ƐNDNOT DƐN
1 JIOVA
Gɔd in nem na Jiova ɛn i min: “I De Mek Wetin I Want Bi.” Na Jiova na di ɔlmayti Gɔd, ɛn na in mek ɔltin. I gɛt di pawa fɔ du ɛnitin we i disayd fɔ du.
Insay di Ibru langwej, dɛn rayt Gɔd in nem wit 4 lɛta dɛn. Insay Inglish, dɛn lɛta dɛn ya tinap fɔ YHWH ɔ JHVH. Gɔd in nem de insay di Ibru Skripchɔ lɛk 7,000 tɛm so. Pipul dɛn ɔlsay na di wɔl de kɔl Jiova in nem difrɛn we dɛn insay dɛn langwej.
2 “NA GƆD TƐL PIPUL ƆLTIN WE RAYT NAIN BUK”
Di Baybul na Gɔd in buk, bɔt i yuz man dɛn fɔ rayt am. Dis jɔs tan lɛk we wan bɔsman tɛl in sɛktri fɔ rayt lɛta fɔ am, ɛn na wetin i de tɛl am i fɔ rayt. Gɔd bin yuz in oli spirit fɔ gayd di pipul dɛn we rayt di Baybul fɔ rayt wetin i want. Gɔd in spirit bin de gayd dɛn difrɛn we dɛn, sɔntɛnde, Gɔd bin de mek dɛn si vishɔn ɔ drim fɔ mek dɛn rayt wetin i want dɛn fɔ rayt.
3 ADVAYS Ɔ LƐSIN DƐN WE WI GO LAN FRƆM GƆD IN LƆ [PRINSIPUL]
Dis na tichin dɛn insay di Baybul we de ɛksplen di men tin dɛn we di Baybul de tich. Fɔ ɛgzampul, di advays we se “bad padi dɛn go mek una pwɛl una gud abit dɛn,” de tich wi se di pipul dɛn we wi de kip kɔmpin wit go mek wi gɛt gud abit dɛn ɔ bad abit dɛn. (Fɔs Lɛta Fɔ Kɔrint 15:33, NW) Ɛn di advays we se “na wetin una plant, una go gɛt,” de tich wi se ɛnitin we wi du na in go fala wi.—Lɛta Fɔ Galeshya 6:7.
4 WETIN DI BAYBUL BIN DƆN TƆK
Dis na mɛsej we kɔmɔt frɔm Gɔd. I kin bi wetin Gɔd want fɔ du, aw i want wi fɔ biev, i kin bi lɔ, ɔ jɔjmɛnt. I kin bi bak mɛsej bɔt sɔntin we go apin tumara bambay. Bɔku tin dɛn de we di Baybul bin dɔn tɔk we dɔn ɔlrɛdi apin.
5 WETIN DI BAYBUL TƆK BƆT DI MƐSAYA
Na Jizɔs du bɔku pan di tin dɛn we di Baybul bin dɔn tɔk bɔt di Mɛsaya. Rid di bɔks we se “Wetin di Baybul Bin Dɔn Tɔk bɔt di Mɛsaya.”
▸ Chapta. 2, par. 17, ftn.
6 WETIN JIOVA WANT FƆ DI WƆL
Jiova bin mek di wɔl fɔ bi Paradays fɔ mek mɔtalman dɛn we lɛk am go de de. Wetin i want nɔ chenj. I nɔ go te igen, Gɔd go pul ɔl di bad bad tin dɛn ɛn gi in pipul dɛn layf we go de sote go.
7 SETAN
Setan na di fɔs enjɛl we nɔ bin obe Gɔd. In nem Setan min “pɔsin we gɛt trangayes,” bikɔs i fɛt agens Jiova. Dɛn kin kɔl am bak, Dɛbul, we min “pɔsin we de pwɛl ɔda pɔsin in nem.” Dɛn gi am dis nem bikɔs i de se tin we nɔto tru bɔt Gɔd ɛn i de ful pipul dɛn.
