SUƐI LEBOLII 39
Yiyaŋ Mɛlɛka Nɔ a Koowaŋ Okɔɔ Wo
Koowaŋ ma cho bɔɔ nyɛ sɔvɛ. Te ŋ nɔ maŋ te, ŋ ve yoomu le. Mɛlɛka nɔ dioo ni mbo chɔm naa mɛɛ naŋ nɔ miŋ soliŋ koowaŋ kpeku yɛ, kanifuule ndu toosiaa naa ni. Yɛɛnɛ o dimi yɛ a koowaŋ okɔɔ? Baa ŋ nɔ pa miŋ de maŋ ɔɔ miŋ hiviŋ maŋ o ŋdial? Yɛɛ mala yɛ num ma tosa kɛɛsiaa kɛndɔɔ a koowaŋ okɔɔ?
1. Vɛɛ Chɛhowa yiyaŋ yɛ a koowaŋ okɔɔ?
Mi Chɛhowa dimul buɛiyaa nduaa o sindɔɔ niŋ aa: ‘O koowaŋ niŋ yoomoo cho ni.’ (Lɛvitikɔɔ 17:14) Chɛhowa o hɔl, koowaŋ ma sim le yoomoo ni. Mɛɛ yoomoo cho ke sɔvɛ fula Chɛhowa o ba wo yɛ koowaŋ bɛɛ ma cho ni.
2. Yɛɛ Mɛlɛka dimi yɛ maa naŋ tosa a koowaŋ te?
Tuupa mi Chiisu huŋ o chieeŋndo choo, mi Chɛhowa dimul buɛiyaa nduaa o sindɔɔ niŋ pa maa a dia koowaŋ te. (Nuawɔ Chɛnɛsee 9:4 a Lɛvitikɔɔ 17:10.) Mbo chɔɔlu sawaa hoo kindila mɛɛ o dimul Kilisiɔŋnda o wɔsiŋ kɛmɛ tasoŋ niŋ aa: “La hiou lachi a . . . koowaŋ fafaŋndo.”—Nuawɔ Walta Kiilaa 15:28, 29.
Yɛɛ o sim yɛ le koowaŋ fafaŋndo? Te wana chiɔuwaa dimul num pɛ maa fafaŋ muɛiyaŋ, a nɔ ma kol maŋ te, lende le? Kɛ baa ma chɛl pa le nyɛdiaa nda toosiaa a muɛiyaŋ ndo dioo ɔɔ ma hɔu num maŋ o nyɛsuaŋ niŋ? Wana chɛl keŋ kposoŋ te. Lende koni, sawa Mɛlɛka dɔu maa wana dia koowaŋ te wo sim ni maa, ŋ nɔ miŋ kol maŋ ɔɔ miŋ de visi vi o ba choo wo le. Ŋ nɔ vɛlɛ miŋ de nyɛdiaa nda toosiaa a koowaŋ ndo le.
Koowaŋ soliŋndo kpeku le dandaa yɛ? Dandalaŋ lapum a koowaŋ okɔɔ, sawa Mɛlɛkaa kɛɛ laŋ kpooŋ. Laŋ la cho ni, hivioo naa koowaŋ kpou o ŋdial, ɔɔ ma sala hiɔɔluaŋ ma kɛ kɛ. Maŋ ma cho ni, ma yɔŋgu hueiyii yoomɛi yaŋ, ma chɔulaba naalaŋ ndaŋ, ma pɛŋgi koowaŋ fulaa waŋ, a ma tosa mi dialloŋ tosa wallo waŋ. Dandala cheleŋ a koowaŋ okɔɔ, sawa kpeekpei cho o Baabuiyo niŋ a laŋ okɔɔ le. Le tamaseliiyo, ma soliŋ nyɛm cho o koowaŋ niŋndoŋ kpeku le waŋndo chiɔuwo. Lepum yɛ, kooma waŋndo pila nda soliŋ kpeku ni le ndu dandaa dɔwɔɔ. Te ŋ wa pɛ yiyaŋndo o sɔɔŋ muŋ choo, naapila nɔ ni miŋ kɛɛsiaa nyɛ naŋ nɔ le tosaa wo.a—Kaleesiaŋnda 6:5.
