Jun

Jiova bin blɛs di fɔstɛm Kristian dɛn bikɔs dɛn bin ajɔst we tin bin chenj. Bɔku tɛm dɛn bin de mek dɛn sɔfa di tɛm we dɛn nɔ bin de ɛkspɛkt. Tink bɔt wetin bin apin to Banabas ɛn apɔsul Pɔl we dɛn bin de prich na wan eria na Listra. Fɔs, di pipul dɛn bin wɛlkɔm dɛn ɛn lisin to dɛn. Bɔt leta, pipul dɛn we de agens Pɔl ɛn Banabas bin “put wɔd na di krawd dɛn yes,” ɛn sɔm pan dɛn sem pipul dɛn de bin ston Pɔl ɛn lɛf am fɔ mek i day. (Akt 14:19) Bɔt Banabas ɛn Pɔl bin kɔntinyu fɔ prich ɔdasay dɛn. Wetin na bin di rizɔlt? Dɛn bin mek “bɔku disaypul dɛn,” ɛn di tin dɛn we dɛn bin de tɔk ɛn dɛn ɛgzampul bin ɛp dɛn kɔmpin Kristian dɛn fɔ tinap tranga wan. (Akt 14:21, 22.) Bɔku pipul dɛn bin bɛnifit bikɔs Banabas ɛn Pɔl nɔ bin giv-ɔp we dɛn bin de mek dɛn sɔfa di tɛm we dɛn nɔ bin de ɛkspɛkt. If wi nɔ giv-ɔp fɔ du di wok we Jiova dɔn tɛl wi fɔ du, i go blɛs wi. w23.04 16-17 ¶13-14

Frɔm we Kiŋ Devid bin smɔl, i bin gɛt bɔku bad bad ɛnimi dɛn, ɛn bɔku tɛm i bin de pre to Jiova fɔ mek i ɛp am. Devid bin shɔ se Jiova de yɛri ɛn ansa in prea dɛn. Yusɛf go ebul fɔ gɛt da sem kɔnfidɛns de. Di Baybul de ɛp wi fɔ no se Jiova go gi wi di sɛns ɛn trɛnk we wi nid fɔ bia. I go yuz wi brɔda ɛn sista dɛn ɔ ivin di wan dɛn we nɔ de sav am rayt naw fɔ ɛp wi sɔm we dɛn. Na tru se sɔntɛm Jiova nɔ go ansa wi prea dɛn di we aw wi de ɛkspɛkt ɔltɛm, bɔt wi no se i go ansa dɛn. I go gi wi wetin wi nid di rayt tɛm we wi nid am. So kɔntinyu fɔ pre ɛn gɛt fet se Jiova go yɛri yu. Biliv tranga wan se Jiova go kia fɔ yu naw ɛn i go “satisfay ɔltin we gɛt layf ɛn . . . gi dɛn wetin dɛn want” na di nyu wɔl we de kam.​—Sam 145:16. w23.05 8 ¶4; 13 ¶17-18

I fayn fɔ pe atɛnshɔn pan di blɛsin dɛn we yu go gɛt we yu ebul fɔ rich yu gol. Us blɛsin dɛn yu fɔ pe atɛnshɔn pan? If yu gol na fɔ du mɔ pan yu Baybul ridin ɔ prea, tink bɔt aw dat go ɛp yu fɔ gɛt tayt padi biznɛs wit Jiova. (Sam 145:18, 19) If yu gol na fɔ gɛt wan Kristian kwaliti, pe atɛnshɔn pan aw dat go ɛp yu fɔ gɛt tayt padi biznɛs wit ɔda pipul dɛn. (Kol. 3:14) Yu nɔ tink se i go fayn fɔ mek list ɛn put ɔl di rizin dɛn we mek yu want fɔ rich yu gol? Go de wach da list de ɔltɛm. Dɔn bak, spɛn tɛm wit di wan dɛn we go ɛnkɔrej yu fɔ rich yu gol. (Prɔv. 13:20) Fɔ tɔk tru, wi ɔl gɛt tɛm dɛn we wi nɔ kin rili want fɔ du sɔntin. Fɔ se dat min se wi nɔ go tray fɔ rich wi gol? Nɔ. Wi go stil ebul rich wi gol ivin if wi nɔ gɛt tin we de muv wi fɔ du dat sɔm de dɛn. Fɔ tru, dat nɔto izi tin fɔ du. Bɔt yu go gladi we yu rich yu gol. w23.05 27-28 ¶5-8

We wi no se wi gɛt fɔ ansa fɔ di tin dɛn we wi de disayd fɔ du, dat go mek wi kɔnfɛs wi sin dɛn, kɔrɛkt wi mistek dɛn, ɛn avɔyd fɔ ripit di sem mistek dɛn. We wi du dɛn tin dɛn ya, dat go ɛp wi fɔ kɔntinyu fɔ rɔn di res fɔ layf. If yu bin dɔn disayd fɔ du sɔntin we nɔ rayt, wetin yu go du? Nɔ yuz yu tɛm ɛn trɛnk fɔ tray fɔ pruv se yu bin rayt ɔ bigin fɔ blem ɔda pipul dɛn. Bifo dat, na fɔ gri se yu dɔn mek mistek ɛn du di bɛst tin we yu ebul fɔ du naw. If yu de fil gilti bɔt sɔntin we yu dɔn du we rɔng, na fɔ put yusɛf dɔŋ ɛn pre to Jiova, gri se yu dɔn mek mistek, ɛn aks am fɔ fɔgiv yu. (Sam 25:11; 51:3, 4) Beg di wan dɛn we yu dɔn du bad, ɛn if nid de, na fɔ aks di ɛlda dɛn fɔ ɛp. (Jems 5:14, 15) Lan frɔm yu mistek dɛn, ɛn tray nɔ fɔ ripit dɛn. As yu de du dat, wan dawt nɔ de se Jiova go fɔgiv yu ɛn gi yu di sɔpɔt we yu nid.​—Sam 103:8-13. w23.08 28-29 ¶8-9