8 ENJƐL DƐN
Jiova bin mek di enjɛl dɛn lɔng tɛm bifo i mek di wɔl. I mek dɛn fɔ de na ɛvin. Na bɔku bɔku enjɛl dɛn de na ɛvin. (Daniɛl 7:10) Dɛn ɔl gɛt nem ɛn difrɛn abit dɛn, ɛn di enjɛl dɛn we kɔntinyu fɔ de biɛn Jiova nɔ de gri fɔ mek mɔtalman wɔship dɛn. Dɛn gɛt difrɛn pozishɔn dɛn ɛn Jiova dɔn gi dɛn difrɛn wok dɛn fɔ du. Sɔm pan di wok dɛn na fɔ sav na di say we Jiova sidɔm, fɔ kɛr in mɛsej dɛn, fɔ protɛkt ɛn gayd in savant dɛn na di wɔl, fɔ tɔk bɔt in jɔjmɛnt dɛn, ɛn fɔ sɔpɔt di prichin wok. (Sam 34:7; Rɛvɛleshɔn 14:6; 22:8, 9) Dɛn go jɔyn Jizɔs tumara bambay fɔ fɛt di wɔ we dɛn kɔl Amagɛdɔn.—Rɛvɛleshɔn 16:14, 16; 19:14, 15.
▸ Chapta. 3, par. 5; Chapta. 10, par. 1
9 SIN
Sin na ɛnitin we wi de fil, tink bɔt, ɔ du we de agens Jiova ɔ wetin i want. Sin de pwɛl wi padi biznɛs wit Gɔd, so Gɔd dɔn gi wi in lɔ dɛn, ɛn i dɔn gi wi advays ɔ lɛsin dɛn we go ɛp wi fɔ mek wi nɔ sin bay wilful wan. Jiova bin mek ɔltin pafɛkt, bɔt we Adam ɛn Iv bin disayd nɔ fɔ obe Jiova, dɛn bin sin ɛn dɛn nɔ pafɛkt igen. Dɛn ol ɛn day, ɛn bikɔs wi gɛt sin frɔm Adam, wisɛf de ol ɛn day.
▸ Chapta. 3, par. 7; Chapta. 5, par. 3
10 AMAGƐDƆN
Dis na Gɔd in wɔ fɔ dɔnawe wit Setan in wikɛd wɔl ɛn ɔl bad pipul dɛn.
▸ Chapta. 3, par. 13; Chapta. 8, par. 18
11 GƆD IN KIŊDƆM
Gɔd in Kiŋdɔm na wan gɔvmɛnt we Jiova dɔn mek na ɛvin. Na Jizɔs de rul as Kiŋ na dis Kiŋdɔm. Tumara bambay, Jiova go yuz dis Kiŋdɔm fɔ pul kɔmɔt ɔl di bad tin dɛn na di wɔl. Gɔd in Kiŋdɔm go rul oba di wan ol wɔl.
12 JIZƆS KRAYS
Na Jizɔs fɔs Gɔd mek bifo i mek ɛni ɔda tin. Jiova bin sɛn Jizɔs na dis wɔl fɔ kam day fɔ ɔl mɔtalman. Afta dɛn kil Jizɔs, Jiova bin gi am layf bak. Jizɔs de rul naw na ɛvin as Kiŋ na Gɔd in Kiŋdɔm.
13 WETIN DI BAYBUL TƆK BƆT DI SƐVINTI WIK?
Di Baybul bin dɔn tɔk se di Mɛsaya go kam. Dis go apin di tɛm we di Baybul kɔl di 69 wik, we bigin insay di ia 455 bifo Krays ɛn i ɛnd insay di ia 29.
