လူၤကၣ်
၂ ဖဲန့ၣ်အဆၢကတီၢ် ကဲစၢ်အီၤကူစတူး ဟ့ၣ်လီၤ တၢ်ကလုၢ်လၢ ပှၤအိၣ်လၢ အဘီမုၢ်ဒီဘ့ၣ်အပူၤ ကဘၣ်ဆဲးလီၤအမံၤလီၤ. ၂ (တၢ်ဆဲးလီၤမံၤ အဆိကတၢၢ်တဘျီအံၤ အိၣ်ထီၣ်ဝဲဖဲ စီၤကူၤရ့နံ ကဲပဒိၣ်ဖးဒိၣ်လၢ စူၤရံကီၢ်ရ့ၣ်အပူၤလီၤ.) ၃ ဒီးပှၤခဲလၢာ် လဲၤဆဲးလီၤအမံၤ တဂၤလၢ အနီၢ်ကစၢ်အဝ့ၢ် တဂၤလၢ အနီၢ်ကစၢ်အဝ့ၢ်လီၤ. ၄ မ့မ့ၢ်စီၤယိၤသးန့ၣ်+ အိၣ်လၢ ဝ့ၢ်နစၤရ့းလၢ ကၤလံၤလါ အဟီၣ်ကဝီၤအပူၤလီၤ. မ့ၢ်လၢ အဝဲပၣ်ဃုာ်လၢ စီၤဒၤဝံး အဒူၣ်ဖိထၢဖိအကျါ ဒီးမ့ၢ်စ့ၢ်ကီး အစၢၤအသွဲၣ်တဂၤ အဃိ အဝဲလဲၤလၢ စီၤဒၤဝံးအဝ့ၢ် လၢအမ့ၢ် ဘ့ၤသလ့ဃ့ၣ်+ လၢအအိၣ်လၢ ယူဒၤ အဟီၣ်ကဝီၤ အပူၤလီၤ. ၅ အဝဲလဲၤဃုာ်ဒီးအမါ နီၢ်မၤရံ ဒ်သိးကလဲၤ ဆဲးလီၤအမံၤအဂီၢ်လီၤ.+ ဒီးတယံာ်ဘၣ်န့ၣ် နီၢ်မၤရံ ကအိၣ်ဖျဲၣ်ထီၣ်အဖိလီၤ.+ ၆ ဖဲအဝဲသ့ၣ် လဲၤတုၤဝံၤအလီၢ်ခံ တၢ်ဆၢကတီၢ်ဘၣ်လၢ အကအိၣ်ဖျဲၣ်ထီၣ်အဖိလီၤ. ၇ ဘၣ်ဆၣ် ဒၢးလၢအဝဲသ့ၣ် ကမံတ့ၢ်အဂီၢ် တအိၣ်ဘၣ်အဃိ ဖဲအဝဲအိၣ်ဖျဲၣ်ထီၣ်ဝဲ အဖိခွါဝဲၢ်ကိအခါ+ အဘိၣ်ဘံထီၣ်အီၤလၢ တၢ်ကံးညာ် ဒီးဒုးမံနီၤအီၤလၢ ဆၣ်ဖိကီၢ်ဖိ အီၣ်ဆၣ်အကျိးပူၤလီၤ.+
၈ ဖဲတၢ်လီၢ်အဝဲန့ၣ် ပှၤကွၢ်သိတဖၣ်စ့ၢ်ကီး အိၣ်ဝဲဆိးဝဲလၢ တၢ်ပျီပူၤ ဒ်သိးကကွၢ်ထွဲဝဲ အသိလၢ မုၢ်နၤခီလီၤ. ၉ သတူၢ်ကလာ်န့ၣ် ယဟိဝၤယွၤ* အမူခိၣ်ကလူးတဂၤ ဆၢထၢၣ်လၢ အဝဲသ့ၣ် အမဲာ်ညါ ဒီးယဟိဝၤယွၤ အလၤကပီၤန့ၣ် ကပီၤထီၣ် ဝးတရံး အဝဲသ့ၣ်လီၤ. ဒီးအဝဲသ့ၣ် ပျံၤတၢ်ဒိၣ်မးလီၤ. ၁၀ ဘၣ်ဆၣ် မူခိၣ်ကလူးတဂၤန့ၣ် တဲဘၣ်အဝဲသ့ၣ်လၢ “ပျံၤတၢ်တဂ့ၤ. ကွၢ်လၢအံၤ, ယကတဲဘၣ်သု တၢ်ကစီၣ်လၢ အလီၤသးခုဖးဒိၣ်တခါ လၢပှၤခဲလၢာ်အဂီၢ်လီၤ. ၁၁ တနံၤညါအံၤ ပှၤလၢ အကအုၣ်က့ၤခီၣ်က့ၤတၢ်တဂၤ+ လၢအမ့ၢ် ကစၢ်ခရံာ်န့ၣ်+ အိၣ်ဖျဲၣ်ထီၣ်ဝဲလၢ စီၤဒၤဝံး အဝ့ၢ်ပူၤလံ.