Luomaŋnda

6 O yɛɛnɛ naŋ nɔ yɛ miŋ dimi? Baa ŋ nɔ pa miŋ hiou lachi a hakioo tosaa le halikpeŋ miŋ chɔɔlu kɛndɛi bɛnduii Mɛlɛkɛi sɔla? 2 Sako bɛɛ! Ŋ sina maa ŋ cho niŋ machuaa wanaa vilɛi o hakioo niŋ.+ Baa ŋ nɔ pa miŋ hiou lachi a waa o hakioo niŋ?+ 3 La sina nuaa maa naŋ sɔla yiŋɔɔ o Chiisu Kiliti niŋnda kpou,+ maa o piɔm ndɔɔ niŋ te naŋ sɔla yiŋɔɔ le?+ 4 Le yiŋɔɔ naŋ sɔla o piɔm ndɔɔ niŋndo, miŋ sɔla kumbɔɔ a ndu latulu.+ Nduyɛ mɛɛ Kiliti miiŋgu yoomu o biilu Finya ndɔɔ niŋ yɛ, naa bɛɛ ŋ cho niŋ o yoomu sɛnɛiyo niŋ.+ 5 Mɛɛ naŋ cho o diompilɔɔ niŋ a ndu le mɛɛ naŋ cho wu maa ndu yɛ,+ o nɛi pilɛ koŋ choo, ŋ cho o diompilɔɔ niŋ a ndu le mɛɛ naŋ cho miiŋgu yoomu maa ndu yɛ.+ 6 Ŋ sina maa wanachieeyɛi nɛi paanduei sɔla baŋɔɔ o yɔmndo choo latulu a Chiisu,+ le mbo faŋa kpaaya hakioo naa o ŋdial.+ Ŋ nɔ lɛ miŋ wa chiaa hakioo o ba bɛŋgu le.+ 7 Wana vi wo, haki o haki cho lɛ ndu kuee le.

8 Lelaŋ, te ŋ vi pɛ a Kiliti latulu, ŋ laalaŋ maa ŋ cho vɛlɛ miiŋgu yoomu a ndu latulu. 9 Ŋ sina maa miiŋgu Kiliti miiŋgu yoomu wo,+ fɛɛŋ bɛɛ o vi lɛ le.+ Piɔmndo nɔ lɛ ndu kpaaya choo le. 10 Le pilɛ kpe o vi ni mbo faŋa hakioo.+ O cho niŋ yoomu suŋ suŋ le hɛnaŋ Mɛlɛkaa tosaa. 11 Lende koni, nya bɛɛ la chua nyapila maa la cho niŋ a vilɛiya o hakioo niŋ, kɛ maa la cho yoomu le hɛnaŋ Mɛlɛkaa tosaa maa buɛiyaa Chiisu Kiliti wa.+

12 Lelaŋ, pesiŋ bɛɛ la chɛl lɛ mi hakioo wa masaa dialuŋ nyaŋ choo le.+ La tual yeemaŋ dialuŋ nyaŋ wu muŋ ndoŋ kɔɔli le. 13 La soliŋ lɛ dialuŋ nyaŋ kpeku maa nyɛm wali le yɔŋ wɔɔŋndo tosaa le. Kɛ la yɔŋguŋ o Mɛlɛka lo maa wanaa miiŋgu yoomu wa. La yɔŋgu Mɛlɛka dialuŋ nyaŋ maa nyɛm wali le nyɛ cho sakpo wo tosaa.+ 14 La chɛl mi hakioo wa nya choo masa le, kanifuule la cho o sawa* bɛŋgu le.+ Suŋ suŋ niŋ, la cho kɛndɛi bɛnduii Mɛlɛkɛi tueiyɔɔ yeela.+

15 Baa koŋ sim ni maa ŋ nɔ miŋ tosa hakioo le mɛɛ naŋ sɔla kɛndɛi bɛnduii Mɛlɛkɛi, nduyɛ ŋ cho o sawa bɛŋgu le yɛ?+ Pɛ pɛ bɛɛ! 16 La sina nuaa maa te la yɔŋguŋ pɛ maa chiaa le wana o wana diikɔŋndo, la simnuŋ chiaa le wana koŋ te?+ Lelaŋ, te la simnuŋ pɛ chiaa le hakioo,+ la cho piɔmndo sɔla.+ Kɛ te la simnuŋ pɛ chiaa le Mɛlɛka, nduyɛ mi la diikuŋ ndu, la cho wa wanaa sakpuaa. 17 Ŋ mel Mɛlɛka balika maa mi che bɛɛ la wa paandu chiaa hakioo o ba bɛŋgu, kɛ suŋ suŋ niŋ, la cho pɛɛkula nya sɔla laŋ diikɔŋndo a kɔllo kpou. 18 Mɛɛ nya sɔla baŋaa hakioo o ba bɛŋgu,+ mi la simnuŋ chiaa le nyɛ cho sakpo wo tosaa.+ 19 Le mɛɛ nya cho wanaa lahakiaa yɛ ya cho suɛi o yiyaŋ iwana chieeyaa niŋ ni. O paandoo niŋ, mi nyaa yɔŋgu dialuŋ nyaŋ le kaala nɔɔlɛilaŋ a yɔŋ wɔɔŋndo tosaa. Kɛ suŋ suŋ niŋ, yeemaŋ siiŋguu nya chiaa le tosaa nyɛ cho sakpo wo, a nyɛ cho o diandaa wo nya nɔ ni mi la tol kɔɔli.+ 20 Boondii nya wa chiaa le hakioo ve, nyaa nɔ kuee le nyɛ cho sakpo wo tosaa le.

21 Yɛɛ wa yɛ fulamakɔɔli kaala nyalaŋ a boondii keŋ? Mi la tosa sɔɔŋ nya che niŋ hau maa sɔɔŋ lasiɔmboŋ ndoŋ. Nduyɛ, o piɔmndo niŋ koni sɔɔŋ muŋ yaa wana ni.+ 22 Kɛ mɛɛ nya sɔla niŋ baŋaa hakioo o ba, mi la simnuŋ chiaa le Mɛlɛka yɛ, la tosa nyɛ cho o diandaa wo.+ O mɛɛlulaŋ, la cho yoomu fafɛɛŋndo sɔla.+ 23 Kanifuule, paawa* wana sɔla le hakioo wo cho piɔmndo ni.+ Kɛ, ke Mɛlɛka yɔŋgu naa sanaa o Masanɔ naa Chiisu Kiliti+ niŋndo cho yoomu fafɛɛŋndo ni.+