Aw wi no se na insay di ia 29 i bin ɛnd? Wi no dis bikɔs di 69 wik bin bigin insay di ia 455 bifo Krays we Nɛimaya bin kam na Jerusɛlɛm ɛn bigin fɔ bil di siti. (Daniɛl 9:25; Nɛimaya 2:1, 5-8) Jɔs lɛk aw di wɔd “dɔzin” kin mek wi tink bɔt di nɔmba 12, na so di wɔd “wik” de mɛmba wi bɔt di nɔmba 7. Di wik dɛn we di Baybul tɔk bɔt na ya nɔto di sɛvin dez wik dɛn we wi sabi. Bɔt i min se ɛni wan wik tinap fɔ sɛvin ia, jɔs lɛk wetin di Baybul kin min we i tɔk bɔt “wan de fɔ wan ia.” (Di Nɔmba Dɛm 14:34; Izikɛl 4:6) So if wan wik na sɛvin ia, dat min se di 69 wik go bi 483 ia (69 x 7). If wi kɔnt 483 ia frɔm 455 bifo Krays, dat go tek wi to di ia 29. Dis na di ia we Jizɔs bin baptayz ɛn bi di Mɛsaya!—Lyuk 3:1, 2, 21, 22.
Di Baybul bin tɔk bak bɔt wan ɔda wik, we na ɔda sɛvin ia. Na insay dis sɛvin ia, dat na insay di ia 33, dɛn go kil di Mɛsaya, ɛn na insay di ia 36, dɛn go prich di gud nyuz bɔt Gɔd in Kiŋdɔm na ɔl di neshɔn dɛn nɔto to di Ju pipul dɛn nɔmɔ.—Daniɛl 9:24-27.
14 DI LAY LAY TICHIN BƆT DI TRINITI
Di Baybul tich se na Jiova mek ɔltin ɛn na Jizɔs fɔs mek bifo i mek ɔl di ɔda tin dɛn. (Lɛta Fɔ Kɔlɔse 1:15, 16) Jizɔs nɔto di Ɔlmayti Gɔd. I nɔ ɛva tɔk se i ikwal to Gɔd. Infakt i bin se: “Mi Papa pas mi.” (Jɔn 14:28; Fɔs Lɛta Fɔ Kɔrint 15:28) Bɔt sɔm rilijɔn dɛn de tich di Triniti. Dɛn se na tri pɔsin mek wan Gɔd: di Papa, di Pikin, ɛn di oli spirit. Di wɔd “Triniti” nɔ de insay di Baybul. Dis na lay lay tichin.
Di oli spirit na Gɔd in pawa we i de yuz fɔ du wetin i want. Nɔto pɔsin. Fɔ ɛgzampul, “Gɔd in spirit kam insay” di Kristian dɛn we bin de trade, ɛn Jiova bin dɔn tɔk se: “A go gi ɔlman mi spirit.”—Di Apɔsul Dɛn Wok [Akt] 2:1-4, 17.
▸ Chapta. 4, par. 12; Chapta. 15, par. 17
15 DI KRƆS
We tru Kristian dɛn de wɔship Gɔd, dɛn nɔ de yuz di krɔs. Wetin mek?
Fɔ lɔng tɛm, dɛn dɔn de yuz di krɔs insay lay lay rilijɔn. Trade trade, dɛn bin de yuz di krɔs fɔ wɔship tin dɛn we Gɔd mek, ɛn yuz am bak insay di sɛrimɔni we dɛn bin de mek fɔ du mami ɛn dadi biznɛs we dɛn de wɔship lay lay gɔd dɛn. Insay di fɔs 300 ia afta Jizɔs day, Kristian dɛn nɔ bin de yuz di krɔs we dɛn de wɔship. Bɔt leta, di Roman Kiŋ we nɛm Kɔnstantayn bin mek di krɔs as sayn fɔ Kristian rilijɔn. Dɛn bin yuz dis sayn fɔ tray fɔ mek pipul dɛn no mɔ bɔt di Kristian rilijɔn. Bɔt di krɔs nɔ gɛt ɛnitin fɔ du wit Jizɔs Krays. Di New Catholic Encyclopedia tɔk se: “Pipul dɛn we bin de bifo di tɛm we Kristian rilijɔn bigin, bin de yuz di krɔs ɛn di wan dɛnsɛf we nɔto Kristian bin de yuz am.”
