ယဃ့းစက့လး

၁ ဖဲယအိၣ်ယဆိးလၢ ပှၤလၢအဘၣ် တၢ်က့ၤဖီၣ်အီၤတဖၣ်အကျါအခါ+ လၢထံကျိကဘၢ် အကပၤန့ၣ်+ မူခိၣ်အိးထီၣ်အသး ဒီးယထံၣ်ဘၣ် တၢ်ထံၣ်လၢညါခီ လၢအဟဲလၢ ကစၢ်ယွၤအအိၣ်လီၤ. တၢ်မၤအသးအံၤ ဘၣ်ဖဲအနံၣ် ၃၀ နံၣ်တနံၣ်,* လါလွံၢ်လါတလါထီၣ် ယဲၢ်သီတသီလီၤ. ၂ ဒီးလါလွံၢ်လါတလါအံၤ, လါထီၣ်ယဲၢ်သီန့ၣ် ဘၣ်ဖဲ စီၤပၤယဟိၤယါခံၣ်+ ဘၣ်တၢ်က့ၤဖီၣ်အီၤ ပှဲၤထီၣ်ယဲၢ်နံၣ်တနံၣ်လီၤ. ၃ ဖဲန့ၣ်အခါ ယအိၣ်လၢ ပှၤက့ၤစ့းဖိအကီၢ်ပူၤ+ လၢထံကျိကဘၢ် အကပၤ ဒီးယဟိဝၤယွၤ ဟ့ၣ်လီၤယၤ, စီၤယဃ့းစက့လး* လၢတၢ်ကစီၣ်လီၤ. ဖဲန့ၣ်န့ၣ် ယဟိဝၤယွၤ အစိအကမီၤ ဟဲလီၤလၢယလိၤလီၤ.+ ယမ့ၢ် ပှၤလုၢ်တၢ်ဒိၣ် စီၤဘူၤစံၤ အဖိခွါလီၤ.

၄ ဖဲယကွၢ်တၢ်အခါ ယထံၣ်ဘၣ်လၢ ကလံၤမုၢ်လၢ အဆူၣ်န့ၣ်+ ဟဲလၢကလံၤစိးတခီလီၤ. ဒီးယထံၣ် တၢ်အၢၣ်ဖးဒိၣ် ဒီးမ့ၣ်အူကပီၤထီၣ်မျးမျး*+ ဒီးတၢ်ကပီၤလၢ အကပြုၢ်ကပြီၤ ဝးတရံး တၢ်အၢၣ်ဖးဒိၣ်လီၤ. ဒီးလၢမ့ၣ်အူအံၤ အကျါန့ၣ် ယထံၣ်ဘၣ် တၢ်ကတြ့ၣ်ကတြိၣ်တခါလၢ အလီၤဂာ် ဒ်သိးဒီး ထူဒီးစ့ ကျဲၣ်ကျီလိာ်သးလီၤ.+ ၅ ဒီးလၢမ့ၣ်အူအံၤ အကျါန့ၣ် ယထံၣ်ဘၣ် တၢ်လၢအလီၤဂာ်ဒီး မူခိၣ်ကလူးလွံၢ်ဂၤလီၤ.+ အဝဲသ့ၣ် တဂၤစုာ်စုာ်န့ၣ် ဖျါလီၤဂာ်ဒ် ပှၤကညီအသိးလီၤ. ၆ အဝဲသ့ၣ် တဂၤစုာ်စုာ်န့ၣ် အိၣ်ဒီးအမဲာ်သၣ်လွံၢ်ဘ့ၣ် ဒီးအဒံးဆ့ လွံၢ်ဘ့ၣ်လီၤ.+ ၇ အဝဲသ့ၣ် အခီၣ်လၣ်န့ၣ် အိၣ်ဝဲဘျၢဘျၢ ဒီးအခီၣ်ညါသးန့ၣ် လီၤဂာ်ဒ်ကျီၢ်ဖိ အခီၣ်မ့ၣ်အသိးလီၤ. ဒီးအကပီၤဝဲဒ် တိၢ်ဘီလၢ ပှၤထူးဘျ့အီၤ အသိးလီၤ.+ ၈ အဝဲသ့ၣ် အဒံးဆ့ တဘ့ၣ်စုာ်စုာ် အဖီလာ်န့ၣ် အိၣ်ဝဲဒီး ပှၤကညီအစုလီၤ. အဝဲသ့ၣ် လွံၢ်ဂၤန့ၣ် အိၣ်ဝဲဒီး အမဲာ်သၣ်တဖၣ် ဒီးအဒံးဆ့တဖၣ်လီၤ. ၉ အဝဲသ့ၣ် အဒံးဆ့တဖၣ်န့ၣ် ဘၣ်ထံးလိာ်အသးလီၤ. ဖဲအဝဲသ့ၣ် လဲၤတၢ်အခါ တလိၣ်တရံးအသးဘၣ် ဒီးဖဲအဝဲသ့ၣ် လဲၤတၢ်တကပၤဂ့ၤ တကပၤဂ့ၤအခါ လဲၤဝဲလိၤလိၤလီၤ.+

၁၀ အဝဲသ့ၣ် လွံၢ်ဂၤလၢာ် အမဲာ်သၣ်န့ၣ် လီၤဂာ်ဒ်အံၤလီၤ. အဝဲသ့ၣ် တဂၤစုာ်စုာ် အမဲာ်သၣ်န့ၣ် လၢအမဲာ်ညါတခီ မ့ၢ်ဝဲ ပှၤကညီ အမဲာ်သၣ်, လၢအထွဲတခီန့ၣ် ခ့ယုၢ်+ အမဲာ်သၣ်, လၢအစ့ၣ်တခီန့ၣ် ကျီၢ်ဖါ+ အမဲာ်သၣ် ဒီးလၢအလီၢ်ခံတခီန့ၣ် မ့ၢ်ဝဲ လံာ်ကြီကြာ်+ အမဲာ်သၣ်လီၤ.+ ၁၁ အဝဲသ့ၣ် အမဲာ်သၣ်န့ၣ် အိၣ်ဝဲဒ်န့ၣ်လီၤ. အဝဲသ့ၣ် အဒံးဆ့တဖၣ်န့ၣ် ယူာ်ထီၣ်အသးလၢ အဝဲသ့ၣ် အဖီခိၣ်လီၤ. အဝဲသ့ၣ် တဂၤစုာ်စုာ်န့ၣ် အဒံးဆ့ခံဘ့ၣ် ဘၣ်ထံးလိာ်အသး ဒီးအဒံးဆ့ အဂၤခံဘ့ၣ်န့ၣ် ကးဘၢဃာ် အမိၢ်ပှၢ်လီၤ.+

၁၂ ဒ်သးစီဆှံ ဟံးစုနဲၣ်ကျဲ အဝဲသ့ၣ်အသိး အဝဲသ့ၣ် တဂၤစုာ်စုာ် လဲၤတၢ်တကပၤဂ့ၤ တကပၤဂ့ၤလိၤလိၤ+ ဒီးအဝဲသ့ၣ် တလိၣ်တရံးအသးဘၣ်. ၁၃ ဒီးမူခိၣ်ကလူးလွံၢ်ဂၤအံၤန့ၣ် ဖျါလီၤဂာ်ဒ် မ့ၣ်အူအ့ၣ်လၢ အကဲၤဝဲလီၤ. ဒီးလၢအဝဲသ့ၣ် အဘၢၣ်စၢၤန့ၣ် တၢ်လၢအလီၤဂာ်ဒ်ဆှိ* တဖၣ်လၢအကဲၤဝဲန့ၣ် သုးထီၣ်သုးလီၤအသးလၢ လီၢ်ခံဒီးမဲာ်ညါလီၤ. ဒီးလီဝၢ်ဒံး ဟဲဆဲးကပြုၢ်ထီၣ်ဝဲလၢ မ့ၣ်အူကျါလီၤ.+ ၁၄ ဖဲမူခိၣ်ကလူးတဖၣ်အံၤ လဲၤတၢ်ဒီးဟဲက့ၤအခါ အဖျါလီၤဂာ်ဒ် လီဝၢ်ဒံး ကပီၤမျးမျးအသိးလီၤ.

၁၅ ဖဲယကွၢ် မူခိၣ်ကလူးလၢ အအိၣ်ဒီး အမဲာ်သၣ်လွံၢ်ဘ့ၣ်အခါ ယထံၣ်ဘၣ်လၢ လၢအဝဲသ့ၣ် တဂၤစုာ်စုာ်အကပၤန့ၣ် အိၣ်ဝဲဒီး လ့ၣ်ကဟၣ်အပၣ် တခါစုာ်စုာ် လၢအအိၣ်လၢ ဟီၣ်ခိၣ်လိၤလီၤ.+ ၁၆ လ့ၣ်ကဟၣ်အပၣ်တဖၣ်န့ၣ် ကပြုၢ်ကပြီၤ လီၤဂာ်ဒ် တၢ်မျၢ်ဘီလါအသိး ဒီးအပၣ်လွံၢ်ပၣ်လၢာ်န့ၣ် လီၤဂာ်လိာ်အသးလီၤ. ဒီးလီၤဂာ်လၢ လ့ၣ်ကဟၣ်အပၣ်တဖၣ်အံၤ ဘၣ်တၢ်တ့အီၤ ဒ်အံၤလီၤ. လၢလ့ၣ်ကဟၣ် အပၣ်တပၣ်စုာ်စုာ် အကွီၤပူၤန့ၣ် အိၣ်ဒီးလ့ၣ်ကဟၣ် အပၣ်အဂၤတပၣ်လီၤ. ၁၇ ဖဲလ့ၣ်ကဟၣ်အပၣ်တဖၣ် လဲၤတၢ်အခါ အတလိၣ်ဃၣ်အသးဘၣ်, ဘၣ်ဆၣ် လဲၤတၢ်န့ၢ် လွံၢ်ကပၤလၢာ်လီၤ. ၁၈ ဒီးအကွီၤတဖၣ်န့ၣ် အိၣ်ဝဲဖးထီ ဒီးလီၤကမၢကမၣ်ဒိၣ်မး ဒီးလၢအပၣ်လွံၢ်ခါ အကွီၤတဖၣ်အလိၤန့ၣ် အိၣ်ဒီးအမဲာ်ချံတဖၣ် ပှဲၤပှဲၤလီၤ.+ ၁၉ ဖဲမူခိၣ်ကလူးတဖၣ်အံၤ သုးအသး တဘျီဂ့ၤတဘျီဂ့ၤန့ၣ် လ့ၣ်ကဟၣ်အပၣ်တဖၣ် သုးပိာ်အဝဲသ့ၣ်အခံလီၤ. ဒီးဖဲအဝဲသ့ၣ် သုးကစီၤထီၣ်အသးလၢ တၢ်ဖးဖီလၢ ဟီၣ်ခိၣ်အဖီခိၣ်အခါ လ့ၣ်ကဟၣ်အပၣ်တဖၣ် သုးကစီၤထီၣ်အသး စ့ၢ်ကီးလီၤ.+ ၂၀ မူခိၣ်ကလူးတဖၣ်အံၤ လဲၤဝဲ ဖဲတၢ်လီၢ်လၢ သးစီဆှံ ဟံးစုနဲၣ်ကျဲ အဝဲသ့ၣ် ဒီးဖဲသးစီဆှံ လဲၤတၢ်လီၢ် တပူၤဂ့ၤတပူၤဂ့ၤန့ၣ်လီၤ. ဒီးလ့ၣ်ကဟၣ်အပၣ်တဖၣ်စ့ၢ်ကီး သုးကစီၤထီၣ်အသး ဃုာ်ဒီးအဝဲသ့ၣ်, မ့ၢ်လၢ သးစီဆှံလၢ အဟံးစုနဲၣ်ကျဲ မူခိၣ်ကလူးတဖၣ်န့ၣ် အိၣ်ဝဲလၢ လ့ၣ်ကဟၣ်အပၣ်တဖၣ်အပူၤ စ့ၢ်ကီးအဃိလီၤ. ၂၁ ဖဲမူခိၣ်ကလူးတဖၣ်အံၤ သုးအသးအခါ လ့ၣ်ကဟၣ်အပၣ်တဖၣ် သုးအသး ဒီးဖဲမူခိၣ်ကလူးတဖၣ် အိၣ်ပတုာ်အခါ လ့ၣ်ကဟၣ်အပၣ်တဖၣ် အိၣ်ပတုာ်ဝဲလီၤ. ဒီးဖဲမူခိၣ်ကလူးတဖၣ် သုးကစီၤထီၣ်အသးလၢ တၢ်ဖးဖီ လၢဟီၣ်ခိၣ်အဖီခိၣ်အခါ လ့ၣ်ကဟၣ်အပၣ်တဖၣ် သုးကစီၤထီၣ်အသး ဃုာ်ဒီးအဝဲသ့ၣ်, မ့ၢ်လၢ သးစီဆှံလၢ အဟံးစုနဲၣ်ကျဲ မူခိၣ်ကလူးတဖၣ်န့ၣ် အိၣ်ဝဲလၢ လ့ၣ်ကဟၣ်အပၣ်တဖၣ်အပူၤစ့ၢ်ကီး အဃိလီၤ.

၂၂ တၢ်လၢအလီၤဂာ်ဒီး လၢၢ်ဖျါကလၤ* လၢအကပီၤတဘ့ၣ်န့ၣ် အိၣ်လၢမူခိၣ်ကလူး လွံၢ်ဂၤအံၤ အခိၣ်ဒီ ဒီးအဖျါလီၤကမၢကမၣ် ဒိၣ်မးလီၤ.+ ၂၃ ဒီးတၢ်လၢ အလီၤဂာ်ဒီး လၢၢ်ဖျါကလၤတဘ့ၣ် အဖီလာ်န့ၣ် မူခိၣ်ကလူး အဒံးဆ့တဖၣ် ယူာ်ထီၣ်အသးဘျၢဘျၢ ဒီးဘၣ်ထံးလိာ်အသးလီၤ. အဝဲသ့ၣ် တဂၤစုာ်စုာ်န့ၣ် အိၣ်ဒီးအဒံးဆ့ခံဘ့ၣ် လၢကကးဘၢဝဲ အမိၢ်ပှၢ် လၢအံၤတကပၤအဂီၢ် ဒီးခံဘ့ၣ်လၢ ကကးဘၢ အမိၢ်ပှၢ်လၢန့ၣ် တကပၤအဂီၢ်လီၤ. ၂၄ ဒီးယနၢ်ဟူ အဝဲသ့ၣ် အဒံးဆ့တဖၣ်န့ၣ် သီၣ်လီၤဂာ်ဒ် ထံယွၤလီၤဆူၣ်ဆူၣ် သီၣ်ဝဲအသိး ဒီးအသီၣ်လီၤဂာ်စ့ၢ်ကီးလၢ သ့တၢ်လၢာ်ကစၢ် အကလုၢ်သီၣ်ဝဲ အသိးလီၤ.+ ဒီးဖဲအဝဲသ့ၣ် လဲၤတၢ်အခါ အသီၣ်လီၤဂာ်ဒ် သုးမုၢ်သံၣ်ဘိ သီၣ်ဝဲအသိးလီၤ. ဖဲအဝဲသ့ၣ် ဆၢထၢၣ်ဂၢၢ်တပၢၢ်အခါ အဝဲသ့ၣ်ပာ်လီၤက့ၤ အဒံးဆ့တဖၣ်လီၤ.

၂၅ တၢ်လၢ အလီၤဂာ်ဒီး လၢၢ်ဖျါကလၤတဘ့ၣ်န့ၣ် အိၣ်လၢ အဝဲသ့ၣ် အခိၣ်ဒီ ဒီးတၢ်ကလုၢ် သီၣ်ထီၣ်ဝဲလၢ လၢၢ်ဖျါကလၤအံၤ အဖီခိၣ်လီၤ. (ဖဲအဝဲသ့ၣ် ဆၢထၢၣ်ဂၢၢ်တပၢၢ်အခါ အဝဲသ့ၣ်ပာ်လီၤက့ၤ အဒံးဆ့တဖၣ်လီၤ.) ၂၆ တၢ်လၢ အလီၤဂာ်ဒီး လၢၢ်ဖျါကလၤတဘ့ၣ်န့ၣ် အိၣ်လၢ အဝဲသ့ၣ် အခိၣ်ဒီ ဒီးလၢလၢၢ်ဖျါကလၤအံၤ အဖီခိၣ်န့ၣ် အိၣ်ဝဲဒီး တၢ်လၢအလီၤဂာ်ဒီး တၢ်မျၢ်နံၤလါအဲး+ ဒီးအလီၤဂာ်ဒီး လီၢ်ပစိာ်လီၤ.+ ဒီးပှၤလၢအဆ့ၣ်နီၤ လၢလီၢ်ပစိာ်အံၤ အဖီခိၣ်န့ၣ် ဖျါလီၤဂာ်ဒ်သိးဒီး ပှၤကညီလီၤ.+ ၂၇ ဒီးယထံၣ်ဘၣ်လၢ စးထီၣ်ဖဲ အယီၢ်ဒ့ ဒီးဆူအဖီခိၣ်န့ၣ် တၢ်ကတြ့ၣ်ကတြိၣ်တခါလၢ အလီၤဂာ် ဒ်သိးဒီး ထူဒီးစ့ ကျဲၣ်ကျီလိာ်သးန့ၣ် ဟဲဆဲးကပြုၢ်ထီၣ်ဒ် မ့ၣ်အူအတၢ်ကပီၤအသိးလီၤ.+ ဒီးစးထီၣ်ဖဲအယီၢ်ဒ့ ဒီးဆူအဖီလာ်န့ၣ် ဖျါလီၤဂာ်ဒီး မ့ၣ်အူလီၤ.+ ဒီးတၢ်ကပီၤတခါ အိၣ်ဝးတရံးဝဲ ပှၤတဂၤန့ၣ်လီၤ. ၂၈ ဒီးတၢ်ကပီၤတခါ လၢအအိၣ်ဝးတရံးဝဲ ပှၤတဂၤန့ၣ် လီၤဂာ်ဒီး တၢၢ်ကွဲၤလၢ+ အအိၣ်ဖျါထီၣ်လၢ တၢ်အၢၣ်အကျါ ဖဲတၢ်စူၤဝဲ အနံၤန့ၣ်လီၤ. ဒီးတၢ်ကပီၤအံၤ လီၤဂာ်ဒီး ယဟိဝၤယွၤ အလၤကပီၤလီၤ.+ ဖဲယထံၣ်ဘၣ် တၢ်ကပီၤအဝဲန့ၣ်အခါ ယထိၣ်လီၤပှီၤယသး ဒီးယနၢ်ဟူ ပှၤတဂၤတဲတၢ်လီၤ.

၂ ဒီးကစၢ်ယွၤတဲယၤလၢ “ပှၤကညီဖိခွါဧၢ,* ဆၢထၢၣ် ဒီးယကတဲတၢ်ဒီးနၤလီၤ.”+ ၂ ဖဲကစၢ်ယွၤ တဲတၢ်ဒီးယၤအခါ အသးစီဆှံ ဟဲနုာ်လီၤလၢယပူၤ ဒီးဒုးဆၢထၢၣ်ယၤ+ ဒ်သိး ယကနၢ်ဟူ ကစၢ်ယွၤလၢအတဲတၢ်ဒီးယၤ အဂီၢ်လီၤ.

၃ အဝဲတဲယၤလၢ “ပှၤကညီဖိခွါဧၢ, ယကမၢလီၤနၤလၢ ပှၤအံၣ်စရ့လးဖိတဖၣ် အအိၣ်လီၤ.+ အဝဲသ့ၣ် မ့ၢ်ပှၤကလုာ်တဖၣ်* လၢအထီဒါတၢ် ဒီးအထီဒါက့ၤယၤလီၤ.+ အဝဲသ့ၣ် ဒီးအဝဲသ့ၣ် အမိၢ်ပၢ်ဖံဖု လၢပျၢၤတဖၣ်န့ၣ် မၤကမၣ်ယၤ တုၤလီၤလၢ တနံၤအံၤလီၤ.+ ၄ ယကမၢလီၤနၤလၢ ပှၤလၢအခိၣ်ကိၤ ဒီးပှၤလၢ အနၢ်က့ၣ် အအိၣ်လီၤ.+ ဖဲနစးထီၣ် တဲတၢ်အခါ နကဘၣ်တဲ အဝဲသ့ၣ်လၢ ‘တၢ်ပၢကစၢ် ယဟိဝၤယွၤ တဲဝဲဒ်အံၤလီၤ.’ ၅ အဝဲသ့ၣ်န့ၣ် မ့ၢ်ပှၤလၢ အထီဒါက့ၤတၢ်တဖၣ်+ အဃိ အဝဲသ့ၣ် ဒိကနၣ်တၢ်မ့ၢ်ဂ့ၤ, တဒိကနၣ်တၢ်ဘၣ်မ့ၢ်ဂ့ၤ အဝဲသ့ၣ် ကသ့ၣ်ညါဘၣ်ဝဲ သပှၢ်တၢၢ်လၢ ဝံတဂၤ အိၣ်ဝဲလၢအဝဲသ့ၣ် အကျါလီၤ.+

၆ “ပှၤကညီဖိခွါဧၢ, တၤဆှုၣ်တၤမဲတဖၣ် အိၣ်ဝးတရံးနၤ+ ဒီးနအိၣ်ဘၣ်လၢ ပတ့ၤချဲး အကျါသနာ်က့* တဘၣ်ပျံၤ အဝဲသ့ၣ်+ ဒီးတၢ်လၢ အဝဲသ့ၣ်တဲဝဲန့ၣ်တဂ့ၤ. အဝဲသ့ၣ် မ့ၢ်ပှၤလၢ အထီဒါက့ၤတၢ် ဘၣ်ဆၣ် တဘၣ်ပျံၤ အဝဲသ့ၣ်တဂ့ၤ+ ဒီးတဘၣ်ပျံၤ အဝဲသ့ၣ် အတၢ်ပာ်မဲာ်ပာ်နါတဂ့ၤ.+ ၇ အဝဲသ့ၣ် မ့ၢ်ပှၤလၢ အထီဒါက့ၤတၢ် အဃိ အဝဲသ့ၣ် ဒိကနၣ်မ့ၢ်ဂ့ၤ တဒိကနၣ်ဘၣ်မ့ၢ်ဂ့ၤ နကဘၣ်တဲဘၣ် အဝဲသ့ၣ်လၢ ယတၢ်ကတိၤတဖၣ်လီၤ.+

၈ “ပှၤကညီဖိခွါဧၢ, ဒိကနၣ် တၢ်လၢယကတဲနၤနီၤ. တဘၣ်ထီဒါက့ၤတၢ် ဒ်ပှၤလၢအထီဒါက့ၤတၢ်တဖၣ်အံၤ အသိးတဂ့ၤ. အိးထီၣ် နကိာ်ပူၤ ဒီးအီၣ်တၢ်လၢ ယကဟ့ၣ်နၤနီၤ.”+

၉ ဖဲယကွၢ်တၢ်အခါ ယထံၣ် ပှၤစုတခီ ယူာ်ဃီၤအသးလၢယအိၣ်+ ဒီးလံာ်ထူတထူလၢ အိၣ်ဒီးတၢ်ကွဲးအသးတဖၣ်န့ၣ်+ အိၣ်ဝဲလၢစုအံၤအပူၤလီၤ. ၁၀ အဝဲသလၣ်ထီၣ် လံာ်ထူလၢ ယမဲာ်ညါ ဒီးတၢ်ကွဲးအသး အိၣ်လၢအပူၤ ဒီးအချၢလီၤ.+ ဒီးလၢလံာ်ထူအံၤအပူၤန့ၣ် အိၣ်ဝဲဒီးထါဟီၣ် ဒီးတၢ်ကစီၣ်လၢ အလီၤသးအုးဒီး လီၤဟီၣ်လီၤ.+

၃ ဒီးအဝဲတဲယၤလၢ “ပှၤကညီဖိခွါဧၢ, အီၣ်တၢ်လၢ အအိၣ်လၢနမဲာ်ညါ. အီၣ်လံာ်ထူအံၤ ဒီးလဲၤတဲတၢ်ဒီး ပှၤအံၣ်စရ့လးဖိနီၤ.”+

၂ အဃိ ယအိးထီၣ် ယကိာ်ပူၤ ဒီးအဝဲဒုးအီၣ်ယၤ လံာ်ထူအံၤလီၤ. ၃ အဝဲတဲယၤလၢ “ပှၤကညီဖိခွါဧၢ, အီၣ်လံာ်ထူလၢ ယဟ့ၣ်နၤ ဒီးမၤပှဲၤနဟၢဖၢဒီး လံာ်ထူသၢၤ.” အဃိ ယအီၣ်အီၤ ဒီးဖဲအအိၣ်လၢ ယကိာ်ပူၤအခါ ဆၢဝဲဒ်သိးဒီး ကနဲစီလီၤ.+

၄ အဝဲတဲယၤလၢ “ပှၤကညီဖိခွါဧၢ, လဲၤတဲဘၣ် ပှၤအံၣ်စရ့လးဖိ လၢယတၢ်ကတိၤတဖၣ်နီၤ. ၅ ယတမၢလီၤနၤလၢ ပှၤတကလုာ်လၢ နတသ့အကျိာ် ဒီးနတနၢ်ပၢၢ်အကျိာ် အအိၣ်ဘၣ်. ယမၢလီၤနၤလၢ ပှၤအံၣ်စရ့လးဖိ အအိၣ်လီၤ. ၆ ယတမၢလီၤနၤလၢ ပှၤကလုာ်တဖၣ် လၢနတသ့အကျိာ် ဒီးနတနၢ်ပၢၢ်အကျိာ် ဒီးအတၢ်ကတိၤ အအိၣ်ဘၣ်. ယမ့ၢ်ဆှၢလီၤနၤ လၢအဝဲသ့ၣ် အအိၣ်န့ၣ် အဝဲသ့ၣ် ကဒိကနၣ်နၤဒံး.+ ၇ ဘၣ်ဆၣ် မ့မ့ၢ် ပှၤအံၣ်စရ့လးဖိတဖၣ်န့ၣ် တအဲၣ်ဒိး ဒိကနၣ်ယၤဘၣ်အဃိ အဝဲသ့ၣ် တဒိကနၣ်နၤဘၣ်.+ ပှၤအံၣ်စရ့လးဖိ ခဲလၢာ်န့ၣ် မ့ၢ်ပှၤလၢ အခိၣ်ကိၤ ဒီးအနၢ်က့ၣ်လီၤ.+ ၈ ယကမၤဆူၣ်ထီၣ်နသး ဒ်သိး နကပာ်နသး ကျၢၤမုဆှု ဒီးနခိၣ်ကကိၤ ထဲသိးဒီး အဝဲသ့ၣ် ပာ်အသးကျၢၤမုဆှု ဒီးအခိၣ်ကိၤအသိးလီၤ.*+ ၉ ယကမၤကိၤထီၣ်နခိၣ် တုၤအလီၤဂာ်ဒ် တၢ်မျၢ်အသိး ဒီးကကိၤဒိၣ်န့ၢ်ဒံး လၢၢ်လၢအကိၤလီၤ.*+ အဝဲသ့ၣ်မ့ၢ်ပှၤလၢ အထီဒါက့ၤတၢ် ဘၣ်ဆၣ် တဘၣ်ပျံၤ အဝဲသ့ၣ်တဂ့ၤ ဒီးတဘၣ်ပျံၤ အဝဲသ့ၣ် အတၢ်ပာ်မဲာ်ပာ်နါတဂ့ၤ.”+

၁၀ အဝဲတဲယၤလၢ “ပှၤကညီဖိခွါဧၢ, ဒိကနၣ် တၢ်လၢယကတဲနၤခဲလၢာ် ဒီးတိၢ်နီၣ်ဃာ်အီၤလၢ နသးပူၤနီၤ. ၁၁ လဲၤလၢနပှၤကလုာ် လၢအဘၣ်တၢ်က့ၤဖီၣ်အီၤတဖၣ်အအိၣ်+ ဒီးတဲတၢ်ဒီး အဝဲသ့ၣ်တက့ၢ်. အဝဲသ့ၣ် ဒိကနၣ်တၢ်မ့ၢ်ဂ့ၤ တဒိကနၣ်တၢ်ဘၣ်မ့ၢ်ဂ့ၤ တဲအဝဲသ့ၣ်လၢ ‘တၢ်ပၢကစၢ် ယဟိဝၤယွၤ တဲဝဲဒ်အံၤလီၤ.’”+

၁၂ သးစီဆှံန့ၣ်* စိာ်ထီၣ်ယၤ+ ဒီးယနၢ်ဟူ တၢ်ကလုၢ်သီၣ်သထြုးထီၣ်ဖးဒိၣ်လၢ ယလီၢ်ခံ လၢအတဲယၤလၢ “မ်ယဟိဝၤယွၤ အလၤကပီၤ ဘၣ်တၢ်စံးထီၣ်ပတြၢၤအီၤ လၢအတၢ်အိၣ်တၢ်ဆိး အလီၢ်တက့ၢ်.” ၁၃ ယနၢ်ဟူဘၣ် မူခိၣ်ကလူးတဖၣ်န့ၣ် အဒံးဆ့ ဘၣ်တရူာ်လိာ်အသးအသီၣ်+ ဒီးလ့ၣ်ကဟၣ်အပၣ်လၢ အအိၣ်လၢအဝဲသ့ၣ် အကပၤအသီၣ်+ ဒီးတၢ်သီၣ်သထြုးထီၣ် ဖးဒိၣ်လီၤ. ၁၄ သးစီဆှံ စိာ်ထီၣ်ယၤ ဒီးလဲၤစိာ်ယၤ ဒီးယသးတမုာ်ဘၣ် ဒီးယသူၣ်ဒိၣ်သးဖျိးတၢ်လီၤ. ဒီးယဟိဝၤယွၤ အစိအကမီၤ မၤတၢ်လၢယပူၤ ဆူၣ်မးလီၤ. ၁၅ အဃိ ယလဲၤလၢ ပှၤလၢအဘၣ်တၢ်က့ၤဖီၣ်အီၤတဖၣ် အအိၣ်လီၤ. အဝဲသ့ၣ် အိၣ်လၢ တ့ၤလၤဘံးတၢ်လီၢ် လၢအအိၣ်လၢ ထံကျိကဘၢ် အကပၤလီၤ.+ ဒီးယအိၣ်ယဆိး လၢအဝဲသ့ၣ် အိၣ်တၢ်အလီၢ်လီၤ. ဒီးလၢတၢ်သးလီၤကတုၤအပူၤ+ ယအိၣ်လၢ အဝဲသ့ၣ်အကျါနွံသီလီၤ.

၁၆ နွံသီဝံၤ အလီၢ်ခံန့ၣ် ယဟိဝၤယွၤ တဲယၤလၢ

၁၇ “ပှၤကညီဖိခွါဧၢ, ယဃုထၢထီၣ်နၤလၢ ပှၤခိးကွၢ်တၢ်ဖိ လၢပှၤအံၣ်စရ့လးဖိတဖၣ် အဂီၢ်လီၤ.+ ဖဲနနၢ်ဟူ ယတၢ်ကတိၤတဖၣ်အခါ နကဘၣ် ဟ့ၣ်ပလီၢ် အဝဲသ့ၣ် လၢယဂီၢ်လီၤ.+ ၁၈ ယမ့ၢ်တဲ ပှၤအၢပှၤသီတဂၤဂၤလၢ ‘နကသံသပှၢ်ကတၢၢ်’ ဒီးနမ့ၢ်တဟ့ၣ်ပလီၢ်အီၤဘၣ် ဒီးနမ့ၢ်တတဲပလီၢ် ပှၤအၢပှၤသီတဂၤအံၤ ဒ်သိး အကပာ်တ့ၢ်ကွံာ် ကျဲအၢကျဲသီ ဒီးဆဲးမူအဂီၢ်ဘၣ်န့ၣ်+ အဝဲကသံဝဲ မ့ၢ်လၢအမ့ၢ် ပှၤအၢပှၤသီ လၢအမၤတၢ်ဒဲးဘး အဃိလီၤ.+ ဘၣ်ဆၣ် ယကဃ့က့ၤအသွံၣ် လၢနအိၣ်လီၤ.*+ ၁၉ ဘၣ်ဆၣ် နမ့ၢ်ဟ့ၣ်ပလီၢ် ပှၤအၢပှၤသီတဂၤ ဒီးအဝဲ မ့ၢ်တပာ်တ့ၢ်ကွံာ် အကျဲအၢကျဲသီဘၣ်န့ၣ် အကဘၣ်သံဝဲလၢ အတၢ်ကမၣ်အဃိလီၤ. ဒီးမ့မ့ၢ်နၤန့ၣ် နသးသမူ ကပူၤဖျဲး သပှၢ်ကတၢၢ်လီၤ.+ ၂၀ ပှၤတီပှၤလိၤတဂၤ မ့ၢ်တမၤတၢ်တီတီလိၤလိၤလၢၤဘၣ် ဒီးမ့ၢ်မၤ တၢ်ကမၣ်န့ၣ် ယကမၤဘၣ်တိၢ်အခီၣ် ဒီးအဝဲကသံဝဲလီၤ.+ နမ့ၢ်တဟ့ၣ်ပလီၢ်အီၤဘၣ်န့ၣ် အကသံဝဲလၢ အတၢ်ဒဲးဘးအဃိ ဒီးအတၢ်မၤလၢ အတီအလိၤန့ၣ် တၢ်တသ့ၣ်နီၣ်ထီၣ်အီၤလၢၤဘၣ်. ဘၣ်ဆၣ် ယကဃ့က့ၤအသွံၣ် လၢနအိၣ်လီၤ.*+ ၂၁ ဘၣ်ဆၣ် နမ့ၢ်ဟ့ၣ်ပလီၢ် ပှၤတီပှၤလိၤ ဒ်သိးအသုတမၤ တၢ်ဒဲးဘးတဂ့ၤအဂီၢ် ဒီးအဝဲမ့ၢ်တမၤ တၢ်ဒဲးဘးဘၣ်န့ၣ် အဝဲ ကဆဲးအိၣ်မူဘၣ် လၢနဟ့ၣ်ပလီၢ်အီၤ အဃိလီၤ.+ ဒီးနၤစ့ၢ်ကီး နသးသမူ ကပူၤဖျဲးလီၤ.”

၂၂ ယဟိဝၤယွၤ အစိအကမီၤ လီၤဘၣ်ယၤဖဲန့ၣ် ဒီးအဝဲတဲယၤလၢ “လဲၤလၢ တၢ်ပၢၤခိၣ် ဒီးယကတဲတၢ်ဒီးနၤ ဖဲန့ၣ်လီၤ.” ၂၃ အဃိ ယဆၢထၢၣ် ဒီးယလဲၤလၢ တၢ်ပၢၤခိၣ်လီၤ. ဒီးဖဲန့ၣ် ယထံၣ်ဘၣ် ယဟိဝၤယွၤ အလၤကပီၤ+ ဒ်ယထံၣ်ဘၣ်တ့ၢ်အီၤဖဲ ထံကျိကဘၢ် အကပၤအသိးလီၤ.+ ဒီးယထိၣ်လီၤပှီၤယသးလီၤ. ၂၄ ဒီးသးစီဆှံ နုာ်လီၤလၢယပူၤ ဒီးဒုးဆၢထၢၣ်ယၤလီၤ.+ ဒီးကစၢ်ယွၤတဲယၤလၢ

“က့ၤအိၣ်လၢ နဟံၣ်ပူၤနီၤ. ၂၅ ပှၤကညီဖိခွါဧၢ, အဝဲသ့ၣ် ကစၢဃာ်နၤဒီးပျံၤ ဒ်သိးနလဲၤလၢ အဝဲသ့ၣ်အကျါ သုတန့ၢ်တဂ့ၤအဂီၢ်လီၤ. ၂၆ ဘၣ်ဆၣ် မ့ၢ်လၢအဝဲသ့ၣ် ကဲပှၤလၢအထီဒါက့ၤတၢ်အဃိ ယကမၤဃၢထီၣ်နပျ့ၤ ဒီးနကကဲထီၣ် ပှၤလၢအတဲတၢ် တသ့ဘၣ်အဃိ နသိၣ်ဃီၣ် အဝဲသ့ၣ် တန့ၢ်လၢၤဘၣ်. ၂၇ ဘၣ်ဆၣ် ဖဲယတဲတၢ်ဒီးနၤအခါ ယကအိးထီၣ် နကိာ်ပူၤ ဒ်သိးနတဲတၢ်ကသ့အဂီၢ် ဒီးနကဘၣ်တဲ အဝဲသ့ၣ်လၢ+ ‘တၢ်ပၢကစၢ် ယဟိဝၤယွၤ တဲဝဲဒ်အံၤလီၤ.’ မ့ၢ်လၢ အဝဲသ့ၣ်မ့ၢ် ပှၤလၢအထီဒါတၢ်အဃိ+ ပှၤလၢအကနၣ်တၢ်န့ၣ် ကကနၣ်ဒၣ်ဝဲ+ ဒီးပှၤလၢ အတကနၣ်ဘၣ်န့ၣ် ကအိၣ်ဒၣ်ဝဲ.

၄ “ပှၤကညီဖိခွါဧၢ, ဟံးန့ၢ်အူးခဲ တဘ့ၣ် ဒီးပာ်အီၤလၢနမဲာ်ညါ ဒီးစိးပျၤ ဝ့ၢ်ယရူၤၡလ့ၣ် အဂီၤလၢအလိၤတက့ၢ်. ၂ ဒီးနကဘၣ် မၤထီၣ်နသး ဒ်သိးဒီး နဒုးဝ့ၢ်တဖျၢၣ်အံၤ ဒီးသူၣ်ထီၣ်တၢ်ဒူၣ်+ လၢကကဝီၤဃာ်အီၤအဂီၢ်+ ဒီးပူၣ်ထီၣ်ဟီၣ်ခိၣ်+ ဒီးဆီလီၤဒဲကဝီၤ လၢအဃၢၤလီၤ. ဒီးနကဘၣ် ကဝီၤဃာ်ဝ့ၢ်ဒီး တၢ်စုကဝဲၤတဖၣ် ဒ်သိး နကမၤဟးဂီၤဝ့ၢ်အဂီၢ်လီၤ.+ ၃ နကဘၣ်ဟံးန့ၢ် သပၢၤထးဘ့ၣ်ဘၣ်တဘ့ၣ် ဒီးပာ်လီၤအီၤလၢ နၤဒီးဝ့ၢ်တဖျၢၣ်အံၤ အဘၢၣ်စၢၤ ဒ်ဝ့ၢ်ဒူၣ်ထး အသိးလီၤ. ဒီးနဘၣ်ကွၢ်ဝ့ၢ်အံၤ ဟ့ယုၢ်ကလာ် ဒီးနကဘၣ် ပာ်ဖျါထီၣ်လၢ ဝ့ၢ်အံၤ ကဘၣ်တၢ်ကဝီၤဃာ်အီၤ ဒ်လဲၣ်န့ၣ်လီၤ. အဝဲန့ၣ် ကကဲထီၣ် တၢ်ပနီၣ်လၢ အံၣ်စရ့လးအပှၤဂီၢ်မုၢ် အဂီၢ်လီၤ.+

၄ “နကဘၣ်မံနီၤလၢ နစုစ့ၣ်တခီ ဒီးနဘၣ်ပာ်လီၤ အံၣ်စရ့လးအပှၤဂီၢ်မုၢ် အတၢ်ကမၣ်လၢ နလိၤလီၤ.+ ဖဲမုၢ်နံၤမုၢ်သီတဖၣ်လၢ နမံနီၤလီၤလၢနကပၤ အတီၢ်ပူၤန့ၣ် အဝဲသ့ၣ် အတၢ်ကမၣ်န့ၣ် ကအိၣ်လၢနလိၤလီၤ. ၅ ယကမၢနမၤဒ်န့ၣ် အသီ ၃၉၀ ဒ်နံၣ်လၢ အဝဲသ့ၣ်မၤကမၣ်ယၤ+ အိၣ်ဝဲအသိး ဒီးအံၣ်စရ့လးအပှၤဂီၢ်မုၢ် အတၢ်ကမၣ်န့ၣ် ကအိၣ်လၢနလိၤလီၤ. ၆ ဖဲနမၤဒ်န့ၣ် အသီပှဲၤထီၣ်အခါ

“နကဘၣ်မံနီၤကဒီးလၢ စုထွဲတခီ ဒီးယူဒၤအပှၤဂီၢ်မုၢ် အတၢ်ကမၣ်န့ၣ်+ ကအိၣ်လၢနလိၤ အသီ ၄၀ လီၤ. ယပာ်ပနီၣ်န့ၢ်နၤ တနံၤလၢ တနံၣ်အဂီၢ်, တနံၤလၢ တနံၣ်အဂီၢ်လီၤ. ၇ နကဘၣ်ချံးထီၣ် နဆ့ကၤ အစုဒုၣ် ဒီးကွၢ်ဟ့ ဝ့ၢ်ယရူၤၡလ့ၣ် လၢအဘၣ် တၢ်ကဝီၤဃာ်အီၤ+ ဒီးတဲဝံအတၢ်စံးပာ်လၢ အထီဒါအီၤလီၤ.

၈ “ဒီးယကစၢဃာ်နၤဒီးပျံၤတဖၣ်အဃိ တချုးလၢ နကဝီၤဃာ်ဝ့ၢ် အမုၢ်နံၤတဖၣ် ပှဲၤထီၣ်ဒံးဘၣ်န့ၣ် နဃၣ်နသး လၢန့ၣ်တကပၤ လၢအံၤတကပၤ တန့ၢ်ဘၣ်.

၉ “ဒီးနကဘၣ် ဟံးန့ၢ်ဘု, ဘုမုယီၤ, ပထိး, သဘ့, သွံသၣ် ဒီးဘုကၠူၣ် ဒီးထၢနုာ်အီၤလၢ တၢ်ပူၤတၢ်လီၢ်တခါ အပူၤလီၤ. ဒီးနကဘၣ်တ့ထီၣ်ကိၣ်လၢ တၢ်သ့ၣ်တဖၣ်န့ၣ် ဒ်သိးနကအီၣ်အီၤ ဖဲနမံနီၤလၢနကပၤ လၢအသီ ၃၉၀ အတီၢ်ပူၤလီၤ.+ ၁၀ နကဘၣ်စီၤကိၣ် ဒီးတနံၤန့ၣ် နကဘၣ်အီၣ်အီၤ ၡက့လး ၂၀ လီၤ.* နကဘၣ်အီၣ်အီၤ ဒ်တၢ်ဆၢကတီၢ် လၢအဘၣ်တၢ်ပာ်ပနီၣ်အီၤ အသိးလီၤ.

၁၁ “ဒီးနကဘၣ်အီထံ တနံၤန့ၣ် ထဲခံခွးလီၤ.* နဘၣ်အီအီၤ ဒ်တၢ်ဆၢကတီၢ်လၢ အဘၣ်တၢ်ပာ်ပနီၣ်အီၤ အသိးလီၤ.

၁၂ “လၢနကကုၢ်ကိၣ်အဂီၢ် နကဘၣ်သူ ပှၤကညီအအ့ၣ်ဃ့ ဒ်သိး မ့ၣ်အူဆၣ်လီၤ. ဒီးနဘၣ် ကုၢ်ကိၣ်လၢ အဝဲသ့ၣ် အမဲာ်ညါ ဝံၤဒီး နကဘၣ် အီၣ်ကိၣ်အံၤ ဒ်နအီၣ် ကိၣ်ဘုမုယီၤ အသိးလီၤ.” ၁၃ ယဟိဝၤယွၤ တဲဝဲလၢ “ဒ်န့ၣ်အသိး ယကမၤလီၤပြံလီၤပြါ ပှၤအံၣ်စရ့လးဖိတဖၣ်လၢ ပှၤကလုာ်တဖၣ်အကျါ ဒီးဖဲန့ၣ်န့ၣ် အဝဲသ့ၣ် ကဘၣ်အီၣ်ဝဲ ကိၣ်လၢအတကဆှီဘၣ်လီၤ.”+

၁၄ ဒီးယတဲလၢ “မၤဒ်န့ၣ်တဂ့ၤသၢၤ, တၢ်ပၢကစၢ် ယဟိဝၤယွၤဧၢ. စးထီၣ်လၢ ယသးစၢ် တုၤလၢခဲအံၤန့ၣ် ယတမၤဘၣ်အၢလီၤယသးလၢ တၢ်အီၣ်အဃိ နီတဘျီဘၣ်. ယတအီၣ် ဆၣ်ဖိကီၢ်ဖိ လၢပှၤထံၣ်န့ၢ်အီၤလၢအသံ, ဆၣ်ဖိကီၢ်ဖိလၢ အဘၣ်တၢ်အ့ၣ်ဖှီအီၤ+ မ့တမ့ၢ် တၢ်ညၣ်လၢ အတကဆှီဘၣ်န့ၣ်ဘၣ်.”+

၁၅ အဃိ အဝဲတဲယၤလၢ “ဂ့ၤလံ, မ့မ့ၢ်ဒ်န့ၣ်န့ၣ် လၢပှၤကညီ အအ့ၣ်အလီၢ်န့ၣ် ယကဟ့ၣ်ဒုးသူက့ၤနၤလၢ ကျီၢ်အ့ၣ် ဒီးနကဘၣ် ကုၢ်နကိၣ်လၢ အဖီခိၣ်လီၤ.” ၁၆ ဒီးအဝဲတဲယၤလၢ “ပှၤကညီဖိခွါဧၢ, ယကမၤဟးဂီၤ တၢ်အီၣ်လၢ ဝ့ၢ်ယရူၤၡလ့ၣ်အပူၤလီၤ.+ ဒီးအဝဲသ့ၣ် ကဘၣ်ယိၣ်ဝဲလၢ အတၢ်အီၣ်ကလၢာ်ကွံာ်အဃိ+ အဝဲသ့ၣ် ကဘၣ်အီၣ်တၢ်အီတၢ်လၢ စက့လီၤ.+ ၁၇ အဝဲသ့ၣ် အတၢ်အီၣ်တၢ်အီ ကလၢာ်ကွံာ်အဃိ အဝဲသ့ၣ် ကဖုးဘၣ်အသး ဒီးကကွၢ်လိာ်အသး တဂၤဒီးတဂၤလီၤ. ဒီးအဝဲသ့ၣ်ကဃဲၤလီၤဃိလီၤလၢ အတၢ်ကမၣ် အဃိလီၤ.

၅ “ပှၤကညီဖိခွါဧၢ, နကဘၣ်ဟံးန့ၢ်နးလၢ အကနၣ်အ့ၣ်တဘ့ၣ် ဒီးနကဘၣ်သူအီၤဒ် ပှၤတံာ်ခိၣ်ဖိ အဒီလူၤတဘ့ၣ် အသိးလီၤ. နကဘၣ်လူၤ နခိၣ်ဆူၣ်ခၣ်ဆူၣ် ဝံၤဒီးစီၤအီၤလၢ စီၤပီၢ်အပူၤ ဒီးနီၤဖးလီၤအီၤ သၢပူလီၤ. ၂ ဒီးလၢသၢပူအကျါ တပူန့ၣ် နကဘၣ် ဒွဲၣ်အူအီၤ လၢဝ့ၢ်ပူၤ ဖဲတၢ်ကဝီၤဃာ်ဝ့ၢ် အဆၢကတီၢ်ဝံၤအလီၢ်ခံလီၤ.+ ဒီးနကဘၣ်ဟံးန့ၢ် အဂၤတပူ ဒီးကျီအီၤလၢနး လၢဝ့ၢ်အဃၢၤဝးဝးလီၤ.+ ဒီးမ့မ့ၢ် လၢအလီၢ်ခံကတၢၢ်တပူန့ၣ် နကဘၣ်ဖှံအီၤလၢ ကလံၤကျါ ဒီးယကလူၤထွဲ အဝဲသ့ၣ်အခံ ဒီးနးလီၤ.+

၃ “ဒီးနကဘၣ် ဟံးန့ၢ်နခိၣ်ဆူၣ်ခၣ်ဆူၣ် စှၤကိာ်ဘိ ဒီးဘိၣ်ထီၣ်အီၤလၢ နဆ့ကၤလီၤ. ၄ ဒီးဟံးန့ၢ်နခိၣ်ဆူၣ်ခၣ်ဆူၣ်တနီၤ ဒီးကွံာ်လီၤအီၤလၢ မ့ၣ်အူအပူၤ ဒ်သိးမ့ၣ်အူ ကအီၣ်ကွံာ်အီၤ အဂီၢ်တက့ၢ်. ဒီးမ့ၣ်အူအံၤ ကရၤလီၤအသးလၢ ပှၤအံၣ်စရ့လးဖိ ခဲလၢာ်အအိၣ်လီၤ.+

၅ “တၢ်ပၢကစၢ် ယဟိဝၤယွၤ တဲဝဲလၢ ‘အဝဲအံၤ မ့ၢ်ဝဲ ယရူၤၡလ့ၣ်လီၤ. ယပာ်လီၤအီၤလၢ ပှၤကလုာ်လၢအအိၣ်ဝးတရံးအီၤတဖၣ် အခၢၣ်သးလီၤ. ၆ ဘၣ်ဆၣ် ယရူၤၡလ့ၣ် ထီဒါက့ၤ ယတၢ်သိၣ်တၢ်သီ ဒီးယတၢ်ဘျၢတဖၣ် ဒီးမၤတၢ်အၢတၢ်သီဒိၣ်န့ၢ်ဒံး ပှၤကလုာ်တဖၣ်လၢ အအိၣ်လၢ တၢ်လီၢ်လၢ အအိၣ်ဝးတရံးအီၤလီၤ.+ ပှၤအိၣ်လၢ ဝ့ၢ်ယရူၤၡလ့ၣ်အပူၤတဖၣ် တဒိကနၣ် ယတၢ်သိၣ်တၢ်သီ ဒီးတလဲၤတၢ်ဒ် ယတၢ်ဘျၢတဖၣ်အသိးဘၣ်.’

၇ “တၢ်ပၢကစၢ် ယဟိဝၤယွၤ တဲဝဲလၢ ‘သုအၢန့ၢ်ဒံး ပှၤကလုာ်တဖၣ်လၢ အအိၣ်ဝးတရံးသု ဒီးသုတလဲၤတၢ်ဒ် ယတၢ်ဘျၢအသိးဘၣ်, ဒီးသုတအိၣ်မူမၤထွဲ ယတၢ်သိၣ်တၢ်သီတဖၣ်ဘၣ်. တကးဒံးဘၣ် သုမၤထွဲဒ် ပှၤကလုာ်လၢ အအိၣ်ဝးတရံးသုတဖၣ် အတၢ်သိၣ်တၢ်သီအသိးလီၤ.+ ၈ အဃိ တၢ်ပၢကစၢ် ယဟိဝၤယွၤ တဲဝဲလၢ “အိ ဝ့ၢ်ဧၢ, ယထီဒါနၤလံ.+ ယကစံၣ်ညီၣ်နၤလၢ ပှၤကလုာ်အဂၤတဖၣ် အမဲာ်ညါလီၤ.+ ၉ မ့ၢ်လၢ နလုၢ်လၢ်လၢ အအၢအသီအဃိ တၢ်လၢယတမၤနၤ နီတဘျီဒံးဘၣ်န့ၣ် ယကမၤနၤ ဒီးခါဆူညါန့ၣ် ယတမၤဒ်န့ၣ် နီတဘျီလၢၤဘၣ်.+

၁၀ “‘“သုဝဲလၢအမ့ၢ် ပၢ်တဖၣ်န့ၣ် ကအီၣ်က့ၤအဖိခွါ+ ဒီးဖိခွါန့ၣ် ကအီၣ်က့ၤ အပၢ်လီၤ. ဒီးယကစံၣ်ညီၣ်သု ဒီးယကမၤလီၤပြံလီၤပြါ သုဝဲလၢ အအိၣ်တ့ၢ်တဖၣ် လၢတၢ်လီၢ် ကိးကပၤဒဲးလီၤ.”’+

၁၁ “တၢ်ပၢကစၢ် ယဟိဝၤယွၤ တဲဝဲလၢ ‘မ့ၢ်လၢ သုမၤဘၣ်အၢ ယတၢ်လုၢ်ဟံၣ်လၢ သုတၢ်ဂီၤတၢ်ဖှီၣ်တဖၣ်လၢ အလီၤသးဘၣ်အၢ ဒီးသုလုၢ်လၢ်လၢ အအၢအသီအဃိ+ ဒ်ယမ့ၢ်ပှၤလၢ အမူဝဲ သပှၢ်တၢၢ်အသိး ယအၢၣ်လီၤလၢ ယကပာ်တ့ၢ်ကွံာ်* သုသပှၢ်တၢၢ်လီၤ. ဒီးယတဒိသူၣ်ဒိသးသုလၢၤဘၣ် ဒီးယတပာ်ဖျါထီၣ် တၢ်သးကညီၤလၢ သုဖီခိၣ် စ့ၢ်ကီးလၢၤဘၣ်.+ ၁၂ သုဝဲလၢအအိၣ်လၢဝ့ၢ်ပူၤ သၢပူတပူန့ၣ် ကဘၣ်သံလၢ တၢ်ဆါသံသတြိာ် မ့တမ့ၢ် လၢတၢ်သၣ်ဝံၤလီၤဒိ အဃိလီၤ. ဒီးသုဝဲအဂၤ သၢပူတပူန့ၣ် ကဘၣ်သံလၢနးအဃိ လၢဝ့ၢ်အဃၢၤဝးဝးလီၤ.+ ဒီးမ့မ့ၢ် သုဝဲလၢ အအိၣ်တ့ၢ် သၢပူတပူန့ၣ် ယကမၤလီၤပြံလီၤပြါသုလၢ တၢ်လီၢ်ဝးဝး ဒီးယကလူၤထွဲ သုခံဒီးနးလီၤ.+ ၁၃ ဖဲန့ၣ်အခါ ယတၢ်သးထီၣ် ကကတၢၢ်ကွံာ် ဒီးယတၢ်သးဒိၣ်ထီၣ် အဝဲသ့ၣ် ကခုၣ်လီၤကွံာ် ဒီးယကသးမံလီၤ.+ ဖဲယပျၢ်လီၤ ယတၢ်သးထီၣ် ဝံၤအလီၢ်ခံ အဝဲသ့ၣ် ကသ့ၣ်ညါလၢ ယၤ ယဟိဝၤယွၤန့ၣ် ယတဲပာ်စၢၤတၢ် မ့ၢ်လၢ ယမ့ၢ်ကစၢ်လၢ အဃ့ဝဲ သပှၢ်ကတၢၢ်လၢ ပှၤကဘၣ် တီဒီးယၤလၢ သးဒီဖျၢၣ်လီၤ.+

၁၄ “‘ယကဒုးကဲထီၣ်နၤလၢ တၢ်ဟးဂူာ်ဟးဂီၤအလီၢ် ဒီးတၢ်ဒုၣ်ဒွဲၣ်အလီၢ် လၢပှၤကလုာ်လၢ အအိၣ်ဝးတရံးနၤတဖၣ်အကျါ ဒီးလၢပှၤလၢ အလ့ၢ်ထီၣ်လ့ၢ်လိၤတဖၣ် အမဲာ်ညါလီၤ.+ ၁၅ ဒီးဖဲယစံၣ်ညီၣ် ဒီးသိၣ်ဃီၣ်နၤလၢ တၢ်သးထီၣ် ဒီးတၢ်သူၣ်ဒိၣ်သးဖျိးအပူၤအခါ+ နကကဲထီၣ် တၢ်အဒိအတဲာ် ဒီးတၢ်ဟ့ၣ်ပလီၢ် လၢပှၤကလုာ်တဖၣ် လၢအအိၣ်ဝးတရံးနၤအဂီၢ်လီၤ. ဒီးအဝဲသ့ၣ် ကပျံၤတၢ် ခီဖျိ တၢ်လၢအကဲထီၣ်အသးဒီးနၤအဃိလီၤ. ဒီးအဝဲသ့ၣ် ကဒုၣ်ဒွဲၣ်နၤ ဒီးကဆိကမိၣ်ဆံးနၤလီၤ. ယၤ ယဟိဝၤယွၤန့ၣ် ယတဲဒ်န့ၣ်လီၤ.

