Jiova Rili Lɛk Yu

1. Wetin kin kam na yu maynd we yu tink bɔt Jiova?

YU DƆN ɛva tray fɔ tink bɔt aw Jiova tan? Wetin kin kam na yu maynd we yu de pre to am? Pan ɔl we wi nɔ de si Jiova, di Baybul tɔk bɔt am difrɛn we dɛn. I se Jiova na “san . . . ɛn big shild” ɛn na “faya we de pwɛl kpatakpata.” (Sam 84:11; Ibru. 12:29) Wan pan di man dɛn we rayt di Baybul tɔk se Jiova tan lɛk safaya ston, mɛtal we de shayn, ɛn brayt renbo. (Izi. 1:​26-28) Sɔm pan dɛn tin dɛn ya we dɛn tɔk bɔt Jiova kin mek wi kɔle am ɔ dɛn kin mek wi fil se wi nɔ fit fɔ de nia am.

2. Wetin kin mek i nɔ izi fɔ sɔm pipul dɛn fɔ kam nia Jiova?

² Bikɔs wi nɔ de si Jiova, sɔntɛm dat kin mek i nɔ izi fɔ mek wi biliv se i lɛk wi. Sɔm pipul dɛn tink se Jiova nɔ go ɛva lɛk dɛn bikɔs ɔf di bad tin dɛn we bin dɔn apin to dɛn na layf. Sɔntɛm dɛn nɔ bin ɛva gɛt papa we lɛk dɛn. Jiova ɔndastand aw wi de fil, ɛn i no aw dat kin afɛkt wi. So fɔ ɛp wi, i dɔn sho wi insay in Wɔd sɔm pan di fayn kwaliti dɛn we i gɛt.

3. Wetin mek wi nid fɔ tek tɛm tɔk bɔt di lɔv we Jiova gɛt?

³ Di bɛst wɔd we rili sho udat Jiova bi na lɔv. (1 Jɔn 4:8) Gɔd na lɔv. Dis lɔv de afɛkt ɔl wetin i de du. Di lɔv we Gɔd gɛt rili strɔng, na dat mek i nɔ jɔs de sho am to di wan dɛn we lɛk am, bɔt i de sho am bak to di wan dɛn we nɔ lɛk am. (Mat. 5:​44, 45) Insay dis atikul, wi go tek tɛm tɔk bɔt Jiova ɛn di lɔv we i gɛt. Di mɔ wi lan bɔt wi Gɔd, na di mɔ wi go lɛk am.

JIOVA RILI LƐK WI

4. Aw di lɛk we Jiova rili lɛk wi kin mek yu fil? (Luk bak di pikchɔ.)

⁴ “Jiova rili lɛk wi.” (Jems 5:11) Insay di Baybul, Jiova kɔmpia insɛf to mama we rili gɛt lɔv. (Ayz. 66:​12, 13) Imajin aw mama we rili lɛk in smɔl pikin kin kia fɔ am. I kin tek tɛm put am pan in lɛg, bayo bayo am, ɛn tɔk to am saful wan. We di pikin de kray ɔ we i de fil pen, di mama kin mek shɔ se i gi am wetin i nid. We wi at rili pwɛl, wisɛf fɔ biliv se Jiova rili lɛk wi. Wan pan di man dɛn we rayt di sam buk rayt se: “We a kin tink bɔt bɔku tin dɛn we kin mek a wɔri, yu kin ɛnkɔrej mi ɛn mek a fil fayn.”​—Sam 94:19.

