Chɔŋ
17 Mɛɛ Chiisu chii sɔɔŋ muŋ dimi, mbo heelu hɔlla choo choo mbo dimi aa: “Kɛkɛ, teleŋndo fuuluu. Tosa mi po numndo sɔla saŋgalaa, nduyɛ mi po numndo bɛɛ tosa ma sɔla saŋgalaa.+ 2 A ke ndu kpaayaa ŋwaŋnda chiee choo kpou,+ le mbo yɔŋgu wanaa ŋ ke ndu wa+ kpou yoomu fafɛɛŋndo.+ 3 Le yoomu fafɛɛŋndo sɔlaa,+ a nɔ ma sina num Mɛlɛka tonyaa numpilɛ kpe,+ a Chiisu Kiliti, wana ŋ vem ndo.+ 4 I tosa ma sɔla saŋgalaa o lɛŋndeŋ choo,+ nduyɛ I chii wali ŋ ke ya wo tosa.+ 5 Lelaŋ Kɛkɛ, tosa mi wa num ikɛi, okoŋ mi sɔla bɛɛle yaa nɔ paandu num ikɛi leŋ, tuupa mi chieeŋndo kanduŋ.+
6 “I tosa mi wanaa ŋ ke ya o chieeŋndo hoo niŋnda sina diola numndaŋ.+ Le num nda wa ni, kɛ ma ke ya nda, nduyɛ ma diikuŋ diom numndo. 7 A sina niŋ maa nyɛm ŋ ke ya woŋ kpou num o ba ŋ fula ni. 8 Mɛɛ ya dimul nda sɔɔŋ ŋ dimul la woŋ,+ ma chɛl muŋ. Ma sina kɛsɛ maa hɔlte num ya hiŋ ni,+ nduyɛ ma laalaŋ maa num vem ya ni.+ 9 I cho piɛileŋ le nda. O cho le chieeŋndo le ya cho num piɛiyo le, kɛ le wanaa ŋ ke ya wa, kanifuule le num nda cho ni. 10 Nyɛ o nyɛ ya nɔ, num nɔ ni. Nduyɛ nyɛ o nyɛ ŋ nɔ, ya nɔ ni.+ I sɔla bɛɛleŋ nda tɛɛŋ.
11 “I cho lɛ o chieeŋndo niŋ te, kɛ nda cho wa o chieeŋndo niŋ.+ I cho kɔlaŋ naa num chua. Finya ni diandaa, yandii hɔlte numndeŋ le wa nda choo+ le sabu diola numnda ŋ ke ya laŋ, le ma wa diompilɛ, mɛɛ naŋ cho diompilɛ yɛ.+ 12 Teleŋ ya wa a nda latulu wo, hɔlte nileŋ le wa nda choo+ le sabu diola numnda ŋ ke ya laŋ. Mi manda nda, o pilɛ bɛɛ sɔla tambii le,+ mɛɛ po nɔ le tambei sɔlaa wo,+ le halikpeŋ mi nyɛ yau Mɛlɛkaa dimi wo peeluŋ.+ 13 I cho hunɔɔ suŋ suŋ lakɔ naa num chua. I cho sɔɔŋ muŋ dimioo o chieeŋndo choo le mi nyaale cho ya wo wa nda o piaa o lakɔl cha.+ 14 I ke nda diom numndo, kɛ mi chieeŋndo tul nda leyɛ, kanifuule a cho le chieeŋndo le,+ mɛɛ ya bɛɛ cho le chieeŋndo le yɛ.
15 “I cho num piɛi le ma soli nda o chieeŋndo niŋ te, kɛ le mi hɔlte numndeŋ le wa nda choo le wana dɛnɛ wɔɔŋndo.”*+ 16 A cho le chieeŋndo le,+ mɛɛ ya bɛɛ cho le chieeŋndo le yɛ.+ 17 Tosa mi tonyaa dindi nda,+ kanifuule diom numndo cho tonyaa ni.+ 18 Mɛɛ ŋ vem ya o chieeŋndo niŋ yɛ, lende koni ya bɛɛ vem nda o chieeŋndo niŋ ni.+ 19 Nduyɛ I cho yapila kɛsioo o diandaa le nda, le halikpeŋ mi nda bɛɛ tonyaa dindi nda.
20 “O cho ko le haa kinɛi le ya cho num piɛileŋ te, kɛ le wanaa cho bɛɛ pɛɛkula ndalaŋ nilaŋ yaŋɔɔ, ma dɔu laalaŋndo o ya niŋ nda. 21 Maa nda kpou wa diompilɛ,+ mɛɛ num Finya nuu cho diompilɛ a ya, mi wa diompilɛ a num yɛ.+ Mi nda bɛɛ wa diompilɛ a naa, le mi chieeŋndo laalaŋ maa num vem ya ni. 22 I ke nda bɛɛleŋ mɛɛ num bɛɛ ke ya bɛɛleŋ yɛ, le ma wa diompilɛ mɛɛ naŋ cho diompilɛ yɛ.+ 23 I cho diompilɛ a nda, mi num wa diompilɛ a ya, le mi nda kpou wa diompilɛ. O hei niŋ, chieeŋndo cho sina maa num vem ya ni, nduyɛ mbo sina vɛlɛ maa mɛɛ ŋ kaala ya yɛ, lende koni ŋ kaala nda ni. 24 Kɛkɛ, I yeema mi wanaa ŋ ke ya haa wa kɔ wa naa ya cho wa,+ le ma che bɛɛle ŋ ke ya leŋ, kanifuule a kaala ya tuupa mi chieeŋndo kanduŋ.+ 25 Kɛkɛ, num cho hoo sakpo wo, chieeŋndo sina num te.+ Kɛ ya I sina num,+ nduyɛ haa bɛɛ sina niŋ maa num vem ya ni. 26 I chɔm nda diola numndaŋ, nduyɛ I cho hiouwɔɔ lachi a nda laŋ chɔmndo,+ le ma chɔm waŋnda kaalaa mɛɛ ŋ chɔm ya kaala yɛ. Okoŋ, mi wa diompilɛ a nda.+