CHƆƆLU YAASIAA
Tofawɔ ma sina mɛɛ ŋ tosa kɛɛsiaa a koowaŋ soliŋndo kpeku okɔɔ yɛ.
3. Tosa kɛɛsiaa a danda suu nɛŋi Chɛhowa kɔllo wo
Vɛɛ ŋ tosa yɛ kɛɛsiaa a danda chɛlaŋ a yiyaŋ Chɛhowaa wo okɔɔ? Handu VIDUEIYO, okoŋ mi la suukaŋ le sabu sɔɔŋ muŋ cho ŋ sɔvɛ wo.
Piɛi le taasioo.—Chemisi 1:5.
Tosa yaasiaa o sawala mandaala Baabuiyo choo, ma che mɛɛ ŋ duau laŋ o wali niŋ yɛ.—Pulɔwaa 13:16.
Kindiŋ ma sina a dandala suu cho o tanda numndo niŋndaŋ.
Kindiŋ ma sina danda suu ŋ nɔ ma chɛl kposoŋ te wo.
Kɛsiŋ o kɔl maa kɛɛsiaa ŋ cho tosa wo nɔ mbo paaliaŋ kɔl num iyamaa le.—Walta Kiilaa 24:16.b
Loonuŋ maa wana o wana nɔ mbo tosal num kɛɛsiaa piiliaŋ kɔl num iyamaa wo le. O yɔŋ bɛɛ aa wana nya cho o nɔɔ niŋndo, bɛndu kundaa, ɔɔ wana cho num Baabuiyo pɛɛkoo wo.—Luomaŋnda 14:12.
Poonyiaa kɛɛsiaa ŋ tosa wo o yau choo.
4. Danda sɔviɔɔ Seiyaa Chɛhowaa duaunuŋ ni
Ŋ tiuba miŋ bii sawa Mɛlɛkaa a koowaŋ okɔɔ, okoŋ ma dɔu naa danda nda hivi naa koowaŋ o ŋdial te wo. Handu VIDUEIYO.
Nuawɔ Taitɔɔ 3:2, okoŋ mi la suukaŋ o nyunaa hoo choo:
Te ŋ wa pɛ suukaŋndo a wanaa chiɔuwaa, le yɛɛ naŋ nɔ yɛ miŋ ke nda bɛɛleŋ?
Ma naŋ nɔ miŋ hiviŋ o ŋdial te waŋ |
Kilisiɔŋnɔɔ kɛɛsiaa a ba ndɔ |
|---|---|
A. Ma mala mi dialloŋ tosa wallo waŋ |
Nyɛm nda soli leniŋ ndoŋ |
B. Ma chɔulaba naalaŋ ndaŋ |
Nyɛm nda soli leniŋ ndoŋ |
C. Ma pɛŋgi koowaŋ fulaa waŋ |
Nyɛm nda soli leniŋ ndoŋ |
D. Ma yɔŋgu hueiyii yoomɛi yaŋ |
Nyɛm nda soli leniŋ ndoŋ |
5. Dandaa dɔwɔɔ a nyɛm nda soli o koowaŋ niŋndoŋ
Koowaŋ ma cho sala hiɔɔlu. Ma yɔŋgu hueiyii yoomɛi yaŋ, ma chɔulaba naalaŋ ndaŋ, ma pɛŋgi koowaŋ fulaa waŋ, a ma mala mi dialloŋ tosa wallo waŋ. Kɛ o kooma sala hiɔɔluaŋ maŋ niŋ, ma soli nyɔɔŋ ŋpum.c Ma soliŋ nyɔɔŋ muŋ kpeku le kooma chiɔuwaŋ toosiaa ɔɔ le koowaŋ pɛŋgioo waŋndo fulaa o ŋdial.
Te o hiŋ pɛ a danda waa nuaa okɔɔ, Kilisiɔŋnɔ kɛ kɛ nɔ mbo soliŋ kɔl iyama Baabuiyo kpeku le kɛɛsiaa tosaa a ba ndɔ. Mi apum kɛɛsiaa le kiɔɔ dandaa dɔɔnɔŋndo a nyɛm nda soli o kooma sala hiɔɔluaŋ maŋ niŋndoŋ kpou. Apum yɛ, mi kɔl nda iyamaa chɛl le ma dɔɔnuŋ danda waa nuaa.
