Biliv se Jiova Lɛk Yu

1. Wetin mek yu bin gi yu layf to Jiova? (Luk bak di pikchɔ.)

YU MƐMBA di tɛm we yu bin gi yu layf to Jiova? Yu bin disayd fɔ du dat bikɔs yu bin dɔn sabi am ɛn yu lɛk am. Yu bin prɔmis am se yu go put am fɔs na yu layf, ɛn yu go kɔntinyu fɔ lɛk am wit ɔl yu at, wit ɔl yu layf, wit ɔl yu maynd, ɛn wit ɔl yu trɛnk. (Mak 12:30) Frɔm da tɛm de, di lɔv we yu gɛt fɔ Jiova dɔn strɔng mɔ ɛn mɔ. So aw yu go ansa if pɔsin aks yu se, “Yu shɔ se yu lɛk Jiova?” Wan dawt nɔ de se yu nɔ go westɛm fɔ tɔk se, “A lɛk Jiova pas ɛni ɔda pɔsin ɔ ɛni ɔda tin!”

2-3. Wetin Jiova want mek wi biliv? Wetin wi go tɔk bɔt insay dis atikul? (Jɛrimaya 31:3)

² Bɔt aw yu go ansa if pɔsin aks yu se, “Yu shɔ se Jiova lɛk yu?” Fɔ se yu go westɛm fɔ ansa bikɔs yu tink se yu nɔ fit fɔ mek Jiova lɛk yu? Wan sista we dɛn bin de trit bad di tɛm we i bin smɔl tɔk se: “A no se a lɛk Jiova. A nɔ gɛt wan dawt bɔt dat. Bɔt bɔku tɛm, a kin dawt if Jiova lɛk mi.” Bɔt aw Jiova de rili fil bɔt yu?

³ Jiova want yu fɔ biliv tranga wan se i lɛk yu. (Rid Jɛrimaya 31:3.) Di tru na dat na Jiova drɔ yu fɔ kam nia am. Ɛn we yu gi yu layf to am ɛn baptayz, i gi yu gift we rili valyu, dat nain lɔv we nɔ de chenj. Dat min se i rili lɛk yu wit ɔl in at ɛn i nɔ go ɛva lɛf yu. I de si yu ɛn ɔl di wan dɛn we de wɔship am as in “prɔpati we [i] valyu.” (Mal. 3:​17, futnot) Jiova want mek yu biliv tranga wan se i lɛk yu jɔs lɛk aw apɔsul Pɔl bin biliv se Jiova lɛk am. Apɔsul Pɔl bin gɛt kɔnfidɛns fɔ rayt se: “A rili biliv se day, layf, enjɛl dɛn, gɔvmɛnt dɛn, tin dɛn we de ya naw, tin dɛn we gɛt fɔ kam, pawa dɛn, ayt, tin we dip, ɔ ɛni ɔda tin we Gɔd mek nɔ ebul mek Gɔd lɛf fɔ lɛk wi.” (Rom. 8:​38, 39) Insay dis atikul, wi go tɔk bɔt wetin mek wi nid fɔ biliv mɔ ɛn mɔ se Jiova lɛk wi, ɛn wetin go ɛp wi fɔ du dat.

WETIN MEK WI NID FƆ BILIV SE JIOVA LƐK WI?

4. Aw wi go ebul fɔ fɛt agens wan pan Setan in kɔni kɔni trik dɛn?

⁴ We wi biliv se Jiova lɛk wi, wi go ebul fɛt agens wan pan Setan in “kɔni kɔni trik dɛn.” (Ɛfi. 6:11) Setan go du ɛnitin we i ebul fɔ mek wi nɔ kɔntinyu fɔ sav Jiova. Wan pan Setan in kɔni kɔni trik dɛn we i de yuz na fɔ mek wi biliv se Jiova nɔ lɛk wi. Nɔ ɛva fɔgɛt se Setan na pɔsin we de luk fɔ ɛni chans we i gɛt fɔ pul wi kɔmɔt nia Jiova. Bɔku tɛm, i kin atak wi di tɛm we wi nɔ gɛt bɛtɛ trɛnk. Fɔ ɛgzampul, i kin atak wi di tɛm we wi at pwɛl bikɔs ɔf wetin wi bin dɔn du, wetin de apin to wi naw, ɔ bikɔs wi nɔ no wetin go apin to wi tumara bambay. (Prɔv. 24:10) Setan tan lɛk layɔn we de luk fɔ we fɔ it animal we nɔ ebul fɛt fɔ insɛf. So i kin wet fɔ tɛm we wi at pwɛl fɔ atak wi fɔ mek wi go stɔp fɔ sav Jiova. Bɔt if wi kɔntinyu fɔ biliv se Jiova lɛk wi, dat go mek wi ebul fɔ “de agens” Setan ɛn in kɔni kɔni trik ɛn tatiks dɛn.—1 Pit. 5:​8, 9; Jems 4:7.