Jizɔs nɔ day pan krɔs. Di Grik wɔd dɛn we dɛn bin yuz fɔ translet “krɔs” min “stik we tinap stret,” “wan bod,” ɔ “wan stik.” The Companion Bible tɔk se: “No wɔd nɔ de insay di Grik langwej we dɛn bin yuz fɔ rayt di [Nyu Tɛstamɛnt] we min tu bod dɛn.” Jizɔs bin day pan stik we tinap stret.
Jiova nɔ want wi fɔ yuz imej ɔ sayn dɛn na wi wɔship.—Ɛksodɔs 20:4, 5; Fɔs Lɛta Fɔ Kɔrint 10:14.
16 DI MƐMORIAL
Jizɔs bin tɛl in disaypul dɛn fɔ mɛmba in day. Dɛn kin du dis ɛvri ia insay Naysan 14, di sem tɛm we di Izrɛlayt dɛn bin de sɛlibret di Pasova. Na di Mɛmorial, dɛn kin pas bred ɛn wayn we tinap fɔ Jizɔs in bɔdi ɛn blɔd to ɔlman we kam di Mɛmorial. Di wan dɛn we go rul wit Jizɔs na ɛvin go it di bred ɛn drink di wayn. Di wan dɛn we gɛt di op fɔ liv sote go na dis wɔl go atɛnd di Mɛmorial wit rɛspɛkt bɔt dɛn nɔ go it di bred ɔ drink di wayn.
17 SOL
Insay di Inglish New World Translation, dɛn yuz di wɔd “sol” fɔ (1) pɔsin, (2) animal, ɔ (3) di layf we mɔtalman ɔ animal gɛt. Lɛ wi si sɔm ɛgzampul dɛn:
Pɔsin. “Insay Noa in tɛm . . . smɔl pipul dɛn, dat na et sol dɛn nɔmɔ,” bin sev we da Ebi Ebi Ren bin kam. (Pita In Fɔs Lɛta 3:20, NW) Na ya, di wɔd sol min pipul dɛn; dat na Noa ɛn in wɛf, dɛn tri bɔy pikin dɛn, ɛn dɛn pikin dɛn wɛf dɛn.
Animal. “Gɔd tɔk se: ‘Lɛ di wata ful-ɔp wit tin dɛn we gɛt layf [“sol dɛn,” futnot], ɛn lɛ tin dɛn we de flay, flay ɔp di skay.’ Dɔn Gɔd bin se: ‘Lɛ ɔlkayn animal [“sol dɛn,” futnot] kam na di wɔl. Animal dɛn lɛk di wan fɔ mɛn, di wan we de drɛg na grɔn, ɛn wayl animal dɛn. Dɛn ɔl fɔ gɛt dɛn kɔmpin.’ Ɛn na so ɔltin bi.”—Jɛnɛsis 1:20, 24, NW.
Di layf we mɔtalman ɛn animal gɛt. Jiova bin tɛl Mozis se: “Ɔl di pipul dɛn we bin want fɔ kil yu, [“sol,” futnot] dɔn day.” (Ɛksodɔs 4:19, NW) We Jizɔs bin de na di wɔl, i bin se: “Mi na di gud shɛpad; di gud shɛpad de gi in layf [“sol,” futnot] fɔseka in ship dɛn.”—Jɔn 10:11, NW.
