၂ ကွဲးနီၣ်တၢ်
၂၄ ဖဲစီၤယိၤအၣ် ကဲထီၣ်စီၤပၤအခါ အသးနံၣ်အိၣ်ဝဲ နွံနံၣ်လီၤ.+ ဒီးအဝဲပၢတၢ်လၢ ဝ့ၢ်ယရူၤၡလ့ၣ်အပူၤ အနံၣ် ၄၀ လီၤ. စီၤယိၤအၣ် အမိၢ်မ့ၢ်ဝဲ နီၢ်စံဘယၤ လၢအအိၣ်လၢ ဝ့ၢ်ဘ့ၢ်ၡဘၤန့ၣ်လီၤ.+ ၂ ဒီးဖဲပှၤလုၢ်တၢ်ဒိၣ် စီၤယဟိၤယဒါ အိၣ်မူဝဲ ဒီတကတီၢ်န့ၣ် စီၤယိၤအၣ် ဆဲးမၤတၢ်လၢ ယဟိဝၤယွၤ ထံၣ်ဝဲလၢ အဂ့ၤလီၤ.+ ၃ စီၤယဟိၤယဒါ ဃုန့ၢ် စီၤယိၤအၣ် အမါခံဂၤလီၤ. ဒီးလၢခံ စီၤယိၤအၣ်အိၣ်ဒီး အဖိမုၣ် ဒီးအဖိခွါတဖၣ်လီၤ.
၄ လၢခံ စီၤယိၤအၣ် အသးဆူၣ်လၢ ကဘှီဂ့ၤထီၣ်က့ၤ ယဟိဝၤယွၤ အဟံၣ်လီၤ.+ ၅ အဃိ အဝဲကိးဖှိၣ် ပှၤလုၢ်တၢ်ဒိၣ်တဖၣ် ဒီးပှၤလ့ၤဝံဖိတဖၣ် ဒီးတဲအဝဲသ့ၣ်လၢ “လဲၤထီၣ်လၢ ယူဒၤအဝ့ၢ်တဖၣ် ဒီးထၢဖှိၣ်စ့လၢ ပှၤအံၣ်စရ့လးဖိ ခဲလၢာ်အအိၣ် ဒ်သိးသုဘှီဂ့ၤထီၣ်က့ၤ သုကစၢ်ယွၤအဟံၣ်+ တနံၣ်ဘၣ်တနံၣ် ကန့ၢ်အဂီၢ်တက့ၢ်. ဒီးသုကဘၣ်လဲၤမၤချ့ချ့လီၤ.” ဘၣ်ဆၣ် ပှၤလ့ၤဝံဖိတဖၣ် သုးတၢ်ဆၢကတီၢ်လီၤ.+ ၆ အဃိ စီၤပၤကိးန့ၢ် ပှၤအခိၣ် စီၤယဟိၤယဒါ ဒီးတဲအီၤလၢ+ “ယဟိဝၤယွၤ အခ့အပှၤ စီၤမိၤၡ့ မၤလိာ်ဝဲလၢ အံၣ်စရ့လး အတၢ်အိၣ်ဖှိၣ် ကဘၣ်ဟ့ၣ်လီၤ တၢ်ခိတၢ်သွဲစီဆှံလၢ ဒဲစီဆှံအဂီၢ်လီၤ.+ ဘၣ်မနုၤအဃိ နတမၢ ပှၤလ့ၤဝံဖိတဖၣ် ထၢတၢ်ခိတၢ်သွဲစီဆှံတဖၣ်အံၤလၢ ယူဒၤဒီးဝ့ၢ်ယရူၤၡလ့ၣ် အပှၤဂီၢ်မုၢ်အအိၣ် ဒီးဟဲစိာ်အီၤဖဲအံၤဘၣ်လဲၣ်.