5. Wetin mek i impɔtant fɔ no se Jiova lɛk wi ɛn i valyu wi?

⁵ We wi biliv se Jiova lɛk wi, dat go mek wi kam nia am mɔ ɛn mɔ. Lɛ wi tɔk bɔt wetin mek wi se so. Jiova mek wi di kayn we we de mek wi lɛk ɔda pipul dɛn ɛn wi kin want fɔ mek dɛnsɛf lɛk wi. We pipul dɛn lɛk wi, i nɔmal fɔ lɛ wisɛf sho se wi lɛk dɛn. So di mɔ we wi de si se Jiova lɛk ɛn valyu wi, na di mɔ wisɛf go lɛk am. (1 Jɔn 4:19) Ɛn di mɔ we wi de lɛk am, na di mɔ insɛf go lɛk wi. Di Baybul tɔk klia wan se: “Una kam nia Gɔd, ɛn insɛf go kam nia una.” (Jems 4:8) Bɔt wetin wi go du fɔ mek wi biliv mɔ ɛn mɔ se Jiova lɛk wi?

WETIN GO ƐP WI FƆ BILIV SE JIOVA LƐK WI?

6. If yu nɔ shɔ se Jiova lɛk yu, wetin yu fɔ du?

⁶ Kɔntinyu fɔ pre to Jiova fɔ mek i ɛp yu fɔ ɔndastand wetin mek i lɛk yu. (Lyuk 18:1; Rom. 12:12) Pre to Jiova fɔ mek i ɛp yu fɔ si yusɛf di we aw i de si yu. If nid de, yu kin du dat bɔku tɛm insay di de. Na tru se tɛm dɛn kin de we i kin at fɔ mek yu biliv se Jiova lɛk yu bikɔs yu de rili fil bad bɔt yusɛf. Bɔt mɛmba se Jiova pas yu at. (1 Jɔn 3:​19, 20) I sabi yu pas aw yu sabi yusɛf, ɛn i de si di fayn kwaliti dɛn we yu gɛt pan ɔl we yu nɔ no se yu gɛt dɛn. (1 Sam. 16:7; 2 Kro. 6:30) So nɔ fred fɔ “tɛl” am aw yu de fil, ɛn beg am fɔ ɛp yu fɔ biliv se i lɛk yu. (Sam 62:8) Afta yu dɔn pre, i go fayn fɔ mek yu du dɛn tin dɛn ya we wi de kam tɔk bɔt.

7-8. Aw di Baybul buk we nem Sam de ɛp wi fɔ biliv se Jiova lɛk wi?

⁷ Biliv wetin Jiova se. I yuz in spirit fɔ ɛp di wan dɛn we rayt di Baybul fɔ sho di kayn pɔsin we i rili bi. Insay wan pan di sam dɛn, Devid bin yuz fayn wɔd dɛn fɔ sho se Jiova rili bisin bɔt wi. I bin se: “Jiova de nia di wan dɛn we gɛt pwɛlat; i de sev di wan dɛn we dɛn at rili pwɛl.” (Sam 34:18) We yu at pwɛl bad bad wan, sɔntɛm yu go tink se nɔbɔdi nɔ ɔndastand aw yu de fil ɔ nɔbɔdi nɔ go ebul fɔ ɛp yu. Bɔt Jiova dɔn prɔmis se ɛnitɛm yu fil da we de, i go de nia yu bikɔs i no se na da tɛm de yu nid am pas ɛni ɔda tɛm. Insay wan ɔda sam, Devid bin rayt se: “Duya gɛda mi kray wata na yu bɔtul.” (Sam 56:8) Jiova kin no we yu at pwɛl ɛn we yu nɔ gladi. I rili bisin bɔt yu ɛn i et fɔ si we yu de sɔfa. Jɔs lɛk aw ivin smɔl wata sɛf valyu to pɔsin we de travul na dɛzat, na so Jiova valyu di kray wata we de kɔmɔt na yu yay, ɛn i de mɛmba ɔl di tɛm dɛn we yu de fil pen ɛn kray. Sam 139:3 tɔk se: “[Jiova] yu sabi ɔl wetin a de du.” Jiova de si ɔl wetin yu de du, bɔt i de pe atɛnshɔn pan di gud tin dɛn we yu de du. (Ibru. 6:10) Wetin mek? Na bikɔs i rili valyu ɔl wetin yu de du fɔ mek i gladi.a

