Walta Kiilaa
15 Mi puaa pum fula Chudiaa ma huŋ Aŋtiɔɔ. Ma kandu puaapiliaa pɛɛkoo aa: “Te o cho mi la sɔla hivi chiɛi kɔɔlioo a mɛɛ Sawala Mɛlɛka ke Muuse laŋ+ la dimi yɛ le, la sɔla pioŋɔɔ le.” 2 Mi suɛi hei huŋ a sɛɛŋgiaŋndo puaa haa tɛɛŋ nda Pɔɔl a Banabaa waa. Le hei, mi kɛɛsiaa tosaŋ le mi Pɔɔl, Banabaa, a wanaa cheleŋ kuɛ o kiilaa a o bɛnduaa lo Chulusalɛm+ le suɛi hei.
3 Mi kunda wanaa laalaŋnda liila nda nyɛɛmbɔ. Mi puaa haa keeku Foniisiaa a Sameeliaa. A wa kɔlaŋ a waŋnda dimullo a mɛɛ wanaa cho ŋChuu le wa simnuŋ wanaa laalaŋnda yɛ. Mɛɛ puaapiliaa tuei hei, mi nda kpou duaunuŋ nyaale tau. 4 Mɛɛ nda fuuluu Chulusalɛm, mi kunda wanaa laalaŋnda, kiilaa, a bɛnduaa kpou bii nda nyɛkɛndɛi. Okoŋ ma dimul nda sɔɔŋ bɔɔbɔɔ Mɛlɛka mala nda ma tosa woŋ. 5 Kɛ mi waŋnda apum o kunda lepiɛi Falisiiya tɛɛŋ, a simnuŋ wanaa laalaŋnda wa chaŋ isisi ma dimi aa: “O bɛnda ma sɔla hivi chiɛi kɔɔlioo, nduyɛ ma dimul nda le ma bii Sawala Mɛlɛka ke Muuse laŋ.”+
6 Okoŋ mi kiilaa a bɛnduaa chuuŋgiaŋ le ma suukaŋ a suɛi hei okɔɔ. 7 Mɛɛ nda suukaŋ o ndi choo le teleŋ vilɛi, mi Pitɛ chaŋ mbo dimi aa: “Puaapiliaa niaa, nyapila sina ndi walaŋ maa paandu pa Mɛlɛka hɛli ya nya tɛɛŋ ni, le mi dimul wanaa cho ŋChuu le wa yooŋgu kɛndɔɔ ma tuei, nduyɛ ma laalaŋ.+ 8 Mi Mɛlɛka, o sina kɔl wanachioo wo+ ke nda nyina diandaa+ mɛɛ o ke naa yɛ koni, le chɔmndo maa o chɛl nda. 9 O chɔm yɛ yɛ naa ndaa tɛɛŋ kposoŋ te.+ Kɛ mbo dindi kɔlta ndalaŋ le mɛɛ nda laalaŋ yɛ.+ 10 Le yɛɛnɛ nya cho yɛ niko Mɛlɛka tɔɔndaŋndo, mi la wa wanaa laalaŋnda wolɔɔla+ finyaa naa mamaa ɔɔ naapila nɔla chua le laŋ siiluuwo?+ 11 Mɛɛ naŋ laalaŋ miŋ sɔla pioŋɔɔ o kɛndɛi bɛnduii Masanɔɔ Chiisu ve niŋ yɛ,+ lende koni nda bɛɛ laalaŋ ni, ma sɔla pioŋɔɔ.”+
12 Mi nda kpou mei doŋ. Okoŋ ma kandu nilaŋ yaŋɔɔ o nyɛ Banabaa nda Pɔɔl wa nda tɛɛsiallo wo, a mɛɛ Mɛlɛka mala nda ma tosa sɔɔŋ kɔndɔfilloŋ, a kaamaalaŋ wanaa cho ŋChuu le wa tɛɛŋ yɛ. 13 Mɛɛ nda chii suɛi, mi Chemisi muli aa: “Puaapiliaa, la yaŋ ya nilaŋ. 14 Simiɔŋ+ laŋga chɔm naa maa Mɛlɛka chɛl wanaa cho ŋChuu le wa, le mbo hɛli ŋwaŋ nda tɛɛŋ le mi diola ndɔlaŋ la wa nda choo.+ 15 Hei chɛlaŋ a nyɛ wanaa ndaa suaa le Mɛlɛka wa dimi wo. Ma poonyiaa aa: 16 ‘Okoŋ kɔɔli, tɛndii Deeve cho o delaa wo, I cho ndu miŋgi simi. I cho nyɛm tambu woŋ miŋgi toosiaa, 17 le mi waŋnda a tuaa a wanaa cho ŋChuu le wa kpou nuuviaa ya Chɛhowa,* wanaa diola nilaŋ la cho choo wa. Ya Chɛhowa* dimi hei ni, nduyɛ I cho sɔɔŋ muŋ tosa.+ 18 Sindɛ niŋ pa ya dimi le sɔɔŋ muŋ tosaa ni.’+ 19 Lelaŋ, I yiyaŋ maa wanaa cho ŋChuu le wa, a cho muliŋndo o Mɛlɛka lo wa, o bɛnda miŋ paaliaŋ nda le.+ 20 Kɛ o bɛnda miŋ poonyial nda le ma fafaŋ nyɛm lasooluu woŋ,+ kaa ihini nɔɔlɛiyo,*+ yifaa,* a koowaŋ.+ 21 Chɔŋ o sindɔɔ niŋ, Muuse ndoo nɔ waŋnda le yaula o poonyiaa laŋ waŋnda pɛɛkoo o chiee o chiee bɛndu niŋ. A wa hei tosaa o paale pɛŋgiaale kɛ kɛ choo o chiɛila Chuuwa piɛi Mɛlɛka laŋ niŋ.”+