We pɔsin du sɔntin bak wit ɔl in “sol,” dis min se i want fɔ du am ɛn i de du am di bɛst we aw i sabi. (Matyu 22:37; Ditarɔnɔmi 6:5) Dɛn kin yuz di wɔd “sol” bak fɔ tɔk bɔt wetin ɛnitin we gɛt layf go want. So wi go se we pɔsin dɔn day na in sol dɔn day.—Di Nɔmba Dɛn 6:6, NW; Prɔvabs 23:2, NW; Ayzaya 56:11, NW; Egay 2:13, NW.
▸ Chapta 6, par. 5, futnot; Chapta 15, par. 17
18 SPIRIT
Di Ibru ɛn Grik wɔd dɛn we dɛn yuz fɔ translet “spirit” insay di Inglish New World Translation kin min difrɛn tin dɛn. Bɔt dɛn min sɔntin we wi nɔ de si, lɛk di briz ɔ di blo we mɔtalman ɛn animal kin blo. Dɛn wɔd ya kin min bak spirit pɔsin ɔ di oli spirit, we na di pawa we Gɔd de yuz fɔ du wetin i want. Di Baybul nɔ tich se sɔntin de insay pɔsin we go kɔntinyu fɔ liv afta i dɔn day.—Ɛksodɔs 35:21; Sam 104:29; Matyu 12:43; Lyuk 11:13.
▸ Chapta 6, par. 5, futnot; Chapta 15, par. 17
19 GƐƐNA
Gɛɛna na di nem fɔ wan ples we de nia Jerusɛlɛm usay dɛn bin de trowe ɛn bɔn dɔti. Natin nɔ de we pruv se insay Jizɔs in tɛm dɛn bin de bɔn animal ɔ mɔtalman we gɛt layf na dis ples. So Gɛɛna nɔ min ples we wi nɔ de si, usay dɛn de du bad bad tin dɛn to pipul dɛn we dɔn day ɛn bɔn dɛn sote go. We Jizɔs bin de tɔk bɔt di wan dɛn we dɛn trowe insay Gɛɛna, i bin de tɔk bɔt aw dɛn go dɔnawe wit dɛn kpatakpata wan.—Matyu 5:22; 10:28.
20 DI AWA FADA PREA
Dis na di prea we Jizɔs tich in disaypul dɛn. Na prea we de tich wi aw fɔ pre to Jiova. Fɔ ɛgzampul, Jizɔs bin tich wi fɔ pre dis we:
“Mek ɔlman ɔnɔ yu nem”
Wi de pre fɔ mek Jiova pul ɔl di bad nem we dɛn dɔn put pan am. So dat ɔl di wan dɛn we de na ɛvin ɛn dis wɔl go ɔnɔ ɛn rɛspɛkt Gɔd in nem.
“Lɛ yu Kiŋdɔm kam”
Wi de pre fɔ mek Gɔd in gɔvmɛnt dɔnawe wit Setan in wikɛd wɔl, mek i rul oba di wan ol wɔl, ɛn mek di wɔl bi Paradays.
“Lɛ wetin yu want, bi na di wɔl”
Wi de pre fɔ mek wetin Gɔd want fɔ di wɔl bi, so dat pafɛkt mɔtalman dɛn we de obe am go de sote go na Paradays, jɔs lɛk wetin Jiova want we i bin mek mɔtalman.
21 DI DAY WE JIZƆS DAY FƆ WI
Jiova mek Jizɔs kam day fɔ wi so dat i go sev mɔtalman frɔm sin ɛn day. Di day we Jizɔs kam day fɔ wi na di prayz we wi nid fɔ mek wi go gɛt pafɛkt layf we Adam bin lɔs, ɛn fɔ mek wi go gɛt tayt padi biznɛs wit Jiova. Gɔd sɛn Jizɔs kam na dis wɔl fɔ mek i go day fɔ wi ɔl. Bikɔs Jizɔs day fɔ wi, wi ɔl gɛt di chans fɔ de sote go ɛn bi pafɛkt mɔtalman.
