မၤတၢ်

၁ စီၤသီးဖံၤလူးဧၢ, လၢလံာ်အဆိကတၢၢ် တဘ့ၣ်အပူၤန့ၣ်​ ယကွဲးဖျါထီၣ်​ တၢ်ခဲလၢာ်လၢ ယ့ၣ်ၡူးမၤဝဲ ဒီးသိၣ်လိဝဲ စးထီၣ်လၢအခီၣ်ထံး+ ၂ တုၤလီၤလၢမုၢ်နံၤလၢ အဘၣ်တၢ်ဟံးထီၣ်အီၤလီၤ.+ အဘၣ်တၢ်ဟံးထီၣ်အီၤ ဖဲအဝဲ ဟံးစုနဲၣ်ကျဲ အတၢ်မၢဖိလၢ အဃုထၢထီၣ်ဝဲတဖၣ်​ ခီဖျိလၢ သးစီဆှံဝံၤအလီၢ်ခံလီၤ.+ ၃ ယ့ၣ်ၡူးတူၢ်တၢ်နးတၢ်ဖှီၣ်​ ဝံၤအလီၢ်ခံ အဝဲလီၣ်ဖျါထီၣ်အသးလၢ အတၢ်မၢဖိတဖၣ်​ အမဲာ်ညါအါဘျီ ဒ်သိးအကပာ်ဖျါထီၣ်ဝဲ လီၤတံၢ်လီၤဆဲးလၢ အဝဲမူဝဲလီၤ.+ လၢအသီ ၄၀ အတီၢ်ပူၤန့ၣ်​ အဝဲသ့ၣ်​ ထံၣ်ဘၣ်အီၤဒီး အဝဲတဲဘၣ်ဃးဒီး ကစၢ်ယွၤအဘီမုၢ်အဂ့ၢ်လီၤ.+ ၄ ဖဲယ့ၣ်ၡူးအိၣ်ဖှိၣ်ဒီး အဝဲသ့ၣ်အခါ ယ့ၣ်ၡူးမၤလိာ်အဝဲသ့ၣ်လၢ “တဘၣ်ဟးထီၣ်လၢ ဝ့ၢ်ယရူၤၡလ့ၣ်အပူၤတဂ့ၤ.+ ဆဲးအိၣ်ခိး တၢ်လၢပၢ်အၢၣ်လီၤတ့ၢ်ဝဲ+ လၢသုနၢ်ဟူ လၢယအိၣ်တက့ၢ်. ၅ စီၤယိၤဟၣ်န့ၣ်​ ဒိးဘျၢတၢ်လၢထံ ဘၣ်ဆၣ်​ လၢစှၤနံၤစှၤသီအတီၢ်ပူၤန့ၣ်​ သုဝဲသ့ၣ်အံၤ သုကဘၣ်​ တၢ်ဒိးဘျၢသုလၢ သးစီဆှံလီၤ.”+

၆ ဖဲအဝဲသ့ၣ်အိၣ်ဖှိၣ်ကဒီး အဆၢကတီၢ် အဝဲသ့ၣ်​ သံကွၢ်ယ့ၣ်ၡူးလၢ “ကစၢ်ဧၢ, နကသူၣ်ထီၣ်က့ၤ ဘီမုၢ်လၢ အံၣ်စရ့လးအပူၤ လၢဆၢကတီၢ်ခဲအံၤဧါ.”+ ၇ ယ့ၣ်ၡူးတဲဘၣ်​ အဝဲသ့ၣ်လၢ “ပှၤလၢအအိၣ်ဒီးတၢ်ခွဲးတၢ်ယာ်လၢ ကပာ်ပနီၣ်ဝဲ တၢ်ဆၢကတီၢ် ဒီးမုၢ်နံၤမုၢ်သီတဖၣ်န့ၣ်​ မ့ၢ်ဝဲထဲပၢ်တဂၤလီၤ. ဒီးတလိၣ်လၢ သုကသ့ၣ်ညါဘၣ်.+ ၈ ဘၣ်ဆၣ်​ ဖဲသးစီဆှံဟဲလီၤလၢ သုလိၤအခါ သုကဒိးန့ၢ်ဘၣ်​ တၢ်စိတၢ်ကမီၤ+ ဒီးသုကကဲထီၣ်​ ယပှၤအုၣ်အသးတဖၣ်လၢ+ ဝ့ၢ်ယရူၤၡလ့ၣ်အပူၤ,+ လၢယူဒၤ အဟီၣ်ကဝီၤဒီဘ့ၣ်, လၢၡၤမရံအပူၤ+ ဒီးပၢၢ်တုၤလၢ ဟီၣ်ခိၣ်ဒီဘ့ၣ်လီၤ.”+ ၉ ယ့ၣ်ၡူးတဲ တၢ်ဂ့ၢ်တဖၣ်န့ၣ်​ ဝံၤဒီး ဖဲအဝဲသ့ၣ်​ ကွၢ်အီၤအခါ အဘၣ်တၢ်ဟံးထီၣ်အီၤ ဒီးတၢ်အၢၣ်တလိၣ်​ မၤဘၢအီၤအဃိ အဝဲသ့ၣ်​ တထံၣ်အီၤလၢၤဘၣ်.+ ၁၀ ဖဲယ့ၣ်ၡူး က့ၤထီၣ်ဝဲအဆၢကတီၢ် အဝဲသ့ၣ်​ ကွၢ်ထီၣ်တၢ်လၢမူခိၣ်​ ဒီးသတူၢ်ကလာ်န့ၣ်​ ပှၤခံဂၤလၢ အသိးဆ့ကၤဝါန့ၣ်+ ဆၢထၢၣ်ဝဲလၢ အဝဲသ့ၣ်အကပၤ ၁၁ ဒီးတဲဝဲလၢ “ပှၤကၤလံၤလါဖိ သ့ၣ်ဧၢ, ဘၣ်မနုၤအဃိ သုအိၣ်ဆၢထၢၣ်ဒ်အံၤ ဒီးကွၢ်ထီၣ်တၢ်လၢ မူခိၣ်လဲၣ်. ယ့ၣ်ၡူးလၢ အဘၣ်တၢ်ဟံးထီၣ်အီၤ လၢသုအိၣ်​ ဆူမူခိၣ်တဂၤအံၤ ကဟဲက့ၤဒ်သုထံၣ်​ အဝဲက့ၤထီၣ်လၢ မူခိၣ်အသိးလီၤ.”

