Hiou Lachi a Tiindaŋ Numndo Kindioo Poŋ

1. Tiindaŋ kuɛɛ Chɛhowa ke yɛ naa?

CHƐHOWA ke naa tiindaŋ sɔvɛ sɔviɔɔ le yoomu fafɛɛŋndo sɔlaa o chilaŋ niŋ. Waŋnda apum nɔ tiindaŋndo le kɔlaŋ waa o choo choo niŋ lefafɛɛŋ o inyinaya. (1 Kɔliŋ. 15:​50, 53) Kɛ wanaa bɔɔbɔɔ nɔ tiindaŋndo le waa o chieeŋndo choo lefafɛɛŋ, ma nɔ kɛndiaa walaŋndo a kɔl kɛndɛ kpeekpeiyo. (Sɔɔŋ. 21:​3, 4) O yɔŋ bɛɛ miŋ nɔ tiindaŋndo le kɔlaŋ o choo choo niŋ ɔɔ le waa o chieeŋndo choo, ŋ nɔ miŋ chua ndu o sɔvɛ.

2. O yɛɛ choo tiindaŋ naa tɔlnuŋ yɛ, nduyɛ le yɛɛ naŋ dimi yɛ lende?

² O Baabuiyo niŋ, diomndo hoo ‘tiindaŋndo’ sim le “sɔɔŋ kɛndɔŋ waa lehɔl.” Ŋ sina maa tiindaŋ naŋ nɔ le chilaŋndo cho nyɛ kpeekpei kanifuule, Chɛhowa ke naa ndu ni. (Luomaŋ. 15:​13) Ŋ sina nyɛ o chuel naa buŋgɛiyo, nduyɛ teleŋ o teleŋ mbo lo o lediom. (Nɔm. 23:​19) Ŋ sina vɛlɛ maa Chɛhowa nɔ yeemɛi a kpaayaa le sɔɔŋ o dimi woŋ kpou tosaa. Lelaŋ, tiindaŋ naa tolnuŋ o sɔɔŋ naapila yiyaŋ maa ŋ cho yɔŋnɔŋndoŋ choo le. Kɛ o tɔlnuŋ o sɔɔŋ naŋ sina maa ŋ cho yɔŋnɔŋ ndoŋ choo.

3. Yɛɛ naŋ cho yɛ yaasiaa o buŋgɛi hei niŋ? (Sam 27:​14)

³ Finya naa o choo choo niŋ kaala naa tau, nduyɛ o yeema naa miŋ dɔu tiindaŋndo o ndu niŋ. (Nuawɔ Sam 27:​14.) Te tiindaŋ naa o Chɛhowa niŋ wa pɛ o kala poŋ, koŋ mala naa miŋ biunuŋ tɔɔndaŋndaŋ, miŋ nɔ kɔl simulaa, nduyɛ miŋ wa a kɔl kɛndɛ mɛɛ mɛɛ sɔɔŋ palaŋ komal naa o chilaŋ niŋ. O buŋgɛi hei niŋ, ŋ cho chɔ mɛɛ tiindaŋ naa manda naa yɛ. Tiindaŋ naa cho ko maa chiliŋii simi dɛndɔɔ o peelo ve, a mɔsil puaa chɔuwa wounuŋndo. Ŋ cho fɛŋ yaasiaa a hei okɔɔ, okoŋ miŋ yaasiaa mɛɛ naŋ kindi tiindaŋ naa yɛ.

