မၤတၢ်
၂၀ ဖဲတၢ်တၢထီၣ်တၢလီၤ လီၤကယးဝံၤ အလီၢ်ခံ စီၤပီလူး ကိးဖှိၣ်ပှၤလၢ အစူၢ်က့ၤ နာ်က့ၤတၢ်တဖၣ် ဒီးဟ့ၣ်ဂံၢ်ဟ့ၣ်ဘါ ဒီးဆၢဂ့ၤဆၢဝါ အဝဲသ့ၣ်ဝံၤဒီး အဝဲလဲၤလၢ ကီၢ်မၤက့းဒနံလီၤ. ၂ အဝဲလဲၤလၢ ဟီၣ်ကဝီၤဖဲန့ၣ်တဖၣ် ဒီးဟ့ၣ်ဂံၢ်ဟ့ၣ်ဘါဝဲ ပှၤလၢအအိၣ် ဖဲန့ၣ်တဖၣ်အါမး ဝံၤဒီးအဝဲလဲၤလၢ ကြံးကီၢ်လီၤ. ၃ အဝဲအိၣ်ဖဲန့ၣ် သၢလါလီၤ. ဖဲဘူးထီၣ်လၢ အဝဲကဒိးထီၣ်ကဘီ ဒီးလဲၤလၢ ကီၢ်စူၤရံအခါ ပှၤယူဒၤဖိတဖၣ် ကူၣ်ထီၣ်တၢ်လၢ ကမၤအၢအီၤအဃိ အဝဲပာ်လီၤ အသးလၢ ကက့ၤကဒါက့ၤလၢ ကီၢ်မၤက့းဒနံအပူၤလီၤ. ၄ ဒီးပှၤဘ့းရံၤဖိ စီၤပူရူးအဖိခွါ စီၤစိပၤတြူး, ပှၤသ့းစၤလနံဖိ လၢအမ့ၢ် စီၤအရံစတၢ်ဃူး ဒီးစီၤစ့းကူၣ်ဒူး, ပှၤဒ့ၢ်ဘ့ၤဖိလၢအမ့ၢ် စီၤကါယူး, စီၤတံၤမသ့း ဒီးပှၤလၢ အအိၣ်ဟဲလၢ အၤစံအကီၢ်ရ့ၣ် လၢအမ့ၢ် စီၤတူဃံၤကူး ဒီးစီၤတြီဖံမူးန့ၣ် လဲၤသကိးတၢ်ဒီးအီၤလီၤ. ၅ ပှၤသ့ၣ်တဖၣ်အံၤ လဲၤဆိဝဲ ဒီးအိၣ်ခိးပှၤလၢ တြိၤအါန့ၣ်လီၤ. ၆ ဘူၣ်ကိၣ်တအိၣ်ဘၣ်ဒီး ကိၣ်မံၣ် ဝံၤအလီၢ်ခံ ပဒိးထီၣ် ကဘီဒီးဟးထီၣ်လၢ ဝ့ၢ်ဖံလံးပံၤလီၤ. ဒီးလၢယဲၢ်သီ အတီၢ်ပူၤန့ၣ် ပလဲၤတုၤလၢ အဝဲသ့ၣ်အအိၣ်လၢ တြိၤအါ ဒီးပအိၣ်ဖဲန့ၣ် နွံသီလီၤ.
