Kɔliŋtiaŋ Diiŋ Ndɔɔ

1 Ya Pɔɔl, kiilanɔ Chiisu Kiliti wo o hɛnaŋ Mɛlɛkaa niŋ, I cho latulu a puaapilɛnɔ naa Timoti.+ I cho yauwo hoo poonyiaa le nya cho o kundaa niŋ Kɔliŋ nda, a wanaa laalaŋaa* cho Akeya wa kpou:+

2 Maa Mɛlɛka Finya naa nda Masanɔɔ Chiisu Kiliti tosal nya kɛndɛi ndɛi bɛnduei, nduyɛ ma ke nya kɔl nyuloo fɔ!

3 La ŋ melnuŋ Mɛlɛka balikaa, o cho Finyaa le Masanɔ naa Chiisu Kiliti wo.+ Finya inyiɛɛyo o cho ni.+ Nduyɛ, ndu cho Mɛlɛka dɛɛniaa naa kɔltaŋ o isɔɔ o isɔɔ niŋndo ni.+ 4 Ndu dɛɛniaa naa kɔltaŋ o nyɛpalaa suu o suu niŋ ni.+ Kɔl dɛɛniaa naŋ sɔla ndu o ba wo, ndu tosa ni mi naa bɛɛ dɛɛniaa acheleŋnda kɔltaŋ+ o nyɛpalaa suu o suu niŋ.+ 5 Mɛɛ nyɛpalaa naŋ sɔla le Kiliti wo cho tau yɛ,+ lende koni kɔl dɛɛniaa naŋ sɔla o Kiliti niŋndo cho tau ni. 6 Nyɛpalaa cho naa komallo wo, le nya kɔltaŋ dɛɛniaa a nya piŋioo o cho ni. Te ŋ sɔla pɛ kɔl dɛɛniaa, le nya naŋ sɔla ndu ni. Le mbo mala nya mi la biunuŋ nyɛpalaa suu komal naa wo. 7 Ŋ nɔ tiindaŋndo o nya niŋ maa, mɛɛ nya sɔla saŋgaa maa naa yɛ, lende koni nya cho kɔl dɛɛniaa sɔla ni maa naa.+

8 Puaapiliaa, ŋ yeema mi la sina a nyɛpalaa keeku naa choo o buŋgɛi Eesiaa ve niŋndo okɔɔ.+ Nyɛkindilaa nda handu naa choo wo ndoo hiou naa mayoomu. Ŋ ve kɔl maa ŋ cho chinda le.+ 9 Miŋ yiyaŋ maa ndaa chii niŋ naa yamɛi kilul le piɔmndo sɔlaa. Hei yɔŋnuŋ le miŋ tiindaŋ Mɛlɛka miŋgi waŋvilɛiya yoomu wo,+ kɛ o cho naapila le. 10 Mbo piŋi naa o kpundɛ koŋ niŋ. Suŋ suŋ bɛɛ o cho naa piŋi. Nduyɛ ŋ nɔ tiindaŋndo maa o cho hiouwɔɔ lachi a naa piŋioo.+ 11 Nya bɛɛ la nɔla mi la mala naa Mɛlɛka nyɔɔloo o piɛileŋ niŋ.+ Kanifuule, te wanaa bɔɔbɔɔ piɛi pɛ le naa, Mɛlɛka cho piɛile leŋ muli mbo mala naa. Okoŋ mi wanaa bɔɔbɔɔ mel ndu balikaa.+

12 Nyɛ naŋ kialu yoŋgaa wo cho ni maa, ŋ nɔ kɔl iyama walaŋndo a mɛɛ naŋ kela o chieeŋndo niŋ yɛ, taama taama nya o hɔl. Kela naa wa o diandaa, nduyɛ o wa sakpo Mɛlɛka o hɔl. Ŋ tosa hei o kɔl kalu iwana chieeya niŋ te,+ kɛ o kɛndɛi bɛnduii Mɛlɛkɛi bɛŋgu. 13 Sɔɔŋ cho tɛtɛlɛ le diomndaŋ veeloo, nduyɛ mi la bii bila woŋ naŋ cho nya poonyiallo ni. I laalaŋ maa la cho hiouwɔɔ lachi a muŋ biyɔɔ bila nyɛkɛndɛi. 14 Nya pumnda bii niŋ sɔɔŋ muŋ bila, nduyɛ la sina maa o naa niŋ nya kialu yoŋgaa ni, mɛɛ naa bɛɛ cho hunɔɔ yoŋgaa kiolɔɔ o nya niŋ o paale Masanɔɔ Chiisu leŋ choo yɛ.

15 Le laalaŋ ya nɔ hoo o nya niŋndo, mi kɛɛsiaa le hunɔɔ o nya lo hunɔɔ diiŋ ndɔɔ le mi la dɔɔnuŋ vɛlɛ nyaale. 16 Mi yaa kɛɛsiaa maa te I wa pɛ kɔlaŋ Masidooniaa, I kei nya yilɔɔ. Nduyɛ te I wa miiŋgoo pɛ, I kei vɛlɛ naa nya chua. Okoŋ mi nyaa liila ya tiŋ le kɔlaŋ Chudiaa.+ 17 La yiyaŋ pa maa kɛɛsiaa ya tosa koŋ ndo I chue ndu suɛi kpeekpei le? Ɔɔ la yiyaŋ pa maa o yiyaŋ iwana chieeyaa niŋ ya tosa kɛɛsiaa hoo ni, te I chɛl pɛ, okoŋ kɔɔli I kɛɛ? 18 Nyɛ naŋ dimul nya wo cho tonya, la nɔ mi la laalaŋ Mɛlɛka. Ŋ chɛl suɛi, okoŋ kɔɔli miŋ kɛɛ le. 19 Kanifuule, Po Mɛlɛkaa, Chiisu Kiliti, o ya Pɔɔl, Sivanɔɔ*, a Timoti+ dimul nya a ndu okɔɔ wo, o cho wana chɛl le isɔɔ tosa, mbo kɛɛ le ndi tosa le. Kɛ nyɛ o chɛl pɛ le tosaa, ndu o tosa ni. 20 Sɔɔŋ Mɛlɛka mɛi lediom le tosaa woŋ kpou, ŋ peeluŋ o Chiisu niŋ.+ Te ŋ wa pɛ piɛileŋ o Mɛlɛka lo, o ndu niŋ naŋ dimi ni aa “Amiina,”*+ okoŋ mi Mɛlɛka sɔla biiloo o naa niŋ. 21 Mɛlɛka ke naa tiindaŋndo maa nya ni, naa ni, le Kiliti naŋ cho ni. Nduyɛ Mɛlɛka pɔya naa ni.+ 22 O handu naa tamasi ndɔɔ choo.+ Tamasi koŋ cho nyina diandaa+ cho naa o lakɔl lo ni. Koŋ cho ni, nyɛ o mɛi lediom le naa kioo wo.

23 Le sabu ya hiŋndɔ Kɔliŋ te wo cho ni maa, I yeema mi tɛɛmbuu nya kɔltaŋ te. Mɛlɛka pila cho lesei a hei okɔɔ. 24 O cho nuaa maa ŋmasa le naŋ cho le laalaŋ nyaa le.+ Kɛ wanaa walla naŋ cho latulu a nya ni le mi la wa a nyaale, kanifuule laalaŋ nyaa tosa ni mi la sim yi.