▸ Chapta. 8, par. 21; Chapta. 9, par. 13
22 WETIN MEK DI IA 1914 RILI IMPƆTANT?
Di tin dɛn we di Baybul bin dɔn tɔk se go apin na Daniɛl chapta 4 tich wi se Gɔd in Kiŋdɔm go bigin rul insay 1914.
Di tin dɛn we di Baybul bin dɔn tɔk se go apin: Jiova bin mek Kiŋ Nɛbyukadnɛza drim wan drim we de tɔk bɔt wan big big stik we dɛn bin kɔt. Insay da drim de, dɛn bin rap ayɛn ɛn kɔpa rayt rawnd di stik fɔ mek i nɔ gro igen fɔ “sɛvin tɛm.” Afta dat di stik go gro bak.—Daniɛl 4:1, 10-16.
Wetin di tin dɛn we di Baybul bin dɔn tɔk se go apin min fɔ wi?: Di stik tinap fɔ di rul we Gɔd de rul. Bɔku tɛm, Jiova dɔn de yuz kiŋ dɛn na Jerusɛlɛm fɔ rul di Izrɛlayt dɛn. (Fɔs Kronikul 29:23) Bɔt dɛn kiŋ dɛn de nɔ bin kɔntinyu fɔ fetful, ɛn dat bin mek dɛn nɔ kɔntinyu fɔ rul. Dɛn bin pwɛl Jerusɛlɛm insay di ia 607 bifo Krays. Na da tɛm de di “sɛvin tɛm” we di Baybul tɔk bɔt bigin. (Sɛkɛn Kiŋ 25:1, 8-10; Izikɛl 21:25-27) We Jizɔs bin se, “Dɛn pipul we nɔ sabi Gɔd, go pwɛl Jerusɛlɛm ɔltogɛda, te dɛn kɔmɔt na pawa,” i bin de tɔk bɔt di “sɛvin tɛm.” (Lyuk 21:24) So di “sɛvin tɛm” nɔ bin ɛnd di tɛm we Jizɔs bin de na di wɔl. Jiova bin prɔmis fɔ chuz wan kiŋ di tɛm we di “sɛvin tɛm” go dɔn. Di rul we dis nyu Kiŋ Jizɔs go rul, go briŋ bɔku bɔku blɛsin fɔ Gɔd in pipul dɛn ɔlsay na di wɔl sote go.—Lyuk 1:30-33.
Di tɛm we di “sɛvin tɛm” las fɔ: Di “sɛvin tɛm” bin las fɔ 2,520 ia. If wi kɔnt 2,520 ia frɔm di ia 607 bifo Krays, i go briŋ wi to di ia 1914. Na da tɛm de Jiova mek Jizɔs, di Mɛsaya, Kiŋ fɔ Gɔd in Kiŋdɔm na ɛvin.
Aw wi ebul fɔ gɛt di nɔmba 2,520? Di Baybul se tri ɛn af tɛm ikwal to 1,260 dez. (Rɛvɛleshɔn 12:6, 14) So di “sɛvin tɛm” na we wi dɔbul 1,260 dez, we go gi wi 2,520 dez. Di 2,520 dez ikwal to 2,520 ia jɔs lɛk wetin di Baybul kin min we i tɔk bɔt “wan de fɔ wan ia.”—Di Nɔmba Dɛm 14:34; Izikɛl 4:6.
23 MAYKƐL WE NA DI ENJƐL DƐN CHIF
Na wan enjɛl nɔmɔ di Baybul tɔk bɔt we na di “enjɛl dɛn chif,” ɛn in nem na Maykɛl.—Daniɛl 12:1; Jud In Lɛta 9.
Maykɛl na di lida fɔ ɔl di enjɛl dɛn we fetful to Gɔd. Rɛvɛleshɔn 12:7 tɔk se: “Maykɛl ɛn in enjɛl dɛn go fɛt di dragɔn . . . wit in yon mɛsenja dɛn [“enjɛl dɛn,” NW].” Di Baybul buk we nem Rɛvɛleshɔn tɔk se di lida fɔ Gɔd in fetful enjɛl dɛn na Jizɔs, so Maykɛl na di ɔda nem fɔ Jizɔs.—Rɛvɛleshɔn 19:14-16.
