Abop pan Jiova fɔ Kɔrej Yu

1. Ɛksplen wetin bin de apin to di Ju dɛn we bin de na ɛgzayl.

IMAJIN aw di Ju dɛn we bin de na ɛgzayl na Babilɔn go dɔn fil. Dɛn bin si we dɛn pwɛl dɛn om-tɔŋ. Dɛn bin pul dɛn na dɛn om-tɔŋ ɛn kɛr dɛn go ɔdasay bikɔs ɔf dɛn ɛn dɛn gret granpa dɛn sin dɛn. (2 Kro. 36:15, 16, 20, 21) Na tru se we dɛn bin de na Babilɔn, dɛn bin gɛt fridɔm fɔ du di nɔmal tin dɛn we pipul dɛn kin du ɛvride. (Jɛr. 29:4-7) Bɔt layf nɔ bin izi ɛn nɔto da kayn layf de dɛn bin want. Aw dɛn bin fil bɔt wetin bin de apin to dɛn? Notis wetin wan pan di fetful man dɛn we bin de na ɛgzayl bin tɔk. I se: “Di tɛm we wi sidɔm na di riva dɛn na Babilɔn, wi bin de kray we wi mɛmba Zayɔn.” (Sam 137:1) Di Ju dɛn we bin de na ɛgzayl bin rili nid pɔsin fɔ kɔrej dɛn. Bɔt udat go kɔrej dɛn?

2-3. (a) Wetin Jiova bin du fɔ di Ju dɛn we bin de na ɛgzayl? (b) Wetin wi go tɔk bɔt insay dis atikul?

² Jiova na “di Gɔd we de kɔrej pɔsin pan ɔltin.” (2 Kɔr. 1:3) Bikɔs Gɔd lɛk wi, i kin gladi fɔ kɔrej ɔl di wan dɛn we de kam nia am. Jiova bin no se sɔm pan di Ju dɛn we de na ɛgzayl go gri fɔ tek di kɔrɛkshɔn ɛn kam bak to am. (Ayz. 59:20) Na dat mek Jiova bin yuz prɔfɛt Ayzaya fɔ rayt di buk we gɛt in nem, ɛn i pas 100 ia afta Ayzaya rayt da buk de bifo di Ju dɛn go na ɛgzayl. Wetin bin mek i rayt am? Ayzaya bin rayt se: “Una Gɔd se: ‘Una kɔrej mi pipul dɛn, una kɔrej dɛn.’” (Ayz. 40:1) Jiova bin yuz wetin di prɔfɛt bin rayt fɔ gi di Ju dɛn we bin de na ɛgzayl di kɔrej we dɛn nid.

³ Jɔs lɛk di Ju dɛn we bin de na ɛgzayl, sɔntɛnde wisɛf kin nid pɔsin fɔ kɔrej wi. Insay dis atikul, wi go tɔk bɔt tri we dɛn aw Jiova bin kɔrej di pipul dɛn we bin de na ɛgzayl: (1) I bin prɔmis fɔ fɔgiv di wan dɛn we ripɛnt, (2) i mek in pipul dɛn gɛt op, ɛn (3) i ɛp dɛn nɔ fɔ fred. As wi de tɔk bɔt dɛn pɔynt dɛn ya, notis aw wi go bɛnifit frɔm di fayn wɔd dɛn we Jiova bin tɔk.

JIOVA DE FƆGIV WI

4. Aw Jiova bin sho se in na Gɔd we gɛt sɔri-at? (Ayzaya 55:7)

⁴ Jiova na “di Papa we rili gɛt sɔri-at.” (2 Kɔr. 1:3) I sho da kwaliti de bay we i bin prɔmis fɔ fɔgiv di Ju dɛn na ɛgzayl we ripɛnt. (Rid Ayzaya 55:7.) I bin tɔk se: “Bikɔs a gɛt lɔv we nɔ de chenj sote go, a go sɔri fɔ yu.” (Ayz. 54:8) Aw Jiova go sho in sɔri-at? Pan ɔl we di Ju dɛn go sɔfa bikɔs ɔf di tin dɛn we dɛn bin dɔn du, Jiova bin prɔmis se dɛn nɔ go kɔntinyu fɔ de na Babilɔn sote go. Dɛn go jɔs de na ɛgzayl fɔ sɔm tɛm. (Ayz. 40:2) Dɛn wɔd dɛn ya go mɔs dɔn kɔrej di Ju dɛn we bin ripɛnt ɛn mek dɛn gɛt op.