⁸ We Jiova mek dɛn rayt dɛn fayn skripchɔ dɛn ya na di Baybul, i tan lɛk i de tɛl yu se: “A want mek yu no se a rili lɛk yu ɛn a bisin bɔt yu.” Bɔt lɛk aw wi dɔn lan, Setan want lɛ yu fil se Jiova nɔ lɛk yu. So if sɔntɛnde yu de dawt if Jiova lɛk yu, na fɔ aks yusɛf dis kwɛstyɔn, ‘Udat a want fɔ biliv? Na “di papa pan lay” ɔ “di Gɔd we de tɔk tru”?’—Jɔn 8:44; Sam 31:5.

9. Wetin Jiova prɔmis di wan dɛn we lɛk am? (Ɛksodɔs 20:​5, 6)

⁹ Tink bɔt aw Jiova de fil bɔt di wan dɛn we lɛk am. Lɛ wi tɔk bɔt wetin Jiova bin tɛl Mozis ɛn di Izrɛlayt dɛn. (Rid Ɛksodɔs 20:​5, 6.) Jiova prɔmis se i go kɔntinyu fɔ sho lɔv we nɔ de chenj to di wan dɛn we lɛk am. Dɛn wɔd dɛn ya mek wi biliv tranga wan se if pɔsin we de sav Jiova sho se i lɛk am, wan dawt nɔ de se Jiova insɛf go sho se i lɛk di pɔsin. (Nɛi. 1:5) So if sɔntɛnde yu de dawt if Jiova lɛk yu, na fɔ aks yusɛf dis kwɛstyɔn, ‘A lɛk Jiova?’ Dɔn tink bɔt dis: If yu lɛk am ɛn yu de tray tranga wan fɔ du tin dɛn we go mek i gladi, na fɔ biliv se insɛf rili lɛk yu. (Dan. 9:4; 1 Kɔr. 8:3) Dat min se, if yu shɔ se yu lɛk Jiova, yu nɔ nid fɔ dawt se i lɛk yu. Wan dawt nɔ de se i lɛk yu ɛn i nɔ go ɛva kɔmɔt biɛn yu.

10-11. Aw Jiova want lɛ yu si di day we Jizɔs day fɔ wi? (Galeshians 2:20)

¹⁰ Tink gud gud wan bɔt di day we Jizɔs day fɔ wi. Di gift we pas ɔl we Jiova dɔn gi mɔtalman na we i mek Jizɔs Krays day fɔ wi. (Jɔn 3:16) Bɔt fɔ se dis na gift we yusɛf kin bɛnifit frɔm? Yɛs! Lɛ wi tɔk bɔt apɔsul Pɔl in ɛgzampul. Mɛmba se i bin dɔn du sɔm bad bad tin dɛn bifo i bi Kristian, ɛn i bin nid fɔ kɔntinyu fɔ fɛt tranga wan nɔ fɔ du di bad tin dɛn we i bin de fil fɔ du. (Rom. 7:​24, 25; 1 Tim. 1:​12-14) Bɔt i bin kam fɔ si se di day we Jizɔs day na gift frɔm Jiova we insɛf sɛf de bɛnifit frɔm. (Rid Galeshians 2:20.) Mɛmba se na Jiova bin mek Pɔl rayt dɛn wɔd dɛn ya. Ɛn Jiova want wi fɔ lan frɔm wetin Pɔl bin rayt. (Rom. 15:4) Di wɔd dɛn we Pɔl tɔk sho se Jiova want mek yu si di day we Jizɔs day as gift we I dɔn gi yu. We yu tink bɔt aw dis gift we Jiova dɔn gi yu wɔndaful, dat go mek yu biliv mɔ ɛn mɔ se i lɛk yu.