Jɛoayda bin ɛp Kiŋ Jɛoash fɔ bi gud pɔsin. Dat bin mek we di kiŋ bin yɔŋ, i bin want fɔ mek Jiova gladi. Bɔt afta Jɛoayda day, Jɛoash bin de lisin to prins dɛn we bin de tɔk lay lay tin dɛn bɔt Jiova. (2 Kro. 24:4, 17, 18) Pan ɔl we Jiova in at bin rili pwɛl bikɔs ɔf dat, i kɔntinyu fɔ “sɛn prɔfɛt dɛn to dɛm fɔ briŋ dɛn kam bak . . . , bɔt dɛn nɔ bin stil lisin.” Dɛn nɔ bin ivin lisin to Jɛoayda in bɔypikin Zɛkaraya, we nɔto bin jɔs Jiova in prɔfɛt ɛn prist bɔt na bin Jɛoash in kɔzin bak. Infakt, Kiŋ Jɛoash bin ivin mek dɛn kil Zɛkaraya. (2 Kro. 22:11; 24:19-22) Jɛoash nɔ bin kɔntinyu fɔ fred Jiova di rayt we. Jiova bin dɔn tɔk se: “Di wan dɛn we de fityay mi, dɛn go fityay dɛn.” (1 Sam. 2:30) Leta, Sirian sojaman dɛn we nɔ bin bɔku bin win Jɛoash in “big big ami” pan fɛt ɛn “wund [Jɛoash] bad bad wan.” (2 Kro. 24:24, 25) Jɛoash in yon savant dɛn bin kil am fɔ we i kil Zɛkaraya. w23.06 18-19 ¶16-17

Pɔl bin spɛn bɔku tɛm na Ɛfisɔs fɔ prich ɛn tich di gud nyuz. (Akt 19:1, 8-10; 20:20, 21) I bin rili lɛk in brɔda dɛn ɛn i bin want fɔ ɛp dɛn fɔ kɔntinyu fɔ sav Jiova fetful wan. Bifo di pipul dɛn na Ɛfisɔs lan bɔt di trut ɛn kam fɔ bi Kristian, dɛn bin biliv tin dɛn we lay lay rilijɔn de tich ɛn majik. Ɔlman bin sabi di pipul dɛn we bin de na Ɛfisɔs as pipul dɛn we bin de liv fri layf ɛn we bin de du tin dɛn we de sho se dɛn nɔ gɛt wan shem ɔ rɛspɛkt. Bɔku tɛm, di drama dɛn we dɛn bin de akt ɛn dɛn sɛlibreshɔn dɛn bin jɔs de bɔt mami ɛn dadi biznɛs. (Ɛfi. 5:3) Bɔku pan dɛn “nɔ de fil bad igen we dɛn du bad tin.” Di orijinal minin fɔ dɛn wɔd dɛn ya min we “pɔsin nɔ de fil pen igen.” (Ɛfi. 4:17-19) Bifo di pipul dɛn na Ɛfisɔs lan bɔt wetin rayt ɛn rɔng, dɛn kɔnshɛns nɔ bin de kɔndɛm dɛn fɔ di rɔng tin dɛn we dɛn bin de du. Na dat mek Pɔl se, i bin tan lɛk “dɛn maynd de insay daknɛs, ɛn dɛn de fa frɔm di layf we de kɔmɔt to Gɔd.” Bɔt sɔm pan di pipul dɛn na Ɛfisɔs nɔ bin kɔntinyu fɔ de na daknɛs. w24.03 20 ¶2, 4; 21 ¶5-6

Gidiɔn bin nid fɔ wok tranga wan fɔ bi jɔj. We di Midianayt dɛn bin rɔnawe di nɛt we dɛn bin de fɛt, Gidiɔn bin rɔnata dɛn frɔm di Vali we de na Jezriɛl te to di Jɔdan Riva. (Jɔj 7:22) Fɔ se Gidiɔn bin stɔp na di Jɔdan Riva? Nɔ! Pan ɔl we i bin taya, in ɛn in 300 man dɛn bin krɔs di riva ɛn kɔntinyu fɔ rɔnata di Midianayt dɛn. Faynali, dɛn bin kech di Midianayt dɛn ɛn kil dɛn. (Jɔj 8:4-12) Gidiɔn bin biliv se Jiova go gi am trɛnk, ɛn Jiova bin du dat. (Jɔj 6:14, 34) Wantɛm, Gidiɔn ɛn in man dɛn bin de rɔnata tu Midianayt kiŋ dɛn, ɛn i go bi se di kiŋ dɛn bin de rayd kamɛl dɛn. (Jɔj 8:12, 21) Bɔt Jiova bin ɛp di Izrɛlayt dɛn fɔ kech dɛn ɛn win di fɛt. Ɛlda dɛnsɛf kin abop pan Jiova bikɔs “i nɔ de wik [ɛn] i nɔ de taya.” I go gi dɛn trɛnk we dɛn nid am.​—Ayz 40:28, 29. w23.06 6 ¶14, 16

