WE YU DE STAT FƆ TƆK
LƐSIN 2
Tɔk Nachɔral Wan
Prinsipul: “Wɔd we pɔsin tɔk di rayt tɛm rili fayn!”—Prɔv. 15:23.
Wetin Filip Bin Du?
1. Wach di VIDIO, ɔ rid Akt 8:30, 31. Dɔn tink bɔt dɛn kwɛstyɔn dɛn ya:
Aw Filip stat fɔ tɔk to di man?
Wetin mek dis na bin nachɔral we fɔ stat fɔ tɔk ɛn tɔk bɔt sɔntin we dis man nɔ bin sabi?
Wetin Wi Lan Frɔm Filip?
2. If wi alaw di tɔk fɔ go nachɔral wan, i pɔsibul se di pɔsin go fil fri ɛn rɛdi fɔ lisin to wi mɛsej.
Falamakata Filip
3. Wach di pɔsin. Di we aw pɔsin de mek in fes ɛn in bɔdi kin tɛl wi bɔku tin bɔt am. Di pɔsin luk lɛk se i want fɔ tɔk to yu? Sɔntɛm yu go stat fɔ tɔk bɔt wan tru tin na di Baybul bay we yu aks dis kwɛstyɔn, “Yu bin no se . . . ?” Nɔ fos fɔ tɔk to pɔsin we nɔ want fɔ tɔk.
4. Na fɔ peshɛnt. Nɔ tink se yu fɔ tɔk bɔt di Baybul wantɛm wantɛm. Wet fɔ di rayt tɛm fɔ tɔk to di pɔsin so dat yu go tɔk am nachɔral wan. Sɔntɛnde, i go min se yu gɛt fɔ wet te yu gɛt ɔda chans fɔ tɔk to di pɔsin.
5. Rɛdi fɔ ajɔst. I go bi se di tɔk de go di we aw yu nɔ de ɛkspɛkt. Yu fɔ rɛdi fɔ tɔk sɔntin we impɔtant to di pɔsin, ilɛksɛf i min se yu go tɔk sɔntin frɔm di Baybul we difrɛn frɔm wetin yu dɔn pripia.