+ ၁၂ ဒီးတၢ်ပနီၣ်လၢ သုဂီၢ်န့ၣ် မ့ၢ်ဝဲဒ်အံၤလီၤ. သုကထံၣ်ဘၣ် ဖိသၣ်အိၣ်ဖျဲၣ်ထီၣ်သီသီတဂၤ ဘၣ်တၢ်ဘိၣ်ဘံဃာ်အီၤလၢ တၢ်ကံးညာ် ဒီးမံနီၤဝဲလၢ ဆၣ်ဖိကီၢ်ဖိ အီၣ်ဆၣ်အကျိးပူၤလီၤ.” ၁၃ ဒီးမူခိၣ်ကလူး အသုးမုၢ်ဖးဒိၣ်တဖု+ ဟဲအိၣ်ဖျါထီၣ် သတူၢ်ကလာ်လၢ မူခိၣ်ကလူးတဂၤန့ၣ်အကပၤ ဒီးစံးထီၣ်ပတြၢၤ ကစၢ်ယွၤ ဒီးတဲဝဲလၢ ၁၄ “စံးထီၣ်ပတြၢၤ ကစၢ်ယွၤ လၢမူခိၣ်တက့ၢ်. မ်ပှၤလၢကစၢ်ယွၤ ဘၣ်သူၣ်ဘၣ်သးအီၤတဖၣ် အိၣ်ဒီး တၢ်မုာ်တၢ်ခုၣ် လၢဟီၣ်ခိၣ်ချၢတက့ၢ်.”
၁၅ ဖဲမူခိၣ်ကလူးတဖၣ် က့ၤထီၣ်ဆူ မူခိၣ်အခါ ပှၤကွၢ်သိတဖၣ် တဲလိာ်အသး ကဒဲကဒဲလၢ “ပကလဲၤလၢ ဘ့ၤသလ့ဃ့ၣ် ဒီးလဲၤကွၢ် တၢ်မၤအသးတဖၣ်လၢ ယဟိဝၤယွၤ ဒုးသ့ၣ်ညါပှၤဟီ.” ၁၆ အဝဲသ့ၣ် လဲၤဝဲချ့ချ့ ဒီးထံၣ်ဝဲနီၢ်မၤရံ ဒီးစီၤယိၤသး ဒီးထံၣ်စ့ၢ်ကီးဝဲ ဖိသၣ်မံနီၤဝဲလၢ ဆၣ်ဖိကီၢ်ဖိ အီၣ်ဆၣ်အကျိးပူၤလီၤ. ၁၇ ဖဲပှၤကွၢ်သိတဖၣ် ထံၣ်ဘၣ်ဝဲ ဒ်န့ၣ်အခါ အဝဲသ့ၣ်တဲဘၣ် ပှၤဂၤ တၢ်ကစီၣ်လၢ အနၢ်ဟူဘၣ်ဝဲ ဘၣ်ဃးဒီး ဖိသၣ်အံၤအဂ့ၢ်လီၤ. ၁၈ ကယဲၢ်ပှၤလၢ အနၢ်ဟူ တၢ်လၢ ပှၤကွၢ်သိတဖၣ်တဲဝဲန့ၣ် ကမၢကမၣ်ဝဲလီၤ. ၁၉ ဘၣ်ဆၣ် နီၢ်မၤရံန့ၣ် တိၢ်နီၣ်ဃာ်ဝဲ တၢ်ကတိၤတဖၣ်န့ၣ်ခဲလၢာ် ဒီးဆိကမိၣ်ထံဝဲ အခီပညီလီၤ.+ ၂၀ ဒီးပှၤကွၢ်သိတဖၣ်န့ၣ် က့ၤဝဲ ဒီးမ့ၢ်လၢအဝဲသ့ၣ် နၢ်ဟူဒီးထံၣ်ဘၣ်ဝဲဒ် တၢ်တဲပာ်စၢၤ အဝဲသ့ၣ် အသိးအဃိ အဝဲသ့ၣ် မၤလၤကပီၤ ကစၢ်ယွၤ ဒီးစံးထီၣ်ပတြၢၤအီၤလီၤ.
၂၁ ဖဲဃိးသီတသီန့ၣ် တၢ်ဆၢကတီၢ်ဘၣ်လၢ အဝဲဘၣ်ဒိးတၢ်ကူးတရံး+ ဒီးပှၤကိးန့ၢ်အမံၤလၢ ယ့ၣ်ၡူး ဒ်မူခိၣ်ကလူးတဂၤ တဲဆိပာ်စၢၤဝဲ တချုးလၢ အမိၢ်ဒၢထီၣ်အီၤ ဒံးဘၣ်လီၤ.+
၂၂ ဒီးဒ်စီၤမိၤၡ့ အတၢ်သိၣ်တၢ်သီ အိၣ်ဝဲအသိး+ တၢ်ဆၢကတီၢ်ဘၣ်လၢ တၢ်ကမၤကဆှီထီၣ် အဝဲသ့ၣ်လီၤ. ဒီးအဝဲသ့ၣ် ဟဲစိာ်ယ့ၣ်ၡူး လၢဝ့ၢ်ယရူၤၡလ့ၣ် ဒ်သိးကပာ်ဖျါထီၣ်အီၤလၢ ယဟိဝၤယွၤ အမဲာ်ညါ, ၂၃ ဒ်တၢ်ကွဲးအသးတဖၣ်လၢ ယဟိဝၤယွၤ အတၢ်သိၣ်တၢ်သီအပူၤ အိၣ်ဝဲအသိးလီၤ. တၢ်ကွဲးအသး တဲဝဲလၢ “ဖိဝဲၢ်ကိ ပိာ်ခွါကိးဂၤဒဲးန့ၣ် ကဘၣ်စီဆှံလၢ ယဟိဝၤယွၤ အမဲာ်ညါလီၤ.”+ ၂၄ ဒီးအဝဲသ့ၣ်လုၢ်ထီၣ်တၢ် ဒ်ယဟိဝၤယွၤ အတၢ်သိၣ်တၢ်သီ အိၣ်ဝဲအသိးလီၤ. တၢ်သိၣ်တၢ်သီ တဲဝဲလၢ “နကဘၣ်လုၢ်ထီၣ် ထိၣ်လွံၢ်ခံဘ့ၣ် မ့တမ့ၢ် ထိၣ်ကးက့ၣ်ဖိ ခံဘ့ၣ်လီၤ.”+
၂၅ ဒီးစီၤစူၤမ့းအိၣ်န့ၣ် အိၣ်ဝဲလၢ ဝ့ၢ်ယရူၤၡလ့ၣ်လီၤ. အဝဲမ့ၢ် ပှၤအတီအလိၤ, အပျံၤကစၢ်ယွၤ ဒီးအိၣ်ခိးကွၢ်လၢ်ဝဲ တၢ်ဆၢကတီၢ်လၢ ကစၢ်ယွၤကမၤမုာ်ထီၣ်က့ၤ ပှၤအံၣ်စရ့လးဖိလီၤ.+ ဒီးသးစီဆှံ အိၣ်ဝဲလၢအလိၤလီၤ. ၂၆ တကးဒံးဘၣ် ခီဖျိလၢ သးစီဆှံအဃိ ကစၢ်ယွၤ ဒုးသ့ၣ်ညါအီၤ လၢအကထံၣ်ဘၣ် ယဟိဝၤယွၤ အပှၤဒိးဖှူသးတဂၤ* တချုးလၢ အသံဒံးဘၣ်အခါလီၤ. ၂၇ ခီဖျိလၢ သးစီဆှံ အတၢ်ဟံးစုနဲၣ်ကျဲအဃိ စီၤစူၤမ့းအိၣ် လဲၤဝဲလၢ တၢ်လုၢ်ဟံၣ်လီၤ. ဒီးဖိသၣ်ယ့ၣ်ၡူး အမိၢ်အပၢ် ဟဲစိာ်အီၤလၢ တၢ်လုၢ်ဟံၣ်ပူၤ ဒ်သိး ကမၤထွဲ လုၢ်လၢ်တဖၣ်ဒ် စီၤမိၤၡ့ အတၢ်သိၣ်တၢ်သီ အိၣ်ဝဲအသိးလီၤ.