မၤတၢ်

၂၄ ပူၤကွံာ်ယဲၢ်သီ ဝံၤအလီၢ်ခံ ပှၤလုၢ်တၢ်ခိၣ်​ အဒိၣ်ကတၢၢ် စီၤအနၤနံ+ ဃုာ်ဒီးပှၤသူၣ်က့သးပှၢ်တနီၤ ဒီးစီၤတ့ၢ်တူးလူး လၢအမ့ၢ် ပီၢ်ရီန့ၣ်​ ဟဲလီၤဝဲဒ်သိး ကပာ်ဒ့ၣ်ပာ်ကမၣ်​ စီၤပီလူး လၢပဒိၣ်ဖးဒိၣ်​ စီၤဖ့လံး အမဲာ်ညါလီၤ.+ ၂ ဖဲပှၤကိးန့ၢ် စီၤတ့ၢ်တူးလူးအခါ အဝဲပာ်ဒ့ၣ်ပာ်ကမၣ်​ စီၤပီလူး ဒီးတဲဝဲဒ်အံၤလီၤ.

“တၢ်ဒိၣ်​ စီၤဖ့လံးဧၢ, လၢနဃိ ပအိၣ်ဘၣ်​ ပှဲၤဒီးတၢ်မုာ်တၢ်ခုၣ်​ ဒီးခီဖျိလၢ နကူၣ်တၢ်သ့မးအဃိ တၢ်ဆီတလဲ ဟဲအိၣ်ထီၣ်လၢ အကဲဘျုးလၢ ပှၤတကလုာ်အံၤ အဂီၢ်လီၤ. ၃ လၢတၢ်လီၢ်ကိးပူၤဒဲး ဒီးကိးဆၢကတီၢ်ဒဲးန့ၣ်​ ပအၢၣ်လီၤတူၢ်လိာ် တၢ်ဂ့ၢ်တဖၣ်အံၤ ဒီးပစံးဘျုးဘၣ်နၤ ဒိၣ်မးလီၤ. ၄ ဘၣ်ဆၣ်​ ယတအဲၣ်ဒိးဟံးန့ၢ် နတၢ်ဆၢကတီၢ် အါအါဘၣ်. အဃိ ယဃ့ကညးနၤလၢ ဒိကနၣ်တၢ်လၢ ပကတဲတဖၣ်​ လၢတၢ်သးအိၣ်​ အပူၤတက့ၢ်. ၅ ပထံၣ်ဘၣ်လၢ ပှၤတဂၤအံၤ မ့ၢ်ပှၤလၢ အဟးမၤတံာ်တာ်ပှၤဂၤ+ ဒီးအဟ့ၣ်သဆၣ်ထီၣ်+ ပှၤယူဒၤဖိခဲလၢာ်လၢ ဟီၣ်ခိၣ်ဒီဘ့ၣ်​ ဒ်သိး ကထီဒါ ပဒိၣ်အဂီၢ်လီၤ. ဒီးအဝဲမ့ၢ်ဝဲ ပှၤနစၤရ့းဖိ အကရၢခိၣ်တဂၤလီၤ.+ ၆ တကးဒံးဘၣ်​ အဝဲဂုာ်ကျဲးစၢး မၤဘၣ်အၢ တၢ်လုၢ်ဟံၣ်အဃိ ပဖီၣ်အီၤလီၤ.+ ၇ *— ၈ ဒီးတၢ်လၢ ပပာ်ဒ့ၣ်ပာ်ကမၣ်အီၤတဖၣ်​ ဘၣ်ဧါ တဘၣ်ဧါန့ၣ်​ နမ့ၢ် သံကွၢ်သံဒိးအီၤလၢ နနီၢ်ကစၢ်န့ၣ်​ နကသ့ၣ်ညါဘၣ်လီၤ.”

၉ ပှၤယူဒၤဖိတဖၣ်စ့ၢ်ကီး ထီဒါစီၤပီလူးဒီး တဲဝဲလၢ တၢ်ဂ့ၢ်တဖၣ်အံၤန့ၣ်​ မ့ၢ်ဝဲတီဝဲလီၤ. ၁၀ ဖဲပဒိၣ်ဖးဒိၣ်​ ဖျးလီၤအခိၣ်လၢ စီၤပီလူးအအိၣ်​ ဒ်သိး စီၤပီလူး ကတဲတၢ်အဂီၢ်အခါ စီၤပီလူးတဲဝဲလၢ