5. Wetin mek wi gɛt mɔ rizin fɔ valyu Jiova in sɔri-at pas di Ju dɛn we bin de na ɛgzayl?

⁵ Wetin wi lan? Jiova rili rɛdi fɔ fɔgiv in savant dɛn. Tide, wi gɛt mɔ rizin fɔ sho se wi valyu Jiova in sɔri-at pas di Ju dɛn we bin de na ɛgzayl. Wetin mek? Na bikɔs wi no wetin Jiova dɔn du fɔ fɔgiv wi sin dɛn. Afta lɛk 700 ia we Ayzaya tɔk bɔt Jiova in fɔgivnɛs, Jiova bin sɛn in Bɔypikin we i rili lɛk na dis wɔl fɔ gi in layf as prayz fɔ pe fɔ di sin dɛn fɔ ɔl di wan dɛn we dɔn ripɛnt. Na da sakrifays de, de mek Jiova “wep” wi sin dɛn ɔl “kɔmɔt.” (Akt 3:19; Ayz. 1:18; Ɛfi. 1:7) Di Gɔd we wi de sav rili gɛt sɔri-at!

6. Aw wi go bɛnifit we wi pe atɛnshɔn pan Jiova in sɔri-at? (Luk bak di pikchɔ.)

⁶ Di wɔd dɛn we Jiova mek Ayzaya rayt we de na Ayzaya 55:7 go kɔrej wi if wi de rili fil bad fɔ di sin we wi dɔn kɔmit. Sɔm pan wi kin kɔntinyu fɔ fil bad fɔ di sin we wi bin dɔn kɔmit pan ɔl we wi bin dɔn ripɛnt. Sɔntɛm wi go kɔntinyu fɔ fil da we de mɔ if wi stil de sɔfa fɔ di sin we wi bin dɔn kɔmit. Bɔt if wi bin dɔn kɔnfɛs wi sin ɛn lɛf di bad tin we wi bin du, wi gɛt kɔnfidɛns se Jiova dɔn fɔgiv wi. Ɛn we Jiova dɔn fɔgiv, i de disayd nɔ fɔ mɛmba wi sin. (Luk bak Jɛrimaya 31:34.) So if Jiova nɔ de mɛmba di sin dɛn we wi bin dɔn kɔmit, wisɛf nɔ fɔ mɛmba dɛn. Wetin impɔtant to Jiova na wetin wi de du naw, nɔto di sin dɛn we wi bin dɔn kɔmit. (Izi. 33:14-16) Ɛn i nɔ go te igen, wi Papa we rili gɛt sɔri-at go mek wi fri sote go frɔm di bad tin dɛn we de apin to wi bikɔs ɔf wi sin dɛn.

7. Wetin go mek wi tɔk to di ɛlda dɛn if wi bin dɔn kɔmɔt siriɔs sin ɛn ayd am?

⁷ Wetin wi fɔ du if wi kɔnshɛns de mɔna wi bikɔs wi de ayd siriɔs sin we wi dɔn kɔmit? Di Baybul ɛnkɔrej wi fɔ tɔk to di ɛlda dɛn fɔ ɛp wi. (Jems 5:14, 15) Bɔt sɔntɛm i nɔ go izi fɔ mek wi tɔk bɔt di bad tin we wi dɔn du. Bɔt wi go rɛdi fɔ tɔk to dɛn fetful man dɛn ya if wi dɔn ripɛnt wit ɔl wi at, ɛn mɛmba se Jiova ɛn di wan dɛn we i dɔn pik fɔ ɛp wi, lɛk wi ɛn dɛn go sɔri fɔ wi. Lɛ wi tɔk bɔt aw Jiova in sɔri-at bin kɔrej wan brɔda we nem Atɔ,a we in kɔnshɛns bin de rili mɔna am. Atɔ tɔk se, “A bin de wach rud rud pikchɔ ɛn fim dɛn fɔ wan ia. Bɔt afta a yɛri wan tɔk bɔt di kɔnshɛns, a kɔnfɛs mi sin to mi wɛf ɛn di ɛlda dɛn. Afta a du dat, mi at bin kol, bɔt a bin de stil fil bad fɔ wetin a du. Di ɛlda dɛn mɛmba mi se Jiova stil want mi fɔ bi in padi. I de kɔrɛkt wi bikɔs i lɛk wi. Di fayn wɔd dɛn we di ɛlda dɛn tɔk bin tɔch mi at ɛn ɛp mi fɔ chenj di we aw a bin de tink.” Naw, Atɔ na rɛgyula payɔnia ɛn ministerial savant. We wi no se Jiova de sɔri fɔ wi if wi ripɛnt, dat de rili kɔrej wi!

