၁ ၡမူၤအ့လး
၁ လၢဝ့ၢ်ရၤမါသဲၣ်စိဖံၣ်+ ဖဲအ့ဖရဲၣ်+ အကစၢၢ်ကလိကျါန့ၣ် ပှၤပိာ်ခွါလၢအမံၤမ့ၢ်ဝဲ စီၤအ့လကါနၤ အိၣ်ဝဲတဂၤလီၤ. စီၤအ့လကါနၤန့ၣ်+ အပၢ်မ့ၢ်ဝဲ စီၤယရိဃၣ်, စီၤယရိဃၣ် အပၢ်မ့ၢ်ဝဲ စီၤအလံဟူၤ, စီၤအလံဟူၤ အပၢ်မ့ၢ်ဝဲ စီၤတိဟူၤ ဒီးစီၤတိဟူၤ အပၢ်မ့ၢ်ဝဲ စီၤစူာ် လၢအမ့ၢ် ပှၤအ့ဖရဲၣ်ဖိလီၤ. ၂ စီၤအ့လကါနၤန့ၣ် အမါအိၣ်ဝဲ ခံဂၤလီၤ. အမါတဂၤန့ၣ် အမံၤမ့ၢ်ဝဲ နီၢ်ဃးနၤ ဒီးအမါလၢ အဂၤတဂၤန့ၣ် အမံၤမ့ၢ်ဝဲ နီၢ်ပနံးနၤလီၤ. နီၢ်ပနံးနၤန့ၣ် အိၣ်ဒီးအဖိတဖၣ် ဘၣ်ဆၣ် နီၢ်ဃးနၤန့ၣ် အဖိတအိၣ် နီတဂၤဘၣ်. ၃ ဒီးတနံၣ်ဘၣ်တနံၣ်န့ၣ် စီၤအ့လကါနၤ ဟးထီၣ်လၢ အနီၢ်ကစၢ်အဝ့ၢ်ပူၤ ဒ်သိး အကလဲၤဘူၣ်ထီၣ်ဘါထီၣ် တၢ်သုးမုၢ်ဂီၢ်မုၢ်အကစၢ် ယဟိဝၤယွၤ ဒီးဟ့ၣ်လုၢ်ထီၣ်တၢ် လၢအအိၣ် လၢဝ့ၢ်ၡံလိၤအပူၤလီၤ.+ ဒီးဖဲန့ၣ်န့ၣ် စီၤဧ့လံၤအဖိခွါ ခံဂၤ လၢအမ့ၢ် စီၤဃၤဖနံ+ ဒီးစီၤဖံၤနဃၣ် မၤတၢ်ဒ် ယဟိဝၤယွၤ အပှၤလုၢ်တၢ်ဒိၣ်တဖၣ် အသိးလီၤ.+
၄ ဘၣ်တနံၤ ဖဲစီၤအ့လကါနၤ လုၢ်ထီၣ်တၢ်အခါ အဟ့ၣ်ဝဲ အမါ နီၢ်ပနံးနၤ ဒီးအဖိမုၣ်ဖိခွါတဖၣ်လၢ တၢ်ညၣ်အလိၣ်တဖၣ်လီၤ.+ ၅ ဒီးယဟိဝၤယွၤ တဆိၣ်ဂ့ၤ နီၢ်ဃးနၤ ဒ်သိး အဖိကအိၣ်အဂီၢ်ဘၣ်. သနာ်က့ မ့ၢ်လၢ စီၤအ့လကါနၤ အဲၣ်အီၤဒိၣ်မးအဃိ အဝဲဟ့ၣ်လီၤအီၤလၢ တၢ်ညၣ်လီၤလီၤဆီဆီ တလိၣ်လီၤ. ၆ တကးဒံးဘၣ် မ့ၢ်လၢ ယဟိဝၤယွၤ တဆိၣ်ဂ့ၤ နီၢ်ဃးနၤ ဒ်သိး အဖိကအိၣ်အဂီၢ်ဘၣ်အဃိ ဒ်သိး နီၢ်ဃးနၤ အသးကဘၣ်ဒိအဂီၢ် စီၤအ့လကါနၤ အမါလၢအဝဲတဂၤန့ၣ် တဲဆဲးအဲး နီၢ်ဃးနၤ ခဲအံၤခဲအံၤလီၤ. ၇ အဃိ ဖဲနီၢ်ဃးနၤ လဲၤလၢ ယဟိဝၤယွၤအဟံၣ်+ တနံၣ်ဘၣ်တနံၣ်န့ၣ် နီၢ်ပနံးနၤ မၤဝဲဒ်န့ၣ်လီၤ. ဒီးနီၢ်ပနံးနၤ တဲဆဲးအဲးအီၤ တုၤလၢ အမဲာ်ထံလီၤ ဒီးအတအီၣ်တၢ်လၢၤဘၣ်. ၈ ဘၣ်ဆၣ် အဝၤ စီၤအ့လကါနၤ တဲအီၤလၢ “နီၢ်ဃးနၤဧၢ, ဘၣ်မနုၤအဃိ နမဲာ်ထံလီၤ ဒီးနတအီၣ်တၢ် လၢၤဘၣ်လဲၣ်. ဒီးဘၣ်မနုၤအဃိ နသးအုးထဲန့ၣ်ညါလဲၣ်. လၢနဂီၢ်န့ၣ် ယတဂ့ၤ ဒိၣ်န့ၢ်ဒံး ဖိခွါအဂၤ တဆံဧီၤ.”
၉ ဖဲအဝဲသ့ၣ် အီၣ်တၢ်အီတၢ်လၢ ဝ့ၢ်ၡံလိၤအပူၤဝံၤအခါ နီၢ်ဃးနၤ ဂဲၤဆၢထၢၣ်ဝဲလီၤ. ဖဲန့ၣ်အခါ ပှၤလုၢ်တၢ်ဒိၣ် စီၤဧ့လံၤ ဆ့ၣ်နီၤဝဲလၢ လီၢ်ဆ့ၣ်နီၤ လၢယဟိဝၤယွၤ အတၢ်လုၢ်ဟံၣ်*+ အတၢ်နုာ်လီၤအလီၢ် တကပၤလီၤ. ၁၀ ဒီးနီၢ်ဃးနၤ အသးဘၣ်ဒိဒိၣ်မး အဃိ အဝဲ ဃ့ထုကဖၣ်လၢ ယဟိဝၤယွၤအအိၣ်+ ဒီးဟီၣ်ဝဲ လၢာ်သူၣ်လၢာ်သးလီၤ. ၁၁ ဒီးအဝဲ မၤတၢ်အၢၣ်လီၤလၢ “အိ တၢ်သုးမုၢ်ဂီၢ်မုၢ်အကစၢ် ယဟိဝၤယွၤဧၢ, နမ့ၢ်ကွၢ်လီၤ ယတၢ်နးတၢ်ဖှီၣ် ဒီးသ့ၣ်နီၣ်ထီၣ်ယၤ, နမ့ၢ်တသးပ့ၤနီၣ်ယၤ ဒီးနမ့ၢ်ဟ့ၣ်ယၤ ဖိခွါတဂၤန့ၣ်+ ယကဟ့ၣ်အီၤလၢ ယဟိဝၤယွၤအအိၣ် လၢအတၢ်အိၣ်မူ ဒီတစိၤညါ ဒီးပှၤတဘၣ်တံာ် အခိၣ်ဆူၣ် နီတဂၤဘၣ်.”+