+ ၂၈ ဒီးစီၤစူၤမ့းအိၣ် စိာ်ထီၣ်ဖိသၣ် လၢအစုလိၤ ဒီးစံးထီၣ်ပတြၢၤ ကစၢ်ယွၤလၢ ၂၉ “တၢ်ပၢကစၢ်ဧၢ, နမၤလၢပှဲၤ နတၢ်အၢၣ်လီၤလံအဃိ ယသံမုာ်လံ.+ ၃၀ ယထံၣ်ဘၣ် ပှၤလၢအကအုၣ်က့ၤခီၣ်က့ၤတၢ်တဂၤ+ ၃၁ လၢနကတဲာ်ကတီၤအီၤ ဒ်သိးပှၤခဲလၢာ် ကထံၣ်ဘၣ်ဝဲအဂီၢ်လီၤ.+ ၃၂ အဝဲ မ့ၢ်တၢ်ကပီၤလၢ+ အကသုးကွံာ် တၢ်လၢအကျၢၢ်ဘၢ ပှၤကလုာ်တဖၣ်အမဲာ်+ ဒီးမ့ၢ်ဝဲ တၢ်လၤတၢ်ကပီၤလၢ နပှၤဂီၢ်မုၢ် ပှၤအံၣ်စရ့လးဖိအဂီၢ်လီၤ.” ၃၃ ဒီးဖိသၣ် အမိၢ်အပၢ်န့ၣ် ကမၢကမၣ်ဝဲ ဘၣ်ဃးဒီး ဖိသၣ်အဂ့ၢ်လၢ စီၤစူၤမ့းအိၣ် တဲဖျါထီၣ်ဝဲလီၤ. ၃၄ ဒီးစီၤစူၤမ့းအိၣ် ဆိၣ်ဂ့ၤအဝဲသ့ၣ် ဒီးတဲဘၣ် ဖိသၣ်အမိၢ် နီၢ်မၤရံလၢ “ခီဖျိလၢ ဖိသၣ်တဂၤအံၤအဃိ ပှၤအံၣ်စရ့လးဖိတနီၤ ကလီၤဃံၢ်+ ဒီးတနီၤန့ၣ် ကဂဲၤဆၢထၢၣ်ဝဲလီၤ.+ ဒီးအဝဲကကဲထီၣ် တၢ်ပနီၣ်တခါလၢ ပှၤကတဲဆါဝဲလီၤ.+ ၃၅ အဝဲ ဘၣ်တၢ်ဃုထၢထီၣ်အီၤ ဒ်သိး တၢ်ကူၣ်တၢ်ဖးလၢ ပှၤအါဂၤအသးပူၤ ကဖျါထီၣ်အဂီၢ်လီၤ. မ့မ့ၢ်နၤန့ၣ် နးဖးထီတဘ့ၣ် ကဆဲးဖျိနသးလီၤ.”+