၇ ဖဲမုၢ်ခီၣ်ထံးအနံၤန့ၣ် ပပာ်ဖှိၣ်ထီၣ် ပသးဒ်သိး ပကအီၣ် သကိးတၢ်အဂီၢ် ဒီးလၢခံတနံၤန့ၣ် စီၤပီလူး ကက့ၤဝဲအဃိ အဝဲစးထီၣ် စံၣ်တဲၤတဲလီၤ အဝဲသ့ၣ် ဒီးဟ့ၣ်ဝဲ တၢ်စံၣ်တဲၤတဲလီၤတၢ် ဖးယံာ် တုၤလၢ ဖးဖီမုၢ်လီၤ. ၈ ဖဲဒၢးတဖျၢၣ်လၢ ဟံၣ်ဖီခိၣ်တတီၤလၢ ပပာ်ဖှိၣ်ထီၣ်ပသး အလီၢ်န့ၣ် မ့ၣ်အူဒၢ အိၣ်ဝဲ အါဖျၢၣ်လီၤ. ၉ ဖဲစီၤပီလူး စံၣ်တဲၤတဲလီၤတၢ်အခါ ပှၤသးစၢ်တဂၤလၢ အမံၤမ့ၢ် စီၤအူတူၤဃူးန့ၣ် ဆ့ၣ်နီၤ သန့ၤအသးလၢ ပဲတြီအကပၤ ဒီးမံဘၣ်အသး ယိာ်ယိာ်အဃိ အဝဲအိၣ်လၢ ဟံၣ်သၢကထြၢဒီး လီၤတဲာ်ဆူ ကိာ်လာ်ဒ့လီၤ. ဖဲပှၤလဲၤတုၤလၢ အအိၣ်အခါ အသံလံ. ၁၀ ဘၣ်ဆၣ် စီၤပီလူး စံၣ်လီၤလၢ ဟံၣ်ဖီလာ် ဒီးမံနီၤဝဲလၢ အဖီခိၣ် ဒီးဖိးဟုအီၤ ဒီးတဲဝဲ “ကိၢ်တဂ့ၤ, အမူဝဲလီၤ.” ၁၁ ဝံၤဒီးအဝဲက့ၤထီၣ်လၢ ဟံၣ်ဖီခိၣ် ဒီးလၢတၢ်အီၣ် တဘျီအံၤအဂီၢ် အဝဲဘိးကၢ်ကိၣ်ဒီး အီၣ်တၢ်လီၤ. ဒီးအဝဲဆဲး တဲသကိးတၢ် ဖးယံာ်တုၤလၢ မုၢ်ဝါထီၣ်ဒီး အဝဲဟးထီၣ်ကွံာ်ဝဲလီၤ. ၁၂ အဃိ အဝဲသ့ၣ် က့ၤကိးဝဲ ပိာ်ခွါသးစၢ်လၢ အမူထီၣ်က့ၤအံၤ ပှဲၤဒီး တၢ်သူၣ်မံသးမုာ်လီၤ.
၁၃ စီၤပီလူးန့ၣ် ပာ်လီၤအသးလၢ အကလဲၤလၢ အၣ်စူးလၢအခီၣ်လီၤ. ဘၣ်ဆၣ် ဒ်အဝဲမၤလိာ် ပှၤအသိး ပဒိးထီၣ်ကဘီဒီး လဲၤဆိလၢအၣ်စူး ဒ်သိးပကတီၣ်ထီၣ်အီၤလၢ ကဘီပူၤဖဲန့ၣ်လီၤ. ၁၄ အဃိ ဖဲအဝဲ ထံၣ်လိာ်သးဒီးပှၤ လၢအၣ်စူးအခါ ပဒုးဒိးထီၣ်အီၤ ကဘီဒီး ပလဲၤလၢ ဝ့ၢ်မ့ၤတိၤလ့လီၤ. ၁၅ လၢခံတနံၤန့ၣ် ပလဲၤကဒီးတၢ်လၢကဘီ တုၤလၢကီးဃံအူးလီၤ. ဘၣ်ဆၣ် လၢခံတနံၤန့ၣ် ပတုၤလၢကီးစါမူး ဒီးလၢခံတနံၤန့ၣ် ပလဲၤတုၤကဒီးလၢ ဝ့ၢ်မံလ့ၤတူးလီၤ. ၁၆ ဒီးစီၤပီလူးပာ်လီၤအသးလၢ အကလဲၤတလၢ ဝ့ၢ်အ့းဖ့းစူး ဒ်သိးအသုတသူ အတၢ်ဆၢကတီၢ်လၢ အၤစံကီၢ်ရ့ၣ်အပူၤ နီတစဲးတဂ့ၤအဂီၢ်လီၤ. ဒီးအဝဲလဲၤကရီ ဒ်သိးကတုၤလၢ ဝ့ၢ်ယရူၤၡလ့ၣ် ဖဲဘူၣ်ယဲၢ်ဆံအနံၤအဂီၢ်လီၤ.