TIINDAŊ NAA CHO KO MAA CHILIŊII SIMI DƐNDƆƆ O PEELO VE

4. Vɛɛ tiindaŋndo cho yɛ maa chiliŋii simi dɛndɔɔ o peelo ve? (Hibuluiya 6:​19)

⁴ O yau kiilanɔɔ Pɔɔl poonyial Hibuluiya wo niŋ, mbo tuu tiindaŋ naŋ nɔ wo a chiliŋii simi dɛndɔɔ o peelo ve. (Nuawɔ Hibuluiya 6:​19.) Teleŋnda bɔɔbɔɔ, o dɛndɛla kua o mɛŋndaŋ choo laŋ niŋ ndoo kela ni. Lelaŋ, ndoo sina maa chiliŋii simi dɛndɔɔ o peelo ve mala dɛndɔɔ ni o hiiluŋ te. Teleŋ pilɛ, ndu a wanaa cheleŋ wa o dɛndɔɔ niŋ, mi hueiyii bɛndu bɛnduei kandu hɔŋndo. Mɛɛ hueiyii keŋ kandu hɔŋndo, mbo cha mi wanaa wa kɔlaŋ a dɛndɔɔ wa mal chiliŋuŋ muŋ o peelo le halikpeŋ hueiye kue a dɛndɔɔ o fondaŋ wɔɔŋndo le. (Walta. 27:​29, 39-41) Mɛɛ chiliŋii simi dɛndɔɔ o peelo ve simi dɛndɔɔ yi yɛ, lende tiindaŋ naa simi naa yi ni ŋ hiiluŋ o Chɛhowa piɛiyo niŋ te, o yɔŋ bɛɛ mi tɔɔndaŋnda kala kalalaŋ la komal naa. Nduyɛ te sɔɔŋ kindilaŋ komal naa pɛ, tiindaŋ koŋ mala naa ni miŋ kɛsi kɔllo, nduyɛ miŋ nɔ laalaŋndo maa sɔɔŋ kɛndɔŋ cho yɔŋnɔŋ o chilaŋ niŋ. Ŋ nɔ miŋ loonuŋ nyɛ Chiisu dimi wo maa, waŋnda cho naa nyɛpalaa tusi choo. (Chɔŋ 15:​20) Lelaŋ, te ŋ wa pɛ yiyaŋndo a fanda cho naa lachi wo okɔɔ, keŋ mala naa miŋ sim yi o Chɛhowa piɛiyo niŋ ŋ hiiluŋ te.

5. Vɛɛ tiindaŋndo mala yɛ Chiisu mi che bɛɛ ndoo sina maa o cho piɔmndo sɔla?

⁵ Mi tiindaŋndo mala Chiisu le loo o laalaŋndo choo mi che bɛɛ ndoo sina maa o cho piɔm imɔnɔɔ sɔla. O paale Pɛŋtikɔɔsileŋ choo wɔsi 33 o faŋa Chiisu wo kɔɔli, mi kiilanɔɔ Pitɛ suaa a huului cho o yau Sam ndo niŋndo okɔɔ. Huului keŋ chɔm mɛɛ Chiisu ndoo kɛsi kɔllo, nduyɛ mbo nɔ tiindaŋndo o Mɛlɛka niŋ yɛ. Mbo dimi aa: “I nɔ tiindaŋndo kanifuule, a cho ya malɔɔ o sɛiyo niŋ te, kɛlɛŋgaa ma chɛl mi wana chɔm lo lechoo wo o numndo wo sɛ. . . . A cho tosa mi wa a nyaaloo tau num o hɔl.” (Walta. 2:​25-28; Sam 16:​8-11) Mi che bɛɛ Chiisu ndoo sina maa o nɔ le piɔmndo sɔlaa, kɛ ndoo nɔ tiindaŋndo maa Mɛlɛka cho ndu miŋgi yoomu. Nduyɛ ndoo sina vɛlɛ maa, o cho miiŋgu diompilɛ nda Finya ndɔ o choo choo niŋ.—Hibu. 12:​2, 3.

6. Yɛɛ puaapilɛnɔ pilɛ dimi yɛ a tiindaŋndo okɔɔ?

⁶ Tiindaŋ naŋ nɔ le chilaŋndo mala niŋ puaapiliaa a ndepiliaa naa bɔɔbɔɔ le ma biunuŋ. Ŋ tofaŋndɔ tamasi puaapilɛnɔ pilɛ diolaŋ Liona Chini. O lɛŋnde Iŋkilaŋ ndeŋ niŋ puaapilɛnɔɔ hoo wa ni. Mɛɛ Chɔu Chieeŋ Tasoo del, ma duau ndu o chiɛi manyumndo niŋ le mɛɛ o kɛɛ kɔlaŋ o chɔuwo yɛ. Mɛɛ o chii paŋgoŋ ŋmuuŋ o chiɛi manyum koŋ niŋ, ma kua a ndu o dɔɔŋgɔ ndaa kota waŋnda tau wo niŋ. Mbo dimi aa: “Nyɛ yɔŋnuŋ ya wo mala ya le sinaa mɛɛ i cho suɛi sɔvɛ le tiindaŋndo nɔɔ le nyɛkindilaa biuwɔŋndo yɛ. Tamasi Chiisu wo, kiilaa nduaa a wanaa ndaa suaa le Mɛlɛka wa mala naa miŋ nɔ tiindaŋndo, nduyɛ miŋ sɔla yoomuaŋ le tɔɔndaŋndaŋ biuwɔŋndo. Nduyɛ ŋ nɔ vɛlɛ diomnda mɛyaala cho o Baabuiyo niŋndaŋ le naa malaa.” Tiindaŋ Liona wo wa maa chiliŋii simi dɛndɔɔ o peelo ve. Naa bɛɛ, tiindaŋ naa tiuba mbo wa maa chiliŋii simi dɛndɔɔ o peelo ve.

