ယံးရမံယၤ
၁၇ “ယူဒၤအပှၤဂီၢ်မုၢ်ဧၢ, သု တၢ်ဒဲးဘးန့ၣ် ဘၣ်တၢ်ကွဲးအီၤလၢ ထိၣ်ဒံးဘိထး တဘိလီၤ.
ဒီးဘၣ်တၢ်စိးပျၤအီၤလၢ တၢ်မျၢ်အခိၣ်စူတဘိလၢ သုသးဘ့ၣ်ဘၣ်အလိၤ
ဒီးလၢသုတၢ်လုၢ်လီၢ်တဖၣ် အနၢၤအလိၤလီၤ.
၂ သုဖိခွါတဖၣ်ဒၣ်လဲာ် နီၣ်ဘၣ် သုတၢ်လုၢ်လီၢ် ဒီးတၢ်စီဆှံအထူၣ်တဖၣ်*+
လၢအအိၣ်လၢ တၢ်လူၢ်လၢ အထီတဖၣ်အလိၤ, လၢသ့ၣ်လါဟ့လၢ အပှဲၤဒီးအလၣ်တဖၣ် အခီၣ်ထံး+
၃ ဒီးလၢကစၢၢ်တဖၣ်လၢ အအိၣ်ယံၤ ဒီးဝ့ၢ်တဖၣ်လီၤ.
ခီဖျိလၢ သုတၢ်ဒဲးဘးလၢ သုမၤအီၤလၢ သုဟီၣ်ကဝီၤခဲလၢာ် အပူၤအဃိ
သုတၢ်ထူးတၢ်တီၤ, တၢ်လၢအအိၣ်ဒီးသု ဒီးသုတၢ်လီၢ်ထီၣ်ထီတဖၣ်န့ၣ်+ ယကဟ့ၣ်လီၤလၢ သုဒုၣ်သုဒါတဖၣ် အစုပူၤလီၤ.+
၄ သုတၢ်န့ၢ်သါလၢ ယဟ့ၣ်လီၤသုန့ၣ် သုဘၣ်တူၢ်ၡူအီၤလၢ သုနီၢ်ကစၢ်အဃိလီၤ.+
ဒီးယကမၢ သုမၤန့ၢ်တၢ်လၢ သုဒုၣ်သုဒါတဖၣ်အဂီၢ် လၢကီၢ်လၢ သုတသ့ၣ်ညါဘၣ် တဘ့ၣ်အပူၤလီၤ.+
ယကမၤဒ်န့ၣ် မ့ၢ်လၢ သုမၤဒိၣ်ထီၣ်ယသး ဒ်မ့ၣ်အူအသိး+
ဒီးအကအီၣ်ကွံာ်တၢ် အစိၤစိၤ အဃၣ်ဃၣ်လီၤ.”
၅ ယဟိဝၤယွၤ တဲဝဲလၢ
“ပှၤလၢအနာ်န့ၢ် ပှၤဟီၣ်ခိၣ်ဖိ,+
သန့ၤအသးလၢ ပှၤဟီၣ်ခိၣ်ဖိ အတၢ်ဂံၢ်တၢ်ဘါ+
ဒီးဃၣ်ကွံာ်အသးလၢ ယဟိဝၤယွၤ အအိၣ်န့ၣ် ဘၣ်ဆိၣ်အၢလီၤ.
၆ အဝဲကလီၤဂာ် ဒ်သိးဒီး သ့ၣ်လၢ အအိၣ်တ့ၢ် ထဲတထူၣ်လၢ မဲးမုၢ်ခိၣ်လီၤ.
အဝဲတအိၣ်ဒီး တၢ်မုၢ်လၢ်လၢ အကထံၣ်ဘၣ် တၢ်ဂ့ၤဘၣ်.
ဘၣ်ဆၣ် အဝဲကအိၣ်လၢ ပှၢ်မုၢ်ကနၢလၢအဃ့ထီ
လၢတၢ်လီၢ်လၢ အအိၣ်ဒီးအံသၣ် ဖဲပှၤအိၣ်လၢအပူၤ တကဲ နီတဂၤဘၣ်လီၤ.
၇ မ့မ့ၢ်ပှၤလၢ အနာ်န့ၢ် ယဟိဝၤယွၤ
ဒီးသန့ၤအသးလၢ ယဟိဝၤယွၤန့ၣ် ဘၣ်ဆိၣ်ဂ့ၤဝဲလီၤ.+
၈ အဝဲ ကလီၤဂာ် ဒ်သိးဒီး သ့ၣ်တထူၣ်လၢ အသူၣ်လီၤအသးလၢ ထံကျိဖိအကပၤ
ဒီးစဲၤလီၤအဂံၢ်တဖၣ် လၢထံကျိဖိ အပူၤလီၤ.