၁၆ “‘ဒ်သိး ယကမၤဟးဂီၤသုအဂီၢ် ယကဆှၢလီၤ တၢ်သၣ်ဝံၤလီၤဒိ ဒ်ပျၢ်ဘိတဖၣ်လၢ အမၤသံတၢ် အသိးလီၤ. ပျၢ်ဘိလၢ ယကဆှၢလီၤတဖၣ်အံၤ ကမၤဟးဂီၤသုလီၤ.+ ဒီးယကပျဲလၢ သုတၢ်အီၣ် ကလၢာ်ကွံာ် ဒ်သိး တၢ်သၣ်ဝံၤလီၤဒိ ကဘၣ်သု နးဒိၣ်ထီၣ် အဂီၢ်လီၤ.+ ၁၇ ယကပျဲလီၤ တၢ်သၣ်ဝံၤလီၤဒိ ဒီးဆၣ်ဖိကီၢ်ဖိလၢအအၢလၢ+ ကမၤသံ နဖိတဖၣ်လီၤ. တၢ်ဆါသံသတြိာ် ဒီးတၢ်မၤသံမၤဝီ ကအိၣ်လၢသုကျါ ဒီးယကပျၢ်လီၤနး လၢသုအိၣ်လီၤ.+ ယၤ ယဟိဝၤယွၤန့ၣ် ယတဲဒ်န့ၣ်လီၤ.’”

၆ ယဟိဝၤယွၤ တဲယၤလၢ ၂ “ပှၤကညီဖိခွါဧၢ, ကွၢ်တၢ်လၢ အံၣ်စရ့လး အကစၢၢ်တဖၣ်အအိၣ် ဒီးတဲဝံအတၢ်စံးပာ်လၢ အထီဒါအီၤနီၤ. ၃ နကဘၣ်တဲလၢ ‘အိ အံၣ်စရ့လးအကစၢၢ်တဖၣ်ဧၢ, ကနၣ်တၢ်လၢ တၢ်ပၢကစၢ် ယဟိဝၤယွၤတဲဝဲ. တၢ်ပၢကစၢ် ယဟိဝၤယွၤ တဲဝဲ ကစၢၢ်တဖၣ်, တၢ်လူၢ်တဖၣ်, ထံဖိကျိတဖၣ် ဒီးတၢ်တြီၤတဖၣ်လၢ “ယကပျၢ်လီၤ နးလၢသုအိၣ် ဒီးယကမၤဟးဂီၤ သုတၢ်လီၢ်ထီၣ်ထီတဖၣ်လီၤ. ၄ သုတၢ်လုၢ်လီၢ်တဖၣ်န့ၣ် ကဘၣ်တၢ်မၤဟးဂီၤအီၤ ဒီးသုတၢ်လုၢ် တၢ်နၢမူ အလီၢ်တဖၣ်န့ၣ် ကဘၣ်တၢ်မၤကၢ်အီၤလီၤ.+ ဒီးယကကွံာ်လီၤ သုပှၤလၢ အဘၣ်တၢ်မၤသံအီၤတဖၣ် အစိၣ်လၢ သုတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ် အမဲာ်ညါလီၤ.+ ၅ ယကကွံာ်လီၤ ပှၤအံၣ်စရ့လးဖိ အစိၣ်တဖၣ်လၢ အဝဲသ့ၣ် အတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ် အမဲာ်ညါ ဒီးယကမၤလီၤပြံလီၤပြါ သုဃံသုကွဲတဖၣ်လၢ သုတၢ်လုၢ်လီၢ်တဖၣ် အဃၢၤဝးဝးလီၤ.+ ၆ ဝ့ၢ်တဖၣ်လၢ အအိၣ်လၢ သုအိၣ်တၢ်လီၢ် ကိးတီၤဒဲးန့ၣ် ကဘၣ်တၢ်မၤဟးဂီၤကွံာ်အီၤ+ ဒီးသုတၢ်လီၢ်ထီၣ်ထီတဖၣ်န့ၣ် ကဘၣ်တၢ်မၤဟးဂီၤကွံာ်အီၤ ဒီးမၤလီၤပှီၢ်ကွံာ်အီၤလီၤ.+ သုတၢ်လုၢ်လီၢ်တဖၣ် ကဘၣ်တၢ်မၤဟးဂီၤကွံာ်အီၤ ဒီးမၤလီၤကလဲကွံာ်အီၤလီၤ. ဒီးသုတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်န့ၣ် ကဘၣ်တၢ်မၤဟးဂီၤကွံာ်အီၤ ဒီးသုတၢ်လုၢ် တၢ်နၢမူ အလီၢ်တဖၣ်န့ၣ် ကဘၣ်တၢ်မၤကၢ်ကွံာ်အီၤလီၤ. တၢ်လၢသုတ့အီၤလၢ သုစုတဖၣ်အံၤန့ၣ် ကဘၣ်တၢ်မၤလီၤမၢ်ကွံာ်အီၤ ခဲလၢာ်လီၤ. ၇ ပှၤအါဂၤလၢ သုကျါန့ၣ် ကသံဝဲ+ ဒီးသုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.+

၈ “‘“ဖဲသုလီၤပြံလီၤပြါလၢ တၢ်လီၢ်အဂၤတဖၣ်အခါ ယကဒုးပူၤဖျဲး သုဝဲတနီၤလၢနး လၢပှၤကလုာ်တဖၣ်အကျါအဃိ သုကအိၣ်တ့ၢ် တနီၤလီၤ.+ ၉ ပှၤလၢ အပူၤဖျဲးတဖၣ်န့ၣ် ကဘၣ်တၢ်က့ၤဖီၣ် အဝဲသ့ၣ်လၢ ပှၤကလုာ်တဖၣ်အကျါ ဒီးအဝဲသ့ၣ် ကနီၣ်ဘၣ်က့ၤယၤ ဖဲန့ၣ်လီၤ.+ အဝဲသ့ၣ် ကသ့ၣ်ညါဘၣ်ဝဲလၢ ယသးဘၣ်ဒိဖးဒိၣ် ခီဖျိလၢ အဝဲသ့ၣ် တသးတီဒီးယၤဘၣ် ဒီးဃၣ်ကွံာ်အသးလၢ ယအိၣ်+ တကးဒံးဘၣ် အဝဲသ့ၣ် သူၣ်လီသးကွံတ့ၢ်ဝဲ အတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ် အဃိလီၤ.+ ဒီးအဝဲသ့ၣ် ကမဲာ်ဆှးဝဲ ဒီးကသးဘၣ်အၢလီၤက့ၤအသး မ့ၢ်လၢ အဝဲသ့ၣ် မၤဘၣ်ဝဲ တၢ်အၢတၢ်သီ ဒီးတၢ်လၢ အလီၤသးဘၣ်အၢတဖၣ် အဃိလီၤ.+ ၁၀ အဝဲသ့ၣ် ကသ့ၣ်ညါဘၣ်ဝဲလၢ ယမ့ၢ်ယဟိဝၤယွၤ ဒီးကသ့ၣ်ညါဝဲလၢ ဖဲယတဲပျံၤတဲဖုးတ့ၢ် အဝဲသ့ၣ်လၢ ယကဒုးဘၣ်ကီဘၣ်ခဲ အဝဲသ့ၣ်ဒ်အံၤအခါ တမ့ၢ်လၢယတဲလိာ်ကွဲတၢ်ဘၣ်.”’+

၁၁ “တၢ်ပၢကစၢ် ယဟိဝၤယွၤ တဲဝဲလၢ ‘ဒဲနစု ဒီးဆဲးထူနခီၣ်လၢ တၢ်သးအုးအပူၤ ဒီးကအုကစွါ ဘၣ်ဃးဒီး တၢ်အၢတၢ်သီ ဒီးတၢ်လၢ အလီၤသးဘၣ်အၢလၢ ပှၤအံၣ်စရ့လးဖိ မၤဝဲခဲလၢာ် အဃိန့ၣ်တက့ၢ်. အဝဲသ့ၣ် ကသံလၢနး, တၢ်သၣ်ဝံၤလီၤဒိ ဒီးတၢ်ဆါသံသတြိာ် အဃိလီၤ.+ ၁၂ ပှၤလၢအအိၣ်လၢ တၢ်လီၢ်အယံၤတဖၣ် ကဘၣ်သံလၢ တၢ်ဆါသံသတြိာ် ဒီးပှၤလၢအအိၣ်ဘူးတဖၣ်န့ၣ် ကဘၣ်သံလၢနးအဃိလီၤ. ဒီးပှၤလၢအပူၤဖျဲး ဒီးအိၣ်တ့ၢ်တဖၣ်န့ၣ် ကဘၣ်သံလၢ တၢ်သၣ်ဝံၤလီၤဒိ အဃိလီၤ. ဒီးယကပျၢ်လီၤ ယတၢ်သးဒိၣ်လၢ အဝဲသ့ၣ်အဖီခိၣ် လၢာ်လၢာ်ဆ့ဆ့လီၤ.+ ၁၃ ဖဲအဝဲသ့ၣ် သံဝဲလၢ အတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်အကျါ ဒီးအတၢ်လုၢ်လီၢ်တဖၣ် အကပၤဝးဝး+ ဒီးလၢတၢ်လူၢ်ဖးထီတဖၣ်အလိၤ ဒီးလၢကစၢၢ်ဒီခိၣ် ဒီးလၢသ့ၣ်လါဟ့တဖၣ် လၢအပှဲၤဒီးအလၣ် အခီၣ်ထံး ဒီးသ့ၣ်ထူၣ်ဖးဒိၣ်တဖၣ် အဒ့ဖီလာ်အခါ သုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.+ ဖဲတၢ်လီၢ်ဖဲန့ၣ်တဖၣ်န့ၣ် အဝဲသ့ၣ် လုၢ်ထီၣ်တၢ်နၢမူ ဒ်သိးကမၤမုာ်ဝဲ အတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ် အသးအဂီၢ်လီၤ.+ ၁၄ ယကယၤထီၣ်ယစု လၢယကစံၣ်ညီၣ် အဝဲသ့ၣ်အဂီၢ် ဒီးယကဒုးအိၣ်သယုၢ် အတၢ်လီၢ်တၢ်ကျဲလီၤ. ဒီးအဝဲသ့ၣ် အတၢ်အိၣ်တၢ်ဆိးအလီၢ် ခဲလၢာ်န့ၣ် ကအိၣ်သယုၢ် နးဒိၣ်န့ၢ်ဒံး ပှၢ်မုၢ်ကနၢ လၢအဘူးဒီး ဒံးဘလးလီၤ. ဒီးအဝဲသ့ၣ် ကသ့ၣ်ညါဘၣ်ဝဲလၢ ယမ့ၢ် ယဟိဝၤယွၤလီၤ.’”

၇ ယဟိဝၤယွၤ တဲယၤလၢ ၂ “ပှၤကညီဖိခွါဧၢ, တၢ်ပၢကစၢ် ယဟိဝၤယွၤ တဲဝဲကီၢ်အံၣ်စရ့လးလၢ ‘တၢ်အကတၢၢ် ကဟဲဝဲလီၤ. ကီၢ်ဒီဘ့ၣ် ကတုၤလၢ တၢ်ဟးဂီၤလီၤ. ၃ တၢ်အကတၢၢ် လၢသုဂီၢ်န့ၣ် ကဟဲဝဲလီၤ. ယကပျၢ်လီၤ ယတၢ်သးထီၣ်လၢသုအိၣ် ဒီးယကစံၣ်ညီၣ်သု ဒ်သုတၢ်မၤတဖၣ်အသိး ဒီးယကသိၣ်ဃီၣ်သု ခီဖျိလၢ သုတၢ်မၤလၢ အအၢအသီတဖၣ် အဃိလီၤ. ၄ ယတဒိသူၣ်ဒိသးသုလၢၤဘၣ် ဒီးယတပာ်ဖျါထီၣ် တၢ်သးကညီၤလၢ သုဖီခိၣ် စ့ၢ်ကီးလၢၤဘၣ်.+ တၢ်လၢအကကဲထီၣ်အသး ခီဖျိလၢ သုတၢ်မၤအဃိန့ၣ် ယကဒုးတူၢ်သု ဒီးသုကတူၢ်ဘၣ်က့ၤတၢ် ခီဖျိလၢသုတၢ်မၤလၢ အအၢအသီတဖၣ် အဃိလီၤ.+ ဒီးသုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.’+

၅ “တၢ်ပၢကစၢ် ယဟိဝၤယွၤ တဲဝဲလၢ ‘တၢ်ကီတၢ်ခဲ ကဟဲဝဲလီၤ. တၢ်ကီတၢ်ခဲလၢ အကဟဲတခါအံၤ လီၤဆီဒိၣ်မးလီၤ.+ ၆ တၢ်အကတၢၢ် ကဟဲဝဲလီၤ. တၢ်အကတၢၢ်အံၤ ကဟဲဝဲ ဒီးကဟဲဘၣ်သု သတူၢ်ကလာ်လီၤ. ကွၢ်မီၤ, အဟဲလံ. ၇ ပှၤလၢအအိၣ်လၢ ကီၢ်ပူၤသ့ၣ်ဧၢ, အဘၣ်က့ၤ သုကလဲးလံ. တၢ်ဆၢကတီၢ်အဝဲန့ၣ် ဟဲဝဲ ဒီးမုၢ်နံၤအဝဲန့ၣ် ဘူးထီၣ်လံ.+ တၢ်သဘံၣ်သဘုၣ် ကအိၣ်ထီၣ် ဒီးတၢ်သူၣ်ဖှံသးညီ အသီၣ် တအိၣ်လၢ ကစၢၢ်ကလိတဖၣ် အလိၤလၢၤဘၣ်.

၈ “‘တယံာ်တမီၢ်န့ၣ် ယကလူလီၤ ယတၢ်သးထီၣ်လၢသုလိၤ+ ဒီးယကပျၢ်လီၤ ယတၢ်သးထီၣ်လၢသုအိၣ် လၢာ်လၢာ်ဆ့ဆ့+ ဒီးယကစံၣ်ညီၣ်သု ဒ်သုတၢ်မၤတဖၣ်အသိး ဒီးယကသိၣ်ဃီၣ်သု လၢသုတၢ်မၤလၢ အအၢအသီတဖၣ် အဃိလီၤ. ၉ ယတဒိသူၣ်ဒိသးသုလၢၤဘၣ် ဒီးယတပာ်ဖျါထီၣ် တၢ်သးကညီၤလၢ သုဖီခိၣ် စ့ၢ်ကီးလၢၤဘၣ်.+ တၢ်လၢအကကဲထီၣ်အသး ခီဖျိလၢ သုတၢ်မၤအဃိန့ၣ် ယကဒုးတူၢ်သု ဒီးသုကတူၢ်ဘၣ်က့ၤတၢ် ခီဖျိလၢ သုတၢ်မၤလၢ အအၢအသီတဖၣ် အဃိလီၤ. ဒီးသုကသ့ၣ်ညါဘၣ်လၢ ယမ့ၢ် ယဟိဝၤယွၤ လၢအသိၣ်ဃီၣ်သုလီၤ.+

၁၀ “‘ကွၢ်သၢၤ, မုၢ်နံၤအဝဲန့ၣ် ဟဲဝဲလံ.+ အကဘၣ် သုကလဲးလီၤ. တၢ်စံၣ်ညီၣ်အနီၣ်တီၢ်န့ၣ် အိၣ်ကတဲာ်ကတီၤပာ်စၢၤ အသးလံ. ဒုၣ်ဒါန့ၣ် ပာ်ထီၣ်ထီအသး ဒိၣ်ထီၣ်မးဒိၣ်ထီၣ်လံ. ၁၁ ခီဖျိလၢ အဝဲသ့ၣ် အတၢ်အၢတၢ်သီအဃိ နီၣ်တီၢ် ကသိၣ်ဃီၣ် အဝဲသ့ၣ် နးမးလီၤ.+ အဝဲသ့ၣ် အနီၢ်ကစၢ်မ့ၢ်ဂ့ၤ, အတၢ်ထူးတၢ်တီၤမ့ၢ်ဂ့ၤ, အလီၢ်အလၤမ့ၢ်ဂ့ၤ, အပှၤဂီၢ်မုၢ်မ့ၢ်ဂ့ၤ ကဟးဂီၤကွံာ်ဝဲ ခဲလၢာ်လီၤ. ၁၂ တၢ်ဆၢကတီၢ်အဝဲန့ၣ် ကဟဲဝဲ ဒီးမုၢ်နံၤအဝဲန့ၣ် ကဟဲတုၤလီၤ. တၢ်သးဒိၣ်ထီၣ် ကဘၣ်ဝဲ ပှၤဂီၢ်မုၢ် ခဲလၢာ်အဃိ ပှၤပှ့ၤတၢ်ဖိတဖၣ် တသးခုလၢၤဘၣ် ဒီးပှၤဆါတၢ်ဖိတဖၣ် တကအုကစွါလၢၤဘၣ်.+ ၁၃ တၢ်လၢ တၢ်ထံၣ်လၢညါခီ ပာ်ဖျါထီၣ်ဝဲန့ၣ် ကဘၣ်ဝဲ ပှၤဂီၢ်မုၢ်ခဲလၢာ်အဃိ ပှၤဆါတၢ်ဖိတဖၣ်န့ၣ် မ့ၢ်ပူၤဖျဲး ဘၣ်ဆၣ် အဝဲသ့ၣ် တဟဲက့ၤဘၣ်လၢ အဟီၣ်ခိၣ်လီၢ်လၢ အဆါတ့ၢ်ဝဲ အအိၣ်ဘၣ်. ပှၤတဂၤမး တဟဲက့ၤဘၣ်ဘၣ်. ဒီးမ့ၢ်လၢ အဝဲသ့ၣ်အတၢ်ကမၣ် အိၣ်ဝဲအဃိ အသးသမူ တပူၤဖျဲး နီတဂၤဘၣ်.

၁၄ “‘အဝဲသ့ၣ်အူထီၣ်ကွဲၤ+ ဒီးပှၤကိးဂၤဒဲး အိၣ်ကတဲာ်ကတီၤအသး ဘၣ်ဆၣ် ပှၤတလဲၤလၢ တၢ်ဒုးပူၤနီတဂၤဘၣ်, မ့ၢ်လၢ ယတၢ်သးဒိၣ် ကဟဲဘၣ် ပှၤဂီၢ်မုၢ်ခဲလၢာ် အဃိလီၤ.+ ၁၅ နးကအိၣ်လၢ ဝ့ၢ်ချၢ+ ဒီးတၢ်ဆါသံသတြိာ် ဒီးတၢ်သၣ်ဝံၤလီၤဒိ ကအိၣ်လၢ ဝ့ၢ်ပူၤလီၤ. ပှၤလၢအအိၣ်လၢ ဝ့ၢ်ချၢန့ၣ် ကသံဝဲလၢနး ဒီးတၢ်သၣ်ဝံၤလီၤဒိ ဒီးတၢ်ဆါသံသတြိာ် ကဘၣ်ပှၤအိၣ်လၢ ဝ့ၢ်ပူၤလီၤ.+ ၁၆ ပှၤလၢ အပူၤဖျဲးတဖၣ်န့ၣ် ကလဲၤဃ့ၢ်ဝဲလၢ ကစၢၢ်ကလိအကျါ ဒီးဒ်ထိၣ်လွံၢ်တဖၣ်လၢ တၢ်တြီၤပူၤအသိး အဝဲသ့ၣ် တဂၤစုာ်စုာ် ကကအုကစွါ လၢအတၢ်ကမၣ် အဃိလီၤ.+ ၁၇ အဝဲသ့ၣ် ခဲလၢာ်အစုကလီၤစၢ် စၢ်ဖဲးအဲး ဒီးထံကယွၤလီၤဝဲလၢ အခီၣ်လ့ၢ်ခိၣ်တဖၣ် အလိၤလီၤ.*+ ၁၈ အဝဲသ့ၣ် ကကူထီၣ်သိးထီၣ် ထၢၣ်တၢ်ကံးညာ်*+ ဒီးတၢ်ပျံၤတၢ်ဖုး ကလုၢ်ဘၢကွံာ် အဝဲသ့ၣ်လီၤ. ပှၤကိးဂၤဒဲး ကမဲာ်ဆှး ဒီးကလူၤအခိၣ်လီၤ.*+

၁၉ “‘အဝဲသ့ၣ် ကတၢၤကွံာ် အစ့လၢကျဲပူၤ ဒီးအဝဲသ့ၣ် အထူတဖၣ်န့ၣ် ကကဲထီၣ် တၢ်လီၤသးဘၣ်အၢ လၢအဝဲသ့ၣ် အဂီၢ်လီၤ. ဖဲယဟိဝၤယွၤ အတၢ်သးထီၣ် အမုၢ်နံၤန့ၣ် အဝဲသ့ၣ်အထူမ့ၢ်ဂ့ၤ အစ့မ့ၢ်ဂ့ၤ မၤပူၤဖျဲး အဝဲသ့ၣ် တန့ၢ်ဘၣ်.+ ဖဲန့ၣ်အခါ အဝဲသ့ၣ် အီၣ်ဘၣ်တၢ် တဘျဲလၢၤဘၣ် ဒီးအဟၢဖၢ တပှဲၤဝဲလၢၤဘၣ်. အဃိ အထူဒီးအစ့န့ၣ် အိၣ်ဒၣ် အကဲထီၣ် တၢ်လီၤဃံၢ်အလီၢ် လၢအဆှၢအဝဲသ့ၣ်လၢ တၢ်ဒဲးဘးလီၤ. ၂၀ အဝဲသ့ၣ် ပာ်ကဖၢလၢအသးလၢ အဝဲသ့ၣ် အတၢ်ကယၢကယဲ လၢအဃံအလၤတဖၣ် အဃိလီၤ. ဒီးအဝဲသ့ၣ် သူဝဲထူဒီးစ့ ဒ်သိးကတ့ထီၣ် တၢ်လၢအလီၤသးဘၣ်အၢတဖၣ် လၢအမ့ၢ် တၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်လီၤ.+ လၢတၢ်န့ၣ်အဃိ ယကမၤဒ်သိး အဝဲသ့ၣ် ကသးဘၣ်အၢဝဲ အထူဒီးစ့တဖၣ်အံၤလီၤ. ၂၁ ဖဲပှၤထံဂၤကီၢ်ဂၤဖိတဖၣ် ဟဲဂုာ်န့ၢ်ဆူၣ်အဝဲသ့ၣ်အတၢ် ဒီးပှၤအၢပှၤသီတဖၣ် ဟံးန့ၢ်ဆူၣ် အဝဲသ့ၣ်အတၢ်အခါ ယကဟ့ၣ်လီၤ ထူဒီးစ့တဖၣ်အံၤ လၢပှၤသ့ၣ်တဖၣ်န့ၣ် အစုပူၤ ဒီးပှၤသ့ၣ်တဖၣ်န့ၣ် ကမၤဘၣ်အၢ တၢ်လုၢ်ဒိၣ်ပှ့ၤဒိၣ်တဖၣ်အံၤ သပှၢ်ကတၢၢ်လီၤ.

၂၂ “‘ယကဃၣ်ကွံာ်ယမဲာ်လၢ အဝဲသ့ၣ်အအိၣ်+ ဒီးယတၢ်လီၢ်လၢ အအိၣ်သဒၢန့ၣ်* ကဘၣ်တၢ်မၤဘၣ်အၢအီၤလီၤ. တမျာ်တဖၣ် ကဟဲနုာ်လီၤလၢအပူၤ ဒီးကမၤဘၣ်အၢအီၤလီၤ.+

၂၃ “‘လၢကီၢ်ဒီဘ့ၣ်အပူၤန့ၣ် ပှၤဘၣ်သံလၢ တၢ်စံၣ်ညီၣ် တတီတလိၤအဃိ+ ဒီးဝ့ၢ်န့ၣ် ပှဲၤဝဲဒီး တၢ်မၤဆူၣ်မၤစိးလီၤ.+ အဃိ တ့ထီၣ်ပျံၤထးသၢၤ.*+ ၂၄ ယကဟဲကိး ပှၤကလုာ်တဖၣ်လၢ အအၢကတၢၢ်+ ဒီးအဝဲသ့ၣ် ကဟံးန့ၢ် ပှၤအိၣ်လၢဝ့ၢ်ပူၤ အဟံၣ်တဖၣ်+ ဒီးယကမၤပတုာ် ပှၤလၢအဂံၢ်ဆူၣ်တဖၣ် အတၢ်ပာ်ထီၣ်ထီ အသးလီၤ. ဒီးအဝဲသ့ၣ် အတၢ်လီၢ်စီဆှံတဖၣ်န့ၣ် ကဘၣ်တၢ်မၤဘၣ်အၢအီၤလီၤ.+ ၂၅ ဖဲတၢ်ကီတၢ်ခဲ ဘၣ်အဝဲသ့ၣ်အခါ အဝဲသ့ၣ် ကဃုတၢ်မုာ်တၢ်ခုၣ် ဘၣ်ဆၣ် အဝဲသ့ၣ် တထံၣ်န့ၢ် တၢ်မုာ်တၢ်ခုၣ်ဘၣ်.+ ၂၆ တၢ်ကီတၢ်ခဲဖးဒိၣ် ကဟဲဘၣ် အဝဲသ့ၣ် တခါဝံၤတခါ ဒီးအဝဲသ့ၣ် ကနၢ်ဟူဘၣ်တၢ်ဂ့ၢ် တခါဝံၤတခါလီၤ. ဒီးပှၤကအဲၣ်ဒိးနၢ်ဟူ တၢ်ထံၣ်လၢညါခီအဂ့ၢ် လၢဝံအအိၣ်လီၤ.+ ဘၣ်ဆၣ် ပှၤလုၢ်တၢ်ဒိၣ် အတၢ်ဟံးစုနဲၣ်ကျဲ ဒီးပှၤသူၣ်က့သးပှၢ်တဖၣ် အတၢ်ဟ့ၣ်ကူၣ်န့ၣ် တကဲဘျုးလၢၤဘၣ်.+ ၂၇ စီၤပၤန့ၣ် ကသးအုး+ ဒီးပှၤခိၣ်ပှၤနၢ်န့ၣ် အသးကဟးဂီၤဝဲ သပှၢ်ကတၢၢ်လီၤ. ဒီးပှၤထံဖိကီၢ်ဖိတဖၣ် အစုန့ၣ် ကကနိးဝဲ လၢတၢ်ပျံၤတၢ်ဖုး အဃိလီၤ. ယကမၤ အဝဲသ့ၣ် ဒ်အဝဲသ့ၣ် မၤတ့ၢ်ဝဲအသိး ဒီးယကစံၣ်ညီၣ် အဝဲသ့ၣ် ဒ်အဝဲသ့ၣ် စံၣ်ညီၣ်ပှၤဂၤ အသိးလီၤ. ဒီးအဝဲသ့ၣ် ကသ့ၣ်ညါဘၣ်ဝဲလၢ ယမ့ၢ် ယဟိဝၤယွၤလီၤ.’”+

၈ ဖဲဃုနံၣ်တနံၣ်, လါဃုလါတလါ, လါထီၣ်ယဲၢ်သီတသီ, ဖဲယဆ့ၣ်နီၤအိၣ်လၢ ယဟံၣ်ပူၤ ဒီးယူဒၤ အပှၤသူၣ်က့သးပှၢ်တဖၣ် ဆ့ၣ်နီၤလၢ ယမဲာ်ညါအခါ တၢ်ပၢကစၢ် ယဟိဝၤယွၤ အစိအကမီၤ လီၤဘၣ်လၢ ယလိၤလီၤ. ၂ ဖဲယကွၢ်တၢ်အခါ ယထံၣ်ဘၣ် ပှၤတဂၤလၢ အလီၤဂာ်ဒ်သိးဒီး မ့ၣ်အူလီၤ. စးထီၣ်လၢအယီၢ်ဒ့ ဒီးဆူအဖီလာ်န့ၣ် အိၣ်ဝဲဒီးမ့ၣ်အူလီၤ.+ ဘၣ်ဆၣ် စးထီၣ်လၢ အယီၢ်ဒ့ ဒီးဆူအဖီခိၣ်န့ၣ် ဖျါကပြုၢ်ကပြီၤဝဲ ဒီးကတြ့ၣ်ဝဲဒ် ထူဒီးစ့ ကျဲၣ်ကျီလိာ်သးအသိးလီၤ.+ ၃ ဒီးအဝဲယူာ်ဃီၤ တၢ်လၢအလီၤဂာ်ဒီး တၢ်အစုတခီ ဒီးဖီၣ်စှီၤထီၣ် ယခိၣ်ဆူၣ် ဒီးသးစီဆှံန့ၣ်* စိာ်ထီၣ်ယၤလၢ တၢ်ဖးဖီ* ဒီးဆှၢလီၤယၤလၢ ဝ့ၢ်ယရူၤၡလ့ၣ် ခီဖျိလၢ ကစၢ်ယွၤ အတၢ်ထံၣ်လၢညါခီလီၤ. ဒီးသးစီဆှံန့ၣ် ဆှၢယၤလၢတၢ်ပျီလၢ အအံၣ်တဘ့ၣ် အတြဲၤခီၣ်ထံး+ လၢအအိၣ်လၢ တၢ်လုၢ်ဟံၣ် အကလံၤစိး တခီလီၤ. ဖဲန့ၣ်န့ၣ် အိၣ်ဝဲဒီး တၢ်ဂီၤတၢ်ဖှီၣ်လၢ အဒုးအိၣ်ထီၣ် ကစၢ်ယွၤ အတၢ်သးထီၣ်လီၤ.+ ၄ ဒီးယထံၣ်ဘၣ် အံၣ်စရ့လး အကစၢ်ယွၤ အလၤကပီၤ+ ဒီးအဖျါလီၤဂာ်ဒ် ယထံၣ်ဘၣ်တ့ၢ်အီၤဖဲ တၢ်ပၢၤခိၣ်လီၤ.+

၅ အဝဲတဲယၤလၢ “ပှၤကညီဖိခွါဧၢ, ကွၢ်တၢ်လၢ ကလံၤစိးတခီန့ၣ်.” အဃိ ယကွၢ်တၢ် လၢကလံၤစိးတခီ ဒီးဖဲကျဲနုာ်လီၤလၢ တၢ်လုၢ်လီၢ်အတြဲၤ အကလံၤစိးတခီန့ၣ် ယထံၣ်ဘၣ် တၢ်ဂီၤတၢ်ဖှီၣ်လၢ အဒုးအိၣ်ထီၣ် ကစၢ်ယွၤ အတၢ်သးထီၣ်လီၤ. ၆ ဒီးအဝဲတဲယၤလၢ “ပှၤကညီဖိခွါဧၢ, ပှၤအံၣ်စရ့လးဖိတဖၣ် မၤတၢ်လၢ အအၢအသီ ဒီးအလီၤသးဘၣ်အၢဒိၣ်မး ဖဲအံၤန့ၣ်+ နထံၣ်ဧါ. အဝဲသ့ၣ် မၤဝဲဒ်သိး ယကဟးယံၤ ဒီးယတၢ်လုၢ်ဟံၣ်န့ၣ် မ့ၢ်နထံၣ်ဧါ.+ ဘၣ်ဆၣ် နကထံၣ်ဘၣ် တၢ်လၢအလီၤသးဘၣ်အၢ အါန့ၢ်အန့ၣ်ဒံးလီၤ.”

၇ ဒီးအဝဲ လဲၤဆှၢယၤလၢ တၢ်ပျီလၢအအိၣ်လၢ ကရၢၢ်ပူၤ အတၢ်နုာ်လီၤအလီၢ်လီၤ. ဒီးဖဲယကွၢ်တၢ်အဆၢကတီၢ် ယထံၣ်ဘၣ် တၢ်ပူၤဟိတပူၤလၢ တၢ်ဒူၣ်အလိၤလီၤ. ၈ ဒီးအဝဲတဲယၤလၢ “ပှၤကညီဖိခွါဧၢ, ဝံသးစူၤ ဘၢၣ်ဖျိလဲၢ်ထီၣ် တၢ်ပူၤလၢ တၢ်ဒူၣ်ကပၤတပူၤအံၤမီၤ.” အဃိ ယဘၢၣ်ဖျိလဲၢ်ထီၣ် တၢ်ပူၤတပူၤ လၢတၢ်ဒူၣ်ကပၤလီၤ. ဒီးဖဲန့ၣ်န့ၣ် ယထံၣ်ဘၣ် ကျဲနုာ်လီၤ အလီၢ်လီၤ. ၉ ဒီးအဝဲတဲယၤလၢ “လဲၤနုာ်လီၤကွၢ် တၢ်အၢတၢ်သီ ဒီးတၢ်လီၤသးဘၣ်အၢလၢ အဝဲသ့ၣ်မၤဝဲ ဖဲန့ၣ်န့ၣ်.” ၁၀ အဃိ ယလဲၤနုာ်လီၤကွၢ်တၢ် ဒီးယထံၣ်ဘၣ် တၢ်လၢအဟူးအဂဲၤ အကလုာ်ကလုာ်အဂီၤ, ဆၣ်ဖိကီၢ်ဖိလၢ တကဆှီဘၣ်အဂီၤ+ ဒီးပှၤအံၣ်စရ့လးဖိ အတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်+ ဘၣ်တၢ်စိးပျၤအီၤလၢ တၢ်ဒူၣ်ကပၤဝးဝးလီၤ. ၁၁ ဒီးပှၤအံၣ်စရ့လးဖိ အပှၤသူၣ်က့သးပှၢ် အဂၤ ၇၀ ဆၢထၢၣ်လၢ တၢ်သ့ၣ်တဖၣ်န့ၣ် အမဲာ်ညါ ဒီးစီၤၡၤဖၣ်+ အဖိခွါ စီၤယၤစါနယၤ ဆၢထၢၣ်လၢ အဝဲသ့ၣ် အကျါလီၤ. အဝဲသ့ၣ်တဂၤစုာ်စုာ် စိာ်ဃာ်ဝဲ တၢ်ဒွဲၣ်ထီၣ်တၢ်နၢမူအဒၢ ဒီးတၢ်နၢမူအခုၣ်တဖၣ် ခုၣ်ထီၣ်ဝဲလီၤ.+ ၁၂ အဝဲတဲယၤလၢ “ပှၤကညီဖိခွါဧၢ, တၢ်လၢ ပှၤအံၣ်စရ့လးဖိ အပှၤသူၣ်က့သးပှၢ်တဖၣ် မၤဝဲလၢ တၢ်ခံးကျါန့ၣ် မ့ၢ်နထံၣ်ဧါ. အဝဲသ့ၣ် တဂၤစုာ်စုာ်န့ၣ် အိၣ်ဝဲလၢ အဒၢးတဖၣ်လၢ တၢ်ကိပူၤတတီၤ ဖဲအဝဲသ့ၣ် အတၢ်ဂီၤတၢ်ဖှီၣ်တဖၣ် အိၣ်ဝဲအလီၢ်န့ၣ် နထံၣ်ဧါ. အဝဲသ့ၣ် တဲဝဲလၢ ‘ယဟိဝၤယွၤ တထံၣ်ပှၤဘၣ်. ယဟိဝၤယွၤ ပာ်တ့ၢ် ကီၢ်တဘ့ၣ်အံၤလံ.’”+

၁၃ ဒီးအဝဲတဲယၤလၢ “နကထံၣ်ဘၣ် တၢ်လၢအဝဲသ့ၣ်မၤဝဲလၢ အလီၤသးဘၣ်အၢ အါန့ၢ်အန့ၣ်ဒံးလီၤ.” ၁၄ ဒီးအဝဲ လဲၤဆှၢယၤလၢ ယဟိဝၤယွၤ အဟံၣ်တြဲၤ လၢကလံၤစိးတခီ အကျဲနုာ်လီၤအလီၢ်လီၤ. ဒီးယထံၣ်ဘၣ် ပှၤပိာ်မုၣ်တဖၣ် ဆ့ၣ်နီၤဟီၣ်လၢ ယွၤတးမူး အဃိလီၤ.

၁၅ ဒီးအဝဲ တဲယၤလၢ “ပှၤကညီဖိခွါဧၢ, နထံၣ်ဧါ. နကထံၣ်ဘၣ်ဒံး တၢ်လၢအလီၤသးဘၣ်အၢ အါန့ၢ်အန့ၣ် ဒီးနးန့ၢ်အန့ၣ်ဒံးလီၤ.”+ ၁၆ ဒီးအဝဲ လဲၤကိးယၤလၢ ယဟိဝၤယွၤ အတၢ်လုၢ်ဟံၣ် အတၢ်ပျီလၢ အအံၣ်တဘ့ၣ် အပူၤလီၤ.+ ဒီးဖဲကစၢ် ယဟိဝၤယွၤ အတၢ်လုၢ်ဟံၣ် အကျဲနုာ်လီၤအလီၢ် ဒီးတၢ်လုၢ်လီၢ် အဘၢၣ်စၢၤန့ၣ် ပှၤပိာ်ခွါအိၣ်ဝဲ ၂၅ ဂၤလၢ အဃၣ်ဒူၣ်ချၢအသးလၢ ယဟိဝၤယွၤ အတၢ်လုၢ်ဟံၣ် ဒီးအဝဲသ့ၣ် ဃၣ်အသးလၢ မုၢ်ထီၣ်တခီလီၤ. ဒီးအဝဲသ့ၣ်န့ၣ် ဘါလီၤဝဲမုၢ် ဆူမုၢ်ထီၣ်တခီလီၤ.+

၁၇ အဝဲတဲယၤလၢ “ပှၤကညီဖိခွါဧၢ, နထံၣ်ဧါ. ယူဒၤအပှၤဂီၢ်မုၢ် မၤတၢ်လၢ အလီၤသးဘၣ်အၢတဖၣ်, မၤပှဲၤဝဲကီၢ်ဒီး တၢ်မၤဆူၣ်မၤစိး+ ဒီးဆဲးမၤကမၣ်ယၤန့ၣ် မ့ၢ်အဝဲသ့ၣ်ဆိကမိၣ်ဝဲလၢ တၢ်ဂ့ၢ်ဆံးဆံးဖိလီၤဧါ. အဝဲသ့ၣ် ယူာ်ထီၣ်သ့ၣ်ဒ့* လၢယနါဒ့ အခိၣ်ထိးတီတီလီၤ. ၁၈ အဃိ ယကပာ်ဖျါထီၣ် ယတၢ်သးဒိၣ်ထီၣ်လၢ အဝဲသ့ၣ်အဖီခိၣ်လီၤ. ဒီးယတဒိသူၣ်ဒိသး အဝဲသ့ၣ်လၢၤဘၣ် ဒီးယတပာ်ဖျါထီၣ် တၢ်သးကညီၤလၢ အဖီခိၣ် စ့ၢ်ကီးလၢၤဘၣ်.+ အဝဲသ့ၣ် မ့ၢ်ဟီၣ်ကိးပသူထီၣ် ဖးဒိၣ်လၢ ယနၢ်ပူၤသနာ်က့ ယတဒိကနၣ် အဝဲသ့ၣ်လၢၤဘၣ်.”+

၉ ယနၢ်ဟူ အဝဲတဲထီၣ်တၢ်လၢ အကလုၢ်ဖးဒိၣ်လၢ “ကိးဖှိၣ်ထီၣ် ပှၤလၢအကစံၣ်ညီၣ်ဝ့ၢ်ဟီ. အဝဲသ့ၣ် တဂၤစုာ်စုာ်န့ၣ် ဖီၣ်ဃာ်ဝဲ တၢ်စုကဝဲၤလၢ အကမၤဟးဂီၤတၢ် အဂီၢ်လံ.”

၂ ဒီးယထံၣ်ဘၣ် ပှၤပိာ်ခွါဃုဂၤ ဟဲထီၣ်လၢ တြဲၤလၢတၢ်ဖီခိၣ်တဘ့ၣ်+ လၢအဃၣ်အမဲာ်လၢ ကလံၤစိးတခီလီၤ. အဝဲသ့ၣ် တဂၤစုာ်စုာ်န့ၣ် ဖီၣ်ဃာ်ဝဲ တၢ်စုကဝဲၤလၢ ကမၤဟးဂီၤတၢ်အဂီၢ်လီၤ. ဒီးပှၤပိာ်ခွါအဂၤတဂၤ လၢအဝဲသ့ၣ်အကျါန့ၣ် ကူသိးဝဲ တၢ်ကူတၢ်ကၤလၢ အညၣ်ဂ့ၤ ဒီးလၢအယီၢ်ဒ့လိၤန့ၣ် အိၣ်ဝဲဒီး ပှၤကွဲးလံာ်ဖိ အကသံၣ်ထံအနၢၤတဘိလီၤ.* ဒီးအဝဲသ့ၣ် ဟဲနုာ်လီၤ ဒီးဆၢထၢၣ်ဝဲလၢ တၢ်လုၢ်လီၢ်တိၢ်ဘီ အကပၤလီၤ.+

၃ ဒီးအံၣ်စရ့လး အကစၢ်ယွၤ အလၤကပီၤလၢ+ အအိၣ်ပာ်စၢၤဝဲလၢ ခ့ရူာ်တဖၣ် အဖီခိၣ်န့ၣ် ဟူးထီၣ်ဝဲ ဒီးသုးအသးဆူ တၢ်လုၢ်ဟံၣ်အတြဲၤခီၣ်ထံးလီၤ.+ ဒီးအဝဲ* ကိးထီၣ်ဝဲလၢ ပှၤတဂၤလၢ အသိးဝဲ တၢ်ကူတၢ်ကၤလၢ အညၣ်ဂ့ၤ ဒီးအယီၢ်ဒ့လိၤ အိၣ်ဝဲဒီး ပှၤကွဲးလံာ်ဖိ အကသံၣ်ထံ အနၢၤတဘိန့ၣ် အအိၣ်လီၤ. ၄ ယဟိဝၤယွၤ တဲအီၤလၢ “လဲၤတၢ်လၢ ဝ့ၢ်ယရူၤၡလ့ၣ် အပူၤတက့ၢ်. ဒီးပှၤလၢ အကအုကစွါ ဒီးဘၣ်ကိၢ်ဘၣ်ဂီၤ+ ခီဖျိတၢ်လၢ အလီၤသးဘၣ်အၢ လၢအမၤအသး လၢဝ့ၢ်ပူၤခဲလၢာ်အဃိန့ၣ် ကွဲးလီၤတၢ်ပနီၣ် လၢအဝဲသ့ၣ် အမဲာ်တူၢ်ခိၣ် အလိၤတက့ၢ်.”+

၅ ဒီးယနၢ်ဟူဘၣ်လၢ ကစၢ်ယွၤ တဲဘၣ်ပှၤအဂၤတဖၣ်လၢ “လဲၤတၢ်လၢဝ့ၢ်ပူၤလၢ ပှၤတဂၤန့ၣ်အလီၢ်ခံ ဒီးတီၢ်ပှၤကညီတက့ၢ်. တဘၣ်ဒိသူၣ်ဒိသး အဝဲသ့ၣ်တဂ့ၤ ဒီးတဘၣ်သးကညီၤ အဝဲသ့ၣ်တဂ့ၤ.+ ၆ ပှၤသးပှၢ်မ့ၢ်ဂ့ၤ, ပှၤပိာ်ခွါသးစၢ်မ့ၢ်ဂ့ၤ, ပှၤမုၣ်ကနီၤမ့ၢ်ဂ့ၤ, ဖိဒံဖိသၣ်မ့ၢ်ဂ့ၤ, ပှၤပိာ်မုၣ်တဖၣ်မ့ၢ်ဂ့ၤ မၤသံအဝဲသ့ၣ် ခဲလၢာ်ခဲဆ့တက့ၢ်.+ ဘၣ်ဆၣ် တဘၣ်လဲၤမၤဘူး ပှၤလၢအအိၣ်ဒီး တၢ်ပနီၣ်န့ၣ် နီတဂၤတဂ့ၤ.+ သုကဘၣ် မၤဒ်အံၤ စးထီၣ်လၢ ယတၢ်လုၢ်ဟံၣ်လီၤ.”+ အဃိ အဆိကတၢၢ်န့ၣ် ပှၤတဖၣ်န့ၣ်မၤသံဝဲ ပှၤသူၣ်က့သးပှၢ်တဖၣ်လၢ အအိၣ်လၢ တၢ်လုၢ်ဟံၣ် အမဲာ်ညါလီၤ.+ ၇ ဒီးကစၢ်ယွၤ တဲအဝဲသ့ၣ်လၢ “လဲၤသၢၤ. မၤဘၣ်အၢ တၢ်လုၢ်ဟံၣ်တက့ၢ်. မၤပှဲၤ တၢ်လုၢ်ဟံၣ် အတၢ်ပျီတဖၣ်လၢ ပှၤသံအစိၣ်န့ၣ်တက့ၢ်.”+ အဃိ အဝဲသ့ၣ် လဲၤမၤသံကွံာ် ပှၤလၢ အအိၣ်လၢ ဝ့ၢ်ပူၤလီၤ.

၈ ဖဲအဝဲသ့ၣ် လဲၤတီၢ်သံတၢ်အခါ ယပူၤဖျဲးမူဒံး ထဲတဂၤ ဒီးယထိၣ်လီၤပှီၤယသး ဒီးယတဲထီၣ်တၢ်လၢ ယကလုၢ်ဖးဒိၣ်လၢ “အံၤအံ, တၢ်ပၢကစၢ် ယဟိဝၤယွၤဧၢ, ဖဲနပာ်ဖျါထီၣ် နတၢ်သးဒိၣ်လၢ ဝ့ၢ်ယရူၤၡလ့ၣ် အဖီခိၣ်အခါ နကမၤဟးဂီၤကွံာ် ပှၤအံၣ်စရ့လးဖိလၢ အအိၣ်တ့ၢ်တဖၣ် ခဲလၢာ်ဧါ.”+

၉ ဒီးအဝဲတဲယၤလၢ “အံၣ်စရ့လးအပှၤဂီၢ်မုၢ် ဒီးယူဒၤအပှၤဂီၢ်မုၢ် အတၢ်ကမၣ်န့ၣ် ဒိၣ်ဝဲ ဒိၣ်မးလီၤ.+ ကီၢ်န့ၣ်ပှဲၤဝဲဒီး တၢ်မၤသံမၤဝီ+ ဒီးဝ့ၢ်န့ၣ် ပှဲၤဝဲဒီး တၢ်တတီတလိၤတဖၣ်လီၤ.+ အဝဲသ့ၣ် တဲဝဲလၢ ‘ယဟိဝၤယွၤ ပာ်တ့ၢ် ကီၢ်တဘ့ၣ်အံၤလံ. ယဟိဝၤယွၤ တထံၣ်ပှၤဘၣ်.’+ ၁၀ အဃိ ယတဒိသူၣ်ဒိသး အဝဲသ့ၣ်လၢၤဘၣ် ဒီးယတပာ်ဖျါထီၣ် တၢ်သးကညီၤလၢ အဝဲသ့ၣ်အဖီခိၣ် စ့ၢ်ကီးလၢၤဘၣ်.+ ဒီးယကဟ့ၣ်ကၣ်က့ၤအဝဲသ့ၣ် ဒ်တၢ်လၢအဝဲသ့ၣ်မၤတ့ၢ်ဝဲ အသိးလီၤ.”

၁၁ ဒီးယထံၣ်ဘၣ်လၢ ပှၤတဂၤလၢ အသိးဝဲ တၢ်ကူတၢ်ကၤလၢ အညၣ်ဂ့ၤ ဒီးအယီၢ်ဒ့လိၤ အိၣ်ဝဲဒီး ကသံၣ်ထံ အနၢၤတဘိန့ၣ် ဟဲက့ၤတဲဝဲလၢ “ဒ်နမၤလိာ်ယၤအသိးန့ၣ် ယမၤဝံၤလံ.”

၁၀ တၢ်လၢ အလီၤဂာ်ဒီး လၢၢ်ဖျါကလၤတဘ့ၣ်န့ၣ် အိၣ်ဝဲလၢ ခ့ရူာ်တဖၣ် အခိၣ်ဒီလီၤ. ဒီးဖဲယကွၢ်တၢ်အခါ ယထံၣ်တၢ်လၢ အလီၤဂာ်ဒီး တၢ်မျၢ်နံၤလါအဲး အိၣ်ဖျါထီၣ်လၢ ခ့ရူာ်တဖၣ် အဖီခိၣ်လီၤ. ဒီးတၢ်တခါန့ၣ် လီၤဂာ်ဒီး လီၢ်ပစိာ်လီၤ.+ ၂ ဒီးကစၢ်ယွၤ တဲဘၣ် ပှၤတဂၤလၢ အသိးဝဲ တၢ်ကူတၢ်ကၤလၢ အညၣ်ဂ့ၤန့ၣ်လၢ+ “လဲၤနုာ်လီၤလၢ လ့ၣ်ကဟၣ်အပၣ်တဖၣ် အဘၢၣ်စၢၤ+ လၢအအိၣ်လၢ ခ့ရူာ်တဖၣ် အဖီလာ်န့ၣ်တက့ၢ်. ဒီးမၤပှဲၤ နစုခံခီလၢာ်ဒီး မ့ၣ်အူအ့ၣ်လၢ+ အအိၣ်လၢ ခ့ရူာ်တဖၣ် အဘၢၣ်စၢၤ ဒီးကွံာ်လီၤအီၤလၢ ဝ့ၢ်အဖီခိၣ်န့ၣ်တက့ၢ်.”+ အဃိ ဖဲယကွၢ်တၢ်အခါ အဝဲလဲၤနုာ်လီၤဝဲလီၤ.