+ ၇ ဒ်သုသ့ၣ်ညါအသိး လၢညါန့ၣ် ပိာ်မုၣ်အၢအၢသီသီ နီၢ်ဧသၤလယၤ+ အဖိခွါတဖၣ် နုာ်လီၤဆူၣ်လၢ ယွၤလၢအမ့ၢ်အတီတဂၤ အဟံၣ်ပူၤ+ ဒီးတၢ်လၢအစီဆှံလၢ ယဟိဝၤယွၤ အဟံၣ်ပူၤခဲလၢာ်န့ၣ် အဝဲသ့ၣ်သူက့ၤလၢ ဘဧၤလးအဂီၢ်လီၤ.” ၈ ဒီးလၢခံ ဒ်စီၤပၤမၤလိာ်ဝဲအသိး ပှၤတ့ထီၣ် တလါတဖျၢၣ်+ ဒီးပှၤပာ်လီၤအီၤလၢ တၢ်ချၢ ဖဲယဟိဝၤယွၤ အဟံၣ်အတြဲၤန့ၣ်လီၤ.+ ၉ ဖဲန့ၣ်ဝံၤအလီၢ်ခံ လၢယူဒၤဘီမုၢ် ဒီးဝ့ၢ်ယရူၤၡလ့ၣ်အပူၤန့ၣ် ပှၤဘိးဘၣ်သ့ၣ်ညါလီၤဝဲလၢ ပှၤကဘၣ်ဟဲစိာ် တၢ်ခိတၢ်သွဲစီဆှံ လၢယဟိဝၤယွၤ အအိၣ်+ ဒ်ယွၤလၢအမ့ၢ်အတီ အခ့အပှၤ စီၤမိၤၡ့ မၤလိာ်ပာ်စၢၤဝဲ ပှၤအံၣ်စရ့လးဖိ လၢပှၢ်မုၢ်ကနၢ အသိးန့ၣ်လီၤ. ၁၀ ပဒိၣ်ဖးဒိၣ်တဖၣ် ဒီးပှၤဂီၢ်မုၢ်ခဲလၢာ် သူၣ်ခုသးခုဝဲ+ ဒီးအဝဲသ့ၣ်ဟဲစိာ် တၢ်မၤဘူၣ် ဒီးထၢနုာ်ဝဲလၢ တလါတဖျၢၣ်န့ၣ် အပူၤတုၤလၢအပှဲၤလီၤ.
၁၁ တဘျီဂ့ၤတဘျီဂ့ၤ ဖဲပှၤလ့ၤဝံဖိ ထံၣ်ဝဲလၢ ကျိၣ်စ့အိၣ်အါမးလၢ တလါပူၤအခါ အဝဲသ့ၣ် ဟဲစိာ်နုာ်တလါ ဒ်သိးကအးလီၤအီၤလၢ စီၤပၤအစုပူၤလီၤ. ဖဲန့ၣ်အခါ စီၤပၤအနဲၣ်ရွဲၣ် ဒီးပှၤလုၢ်တၢ်ခိၣ် အဒိၣ်ကတၢၢ် အပှၤမၤစၢၤတၢ်တဂၤန့ၣ် ဟဲထုးထီၣ်စ့လၢ တလါပူၤ+ ဝံၤဒီးက့ၤပာ်တလါလၢ အလီၢ်လီၤ. တနံၤဘၣ်တနံၤ အဝဲသ့ၣ် မၤဝဲဒ်န့ၣ် ဒီးအဝဲသ့ၣ် ထၢဖှိၣ်စ့ဒီဒူၣ်လီၤ. ၁၂ လၢခံ စီၤပၤ ဒီးစီၤယဟိၤယဒါ ဟ့ၣ်လီၤဝဲ စ့န့ၣ်လၢ ပှၤလၢအတီခိၣ်ရိၤမဲ ယဟိဝၤယွၤ အဟံၣ်အတၢ်မၤတဖၣ်န့ၣ် အစုပူၤလီၤ. ဝံၤဒီးအဝဲသ့ၣ် ငါန့ၢ်ဝဲ ပှၤဘူးတဲာ်လၢၢ်တဖၣ် ဒီးပှၤစုသ့ဖိတဖၣ် လၢကဘှီဂ့ၤထီၣ်က့ၤ ယဟိဝၤယွၤအဟံၣ်အဂီၢ်လီၤ.+ ဒီးအဝဲသ့ၣ် ငါန့ၢ်စ့ၢ်ကီး ပှၤလၢအမၤတၢ်လၢ ထးဒီးတိၢ်ဘီ ဒ်သိးကဘှီဂ့ၤထီၣ်က့ၤ ယဟိဝၤယွၤ အဟံၣ်အဂီၢ်လီၤ. ၁၃ အဃိ ပှၤလၢအတီခိၣ်ရိၤမဲတၢ်တဖၣ် စးထီၣ်တၢ်မၤတခါအံၤ ဒီးတၢ်ဘှီဂ့ၤထီၣ်က့ၤတၢ်မၤ လဲၤအသးဂ့ၤဂ့ၤဘၣ်ဘၣ်လၢ အဝဲသ့ၣ် အတၢ်ကွၢ်ထွဲအဖီလာ်လီၤ. ဒီးအဝဲသ့ၣ် ဘှီဂ့ၤထီၣ်က့ၤ ယွၤလၢအမ့ၢ်အတီတဂၤအဟံၣ် ဒ်အကြၢးအိၣ်ဝဲအသိး ဒီးတ့ကျၢၤထီၣ်က့ၤအီၤ ဒ်လၢညါအသိးလီၤ. ၁၄ ဖဲတၢ်မၤတခါအံၤဝံၤအခါ အဝဲသ့ၣ် လဲၤဟ့ၣ်လီၤစ့လၢ အအိၣ်တ့ၢ်တဖၣ်လၢ စီၤပၤဒီးစီၤယဟိၤယဒါ အအိၣ် ဒီးအဝဲသ့ၣ်သူဝဲ ဒ်သိးကတ့ထီၣ် တၢ်ပီးတၢ်လီတဖၣ်လၢ ယဟိဝၤယွၤ အဟံၣ်ပူၤ လၢအပၣ်ဃုာ်ဒီး တၢ်ပီးတၢ်လီတဖၣ်လၢ တၢ်အခ့အပှၤ အတၢ်မၤ ဒီးလၢပှၤကလုၢ်ထီၣ်တၢ်အဂီၢ်, ထံခွးတဖၣ်, တၢ်ပီးတၢ်လီထူ ဒီးတၢ်ပီးတၢ်လီ စ့ညၣ်တဖၣ်လီၤ.+ ဒီးဖဲစီၤယဟိၤယဒါ အိၣ်မူဒံးဝဲအဆၢကတီၢ် ပှၤလုၢ်ထီၣ် တၢ်လုၢ်ဒွဲၣ်အူတဖၣ်+ ဖဲယဟိဝၤယွၤ အဟံၣ်ထီဘိလီၤ.
