STƆDI ATIKUL 23
SIŊ 2 Jiova Na Yu Nem
Jiova in Nem Impɔtant to Wi
Jiova se, “Una na mi witnɛs dɛn.”—AYZ. 43:10.
MEN PƆYNT
Fɔ sho aw wi go ɛp fɔ mek Jiova in nem oli ɛn pul di badnem we Setan dɔn put pan am.
1-2. Aw wi no se Jiova in nem impɔtant to Jizɔs?
JIOVA in nem impɔtant to Jizɔs pas ɛni ɔda tin. In na di men pɔsin we dɔn mek pipul dɛn no in Papa in nem. Jɔs lɛk aw wi lan na di atikul bifo dis wan, Jizɔs bin rɛdi fɔ day fɔ Jiova in nem ɛn ɔl wetin i tinap fɔ. (Mak 14:36; Ibru. 10:7-9) Ɛn afta di Wan Tawzin Ia we I Go De Rul dɔn, i go rɛdi fɔ gi ɔl di pawa to Jiova fɔ mek In nem oli. (1 Kɔr. 15:26-28) Di lɛk we Jizɔs lɛk Gɔd in nem de sho bak di kayn tayt padi biznɛs we i gɛt wit in Papa. I sho klia wan se Jizɔs lɛk di Pɔsin we gɛt da nem de.
2 Jizɔs kam na di wɔl fɔ tɔk bɔt in Papa in nem. (Jɔn 5:43; 12:13) I bin mek in disaypul dɛn no in Papa in nem. (Jɔn 17:6, 26) We Jizɔs bin de tich pipul dɛn ɛn pafɔm mirekul dɛn, i bin mek dɛn no klia wan se na Jiova gi am di sɛns ɛn pawa fɔ du dɛn tin dɛn de. (Jɔn 10:25) Infakt, Jizɔs bin beg Jiova fɔ protɛkt in disaypul dɛn “bikɔs ɔf [In] nem.” (Jɔn 17:11) So if na dis kayn we Jiova in nem impɔtant to Jizɔs, aw pɔsin go tɔk se in na Jizɔs in tru tru disaypul bɔt i nɔ sabi Jizɔs in Papa in nem ɛn i nɔ de yuz am?
3. Wetin wi go tɔk bɔt insay dis atikul?
3 Bikɔs wi na Kristian dɛn we de tray fɔ falamakata Jizɔs in futmak, wi rɛspɛkt ɛn lɛk in Papa in nem. (1 Pit. 2:21) Insay dis atikul, wi go si aw Jiova in nem de sho udat dɛn de prich di “gud nyuz bɔt di Kiŋdɔm.” (Mat. 24:14) Wi go tɔk bak bɔt aw Jiova in nem fɔ impɔtant to wi wan bay wan.
“PIPUL DƐN WE GO GƐT IN NEM”
4. (a) Wetin Jizɔs bin tɛl in disaypul dɛn jɔs bifo i go bak na ɛvin? (b) Us kwɛstyɔn wi go tɔk bɔt?
4 Jɔs bifo Jizɔs go bak na ɛvin, i tɛl in disaypul dɛn se: “Una go gɛt pawa we di oli spirit kam pan una, ɛn una go tɔk bɔt mi na Jerusɛlɛm, ɛn ɔlsay na Judia ɛn Sameria, ɛn na di say we fa pas ɔl na di wɔl.” (Akt 1:8) So dɛn nɔ go jɔs prich di gud nyuz na Izrɛl, bɔt dɛn go prich am bak na ɔda say dɛn na di wɔl. As tɛm de go, pipul dɛn ɔlsay na di wɔl go gɛt chans fɔ bi Jizɔs in disaypul dɛn. (Mat. 28:19, 20) Bɔt Jizɔs bin tɔk se: “Una go tɔk bɔt mi.” Fɔ se dɛn nyu disaypul dɛn ya go nid fɔ sabi Jiova in nem, ɔ dɛn go jɔs de tɔk bɔt Jizɔs? Di tin dɛn we dɛn tɔk bɔt na Akt chapta 15 ɛp wi fɔ ansa da kwɛstyɔn de.