၃ ဖဲအဝဲ လဲၤနုာ်ဝဲအခါ ခ့ရူာ်တဖၣ် ဆၢထၢၣ်လၢ တၢ်လုၢ်ဟံၣ် အထွဲတခီလီၤ. ဒီးတၢ်အၢၣ် အိၣ်ပှဲၤဝဲ တၢ်လုၢ်ဟံၣ် အတၢ်ပျီလၢ အအံၣ်တဘ့ၣ်လီၤ. ၄ ယဟိဝၤယွၤ အလၤကပီၤလၢ+ အအိၣ်လၢ ခ့ရူာ်တဖၣ် အဖီခိၣ်န့ၣ် ဟူးထီၣ်ဝဲ ဒီးလဲၤဝဲလၢ တၢ်လုၢ်ဟံၣ် အတြဲၤခီၣ်ထံးလီၤ. ဒီးတၢ်လုၢ်ဟံၣ်န့ၣ် ပှဲၤထီၣ်ဝဲဒီး တၢ်အၢၣ် ကယီကယီလီၤ.+ ဒီးတၢ်ပျီန့ၣ် ပှဲၤဝဲဒီး ယဟိဝၤယွၤ အလၤကပီၤ အတၢ်ကပြုၢ်ကပြီၤလီၤ. ၅ ဒီးခ့ရူာ်တဖၣ် အဒံးဆ့န့ၣ် သီၣ်ထီၣ်ဝဲ ဟူတုၤလၢ တၢ်ပျီလၢ အလဲၢ်တဘ့ၣ်အပူၤ ဒီးအသီၣ်လီၤဂာ် ဒ်သ့တၢ်လၢာ်ကစၢ် တဲတၢ်သီၣ်အသိးလီၤ.+

၆ ဒီးကစၢ်ယွၤမၤလိာ် ပှၤလၢအသိးဝဲ တၢ်ကူတၢ်ကၤလၢ အညၣ်ဂ့ၤလၢ “ဟံးန့ၢ် မ့ၣ်အူလၢ အအိၣ်လၢ လ့ၣ်ကဟၣ်အပၣ်တဖၣ် အဘၢၣ်စၢၤ လၢခ့ရူာ်တဖၣ် အဘၢၣ်စၢၤမီၤ.” ဒီးပှၤတဂၤန့ၣ် လဲၤနုာ်ဝဲ ဒီးဆၢထၢၣ်ဝဲလၢ လ့ၣ်ကဟၣ်အပၣ် အကပၤလီၤ. ၇ ဒီးလၢခ့ရူာ်တဖၣ်အကျါ တဂၤန့ၣ် ယူာ်ထီၣ်အစုဆူ မ့ၣ်အူလၢအအိၣ်လၢ ခ့ရူာ်တဖၣ် အဘၢၣ်စၢၤလီၤ.+ ဒီးအဝဲဟံးန့ၢ်ဝဲ မ့ၣ်အူတနီၤ ဒီးထၢနုာ်ဝဲလၢ ပှၤလၢအသိးဝဲ တၢ်ကူတၢ်ကၤလၢ အညၣ်ဂ့ၤတဂၤန့ၣ် အစုခံခီအပူၤလီၤ.+ ဒီးပှၤတဂၤအံၤ ဟံးန့ၢ်ဝဲဝံၤဒီး ဟးထီၣ်ကွံာ်ဝဲလီၤ. ၈ လၢခ့ရူာ်တဖၣ် အဒံးဆ့ဖီလာ်န့ၣ် အိၣ်ဝဲဒီး တၢ်လၢအလီၤဂာ်ဒီး ပှၤကညီအစုလီၤ.+

၉ ဖဲယကွၢ်တၢ်အခါ ယထံၣ်ဘၣ် လ့ၣ်ကဟၣ် အပၣ်လွံၢ်ပၣ် အိၣ်လၢ ခ့ရူာ်တဖၣ် အကပၤလီၤ. လၢခ့ရူာ်တဂၤစုာ်စုာ် အကပၤန့ၣ် အိၣ်ဝဲဒီး လ့ၣ်ကဟၣ်အပၣ် တခါစုာ်စုာ်လီၤ. ဒီးလ့ၣ်ကဟၣ် အပၣ်တဖၣ်န့ၣ် ကပြုၢ်ကပြီၤ လီၤဂာ်ဒ် တၢ်မျၢ်ဘီလါ အသိးလီၤ.+ ၁၀ လ့ၣ်ကဟၣ်အပၣ် လွံၢ်ပၣ်လၢာ်န့ၣ် လီၤဂာ်လိာ်အသးလီၤ. ဒီးလီၤဂာ်လၢ လ့ၣ်ကဟၣ်အပၣ်တဖၣ်အံၤ အိၣ်ဝဲ ဒ်အံၤလီၤ. လၢလ့ၣ်ကဟၣ် အပၣ်တပၣ်စုာ်စုာ် အကွီၤပူၤန့ၣ် အိၣ်ဒီးလ့ၣ်ကဟၣ် အပၣ်အဂၤတပၣ်လီၤ. ၁၁ ဖဲလ့ၣ်ကဟၣ်အပၣ်တဖၣ် လဲၤတၢ်အခါ အတလိၣ် ဃၣ်အသးဘၣ်, ဘၣ်ဆၣ် လဲၤတၢ်န့ၢ် လွံၢ်ကပၤလၢာ်လီၤ. ဒီးလ့ၣ်ကဟၣ် အပၣ်တဖၣ်န့ၣ် လဲၤဝဲတၢ်လီၢ်လၢ ခ့ရူာ်အခိၣ်လိၤအလီၢ် ဒီးလ့ၣ်ကဟၣ်အပၣ်တဖၣ် တလိၣ်ဃၣ်အသးဘၣ်. ၁၂ ဒီးခ့ရူာ်တဖၣ် အမိၢ်ပှၢ် ဒီတဂၤမ့ၢ်ဂ့ၤ, အချၢဃံလိၤမ့ၢ်ဂ့ၤ, အစုလိၤမ့ၢ်ဂ့ၤ, အဒံးဆ့လိၤမ့ၢ်ဂ့ၤ အိၣ်ဒီးအမဲာ်ချံတဖၣ် ပှဲၤပှဲၤလီၤ. ဒီးလ့ၣ်ကဟၣ်အပၣ်လၢ အအိၣ်လၢ အဝဲသ့ၣ်လွံၢ်ဂၤ အကပၤစ့ၢ်ကီး အိၣ်ဒီးအမဲာ်ချံတဖၣ် ပှဲၤပှဲၤလီၤ.+ ၁၃ ယနၢ်ဟူ တၢ်ကလုၢ်တခါ လၢအတဲဝဲ လ့ၣ်ကဟၣ်အပၣ်လၢ “လ့ၣ်ကဟၣ်အပၣ်ဧၢ, လဲၤဟီ.”

၁၄ အဝဲသ့ၣ် တဂၤစုာ်စုာ်န့ၣ်* အိၣ်ဒီးအမဲာ်သၣ် လွံၢ်ဘ့ၣ်လီၤ. အမဲာ်သၣ် အဆိကတၢၢ်တဘ့ၣ်န့ၣ် လီၤဂာ်ဒီး ခ့ရူာ် အမဲာ်သၣ်, အမဲာ်သၣ် ခံဘ့ၣ်တဘ့ၣ်န့ၣ် လီၤဂာ်ဒီး ပှၤကညီအမဲာ်သၣ်, ဒီးအမဲာ်သၣ် သၢဘ့ၣ်တဘ့ၣ်န့ၣ် လီၤဂာ်ဒီး ခ့ယုၢ် အမဲာ်သၣ် ဒီးအမဲာ်သၣ် လွံၢ်ဘ့ၣ်တဘ့ၣ်န့ၣ် လီၤဂာ်ဒီး လံာ်ကြီကြာ် အမဲာ်သၣ်လီၤ.+

၁၅ ဒီးခ့ရူာ်တဖၣ် စိာ်ကစီၤထီၣ်အသးလီၤ. အဝဲသ့ၣ်တဖၣ်န့ၣ် မ့ၢ်ဝဲ မူခိၣ်ကလူးတဖၣ်လၢ ယထံၣ်ဘၣ်တ့ၢ်အီၤ ဖဲထံကျိကဘၢ် အကပၤလီၤ.+ ၁၆ ဖဲခ့ရူာ်တဖၣ်အံၤ သုးအသးအခါ လ့ၣ်ကဟၣ်အပၣ်တဖၣ် သုးပိာ်အဝဲသ့ၣ်အခံလီၤ. ဒီးဖဲခ့ရူာ်တဖၣ် ယူာ်ထီၣ်အဒံးဆ့ ဒီးသုးကစီၤထီၣ်အသးလၢ တၢ်ဖးဖီ လၢဟီၣ်ခိၣ်အဖီခိၣ်အခါ လ့ၣ်ကဟၣ်အပၣ်တဖၣ် တဃၣ်ကွံာ်အသး ဒီးတသုးယံၤထီၣ်အသး လၢအဝဲသ့ၣ် အအိၣ်ဘၣ်.+ ၁၇ ဒီးဖဲခ့ရူာ်တဖၣ် အိၣ်ပတုာ်အခါ လ့ၣ်ကဟၣ်အပၣ်တဖၣ် အိၣ်ပတုာ်ဝဲလီၤ. ဒီးဖဲခ့ရူာ်တဖၣ် စိာ်ကစီၤထီၣ်အသးအခါ အဝဲသ့ၣ် သုးကစီၤထီၣ်အသး, မ့ၢ်လၢ သးစီဆှံလၢ အဟံးစုနဲၣ်ကျဲ မူခိၣ်ကလူးတဖၣ်န့ၣ် အိၣ်ဝဲလၢ လ့ၣ်ကဟၣ်အပၣ်တဖၣ်အပူၤစ့ၢ်ကီး အဃိလီၤ.

၁၈ ဒီးယဟိဝၤယွၤ အလၤကပီၤ+ သုးထီၣ်ကွံာ်အသးလၢ တၢ်လုၢ်ဟံၣ် အတြဲၤခီၣ်ထံး ဒီးလဲၤအိၣ်ပတုာ်ဝဲလၢ ခ့ရူာ်တဖၣ် အဖီခိၣ်လီၤ.+ ၁၉ ဒီးဖဲယကွၢ်တၢ်အခါ ယထံၣ်ဘၣ်လၢ ခ့ရူာ်တဖၣ် ယူာ်ထီၣ်အဒံးဆ့ ဒီးသုးကစီၤထီၣ်အသးလၢ တၢ်ဖးဖီ လၢဟီၣ်ခိၣ် အဖီခိၣ်လီၤ. ဖဲအဝဲသ့ၣ် သုးအသးအခါ လ့ၣ်ကဟၣ်အပၣ်တဖၣ် သုးပိာ်အခံလီၤ. ဒီးအဝဲသ့ၣ် အိၣ်ပတုာ်ဝဲလၢ ယဟိဝၤယွၤ အဟံၣ်တြဲၤ လၢမုၢ်ထီၣ်တခီ အကျဲနုာ်လီၤအလီၢ် ဒီးအံၣ်စရ့လးအကစၢ်ယွၤ အလၤကပီၤ အိၣ်လၢအဝဲသ့ၣ် အဖီခိၣ်လီၤ.+

၂၀ အဝဲသ့ၣ်မ့ၢ်ဝဲ မူခိၣ်ကလူးတဖၣ်လၢ ယထံၣ်တ့ၢ်အီၤလၢ အံၣ်စရ့လး အကစၢ်ယွၤ အလီၢ်ပစိာ် အဖီလာ် လၢထံကျိကဘၢ် အကပၤလီၤ.+ အဃိ ယသ့ၣ်ညါထီၣ်လၢ အဝဲသ့ၣ်မ့ၢ်ဝဲ ခ့ရူာ်တဖၣ်လီၤ. ၂၁ ဒီးအဝဲသ့ၣ် လွံၢ်ဂၤလၢာ်န့ၣ် အိၣ်ဝဲဒီး အမဲာ်သၣ်လွံၢ်ဘ့ၣ် စုာ်စုာ် ဒီးအဒံးဆ့ လွံၢ်ဘ့ၣ် စုာ်စုာ်လီၤ. ဒီးတၢ်လၢ အလီၤဂာ်ဒီး ပှၤကညီအစု အိၣ်ဝဲလၢ အဒံးဆ့တဖၣ် အဖီလာ်လီၤ.+ ၂၂ ဒီးအဝဲသ့ၣ် အမဲာ်သၣ်န့ၣ် လီၤဂာ်ဒီး တၢ်မဲာ်သၣ်တဖၣ်လၢ ယထံၣ်ဘၣ်လၢ ထံကျိကဘၢ် အကပၤလီၤ.+ ဒီးခ့ရူာ်တဂၤစုာ်စုာ်န့ၣ် လဲၤတၢ်လၢအမဲာ်ညါ လိၤလိၤလီၤ.+

၁၁ ဒီးသးစီဆှံ* စိာ်ထီၣ်ယၤ ဒီးလဲၤဆှၢယၤလၢ ယဟိဝၤယွၤ အဟံၣ်တြဲၤ လၢမုၢ်ထီၣ်တခီလီၤ. တြဲၤအံၤအမဲာ်ညါန့ၣ် အိၣ်ဝဲလၢ မုၢ်ထီၣ်တခီလီၤ.+ ဒီးဖဲတြဲၤ အကျဲနုာ်လီၤအလီၢ်န့ၣ် ယထံၣ်ဘၣ် ပှၤပိာ်ခွါ ၂၅ ဂၤ လၢအမ့ၢ် ပှၤဂီၢ်မုၢ်အပဒိၣ်တဖၣ်လီၤ. ဒီးလၢအဝဲသ့ၣ် အကျါန့ၣ် အိၣ်ဝဲဒီး စီၤဧၤစူၢ် အဖိခွါ စီၤယၤစါနယၤ ဒီးစီၤဘနါယၤ အဖိခွါ စီၤပလၤတယၤလီၤ.+ ၂ ဒီးကစၢ်ယွၤတဲယၤလၢ “ပှၤကညီဖိခွါဧၢ, အဝဲသ့ၣ် မ့ၢ်ပှၤလၢအကူၣ်ထီၣ် တၢ်အၢတၢ်သီ ဒီးမ့ၢ်ပှၤလၢ အဟ့ၣ်ကူၣ် တၢ်လၢအအၢအသီ လၢဝ့ၢ်တဖျၢၣ်အံၤ အပူၤလီၤ. ၃ အဝဲသ့ၣ် တဲဝဲလၢ ‘ခဲအံၤမ့ၢ်ဝဲ တၢ်ဆၢကတီၢ်လၢ ပကသူၣ်ထီၣ်ဟံၣ်တဖၣ် တမ့ၢ်ဧီၤ.+ ဝ့ၢ်တဖျၢၣ်အံၤ* မ့ၢ်ဝဲ သပၢၤဖီအီၣ်တၢ်+ ဒီးပမ့ၢ် တၢ်ညၣ်လီၤ.’*

၄ “ပှၤကညီဖိခွါဧၢ, တဲဝံအတၢ်စံးပာ်လၢ အထီဒါအဝဲသ့ၣ်ဟီ. တဲတၢ်ဒ် ဝံအသိးဟီ.”+

၅ ဒီးယဟိဝၤယွၤ အသးစီဆှံ ဟဲလီၤလၢယလိၤ+ ဒီးကစၢ်ယွၤ တဲယၤလၢ “နကဘၣ်တဲလၢ ‘ယဟိဝၤယွၤ တဲဝဲလၢ “အိ ပှၤအံၣ်စရ့လးဖိသ့ၣ်ဧၢ, တၢ်လၢသုတဲန့ၣ် ဘၣ်လီၤ. သုဆိကမိၣ် တၢ်မနုၤလဲၣ်န့ၣ် ယသ့ၣ်ညါပာ်စၢၤလံ. ၆ လၢဝ့ၢ်တဖျၢၣ်အံၤအပူၤန့ၣ် ပှၤဘၣ်သံလၢသုဃိအါမး ဒီးသုမၤပှဲၤ ဝ့ၢ်အကျဲတဖၣ်လၢ ပှၤသံအစိၣ်လီၤ.”’”+ ၇ “အဃိ တၢ်ပၢကစၢ် ယဟိဝၤယွၤ တဲဝဲလၢ ‘ပှၤသံအစိၣ်တဖၣ်လၢ သုမၤပြံပြါအီၤလၢ ဝ့ၢ်ပူၤန့ၣ် မ့ၢ်ဝဲတၢ်ညၣ် ဒီးဝ့ၢ်န့ၣ်မ့ၢ်ဝဲ သပၢၤဖီအီၣ်တၢ်လီၤ.+ ဘၣ်ဆၣ် မ့မ့ၢ် သုဝဲသ့ၣ်အံၤ တၢ်ကထုးထီၣ်ကွံာ်သု လၢဝ့ၢ်ပူၤလီၤ.’”

၈ “တၢ်ပၢကစၢ် ယဟိဝၤယွၤ တဲဝဲလၢ ‘သုပျံၤတၢ်ဒုး+ ဘၣ်ဆၣ် ယကမၤဒ်သိး ပှၤကဟဲဒုးသုလီၤ. ၉ ယကထုးထီၣ်ကွံာ်သုလၢ ဝ့ၢ်ပူၤ ဒီးယကဟ့ၣ်လီၤသုလၢ ပှၤထံဂၤကီၢ်ဂၤဖိတဖၣ် အစုပူၤ ဒီးယကစံၣ်ညီၣ်သုလီၤ.+ ၁၀ သုကသံလၢ နးအဃိလီၤ.+ ယကစံၣ်ညီၣ်သု ဖဲအံၣ်စရ့လး အကီၢ်ဆၢ+ ဒီးသုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.+ ၁၁ ဝ့ၢ်န့ၣ် တကဲထီၣ် သပၢၤဖီအီၣ်တၢ် လၢသုဂီၢ်ဘၣ် ဒီးသုတကဲထီၣ် တၢ်ညၣ်လၢ အအိၣ်လၢ အပူၤစ့ၢ်ကီးဘၣ်. ယကစံၣ်ညီၣ်သု ဖဲအံၣ်စရ့လး အကီၢ်ဆၢလီၤ. ၁၂ ဒီးသုကသ့ၣ်ညါဘၣ်လၢ ယမ့ၢ်ယဟိဝၤယွၤလီၤ. သုတလဲၤတၢ်ဒ် ယတၢ်ဘျၢတဖၣ်အသိးဘၣ် ဒီးသုတအိၣ်မူမၤထွဲ ယတၢ်သိၣ်တၢ်သီတဖၣ်ဘၣ်.+ တကးဒံးဘၣ် သုမၤဒ် ပှၤကလုာ်လၢ အအိၣ်ဝးတရံးသုတဖၣ် အတၢ်သိၣ်တၢ်သီအသိးလီၤ.’”+

၁၃ ဖဲယတဲတၢ်ဒ်ဝံအသိး ဝံၤအခါ စီၤဘနါယၤ အဖိခွါ စီၤပလၤတယၤန့ၣ် သံဝဲလီၤ. ဒီးယထိၣ်လီၤပှီၤယသး ဒီးယကိးပသူထီၣ်လၢ “အံၤအံ, တၢ်ပၢကစၢ် ယဟိဝၤယွၤဧၢ, နကမၤသံ ပှၤအံၣ်စရ့လးဖိလၢ အအိၣ်တ့ၢ်တဖၣ်န့ၣ် ခဲလၢာ်စ့ၢ်ကီးဧါ.”+

၁၄ ကစၢ်ယဟိဝၤယွၤ တဲယၤလၢ ၁၅ “ပှၤကညီဖိခွါဧၢ, ပှၤလၢအအိၣ်လၢ ဝ့ၢ်ယရူၤၡလ့ၣ်အပူၤတဖၣ်တဲဝဲ နဘူးနတံၢ်လၢ အအိၣ်ဒီး တၢ်ခွဲးတၢ်ယာ်လၢ ကပှ့ၤကဒါက့ၤတၢ် ဒီးပှၤအံၣ်စရ့လးဖိအဂၤခဲလၢာ်လၢ ‘အိၣ်မ့ၢ်ယံၤဒီး ယဟိဝၤယွၤ. ကီၢ်တဘ့ၣ်အံၤန့ၣ် မ့ၢ်ပတၢ်လီၤ. တၢ်ဟ့ၣ်လီၤပာ်စၢၤပှၤ ဝံၤလံ.’ ၁၆ လၢတၢ်န့ၣ်အဃိ နဘၣ်တဲလၢ ‘တၢ်ပၢကစၢ် ယဟိဝၤယွၤ တဲဝဲလၢ “ယနီဟးထီၣ်ကွံာ် အဝဲသ့ၣ်ဆူ တၢ်လီၢ်ဖးယံၤ လၢပှၤကလုာ်အဂၤအကျါ ဒီးယမၤပြံပြါအဝဲသ့ၣ် လၢထံကီၢ်အဂၤတဖၣ်အပူၤ ဘၣ်ဆၣ်+ ဖဲထံကီၢ်လၢအဝဲသ့ၣ် လဲၤအိၣ်ဝဲန့ၣ် ယကကဲထီၣ် တၢ်လီၢ်စီဆှံလၢ အဝဲသ့ၣ်အဂီၢ် တစိၢ်ဖိလီၤ.”’+

၁၇ “နကဘၣ်တဲလၢ ‘တၢ်ပၢကစၢ် ယဟိဝၤယွၤ တဲဝဲလၢ “ယကကိးဖှိၣ်က့ၤ သုဝဲလၢ အအိၣ်လၢ ပှၤကလုာ်တဖၣ်အကျါ ဒီးယကပာ်ဖှိၣ်ထီၣ်က့ၤ သုဝဲလၢ အလီၤပြံလီၤပြါ လၢကီၢ်အဂၤတဖၣ်အပူၤလီၤ. ဒီးယကဟ့ၣ်သုလၢ ကီၢ်အံၣ်စရ့လးလီၤ.+ ၁၈ သုကဟဲက့ၤ ဒီးကမၤလီၤမၢ်ကွံာ် တၢ်လၢ အလီၤသးဘၣ်အၢတဖၣ် ဒီးလုၢ်လၢ်လၢ အအၢအသီတဖၣ် ခဲလၢာ်လီၤ.+ ၁၉ ယကဟ့ၣ်လီၤသုလၢ တၢ်သးတဖျၢၣ်ဃီ+ ဒီးယကဟ့ၣ်လီၤသု တၢ်ပာ်သူၣ်ပာ်သးလၢ အသီလီၤ.+ ဒီးယကထုးထီၣ်ကွံာ် သုသးလၢ အလီၤဂာ်ဒ်လၢၢ်အသိး လၢသုနီၢ်ခိပူၤ+ ဒီးဟ့ၣ်လီၤသုသးလၢ အကပုာ်လုး ဒ်တၢ်ဖံးတၢ်ညၣ်အသိးလီၤ.*+ ၂၀ ယကမၤဒ်န့ၣ် ဒ်သိး သုကပိာ်ထွဲ ယတၢ်ဘျၢတဖၣ် ဒီးဒိကနၣ် ယတၢ်သိၣ်တၢ်သီတဖၣ် အဂီၢ်လီၤ. ဒီးသုမ့ၢ်မၤဒ်န့ၣ်န့ၣ် သုကကဲထီၣ် ယပှၤဂီၢ်မုၢ် ဒီးယကကဲထီၣ် သုကစၢ်ယွၤလီၤ.”’

၂၁ “‘တၢ်ပၢကစၢ် ယဟိဝၤယွၤ တဲဝဲလၢ “ပှၤလၢ အပာ်လီၤအသးလၢ ကဆဲးမၤ တၢ်လၢအလီၤသးဘၣ်အၢ ဒီးလုၢ်လၢ်လၢ အအၢအသီန့ၣ် ယကဟ့ၣ်ကၣ်က့ၤ အဝဲသ့ၣ် ဒ်တၢ်လၢ အဝဲသ့ၣ် မၤဝဲအသိးလီၤ.”’”

၂၂ ခ့ရူာ်တဖၣ် ယူာ်ထီၣ် အဒံးဆ့ ဒီးလ့ၣ်ကဟၣ်အပၣ်တဖၣ် အိၣ်ဘူးဒီးအဝဲသ့ၣ်+ ဒီးအံၣ်စရ့လး အကစၢ်ယွၤ အလၤကပီၤ အိၣ်လၢ အဝဲသ့ၣ် အဖီခိၣ်လီၤ.+ ၂၃ ဒီးယဟိဝၤယွၤ အလၤကပီၤ+ ဟးထီၣ်ကွံာ်လၢ ဝ့ၢ်အဖီခိၣ် ဒီးလဲၤအိၣ်ပတုာ်ဝဲလၢ ကစၢၢ်လၢ အအိၣ်လၢ ဝ့ၢ်အမုၢ်ထီၣ်တခီ အဖီခိၣ်လီၤ.+ ၂၄ တၢ်ထံၣ်လၢညါခီန့ၣ် ယထံၣ်ဘၣ်အီၤ ခီဖျိလၢ ကစၢ်ယွၤ အသးစီဆှံ* အဃိ ဒီးလၢတၢ်ထံၣ်လၢညါခီအပူၤန့ၣ် သးစီဆှံ စိာ်ထီၣ်ယၤ ဒီးက့ၤဆှၢယၤလၢ ပှၤလၢ အဘၣ်တၢ်က့ၤဖီၣ်အီၤတဖၣ် အအိၣ်လၢ ကီၢ်က့ၤစ့း အပူၤလီၤ. ဒီးတၢ်ထံၣ်လၢညါခီလၢ ယထံၣ်ဘၣ်န့ၣ် ကတၢၢ်ဝဲလီၤ. ၂၅ ဒီးတၢ်လၢ ယဟိဝၤယွၤ ဒုးနဲၣ်ယၤ ခဲလၢာ်န့ၣ် ယတဲဘၣ် ပှၤဂီၢ်မုၢ်လၢ အဘၣ်တၢ်က့ၤဖီၣ်အီၤတဖၣ်လီၤ.

၁၂ ကစၢ်ယဟိဝၤယွၤ တဲယၤလၢ ၂ “ပှၤကညီဖိခွါဧၢ, နအိၣ်လၢ ပှၤလၢအထီဒါတၢ်တဖၣ် အကျါလီၤ. အဝဲသ့ၣ် မ့ၢ်ပှၤလၢအထီဒါတၢ်တဖၣ်+ အဃိ အဝဲသ့ၣ် အမဲာ်ချံအိၣ်ဘၣ်ဆၣ် တထံၣ်တၢ်ဘၣ် ဒီးအနၢ်အိၣ်ဘၣ်ဆၣ် တနၢ်ဟူတၢ်ဘၣ်.+ ၃ ပှၤကညီဖိခွါဧၢ, မ့မ့ၢ်နၤန့ၣ် နကဘၣ်ဘိၣ်ထီၣ် နတၢ်ဘိၣ်တဖၣ် ဒ်ပှၤတဂၤလၢ ကဘၣ်တၢ်က့ၤဖီၣ်အီၤ အသိးလီၤ. ဒီးလၢမုၢ်ဆါခီ အဆၢကတီၢ် ဖဲအဝဲသ့ၣ် ကွၢ်တၢ်အခါန့ၣ် နကဘၣ်ဟးထီၣ် ဒ်ပှၤက့ၤဖီၣ်နၤ အသိးလီၤ. ဖဲအဝဲသ့ၣ် ကွၢ်တၢ် အဆၢကတီၢ်န့ၣ် နကဘၣ်ဟးထီၣ်လၢ နဟံၣ်ပူၤ ဒီးလဲၤလၢတၢ်လီၢ် အဂၤတတီၤ ဒ်တၢ်က့ၤဖီၣ်နၤ အသိးလီၤ. အဝဲသ့ၣ်န့ၣ် မ့ၢ်ပှၤလၢ အထီဒါတၢ်တဖၣ် သနာ်က့ ဘၣ်သ့ၣ်သ့ၣ် အဝဲသ့ၣ် ကဆိမိၣ်ထံဝဲ အခီပညီလီၤ. ၄ ဒီးလၢမုၢ်ဆါခီ အဆၢကတီၢ် ဖဲအဝဲသ့ၣ် ကွၢ်တၢ်အခါ နကဘၣ်စိာ်ထီၣ် နတၢ်ဘိၣ်လၢ နဘိၣ်ထီၣ်ပာ်စၢၤလၢ ပှၤကက့ၤဖီၣ်နၤ အဂီၢ်လီၤ. ဒီးလၢမုၢ်ဟါလီၤ အဆၢကတီၢ် ဖဲအဝဲသ့ၣ် ကွၢ်တၢ်အခါ နကဘၣ် ဟးထီၣ်ကွံာ် ဖဲန့ၣ် ဒ်ပှၤတဂၤလၢ အဘၣ်တၢ်က့ၤဖီၣ်အီၤ အသိးလီၤ.+

၅ “ဖဲအဝဲသ့ၣ် ကွၢ်တၢ်အဆၢကတီၢ် ဘၢၣ်ဖျိ တၢ်ပူၤတပူၤ လၢတၢ်ဒူၣ်ကပၤ ဒီးစိာ်ထီၣ် နတၢ်ဘိၣ်တဖၣ် ဒီးဟးထီၣ်လၢ တၢ်ပူၤအဝဲန့ၣ်တက့ၢ်.+ ၆ ဖဲအဝဲသ့ၣ် ကွၢ်တၢ်အခါ ယိးထီၣ် နတၢ်ဘိၣ်တဖၣ် လၢနဖံဘၣ်ခိၣ် ဒီးဟးယိးအီၤလၢ တၢ်ခံးကျါတက့ၢ်. ဒီးနကဘၣ် ကးဘၢဃာ်နမဲာ် ဒ်သိးနသုတထံၣ်လီၤ ဟီၣ်ခိၣ် တဂ့ၤအဂီၢ်လီၤ. မ့ၢ်လၢယပာ်နၤဒ်သိး နကကဲထီၣ် တၢ်ပနီၣ်လၢ ပှၤအံၣ်စရ့လးဖိတဖၣ် အဂီၢ်အဃိ နကဘၣ်မၤဒ်န့ၣ်လီၤ.”+

၇ ယမၤထွဲဒ် တၢ်မၤလိာ်ယၤအသိးလီၤ. ဖဲမုၢ်ဆါခီန့ၣ် ယစိာ်ထီၣ် ယတၢ်ဘိၣ် ဒ်ပှၤတဂၤလၢ ကဘၣ်တၢ်က့ၤဖီၣ်အီၤ အသိးလီၤ. ဒီးဖဲဟါလီၤခီန့ၣ် ယဘၢၣ်ဖျိတၢ်ဒူၣ်တပူၤ လၢတၢ်ဒူၣ် အကပၤ လၢယစုလီၤ. ဖဲတၢ်ခံးလီၤအဆၢကတီၢ်န့ၣ် ယစိာ်ထီၣ် ယတၢ်ဘိၣ်တဖၣ် ဒီးယယိးထီၣ်အီၤလၢ အဝဲသ့ၣ်အမဲာ်ညါလီၤ.

၈ ဖဲဂီၤခီန့ၣ် ယဟိဝၤယွၤ တဲယၤလၢ ၉ “ပှၤကညီဖိခွါဧၢ, ပှၤအံၣ်စရ့လးဖိလၢ အထီဒါတၢ်တဖၣ်အံၤ သံကွၢ်နၤလၢ ‘နဟးမၤ တၢ်မနုၤလဲၣ်’ န့ၣ်ဧါ. ၁၀ တဲအဝဲသ့ၣ်လၢ ‘တၢ်ပၢကစၢ် ယဟိဝၤယွၤ တဲဝဲလၢ “အဝဲအံၤမ့ၢ် တၢ်ကစီၣ်လၢ ဘၣ်ဃးဒီး ပှၤခိၣ်ပှၤနၢ်လၢ+ ဝ့ၢ်ယရူၤၡလ့ၣ်အပူၤ ဒီးပှၤအံၣ်စရ့လးဖိလၢ အအိၣ်လၢ ဝ့ၢ်ပူၤခဲလၢာ်လီၤ.”’

၁၁ “နကဘၣ်တဲလၢ နမ့ၢ်တၢ်ပနီၣ်+ ဒီးတၢ်ကကဲထီၣ်အသးဒီး အဝဲသ့ၣ် ဒ်နမၤပၠး အသိးလီၤ. ဒီးအဝဲသ့ၣ် ကဘၣ်တၢ်က့ၤဖီၣ်အီၤ ဒီးဒုးကဲကုၢ်အီၤလီၤ.+ ၁၂ ပှၤခိၣ်ပှၤနၢ်လၢ အအိၣ်လၢ အဝဲသ့ၣ်အကျါ တဂၤန့ၣ် ကဘၣ်ယိးထီၣ် အတၢ်ဘိၣ်တဖၣ် ဒီးဟးထီၣ်လၢ တၢ်ခံးကျါလီၤ. အဝဲ ကဘၢၣ်ဖျိ တၢ်ဒူၣ်အပူၤ, ကယိးထီၣ်အတၢ်ဘိၣ် ဒီးဟးထီၣ်ဝဲလၢ တၢ်ပူၤအဝဲန့ၣ်လီၤ.+ ဒီးအကကးဘၢအမဲာ်အဃိ အဝဲတထံၣ်လီၤ ဟီၣ်ခိၣ်ဘၣ်. ၁၃ ယကဒိးလီၤဃာ် ပျံၤသကွီၤလၢအဂီၢ် ဒီးအဝဲကလီၤလၢ ယပျံၤသကွီၤအပူၤလီၤ.+ ဒီးယကဆှၢအီၤလၢ ဘၤဘူၤလိၣ် လၢအမ့ၢ် ပှၤက့ၤစ့းဖိအကီၢ် ဘၣ်ဆၣ် အဝဲတထံၣ်ဘၣ်ဝဲ ကီၢ်အဝဲန့ၣ်ဘၣ် ဒီးအဝဲကသံဝဲ ဖဲန့ၣ်လီၤ.+ ၁၄ ဒီးပှၤလၢအအိၣ်ဝးတရံးအီၤတဖၣ် လၢအမ့ၢ် ပှၤလၢအမၤစၢၤအီၤ ဒီးအသုးဖိခဲလၢာ်န့ၣ် ယကမၤလီၤပြံလီၤပြါ အဝဲသ့ၣ်လၢ တၢ်လီၢ်ဝးဝး+ ဒီးယကလူၤထွဲ အဝဲသ့ၣ်အခံဒီးနးလီၤ.+ ၁၅ ဖဲယနီလဲၤ အဝဲသ့ၣ် လၢပှၤကလုာ်တဖၣ်အကျါ ဒီးဖဲယမၤလီၤပြံလီၤပြါ အဝဲသ့ၣ်လၢ ကီၢ်အဂၤတဖၣ်အပူၤအခါ အဝဲသ့ၣ် ကသ့ၣ်ညါဘၣ်ဝဲလၢ ယမ့ၢ်ယဟိဝၤယွၤလီၤ. ၁၆ ဘၣ်ဆၣ် ယကမၤပူၤဖျဲး အဝဲသ့ၣ်စှၤဂၤ လၢနး, တၢ်သၣ်ဝံၤလီၤဒိ ဒီးတၢ်ဆါသံသတြိာ်လီၤ. အဃိ ဖဲအဝဲသ့ၣ် လဲၤအိၣ်လၢ ပှၤကလုာ်တဖၣ်အကျါအခါ အဝဲသ့ၣ် ကတဲဖျါထီၣ် အလုၢ်လၢ်အအၢအသီ လၢအဝဲသ့ၣ် မၤတ့ၢ်ဝဲခဲလၢာ်လီၤ. ဒီးအဝဲသ့ၣ် ကသ့ၣ်ညါဘၣ်ဝဲလၢ ယမ့ၢ်ယဟိဝၤယွၤလီၤ.”

၁၇ ဒီးကစၢ်ယဟိဝၤယွၤ တဲယၤလၢ ၁၈ “ပှၤကညီဖိခွါဧၢ, နကဘၣ် အီၣ်နတၢ်အီၣ်လၢ တၢ်ကနိးကစုာ်အပူၤ ဒီးနကဘၣ် အီနထံလၢ တၢ်ပျံၤတၢ်ဖုး ဒီးတၢ်သူၣ်ကိၢ်သးဂီၤ အပူၤလီၤ.+ ၁၉ နကဘၣ်တဲဘၣ် ပှၤဂီၢ်မုၢ်တဖၣ်လၢ ‘ဘၣ်ဃးဒီး ပှၤလၢအအိၣ်လၢ ဝ့ၢ်ယရူၤၡလ့ၣ်လၢ ကီၢ်အံၣ်စရ့လး အပူၤန့ၣ် တၢ်ပၢကစၢ် ယဟိဝၤယွၤ တဲဝဲလၢ “အဝဲသ့ၣ် ကအီၣ်တၢ်အီၣ်လၢ တၢ်သူၣ်ကိၢ်သးဂီၤအပူၤ ဒီးကအီထံလၢ တၢ်ပျံၤတၢ်ဖုး အပူၤလီၤ. ဒီးအဝဲသ့ၣ် အဟီၣ်ကဝီၤ ကအိၣ်သယုၢ်ဝဲ ခဲလၢာ်ခဲဆ့+ ခီဖျိလၢ ပှၤဝ့ၢ်ဖိခဲလၢာ် အတၢ်မၤဆူၣ်မၤစိး အဃိလီၤ.+ ၂၀ ဒီးဝ့ၢ်တဖၣ်လၢ ခဲအံၤပှဲၤဝဲဒီး ပှၤကညီန့ၣ် ကဘၣ်တၢ်မၤဟးဂီၤအီၤ ဒီးကီၢ်န့ၣ် ကကဲထီၣ်တၢ်လီၢ်လၢ အအိၣ်သယုၢ်ဝဲလီၤ.+ ဒီးသုကသ့ၣ်ညါဘၣ်လၢ ယမ့ၢ်ယဟိဝၤယွၤလီၤ.”’”+

၂၁ ကစၢ်ယဟိဝၤယွၤ တဲယၤလၢ ၂၂ “ပှၤကညီဖိခွါဧၢ, လၢအံၣ်စရ့လးအပူၤန့ၣ် ပှၤတဲဝဲ တၢ်ကတိၤဒိလၢ ‘မုၢ်နံၤမုၢ်သီတဖၣ် လဲၤပူၤကွံာ်ဝဲ သနာ်က့ တၢ်ထံၣ်လၢညါခီတဖၣ်န့ၣ် တဟဲလၢပှဲၤထီၣ် နီတမံၤမၢၤ.’+ ၂၃ အဃိ တဲဘၣ်အဝဲသ့ၣ်လၢ ‘တၢ်ပၢကစၢ် ယဟိဝၤယွၤ တဲဝဲလၢ “ယကမၤပတုာ်ကွံာ် တၢ်ကတိၤတခါအံၤ ဒီးလၢအံၣ်စရ့လး အပူၤန့ၣ် ပှၤတသူဝဲ တၢ်ကတိၤဒိအံၤလၢၤဘၣ်.”’ ဒီးတဲအဝဲသ့ၣ်လၢ ‘မုၢ်နံၤတဖၣ်န့ၣ် ဘူးထီၣ်လံ+ ဒီးတၢ်ထံၣ်လၢညါခီတဖၣ်န့ၣ် ကဟဲလၢထီၣ်ပှဲၤထီၣ်ဝဲ ခဲလၢာ်လီၤ.’ ၂၄ ဒီးလၢပှၤအံၣ်စရ့လးဖိတဖၣ် အကျါန့ၣ် ဝံအဘျၣ် ဒီးပှၤဖးတၢ်ကမၤအသးလၢ ခါဆူညါ လၢအတဲမုာ်ပှၤနၢ်န့ၣ် တအိၣ်လၢၤဘၣ်.+ ၂၅ ‘တၢ်ပၢကစၢ် ယဟိဝၤယွၤ တဲဝဲလၢ “ယၤ, ယဟိဝၤယွၤ ကတဲတၢ်လီၤ. တၢ်လၢယကတဲ တမံၤဂ့ၤတမံၤဂ့ၤန့ၣ် ကဟဲလၢထီၣ်ပှဲၤထီၣ် ဒီးတစဲၤခံဘၣ်.+ အိ ပှၤလၢအထီဒါတၢ်သ့ၣ်ဧၢ, ဖဲသုစိၤန့ၣ်+ ယကတဲတၢ် ဒီးယကမၤလၢပှဲၤအီၤလီၤ.”’”

၂၆ ကစၢ်ယဟိဝၤယွၤ တဲယၤလၢ ၂၇ “ပှၤကညီဖိခွါဧၢ, ပှၤအံၣ်စရ့လးဖိတဖၣ် တဲဝဲလၢ နတၢ်ထံၣ်လၢညါခီန့ၣ် ကလၢထီၣ်ပှဲၤထီၣ်အဂီၢ် လိၣ်ဒံးဖးယံာ်ဒံး. ဒီးဝံအတၢ်စံးပာ်လၢ နတဲန့ၣ် ဘၣ်ဃးဒီး ခါဆူညါ ဖးယံာ်ဒံး.+ ၂၈ အဃိ တဲဘၣ်အဝဲသ့ၣ်လၢ ‘တၢ်ပၢကစၢ် ယဟိဝၤယွၤ တဲဝဲဒ်အံၤ “ယၤ, တၢ်ပၢကစၢ် ယဟိဝၤယွၤန့ၣ် ယတဲလၢ ‘တၢ်လၢယတဲ တမံၤဂ့ၤတမံၤဂ့ၤန့ၣ် ကဟဲကဲထီၣ်ဝဲ ဒီးတစဲၤခံဘၣ်.’”’”

၁၃ ကစၢ်ယဟိဝၤယွၤ တဲယၤလၢ ၂ “ပှၤကညီဖိခွါဧၢ, တဲတၢ်ဒ် ဝံအသိးလၢ ကဟ့ၣ်ပလီၢ် အံၣ်စရ့လး အဝံတဖၣ်အဂီၢ်တက့ၢ်.+ ဒီးပှၤလၢ အထုးထီၣ် ဝံအတၢ်စံးပာ်လၢ အနီၢ်ကစၢ် အခိၣ်နူာ်န့ၣ် တဲအဝဲသ့ၣ်လၢ+ ‘ကနၣ်တၢ်လၢ ယဟိဝၤယွၤ ကတဲန့ၣ်တက့ၢ်. ၃ တၢ်ပၢကစၢ် ယဟိဝၤယွၤ တဲဝဲလၢ “ဝံလၢအတကျီးဘၣ်တဖၣ်လၢ အတထံၣ်တၢ်ထံၣ်လၢညါခီ နီတမံၤဘၣ် ဒီးတဲတၢ်ဖဲအသးန့ၣ် ကဘၣ်ကီဘၣ်ခဲ သပှၢ်တၢၢ်လီၤ.+ ၄ အိ အံၣ်စရ့လးဧၢ, နဝံတဖၣ်န့ၣ် လီၤဂာ်ဒီး ထွံၣ်မံၤတဖၣ်လၢ အအိၣ်လၢ တၢ်ဟးဂူာ်ဟးဂီၤ အကျါလီၤ. ၅ သုဝဲလၢအမ့ၢ် ဝံတဖၣ်န့ၣ် တလဲၤဘၣ်လၢ ဝ့ၢ်ဒူၣ်အတၢ်လီၤဟိတဖၣ်အပူၤ ဒ်သိးကတ့ထီၣ်က့ၤဝဲ ဝ့ၢ်ဒူၣ်လၢ ပှၤအံၣ်စရ့လးဖိတဖၣ် အဂီၢ်လၢၤဘၣ်.+ အဃိ ဖဲယဟိဝၤယွၤ အမုၢ်နံၤန့ၣ် ပှၤအံၣ်စရ့လးဖိတဖၣ် ဆၢထၢၣ်လၢ တၢ်ဒုးအပူၤ တန့ၢ်လၢၤဘၣ်.”+ ၆ “သုထံၣ်တၢ်ထံၣ်လၢညါခီလၢ အတတီတလိၤဘၣ် ဒီးတဲဆိပာ်စၢၤတၢ်လၢ တၢ်လံၣ်တၢ်လီ အပူၤလီၤ. ဒီးယဟိဝၤယွၤ တဆှၢလီၤသုဘၣ် ဘၣ်ဆၣ် သုတဲလၢ ‘ယဟိဝၤယွၤ တဲဝဲဒ်အံၤ’ လီၤ. ဒီးသုဆိကမိၣ်လၢ တၢ်လၢသုတဲဆိပာ်စၢၤတဖၣ် ကဟဲလၢထီၣ်ပှဲၤထီၣ်လီၤ.+ ၇ ယတတဲသု တၢ်နီတမံၤဘၣ် သနာ်က့ သုတဲလၢ ‘ယဟိဝၤယွၤ တဲဝဲဒ်အံၤ’ လီၤ. အဃိ သုတၢ်ထံၣ်လၢညါခီန့ၣ် မ့ၢ်ဝဲ တၢ်လၢ အတတီတလိၤဘၣ် ဒီးတၢ်လၢ သုတဲဆိပာ်စၢၤအီၤန့ၣ် မ့ၢ်ဝဲတၢ်လံၣ်တၢ်လီ တမ့ၢ်ဧီၤ.”’

၈ “‘အဃိ တၢ်ပၢကစၢ် ယဟိဝၤယွၤ တဲဝဲလၢ “ယၤ, တၢ်ပၢကစၢ် ယဟိဝၤယွၤန့ၣ် ယတဲလၢ ‘မ့ၢ်လၢ သုတဲလံၣ်တဲလီတၢ် ဒီးသုတၢ်ထံၣ်လၢညါခီန့ၣ် တမ့ၢ်တတီဘၣ်အဃိ ယထီဒါသုလီၤ.’”+ ၉ ယထီဒါ ဝံတဖၣ်လၢ အထံၣ်တၢ်ထံၣ်လၢညါခီ လၢအတတီတလိၤ ဒီးအတဲဆိပာ်စၢၤတၢ် လၢတၢ်လံၣ်တၢ်လီ အပူၤလီၤ.+ လၢခံ အဝဲသ့ၣ် တအိၣ်ဘၣ်လၢ ပှၤဂီၢ်မုၢ်လၢ ယရ့အီၤဘူးဘူးတဖၣ် အကျါလၢၤဘၣ်. ဒီးအဝဲသ့ၣ် အမံၤန့ၣ် တဘၣ်တၢ်ကွဲးနီၣ်အီၤလၢ ပှၤအံၣ်စရ့လးဖိတဖၣ် အတၢ်ကွဲးနီၣ်အကျါလၢၤဘၣ်. ဒီးအဝဲသ့ၣ် တဟဲက့ၤဘၣ်လၢ ကီၢ်အံၣ်စရ့လး အပူၤလၢၤဘၣ်. ဒီးသုကသ့ၣ်ညါဘၣ် လၢယမ့ၢ် တၢ်ပၢကစၢ် ယဟိဝၤယွၤလီၤ.+ ၁၀ တၢ်ကကဲထီၣ်အသးဒီး အဝဲသ့ၣ်ဒ်န့ၣ်, မ့ၢ်လၢ တၢ်မုာ်တၢ်ခုၣ် တအိၣ်ဘၣ် သနာ်က့ အဝဲသ့ၣ် တဲဝဲလၢ “တၢ်မုာ်တၢ်ခုၣ်အိၣ်လံ” အဃိ အဝဲသ့ၣ် ဆှၢကမၣ် ယပှၤဂီၢ်မုၢ်လီၤ.+ ဖဲပှၤသူၣ်ထီၣ် တၢ်အဒူၣ်လၢ တကျၢၤအါအါဘၣ်အခါ အဝဲသ့ၣ် ဖှူဝါထီၣ်ဝဲလီၤ.’*+

၁၁ “တဲဘၣ်ပှၤလၢ အဖှူဝါထီၣ်တၢ်တဖၣ်န့ၣ်လၢ အတၢ်ဒူၣ်န့ၣ် ကလီၤပှီၢ်ဝဲလီၤ. တၢ်ကစူၤလီၤဖးဒိၣ်, သူၣ်တဖၣ်ကလီၤဝဲ ဒီးကလံၤမုၢ် လၢအဆူၣ်န့ၣ် ကဟဲမၤလီၤပှီၢ်ကွံာ် အတၢ်ဒူၣ်လီၤ.+ ၁၂ ဖဲတၢ်ဒူၣ်လီၤပှီၢ်ဝဲအခါ ပှၤကသံကွၢ်သုလၢ ‘သုဖှူဝါထီၣ် တၢ်ဒူၣ်ဒ်န့ၣ်န့ၣ် မ့ၢ်အကဲဘျုး တမံၤမံၤဧါ.’+

၁၃ “တၢ်ပၢကစၢ် ယဟိဝၤယွၤ တဲဝဲလၢ ‘ယကဒုးဟဲ ကလံၤမုၢ်ဆူၣ်ဆူၣ် လၢတၢ်သးဒိၣ်အပူၤ ဒီးယကဒုးစူၤလီၤတၢ်ဖးဒိၣ် လၢတၢ်သးထီၣ်အပူၤ ဒီးယကဒုးလီၤ သူၣ်လၢအမၤဟးဂီၤတၢ်တဖၣ် လၢတၢ်သူၣ်ဒိၣ်သးဖျိး အပူၤလီၤ. ၁၄ ယကမၤလီၤပှီၢ်ကွံာ် တၢ်ဒူၣ်လၢ သုဖှူဝါထီၣ်အီၤတဖၣ် ဒီးယကကွံာ်လီၤအီၤလၢ ဟီၣ်ခိၣ်လိၤလီၤ. ဒီးတၢ်ဒူၣ်အခီၣ်ထံး ကဖျါထီၣ်လီၤ. ဖဲဝ့ၢ်လီၤပှီၢ်ကွံာ်အခါ သုကတုၤလၢ တၢ်ဟးဂီၤ လၢဝ့ၢ်ပူၤလီၤ. ဒီးသုကသ့ၣ်ညါဘၣ်လၢ ယမ့ၢ်ယဟိဝၤယွၤလီၤ.’

၁၅ “‘ဖဲယပျၢ်လီၤကွံာ် ယတၢ်သးထီၣ် လၢာ်လၢာ်ဆ့ဆ့ လၢတၢ်ဒူၣ်အလိၤ ဒီးလၢပှၤလၢအဖှူဝါထီၣ်အီၤတဖၣ် အလိၤအခါ ယကတဲလၢ “တၢ်ဒူၣ်တအိၣ်လၢၤဘၣ် ဒီးပှၤလၢအဖှူဝါထီၣ်အီၤန့ၣ် တအိၣ်စ့ၢ်ကီးလၢၤဘၣ်.+ ၁၆ ဒီးအံၣ်စရ့လး အဝံတဖၣ်န့ၣ် လီၤမၢ်ကွံာ်လံ. အဝဲသ့ၣ် တဲဝဲဝံအတၢ်စံးပာ် လၢဘၣ်ဃးဒီး ယရူၤၡလ့ၣ် ဒီးဖဲတၢ်မုာ်တၢ်ခုၣ် တအိၣ်ဘၣ်အခါ အဝဲသ့ၣ် ထံၣ်ဝဲ တၢ်ထံၣ်လၢညါခီလၢ ဝ့ၢ်တဖျၢၣ်အံၤ အိၣ်ဝဲဒီး တၢ်မုာ်တၢ်ခုၣ်လီၤ.”’+ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.

၁၇ “ပှၤကညီဖိခွါဧၢ, ကွၢ်ဃီၤတၢ်ဆူ ပိာ်မုၣ်တဖၣ်လၢ နပှၤဂီၢ်မုၢ်အကျါ လၢအထုးထီၣ် ဝံအတၢ်စံးပာ် လၢအနီၢ်ကစၢ် အခိၣ်နူာ်တက့ၢ်. ဒီးတဲဝံအတၢ်စံးပာ်လၢ အထီဒါ အဝဲသ့ၣ်တက့ၢ်. ၁၈ တဲအဝဲသ့ၣ်လၢ ‘တၢ်ပၢကစၢ် ယဟိဝၤယွၤ တဲဝဲလၢ “ပှၤပိာ်မုၣ်တဖၣ်လၢ အဆးဝဲ စုပး* လၢပှၤခဲလၢာ်အဂီၢ် ဒီးခိၣ်ဖၢၣ်လၢ ကယဲၢ်ပှၤလၢအခိၣ်ဒိၣ်မ့ၢ်ဂ့ၤ ပှၤအခိၣ်ဆံးမ့ၢ်ဂ့ၤ အဂီၢ်န့ၣ် ကဘၣ်ကီဘၣ်ခဲ သပှၢ်တၢၢ်လီၤ. သုပိာ်မုၣ်တဖၣ်အံၤ သုမၤဒ်န့ၣ်န့ၣ် မ့ၢ်ဒၣ် သုလူၤဖီၣ် ယပှၤဂီၢ်မုၢ် အသးသမူ ဒီးသုအဲၣ်ဒိး မၤပူၤဖျဲးလီၤက့ၤ သုနီၢ်ကစၢ် အသးသမူ တမ့ၢ်ဧီၤ. ၁၉ မ့ၢ်သုကမၤဘၣ်ဒိ ယလၤကပီၤလၢ ယပှၤဂီၢ်မုၢ် အမဲာ်ညါ ဒ်သိး သုကန့ၢ်ဘၣ် ဘုမုယီၤ စှၤစှီၤ ဒီးကိၣ်တစဲးတမွဲး အဂီၢ်န့ၣ်ဧါ.+ သုမၤသံပှၤလၢ အတကြၢးသံဘၣ် ဒီးသုပာ်မူ ပှၤလၢအတကြၢးမူဘၣ် ဒီးသုမၤဒ်န့ၣ် ခီဖျိ သုလံၣ်အီၣ်လီအီၣ် ယပှၤဂီၢ်မုၢ်လၢ အဒိကနၣ်သုလီၤ.”’+

၂၀ “အဃိ တၢ်ပၢကစၢ် ယဟိဝၤယွၤ တဲဝဲလၢ ‘အိ ပှၤပိာ်မုၣ်သ့ၣ်ဧၢ, သုသူစုပးတဖၣ် လၢသုကဒိး ပှၤဂၤ ဒ်ထိၣ်အသိးအဃိ ယထီဒါသုလီၤ. ယကထုးတဲာ်ကွံာ် စုပးလၢ အအိၣ်လၢ သုစုလိၤ ဒီးပျၢ်လီၤကွံာ် ပှၤလၢသုဒိးအီၤ ဒ်ထိၣ်တဖၣ်အသိးလီၤ. ၂၁ ယကဖှီညာ်ကွံာ် သုခိၣ်ဖၢၣ်တဖၣ် ဒီးမၤပူၤဖျဲး ယပှၤဂီၢ်မုၢ်လၢ သုစုပူၤလီၤ. ဒီးအဝဲသ့ၣ် တကဲတၢ်လၢ သုကဘၣ်ဒိးအီၤလၢ ပျံၤသကွီၤအပူၤလၢၤဘၣ်. ဒီးသုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.+ ၂၂ ယတအဲၣ်ဒိး မၤကီမၤခဲ ပှၤတီပှၤလိၤဘၣ် သနာ်က့ သုမၤလီၤစၢ် အဝဲသ့ၣ်အသး ခီဖျိလၢ သုတၢ်လံၣ်တၢ်လီတဖၣ်လီၤ.+ ဒီးသုမၤဆူၣ်ထီၣ် ပှၤအၢပှၤသီအစုလီၤ.+ အဃိ အဝဲသ့ၣ် တပတုာ်ကွံာ် အတၢ်မၤလၢ အအၢအသီဘၣ် ဒီးတမ့ၢ်လၢ အဝဲသ့ၣ်ကဆဲးအိၣ်မူဘၣ်ဝဲဘၣ်.+ ၂၃ အဃိ သုဝဲ ပှၤပိာ်မုၣ်တဖၣ်အံၤန့ၣ် သုတထံၣ်ဘၣ် တၢ်ထံၣ်လၢညါခီလၢ အတတီတလိၤလၢၤဘၣ် ဒီးသုတတဲဆိပာ်စၢၤဘၣ်တၢ်လၢၤဘၣ်.+ ယကမၤပူၤဖျဲး ယပှၤဂီၢ်မုၢ်တဖၣ်လၢ သုစုပူၤ ဒီးသုကသ့ၣ်ညါဘၣ်လၢယမ့ၢ် ယဟိဝၤယွၤလီၤ.’”