Te a wa pɛ kɛɛsiaa hoo tosaa, kɛsiŋ nyunaa hoo o kɔl:
Vɛɛ ya tɛɛsial lɛ wana chiɔuwaa sabu ya kɛɛ ɔɔ chɛl nyɛm nda soli o koowaŋ maŋ niŋndoŋ ŋpum?
TE WAŊNDO DIMI PƐ AA: “O cho suɛi wɔɔŋ te i cho le chɛlɔɔ ma hivi num koowaŋ o ŋdial te.”
Vɛɛ num yiyaŋ yɛ?
SƆƆŊ KULLOŊ
Chɛhowa yeema naa miŋ che koowaŋ nyɛ sɔvɛ bɛndu.
Nyunala miiŋgaa choo laŋ
Le yɛɛ Chɛhowa che yɛ koowaŋ nyɛ sɔvɛ bɛndu?
Vɛɛ naŋ looku yɛ sina maa sawa Mɛlɛka dɔu maa naŋ fafaŋ koowaŋ ndo sim vɛlɛ le kooma hiviaŋ?
Te o hiŋ pɛ a koowaŋ soliŋndo kpeku okɔɔ le dandaa, yɛɛ mala yɛ num ma tosa kɛɛsiaa kɛndɔɔ?
CHƆƆLU SƆƆŊ PUM TOFA
A yɛɛ okɔɔ fɛŋ ŋ nɔ yɛ ma yiyaŋ, tuupa ma chɛl le num dandaa dɔwɔɔ a kooma numndaŋ?
“Nyunala Wanaa Nua o Yaula Naalaŋ Niŋnda” (Bandu Mɛŋgɛlaa, Saa 15, 2000)
Te o hiŋ pɛ a nyɛm nda soli o koowaŋ niŋndoŋ soliŋndo kpeku le dandaa, a yɛɛ okɔɔ ŋ nɔ yɛ ma yiyaŋ te a wa pɛ kɛɛsiaa tosaa?
“Nyunala Wanaa Nua o Yaula Naalaŋ Niŋnda” (Bandu Mɛŋgɛlaa, Kooŋndo 15, 2004)
Yɛɛ tosa yɛ mi wana chiɔuwaa bɛndu pilɛ laalaŋ maa yiyaŋ Chɛhowaa a koowaŋ okɔɔ bɛnda bɔɔ?
“Mi Chɛl Yiyaŋ Mɛlɛkaa a Koowaŋ Okɔɔ” (“Tiondoo!”, Yindimiiyo 8, 2003)
Pɛɛku wɔ ma sina mɛɛ bɛnduaa cho o Kunda Suaa o Wanaa Chiɔuwaa Lo Wo cho puaapiliaa a ndepiliaa ndaa malaa yɛ.
a Tofa Suɛi Lebolii 35, “Vɛɛ Naŋ Tosa yɛ Kɛɛsiaala Kɛndɛlaŋ?”
b Tofa suɛi lebolii pɔmbuɛi 5, “Dandaa Dɔwɔɔ a Nyɛm Nda Soli o Koowaŋ Niŋndoŋ”; Diomnda Chɔɔlaala 3, “Danda Nda Soliŋ Koowaŋ Kpeku Wo”.
c Wanaa chiɔuwaa apum che kooma sala hiɔɔluaŋ maŋ nyɛ pilɛ a nyɛm nda soli o koowaŋ maŋ niŋndoŋ. Lelaŋ, numpila nɔ ni ma tɛɛsial nda kɛɛsiaa ŋ tosa maa a hivi num koowaŋ kpou ɔɔ kooma sala hiɔɔlu ma kɛ kɛ o ŋdial te wo. Maŋ ma cho ni: Ma yɔŋgu hueiyii yoomɛi yaŋ, ma chɔulaba naalaŋ ndaŋ, ma pɛŋgi koowaŋ fulaa waŋ, a ma mala mi dialloŋ tosa wallo waŋ.