ဖဲတၢ်ကိၢ်ထီၣ် အဆၢကတီၢ် အဝဲတဘၣ် တၢ်နီတမံၤဘၣ်.
ဒီးအလၣ်တဖၣ် ကအိၣ်လါဟ့ဝဲ ထီဘိလီၤ.+
ဖဲတၢ်ယီၤဃ့အနံၣ်န့ၣ် အဝဲ တဘၣ်ယိၣ်တၢ်ဘၣ်
ဒီးကဆဲးသၣ်ထီၣ်ဝဲ ထီဘိလီၤ.
၉ ပှၤဟီၣ်ခိၣ်ဖိအသးန့ၣ် ကွဲန့ၢ်လွဲန့ၢ်တၢ် အါန့ၢ်ဒံး တၢ်အဂၤခဲလၢာ် ဒီးလီၤဘၣ်ယိၣ် ဒိၣ်မးလီၤ.+
မတဂၤ သ့ၣ်ညါအီၤ ကသ့လဲၣ်.
၁၀ ယၤ, ယဟိဝၤယွၤအံၤ ယဃုသ့ၣ်ညါ ပှၤသူၣ်ပှၤသး+
ဒီးယသမံသမိး အဝဲသ့ၣ် အတၢ်ဆိကမိၣ်လၢအယိာ်*
ဒ်သိး ယကဟ့ၣ် ပှၤတဂၤစုာ်စုာ် ဒ်အသကဲာ်ပဝး အိၣ်ဝဲအသိး
ဒီးဒ်တၢ်လၢ အဝဲမၤဝဲ အသိးလီၤ.+
၁၁ ပှၤတဂၤလၢ အမၤန့ၢ် တၢ်ထူး တၢ်တီၤတဖၣ်လၢ တၢ်တတီတလိၤအပူၤန့ၣ်+ လီၤဂာ်ဒ်သိးဒီး ထိၣ်ဘှၢၣ်တဘ့ၣ်လၢ အဟုဒံၣ်တဖၣ်လၢ အဝဲတဒံၣ်လီၤဝဲဘၣ်လီၤ.
ဒီးဖဲအသးတပှၢ် ဒိၣ်ဒိၣ်ဒံးဘၣ်ဒီး အဂံၢ်ဘါဆူၣ်ဒံးအခါ
အတၢ်ထူးတၢ်တီၤတဖၣ်န့ၣ် ကလီၤမၢ်ကွံာ်ဝဲ
ဒီးလၢခံကတၢၢ်န့ၣ် ကဖျါထီၣ်ဝဲလၢ အဝဲမ့ၢ် ပှၤဟးဂီၤဖိတဂၤလီၤ.”
၁၂ လီၢ်ပစိာ်လၢ အလီၤကဟုကညီၢ် လၢအဘၣ်တၢ်ပာ်ထီၣ်ထီအီၤ လၢအခီၣ်ထံးလံၤလံၤန့ၣ်
မ့ၢ်ဝဲ ပတၢ်ဘူၣ်ထီၣ်ဘါထီၣ် အလီၢ်လီၤ.+
၁၃ ယဟိဝၤယွၤဧၢ, နမ့ၢ်အံၣ်စရ့လး အတၢ်မုၢ်လၢ်လီၤ.
ပှၤလၢ အပာ်တ့ၢ်ကွံာ်နၤန့ၣ် ကဒိးန့ၢ်ဘၣ် တၢ်မဲာ်ဆှး ကိးဂၤဒဲးလီၤ.
ပှၤလၢ အလဲၤသဒၣ်* နၤ, ယဟိဝၤယွၤ လၢအမ့ၢ် ထံမူအဂံၢ်ခီၣ်ထံး+
ဒီးပာ်တ့ၢ်ကွံာ်နၤန့ၣ် အဝဲသ့ၣ်အမံၤ ကဘၣ်တၢ်ကွဲးနီၣ်အီၤလၢ ဟီၣ်ခိၣ်ကမူၣ်အကျါလီၤ.+
၁၄ အိ ယဟိဝၤယွၤဧၢ, ယစံးထီၣ်ပတြၢၤနၤလီၤ.
မၤဘျါက့ၤယၤတက့ၢ်. ဒီးယက ဘျါက့ၤလီၤ.
မၤပူၤဖျဲးယၤတက့ၢ်. ဒီးယက ပူၤဖျဲးလီၤ.+
၁၆ ဘၣ်ဆၣ် မ့မ့ၢ်ယၤန့ၣ် ယတဃ့ၢ်ပူၤဖျဲးယသးလၢ ယကပိာ်နခံ ဒ်ပှၤကွၢ်သိတဂၤ အသိးဘၣ်.