၁၄ ဒီးအံၣ်စရ့လး အပှၤသူၣ်က့သးပှၢ်တနီၤ ဟဲဆ့ၣ်နီၤလၢ ယမဲာ်ညါလီၤ.+ ၂ ယဟိဝၤယွၤ တဲယၤလၢ ၃ “ပှၤကညီဖိခွါဧၢ, ပှၤသ့ၣ်တဖၣ်န့ၣ် ပာ်လီၤအသးလၢ ကပိာ်ဝဲ အတၢ်တၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်အခံ ဒီးပာ်လီၤတၢ်လီၤဃံၢ်အလီၢ်လၢ ပှၤဂၤကမၤဘၣ် တၢ်ဒဲးဘးအဂီၢ်လီၤ. အဃိ မ့ၢ်ယကဘၣ်စံးဆၢ တၢ်လၢအဝဲသ့ၣ် သံကွၢ်ဝဲဧါ.+ ၄ တဲဘၣ်အဝဲသ့ၣ်လၢ ‘တၢ်ပၢကစၢ် ယဟိဝၤယွၤ တဲဝဲလၢ “ပှၤအံၣ်စရ့လးဖိတဂၤ မ့ၢ်ပာ်လီၤအသးလၢ ကပိာ်ဝဲ အတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်အခံ ဒီးမ့ၢ်ပာ်လီၤတၢ်လီၤဃံၢ်အလီၢ်လၢ ပှၤဂၤကမၤဘၣ် တၢ်ဒဲးဘးအဂီၢ် ဒီးအမ့ၢ်ဟဲသံကွၢ်တၢ်လၢ ဝံတဂၤအအိၣ်န့ၣ် ယၤ, ယဟိဝၤယွၤ ကစံၣ်ညီၣ်အီၤလီၤ. ယကစံၣ်ညီၣ်အီၤနးထဲလဲၣ်န့ၣ် ကဒိးသန့ၤထီၣ်အသးလၢ အတၢ်ဂီၤတၢ်ဖှီၣ် အနီၣ်ဂံၢ်အါဝဲထဲလဲၣ် အဖီခိၣ်လီၤ. ၅ မ့ၢ်လၢ ပှၤအံၣ်စရ့လးဖိတဖၣ်န့ၣ် ဟးယံၤကွံာ်ဒီးယၤ ဒီးလဲၤပိာ် အတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်အခံအဃိ ယကဒုးလီၤဘၣ် တၢ်ပျံၤတၢ်ဖုးလၢ အဝဲသ့ၣ် အသးပူၤလီၤ.”’+

၆ “အဃိ တဲဘၣ် ပှၤအံၣ်စရ့လးဖိလၢ ‘တၢ်ပၢကစၢ် ယဟိဝၤယွၤ တဲဝဲလၢ “ဃၣ်ကွံာ်သုသးလၢ သုတၢ်ဂီၤတၢ်ဖှီၣ်လၢ အလီၤသးဘၣ်အၢအအိၣ် ဒီးဃၣ်ကွံာ်သုသးလၢ သုလုၢ်လၢ်လၢ အအၢအသီ ခဲလၢာ်အအိၣ် ဒီးဟဲက့ၤလၢယအိၣ်တက့ၢ်.+ ၇ ပှၤအံၣ်စရ့လးဖိမ့ၢ်ဂ့ၤ, ပှၤထံဂၤကီၢ်ဂၤဖိလၢ အအိၣ်လၢ အံၣ်စရ့လး အကီၢ်ပူၤမ့ၢ်ဂ့ၤ လၢအထုးယံၤထီၣ်အသးဒီးယၤ ဒီးပာ်လီၤအသးလၢ အကပိာ်ဝဲ အတၢ်ဂီၤတၢ်ဖှီၣ်လၢ အလီၤသးဘၣ်အၢ တဖၣ်အခံ ဒီးပာ်လီၤ တၢ်လီၤဃံၢ် အလီၢ်လၢ ပှၤဂၤကမၤဘၣ် တၢ်ဒဲးဘးအဂီၢ်န့ၣ် အဝဲမ့ၢ်ဟဲလၢ ယဝံတဂၤအအိၣ်+ ဒ်သိးကသံကွၢ်တၢ်အဂီၢ်န့ၣ် ယၤ ယဟိဝၤယွၤအံၤ ယကစံးဆၢက့ၤအီၤလၢ ယနီၢ်ကစၢ်လီၤ. ၈ ယကထီဒါ ပှၤတဂၤန့ၣ် ဒီးယကဒုးကဲထီၣ်အီၤလၢ တၢ်ဟ့ၣ်ပလီၢ် ဒီးတၢ်ကတိၤဒိလၢ ပှၤဂၤအဂီၢ်လီၤ. ဒီးယကမၤသံကွံာ်အီၤ+ ဒီးဖဲန့ၣ်န့ၣ် သုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.”’

၉ “‘ဘၣ်ဆၣ် ဝံတဂၤ မ့ၢ်ဘၣ်တၢ်ကွဲန့ၢ်လွဲန့ၢ်အီၤ ဒီးမ့ၢ်စံးဆၢတၢ်န့ၣ် ပှၤလၢအကွဲန့ၢ်လွဲန့ၢ် ဝံတဂၤန့ၣ်န့ၣ် မ့ၢ်ဒၣ်ယၤ, ယဟိဝၤယွၤလီၤ.+ ဒီးယကယၤထီၣ်ယစု လၢယကစံၣ်ညီၣ်အီၤအဂီၢ် ဒီးယကမၤသံကွံာ်အီၤလီၤ. ၁၀ အဝဲသ့ၣ် ကတူၢ်ဘၣ်တၢ် လၢအတၢ်ကမၣ်အဃိ ဒီးပှၤလၢအလဲၤသံကွၢ်တၢ်မ့ၢ်ဂ့ၤ, ဝံတဂၤန့ၣ်မ့ၢ်ဂ့ၤ ကအိၣ်ဒီးတၢ်ကမၣ် ဒ်သိးသိးလီၤ. ၁၁ တၢ်ကမၤအသးဒ်န့ၣ် ဒ်သိးပှၤအံၣ်စရ့လးဖိတဖၣ် သုတဟးယံၤဒီးယၤ ဒီးဒ်သိးအသု တမၤဘၣ်အၢလီၤအသးလၢ တၢ်ကမၣ်တဖၣ်အဃိ လၢၤတဂ့ၤအဂီၢ်လီၤ. ဒီးအဝဲသ့ၣ် ကကဲထီၣ် ယပှၤဂီၢ်မုၢ် ဒီးယကကဲထီၣ် အဝဲသ့ၣ် အကစၢ်ယွၤလီၤ.’+ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.”

၁၂ ကစၢ်ယဟိဝၤယွၤ တဲယၤလၢ ၁၃ “ပှၤထံဖိကီၢ်ဖိလၢ အအိၣ်လၢ ကီၢ်ပူၤ မ့ၢ်မၤကမၣ်ယၤ ခီဖျိ အတတီဒီးယၤဘၣ်န့ၣ် ယကယၤထီၣ်ယစု လၢယကထီဒါအဝဲသ့ၣ်အဂီၢ် ဒီးယကမၤဟးဂီၤ အဝဲသ့ၣ် အတၢ်အီၣ်+ ဒီးယကဒုးအိၣ်ထီၣ် တၢ်သၣ်ဝံၤလီၤဒိ+ ဒီးမၤသံ ပှၤကညီ ဒီးဆၣ်ဖိကီၢ်ဖိလၢ အအိၣ်လၢကီၢ်ပူၤလီၤ.”+ ၁၄ “တၢ်ပၢကစၢ် ယဟိဝၤယွၤ တဲဝဲလၢ ‘ပှၤသၢဂၤ လၢအမ့ၢ် စီၤနိအၤ,+ စီၤဒၤနံးယ့လး+ ဒီးစီၤယိၤဘး+ မ့ၢ်အိၣ်လၢ ကီၢ်တဘ့ၣ်န့ၣ်အပူၤန့ၣ် အဝဲသ့ၣ် အတၢ်တီတၢ်လိၤ မၤပူၤဖျဲး ကသ့ထဲ အနီၢ်ကစၢ်လီၤ.’”+

၁၅ “‘ယမ့ၢ်ဒုးလဲၤနုာ်လီၤဘၣ်ဖုး ဆၣ်ဖိကီၢ်ဖိအအၢ လၢကီၢ်ပူၤန့ၣ် အဝဲသ့ၣ် ကအ့ၣ်သံ ပှၤကီၢ်ဖိအါဂၤလီၤ. ဒီးခီဖျိလၢ ဆၣ်ဖိကီၢ်ဖိ အအၢတဖၣ်အဃိ ပှၤလဲၤလၢကီၢ်ပူၤတဘူၣ်နီတဂၤဘၣ် ဒီးကီၢ်န့ၣ် ကအိၣ်သယုၢ်လီၤ.+ ၁၆ ဒ်ယမ့ၢ်ပှၤလၢအမူဝဲ သပှၢ်တၢၢ်အသိး ယအၢၣ်လီၤလၢ စီၤနိအၤ, စီၤဒၤနံးယ့လး ဒီးစီၤယိၤဘး မ့ၢ်အိၣ်လၢ ကီၢ်တဘ့ၣ်န့ၣ်အပူၤသနာ်က့ အဝဲသ့ၣ် မၤပူၤဖျဲး အဖိမုၣ်ဖိခွါတဖၣ် တန့ၢ်ဘၣ်. အဝဲသ့ၣ်မၤပူၤဖျဲး ကသ့ထဲ အနီၢ်ကစၢ်လီၤ. ဒီးကီၢ်န့ၣ် ကအိၣ်သယုၢ်ဝဲလီၤ.’ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.”

၁၇ “‘ယမ့ၢ်ဆှၢလီၤဘၣ်ဖုးနးလၢ ကီၢ်ပူၤ+ ဒီးတဲလၢ “မ်နးတဘ့ၣ် လဲၤတၢ်လၢကီၢ်ပူၤတက့ၢ်.” ဒီးယမ့ၢ်မၤသံ ပှၤကညီ ဒီးဆၣ်ဖိကီၢ်ဖိန့ၣ်+ ၁၈ ဒ်ယမ့ၢ်ပှၤလၢအမူဝဲ သပှၢ်တၢၢ်အသိး ယအၢၣ်လီၤလၢ စီၤနိအၤ, စီၤဒၤနံးယ့လး ဒီးစီၤယိၤဘး မ့ၢ်အိၣ်လၢ ကီၢ်ပူၤသနာ်က့ အဝဲသ့ၣ် မၤပူၤဖျဲး အဖိမုၣ်ဖိခွါတဖၣ် တန့ၢ်ဘၣ်. အဝဲသ့ၣ်မၤပူၤဖျဲး ကသ့ထဲ အနီၢ်ကစၢ်လီၤ.’ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.”

၁၉ “‘ယမ့ၢ်ဒုးလီၤဘၣ်ဖုး တၢ်ဆါသံသတြိာ် လၢကီၢ်ပူၤ+ ဒီးလူလီၤယတၢ်သးထီၣ်လၢ ကမၤသံ ပှၤကညီ ဒီးဆၣ်ဖိကီၢ်ဖိန့ၣ် ၂၀ ဒ်ယမ့ၢ်ပှၤလၢအမူဝဲ သပှၢ်တၢၢ်အသိး ယအၢၣ်လီၤလၢ စီၤနိအၤ,+ စီၤဒၤနံးယ့လး+ ဒီးစီၤယိၤဘး+ မ့ၢ်အိၣ်လၢ ကီၢ်ပူၤသနာ်က့ အဝဲသ့ၣ် မၤပူၤဖျဲး အဖိမုၣ်ဖိခွါတဖၣ် တန့ၢ်ဘၣ်. အဝဲသ့ၣ် အတၢ်တီတၢ်လိၤ မၤပူၤဖျဲး ကသ့ထဲ အနီၢ်ကစၢ်လီၤ.’+ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.”

၂၁ “တၢ်ပၢကစၢ် ယဟိဝၤယွၤ တဲဝဲလၢ ‘ဒ်န့ၣ်အသိး ဖဲယဆှၢလီၤ ယတၢ်စံၣ်ညီၣ်လွံၢ်မံၤ+ လၢအမ့ၢ် နး, တၢ်သၣ်ဝံၤလီၤဒိ, ဆၣ်ဖိကီၢ်ဖိလၢ အလီၤပျံၤလီၤဖုး ဒီးတၢ်ဆါသံသတြိာ်လၢ+ ဝ့ၢ်ယရူၤၡလ့ၣ်အခါ ပှၤကညီ ဒီးဆၣ်ဖိကီၢ်ဖိတဖၣ် ကသံဝဲဖဲန့ၣ်လီၤ.+ ၂၂ ဘၣ်ဆၣ် ပှၤတနီၤလၢ အအိၣ်တ့ၢ်လၢ ဝ့ၢ်ပူၤန့ၣ် ကပူၤဖျဲး+ ဃုာ်ဒီး အဖိမုၣ်အဖိခွါတဖၣ်လီၤ. ဒီးအဝဲသ့ၣ် ကဟဲလၢသုအိၣ်လီၤ. ဖဲသုထံၣ်ဘၣ် အဝဲသ့ၣ် အသကဲာ်ပဝး ဒီးတၢ်လၢအဝဲသ့ၣ် မၤဝဲတဖၣ်အခါ သုကသးမံ လၢယဒုးလီၤဘၣ် တၢ်ကီတၢ်ခဲလၢ ဝ့ၢ်ယရူၤၡလ့ၣ်အဖီခိၣ် ဒီးတၢ်ခဲလၢာ်လၢ ယမၤအီၤလၢ ဝ့ၢ်ယရူၤၡလ့ၣ် အပူၤလီၤ.’”

၂၃ “တၢ်ပၢကစၢ် ယဟိဝၤယွၤ တဲဝဲလၢ ‘ဖဲသုထံၣ်ဘၣ် အဝဲသ့ၣ် အသကဲာ်ပဝး ဒီးတၢ်လၢအဝဲသ့ၣ် မၤဝဲတဖၣ်အခါ သုကသးမံလီၤ. ဒီးသုကသ့ၣ်ညါလၢ တၢ်ဂ့ၢ်တၢ်ကျိၤ မ့ၢ်တအိၣ်ဘၣ်န့ၣ် ယတမၤဒ်န့ၣ်ဘၣ်.’”+

၁၅ ကစၢ်ယဟိဝၤယွၤ တဲယၤလၢ ၂ “ပှၤကညီဖိခွါဧၢ, တၢ်လၢ စပံးမုၢ်အထူၣ်န့ၣ် နမ့ၢ်ထိၣ်သတြီၤအီၤဒီး သ့ၣ်အဂၤ မ့တမ့ၢ် သ့ၣ်လၢပှၢ်လၢ်ကျါ အဒ့တဖၣ်န့ၣ် မ့ၢ်အလီၤဆီလိာ်အသး ဒ်လဲၣ်. ၃ စပံးမုၢ်အထူၣ်န့ၣ် မ့ၢ်နသူအီၤ လၢကမၤတၢ်မၤ တမံၤမံၤအဂီၢ် ကသ့ဧါ. ဒ်သိး ပှၤကဘျးလီၤ တၢ်ပီးတၢ်လီတဖၣ်အဂီၢ် မ့ၢ်ပှၤတ့နီၣ်ဘျးတၢ်လၢ စပံးမုၢ်အထူၣ် ကသ့ဧါ. ၄ နီၢ်ကီၢ်န့ၣ် ပှၤကွံာ်လီၤ စပံးမုၢ်အထူၣ်လၢ မ့ၣ်အူပူၤ ဒ်မ့ၣ်အူဆၣ်အသိး ဒီးမ့ၣ်အူန့ၣ် အီၣ်ကွံာ်ဝဲ အစိးနါ ခံခီလၢာ် တကးဒံးဘၣ် အခၢၣ်သးန့ၣ် ကိၢ်ဃိာ်ဝဲလီၤ. ဖဲပှၤမၤဒ်န့ၣ် ဝံၤအခါ ပှၤသူအီၤ လၢကမၤတၢ်မၤ တမံၤမံၤအဂီၢ် ကသ့ဒံးဧါ. ၅ တချုးလၢ မ့ၣ်အူအီၣ်အီၤဒံးဘၣ် သနာ်က့ အဘျုးတအိၣ် နီတမံၤဘၣ်. မ့မ့ၢ်ဒ်န့ၣ်န့ၣ် ဖဲမ့ၣ်အူ အီၣ်ကွံာ်ဝဲ အစိးနါခံခီလၢာ် ဒီးကိၢ်ဃိာ်ဝဲ ဝံၤအလီၢ်ခံ အဘျုးကအိၣ်ဒ်လဲၣ်.”

၆ “လၢတၢ်န့ၣ်အဃိ တၢ်ပၢကစၢ် ယဟိဝၤယွၤ တဲဝဲလၢ ‘ယကမၤ ပှၤလၢအအိၣ်လၢ ဝ့ၢ်ယရူၤၡလ့ၣ်အပူၤ ဒ်စပံးမုၢ်အထူၣ်လၢ ယကွံာ်လီၤ လၢမ့ၣ်အူအပူၤ ဒ်မ့ၣ်အူဆၣ် အသိးန့ၣ်လီၤ.+ ၇ ယထီဒါ အဝဲသ့ၣ်လံ. အဝဲသ့ၣ် ပူၤဖျဲးထီၣ်လၢ မ့ၣ်အူကျါ ဘၣ်ဆၣ် မ့ၣ်အူကအီၣ်ကွံာ် အဝဲသ့ၣ်လီၤ. ဖဲယထီဒါ အဝဲသ့ၣ်အခါ သုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.’”+

၈ “တၢ်ပၢကစၢ် ယဟိဝၤယွၤ တဲဝဲလၢ ‘မ့ၢ်လၢအဝဲသ့ၣ် အတၢ်သးတီ တအိၣ်ဘၣ်အဃိ+ ယကမၤအိၣ်သယုၢ်ကီၢ်လီၤ.’”+

၁၆ ကစၢ်ယဟိဝၤယွၤ တဲယၤလၢ ၂ “ပှၤကညီဖိခွါဧၢ, ဒုးသ့ၣ်ညါ ဝ့ၢ်ယရူၤၡလ့ၣ်လၢ ဘၣ်ဃးဒီး အလုၢ်လၢ်လၢ အအၢအသီအဂ့ၢ်တက့ၢ်.+ ၃ နကဘၣ်တဲလၢ ‘တၢ်ပၢကစၢ် ယဟိဝၤယွၤ တဲဝဲ ဝ့ၢ်ယရူၤၡလ့ၣ်လၢ “နထူနထံး အိၣ်လၢ ကီၢ်ကနၤဧၣ် ဒီးနအိၣ်ဖျဲၣ်ထီၣ် ဖဲန့ၣ်လီၤ. နပၢ်မ့ၢ်ဝဲ ပှၤအမိၢ်ဖိ+ ဒီးနမိၢ်မ့ၢ်ဝဲ ပှၤဃ့ၤသးဖိလီၤ.+ ၄ ဖဲနအိၣ်ဖျဲၣ်ထီၣ် အနံၤန့ၣ် ပှၤတကူးတဲာ် နဒ့ဘၣ်. ဒီးပှၤတသ့ကဆှီထီၣ်နၤဒီး ထံစ့ၢ်ကီးဘၣ်. ပှၤတထူးနၤလၢ အံသၣ်ဘၣ် ဒီးပှၤတဘိၣ်ထီၣ်နၤလၢ တၢ်ကံးညာ် စ့ၢ်ကီးဘၣ်. ၅ ပှၤတသးကညီၤနၤ ဒ်သိး ကမၤန့ၢ်နၤဒ်န့ၣ်အဂီၢ် နီတဂၤဘၣ်. ပှၤတသူၣ်အိၣ်သးအိၣ်နၤ နီတဂၤဘၣ်. ဖဲနအိၣ်ဖျဲၣ်ထီၣ် အနံၤန့ၣ် အဝဲသ့ၣ် သးဟ့နၤအဃိ တၢၤကွံာ်နၤ လၢတၢ်ပျီပူၤလီၤ.

၆ “‘“ဖဲယလဲၤဘၣ်ကျဲဖဲန့ၣ် အခါ ယထံၣ်လၢ နထူတကျာ်တၢ်လၢ နနီၢ်ကစၢ် အသွံၣ်ကျါလီၤ. ဖဲနမံနီၤလီၤလၢ နသွံၣ်ကျါအခါ ယတဲနၤလၢ ‘နကဆဲးမူလီၤ.’ နီၢ်ကီၢ်လီၤ, ဖဲနမံနီၤလီၤလၢ နသွံၣ်ကျါအခါ ယတဲနၤလၢ ‘နကဆဲးမူလီၤ.’ ၇ ယဒုးအါထီၣ်ဂီၢ်ထီၣ်နၤ ဒ်တၢ်မုၢ်တၢ်ဘိတဖၣ်လၢ အမဲထီၣ်ဝဲလၢ တၢ်ပျီပူၤအသိးလီၤ. ဒီးနဒိၣ်ထီၣ်ထီထီၣ် ဒီးနသိးတၢ်ကယၢကယဲလၢ အဂ့ၤကတၢၢ်တဖၣ်လီၤ. နနုၢ်တဖၣ်န့ၣ် ဒိၣ်ထီၣ်ဂ့ၤဂ့ၤ ဒီးနခိၣ်ဆူၣ် ထီဂ့ၤမး စ့ၢ်ကီးလီၤ. ဘၣ်ဆၣ် ဖဲန့ၣ်အခါ နအိၣ်ဘ့ၣ်ဆ့ဒံး ဒီးနတၢ်ကူတၢ်ကၤ တအိၣ်ဘၣ်.”’

၈ “တၢ်ပၢကစၢ် ယဟိဝၤယွၤ တဲဝဲလၢ ‘ဖဲယလဲၤဘၣ်လၢနအိၣ် ဒီးယထံၣ်နၤအခါ ယသ့ၣ်ညါလၢ နသးနံၣ် တုၤထီၣ်ထီၣ်ဘးလၢ နသ့ၣ်ညါထီၣ် တၢ်အဲၣ်လံ. အဃိ ယကးဘၢနၤလၢ ယတၢ်ကူတၢ်သိး+ ဒီးယမၤဘၢက့ၤ နတၢ်အိၣ်ဘ့ၣ်ဆ့ ဒီးယအၢၣ်လီၤတၢ်ဒီးနၤ ဒီးယမၤတၢ်အၢၣ်လီၤအီလီၤဒီးနၤလီၤ. ဒီးနကဲထီၣ် ယတၢ်လီၤ. ၉ တကးဒံးဘၣ် ယဒုးလုၢ်နၤထံ ဒီးသ့စီကွံာ် နသွံၣ်တဖၣ် ဒီးယဖှူနၤလၢ သိလီၤ.+ ၁၀ ယဒုးသိးထီၣ်နၤ ဆ့ကၤလၢ ပှၤဆးကံၣ်ဃ့အီၤ ဒီးယဟ့ၣ်နၤ ခီၣ်ဖံးလၢ ပှၤတ့အီၤလၢ ဆၣ်ဖိကီၢ်ဖိ အဘ့ၣ်လၢအဂ့ၤလီၤ. ဒီးယဒုးဖၢၣ်ထီၣ်နၤ တၢ်ကံးညာ်လၢအဂ့ၤ ဒီးယဒုးကူကၤထီၣ်နၤ တၢ်ကူတၢ်ကၤ လၢအပှ့ၤဒိၣ်လီၤ. ၁၁ ယမၤဃံမၤလၤထီၣ်နၤလၢ တၢ်ကယၢကယဲ ဒီးယဒုးသိးထီၣ်နၤထံဖှံၣ် ဒီးယဒုးလံာ်ထီၣ်နၤဖဲလီၤ. ၁၂ ယဒုးဒံးထီၣ်နၤ နါဒ့အကွီၤ ဒီးဒုးဒံးထီၣ်နၤ နၢ်ဒံး ဒီးဒုးဖျီၣ်ထီၣ်နၤ ခိၣ်သလုးဃံလၤလီၤ. ၁၃ နမၤဃံမၤလၤထီၣ်ဘၣ်နသးလၢ ထူဒီးစ့ ဒီးနကူသိးဘၣ် တၢ်ကူတၢ်ကၤလၢ အညၣ်ဂ့ၤ ဒီးအပှ့ၤဒိၣ်ဒိၣ် ဒီးဆ့ကၤလၢ ပှၤဆးကံၣ်ဃ့အီၤလီၤ. ဒီးနအီၣ်ဘၣ် ကိၣ်ကမူၣ်လၢအဂ့ၤ, ကနဲစီ ဒီးသိလီၤ. ဒီးနဒိၣ်ထီၣ် ဒီးနဒိၣ်တၢ်ဂ့ၤဒိၣ်မး+ ဒီးနကြၢးဒီး နီၢ်ပၤမုၣ်အလီၢ်လီၤ.’”

၁၄ “တၢ်ပၢကစၢ် ယဟိဝၤယွၤ တဲဝဲလၢ ‘ယပာ်လီၤ ယတၢ်လၤတၢ်ကပီၤလၢနလိၤ+ အဃိ နတၢ်ဃံတၢ်လၤန့ၣ် လၢပှဲၤဝဲလီၤ. ခီဖျိလၢ နတၢ်ဃံတၢ်လၤအဃိ နမံၤဟူသၣ်ဖျါလၢ ပှၤကလုာ်တဖၣ်အကျါလီၤ.’”+

၁၅ “‘ဘၣ်ဆၣ် လၢခံန့ၣ် နပာ်ထီၣ်ထီနသးလၢ နတၢ်ဃံတၢ်လၤအဃိလီၤ.+ ဒီးနကဲထီၣ် ပိာ်မုၣ်ဆါလီၤအီၣ်သး မ့ၢ်လၢ နမံၤဟူသၣ်ဖျါ အဃိလီၤ.+ ဒီးလၢတၢ်သူၣ်ဆူၣ်သးဆူၣ်အပူၤန့ၣ် နဆါလီၤအီၣ်နသးလၢ ပှၤလၢအလ့ၢ်လိၤလၢ နမဲာ်ညါကိးဂၤဒဲး+ ဒီးနဟ့ၣ်လီၤနနီၢ်ကစၢ်လၢ အဝဲသ့ၣ် အအိၣ်လီၤ. ၁၆ နသူနတၢ်ကူတၢ်ကၤတနီၤ လၢနကမၤဃံမၤလၤထီၣ် တၢ်လီၢ်ထီၣ်ထီ လၢနဆါလီၤအီၣ်နသးအလီၢ်+ လၢတၢ်အလွဲၢ် အကလုာ်ကလုာ်လီၤ. တၢ်တကြၢး ကဲထီၣ်အသးဒ်န့ၣ် ဒီးတၢ်တကြၢး မၤအသးဒ်န့ၣ် နီတဘျီဘၣ်. ၁၇ တၢ်ကယၢကယဲ ထူဒီးစ့ လၢအဃံအလၤ လၢယဟ့ၣ်လီၤနၤန့ၣ် နတ့ထီၣ် ပှၤပိာ်ခွါအဂီၤတဖၣ်* ဒီးနမၤကမၣ်မုၣ်ကမၣ်ခွါ* ဒီးတၢ်သ့ၣ်တဖၣ်န့ၣ်လီၤ.+ ၁၈ ဒီးနကျၢၢ်ဘၢအီၤလၢ နဆ့ကၤလၢ ပှၤဆးကံၣ်ဃ့အီၤ ဒီးနလုၢ်ထီၣ်ယသိ ဒီးယတၢ်နၢမူလၢ အဝဲသ့ၣ်အအိၣ်လီၤ.+ ၁၉ ကိၣ်လၢအဘၣ်တၢ်တ့အီၤလၢ ကိၣ်ကမူၣ်လၢအဂ့ၤ, သိ ဒီးကနဲစီ လၢယဟ့ၣ်လီၤနၤန့ၣ် နဟ့ၣ်လုၢ်ထီၣ်အီၤ ဒ်တၢ်နၢမူလၢ အမၤမုာ် အဝဲသ့ၣ်အသးလီၤ.+ တၢ်ကဲထီၣ်အသးဒ်န့ၣ် သပှၢ်တၢၢ်လီၤ.’ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.”

၂၀ “‘နမၤတၢ်ဆါလီၤအီၣ်သး တၢ်မၤတဖၣ်အံၤ ထဲထဲန့ၣ် သနာ်က့ တလၢပှဲၤလၢနဂီၢ်ဒံးဘၣ်. အဃိ နဟံးန့ၢ် နဖိမုၣ်နဖိခွါတဖၣ်လၢ နအိၣ်ဖျဲၣ်ထီၣ်န့ၢ်လၢယဂီၢ်+ ဒီးနလုၢ်ထီၣ် အဝဲသ့ၣ်လၢ တၢ်ဂီၤတၢ်ဖှီၣ်တဖၣ် အအိၣ်လီၤ.+ ၂၁ နမၤသံယဖိတဖၣ် ဒီးနဟ့ၣ်လုၢ်ထီၣ် အဝဲသ့ၣ် ခီဖျိ နဒွဲၣ်ထီၣ် အဝဲသ့ၣ်လၢ မ့ၣ်အူအပူၤလီၤ.+ ၂၂ ဒီးဖဲနမၤတၢ်လၢ အလီၤသးဘၣ်အၢတဖၣ် ဒီးဆါလီၤအီၣ်နသးအခါ နတသ့ၣ်နီၣ်ထီၣ်ဘၣ်က့ၤ ဆၢကတီၢ် ဖဲနမ့ၢ်ဒံးဖိသၣ် ဒီးနဘၣ်အိၣ်ဘ့ၣ်ဆ့ ဒီးထူတကျာ်တၢ်လၢ နသွံၣ်အကျါ အခါန့ၣ်ဘၣ်. ၂၃ ခီဖျိလၢ နမၤတၢ်အၢတၢ်သီတဖၣ်အံၤ ခဲလၢာ်အဃိ နကဘၣ်ကီဘၣ်ခဲ သပှၢ်တၢၢ်လီၤ.’+ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ. ၂၄ ‘လၢတၢ်ဆါတၢ်ပှ့ၤအလီၢ် ကိးတီၤဒဲးန့ၣ် နတ့ထီၣ် တၢ်ဘူၣ်ထီၣ်ဘါထီၣ် ယွၤလၢအကမၣ်အလီၢ် လၢနနီၢ်ကစၢ်အဂီၢ် ဒီးနတ့ထီၣ် တၢ်လီၢ်ထီၣ်ထီ လၢနနီၢ်ကစၢ် အဂီၢ်လီၤ. ၂၅ နတ့ထီၣ် တၢ်လီၢ်ထီၣ်ထီလၢ တၢ်လီၢ်လၢ ပှၤထံၣ်အီၤသ့ဂ့ၤဂ့ၤ လၢကျဲကိးဘိဒဲး အပူၤလီၤ. ဒီးနမၤဘၣ်အၢလီၤ နတၢ်ဃံတၢ်လၤ ခီဖျိ နဟ့ၣ်လီၤနသးလၢ ပှၤလၢအလ့ၢ်ထီၣ်လ့ၢ်လိၤ ကိးဂၤဒဲးအအိၣ်+ ဒီးနမၤအါထီၣ် တၢ်ဆါလီၤအီၣ်သး အတၢ်မၤတဖၣ်လီၤ.+ ၂၆ နဆါလီၤအီၣ်နသးလၢ ပှၤအဲၤကူပတူးဖိလၢ+ အအိၣ်လၢနဃၢၤ လၢအမ့ၢ်ပှၤလၢ အသးကတၢဒိၣ်မးတဖၣ် အစုပူၤလီၤ. ဒီးနမၤ ဒိၣ်ထီၣ်ယသး ခီဖျိလၢ နမၤတၢ်ဆါလီၤအီၣ်သး အတၢ်မၤ အဘျီအါမးအဃိလီၤ. ၂၇ ခဲအံၤ ယကယၤထီၣ်ယစု ဒ်သိးယကထီဒါနၤအဂီၢ် ဒီးယကမၤလီၤစှၤ နတၢ်အီၣ်လီၤ.+ ဒီးယကဟ့ၣ်လီၤနၤ လၢပှၤပိာ်မုၣ်လၢ အသးဟ့နၤ+ လၢအမ့ၢ် ပှၤဖလ့ၡသးဖိတဖၣ် အစုပူၤလီၤ.* အဝဲသ့ၣ်တဖၣ်န့ၣ် မ့ၢ်ပှၤလၢ အဖုးဘၣ်အသး ခီဖျိလၢ နလုၢ်လၢ်သကဲာ်ပဝးလၢ အလီၤမဲာ်ဆှး အဃိလီၤ.+

၂၈ “‘မ့ၢ်လၢ နဆါလီၤအီၣ်နသး တဘျဲဒံးဘၣ်အဃိ နဆါလီၤအီၣ်နသးလၢ ပှၤအၤၡူၢ်ဖိတဖၣ် အအိၣ်လီၤ.+ ဘၣ်ဆၣ် နဆါလီၤအီၣ်နသး တဘျဲဒံးဘၣ်. ၂၉ နမၤအါထီၣ် တၢ်ဆါလီၤအီၣ်သးတၢ်မၤ ခီဖျိ နအးလီၤနသးလၢ ပှၤဆါတၢ်ပှ့ၤတၢ်ဖိတဖၣ် အကီၢ်ပူၤ ဒီးလၢပှၤက့ၤစ့းဖိတဖၣ် အအိၣ်လီၤ.+ ဘၣ်ဆၣ် နသးတမံဒံးဘၣ်.’ ၃၀ တၢ်ပၢကစၢ် ယဟိဝၤယွၤ တဲဝဲလၢ ‘နသးအါဒိၣ်မး ဒီးဖဲနမၤတၢ်သ့ၣ်တဖၣ်န့ၣ် ခဲလၢာ်အခါ နမၤဒ် ပှၤဆါလီၤအီၣ်သး လၢအတၢ်မဲာ်ဆှး တအိၣ်ဘၣ်အသိးလီၤ.+ ၃၁ နတ့ထီၣ် တၢ်ဘူၣ်ထီၣ်ဘါထီၣ် ယွၤလၢအကမၣ်အလီၢ် လၢတၢ်လီၢ်လၢ ပှၤထံၣ်အီၤသ့ဂ့ၤဂ့ၤ လၢကျဲကိးဘိဒဲး အပူၤလီၤ. ဒီးလၢတၢ်ဆါတၢ်ပှ့ၤအလီၢ် ကိးတီၤဒဲးန့ၣ် နတ့ထီၣ် တၢ်လီၢ်ထီၣ်ထီတဖၣ်လီၤ. ဘၣ်ဆၣ် ဖဲန့ၣ်အခါ နတလီၤဂာ်ဒီး ပှၤလၢအဆါလီၤအီၣ်အသးဘၣ်, မ့ၢ်လၢ နတဟံးန့ၢ် နတၢ်ဆါလီၤအီၣ်သး အဘူးအလဲဘၣ် အဃိလီၤ. ၃၂ နမ့ၢ်မါလၢ အအဲၣ်ဘၢအဝၤ ဒီးနမံဃုာ်ဒီး ပှၤလၢနတသ့ၣ်ညါအီၤဘၣ်တဖၣ်လီၤ.+ ၃၃ ညီနုၢ်န့ၣ် ပှၤဘၣ်ဟ့ၣ်လီၤ ပှၤလၢအဆါလီၤအီၣ်သး အပှ့ၤလီၤ.+ ဘၣ်ဆၣ် မ့မ့ၢ်နၤန့ၣ် နဟ့ၣ်လီၤတၢ်ဟ့ၣ်လၢ ပှၤလၢအသးကတၢလၢနဃိတဖၣ် အအိၣ်လီၤ.+ ဒီးပှၤလၢ အအိၣ်ဝးတရံးနၤတဖၣ်န့ၣ် နထီးအဝဲသ့ၣ်လၢကျိၣ်လၢစ့ ဒ်သိး အဝဲသ့ၣ် ကဟဲမၤကမၣ်မုၣ်ကမၣ်ခွါဒီးနၤ အဂီၢ်လီၤ.+ ၃၄ နလီၤဆီဒီး ပိာ်မုၣ်အဂၤလၢ အဆါလီၤအီၣ်သးတဖၣ်လီၤ. ပှၤတဆါလီၤအီၣ်သး ဒ်နမၤအသိး နီတဂၤဘၣ်. နဟ့ၣ်ပှၤဂၤတၢ် ဘၣ်ဆၣ် ပှၤတဟ့ၣ်နၤတၢ်ဘၣ်. နမၤထီၣ်နသး လီၤဆီဒိၣ်မး.’

၃၅ “အဃိ ပိာ်မုၣ်ဆါလီၤအီၣ်သးဧၢ,+ ကနၣ်ယဟိဝၤယွၤ အတၢ်ကတိၤလၢအံၤ. ၃၆ တၢ်ပၢကစၢ် ယဟိဝၤယွၤ တဲဝဲလၢ ‘နပာ်ဖျါထီၣ် နတၢ်သးကတၢအါမး ဒီးဖဲနဆါလီၤအီၣ်နသး လၢနတၢ်အဲၣ်တီတဖၣ် ဒီးတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်* အအိၣ်အခါ နတၢ်အိၣ်ဘ့ၣ်ဆ့ အိၣ်ဖျါထီၣ်ဝဲလီၤ. ဒီးတကးဒံးဘၣ် နလုၢ်ထီၣ် နဖိတဖၣ်အသွံၣ်လၢ+ တၢ်ဂီၤတၢ်ဖှီၣ်တဖၣ်အံၤ အအိၣ်လီၤ.+ ၃၇ ခီဖျိလၢ နမၤဒ်န့ၣ်အဃိ ယကပာ်ဖှိၣ် နတၢ်အဲၣ်တီတဖၣ်လၢ နမၤမုာ် အဝဲသ့ၣ်အသး ကိးဂၤဒဲး ဃုာ်ဒီးကယဲၢ်ပှၤလၢ နအဲၣ်အီၤ ဒီးပှၤလၢနသးဟ့အီၤတဖၣ်လီၤ. ယကပာ်ဖှိၣ် အဝဲသ့ၣ် ဒ်သိး ကဟဲဒုးနၤအဂီၢ် ဒီးယကမၤဖျါထီၣ် နတၢ်အိၣ်ဘ့ၣ်ဆ့လၢ အဝဲသ့ၣ် အမဲာ်ညါလီၤ. ဒီးအဝဲသ့ၣ် ကထံၣ်ဘၣ် နတၢ်အိၣ်ဘ့ၣ်ဆ့ ပျီပျီလီၤ.+

၃၈ “‘ဒီးယကစံၣ်ညီၣ်နၤ ဒ်တၢ်စံၣ်ညီၣ်လၢ အကြၢးဒီး ပိာ်မုၣ်လၢ အအဲၣ်ဘၢတၢ်+ ဒီးပိာ်မုၣ်လၢ အလူလီၤ တၢ်သွံၣ်အသိးလီၤ.+ ဒီးနသွံၣ်ကဘၣ်ယွၤလီၤလၢ ယတၢ်သးဒိၣ် ဒီးယတၢ်သူၣ်က့ၣ်သးကါ အဃိလီၤ.+ ၃၉ ယကဟ့ၣ်လီၤနၤလၢ အဝဲသ့ၣ် အစုပူၤ ဒီးအဝဲသ့ၣ် ကမၤလီၤပှီၢ်ကွံာ် နတၢ်ဘူၣ်ထီၣ်ဘါထီၣ် ယွၤလၢအကမၣ်အလီၢ် ဒီးမၤလီၤပှီၢ်ကွံာ် နတၢ်လီၢ်ထီၣ်ထီတဖၣ်လီၤ.+ ဒီးအဝဲသ့ၣ် ကဘ့ၣ်လီၤကွံာ် နတၢ်ကူတၢ်ကၤတဖၣ်+ ဒီးကဟံးန့ၢ် နတၢ်ကယၢကယဲလၢ အဃံအလၤတဖၣ်+ ဒီးကပာ်တ့ၢ်ဘ့ၣ်ဆ့နၤ ဒီးနတၢ်ကူတၢ်ကၤ တအိၣ်လၢနလိၤလၢၤဘၣ်. ၄၀ အဝဲသ့ၣ် ကဟဲကိးပှၤတဖု ဒ်သိး ကဒုးနၤအဂီၢ်+ ဒီးအဝဲသ့ၣ် ကကွံာ်နၤလၢလၢၢ်+ ဒီးကမၤသံနၤလၢ အနးတဖၣ်လီၤ.+ ၄၁ အဝဲသ့ၣ် ကဒွဲၣ်ထီၣ် နဟံၣ်တဖၣ်လၢမ့ၣ်အူ+ ဒီးကစံၣ်ညီၣ်နၤလၢ ပှၤပိာ်မုၣ်အါဂၤ အမဲာ်ညါလီၤ. ဒီးယကမၤကတၢၢ်ကွံာ် နတၢ်ဆါလီၤအီၣ်သးအတၢ်မၤ+ ဒီးနတဟ့ၣ်လီၤ တၢ်အပှ့ၤလၢၤဘၣ်. ၄၂ ယပျၢ်လီၤ ယတၢ်သးဒိၣ်လၢနလိၤ+ ဝံၤဒီးယတၢ်သးထီၣ် ကခုၣ်လီၤက့ၤ ဒီးယတသးထီၣ်နၤလၢၤဘၣ်.+ ဒီးယသးကမုာ် ဒီးယသးတဆါလၢၤဘၣ်.’

၄၃ “တၢ်ပၢကစၢ် ယဟိဝၤယွၤ တဲဝဲလၢ ‘မ့ၢ်လၢ နတသ့ၣ်နီၣ်ထီၣ်က့ၤ ဆၢကတီၢ်ဖဲ နမ့ၢ်ဒံး ဖိသၣ်အခါဘၣ်+ ဒီးနမၤတၢ်သ့ၣ်တဖၣ်အံၤ အဃိန့ၣ် ယသးထီၣ်တၢ်လံ. လၢတၢ်န့ၣ်အဃိ ယကဟ့ၣ်ကၣ်က့ၤနၤ ဒ်တၢ်လၢ နမၤတ့ၢ်အသိးလီၤ. ဒီးနလုၢ်လၢ် သကဲာ်ပဝးလၢ အလီၤမဲာ်ဆှးတဖၣ် ဒီးနတၢ်မၤလၢ အလီၤသးဘၣ်အၢ ခဲလၢာ်န့ၣ် နတမၤဘၣ်အီၤလၢၤဘၣ်.

၄၄ “‘ဘၣ်ဃးဒီးနၤန့ၣ် ပှၤကိးဂၤဒဲး ကတဲဝဲ တၢ်ကတိၤဒိလၢ “အမိမၤအသးဒ်န့ၣ်ဒၢး အဖိမုၣ်မၤအသးဒ်န့ၣ်ဝဲန့ၣ်.”+ ၄၅ နမိန့ၣ် တပာ်ကဲ အဖိအဝၤဘၣ် ဒီးနလီၤဂာ်ဒ်သိးဒီး နမိလီၤ. ဒီးနဒီပုၢ်ဝဲၢ်မုၣ်တဖၣ်န့ၣ် တပာ်ကဲ အဖိအဝၤဘၣ် ဒီးနလီၤဂာ်ဒ်သိးဒီး နဒီပုၢ်ဝဲၢ်မုၣ်တဖၣ်လီၤ. နမိမ့ၢ်ဝဲ ပှၤဃ့ၤသးဖိ ဒီးနပါမ့ၢ်ဝဲ ပှၤအမိၢ်ဖိလီၤ.’”+

၄၆ “‘နနီမ့ၢ်ဝဲ ဝ့ၢ်ၡၤမရံ+ ဒီးအအိၣ်ဝဲဒီး အဖိမုၣ်တဖၣ်လၢ နကလံၤစိးတခီလီၤ.+ ဒီးနဒ့မုၣ်မ့ၢ်ဝဲ ဝ့ၢ်စဒိၣ်+ ဒီးအအိၣ်ဝဲဒီး အဖိမုၣ်တဖၣ်လၢ နကလံၤထံးတခီလီၤ.+ ၄၇ နမၤဒ်အဝဲသ့ၣ် မၤဝဲအသိး ဒီးနမၤ လုၢ်လၢ်သကဲာ်ပဝးလၢ အအၢအသီ လၢအဝဲသ့ၣ်မၤဝဲလီၤ. ဘၣ်ဆၣ် လၢတစိၢ်ဖိ အတီၢ်ပူၤန့ၣ် နတၢ်သကဲာ်ပဝး လီၤရၢၢ်ဒိၣ်န့ၢ်ဒံး အဝဲသ့ၣ်လီၤ.’+ ၄၈ တၢ်ပၢကစၢ် ယဟိဝၤယွၤ တဲဝဲလၢ ‘ဒ်ယမ့ၢ်ပှၤလၢ အမူဝဲ သပှၢ်တၢၢ်အသိး ယအၢၣ်လီၤလၢ နဒ့မုၣ် ဝ့ၢ်စဒိၣ် ဒီးအဖိမုၣ်တဖၣ်န့ၣ် တမၤဝဲ တၢ်လၢနၤဒီးနဖိမုၣ်တဖၣ် မၤဝဲဘၣ်. ၄၉ နဒ့မုၣ် ဝ့ၢ်စဒိၣ် အတၢ်ကမၣ်န့ၣ် အိၣ်ဝဲဒ်အံၤ, အဝဲဒီးအဖိမုၣ်တဖၣ်န့ၣ်+ ပာ်ထီၣ်ထီအသး+ ဒီးအဝဲသ့ၣ် အတၢ်အီၣ်တၢ်အီ အိၣ်ဝဲဒီဒူၣ်+ ဒီးအတဘၣ်ကိၢ်ဘၣ်ဂီၤတၢ် နီတမံၤဘၣ်.+ ဘၣ်ဆၣ် အဝဲသ့ၣ် တဆီၣ်ထွဲမၤစၢၤ ပှၤလၢ အဘၣ်နးဘၣ်ဖှီၣ် ဒီးပှၤဖှီၣ်ဖိယာ်ဖိတဖၣ်ဘၣ်.+ ၅၀ ဒီးအဝဲသ့ၣ် ဆဲးပာ်ထီၣ်ထီအသး+ ဒီးမၤတၢ်လၢ အလီၤသးဘၣ်အၢလၢ ယမဲာ်ညါအဃိ+ ယထံၣ်လၢ အလီၢ်အိၣ်လၢ ယကဘၣ်မၤ ဟးဂီၤကွံာ် အဝဲသ့ၣ်လီၤ.+

၅၁ “‘ၡၤမရံ အတၢ်ဒဲးဘးန့ၣ်+ မးတထဲသိးဒီး နတၢ်ဒဲးဘး တဝာ်ဘၣ်. နဆဲးမၤ လုၢ်လၢ်လၢ အအၢအသီ အါန့ၢ်ဒံး အဝဲသ့ၣ်မၤဝဲ တုၤဒၣ်လဲာ် ခီဖျိလၢ နလုၢ်လၢ်လၢ အအၢအသီတဖၣ်အဃိန့ၣ် နဒီပုၢ်ဝဲၢ်မုၣ်တဖၣ် ဖျါတီဖျါလိၤဝဲလီၤ.+ ၅၂ မ့ၢ်လၢနဆီၣ်ထွဲ နဒီပုၢ်ဝဲၢ်မုၣ်တဖၣ် အတၢ်သကဲာ်ပဝးအဃိ နကတူၢ်ဘၣ် တၢ်မဲာ်ဆှးလီၤ. နမၤတၢ်ဒဲးဘး လၢအအၢန့ၢ်ဒံး နဒီပုၢ်ဝဲၢ်မုၣ်တဖၣ်အဃိ အဝဲသ့ၣ် တီလိၤဒိၣ်န့ၢ်ဒံးနၤလီၤ. မ့ၢ်လၢ နမၤဒ်သိး နဒီပုၢ်ဝဲၢ်မုၣ်တဖၣ် ကဖျါတီဖျါလိၤအဃိ ခဲအံၤန့ၣ် နကတူၢ်ဘၣ် တၢ်မဲာ်ဆှးလီၤ.’

၅၃ “‘ပှၤလၢ အဘၣ်တၢ်က့ၤဖီၣ်အီၤတဖၣ် လၢအမ့ၢ် ဝ့ၢ်စဒိၣ်အပှၤ ဒီးအဖိမုၣ်တဖၣ် လၢအဘၣ်တၢ်က့ၤဖီၣ်အီၤ ဒီးၡၤမရံအပှၤ ဒီးအဖိမုၣ်တဖၣ် လၢဘၣ်တၢ်က့ၤဖီၣ်အီၤန့ၣ် ယကပာ်ဖှိၣ်ထီၣ် အဝဲသ့ၣ်လီၤ. ဒီးယကပာ်ဖှိၣ်ထီၣ် နပှၤလၢ အဘၣ်တၢ်က့ၤဖီၣ်အီၤတဖၣ် ဃုာ်ဒီးအဝဲသ့ၣ်+ ၅၄ ဒ်သိးနကတူၢ်ဘၣ် တၢ်မဲာ်ဆှးအဂီၢ်လီၤ. မ့ၢ်လၢ နမၤဒ်သိး အဝဲသ့ၣ် အသးကမုာ်ထီၣ်အဃိ နကတူၢ်ဘၣ် တၢ်မဲာ်ဆှးလီၤ. ၅၅ ဘၣ်ဆၣ် နဒီပုၢ်ဝဲၢ်မုၣ်တဖၣ် လၢအမ့ၢ် စဒိၣ် ဒီးၡၤမရံ ဒီးအဝဲသ့ၣ် အဖိမုၣ်တဖၣ်န့ၣ် အတၢ်အိၣ်သး ကအိၣ်က့ၤ ဒ်လၢအပူၤကွံာ်အသိးလီၤ. နၤဒီးနဖိမုၣ်တဖၣ်စ့ၢ်ကီး သုတၢ်အိၣ်သး ကက့ၤအိၣ်ဒ် လၢအပူၤကွံာ်အသိးလီၤ.+ ၅၆ လၢညါ ဖဲနပာ်ထီၣ်ထီနသး အဆၢကတီၢ်န့ၣ် နမးတတဲ နဒ့မုၣ်စဒိၣ်အဂ့ၢ်ဘၣ်. ၅၇ ဖဲန့ၣ်အခါ နတၢ်အၢတၢ်သီ တအိၣ်ဖျါထီၣ်ဒံးဒၢး.+ တဘျီအံၤ ကီၢ်စူၤရံ အဖိမုၣ်တဖၣ် ဒီးပှၤလၢအအိၣ်လၢ အဝဲသ့ၣ်အဃၢၤတဖၣ် ဒုၣ်ဒွဲၣ်နၤ ဒီးဖလ့ၡသး အဖိမုၣ်တဖၣ်+ လၢအအိၣ်ဝးတရံးနၤခဲလၢာ်န့ၣ် နံၤဘၣ်နၤလီၤ. ၅၈ နကတူၢ်ဘၣ်က့ၤတၢ် ခီဖျိလၢ နလုၢ်လၢ်သကဲာ်ပဝးလၢ အလီၤမဲာ်ဆှး ဒီးနလုၢ်လၢ်လၢ အအၢအသီတဖၣ် အဃိလီၤ.’ ယဟိဝၤယွၤ တဲဝဲဒ်န့ၣ်လီၤ.”

၅၉ “တၢ်ပၢကစၢ် ယဟိဝၤယွၤ တဲဝဲလၢ ‘ခဲအံၤ ယကမၤနၤ ဒ်နမၤတ့ၢ်အသိး,+ မ့ၢ်လၢ နတပာ်ကဲ နတၢ်အၢၣ်လီၤဘၣ် ဒီးနမၤဟးဂီၤ တၢ်အၢၣ်လီၤအီလီၤလၢ ယမၤဒီးနၤ အဃိလီၤ.+ ၆၀ ဘၣ်ဆၣ် ယကသ့ၣ်နီၣ်ထီၣ်က့ၤ တၢ်အၢၣ်လီၤအီလီၤလၢ ယမၤအီၤဒီးနၤ ဖဲနမ့ၢ်ဒံးဖိသၣ်အခါလီၤ. ဒီးယကမၤ တၢ်အၢၣ်လီၤအီလီၤဒီးနၤ လၢအအိၣ်ဂၢၢ်ကျၢၤဝဲ လီၤစိၤလီၤထီလီၤ.+ ၆၁ ဖဲနတူၢ်လိာ် နနီဒီးနဒ့မုၣ်တဖၣ်အခါ နကသ့ၣ်နီၣ်ထီၣ်က့ၤ တၢ်လၢနမၤတ့ၢ်တဖၣ် ဒီးနကမဲာ်ဆှးလီၤ.+ အဝဲသ့ၣ်တဖၣ်န့ၣ် ယကဟ့ၣ်လီၤနၤ ဒ်နဖိမုၣ်အသိးလီၤ. ဘၣ်ဆၣ် ယကမၤဒ်န့ၣ်န့ၣ် တမ့ၢ်လၢ နတၢ်အၢၣ်လီၤအီလီၤ အဃိဘၣ်.’

၆၂ “‘ယကမၤ တၢ်အၢၣ်လီၤအီလီၤဒီးနၤ ဒီးနကသ့ၣ်ညါဘၣ် လၢယမ့ၢ် ယဟိဝၤယွၤလီၤ. ၆၃ ဖဲယပျၢ်ကွံာ်* တၢ်ကမၣ်လၢ နမၤတ့ၢ်အီၤခဲလၢာ်အခါ+ နကသ့ၣ်နီၣ်ထီၣ်က့ၤ တၢ်လၢနမၤတ့ၢ်တဖၣ် ဒီးနကမဲာ်ဆှး တုၤလၢ နအါထီၣ်နကိာ်ပူၤ တဘူၣ်လၢၤဘၣ်.’+ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.”