Wisɛf go ebul fɔ mekɔp wi maynd ilɛk us prɔblɛm dɛn mit wi. So biliv Jiova. Tink bɔt aw Berak bin ebul fɔ go bifo bikɔs i bin biliv di tin dɛn we Jiova se. Di Izrɛlayt dɛn nɔ bin rɛdi fɔ fɛt wɔ; dɛn nɔ bin ivin gɛt wɛpɔn dɛn. Bɔt Jiova bin tɛl Berak fɔ go ɛn fɛt agens di Kenanayt chif we na Sisera ɛn in sojaman dɛn, we bin gɛt bɔku wɛpɔn dɛn. (Jɔj 5:8) Di uman prɔfɛt we na Dɛbora bin tɛl Berak fɔ go dɔŋ na di lɛvul grɔn fɔ go mit Sisera ɛn in 900 chariɔt dɛn. Pan ɔl we i nɔ go izi fɔ lɛ di Izrɛlayt dɛn fɛt agens di chariɔt dɛn we fast na di lɛvul grɔn, Berak bin obe. As di sojaman dɛn de rɔndɔŋ Mawnt Tebɔ, Jiova bin mek ebi ebi ren fɔdɔm. Sisera in chariɔt dɛn bin fasin na di pɔtɔ pɔtɔ, ɛn Jiova bin mek Berak win di fɛt. (Jɔj 4:1-7, 10, 13-16) Semweso, Jiova go mek wi win if wi biliv am ɛn biliv di tin dɛn we i de yuz in ɔganayzeshɔn fɔ tɛl wi. w23.07 19 ¶17-18

We wi bi pɔsin we de peshɛnt, dat go mek wi gɛt layf we go de sote go. Lɛk di fetful savant dɛn we bin de trade, wisɛf nid fɔ peshɛnt wet fɔ lɛ Gɔd du ɔl di tin dɛn we i dɔn prɔmis. (Ibru. 6:11, 12) Di Baybul kɔmpia wi to fama. (Jems 5:7, 8.) Fama kin wok tranga wan fɔ plant ɛn wata di tin dɛn we i dɔn plant, bɔt i nɔ kin no di patikyula tɛm we dɛn go gro. So di fama kin peshɛnt wet ɛn biliv se i go avɛst di tin dɛn we i dɔn plant. Semweso, wi de wok tranga wan fɔ bi Krays in disaypul dɛn pan ɔl we wi “nɔ no di de we [wi] Masta de kam.” (Mat. 24:42) Wi de peshɛnt wet ɛn biliv se we di rayt tɛm rich, Jiova go du ɔl di tin dɛn we i dɔn prɔmis. If wi stɔp fɔ bi pɔsin we de peshɛnt, wi go taya fɔ wet ɛn smɔl smɔl, wi go lɛf Jiova. Wi go ivin bigin fɔ pe atɛnshɔn pan tin dɛn we wi tink se go mek wi gɛt gladi-at naw. Bɔt if wi kɔntinyu fɔ peshɛnt, wi go bia te di ɛnd kam ɛn wi go sev.​—Mayk. 7:7. w23.08 22 ¶7

We wi kɔmpia di prɔfɛsi na Daniɛl 2:41-43 wit ɔda wan dɛn na di Baybul buk dɛn we nem Daniɛl ɛn Rɛvɛleshɔn, wi dɔn kam fɔ ɔndastand se di fut dɛn tinap fɔ Amɛrika ɛn Briten we de wok togɛda, ɛn dɛn gɛt pawa pas ɛni ɔda gɔvmɛnt insay wi tɛm. We Daniɛl bin de tɔk bɔt dis wɔl pawa, i bin se “sɔm pat dɛn na di kiŋdɔm go strɔng ɛn sɔm pat go wik.” Wetin mek sɔm pat dɛn go wik? Na bikɔs di kɔmɔn pipul dɛn, we tinap fɔ di sɔft kle, de mek dɛn nɔ ebul fɔ du tin dɛn we de sho se dɛn strɔng lɛk ayɛn. Wi lan sɔm tru tin dɛn we impɔtant frɔm di imej we Daniɛl bin tɔk bɔt. Fɔs, di Anglo-Amɛrikan Wɔl Pawa dɔn sho se dɛn gɛt trɛnk we i kam to sɔm tin dɛn. Fɔ ɛgzampul, Amɛrika ɛn Briten bin de pan di neshɔn dɛn we bin win Wɔl Wɔ I ɛn Wɔl Wɔ II. Bɔt dis wɔl pawa dɔn wik ɛn dɛn go kɔntinyu fɔ wik bikɔs dɛn sitizin dɛn de fɛt agens dɛnsɛf ɛn di gɔvmɛnt. Sɛkɔn, dis wɔl pawa go bi di las wɔl pawa we go rul bifo Gɔd in Kiŋdɔm dɔnawe wit ɔl mɔtalman kiŋdɔm dɛn. w23.08 10-11 ¶12-13

Tɛm dɛn de we Devid in at bin rili pwɛl bikɔs ɔf di prɔblɛm dɛn we bin de mit am. (Sam 18:4, 5) Bɔt Jiova in lɔv ɛn di we aw i bin de kia fɔ am bin mek i fil fayn. Jiova bin de kɛr Devid go “usay i nɔ go yagba fɔ natin” ɛn “usay i go gɛt kolat.” Bikɔs ɔf dis, Devid bin kɔntinyu fɔ gɛt trɛnk ɛn i bin ebul fɔ kɔntinyu fɔ sav Jiova wit gladi-at. (Sam 18:28-32; 23:2) Tide bak, “na bikɔs Jiova gɛt lɔv we nɔ de chenj, na dat mek wi nɔ day yet” we prɔblɛm dɛn mit wi. (Lam. 3:22; Kol. 1:11) Devid in layf bin de pan denja bɔku tɛm, ɛn i bin gɛt bɔku pawaful ɛnimi dɛn. Bɔt di lɔv we Jiova gɛt fɔ am bin mek i fil sef. Devid bin de si se Jiova de wit am ɔltɛm, ɛn dat bin de mek i fil fayn. So na dat mek i bin siŋ se: “[Jiova] pul di fred kɔmɔt pan mi.” (Sam 34:4) Pan ɔl we sɔntɛnde Devid bin de fred, i bin lɛf fɔ fred bikɔs i bin no se Jiova lɛk am. w24.01 30 ¶15-17

