BUŊGƐI WALII 2

Mɛɛ Ŋ Suaa Yɛ

Kɔliŋtiaŋ Diiŋ Ndɔɔ 2:17

SƆƆŊ KULLOŊ: Soo mɛɛ numpila suaa yɛ, nduyɛ ma soo a kɔllo kpou o wanaa cho num nilaŋ yaŋɔɔ wa lo.

Piɛi ma toosiaŋ nyɛkɛndɛi. Piɛi le malaa le ma handu kɔllo o suɛi ŋ cho toosiaa ve choo, kɛ tiindaŋ o numpila niŋ te. Kɛsiŋ sɔɔŋ kulloŋ o kɔl, sɔɔŋ ŋ yeema ma soo woŋ. Soo mɛɛ numpila suaa yɛ. Veelu lɛ diomndaŋ mɛɛ mɛɛ la cho la poonyiaa o yauwo choo yɛ le.

Te o wa pɛ maa a cho diomndaŋ veelu o Baabuiyo niŋ ɔɔ yaula naalaŋ opilɛ, sina yooŋgu cho leniŋndo nyɛkɛndɛi. Hei mala num a boŋi boŋi o diomndaŋ veeloo niŋ te. Te sɔɔŋ waŋnda dimi woŋ ŋ yeema miŋgioo sondo ni, veelu diomndaŋ mɛɛ nda sinaŋ o suɛi keŋ niŋ yɛ. A wa pɛ hei tosaa, a nɔ ma hiou ba le.
Soo a kɔllo kpou. Yiyaŋ le sabu wanaa cho num nilaŋ yaŋɔɔ wa nɔ ma tuei nyɛ ŋ cho dimioo wo. Handu nda kɔllo choo. Okoŋ, mɛɛ ŋ sim yɛ, mɛɛ ŋ cho balaŋ yoondiaa yɛ, a mɛɛ ŋ cho hɔlla tosa yɛ cho nda dimul mɛɛ ŋ yiyaŋ a suɛi keŋ yɛ, nduyɛ a mɛɛ ŋ yiyaŋ a nda yɛ.

Teŋgeŋndo cho suɛi mɛɛ numpila suaa yɛ tɛɛŋ a suɛi kpɔlɔkpɔlɔ. Soo walaŋ le mi yooŋgu ŋ cho dimioo wo sɔla bɛɛleŋ.
Tofa wanaa cho num nilaŋ yaŋɔɔ wa. Wa wanaa ŋ cho suɛi o nda lo wa tofaa hɔlla te a wa pɛ suɛi. Te a wa pɛ suɛi yɔŋgoo, tofa wanaa cho num nilaŋ yaŋɔɔ wa a pilɛŋ pilɛŋ. Kei nda kpou hɔlteŋ choo o lepilɛ niŋ ma faŋa le.