7. Vɛɛ tɔɔndaŋnda komal naa laŋ la kindi yɛ tiindaŋ naa? (Luomaŋnda 5:​3-5; Chemisi 1:​12)

⁷ Te Chɛhowa mala naa pɛ miŋ biunuŋ tɔɔndaŋndaŋ, mi keŋ tosa mi tiindaŋ naa chɔɔlu kalu poŋ, nduyɛ mbo hini kɔl a naa. (Nuawɔ Luomaŋnda 5:​3-5; Chemisi 1:​12.) Tiindaŋ naa cho wa o kala mbo hiou bɛɛ teleŋ tase naŋ tuei yooŋgu kɛndɔɔ, nduyɛ miŋ chɛl ndu wo. Setana yeema mi tɔɔndaŋnda komal naa laŋ la tosa miŋ vi ŋdial. Kɛ a mala Chɛhowaa, ŋ tiuba miŋ biunuŋ tɔɔndaŋ kɛ kɛ.

TIINDAŊ NAA CHO KO MAA MƆSIL PUAA CHƆUWA WOUNUŊNDO

8. Vɛɛ tiindaŋ naa cho yɛ maa mɔsil puaa chɔuwa wounuŋndo? (1 Tɛsaloniaŋ 5:​8)

⁸ Mi Baabuiyo tuu vɛlɛ tiindaŋ naa a mɔsil puaa chɔuwa wounuŋndo. (Nuawɔ 1 Tɛsaloniaŋ 5:​8.) Mi sovɛinɔɔ wounuŋ mɔsillo o chɔuwo yɔŋii chiŋɔma yaamɔɔwaa nduaa wuu waŋ ma viɔ ndu bolleŋ. Naa bɛɛ, ŋ cho chɔulabaa a Setana. Lelaŋ, ŋ nɔ miŋ manda yiyaŋnda naalaŋ. Mi Setana tɔɔndaŋ naa o nɛila bɔɔbɔɔ niŋ, nduyɛ mbo kindiŋ le yiyaŋnda naalaŋ pɔsɔŋiaa. Mi mɔsil puaa chɔuwa wounuŋndo manda nda bolleŋ. O nɛi pilɛ koŋ choo, mi tiindaŋ naa manda yiyaŋnda naalaŋ le miŋ lo o laalaŋ naa choo.

9. Vɛɛ wanaa nɔ tiindaŋ te wa tosa yɛ sɔɔŋ?

⁹ Mi tiindaŋ naŋ nɔ le yoomu fafɛɛŋndo sɔlaa wo mala naa miŋ tosa sɔɔŋ a taasi, nduyɛ miŋ tosa kɛɛsiaala kɛndɛlaŋ. O baa pilɔɔ choo, te ŋ chɛl pɛ mi tiindaŋndo hoo yɔŋyɔla, nduyɛ miŋ wa yiyaŋndo o sɔɔŋ ŋdialloŋ choo, mɛɛ tiindaŋ naŋ nɔ le yoomu fafɛɛŋndo sɔlaa wo cho naa hiɔlɔŋ. Yiyaŋndɔ a nyɛ yɔŋnuŋ a Kilisiɔŋnda apum o Kɔliŋ niŋndo okɔɔ. Mi waŋnda haa mal tiindaŋ ndaa nɔ maa Mɛlɛka cho wanaa vi wa miŋgi yoomu wo. (1 Kɔliŋ. 15:​12) Le hei, mi Pɔɔl poonyiaa maa, wanaa nɔ laalaŋndo maa Mɛlɛka miŋgi niŋ wanaa vi wa yoomu le wa, le yeemaŋ ndaŋ peeloo koni nda tosa sɔɔŋ ni. (1 Kɔliŋ. 15:​32) Hau bɛɛ, mi wanaa nɔ tiindaŋ o mɛɛla Mɛlɛkalaŋ niŋ te wa tosa sɔɔŋ mɛɛ nda yeema yɛ, le halikpeŋ ma wa a kɔl kɛndɛ. Kɛ naa naa, ŋ nɔ laalaŋndo o diomnda mɛyaala Mɛlɛkalaŋ niŋ. Maa mɔsil puaa chɔuwa wounuŋndo, mi tiindaŋ naa manda yiyaŋnda naalaŋ, ŋ hendu kɔllo o naapila choo, okoŋ miŋ tɛɛmbuu chaŋyɛi naŋ nɔ a Chɛhowa ve le.—1 Kɔliŋ. 15:​33, 34.