Lan frɔm di bad tin dɛn we Jɛoash bin disayd fɔ du. Afta Ay Prist Jɛoayda day, Jɛoash bin pik bad padi dɛn. (2 Kro. 24:17, 18.) I bin disayd fɔ lisin to di prins dɛn na Juda we nɔ bin lɛk Jiova. Yu go mɔs gri se Jɛoash bin fɔ dɔn avɔyd dɛn bikɔs dɛn bin de du bad tin dɛn. Bifo dat, i bin lisin to dɛn advays. Infakt, we Jɛoash in kɔzin Zɛkaraya bin tray fɔ kɔrɛkt am, Jɛoash bin mek dɛn kil am. (2 Kro. 24:20, 21; Mat. 23:35) Dis tin we Jɛoash du bin rili bad ɛn i nɔ mek sɛns atɔl! I bin bigin in layf fayn, bɔt i sɔri fɔ no se i bin tɔn apɔstet ɛn kil. Faynali, in yon savant dɛn bin kil am. (2 Kro. 24:22-25) Dis nɔ bin fɔ dɔn apin to am if i bin kɔntinyu fɔ lisin to Jiova ɛn di wan dɛn we lɛk Jiova. w23.09 9 ¶6

Jizɔs bin no se apɔsul Pita go ebul fɔ kɔntinyu fɔ fetful. So Jizɔs bin tɔk to Pita fayn ɛn tɛl am mek i “lɛf fɔ fred.” Di kɔnfidɛns we Jizɔs bin gɛt pan Pita bin chenj Pita in layf. Pita ɛn in brɔda Andru bin leta lɛf dɛn fishin wok ɛn jɔyn Jizɔs fɔ du di prichin wok. Dɔn Jiova bin blɛs dɛn bɔku we dɛn. (Mak 1:16-18) Pita bin gɛt bɔku wɔndaful ɛkspiriɛns dɛn we i bin de fala Krays. I bin si we Jizɔs de mɛn pipul dɛn we sik, pul dimɔn dɛn, ɛn ivin gi layf bak to di wan dɛn we bin dɔn day. (Mat. 8:14-17; Mak 5:37, 41, 42) Pita bin si bak wan vishɔn we sho aw Jizɔs go bi Kiŋ na Gɔd in Kiŋdɔm. Pita nɔ bin ɛva fɔgɛt da vishɔn de. (Mak 9:1-8; 2 Pit. 1:16-18) Fɔ tru, Pita bin si tin dɛn we i nɔ bin de ɛva ɛkspɛkt. I go bi se Pita bin rili gladi bikɔs i nɔ alaw di bad we aw i bin de fil bɔt insɛf fɔ mek i nɔ gɛt dɛn blɛsin dɛn de! w23.09 21 ¶4-5

Insay apɔsul Pita in fɔs lɛta, i bin yuz di sem wɔd dɛn “rili lɛk.” Da kayn lɔv de nɔ jɔs de kɔba smɔl sin dɛn, bɔt i de “kɔba bɔku bɔku sin dɛn.” (1 Pit. 4:8) Sɔntɛm Pita bin mɛmba di lɛsin bɔt fɔgivnɛs we Jizɔs bin tich am bifo dis tɛm. Da tɛm de, i go bi se Pita bin biliv se in na pɔsin we rili gud we i bin tɔk se i go fɔgiv in brɔda “sɛvin tɛm.” Bɔt Jizɔs bin tich am ɛn wi bak tide fɔ fɔgiv “77 tɛm,” we min se wi nɔ fɔ stɔp fɔ fɔgiv ɔda pipul dɛn. (Mat. 18:21) If i nɔ izi fɔ yu fɔ fala dis advays, nɔ pwɛlat! Sɔntɛnde, i nɔ kin izi fɔ ɔl Jiova in savant dɛn we nɔ pafɛkt fɔ fɔgiv. Di tin we impɔtant naw na fɔ du ɔl wetin yu ebul fɔ fɔgiv yu brɔda ɔ sista ɛn mek pis wit am. w23.09 29 ¶12

We i de insay di big big fish in bɛlɛ, i bin ripɛnt ɛn i bin gɛt fet se Jiova go lisin to in prea ɛn ɛp am. Leta, Jona bin go bak na dray land, ɛn i bin rɛdi fɔ du wetin Jiova tɛl am fɔ du. (Jona 2:10–3:4) We prɔblɛm dɛn kin mit yu, yu kin wɔri te yu nɔ ebul fɔ pre? Ɔ yu kin taya fɔ stɔdi? Mɛmba se Jiova ɔndastand gud gud wan wetin de apin to yu. So ivin we yu pre to am shɔt wan, gɛt kɔnfidɛns se i go gi yu di rayt tin we yu nid. (Ɛfi. 3:20) If i nɔ izi fɔ mek yu rid ɛn stɔdi di Baybul bikɔs yu sik, yu taya, ɔ yu at rili pwɛl, yu kin lisin to di odio Baybul ridin ɔ di odio rɛkɔdin fɔ wan pan wi pɔblikeshɔn dɛn. Yu kin lisin bak to wan pan wi siŋ dɛn ɔ wach vidio na jw.org. We yu de pre to Jiova ɛn luk fɔ we dɛn we i de ansa yu prea na di Baybul ɛn ɔl di ɔda tin dɛn we i de gi, dat go mek yu gɛt trɛnk. w23.10 13 ¶6; 14 ¶9