5. Aw di apɔsul ɛn ɛlda dɛn na Jerusɛlɛm bin sho se ɔlman nid fɔ sabi Jiova in nem? (Luk bak di pikchɔ.)
5 Insay di ia 49 afta Krays, di apɔsul ɛn ɛlda dɛn na Jerusɛlɛm bin gɛt mitin fɔ tɔk bɔt wetin di Jɛntayl dɛn we nɔ sakɔmsayz yet nid fɔ du fɔ mek dɛn bi Kristian. We di mitin de dɔn, Jems we na Jizɔs in stɛp-brɔda bin tɔk se: “[Pita] dɔn tɔk gud gud wan bɔt aw Gɔd dɔn tɔn in atɛnshɔn to di neshɔn dɛn fɔ di fɔs tɛm fɔ tek pipul dɛn we go gɛt in nem.” Udat in nem Jems bin de tɔk bɔt? I bin kot bak di wɔd dɛn we prɔfɛt Emɔs tɔk we i se: “So dat di man dɛn we lɛf go luk fɔ Jiova wit ɔl dɛn at togɛda wit di pipul dɛn na ɔl di neshɔn dɛn, we na pipul dɛn we gɛt mi nem. Na Jiova tɔk dis.” (Akt 15:14-18) Dɛn nyu disaypul dɛn ya nɔ go jɔs nid fɔ lan bɔt Jiova, bɔt dɛn go bi pipul dɛn bak ‘we gɛt in nem.’ Dis min se dɛn go prich bɔt Gɔd in nem ɛn pipul dɛn go sabi dɛn bak fɔ da nem de.
Insay di mitin we di gɔvnin bɔdi we bin de insay di fɔstɛm Kristian dɛn tɛm bin gɛt, dɛn fetful man dɛn de bin sho klia wan se Kristian dɛn fɔ bi pipul dɛn we gɛt Gɔd in nem (Luk na paregraf 5)
6-7. (a) Wetin mek Jizɔs bin kam na di wɔl? (b) Us ɔda impɔtant rizin de we mek Jizɔs kam na di wɔl?
6 Jizɔs in nem min “Na Jiova de Sev,” ɛn na in Jiova bin yuz fɔ sev ɔl di wan dɛn we de sho se dɛn gɛt fet pan In ɛn in Pikin. Jizɔs kam na di wɔl fɔ gi in layf fɔ mɔtalman. (Mat. 20:28) We i pe di prayz fɔ fri mɔtalman, i mek dɛn gɛt di chans fɔ sev ɛn gɛt layf we go de sote go.—Jɔn 3:16.
7 Bɔt wetin mek mɔtalman bin nid pɔsin fɔ sev dɛn? Na bikɔs ɔf wetin bin apin na di gadin we bin de na Idɛn. Jɔs lɛk aw wi dɔn tɔk na di atikul bifo dis wan, wi fɔs mama ɛn papa we na Adam ɛn Iv bin tɔn dɛn bak pan Jiova ɛn dat bin mek dɛn lɔs di chans fɔ de sote go. (Jɛn. 3:6, 24) Bɔt Jizɔs kam na di wɔl fɔ du sɔntin we impɔtant pas fɔ sev mɔtalman. Setan bin tɔk lay lay tin dɛn bɔt Jiova fɔ pwɛl in nem. (Jɛn. 3:4, 5) So mɔtalman bin nid fɔ no se Jiova nɔ du ɛni bad ɛn in nem oli. Jizɔs bin du impɔtant tin fɔ mek Jiova in nem oli bikɔs na in Jiova bin sɛn ɛn In nem bin de pan am.
So if na dis kayn we Jiova in nem impɔtant to Jizɔs, aw pɔsin go tɔk se in na Jizɔs in tru tru disaypul bɔt i nɔ sabi Jizɔs in Papa in nem ɛn i nɔ de yuz am?