10. Vɛɛ tiindaŋndo mala yɛ num le ma soliŋ yiyaŋnda wɔɔŋndaŋ o kɔl?

¹⁰ Mi tiindaŋ naa mala naa vɛlɛ miŋ fafaŋ yiyaŋndo maa, ŋ tiuba miŋ nɛŋi Chɛhowa kɔl te. Le tamaseliiyo, mi waŋndo opum yiyaŋ dɔɔ aa: “Fɛɛŋ bɛɛ I ve niŋ wanaa cho wa yoomu lefafɛɛŋ nda tɛɛŋ te. Kanifuule, I nɔ kaala kɛndɛ maa wanaa kaŋ te. Fɛɛŋ bɛɛ I tiu niŋ ba mi diikuŋ sawala Chɛhowalaŋ kpou le.” Loonuŋ maa mi chaaŋaa lachoowaa yaawaa Choobu wa opilɛ diolaŋ Ɛlifaasi dimul Choobu nyɛ waa lende. Mbo dimul Choobu aa: “Vɛɛnɛ wana chioo o cho yɛ, mbo wa o diandaa Mɛlɛka o hɔl?” Mbo dimi vɛlɛ a Mɛlɛka okɔɔ aa: “Kiilaa Mɛlɛkaa cho choo choo wa bɛɛ, Mɛlɛka laalaŋ a nda le. Nyɛm cho bɛɛ o halaa niŋ choo choo woŋ, ŋ cho ŋ diandaa ndu o hɔl te.” (Choobu 15:​14, 15) Nuawɔ choola bɛndu se! Loonuŋ maa, Setana nyindu waŋnda ni le yiyaŋnda waa nuaa nɔɔ. O sina maa te a hiou pɛ lachi a yiyaŋnda waa nuaa nɔɔ, koŋ cho tosa mi laalaŋ numndo yɔŋnuŋ pɔmbɔlɔsɔɔ. Lelaŋ, fafaŋ choola waa nuaa nduyɛ ma handu kɔllo o mɛɛla Chɛhowalaŋ choo. Pesiŋ bɛɛ kiisaŋ a tiindaŋ ŋ nɔ le waa yoomu le fafɛɛŋndo okɔɔ le. Nduyɛ, nɔ tiindaŋndo maa Chɛhowa cho num mala ma komal kpeleŋ numndo.—1 Timo. 2:​3, 4.

KINDI TIINDAŊ NUMNDO POŊ

11. Le yɛɛ naŋ nɔ yɛ miŋ biunuŋ chumndo le mi Mɛlɛka peelu mɛɛla ndɔlaŋ?

¹¹ I ve lɔɔlɔɔ bɛɛŋ bɛɛŋ le tiindaŋ naa kindioo le. Teleŋndaŋ lapum, te ŋ yiyaŋ pɛ maa mɛɛla Mɛlɛkalaŋ la cho keleŋa peelɔŋ te, mi keŋ tosa miŋ kuɛ le dialloŋ wuoo. Kɛ ŋ nɔ miŋ loonuŋ maa, Chɛhowa cho le fɛɛŋ a fɛɛŋ. Lelaŋ, mɛɛ naŋ cha teleŋndaŋ yɛ cho teŋgeŋ a mɛɛ ndu cha laŋ yɛ. (2 Pitɛ 3:​8, 9) O cho mɛɛla ndɔlaŋ peelu a teleŋ bɛnda wo, kɛ o cho a teleŋ naŋ yeema mi la peeluŋ ndo le. Yɛɛ mala yɛ naa miŋ hiou lachi a tiindaŋ naa kindioo poŋ, haaa mi teleŋ Mɛlɛka cho mɛɛla ndɔlaŋ peelu wo fuuluu?—Chemi. 5:​7, 8.