၁၅ ဒီးစီၤယဟိၤယဒါ သးပှၢ်ထီၣ် ဒီးသံဝဲလၢ တၢ်သူၣ်မံသးမုာ်အပူၤ ဖဲအသးနံၣ်အိၣ်ဝဲ ၁၃၀ န့ၣ်လီၤ. ၁၆ ဒီးမ့ၢ်လၢအမၤတ့ၢ် တၢ်ဂ့ၤလၢ အံၣ်စရ့လးအပူၤ+ ဘၣ်ဃးဒီး ယွၤလၢအမ့ၢ်အတီ ဒီးကစၢ်ယွၤအဟံၣ်အဃိ ပှၤခူၣ်လီၤကွံာ်အီၤ တပူၤဃီဒီး စီၤပၤတဖၣ် လၢစီၤဒၤဝံးအဝ့ၢ်ပူၤလီၤ.+
၁၇ စီၤယဟိၤယဒါ သံဝံၤအလီၢ်ခံ ယူဒၤအပဒိၣ်ဖးဒိၣ်တဖၣ် ဟဲထိၣ်လီၤပှီၤအသးလၢ စီၤပၤအမဲာ်ညါ ဒီးစီၤပၤဒိကနၣ် အဝဲသ့ၣ်လီၤ. ၁၈ ဒီးပှၤဂီၢ်မုၢ်တဖၣ် ပာ်တ့ၢ်ကွံာ် အဝဲသ့ၣ် အမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤအဟံၣ် ဒီးအဝဲသ့ၣ် ဘူၣ်ထီၣ်ဘါထီၣ်ဝဲ တၢ်စီဆှံအထူၣ်တဖၣ်* ဒီးတၢ်ဂီၤတၢ်ဖှီၣ်တဖၣ်လီၤ. ခီဖျိလၢ အဝဲသ့ၣ် အတၢ်ကမၣ် အဃိ ကစၢ်ယွၤ အတၢ်သးထီၣ် လီၤဘၣ်လၢ ယူဒၤဒီးဝ့ၢ်ယရူၤၡလ့ၣ် အပူၤလီၤ. ၁၉ ဒ်သိးအဝဲသ့ၣ် ကဟဲက့ၤလၢ ယဟိဝၤယွၤအအိၣ်အဂီၢ် ကစၢ်ယွၤဆှၢလီၤ ဝံတဖၣ်လၢ အဝဲသ့ၣ်အအိၣ် တလီၢ်လီၢ်လီၤ. ဝံတဖၣ်အံၤ ဟ့ၣ်ပလီၢ်အဝဲသ့ၣ် ဘၣ်ဆၣ် အဝဲသ့ၣ် တဒိကနၣ်ဝဲဘၣ်.+
၂၀ ကစၢ်ယွၤ အသးစီဆှံဟဲလီၤလၢ ပှၤလုၢ်တၢ်ဒိၣ် စီၤယဟိၤယဒါ+ အဖိခွါ စီၤစကၤရယၤအလိၤလီၤ. ဒီးစီၤစကၤရယၤ ဆၢထၢၣ်ဝဲလၢ ပှၤဂီၢ်မုၢ်အမဲာ်ညါ ဒီးတဲအဝဲသ့ၣ်လၢ “ယွၤလၢအမ့ၢ်အတီတဂၤ တဲဝဲဒ်အံၤ, ‘ဘၣ်မနုၤအဃိ သုမၤကမၣ် ယဟိဝၤယွၤ အတၢ်မၤလိာ်တဖၣ် ဒီးဒုးအိၣ်ထီၣ် သုနီၢ်ကစၢ် အတၢ်ကီတၢ်ခဲလဲၣ်. မ့ၢ်လၢသုပာ်တ့ၢ်ကွံာ် ယဟိဝၤယွၤအဃိ အဝဲကပာ်တ့ၢ်ကွံာ်သု.’”+ ၂၁ ဘၣ်ဆၣ် အဝဲသ့ၣ် ကူၣ်အၢအီၤ+ ဒီးဒ်စီၤပၤမၤလိာ်ဝဲအသိး အဝဲသ့ၣ် ကွံာ်သံ စီၤစကၤရယၤလၢလၢၢ် ဖဲယဟိဝၤယွၤအဟံၣ် အတၢ်ပျီန့ၣ်လီၤ.+ ၂၂ အဃိ စီၤပၤယိၤအၣ် သးပ့ၤနီၣ်ကွံာ် တၢ်အဲၣ်လၢ အတီလၢ စီၤစကၤရယၤ အပၢ် စီၤယဟိၤယဒါ ပာ်ဖျါထီၣ်ဝဲလၢ အဖီခိၣ် ဒီးမၤသံ အဖိခွါ စီၤစကၤရယၤလီၤ. ဖဲစီၤစကၤရယၤ ဘူးထီၣ်ကသံအခါ အတဲဝဲလၢ “မ်ယဟိဝၤယွၤ ကွၢ်ကျဲၤ ဒီးဟံးန့ၢ်နၤအရ့* တက့ၢ်.”+