8. Wetin ɔl di wan dɛn we na Kristian nid fɔ ɔndastand?
8 Ɔl di wan dɛn we na Kristian ilɛk dɛn na Ju ɔ Jɛntayl go nid fɔ no di Pɔsin we go mek dɛn sev, dat na Jizɔs in Papa we na Jiova Gɔd. (Jɔn 17:3) Dɔn bak, jɔs lɛk Jizɔs, Jiova in nem go de pan dɛn. Dɛn go nid fɔ ɔndastand bak se i impɔtant fɔ lɛ dɛn mek da nem de oli. Na dat go mek dɛn sev. (Akt 2:21, 22) So ɔl Jizɔs in fetful disaypul dɛn bin nid fɔ lan bɔt Jiova ɛn Jizɔs. So naw wi ɔndastand wetin mek Jizɔs dɔn in prea we dɛn rayt na Jɔn 17 wit dɛn wɔd dɛn ya: “A dɔn mek dɛn no yu nem, ɛn a go kɔntinyu fɔ mek dɛn no am, so dat dɛn go lɛk ɔda pipul dɛn di sem we aw yu lɛk mi, so dat a go gɛt wanwɔd wit dɛn.”—Jɔn 17:26.
“UNA NA MI WITNƐS DƐN”
9. Wetin wi go du fɔ sho se Jiova in nem impɔtant to wi?
9 Ɔl Jizɔs in tru tru disaypul dɛn nid fɔ du sɔntin fɔ mek Jiova in nem oli. (Mat. 6:9, 10) Jiova in nem fɔ impɔtant to dɛn pas ɛni ɔda nem. Dat min se dɛn nid fɔ du sɔntin. Bɔt aw wi go ɛp fɔ mek Jiova in nem oli ɔ fɔ pruv se ɔl wetin Setan tɔk bɔt Jiova na lay?
10. Wetin Ayzaya chapta 42-44 tɔk bɔt we tan lɛk kɔt kes? (Ayzaya 43:9; 44:7-9) (Luk bak di pikchɔ.)
10 Ayzaya chapta 42 to 44 sho di impɔtant wok we wi gɛt fɔ mek Jiova in nem oli. Dɛn chapta dɛn de tɔk bɔt sɔntin we tan lɛk kɔt kes usay dɛn bin gɛt fɔ pruv udat na di tru Gɔd. Jiova bin tɛl ɔl di wan dɛn we se dɛn na gɔd dɛn fɔ pruv se dɛn na rial gɔd dɛn. Dɔn bak, jɔs lɛk aw dɛn kin du na kɔt, Jiova bin aks fɔ mek witnɛs dɛn kam ɛn pruv se dɛn gɔd dɛn de rial. Bɔt no witnɛs nɔ bin de!—Rid Ayzaya 43:9; 44:7-9.
Wi na witnɛs dɛn fɔ Jiova (Luk na paregraf 10 ɛn 11)
11. Wetin Jiova tɛl in pipul dɛn na Ayzaya 43:10-12?
11 Rid Ayzaya 43:10-12. Jiova bin tɛl in pipul dɛn se: “Una na mi witnɛs dɛn, ɛn mi na Gɔd.” Jiova de aks dɛn fɔ ansa dis kwɛstyɔn: “Ɛni ɔda Gɔd de apat frɔm mi?” (Ayz. 44:8) So wi gɛt di ɔnɔ fɔ ansa da kwɛstyɔn de. Wi go sho se Jiova na di wangren tru Gɔd bay di tin dɛn we wi de tɔk ɛn du. In nem impɔtant pas ɔl ɔda nem dɛn. Di we aw wi de liv wi layf go sho se wi rili lɛk Jiova ɛn wi go kɔntinyu fɔ de biɛn am ilɛk wetin Setan du to wi. We wi du dis, wi go gɛt chans fɔ ɛp fɔ mek In nem gɛt glori.