“နကဲစံၣ်ညီၣ်ကွီၢ်လၢ ပှၤတကလုာ်အံၤအဖီခိၣ်​ အိၣ်ဝဲအါနံၣ်လံန့ၣ်​ ယသ့ၣ်ညါဂ့ၤဂ့ၤလီၤ. အဃိ လၢတၢ်သးခုအပူၤ ယကတဲဆၢက့ၤတၢ်လၢ ယနီၢ်ကစၢ်အဂီၢ်လီၤ.+ ၁၁ စးထီၣ်လၢ ယလဲၤထီၣ်ဘါယွၤလၢ ဝ့ၢ်ယရူၤၡလ့ၣ်+ တုၤခဲအံၤန့ၣ်​ ကအိၣ်ဝဲထဲ ၁၂ သီဒံးလီၤ. တၢ်ဂ့ၢ်တခါအံၤန့ၣ်​ နဃုသ့ၣ်ညါအီၤလၢ နနီၢ်ကစၢ်သ့လီၤ. ၁၂ ဒီးအဝဲသ့ၣ်​ တထံၣ်ဝဲလၢ ယတဲအါလိာ်သးဒီး ပှၤလၢ တၢ်လုၢ်ဟံၣ်ပူၤမ့ၢ်ဂ့ၤ, ဒုးအိၣ်ထီၣ်​ တၢ်တၢထီၣ်တၢလီၤ လၢဘူၣ်ဘျီၣ်ပူၤမ့ၢ်ဂ့ၤ, ဒီးလၢဝ့ၢ်ပူၤမ့ၢ်ဂ့ၤန့ၣ်​ နီတဘျီဘၣ်. ၁၃ ဒီးတၢ်လၢအဝဲသ့ၣ်​ ပာ်ဒ့ၣ်ပာ်ကမၣ်ယၤ ခဲအံၤတဖၣ်န့ၣ်​ အဝဲသ့ၣ်​ ပာ်ဖျါထီၣ်န့ၢ်နၤ တၢ်အုၣ်အသး တသ့ဘၣ်. ၁၄ ဘၣ်ဆၣ်​ ယကအၢၣ်လီၤနၤ တၢ်တမံၤလီၤ. ယဘူၣ်ထီၣ်ဘါထီၣ်​ ပမိၢ်ပၢ်ဖံဖု လၢပျၢၤတဖၣ်အယွၤ+ ဒ်တၢ်ဘူၣ်တၢ်ဘါ အကရၢလၢ အဝဲသ့ၣ်​ တဲလၢအကမၣ်အံၤ အတၢ်ရဲၣ်တၢ်ကျဲၤ အိၣ်ဝဲအသိးလီၤ. ဒီးယနာ်တၢ်ခဲလၢာ်လၢ အအိၣ်လၢ စီၤမိၤၡ့ အတၢ်သိၣ်တၢ်သီ ဒီးဝံအတၢ်ကွဲးအသးတဖၣ်​ အပူၤလီၤ.+ ၁၅ ဒ်ပှၤသ့ၣ်တဖၣ်အံၤ မုၢ်လၢ်ဝဲအသိး ယၤစ့ၢ်ကီး ယမုၢ်လၢ်တၢ်လၢ ယွၤအအိၣ်လၢ ပှၤတီပှၤလိၤဒီး ပှၤတတီတလိၤ+ လၢအသံသ့ၣ်တဖၣ်​ ကဂဲၤဆၢထၢၣ်​ သမူထီၣ်က့ၤဝဲလီၤ.+ ၁၆ လၢတၢ်ဂ့ၢ်အံၤအဃိ လၢကစၢ်ယွၤ အမဲာ်ညါမ့ၢ်ဂ့ၤ, ပှၤဟီၣ်ခိၣ်ဖိ အမဲာ်ညါမ့ၢ်ဂ့ၤ,+ ယဂုာ်ကျဲးစၢးပၢၤဃာ် ယသးလၢ အသ့ၣ်ညါဒၣ်တၢ်လၢ အကဆှီထီဘိလီၤ. ၁၇ တၢ်ဆၢကတီၢ် လဲၤပူၤကွံာ် အါနံၣ်ဝံၤအလီၢ်ခံ ယဟဲက့ၤတုၤလၢ ဝ့ၢ်ယရူၤၡလ့ၣ်​ ဒ်သိးယကဟ့ၣ်လီၤ တၢ်မၤဘူၣ်လၢ+ ယပှၤကလုာ်အအိၣ်​ ဒီးလၢ ယကလုၢ်ထီၣ်တၢ်အဂီၢ်လီၤ. ၁၈ ဖဲယမၤ တၢ်သ့ၣ်တဖၣ်အံၤအခါ အဝဲသ့ၣ်​ ထံၣ်ယၤလၢ တၢ်လုၢ်ဟံၣ်အပူၤဖဲ ယမၤကဆှီထီၣ်ယသး ဒ်လုၢ်လၢ် အိၣ်ဝဲအသိး ဝံၤအလီၢ်ခံလီၤ.+ ဖဲန့ၣ်​ ပှၤဂီၢ်မုၢ်တဖၣ်မ့ၢ်ဂ့ၤ, တၢ်တၢထီၣ်တၢလီၤမ့ၢ်ဂ့ၤ, တအိၣ်ဘၣ်. ဘၣ်ဆၣ်​ ပှၤယူဒၤဖိတနီၤလၢ အဟဲလၢ အၤစံအကီၢ်ရ့ၣ်န့ၣ်​ အိၣ်ဝဲဖဲန့ၣ်လီၤ. ၁၉ အဝဲသ့ၣ်​ မ့ၢ်အဲၣ်ဒိး ပာ်ဒ့ၣ်ပာ်ကမၣ်ယၤန့ၣ်​ အဝဲသ့ၣ်​ ကြၢးဟဲဖဲအံၤ လၢနမဲာ်ညါဒီး ပာ်ဖျါထီၣ်​ တၢ်ဂ့ၢ်လီၤ.+ ၂၀ မ့တမ့ၢ်ဘၣ်န့ၣ်​ ဖဲယဆၢထၢၣ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်အမဲာ်ညါ အခါ ပှၤလၢ အအိၣ်ဖဲအံၤတဖၣ်​ ထံၣ်ဝဲလၢ ယမၤကမၣ်တၢ် ဒ်လဲၣ်န့ၣ်​ မၢအဝဲသ့ၣ်​ တဲဖျါထီၣ်လၢ အနီၢ်ကစၢ်တက့ၢ်. ၂၁ တၢ်လၢယမၤန့ၣ်​ အိၣ်ဒၣ်ထဲ တမံၤလၢအမ့ၢ် ဖဲယအိၣ်ဆၢထၢၣ်လၢ အဝဲသ့ၣ်အကျါန့ၣ်​ ယကိးပသူထီၣ်လၢ ‘တနံၤအံၤ ယဘၣ်တၢ်စံၣ်ညီၣ်ဒ်အံၤ မ့ၢ်လၢ ယနာ်လၢပှၤသံ ကဂဲၤဆၢထၢၣ်​ သမူထီၣ်က့ၤ အဃိလီၤ.’”+

