Hiouwɔɔ Lachioo Tosaa o Wali Pollo Niŋ​—Baltaŋ Kandɔɔ le Yooŋgu Kɛndɔɔ Dimioo

Mi Chiisu tiuba le chua Sameeliaŋnɔɔ yooŋgu kɛndɔɔ dimullo o baltaŋ niŋ kanifuule o kandu fɛɛŋ suukaŋndo a ndu. Vɛɛ naŋ tosa yɛ hiouwɔɔ lachioo le suukaŋndo kandɔɔ a wanaa naŋ sina le wa?

• Wa wana ichaŋya nduyɛ ma soo o waŋnda lo. Mi che bɛɛ Chiisu wa o saŋgɛi, kɛ mbo kandu suukaŋndo a mɛɛ o nyuna le mɛŋma kollaŋ yɛ. A kandu yilɔɔ a dialuŋ fulaa nduyɛ naapum ma soo a mɛɛ choo cho yɛ, ɔɔ a sɔɔŋ laŋga yɔŋnuŋndoŋ okɔɔ. Loonuŋ maa kpeleŋ tasoo cho le suukaŋndo kandɔɔ ni. Lelaŋ, soo a nyɛ pilaŋ wana koŋ kɔllo wo. Te o mulul num te, tambu kɔl te. Kindiŋ ma soo vɛlɛ o wana cheleŋndo. Piɛi o Chɛhowa lo le kɔl sikpaa.—Nɛh 2:​4; Walta 4:​29.

• Wa o bɛɛndiaaŋ teleŋ o teleŋ le yooŋgu kɛndɔɔ dimioo, kɛ lau le ndu tosaa le. Tosa mi suukaŋndo wa nyɛkɛndɛi. Te a baŋ pɛ waŋndo le suukaŋndo, koŋ tɛɛmbuu waŋndo kɔllo nduyɛ mbo kelu suukaŋndo. Tambu kɔl te te waŋndo kelu pɛ suukaŋndo tuupa ma dimul ndu yooŋgu kɛndɔɔ. Te siooŋnde wa num pɛ le yooŋgu kɛndɔɔ dimioo o baltaŋ niŋ, pɛɛku le suukaŋndo kandɔɔ, ma nɔ bɛɛ kpeleŋ le yooŋgu kɛndɔɔ dimioo le. [Handu viduei 1 okoŋ, mi la suukaŋ lechoo.]

• Kindiŋ ma nuuviaa nɛilaŋ le yooŋgu kɛndɔɔ dimioo a mɛɛ ŋ dimul ndu suɛi pilaŋ ndu kɔllo a laalaŋ numndo okɔɔ wo yɛ. Koŋ tosa mi wana koŋ nyuna num le ma tɛɛsial ndu. Mi Chiisu suaa a nyɛ pilaŋ chuaa kɔllo wo, okoŋ mi chuaa nyuuniaa ndu. Mɛɛ o kandu yooŋgu kɛndɔɔ dimioo, nyunala chua koŋ o wa laŋ mulioo ni. [Handu viduei 2 okoŋ, mi la suukaŋ lechoo nduyɛ ma handu viduei 3 okoŋ, mi la suukaŋ lechoo.]