¹¹ Wi tɛl Jiova tɛnki fɔ we i mek Jizɔs kam day fɔ wi. Bɔt wan ɔda rizin we mek Jizɔs kam na di wɔl na fɔ tɛl pipul dɛn di tru bɔt Gɔd. (Jɔn 18:37) Wan pan dɛn tru tin dɛn de gɛt fɔ du wit di we aw Jiova de fil bɔt in pikin dɛn.

AW JIZƆS DE ƐP WI FƆ BILIV SE JIOVA LƐK WI?

12. Wetin mek wi fɔ biliv wetin Jizɔs tɔk bɔt Jiova?

¹² We Jizɔs bin de na di wɔl, i bin gladi fɔ tɛl pipul dɛn bɔt udat Jiova bi. (Lyuk 10:22) Wi nɔ gɛt ɛni rizin fɔ dawt wetin Jizɔs tɔk bɔt udat Jiova bi. Wetin mek? Na bikɔs Jizɔs bin dɔn de wit Jiova na ɛvin fɔ lɔng lɔng tɛm bifo i kam na di wɔl. (Kol. 1:15) Jizɔs no aw in Papa lɛk am. Ɛn i dɔn si bak aw in papa dɔn sho se i lɛk in fetful enjɛl dɛn ɛn ɔl in fetful pikin dɛn we de na di wɔl. Aw Jizɔs de ɛp ɔda pipul dɛn fɔ biliv se Gɔd lɛk dɛn?

13. Aw Jizɔs want mek wi si Jiova?

¹³ Jizɔs want mek wi si Jiova lɛk aw i de si am. Insay di Gɔspɛl dɛn, i pas 160 tɛm we Jizɔs kɔl Jiova “Papa.” Ɛn we i bin de tɔk to in disaypul dɛn, i bin de yuz wɔd dɛn lɛk “una Papa” ɔ “una Papa we de na ɛvin.” (Mat. 5:16; 6:26) Di stɔdi not fɔ Matyu 5:16 tɔk se: “Bifo dis tɛm, Gɔd in savant dɛn bin de yuz big big taytul dɛn we dɛn de tɔk bɔt Jiova ɛn we dɛn de kɔl am. Dɛn bin de yuz taytul dɛn lɛk di ‘Ɔlmayti,’ ‘di Wan We De Pantap Ɔlman,’ ɛn di ‘Gret Gɔd We Mek Ɔltin.’ Bɔt bɔku tɛm, Jizɔs bin de yuz di simpul ɛn kɔmɔn wɔd we na ‘Papa’ fɔ sho di kayn padi biznɛs we Gɔd gɛt wit in savant dɛn.” Dis sho klia wan se Jizɔs want mek wi si Jiova lɛk aw i de si am, dat na, as Papa we rili lɛk In pikin dɛn. Lɛ wi tɔk bɔt tu ɛgzampul dɛn usay Jizɔs yuz di wɔd “Papa.”

14. Aw Jizɔs bin sho se wi Papa we de na ɛvin valyu wi wan bay wan? (Matyu 10:​29-31) (Luk bak di pikchɔ.)

¹⁴ Fɔs, lɛ wi tɔk bɔt wetin Jizɔs bin tɔk na Matyu 10:​29-31. (Rid.) Sparo dɛn na smɔl smɔl bɔd dɛn we nɔ go ɛva lɛk Jiova ɔ wɔship am. Bɔt pan ɔl dat, wi Papa valyu ɛniwan pan dɛn sparo dɛn de, ɛn i de ivin notis we ɛniwan pan dɛn fɔdɔm na grɔn. If Jiova valyu smɔl bɔd da kayn we de, wi shɔ se i rili valyu wi wan bay wan bikɔs wi lɛk am ɛn wi de wɔship am! We di stɔdi not fɔ vas 30 de tɔk bɔt di wɔd dɛn we se, “i ivin no ɔmɔs ia de na una ed,” i se: “Bikɔs Jiova ivin no smɔl smɔl tin dɛn bɔt wi, wi nɔ gɛt wan dawt se i rili bisin bɔt wi we na Jizɔs in disaypul dɛn wan bay wan.” Dis sho klia wan se Jizɔs want wi fɔ biliv se wi Papa we de na ɛvin valyu wi wan bay wan.