Di tabanakul ɛn di tɛmpul dɛn we dɛn bin leta bil na Jerusalɛm bin gɛt di sem tin dɛn insay. Dɛn bin gɛt tu rum dɛn, we na “di Ples we Oli” ɛn “di Ples we Oli Pas Ɔl,” we bin gɛt kɔtin bitwin dɛn. (Ibru. 9:2-5; Ɛks. 26:31-33) Di Ples we Oli bin gɛt stand we dɛn kin put lamp we dɛn mek wit gold, ɔlta fɔ bɔn insɛns, ɛn wan tebul fɔ put di shobred. Na di prist dɛn nɔmɔ we dɛn “anɔynt” dɛn bin de alaw fɔ go insay di Ples we Oli fɔ go du dɛn wok dɛn as prist. (Nɔm. 3:3, 7, 10) Di Ples we Oli Pas Ɔl bin gɛt di agrimɛnt bɔks we dɛn mek wit gold we de sho se Jiova de wit in pipul dɛn. (Ɛks. 25:21, 22) Na di ay prist nɔmɔ dɛn bin de alaw fɔ go insay di Ples we Oli Pas Ɔl wantɛm insay di ia, dat na di De fɔ Fɔgiv Sin. (Lɛv. 16:2, 17) I bin de go wit animal in blɔd fɔ mek Jiova fɔgiv in yon sin dɛn ɛn di wan ol neshɔn. As tɛm de go, Jiova bin mek dɛn no klia wan wetin dɛn difrɛn tin dɛn ya na di tabanakul tinap fɔ.​—Ibru. 9:6, 7. w23.10 27 ¶12

Di lɔ we se wi fɔ “lɛk [wi] kɔmpin dɛn” de bɔku say na Gɔd in Wɔd. (Jɔn 15:12; Rom. 13:8; 1 Tɛs. 4:9; 1 Pit. 1:22; 1 Jɔn 4:11) Bɔt lɔv na kwaliti we de insay wi at, ɛn no mɔtalman nɔ ebul fɔ si wi at. So aw wi go ebul mek ɔda pipul dɛn no se wi lɛk dɛn? Na bay wetin wi de tɔk ɛn di tin dɛn we wi de du. Bɔku we dɛn de we wi go sho wi brɔda ɛn sista dɛn se wi lɛk dɛn. Lɛ wi tɔk bɔt sɔm ɛgzampul dɛn: “Una fɔ tɔk tru to una kɔmpin dɛn.” (Zɛk. 8:16) “Una . . . fɔ gɛt wanwɔd.” (Mak 9:50) “Na una fɔs fɔ sho ɔnɔ to una kɔmpin dɛn.” (Rom. 12:10) “Una wɛlkɔm una kɔmpin dɛn.” (Rom. 15:7) “Una kɔntinyu fɔ . . . fɔgiv” una kɔmpin dɛn. (Kol. 3:13) “Una kɔntinyu fɔ ɛp una kɔmpin dɛn wit dɛn ɛvi lod dɛn.” (Gal. 6:2) “Una go de kɔrej una kɔmpin dɛn.” (1 Tɛs. 4:18) “Una kɔntinyu fɔ . . . ɛp una kɔmpin dɛn fɔ tinap tranga wan.” (1 Tɛs. 5:11) “Una pre fɔ una kɔmpin dɛn.”​—Jems 5:16. w23.11 9 ¶7-8

Ɛvride, tin dɛn de we wi de disayd fɔ du we mek wi nid strɔng fet. Fɔ ɛgzampul, wi kin disayd fɔ du tin dɛn we gɛt fɔ du wit udat dɛn wi fɔ gɛt as padi, tin dɛn fɔ ɛnjɔy wisɛf, fɔ lan buk, udat wi fɔ mared, fɔ bɔn pikin, ɛn us wok fɔ du. I fayn fɔ mek wi aks wisɛf, ‘Di tin dɛn we a de disayd fɔ du de sho se a biliv tranga wan se i nɔ go te igen dis wɔl go dɔn ɛn wi go gɛt Gɔd in nyu wɔl? Ɔ a de disayd fɔ du di sem tin dɛn we pipul dɛn we nɔ biliv se dɛn go ebul de sote go de du?’ (Mat. 6:19, 20; Lyuk 12:16-21) Wi go disayd fɔ du di bɛst tin dɛn if wi gɛt mɔ fet se di nyu wɔl de kam jisnɔ. Prɔblɛm dɛn kin mit wi bak we mek wi nid fɔ gɛt strɔng fet. Sɔntɛm, pipul dɛn go mek wi sɔfa, wi go gɛt siriɔs wɛlbɔdi prɔblɛm, ɔ ɔda tin dɛn we go mek wi at pwɛl. Fɔs, sɔntɛm wi go fil se wi ebul fɔ bia wi prɔblɛm. Bɔt bɔku tɛm, dɛn kayn prɔblɛm dɛn ya kin de fɔ lɔng tɛm, so wi go nid strɔng fet fɔ mek wi ebul bia ɛn kɔntinyu fɔ sav Jiova wit gladi-at.​—1 Pit. 1:6, 7. w23.04 27 ¶4-5

Jiova de ɛkspɛkt wi fɔ du sɔntin we gri wit wi prea dɛn. Fɔ ɛgzampul, sɔntɛm wan brɔda go pre to Jiova fɔ mek i ɛp am so dat i go tɔk to in bɔsman na in wokples fɔ mek i go alaw am fɔ atɛnd di kɔnvɛnshɔn. Aw Jiova de ansa da kayn prea de? Sɔntɛm i go mek di brɔda gɛt maynd fɔ tɔk to in bɔsman. Bɔt di brɔda go stil nid fɔ go to in bɔs ɛn tɔk to am. Sɔntɛm i go nid fɔ tɔk am bɔku tɛm. I go ivin nid fɔ tɔk to wan pan in wokmet dɛn fɔ wok fɔ am da de de, dɔn i go wok fɔ in wokmet ɔda tɛm ɔ sɔntɛm i go se mek dɛn nɔ pe am fɔ di de we i nɔ de wok. Jiova de ɛkspɛkt wi fɔ kɔntinyu fɔ pre to am bɔt di tin dɛn we impɔtant to wi. Frɔm wetin Jizɔs bin tɔk, Jiova nɔ go gi wi di tin dɛn we wi de pre to am fɔ wantɛm wantɛm. (Lyuk 11:9) So nɔ giv-ɔp! Pre wit ɔl yu at ɛn nɔ taya fɔ pre. (Lyuk 18:1-7) We wi du dat, wi de sho Jiova se da tin de rili impɔtant to wi. Dɔn bak, wi de sho am se wi gɛt fet se i ebul fɔ ɛp wi. w23.11 22 ¶10-11