12. Aw di prɔfɛsi we de na Ayzaya 40:3, 5 bin kam tru?
12 Wi de falamakata Jizɔs Krays bay we wi de sɔpɔt Jiova in nem ɛn mek i gɛt rɛspɛkt. Ayzaya bin tɔk bak se pɔsin go “klia [ɔ, “rɛdi,” futnot] di rod fɔ Jiova.” (Ayz. 40:3) Aw dat bin apin? Jɔn we Bin De Baptayz Pipul Dɛn bin pripia di rod fɔ Jizɔs we Jiova bin sɛn ɛn we bin de tɔk fɔ Jiova. (Mat. 3:3; Mak 1:2-4; Lyuk 3:3-6) Da sem prɔfɛsi de bin tɔk se: “Dɛn go si Jiova in glori.” (Ayz. 40:5) Aw dat bin apin? We Jizɔs bin de na di wɔl, i bin de du wetin in Papa tɛl am fɔ du pafɛkt wan, so i bin tan lɛk se na Jiova insɛf bin kam na di wɔl.—Jɔn 12:45.
13. Aw wi go falamakata Jizɔs?
13 Jɔs lɛk Jizɔs, wisɛf na Jiova in witnɛs dɛn. Wi gɛt Jiova in nem ɛn wi de tɛl ɔlman bɔt di wɔndaful tin dɛn we i dɔn du. Bɔt fɔ mek wi go ebul fɔ du dis fayn wan, wi fɔ mek bak lɛ pipul dɛn no di impɔtant wok we Jizɔs dɔn du fɔ mek Jiova in nem oli. (Akt 1:8) Jizɔs na di men pɔsin we dɔn bi Jiova in Witnɛs ɛn wi de falamakata am. (Rɛv. 1:5) Bɔt aw wi go sho se Jiova in nem impɔtant to wi ɔl wan bay wan?
AW WI GO SHO SE JIOVA IN NEM IMPƆTANT TO WI?
14. Akɔdin to Sam 105:3, aw wi de fil bɔt Jiova in nem?
14 Na big big ɔnɔ wi gɛt fɔ gɛt Jiova in nem. (Rid Sam 105:3.) Jiova kin rili gladi we wi de bost bɔt in nem. (Jɛr. 9:23, 24; 1 Kɔr. 1:31; 2 Kɔr. 10:17) Fɔ “bost bɔt Jiova” min se wi gladi we in na wi Gɔd. Na big big ɔnɔ wi gɛt fɔ tɛl ɔda pipul dɛn se Jiova oli ɛn i de du ɔltin di rayt we. Wi nɔ fɔ ɛva shem fɔ tɛl wi wokmet dɛn, klasmet dɛn, neba dɛn, ɛn ɔda pipul dɛn se wi na Jiova Witnɛs! Setan want lɛ wi stɔp fɔ tɛl ɔda pipul dɛn bɔt Jiova in nem. (Jɛr. 11:21; Rɛv. 12:17) Infakt, Setan ɛn in lay lay prɔfɛt dɛn want mek pipul dɛn fɔgɛt bɔt Jiova in nem. (Jɛr. 23:26, 27) Bɔt bikɔs wi lɛk Jiova in nem, wi de kɔntinyu fɔ gladi fɔ tɔk bɔt am “ɔltɛm.”—Sam 5:11; 89:16.
15. Wetin i min fɔ kɔl Jiova in nem?
15 Wi de kɔntinyu fɔ kɔl Jiova in nem. (Joɛl 2:32; Rom. 10:13, 14) Fɔ kɔl Jiova in nem nɔ jɔs min fɔ sabi in nem ɛn fɔ yuz am. I min se wi fɔ no Gɔd as rial Pɔsin, abop pan am, ɛn fɔ luk to am fɔ ɛp ɛn gayd wi. (Sam 20:7; 99:6; 116:4; 145:18) Wi de tɛl ɔda pipul dɛn bak bɔt in nem ɛn in kwaliti dɛn, ɛn wi de ɛnkɔrej dɛn fɔ ripɛnt ɛn du tin dɛn we go mek Jiova gladi fɔ dɛn.—Ayz. 12:4; Akt 2:21, 38.
