Jekɔb Go na Eran

YU SABI udat na dɛn man ya we Jekɔb de tɔk to? We Jekɔb dɔn travul fɔ lɔng tɛm, i mit dɛn man ya nia wan watawɛl. Dɛn bin de mɛn dɛn ship dɛn. Jekɔb aks dɛn se: ‘Usay una kɔmɔt?’

Na de dɛn se: ‘Na Eran.’

Jekɔb aks dɛn bak se: ‘Una sabi Leban?’

Na de dɛn se: ‘Yɛs. Luk in pikin we nem Rechɛl, de kam yanda wit in papa in ship dɛn.’ Yu de si Rechɛl we i de kam oba yanda?

We Jekɔb si Rechɛl de kam wit Leban in ship dɛn, na de i go pul di ston we kɔba di watawɛl fɔ mek di ship dɛn drink. Afta dat, Jekɔb grit Rechɛl ɛn tɛl am udat i bi. Rechɛl gladi fɔ sabi Jekɔb, so i rɔn go na os ɛn tɛl in papa we na Leban. Leban na Jekɔb in ɔnkul.

Leban gladi fɔ lɛ Jekɔb de wit dɛn. We Jekɔb se i want mared Rechɛl, Leban gladi. Bɔt i se mek Jekɔb wok fɔ am fɔ sɛvin ia bifo Jekɔb go mared Rechɛl. Bikɔs Jekɔb lɛk Rechɛl, i gri fɔ du am. Bɔt we di tɛm kam fɔ lɛ dɛn mared, yu no wetin apin?

Bifo Leban gi Rechɛl to Jekɔb, na in big gyal pikin we nem Lia, i gi am fɔ mared. We Jekɔb gri fɔ wok fɔ ɔda sɛvin ia, Leban gi am Rechɛl fɔ mared. Dɛn tɛm dɛn de, Gɔd bin de gri fɔ lɛ man mared pas wan uman. Bɔt naw, na wan uman nɔmɔ man fɔ mared bikɔs na so di Baybul se.