၁၂ ဖဲနီၢ်ဃးနၤ ဃ့ထုကဖၣ် လၢယဟိဝၤယွၤအအိၣ် ဖးယံာ်အခါ စီၤဧ့လံၤ ကွၢ်ဝဲအထးခိၣ်လီၤ. ၁၃ ဘၣ်ဆၣ် နီၢ်ဃးနၤ တဲတၢ်လၢ အသးပူၤလီၤ. အထးခိၣ်ဟူး သနာ်က့ အကလုၢ်တသီၣ်ဘၣ်. အဃိ စီၤဧ့လံၤ ဆိကမိၣ်ဝဲလၢ အမူၤစပံးထံလီၤ. ၁၄ ဒီးစီၤဧ့လံၤ တဲဘၣ်အီၤလၢ “ဘၣ်မနုၤအဃိ နမူၤစပံးထံ ထဲအံၤညါလဲၣ်. အီလၢၤတဂ့ၤသၢၤ.” ၁၅ ဖဲန့ၣ် နီၢ်ဃးနၤ တဲဆၢက့ၤဝဲလၢ “တမ့ၢ်ဘၣ် ကစၢ်ဧၢ, ယမ့ၢ်ပိာ်မုၣ်လၢ အဘၣ်ကိၢ်ဘၣ်ဂီၤ ဒိၣ်မးတဂၤလီၤ. စပံးထံမ့ၢ်ဂ့ၤ, တၢ်လၢအပၣ်ဃုာ်ဒီးသံးမ့ၢ်ဂ့ၤ ယတအီဘၣ်. မ့ၢ်ဒၣ် ယတဲဘၣ် ယဟိဝၤယွၤလၢ ယတၢ်တူၢ်ဘၣ် ခဲလၢာ်လီၤ.+ ၁၆ တဘၣ်ပာ် နကုၢ်ပိာ်မုၣ်ယၤအံၤ ဒ်ပိာ်မုၣ်လၢ အအၢအသီတဂၤ အသိးတဂ့ၤ. ခီဖျိလၢ ယသူၣ်ကိၢ်သးဂီၤ ဒီးယသးဘၣ်ဖှီၣ် ဒိၣ်မးအဃိ ယဃ့ထုကဖၣ် တုၤလၢခဲအံၤလီၤ.” ၁၇ ဒီးစီၤဧ့လံၤ တဲအီၤလၢ “က့ၤမုာ်မုာ်တက့ၢ်. ဒီးမ်အံၣ်စရ့လးအကစၢ် ဟ့ၣ်နၤတၢ်လၢ နဃ့ကညးအီၤတက့ၢ်.”+ ၁၈ ဝံၤဒီး နီၢ်ဃးနၤ တဲဝဲလၢ “မ်နဘၣ်သူၣ်ဘၣ်သး ယၤတက့ၢ်.” ဒီးနီၢ်ဃးနၤ ဟးထီၣ်ကွံာ်ဝဲ ဒီးအီၣ်တၢ်လီၤ. ဒီးနီၢ်ဃးနၤ အသးတဘၣ်ဖှီၣ်လၢၤဘၣ်.
၁၉ ဒီးအဝဲသ့ၣ် ဂဲၤဆၢထၢၣ် ဂီၤဂီၤ ဒီးချံးလီၤအခီၣ်လၢ ယဟိဝၤယွၤ အမဲာ်ညါ ဝံၤဒီး အဝဲသ့ၣ်က့ၤလၢ ဝ့ၢ်ရၤမါလီၤ.+ စီၤအ့လကါနၤ မံဃုာ်ဒီးအမါ နီၢ်ဃးနၤလီၤ. ဒီးယဟိဝၤယွၤ နီၣ်ဘၣ်က့ၤ နီၢ်ဃးနၤ+ ၂၀ အဃိ နီၢ်ဃးနၤဒၢထီၣ် ဒီးလၢတနံၣ်အတီၢ်ပူၤန့ၣ် အဝဲ အိၣ်ဖျဲၣ်ထီၣ်ဝဲ ဖိခွါတဂၤလီၤ. ဒီးအဝဲကိးန့ၢ် အမံၤလၢ+ စီၤၡမူၤအ့လး* မ့ၢ်လၢ အဝဲတဲဝဲလၢ “ယဃ့န့ၢ်အီၤလၢ ယဟိဝၤယွၤအအိၣ်” အဃိလီၤ.