၁၇ ကစၢ်ယဟိဝၤယွၤ တဲယၤလၢ ၂ “ပှၤကညီဖိခွါဧၢ, တဲတၢ်ပှိၤပှံပှိၤပှီၢ် ဒီးတၢ်ကတိၤဒိလၢ ဘၣ်ဃးဒီး ပှၤအံၣ်စရ့လးဖိနီၤ.+ ၃ ဒီးနကဘၣ်တဲလၢ ‘တၢ်ပၢကစၢ် ယဟိဝၤယွၤ တဲဝဲလၢ “လံာ်ကြီကြာ် ဖးဒိၣ်တဘ့ၣ်လၢ+ အအိၣ်ဒီးအဒံးဆ့ ဖးလဲၢ်ဖးထီလၢ အအိၣ်ဒီး အဆူၣ်အလွဲၢ် အကလုာ်ကလုာ်န့ၣ် ဟဲဝဲလၢ လဘၤနိၣ်+ အကစၢၢ်ကလိကျါ ဒီးဘိးန့ၢ်ဝဲ သ့ၣ်ဆှိအ့ရ့း အခိၣ်စိး အဖီခိၣ်ကတၢၢ် တဒ့လီၤ.+ ၄ အဝဲဘိးန့ၢ်ဝဲ သ့ၣ်ဒ့ခိၣ်စိးဝဲန့ၣ် ဒီးလဲၤစိာ်ဝဲလၢ ပှၤဆါတၢ်ပှ့ၤတၢ်ဖိတဖၣ်အကီၢ်* ဒီးသူၣ်လီၤဝဲလၢ ပှၤဆါတၢ်ပှ့ၤတၢ်ဖိတဖၣ် အဝ့ၢ်ပူၤလီၤ.+ ၅ အဝဲဟံးန့ၢ်ဝဲ တၢ်အချံတနီၤလၢကီၢ်ပူၤ+ ဒီးသူၣ်လီၤဝဲလၢ ပျီတဘ့ၣ် လၢအအိၣ်ဒီး ဟီၣ်ခိၣ်ညၣ်ထ့ၣ်လၢအဂ့ၤ အပူၤလီၤ. ဒီးသူၣ်လီၤဝဲဒ် သ့ၣ်ပံၢ်သလီလၢ အအိၣ်လၢ ထံကျိကပၤအသိးလီၤ. ၆ တၢ်အချံန့ၣ် ဟဲမဲထီၣ် ဒီးကဲထီၣ်ဝဲ စပံးမုၢ် ဖုၣ်ဖုၣ်ဖိလၢ အလၣ်တဖၣ် ဃၣ်အသးလၢ အမုၢ်အအိၣ်+ ဒီးအမုၢ်ရၤလီၤအသး ဒီးအဂံၢ်စဲၤလီၤအသး လၢအဖီလာ်လီၤ. ဒီးစပံးမုၢ်တမုၢ်အံၤ အဒိးဘီၣ်တဖၣ် ဟဲထီၣ်ဝဲ ဒီးအဒ့တဖၣ် ဟဲထီၣ်ဝဲလီၤ.+

၇ “‘“ဒီးလံာ်ကြီကြာ် ဖးဒိၣ်အဂၤတဘ့ၣ် ဟဲယူၤဝဲ+ ဒီးအအိၣ်ဒီးအဒံးဆ့ ဖးလဲၢ်ဖးထီလီၤ.+ စပံးမုၢ်တမုၢ်လၢ တၢ်သူၣ်လီၤအီၤလၢ ကရၢၢ်ပူၤအံၤန့ၣ် လၢတၢ်သူၣ်ဆူၣ်သးဆူၣ်အပူၤ ဒုးစွါလီၤအဂံၢ်လၢ ကရၢၢ်အချၢ ဆူလံာ်ကြီကြာ်တဘ့ၣ်အံၤ အအိၣ်လီၤ. ဒီးအဒ့ဒီးအလၣ်တဖၣ် ယူာ်ထီၣ်အသးလၢ လံာ်ကြီကြာ်အအိၣ် ဒ်သိး လံာ်ကြီကြာ်တဘ့ၣ်အံၤ ကလူန့ၢ်အီၤထံ အဂီၢ်လီၤ.+ ၈ နီၢ်ကီၢ်န့ၣ် အဘၣ်တၢ်သူၣ်လီၤတ့ၢ်အီၤလၢ ပျီလၢအဂ့ၤ လၢအအိၣ်ဘူးဒီးထံကျိ ဒ်သိးအဒ့ကဟဲထီၣ်, ကသၣ်ထီၣ် ဒီးကကဲထီၣ် စပံးမုၢ်လၢ အလီၤကဟုကညီၢ် တမုၢ်အဂီၢ်လီၤ.”’+

၉ “ဒီးနဘၣ်တဲလၢ ‘တၢ်ပၢကစၢ် ယဟိဝၤယွၤ တဲဝဲလၢ “စပံးမုၢ်အံၤ မ့ၢ်အကဒိၣ်ထီၣ်ထီထီၣ် စ့ၢ်ကီးဧါ. ပှၤကထဲးထီၣ်ကွံာ်အဂံၢ်+ ဒ်သိး အသၣ်တဖၣ် ကအုၣ်ဝဲ ဒီးအဒ့ဘီၣ်တဖၣ် ကလီၤညွံးလီၤဘဲဝဲအဂီၢ် တမ့ၢ်ဧီၤ.+ စပံးမုၢ် ကဃ့ထီဝဲ ဒိၣ်မးအဃိ ဒ်သိး ပှၤကထဲးထီၣ်အီၤ ဃုာ်ဒီးအဂံၢ်အဂီၢ် တလိၣ်ပှၤစုဆူၣ် မ့တမ့ၢ် ပှၤအါဂၤ ကဘၣ်ထဲးထီၣ်ဝဲဘၣ်. ၁၀ ပှၤမ့ၢ်ထဲးထီၣ် ဒီးသူၣ်လီၤက့ၤအီၤသနာ်က့ မ့ၢ်အကဒိၣ်ထီၣ်ထီထီၣ်ဒံးဧါ. ကလံၤလၢ မုၢ်ထီၣ်တခီ ကဟဲအူဘၣ်အီၤ ဒီးကဃ့ထီကွံာ်ဝဲ လၢာ်လၢာ်ဆ့ဆ့ တမ့ၢ်ဧီၤ. အကဃ့ထီကွံာ်ဝဲဖဲ ကရၢၢ်လၢ အမဲထီၣ်ဝဲ အပူၤလီၤ.”’”

၁၁ ကစၢ်ယဟိဝၤယွၤ တဲယၤလၢ ၁၂ “ဝံသးစူၤ တဲဘၣ် ပှၤထီဒါတၢ်ဖိတဖၣ်လၢ ‘တၢ်ဂ့ၢ်သ့ၣ်တဖၣ်အံၤ အဲၣ်ဒိးတဲဝဲ တၢ်မနုၤလဲၣ်န့ၣ် သုတသ့ၣ်ညါဧီၤ. ဘၤဘူၤလိၣ် အစီၤပၤ ဟဲဝဲလၢ ဝ့ၢ်ယရူၤၡလ့ၣ် ဒီးက့ၤဖီၣ်ဝဲ ဝ့ၢ်ယရူၤၡလ့ၣ် အစီၤပၤ ဒီးအပဒိၣ်တဖၣ်လၢ ဘၤဘူၤလိၣ်လီၤ.+ ၁၃ တကးဒံးဘၣ် အဝဲကိးန့ၢ်ဝဲ စီၤပၤအဒူၣ်ဖိထၢဖိတဂၤ*+ ဒီးမၤဝဲ တၢ်အၢၣ်လီၤအီလီၤဒီးအီၤလီၤ. ဒီးအဝဲမၢဝဲ ပှၤတဂၤန့ၣ် အၢၣ်လီၤတၢ်လၢ အကအိၣ်ဒီးတၢ်သးတီလီၤ.+ ဒီးအဝဲ က့ၤဖီၣ်ဝဲ ကီၢ်အပှၤဒိၣ်ပှၤပှၢ်တဖၣ်+ ၁၄ ဒ်သိး ဘီမုၢ်ကလီၤဝဲ ဒီးဘီမုၢ်အစိအကမီၤ သုတဒိၣ်ထီၣ်က့ၤ လၢၤတဂ့ၤအဂီၢ်လီၤ. ဒီးထဲဒၣ် ပှၤအံၣ်စရ့လးဖိ မ့ၢ်မၤထွဲဝဲ တၢ်အၢၣ်လီၤန့ၣ် ဘီမုၢ် ကဆဲးအိၣ်ဝဲလီၤ.+ ၁၅ ဘၣ်ဆၣ် လၢခံန့ၣ် ယူဒၤအစီၤပၤ တဂၤအံၤ* ထီဒါက့ၤ ဘၤဘူၤလိၣ် အစီၤပၤ+ ခီဖျိ အဆှၢလီၤဝဲ ပှၤစိာ်တၢ်ကစီၣ်ဖိဆူ ကီၢ်အဲၤကူပတူး ဒ်သိး အဝဲသ့ၣ်ကဟ့ၣ်လီၤအီၤ ကသ့ၣ်တဖၣ်+ ဒီးသုးမုၢ်ဖးဒိၣ်တဖု အဂီၢ်လီၤ.+ တၢ်လၢအမၤဝဲန့ၣ် မ့ၢ်အကကဲထီၣ်လိၣ်ထီၣ်ဧါ. ပှၤလၢအမၤဝဲ ဒ်န့ၣ်တဂၤန့ၣ် မ့ၢ်အကပူၤဖျဲး လၢတၢ်စံၣ်ညီၣ်ဧါ. အဝဲမၤဟးဂီၤ တၢ်အၢၣ်လီၤအီလီၤအဃိ မ့ၢ်အကပူၤဖျဲးဧါ.’+

၁၆ “‘တၢ်ပၢကစၢ် ယဟိဝၤယွၤ တဲဝဲလၢ “ဒ်ယမ့ၢ်ပှၤလၢ အမူဝဲ သပှၢ်တၢၢ်အသိး ယအၢၣ်လီၤလၢ မ့ၢ်လၢ အဝဲ* တပာ်ကဲ အတၢ်အၢၣ်လီၤဘၣ် ဒီးမၤဟးဂီၤ အတၢ်အၢၣ်လီၤအီလီၤလၢ အမၤဝဲဒီး စီၤပၤတဂၤ* လၢအပာ်ထီၣ်အီၤလၢ စီၤပၤအဃိ အဝဲကဘၣ်သံဝဲလၢ ဘၤဘူၤလိၣ်အပူၤ ဖဲစီၤပၤအဝဲန့ၣ် အိၣ်တၢ်အလီၢ်လီၤ.+ ၁၇ ဖဲဘၤဘူၤလိၣ် အသုးဖိတဖၣ် ပာ်ပူၣ်ထီၣ်ဟီၣ်ခိၣ်လၢ ကဒုးတၢ်အဂီၢ် ဒီးတ့ထီၣ်တၢ်ဒူၣ် ဝးတရံးဝ့ၢ် ဒ်သိးကမၤသံ ပှၤအါဂၤအခါ ဖၤရိၤအသုးမုၢ်ဖးဒိၣ် ဒီးအသုးဖိလၢ အနီၣ်ဂံၢ်အိၣ်ဝဲ အါအါဂီၢ်ဂီၢ်န့ၣ် တကဲထီၣ်တၢ်မၤစၢၤလၢ အဂီၢ်ဘၣ်.+ ၁၈ အဝဲ* တပာ်ကဲ အတၢ်အၢၣ်လီၤဘၣ် ဒီးမၤဟးဂီၤ အတၢ်အၢၣ်လီၤအီလီၤလီၤ. အဝဲအၢၣ်လီၤတၢ်ဘၣ်ဆၣ် အမၤဝဲ တၢ်သ့ၣ်တဖၣ်န့ၣ်အဃိ အဝဲတပူၤဖျဲးဘၣ်.””’

၁၉ “‘တၢ်ပၢကစၢ် ယဟိဝၤယွၤ တဲဝဲလၢ “ဒ်ယမ့ၢ်ပှၤလၢ အမူဝဲသပှၢ်တၢၢ်အသိး ယအၢၣ်လီၤလၢ မ့ၢ်လၢ အတပာ်ကဲ ယတၢ်အၢၣ်လီၤဘၣ် ဒီးမၤဟးဂီၤ ယတၢ်အၢၣ်လီၤအီလီၤအဃိ ယကဟ့ၣ်ကၣ်က့ၤအီၤ ဒ်တၢ်လၢအမၤဝဲအသိးလီၤ.+ ၂၀ ယကဒိးလီၤ ပျံၤသကွီၤလၢအဂီၢ် ဒီးအဝဲကလီၤလၢ ယပျံၤသကွီၤအပူၤလီၤ.+ ယကလဲၤဆှၢအီၤလၢ ဘၤဘူၤလိၣ် ဒီးစံၣ်ညီၣ်အီၤဖဲန့ၣ် မ့ၢ်လၢ အတၢ်သးတီ တအိၣ်ဘၣ် ဒီးအမၤကမၣ်ယၤအဃိလီၤ.+ ၂၁ အပှၤသုးဖိတဖၣ် လၢအဃ့ၢ်ကွံာ်န့ၣ် ကသံလၢနး ဒီးပှၤလၢအအိၣ်တ့ၢ်တဖၣ်န့ၣ် ကလီၤပြံလီၤပြါလၢ တၢ်လီၢ်ဝးဝးလီၤ.+ ဒီးသုကသ့ၣ်ညါဘၣ်လၢ ယၤ ယဟိဝၤယွၤ တဲတၢ်လီၤ.”’+

၂၂ “‘တၢ်ပၢကစၢ် ယဟိဝၤယွၤ တဲဝဲလၢ “ယကဒဲးန့ၢ် သ့ၣ်ဆှိအ့ရ့းဖးထီတထူၣ်န့ၣ်+ အခိၣ်စိးဘီၣ်ဘီၣ်ဖိလၢ အဖီခိၣ်ကတၢၢ်တဒ့+ ဒီးယကသူၣ်လီၤအီၤလၢ ကစၢၢ်ဖးထီတဖျၢၣ် အလိၤလီၤ.+ ၂၃ ယကသူၣ်လီၤအီၤလၢ အံၣ်စရ့လး အကစၢၢ်တဖျၢၣ်အဒီခိၣ် ဒီးအဒ့တဖၣ် ကဒိၣ်ထီၣ် ဒီးကသၣ်ထီၣ်ဝဲလီၤ. ဒီးအကကဲထီၣ် သ့ၣ်ဆှိအ့ရ့းလၢ အလီၤကဟုကညီၢ်တထူၣ်လီၤ. ဒီးထိၣ်အကလုာ်ကလုာ် ကဟဲအိၣ်လၢ အဖီလာ် ဒီးကအိၣ်ဝဲဆိးဝဲလၢ အလၣ်အကဒုလာ်လီၤ. ၂၄ သ့ၣ်ထူၣ်လၢ အအိၣ်လၢ တၢ်ပျီပူၤ ခဲလၢာ်န့ၣ် ကသ့ၣ်ညါဘၣ်ဝဲလၢ ယၤ ယဟိဝၤယွၤန့ၣ် ဆီၣ်လီၤကွံာ် သ့ၣ်ထူၣ်လၢ အဖးထီ ဒီးပာ်ထီၣ်ထီ သ့ၣ်ထူၣ်လၢအဖုၣ်+ ဒီးယမၤဃ့ထီကွံာ် သ့ၣ်ထူၣ်လၢ အလါ ဒီးဒုးဖီထီၣ် သ့ၣ်ထူၣ်လၢ အဃ့ထီလီၤ.+ ယၤ ယဟိဝၤယွၤန့ၣ် ယတဲတၢ်ဝံၤလံ ဒီးယကမၤဒ်န့ၣ် သပှၢ်ကတၢၢ်လီၤ.”’”

၁၈ ကစၢ်ယဟိဝၤယွၤ တဲယၤလၢ ၂ “လၢကီၢ်အံၣ်စရ့လးအပူၤန့ၣ် သုတဲညီနုၢ် တၢ်ကတိၤဒိလၢအမ့ၢ် ‘ပၢ်တဖၣ်အီၣ်စပံးသၣ် လၢအဆံၣ် ဒီးပှၤလၢအမဲတဃံၤန့ၣ်* လၢအဖိခွါတဖၣ်ဟီ.’+ သုတဲတၢ်ကတိၤဒိအံၤန့ၣ် သုအဲၣ်ဒိးတဲ အခီပညီဒ်လဲၣ်.

၃ “တၢ်ပၢကစၢ် ယဟိဝၤယွၤ တဲဝဲလၢ ‘ဒ်ယမ့ၢ်ပှၤလၢအမူဝဲ သပှၢ်တၢၢ်အသိး ယအၢၣ်လီၤလၢ လၢအံၣ်စရ့လးအပူၤန့ၣ် သုတတဲဘၣ် တၢ်ကတိၤဒိအံၤလၢၤဘၣ်. ၄ သးသမူခဲလၢာ်န့ၣ် မ့ၢ်ယတၢ်လီၤ. ပၢ်အသးသမူမ့ၢ်ဂ့ၤ ဖိအသးသမူမ့ၢ်ဂ့ၤ မ့ၢ်ယတၢ်လီၤ. ပှၤတဂၤဂ့ၤတဂၤဂ့ၤ* လၢအမၤတၢ်ဒဲးဘးန့ၣ် ကသံလီၤ.

၅ “‘အဒိ ပှၤတီပှၤလိၤ အိၣ်ဝဲတဂၤလီၤ. အဝဲမၤတၢ်လၢ အတီအလိၤ ဒီးမၤတၢ်လၢအဘၣ်လီၤ. ၆ အဝဲတအီၣ် တၢ်လၢပှၤလုၢ်ထီၣ်အီၤလၢ တၢ်ဂီၤတၢ်ဖှီၣ်အအိၣ် လၢကစၢၢ်ခိၣ်ဘၣ်.+ ဒီးအဝဲ တဃ့ထုကဖၣ်လၢ တၢ်ဂီၤတၢ်ဖှီၣ်လၢ အလီၤသးဘၣ်အၢ* လၢအအိၣ်လၢ ပှၤအံၣ်စရ့လးဖိ အကျါန့ၣ်ဘၣ်. ဒီးအဝဲတမံဃုာ်ဒီး ပှၤမါ+ ဒီးတမံဃုာ်ဒီး ပိာ်မုၣ်လၢ အလုၢ်အလၢ်ဟဲန့ၣ်ဘၣ်.+ ၇ အဝဲ တရ့ဒီးပှၤဂၤ အၢအၢသီသီ နီတဂၤဘၣ်+ ဒီးတၢ်လၢ ပှၤလၢအဃ့လိၢ်တၢ်တဖၣ် ပီၣ်လီၤဝဲန့ၣ် အဝဲဟ့ၣ်က့ၤဝဲလီၤ.+ အဝဲ တဂုာ်န့ၢ် ပှၤဂၤအတၢ် နီတဂၤဘၣ်.+ ဒီးပှၤလၢ အဟၢဖၢ လီၤဘဲန့ၣ် ဟ့ၣ်ဒုးအီၣ်ဝဲတၢ်အီၣ်+ ဒီးပှၤလၢ အအိၣ်ဘ့ၣ်ဆ့န့ၣ် ဒုးကူဒုးသိးဝဲ တၢ်ကူတၢ်ကၤလီၤ.+ ၈ အဝဲတဃ့ စ့အအ့ၣ်လၢ ပှၤလၢအဃ့လိၢ်တၢ် လၢအအိၣ်န့ၣ်ဘၣ်.+ ဒီးအဝဲတမၤ တၢ်တတီတလိၤဘၣ်.+ ဒီးအဝဲ စံၣ်ညီၣ်န့ၢ်တၢ်လၢ ပှၤခံဂၤအဘၢၣ်စၢၤ တီတီလိၤလိၤလီၤ.+ ၉ အဝဲလဲၤတၢ်ဒ် ယတၢ်ဘျၢအသိး ဒီးအိၣ်မူမၤထွဲ ယတၢ်သိၣ်တၢ်သီ ဒ်သိးကမၤတၢ်လၢ တၢ်သးတီအပူၤအဂီၢ်လီၤ. ပှၤဒ်န့ၣ်တဂၤန့ၣ် အမ့ၢ်ပှၤလၢအတီအလိၤ ဒီးကဆဲးအိၣ်မူဘၣ် သပှၢ်ကတၢၢ်လီၤ.’+ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.

၁၀ “‘အဒိ ပၢ်တဂၤန့ၣ် အိၣ်ဒီးအဖိခွါတဂၤ ဒီးအဖိခွါန့ၣ် မ့ၢ်ဝဲတမျာ်,+ ပှၤမၤသံတၢ်+ မ့တမ့ၢ် မၤဝဲ တၢ်ဒဲးဘးဖဲမကၢာ်တခါခါလီၤ. ၁၁ (ပၢ်န့ၣ်တမၤဝဲ တၢ်သ့ၣ်တဖၣ်န့ၣ် နီတမံၤဘၣ်.) အဖိခွါန့ၣ် အီၣ်ဝဲ တၢ်လၢပှၤလုၢ်ထီၣ်အီၤလၢ တၢ်ဂီၤတၢ်ဖှီၣ်အအိၣ် လၢကစၢၢ်ခိၣ်လီၤ. ဒီးအဝဲမံဃုာ်ဒီး ပှၤမါလီၤ. ၁၂ အဝဲ ရ့ပှၤဖှီၣ်ဖိယာ်ဖိ ဒီးပှၤလၢအလိၣ်ဘၣ် တၢ်မၤစၢၤတဖၣ် အၢအၢသီသီလီၤ.+ အဝဲ တမျာ်ပှၤဂၤအတၢ် ဒီးတဟ့ၣ်က့ၤဝဲ တၢ်လၢပှၤပီၣ်လီၤဝဲ လၢအအိၣ်ဘၣ်. အဝဲ ဃ့ထုကဖၣ်လၢ တၢ်ဂီၤတၢ်ဖှီၣ်လၢ အလီၤသးဘၣ်အၢ အအိၣ်လီၤ.+ ဒီးအမၤဝဲ လုၢ်လၢ်လၢ အလီၤသးဘၣ်အၢတဖၣ်လီၤ.+ ၁၃ ဒီးအဝဲ ဃ့စ့အအ့ၣ်လၢ ပှၤလၢအဃ့လိၢ်တၢ်လၢ အအိၣ်လီၤ.+ အဃိ အဝဲတဆဲးအိၣ်မူဘၣ်လၢၤဘၣ်. မ့ၢ်လၢ အဝဲမၤဝဲ လုၢ်လၢ်လၢ အအၢအသီတဖၣ်အံၤ ခဲလၢာ်အဃိ အဝဲကဘၣ်သံဝဲ သပှၢ်ကတၢၢ်လီၤ. ဒီးအသွံၣ်ကလီၤတီလၢ အနီၢ်ကစၢ် အခိၣ်လိၤလီၤ.

၁၄ “‘အဒိ ပၢ်တဂၤ အိၣ်ဒီးအဖိခွါတဂၤလီၤ. အဖိခွါ ထံၣ်ဝဲ တၢ်ဒဲးဘး ခဲလၢာ်လၢ အပၢ်မၤဝဲ ဘၣ်ဆၣ် အဝဲတမၤဝဲ တၢ်သ့ၣ်တဖၣ်န့ၣ်ဘၣ်. ၁၅ အဝဲတအီၣ်ဝဲ တၢ်လၢပှၤလုၢ်ထီၣ်အီၤလၢ တၢ်ဂီၤတၢ်ဖှီၣ်အအိၣ် လၢကစၢၢ်ခိၣ်ဘၣ်. ဒီးအဝဲတဃ့ဘါထုကဖၣ်လၢ တၢ်ဂီၤတၢ်ဖှီၣ်လၢ အလီၤသးဘၣ်အၢ လၢအအိၣ်လၢ ပှၤအံၣ်စရ့လးဖိ အကျါန့ၣ်ဘၣ်. ဒီးအဝဲတမံဃုာ်ဒီး ပှၤမါဘၣ်. ၁၆ အဝဲ တရ့ဒီးပှၤဂၤ အၢအၢသီသီ နီတဂၤဘၣ် ဒီးတၢ်လၢ ပှၤလၢအဃ့လိၢ်တၢ်တဖၣ် ပီၣ်လီၤဝဲန့ၣ် အဝဲတဟံးန့ၢ်ဘၣ်. အဝဲတဂုာ်န့ၢ် ပှၤဂၤအတၢ် နီတမံၤဘၣ်. ဒီးပှၤလၢ အဟၢဖၢ လီၤဘဲန့ၣ် ဟ့ၣ်ဒုးအီၣ်ဝဲတၢ်အီၣ် ဒီးပှၤလၢ အအိၣ်ဘ့ၣ်ဆ့န့ၣ် ဒုးကူဒုးသိးဝဲ ဒီးတၢ်ကူတၢ်ကၤလီၤ. ၁၇ ဒီးအဝဲ တဆီၣ်တံၢ်မၤနၢၤ ပှၤဖှီၣ်ဖိယာ်ဖိဘၣ်. ဒီးအဝဲတဃ့ စ့အအ့ၣ်လၢ ပှၤလၢအဃ့လိၢ်တၢ် လၢအအိၣ်န့ၣ်ဘၣ်. ဒီးအဝဲ မၤထွဲဒ် ယတၢ်သိၣ်တၢ်သီအသိး ဒီးလဲၤတၢ်ဒ် ယတၢ်ဘျၢ အသိးလီၤ. ပှၤဒ်န့ၣ်တဂၤန့ၣ် တသံဘၣ်ဝဲလၢ အပၢ်အတၢ်ကမၣ် အဃိဘၣ်. အကဆဲးအိၣ်မူဘၣ် သပှၢ်ကတၢၢ်လီၤ. ၁၈ ဘၣ်ဆၣ် မ့မ့ၢ်အပၢ်န့ၣ် လံၣ်အီၣ်လီအီၣ်တၢ်, ဂုာ်န့ၢ်အဒီပုၢ်ဝဲၢ်အတၢ် ဒီးမၤဝဲ တၢ်လၢအကမၣ် လၢအပှၤကလုာ်တဖၣ်အကျါ အဃိ အကဘၣ်သံဝဲ လၢအတၢ်ကမၣ် အဃိလီၤ.

၁၉ “‘ဘၣ်ဆၣ် သုကတဲလၢ “ဘၣ်မနုၤအဃိ အဖိခွါ တတူၢ်ဘၣ် တၢ်ကမၣ်လၢ အပၢ်အတၢ်ဒဲးဘး အဃိဘၣ်လဲၣ်.” မ့ၢ်လၢ အဖိခွါန့ၣ် မၤတၢ်တီတီလိၤလိၤ ဒီးမၤတၢ်လၢအဘၣ် ဒီးအဝဲမၤထွဲဝဲ ယတၢ်ဘျၢခဲလၢာ် အဃိ အဝဲ ကဆဲးအိၣ်မူဘၣ် သပှၢ်ကတၢၢ်လီၤ.+ ၂၀ ပှၤ* လၢအမၤတၢ်ဒဲးဘး တဂၤန့ၣ် ကသံဝဲလီၤ.+ ဖိခွါ တတူၢ်ဘၣ် တၢ်ကမၣ်လၢ အပၢ် အတၢ်ဒဲးဘး အဃိဘၣ်. ဒီးအပၢ် တတူၢ်ဘၣ် တၢ်ကမၣ်လၢ အဖိခွါ အတၢ်ဒဲးဘး အဃိဘၣ်. ဖဲပှၤတီပှၤလိၤ န့ၢ်ဘၣ် ခိၣ်ဖးလၢ အတၢ်တီတၢ်လိၤ အဃိအခါန့ၣ် အကန့ၢ်ဘၣ်ဝဲ ထဲအီၤတဂၤလီၤ. ဒီးဖဲပှၤအၢပှၤသီ ဘၣ်တၢ်စံၣ်ညီၣ်အီၤ လၢအတၢ်အၢတၢ်သီအဃိ အခါန့ၣ် အကဘၣ်တၢ်စံၣ်ညီၣ် ထဲအီၤတဂၤလီၤ.+

၂၁ “‘ဒီးပှၤအၢပှၤသီတဂၤ မ့ၢ်တမၤတၢ်ဒဲးဘးလၢ အမၤတ့ၢ်ဝဲ နီတမံၤလၢၤဘၣ် ဒီးမ့ၢ်မၤထွဲက့ၤ ယတၢ်ဘျၢတဖၣ် ဒီးမၤတၢ်တီတီလိၤလိၤ ဒီးမၤတၢ်လၢအဘၣ်န့ၣ် အဝဲ ကဆဲးအိၣ်မူဘၣ်ဝဲ သပှၢ်ကတၢၢ်လီၤ. ဒီးအဝဲ တသံဘၣ်ဘၣ်.+ ၂၂ ဒီးယတစံၣ်ညီၣ်အီၤ* လၢတၢ်ကမၣ်လၢ အမၤတ့ၢ်ဝဲတဖၣ် အဃိဘၣ်.+ အဝဲ ကဆဲးအိၣ်မူဘၣ်ဝဲ ခီဖျိလၢ အမၤတၢ်လၢ အတီအလိၤ အဃိလီၤ.’+

၂၃ “တၢ်ပၢကစၢ် ယဟိဝၤယွၤ တဲဝဲလၢ ‘ပှၤအၢပှၤသီ မ့ၢ်ဘၣ်သံန့ၣ် မ့ၢ်ယဘၣ်သူၣ်ဘၣ်သး တစဲးစဲးဧါ.+ ယအဲၣ်ဒိးလၢ အဝဲ ကပာ်တ့ၢ်ကွံာ် အကျဲအၢကျဲသီ ဒီးဆဲးအိၣ်မူ တမ့ၢ်ဧီၤ.’+

၂၄ “‘ဘၣ်ဆၣ် ပှၤတီပှၤလိၤတဂၤ မ့ၢ်တမၤတၢ် တီတီလိၤလိၤလၢၤဘၣ် ဒီးမ့ၢ်မၤတၢ်လၢ အကမၣ် ဒီးမၤတၢ်အၢတၢ်သီ ကိးမံၤဒဲးလၢ ပှၤအၢပှၤသီမၤဝဲန့ၣ် မ့ၢ်အဝဲ ကအိၣ်မူဘၣ်ဒံးဧါ. တၢ်တသ့ၣ်နီၣ်ထီၣ်က့ၤ တၢ်တီတၢ်လိၤလၢ အမၤတ့ၢ်ဝဲတဖၣ် နီတမံၤဘၣ်.+ မ့ၢ်လၢ အဝဲတအိၣ်ဒီး တၢ်သးတီဘၣ် ဒီးအမၤဘၣ်တၢ်ဒဲးဘး အဃိ အဝဲကဘၣ်သံလီၤ.+

၂၅ “‘ဘၣ်ဆၣ် သုကတဲလၢ “ယဟိဝၤယွၤ တမၤတၢ် တီတီလိၤလိၤဘၣ်.”+ အိ ပှၤအံၣ်စရ့လးဖိသ့ၣ်ဧၢ, ဝံသးစူၤ ကနၣ်လၢအံၤ. ယတၢ်မၤန့ၣ် တတီတလိၤဧီၤ.+ ပှၤမၤတၢ် တတီတလိၤန့ၣ် လၢသုဟီ တမ့ၢ်ဧီၤ.+

၂၆ “‘ပှၤတီပှၤလိၤတဂၤ မ့ၢ်တမၤတၢ် တီတီလိၤလိၤလၢၤဘၣ် ဒီးမ့ၢ်မၤ တၢ်ကမၣ်ဒီးအမ့ၢ်သံန့ၣ် ကသံဝဲလၢ အနီၢ်ကစၢ် အတၢ်ကမၣ် အဃိလီၤ.

၂၇ “‘ဒီးပှၤအၢပှၤသီတဂၤ မ့ၢ်တမၤ တၢ်အၢတၢ်သီလၢၤဘၣ် ဒီးမ့ၢ်စးထီၣ် မၤတၢ်တီတီလိၤလိၤ ဒီးမၤတၢ်လၢ အဘၣ်န့ၣ် အဝဲကမၤပူၤဖျဲး အနီၢ်ကစၢ် အသးသမူလီၤ.+ ၂၈ အဝဲ မ့ၢ်သ့ၣ်ညါလီၤအသး ဒီးမ့ၢ်တမၤ တၢ်ကမၣ် လၢအမၤတ့ၢ်ဝဲ နီတမံၤလၢၤဘၣ်န့ၣ် အဝဲကဆဲးအိၣ်မူဘၣ် သပှၢ်ကတၢၢ်လီၤ. အဝဲ တသံဘၣ်ဘၣ်.

၂၉ “‘ဘၣ်ဆၣ် ပှၤအံၣ်စရ့လးဖိတဖၣ် ကတဲဝဲလၢ “ယဟိဝၤယွၤ တမၤတၢ် တီတီလိၤလိၤဘၣ်.” အိ ပှၤအံၣ်စရ့လးဖိသ့ၣ်ဧၢ, ကနၣ်လၢအံၤ. ယတၢ်မၤန့ၣ် တတီတလိၤဧီၤ.+ ပှၤမၤတၢ် တတီတလိၤန့ၣ် လၢသုဟီ တမ့ၢ်ဧီၤ.’

၃၀ “တၢ်ပၢကစၢ် ယဟိဝၤယွၤ တဲဝဲလၢ ‘အိ ပှၤအံၣ်စရ့လးဖိဧၢ, ယကစံၣ်ညီၣ် သုဝဲတဂၤစုာ်စုာ် ဒ်တၢ်လၢသုမၤအသိးလီၤ.+ ဒ်သိး သုတၢ်ကမၣ်တဖၣ် သုတကဲထီၣ် တၢ်လီၤဃံၢ်အလီၢ်လၢ သုကဘၣ်တၢ်စံၣ်ညီၣ် တဂ့ၤအဂီၢ် တဘၣ်မၤ တၢ်ကမၣ်တဖၣ်န့ၣ် နီတစဲးလၢၤတဂ့ၤ. တဘၣ်မၤလၢၤတဂ့ၤ. ၃၁ ပာ်တ့ၢ်ကွံာ် တၢ်ကမၣ်ခဲလၢာ်လၢ သုမၤအီၤတဖၣ်တက့ၢ်.+ သုကဘၣ် ဆီတလဲ သုတၢ်ပာ်သူၣ်ပာ်သး ဒီးသုတၢ်ဆိကမိၣ်လီၤ.+ အိ ပှၤအံၣ်စရ့လးဖိသ့ၣ်ဧၢ, သုမ့ၢ်တမၤဒ်န့ၣ်ဘၣ်န့ၣ် သုကသံလီၤ.’+

၃၂ “တၢ်ပၢကစၢ် ယဟိဝၤယွၤ တဲဝဲလၢ ‘ယတအဲၣ်ဒိးလၢ ပှၤသံနီတဂၤဘၣ်.+ အဃိ ပီၢ်ယၢ်လီၤက့ၤသုသး ဒီးသုကဆဲးမူလီၤ.’”+

အဝဲမံနီၤလၢ ခ့ယုၢ်ဖိလၢ အဂံၢ်ဆူၣ်ဘါဆူၣ်တဖၣ်အကျါ ဒီးကွၢ်လုၢ်ဒိၣ်ထီၣ် အဖိတဖၣ်လီၤ.

 ၃ အဖိလၢ အကွၢ်လုၢ်ဒိၣ်ထီၣ်ဝဲအကျါ တဒုန့ၣ် ကဲထီၣ်ဝဲ ခ့ယုၢ်ဖိလၢ အဂံၢ်ဆူၣ်ဘါဆူၣ် တဒုလီၤ.+

 ၅ ဒီးအမိၢ်န့ၣ် အိၣ်ခိးအီၤ ဘၣ်ဆၣ် လၢခံန့ၣ် အသ့ၣ်ညါဘၣ်ဝဲလၢ အဖိတဟဲက့ၤလၢၤဘၣ်.

အဃိအဝဲ ကိးန့ၢ် အဖိအဂၤတဒု ဒီးဒုးကဲထီၣ်အီၤ ဒ်ခ့ယုၢ်ဖိ လၢအဂံၢ်ဆူၣ်ဘါဆူၣ် တဒုလီၤ.

 ၆ ခ့ယုၢ်ဖိတဒုအံၤ ဟးလၢခ့ယုၢ်တဖၣ်အကျါ ဒီးကဲထီၣ်ဝဲ ခ့ယုၢ်ဖိလၢ အဂံၢ်ဆူၣ်ဘါဆူၣ် တဒုလီၤ.

ဒီးအဝဲ မၤလိသ့ပာ်စၢၤအသးလၢ ကအ့ၣ်ဖှီတၢ် ဒီးအအီၣ်ယူၢ်လီၤ ပှၤကညီစ့ၢ်ကီးလီၤ.+

 ၇ အဝဲ ဃုအီၣ်တၢ်လၢ တၢးလၢအကျၢၤတဖၣ်အကျါ ဒီးမၤဟးဂီၤကွံာ် ဝ့ၢ်တဖၣ်လီၤ.

အဃိ တၢ်လီၢ်လၢ အအိၣ်သယုၢ်န့ၣ် အိၣ်ပှဲၤထဲ အကညီၤတၢ် အသီၣ်လီၤ.+

 ၈ ကီၢ်ရ့ၣ်လၢအအိၣ်ဝးတရံးအီၤတဖၣ် အပှၤကလုာ်န့ၣ် ဟဲထီဒါအီၤ ဒီးပာ်လီၤပျံၤသကွီၤလၢ အဂီၢ်လီၤ.

ဒီးအဝဲသ့ၣ် ဖီၣ်န့ၢ်အီၤလၢ တၢ်ပူၤလီၤ.

 ၉ အဝဲသ့ၣ် ဘျးထီၣ်အီၤလၢနီၣ်ဘျး ဒီးထၢနုာ်အီၤလၢ ကပိၤပူၤ ဒီးက့ၤကိးအီၤလၢ ဘၤဘူၤလိၣ် အစီၤပၤအအိၣ်လီၤ.

အဝဲသ့ၣ် ဒုးဃာ်အီၤ ဖဲန့ၣ်အဃိ အကလုၢ် တသီၣ်ထီၣ်လၢ အံၣ်စရ့လး အကစၢၢ်တဖၣ်အလိၤ နီတဘျီလၢၤဘၣ်.

၁၀ နမိၢ်န့ၣ် လီၤဂာ်ဒီး စပံးမုၢ်*+ လၢအအိၣ်သူၣ်လီၤအသးလၢ ထံကျိနံၤလီၤ.

မ့ၢ်လၢ အအီဘၣ်ထံ လၢလၢပှဲၤပှဲၤအဃိ အသၣ်ထီၣ် ဒီးအဒ့တဖၣ် ထီၣ်ဝဲပှဲၤပှဲၤလီၤ.

၁၁ ဒီးအဒ့တဖၣ်န့ၣ် ကျၢၤထီၣ်ဝဲ တုၤလၢ အကြၢးကဲထီၣ် ပှၤပၢတၢ်တဖၣ် အနီၣ်ထိးဘိတဖၣ်လီၤ.

၁၂ ဘၣ်ဆၣ် စပံးမုၢ်အံၤ ဘၣ်တၢ်ထဲးထီၣ်အီၤ လၢတၢ်သးဒိၣ်ထီၣ်အပူၤ+ ဒီးဘၣ်တၢ်ကွံာ်လီၤအီၤလၢ ဟီၣ်ခိၣ်လိၤလီၤ.

ဒီးကလံၤလၢ မုၢ်ထီၣ်တခီန့ၣ် မၤဃ့ထီကွံာ် အသၣ်တဖၣ်လီၤ.

ဒီးအဒ့လၢ အကျၢၤတဖၣ် ဘၣ်တၢ်ဘိးကၢ်ကွံာ်အီၤ ဒီးဃ့ထီဝဲ+ ဒီးမ့ၣ်အူအီၣ်ကွံာ်အီၤလီၤ.+

၁၄ မ့ၣ်အူဟးအီၣ်ဝဲ အဒ့တဖၣ် ဒီးအီၣ်ကွံာ်ဝဲ အစိးတဖၣ် ဒီးအသၣ် တဖၣ်လီၤ.

ဒီးအဒ့လၢ အကျၢၤလၢ အကကဲထီၣ် ပှၤပၢတၢ် အနီၣ်ထိးဘိန့ၣ် တအိၣ်တ့ၢ် နီတဒ့လၢၤဘၣ်.+

“‘အဝဲအံၤမ့ၢ်ဝဲ ထါဟီၣ် ဒီးအကမ့ၢ်ဝဲထါဟီၣ်လၢ ခါဆူညါအဂီၢ်လီၤ.’”

၂၀ ဖဲနွံနံၣ်တနံၣ်, လါယဲၢ်လါတလါ, လါထီၣ် အသီတဆံန့ၣ် အံၣ်စရ့လး အပှၤသူၣ်က့သးပှၢ်တနီၤ ဟဲဆ့ၣ်နီၤလၢ ယမဲာ်ညါ ဒ်သိး ကသံကွၢ်တၢ်လၢ ယဟိဝၤယွၤအအိၣ် အဂီၢ်လီၤ. ၂ ယဟိဝၤယွၤ တဲယၤလၢ ၃ “ပှၤကညီဖိခွါဧၢ, တဲဘၣ် အံၣ်စရ့လး အပှၤသူၣ်က့သးပှၢ်တဖၣ်လၢ ‘တၢ်ပၢကစၢ် ယဟိဝၤယွၤတဲဝဲလၢ “သုဟဲသံကွၢ်တၢ်လၢ ယအိၣ်ဧါ. ယၤ တၢ်ပၢကစၢ် ယဟိဝၤယွၤန့ၣ် ‘ဒ်ယမ့ၢ်ပှၤလၢအမူဝဲ သပှၢ်တၢၢ်အသိး ယအၢၣ်လီၤလၢ ယတစံးဆၢ သုတၢ်သံကွၢ်ဘၣ်.’”’+

၄ “နအိၣ်ကတဲာ်ကတီၤနသးလၢ နကစံၣ်ညီၣ် အဝဲသ့ၣ်လံဧါ. ပှၤကညီဖိခွါဧၢ, နအိၣ်ကတဲာ်ကတီၤနသးလၢ နကစံၣ်ညီၣ် အဝဲသ့ၣ်လံဧါ. ဒုးသ့ၣ်ညါ အဝဲသ့ၣ် တၢ်လၢအလီၤသးဘၣ်အၢလၢ အဝဲသ့ၣ် အမိၢ်ပၢ်ဖံဖု လၢပျၢၤတဖၣ် မၤတ့ၢ်ဝဲန့ၣ်တက့ၢ်.+ ၅ တဲအဝဲသ့ၣ်လၢ ‘တၢ်ပၢကစၢ် ယဟိဝၤယွၤ တဲဝဲလၢ “ဖဲမုၢ်နံၤလၢ ယဃုထၢထီၣ် ပှၤအံၣ်စရ့လးဖိန့ၣ်+ ယအၢၣ်လီၤတၢ်ဒီး စီၤယၤကိာ် အစၢၤအသွဲၣ်* ဒီးလၢကီၢ်အဲၤကူပတူးအပူၤန့ၣ်+ ယဒုးသ့ၣ်ညါ အဝဲသ့ၣ်လၢ ယမ့ၢ်မတဂၤလဲၣ်န့ၣ်လီၤ. ယအၢၣ်လီၤအဝဲသ့ၣ် ဒီးယတဲလၢ ‘ယမ့ၢ် သုကစၢ် ယဟိဝၤယွၤလီၤ.’ ၆ ဖဲမုၢ်နံၤ အဝဲန့ၣ် ယအၢၣ်လီၤလၢ ယကထုးထီၣ် အဝဲသ့ၣ် လၢကီၢ်အဲၤကူပတူး ဒီးဒုးလဲၤ အဝဲသ့ၣ်လၢ ကီၢ်လၢ ယဃုသ့ၣ်ညါပာ်စၢၤန့ၢ် အဝဲသ့ၣ်လီၤ. ကီၢ်တဘ့ၣ်အံၤန့ၣ် တၢ်နုၢ်ထံ ဒီးကနဲစီ ယွၤလီၤဝဲလၢအပူၤ+ ဒီးအဃံလၤဒိၣ်န့ၢ်ဒံး ကီၢ်အဂၤ ခဲလၢာ်လီၤ. ၇ ဒီးယတဲအဝဲသ့ၣ်လၢ ‘သုဝဲကိးဂၤဒဲးန့ၣ် သုကဘၣ်တၢၤကွံာ် တၢ်လၢအလီၤသးဘၣ်အၢ လၢအအိၣ်လၢ သုမဲာ်ညါတဖၣ်လီၤ. ဒီးသုတဘၣ် မၤဘၣ်အၢသုသးဒီး အဲၤကူပတူး အတၢ်ဂီၤတၢ်ဖှီၣ် လၢအလီၤသးဘၣ်အၢတဖၣ်ဘၣ်.*+ ယမ့ၢ် သုကစၢ် ယဟိဝၤယွၤလီၤ.’+

၈ “‘“ဘၣ်ဆၣ် အဝဲသ့ၣ် ထီဒါယၤ ဒီးတအဲၣ်ဒိး ဒိကနၣ်ယကလုၢ်ဘၣ်. အဝဲသ့ၣ် တတၢၤကွံာ် တၢ်လၢအလီၤသးဘၣ်အၢ လၢအအိၣ်လၢ အမဲာ်ညါဘၣ်. ဒီးအဝဲသ့ၣ် တပာ်တ့ၢ်ကွံာ် အဲၤကူပတူး အတၢ်ဂီၤတၢ်ဖှီၣ် လၢအလီၤသးဘၣ်အၢတဖၣ်ဘၣ်.+ အဃိ ယအၢၣ်လီၤလၢ ယကလူလီၤ ယတၢ်သးထီၣ်လၢ အဝဲသ့ၣ်အလိၤ ဒီးပျၢ်လီၤ ယတၢ်သးထီၣ် လၢာ်လၢာ်ဆ့ဆ့ လၢအဝဲသ့ၣ်အအိၣ် လၢကီၢ်အဲၤကူပတူး အပူၤလီၤ. ၉ ဘၣ်ဆၣ် ယပၢၤယသးလၢ ယမံၤအဃိ ဒီးဒ်သိး ယမံၤသုတဟးဂီၤလၢ ပှၤကလုာ်တဖၣ် အမဲာ်ညါ တဂ့ၤအဂီၢ်လီၤ. အဝဲသ့ၣ် အိၣ်ဝဲလၢ ပှၤကလုာ်တဖၣ်အံၤအကျါလီၤ.+ ဒီးဖဲယဒုးဟးထီၣ် အဝဲသ့ၣ်* လၢကီၢ်အဲၤကူပတူးအခါ လၢပှၤကလုာ်တဖၣ်အံၤ အမဲာ်ညါန့ၣ် ယပာ်ဖျါထီၣ်န့ၢ် အဝဲသ့ၣ်* လၢယမ့ၢ် မတဂၤလဲၣ်န့ၣ်လီၤ.+ ၁၀ အဃိ ယဒုးဟးထီၣ်ကွံာ် အဝဲသ့ၣ်လၢ ကီၢ်အဲၤကူပတူးအပူၤ ဒီးဆှၢအဝဲသ့ၣ် လၢပှၢ်မုၢ်ကနၢလီၤ.+

၁၁ “‘“ယဟ့ၣ်လီၤ အဝဲသ့ၣ်လၢ ယတၢ်ဘျၢတဖၣ် ဒီးဒုးသ့ၣ်ညါ အဝဲသ့ၣ်လၢ ယတၢ်သိၣ်တၢ်သီတဖၣ်+ ဒ်သိး ပှၤလၢ အမၤထွဲဝဲန့ၣ် ကအိၣ်မူဘၣ်ဝဲ အဂီၢ်လီၤ.+ ၁၂ ယဟ့ၣ်လီၤအဝဲသ့ၣ် လၢမုၢ်အိၣ်ဘှံးနံၤ အတၢ်သိၣ်တၢ်သီ+ ဒ်အမ့ၢ် တၢ်ပနီၣ်လၢ ယၤဒီးအဝဲသ့ၣ် အဘၢၣ်စၢၤ+ ဒ်သိး အဝဲသ့ၣ် ကသ့ၣ်ညါဝဲလၢ ယၤ ယဟိဝၤယွၤန့ၣ် ယပာ်စီဆှံ အဝဲသ့ၣ်လီၤ.

၁၃ “‘“ဘၣ်ဆၣ် ပှၤအံၣ်စရ့လးဖိတဖၣ်န့ၣ် ထီဒါယၤလၢ ပှၢ်မုၢ်ကနၢ အပူၤလီၤ.+ အဝဲသ့ၣ် တလဲၤတၢ်ဒ် ယတၢ်ဘျၢတဖၣ်အသိးဘၣ် ဒီးတဒိကနၣ် ယတၢ်သိၣ်တၢ်သီတဖၣ်လၢ ပှၤမ့ၢ်မၤထွဲအီၤန့ၣ် ပှၤကအိၣ်မူဘၣ်န့ၣ်ဘၣ်. အဝဲသ့ၣ် မၤကမၣ် မုၢ်အိၣ်ဘှံးနံၤ အတၢ်သိၣ်တၢ်သီ လၢာ်လၢာ်ဆ့ဆ့လီၤ. အဃိ ယအၢၣ်လီၤလၢ ယကလူလီၤ ယတၢ်သးထီၣ်လၢ အဝဲသ့ၣ်အလိၤ လၢပှၢ်မုၢ်ကနၢအပူၤ ဒ်သိး ယကမၤဟးဂီၤကွံာ် အဝဲသ့ၣ်အဂီၢ်လီၤ.+ ၁၄ ဘၣ်ဆၣ် ယပၢၤယသးလၢ ယမံၤအဃိ ဒီးဒ်သိး ယမံၤသုတဟးဂီၤလၢ ပှၤကလုာ်တဖၣ် အမဲာ်ညါ တဂ့ၤအဂီၢ်လီၤ. လၢညါ ယထုးထီၣ်အဝဲသ့ၣ်* လၢပှၤကလုာ်တဖၣ်အံၤ အမဲာ်ညါလီၤ.+ ၁၅ ဒီးလၢပှၢ်မုၢ်ကနၢအပူၤန့ၣ် ယအၢၣ်လီၤအဝဲသ့ၣ်လၢ ယတဆှၢနုာ် အဝဲသ့ၣ်လၢ ကီၢ်လၢယတဲလၢ ယကဟ့ၣ်လီၤ အဝဲသ့ၣ်န့ၣ်ဘၣ်.+ ကီၢ်တဘ့ၣ်န့ၣ် တၢ်နုၢ်ထံ ဒီးကနဲစီ ယွၤလီၤဝဲလၢအပူၤ+ ဒီးအဃံလၤဒိၣ်န့ၢ်ဒံး ကီၢ်အဂၤ ခဲလၢာ်လီၤ. ၁၆ ယမၤအဝဲသ့ၣ်ဒ်န့ၣ် မ့ၢ်လၢ အဝဲသ့ၣ် တဒိကနၣ် ယတၢ်သိၣ်တၢ်သီတဖၣ်ဘၣ် ဒီးတလဲၤတၢ်ဒ် ယတၢ်ဘျၢတဖၣ်အသိးဘၣ် ဒီးအဝဲသ့ၣ် မၤကမၣ် မုၢ်အိၣ်ဘှံးနံၤ အတၢ်သိၣ်တၢ်သီအဃိလီၤ. တကးဒံးဘၣ် အဝဲသ့ၣ် သးအိၣ်ဘူၣ်ထီၣ်ဘါထီၣ် တၢ်ဂီၤတၢ်ဖှီၣ် လၢအလီၤသးဘၣ်အၢတဖၣ်လီၤ.+

၁၇ “‘“ဘၣ်ဆၣ် ယသးကညီၤဘၣ် အဝဲသ့ၣ် ဒီးယတမၤဟးဂီၤ အဝဲသ့ၣ်လၢၤဘၣ်. ဒီးလၢပှၢ်မုၢ်ကနၢအပူၤန့ၣ် ယတမၤဟးဂီၤကွံာ် အဝဲသ့ၣ် ခဲလၢာ်ခဲဆ့ဘၣ်. ၁၈ လၢပှၢ်မုၢ်ကနၢအပူၤန့ၣ် ယတဲဘၣ် အဝဲသ့ၣ် အဖိခွါတဖၣ်လၢ+ ‘တဘၣ်လဲၤတၢ်ဒ် သုပၢ်တဖၣ် အတၢ်ဘျၢအသိးတဂ့ၤ+ ဒီးတဘၣ် မၤထွဲအဝဲသ့ၣ် အတၢ်စံၣ်ညီၣ်ဆၢတဲာ်တဖၣ်တဂ့ၤ. ဒီးတဘၣ်မၤဘၣ်အၢလီၤသုသးလၢ အဝဲသ့ၣ် အတၢ်ဂီၤတၢ်ဖှီၣ် လၢအလီၤသးဘၣ်အၢတဖၣ်တဂ့ၤ. ၁၉ ယမ့ၢ် သုကစၢ် ယဟိဝၤယွၤလီၤ. လဲၤတၢ်ဒ် ယတၢ်ဘျၢတဖၣ်အသိး ဒီးအိၣ်မူမၤထွဲ ယတၢ်သိၣ်တၢ်သီတဖၣ်တက့ၢ်.+ ၂၀ ဒီးပာ်စီဆှံ မုၢ်အိၣ်ဘှံးနံၤတက့ၢ်.+ သုမ့ၢ်မၤဒ်န့ၣ်န့ၣ် ကကဲထီၣ် တၢ်ပနီၣ်လၢ ယၤဒီးသုအဘၢၣ်စၢၤ လၢကဒုးသ့ၣ်နီၣ်ထီၣ်သုလၢ ယမ့ၢ်သုကစၢ် ယဟိဝၤယွၤလီၤ.’+

၂၁ “‘“ဘၣ်ဆၣ် အဝဲသ့ၣ် ထီဒါယၤလီၤ.+ အဝဲသ့ၣ် တလဲၤတၢ်ဒ် ယတၢ်ဘျၢတဖၣ်အသိးဘၣ် ဒီးတအိၣ်မူမၤထွဲ ယတၢ်သိၣ်တၢ်သီတဖၣ်လၢ ပှၤမ့ၢ်မၤထွဲအီၤန့ၣ် ပှၤကအိၣ်မူဘၣ်န့ၣ်ဘၣ်. အဝဲသ့ၣ် မၤကမၣ် မုၢ်အိၣ်ဘှံးနံၤ အတၢ်သိၣ်တၢ်သီလီၤ. အဃိ ယအၢၣ်လီၤလၢ ယကလူလီၤ ယတၢ်သးထီၣ်လၢ အဝဲသ့ၣ်အလိၤ ဒီးပျၢ်လီၤ ယတၢ်သးထီၣ် လၢာ်လၢာ်ဆ့ဆ့ လၢအဝဲသ့ၣ်အအိၣ် လၢပှၢ်မုၢ်ကနၢအပူၤလီၤ.+ ၂၂ ဘၣ်ဆၣ် ယပၢၤယသး+ ဒီးယမၤတၢ်လၢ ယမံၤအဂီၢ်+ ဒ်သိး ယမံၤသုတဟးဂီၤလၢ ပှၤကလုာ်တဖၣ် အမဲာ်ညါ တဂ့ၤအဂီၢ်လီၤ. လၢညါ ယထုးထီၣ် အဝဲသ့ၣ် လၢပှၤကလုာ်တဖၣ်အံၤ အမဲာ်ညါလီၤ. ၂၃ ဒီးလၢပှၢ်မုၢ်ကနၢအပူၤန့ၣ် ယအၢၣ်လီၤလၢ ယကနီလဲၤ အဝဲသ့ၣ်လၢ တၢ်လီၢ်အဂၤ ဒီးယကမၤလီၤပြံလီၤပြါ အဝဲသ့ၣ်လၢ ပှၤကလုာ်တဖၣ်အကျါ,+ ၂၄ မ့ၢ်လၢ အဝဲသ့ၣ် တအိၣ်မူမၤထွဲ ယတၢ်သိၣ်တၢ်သီတဖၣ်ဘၣ် ဒီးအဝဲသ့ၣ် တဒိကနၣ် ယတၢ်ဘျၢတဖၣ်ဘၣ်+ ဒီးအဝဲသ့ၣ်မၤကမၣ် မုၢ်အိၣ်ဘှံးနံၤ အတၢ်သိၣ်တၢ်သီ အဃိလီၤ. တကးဒံးဘၣ် အဝဲသ့ၣ် ဘူၣ်ထီၣ်ဘါထီၣ်ဝဲ အမိၢ်ပၢ်ဖံဖုလၢပျၢၤ အတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်လီၤ.+ ၂၅ အဃိ ယပျဲလၢ အဝဲသ့ၣ် ကမၤထွဲ တၢ်ဘျၢလၢအတဂ့ၤဘၣ်တဖၣ် ဒီးကမၤထွဲ တၢ်သိၣ်တၢ်သီလၢ တဟ့ၣ်အဝဲသ့ၣ် တၢ်မူဘၣ်န့ၣ်လီၤ.+ ၂၆ ယပျဲလၢ အဝဲသ့ၣ် ကမၤဘၣ်အၢလီၤအသး ခီဖျိလၢ အတၢ်လုၢ်တဖၣ် လၢအမ့ၢ် အဝဲသ့ၣ် ဒွဲၣ်ထီၣ်* အဖိဝဲၢ်ကိ ကိးဂၤဒဲး လၢမ့ၣ်အူလီၤ.+ ယပျဲမၤ အဝဲသ့ၣ်ဒ်န့ၣ် ဒ်သိးအဝဲသ့ၣ် ကဘၣ်တၢ်မၤဟးဂီၤအီၤ ဒီးကသ့ၣ်ညါဘၣ်ဝဲလၢ ယမ့ၢ် ယဟိဝၤယွၤ အဂီၢ်လီၤ.”’