၁၇ ဘၣ်ဆၣ် ဖဲအဝဲအိၣ်လၢ ဝ့ၢ်မံလ့ၤတူးအခါ အဝဲဆှၢလီၤဝဲ တၢ်ကစီၣ်ဆူ ဝ့ၢ်အ့းဖ့းစူး ဒ်သိး ကကိးန့ၢ်ဝဲ တၢ်အိၣ်ဖှိၣ် သးပှၢ်တဖၣ်အဂီၢ်လီၤ. ၁၈ ဖဲအဝဲသ့ၣ် ဟဲလၢအအိၣ်အခါ အဝဲတဲဘၣ် အဝဲသ့ၣ်လၢ “စးထီၣ်ဖဲ မုၢ်တနံၤလၢ ယခါလီၤယခီၣ်လၢ အၤစံကီၢ်ရ့ၣ် အပူၤလံၤလံၤ ယအိၣ်မူလၢ သုကျါဒ်လဲၣ် ဒ်လဲၣ်န့ၣ် သုသ့ၣ်ညါ ဂ့ၤဂ့ၤလီၤ. ၁၉ ဒ်ကုၢ်တဂၤအသိး လၢတၢ်ဆီၣ်လီၤသး ဒိၣ်ဒိၣ်မုၢ်မုၢ်အပူၤ ယမၤ ကစၢ်အတၢ်မၤလီၤ. ဒီးပှၤယူဒၤဖိတဖၣ် ကူၣ်အၢယၤအဃိ ယလဲၤခီဖျိ တၢ်မၤကွၢ် အကလုာ်ကလုာ် လၢတၢ်မဲာ်ထံမဲာ်နိ အပူၤလီၤ. ၂၀ ဘၣ်ဆၣ် တၢ်လၢ အကဲဘျုး လၢသုဂီၢ်န့ၣ် ယတပာ်ခူသူၣ်အီၤ နီတမံၤဘၣ်, ယစံၣ်တဲၤတဲလီၤသု ခဲလၢာ်လီၤ. ဒီးယသိၣ်လိသုလၢ ကမျၢၢ်အမဲာ်ညါ ဒီးလၢတဟံၣ်ဘၣ် တဟံၣ်န့ၣ်လီၤ. ၂၁ ယအုၣ်ယသး လီၤတံၢ်လီၤဆဲးလၢ ပှၤယူဒၤဖိဒီး ပှၤကြံးဖိတဖၣ် အမဲာ်ညါ ဒ်သိးအဝဲသ့ၣ် ကပီၢ်ယၢ်လီၤက့ၤအသး ဒီးဃၣ်က့ၤ အသးဆူ ကစၢ်ယွၤအအိၣ် ဒီးစူၢ်က့ၤနာ်က့ၤ ပကစၢ် ယ့ၣ်ၡူးအဂီၢ်လီၤ. ၂၂ ခဲအံၤန့ၣ် သးစီဆှံ ထိၣ်ဟူးထိၣ်ဂဲၤထီၣ် ယၤလၢ ယကလဲၤလၢ ယရူၤၡလ့ၣ်လီၤ. ဖဲန့ၣ် တၢ်ကမၤအသးဒီးယၤ ဒ်လဲၣ်န့ၣ် ယတသ့ၣ်ညါဘၣ်. ၂၃ ဘၣ်ဆၣ် လၢဝ့ၢ်တဖျၢၣ်ဘၣ် တဖျၢၣ်န့ၣ် သးစီဆှံတဲဘၣ်ယၤ တဘျီဝံၤ တဘျီလၢ ဃိာ်ဒီးတၢ်နးတၢ်ဖှီၣ် အိၣ်ခိး ပာ်စၢၤယၤလီၤ. ၂၄ ဘၣ်ဆၣ် ယသးသမူန့ၣ် ယတထံၣ်အီၤဒ် တၢ်လၢ အရ့ဒိၣ်လၢယဂီၢ် နီတစဲးဘၣ်. တၢ်လၢ အရ့ဒိၣ်န့ၣ်မ့ၢ်ဝဲ ယကမၤဝံၤက့ၤ ယမူဒါဒီး တၢ်စံၣ်တဲၤတဲလီၤ တၢ်မၤလၢ ကစၢ်ယ့ၣ်ၡူး ဟ့ၣ်လီၤယၤလၢ ယကအုၣ်ယသး လီၤတံၢ်လီၤဆဲးလၢ တၢ်သးခုကစီၣ် ဘၣ်ဃးဒီး ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ် အဂ့ၢ်န့ၣ်လီၤ.