၂၁ လၢခံ စီၤအ့လကါနၤ လဲၤထီၣ် ဃုာ်ဒီးအဟံၣ်ဖိဃီဖိ ကိးဂၤဒဲး ဒ်သိး ကဟ့ၣ်လုၢ်ထီၣ်ဝဲ တနံၣ်တဘျီ အတၢ်လုၢ်တၢ်ပာ်လၢ ယဟိဝၤယွၤအအိၣ်+ ဒီးဒ်သိး အကဟ့ၣ်ဝဲ တၢ်လုၢ်လၢ တၢ်အၢၣ်လီၤအဂီၢ်လီၤ. ၂၂ ဘၣ်ဆၣ် နီၢ်ဃးနၤ တလဲၤဝဲဘၣ်.+ အဝဲတဲဘၣ်အဝၤလၢ “ဖိသၣ်ပိာ်ခွါ မ့ၢ်ဖှၣ်နုၢ်မး ယကလဲၤကိးအီၤလၢ ယဟိဝၤယွၤအမဲာ်ညါ ဒီးအဝဲ ကဘၣ်အိၣ်တ့ၢ်ဖဲန့ၣ် တစိၤသးလီၤ.”+ ၂၃ ဒီးအဝၤ စီၤအ့လကါနၤ တဲဘၣ်အီၤလၢ “နမ့ၢ်ထံၣ်လၢ အဘၣ်န့ၣ် မၤဟီ. အိၣ်လၢဟံၣ်တုၤလၢ အဖှၣ်နုၢ်ဝံၤ တက့ၢ်. မ်ယဟိဝၤယွၤ မၤလၢပှဲၤ တၢ်လၢနတဲတက့ၢ်.” ဒီးနီၢ်ဃးနၤ အိၣ်တ့ၢ်လၢဟံၣ် ဒီးဒုးအီနုၢ်အဖိခွါ တုၤလၢ အဖိခွါ ဖှၣ်နုၢ်န့ၣ်လီၤ.
၂၄ ဖဲနီၢ်ဃးနၤ အဖိခွါ ဖှၣ်နုၢ်ဝံၤအခါ အဝဲလဲၤကိးအီၤလၢ ဝ့ၢ်ၡံလိၤလီၤ. ဒီးအဝဲလဲၤ ကိးဃုာ်ဒီး ကျီၢ်ဖါသၢနံၣ်တဒု ဒီးလဲၤစိာ်ဝဲ ကိၣ်ကမူၣ် တအ့ဖး* ဒီးစပံးထံ ဖးဒိၣ်တကိလီၤ.+ ဒီးနီၢ်ဃးနၤ လဲၤလၢ ယဟိဝၤယွၤအဟံၣ် လၢအအိၣ်လၢ ဝ့ၢ်ၡံလိၤအပူၤ+ ဒီးလဲၤကိးဃုာ်ဒီး ဖိသၣ်ပိာ်ခွါလီၤ. ၂၅ ဒီးအဝဲသ့ၣ် မၤသံကွံာ် ကျီၢ်ဖါတဒု ဒီးလဲၤကိး ဖိသၣ်ပိာ်ခွါ လၢစီၤဧ့လံၤ အအိၣ်လီၤ. ၂၆ ဝံၤဒီး နီၢ်ဃးနၤ တဲဝဲလၢ “ကစၢ်ဧၢ, ဝံသးစူၤယၤနီၤ. ယအၢၣ်လီၤနၤလၢ ယမ့ၢ်ပိာ်မုၣ်တဂၤလၢ အဆၢထၢၣ်ဒီးနၤ လၢတၢ်လီၢ်ဖဲအံၤ ဒ်သိးကဃ့ထုကဖၣ်တၢ်လၢ ယဟိဝၤယွၤအအိၣ် အဂီၢ်လီၤ.+ ၂၇ ယဃ့ထုကဖၣ် လၢယကဒိးန့ၢ်ဘၣ် ဖိသၣ်ပိာ်ခွါ တဂၤအံၤအဂီၢ် ဒီးယဟိဝၤယွၤ ဟ့ၣ်ယၤတၢ်လၢ ယဃ့ကညးအီၤလံ.+ ၂၈ အဃိ ခဲအံၤ ယဟ့ၣ်ဒုးလိၢ်အီၤလၢ ယဟိဝၤယွၤ အအိၣ်လီၤ. ဒီးအကဘၣ် တၢ်ဟ့ၣ်ဒုးလိၢ်အီၤလၢ ယဟိဝၤယွၤအအိၣ် တစိၤလၢအသးလီၤ.”
ဝံၤဒီးအဝဲ* ချံးလီၤအခီၣ်လၢ ယဟိဝၤယွၤ အမဲာ်ညါလီၤ.