JIOVA DE GI WI OP

8. (a) Us op Jiova bin gi di Ju dɛn we bin de na ɛgzayl? (b) Akɔdin to Ayzaya 40:29-31, aw di Ju dɛn we bin dɔn ripɛnt bin fil bikɔs ɔf di op we Jiova gi dɛn?

⁸ Na mɔtalman yay, i bin tan lɛk se di Ju dɛn nɔ bin gɛt ɛni op. Ɔlman bin no se di Babilonian dɛn nɔ bin de alaw di wan dɛn we dɛn kech we dɛn kin go fɛt wɔ fɔ go bak na dɛn om-tɔŋ. (Ayz. 14:17) Bɔt Jiova bin gi in pipul dɛn op. I bin prɔmis se i go fri in pipul dɛn, ɛn natin nɔ go stɔp am. (Ayz. 44:26; 55:12) Babilɔn bin jɔs tan lɛk smɔl dɔst na Jiova in yay. (Ayz. 40:15) As i blo am so, i de go. Aw di Ju dɛn we bin de na ɛgzayl go fil bikɔs ɔf di op we dɛn gɛt? I go kɔrej dɛn. Bɔt nɔto dat nɔmɔ. Ayzaya bin rayt se: “Di wan dɛn we abop pan Jiova go gɛt pawa bak.” (Rid Ayzaya 40: 29-31.) Fɔ tru, op go mek dɛn gɛt trɛnk, dɛn go “flay rayt ɔp lɛk se dɛn gɛt igul wiŋ dɛn.”

9. Us rizin di Ju dɛn we bin de na ɛgzayl bin gɛt fɔ abop pan Jiova in prɔmis dɛn?

⁹ Jiova bin gi bak di Ju dɛn we bin de na ɛgzayl rizin fɔ abop pan in prɔmis dɛn. Aw? Tink bɔt di prɔfɛsi dɛn we bin dɔn ɔlrɛdi kam tru. Dɛn bin no se di Asirian dɛn bin dɔn win di nɔt pat na Izrɛl pan fɛt ɛn go wit di pipul dɛn na ɛgzayl. (Ayz. 8:4) Dɛn bin si we di Babilonian dɛn dɔnawe wit Jerusɛlɛm ɛn go wit di pipul dɛn na ɛgzayl. (Ayz. 39:5-7) Dɛn bin no se di kiŋ na Babilɔn bin bɔs Kiŋ Zɛdikaya in yay ɛn go wit am na Babilɔn. (Jɛr. 39:7; Izi. 12:12, 13) Ɔl di tin dɛn we Jiova bin tɔk se go apin, bin apin. (Ayz. 42:9; 46:10) Dɛn tin dɛn ya go dɔn mek dɛn gɛt strɔng fet pan Jiova in prɔmis se i go fri dɛn.

10. Wetin go ɛp wi fɔ kɔntinyu fɔ gɛt op insay dis las dez?

¹⁰ Wetin wi lan? We wi at pwɛl, di op we wi gɛt go kɔrej wi ɛn ɛp wi fɔ gɛt trɛnk bak. Wi de na tɛm we tin rili tranga ɛn wi gɛt pawaful ɛnimi dɛn. Bɔt wi at nɔ fɔ pwɛl pasmak. Jiova dɔn gi wi wɔndaful op we na layf we go de sote go, ɛn wi go fil sef ɛn gɛt tru tru pis. Wi fɔ kɔntinyu fɔ pe atɛnshɔn pan da op de. If wi nɔ du dat, wi op nɔ go strɔng bɛtɛ igen ɛn i go tan lɛk we pɔsin de wach wan fayn ples na glas winda bɔt i nɔ de ebul si am fayn bikɔs di glas dɔti. Wetin wi go du fɔ mek wi “klin di glas winda,” dat na, fɔ mek wi op kɔntinyu fɔ strɔng? Wi fɔ mek tɛm fɔ tink ɔltɛm bɔt aw wi layf go tan lɛk insay di nyu wɔl. Wi kin rid atikul dɛn, wach vidio dɛn, ɛn lisin to siŋ dɛn we de tɔk bɔt wi op. Ɛn wi kin pre to Jiova bɔt di prɔmis dɛn we wi de rili wet fɔ si kam tru.