၃၆ ဒီးနီၢ်အၣ်နၤန့ၣ် မ့ၢ်ဝဲဝံမုၣ်တဂၤလီၤ. အဝဲမ့ၢ်ဝဲ စီၤဖနူၤအ့လး အဖိမုၣ်လၢ အၤၡ့ၢ် အဒူၣ်အကျါလီၤ. အဝဲဖျီသးဝံၤ အအိၣ်ဘၣ်ဒီးအဝၤထဲ နွံနံၣ်လီၤ. ခဲအံၤ အသးပှၢ်ဖးဒိၣ်လံ. ၃၇ အဝဲမ့ၢ် မုၣ်ကမဲ ဒီးအသးအိၣ် ၈၄ နံၣ်လီၤ. အဝဲဟဲလၢ တၢ်လုၢ်ဟံၣ်ထီဘိ ဒ်သိး ကဘူၣ်ထီၣ်ဘါထီၣ်တၢ် လၢမုၢ်နၤဒီးမုၢ်ဆါ, ကဒုၣ်တၢ်အီၣ် ဒီးကဃ့ထုကဖၣ်တၢ် အဂီၢ်လီၤ. ၃၈ ဖဲန့ၣ်အခါ အဝဲဟဲ ဒီးစံးဘျုးစံးဖှိၣ် ကစၢ်ယွၤ ဒီးတဲဘၣ် ဖိသၣ်တဂၤအံၤအဂ့ၢ်လၢ ပှၤကိးဂၤဒဲးလၢ အခိးကွၢ်လၢ်ဝဲလၢ ကစၢ်ယွၤ ကမၤပူၤဖျဲး ယရူၤၡလ့ၣ်လီၤ.+
၃၉ နီၢ်မၤရံဒီးစီၤယိၤသး မၤဝဲတၢ်ခဲလၢာ်ဒ် ယဟိဝၤယွၤ အတၢ်သိၣ်တၢ်သီ အိၣ်ဝဲအသိး+ ဝံၤဒီး အဝဲသ့ၣ် က့ၤဝဲလၢ အနီၢ်ကစၢ်အဝ့ၢ် လၢအမ့ၢ် ဝ့ၢ်နစၤရ့းလၢ+ ကၤလံၤလါအပူၤလီၤ. ၄၀ ဒီးဖိသၣ်န့ၣ် ဒိၣ်ထီၣ်ဒီးအဂံၢ်အဘါ ဆူၣ်ထီၣ်ဝဲ ဒီးအတၢ်ကူၣ်သ့ အါထီၣ်မးအါထီၣ် ဒီးကစၢ်ယွၤ ဘၣ်သူၣ်ဘၣ်သးအီၤ ထီဘိလီၤ.+
၄၁ ဒီးယ့ၣ်ၡူးအမိၢ်အပၢ် လဲၤဝဲလၢ ဝ့ၢ်ယရူၤၡလ့ၣ် ဒ်သိးကမၤဝဲ ဘူၣ်လဲၤကပာ်အဂီၢ် ကိးနံၣ်ဒဲးလီၤ.+ ၄၂ ဖဲယ့ၣ်ၡူးအိၣ် ၁၂ နံၣ်အခါ အဝဲသ့ၣ်လဲၤမၤဝဲ ဘူၣ်လဲၤကပာ် ဒ်ညီနုၢ်အသိးလီၤ.+ ၄၃ ဘူၣ်လဲၤကပာ် ဝံၤအလီၢ်ခံ အဝဲသ့ၣ်က့ၤဝဲလီၤ. မ့မ့ၢ် ဖိသၣ်ယ့ၣ်ၡူးန့ၣ် အိၣ်တ့ၢ်လၢ ယရူၤၡလ့ၣ် ဘၣ်ဆၣ် အမိၢ်အပၢ် တသ့ၣ်ညါဝဲဘၣ်. ၄၄ အဝဲသ့ၣ် ဆိကမိၣ်ဝဲလၢ ယ့ၣ်ၡူး ပၣ်ဃုာ်လၢ ပှၤလၢအက့ၤသကိးဒီး