Maatiu

5 Mɛɛ Chiisu che faŋga bɛndoo, mbo hel naa temaa o pembei choo. Mɛɛ o chal, mi buɛiyaa nduaa huŋ naa ndu chua. 2 Okoŋ, mbo kandu nda pɛɛkoo. Mbo dimi aa:

3 “Kɔl kɛndɔɔ cho le wanaa landuŋ kɔl le suɛi Mɛlɛkɛi ya,+ kanifuule le nda Masale Mɛlɛkaleŋ le cho ni.

4 “Kɔl kɛndɔɔ cho le wanaa cho a kɔlta tambɛilaŋ nda, kanifuule a cho kɔl dɛɛniaa sɔla.+

5 “Kɔl kɛndɔɔ cho le wanaa vi kɔltaŋ nda,*+ kanifuule le nda lɛŋndeŋ le wa niŋ ni.+

6 “Kɔl kɛndɔɔ cho le wanaa landuŋ kɔl+ le nyɛ cho sakpo wo tosaa wa, kanifuule Mɛlɛka cho tosa ma hini kɔl mɛɛ.+

7 “Kɔl kɛndɔɔ cho le wanaa tuiinuŋ waŋnda inyiɛɛ ya,+ kanifuule nda bɛɛ a cho nda nyiɛɛye tuiinɔŋ.

8 “Kɔl kɛndɔɔ cho le wanaa nɔ kɔlta diandaa laŋ nda,+ kanifuule a cha niŋ Mɛlɛka.

9 “Kɔl kɛndɔɔ cho le wanaa tosa mi kɔl nyuloo miiŋgu waŋnda tɛɛŋ nda,+ kanifuule a sɔla niŋ veeloo aa chuauwaa Mɛlɛkaa.

10 “Kɔl kɛndɔɔ cho le wanaa nda cho nyɛpalaa tusioo choo, le mɛɛ nda cho nyɛ cho sakpo wo tosaa yɛ,+ kanifuule le nda Masale Mɛlɛkaleŋ le cho ni.

11 “Kɔl kɛndɔɔ cho le nya le mɛɛ nda cho nya tɔɔ tɛɛmbuuwo,+ ma tusi nya nyɛpalaa choo,+ nduyɛ ma hɛɛnduu nya sɔɔŋ wɔɔŋ suu o suu choo le sabu nuu yɛ.+ 12 La wa a nyaale, nduyɛ mi la naŋ kɔl tau,+ kanifuule fanda+ bɛndoo cho le nya o choo choo niŋ. Lende koni nda tusi wanaa ndaa suaa le Mɛlɛka wa nyɛpalaa choo sindɛ ni.+

13 “Nya cho hɛlle+ le chieeŋndo ni. Kɛ te yeelaa fulaŋ pɛ o hɛlle niŋ, vɛɛ yeelaa miiŋgu yɛ vɛlɛ o ndi niŋ? I nɔ lɛ tɔnɔ kposoŋ te. Viouwɔɔ koni nda viau ndi ni,+ mi waŋnda kei niɔu niɔu lechoo.

14 “Nya cho paŋgeloo le chieeŋndo ni.+ Chiee bɛndu cho o pembei choo wo viŋnuŋ te. 15 Waŋnda mɛndul lambuiyo pɛ, a kuumbuu kambɛiyo lechoo le. Kɛ o nyɛ kɛsiaa la lambuiyo choo nda kɛsi ndu ni, le mbo yɔŋgu wanaa cho chiɛiniŋ nda kpou nyɛ teŋgaa.+ 16 Lende koni, nya bɛɛ la tosa mi paŋgele nyaa dendu waŋnda o hɔl,+ le ma che walta nyala kɛndɛlaŋ,+ okoŋ ma saŋgala Finya nya cho o choo choo niŋndo.+

