Hiouwɔɔ Lachioo Tosaa o Wali Pollo Niŋ—Chiŋa Waŋndo Baltaŋ Halikpeŋ Ma Dimul Ndu Yooŋgu Kɛndɔɔ o Baltaŋ Niŋ

Le yɛɛ hei Bɛnda Yɛ? Te ŋ wa pɛ o wali pollo niŋ chiɛiyo a chiɛiyo, lepum wanaa bɔɔbɔɔ ve o la nda lo bɛɛ le. Naapum, ŋ komal waŋnda haa te ŋ wa pɛ wana chiɔuwaa chumndo o lapita, boondii naŋ wa pɛŋgi pɔmbɔɔ o wallo niŋndo ɔɔ o sukuu. Hɛnaŋ Chɛhowaa cho ni maa wana o wana nɔ mbo tuei yooŋgu kɛndɔɔ a Masale ndɔ leŋ okɔɔ. (Tim. Tasoo 2:3, 4) Le yooŋgu kɛndɔɔ dimioo o baltaŋ niŋ, mɛɛ miŋ chiŋa waŋndo baltaŋ.

Vɛɛ Ŋ Tosa yɛ Hei?

Tofa wana ŋ yeema suɛi o ndu lo wo. Baa waŋndo hoo nɔ pa hɔlaa wana bii ndu ichaŋya nduyɛ, mbo yeema le ma soo o ndu lo? Baa mɛɛ ŋ komal ndu yɛ chɛl num pa ma bɛndi suukaŋndo? Wanaa dimiaa yooŋgu kɛndiaa apum nua fɛŋ waŋndo hɔlla ma mam muɛɛŋ. Te wana koŋ bɛɛ mam pɛ muɛɛŋ, a kindiŋ le baltaŋ kandɔɔ a ndu.
Te a nɔ kɔl sikpa le suɛi le, piɛi chobe o kɔl niŋ naa Chɛhowa cha.—Nɛh. 2:4, NW; Walta Wa. 4:29.
Kandu a suɛi cho tɛtɛlɛ ve. Naapum a yilɔɔ. O cho a Masale Mɛlɛkaleŋ okɔɔ le Chiisu kandu suɛi o chua Sameeliaanɔɔ lo le. (Chɔŋ 4:7) Lepum, a kandu suɛi o waŋndo lo a ndu chandɔɔ. A dimi aa, “Chuauwaa numnda nɔ bɛɛleŋ bɔɔ!” Nyunaa bɛɛ cho vɛlɛ nɛiyo o pilɛ le baltaŋ kandɔɔ. A nyuna waŋndo aa, “Numboo tuei pa yooŋgu nda wa koŋ chɔchɔl dimioo o alaadioo choo wo?”
La kandu pɛ baltaŋ, nuuviaa nɛi ŋ dimul ndu yooŋgu kɛndɔɔ wo. Kɛ tosa ndi o lau niŋ te. Tosa balta nya cho wa dɔuwɔɔ laŋ mila wa nyɛkɛndɛi. Naapum a kandu a suɛi o nɔ yeemɛiye, i tosa mbo nyuna num nde. Le tamaseliiyo, te o wa pɛ maa a balta yuŋgoo okɔɔ nya cho suɛi ni, a dimi aa, “I saaluŋ sila sɔvɛ pum le chuauwa mandaa ma fula leniŋ nyɛkɛndɛi.” Te o wa yɛ pɛ maa a yooŋgu nya tuei o alaadioo choo wo okɔɔ nya cho baltaŋ ni, a dimi aa, “I laŋa tuei suɛi hiŋ a sigaŋndo ve.” Te baltaŋ la mɛɛlu pɛ ma dimul ndu yooŋgu kɛndɔɔ le, tambu kɔl te.
Kɔ a yaula pɔmbɔlaŋ o ba ɔɔ la cheleŋndaŋ le wanaa chɔm yeemɛiya kioo.

Kindiŋ Ma Tosa hei o Paŋgei hei Niŋ,

• O lɔɔ o lɔɔ bɛŋgu, kindiŋ ma chiŋa waŋndo baltaŋ o wa bɛɛ lepilɛ halikpeŋ ma dimul ndu yooŋgu kɛndɔɔ o baltaŋ niŋ.