24 DI LAS DEZ
Dis min di tɛm we impɔtant tin dɛn go apin na di wɔl jɔs bifo Gɔd in Kiŋdɔm dɔnawe wit Setan in wɔl. We di Baybul tɔk bak bɔt di tɛm we “di wɔl de dɔn” ɛn di tɛm we mɔtalman Pikin “de kam bak,” i min dis sem tɛm. (Matyu 24:3, 27, 37) Di las dez bigin di tɛm we Gɔd in Kiŋdɔm bigin fɔ rul na ɛvin insay di ia 1914, ɛn i go ɛnd di tɛm we Gɔd go dɔnawe wit Setan in wɔl na di wɔ we dɛn kɔl Amagɛdɔn.—Sɛkɛn Lɛta To Timoti 3:1; Pita In Sɛkɛn Lɛta 3:3.
25 FƆ GƐT LAYF BAK
Dis na we Gɔd gi layf bak to pɔsin we dɔn day. Na nayn tɛm di Baybul tɔk bɔt pipul dɛn we bin get layf bak. Ilayja, Ilaysha, Jizɔs, Pita, ɛn Pɔl, bin gi layf bak to pipul dɛn we bin dɔn day. Na Gɔd in pawa mek dɛn bin ebul fɔ du dis. Jiova prɔmis fɔ gi layf bak to “gud ɔ bad,” pipul dɛn we dɔn day, na dis wɔl. (Di Apɔsul Dɛn Wok [Akt] 24:15) Di Baybul tɔk bak bɔt pipul dɛn we Gɔd dɔn chuz, we go gɛt layf bak fɔ go de na ɛvin wit Jizɔs.—Jɔn 5:28, 29; 11:25; Lɛta Fɔ Filipay 3:11; Rɛvɛleshɔn 20:5, 6.Chapta. 9, par. 13
26 JUJU BIZNƐS (DƐBUL DƐN)
Dis na we pɔsin kin tray fɔ tɔk to bad spirit dɛn. Dɛn kin du dis bay dɛnsɛf ɔ dɛn kin go to wich dɔktɔ, ɔ pɔsin we de lukin-grɔn. Pipul dɛn de du dis bikɔs dɛn biliv di lay lay tichin bɔt dayman. Dɛn biliv se we pɔsin day in spirit go kɔntinyu fɔ liv ɛn tɔn to pawaful gost. Di dɛbul dɛn de tray bak fɔ mek mɔtalman dɛn nɔ obe Gɔd. Fɔ stɔdi bɔt sta dɛn, lukin-grɔn, majik, wich, kɔlt, fɔ biliv se sɔntin go briŋ gud lɔk ɔ bad lɔk to yu, ɔl dis na juju biznɛs. Bɔku buk dɛn, fim dɛn, pikchɔ dɛn, ɛn ivin siŋ dɛn de mek di dɛbul dɛn, majik, ɛn wich tan lɛk sɔntin we nɔ bad. Bɔku bɛrin sɛrimɔni dɛn, lɛk fɔ pul sara fɔ di wan dɛn we dɔn day, mek program ɛni ia fɔ di pɔsin we dɔn day, mek sɛrimɔni fɔ uman dɛn we dɛn man dɛn dɔn day, ɛn wekin sɛrimɔni dɛn, ɔl dis gɛt sɔntin fɔ du wit di dɛbul dɛn. Pipul dɛn kin yuz drɔgs we dɛn de tray fɔ yuz di dɛbul dɛn pawa.—Lɛta Fɔ Galeshya 5:20; Rɛvɛleshɔn 21:8.