၁၂ ဖဲန့ၣ်အခါ အဝဲသ့ၣ်အိၣ်လၢ ကစၢၢ်သ့ၣ်စၤယံး အလိၤ ဝံၤဒီးအဝဲသ့ၣ်​ က့ၤဝဲလၢ ယရူၤၡလ့ၣ်လၢ+ အအိၣ်တယံၤဘၣ်​ ဒီးတၢ်ဒ့ၣ်စၢၤအိၣ်ဝဲထဲ မံးလာ်တဝာ်လီၤ.* ၁၃ ဖဲအဝဲသ့ၣ်​ က့ၤတုၤအခါ အဝဲသ့ၣ်​ လဲၤထီၣ်ဝဲလၢ ဒၢးတဖျၢၣ်လၢ ဟံၣ်ဖီခိၣ်တတီၤ ဖဲအဝဲသ့ၣ်​ အိၣ်တမှံၤဝဲလီၤ. ဖဲန့ၣ်အိၣ်ဝဲဒီး စီၤပ့းတရူး, စီၤယိၤဟၣ်, စီၤယၤကိာ်, စီၤအၣ်ဒရ့း, စီၤဖံလံးပူး, စီၤသိၤမါ, စီၤဘၢ်သလီးမဲ, စီၤမးသဲ, စီၤအၤလဖဲ အဖိခွါစီၤယၤကိာ်, စီၤၡံမိၣ်​ လၢအမ့ၢ် ပှၤလၢအသးဆူၣ်တဂၤ ဒီးစီၤယၤကိာ် အဖိခွါ စီၤယူဒၤလီၤ.+ ၁၄ ပှၤတဖၣ်န့ၣ်ခဲလၢာ် ဒီးပိာ်မုၣ်တနီၤ+ ဒီးယ့ၣ်ၡူးအမိၢ် နီၢ်မၤရံ ဒီးယ့ၣ်ၡူး အဒီပုၢ်ဝဲၢ်ခွါတဖၣ်+ ဆဲးဃ့ထုကဖၣ်တၢ် တလီၢ်လီၢ်လၢ တၢ်သးတဖျၢၣ်ဃီအပူၤလီၤ.