12. A mɛɛ Hibuluiya 11:​1, 6 dimi yɛ, vɛɛ tiindaŋndo chiɛɛliaŋ yɛ a laalaŋndo?

¹² Te ŋ wa pɛ Chɛhowa sɔɔŋguuwo ikɛi kpɛɛluŋ, keŋ mala naa mi tiindaŋ naa wa o kala poŋ. Kanifuule ndu cho tosa ni, mi sɔɔŋ naŋ cho lehɔl le muŋ ndoŋ peeluŋ. Nduyɛ pɛŋ, le miŋ nɔ tiindaŋndo, mɛɛ miŋ nɔ laalaŋndo maa Chɛhowa cho, vɛlɛ maa “mbo fanda wanaa cho ndu nuuviaa wa.” (Nuawɔ Hibuluiya 11:​1, 6.) Te ŋ laalaŋ pɛ kɛsɛ maa Chɛhowa cho, keŋ cho naa mala miŋ nɔ tiindaŋndo maa o cho mɛɛla ndɔlaŋ kpou peelu. Ŋ tofaŋndɔ nɛilaŋ latiŋ la mala naa miŋ kindi chaŋyɛi nɛi a Chɛhowa, nduyɛ miŋ kindi tiindaŋ naa wo.

13. Vɛɛ naŋ sɔɔŋguu yɛ Mɛlɛka ikɛi kpɛɛluŋ?

¹³ Wa piɛileŋ o Chɛhowa lo vɛlɛ ma wa diomndaŋ veeloo o Baabuiyo niŋ. Mi che bɛɛ ŋ chi Chɛhowa le, kɛ ŋ tiuba miŋ sɔɔŋguu ndu ikɛi kpɛɛluŋ. Ŋ tiuba miŋ soo o ndu lo o piɛileŋ niŋ, nduyɛ miŋ nɔ tiindaŋndo maa mbo yaŋ naa nilaŋ. (Chɛlui. 29:​11, 12) Ŋ yaŋ Mɛlɛka nilaŋ te ŋ wa pɛ diomndaŋ veeloo o Baabuiyo niŋ, nduyɛ miŋ wa yiyaŋndo lechoo. Te ŋ veelu pɛ diomndaŋ a mɛɛ Chɛhowa ndoo buulaŋ a buɛiyaa nduaa chɔm lo lechoo wo o paandoo niŋnda yɛ okɔɔ, mi tiindaŋ naa chɔɔlu kalu poŋ. “Nyɛ o nyɛ nda poonyiaa sindɛ o Yau Mɛlɛkaa niŋ, le naa pɛɛkoo nda poonyiaa ndu ni. O tosa miŋ biunuŋ, mbo dɛɛniaa naa kɔltaŋ, nduyɛ miŋ nɔ tiindaŋndo.”—Luomaŋ. 15:​4.

14. Le yɛɛ naŋ nɔ yɛ miŋ yiyaŋ a sɔɔŋ Chɛhowa tosal niŋ acheleŋnda woŋ okɔɔ?

¹⁴ Yiyaŋ a mɛɛ Chɛhowa peelu niŋ mɛɛla ndɔlaŋ yɛ okɔɔ. Yiyaŋndɔ a nyɛ Chɛhowa ndoo tosal Ebilaham nda Sela wo. Mi che bɛɛ ndaa fuuluu niŋ wɔsila ndaa tiu lɛ ba ma velu ŋchuau le wo, kɛ mi Mɛlɛka chuel nda buŋgɛi maa a cho poo violɔɔ. (Chɛ. 18:​10) Yɛɛ Ebilaham ndoo tosa yɛ mɛɛ Mɛlɛka chuel nda buŋgɛi? Baabuiyo dimi aa: “Ndoo laalaŋ maa o cho hunɔɔ simnɔŋ finyaa le kaala bɔɔbɔɔ.” (Luomaŋ. 4:​18) O yiyaŋ iwana chieeyaa niŋ, Ebilaham nda Sela ndaa tiu lɛ ba ma velu ŋchuau le. Kɛ Ebilaham ndoo nɔ tiindaŋndo maa Chɛhowa cho diomnde ndɔle mɛyaaleŋ peelu. Nduyɛ mi Chɛhowa peelu buŋgɛi o chuel ndu keŋ nde. (Luomaŋ. 4:​19-21) Bundɔŋ waa nuaa o Baabuiyo niŋ pɛɛku naa maa, mi Chɛhowa peelu mɛɛla ndɔlaŋ teleŋ o teleŋ o yɔŋ bɛɛ miŋ yiyaŋ maa, sɔɔŋ muŋ tiuba miŋ yɔŋnuŋ te.