ဒီးယတလီကီ စ့ၢ်ကီးလၢ တၢ်ကီတၢ်ခဲဖးဒိၣ် အမုၢ်နံၤ ကဟဲဝဲဘၣ်.
တၢ်ခဲလၢာ်လၢ ယတဲတ့ၢ်အီၤလၢ ယထးခိၣ်န့ၣ် နသ့ၣ်ညါအီၤဂ့ၤဂ့ၤ
ဒီးယတၢ်ကတိၤခဲလၢာ် အိၣ်ဝဲလၢ နမဲာ်ညါလီၤ.
၁၇ တဘၣ်ပာ်တ့ၢ်ယၤ ဒီးဒုးအိၣ်ထီၣ် တၢ်ပျံၤတၢ်ဖုး လၢယဂီၢ်တဂ့ၤ.
ဖဲတၢ်ကီတၢ်ခဲ အဆၢကတီၢ်န့ၣ် နမ့ၢ်ယတၢ်အိၣ်သဒၢ အလီၢ်လီၤ.
၁၈ မ်ပှၤလၢ အမၤအၢမၤနးယၤတဖၣ် ဒိးန့ၢ်ဘၣ်တၢ်မဲာ်ဆှးတက့ၢ်.+
ဘၣ်ဆၣ် တဘၣ်ပျဲလၢ ယက ဒိးန့ၢ်ဘၣ် တၢ်မဲာ်ဆှးတဂ့ၤ.
မ်အဝဲသ့ၣ် ပျံၤတၢ်ဖုးတၢ်တက့ၢ်.
ဘၣ်ဆၣ် တဘၣ်ပျဲလၢ ယကပျံၤတၢ်ဖုးတၢ်တဂ့ၤ.
ဒုးလီၤဘၣ်အဝဲသ့ၣ်လၢ တၢ်ကီတၢ်ခဲအမုၢ်နံၤ,+
မၤသဘှံးအဝဲသ့ၣ် ဒီးမၤဟးဂီၤကွံာ် အဝဲသ့ၣ် လၢာ်လၢာ်ဆ့ဆ့တက့ၢ်.
၁၉ ယဟိဝၤယွၤ တဲယၤလၢ “လဲၤဆၢထၢၣ်ဖဲ ပှၤဂီၢ်မုၢ်အတြဲၤလၢ ယူဒၤအစီၤပၤတဖၣ် ဟဲနုာ်ဟးထီၣ်ဝဲန့ၣ် ဒီးလဲၤဆၢထၢၣ်လၢ ဝ့ၢ်ယရူၤၡလ့ၣ် အတြဲၤခဲလၢာ် အခီၣ်ထံးတက့ၢ်.+ ၂၀ နကဘၣ် တဲအဝဲသ့ၣ်လၢ ‘ယူဒၤအစီၤပၤတဖၣ်, ယူဒၤအပှၤဂီၢ်မုၢ်ခဲလၢာ် ဒီးပှၤလၢအအိၣ်လၢ ဝ့ၢ်ယရူၤၡလ့ၣ်အပူၤ ခဲလၢာ် လၢအဟဲနုာ်လီၤလၢ တြဲၤတဖၣ်အံၤသ့ၣ်ဧၢ, ဒိကနၣ် ယဟိဝၤယွၤ အတၢ်ကတိၤအံၤတက့ၢ်. ၂၁ ယဟိဝၤယွၤ တဲဝဲလၢ “ဖဲမုၢ်အိၣ်ဘှံးနံၤန့ၣ် ဒ်သိး သုသုတဟဲယိး တၢ်ဝံတၢ်ယိး ဒီးဒ်သိး သုသုတဟဲစိာ်နုာ်အီၤ ခီဖျိဝ့ၢ်ယရူၤၡလ့ၣ် အတြဲၤတဖၣ် နီတမံၤတဂ့ၤအဂီၢ် ပလီၢ်သုသးတက့ၢ်.+ ၂၂ ဖဲမုၢ်အိၣ်ဘှံးနံၤန့ၣ် တဘၣ်စိာ်ထီၣ် တၢ်ဝံတၢ်ယိးလၢ သုဟံၣ်ချၢနီတမံၤတဂ့ၤ. ဒီးတဘၣ်မၤတၢ်မၤ နီတမံၤတဂ့ၤ.+ သုကဘၣ် ပာ်စီဆှံမုၢ်အိၣ်ဘှံးနံၤ ဒ်ယမၤလိာ်ပာ်စၢၤ သုမိၢ်ပၢ်ဖံဖု လၢပျၢၤတဖၣ်အသိးလီၤ.+ ၂၃ မ့မ့ၢ် သုမိၢ်ပၢ်ဖံဖု လၢပျၢၤတဖၣ်န့ၣ် တဒိကနၣ် ယကလုၢ်ဘၣ် ဒီးတကနၣ်ဃုာ်တၢ်* စ့ၢ်ကီးဘၣ်. အဝဲသ့ၣ် အခိၣ်ကိၤ ဒီးတအဲၣ်ဒိး ဒိကနၣ်တၢ် ဒီးတူၢ်လိာ် တၢ်သိၣ်က့ၤသီက့ၤဘၣ်.”’+