၁၅ ဖဲမုၢ်နံၤတဖၣ်န့ၣ်​ အတီၢ်ပူၤ စီၤပ့းတရူး ဆၢထၢၣ်လၢ ဒီပုၢ်ဝဲၢ်တဖၣ်​ အခၢၣ်သး (ပှၤခဲလၢာ် အနီၣ်ဂံၢ် ကအိၣ်ဝဲ ၁၂၀) ဒီးတဲဝဲလၢ ၁၆ “ဒီပုၢ်ဝဲၢ်သ့ၣ်ဧၢ, တၢ်ကွဲးအသးလၢ စီၤဒၤဝံး တဲဆိပာ်စၢၤဝဲ ခီဖျိ သးစီဆှံန့ၣ်​ ဘၣ်လၢထီၣ်ပှဲၤထီၣ်ဝဲလီၤ.+ အဝဲတဲတၢ် ဘၣ်ဃးဒီး စီၤယူဒၤလၢ အလဲၤဆှၢပှၤလၢ အလဲၤဖီၣ်ယ့ၣ်ၡူးလီၤ.+ ၁၇ အဝဲဘၣ်​ တၢ်ဂံၢ်ဃုာ်အီၤလၢပကျါ+ ဒီးအဝဲပၣ်ဃုာ်လၢ တၢ်စံၣ်တဲၤတဲလီၤ တၢ်မၤအံၤအပူၤ ဒ်သိးဒီးပှၤလီၤ. ၁၈ (ပှၤတဂၤအံၤ ပှ့ၤဝဲဟီၣ်ခိၣ်​ တကဝီၤလၢ တၢ်တတီတလိၤ အဘူးအလဲဒီး+ လီၤတဲာ်ဆှိခိၣ်, အဟၢဖၢသ့ၣ်ဖး ဒီးအပှံာ်လီၤလာ် ခဲလၢာ်လီၤ.+ ၁၉ ပှၤအိၣ်လၢ ဝ့ၢ်ယရူၤၡလ့ၣ်အပူၤခဲလၢာ် သ့ၣ်ညါထီၣ်ဝဲ တၢ်ဂ့ၢ်တခါအံၤအဃိ ဟီၣ်ခိၣ်တကဝီၤအံၤ ပှၤကိးအီၤလၢ အဝဲသ့ၣ်အကျိာ်လၢ အၤက့းလဒၤမါ, အခီပညီမ့ၢ်ဝဲ “တၢ်သွံၣ်အဟီၣ်ကဝီၤ” လီၤ.) ၂၀ လံာ်ထါစံးထီၣ်ပတြၢၤ ကွဲးဝဲလၢ ‘အတၢ်အိၣ်တၢ်ဆိးအလီၢ်န့ၣ်​ မ်အအိၣ်သယုၢ်တက့ၢ်. ဒီးမ်ပှၤသုတအိၣ်တဆိးလၢ အပူၤနီတဂၤတဂ့ၤ.’+ ဒီး ‘အမူဒါလၢ အမ့ၢ်ပှၤကွၢ်ထွဲတၢ်န့ၣ်​ မ်ပှၤအဂၤတဂၤ ဟံးန့ၢ်က့ၤအီၤတက့ၢ်.’+ ၂၁ အဃိ ပှၤလၢအကဘၣ်​ တၢ်ဃုထၢထီၣ်အီၤတဂၤန့ၣ်​ ကဘၣ်မ့ၢ်ပှၤလၢ အလဲၤဃုာ်တၢ်ဒီးပှၤ ဒီတကတီၢ် ဖဲကစၢ်ယ့ၣ်ၡူးမၤဝဲ အတၢ်မၤ* လၢပကျါ ၂၂ စးထီၣ်လၢ စီၤယိၤဟၣ်​ ဒိးဘျၢအီၤထံ+ တုၤလီၤလၢ မုၢ်နံၤလၢ တၢ်ဟံးထီၣ်အီၤလၢ ပအိၣ်လီၤ.+ ပှၤတဂၤအံၤ ကဘၣ်အုၣ်အသး ဃုာ်ဒီးပှၤ လၢယ့ၣ်ၡူး ဂဲၤဆၢထၢၣ်သမူထီၣ်က့ၤ အဂ့ၢ်လီၤ.”+

၂၃ အဃိ အဝဲသ့ၣ်​ တီၣ်ဖျါထီၣ်ဝဲ ပှၤခံဂၤလီၤ. တဂၤန့ၣ်မ့ၢ်ဝဲ စီၤယိၤသးလၢ ပှၤကိးအီၤလၢ စီၤဘၢ်စဘါ ဒီးပှၤကိးစ့ၢ်ကီးအီၤလၢ စီၤယူစတူးလီၤ. ဒီးအဝဲတဂၤန့ၣ်​ မ့ၢ်ဝဲ စီၤမးသံလီၤ. ၂၄ ဒီးအဝဲသ့ၣ်​ ဃ့ထုကဖၣ်တၢ်လၢ “ပကစၢ် ယဟိဝၤယွၤ* လၢအသ့ၣ်ညါပှၤခဲလၢာ် အသးဧၢ,+ လၢပှၤခံဂၤအံၤအကျါ ဒုးနဲၣ်ပှၤ ပှၤလၢနဃုထၢအီၤတဂၤ ၂၅ ဒ်သိး အကဟံးထီၣ်​ တၢ်စံၣ်တဲၤတဲလီၤ တၢ်မၤအံၤ ဒီးကဲထီၣ်တၢ်မၢဖိလၢ စီၤယူဒၤအလီၢ်တက့ၢ်. စီၤယူဒၤပာ်တ့ၢ်ဝဲ အမူဒါအံၤ ဒ်သိး အကလဲၤတၢ်လၢ အနီၢ်ကစၢ်အကျဲ အဂီၢ်လီၤ.”+ ၂၆ ဒီးအဝဲသ့ၣ်ဖးတၢ်+ ဒီးတၢ်ဖးန့ၣ်​ လီၤဘၣ်လၢ စီၤမးသံအအိၣ်အဃိ တၢ်ဂံၢ်ဃုာ်အီၤဒီး တၢ်မၢဖိ ၁၁ ဂၤလီၤ.