17 “La yiyaŋ nuaa maa le Sawalaŋ* ɔɔ nyɛ wanaa ndaa suaa le Mɛlɛka wa dimi wo tɛɛmbuuwo le ya hiŋ te. I hiŋ le laŋ tɛɛmbuu le, kɛ le laŋ peeloo.+ 18 A tonya mi dimul nya maa, choo choo a lɛŋndeŋ le cho hiouwɔɔ. Kɛ diom taaniŋndo o pilɛ bɛɛ o Sawalaŋ niŋ feŋaŋ lechoo le, haaa mi laŋ kpou la peeluŋ.+ 19 Lelaŋ, wana o wana tɛɛmbuu pɛ sawala taaniŋ ndaŋ o pilɛ bɛɛ, okoŋ mbo pɛɛku acheleŋnda le keŋ tosaa, wana koŋ suliŋ le Masale Mɛlɛkaleŋ te. Kɛ wana tosa pɛ nyɛ sawalaŋ ndaŋ la dimi wo, nduyɛ mbo pɛɛku waŋnda laŋ, mɛɛ wana koŋ suliŋ le Masale Mɛlɛkaleŋ. 20 Mi dimul nya, te la ve sakpo mbo hiou Falisiiya a wanaa pɛɛku waŋnda sawala Mɛlɛkalaŋ nda+ le, pesiŋ bɛɛ la luei niŋ o Masale Mɛlɛkaleŋ niŋ te.+

21 “La tuei ma dimul finyaa nyaa mamaa aa: ‘Wana dii wanachioo le.+ Wana o wana dii wanachioo pɛ a kɔɔsa a ndu.’+ 22 Kɛ ya ya, I cho nya dimullo maa wana o wana hiou lachi a kɔllo tuuloo+ a chaaŋ ndɔ pɛ, a kɔɔsa a ndu. Nduyɛ, wana o wana dimul chaaŋ ndɔ diomnda wɔɔŋndaŋ pɛ, a kuɛ a ndu o Toŋgo Kialaa Ŋyamaa, a kɔɔsa a ndu. Wana o wana dimul pɛ chaaŋ ndɔ aa, ‘Diɔm fondoo fuu ŋ cho ni,’ o cho lakɔ o yiŋnde Kɛhɛna* leŋ niŋ.+

23 “Lelaŋ, te a hiŋ pɛ le salaa solioo o bandu luamaa lasalaa,+ okoŋ ma loonuŋ maa chaaŋ num nɔ num o kɔl le suɛi ŋ tosal ndu ve, 24 mɛɛ mɛiyɔ sala num koŋ o bandoo hɔlndɔ, ma miiŋgu naa ndu chua mi la kɔ toosiaŋ tɛɛŋ. Okoŋ kɔɔli, a huŋ soli niko sala numndo.+

25 “Keleŋa suɛi cho nya tɛɛŋ nya waŋndo ve toosiaa teleŋ nya fuuluu wɔ o lemasa le wo, yɔŋii o kɔ mal num wana kialaa ŋyamaa o ba. Okoŋ, mi ndu dimul wana cho chiɛi manyumndo hɔlteŋ ndo mbo dɔu num o chiɛi manyumndo niŋ.+ 26 Mi dimul num, pesiŋ bɛɛ a soli num loŋ te, haaa mɛɛ ma chii kanii num ii mɛɛlɛi* paawa.

27 “Mi la tuɛi paandu aa: ‘A nɔ ma suunda le.’+ 28 Kɛ ya ya, mi dimul nya maa wana o wana hiu wana lanɔɔ+ tofaa pɛ haaa mi yeemɛi bii ndu le waa a ndu, mɛɛ o chii suunda a ndu o kɔl ndɔɔ niŋ.+ 29 Lelaŋ, te hɔlte numnde ba kɛndɛleŋ le wa tosaa pɛ le ma luɛi o hakioo niŋ, kala leŋ po ma viou.+ Kanifuule, o bɛnda mi faluŋ numndoŋ i pilɛ hɛluŋ num, mbo hiau dialuŋ numndoŋ kpou kɔlaŋ Kɛhɛna.*+ 30 Nduyɛ, te ba num kɛndɔɔ wa tosaa pɛ le ma luɛi o hakioo niŋ, kiolu ndu kpali ma viou.+ Kanifuule, o bɛnda mi faluŋ numndoŋ i pilɛ hɛluŋ num, mbo hiau dialuŋ numndoŋ kpou kɔlaŋ Kɛhɛna.*+

31 “Mi la tuɛi vɛlɛ aa: ‘Wana o wana kɛɛ pɛ laa ndɔ, o ke ndu yau kɛyaŋndo.’+ 32 Kɛ ya ya, mi dimul nya maa wana o wana kɛɛ pɛ laa ndɔ, te o cho yɛ le kaa ihini nɔɔlɛiyo* le, nduyɛ mi chua koŋ kɔ chal wana pɔnɔ cheleŋ o ba, mɛɛ ndu tosa ni mi chua koŋ suunda. Wana o wana chua pɛ wana lanɔ nda kɛɛ o nɔɔ niŋndo, mɛɛ wana koŋ suunda.+