၂၄ “‘ယဟိဝၤယွၤ တဲဝဲလၢ “ဘၣ်ဆၣ် သုမ့ၢ်ဒိကနၣ် ယကလုၢ် လီၤတံၢ်လီၤဆဲး ဒီးဖဲမုၢ်အိၣ်ဘှံးနံၤန့ၣ် သုမ့ၢ်တဟဲယိးနုာ် တၢ်ဝံတၢ်ယိး ခီဖျိဝ့ၢ်တဖျၢၣ်အံၤ အတြဲၤတဖၣ် နီတမံၤဘၣ်, သုမ့ၢ် ပာ်စီဆှံမုၢ်အိၣ်ဘှံးနံၤ ဒီးဖဲတၢ်တနံၤန့ၣ် သုမ့ၢ်တမၤတၢ်မၤ နီတမံၤဘၣ်န့ၣ်+ ၂၅ စီၤပၤ ဒီးပဒိၣ်ဖးဒိၣ်တဖၣ်လၢ အဆ့ၣ်နီၤလၢ စီၤဒၤဝံး အလီၢ်ပစိာ်အလိၤန့ၣ်+ ကဟဲနုာ်လီၤစ့ၢ်ကီး လၢဝ့ၢ်တဖျၢၣ်အံၤ အတြဲၤတဖၣ်လီၤ. စီၤပၤတဖၣ်, ပဒိၣ်ဖးဒိၣ်တဖၣ်, ယူဒၤအပှၤဂီၢ်မုၢ် ဒီးပှၤလၢ အအိၣ်လၢ ဝ့ၢ်ယရူၤၡလ့ၣ်အပူၤန့ၣ် ကဟဲနုာ်လီၤဒိးဝဲ လ့ၣ်ကဟၣ်ဒီးကသ့ၣ်တဖၣ်လီၤ.+ ဒီးပှၤကအိၣ်ဝဲလၢ ဝ့ၢ်တဖျၢၣ်အံၤအပူၤ ထီဘိလီၤ. ၂၆ ဒီးပှၤဂီၢ်မုၢ်လၢ အအိၣ်လၢ ယူဒၤ အဝ့ၢ်တဖၣ်, လၢတၢ်လီၢ်လၢ အအိၣ်လၢ ဝ့ၢ်ယရူၤၡလ့ၣ် အခိၣ်အဃၢၤတဖၣ်, လၢဘံၣ်ယၤမံၣ် အဟီၣ်ကဝီၤ,+ လၢတၢ်လီၢ်လၢအဖုၣ်,+ လၢတၢ်လီၢ်လၢ ကစၢၢ်ကလိကျါ ဒီးလၢနဲကဲၤန့ၣ်* ကဟဲစိာ်ဝဲ တၢ်လုၢ်ဒွဲၣ်အူတဖၣ်,+ တၢ်လုၢ်တၢ်ပာ်တဖၣ်,+ တၢ်လုၢ်ဘုတဖၣ်,+ လီၢ်ဘၣ်* ဒီးတၢ်လုၢ်စံးဘျုးစံးဖှိၣ်က့ၤတဖၣ်လၢ ယၤ, ယဟိဝၤယွၤ အဟံၣ်ပူၤလီၤ.+
၂၇ “‘“ဘၣ်ဆၣ် သုမ့ၢ်တဒိကနၣ် ယကလုၢ် ဒီးပာ်စီဆှံမုၢ်အိၣ်ဘှံးနံၤဘၣ် ဒီးဖဲမုၢ်အိၣ်ဘှံးနံၤန့ၣ် သုမ့ၢ်စိာ် တၢ်ဝံတၢ်ယိးတဖၣ် ဒီးဟဲယိးနုာ်အီၤ ခီဖျိဝ့ၢ်ယရူၤၡလ့ၣ် အတြဲၤတဖၣ်န့ၣ် ယကမၤကဲၤထီၣ် ဝ့ၢ်ယရူၤၡလ့ၣ် အတြဲၤတဖၣ် လၢမ့ၣ်အူလီၤ. ဒီးမ့ၣ်အူ ကအီၣ်ကွံာ် ဝ့ၢ်ယရူၤၡလ့ၣ် အတၢးလၢအကျၢၤတဖၣ် သပှၢ်တၢၢ်+ ဒီးအတလီၤပံာ်ကွံာ်ဘၣ်.”’”+