၂၇ “အိ ပှၤကညီဖိခွါဧၢ, တဲဘၣ်ပှၤအံၣ်စရ့လးဖိတဖၣ်လၢ ‘တၢ်ပၢကစၢ် ယဟိဝၤယွၤတဲဝဲလၢ “သုမိၢ်ပၢ်ဖံဖု လၢပျၢၤတဖၣ်န့ၣ် တပာ်ကဲယၤဘၣ် ခီဖျိလၢ အတတီဒီးယၤဘၣ် ဒ်န့ၣ်စ့ၢ်ကီးလီၤ. ၂၈ ဒီးယဆှၢနုာ်အဝဲသ့ၣ်လၢ ကီၢ်လၢယအၢၣ်လီၤလၢ ယကဟ့ၣ်အဝဲသ့ၣ် အပူၤလီၤ.+ ဘၣ်ဆၣ် ဖဲအဝဲသ့ၣ် ထံၣ်ဝဲ တၢ်လူၢ်ဖးထီတဖၣ် ဒီးသ့ၣ်လၢ အလၣ်အိၣ်အါတဖၣ်အခါ+ အဝဲသ့ၣ် လုၢ်ထီၣ်ဝဲ အတၢ်လုၢ်တဖၣ် ဒီးအတၢ်လုၢ်တၢ်ပာ်တဖၣ်လၢ အမၤဆါ ယသးလီၤ. အဝဲသ့ၣ် လုၢ်ထီၣ်ဝဲ အတၢ်လုၢ်လၢအနၢမူတဖၣ် ဒီးလူလီၤဝဲ စပံးထံ လၢတၢ်လုၢ်တၢ်ပာ်အဂီၢ် ဖဲန့ၣ်လီၤ. ၂၉ အဃိ ယသံကွၢ် အဝဲသ့ၣ်လၢ ‘ဘၣ်မနုၤအဃိ သုလဲၤလၢ တၢ်လီၢ်ထီၣ်ထီလဲၣ်. (ပှၤကိးအီၤလၢ တၢ်လီၢ်ထီၣ်ထီ တုၤလၢ မုၢ်မဆါတနံၤအံၤလီၤ.)’”’+

၃၀ “တဲဘၣ် ပှၤအံၣ်စရ့လးဖိတဖၣ်လၢ ‘တၢ်ပၢကစၢ် ယဟိဝၤယွၤ တဲဝဲလၢ “ဒ်သုမိၢ်ပၢ်ဖံဖု လၢပျၢၤတဖၣ် မၤတ့ၢ်အသိး မ့ၢ်သုမၤဘၣ်အၢလီၤသုသး ခီဖျိလၢ သုဘူၣ်ထီၣ်ဘါထီၣ် တၢ်ဂီၤတၢ်ဖှီၣ် လၢအလီၤသးဘၣ်အၢတဖၣ်လၢ တၢ်သးတတီဘၣ်* အပူၤန့ၣ်ဧါ.+ ၃၁ ပှၤအံၣ်စရ့လးဖိသ့ၣ်ဧၢ, သုဒွဲၣ်အူထီၣ် သုဖိလၢမ့ၣ်အူ ဒ်သိး သုကလုၢ်ထီၣ်တၢ်လၢ သုတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ် အအိၣ်လီၤ. မ့ၢ်သုမၤဘၣ်အၢလီၤသုသးဒ်န့ၣ် တုၤလၢခဲအံၤန့ၣ်ဧါ.+ အဃိ ဖဲသုသံကွၢ်တၢ်လၢ ယအိၣ်အခါ မ့ၢ်ယကြၢးစံးဆၢသုဧါ.”’+

“တၢ်ပၢကစၢ် ယဟိဝၤယွၤ တဲဝဲလၢ ‘ဒ်ယမ့ၢ်ပှၤလၢ အမူဝဲ သပှၢ်တၢၢ်တဂၤအသိး ယအၢၣ်လီၤလၢ ယတစံးဆၢသုဘၣ်.+ ၃၂ လၢသုသးပူၤန့ၣ် သုတဲလၢ “မ်ပကဘူၣ်ထီၣ်ဘါထီၣ် သ့ၣ်ဒီးလၢၢ် ဒ်သိးဒီး ပှၤကလုာ်တဖၣ်သၢၤ.”+ ဘၣ်ဆၣ် တၢ်လၢသုတဲန့ၣ် တဟဲကဲထီၣ် နီတဘျီဘၣ်.’”

၃၃ “တၢ်ပၢကစၢ် ယဟိဝၤယွၤ တဲဝဲလၢ ‘ဒ်ယမ့ၢ်ပှၤလၢအမူဝဲ သပှၢ်တၢၢ်အသိး ယအၢၣ်လီၤလၢ ယကပၢသုဒ် စီၤပၤအသိးလီၤ. ဒီးယကစံၣ်ညီၣ်သုလၢ စုလၢအဂံၢ်ဆူၣ်ဘါဆူၣ် ဒီးစုလၢ အယူာ်ဃီၤအသးလီၤ. ဒီးယကလူလီၤ ယတၢ်သးထီၣ် လၢသုလိၤလီၤ.+ ၃၄ ယသူစုလၢ အဂံၢ်ဆူၣ်ဘါဆူၣ် ဒီးစုလၢ အယူာ်ဃီၤအသး ဒီးယလူလီၤ ယတၢ်သးထီၣ်လၢသုလိၤ ဒီးယမၤလီၤပြံလီၤပြါသု လၢကီၢ်အဂၤတဖၣ် အပူၤလီၤ. ဘၣ်ဆၣ် ယကကိးဖှိၣ်က့ၤ သုဝဲလၢ အအိၣ်လၢ ပှၤကလုာ်တဖၣ်အကျါ ဒီးယကပာ်ဖှိၣ်ထီၣ်က့ၤ သုဝဲလၢ အလီၤပြံလီၤပြါတဖၣ်လီၤ.+ ၃၅ ယကဆှၢသုလၢ ပှၤဂီၢ်မုၢ်တဖၣ် အပှၢ်မုၢ်ကနၢ ဒီးယကသမံသမိးသု လၢမဲာ်သကိးမဲာ်ဖဲန့ၣ်လီၤ.+

၃၆ “တၢ်ပၢကစၢ် ယဟိဝၤယွၤ တဲဝဲလၢ ‘ဒ်ယသမံသမိး သုမိၢ်ပၢ်ဖံဖုလၢပျၢၤလၢ အဲၤကူပတူး အပှၢ်မုၢ်ကနၢအသိး ယကသမံသမိးသု ဒ်န့ၣ်လီၤ. ၃၇ ယကဒုး လဲၤခီဂာ်သုလၢ ပှၤကွၢ်သိ အနီၣ်ထိးဘိ+ အဖီလာ် ဒီးယကမၤဒ်သိး သုကဘၣ်မၤထွဲ ယတၢ်အၢၣ်လီၤအီလီၤလီၤ. ၃၈ ယကမၤလီၤမၢ်ကွံာ် ပှၤထီဒါတၢ် ဒီးပှၤလၢအမၤကမၣ်ယၤ လၢသုကျါလီၤ.+ ယကထုးထီၣ်ကွံာ် အဝဲသ့ၣ်လၢ ထံကီၢ်လၢ အဝဲသ့ၣ် ဘၣ်လဲၤအိၣ်ဝဲ ဒ်ပှၤထံဂၤကီၢ်ဂၤဖိအသိး ဘၣ်ဆၣ် အဝဲသ့ၣ် တနုာ်လီၤဘၣ်ဝဲလၢ ကီၢ်အံၣ်စရ့လး အပူၤဘၣ်.+ ဒီးသုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.’

၃၉ “အိ ပှၤအံၣ်စရ့လးဖိသ့ၣ်ဧၢ, တၢ်ပၢကစၢ် ယဟိဝၤယွၤ တဲဝဲလၢ ‘သုဝဲတဂၤစုာ်စုာ်န့ၣ် လဲၤမၤ သုတၢ်ဂီၤတၢ်ဖှီၣ် လၢအလီၤသးဘၣ်အၢတဖၣ် အတၢ်သၢၤ.+ ဘၣ်ဆၣ် သ့ၣ်ညါလၢ သုမ့ၢ်တဒိကနၣ် ယကလုၢ်ဘၣ်န့ၣ် တၢ်ဆၢကတီၢ် ကတုၤဝဲလၢ သုတမၤဘၣ်အၢဘၣ် ယမံၤစီဆှံ ခီဖျိလၢ သုတၢ်လုၢ်တဖၣ် ဒီးသုတၢ်ဂီၤတၢ်ဖှီၣ် လၢအလီၤသးဘၣ်အၢတဖၣ် အဃိလၢၤဘၣ်.’+

၄၀ “တၢ်ပၢကစၢ် ယဟိဝၤယွၤ တဲဝဲလၢ ‘ပှၤအံၣ်စရ့လးဖိကိးဂၤဒဲး ကဘူၣ်ထီၣ်ဘါထီၣ်ယၤ+ လၢယကစၢၢ်စီဆှံ လၢအမ့ၢ် ကစၢၢ်ဖးထီ လၢအအိၣ်လၢ ကီၢ်အံၣ်စရ့လးအပူၤလီၤ.+ ယကဘၣ်သူၣ်ဘၣ်သး အဝဲသ့ၣ်ဖဲန့ၣ် ဒီးယကမၢ အဝဲသ့ၣ် ဟဲစိာ်အတၢ်မၤဘူၣ်တဖၣ် ဒီးတၢ်လုၢ် အတၤသၣ်ဆိ လၢအမ့ၢ် တၢ်လၢအစီဆှံတဖၣ်လီၤ.+ ၄၁ ဖဲယကိးဖှိၣ်က့ၤ သုဝဲလၢ အအိၣ်လၢ ပှၤကလုာ်တဖၣ်အကျါ ဒီးယပာ်ဖှိၣ်ထီၣ်က့ၤ သုဝဲလၢ အလီၤပြံလီၤပြါ လၢကီၢ်အဂၤတဖၣ် အခါ ယကဘၣ်သူၣ်ဘၣ်သးသု ခီဖျိလၢ တၢ်နၢမူလၢ အမၤမုာ် ယသးအဃိလီၤ.+ ဒီးယကပာ်ဖျါထီၣ်န့ၢ်သုလၢ ယစီဆှံဒီး ပှၤကလုာ်တဖၣ် ကထံၣ်ဘၣ်ဝဲလီၤ.’+

၄၂ “‘ဖဲယဆှၢနုာ်သုလၢ ကီၢ်အံၣ်စရ့လး+ လၢအမ့ၢ် ကီၢ်လၢယအၢၣ်လီၤလၢ ယကဟ့ၣ်လီၤ သုမိၢ်ပၢ်ဖံဖု လၢပျၢၤတဖၣ်အခါ သုကသ့ၣ်ညါဘၣ်လၢ ယမ့ၢ်ယဟိဝၤယွၤလီၤ.+ ၄၃ ဒီးဖဲန့ၣ် သုကသ့ၣ်နီၣ်ထီၣ် သုလုၢ်လၢ်သကဲာ်ပဝး ဒီးသုတၢ်မၤလၢ သုမၤဘၣ်အၢလီၤသုသးတဖၣ်လီၤ.+ ဒီးသုကသးဘၣ်အၢလီၤသုသး ခီဖျိ တၢ်အၢတၢ်သီ လၢသုမၤတ့ၢ်အီၤခဲလၢာ် အဃိလီၤ.+ ၄၄ ပှၤအံၣ်စရ့လးဖိသ့ၣ်ဧၢ, ယကမၤသုဒ်န့ၣ် လၢယမံၤအဃိ+ ဒီးယတစံၣ်ညီၣ်သု ဒ်လုၢ်လၢ်လၢ အအၢအသီ ဒီးတၢ်မၤအၢအၢသီသီလၢ သုမၤတ့ၢ်အသိးဘၣ်. ဒီးဖဲန့ၣ်အခါ သုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.’ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.”

၄၅ ကစၢ်ယဟိဝၤယွၤ တဲယၤလၢ ၄၆ “ပှၤကညီဖိခွါဧၢ, ဃၣ်နမဲာ်လၢ ကလံၤထံးတခီ ဒီးစံၣ်တဲၤတဲလီၤတၢ် ဘၣ်ဃးဒီး ကလံၤထံးတက့ၢ်. ဒီးတဲတၢ်ဒ်ဝံအသိးလၢ ဘၣ်ဃးဒီး ကလံၤထံး သ့ၣ်ပှၢ်အဟီၣ်ကဝီၤတက့ၢ်. ၄၇ တဲဘၣ်ကလံၤထံး သ့ၣ်ပှၢ်အဟီၣ်ကဝီၤလၢ ‘ဒိကနၣ် တၢ်လၢ ယဟိဝၤယွၤ တဲဝဲသၢၤ. တၢ်ပၢကစၢ် ယဟိဝၤယွၤ တဲဝဲလၢ “ယဒွဲၣ်ထီၣ် မ့ၣ်အူလၢနပူၤ+ ဒီးအကအီၣ်ကွံာ်ဝဲ သ့ၣ်ထူၣ်လါလါ ကိးထူၣ်ဒဲး ဒီးသ့ၣ်ထူၣ် အဃ့ထီ ကိးထူၣ်ဒဲးလၢ နပူၤလီၤ. ဒီးမ့ၣ်အူလၣ်လၢ အကဲၤထီၣ်ဝဲန့ၣ် တလီၤပံာ်ဘၣ်+ ဒီးစးထီၣ်လၢ ကလံၤထံး တုၤလၢ ကလံၤစိးန့ၣ် ပှၤမဲာ်သၣ်* ကကိၢ်ဃိာ်ဝဲ ကိးဘ့ၣ်ဒဲးလီၤ. ၄၈ ဒီးပှၤခဲလၢာ် ကသ့ၣ်ညါဝဲလၢ ယၤ ယဟိဝၤယွၤန့ၣ် ယဒွဲၣ်ထီၣ်မ့ၣ်အူအံၤလၢ ယနီၢ်ကစၢ်အဃိ မ့ၣ်အူအံၤ တလီၤပံာ်ဝဲဘၣ်.”’”+

၄၉ ဒီးယတဲလၢ “အံၤအံ. တၢ်ပၢကစၢ် ယဟိဝၤယွၤဧၢ, အဝဲသ့ၣ် တဲအီၣ်ယဂ့ၢ်လၢ ‘အိၣ်ဒၣ် အဝဲဟးတဲ တၢ်ပှိၤပှံပှိၤပှီၢ်တဖၣ်လီၤ.’”*

၂၁ ကစၢ်ယဟိဝၤယွၤ တဲယၤလၢ ၂ “ပှၤကညီဖိခွါဧၢ, ဃၣ်နမဲာ်ဆူ ဝ့ၢ်ယရူၤၡလ့ၣ် ဒီးတဲဖျါထီၣ် တၢ်စံၣ်ညီၣ် အကစီၣ်လၢ အဘၣ်ဃးဒီး တၢ်လီၢ်စီဆှံတဖၣ် ဒီးတဲ ဝံအတၢ်စံးပာ်လၢ ဘၣ်ဃးဒီး ကီၢ်အံၣ်စရ့လး န့ၣ်တက့ၢ်. ၃ ဒီးတဲဘၣ် ကီၢ်အံၣ်စရ့လးလၢ ‘ယဟိဝၤယွၤ တဲဝဲလၢ “ယကဲထီၣ် နဒုၣ်နဒါလံ. ဒီးယကထုးထီၣ် ယနးလၢ အတြိးပူၤ+ ဒီးကျီကွံာ်ပှၤတီပှၤလိၤ* ဒီးပှၤအၢပှၤသီလၢ အအိၣ်လၢ နပူၤလီၤ. ၄ ယကထုးထီၣ်ယနး လၢအတြိးပူၤ ဒီးယကကျီကွံာ် ပှၤတီပှၤလိၤ ဒီးပှၤအၢပှၤသီလၢ အအိၣ်လၢ ကလံၤထံးတခီ တုၤလၢ ကလံၤစိးတခီလီၤ. ၅ အဃိ ပှၤခဲလၢာ် ကသ့ၣ်ညါဘၣ်ဝဲလၢ ယၤ ယဟိဝၤယွၤန့ၣ် ယထုးထီၣ်ယနးလၢ အတြိးပူၤလီၤ. ဒီးယတဂိာ်လီၤကဒါက့ၤ နးလၢအတြိးပူၤဘၣ်.”’+

၆ “ပှၤကညီဖိခွါဧၢ, ကအုလၢ တၢ်ကနိးကစုာ်အပူၤ ဒီးကသါသဖှိလၢ တၢ်သးဟးဂီၤအပူၤ လၢအဝဲသ့ၣ် အမဲာ်ညါနီၤ.+ ၇ ဒီးအဝဲသ့ၣ် မ့ၢ်တဲဝဲလၢ ‘ဘၣ်မနုၤအဃိ နကသါသဖှိလဲၣ်’ န့ၣ်တဲလၢ ‘မ့ၢ်လၢ တၢ်ဂ့ၢ်လၢယနၢ်ဟူဘၣ်တခါအဃိ’ တက့ၢ်. တၢ်ဂ့ၢ်တခါအံၤန့ၣ် ကဟဲကဲထီၣ်ဝဲ သပှၢ်ကတၢၢ် ဒီးပှၤကိးဂၤဒဲး အတၢ်သးဒူ ကလီၤမၢ်ကွံာ်, အစုကလီၤစၢ်ဖဲးအဲး, အသးကဟးဂီၤ ဒီးထံကယွၤလီၤဝဲလၢ အခီၣ်လ့ၢ်ခိၣ် အလိၤလီၤ.*+ ‘တၢ်လၢနနၢ်ဟူဘၣ်န့ၣ် ကဟဲကဲထီၣ် သပှၢ်ကတၢၢ်လီၤ.’ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.”

၈ ကစၢ်ယဟိဝၤယွၤ တဲယၤလၢ ၉ “ပှၤကညီဖိခွါဧၢ, တဲတၢ်ဒ်ဝံအသိး ဒီးတဲလၢ ‘ယဟိဝၤယွၤ တဲဝဲလၢ “နးအိၣ်ဝဲတဘ့ၣ်. နးတဘ့ၣ်န့ၣ်+ အဘၣ်တၢ်ကျ့အ့ၣ်ထီၣ်အီၤ ဒီးဘၣ်တၢ်ထူးကပီၤထီၣ်အီၤလံ. ၁၀ အဘၣ်တၢ်ကျ့အ့ၣ်ထီၣ်အီၤ ဒ်သိး ကမၤသံ ပှၤအါအါဂီၢ်ဂီၢ်လီၤ. ဒီးအဘၣ် တၢ်ထူးအီၤ ဒ်သိး ကကပီၤထီၣ် ဒ်လီဝၢ်ဒံးအသိးလီၤ.”’”

ပှၤတဲဝဲလၢ ‘ပကသးခုလီၤ.’

ဘၣ်ဆၣ် ကစၢ်ယွၤ တဲဝဲလၢ ‘ဒ်နးကျီကွံာ်ဝဲ သ့ၣ်ကိးထူၣ်ဒဲးအသိး နးတဘ့ၣ်န့ၣ် ကကျီကွံာ် ယဖိခွါ+ အနီၣ်ထိးဘိ သပှၢ်ကတၢၢ်လီၤ.’

၁၁ “‘ယဟ့ၣ်လီၤ နးတဘ့ၣ်န့ၣ်လၢ ပှၤစုပူၤ ဒ်သိး ပှၤကထူးကပီၤထီၣ်အီၤ ဒီးပှၤကမၤသံ ပှၤဂၤအဂီၢ်လီၤ. နးတဘ့ၣ်န့ၣ် တၢ်ကျ့အ့ၣ်ထီၣ်အီၤ ဒီးတၢ်ထူးကပီၤထီၣ်အီၤ ဒ်သိး တၢ်ကဟ့ၣ်လီၤအီၤလၢ ပှၤမၤသံတၢ်ဖိ အစုပူၤ အဂီၢ်လီၤ.+

၁၂ “‘မ့ၢ်လၢ နးတဘ့ၣ်န့ၣ် ကဟဲထီဒါ ယပှၤဂီၢ်မုၢ်အဃိ ပှၤကညီဖိခွါဧၢ, ဟီၣ်ကိးပသူထီၣ်ဟီ.+ နးတဘ့ၣ်န့ၣ် ကဟဲထီဒါဝဲ ပှၤအံၣ်စရ့လးဖိ အခိၣ်အနၢ်ကိးဂၤဒဲးလီၤ.+ နးတဘ့ၣ်အံၤ ကကျီကွံာ်အဝဲသ့ၣ် ဃုာ်ဒီး ယပှၤဂီၢ်မုၢ်တဖၣ်လီၤ. အဃိ ဒဲလီၤနခီၣ်ကံၣ်ဒုၣ် လၢတၢ်သူၣ်အုးသးအုး အပူၤတက့ၢ်. ၁၃ ယသမံသမိး ယပှၤဂီၢ်မုၢ်ဝံၤလံ.+ ဒီးနးမ့ၢ်ကျီကွံာ် စီၤပၤအနီၣ်ထိးဘိန့ၣ် တၢ်ကကဲထီၣ်အသးဒ်လဲၣ်. နီၣ်ထိးဘိအံၤ တအိၣ်လၢၤဘၣ်.’+ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.

၁၄ “ပှၤကညီဖိခွါဧၢ, တဲတၢ်ဒ်ဝံအသိး ဒီးဒဲနစု ဒီးကိးထီၣ်လၢ ‘နးအိၣ်ဝဲတဘ့ၣ်’ သၢဘျီတက့ၢ်. နးတဘ့ၣ်န့ၣ် မ့ၢ်ဝဲနးလၢ အမၤသံပှၤဂၤလီၤ. အမ့ၢ်ဝဲ နးလၢအမၤသံ ပှၤအါအါဂီၢ်ဂီၢ် လၢအအိၣ်ဝးတရံး ပှၤသ့ၣ်တဖၣ်န့ၣ်လီၤ.+ ၁၅ အဝဲသ့ၣ် အတၢ်သးဒူ ကလီၤမၢ်+ ဒီးပှၤအါဂၤ ကလီၤဃံၢ်လၢ ဝ့ၢ်အတြဲၤတဖၣ် အခီၣ်ထံးလီၤ. ယကကျီသံ အဝဲသ့ၣ်လၢ နးလီၤ. နးတဘ့ၣ်န့ၣ် ကပီၤထီၣ်ဒ် လီဝၢ်ဒံးအသိး ဒီးဘၣ်တၢ်ထူးကပီၤထီၣ်အီၤ လၢကမၤသံတၢ် အဂီၢ်လီၤ. ၁၆ ကျီလၢအထွဲတကပၤဆူၣ်ဆူၣ်သၢၤ. ကျီလၢ အစ့ၣ်တကပၤသၢၤ. ကျီဖဲ နးအခိၣ်လိၤဝဲအလီၢ်သၢၤ. ၁၇ ယကဒဲယစု ဒီးယကစံၣ်ညီၣ်သံတၢ်လီၤ. ယမ့ၢ်မၤဒ်န့ၣ်မး ယတၢ်သးထီၣ် ကခုၣ်လီၤလီၤ.+ ယၤ ယဟိဝၤယွၤ တဲတၢ်ဝံၤလံ.”

၁၈ ကစၢ်ယဟိဝၤယွၤ တဲယၤလၢ ၁၉ “ပှၤကညီဖိခွါဧၢ, ကျဲအိၣ်ဝဲတဘိလၢ အစးထီၣ်အသးလၢ ထံကီၢ်တဘ့ၣ်အပူၤ ဒီးအဖးဒ့လိာ်သး ဒီးကဲထီၣ်ကျဲခံဘိလၢ အလဲၤဝဲလၢ ဝ့ၢ်ခံဖျၢၣ်လီၤ. ဒ်သိး ဘၤဘူၤလိၣ် အစီၤပၤလၢ အစိာ်ဝဲနး ဟဲဝဲကဘၣ်အဂီၢ် နကဘၣ်ဆီလီၤ တၢ်ပနီၣ်အတၢၣ်* ဖဲကျဲဖးဒ့ အလီၢ်လီၤ. ၂၀ လၢကျဲတဘိအပူၤန့ၣ် ပာ်လီၤဃာ်တၢ်ပနီၣ် ဒ်သိး နးတဘ့ၣ်န့ၣ် လဲၤဝဲလၢ ပှၤဧၣ်မိၣ်ဖိ အဝ့ၢ် ရးဘးကဘၣ်အဂီၢ်+ ဒီးလၢကျဲအဝဲတဘိအပူၤန့ၣ် ပာ်လီၤဃာ်တၢ်ပနီၣ် ဒ်သိး နးတဘ့ၣ်န့ၣ် လဲၤဝဲလၢ ဝ့ၢ်ယရူၤၡလ့ၣ်လၢအကျၢၤ+ လၢအအိၣ်လၢယူဒၤ ကဘၣ်အဂီၢ်တက့ၢ်. ၂၁ ဘၤဘူၤလိၣ်အစီၤပၤ ကဆၢထၢၣ်လၢ ကျဲခံဘိ ဖးဒ့ထီၣ်အသးအလီၢ် ဒ်သိး ကဖးဝဲ တၢ်ကမၤအသးလၢ ခါဆူညါအဂီၢ်လီၤ. အဝဲတရုၤဝဲ အပျၢ်တဖၣ် ဒီးသံကွၢ်တၢ်လၢ အတၢ်ဂီၤတၢ်ဖှီၣ်တဖၣ်အအိၣ် ဒီးကၢ်တၢ်ဒွးတၢ်လၢ ဆၣ်ဖိကီၢ်ဖိ အသူၣ်လီၤ. ၂၂ တၢ်ဖးတၢ်ကမၤအသး လၢခါဆူညါ လၢအအိၣ်လၢ အစုထွဲတခီန့ၣ် ဒုးနဲၣ်အီၤလၢ ဝ့ၢ်ယရူၤၡလ့ၣ် ဒ်သိး အကဆီလီၤဝဲ တၢ်စုကဝဲၤတဖၣ်, ကဟ့ၣ်လီၤ တၢ်ကလုၢ်လၢ ကမၤသံတၢ်အဂီၢ်, ကကိးပသူထီၣ် ဒ်တၢ်ဒုးအတၢ်ကိးပသူထီၣ်, ကဆီလီၤ တၢ်စုကဝဲၤလၢ ကမၤဟးဂီၤဝ့ၢ်အတြဲၤ ဒီးကပာ်ပူၣ်ထီၣ် ဟီၣ်ခိၣ် ဒီးကသူၣ်ထီၣ် တၢ်အဒူၣ်လၢ ကကဝီၤဃာ်တၢ် အဂီၢ်လီၤ.+ ၂၃ သနာ်က့ ပှၤ* လၢအမၤ တၢ်အၢၣ်လီၤအီလီၤဒီး အဝဲသ့ၣ်န့ၣ်* ကဆိကမိၣ်ဝဲလၢ တၢ်ဖးတၢ်ကမၤအသးလၢ ခါဆူညါအံၤန့ၣ် တမ့ၢ်တတီဘၣ်.+ ဘၣ်ဆၣ် အဝဲ ကသ့ၣ်နီၣ်ထီၣ်က့ၤ အဝဲသ့ၣ် အတၢ်ကမၣ် ဒီးကက့ၤဖီၣ် အဝဲသ့ၣ်လီၤ.+

၂၄ “တၢ်ပၢကစၢ် ယဟိဝၤယွၤ တဲဝဲလၢ ‘သုမၤတၢ်ကမၣ်ပျီပျီ ဒီးဖဲသုမၤတၢ်တမံၤဂ့ၤတမံၤဂ့ၤ အခါ ပှၤထံၣ်ဘၣ် သုတၢ်ဒဲးဘးလီၤ. ခီဖျိလၢသုမၤဒ်န့ၣ်အဃိ စီၤပၤသ့ၣ်နီၣ်ဘၣ်လၢ သုတၢ်ကမၣ်အိၣ်ဝဲ ဒီးခဲအံၤန့ၣ် မ့ၢ်လၢ အဝဲသ့ၣ်နီၣ်ဘၣ် သုလံအဃိ ပှၤကက့ၤဖီၣ်သုလီၤ.’

၂၅ “အိ ပှၤအံၣ်စရ့လးဖိ အခိၣ်အနၢ် လၢအအၢအသီဧၢ,+ နလီၤဂာ်ဒ် ပှၤလၢအဘၣ်ဒိဘၣ်ထံး လၢအဘူးထီၣ် ကသံလီၤ. တၢ်စံၣ်ညီၣ် အလီၢ်ခံကတၢၢ် လၢနဂီၢ်န့ၣ် ဟဲလံ. ၂၆ တၢ်ပၢကစၢ် ယဟိဝၤယွၤ တဲဝဲလၢ ‘ဘ့ၣ်လီၤကွံာ် ခိၣ်ဖၢၣ် ဒီးဘ့ၣ်လီၤကွံာ် ခိၣ်သလုးတက့ၢ်.+ တၢ်တဒ်သိးဒီး လၢညါလၢၤဘၣ်.+ ပာ်ထီၣ်ထီ ပှၤလၢအပတီၢ်ဖုၣ်+ ဒီးဆီၣ်လီၤ ပှၤလၢ အပတီၢ်ထီတက့ၢ်.+ ၂၇ ယကမၤဟးဂီၤ စီၤပၤအတၢ်ပၢ* အလီၢ်, ယကမၤဟးဂီၤအီၤ, ယကမၤဟးဂီၤအီၤလီၤ. တချုးလၢ ပှၤတဂၤလၢအအိၣ်ဒီး တၢ်ခွဲးတၢ်ယာ်လၢ အကဒိးန့ၢ်ဘၣ်ဝဲ တၢ်ပၢအလီၢ်အံၤ ဟဲတုၤဒံးဘၣ်န့ၣ် ပှၤတဒိးန့ၢ်ဘၣ်ဝဲ နီတဂၤဘၣ်.+ ဖဲအဝဲဟဲတုၤအခါ ယကဟ့ၣ်အီၤလီၤ.’+

၂၈ “ပှၤကညီဖိခွါဧၢ, တဲတၢ်ဒ်ဝံအသိး ဒီးတဲလၢ ‘ဘၣ်ဃးဒီး ပှၤဧၣ်မိၣ်ဖိ ဒီးအဝဲသ့ၣ် အတၢ်ဒုၣ်ဒွဲၣ်စံးအၢန့ၣ် တၢ်ပၢကစၢ် ယဟိဝၤယွၤ တဲဝဲဒ်အံၤလီၤ. နးအိၣ်ဝဲတဘ့ၣ်. နးတဘ့ၣ်န့ၣ် ဘၣ်တၢ်ထုးထီၣ်အီၤ လၢကမၤသံတၢ် အဂီၢ်လံ. အဘၣ်တၢ်ထူးကပီၤထီၣ်အီၤ ဒ်သိးကမၤဟးဂီၤတၢ်အဂီၢ် ဒီးဒ်သိးကကပီၤထီၣ်ဒ် လီဝၢ်ဒံးအသိး အဂီၢ်လီၤ. ၂၉ ဘၣ်ဃးဒီးနၤ* န့ၣ်ပှၤထံၣ် တၢ်ထံၣ်လၢညါခီလၢ အတမ့ၢ်တတီဘၣ် ဒီးပှၤဖးတၢ်ကမၤအသးလၢ ခါဆူညါ လၢတၢ်လံၣ်တၢ်လီအပူၤ သနာ်က့ ပှၤကပူၣ်ထီၣ် နပှၤတဖၣ်လၢ ပှၤအၢပှၤသီလၢ အသံတဖၣ် အဖီခိၣ်လီၤ. ခဲအံၤန့ၣ် တၢ်စံၣ်ညီၣ်အလီၢ်ခံကတၢၢ် လၢပှၤအၢပှၤသီတဖၣ်အံၤ အဂီၢ်န့ၣ် ဟဲလံ. ၃၀ ဂိာ်နုာ်က့ၤ နးလၢအတြိးပူၤသၢၤ. ယကစံၣ်ညီၣ်နၤ ဖဲနအိၣ်ဟဲအလီၢ် လၢနထူနထံး အိၣ်ဝဲအလီၢ်လီၤ. ၃၁ ယကလူလီၤ ယတၢ်သးဒိၣ် လၢနလိၤလီၤ. ဒီးယတၢ်သးထီၣ် ကအီၣ်ကွံာ်နၤ ဒ်မ့ၣ်အူ အသိးလီၤ. ဒီးယကဟ့ၣ်လီၤနၤလၢ ပှၤလၢအဆူၣ်အကိၤ အစုပူၤ ဒီးပှၤမၤသံတၢ်ဖိ လၢအမၤဟးဂီၤတၢ် အစုပူၤလီၤ.+ ၃၂ နကကဲထီၣ် မ့ၣ်အူဆၣ်+ ဒီးနသွံၣ် ကယွၤလီၤလၢ ကီၢ်ပူၤ ဒီးပှၤတသ့ၣ်နီၣ်ထီၣ်က့ၤနၤလၢၤဘၣ်. ယၤ ယဟိဝၤယွၤ တဲတၢ်ဝံၤလံ.’”

၂၂ ကစၢ်ယဟိဝၤယွၤ တဲယၤလၢ ၂ “ပှၤကညီဖိခွါဧၢ, မ့ၢ်နအိၣ်ကတဲာ်ကတီၤနသးလၢ နကတဲဘၣ် ဝ့ၢ်လၢအလူလီၤတၢ်သွံၣ် လၢတၢ်စံၣ်ညီၣ် အကစီၣ်လံဧါ.+ မ့ၢ်နအိၣ်ကတဲာ်ကတီၤနသးလၢ နကတဲဘၣ်အီၤလၢ တၢ်လီၤသးဘၣ်အၢလၢ အအိၣ်လၢအပူၤအဂ့ၢ်လံဧါ.+ ၃ နကဘၣ်တဲလၢ ‘တၢ်ပၢကစၢ် ယဟိဝၤယွၤ တဲဝဲလၢ “ဝ့ၢ်လၢအပှဲၤဒီး တၢ်မၤသံမၤဝီဧၢ,+ တၢ်ဆၢကတီၢ်လၢ တၢ်ကစံၣ်ညီၣ်နၤအဂီၢ်န့ၣ် ဘူးကတုၤလံ.+ နတ့ထီၣ် တၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်* ဒ်သိး နကမၤဘၣ်အၢလီၤနသးအဂီၢ်လီၤ.+ ၄ ခီဖျိလၢ နမၤသံမၤဝီတၢ်အဃိ နတၢ်ကမၣ်အိၣ်+ ဒီးခီဖျိလၢ နအိၣ်ဒီးတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်အဃိ နကဲထီၣ်တၢ်လၢ အတကဆှီဘၣ်လီၤ.+ အဃိ ယကစံၣ်ညီၣ်နၤ ဒီးတယံာ်တမီၢ်န့ၣ် တၢ်စံၣ်ညီၣ်ကဟဲဘၣ်နၤလီၤ. ယကမၤဒ်သိး ပှၤကလုာ်တဖၣ် ကဒုၣ်ဒွဲၣ်နၤ ဒီးကီၢ်တဖၣ် ကနံၤဆဲးအဲးနၤ အဂီၢ်လီၤ.+ ၅ နမ့ၢ်ဝ့ၢ်လၢ အမံၤဟးဂီၤ ဒီးတၢ်သဘံၣ်သဘုၣ် အိၣ်ပှဲၤလၢ နပူၤအဃိ ကီၢ်လၢအအိၣ်လၢအယံၤမ့ၢ်ဂ့ၤ အဘူးမ့ၢ်ဂ့ၤ ကနံၤဆဲးအဲးနၤလီၤ.+ ၆ ပှၤအံၣ်စရ့လးဖိ အခိၣ်အနၢ် လၢအအိၣ်လၢနပူၤ ကိးဂၤဒဲးန့ၣ် သူအတၢ်စိတၢ်ကမီၤလၢ ကလူလီၤတၢ်သွံၣ် အဂီၢ်လီၤ.+ ၇ ဒီးပှၤလၢအအိၣ်လၢ နပူၤန့ၣ် တပာ်ကဲ အမိၢ်အပၢ်ဘၣ်.+ အဝဲသ့ၣ် လံၣ်အီၣ်လီအီၣ် ပှၤထံဂၤကီၢ်ဂၤဖိ ဒီးအဝဲသ့ၣ်ရ့ဒီး မုၣ်ကမဲဒီးဖိၣ်ဃဲ အၢအၢသီသီလီၤ.”’”+

၈ “‘နတပာ်ကဲ ယတၢ်လီၢ်စီဆှံတဖၣ် နီတစဲးဘၣ် ဒီးနမၤကမၣ် မုၢ်အိၣ်ဘှံးနံၤ အတၢ်သိၣ်တၢ်သီလီၤ.+ ၉ လၢနပူၤန့ၣ် ပှၤလၢအတဲဟးဂီၤ ပှၤဂၤ ဒီးအဲၣ်ဒိးမၤသံပှၤဂၤန့ၣ် အိၣ်ဝဲလီၤ.+ အဝဲသ့ၣ် အီၣ်ဝဲတၢ်လုၢ်တဖၣ်လၢ နကစၢၢ်ကလိတဖၣ် အလိၤ ဒီးဆဲးမၤလုၢ်လၢ်သကဲာ်ပဝးလၢ အလီၤမဲာ်ဆှး လၢနပူၤလီၤ.+ ၁၀ လၢနပူၤန့ၣ် အိၣ်ဒီးပှၤလၢ အမံဃုာ်ဒီးအပၢ်အမါ+ ဒီးပှၤလၢ အမံဃုာ်ဒီးပိာ်မုၣ်လၢ အတကဆှီဘၣ် ခီဖျိလၢ အလုၢ်လၢ် ဟဲအဃိလီၤ.+ ၁၁ လၢနပူၤန့ၣ် အိၣ်ဒီး ပှၤတဂၤလၢ အမၤကမၣ်မုၣ်ကမၣ်ခွါဒီး ပှၤဂၤအမါ+ ဒီးပှၤအဂၤတဂၤန့ၣ် မၤတၢ်လၢ အလီၤမဲာ်ဆှး ဒီးမၤဘၣ်အၢ အဒဲၣ်မုၣ်လီၤ.+ မ့မ့ၢ်အဂၤတဂၤန့ၣ် မံဃုာ်ဒီး အဒီပုၢ်ဝဲၢ်မုၣ်လၢ အမ့ၢ်အပၢ် အဖိမုၣ်လီၤ.+ ၁၂ လၢနပူၤန့ၣ် အိၣ်ဒီးပှၤလၢ အတူၢ်လိာ်စ့လၢ ကမၤသံပှၤဂၤ အဂီၢ်လီၤ.+ အဝဲသ့ၣ် ဟ့ၣ်လိၢ်စ့လၢ ကန့ၢ်ဘၣ်စ့အ့ၣ်အဂီၢ်+ မ့တမ့ၢ် လၢကန့ၢ်အါထီၣ်စ့ အဂီၢ်လီၤ. အဝဲသ့ၣ် ဃ့ဆူၣ်ဃ့စိး ပှၤဂၤအစ့လီၤ.+ မ့ၢ်လံ, အဝဲသ့ၣ် သးပ့ၤနီၣ်ကွံာ်ယၤ သပှၢ်တၢၢ်လံ.’ တၢ်ပၢကစၢ် ယဟိဝၤယွၤ တဲဝဲ ဒ်န့ၣ်လီၤ.

၁၃ “‘သုဃုကျိၣ်စ့လၢ တၢ်တတီတလိၤအပူၤ ဒီးသုမၤသံတၢ်အဃိ ယကဒဲယစုလၢ တၢ်သးဘၣ်အၢ အပူၤလီၤ. ၁၄ ဖဲယစံၣ်ညီၣ်သုအခါ မ့ၢ်သုကအိၣ်ဒီး တၢ်သူၣ်ဒူသးဒူ ဒီးသုစု အဂံၢ်အဘါ ကဆူၣ်ဒံးဧါ.+ ယၤ ယဟိဝၤယွၤန့ၣ် ယတဲတၢ်ဝံၤလံ ဒီးယကစံၣ်ညီၣ်သုလီၤ. ၁၅ ယကမၤလီၤပြံလီၤပြါသုလၢ ပှၤကလုာ်တဖၣ်အကျါ ဒီးယကနီလဲၤသုလၢ ကီၢ်အဂၤတဖၣ်လီၤ.+ ဒီးယကမၤကတၢၢ်ကွံာ် သုလုၢ်လၢ်သကဲာ်ပဝးလၢ အတကဆှီဘၣ်တဖၣ်လီၤ.+ ၁၆ ဒီးသုကတူၢ်ဘၣ် တၢ်မဲာ်ဆှးလၢ ပှၤကလုာ်တဖၣ် အမဲာ်ညါ ဒီးသုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.’”+

၁၇ ကစၢ်ယဟိဝၤယွၤ တဲယၤလၢ ၁၈ “ပှၤကညီဖိခွါဧၢ, ယထံၣ် ပှၤအံၣ်စရ့လးဖိတဖၣ်ဒ် တၢ်အဃံၣ်လၢ အဘျုးတအိၣ်ဘၣ်အသိးလီၤ. အဝဲသ့ၣ် ခဲလၢာ်န့ၣ်လီၤဂာ်ဒီး တိၢ်ဘီ, ထး, ထးဝါ ဒီးစၢၢ်တဖၣ် လၢဖၣ်ကပူၤ အပူၤလီၤ. ဒီးအဝဲသ့ၣ် လီၤဂာ်ဒ်သိးဒီး စ့ညၣ်အဃံၣ်လီၤ.*+

၁၉ “တၢ်ပၢကစၢ် ယဟိဝၤယွၤ တဲဝဲလၢ ‘သုဝဲခဲလၢာ်န့ၣ် သုကဲထီၣ်ဒ်သိးဒီး တၢ်အဃံၣ်လၢ အဘျုးတအိၣ်ဘၣ်+ အဃိ ယကပာ်ဖှိၣ်ထီၣ် သုခဲလၢာ်လၢ ဝ့ၢ်ယရူၤၡလ့ၣ် အပူၤလီၤ. ၂၀ ဒ်ပှၤပာ်ဖှိၣ်ထီၣ် တိၢ်ဘီ, ထး, ထးဝါ ဒီးစၢၢ်တဖၣ် လၢဖၣ်ကပူၤအပူၤ ဒ်သိးပှၤကအူကဲၤထီၣ်မ့ၣ်အူ လၢတၢ်သ့ၣ်တဖၣ်န့ၣ် အဖီလာ် ဒီးမၤပှံၢ်လီၤအီၤအသိး ယကပာ်ဖှိၣ်ထီၣ်သုလၢ တၢ်သးဒိၣ် ဒီးတၢ်သးထီၣ်အပူၤ ဒီးယကအူလီၤ မ့ၣ်အူတခါ လၢသုလိၤ ဒီးယကမၤပှံၢ်လီၤသုလီၤ.+ ၂၁ ယကပာ်သုတပူၤဃီ ဒီးအူလီၤယတၢ်သးထီၣ် အမ့ၣ်အူလၢသုလိၤအဃိ+ သုကပှံၢ်လီၤလၢ ဝ့ၢ်ပူၤလီၤ.+ ၂၂ ဒ်စ့ညၣ်ပှံၢ်လီၤလၢ ဖၣ်ကပူၤတခါအပူၤအသိး သုကပှံၢ်လီၤလၢ ဝ့ၢ်ပူၤလီၤ. အဃိ သုကသ့ၣ်ညါဘၣ်လၢ ယၤ ယဟိဝၤယွၤန့ၣ် ယလူလီၤ ယတၢ်သးထီၣ်လၢ သုလိၤလီၤ.’”

၂၃ ကစၢ်ယဟိဝၤယွၤ တဲယၤလၢ ၂၄ “ပှၤကညီဖိခွါဧၢ, တဲကီၢ်အံၤလၢ ‘နမ့ၢ်ကီၢ်လၢ အတကဆှီဘၣ် ဒီးဖဲယတၢ်သးထီၣ် အမုၢ်နံၤန့ၣ် တၢ်တစူၤလီၤဘၣ်လၢ နပူၤဘၣ်. ၂၅ ဝံတဖၣ် လၢအကူၣ်ထီၣ်တၢ်လၢကီၢ်ပူၤန့ၣ်+ လီၤဂာ်ဒီး ခ့ယုၢ်လၢ အကညီၤတၢ် လၢအအ့ၣ်ဖှီတၢ်တဒုလီၤ.+ အဝဲသ့ၣ် အီၣ်ကွံာ်ဝဲ ပှၤကညီတဖၣ် ဒီးအဝဲသ့ၣ် ဟံးန့ၢ်ဝဲ တၢ်လုၢ်ဒိၣ်ပှ့ၤဒိၣ်တဖၣ် ဒီးတၢ်ထူးတၢ်တီၤတဖၣ်လီၤ. ဒီးလၢကီၢ်ပူၤန့ၣ် အဝဲသ့ၣ် ဒုးကဲထီၣ် ပှၤပိာ်မုၣ်အါဂၤ လၢမုၣ်ကမဲလီၤ. ၂၆ ပှၤလုၢ်တၢ်ဒိၣ်လၢ အအိၣ်လၢ ကီၢ်ပူၤန့ၣ် မၤကမၣ် ယတၢ်သိၣ်တၢ်သီ+ ဒီးအဝဲသ့ၣ် ဆဲးမၤဘၣ်အၢ ယတၢ်စီဆှံအလီၢ်တဖၣ်လီၤ.+ ဒီးအဝဲသ့ၣ် တပာ်လီၤဆီဝဲ တၢ်လၢအစီဆှံ ဒီးတၢ်လၢ အတစီဆှံဘၣ်.+ ဒီးအဝဲသ့ၣ် တဒုးသ့ၣ်ညါပှၤဂၤလၢ တၢ်လၢအကဆှီ ဒီးတၢ်လၢအတကဆှီဘၣ်.+ ဒီးအဝဲသ့ၣ် တမၤထွဲ မုၢ်အိၣ်ဘှံးနံၤ အတၢ်သိၣ်တၢ်သီဘၣ်. ဒီးအဝဲသ့ၣ် မၤဘၣ်ဒိယလၤကပီၤလီၤ. ၂၇ ဒီးပဒိၣ်ပပှၢ်တဖၣ် လၢအအိၣ်လၢ ကီၢ်ပူၤန့ၣ် လီၤဂာ်ဒ်သိးဒီး ထွံၣ်မံၤတဖၣ်လၢ အအ့ၣ်ဖှီတၢ်လီၤ. အဝဲသ့ၣ် လူလီၤတၢ်သွံၣ် ဒီးမၤသံပှၤကညီ ဒ်သိး ကန့ၢ်ဘၣ် ကျိၣ်စ့အဂီၢ်လီၤ.+ ၂၈ ဘၣ်ဆၣ် ဝံတဖၣ် လၢအအိၣ်လၢ ကီၢ်ပူၤန့ၣ် ပာ်ခူသူၣ်တၢ်လၢ ပှၤတဖၣ်န့ၣ် မၤဝဲတဖၣ် ဒ်ပှၤဖှူဝါထီၣ်တၢ်ဒူၣ် အသိးလီၤ. အဝဲသ့ၣ်ထံၣ် တၢ်ထံၣ်လၢညါခီ လၢအတမ့ၢ်တတီဘၣ် ဒီးဖးတၢ်လၢ အကမၤအသး ခါဆူညါလၢတၢ်လံၣ်တၢ်လီအပူၤ+ ဒီးတဲဝဲလၢ “တၢ်ပၢကစၢ် ယဟိဝၤယွၤ တဲဝဲ ဒ်န့ၣ်လီၤ.” ဘၣ်ဆၣ် နီၢ်ကီၢ်န့ၣ် ယၤ ယဟိဝၤယွၤ တတဲတၢ်နီတမံၤဘၣ်. ၂၉ ပှၤဂီၢ်မုၢ်လၢ အအိၣ်လၢ ကီၢ်ပူၤတဖၣ်န့ၣ် လံၣ်အီၣ်လီအီၣ်တၢ် ဒီးတမျာ်တၢ်လီၤ.+ အဝဲသ့ၣ် ရ့ဒီးပှၤလၢအလိၣ်ဘၣ် တၢ်မၤစၢၤ ဒီးပှၤဖှီၣ်ဖိယာ်ဖိတဖၣ် အၢအၢသီသီလီၤ. ဒီးအဝဲသ့ၣ် လံၣ်အီၣ်လီအီၣ် ပှၤထံဂၤကီၢ်ဂၤဖိ ဒီးတစံၣ်ညီၣ်န့ၢ်တၢ်လၢ အဝဲသ့ၣ်အဂီၢ် တီတီလိၤလိၤဘၣ်.’

၃၀ “‘လၢပှၤတဖၣ်န့ၣ် အကျါန့ၣ် ယဃုပှၤလၢ အကဘှီထီၣ်က့ၤ တၢ်ဒူၣ် ဒီးကဆၢထၢၣ်လၢယမဲာ်ညါ လၢတၢ်ဒူၣ်အတၢ်လီၤဟိအခီၣ်ထံး ဒ်သိးယသုတမၤဟးဂီၤ ကီၢ်တဂ့ၤအဂီၢ်လီၤ.+ ဘၣ်ဆၣ် ယတထံၣ် ပှၤနီတဂၤဘၣ်. ၃၁ အဃိ ယကလူလီၤ ယတၢ်သးထီၣ်လၢ အဝဲသ့ၣ်အလိၤ ဒီးမၤဟးဂီၤ အဝဲသ့ၣ်လၢ ယတၢ်သးထီၣ် အမ့ၣ်အူလီၤ. ယကဟ့ၣ်ကၣ်က့ၤ အဝဲသ့ၣ် ဒ်တၢ်လၢ အဝဲသ့ၣ် မၤဝဲအသိးလီၤ.’ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.”

၂၃ ကစၢ်ယဟိဝၤယွၤ တဲယၤလၢ ၂ “ပှၤကညီဖိခွါဧၢ, ပှၤပိာ်မုၣ်အိၣ်ဝဲခံဂၤ ဒီးအမိၢ်မ့ၢ် တဂၤဃီလီၤ.+ ၃ အဝဲသ့ၣ် ဆါလီၤအီၣ်သးလၢ ကီၢ်အဲၤကူပတူးအပူၤလီၤ.+ စးထီၣ်လၢ အဝဲသ့ၣ် အသးစၢ်ခါန့ၣ် အဝဲသ့ၣ် ဆါလီၤအီၣ်သးလီၤ. ဒီးဖဲန့ၣ်န့ၣ် အဝဲသ့ၣ် မၤကမၣ်မုၣ်ကမၣ်ခွါ ဖဲအသး ဒီးအဝဲသ့ၣ် တမ့ၢ် မုၣ်ကနီၤစီဆှံလၢၤဘၣ်. ၄ အနီတဂၤန့ၣ် အမံၤမ့ၢ်ဝဲ နီၢ်အၤဟိးလၤ* ဒီးအဒ့မုၣ်တဂၤန့ၣ် အမံၤမ့ၢ်ဝဲ နီၢ်အၤဟိးလံဘၤလီၤ.* အဝဲသ့ၣ် ကဲထီၣ်ယတၢ် ဒီးအဝဲသ့ၣ် အိၣ်ဖျဲၣ်ထီၣ်န့ၢ်ယၤ ဖိမုၣ်ဖိခွါတဖၣ်လီၤ. နီၢ်အၤဟိးလၤန့ၣ် အဲၣ်ဒိးတဲဝဲ ၡၤမရံ+ ဒီးနီၢ်အၤဟိးလံဘၤန့ၣ် အဲၣ်ဒိးတဲဝဲ ယရူၤၡလ့ၣ်လီၤ.