11. Wetin de ɛp wan sista we sik siriɔs wan fɔ gɛt trɛnk bak?

¹¹ Tink bɔt aw op de kɔrej wan sista we nem Jɔy we sik siriɔs wan fɔ gɛt trɛnk bak. I tɔk se: “We mi at kin pwɛl pasmak, a kin tɛl Jiova ɔl wetin de na mi at bikɔs a no se i de ɔndastand mi. Jiova de ansa mi prea bay we i de gi mi ‘di pawa we pas mɔtalman in yon.’” (2 Kɔr. 4:7) Jɔy de imajin insɛf bak na di nyu wɔl usay “nɔbɔdi nɔ go . . . se: ‘A nɔ wɛl.’” (Ayz. 33:24) If wisɛf tɛl Jiova aw wi de fil ɛn pe atɛnshɔn pan wi op, wi go gɛt trɛnk bak.

12. Us rizin dɛn wi gɛt fɔ abop pan Jiova in prɔmis dɛn? (Luk bak di pikchɔ.)

¹² Jɔs lɛk aw Jiova du fɔ di Ju dɛn we bin de na ɛgzayl, i dɔn gi wisɛf bɔku rizin dɛn fɔ abop pan in prɔmis dɛn. Tink bɔt di prɔfɛsi dɛn we wi de si de kam tru naw. Fɔ ɛgzampul, wi de si di Anglo Amɛrikan Wɔl Pawa we “sɔm pat dɛn . . . strɔng ɛn sɔm pat . . . wik.” (Dan. 2:42, 43) Wi de yɛri bak bɔt ‘atkwek dɛn we de apin na difrɛn ples dɛn,’ ɛn wi de prich na “ɔl di neshɔn dɛn.” (Mat. 24:7, 14) Dɛn prɔfɛsi dɛn ya ɛn bɔku ɔda wan dɛn de mek wi gɛt strɔng fet se Jiova in ɔda prɔmis dɛn go kam tru.

JIOVA DE ƐP WI NƆ FƆ FRED

13. (a) Us prɔblɛm dɛn di Ju dɛn go gɛt we di tɛm rich fɔ mek dɛn fri dɛn? (b) Frɔm wetin de na Ayzaya 41:10-13, aw Jiova bin kɔrej di Ju dɛn we bin de na ɛgzayl?

¹³ Pan ɔl we Jiova bin gi di Ju dɛn we bin de na ɛgzayl wɔndaful op fɔ kɔrej dɛn, i bin no se dɛn go gɛt prɔblɛm dɛn we di tɛm rich fɔ mek dɛn fri dɛn. Jiova bin dɔn tɔk se we di tɛm go de nia fɔ mek di Ju dɛn kɔmɔt na ɛgzayl, wan pawaful kiŋ go dɔnawe wit di neshɔn dɛn we de arawnd Babilɔn ɛn atak Babilɔn. (Ayz. 41:2-5) Fɔ se di Ju pipul dɛn go nid fɔ wɔri? Jiova bin kɔrej in pipul dɛn bifo tɛm we i tɔk se: “Nɔ fred bikɔs a de wit yu. Nɔ wɔri, bikɔs mi na yu Gɔd.” (Rid Ayzaya 41:10-13.) Wetin Jiova bin min we i tɔk se “mi na yu Gɔd”? I nɔ bin de mɛmba di Ju dɛn fɔ wɔship am bikɔs dɛn bin no se dɛn fɔ du dat. Bifo dat, i bin de mɛmba dɛn se i stil de wit dɛn.—Sam 118:6.