၂၅ “အဃိ ယသ့ၣ်ညါလၢ သုဝဲခဲလၢာ်လၢ ယစံၣ်တဲၤတဲလီၤသုလၢ ဘီမုၢ်အဂ့ၢ်န့ၣ် သုတထံၣ်ဘၣ်ယမဲာ် နီတဘျီလၢၤဘၣ်. ၂၆ ဒီးယကိးန့ၢ်သုဒ်သိး တနံၤညါအံၤ သုကအုၣ်သးလၢ ယကဆှီဒီး ပှၤခဲလၢာ်အသွံၣ်, ၂၇ မ့ၢ်လၢ ဘၣ်ဃးဒီး ကစၢ်ယွၤ အတၢ်ဘၣ်သးန့ၣ် ယတဲသုပျီပျီ ဒီးယတပာ်ခူသူၣ် နီတမံၤဘၣ် အဃိလီၤ. ၂၈ ပလီၢ်သုသး ဘၣ်ဃးဒီး သုနီၢ်ကစၢ်ဒီး သိခဲလၢာ်တက့ၢ်. သးစီဆှံ ပာ်ထီၣ်သုလၢ ပှၤကွၢ်ထွဲတၢ်တဖၣ် ဒ်သိးသု ကကဲပှၤကွၢ်သိလၢ ကစၢ်ယွၤ အတၢ်အိၣ်ဖှိၣ်အဂီၢ် လၢအပှ့ၤဝဲဒီး အနီၢ်ကစၢ်အဖိခွါ အသွံၣ်န့ၣ်လီၤ. ၂၉ ဖဲယဟးထီၣ်ဝံၤ အလီၢ်ခံ ယသ့ၣ်ညါပာ်စၢၤလၢ ထွံၣ်မံၤ အဒူတဖၣ် ကဟဲနုာ်လီၤလၢ သုကျါ ဒီးတမ့ၢ်လၢ အဝဲသ့ၣ် ကရ့သိတဖၣ်လၢ တၢ်သးကညီၤ အပူၤဘၣ်. ၃၀ ဒီးပှၤလၢ သုကျါ ကဂဲၤဆၢထၢၣ် ဒီးကတဲက့ၣ် တဲကူတၢ် ဒ်သိး ကကွဲန့ၢ်လွဲန့ၢ် ပှၤလၢ အစူၢ်က့ၤနာ်က့ၤတၢ်တဖၣ် ဆူအဝဲသ့ၣ် အအိၣ်လီၤ.