33 “La tuei vɛlɛ ma dimul finyaa nyaa mamaa aa: ‘Buŋgɛi ŋ chua ma mɛnaŋ o Chɛhowa* lo ve, tɛɛmbuu buŋgɛi keŋ te.+ Tosa nyɛ ŋ chua koŋ buŋgɛi le ndu wo.’+ 34 Kɛ ya ya, mi dimul nya maa la mɛnaŋ kposoŋ te.+ Mɛnaŋ a fondaŋ Mɛlɛkaa le, kanifuule kpeŋgbei* lemasa Mɛlɛkaa o cho ni. 35 Mɛnaŋ a lɛŋndeŋ te, kanifuule fondaŋ ndɔ handaa ŋpeloo le cho ni.+ Mɛnaŋ a Chulusalɛm te, kanifuule chiee Masa bɛndoo o cho ni.+ 36 Mɛnaŋ a bolle numndeŋ te, kanifuule a tiuba ma siiŋguu yiiŋnde numndeŋ le pilɛ bɛɛ le humbu ɔɔ le tiŋi le. 37 Kɛ ‘Ei’ nyaa wa ei, mi ‘Ɛ ɛ’ nyaa wa ɛ ɛ,+ kanifuule nyɛ o nyɛ cheleŋ handuŋ lechoo pɛ, wana dɛnɛ wɔɔŋndo o ba o fula ni.+

38 “Mi la tuɛi aa: ‘Hɔlteŋ le hɔlteŋ, chiŋnde le chiŋnde.’+ 39 Kɛ ya ya, mi dimul nya maa la simul wana dɛnɛ wɔɔŋndo le. Te waŋndo lɔɔ num kpaŋii ba kɛndɛi pɛ, mulul ndu vɛlɛ kpaŋnde i pilɛi.+ 40 Te waŋndo yeema pɛ mbo kuɛ a num o lemasa le mbo chua doma num lebɛŋgoo, mɔsɔŋa ndu ke a doma num bɛndoo fau.+ 41 Te wana nɔ kpaayaa wo baŋ num pɛ le kɔlaŋ a wolɔɔla ndɔlaŋ le tiŋ kilo pilɛ,* kɔ a laŋ le tiŋ kilola tiɔɔŋ. 42 Te waŋndo piɛi num pɛ nyɔɔ, ke ndu. Te waŋndo yeema num kuoo biyɔɔ o ba pɛ,* tuŋ ndu le.+

43 “Mi la tuɛi aa: ‘Kaala wana nya chiɛɛliaŋ ndo,*+ ma tul yaamɔɔnɔ numndo leyɛ.’ 44 Kɛ ya ya, mi dimul nya maa la hiou lachi a yaamɔɔwaa nyaa kaalaa,+ nduyɛ mi la piɛi le wanaa cho nya nyɛpalaa tusioo choo wa.+ 45 O hei niŋ, Finya nya cho o choo choo niŋndo,+ la cho simnɔŋ chuauwaa nduaa. Kanifuule, mbo ke wanaa kɛndiaa a wanaa wɔɔŋnda paaleŋ. Nduyɛ, mbo ke wanaa cho sakpo wa a wanaa cho sakpo le wa piɔɔ.+ 46 Te o wa pɛ maa wanaa kaala nya wa koni nya kaala ni, tɔnɔ yɛɛ nya sɔla yɛ o keŋ niŋ?+ O cho nyɛ pilɛ koŋ te wanaa biyaa paawaa* bɛɛ tosa le? 47 Nduyɛ te wanaa numnda kinɛi ŋ yil ni, ɔɔ teŋgeŋ cho num tɛɛŋ a wanaa cheleŋnda wo? O cho nyɛ pilɛ koŋ te wanaa laalaŋ o Mɛlɛka niŋ te wa bɛɛ cho tosaa le? 48 Lelaŋ, la tosa sɔɔŋ nyɛkɛndɛi,* mɛɛ Finya nya cho o choo choo niŋndo bɛɛ tosa sɔɔŋ yɛ.+