14. Wetin bak Jiova bin du fɔ ɛp di Ju dɛn we bin de na ɛgzayl nɔ fɔ fred?

¹⁴ Jiova bin ɛp di Ju dɛn we bin de na ɛgzayl nɔ fɔ fred we i mɛmba dɛn se in pawa ɛn sɛns nɔ gɛt say we i stɔp. I bin tɛl dɛn fɔ luk ɔp di skay ɛn wach di sta dɛn. I bin tɛl dɛn se i nɔ jɔs mek di sta dɛn, bɔt i no bak ɔl di sta dɛn bay nem. (Ayz. 40:25-28) So wi nɔ gɛt wan dawt se Jiova sabi ɔl in savant dɛn nem dɛn wan bay wan. Ɛn if Jiova gɛt di pawa fɔ mek di sta dɛn, wi nɔ gɛt wan dawt se i gɛt di pawa fɔ ɛp in pipul dɛn. Fɔ tru, di Ju dɛn we bin de na ɛgzayl nɔ bin gɛt ɛni rizin fɔ wɔri ɔ fred.

15. Aw Gɔd bin rɛdi in pipul dɛn fɔ wetin gɛt fɔ apin?

¹⁵ Jiova bin rɛdi in pipul dɛn bak fɔ wetin gɛt fɔ apin. Insay di Baybul buk we nem Ayzaya, Gɔd bin tɛl di pipul dɛn se: “Una go insay una rum dɛn we de insay insay ɛn lɔk una domɔt dɛn. Una ayd fɔ shɔt tɛm te mi vɛksteshɔn pas.” (Ayz. 26:20) Sɔm pat pan dis prɔfɛsi bin kam tru di tɛm we Kiŋ Sayrɔs bin win Babilɔn pan fɛt. Wan man we bin de rayt bɔt istri trade trade we na bin Grik tɔk se we Sayrɔs bin go insay Babilɔn, i “bin tɛl [in sojaman dɛn] fɔ kil ɛnibɔdi we dɛn mit na do.” Imajin aw di pipul dɛn na Babilɔn bin fred! Bɔt i go bi se dɛn nɔ bin kil di Ju dɛn we bin de na ɛgzayl bikɔs dɛn du wetin Jiova tɛl dɛn.

16. Wetin mek wi nɔ fɔ wɔri pasmak bɔt wetin go apin tumara bambay? (Luk bak di pikchɔ.)

¹⁶ Wetin wi lan? I nɔ go te igen, da big big trɔbul we nɔ wande apin yet go apin. We i go bigin, pipul dɛn go kɔnfyuz ɛn wɔri pasmak. Bɔt dat nɔ go apin to Jiova in pipul dɛn. Wi no se Jiova na wi Gɔd. Wi go tinap stret bikɔs wi no se “di tɛm fɔ lɛ [wi] sev dɔn kam nia.” (Lyuk 21:28) Ivin di tɛm we ɔl di neshɔn dɛn go kam togɛda fɔ atak wi, wi go tinap tranga wan. Jiova go yuz in enjɛl dɛn fɔ protɛkt wi ɛn i go tɛl wi wetin fɔ du we go mek wi sev. Aw i go tɛl wi di tin dɛn we i want wi fɔ du? Wi go nid fɔ wet ɛn si. Bɔt sɔntɛm i go yuz wi kɔngrigeshɔn dɛn fɔ tɛl wi wetin fɔ du. Sɔntɛm dis go bi wi “rum dɛn we de insay insay,” usay wi go de sef wan. Aw wi go rɛdi fɔ wetin gɛt fɔ apin? Wi fɔ gɛt tayt padi biznɛs wit wi brɔda ɛn sista dɛn, rɛdi fɔ obe di tin dɛn we Jiova in ɔganayzeshɔn de tɛl wi fɔ du, ɛn biliv tranga wan se na Jiova de dayrɛkt wi ɔganayzeshɔn.​—Ibru. 10:24, 25; 13:17.

17. Aw yu go abop pan Jiova fɔ kɔrej yu?

¹⁷ Pan ɔl we tin nɔ bin izi fɔ di Ju dɛn we dɛn bin de na ɛgzayl, Jiova bin gi dɛn di kɔrej we dɛn go nid. l go du di sem tin fɔ wi bak. So ilɛk wetin go apin tumara bambay, kɔntinyu fɔ abop pan Jiova fɔ kɔrej yu. Abop pan di sɔri-at we i gɛt. Kɔntinyu fɔ mek yu op strɔng. Mɛmba se wans Jiova na yu Gɔd, yu nɔ gɛt natin fɔ fred.