5. Wetin Jiova in lɔv we nɔ de chenj min to yu?

⁵ Jiova nɔ de kɔmɔt biɛn pɔsin. (Sam 103:8) I nɔ kin stɔp fɔ lɛk wi we wi du sɔntin we bad. Di Izrɛlayt dɛn bin mek Jiova vɛks bɔku tɛm, bɔt we dɛn fil bad fɔ di tin dɛn we dɛn dɔn du ɛn lɛf fɔ du dɛn, i bin mek dɛn no se i stil lɛk dɛn. Fɔ ɛgzampul, i bin tɛl dɛn se: ‘Una spɛshal na mi yay, ɛn una gɛt ɔnɔ, ɛn a lɛk una.’ (Ayz. 43:​4, 5) Na dis sem lɔv Gɔd gɛt fɔ wi tide. Wi kin abop pan in lɔv ɔltɛm. Ivin we wi dɔn mek siriɔs mistek dɛn, Jiova nɔ kin tɔn in bak pan wi. We wi ripɛnt ɛn kam bak to am, wi kin si se i stil lɛk wi. I prɔmis wi se “i go fɔgiv [wi] fɔ ɔl wetin [wi] dɔn du.” (Ayz. 55:7) Di Baybul se “Jiova insɛf sɛf go de mek [wi] fil fayn” we i fɔgiv wi.​—Akt 3:19.

6. Wetin Zɛkaraya 2:8 tich wi bɔt Jiova?

⁶ Rid Zɛkaraya 2:8. Bikɔs Jiova lɛk wi, i nɔ kin westɛm fɔ notis aw wi de fil, ɛn i rɛdi fɔ protɛkt wi. I kin fil am we wi at rili pwɛl. Ɛn bikɔs na so i de fil, wi kin pre to am se: “Gayd mi lɛk aw yu de gayd yu bɔlyay.” (Sam 17:8) Di yay na wan pat pan di bɔdi we wi fɔ rili tek tɛm wit, ɛn i rili valyu. So we Jiova kɔmpia wi to in bɔlyay, i tan lɛk i de se, ‘Mi pipul dɛn, ɛnibɔdi we du una bad, dɔn du bad to sɔntin we rili valyu to mi.’

7. Wetin mek wi nid fɔ gɛt mɔ kɔnfidɛns pan di lɔv we Jiova gɛt fɔ wi?

⁷ Jiova want mek wi biliv se i lɛk wi. Bɔt i no se bikɔs ɔf di tin dɛn we dɔn apin to wi, dat kin mek wi wɔnda sɔntɛnde if i rili lɛk wi. Ɔ sɔntɛm, di tin dɛn we de apin to wi naw kin mek wi dawt if i lɛk wi. Wetin go ɛp wi fɔ biliv se i lɛk wi? Na we wi lan bɔt aw Jiova sho se i lɛk Jizɔs, di anɔyntɛd dɛn, ɛn wi ɔl.

AW JIOVA DE SHO SE I LƐK WI?

8. Wetin mek Jizɔs bin biliv se in Papa lɛk am?

⁸ Jiova ɛn in Bɔypikin dɔn de togɛda fɔ lɔng lɔng tɛm. Insay di tɛm we dɛn bin de togɛda na ɛvin, dɛn padi biznɛs bin tayt ɛn dɛn bin rili lɛk dɛnsɛf. Jiova tɔk klia wan bɔt aw i lɛk Jizɔs na Matyu 17:5. I fɔ dɔn jɔs se, ‘Na mi Pikin dis, ɛn a gladi fɔ am.’ Bɔt i bin want wi fɔ no aw i lɛk Jizɔs, na dat mek i kɔl am ‘mi Pikin, di wan we a rili lɛk.’ Jiova bin gladi fɔ di kayn pɔsin we in Pikin bi ɛn fɔ wetin i bin gɛt fɔ du. (Ɛfi. 1:7) Ɛn wan dawt nɔ de se Jizɔs bin no se in Papa rili lɛk am. I bin biliv dis tranga wan. Bɔku tɛm, i bin tɔk wit kɔnfidɛns se di Papa lɛk am.​—Jɔn 3:35; 10:17; 17:24.