22 Okoŋ mi kiilaa, bɛnduaa, a kunda wanaa laalaŋnda kpou kɛɛsiaa le ma hɛli laŋgbaa kalla nda tɛɛŋ, ma yɔŋ nda Aŋtiɔɔ latulu a Pɔɔl nda Banabaa. Ma viam Chuda, o ndaa veelu aa Basabaa wo nda Sailaa.+ Nda wa chilaŋ chuaa puaapiliaa tɛɛŋ ni. 23 Yau nda poonyiaa ma viam nda a ndu wo cho hoo ni:
“Naa puaapiliaa nyaa, kiilaa, a bɛnduaa, ŋ yil nya puaapiliaa cho Aŋtiɔɔ,+ Siiliaa a Siliisiaa wa, a cho ŋChuu le wa. 24 Ŋ tuei maa wanaa pum fula naa tɛɛŋ ma kɔ paaliaŋ nya a nyɛ nda dimul nya wo,+ le ma tɛɛmbuu laalaŋ nyaa. Nduyɛ o cho naa le vem nda keŋ tosa le. 25 Lelaŋ, naa kpou ŋ chii chɛlaŋ miŋ hɛli laŋgbaa kalla le nda viomɔɔ naa nya chua nda puaapiliaa naa kaalaa, Banabaa nda Pɔɔl. 26 Nda ŋiɔɔŋ kpou luei niŋ yoomula ndalaŋ o kpundɔɔ niŋ le wali Masanɔ naa Chiisu Kiliti wo.+ 27 Ŋ cho Chuda nda Sailaa viomɔɔ naa nya chua, le ma kɔ doonuŋ nya kona a sɔɔŋ naŋ poonyiaa o yauwo hoo niŋndoŋ okɔɔ.+ 28 Nyina diandaa+ a naapila kɛɛsiaa maa ŋ cho lɛ nya wolɔɔla cheleŋ siiluu le, mɛɛ sɔɔŋ kpeekpeiyoŋ muŋ: 29 la hiou lachi a fafaŋndo nyɛm lasooluu woŋ,+ koowaŋ,+ yifaa,*+ a kaa ihini nɔɔlɛiyo.*+ Te la fafaŋ pɛ nyɔɔŋ muŋ, la cho batiuwaa sɔla. La idiiyoo!”
30 Mi laŋgbaa nda vem nda bii nɛiyo le kɔlaŋ Aŋtiɔɔ. Mɛɛ nda fuuluu, ma chuuŋgiaa kundaa kpou naapilɛ, ma ke nda yauwo. 31 Mɛɛ nda chii diomndaŋ veelu o yauwo niŋ, ma duaunuŋ nyaale tau le kɔl dɛɛniaa nda sɔla wo. 32 Wanaa ndaa suaa le Mɛlɛka wa Chuda nda Sailaa wa vɛlɛ ni. Le hei, ma dɛɛniaa puaapiliaa kɔltaŋ a sɔɔŋ bɔɔbɔɔ nda yɔŋgu woŋ, nduyɛ ma luei nda yoomuaŋ.+ 33 Mɛɛ nda viou loŋ le teleŋ tiŋ, mi puaapiliaa choŋguŋ nda, ma miiŋgu o wanaa vem nda wa lo. 34* —— 35 Kɛ mi Pɔɔl nda Banabaa lo Aŋtiɔɔ. A wa waŋnda pɛɛkoo a nda yooŋgu kɛndɔɔ dimullo a Chɛhowa* okɔɔ nda puaapiliaa bɔɔbɔɔ cheleŋ.
36 Mɛɛ palɛi hiou i tiŋ, mi Pɔɔl dimul Banabaa aa: “Ŋ miiŋgu niko miŋ kɔ yil puaapiliaa o chieeŋ bɛnduŋ naŋ kei yooŋgu kɛndɔɔ dimi a Chɛhowa* okɔɔ woŋ niŋ kpou, le sinaa mɛɛ nda cho yɛ.”+ 37 Mi Banabaa baŋ kaŋgalaŋ le mi ndaa kuɛ latulu a Chɔŋ, o ndaa veelu aa Maki wo.+ 38 Kɛ Pɔɔl ndoo yeema mi Maki ndoo kuɛ nda kɔɔli le, kanifuule teleŋ pilɛ, mbo mɛi nda Pamfiliaa mbo miiŋguŋ, o liila lɛ nda yooŋgu kɛndɔɔ dimioo le.+ 39 Ma sɛɛŋgiaŋ o suɛi hei choo kalaŋ, okoŋ ma piɔuwaŋ. Mi Banabaa+ chua Maki, ma luɛi o dɛndɔɔ niŋ le kɔlaŋ Saipulɔɔ. 40 Mi Pɔɔl ndu chua Sailaa. Mɛɛ puaapiliaa mal Pɔɔl Chɛhowa* o ba le mbo tosal ndu kɛndɛi nduɛi bɛnduei, ma kuaŋnuŋ.+ 41 Mbo kua Siiliaa a Siliisiaa, mbo luei kundala wanaa laalaŋnda yoomuaŋ.