15. Le yɛɛ naŋ nɔ yɛ miŋ yiyaŋ a sɔɔŋ Mɛlɛka tosal naa niŋndoŋ okɔɔ?

¹⁵ Yiyaŋ a sɔɔŋ Chɛhowa tosal num niŋndoŋ okɔɔ. Suŋ suŋ, diomnda mɛyaala Mɛlɛkalaŋ la cho niŋ peelɔŋndo. Yiyaŋndɔ mɛɛ num sɔla niŋ tɔnɔɔ o laŋ niŋ yɛ. Le tamaseliiyo, mi Chiisu mɛi lediom maa Chɛhowa cho naa ke nyɛm naŋ hauba o yoomoo niŋndoŋ. (Maa. 6:​32, 33) Mbo dimi vɛlɛ maa mi Chɛhowa ke naa nyina ndɔ diandaa, te ŋ nyuna ndu pɛ. (Luku 11:​13) Chɛhowa cho niŋ sɔɔŋ muŋ tosaa. Naapum num bɛɛ a yiyaŋ a buŋgaŋ Chɛhowa chuel num niŋ mbo wa muŋ peeloo wo okɔɔ. Le tamaseliiyo, mbo chua buŋgɛi maa o cho num malɔɔ haki, mbo wa num kɔllo dɛɛniaa, nduyɛ mbo ke num nyɛm mala num le pɛɛkoo a ndu okɔɔ woŋ. (Maa. 6:​14; 24:​45; 2 Kɔliŋ. 1:​3) Te a yiyaŋ pɛ a sɔɔŋ Mɛlɛka tosal num niŋndoŋ okɔɔ, keŋ mala num ma kindi tiindaŋ numndo le sɔɔŋ o cho num tosal o chilaŋ niŋndoŋ.

DƆƆNUŊ NYAALE LE TIINDAŊ Ŋ NƆ WO

16. Le yɛɛ tiindaŋ naa cho yɛ ke sɔviɔɔ opilɛ fulaa Mɛlɛka o ba?

¹⁶ Tiindaŋ naŋ nɔ le chilaŋndo cho ke sɔviɔɔ opilɛ fulaa Mɛlɛka o ba. Ŋ cho lehɔl o nɛi le chila kɛndɛlaŋ sɔlaa. Nduyɛ ŋ sina maa nyɛ naŋ cho lehɔllo cho yɔŋnɔŋ. Tiindaŋ naŋ nɔ hoo wo cho ko maa chiliŋii simi dɛndɔɔ o peelo ve. Ndu simi naa yi ni te tɔɔndaŋndaŋ la komal naa pɛ, ma tusi naa nyɛpalaa choo ɔɔ ma dimi le naa diyɔɔ. Tiindaŋ naa cho vɛlɛ ko maa mɔsil puaa chɔuwa wounuŋndo. Mbo manda naa le miŋ fafaŋ yiyaŋnda wɔɔŋndaŋ, nduyɛ miŋ tosa nyɛ cho o kɛndɔɔ wo. O mala naa vɛlɛ miŋ sɔɔŋguu Mɛlɛka ikɛi, nduyɛ mbo chɔm naa mɛɛ kpɛ Mɛlɛka kaala naa yɛ. Miŋ sɔla tɔnɔɔ tau te ŋ kindi pɛ tiindaŋ naa poŋ.

17. Le yɛɛ naŋ nɔ yɛ miŋ dɔɔnuŋ nyaale le tiindaŋ naa?

¹⁷ Mi kiilanɔɔ Pɔɔl loonuŋ Luomaŋnda o yau o poonyial nda wo niŋ aa: ‘La dɔɔnuŋ nyaale le tiindaŋ nya nɔ wo.’ (Luomaŋ. 12:​12) Pɔɔl ndoo tiuba mbo dɔɔnuŋ nyaale kanifuule, ndoo sina maa te o lo pɛ o laalaŋ ndɔɔ choo, o wa yoomu fafɛɛŋndo sɔla o choo choo niŋ. Naa bɛɛ tiuba miŋ dɔɔnuŋ nyaale le tiindaŋ naŋ nɔ wo kanifuule, ŋ sina maa mi Chɛhowa peelu mɛɛla ndɔlaŋ kpou. Mi wana ŋchondoo poonyiaa aa: “Wanaa dɔu tiindaŋndo o Mɛlɛka . . . niŋ le nda mandaa wa, a pɛl tɔnɔɔ. . . . Ndu cho Mɛlɛka lo o lediom le fɛɛŋ a fɛɛŋ ndo ni.”—Sam 146:​5, 6.