▸ Chapta. 10, par. 10; Chapta. 16, par. 4
27 JIOVA IN RAYT FƆ RUL
Na Jiova na di Ɔlmayti Gɔd, ɛn na in mek di wan ol wɔl. (Rɛvɛleshɔn 15:3) Na dat mek na in gɛt ɔltin ɛn di rayt ɔ pawa fɔ rul oba ɔl di tin dɛn we i mek. (Sam 24:1; Ayzaya 40:21-23; Rɛvɛleshɔn 4:11) I dɔn mek lɔ fɔ ɔl di tin dɛn we i dɔn mek. Jiova gɛt di pawa bak fɔ chuz ɔda pipul dɛn fɔ bi rula. Wi de sɔpɔt Gɔd in rayt fɔ rul bay we wi de sho se wi lɛk am ɛn de obe am.—Fɔs Kronikul 29:11.
28 FƆ PWƐL BƐLƐ
We sɔm uman dɛn kin gɛt bɛlɛ, dɛn kin go pul di bɛlɛ. Sɔm uman dɛn kin drink kɔntri mɛrɛsin so dat di bɛlɛ go pwɛl ɔ dɛn go bɔn di pikin day wan. Bɔt Jiova et dɛn kayn tin dɛn de. Wetin mek? Na bikɔs frɔm di tɛm we di uman gɛt bɛlɛ, Gɔd de si di pikin we de na in bɛlɛ as mɔtalman. So na siriɔs sin fɔ kil pikin we nɔ bɔn yet.
29 FƆ GI Ɔ TEK BLƆD
Dis na we dɔktɔ dɛn kin tek blɔd frɔm pɔsin ɔ frɔm blɔd bank, ɔ dɛn tek wan pan di 4 men pat dɛn we de insay blɔd ɛn put am insay ɔda pɔsin in bɔdi. Di 4 men pat pan blɔd na plasma, rɛd blɔd sɛl, wayt blɔd sɛl, ɛn pletlɛt.
30 TRENIN
Insay di Baybul, di wɔd fɔ “trenin” nɔ jɔs min pɔnishmɛnt. We dɛn tren wi, dat go mek wi no wetin fɔ du, ɛn wi go gɛt sɛns ɛn du tin di rayt we. Jiova nɔ go ɛva du bad tin to di wan dɛn we i de tren. (Prɔvabs 4:1, 2) Jiova dɔn sɛt fayn ɛgzampul fɔ mama ɛn papa dɛn. Di trenin we i de gi rili gud ɛn dat kin mek pɔsin kam fɔ lɛk trenin. (Prɔvabs 12:1) Jiova lɛk in pipul dɛn, ɛn i de tren dɛn. I de sho dɛn wetin fɔ du we go kɔrɛkt di rɔng we we dɛn bin de tink ɛn ɛp dɛn fɔ lan fɔ tink ɛn du tin di we we go mek i gladi. Fɔ mama ɛn papa dɛn, trenin min bak fɔ ɛp yu pikin dɛn fɔ ɔndastand wetin mek dɛn fɔ de obe. I min bak fɔ tich dɛn fɔ lɛk Jiova, ɛn fɔ lɛk in Wɔd, di Baybul, ɛn fɔ ɔndastand di lɛsin dɛn we wi kin lan frɔm wetin de insay de.
31 DƐBUL DƐN
Na wikɛd spirit dɛn we gɛt pawa fawe pas mɔtalman. Di dɛbul dɛn na wikɛd enjɛl dɛn. Dɛn tɔn to wikɛd enjɛl dɛn we dɛn mek dɛnsɛf Gɔd in ɛnimi dɛn bay we dɛn nɔ obe am. (Jɛnɛsis 6:2; Jud 6) Dɛn bin jɔyn Setan fɔ chalenj Jiova.—Ditarɔnɔmi 32:17; Lyuk 8:30; Di Apɔsul Dɛn Wok [Akt] 16:16; Jems 2:19.
[Chat na pej 218 ɛn pej 219]