9. Us wɔd dɛn sho se Jiova lɛk di anɔyntɛd dɛn? Ɛksplen. (Romans 5:5)

⁹ Jiova dɔn sho bak se i lɛk di anɔyntɛd dɛn. (Rid Romans 5:5.) Insay di orijinal langwej, dis vas min se Jiova rili lɛk di anɔyntɛd dɛn, ɛn wi go kɔmpia di lɛk we i lɛk dɛn to riva. Dɛn no se “Gɔd . . . lɛk” dɛn. (Jud 1) Apɔsul Jɔn bin tɔk bɔt aw dɛn de fil we i rayt se: “Luk di kayn we we di Papa dɔn sho se i lɛk wi, we i dɔn mek dɛn de kɔl wi Gɔd in pikin dɛn!” (1 Jɔn 3:1) Bɔt fɔ se na di anɔyntɛd dɛn nɔmɔ Jiova lɛk? Nɔ, Jiova dɔn pruv se i lɛk wi ɔl.

10. Us we Jiova dɔn sho se i lɛk wi we pas ɔl ɔda we dɛn?

¹⁰ Us we Jiova dɔn sho se i lɛk wi we pas ɔl ɔda we dɛn? Na we i mek Jizɔs gi in layf as prayz fɔ fri wi frɔm sin ɛn day. Nɔbɔdi nɔ go ɛva ebul sho wi dis kayn lɔv! (Jɔn 3:16; Rom. 5:8) Jiova bin gi in Bɔypikin we i rili valyu, i alaw am fɔ day fɔ ɔl mɔtalman so dat i go fɔgiv wi sin dɛn ɛn bi In padi dɛn. (1 Jɔn 4:10) Di mɔ we wi de tink bɔt di kayn prayz we Jiova ɛn Jizɔs pe fɔ wi, na di mɔ wi go ɔndastand aw dɛn rili lɛk wi. (Gal. 2:20) Jiova nɔ mek Jizɔs gi in layf as prayz fɔ fri wi jɔs bikɔs i want fɔ du tin tret. Na gift fɔ sho se i lɛk wi. Jiova dɔn sho se i lɛk wi bay we i sakrifays di tin we valyu to am pas ɔl, we na Jizɔs. I alaw in Bɔypikin fɔ sɔfa ɛn day fɔ wi sek.

11. Wetin wi lan frɔm Jɛrimaya 31:3?

¹¹ Di lɔv we Jiova gɛt fɔ wi nɔ jɔs de na in at, bɔt i de sho se i lɛk wi. (Rid Jɛrimaya 31:3.) Jiova dɔn mek wi kam nia am bikɔs i lɛk wi. (Luk bak Ditarɔnɔmi 7:​7, 8.) Nɔbɔdi ɔ natin nɔ de we go mek Gɔd lɛf fɔ lɛk wi. (Rom. 8:​38, 39) Aw dis lɛk we Jiova lɛk wi de mek yu fil? Rid Sam 23 fɔ si aw Jiova in lɔv fɔ Devid ɛn di we aw i bin de kia fɔ am bin afɛkt Devid ɛn aw i kin afɛkt wi bak.

AW DI LƐK WE JIOVA LƐK WI DE MEK YU FIL?

12. Tɔk smɔl bɔt Sam 23.

¹² Rid Sam 23:​1-6. Insay Sam 23, Devid bin sho di kayn kɔnfidɛns we i gɛt fɔ se Jiova lɛk am ɛn i bisin bɔt am. I bin tɔk bɔt di tayt padi biznɛs we de bitwin in ɛn Jiova we na in Shɛpad. Devid bin fil sef we i alaw Jiova fɔ dayrɛkt am, ɛn i bin abop pan Am wit ɔl in at. I bin no se Jiova go kɔntinyu fɔ lɛk am te i day. Wetin mek Devid bin gɛt dis kayn kɔnfidɛns?

13. Wetin mek Devid bin shɔ se Jiova bisin bɔt am?

¹³ “Natin nɔ de we a nid, we a nɔ go gɛt.” Devid bin fil se i gɛt ɔl wetin i nid bikɔs Jiova bin de gi am wetin i nid ɔltɛm. Devid bin ɛnjɔy tayt padi biznɛs bak wit Jiova, ɛn Jiova bin gladi fɔ am. Na dat mek i bin no se ilɛk wetin go apin to am leta, Jiova go kɔntinyu fɔ gi am ɔl wetin i nid. Bikɔs Devid bin abop se Jiova lɛk am ɛn i go kia fɔ am, dat bin ɛp am fɔ mek i nɔ wɔri. Bifo dat, i bin gɛt tru tru gladi-at ɛn satisfay maynd.—Sam 16:11.