၅ “နီၢ်အၤဟိးလၤန့ၣ် ဖဲအဝဲမ့ၢ်ယတၢ်အခါ အဆါလီၤအီၣ်သးလီၤ.+ အသးကတၢလၢ အတၢ်အဲၣ်တီတဖၣ်+ လၢအမ့ၢ် ပှၤအၤၡူၢ်ဖိလၢ+ အအိၣ်လၢအဃၢၤ အဃိလီၤ. ၆ အဝဲသ့ၣ် မ့ၢ်ဝဲ ပဒိၣ်ဖးဒိၣ်တဖၣ် လၢအကူသိး တၢ်လါအဲး ဒီးပဒိၣ်တဖၣ်လီၤ. အဝဲသ့ၣ်ခဲလၢာ် မ့ၢ်ပိာ်ခွါသးစၢ်လၢ အလီၤထုးန့ၢ်သူၣ်ထုးန့ၢ်သး ဒီးအဒိးကသ့ၣ် သ့ဂ့ၤဂ့ၤလီၤ. ၇ ဒီးနီၢ်အၤဟိးလၤ ဆဲးဆါလီၤအီၣ်သးလၢ ကယဲၢ်ပှၤအၤၡူၢ်ဖိလၢ အမံၤဟူသၣ်ဖျါတဖၣ် အအိၣ်လီၤ. အဝဲမၤဘၣ်အၢအသးဒီး+ ပှၤလၢအလီကီဝဲလၢ တၢ်သးကတၢအပူၤတဖၣ်န့ၣ် အတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်လီၤ.* ၈ ဒီးအဝဲ တပာ်တ့ၢ် တၢ်ဆါလီၤအီၣ်သး တၢ်မၤအံၤလၢ အမၤတ့ၢ်ဝဲလၢ ကီၢ်အဲၤကူပတူး အပူၤဘၣ်. နီၢ်ကီၢ်န့ၣ် ဖဲအသးစၢ် ဒီးမ့ၢ်ဒံးမုၣ်ကနီၤအခါန့ၣ် အဝဲသ့ၣ်* ဖူးလဲးဖူးသူအနုၢ် ဒီးမံဃုာ်ဒီးအီၤလၢ တၢ်သးကတၢအပူၤလီၤ.+ ၉ အဃိ ယဟ့ၣ်လီၤအီၤလၢ ပှၤအၤၡူၢ်ဖိ+ အစုပူၤလီၤ. ပှၤအၤၡူၢ်ဖိ မ့ၢ်ဝဲ အတၢ်အဲၣ်တီလၢ အလီကီဝဲလၢ တၢ်သးကတၢ အပူၤလီၤ. ၁၀ ပှၤအၤၡူၢ်ဖိတဖၣ် မၤဖျါထီၣ် အတၢ်အိၣ်ဘ့ၣ်ဆ့+ ဒီးဖီၣ်န့ၢ် အဖိမုၣ်ဖိခွါတဖၣ်+ ဒီးမၤသံအီၤလၢနးလီၤ. ဒီးအမံၤဟးဂီၤလၢ ပိာ်မုၣ်တဖၣ်အကျါ ဒီးအဘၣ်တၢ်စံၣ်ညီၣ်အီၤလီၤ.

၁၁ “ဒီးဖဲအဒ့မုၣ် နီၢ်အၤဟိးလံဘၤ ထံၣ်ဝဲအခါ အတၢ်သးကတၢ ဟဲဒိၣ်ထီၣ်အါန့ၢ်ဒံးလၢညါ ဒီးဆါလီၤအီၣ်အသး နးဒိၣ်န့ၢ်ဒံး အနီလီၤ.+ ၁၂ အသးကတၢလၢ ပှၤလၢအအိၣ်လၢအဃၢၤ လၢအမ့ၢ် ပှၤအၤၡူၢ်ဖိတဖၣ် အဃိလီၤ.+ ပှၤသ့ၣ်တဖၣ်အံၤမ့ၢ်ဝဲ ပဒိၣ်ဖးဒိၣ်တဖၣ် ဒီးပဒိၣ်ပပှၢ်တဖၣ်လၢ အကူသိးဝဲ တၢ်ကူတၢ်သိးလၢ အဂ့ၤတဖၣ် ဒီးအဒိးဝဲကသ့ၣ်သ့ဂ့ၤဂ့ၤ ဒီးအမ့ၢ်ပိာ်ခွါသးစၢ်လၢ အလီၤထုးန့ၢ်သူၣ်ထုးန့ၢ်သးလီၤ. ၁၃ ဖဲအဝဲ မၤဘၣ်အၢလီၤအသးအခါ ယထံၣ်လၢ အဝဲဒီးအနီန့ၣ် ပိာ်ကျဲတဘိဃီလီၤ.+ ၁၄ အဝဲဆဲးမၤအါထီၣ်ဝဲ တၢ်ဆါလီၤအီၣ်သး အတၢ်မၤလီၤ. အဝဲထံၣ်ဘၣ်ဝဲ ပှၤပိာ်ခွါအဂီၤ လၢပှၤစိးပျၤအီၤ လၢအမ့ၢ် ပှၤက့ၤစ့းဖိ အဂီၤလၢ ပှၤဖှူဂီၤထီၣ်အီၤ, ၁၅ ဒီးပးဃာ်ခါပး ဒီးဖၢၣ်ဃာ် ခိၣ်ဖၢၣ်ဖးထီ ဒီးဖျါလီၤဂာ်ဒ် ပှၤသုးဖိတဖၣ် ဒီးအမ့ၢ်ဝဲ ပှၤဘၤဘူၤလိၣ်ဖိလၢ အအိၣ်ဖျဲၣ်ထီၣ်လၢ ကီၢ်က့ၤစ့းအပူၤလီၤ. ၁၆ ဖဲအထံၣ်ဝဲ တၢ်သ့ၣ်တဖၣ်န့ၣ်အခါ အသးကတၢထီၣ် တဘျီဃီ ဒီးဆှၢလီၤတၢ်ကစီၣ်လၢ ကီၢ်က့ၤစ့း လၢအဝဲသ့ၣ်အအိၣ်လီၤ.+ ၁၇ အဃိ ပှၤဘၤဘူၤလိၣ်ဖိ ဟဲလၢ အတၢ်အဲၣ် အလီၢ်မံခး ဒီးမၤဘၣ်အၢအီၤလၢ အဝဲသ့ၣ်အတၢ်သးကတၢ အဃိလီၤ. ဖဲအဝဲ မၤဘၣ်အၢအသးဒီး အဝဲသ့ၣ် ဝံၤအခါ အဝဲသးဘၣ်အၢ အဝဲသ့ၣ် ဒီးဃၣ်ကွံာ်အသးလၢ အဝဲသ့ၣ်အအိၣ်လီၤ.

၁၈ “ဖဲအဝဲ ဆါလီၤအီၣ်သးလၢ တၢ်မဲာ်ဆှးတအိၣ်ဘၣ်အပူၤ ဒီးပာ်ဖျါထီၣ် အတၢ်အိၣ်ဘ့ၣ်ဆ့အခါ+ ယသးဘၣ်အၢအီၤ ဒီးပာ်တ့ၢ်ကွံာ်အီၤ ဒ်ယသးဘၣ်အၢအနီ ဒီးယပာ်တ့ၢ်ကွံာ်အီၤ အသိးလီၤ.+ ၁၉ ဒီးအဝဲ သ့ၣ်နီၣ်ထီၣ်က့ၤ တၢ်ဆၢကတီၢ်လၢ အဆါလီၤအီၣ်အသးလၢ ကီၢ်အဲၤကူပတူး+ ဖဲအသးစၢ်ဒံးအခါ ဒီးအမၤအါထီၣ်ဝဲ တၢ်ဆါလီၤအီၣ်သး အတၢ်မၤလီၤ.+ ၂၀ ဒီးအဝဲလူၤပှၤတဖၣ်န့ၣ် လၢတၢ်သးကတၢအပူၤလီၤ. အဝဲမၤထီၣ်အသး ဒ်သိးဒီး သံၣ်မါတဖၣ်* လၢအကစၢ်အဂီၢ်လီၤ. အကစၢ်တဖၣ်န့ၣ် အိၣ်ဒီးပှၤပိာ်ခွါအက့ၢ်အဂီၤလၢ အမၤအသးဒ် ကသ့ၣ်ယီၤ ဒီးကသ့ၣ်အက့ၢ်အဂီၤ အသိးလီၤ. ၂၁ နသးအိၣ်မၤက့ၤ လုၢ်လၢ်သကဲာ်ပဝးလၢ အလီၤမဲာ်ဆှး လၢနမၤအီၤလၢ ကီၢ်အဲၤကူပတူး ဖဲနသးစၢ်အခါန့ၣ်လီၤ.+ ဖဲန့ၣ်အခါ အဝဲသ့ၣ် ဖူးလဲးဖူးသူ နနုၢ်လီၤ.+

၂၂ “နီၢ်အၤဟိးလံဘၤဧၢ, တၢ်ပၢကစၢ် ယဟိဝၤယွၤ တဲဝဲလၢ ‘ယကထိၣ်ဟူးထိၣ်ဂဲၤထီၣ် နတၢ်အဲၣ်တီ+ လၢနသးဘၣ်အၢ ဒီးပာ်တ့ၢ်ကွံာ်အီၤတဖၣ်လီၤ. ယကမၢ အဝဲသ့ၣ်ဟဲလၢ တၢ်လီၢ်ကိးကပၤဒဲး ဒီးဒုးနၤလီၤ.+ ၂၃ အဝဲသ့ၣ်တဖၣ်န့ၣ် မ့ၢ်ဝဲ ပှၤဘၤဘူၤလိၣ်ဖိ+ ဒီးပှၤပကိးဖိ,+ ပှၤၡိအၤဖိ ဒီးပှၤကိအၤဖိ လၢအမ့ၢ် ပှၤက့ၤစ့းဖိတဖၣ်+ ဒီးပှၤအၤၡူၢ်ဖိတဖၣ်လီၤ. အဝဲသ့ၣ်တဖၣ်န့ၣ် မ့ၢ်ဝဲ ပှၤပိာ်ခွါသးစၢ်လၢ အလီၤထုးန့ၢ်သူၣ်ထုးန့ၢ်သး, ပဒိၣ်ဖးဒိၣ်, ပဒိၣ်တဖၣ်, သုးဖိတဖၣ် ဒီးပှၤလၢ အဘၣ်တၢ်ဃုထၢထီၣ်အီၤ လီၤလီၤဆီဆီတဖၣ်လီၤ. အဝဲသ့ၣ်ခဲလၢာ်န့ၣ် ဒိးဝဲကသ့ၣ်သ့ ဂ့ၤဂ့ၤလီၤ. ၂၄ အဝဲသ့ၣ် ကဒုးနၤလၢ လ့ၣ်ကဟၣ်သုး လၢအသီၣ်သထြုး လၢအအိၣ်ဒီး အပၣ်တဖၣ် ဒီးပှၤသုးဖိလၢ အနီၣ်ဂံၢ်အါတဖု လၢအအိၣ်ဒီး ကတီၤဖိ ဒီးကတီၤဖးဒိၣ် ဒီးခိၣ်ဖျီၣ်ထးလီၤ. အဝဲသ့ၣ် ကဆီလီၤအသး ဝးတရံးနၤ ဒီးယကဟ့ၣ်အခွဲးလၢ အဝဲသ့ၣ် ကစံၣ်ညီၣ်နၤ ဒီးအဝဲသ့ၣ် ကစံၣ်ညီၣ်နၤ ဖဲအသးလီၤ.+ ၂၅ ယကပာ်ဖျါထီၣ် ယတၢ်သးထီၣ်လၢနလိၤ ဒီးအဝဲသ့ၣ် ကမၤနၤ လၢတၢ်သးဒိၣ်ထီၣ် အပူၤလီၤ. အဝဲသ့ၣ် ကဒီၣ်တဲာ်ကွံာ် နနါဒ့, နနၢ် ဒီးနပှၤလၢ အပူၤဖျဲးတနီၤန့ၣ် ကဘၣ်သံလၢ နးအဃိလီၤ. အဝဲသ့ၣ် ကက့ၤဖီၣ် နဖိမုၣ်ဖိခွါတဖၣ် ဒီးပှၤလၢ အပူၤဖျဲးတနီၤန့ၣ် မ့ၣ်အူကအီၣ်ကွံာ်အီၤလီၤ.+ ၂၆ အဝဲသ့ၣ် ကဘ့ၣ်လီၤကွံာ် နတၢ်ကူတၢ်ကၤတဖၣ်+ ဒီးကဟံးန့ၢ် နတၢ်ကယၢကယဲ လၢအဃံအလၤတဖၣ်လီၤ.+ ၂၇ ယကမၤကတၢၢ်ကွံာ် နလုၢ်လၢ်သကဲာ်ပဝးလၢ အလီၤမဲာ်ဆှး ဒီးနတၢ်ဆါလီၤအီၣ်သးတၢ်မၤ+ လၢနစးထီၣ်မၤအီၤလၢ ကီၢ်အဲၤကူပတူးလီၤ.+ ဒီးနတကွၢ်တၢ်လၢ အဝဲသ့ၣ် အအိၣ်လၢၤဘၣ် ဒီးနတသ့ၣ်နီၣ်ထီၣ် ကီၢ်အဲၤကူပတူးလၢၤဘၣ်.’

၂၈ “တၢ်ပၢကစၢ် ယဟိဝၤယွၤ တဲဝဲလၢ ‘ယကဟ့ၣ်လီၤနၤလၢ ပှၤလၢ နသးဟ့အီၤတဖၣ် အစုပူၤန့ၣ် ဘူးထီၣ်လံ. အဝဲသ့ၣ် မ့ၢ်ပှၤလၢ နသးဘၣ်အၢ ဒီးပာ်တ့ၢ်ကွံာ်အီၤတဖၣ်လီၤ.+ ၂၉ ဒီးလၢတၢ်သးဟ့အပူၤ အဝဲသ့ၣ် ကမၤအၢနၤ ဒီးကဟံးန့ၢ်ကွံာ် တၢ်ခဲလၢာ် လၢအအိၣ်ဒီးနၤလၢ+ နမၤအီၤလၢ နဂံၢ်နဘါ ဒီးကပာ်တ့ၢ် ဘ့ၣ်ဆ့နၤလီၤ. ဒီးပှၤခဲလၢာ်ကထံၣ်ဘၣ် နတၢ်အိၣ်ဘ့ၣ်ဆ့ လၢအလီၤမဲာ်ဆှး, နတၢ်မၤ ကမၣ်မုၣ်ကမၣ်ခွါ ဒီးနတၢ်ဆါလီၤအီၣ်သး တၢ်မၤလီၤ.+ ၃၀ မ့ၢ်လၢ နလူၤပှၤကလုာ်တဖၣ် ဒ်သိးဒီးပှၤဆါလီၤအီၣ်သး+ ဒီးနမၤဘၣ်အၢလီၤနသးဒီး အဝဲသ့ၣ် အတၢ်ဂီၤတၢ်ဖှီၣ် လၢအလီၤသးဘၣ်အၢတဖၣ်+ အဃိ တၢ်သ့ၣ်တဖၣ်န့ၣ် ကကဲထီၣ်အသးဒီးနၤလီၤ. ၃၁ နမၤထီၣ်နသးဒ် နနီအသိးလီၤ.+ အဃိ ထံခွး* လၢယဟ့ၣ်လီၤနနီန့ၣ် ယကဟ့ၣ်လီၤနၤ စ့ၢ်ကီးလီၤ.’+

၃၂ “တၢ်ပၢကစၢ် ယဟိဝၤယွၤ တဲဝဲလၢ

‘နကဘၣ်အီ တၢ်အိၣ်လၢ နနီအထံခွးလၢ အဒိၣ်အထီတဖျၢၣ် အပူၤလီၤ.+

ထံခွးအံၤ အိၣ်ပှဲၤဝဲဒီး တၢ်ဒုၣ်ဒွဲၣ်စံးအၢအဃိ ပှၤကနံၤဘၣ်နၤ ဒီးပှၤကဒုၣ်ဒွဲၣ်စံးအၢနၤလီၤ.+

ဒီးနကကဲထီၣ် တၢ်လီၤကမၢကမၣ်လၢ ပှၤဂၤအဂီၢ် ဒီးနကအိၣ် သယုၢ်လီၤ.

တၢ်ပၢကစၢ် ယဟိဝၤယွၤ တဲဝဲလၢ “အဝဲန့ၣ် မ့ၢ်တၢ်လၢ ယတဲလီၤ.”’

၃၅ “တၢ်ပၢကစၢ် ယဟိဝၤယွၤ တဲဝဲလၢ ‘မ့ၢ်လၢ နသးပ့ၤနီၣ်ကွံာ်ယၤ ဒီးတပာ်ကဲယၤ နီတစဲးဘၣ်အဃိ+ နကတူၢ်ဘၣ်တၢ် ခီဖျိလၢ နလုၢ်လၢ်သကဲာ်ပဝးလၢ အလီၤမဲာ်ဆှး ဒီးနမၤ တၢ်ဆါလီၤအီၣ်သး တၢ်မၤတဖၣ် အဃိလီၤ.’”

၃၆ ယဟိဝၤယွၤ တဲယၤလၢ “ပှၤကညီဖိခွါဧၢ, ယအဲၣ်ဒိးလၢ နကတဲဖျါထီၣ် တၢ်စံၣ်ညီၣ်အကစီၣ်လၢ ဘၣ်ဃးဒီး နီၢ်အၤဟိးလၤ ဒီးနီၢ်အၤဟိးလံဘၤလီၤ.+ ဒီးတဲဘၣ် အဝဲသ့ၣ်လၢ အလုၢ်လၢ်လၢ အအၢအသီတဖၣ်တက့ၢ်. ၃၇ အဝဲသ့ၣ် အဲၣ်ဘၢတၢ်*+ ဒီးမၤသံတၢ်လီၤ. အဝဲသ့ၣ် အဲၣ်ဘၢတၢ် ခီဖျိ ဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ် တကးဒံးဘၣ် အဝဲသ့ၣ် အဖိခွါလၢ အအိၣ်ဖျဲၣ်ထီၣ်ဝဲလၢ ယဂီၢ်န့ၣ် အဝဲသ့ၣ် ဒွဲၣ်ထီၣ်* ဝဲလၢမ့ၣ်အူ ဒ်တၢ်အီၣ်လၢ တၢ်ဂီၤတၢ်ဖှီၣ်တဖၣ် အဂီၢ်လီၤ.+ ၃၈ တကးဒံးဘၣ် အဝဲသ့ၣ် မၤကမၣ်ယၤ ခီဖျိ အမၤဘၣ်အၢဝဲ ယတၢ်စီဆှံအလီၢ် ဖဲတၢ်တနံၤန့ၣ် ဒီးမၤကမၣ် မုၢ်အိၣ်ဘှံးနံၤ အတၢ်သိၣ်တၢ်သီ အဃိလီၤ. ၃၉ ဖဲအဝဲသ့ၣ် မၤသံဝဲ အဖိခွါတဖၣ် ဒ်တၢ်လုၢ်လၢ အတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်အဂီၢ်ဝံၤ+ တနံၤဃီ အတီၢ်ပူၤန့ၣ် အဝဲသ့ၣ် ဟဲနုာ်လီၤလၢ ယတၢ်စီဆှံအလီၢ် ဒ်သိးကမၤဘၣ်အၢဝဲအဂီၢ်လီၤ.+ အဝဲသ့ၣ် မၤတၢ်လၢယဟံၣ်ပူၤ ဒ်န့ၣ်လီၤ. ၄၀ တကးဒံးဘၣ် အဝဲသ့ၣ် ဆှၢလီၤပှၤစိာ်တၢ်ကစီၣ်ဖိတဂၤ ဒ်သိး ကဟဲကိးန့ၢ်အီၤ ပှၤပိာ်ခွါတဖၣ်လၢ အအိၣ်လၢ တၢ်လီၢ်ဖးယံၤလီၤ.+ နီၢ်အၤဟိးလံဘၤဧၢ, ဖဲပှၤတဖၣ်န့ၣ် ဟဲလၢကျဲအခါ နလုၢ်ထံလုၢ်နိ, မၤဃံမၤလၤထီၣ် နမဲာ်ချံ ဒီးနမၤဃံမၤလၤထီၣ်နသးဒီး တၢ်ကယၢကယဲတဖၣ်လီၤ.+ ၄၁ ဒီးနဆ့ၣ်နီၤလၢ လီၢ်ဆ့ၣ်နီၤလၢ အဃံအလၤအလိၤ+ ဒီးလၢအမဲာ်ညါန့ၣ် အိၣ်ဒီး စီၢ်နီၤခိၣ်လီၤ.+ ဒီးနပာ်လီၤ ယတၢ်နၢမူတဖၣ်+ ဒီးယသိလၢ+ စီၢ်နီၤခိၣ် အဖီခိၣ်လီၤ. ၄၂ ဒီးပှၤပိာ်ခွါလၢ အအဲၣ်တၢ်မုာ်တၢ်ပၠီၣ်တဖု အကလုၢ်သီၣ်ထီၣ်ဝဲဖဲန့ၣ် ဒီးလၢအဝဲသ့ၣ် အကျါန့ၣ် ပၣ်ဃုာ်ဒီး ပှၤမူၤသံးတဖၣ် လၢပှၤဟဲကိးန့ၢ်အီၤ လၢပှၢ်မုၢ်ကနၢလီၤ. ဒီးအဝဲသ့ၣ် ဒုးသိးထီၣ် ထံဖှံၣ်တဖၣ်လၢ ပှၤဒီပုၢ်ဝဲၢ်မုၣ်ခံဂၤအံၤ အစုလိၤ ဒီးဒုးဖျီၣ်ထီၣ် ခိၣ်သလုးလၢ အဃံအလၤလၢ အဝဲသ့ၣ်ခံဂၤ အခိၣ်လိၤလီၤ.

၄၃ “ဘၣ်ဃးဒီး ပိာ်မုၣ်* လၢအလီၤဘှံးလီၤတီၤလၢ တၢ်အဲၣ်ဘၢတၢ်အဃိန့ၣ် ယတဲလၢ ‘အဝဲကဆဲး ဆါလီၤအီၣ်အသးလီၤ.’ ၄၄ ပှၤလဲၤလၢအအိၣ် ဒ်ပှၤလဲၤလၢ ပှၤဆါလီၤအီၣ်သးအအိၣ် အသိးလီၤ. နီၢ်အၤဟိးလၤ ဒီးနီၢ်အၤဟိးလံဘၤ လၢအမ့ၢ် ပိာ်မုၣ်လၢ အအိၣ်ဒီး လုၢ်လၢ်သကဲာ်ပဝးလၢ အလီၤမဲာ်ဆှးန့ၣ် ပှၤလဲၤလၢ အဝဲသ့ၣ်အအိၣ် ဒ်န့ၣ်လီၤ. ၄၅ မ့ၢ်လၢ အအဲၣ်ဘၢတၢ် ဒီးအလူလီၤတၢ်သွံၣ်အဃိ+ ပှၤပိာ်ခွါလၢ အတီအလိၤတဖၣ် ကစံၣ်ညီၣ်အီၤ ဒ်အကြၢးဒီးအီၤအသိးလီၤ.+ အဝဲသ့ၣ်မ့ၢ် ပိာ်မုၣ်လၢ အအဲၣ်ဘၢတၢ် ဒီးအဝဲသ့ၣ် မၤသံတၢ်လီၤ.+

၄၆ “ဒီးတၢ်ပၢကစၢ် ယဟိဝၤယွၤ တဲဝဲလၢ ‘သုးမုၢ်တဖု ကဟဲဒုး အဝဲသ့ၣ် ဒီးကဂုာ်န့ၢ်အဝဲသ့ၣ် အတၢ်ဖိတၢ်လံၤတဖၣ် အဃိ ပှၤဂၤတဖၣ် ကပျံၤတၢ် ခီဖျိ တၢ်လၢအကဲထီၣ်အသးဒီး အဝဲသ့ၣ်အဃိလီၤ.+ ၄၇ သုးမုၢ်တဖုန့ၣ် ကကွံာ်အဝဲသ့ၣ်လၢလၢၢ်+ ဒီးကကျီသံကွံာ် အဝဲသ့ၣ်လၢနးလီၤ. ဒီးအကမၤသံကွံာ် အဝဲသ့ၣ် အဖိမုၣ်ဖိခွါတဖၣ်+ ဒီးကဒွဲၣ်အူထီၣ် အဝဲသ့ၣ်အဟံၣ် လၢမ့ၣ်အူလီၤ.+ ၄၈ ယကမၤကတၢၢ်ကွံာ် လုၢ်လၢ်သကဲာ်ပဝးလၢ အလီၤမဲာ်ဆှး လၢကီၢ်ပူၤ ဒီးပှၤပိာ်မုၣ်ခဲလၢာ် ကဟံးန့ၢ်ဝဲ တၢ်မၤလိလၢ သုအိၣ် အဃိ တမ့ၢ်လၢအဝဲသ့ၣ် ကမၤထွဲဝဲဒ် သုလုၢ်လၢ်သကဲာ်ပဝးလၢ အလီၤမဲာ်ဆှးအသိးဘၣ်.+ ၄၉ မ့ၢ်လၢ သုလုၢ်လၢ်သကဲာ်ပဝးလၢ အလီၤမဲာ်ဆှး ဒီးသုတၢ်ဒဲးဘးလၢ သုဘူၣ်ထီၣ်ဘါထီၣ် တၢ်ဂီၤတၢ်ဖှီၣ်လၢ အလီၤသးဘၣ်အၢအဃိ ပှၤဘၤဘူၤလိၣ်ဖိ ကသိၣ်ဃီၣ်သုလီၤ. ဒီးသုကသ့ၣ်ညါဘၣ်လၢ ယမ့ၢ်တၢ်ပၢကစၢ် ယဟိဝၤယွၤလီၤ.’”+

၂၄ ဖဲခွံနံၣ်တနံၣ်, လါတဆံလါတလါ, လါထီၣ်အသီတဆံန့ၣ် ယဟိဝၤယွၤ တဲယၤလၢ ၂ “ပှၤကညီဖိခွါဧၢ, ကွဲးနီၣ်ဃာ် မုၢ်နံၤမုၢ်သီ တနံၤအံၤနီၤ. တနံၤအံၤန့ၣ် မ့ၢ်ဝဲ မုၢ်နံၤလၢ ဘၤဘူၤလိၣ်အစီၤပၤ ဟဲဒုးဝဲ ဝ့ၢ်ယရူၤၡလ့ၣ်လီၤ.+ ၃ တဲတၢ်ကတိၤဒိလၢ ဘၣ်ဃးဒီး ပှၤလၢအထီဒါတၢ်နီၤ. ဘၣ်ဃးဒီး အဝဲသ့ၣ်န့ၣ် တဲလၢ

“‘တၢ်ပၢကစၢ် ယဟိဝၤယွၤ တဲဝဲလၢ

“ဒိထီၣ်သပၢၤ ဖီအီၣ်တၢ်လၢ မ့ၣ်အူဖီခိၣ် ဒီးထၢနုာ်ထံလၢအပူၤတက့ၢ်.+

 ၄ ပၢနုာ်တၢ်ညၣ်အလိၣ်လၢအဂ့ၤ,+

အခီၣ်ကံၣ်ဒုၣ်, အဖံဘၣ်ခိၣ် ဒီးမၤပှဲၤသပၢၤဒီး တၢ်အဃံလၢ အဂ့ၤကတၢၢ်တဖၣ် လၢသပၢၤပူၤတက့ၢ်.

 ၅ ဟံးန့ၢ်သိလၢ အဂ့ၤကတၢၢ်တဒု+ ဒီးပာ်ပူၣ်ထီၣ်သ့ၣ်မုၣ် လၢသပၢၤ ဖီလာ်ဝးဝး,

ချီထီၣ်တၢ်ညၣ် ဒီးတၢ်ဃံ လၢသပၢၤပူၤတက့ၢ်.”’

ထုးထီၣ်တၢ်ညၣ် တလိၣ်ဝံၤတလိၣ်ဟီ,+ တဘၣ်ဃုထၢ* လၢနကထုးထီၣ် ဖဲလဲၣ်တလိၣ်လဲၣ်န့ၣ်တဂ့ၤ.

 ၇ လၢဝ့ၢ်ပူၤန့ၣ် ပှၤအါဂၤ ဘၣ်တၢ်မၤသံအီၤလီၤ.+ ပှၤလၢအဘၣ်တၢ်မၤသံအီၤတဖၣ် အသွံၣ်န့ၣ် ဘၣ်တၢ်လူလီၤအီၤလၢ လၢၢ်ဘ့ၣ်ဘၣ် အဖီခိၣ်လီၤ.

တၢ်သွံၣ်တဖၣ်န့ၣ် ပှၤတလူလီၤအီၤ လၢဟီၣ်ခိၣ်လိၤ ဒ်သိး ကမၤဘၢအီၤ လၢဟီၣ်ခိၣ်ကမူၣ်အဂီၢ်ဘၣ်.+

ယမၤဒ်န့ၣ် ဒ်သိး ယသးကဒိၣ်ထီၣ်တၢ် တုၤလၢ ယကစံၣ်ညီၣ်အီၤ အဂီၢ်လီၤ.

ယကပာ်ပူၣ်ထီၣ် သ့ၣ်မုၣ်အပူၣ် ဖးဒိၣ်လီၤ.

ဒီးတၢ်ဃံၣ်တၢ်မူးလၢ အပူၤန့ၣ် ကလီၤပှံၢ်ဝဲ+ ဒီးတၢ်ထီၣ်အ့ၣ်လၢ အပူၤန့ၣ် ကအူအီၣ်ကွံာ်ဝဲလီၤ.

အဃိ ကွံာ်လီၤသပၢၤထီၣ်အ့ၣ် တဖျၢၣ်အံၤလၢ မ့ၣ်အူပူၤသၢၤ.’

၁၃ “‘မ့ၢ်လၢန* အိၣ်ဒီး လုၢ်လၢ်သကဲာ်ပဝး လၢအလီၤမဲာ်ဆှး အဃိ နတကဆှီဘၣ်.+ ယဂုာ်ကျဲးစၢး မၤကဆှီထီၣ်နၤ ဘၣ်ဆၣ် နတကဆှီထီၣ်ဘၣ်. ယပျၢ်လီၤ ယတၢ်သးထီၣ်လၢနလိၤ မ့ၢ်တဝံၤဘၣ်န့ၣ် နတကဆှီထီၣ်ဘၣ်.+ ၁၄ ယၤ, ယဟိဝၤယွၤ တဲတၢ်ဝံၤလံ ဒီးတၢ်ကဟဲကဲထီၣ်အသး ဒ်န့ၣ် သပှၢ်ကတၢၢ်လီၤ. ယကမၤသပှၢ်တၢၢ် ဒီးယတဆီတလဲ ယတၢ်ဆၢတဲာ်ဘၣ် ဒီးယတသးကညီၤနၤဘၣ်.+ အဝဲသ့ၣ် ကစံၣ်ညီၣ်နၤ ဒ်နသကဲာ်ပဝး ဒီးဒ်တၢ်လၢ နမၤအသိးလီၤ.’ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.”

၁၅ ကစၢ်ယဟိဝၤယွၤ ဆဲးတဲယၤလၢ ၁၆ “ပှၤကညီဖိခွါဧၢ, ယကမၤလီၤမၢ်ကွံာ် ပှၤလၢနအဲၣ်အီၤတဂၤ ခီဖျိတၢ်တီၢ် ထဲတထံၣ်လီၤ.+ နတဘၣ်သူၣ်အုးသးအုးဘၣ် ဒီးနတဘၣ်ဟီၣ် ဒီးဒုးလီၤနမဲာ်ထံဘၣ်. ၁၇ ကအုကစွါကစုဒု ဒီးတဘၣ်မၤ လုၢ်လၢ်လၢ ဘၣ်ဃးဒီး တၢ်သူၣ်အုးသးအုးလၢ ပှၤသံအဃိတဂ့ၤ.+ ဖၢၣ်ထီၣ်နခိၣ်ဖၢၣ်+ ဒီးဒိးထီၣ်ခီၣ်ဖံးတက့ၢ်.+ တဘၣ်ကးဘၢ နနိးဆူၣ်တဂ့ၤ.+ ဒီးတဘၣ်အီၣ် ကိၣ်လၢ ပှၤဟဲဆှၢဒုးအီၣ်နၤတဂ့ၤ.”+

၁၈ ဒီးယတဲတၢ်ဒီး ပှၤဂီၢ်မုၢ်လၢ ဂီၤခီ ဒီးယမါသံလၢ ဟါလီၤခီလီၤ. အဃိ လၢခံတဂီၤန့ၣ်ယမၤဒ် တၢ်မၤလိာ်ယၤ အသိးလီၤ. ၁၉ ပှၤဂီၢ်မုၢ်တဖၣ် တဲယၤလၢ “တၢ်လၢနမၤအီၤတဖၣ်အံၤန့ၣ် အဘၣ်ထွဲဒီးပှၤဒ်လဲၣ်န့ၣ် နတတဲဘၣ်ပှၤဧီၤ.” ၂၀ အဃိ ယတဲဆၢ အဝဲသ့ၣ်လၢ “ယဟိဝၤယွၤ တဲယၤလၢ ၂၁ ‘တဲဘၣ် ပှၤအံၣ်စရ့လးဖိတဖၣ်လၢ “တၢ်ပၢကစၢ် ယဟိဝၤယွၤ တဲဝဲလၢ ‘ယတၢ်စီဆှံအလီၢ် လၢသုပာ်ကဖၢလၢသုသးလၢအဃိ ဒီးသုပာ်လုၢ်ပာ်ပှ့ၤအီၤ ဒီးသးစဲဘူးဒီးအီၤန့ၣ် ယကမၤဘၣ်အၢအီၤ+ ဘူးထီၣ်လံ. သုဖိမုၣ်ဖိခွါ လၢသုပာ်တ့ၢ်အီၤ လၢဝ့ၢ်ပူၤန့ၣ် ကဘၣ်သံလၢ နးအဃိလီၤ.+ ၂၂ ဖဲန့ၣ်အခါ သုကမၤဘၣ်ဒ် ယမၤအသိးလီၤ. သုတကးဘၢ သုနိးဆူၣ်ဘၣ် ဒီးသုတအီၣ် တၢ်အီၣ်လၢ ပှၤဟဲစိာ်ဒုးအီၣ်သုဘၣ်.+ ၂၃ သုကဖၢၣ်ဃာ်ခိၣ်ဖၢၣ် ဒီးသုကဒိးဃာ် ခီၣ်ဖံးလီၤ. သုတသးအုး ဒီးသုတဟီၣ်ဘၣ်. လၢတၢ်န့ၣ်အလီၢ် သုကတူၢ်ဘၣ်တၢ် လၢသုတၢ်ကမၣ်အဃိ+ ဒီးသုကကွၢ်လိာ်သး တဂၤဒီးတဂၤ ဒီးသုကကအုကစွါလီၤ. ၂၄ စီၤယဃ့းစက့လး မ့ၢ်ဝဲ တၢ်ပနီၣ်လၢ သုဂီၢ်လီၤ.+ သုကမၤဒ် အဝဲမၤဝဲအသိးလီၤ. ဖဲတၢ်မၤအသးဒ်န့ၣ်အခါ သုကသ့ၣ်ညါဘၣ်လၢ ယမ့ၢ် တၢ်ပၢကစၢ် ယဟိဝၤယွၤလီၤ.’”’”

၂၅ “ပှၤကညီဖိခွါဧၢ, အဝဲသ့ၣ် အတၢ်သူၣ်ထီၣ်လၢ အဝဲသ့ၣ် ပာ်ဂံၢ်ပာ်ဘါဝဲန့ၣ် မ့ၢ်တၢ်လၢ အဃံအလၤလၢ အမၤသးခု အဝဲသ့ၣ်အသး ဒီးအဝဲသ့ၣ် ပာ်လုၢ်ပာ်ပှ့ၤဝဲလီၤ. ဘၣ်ဆၣ် ယကဟံးထီၣ်ကွံာ် တၢ်လီၢ်အံၤလၢ အအိၣ်စဲဘူးလၢ အဝဲသ့ၣ် အသးပူၤဃုာ်ဒီး အဝဲသ့ၣ် အဖိမုၣ်ဖိခွါတဖၣ်လီၤ.+ ဖဲန့ၣ်အခါ ၂၆ ပှၤလၢ အဃ့ၢ်ပူၤဖျဲးအသးတဂၤန့ၣ် ကဟဲတဲကျၢနၤ တၢ်ကစီၣ်လီၤ.+ ၂၇ ဖဲတၢ်တနံၤန့ၣ် နတအိၣ်ဘှ့ၣ်လၢၤဘၣ် ဒီးနကအိးထီၣ် နထးခိၣ် ဒီးနကတဲတၢ်ဒီး ပှၤလၢ အဃ့ၢ်ပူၤဖျဲးအသးတဂၤန့ၣ်လီၤ.+ နကကဲထီၣ် တၢ်ပနီၣ်လၢ အဝဲသ့ၣ်အဂီၢ် ဒီးအဝဲသ့ၣ် ကသ့ၣ်ညါဘၣ်ဝဲလၢယမ့ၢ် ယဟိဝၤယွၤလီၤ.”

၂၅ ကစၢ်ယဟိဝၤယွၤ တဲယၤလၢ ၂ “ပှၤကညီဖိခွါဧၢ, ကွၢ်တၢ်လၢ ပှၤဧၣ်မိၣ်ဖိတဖၣ်အအိၣ်+ ဒီးတဲဝံအတၢ်စံးပာ် လၢအထီဒါ အဝဲသ့ၣ်တက့ၢ်.+ ၃ ဒီးနကဘၣ်တဲ ပှၤဧၣ်မိၣ်ဖိတဖၣ်လၢ ‘ဒိကနၣ်တၢ်လၢ တၢ်ပၢကစၢ် ယဟိဝၤယွၤ ကတဲဝဲန့ၣ်တက့ၢ်. တၢ်ပၢကစၢ် ယဟိဝၤယွၤ တဲဝဲလၢ “ဖဲပှၤဟဲမၤဘၣ်အၢ ယတၢ်လုၢ်ဟံၣ်အခါ ဒီးဖဲပှၤဟဲမၤသယုၢ် ပှၤအံၣ်စရ့လးဖိ အကီၢ်အခါ ဒီးဖဲပှၤက့ၤဖီၣ် ယူဒၤအပှၤဂီၢ်မုၢ်အခါ မ့ၢ်လၢ သုတဲလၢ ‘ဘၣ်ပိးလီၤ’* အဃိ ၄ ယကဟ့ၣ်လီၤကွံာ်သုလၢ ပှၤမုၢ်ထီၣ်ဖိတဖၣ် အစုပူၤလီၤ. ဒီးအဝဲသ့ၣ် ကဆီလီၤအဒဲကဝီၤတဖၣ်လၢ သုတၢ်လီၢ်ဒီး ကသူၣ်ထီၣ်အဒဲတဖၣ်လၢ သုအိၣ်တၢ်လီၢ်လီၤ. အဝဲသ့ၣ် ကအီၣ် သုတၤသူတၤသၣ် ဒီးကအီဝဲ သုတၢ်နုၢ်ထံလီၤ. ၅ ယကဒုးကဲထီၣ် ဝ့ၢ်ရးဘးလၢ+ ကီၤလၤအူး အတၢ်အီၣ်ဆၣ်အလီၢ် ဒီးယကဒုးကဲထီၣ် ပှၤဧၣ်မိၣ်ဖိ အကီၢ်လၢ သိဒီးမဲာ်တဲးလဲးအဖုတဖၣ် အိၣ်ကဒုဝဲ အလီၢ်လီၤ. ဒီးသုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.”’”

၆ “တၢ်ပၢကစၢ် ယဟိဝၤယွၤ တဲပှၤဧၣ်မိၣ်ဖိတဖၣ်လၢ ‘ဖဲတၢ်ကဲထီၣ်အသး ဒ်န့ၣ်လၢ ပှၤအံၣ်စရ့လးဖိ အကီၢ်ပူၤအခါ သုမၤဆဲးအဲးတၢ်+ သပှၢ်တၢၢ်ခီဖျိ သုဒဲစုပှီၢ်ခီၣ်လၢ+ တၢ်သးခုအပူၤလီၤ. ၇ အဃိ ယကယၤထီၣ်ယစု လၢသုအိၣ် ဒီးဟ့ၣ်လီၤသုလၢ ပှၤကလုာ်တဖၣ်အစုပူၤ ဒ်သိး အကဂုာ်န့ၢ်တၢ်လၢ သုအိၣ်လီၤ. ယကမၤဟးဂီၤကွံာ်သု ဒ်သိးသုသုတအိၣ်ဘၣ်လၢ ပှၤကလုာ်အဂၤတဖၣ်အကျါ လၢၤတဂ့ၤအဂီၢ် ဒီးယကမၤလီၤမၢ်ကွံာ်သုလၢ ထံကီၢ်တဖၣ် အပူၤလီၤ.+ ယကမၤဟးဂီၤကွံာ်သု ခဲလၢာ်ခဲဆ့ ဒီးသုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.’

၈ “တၢ်ပၢကစၢ် ယဟိဝၤယွၤ တဲဝဲလၢ ‘ပှၤမိၤအးဖိ+ ဒီးပှၤစ့ဧၢ်ဖိ+ တဲဝဲလၢ “ယူဒၤအပှၤဂီၢ်မုၢ်န့ၣ် လီၤဂၤဒ်သိးဒီး ပှၤကလုာ်အဂၤတဖၣ်လီၤ.” ၉ လၢတၢ်န့ၣ်အဃိ ယကပျဲလၢ ပှၤဟဲဒုး ဝ့ၢ်တဖၣ်လၢ အအိၣ်လၢ မိၤအးအကီၢ်ဆၢ ဃုာ်ဒီးကီၢ်မိၤအး အဝ့ၢ်လၢ အဂ့ၤကတၢၢ်တဖၣ် လၢအမ့ၢ် ဝ့ၢ်ဘ့းသၤယၡံမိး, ဝ့ၢ်ဘ့ၤသဘဧၤလးမဧိၣ် ဒီးဝ့ၢ်ကံးရယးသံၣ်လီၤ.+ ၁၀ ယကဟ့ၣ်လီၤ ပှၤမိၤအးဖိတဖၣ် ဒီးပှၤဧၣ်မိၣ်ဖိတဖၣ် လၢပှၤမုၢ်ထီၣ်ဖိတဖၣ် အစုပူၤ ဒ်တၢ်န့ၢ်သါအသိးလီၤ.+ အဃိ လၢပှၤကလုာ်တဖၣ် အကျါန့ၣ် ပှၤဧၣ်မိၣ်ဖိတဖၣ် တဘၣ်တၢ်သ့ၣ်နီၣ်ထီၣ်အီၤလၢၤဘၣ်.+ ၁၁ ဒီးယကစံၣ်ညီၣ် ပှၤမိၤအးဖိ+ ဒီးအဝဲသ့ၣ် ကသ့ၣ်ညါဘၣ်ဝဲလၢ ယမ့ၢ် ယဟိဝၤယွၤလီၤ.’

၁၂ “တၢ်ပၢကစၢ် ယဟိဝၤယွၤ တဲဝဲလၢ ‘ပှၤအဒိၣ်ဖိ မၤကၣ်ဝဲ ယူဒၤအပှၤဂီၢ်မုၢ်လီၤ. အဃိ အဝဲသ့ၣ် အတၢ်ကမၣ်န့ၣ် ဒိၣ်ဝဲဒိၣ်မးလီၤ.+ ၁၃ တၢ်ပၢကစၢ် ယဟိဝၤယွၤ တဲဝဲလၢ “ယကယၤထီၣ်ယစု လၢကီၢ်အဒိၣ်အအိၣ် ဒီးမၤသံ ပှၤကညီ ဒီးဆၣ်ဖိကီၢ်ဖိတဖၣ် ဒီးမၤအိၣ်သယုၢ်အီၤလီၤ.+ စးထီၣ်လၢ ဝ့ၢ်တ့ၤမၣ် ဒီးတုၤလၢ ဒဒၣ်တၢ်လီၢ်န့ၣ် အဝဲသ့ၣ် ကလီၤဃံၢ်ဝဲလၢ နးအဃိလီၤ.+ ၁၄ ‘ယကဟ့ၣ်ကၣ်က့ၤ ပှၤအဒိၣ်ဖိ ခီဖျိလၢ ယပှၤဂီၢ်မုၢ် ပှၤအံၣ်စရ့လးဖိလီၤ.+ ဒ်သိးယကဟ့ၣ်ကၣ် ပှၤအဒိၣ်ဖိ အဂီၢ် ယကဒုးလီၤ ယတၢ်သးထီၣ် ဒီးယတၢ်သးဒိၣ် လၢပှၤအဒိၣ်ဖိအလိၤ ခီဖျိလၢ ပှၤအံၣ်စရ့လးဖိလီၤ.’+ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.”’

၁၅ “တၢ်ပၢကစၢ် ယဟိဝၤယွၤ တဲဝဲလၢ ‘ပှၤဖလ့ၡသးဖိတဖၣ် သးဟ့ ပှၤအံၣ်စရ့လးဖိ တကတၢၢ် နီတဘျီဘၣ်အဃိ အဝဲသ့ၣ် ကူၣ်ထီၣ်လၢ ကဟ့ၣ်ကၣ်တၢ် အၢအၢသီသီ ဒီးမၤဟးဂီၤကွံာ် ပှၤအံၣ်စရ့လးဖိလီၤ.+ ၁၆ လၢတၢ်န့ၣ်အဃိ တၢ်ပၢကစၢ် ယဟိဝၤယွၤ တဲဝဲလၢ “ယကယၤထီၣ်ယစုလၢ ပှၤဖလ့ၡသးဖိအအိၣ်+ ဒီးယကမၤဟးဂီၤကွံာ် ပှၤကရံသးဖိတဖၣ်လီၤ.+ ဒီးပှၤလၢအအိၣ်လၢ ပီၣ်လဲၣ်နံၤလၢ အအိၣ်တ့ၢ်ဒံးတဖၣ်န့ၣ် ယကမၤဟးဂီၤကွံာ် အဝဲသ့ၣ်လီၤ.+ ၁၇ ယကဟ့ၣ်ကၣ် အဝဲသ့ၣ် လၢတၢ်ဟ့ၣ်ကၣ်ဖးဒိၣ် ဒီးသိၣ်ဃီၣ်အဝဲသ့ၣ်လၢ တၢ်သးဒိၣ်အပူၤလီၤ. ဖဲယဟ့ၣ်ကၣ် အဝဲသ့ၣ်အခါ အဝဲသ့ၣ် ကသ့ၣ်ညါဘၣ်ဝဲလၢ ယမ့ၢ် ယဟိဝၤယွၤလီၤ.”’”

၂၆ ဖဲ ၁၁ နံၣ်, လါထီၣ်အဆိကတၢၢ် တသီန့ၣ် ယဟိဝၤယွၤ တဲယၤလၢ ၂ “ပှၤကညီဖိခွါဧၢ, ဝ့ၢ်စိၢ်န့ၣ် တဲဝဲ ဝ့ၢ်ယရူၤၡလ့ၣ်လၢ+ ‘ပှၤဂီၢ်မုၢ်တဖၣ် အတြဲၤဟးဂီၤအဃိ+ ‘ဘၣ်ပိးလီၤ.’* ဝ့ၢ်ယရူၤၡလ့ၣ်ဟးဂီၤလံ အဃိ တၢ်ခဲလၢာ်န့ၣ် ကဟဲလၢယအိၣ် ဒီးယကကဲဒိၣ်ထီၣ်လီၤ.’ ၃ တၢ်ပၢကစၢ် ယဟိဝၤယွၤ တဲဝဲလၢ ‘အိ ဝ့ၢ်စိၢ်ဧၢ, ယကဲထီၣ် နဒုၣ်နဒါလံ. ဒ်ပီၣ်လဲၣ် ဒုးဟဲထီၣ်လပီအသိး ယကမၢ ပှၤအါကလုာ် ဟဲထီဒါနၤလီၤ. ၄ အဝဲသ့ၣ် ကမၤဟးဂီၤ ဝ့ၢ်စိၢ် အတၢ်ဒူၣ်တဖၣ် ဒီးကမၤလီၤပှီၢ် အတၢးထီတဖၣ်လီၤ.+ ဒီးယကဝာ်ပျီကွံာ် ဝ့ၢ်အတၢ်ဟးဂူာ်ဟးဂီၤတဖၣ် ဒီးယကဒုးကဲထီၣ်အီၤ လၢလၢၢ်လၢ အဘျ့လၢ တၢ်တအိၣ်လၢအလိၤ နီတမံၤဘၣ်လီၤ. ၅ ဒီးဝ့ၢ်ကကဲထီၣ် တၢ်လိဃ့ စၤတဖၣ်အလီၢ်လၢ ပီၣ်လဲၣ်အခၢၣ်သး,’+

“‘မ့ၢ်လၢ ယတဲဝံၤလံအဃိလီၤ. ဒီးပှၤကလုာ်တဖၣ် ကဂုာ်န့ၢ် တၢ်အိၣ်လၢ ဝ့ၢ်ပူၤလီၤ.’ ယၤ, တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ. ၆ ‘ဒီးပှၤအိၣ်လၢ အဒူသဝီတဖၣ် အပူၤန့ၣ် ကသံဝဲလၢ နးအဃိလီၤ. ဒီးပှၤကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.’

၇ “တၢ်ပၢကစၢ် ယဟိဝၤယွၤ တဲဝဲလၢ ‘ယကဒုးဟဲ ဘၤဘူၤလိၣ်အစီၤပၤ နဘူၤကးန့စၢ် လၢကလံၤစိးတခီ ဒ်သိး ကဒုးဝဲ ဝ့ၢ်စိၢ်အဂီၢ်လီၤ.+ စီၤနဘူၤကးန့စၢ် မ့ၢ်ဝဲ စီၤပၤတဖၣ်အစီၤပၤလီၤ.+ အဝဲကဟဲဒီး ကသ့ၣ်တဖၣ်,+ လ့ၣ်ကဟၣ်သုးတဖၣ်,+ ပှၤသုးဖိလၢ အဒိးကသ့ၣ်တဖၣ် ဒီးသုးမုၢ်တဖုလၢ အအိၣ်ဒီး သုးဖိအါဂၤလီၤ. ၈ အဝဲကမၤဟးဂီၤကွံာ် န* ဒူသဝီတဖၣ် လၢနးလီၤ. ဒီးကသူၣ်ထီၣ်တၢ်ဒူၣ်လၢ ကကဝီၤဃာ်တၢ်အဂီၢ် ဒီးပာ်ပူၣ်ထီၣ်ဟီၣ်ခိၣ် လၢကဒုးနၤအဂီၢ် ဒီးကစိာ်ဝဲ ကတီၤဖးဒိၣ်လီၤ. ၉ အဝဲကဘၢၣ်ဖျိ နဝ့ၢ်ဒူၣ်လၢ အတၢ်စုကဝဲၤဖးဒိၣ်လၢ အဘၢၣ်ဖျိတၢ် ဒီးကမၤလီၤပှီၢ်ကွံာ် နတၢးထီတဖၣ် လၢကွါလီၤ.* ၁၀ ခီဖျိလၢ အကသ့ၣ် အါဝဲဒိၣ်မးအဃိ ဟီၣ်ခိၣ်ကမူၣ် ကခုၣ်ထီၣ်ဒီး လုၢ်ဘၢကွံာ်နၤလီၤ. ဒ်ပှၤနုာ်လီၤဆူၣ်လၢ ဝ့ၢ်ဒူၣ်လၢ အလီၤပှီၢ်အပူၤအသိး ဖဲအဝဲဟဲနုာ်လီၤလၢ နတြဲၤတဖၣ်အခါ ကသ့ၣ်တဖၣ်, လ့ၣ်အပၣ်တဖၣ် ဒီးလ့ၣ်ကဟၣ် အသီၣ်တဖၣ်န့ၣ် ကမၤဟူးဝးဝဲ နတၢ်ဒူၣ်တဖၣ်လီၤ. ၁၁ အကသ့ၣ်အခီၣ်မ့ၣ်တဖၣ် ကယီၢ်လီၤတၢ်လၢ နကျဲကိးဘိဒဲးအပူၤ+ ဒီးအဝဲ ကမၤသံနပှၤတဖၣ် လၢနးလီၤ. ဒီးနလၢၢ်ထူၣ် လၢအကျၢၤတဖၣ် ကလီၤကလဲလၢ ဟီၣ်ခိၣ်လိၤလီၤ. ၁၂ အဝဲသ့ၣ် ကဂုာ်န့ၢ်ဆူၣ် နတၢ်ထူးတၢ်တီၤတဖၣ် ဒီးကဟံးန့ၢ်ဆူၣ် တၢ်လၢနဆါအီၤတဖၣ်+ ဒီးကမၤလီၤပှီၢ်ကွံာ် နတၢ်ဒူၣ်တဖၣ် ဒီးကမၤဟးဂီၤကွံာ် နဟံၣ်လၢ အဃံလၤတဖၣ်လီၤ. ဝံၤဒီး အဝဲသ့ၣ် ကကွံာ်လီၤနလၢၢ်တဖၣ်, တၢ်လၢနတ့ထီၣ်ပာ်စၢၤအီၤ ဒီးသ့ၣ်တဖၣ် ဒီးတၢ်အက့အခီတဖၣ် လၢပီၣ်လဲၣ်ပူၤလီၤ.’

၁၃ “‘ယကမၤကတၢၢ်ကွံာ် နတၢ်သးဝံၣ်တဖၣ် ဒီးပှၤတနၢ်ဟူဘၣ် နတနၢ်တဖၣ် အသီၣ်လၢၤဘၣ်.+ ၁၄ ဒီးယကမၤကဲထီၣ်နၤ ဒ်လၢၢ်လၢ အဘျ့လၢ တၢ်တအိၣ်လၢအလိၤ နီတမံၤဘၣ် အသိးလီၤ. ဒီးနကကဲထီၣ် တၢ်လိဃ့ စၤတဖၣ်အလီၢ်လီၤ.+ ယၤ ယဟိဝၤယွၤန့ၣ် ယတဲတၢ်ဝံၤလံ အဃိပှၤတသူၣ်ထီၣ်က့ၤနၤ နီတဘျီလၢၤဘၣ်.’ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.