အဝဲသ့ၣ် အကျါလီၤ. ဖဲအဝဲသ့ၣ် က့ၤဝဲန့ၢ် ဒီတနံၤဝံၤအခါ အဝဲသ့ၣ်စးထီၣ်လူၤဃုဝဲ ယ့ၣ်ၡူးလၢ အဘူးအတံၢ် ဒီးအသကိးတဖၣ် အကျါလီၤ. ၄၅ ဘၣ်ဆၣ် အဝဲသ့ၣ်ဃုအီၤ တဘၣ်ဘၣ်အဃိ အဝဲသ့ၣ် လဲၤကဒါက့ၤလၢ ယရူၤၡလ့ၣ် ဒီးဟးဃုအီၤ ဝးဝးလီၤ. ၄၆ သၢသီဝံၤအလီၢ်ခံ အဝဲသ့ၣ် ထံၣ်ယ့ၣ်ၡူးလၢ တၢ်လုၢ်ဟံၣ်ပူၤလီၤ. အဝဲဆ့ၣ်နီၤလၢ သရၣ်တဖၣ်အခၢၣ်သး ဒီးဒိကနၣ် အဝဲသ့ၣ် ဒီးသံကွၢ် အဝဲသ့ၣ် တၢ်သံကွၢ်တဖၣ်လီၤ. ၄၇ ဒီးခီဖျိလၢ အတၢ်နၢ်ပၢၢ်ဒီး အတၢ်စံးဆၢတဖၣ်အဃိ+ ပှၤလၢ အနၢ်ဟူ တၢ်လၢအတဲဝဲတဖၣ်န့ၣ် ကမၢကမၣ်ဝဲ ကိးဂၤဒဲးလီၤ. ၄၈ ဖဲအမိၢ်အပၢ် ထံၣ်အီၤအခါ အဝဲသ့ၣ် ကမၢကမၣ်ဝဲဒိၣ်မးလီၤ. ဒီးအမိၢ် တဲအီၤလၢ “ဖိခွါဧၢ, နမၤပှၤဒ်အံၤ ဘၣ်လဲၣ်. ယၤဒီးနပၢ် ပသူၣ်ကိၢ်သးဂီၤတၢ် ဒီးပလူၤဃုနၤ သပှၢ်ကတၢၢ်လီၤ.” ၄၉ ဘၣ်ဆၣ် ယ့ၣ်ၡူး တဲအဝဲသ့ၣ်လၢ “သုဃုယၤ ဘၣ်လဲၣ်. ယဘၣ်အိၣ်လၢ ယပၢ်အဟံၣ်ပူၤန့ၣ် သုတသ့ၣ်ညါဧီၤ.”+ ၅၀ ဘၣ်ဆၣ် အဝဲသ့ၣ် တနၢ်ပၢၢ် တၢ်လၢ ယ့ၣ်ၡူးတဲ အဝဲသ့ၣ်ဘၣ်.
၅၁ ဒီးအဝဲက့ၤပိာ် အဝဲသ့ၣ်အခံလၢ ဝ့ၢ်နစၤရ့း ဒီးအဝဲဆဲးဒိကနၣ် အဝဲသ့ၣ် အကလုၢ်လီၤ.+ တၢ်ဂ့ၢ်တဖၣ်အံၤ ခဲလၢာ်န့ၣ် အမိၢ် တိၢ်နီၣ်ဃာ်ဝဲလၢ အသးပူၤ လီၤတံၢ်လီၤဆဲးလီၤ.+ ၅၂ ဒီးယ့ၣ်ၡူး ဒိၣ်ထီၣ်ဝဲဒီး အတၢ်ကူၣ်သ့စ့ၢ်ကီး အါထီၣ်ဝဲလီၤ. ဒီးကစၢ်ယွၤ ဒီးပှၤကညီ ဘၣ်သူၣ်ဘၣ်သးအီၤလီၤ.