Timoti Diiŋ Ndɔɔ
2 Lelaŋ num po nuu,+ hiou lachi a kpaayaa sɔlaa o kɛndɛi bɛnduii Chiisu Kiliti tosal naa ve niŋ. 2 Sɔɔŋ ŋ tuei ya o sondo, nduyɛ mi wanaa bɔɔbɔɔ timbi seileŋ a muŋ okɔɔ woŋ,+ pɛɛku laŋgbaa wana nɔla ma tiindaŋ nda, le mi nda bɛɛ suliŋ le acheleŋnda pɛɛkoo. 3 Wa o bɛɛndiaŋ le saŋgaa sɔlaa+ maa wana chɔu kɛndɛ kɛndɛ+ le Chiisu Kiliti. 4 Wana o wana cho wana chɔuwo, te o yeema pɛ mbo tosa hɛnaŋ wana chua ndu le wallo wo, o wou balaŋ o sɔɔŋ leyula* chieeŋndo hoo niŋ te. 5 Lende koni i cho a wana nyaanuŋ hoo nyaanɔŋ labɛɛlaa nda chaaŋaa nduaa wo ni. Te o cho mbo bii sawalaŋ te, o sɔla fanda le.+ 6 Wana wali ichiɔɔ, o tosa wallo o kala kala wo, o nɔ mbo wa wana tasoo le tɔlɔɔ koŋ dioo. 7 Wa yiyaŋndo lɔɔlɔɔ a sɔɔŋ ya cho muŋ dimioo woŋ okɔɔ. Masanɔɔ cho num sinapɛŋgoo ke o nyɛ o nyɛ niŋ.
8 Wa yiyaŋndo a Chiisu Kiliti okɔɔ, o fula o pulale Deeve leŋ choo,+ mbo miiŋgu yoomu wo.+ Yooŋgu kɛndɛ koŋ ya cho hoo dimioo ni.+ 9 Le yooŋgu kɛndɛ koŋ ya cho saŋgaa ni, nduyɛ ma duau ya o yɔlɔŋ maa wana dɛnɛ wɔɔŋ.+ Kɛ diom Mɛlɛkaa ndu cho o kpɛɛ le.+ 10 Lelaŋ, I cho nyɛ o nyɛ biuwɔŋndo le sabu wanaa Mɛlɛka hɛli wa,+ le halikpeŋ mi nda bɛɛ sɔla chindaa o Chiisu Kiliti niŋ, nduyɛ ma sɔla biilu cho lefafɛɛŋ ndo. 11 Nyɛ dimiŋ hoo wo cho tonya: Te ŋ vi pɛ latulu naa ndaa, mɛɛ ŋ cho vɛlɛ miiŋgu yoomu naa ndaa latulu.+ 12 Te ŋ hiou pɛ lachi a biuwɔŋndo, ŋ cho wa o masaleŋ choo naa ndaa latulu.+ Kɛ te ŋ kɛɛ ndu pɛ, ndu bɛɛ cho naa kɛɛ.+ 13 Naŋ kɛɛ bɛɛ le loo o lediom, ndu kɛɛ le loo o lediom te. Kanifuule, o hui ndupila le.
14 Hiou lachi a nda yiyalaŋndo a sɔɔŋ muŋ okɔɔ. Sila nda Mɛlɛka o hɔl le ma mal diomndaŋ hiŋaŋndo o sɔɔŋ choo. Tɔnɔ o tɔnɔ cho o diomndaŋ hiŋaŋndo niŋ te, kɛ tɛɛmbuuwo la tɛɛmbuu wanaa yaŋ ndaŋ nilaŋ nda ni. 15 Kindiŋ kpoke ma wa wana wali kɛndɛ Mɛlɛka o hɔl. Nɔ lasiɔmbu le wali ndɔɔ le. Pɛɛku waŋnda tonyaa,* nduyɛ ma tɛɛsial nda ndu nyɛkɛndɛi.+ 16 Wou sondoo o sɔɔŋ tɛɛmbuu nyɛ cho o diandaa wo niŋ te.+ Kanifuule sɔɔŋ waa nuaa, hiouwɔɔ ŋ hiau lachi a Mɛlɛka bɛɛlaŋ tɛɛmbuuwo ni. 17 Sɔɔŋ waa lende, kɔlaŋ a pɛŋgɛlaŋndo maa pau koloŋ. Hamaniyɔɔsi nda Failitɔɔ cho waŋnda haa tɛɛŋ.+ 18 Puaa haa faŋaŋ o nɛi tonyaa choo, ma wa dimioo maa wanaa vi wa chuu niŋ miiŋgu yoomu.+ Nduyɛ a cho laalaŋ waŋnda apum laasiaa. 19 Kɛ a koŋ kpou, chiyii kala kalɛi Mɛlɛka kila ve cho wɔ isisi yi. I nɔ poonyiaa lechoo aa: “Chɛhowa* sina wanaa cho le ndu wa.”+ Nduyɛ, “Wana o wana veelu pɛ diola Chɛhowa* laŋ,+ o mal yɔŋ wɔɔŋndo tosaa.”
20 O chiɛi bɛndoo niŋ, o cho ko nyɛm laanduŋ nda toosiaa a kooliiyoŋ ɔɔ a kaniŋ humboŋ ndo le wa leniŋ te. Kɛ ŋ nda toosiaa a yɔmnde, ɔɔ a puuloo woŋ bɛɛ wa leniŋ. Nyɔɔŋ muŋ, ŋpum cho le sɔɔŋ sɔviɔŋ. Ŋpum yɛ, le sɔɔŋ yɔŋaŋ* koni ŋ cho ni. 21 Wana o wana fafaŋ pɛ wanaa cho maa nyɛm laanduŋ cho le sɔɔŋ yɔŋaŋ ndoŋ, o nɔla mbo wa maa nyɛi laandii cho le sɔɔŋ sɔviɔŋ ndoŋ. O cho wa o diandaa, mbo wa o sɔvɛ le wana nɔ ndu wo, nduyɛ mbo wa o bɛɛndiaŋ le wali o wali kɛndɛ tosaa. 22 Lelaŋ, fafaŋ yeemaŋ ŋfeleŋgɔyaŋ. Kɛ kindiŋ ma wa sakpo, ma nɔ laalaŋndo, kaalaa, a kɔl nyuloo. Wa sɔɔŋ muŋ tosaa nya wanaa laalaŋ o Masanɔɔ niŋ a kɔl diandaa wa.
23 Wou sondoo o sɔɔŋ fondoŋ niŋ a diomndaŋ hiŋaŋndo le,+ kanifuule sɔɔŋ muŋ huŋ a sɔŋgɔlaŋ ni. 24 Buɛi Masanɔɔ nɔ mbo wa wana lasɔŋgɔ le. Kɛ o nɔ mbo wa wana kɛndɛ naa wana o wana chua,+ mbo chaa pɛɛkoo, nduyɛ mbo biunuŋ te a tosal ndu pɛ suɛi wɔɔŋnde.+ 25 Te o wa pɛ wanaa simul ndu wa miŋgioo o nɛi, o tosa ndi a lebɛɛ.+ Naapum Mɛlɛka cho nda mala ma wookuŋ, ma sina kɔl kalu cho a tonyaa okɔɔ wo.+ 26 Okoŋ ma miiŋgu o ndapila niŋ, ma hɛluŋ yaŋɔɔle Setana* yeŋ nda, le mbo bii nda le hɛnaŋ ndɔɔ tosaa wo.+