Luku

18 Okoŋ kɔɔli, mbo dimul nda taloo le sabu nda nɔ ma wa piɛileŋ lɔɔlɔɔ, nduyɛ maa a wu ŋdial te wo.+ 2 Mbo dimi aa: “Wana kialaa ŋyama pilɛ wa o chiee pum niŋ, ndoo nɔ isiooŋ le Mɛlɛka le, nduyɛ ndoo nɔ lebɛɛ le wana le. 3 Chua ndoo vii pɔnɔɔ wo bɛɛ wa o chiee koŋ niŋ. Mi chuaa hoo lambaŋ kɔlaŋ naa wana kialaa ŋyamaa hoo chua, mbo dimul ndu aa: ‘Tosa a sabu mi sɔla di nuu naa wana suɛi cho tɛɛŋndo.’ 4 Le teleŋ tiŋ, o ve saalaŋ te. Kɛ o mɛɛlulaŋ, mbo dimuluŋ aa, ‘Mi che bɛɛ I nɔ isiooŋ le Mɛlɛka le, nduyɛ I nɔ lebɛɛ le wana le, 5 kɛ le mɛɛ chuaa hoo cho ya paaliaŋndo teleŋ o teleŋ yɛ, I cho tosa o nɛi o nɛi niŋ mbo sɔla di o nɔ le sɔlaa wo, le halikpeŋ mbo keluŋ ya kɔɔli.’”+ 6 Okoŋ mi Masanɔɔ dimi aa: “La tuei niko nyɛ wana kialaa ŋyama lakafaa hoo dimi wo. 7 Mɛlɛka bɛɛ tiuba mbo ke wanaa nduaa o hɛli, ma wa chaŋndo o ndu lo idii a ichɔl le malaa wa di ndaa,+ nduyɛ mbo biunuŋ nda.+ 8 Mi dimul nya, o cho nda di ndaa ke chɔ chɔ. Kɛ te Po wanachioo hiŋ pɛ, baa o saaluŋ niŋ pa laalaŋ waa nuaa o lɛŋndeŋ choo?”

9 Mbo dimul vɛlɛ wanaa ndaa laalaŋ maa a cho sakpo, nduyɛ a chi acheleŋnda wanaa sɔvɛ le wa taloo hoo aa: 10 “Puaa a ŋiɔɔŋ ndaa kuɛ o chiɛi Mɛlɛkaa niŋ ni le piɛileŋ. Hoo Falisiinɔɔ, o pilɔɔ wana biyaa paawaa.* 11 Mi Falisiinɔɔ sim mbo kandu piɛileŋ o kɔl niŋ aa, ‘Oo Mɛlɛka, I mel num balika le mɛɛ ya cho maa waŋnda a tuaa le yɛ, wanaa dia nyɛm pilaŋ a lediɔɔmu wa, wanaa sendu le wa, a wanaa suundɛiya. I cho bɛɛ pɛŋ maa wana biyaa paawaa hoo le. 12 O lɔɔ bɛŋgu, le diiŋ ya bii sumndo ni. Nduyɛ, I cho o tɔ ndɔɔ yɔŋgoo le nyɛm ya sɔla woŋ kpou.’+ 13 Kɛ wana biyaa paawaa ndu, mbo sim tiŋ landaŋ. Ndoo yeema bɛɛ pɛŋ mbo heelu hɔlaa nduaa choo choo le. Mbo wa takpaa lɔɔ mbo dimi aa, ‘Oo Mɛlɛka, tuiinuŋ ya inyiɛɛ fɔ. Wana hakioo ya cho ni.’+ 14 Mi dimul nya, mɛɛ poo hoo miiŋgu o chiɛi ndɔɔ, Mɛlɛka o hɔl, mbo chɔm maa o wa wana sakpo mbo hiau Falisiinɔɔ poloŋ.+ Kanifuule, wana o wana heeluŋ pɛ, a cho ndu tusi. Kɛ wana o wana tusiŋ pɛ, a cho ndu heelu.”+

15 Okoŋ, mi waŋnda wa hunɔɔ a chuauwaa ndaa pɔmbuaa naa Chiisu chua le mbo handu nda balaŋ choo. Mɛɛ buɛiyaa nduaa che hei, ma kuuna nda.+ 16 Kɛ mi Chiisu veelu chuaambuaa pɔmbuaa, mbo dimi aa: “La mal chuaambuaa pɔmbuaa a huŋ o ya lo. La kuuna nda le, kanifuule le haa ndoo Masale Mɛlɛkaleŋ le cho ni.+ 17 A tonya mi dimul nya, wana o wana chɛl Masale Mɛlɛkaleŋ maa chuaambɔ pɔmbɔɔ le, o luei leniŋ te.”+

