Chɔŋ Tasoo
4 Chaaŋaa niaa kaalaa, o cho yooŋgula nya tuɛi laŋ kpou le nya nɔ mi la laalaŋ maa o Mɛlɛka lo le la fula le.+ Kɛ la yaasiaa laŋ nyɛkɛndɛi le sinaa te o Mɛlɛka lo kpeekpei la fula ni.+ Kanifuule, wanaa lachoowaa dimi maa le Mɛlɛka nda suaa ni wa, a bɔɔbɔɔ cho niŋ o chieeŋndo niŋ.+
2 Mɛɛ nya looku yooŋgu fula o Mɛlɛka lo wo sina yɛ cho hoo ni: Yooŋgu kɛ kɛ chɔm pɛ maa mi Chiisu Kiliti huŋ o chieeŋndo choo o iwana chieeya, mɛɛ o Mɛlɛka lo yooŋgu koŋ fula ni.+ 3 Kɛ yooŋgu kɛ kɛ chɔm a Chiisu okɔɔ le, mɛɛ o fula o Mɛlɛka lo le.+ Wana simul Kiliti wo, yooŋgu ndɔɔ cho koŋ ni. Ndu nya tuei ni maa o nɔ le hunɔɔ,+ nduyɛ o cho niŋ pɛŋ o chieeŋndo niŋ.+
4 Chuauwaa niaa kaalaa, le Mɛlɛka nya cho ni, nduyɛ la chii nda yomɔɔ.+ Kanifuule, wana cho o diompilɔɔ niŋ a nya wo+ nɔ kpaayaa mbo hiau wana cho o diompilɔɔ niŋ a chieeŋndo wo poloŋ.+ 5 Le chieeŋndo nda cho ni.+ Le saboo hoo nda suaa a nyɛm cho o chieeŋndo niŋndoŋ okɔɔ ni, nduyɛ mi chieeŋndo yaŋ nda nilaŋ.+ 6 Kɛ naa naa, le Mɛlɛka naŋ cho ni. Wana o wana sina pɛ Mɛlɛka, ndu yaŋ naa nilaŋ ni.+ Wana o wana cho le Mɛlɛka le, o yeŋ naa lani le.+ O hei niŋ naŋ sina teŋgeŋndo yooŋgu tonya fula o Mɛlɛka lo wo tɛɛŋ a yooŋgu lachoowaa ni.+
7 Chaaŋaa niaa kaalaa, ŋ hiounuŋ lachi a kaaliaŋndo vellaa velle,+ kanifuule o Mɛlɛka lo kaalaa chɛŋ ni. Wana o wana kaala pɛ, mɛɛ chua Mɛlɛkaa o cho ni, nduyɛ o sina Mɛlɛka.+ 8 Wana o wana kaala le, mɛɛ o sina Mɛlɛka le, kanifuule kaalaa Mɛlɛka cho ni.+ 9 Mɛɛ Mɛlɛka chɔm naa kaalaa yɛ cho hoo ni: Mbo yɔŋ Po ndɔ pilɔɔ kpe+ o chieeŋndo choo le miŋ sɔla yoomoo sanaa o ndu niŋ.+ 10 Kaala koŋ cho yɛ ni, o cho nuaa maa naa le kaala Mɛlɛka le, kɛ ndu kaala naa ni. Okoŋ, mbo yɔŋ Po ndɔɔ le mbo huŋ soliŋ sala+ le hakila naalaŋ,+ miŋ miiŋgu o diompilɔɔ niŋ a Mɛlɛka.
11 Chaaŋaa niaa kaalaa, te nuaa kpɛ Mɛlɛka kaala naa ni, mɛɛ naa bɛɛ i cho naa kuee le miŋ kaaliaŋ vellaa velle.+ 12 Wana o wana chi wɔ Mɛlɛka lepilɛ bɛɛ le.+ Kɛ te ŋ hiou pɛ lachi a kaaliaŋndo vellaa velle, Mɛlɛka cho lo diompilɛ a naa, nduyɛ mi kaala ndɔɔ pɛ naa o lakɔl cha.+ 13 O ke naa nyina ndɔɔ. Hei tosa ni miŋ sina maa ŋ cho o diompilɔɔ niŋ a ndu, mi ndu bɛɛ wa o diompilɔɔ niŋ a naa. 14 Le handɔɔ lechoo, naapila bɛɛ che, nduyɛ miŋ wa seileŋ timbioo maa Finyaa yɔŋ Po ndɔɔ le mbo piŋi chieeŋndo.+ 15 Wana o wana chɛl pɛ maa Po Mɛlɛkaa Chiisu cho ni,+ Mɛlɛka cho wa o diompilɔɔ niŋ a wana koŋ, mi wana koŋ bɛɛ wa o diompilɔɔ niŋ a Mɛlɛka.+ 16 Ŋ sina niŋ mɛɛ kpɛ Mɛlɛka kaala naa yɛ, nduyɛ ŋ laalaŋ a kaala o nɔ le naa wo.+
Kaalaa Mɛlɛka cho ni.+ Nduyɛ wana o wana hiou pɛ lachi a kaalaa chɔmndo, wana koŋ cho wa o diompilɔɔ niŋ a Mɛlɛka, mi Mɛlɛka bɛɛ wa o diompilɔɔ niŋ a ndu.+ 17 O hei niŋ, kaala ndɔɔ cho naa piɔ o lakɔl cha, okoŋ miŋ wa fɛɛsɛŋ le suɛi*+ o paale kɔɔsɔleŋ choo, kanifuule mɛɛ ndu* cho yɛ, lende koni naa bɛɛ cho o chieeŋndo hoo choo ni. 18 Kaalaa nɔ isiooŋ te.+ Nduyɛ kaala kpeekpeiyo tuau siooŋnde ni, kanifuule mi siooŋnde kuuna naa sɔɔŋ bɔɔbɔɔ tosaa. Lelaŋ, te waŋndo nɔ pɛ siooŋnde, mɛɛ kaalaa cho ndu o piaa o kɔl cha le.+ 19 Miŋ chɔm kaalaa, kanifuule Mɛlɛka fɛlɛŋ kaala naa.+
20 Wana o wana dimi pɛ aa, “I kaala Mɛlɛka,” kɛ mbo tul puaapilɛnɔ ndɔɔ leyɛ, mɛɛ wana lachoowaa o cho ni.+ Kanifuule, wana o wana kaala puaapilɛnɔ ndɔ+ o cho chɔɔ wo le, mɛɛ o nɔla mbo kaala Mɛlɛka o chi wɔ le wo le.+ 21 Sawa o ke naa wo cho ni maa, wana o wana kaala Mɛlɛka pɛ, mɛɛ o nɔ vɛlɛ mbo kaala puaapilɛnɔ ndɔɔ.+