Jiova Witnɛs dɛn Na Kɔlt?

Nɔ, Jiova Witnɛs dɛn nɔto kɔlt. Bifo dat, wi na Kristian dɛn we de tray tranga wan fɔ falamakata Jizɔs Krays in ɛgzampul ɛn du tin dɛn we i tich.

Wetin na kɔlt?

Difrɛn pipul dɛn gɛt dɛn yon minin fɔ “kɔlt.” Bɔt, lɛ wi tɔk bɔt tu tin dɛn we pipul dɛn kin min we dɛn kin tɔk bɔt kɔlt ɛn wetin mek dɛn tin dɛn nɔ gɛt natin fɔ du wit wi.

• Sɔm pipul dɛn tink se kɔlt na wan nyu rilijɔn ɔ nɔto tru rilijɔn. Jiova Witnɛs dɛn nɔto pipul dɛn we mek wan nyu rilijɔn. Bɔt, di we aw wi de wɔship na di sem we aw dɛn fɔstɛm Kristian dɛn bin de wɔship. Ɔl dɛn ɛgzampul ɛn di tin dɛn we dɛn bin de tich, de insay di Baybul. (Sɛkɛn Lɛta To Timoti 3:16, 17) Wi biliv se na di Baybul gɛt di pawa fɔ sho wetin na di tru we fɔ wɔship Gɔd.

• Sɔm pipul dɛn tink se kɔlt na wan bad grup we se dɛn de du Gɔd in wok bɔt gɛt mɔtalman lida. Jiova Witnɛs dɛn nɔ de tek ɛni mɔtalman as dɛn lida. Bifo dat, wi de fala di ɛgzampul we Jizɔs bin sho in disaypul dɛn. I bin tɛl dɛn se: “Na di Mɛsaya in wangren na una Masta.”—Matyu 23:10.

Jiova Witnɛs dɛn na rilijɔn we de du tin dɛn we de bɛnifit di wan dɛn we jɔyn dɛn ɛn ɔda pipul dɛn na di eria we dɛn de; wi nɔto wan bad kɔlt. Fɔ ɛgzampul, wi prichin wok de ɛp bɔku pipul dɛn fɔ ebul lɛf sɔm bad abit dɛn, lɛk fɔ tek drɔgs ɛn fɔ drink rɔm. Apat frɔm dat, wi kin gɛt klas dɛn ɔlsay na di wɔl usay wi kin ɛp bɔku pipul dɛn we nɔ go skul, fɔ mek dɛn lan fɔ rid ɛn rayt. Ɛn wi kin du bɔku tin dɛn fɔ ɛp na say dɛn we bad tin kin apin. Wi de tray tranga wan fɔ du gud tin dɛn to ɔda pipul dɛn, jɔs lɛk wetin Jizɔs bin tɛl in disaypul dɛn fɔ du.—Matyu 5:13-16.