Udat Na di Tru Gɔd?

Fɔ lɔng tɛm naw pipul dɛn dɔn de wɔship bɔku lay lay gɔd dɛn. Bɔt di Baybul tɔk bɔt wan Gɔd we “pawaful pas ɔl ɔda gɔd dɛn.” (Sɛkɛn Kronikul 2:​5) Udat na da Gɔd de? Ɛn wetin mek i pawaful pas ɔl ɔda gɔd dɛn we pipul dɛn de wɔship? Insay dis lɛsin, yu go lan bɔt wetin dis Gɔd want fɔ mek yu no bɔt am.

1. Wetin na Gɔd in nem, ɛn wetin sho se i want fɔ mek wi no in nem?

Gɔd tɛl wi bɔt insɛf insay di Baybul. I se: “Mi na Jiova. Na dat na mi nem.” (Rid Ayzaya 42:​5, 8, NWT.) Di nem “Jiova” na transleshɔn fɔ wan Ibru nem we bɔku masta sabi bukman dɛn se i min, “I De Mek Wetin I Want Bi.” Jiova want fɔ mek wi no in nem. (Ɛksodɔs 3:​15, NWT) Wetin mek wi fɔ biliv se dat na tru? Insay di Baybul Gɔd mek dɛn rayt in nem pas 7,000 tɛm!a “Di wangren tru Gɔd” ɔp na ɛvin ɛn dɔŋ na di wɔl na in nem Jiova.​—Jɔn 17:​3.

2. Wetin di Baybul tɛl wi bɔt Jiova?

Di Baybul se pan ɔl di gɔd dɛn we mɔtalman de wɔship, na Jiova na di wangren tru Gɔd. Wetin mek? Bɔku rizin dɛn de fɔ dat. Jiova gɛt pawa pas ɔlman, ɛn na in nɔmɔ “De Pantap Ɔlman na di wɔl.” (Rid Sam 83:​18, NWT.) Na in na “di Ɔlmayti,” we min se i gɛt pawa fɔ du ɛnitin we i want fɔ du. Na in “mek ɔltin” na ɛvin ɛn na di wɔl. (Rɛvɛleshɔn 4:​8, 11) Ɛn na Jiova nɔmɔ bin dɔn de frɔm trade trade ɛn i go kɔntinyu fɔ de sote go.​—Sam 90:​2.

3. Gɔd gɛt bɔku taytul dɛn bɔt na wangren nem i gɛt

Yu tink se i mata if yu yuz pɔsin in nem ɔ in taytul? Fɔ no di ansa, ple di VIDIO, dɔn una tɔk bɔt di kwɛstyɔn we de dɔŋ.

VIDIO: Bɔku taytul dɛn, bɔt Wan Nem (0:​41)

• Wetin na di difrɛns bitwin taytul lɛk “Lɔd,” ɛn pɔsin in nem?

Di Baybul se pipul dɛn de wɔship bɔku gɔd ɛn lɔd dɛn. Rid Sam 136:​1-3, NWT. Dɔn una tɔk bɔt dis kwɛstyɔn:

• Udat na “di Gɔd we pas ɔl ɔda gɔd dɛn” ɛn udat na “di Lɔd we pas ɔl ɔda lɔd dɛn”?

4. Jiova want yu fɔ no in nem ɛn yuz am

VIDIO: Yu Tink se Gɔd Gɛt Nem?​—Shɔt Pat (3:​11)

• Yu tink se Jiova want mek pipul dɛn no in nem? Wetin mek?

Jiova want pipul dɛn fɔ yuz in nem. Rid Romans 10:​13, dɔn una tɔk bɔt dɛn kwɛstyɔn dɛn ya:

• Wetin mek i impɔtant fɔ yuz Gɔd in nem we na Jiova?

• Aw yu kin fil we pɔsin de mɛmba yu nem ɛn yuz am?

• Aw yu tink se Jiova de fil we yu yuz in nem?

5. Jiova want fɔ mek yu bi in padi

VIDIO: A Bin De Fɛn di Tru Gɔd (8:​18)

• Insay di vidio, we Sotɛn bin lan bɔt Gɔd in nem, aw dat bin afɛkt am?

Bifo yu bi pɔsin in padi, na in nem fɔs yu de sabi. Rid Jems 4:​8a, dɔn una tɔk bɔt dɛn kwɛstyɔn dɛn ya:

• Wetin Jiova want yu fɔ du?

• We yu no Gɔd in nem ɛn yuz am, aw dat go ɛp yu fɔ go nia am?

WETIN YU DƆN LAN?

Di wangren tru Gɔd in nem na Jiova. I want fɔ mek wi no in nem ɛn yuz am so dat wi go bi in padi.

Rivyu

• Wetin mek Jiova difrɛn frɔm ɔl ɔda gɔd dɛn we pipul dɛn de wɔship?

• Wetin mek wi fɔ yuz Gɔd in nem?

• Wetin sho se Jiova want yu fɔ bi in padi?

DU MƆ RISACH

Lan bɔt fayv rizin dɛn we sho se Gɔd de.

“Yu Tink se Gɔd De?” (Atikul na di wɛbsayt)

Wetin mek i mek sɛns fɔ biliv se Gɔd bin dɔn de frɔm trade trade?

“Udat Mek Gɔd?” (Di Wachtawa, Ɔgɔst 1, 2014)

Lan wetin mek wi fɔ yuz Gɔd in nem ilɛksɛf wi nɔ sabi aw dɛn bin de kɔl am trade.

“Udat Na Jiova?” (Atikul na di wɛbsayt)

Yu tink se i mata us nem wi kɔl Gɔd? Lan bɔt wetin mek wi go se na wangren nem i gɛt.

“Ɔmɔs Nem dɛn Gɔd Gɛt?” (Atikul na di wɛbsayt)