၃၁ “အဃိ စီၣ်မဲာ်စီၣ်နါ ဒီးသ့ၣ်နီၣ်ထီၣ်လၢ သၢနံၣ်အတီၢ်ပူၤန့ၣ် ယသိၣ်လိသု တဂၤစုာ်စုာ်ထီဘိ လၢမဲာ်ထံမဲာ်နိအပူၤ, လၢမုၢ်ဆါဒီး လၢမုၢ်နၤလီၤ. ၃၂ ဒီးခဲအံၤ ယအးလီၤသုလၢ ကစၢ်ယွၤအစုပူၤ ဒီးအကလုၢ်ကထါ လၢအပှဲၤဒီး အတၢ်သးကညီၤ ဒိၣ်ဒိၣ်မုၢ်မုၢ် အပူၤလီၤ. ဒီးတၢ်ကလုၢ် ကထါအံၤ ကဒုးဆူၣ်ထီၣ် သုဂံၢ်သုဘါ ဒီးကဟ့ၣ်သု တၢ်န့ၢ်သါလၢ ကဘၣ်တၢ်ဟ့ၣ်လီၤ ပှၤစီဆှံ ခဲလၢာ်န့ၣ်လီၤ. ၃၃ ယတလီကီ ပှၤဂၤအစ့မ့ၢ်ဂ့ၤ, အထူမ့ၢ်ဂ့ၤ, မ့တမ့ၢ် အတၢ်ကူတၢ်သိး တဖၣ်ဘၣ်. ၃၄ သုသ့ၣ်ညါလၢ ယမၤတၢ်လၢ ယစုတဖၣ်အံၤ ဒ်သိး ယကမၤလၢပှဲၤ ယနီၢ်ကစၢ် အတၢ်လိၣ်ဘၣ် ဒီးပှၤလၢ အအိၣ်ဒီးယၤတဖၣ် အတၢ်လိၣ်ဘၣ် အဂီၢ်န့ၣ်လီၤ. ၃၅ ဒီးလၢ တၢ်ကိးမံၤဒဲးအပူၤ ယပာ်ဖျါထီၣ်န့ၢ် သုလၢ ယမၤတၢ်ဆူၣ်ဆူၣ် လၢကျဲဒ်အံၤ ဒ်သိးသုကမၤစၢၤ ပှၤလၢ အဂံၢ်စၢ်ဘါစၢ် တဖၣ်အဂီၢ် ဒီးဒ်သိးသု ကသ့ၣ်နီၣ်ထီၣ် ကစၢ်ယ့ၣ်ၡူး အတၢ်ကတိၤ ဖဲအတဲဝဲ ‘ဟ့ၣ်တၢ်န့ၣ် ဒုးအိၣ်ထီၣ် တၢ်သးခုအါန့ၢ်ဒံး ဒိးန့ၢ်ဘၣ်တၢ် တက့ၢ်လီၤ.’”
၃၆ ဖဲအဝဲတဲ တၢ်သ့ၣ်တဖၣ်အံၤ ဝံၤအလီၢ်ခံ အဝဲဒီး ပှၤခဲလၢာ် ချံးလီၤအခီၣ် ဒီးဃ့ဘါထုကဖၣ်တၢ်လီၤ. ၃၇ အဝဲသ့ၣ် ကိးဂၤဒဲး ဟီၣ်ဝဲသပှၢ်တၢၢ် ဒီးဖိးဟုဝဲစီၤပီလူး ဒီးနၢမူအီၤလၢ တၢ်အဲၣ်တၢ်ကွံ အပူၤလီၤ. ၃၈ ဒီးအဝဲသ့ၣ် အသးဘၣ်ဒိ လီၤဆီဒၣ်တၢ် မ့ၢ်လၢစီၤပီလူး တဲဘၣ် အဝဲသ့ၣ်လၢ အဝဲသ့ၣ် တထံၣ်ဘၣ်အမဲာ် နီတဘျီလၢၤဘၣ် အဃိန့ၣ်လီၤ. ဒီးအဝဲသ့ၣ် လဲၤဆှၢအီၤတုၤလၢ ကဘီအခီၣ်ထံးလီၤ.