၂၂ စီၤဖ့လံး သ့ၣ်ညါဝဲ တၢ်မ့ၢ်တၢ်တီအကျဲအံၤ* အဂ့ၢ်ဂ့ၤဂ့ၤအဃိ+ အပာ်ပတုာ်ကွံာ်ဝဲ တၢ်သံကွၢ်သံဒိး ဒီးတဲဝဲလၢ “ဖဲသုးဖိ တကထိအခိၣ်​ စီၤလူၤစံ ဟဲအခါ ယကစံၣ်ညီၣ်န့ၢ်သု တၢ်ဂ့ၢ်တဖၣ်အံၤလီၤ.” ၂၃ ဒီးအဝဲမၤလိာ် သုးခိၣ်တဂၤလၢ ကဖီၣ်ဃာ် စီၤပီလူး ဘၣ်ဆၣ်​ ဟ့ၣ်အီၤတၢ်သဘျ့တနီၤ ဒီးဟ့ၣ်ဝဲအခွဲး ဒ်သိး အသကိးတဖၣ်​ ကဟဲမၤန့ၢ်အီၤတၢ်လၢ အလိၣ်ဘၣ်တဖၣ်လီၤ.

၂၄ စှၤနံၤစှၤသီ ဝံၤအလီၢ်ခံ စီၤဖ့လံး ဒီးအမါ နီၢ်ဒြူၤစံးလ့ၤ လၢအမ့ၢ် ပှၤယူဒၤမုၣ်န့ၣ်​ ဟဲတုၤဝဲလီၤ. စီၤဖ့လံး မၢပှၤဟဲကိးန့ၢ်အီၤ စီၤပီလူး ဒီးဒိကနၣ်ဝဲ အတၢ်ကတိၤ လၢအဘၣ်ဃးဒီး တၢ်နာ်ယ့ၣ်ၡူးခရံာ်လီၤ.+ ၂၅ ဘၣ်ဆၣ်​ ဖဲစီၤပီလူး တဲဝဲဘၣ်ဃးဒီး တၢ်တီတၢ်လိၤအဂ့ၢ်, တၢ်ကီၤသူၣ်ကီၤသးအဂ့ၢ် ဒီးတၢ်စံၣ်ညီၣ်လၢ ကဟဲအဂ့ၢ်အခါ+ စီၤဖ့လံး ပျံၤထီၣ်တၢ်အဃိ အတဲဝဲလၢ “ခဲအံၤ နက့ၤသ့လံ. ဘၣ်ဆၣ်​ ဖဲတၢ်ခွဲးတၢ်ယာ် အိၣ်ထီၣ်အခါ ယကကိးက့ၤနၤလၢ အသီတဘျီလီၤ.” ၂၆ တကတီၢ်ဃီန့ၣ်​ အဝဲမုၢ်လၢ်ဝဲလၢ စီၤပီလူး ကဟ့ၣ်အီၤစ့လီၤ. အဃိ အဝဲကိးအီၤ တလီၢ်လီၢ် ဒီးတဲသကိးတၢ်ဒီးအီၤလီၤ. ၂၇ ပူၤကွံာ်ခံနံၣ်​ ဝံၤအလီၢ်ခံ စီၤပီၤကံၤဖ့စတူး ထီၣ်က့ၤလၢ စီၤဖ့လံးအလီၢ်လီၤ. ဒီးမ့ၢ်လၢ စီၤဖ့လံး အဲၣ်ဒိးဝဲလၢ ပှၤယူဒၤဖိတဖၣ်​ ကဘၣ်သူၣ်ဘၣ်သးအီၤအဃိ+ အဝဲပာ်ဃာ် စီၤပီလူးလၢ ဃိာ်ပူၤဒံးလီၤ.