Walta Kiilaa

8 Mi Sɔɔ bɛɛ chɛl o kɔl niŋ le Stiiviŋ diyɔɔ.+

O paale leŋ choo, ma kandu kunda wanaa laalaŋnda o Chulusalɛm niŋ nyɛpalaa bɛndoo tusioo choo. Mi nda kpou saŋnuŋ o tanda Chudiaa wo niŋ a Sameeliaa.+ Mɛɛ kiilaa ma lo loŋ. 2 Mi puaa ndaa nɔ siooŋii Mɛlɛkɛi ya chua dialuŋ Stiiviŋ ndoŋ ma kɔ kumbu. Ma chaŋ tau le ndu. 3 Mi Sɔɔ chiŋalaŋ kunda wanaa laalaŋnda. O wa luɛiyɔɔ chiɛilaŋ niŋ wanaa laalaŋnda biuwo, wana pɔnɔ ni wana lanɔ ni, mbo sɛɛsuu nda, okoŋ mbo duau nda o chiɛi manyumndo niŋ.+

4 Kɛ mi wanaa saŋnuŋ kaŋ nda wa kɔlaŋ a yooŋgu kɛndɔɔ dimioo ba o ba fee.+ 5 Mi Filipi kua o chiee bɛndu pum o Sameeliaa niŋ,+ okoŋ mbo kandu waŋnda yooŋgu kɛndɔɔ dimullo a Kiliti okɔɔ. 6 Mɛɛ waŋnda che kaamaala o wa tosaa laŋ, mi nda kpou yaŋ nilaŋ nyɛkɛndɛi o nyɛ o wa dimioo wo. 7 Wanaa bɔɔbɔɔ nyinaa wɔɔŋnda wa kɔɔli wa, a wa nda fulaa niŋ a yeelaŋ choo choo kpeleŋ.+ Mi wanaa bɛvɛiya a namtaa a bɔɔbɔɔ sɔla sioŋgɔɔ. 8 Mi waŋnda duaunuŋ nyaale tau o chiee bɛndu koŋ niŋ.

9 Po pilɛ wa loŋ diolaŋ aa Saimɔŋ. Wana maŋgalaa o wa ni. Mi waŋnda Sameeliaa duaunuŋ kɔndɔfili tau a ndu. Mbo kialu yoŋgaa maa wana bɛndoo o cho ni. 10 Waŋnda kpou, chuaambɔ ni, kaasoŋnɔ ni, ndaa nɔ bɛɛleŋ tau le ndu. Ma wa dimioo aa: “Kpaaya bɛndu Mɛlɛkaa cho poo hoo choo.” 11 Le teleŋ vilɛi, kɔndɔfillo wa waŋnda biyɔɔ a maŋgaliaala ndoo tosa laŋ. Lelaŋ ndaa nɔ bɛɛle ndɔleŋ ni. 12 Kɛ mɛɛ Filipi dimul nda yooŋgu kɛndɔɔ a Masale Mɛlɛkaleŋ+ vɛlɛ a Chiisu Kiliti okɔɔ, ma laalaŋ. Okoŋ ma sɔla yiŋɔɔ, wana pɔnɔ ni, wana lanɔ ni.+ 13 Mi Saimɔŋ bɛɛ simnuŋ wana laalaŋndo. Mɛɛ o yiŋ, mbo lo latulu nda Filipi.+ Kɔndɔfillo wa ndu tau mɛɛ o che kaamaalaŋ, a walta kɔndɔfilta wa tosaŋndo laŋ.

14 Mɛɛ kiilaa wa Chulusalɛm nda tuei maa waŋnda Sameeliaa chɛl suɛi Mɛlɛkɛi,+ ma viam Pitɛ nda Chɔŋ o nda lo. 15 Mɛɛ nda fuuluu, ma piɛi le nda le ma sɔla nyina diandaa.+ 16 Kanifuule yiŋɔɔ koni ndaa yiŋndɔ o diola Masanɔɔ Chiisu laŋ niŋ ni.+ Kɛ wana pilɛ bɛɛ ndoo sɔla wɔ nyina diandaa le. 17 Okoŋ ma handu nda balaŋ choo,+ ma sɔla nyina diandaa.

18 Mɛɛ Saimɔŋ che maa balaŋ kinɛi kiilaa handu waŋnda choo ni ma sɔla nyina diandaa, mbo ke nda kanioŋ.* 19 Mbo dimul nda aa: “Ya bɛɛ la ke ya kpaayaa hoo. Okoŋ, wana o wana ya handu balaŋ choo pɛ, o sɔla nyina diandaa.” 20 Kɛ mi Pitɛ dimul ndu aa: “Maa kaniŋ numndoŋ tambu a num latulu, kanifuule a yiyaŋ maa a kanioŋ ŋ sɔla ke Mɛlɛkaa ni.+ 21 A cho naa choo le, nduyɛ a sɔla nyɛ o nyɛ o suɛi hei niŋ te, kanifuule kɔl numndo dindu wɔ Mɛlɛka o hɔl te. 22 Lelaŋ, mal yiyaŋ wɔɔŋ ŋ nɔ hoo wo, ma nyɔɔlu Chɛhowa* o piɛileŋ niŋ. Kɛlɛŋgaa dɔɔ mbo mal num haki le yiyaŋnda wɔɔŋnda cho num o kɔllo niŋndaŋ. 23 I che maa paŋalaa cho num o piaa o kɔl cha, nduyɛ ma wa chiɔɔ yɔŋ wɔɔŋndo o ba bɛŋgu.” 24 Mi Saimɔŋ dimul nda aa: “La nyɔɔlul la Chɛhowa* o piɛileŋ niŋ maa sɔɔŋ nya dimi muŋ ndoŋ kpou, i pilɛ bɛɛ yɔŋnuŋ ya le.”