၂၃ ဖဲနံၣ်စးထီၣ်သီသီအခါ စူၤရံအသုးမုၢ် ဟဲထီၣ်ထီဒါ စီၤယိၤအၣ် ဒီးအဝဲသ့ၣ်နုာ်လီၤလၢ ယူဒၤဘီမုၢ် ဒီးဝ့ၢ်ယရူၤၡလ့ၣ်အပူၤလီၤ.+ ဝံၤဒီးအဝဲသ့ၣ် မၤသံကွံာ်ပှၤဂီၢ်မုၢ် အပဒိၣ်ဖးဒိၣ်ခဲလၢာ်+ ဒီးအဝဲသ့ၣ် မၤန့ၢ်ဝဲ ယူဒၤဒီးဝ့ၢ်ယရူၤၡလ့ၣ် အတၢ်ဖိတၢ်လံၤတဖၣ် ဒီးဆှၢဝဲဆူ ဝ့ၢ်ဒၤမ့ၤစ့း အစီၤပၤအအိၣ်လီၤ. ၂၄ ပှၤစူၤရံဖိ အသုးတဖၣ် အိၣ်ထဲစှၤဂၤ သနာ်က့ ယဟိဝၤယွၤ ဟ့ၣ်လီၤယူဒၤ အသုးမုၢ်ဖးဒိၣ်တဒူၣ်လၢ အဝဲသ့ၣ်အစုပူၤ+ မ့ၢ်လၢ ယူဒၤအပှၤဂီၢ်မုၢ် ပာ်တ့ၢ် အမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤအဃိလီၤ. ဒီးပှၤစူၤရံဖိ စံၣ်ညီၣ် စီၤယိၤအၣ်လီၤ. ၂၅ ဒီးဖဲပှၤစူၤရံဖိ ဟးထီၣ်ကွံာ်လၢ စီၤယိၤအၣ် အအိၣ်အခါ စီၤယိၤအၣ် ဘၣ်ဒိဘၣ်ထံးနးမးလီၤ. ဒီးမ့ၢ်လၢ စီၤယိၤအၣ် မၤသံပှၤလုၢ်တၢ်ဒိၣ် စီၤယဟိၤယဒါ+ အဖိခွါတဖၣ်* အဃိ အနီၢ်ကစၢ် အခ့အပှၤတဖၣ် ကူၣ်အၢအီၤ ဒီးမၤသံအီၤလၢ အလီၢ်မံခိၣ်လီၤ.+ အဃိ စီၤယိၤအၣ် သံဝဲဒီး ပှၤခူၣ်လီၤအီၤလၢ စီၤဒၤဝံး အဝ့ၢ်ပူၤ+ ဘၣ်ဆၣ် တမ့ၢ်လၢ စီၤပၤတဖၣ် အတၢ်သွၣ်ခိၣ်အပူၤဘၣ်.+
၂၆ ပှၤလၢအကူၣ်အၢ+ စီၤယိၤအၣ်န့ၣ် မ့ၢ်ဝဲ ပှၤဧၣ်မိၣ်မုၣ် နီၢ်ၡိမ့ၢ် အဖိခွါ စီၤစၤဘး ဒီးပှၤမိၤအးမုၣ် နီၢ်ၡံမဧး အဖိခွါ စီၤယဟိစဘးလီၤ. ၂၇ ဘၣ်ဃးဒီး အဖိခွါတဖၣ်အဂ့ၢ်, တၢ်စံၣ်ညီၣ် ထီဒါအီၤအဂ့ၢ်တဖၣ်+ ဒီးတၢ်ဘှီဂ့ၤထီၣ်က့ၤ ယွၤလၢအမ့ၢ်အတီတဂၤ အဟံၣ်အဂ့ၢ်န့ၣ်+ ဘၣ်တၢ်ကွဲးလီၤအီၤ ခဲလၢာ်လၢ စီၤပၤတဖၣ် အလံာ်ပူၤလီၤ. ဒီးအဖိခွါ စီၤအမၤစယါ ကဲထီၣ်က့ၤ စီၤပၤလၢအလီၢ်လီၤ.