16. Aw wi go pruv se Setan na layman?
16 Wi rɛdi fɔ sɔfa fɔ Jiova in nem. (Jems 5:10, 11) We wi kɔntinyu fɔ de biɛn Jiova ilɛk wi de sɔfa, wi de pruv se Setan na layman. Insay Job in tɛm, Setan bin lay pan di wan dɛn we de sav Jiova se: “Pɔsin go gi ɔl wetin i gɛt fɔ sev in layf.” (Job 2:4) Setan bin tɔk se na we tin fayn nɔmɔ pipul dɛn go sav Jiova, bɔt if tin tranga fɔ dɛn, dɛn go stɔp fɔ sav Jiova. Job we na man we bin fetful bin pruv se wetin Setan tɔk na lay. Wisɛf gɛt chans fɔ pruv se ilɛk wetin Setan du to wi, wi nɔ go ɛva stɔp fɔ sav Jiova. Wi nɔ gɛt wan dawt se Jiova go kɔntinyu fɔ protɛkt wi bikɔs ɔf in nem.—Jɔn 17:11.
17. Akɔdin to 1 Pita 2:12, wetin bak wi go du fɔ mek Jiova in nem gɛt glori?
17 Wi de sho se wi gɛt rɛspɛkt fɔ Jiova in nem. (Prɔv. 30:9; Jɛr. 7:8-11) Bikɔs wi de tɔk bɔt Jiova ɛn wi gɛt in nem, di tin dɛn we wi de du go mek Jiova gɛt prez ɔ mek i gɛt badnem. (Rid 1 Pita 2:12.) So, wi fɔ du ɔl wetin wi ebul fɔ mek Jiova gladi bay di tin dɛn we wi de tɔk ɛn du. We wi du dat, wi go mek in nem gɛt glori pan ɔl we wi nɔ pafɛkt.
18. Us ɔda tin wi go du fɔ pruv se Jiova in nem impɔtant to wi? (Luk bak di futnot.)
18 Wi bisin mɔ bɔt Jiova in nem pas aw wi bisin bɔt wetin ɔda pipul dɛn tink bɔt wi. (Sam 138:2) Wetin mek dis rili impɔtant? Na bikɔs sɔntɛm di lɛk we wi lɛk Jiova in nem go mek di pipul dɛn we de arawnd wi tɔk bad bɔt wi.a Jizɔs bin rɛdi fɔ day shemful wan lɛk kriminal fɔ ɔnɔ Jiova in nem. I “nɔ tek shem mek natin,” we min se i nɔ bin de fil bad ɔ wɔri bɔt wetin ɔda pipul dɛn go tink bɔt am. (Ibru. 12:2-4) Di tin we i bin pe atɛnshɔn pan na fɔ du wetin Gɔd want.—Mat. 26:39.
19. Aw yu de fil bɔt Jiova in nem? Wetin mek?
19 Wi gladi fɔ gɛt Jiova in nem ɛn wi si am se na big big ɔnɔ wi gɛt fɔ mek dɛn kɔl wi Jiova Witnɛs dɛn. Bikɔs ɔf dat, wi rɛdi fɔ bia ilɛk wetin ɔda pipul dɛn tɔk bɔt wi. Jiova in nem impɔtant to wi pas wetin pipul dɛn tink bɔt wi. So lɛ wi mek-ɔp wi maynd fɔ kɔntinyu fɔ prez Jiova in nem ilɛk wetin Setan du fɔ stɔp wi. We wi du dat, wi go pruv se Jiova in nem impɔtant to wi, jɔs lɛk aw i impɔtant to Jizɔs Krays.
SIŊ 10 Prez Wi Gɔd, Jiova!
a Ivin Job we na bin fetful man bin bigin fɔ tink tumɔs bɔt aw ɔda pipul dɛn de si am we in tri padi dɛn tɔk se i go mɔs dɔn du bad. Fɔs, we Job bin lɔs ɔl in prɔpati ɛn pikin dɛn, i “nɔ sin ɔ tɔk se Gɔd de du ɛnitin bad.” (Job 1:22; 2:10) Bɔt, we in padi dɛn tɔk se i go dɔn du bad, i bin bigin tɔk “fulish tɔk dɛn.” In yon gudnem bin impɔtant to am pas fɔ ɔnɔ Jiova.—Job 6:3; 13:4, 5; 32:2; 34:5.