15. Wetin di wɔd dɛn we Jizɔs tɔk na Jɔn 6:44 mek yu no bɔt yu Papa we de na ɛvin?

¹⁵ Lɛ wi tɔk bɔt di sɛkɔn ɛgzampul usay Jizɔs yuz di wɔd “Papa.” (Rid Jɔn 6:44.) Na yu Papa we de na ɛvin insɛf sɛf tek tɛm drɔ yu kam na di trut. Wetin mek i du dat? Na bikɔs i luk insay yu at ɛn si se yu rili want fɔ gɛt tayt padi biznɛs wit am. (Akt 13:48) Di stɔdi not fɔ Jɔn 6:44 tɔk se, i go bi se Jizɔs bin de kot di wɔd dɛn we Jɛrimaya bin tɔk we de na wi tim skripchɔ. I se: “A dɔn drɔ yu to mi wit lɔv we nɔ de chenj [ɔ, dɔn kɔntinyu fɔ sho yu lɔv we nɔ de chenj].” (Jɛr. 31:3; futnot; luk bak Osia 11:4.) Tink bɔt wetin dat min. Wi Papa we de na ɛvin we lɛk wi de kɔntinyu fɔ si di gud tin dɛn insay yu we yu nɔ de si.

16. (a) Wetin Jizɔs tɛl wi? Wetin mek wi fɔ biliv am? (b) Wetin go ɛp yu fɔ biliv mɔ ɛn mɔ se Jiova na di Papa we yu nid? (Luk di bɔks we gɛt di taytul “Di Papa we Wi Ɔl Nid.”)

¹⁶ We Jizɔs kɔl Jiova wi Papa, i tan lɛk i bin de tɛl wi se: “Jiova nɔto jɔs mi Papa, bɔt na una Papa bak. Ɛn a want mek una no se i lɛk una ɛn i rili bisin bɔt una wan bay wan.” So if sɔntɛnde yu de dawt if Jiova lɛk yu, aks yusɛf dis kwɛstyɔn, ‘Fɔ se a fɔ dawt wetin di Pikin we sabi wi Papa gud gud wan ɛn we de tɔk tru ɔltɛm se?’—1 Pit. 2:22.

KƆNTINYU FƆ DU TIN DƐN WE GO MEK YU BILIV SE JIOVA LƐK YU

17. Wetin mek wi fɔ kɔntinyu fɔ du tin dɛn we go mek wi biliv se Jiova lɛk wi?

¹⁷ Wi nid fɔ kɔntinyu fɔ du ɔl wetin wi ebul fɔ biliv tranga wan se Jiova lɛk wi. Jɔs lɛk aw wi bin dɔn lan, wi ɛnimi we na Setan we gɛt kɔni kɔni trik dɛn de du ɛnitin we i ebul fɔ mek wi nɔ kɔntinyu fɔ sav Jiova. Jɔs bikɔs Setan want fɔ pwɛl wi padi biznɛs wit Jiova, i go kɔntinyu fɔ du tin dɛn we go mek wi nɔ biliv se Jiova lɛk wi. Bɔt wi nɔ fɔ alaw Setan fɔ win!—Job 27:5.

18. Wetin yu go du fɔ mek yu biliv mɔ ɛn mɔ se Jiova lɛk yu?

¹⁸ Fɔ mek yu go biliv mɔ ɛn mɔ se Jiova lɛk yu, kɔntinyu fɔ pre to am fɔ mek i ɛp yu fɔ si yusɛf lɛk aw i de si yu. Tink gud gud wan bɔt aw di pipul dɛn we rayt di Baybul tɔk bɔt di kayn lɔv we Jiova gɛt. Mɛmba se Jiova de sho se i lɛk di wan dɛn we lɛk am ɔltɛm. Tink gud gud wan bɔt wetin mek yu want fɔ si di day we Jizɔs day as gift we Jiova dɔn gi yu. Ɛn jɔs lɛk aw Jizɔs tɔk, biliv tranga wan se Jiova na yu Papa we de na ɛvin. Dɔn if ɛnibɔdi aks yu se: “Yu shɔ se Jiova lɛk yu?” yu go gɛt kɔnfidɛns fɔ tɔk se: “Yɛs, i lɛk mi! Ɛn a de du mi bɛst ɛvride fɔ sho se a lɛk am!”