14. Aw Jiova kin sho se i lɛk wi?

¹⁴ Jiova de sho se i lɛk wi bay di we aw i de kia fɔ wi, mɔ di tɛm dɛn we bad tin apin to wi. Klara,a we dɔn wok na Bɛtɛl pas 20 ia, nɔ bin no aw fɔ ɛp in famili we dɛn bin de gɛt siriɔs prɔblɛm dɛn. In papa bin gɛt strok, dɛn bin disfɛloship wan pan in sista dɛn, ɛn dɛn famili bin lɔs di smɔl biznɛs we dɛn bin gɛt ɛn dɛn os. Aw Jiova bin sho se i lɛk ɛn kia fɔ dɛn? Klara tɔk se: “Jiova bin mek shɔ se mi famili gɛt wetin dɛn nid ɛvride. Bɔku tɛm, i bin de ivin gi wi pas wetin wi nid. A kin tink bɔt aw Jiova bin ɛp wi, ɛn a nɔ go ɛva fɔgɛt aw i sho se i lɛk wi. We a kin tink bɔt dɛn tɛm dɛn de, i kin ɛp mi fɔ kɔntinyu fɔ sav Jiova wit gladi-at we ɔda prɔblɛm dɛn mit mi.”

15. Wetin mek Devid bin se i de fil fayn? (Luk bak di pikchɔ.)

¹⁵ “I de mek a fil fayn.” Tɛm dɛn de we Devid in at bin rili pwɛl bikɔs ɔf di prɔblɛm dɛn we bin de mit am. (Sam 18:​4-6) Bɔt Jiova in lɔv ɛn di we aw i bin de kia fɔ am bin mek i fil fayn. Jiova bin de kɛr Devid go “usay i nɔ go yagba fɔ natin” ɛn “usay i go gɛt kolat.” Bikɔs ɔf dis, Devid bin kɔntinyu fɔ gɛt trɛnk ɛn i bin ebul fɔ kɔntinyu fɔ sav Jiova wit gladi-at.​—Sam 18:​28-32.

16. Wetin Jiova dɔn du fɔ mek yu fil fayn?

¹⁶ Tide bak, “na bikɔs Jiova gɛt lɔv we nɔ de chenj, na dat mek wi nɔ day yet” we prɔblɛm dɛn mit wi. (Lam. 3:22; Kol. 1:11) Tink bɔt Rechɛl in ɛgzampul. In at bin rili pwɛl we in man lɛf am ɛn lɛf fɔ sav Jiova insay di COVID-19 pandɛmik. Wetin Jiova bin du fɔ ɛp am? I tɔk se: “Jiova bin mek shɔ se pipul dɛn du tin dɛn fɔ sho se dɛn lɛk mi. I mek bɔku padi dɛn bin de spɛn tɛm wit mi ɔltɛm, briŋ tin dɛn fɔ it, sɛn fayn mɛsej ɛn skripchɔ dɛn we de ɛnkɔrej mi, smayl to mi, ɛn kɔntinyu fɔ mɛmba mi se Jiova bisin bɔt mi. A kin tɛl Jiova tɛnki ɔltɛm fɔ we i gi mi big famili we rili lɛk mi.”

17. Wetin mek Devid “nɔ bin de fred”?

¹⁷ “A nɔ go fred wans a no se yu de wit mi.” Devid in layf bin de pan denja bɔku tɛm, ɛn i bin gɛt bɔku pawaful ɛnimi dɛn. Bɔt di lɔv we Jiova gɛt fɔ am bin mek i fil sef. Devid bin de si se Jiova de wit am ɔltɛm, ɛn dat bin de mek i fil fayn. So na dat mek i bin siŋ se: “[Jiova] pul di fred kɔmɔt pan mi.” (Sam 34:4) Pan ɔl we sɔntɛnde Devid bin de fred, i bin lɛf fɔ fred bikɔs i bin no se Jiova lɛk am.