25 Mɛɛ Pitɛ nda Chɔŋ chii waŋnda yooŋgu kɛndɔɔ dimul nyɛkɛndɛi a Chɛhowa* okɔɔ o tanda koŋ niŋ, ma chaŋ le miiŋgoo Chulusalɛm. A wa kɔlaŋ a yooŋgu kɛndɔɔ dimioo o sɔndɔkɔlta bɔɔbɔɔ o Sameeliaa niŋ.+

26 Mi maalikɛinɔ Chɛhowa* wo+ suaa o Filipi lo aa: “Chɔŋ ma kuɛ kpeŋgii ba tou ve o nɛi chɛŋ Chulusalɛm mbo kua Kaasa wo.” (Nɛi keeku o pollo niŋndo o cho ni.) 27 Okoŋ mbo chaŋ mbo bii nɛiyo. Mɛɛ o wa kɔlaŋ, mbo cha po Itoopiaanɔɔ. Poo hoo ndoo nɔ foofo bɛndoo Kandesi o ba bɛŋgu, masa laandoo le lɛŋnde Itoopiaaleŋ. Ndu ndoo manda nyɛsɔlaa ndɔɔ kpou ni. Ndoo kuɛ Chulusalɛm le Mɛlɛka piɛiyo.+ 28 O wa miiŋgoo o nyɛ ndɔ nyaanaŋ suaa naŋndo niŋ, mbo wa diomndaŋ veeloo choo choo o nyɛ Aisaya, wana ndoo suaa le Mɛlɛka wo poonyiaa wo niŋ. 29 Okoŋ mi nyina diandaa dimul Filipi aa: “Kɔ, ma sɔɔŋguu o nyɛ nyaanaŋ suaa naŋndo ikɛi.” 30 Mi Filipi nyaanuŋ mbo sɔɔŋguu ndu ikɛi. Mbo tuɛi poo hoo diomndaŋ veeloo o nyɛ Aisaya, wana ndoo suaa le Mɛlɛka wo poonyiaa wo niŋ. Mbo nyuna ndu aa: “A cho pa nyɛ ŋ cho koŋ diomndaŋ veeloo wo biyɔɔ bila?” 31 Mbo muli aa: “Vɛɛ ya looku yɛ mi bii bila te waŋndo pɛɛku ya le?” Okoŋ mbo dimul Filipi le mbo hel o nyɛ nyaanaŋndo niŋ mbo chal ndu ikɛi. 32 Buŋgɛi o wa diomndaŋ veeloo o Yau Mɛlɛkaa niŋnde cho hei ni: “Mɛɛ nda huŋ nuaa a saa le ndu diyɔɔ yɛ, lende o wa ni. Nduyɛ mɛɛ nda wa nuaa saa yiiŋnde kilioo mbo mei doŋ yɛ, ndu bɛɛ suu nyɛ o nyɛ le.+ 33 Teleŋ waŋnda wa ndu siɔmbulaŋ tusioo wo, ma kilul ndu yamɛi lakafɛi.+ Le mɛɛ nda dii ndu o lɛŋndeŋ choo yɛ,+ nɛɛnɛ suaa yɛ niŋ a pulale o fula choo leŋ okɔɔ?”

34 Mi wana bɛndoo hoo nyuna Filipi aa: “A nɛɛnɛ okɔɔ wana suaa le Mɛlɛka wo dimi yɛ suɛi hei? A ndupila okɔɔ ɔɔ wana cheleŋ?” 35 Mi Filipi kandu suɛi. Kandɔɔ a fondaŋ o wa diomndaŋ veeloo o Yau Mɛlɛkaa niŋndo, mbo dimul ndu yooŋgu kɛndɔɔ a Chiisu okɔɔ. 36 A lo kɔlaŋ, ma komal mɛŋndaŋ. Mi wana bɛndoo hoo dimi aa: “Tofawɔ mɛŋndaŋ! Yɛɛnɛ kuuna yɛ ya yiŋɔɔ sɔlaa?” 37* —— 38 Okoŋ mbo dimi le ma simi nyɛ nyaanaŋ suaa naŋndo. Mi Filipi nda po Itoopiaanɔɔ hoo tual o mɛŋndaŋ niŋ, mi Filipi yiŋ ndu. 39 Mɛɛ nda fula o mɛŋndaŋ niŋ, o lepilɛ niŋ kpe, mi nyina Chɛhowa* wo faŋa Filipi loŋ. Po Itoopiaanɔɔ chi lɛ ndu le. Kɛ mi poo hoo wa kɔlaŋ a nyaaloo. 40 Mi Filipi chaŋnuŋ ndupila Asidɔɔ, mbo hiau lachi a waŋnda yooŋgu kɛndɔɔ dimullo o chieeŋ bɛndoŋ niŋ kpou haaa mbo fuuluu Sisaliaa.+