Jiova bin prɔmis in padi Ebraam se i go gɛt bɔypikin ɛn ɔl di neshɔn dɛn na di wɔl go gɛt blɛsin bikɔs ɔf am. (Jɛn. 15:5; 22:18) Bikɔs Ebraam bin rili gɛt fet pan Gɔd, i bin biliv tranga wan se Gɔd in prɔmis go mɔs kam tru. Bɔt, we Ebraam bin ol 100 ia ɛn in wɛf bin ol 90 ia, dɛn stil nɔ bin gɛt pikin. (Jɛn. 21:1-7) Bɔt di Baybul se, “di op we [Ebraam] bin gɛt mek i gɛt fet se i go bi papa fɔ bɔku neshɔn dɛn, jɔs lɛk aw dɛn bin dɔn se.” (Rom. 4:18) Ɛn Ebraam bin gɛt wetin i bin op fɔ. I bi papa to di pikin we i bin de wet fɔ, we na Ayzak. Wetin mek Ebraam bin biliv tranga wan se Jiova go du wetin i dɔn prɔmis? Bikɔs Ebraam bin rili sabi Jiova, “i bin rili biliv se Gɔd ebul fɔ du wetin i dɔn prɔmis.” (Rom. 4:21) Jiova bin gladi fɔ Ebraam, ɛn bikɔs Ebraam bin gɛt fet pan Jiova, dat bin mek i si am as pɔsin we de du wetin rayt.​—Jems 2:23. w23.12 8 ¶1-2

Yɔŋ brɔda we ɔda pipul dɛn kin abop pan go tray tranga wan fɔ du ɔl in wok dɛn. Tink bɔt Jizɔs in pafɛkt ɛgzampul. In nɔto pɔsin we nɔ bin de tek in wok siriɔs. I bin du di wok dɛn we Jiova bin gi am ivin we i nɔ bin izi fɔ am fɔ du dɛn. I bin lɛk pipul dɛn, mɔ in disaypul dɛn ɛn i bin rɛdi fɔ gi in layf fɔ dɛn. (Jɔn 13:1) Fɔ falamakata Jizɔs, tray tranga wan fɔ du ɛni wok we dɛn gi yu. Put yusɛf dɔŋ ɛn aks machɔ brɔda dɛn fɔ ɛp yu if yu nɔ shɔ bɔt aw fɔ du am. Nɔ jɔs du af ɛn lɛf af. (Rom. 1211) Bifo dat, dɔn di wok we dɛn gi yu fɔ du, du am “lɛk se na fɔ Jiova [yu] de du am, ɛn nɔto fɔ mɔtalman.” (Kol. 3:23) Yu nɔ pafɛkt, so put yusɛf dɔŋ ɛn gri fɔ tek di blem fɔ ɛni mistek we yu mek.​—Prɔv. 11:2. w23.12 26 ¶8

Wi kin gladi we wi baptayz ɛn de pat pan Jiova in famili. Di wan dɛn we gɛt di ɔnɔ fɔ gɛt tayt padi biznɛs wit Jiova go gri wit wetin Devid we na wan pan di man dɛn we rayt di sam buk tɔk, we i se: “Di wan we yu [Jiova] pik ɛn drɔ nia yu go gladi fɔ de nia yu kɔmpawn dɛn.”—Sam 65:4. Jiova nɔ jɔs de briŋ ɛni kayn pɔsin na in kɔmpawn. I kin disayd fɔ kam nia pipul dɛn we dɔn sho se dɛn want fɔ gɛt tayt padi biznɛs wit am. (Jems 4:8) We yu gi yu layf to Jiova ɛn baptayz, yu kin biliv se i go mek “blɛsin kam pan [yu] lɛk flɔd te [yu] nɔ want natin igen.”—Mal. 3:10; Jɛr. 17:8. Fɔ baptayz na wan pan di fɔs tin dɛn we yu nid fɔ du fɔ bigin sav Jiova. Afta yu dɔn baptayz, yu go want fɔ du yu bɛst fɔ kip di prɔmis we yu dɔn mek fɔ sav Jiova ɛn kɔntinyu fɔ fetful to am, ivin we sɔntin tɛmt yu ɔ we yu de gɛt prɔblɛm dɛn. (Ɛkli. 5:4, 5) As wan pan Jizɔs in disaypul dɛn, yu go fala in ɛgzampul ɛn obe ɔl di tin dɛn we i tɛl wi fɔ du?​—Mat. 28:19, 20; 1 Pit. 2:21. w24.03 8 ¶1-3