18. We wi no se Jiova lɛk wi, aw dat kin ɛp wi we wi de fred?

¹⁸ We wi no se Jiova lɛk wi, aw dat de ɛp wi we tin dɛn apin to wi we de mek wi fred? Wan payɔnia we nem Suzi tɔk bɔt aw in ɛn in man bin fil we dɛn bɔypikin kil insɛf. Suzi tɔk se: “We dɛn kayn bad bad tin ya apin to yu, i kin rili afɛkt yu, ɛn i kin mek yu fred se ɔda bad tin dɛn go apin. Bɔt bikɔs Jiova lɛk wi, dat bin ɛp wi fɔ fil sef.” Rechɛl, we wi bin dɔn tɔk bɔt tɔk se: “Wan nɛt we mi at bin rili pwɛl ɛn we a bin de wɔri ɛn fred, a pre lawd wan to Jiova. As a dɔn fɔ pre so, mi at kol ɛn a lɛf fɔ wɔri. Jɔs lɛk aw kombra de mek in yɔŋbebi slip, na so misɛf slip. A nɔ go ɛva fɔgɛt da tɛm de.” Wan ɛlda we nem Tasɔs bin spɛn 4 ia na prizin bikɔs i nɔ gri fɔ jɔyn di ami. Aw Jiova bin sho se i lɛk am ɛn i bisin bɔt am? Di brɔda tɔk se: “Jiova gi mi pas wetin a bin nid. Dis bin mek a gɛt kɔnfidɛns se a kin abop pan am wit ɔl mi at. Dɔn bak, i bin yuz in spirit fɔ mek a gɛt gladi-at pan ɔl we a bin de na say we bin de mek mi at rili pwɛl. Dis bin ɛp mi fɔ si se di mɔ a abop pan Jiova, na di mɔ a de si se i lɛk mi. So a bigin fɔ rɛgyula payɔnia na prizin.”

KAM NIA YU GƆD WE GƐT LƆV

19. (a) We wi no se Gɔd lɛk wi, aw dat de afɛkt di tin dɛn we wi de tɔk insay wi prea dɛn? (b) Uswan pan di tin dɛn we dɛn yuz fɔ tɔk bɔt aw Jiova tan yu rili lɛk? (Luk di bɔks we gɛt di taytul “Wɔd dɛn we De Ɛp Wi fɔ No se Jiova Lɛk Wi.”)

¹⁹ Di ɛkspiriɛns dɛn we wi dɔn tɔk bɔt, sho se Jiova we na “di Gɔd we gɛt lɔv,” de wit wi! (2 Kɔr. 13:11) I bisin bɔt wi wan bay wan. Wi biliv se “In lɔv we nɔ de ɛva chenj sɔrawnd” wi. (Sam 32:10) Di mɔ we wi de tink bɔt aw i dɔn sho se i lɛk wi, na di mɔ wi de si am as rial pɔsin, ɛn na di mɔ wi go fil se wi gɛt tayt padi biznɛs wit am. Wi nɔ fɔ fred fɔ pre to am ɛn tɛl am aw wi rili nid in lɔv. Wi kin tɛl am bɔt di tin dɛn we de mek wi wɔri bikɔs wi gɛt kɔnfidɛns se i de ɔndastand ɛn i rɛdi fɔ ɛp wi.—Sam 145:​18, 19.

20. Aw di lɛk we Jiova lɛk wi de mek wi kam nia am?

²⁰ Jɔs lɛk aw wi kin go nia faya fɔ wam wisɛf we ples kol, na so wi de fil fɔ kam nia Jiova bikɔs i gɛt lɔv. So alaw Jiova in lɔv fɔ kɔrej yu ɛn gi yu kolat. Gladi bikɔs Jiova lɛk yu. Ɛn lɛ wi ɔl gri se i lɛk wi bay we wi de se: “A lɛk Jiova”!​—Sam 116:1.