18 Okoŋ, mi masa pilɛ nyuna Chiisu aa: “Wana Pɛɛkaa Kɛndɔɔ, yɛɛnɛ ya nɔ yɛ mi tosa le mi sɔla yoomu fafɛɛŋndo?”+ 19 Mi Chiisu dimul ndu aa: “Le yɛɛnɛ ŋ cho yɛ ya veeloo aa wana kɛndɔɔ? Wana o wana cho o kɛndɛ le, mɛɛ Mɛlɛka ndupilɛ kpe.+ 20 A sina sawalaŋ ndaŋ, lende le? ‘Wana suunda le,+ wana dii wanachioo le,+ wana yɔŋ levii le,+ wana tɛnda seile lakafa le,+ ke finya num a kala num bɛɛleŋ.’”+ 21 Mi poo dimi aa: “I wa wɔ o pɔmbɔ mi kandu laŋ kpou biyɔɔ.” 22 Mɛɛ Chiisu tuei hei, mbo dimul ndu aa: “Nyɔɔ o pilɛ lo wɔ num le tosaa: Pisi nyɛ o nyɛ ŋ nɔ ma ke wanaa bala fonduaa kaniŋ* muŋ. A cho sullo sɔla o Mɛlɛka lo. Okoŋ a hiŋ, a tol la kɔɔli.”+ 23 Mɛɛ o tuei hei, mbo tambu kɔllo tau, kanifuule o wa wana sulaa bɛndu.+

24 Mi Chiisu tofa ndu, mbo dimi aa: “Nuawɔ se mɛɛ i cho ikala le mi wanaa sulaa luɛi o Masale Mɛlɛkaleŋ niŋ yɛ!+ 25 I cho bɛɛŋ bɛɛŋ le mi nyɔɔmiɔɔ kei o tɛɛŋgu lesiɛndioo niŋ, mbo hiau wana sulaa luɛiyɔɔ o Masale Mɛlɛkaleŋ niŋ.”+ 26 Mi wanaa tuei hei ya nyuna aa: “Mɛɛ mi nɛɛnɛ kpeekpei sɔla yɛ niŋ pioŋɔɔ?”+ 27 Mbo dimul nda aa: “I cho i kala le wanachioo, kɛ Mɛlɛka ndu nyɛ o nyɛ kindu a ndu le.”+ 28 Kɛ mi Pitɛ dimi aa: “Ŋ mal niŋ nyɛ o nyɛ naŋ nɔ miŋ tual num kɔɔli.”+ 29 Mi Chiisu dimul nda aa: “A tonya mi dimul nya, wana o wana mɛi pɛ chiɛi ndɔɔ, ɔɔ laa ndɔ, ɔɔ bɛndaa nduaa, ɔɔ pɔmbuaa nduaa, ɔɔ finya ndɔ, ɔɔ kala ndɔ, ɔɔ chuauwaa nduaa le Masale Mɛlɛkaleŋ,+ 30 o cho hunɔɔ nyɛ sɔla o teleŋndo hoo niŋ, mbo hiou nyɛ o nyɛ ndoo nɔ. Nduyɛ mbo huŋ sɔla yoomu fafɛɛŋndo o chilaŋ niŋ.”+

31 Okoŋ mbo sei a kiilaa 12 nda, mbo dimul nda aa: “Ŋ cho helɔɔ Chulusalɛm, nduyɛ nyɛ o nyɛ wanaa ndaa suaa le Mɛlɛka wa dimi a Po wanachioo okɔɔ wo cho peelɔŋ.+ 32 Le tamaseliiyo, a cho ndu malɔɔ wanaa cho ŋChuu le wa o ba,+ ma mam ndu,+ ma yiou ndu, nduyɛ ma tufu ndu lɔluaŋ choo.+ 33 Okoŋ kɔɔli, ma lɔɔ ndu, nduyɛ ma dii ndu.+ Kɛ o paale yaa ndɔleŋ choo, mbo miiŋgu yoomu.”+ 34 Kɛ sɔɔŋ muŋ kpou, i pilɛ bɛɛ a bii ndi bila le, kanifuule ŋ wa ŋ viaŋnaŋ, nduyɛ a sina sɔɔŋ o dimi woŋ pɛŋgu le.

35 Mɛɛ Chiisu wa le fuuluuwo Chɛluiko, po sumɛi pum wa ichali o nɛiyo daŋgala mbo wa waŋnda nyɔɔŋ piɛiyo.+ 36 Mɛɛ poo hoo tuei faŋgaa hiouwɔɔ iwɔkɔ wɔkuɛi, mbo nyuna le nyɛ wa yɔŋnɔŋ ndo wo. 37 Ma dimul ndu aa: “Chiisu fula Naasaluɛi yo cho hiouwɔɔ ni!” 38 Okoŋ mbo deŋi choo choo aa: “Chiisu, Po Deeve wo, tuiinuŋ ya inyiɛɛ fɔ!” 39 Mi wanaa wa ndu lachi wa kandu ndu kpaa ma wa ndu dimullo le mbo pɛŋgi bɔɔluuwo. Kɛ mbo chɔɔlu deŋi choo choo aa: “Po Deeve wo, tuiinuŋ ya inyiɛɛ fɔ!” 40 Okoŋ mi Chiisu sim, mbo dimi le ma hiŋ a poo naa ndu chua. Mɛɛ poo sɔɔŋguu Chiisu ikɛi, mbo nyuna ndu aa: 41 “O yɛɛnɛ ŋ yeema yɛ mi tosal num?” Mbo dimi aa: “Masanɔɔ, I yeema ma tosa mi che vɛlɛ.” 42 Okoŋ mi Chiisu dimul ndu aa: “Kandu vɛlɛ chɔɔ. Laalaŋ numndo siŋgi num.”+ 43 O lepilɛ niŋ kpe, mbo cha, okoŋ mbo kandu ndu tolɔɔ kɔɔli,+ mbo saŋgala Mɛlɛka. Mɛɛ waŋnda che nyɛ yɔŋnuŋ ndo, mi nda kpou saŋgala Mɛlɛka.+