Wetin yu go du if yu ɛn yu wɛf nɔ de ɛnjɔy fɔ spɛn tɛm togɛda? Wetin una go du? Tink bɔt bɔnfaya. I nɔ de bigin fɔ blez wantɛm wantɛm. Dɛn fɔ de put big wud dɛn pan di faya smɔl smɔl. Semweso, una kin bigin fɔ spɛn smɔl tɛm togɛda ɛvride. Una mek shɔ se una du tin we una ɔl tu go ɛnjɔy. (Jems 3:18) We una bigin fɔ spɛn smɔl tɛm, una go bigin fɔ lɛk unasɛf bak mɔ ɛn mɔ. Rɛspɛkt rili impɔtant insay mared. I tan lɛk ɔksijɛn we de alaw bɔnfaya fɔ kech brayt wan. If ɔksijɛn nɔ de, faya de ɔt kwik. Semweso, if maredman ɛn in wɛf nɔ gɛt rɛspɛkt fɔ dɛnsɛf, i go izi fɔ mek dɛn nɔ lɛk dɛnsɛf. Bɔt maredman ɛn in wɛf we de tray tranga wan fɔ sho rɛspɛkt fɔ dɛnsɛf, go kɔntinyu fɔ lɛk dɛnsɛf. Bɔt, mɛmba se, nɔto yu fɔ tink se yu de sho rɛspɛkt, bɔt na yu man ɔ wɛf fɔ fil se yu de rɛspɛkt am. w23.05 22 ¶9; 24 ¶14-15

Insay di Baybul, Gɔd in fetful savant dɛn bin tɔk bɔt tɛm dɛn we dɛn at bin rili pwɛl ɛn we dɛn bin de trimbul bikɔs dɛn ɛnimi ɔ ɔda tin dɛn bin de prɛzhɔ dɛn. (Sam 18:4; 55:1, 5) Semweso, pipul dɛn go de agens wi na skul, wokples, na wi famili, ɔ ivin di gɔvmɛnt go de agens wi. Sɔntɛm wi go fred se wi go day bikɔs ɔf wɛlbɔdi prɔblɛm. Dɛn tɛm dɛn de, sɔntɛm wi go fil se wi nɔ ebul fɔ du natin jɔs lɛk smɔl pikin. Aw Jiova de ɛp wi dɛn tɛm dɛn de? I de kɔrej wi ɛn mek wi fil fayn. So tray fɔ de spɛn tɛm wit Jiova ɔltɛm bay we yu de pre to am ɛn rid in Wɔd. (Sam 77:1, 12-14) Dat go mek ɛnitɛm we yu strɛs, di fɔs tin we yu go du, na fɔ pre to yu Papa we de na ɛvin. Tɛl Jiova wetin mek yu de fred ɛn wetin mek yu de wɔri. Dɔn, lisin to am bay we yu de rid in Wɔd, ɛn yu go si aw i de kɔrej yu.​—Sam 119:28. w24.01 24-25 ¶14-16

I rili impɔtant fɔ gɛt sɔntin we go muv yu fɔ rich yu gol dɛn. We pɔsin gɛt sɔntin we go muv am fɔ du mɔ, dat go mek i rili want fɔ wok tranga wan fɔ rich in gol. Ɛn di mɔ wi gɛt tin we de muv wi fɔ du sɔntin, na di mɔ i go pɔsibul fɔ rich wi gol dɛn. So, wetin yu go du fɔ mek yu rili want fɔ du mɔ? Pre fɔ mek yu gɛt sɔntin we go muv yu mɔ ɛn mɔ. Jiova go yuz in spirit fɔ muv yu fɔ rich yu gol. Sɔntɛnde, wi kin sɛt gol bikɔs wi no se wi fɔ du dat, ɛn dat na gud tin. Bɔt sɔntɛm wi nɔ kin rili want fɔ rich am. Tink gud wan bɔt wetin Jiova dɔn du fɔ yu. (Sam 143:5) Apɔsul Pɔl bin tink gud wan bɔt di spɛshal gudnɛs we Jiova bin sho am, ɛn dat bin muv am fɔ wok tranga wan fɔ Jiova. (1 Kɔr. 15:9, 10; 1 Tim. 1:12-14) Semweso, di mɔ yu tink bɔt wetin Jiova dɔn du fɔ yu, na di mɔ yu go rili want fɔ rich yu gol.​—Sam 116:12. w23.05 27 ¶3-5

Wi kin mek wi Papa we de na ɛvin gladi we wi de prez in nem. (Sam 119:108) Bɔt fɔ se dis min se di ɔlmayti Gɔd tan lɛk mɔtalman dɛn we nɔ pafɛkt we kin want fɔ mek dɛn prez dɛn bikɔs dɛn want fɔ fil gud bɔt dɛnsɛf? Nɔ. We wi de prez wi Papa we de na ɛvin, wi de ɛp fɔ pruv se wetin Setan tɔk bɔt wi na lay. Setan tɔk se no mɔtalman nɔ go ebul kɔntinyu fɔ tinap tranga wan fɔ Gɔd in nem. I tɔk se no mɔtalman nɔ go kɔntinyu fɔ sav Jiova fetful wan we sɔntin tɛst am. I se wi ɔl go tɔn wi bak pan Gɔd if wi tink se dat go bɛnifit wi. (Job 1:9-11; 2:4) Bɔt Job we bin fetful bin pruv se Setan na layman. Fɔ se yusɛf go kɔntinyu fɔ fetful to Gɔd? Wi ɔl gɛt di ɔnɔ fɔ tinap tranga wan fɔ wi Papa in nem, ɛn wi go mek i gladi bay we wi de sav am fetful wan. (Prɔv. 27:11) Fɔ tru, na big big ɔnɔ wi gɛt fɔ du dat. w24.02 8-9 ¶3-5

Afta Mozis ɛn Jɔshwa dɛn tɛm, Jiova bin pik jɔj dɛn fɔ gayd in pipul dɛn. Dɔn, insay di tɛm we kiŋ dɛn bin de rul na Izrɛl, Jiova bin pik prɔfɛt dɛn fɔ gayd in pipul dɛn. Di kiŋ dɛn we bin fetful bin fala di advays we di prɔfɛt dɛn bin de gi dɛn. Fɔ ɛgzampul, Kiŋ Devid bin put insɛf dɔŋ ɛn gri fɔ tek di kɔrɛkshɔn we prɔfɛt Netan bin gi am. (2 Sam. 12:7, 13; 1 Kro. 17:3, 4) Kiŋ Jɛoshafat bin abop pan prɔfɛt Jeaziɛl fɔ gayd am, ɛn i bin ɛnkɔrej di pipul dɛn na Juda fɔ “biliv [Gɔd] in prɔfɛt dɛn.” (2 Kro. 20:14, 15) We Kiŋ Ɛzikaya in at bin pwɛl, i bin aks prɔfɛt Ayzaya fɔ ɛp am. (Ayz. 37:1-6) Ɛnitɛm di kiŋ dɛn fala di we aw Jiova de dayrɛkt dɛn, i bin de blɛs dɛn, ɛn i bin de protɛkt di neshɔn. (2 Kro. 20:29, 30; 32:22) Ɔlman bin si se na Jiova de yuz in prɔfɛt dɛn fɔ gayd in pipul dɛn. w24.02 21 ¶8

Setan want lɛ wi de spɛnd tɛm wit pipul dɛn we go mek i nɔ izi fɔ lɛ wi obe Jiova in lɔ dɛn. Wi nid fɔ tek tɛm bikɔs wi nɔ jɔs de spɛn tɛm wit pipul dɛn we wi de si fes-to-fes, bɔt wi de spɛn tɛm bak na soshal midia wit pipul dɛn we wi nɔ de si. Wi nid fɔ tray tranga wan fɔ avɔyd di we aw di wɔl de tink we i kam pan fɔ liv fri layf. Wi no se di we aw dɛn de tink nɔ kɔrɛkt. (Ɛfi. 4:19, 20) I go fayn fɔ mek wi aks wisɛf dɛn kwɛstyɔn dɛn ya: ‘A kin tray tranga wan nɔ fɔ spɛn tumɔs tɛm wit mi wokmet dɛn, klasmet dɛn, ɔ pipul dɛn we nɔ gɛt wan rɛspɛkt fɔ Jiova in lɔ dɛn bɔt wetin rayt ɛn rɔng? A gɛt maynd fɔ fala wetin Jiova se rayt ɔ rɔng pan ɔl we ɔda pipul dɛn go tɔk bad bɔt mi?’ Lɛk aw 2 Timoti 2:20-22 tɔk, sɔntɛm wi go nid bak fɔ tek tɛm pik wi tayt padi dɛn na di kɔngrigeshɔn. Wi fɔ mɛmba se sɔntɛm, sɔm pan dɛn nɔ go ɛp wi fɔ kɔntinyu fɔ sav Jiova fetful wan. w24.03 22-23 ¶11-12

Yu dɔn ɛva tray fɔ tink bɔt aw Jiova tan? Pan ɔl we wi nɔ de si Jiova, di Baybul tɔk bɔt am difrɛn we dɛn. I se Jiova na “san . . . ɛn big shild” ɛn na “faya we de pwɛl kpatakpata.” (Sam 84:11; Ibru. 12:29) Wan pan di man dɛn we rayt di Baybul tɔk se Jiova tan lɛk safaya ston, mɛtal we de shayn, ɛn brayt renbo. (Izi. 1:26-28) Bikɔs wi nɔ de si Jiova, sɔntɛm dat kin mek i nɔ izi fɔ mek wi biliv se i lɛk wi. Sɔm pipul dɛn tink se Jiova nɔ go ɛva lɛk dɛn bikɔs ɔf di bad tin dɛn we bin dɔn apin to dɛn na layf. Jiova ɔndastand aw wi de fil, ɛn i no aw dat kin afɛkt wi. So fɔ ɛp wi, i dɔn sho wi insay in Wɔd sɔm pan di fayn kwaliti dɛn we i gɛt. Di bɛst wɔd we rili sho udat Jiova bi na lɔv. (1 Jɔn 4:8) Gɔd na lɔv. Dis lɔv de afɛkt ɔl wetin i de du. Di lɔv we Gɔd gɛt rili strɔng, na dat mek i nɔ jɔs de sho am to di wan dɛn we lɛk am, bɔt i de sho am bak to di wan dɛn we nɔ lɛk am.​—Mat. 5:44, 45. w24.01 26 ¶1-3

Jiova bin pik Mozis fɔ pul di Izrɛlayt dɛn kɔmɔt na Ijipt ɛn I bin de yuz klawd we tan lɛk pila fɔ lid dɛn santɛm, ɛn na nɛt I bin de yuz faya we tan lɛk pila fɔ mek dɛn si usay dɛn de go. (Ɛks. 13:21) Mozis bin de fala di pila, we bin dayrɛkt in ɛn di Izrɛlayt dɛn fɔ go na di Rɛd Si. Bɔt di Ijipshian dɛn bin de rɔnafta di Izrɛlayt dɛn. So di Izrɛlayt dɛn bin rili fred bikɔs dɛn tink se di Ijipshian dɛn go kil dɛn. Bɔt nɔto bin mistek. Na Jiova bin yuz Mozis fɔ dayrɛkt in pipul dɛn fɔ go na di Rɛd Si. (Ɛks. 14:2) So Gɔd bin sev dɛn di kayn we we dɛn bin rili sɔprayz. (Ɛks. 14:26-28) Fɔti ia afta da tɛm de, Mozis bin kɔntinyu fɔ fala di klawd we tan lɛk pila fɔ dayrɛkt Gɔd in pipul dɛn na di wildanɛs. (Ɛks. 33:7, 9, 10) Na frɔm di pila Jiova bin de tɔk to Mozis, dɔn Mozis bin de tɛl di pipul dɛn wetin Jiova se. Di Izrɛlayt dɛn bin gɛt klia pruf fɔ se na Jiova bin de yuz Mozis fɔ gayd dɛn. w24.02 21 ¶4-5