၁၅ “တၢ်ပၢကစၢ် ယဟိဝၤယွၤ တဲဝဲ ဝ့ၢ်စိၢ်လၢ ‘ဖဲနတၢ်လီၤပှီၢ် အကလုၢ်သီၣ်ထီၣ် ဒီးပှၤလၢအဘူးထီၣ် ကသံတဖၣ် ကအုကစွါဝဲ ဒီးပှၤမၤသံမၤဝီတၢ်လၢ နပူၤအခါ ကီးတဖၣ် ကကနိးကစုာ်လီၤ.+ ၁၆ ဒီးပီၣ်လဲၣ် အပှၤခိၣ်ပှၤနၢ်ခဲလၢာ်န့ၣ် ကစံၣ်လီၤလၢ အလီၢ်ပစိာ်အလိၤ, ကဘ့ၣ်လီၤကွံာ် အဆ့ဖးထီ, ကဘ့ၣ်လီၤကွံာ် အကူအသိးလၢ ပှၤဆးကံၣ်ဃ့အီၤတဖၣ် ဒီးအဝဲသ့ၣ် ကပျံၤတၢ် ဒီးကနိးကစုာ်လီၤ. အဝဲသ့ၣ် ကဆ့ၣ်နီၤ ကနိးကစုာ်ဝဲလၢ ဟီၣ်ခိၣ်လိၤ ဒီးကွၢ်စိဃီၤနၤ ဒီးကကမၢကမၣ်ဒိၣ်မးလီၤ.+ ၁၇ ဒီးအဝဲသ့ၣ် ကသးဝံၣ်န့ၢ်နၤ ထါဟီၣ်တယုၢ်လၢ+

“ပှၤလၢအလဲၤတၢ်လၢ ပီၣ်လဲၣ်ပူၤန့ၣ် အိၣ်ဆိးဝဲလၢနပူၤ ဒီးနမ့ၢ်ဝ့ၢ်လၢ အဘၣ်တၢ်စံးပတြၢၤအီၤလီၤ.

၁၈ ဖဲနလီၤပှီၢ်ကွံာ်အနံၤန့ၣ် ကီးတဖၣ်ဟူးဝးဝဲလီၤ.

ဖဲနတအိၣ်လၢၤဘၣ်အခါ ပီၣ်လဲၣ်အကီးတဖၣ် ဘၣ်ကိၢ်ဘၣ်ဂီၤ တၢ်လီၤ.”’+

၁၉ “တၢ်ပၢကစၢ် ယဟိဝၤယွၤ တဲဝဲလၢ ‘ဖဲယမၤအိၣ်သယုၢ်နၤ ဒီးဒုးကဲထီၣ်နၤဒ် ဝ့ၢ်အဂၤတဖၣ်လၢ ပှၤတအိၣ်ဘၣ်လၢ အပူၤနီတဂၤလၢၤဘၣ်အခါ ယကဒုးလုၢ်ဘၢနၤလၢ ထံလၢအယွၤဝဲဆူၣ်ဆူၣ် ဒီးပီၣ်လဲၣ် ကလုၢ်ဘၢကွံာ်နၤလီၤ.+ ၂၀ ဖဲန့ၣ်အခါ ယကတွံၢ်လီၤစ့ၢ်ကီးနၤဆူ တၢ်သွၣ်ခိၣ်အပူၤ, ဖဲပှၤသံတ့ၢ်လၢညါတဖၣ် အိၣ်ဝဲအလီၢ်လီၤ. ယကဒုးအိၣ်နၤလၢ တၢ်လီၢ်လၢ အယိာ်ကတၢၢ် ဃုာ်ဒီး ဝ့ၢ်လၢပျၢၤတဖၣ်လၢ အဘၣ်တၢ်မၤဟးဂီၤတ့ၢ်အီၤ ဖးယံာ်လံလီၤ. ဒီးနကလဲၤလီၤလၢ တၢ်သွၣ်ခိၣ်အပူၤ ဃုာ်ဒီး ပှၤအဂၤတဖၣ်+ ဒ်သိး ပှၤသုတအိၣ်လၢနပူၤ လၢၤတဂ့ၤအဂီၢ်လီၤ. ဝံၤဒီး ယကမၤဃံမၤလၤထီၣ် ပှၤလၢအအိၣ်မူဒံးတဖၣ် အကီၢ်လီၤ.

၂၁ “တၢ်ပၢကစၢ် ယဟိဝၤယွၤ တဲဝဲလၢ ‘ယကဒုးလီၤဘၣ် တၢ်လီၤပျံၤလီၤဖုး လၢနလိၤ သတူၢ်ကလာ် ဒီးနတအိၣ်လၢၤဘၣ်.+ ပှၤကဃုနၤ ဘၣ်ဆၣ် ပှၤတထံၣ်နၤ နီတဘျီလၢၤဘၣ်.’”

 ၅ နလီၤဂာ်ဒ်သိးဒီး ကဘီတဘ့ၣ်လီၤ. အဝဲသ့ၣ် ဟံးန့ၢ် ကစၢၢ်စနံၢ် အသ့ၣ်ကၠူနံးဖၢၤ ဒီးတ့ထီၣ် နသ့ၣ်ဘ့ၣ်ဘၣ်လီၤ.+

ဒီးအဝဲသ့ၣ် ဟံးန့ၢ်ဝဲ သ့ၣ်ဆှိအ့ရ့း လၢလဘၤနိၣ်အကစၢၢ်ကလိကျါ ဒ်သိးကတ့ထီၣ် နယၢ်လၣ်အထူၣ် အဂီၢ်လီၤ.

 ၈ ပှၤစံဒိၣ်ဖိ ဒီးပှၤအၢ်ဝးဖိတဖၣ်န့ၣ်+ မ့ၢ်ဝဲနပှၤဝၢ်ကဘီဖိလီၤ.

အိ ဝ့ၢ်စိၢ်ဧၢ, နပှၤလၢအအိၣ်ဒီး တၢ်သ့တၢ်ဘၣ်တဖၣ်န့ၣ် မ့ၢ်ဝဲ နပှၤနီကဘီဖိလီၤ.+

 ၉ ဝ့ၢ်ကံးဘလး အပှၤလၢ အအိၣ်ဒီး တၢ်သ့တၢ်ဘၣ် ဒီးတၢ်လဲၤခီဖျိတဖၣ်န့ၣ်+ မၤပံးန့ၢ် တၢ်ပူၤလၢ အအိၣ်လၢ နကနူၤတဖၣ်လီၤ.+

ကယဲၢ်ကဘီလၢ ပီၣ်လဲၣ်အပူၤ ဒီးပှၤကဘီဖိတဖၣ် ဟဲလၢနအိၣ် ဒ်သိး ကဆါတၢ်ပှ့ၤတၢ် အဂီၢ်လီၤ.

၁၀ ပှၤလၢအအိၣ်လၢ ဖၢၡၢၣ်, လူဒံၣ် ဒီးပူၤတၤန့ၣ်+ မ့ၢ်ဝဲ နသုးဖိလၢ နသုးမုၢ် အကျါလီၤ.

အဝဲသ့ၣ် ဘျးထီၣ်ဝဲ အကတီၤတဖၣ် ဒီးအခိၣ်ဖျီၣ်ထး လၢနတၢ်ဒူၣ်တဖၣ်အလိၤ ဒီးအဝဲသ့ၣ် ဒုးအိၣ်ထီၣ် နတၢ်လၤကပီၤလီၤ.

အဝဲသ့ၣ် ဘျးထီၣ်ဝဲ ကတီၤ ကဝီၤကျီၤတဖၣ် လၢနတၢ်ဒူၣ်တဖၣ်အလိၤဝးဝး.

အဃိ နတၢ်ဃံတၢ်လၤန့ၣ် လၢပှဲၤဝဲလီၤ.

၁၂ “‘“မ့ၢ်လၢ နထူးနတီၤဒိၣ်မးအဃိ ပှၤတၢ်ၡံၣ်ဖိတဖၣ်+ မၤတၢ်ဆါတၢ်ပှ့ၤအတၢ်မၤဒီးနၤလီၤ.+ ဒီးအဝဲသ့ၣ် အစ့ညၣ်, ထး, ထးဝါ ဒီးစၢၢ်တဖၣ်န့ၣ် အဝဲသ့ၣ် ခီလဲဝဲဒီး နတၢ်ဖိတၢ်လံၤတဖၣ်လီၤ.+ ၁၃ ပှၤယၤဝၣ်ဖိ, ပှၤတူၤဘလးဖိ+ ဒီးပှၤမ့ၤၡ့းဖိန့ၣ်+ မၤတၢ်ဆါတၢ်ပှ့ၤ အတၢ်မၤဒီးနၤ ဒီးကုၢ်တဖၣ်+ ဒီးတၢ်ဖိတၢ်လံၤလၢ ပှၤတ့အီၤလၢ တိၢ်ဘီတဖၣ်န့ၣ် အဝဲသ့ၣ် ခီလဲဝဲဒီး တၢ်လၢနဆါအီၤတဖၣ်လီၤ. ၁၄ ပှၤတိကးရမၤဖိတဖၣ်+ ခီလဲဝဲ ကသ့ၣ် ဒီးကသ့ၣ်လၤတဖၣ်* လၢနတၢ်ဖိတၢ်လံၤတဖၣ်လီၤ. ၁၅ ပှၤဒဒၣ်ဖိတဖၣ်+ မၤတၢ်ဆါတၢ်ပှ့ၤ အတၢ်မၤဒီးနၤ ဒီးပှၤဆါတၢ်ပှ့ၤတၢ်ဖိလၢ ကီးအါဘ့ၣ်အပူၤန့ၣ် မၤန့ၢ်တၢ်လၢ နဂီၢ်လီၤ. အဝဲသ့ၣ် ဟ့ၣ်နၤ ကဆီမဲ+ ဒီးသ့ၣ်သီလမူာ် ဒ်တၢ်ခိတၢ်သွဲ အသိးလီၤ. ၁၆ မ့ၢ်လၢနတၢ်ဖိတၢ်လံၤတဖၣ် အိၣ်ဝဲဒီဒူၣ် အဃိ ပှၤအဒိၣ်ဖိတဖၣ် မၤတၢ်ဆါတၢ်ပှ့ၤ အတၢ်မၤဒီးနၤလီၤ. အဝဲသ့ၣ် ဟ့ၣ်လီၤနၤ လၢၢ်တၢ်မျၢ်လါဟ့, သိဆူၣ်လၢ အလွဲၢ်လုး, တၢ်ကံးညာ်လၢ ပှၤဆးကံၣ်ဃ့အီၤလၢ အလွဲၢ်အိၣ် အကလုာ်ကလုာ်, တၢ်ကံးညာ်လၢအဂ့ၤ, လၢၢ်ဖီတဖၣ်, ဒီးတၢ်မျၢ်ဆီသွံၣ် ဒ်သိး ကခီလဲဝဲဒီး နတၢ်ဖိတၢ်လံၤတဖၣ် အဂီၢ်လီၤ.

၁၇ “‘“ယူဒၤ ဒီးကီၢ်အံၣ်စရ့လး မၤတၢ်ဆါတၢ်ပှ့ၤ အတၢ်မၤဒီးနၤ ဒီးဟ့ၣ်နၤ ဝ့ၢ်မံာ်နံးအဘုကၠူၣ်,+ တၢ်အီၣ်လၢအဂ့ၤကတၢၢ်, ကနဲစီ,+ သိ ဒီးသ့ၣ်စရံအထုး+ ဒ်သိးကခီလဲဝဲဒီး နတၢ်ဖိတၢ်လံၤတဖၣ် အဂီၢ်လီၤ.+

၁၈ “‘“မ့ၢ်လၢ နတၢ်ဖိတၢ်လံၤတဖၣ် အိၣ်ဝဲဒီဒူၣ် ဒီးနတၢ်ထူးတၢ်တီၤတဖၣ် အဃိ ဝ့ၢ်ဒၤမ့ၤစ့း+ မၤတၢ်ဆါတၢ်ပှ့ၤ အတၢ်မၤဒီးနၤလီၤ. ဒီးအဝဲသ့ၣ် ဟ့ၣ်နၤ ဃ့လ့ဘိၣ် အစပံးထံ ဒီးစၤဟၣ် အသိဆူၣ်တဖၣ် ဒ်သိး ကခီလဲဝဲဒီး နတၢ်ဖိတၢ်လံၤတဖၣ် အဂီၢ်လီၤ. ၁၉ ဝဒၣ် ဒီးယၤဝၣ် လၢအူစလးန့ၣ် ဟ့ၣ်နၤ တၢ်ဖိတၢ်လံၤ လၢပှၤတ့အီၤလၢထး, ကဒါနါ ဒီးဂ့ၢ်နၢမူ ဒ်သိး ကန့ၢ်ဘၣ် နတၢ်ဖိတၢ်လံၤ အဂီၢ်လီၤ. ၂၀ ပှၤဒဒၣ်ဖိ+ ဟ့ၣ်နၤ တၢ်ကံးညာ်လၢ ပှၤကဒိး ဆၣ်ဖိကီၢ်ဖိအဂီၢ် ဒ်သိး ကခီလဲဝဲဒီး တၢ်လၢနဆါအီၤတဖၣ် အဂီၢ်လီၤ. ၂၁ ပှၤဧ့ရ့းဖိ ဒီးက့ဒၢ်+ အခိၣ်အနၢ် ခဲလၢာ်န့ၣ် မၤတၢ်လၢနဂီၢ်လီၤ. အဝဲသ့ၣ် ဆါဝဲ သိဖိတဖၣ်, သိဖါတဖၣ် ဒီးမဲာ်တဲးလဲးတဖၣ်လီၤ.+ ၂၂ ၡဘၤ ဒီးရၤဧမၤ+ အပှၤဆါတၢ်ပှ့ၤတၢ်ဖိတဖၣ်န့ၣ် မၤတၢ်ဆါတၢ်ပှ့ၤ အတၢ်မၤဒီးနၤလီၤ. အဝဲသ့ၣ် ဟ့ၣ်လီၤနၤ တၢ်နၢမူလၢ အဂ့ၤကတၢၢ် အကလုာ်ကလုာ် ဒီးလၢၢ်လၢ အလုၢ်ဒိၣ်ပှ့ၤဒိၣ်တဖၣ် ဒီးထူ ဒ်သိး ကခီလဲဝဲဒီး နတၢ်ဖိတၢ်လံၤတဖၣ်လီၤ.+ ၂၃ ဟၤရၣ်,+ ကးနၤ, ဧ့ၤဒ့ၣ်+ ဒီးပှၤဆါတၢ်ပှ့ၤတၢ်ဖိလၢ ၡဘၤ,+ အၤၡူၢ်+ ဒီးကံလမးန့ၣ် မၤတၢ်ဆါတၢ်ပှ့ၤအတၢ်မၤဒီးနၤလီၤ. ၂၄ လၢနတၢ်ဆါတၢ်ပှ့ၤတၢ်အလီၢ်န့ၣ် အဝဲသ့ၣ် ဟဲစိာ်ဆါဝဲ ဆ့ကၤလုး အလွဲၢ်လါအဲး လၢအအိၣ်ဒီး တၢ်ကံၣ်ဃ့အလွဲၢ်အကလုာ်ကလုာ် ဒီးတၢ်ကံးညာ်လၢ တၢ်ဒါလီၤတၢ်အဂီၢ် လၢအအိၣ်ဒီး အလွဲၢ်အကလုာ်ကလုာ် လၢပှၤစၢဃာ်အီၤဒီးပျံၤ ကျၢၤကျၢၤလီၤ.

၂၅ တၢ်ၡံၣ် အကဘီတဖၣ်န့ၣ်+ ဆှၢထီၣ်ဆှၢလီၤ နတၢ်ဖိတၢ်လံၤ တဖၣ်လီၤ.

အဃိ လၢပီၣ်လဲၣ်ပူၤန့ၣ် နအိၣ်ပှဲၤဒီး တၢ်ထူးတၢ်တီၤတဖၣ်လီၤ.

၂၈ ဖဲနပှၤနီကဘီဖိတဖၣ် ကိးပသူထီၣ်အခါ ပီၣ်လဲၣ်ကၢၢ်နံၤန့ၣ် ကဟူးဝးဝဲလီၤ.

၃၁ ဒီးအဝဲသ့ၣ် ကလူၤအခိၣ်ဆူၣ် ဒီးကသိးထီၣ်ဝဲ ထၢၣ်တၢ်ကံးညာ်လီၤ.*

ဒီးအဝဲသ့ၣ် ကဟီၣ်ဝဲ လၢာ်သူၣ် လၢာ်သး လၢနဃိလီၤ.

၃၃ ဖဲနတၢ်ဖိတၢ်လံၤ လၢအအိၣ်လၢ ပီၣ်လဲၣ်တဖၣ် လဲၤတုၤလၢ ပှၤအိၣ်အခါ အမၤမံ ပှၤအါဂၤ အသးလီၤ.+

နတၢ်ထူးတၢ်တီၤ အါအါဂီၢ်ဂီၢ် ဒီးနတၢ်ဖိတၢ်လံၤတဖၣ်န့ၣ် ဒုးထူးထီၣ်တီၤထီၣ် စီၤပၤတဖၣ် လၢဟီၣ်ခိၣ်ချၢလီၤ.+

၃၄ ဘၣ်ဆၣ် ခဲအံၤ နဟးဂီၤကွံာ်လၢ ပီၣ်လဲၣ်ပူၤ လၢထံယိာ်အကျါလံ.+

ဒီးတၢ်လၢနဆါအီၤတဖၣ် ဒီးပှၤအိၣ်လၢနပူၤတဖၣ် လီၤဘျၢဃုာ်ဒီးနၤ ခဲလၢာ်လီၤ.+

၃၅ ပှၤလၢအအိၣ်လၢ ကီးပူၤခဲလၢာ်န့ၣ် ကွၢ်စိဃီၤနၤ ဒီးကမၢကမၣ်ဝဲ ဒိၣ်မးလီၤ.+

ဒီးအဝဲသ့ၣ် အစီၤပၤတဖၣ်န့ၣ် ပျံၤတၢ် ကနိးကစုာ်+ ဒီးအဝဲသ့ၣ် အမဲာ်သၣ် ပှဲၤဒီးတၢ်ကိၢ်တၢ်ဂီၤလီၤ.

၃၆ ခီဖျိလၢ တၢ်ကဲထီၣ်အသးဒီးနၤ ဒ်န့ၣ်အဃိ ပှၤဆါတၢ်ပှ့ၤတၢ်ဖိ လၢပှၤကလုာ်တဖၣ်အကျါန့ၣ် ကွ့ကလံၤ လၢနဃိလီၤ.

 ၄ နမၤကဲဒိၣ်ထီၣ်နသး ခီဖျိလၢ နတၢ်ကူၣ်သ့ ဒီးနတၢ်သူၣ်ဆးသးဆးအဃိလီၤ.

ဒီးနဆဲးပာ်ဖှိၣ် ထူဒီးစ့ လၢနတၢ်လုၢ်ဒိၣ်ပှ့ၤဒိၣ် အလီၢ်လီၤ.+

 ၅ နမၤတၢ်ဆါတၢ်ပှ့ၤ အတၢ်မၤသ့မး အဃိနထူးထီၣ်တီၤထီၣ် ဒိၣ်မးလီၤ.+

ဒီးခီဖျိလၢ နထူးနတီၤအဃိ နပာ်ထီၣ်ထီနသးလီၤ.”’

အဝဲသ့ၣ် ကထုးထီၣ်အနးတဖၣ် ဒီးတၢ်ဃံတၢ်လၤ လၢအအိၣ်ဒီးနၤ ခီဖျိလၢ နတၢ်ကူၣ်သ့အဃိန့ၣ် အဝဲသ့ၣ် ကမၤဟးဂီၤကွံာ်ဝဲ ခဲလၢာ်လီၤ.

ဒီးကမၤဟးဂီၤ နတၢ်လၤကပီၤ လၢအကဟုကညီၢ်တဖၣ်လီၤ.+

 ၉ မ့ၢ်နကတဲပှၤလၢ အကမၤသံနၤတဂၤန့ၣ်လၢ နမ့ၢ်ယွၤတဂၤဧါ.

လၢပှၤလၢ အကမၤဟးဂီၤနၤ အတၢ်ထံၣ်န့ၣ် နမ့ၢ်ဒၣ် ပှၤကညီတဂၤလီၤ, နတမ့ၢ် ယွၤတဂၤဘၣ်.”’

၁၁ ကစၢ်ယဟိဝၤယွၤ တဲယၤလၢ ၁၂ “ပှၤကညီဖိခွါဧၢ, သးဝံၣ်ထါဟီၣ်တယုၢ်လၢ ဝ့ၢ်စိၢ်အစီၤပၤအဂီၢ် ဒီးတဲအီၤလၢ ‘တၢ်ပၢကစၢ် ယဟိဝၤယွၤ တဲဝဲလၢ

၁၃ ဒီးနအိၣ်လၢ ဧ့ၤဒ့ၣ် လၢအမ့ၢ် ကစၢ်ယွၤ အတၤသၣ်လီၢ် အပူၤလီၤ.

ဒီးလၢၢ်တဖၣ်န့ၣ် ဘၣ်တၢ်ကျီၤဃာ်အီၤဒီး ထူလီၤ.

ယကတဲာ်ကတီၤပာ်စၢၤ တၢ်သ့ၣ်တဖၣ်န့ၣ် ဖဲယတ့လီၤနၤ အမုၢ်နံၤလီၤ.

၁၄ ယဃုထၢထီၣ်နၤ ဒီးယဒိးဖှူနၤ ဒ်ခ့ရူာ်လၢ အဒီသဒၢတၢ်အသိးလီၤ.

နအိၣ်လၢ ကစၢ်ယွၤ အကစၢၢ်စီဆှံအလိၤ+ ဒီးနဟးလၢ လၢၢ်မ့ၣ်အူတဖၣ် အကျါလီၤ.

အဃိ ယကဟီထီၣ်ကွံာ်နၤ လၢကစၢ်ယွၤ အကစၢၢ် ဒ်နမ့ၢ် ပှၤလၢအဘၣ်အၢအသိး ဒီးယကမၤ ဟးဂီၤကွံာ်နၤလီၤ.+

အိ ခ့ရူာ်လၢ အဒီသဒၢတၢ်ဧၢ, ယကနီဟးထီၣ်ကွံာ်နၤ လၢလၢၢ်မ့ၣ်အူတဖၣ် အိၣ်ဝဲအလီၢ်လီၤ.

၁၇ ခီဖျိလၢ နတၢ်ဃံတၢ်လၤအဃိ နပာ်ထီၣ်ထီနသးလီၤ.+

ဒီးနမၤဟးဂီၤလီၤ နတၢ်ကူၣ်သ့ ခီဖျိ နတၢ်လၤကပီၤ လၢအကဟုကညီၢ်တဖၣ်အဃိလီၤ.+

၁၈ ခီဖျိလၢ နအိၣ်ဒီး တၢ်ကမၣ်ဖးဒိၣ် ဒီးနမၤတၢ်ဆါတၢ်ပှ့ၤအတၢ်မၤ လၢအတတီတလိၤဘၣ်အဃိ နမၤဘၣ်အၢ နတၢ်ဘူၣ်ထီၣ်ဘါထီၣ် တၢ်အလီၢ်တဖၣ်လီၤ.

ယကဒွဲၣ်ထီၣ်မ့ၣ်အူ လၢနပူၤ ဒီးမ့ၣ်အူ ကအီၣ်ကွံာ်နၤလီၤ.+

ဒီးလၢပှၤလၢ အကွၢ်နၤခဲလၢာ် အမဲာ်ညါန့ၣ် ယကဒုးကဲထီၣ်က့ၤနၤလၢဖၣ်ဆါကမူၣ် လၢဟီၣ်ခိၣ်လိၤလီၤ.

၁၉ ပှၤလၢအသ့ၣ်ညါနၤန့ၣ် ကကွၢ်စိဃီၤနၤ ဒီးကကမၢကမၣ် ဒိၣ်မးလီၤ.+

ဖဲယစံၣ်ညီၣ်နၤ ဒီးယဘၣ်တၢ်ပာ်စီဆှံယၤ လၢနဃိအခါ ပှၤကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.

၂၃ ယကဆှၢလီၤ တၢ်ဆါသံသတြိာ် လၢနအိၣ် ဒီးတၢ်သွံၣ် ကယွၤလီၤလၢ နကျဲတဖၣ်အပူၤလီၤ.

ဖဲနးတဖၣ် ဟဲထီဒါနၤ ကိးကပၤဒဲးအခါ ပှၤကလီၤဃံၢ်သံလၢ နပူၤလီၤ.

ဒီးအဝဲသ့ၣ် ကသ့ၣ်ညါဘၣ်ဝဲလၢ ယမ့ၢ် ယဟိဝၤယွၤလီၤ.+

၂၄ “‘“ဖဲန့ၣ်အခါ ပှၤလၢအလီၤဂာ်ဒ်သိးဒီး တၤဆှုၣ်တၤမဲလၢ အဘၣ်ဆဲးတၢ် ဒီးတၤဆှုၣ်တၤမဲလၢ အမၤဆါတၢ် လၢအဆိကမိၣ်ဆံး ပှၤအံၣ်စရ့လးဖိတဖၣ်န့ၣ် တအိၣ်ဝးတရံး ပှၤအံၣ်စရ့လးဖိတဖၣ်လၢၤဘၣ်.+ ဒီးပှၤကသ့ၣ်ညါဘၣ်လၢ ယမ့ၢ် တၢ်ပၢကစၢ် ယဟိဝၤယွၤလီၤ.”’

၂၅ “‘တၢ်ပၢကစၢ် ယဟိဝၤယွၤ တဲဝဲလၢ “ဖဲယပာ်ဖှိၣ်ထီၣ်က့ၤ ပှၤအံၣ်စရ့လးဖိတဖၣ်လၢ အလီၤပြံလီၤပြါ လၢကီၢ်အဂၤတဖၣ်အခါ+ ယကဘၣ် တၢ်ပာ်စီဆှံယၤလၢ ပှၤကလုာ်တဖၣ် အမဲာ်ညါလီၤ.+ ဒီးပှၤအံၣ်စရ့လးဖိတဖၣ် ကအိၣ်ဘၣ်ဝဲလၢ အနီၢ်ကစၢ်အကီၢ်+ လၢအမ့ၢ်ကီၢ်လၢ ယဟ့ၣ်လီၤ ယခ့ယပှၤ စီၤယၤကိာ်လီၤ.+ ၂၆ အဝဲသ့ၣ် ကအိၣ်ဘၣ် ဘံၣ်ဘံၣ်ဘၢဘၢဖဲန့ၣ်+ ဒီးကသူၣ်ထီၣ်ဟံၣ်တဖၣ် ဒီးကသူၣ်လီၤ စပံးကျီးတဖၣ်လီၤ.+ ဒီးဖဲယစံၣ်ညီၣ် ပှၤလၢအအိၣ်ဝးတရံးအဝဲသ့ၣ် လၢအဆိကမိၣ်ဆံးအဝဲသ့ၣ် အခါ အဝဲသ့ၣ် ကအိၣ်ဘၣ် ဘံၣ်ဘံၣ်ဘၢဘၢလီၤ.+ ဒီးအဝဲသ့ၣ် ကသ့ၣ်ညါဘၣ်လၢ ယမ့ၢ် အဝဲသ့ၣ် အကစၢ် ယဟိဝၤယွၤလီၤ.”’”

၂၉ ဖဲတဆံနံၣ်တနံၣ်, တဆံလါတလါ, လါထီၣ် ၁၂ သီန့ၣ် ယဟိဝၤယွၤ တဲယၤလၢ ၂ “ပှၤကညီဖိခွါဧၢ, ဃၣ်နမဲာ်လၢ အဲၤကူပတူး အစီၤပၤဖၤရိၤအအိၣ် ဒီးတဲဝံအတၢ်စံးပာ်လၢ အထီဒါအီၤ ဒီးအဲၤကူပတူးဒီဘ့ၣ်ညါ န့ၣ်တက့ၢ်.+ ၃ တဲလၢ ‘တၢ်ပၢကစၢ် ယဟိဝၤယွၤတဲဝဲလၢ

“အဲၤကူပတူး အစီၤပၤ ဖၤရိၤဧၢ, ယကဲထီၣ် နဒုၣ်နဒါလံ.+

နမ့ၢ်ပီၣ်လဲၣ် အတၢ်သးသမူဖးဒိၣ် လၢအမံနီၤလၢ ထံကျိနံၤလါ အထံကျိဖိတဖၣ် အပူၤလီၤ.+

 ၄ ယကဘျးနခၣ်လၢ နီၣ်ကွးတဖၣ် ဒီးညၣ်တဖၣ်လၢ အအိၣ်လၢ နထံကျိနံၤလါ အပူၤန့ၣ် ယကဒုးဘုးတာ်အီၤလၢ နသဘျံးအလိၤလီၤ.

ယကထုးထီၣ်နၤလၢ ထံကျိနံၤလါ အပူၤ ဃုာ်ဒီး ညၣ်တဖၣ်လၢ အဘုးတာ်လၢနသဘျံးအလိၤ ခဲလၢာ်လီၤ.

 ၅ ယကပာ်တ့ၢ်နၤ ဒီးနထံကျိနံၤလါအညၣ်တဖၣ် လၢမဲးမုၢ်ခိၣ်လီၤ.

ဒီးနကလီၤဃံၢ်လၢ ပျီပူၤ ဒီးပှၤတလဲၤထၢထီၣ်နၤ ဒီးခူၣ်လီၤနၤ နီတဂၤဘၣ်.+

ယကဒုးကဲထီၣ်နၤလၢ ဆၣ်ဖိကီၢ်ဖိ အမံၤ လၢဟီၣ်ခိၣ်ချၢ ဒီးထိၣ်လၢ မူခိၣ်တဖၣ် အဆၣ်လီၤ.+

 ၆ ဒီးပှၤအဲၤကူပတူးဖိခဲလၢာ် ကသ့ၣ်ညါဘၣ်ဝဲလၢ ယမ့ၢ် ယဟိဝၤယွၤလီၤ.

ပှၤအံၣ်စရ့လးဖိ သန့ၤအသးလၢ ပှၤအဲၤကူပတူးဖိအအိၣ် သနာ်က့ တကဲဘျုးဘၣ်. အဝဲသ့ၣ် လီၤဂာ်ဒ် လီၢ်ဘိတဘိ* လၢပှၤအံၣ်စရ့လးဖိ အဂီၢ်လီၤ.+

၈ “‘တၢ်ပၢကစၢ် ယဟိဝၤယွၤ တဲဝဲလၢ “ယကပျဲလီၤနးတဘ့ၣ်လၢသုအိၣ်+ ဒီးယကကျီကွံာ် ပှၤကညီ ဒီးဆၣ်ဖိကီၢ်ဖိတဖၣ်လီၤ. ၉ ကီၢ်အဲၤကူပတူး ကကဲထီၣ် တၢ်အိၣ်သယုၢ် ဒီးတၢ်ဟးဂူာ်ဟးဂီၤ အလီၢ်လီၤ.+ ဒီးအဝဲသ့ၣ် ကသ့ၣ်ညါဘၣ်ဝဲလၢ ယမ့ၢ်ယဟိဝၤယွၤ, မ့ၢ်လၢန* တဲလၢ ထံကျိနံၤလါန့ၣ် အမ့ၢ်နတၢ် ဒီးနဒုးကဲထီၣ်အီၤလၢ နနီၢ်ကစၢ်အဃိလီၤ.+ ၁၀ အဃိ ယထီဒါနၤ ဒီးနထံကျိနံၤလါလံ. ယကမၤဟးဂီၤကွံာ် ကီၢ်အဲၤကူပတူး ဒီးမၤဃ့ထီကွံာ်အီၤ ဒ်ပှၢ်မုၢ်ကနၢလၢ အအိၣ်သယုၢ်+ စးထီၣ်လၢ မံးကဒိးလး+ တုၤလၢ ဝ့ၢ်စဝ့နၤ+ ဒီးတုၤလီၤလၢ ကီၢ်အဲၤသံအီးပး အကီၢ်ဆၢလီၤ. ၁၁ ပှၤကညီမ့ၢ်ဂ့ၤ, ဆၣ်ဖိကီၢ်ဖိမ့ၢ်ဂ့ၤ တလ့ၢ်လိၤဝဲဖဲန့ၣ်ဘၣ်.+ ဒီးပှၤတအိၣ်ဝဲဖဲန့ၣ်ဘၣ် အနံၣ် ၄၀ လီၤ. ၁၂ ယကမၤဒ်သိး ကီၢ်အဲၤကူပတူး ကကဲထီၣ် ကီၢ်လၢအအိၣ်သယုၢ် ဒိၣ်န့ၢ်ဒံးကီၢ်အဂၤတဖၣ် ဒီးအဝ့ၢ်တဖၣ်န့ၣ် ကကဲထီၣ် ဝ့ၢ်လၢအအိၣ်သယုၢ် ဒိၣ်န့ၢ်ဒံးဝ့ၢ်အဂၤတဖၣ် အနံၣ် ၄၀ လီၤ.+ ဒီးယကမၤလီၤပြံလီၤပြါ ပှၤအဲၤကူပတူးဖိတဖၣ်လၢ ပှၤကလုာ်တဖၣ်အကျါ ဒီးနီလဲၤအဝဲသ့ၣ်လၢ ကီၢ်အဂၤတဖၣ်အပူၤလီၤ.”+

၁၃ “‘တၢ်ပၢကစၢ် ယဟိဝၤယွၤ တဲဝဲလၢ “ဖဲအနံၣ် ၄၀ ဝံၤအလီၢ်ခံ ယကပာ်ဖှိၣ်ထီၣ်က့ၤ ပှၤအဲၤကူပတူးဖိလၢ အလီၤပြံလီၤပြါ လၢပှၤဂၤအကျါလီၤ.+ ၁၄ ပှၤအဲၤကူပတူးဖိလၢ အဘၣ်တၢ်ဖီၣ်န့ၢ်အီၤတဖၣ်န့ၣ် ယကဒုးဟဲက့ၤကဒါက့ၤ အဝဲသ့ၣ်လၢ ပၤသြိၣ်အဟီၣ်ကဝီၤ+ လၢအမ့ၢ် အဝဲသ့ၣ် အထူအထံးအိၣ်ဝဲအလီၢ် ဒီးဖဲန့ၣ် အဝဲသ့ၣ် ကကဲထီၣ် ဘီမုၢ်လၢ အရ့တဒိၣ်ဘၣ်တဘ့ၣ်လီၤ. ၁၅ ကီၢ်အဲၤကူပတူး အပတီၢ်ကဖုၣ်န့ၢ် ဘီမုၢ်အဂၤတဖၣ် ဒီးအဝဲသ့ၣ် တဒိၣ်စိလၢ ပှၤကလုာ်အဂၤတဖၣ် အဖီခိၣ်လၢၤဘၣ်.+ ယကမၤကဲထီၣ် အဝဲသ့ၣ်လၢ ပှၤအဆံး ဒ်သိး အဝဲသ့ၣ်မၤနၢၤ ပှၤကလုာ်အဂၤတဖၣ် သုတန့ၢ်တဂ့ၤအဂီၢ်လီၤ.+ ၁၆ ဒီးကီၢ်အဲၤကူပတူးန့ၣ် တကဲထီၣ် ပှၤအံၣ်စရ့လးဖိ အတၢ်သန့ၤသးအလီၢ်လၢၤဘၣ်.+ ကီၢ်အဲၤကူပတူး ကကဲထီၣ်က့ၤ တၢ်သ့ၣ်နီၣ်တခါလၢ အဒုးသ့ၣ်နီၣ်ထီၣ်က့ၤ ပှၤအံၣ်စရ့လးဖိတဖၣ်လၢ အတၢ်ကမၣ် ခီဖျိလၢ အဃ့တၢ်မၤစၢၤလၢ ပှၤအဲၤကူပတူးဖိတဖၣ် အအိၣ်အဃိလီၤ. ဒီးပှၤအံၣ်စရ့လးဖိတဖၣ်န့ၣ် ကသ့ၣ်ညါဘၣ်လၢ ယမ့ၢ် တၢ်ပၢကစၢ် ယဟိဝၤယွၤလီၤ.”’”

၁၇ ဖဲ ၂၇ နံၣ်တနံၣ် လါအဆိကတၢၢ်တလါ, လါထီၣ်တသီန့ၣ် ယဟိဝၤယွၤ တဲယၤလၢ ၁၈ “ပှၤကညီဖိခွါဧၢ, ဘၤဘူၤလိၣ် အစီၤပၤ နဘူၤကးန့စၢ်+ မၢအသုးမုၢ် မၤတၢ်ဆူၣ်ဆူၣ် ဒ်သိးကဒုး ဝ့ၢ်စိၢ်အဂီၢ်လီၤ.+ အဝဲသ့ၣ်ကိးဂၤဒဲး အခိၣ်သၣ်ဃံ လ့ၤကွံာ်ဝဲ ဒီးအဖံဘၣ်ခိၣ် လီၤဘျိးကွံာ်ဝဲလီၤ. အဝဲဒီး အသုးဖိတဖၣ်န့ၣ် မၤဝဲဝ့ၢ်စိၢ်ဒ်န့ၣ် သနာ်က့ တန့ၢ်ဘၣ် တၢ်အဘူးအလဲ နီတမံၤဘၣ်.

၁၉ “တၢ်ပၢကစၢ် ယဟိဝၤယွၤ တဲဝဲလၢ ‘အဃိ ယကဟ့ၣ်လီၤ ဘၤဘူၤလိၣ် အစီၤပၤ နဘူၤကးန့စၢ် လၢကီၢ်အဲၤကူပတူးလီၤ.+ ဒီးအဝဲ ကက့ၤစိာ်ဝဲ ကီၢ်အဲၤကူပတူး အတၢ်ထူးတၢ်တီၤတဖၣ် ဒီးကဂုာ်န့ၢ်ဆူၣ်တၢ် အါအါဂီၢ်ဂီၢ် ဖဲန့ၣ်လီၤ. ဒီးတၢ်သ့ၣ်တဖၣ်န့ၣ် ကကဲထီၣ် တၢ်အဘူးအလဲလၢ အသုးမုၢ် အဂီၢ်လီၤ.’

၂၀ “တၢ်ပၢကစၢ် ယဟိဝၤယွၤ တဲဝဲလၢ ‘မ့ၢ်လၢ အဝဲလဲၤဒုး ဝ့ၢ်စိၢ်လၢ ယဂီၢ်အဃိ ယကဟ့ၣ်လီၤအီၤ လၢကီၢ်အဲၤကူပတူး ဒ်အဘူးအလဲ အသိးလီၤ.’+

၂၁ “ဖဲန့ၣ်အဆၢကတီၢ် ယကဒုးအိၣ်ထီၣ် တၢ်အနၢၤတဘိလၢ ပှၤအံၣ်စရ့လးဖိ အဂီၢ်လီၤ.*+ ဒီးယကဟ့ၣ်နၤ တၢ်ခွဲးတၢ်ယာ်လၢ နကတဲတၢ်လၢ အဝဲသ့ၣ် အကျါလီၤ. ဒီးအဝဲသ့ၣ် ကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.”

 ၃ မုၢ်နံၤအဝဲန့ၣ် ဘူးထီၣ်လံ. နီၢ်ကီၢ်လီၤ, ယဟိဝၤယွၤ အမုၢ်နံၤန့ၣ် ဘူးထီၣ်လံ.+

အမ့ၢ်ဝဲ တၢ်အၢၣ်ခံးသူ အမုၢ်နံၤ+ ဒီးတၢ်ဆၢကတီၢ်လၢ ပှၤကလုာ်တဖၣ် ကဘၣ်တၢ်စံၣ်ညီၣ်အီၤ အဂီၢ်လီၤ.+

 ၄ နးတဘ့ၣ် ကဟဲထီဒါ ကီၢ်အဲၤကူပတူး ဒီးဖဲပှၤလီၤဃံၢ်သံလၢ ကီၢ်အဲၤကူပတူးအခါ ပှၤအဲၤသံအီးပးဖိတဖၣ် ကပျံၤတၢ်ဖုးတၢ်လီၤ.

အဲၤကူပတူး အတၢ်ထူးတၢ်တီၤတဖၣ် ကဘၣ်တၢ်က့ၤစိာ်အီၤ ဒီးအဲၤကူပတူး ကဘၣ်တၢ်မၤဟးဂီၤကွံာ်အီၤ တုၤလၢ အခီၣ်ထံးလီၤ.+

“‘လၢကီၢ်ပူၤန့ၣ် အဝဲသ့ၣ် ကလီၤဃံၢ်လၢနးအဃိ စးထီၣ်လၢ မံးကဒိးလး+ တုၤလၢ ဝ့ၢ်စဝ့နၤလီၤ.’+ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ. ၇ ‘အဲၤကူပတူး ကကဲထီၣ် ကီၢ်လၢ အအိၣ်သယုၢ် ဒိၣ်ကတၢၢ် ဒီးအဝ့ၢ်တဖၣ် ကကဲထီၣ်ဝ့ၢ်လၢ အဟးဂီၤဒိၣ်ကတၢၢ်လီၤ.+ ၈ ဖဲယဒုးကဲၤထီၣ်မ့ၣ်အူလၢ ကီၢ်အဲၤကူပတူး ဒီးပှၤလၢ အဖီၣ်လိာ်သးစုဒီးအီၤတဖၣ် ဟးဂီၤကွံာ်အခါ အဝဲသ့ၣ် ကသ့ၣ်ညါဘၣ်ဝဲလၢ ယမ့ၢ် ယဟိဝၤယွၤလီၤ. ၉ ဖဲတၢ်တနံၤန့ၣ် ယကဆှၢလီၤ ပှၤစိာ်တၢ်ကစီၣ်ဖိလၢ ကဘီ ဒ်သိး ယကမၤကနိးကစုာ် ပှၤအဲၤသံအီးပးဖိ လၢအနာ်န့ၢ်လီၤအသးတဖၣ် အဂီၢ်လီၤ. တၢ်ပျံၤတၢ်ဖုး ကလီၤဘၣ် ပှၤအဲၤသံအီးပးဖိတဖၣ် ခီဖျိ တၢ်စံၣ်ညီၣ် အမုၢ်နံၤလၢ အကဟဲဘၣ် ကီၢ်အဲၤကူပတူးအဃိလီၤ. တၢ်ကကဲထီၣ်အသးဒ်န့ၣ် နီၢ်ကီၢ်လီၤ.’

၁၀ “တၢ်ပၢကစၢ် ယဟိဝၤယွၤ တဲဝဲလၢ ‘ယကသူ ဘၤဘူၤလိၣ်အစီၤပၤ နဘူၤကးန့စၢ် ဒ်သိး ယကမၤဟးဂီၤကွံာ် အဲၤကူပတူး အပှၤဂီၢ်မုၢ်တဖၣ်လီၤ.+ ၁၁ စီၤပၤနဘူၤကးန့စၢ် ဒီးအသုးတဖၣ် လၢအမ့ၢ် ပှၤလၢ အသူၣ်အၢသးသီ ဒိၣ်ကတၢၢ် တကလုာ်န့ၣ်+ ကဟဲမၤဟးဂီၤ ကီၢ်လီၤ. အဝဲသ့ၣ် ကကျီကွံာ် ပှၤအဲၤကူပတူးဖိလၢနး ဒီးကမၤပှဲၤကီၢ်ဒီး ပှၤသံစိၣ်တဖၣ်လီၤ.+ ၁၂ ဒီးယကဒုးလီၤသံးကွံာ် ထံကျိနံၤလါ အထံကျိၤတဖၣ်+ ဒီးဆါလီၤကွံာ် ကီၢ်အံၤလၢ ပှၤအၢပှၤသီတဖၣ် အစုပူၤလီၤ. ယကသူ ပှၤထံဂၤကီၢ်ဂၤဖိတဖၣ် ဒ်သိး ကမၤသယုၢ်ဝဲ ကီၢ်အံၤဒီး ကယဲၢ်တၢ်အိၣ်လၢအပူၤ ခဲလၢာ်လီၤ.+ ယၤ, ယဟိဝၤယွၤ တဲတၢ်ဝံၤလံ.’

၁၃ “တၢ်ပၢကစၢ် ယဟိဝၤယွၤတဲဝဲလၢ ‘ယကမၤဟးဂီၤကွံာ် တၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်* ဒီးမၤဟးဂီၤကွံာ် ဝ့ၢ်နိဖး အယွၤတဖၣ်လၢ အလုၢ်အပှ့ၤတအိၣ်ဘၣ်လီၤ.+ လၢကီၢ်အဲၤကူပတူး အပူၤန့ၣ် ပှၤအဲၤကူပတူးဖိလၢ အကကဲခိၣ်နၢ်န့ၣ် တအိၣ်နီတဂၤလၢၤဘၣ်. ဒီးယကဒုးလီၤဘၣ် တၢ်ပျံၤတၢ်ဖုးလၢ ကီၢ်အဲၤကူပတူး အပူၤလီၤ.+ ၁၄ ယကမၤအိၣ်သယုၢ် ပၤသြိၣ်အဟီၣ်ကဝီၤ+ ဒီးဒုးလီၤမ့ၣ်အူလၢ ဝ့ၢ်စိၤဧၣ် ဒီးစံၣ်ညီၣ် ဝ့ၢ်နိလီၤ.+ ၁၅ ယကလူလီၤ ယတၢ်သးဒိၣ်လၢ အဲၤကူပတူး အတၢ်အိၣ်သဒၢအလီၢ် လၢအမ့ၢ် ဝ့ၢ်စံၤ အလိၤလီၤ. ဒီးယကမၤဟးဂီၤကွံာ် ဝ့ၢ်နိ အပှၤဂီၢ်မုၢ်တဖၣ်လီၤ. ၁၆ ယကဒုးကဲၤထီၣ်မ့ၣ်အူလၢ ကီၢ်အဲၤကူပတူးအပူၤ ဒီးတၢ်ပျံၤတၢ်ဖုး ကလီၤဘၣ်ဝ့ၢ်စံၤလီၤ. ဒီးပှၤကနုာ်လီၤန့ၢ်ဆူၣ်လၢ ဝ့ၢ်နိအပူၤ ဒီးဝ့ၢ်နိဖးန့ၣ် ပှၤကဒုးအီၤလၢ မုၢ်ဆါခီ အဆၢကတီၢ်လီၤ. ၁၇ ဝ့ၢ်အိၣ် ဒီးဝ့ၢ်ပံၤဘ့စ့း အပှၤပိာ်ခွါသးစၢ်တဖၣ်န့ၣ် ကလီၤဃံၢ်သံလၢ နးအဃိ ဒီးပှၤလၢအအိၣ်လၢ ဝ့ၢ်ပူၤတဖၣ်န့ၣ် ကဘၣ်တၢ်က့ၤဖီၣ်အီၤလီၤ. ၁၈ ဖဲယဘိးကၢ်ကွံာ် အဲၤကူပတူး အနီၣ်ယိးဘိအခါ တၢ်ကခံးလီၤကွံာ် လၢဝ့ၢ်တၤပါန့ၤအပူၤ လၢမုၢ်ဆါခီလီၤ.+ အဲၤကူပတူးလၢ အပာ်ထီၣ်ထီအသးလၢ အစိအကမီၤ အဃိန့ၣ် ကဟးဂီၤကွံာ်+ ဒီးတၢ်အၢၣ်ကအိၣ်ဘၢကွံာ်အီၤ ဒီးပှၤလၢအအိၣ်လၢ အဝ့ၢ်တဖၣ်အပူၤန့ၣ် ကဘၣ်တၢ်က့ၤဖီၣ်အီၤလီၤ.+ ၁၉ ယကစံၣ်ညီၣ် ကီၢ်အဲၤကူပတူး ဒီးအဝဲသ့ၣ် ကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.’”

၂၀ ဖဲ ၁၁ နံၣ်တနံၣ်, လါအဆိကတၢၢ်တလါ, လါထီၣ် နွံသီတသီန့ၣ် ယဟိဝၤယွၤ တဲယၤလၢ ၂၁ “ပှၤကညီဖိခွါဧၢ, ယမၤကၢ် အဲၤကူပတူး အစီၤပၤဖၤရိၤအစုလံ. ဒီးတၢ်တဘိၣ်ဘျါန့ၢ် အစုဘၣ် အဃိ အဘျါက့ၤ တန့ၢ်လၢၤဘၣ် ဒီးတၢ်တဘိၣ်ဘံန့ၢ်အစုလၢ တၢ်ကံးညာ်ဘၣ် အဃိ အဖီၣ်ထီၣ်က့ၤအနး တကဲလၢၤဘၣ်.”

၂၂ “တၢ်ပၢကစၢ် ယဟိဝၤယွၤ တဲဝဲလၢ ‘ယကဲထီၣ် အဲၤကူပတူး အစီၤပၤဖၤရိၤ အဒုၣ်အဒါလံ.+ အစုလၢ အဂံၢ်ဆူၣ်မ့ၢ်ဂ့ၤ, အစုလၢ အကၢ်မ့ၢ်ဂ့ၤ ယကဘိးကၢ်ကွံာ်အီၤလီၤ.+ ဒီးယကမၤလီၤတဲာ်ကွံာ် နးလၢ အအိၣ်လၢ အစုပူၤလီၤ.+ ၂၃ ဒီးယကမၤလီၤပြံလီၤပြါ ပှၤအဲၤကူပတူးဖိတဖၣ်လၢ ပှၤကလုာ်တဖၣ်အကျါ ဒီးနီလဲၤအဝဲသ့ၣ်လၢ ကီၢ်အဂၤတဖၣ်လီၤ.+ ၂၄ ယကမၤဆူၣ်ထီၣ် ဘၤဘူၤလိၣ် အစီၤပၤ အစုခံခီ*+ ဒီးယကပာ်လီၤယနးလၢ အစုပူၤလီၤ.+ မ့မ့ၢ် ဖၤရိၤန့ၣ် ယကမၤကၢ်ကွံာ် အစုခံခီ ဒီးအဝဲ ကကအုဝဲဖးဒိၣ် လၢဘၤဘူၤလိၣ် အစီၤပၤအမဲာ်ညါ ဒ်ပှၤလၢ အဘူးထီၣ်ကသံတဂၤ အသိးလီၤ. ၂၅ ယကမၤဆူၣ်ထီၣ် ဘၤဘူၤလိၣ် အစီၤပၤ အစုခံခီ ဒီးမ့မ့ၢ် ဖၤရိၤအစုန့ၣ် ကလီၤဘျးဝဲလီၤ. ဒီးဖဲယပာ်လီၤယနးလၢ ဘၤဘူၤလိၣ် အစီၤပၤ အစုပူၤအခါ ဒီးဖဲအဝဲ ယၤထီၣ်အနးလၢ ကဒုးကီၢ်အဲၤကူပတူးအခါ ပှၤကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.+ ၂၆ ဒီးယကမၤလီၤပြံလီၤပြါ ပှၤအဲၤကူပတူးဖိတဖၣ်လၢ ပှၤကလုာ်တဖၣ်အကျါ ဒီးနီလဲၤအဝဲသ့ၣ်လၢ ကီၢ်အဂၤတဖၣ်လီၤ.+ ဒီးအဝဲသ့ၣ် ကသ့ၣ်ညါဘၣ်ဝဲလၢ ယမ့ၢ် ယဟိဝၤယွၤလီၤ.’”

 ၃ နလီၤဂာ်ဒီး ပှၤအၤၡူၢ်ဖိတဂၤလၢ အလီၤဂာ်ဒီး လဘၤနိၣ် အသ့ၣ်ဆှိအ့ရ့းလီၤ.

 ၄ ထံတဖၣ် ဒုးဒိၣ်ထီၣ်အီၤ ဒီးထံထီၣ်ပၢၢ်လၢအယိာ် ဒုးထီထီၣ်အီၤလီၤ.

ဒီးထံကျိဖိတဖၣ် အိၣ်ဝးတရံးအီၤဖဲ အဘၣ်တၢ်သူၣ်လီၤအီၤ အလီၢ်လီၤ.

ဒီးသ့ၣ်ထူၣ်တဖၣ် လၢအအိၣ်လၢ တၢ်ပျီပူၤ ခဲလၢာ်န့ၣ် န့ၢ်ဘၣ်ထံလၢ အထံကျိၤတဖၣ် အအိၣ်လီၤ.

 ၅ အဃိသ့ၣ်ဆှိအ့ရ့းတထူၣ်န့ၣ် ထီန့ၢ်ဒံး သ့ၣ်ထူၣ်တဖၣ် လၢအအိၣ်လၢ တၢ်ပျီပူၤခဲလၢာ်လီၤ.

ဒီးပှၤကလုာ်လၢ အဒိၣ်တဖၣ် အိၣ်ဆိးဝဲလၢ အကဒုလာ်လီၤ.

၁၀ “တၢ်ပၢကစၢ် ယဟိဝၤယွၤ တဲဝဲလၢ ‘သ့ၣ်အံၤထီထီၣ်ဒိၣ်မး ဒီးအခိၣ်စိး တုၤလၢ တၢ်အၢၣ် ဒီးအပာ်ထီၣ်ထီအသးလၢ အထီထီၣ်ဝဲအဃိလီၤ. ၁၁ လၢတၢ်န့ၣ်အဃိ ယကဟ့ၣ်လီၤအီၤလၢ ပှၤကလုာ်တဖၣ် အခိၣ်အနၢ်လၢ အစိကမီၤဒိၣ်တဂၤ အစုပူၤလီၤ.+ ဒီးအဝဲကထီဒါသ့ၣ်အံၤ သပှၢ်ကတၢၢ် ဒီးခီဖျိလၢ သ့ၣ်အံၤအတၢ်အၢတၢ်သီအဃိ ယတကနၣ်ဃုာ်အီၤလၢၤဘၣ်. ၁၂ ပှၤထံဂၤကီၢ်ဂၤဖိလၢ အမ့ၢ် ပှၤလၢအသူၣ်အၢသးသီ ဒိၣ်ကတၢၢ် တကလုာ်န့ၣ် ကကူာ်လီၤကွံာ်အီၤ ဒီးကပာ်တ့ၢ်ကွံာ်အီၤလၢ ကစၢၢ်ကလိကျါ ဒီးအလၣ်တဖၣ် ကလီၤဆှုကွံာ်လၢ တၢ်တြီၤတဖၣ်အပူၤ ဒီးအဒ့တဖၣ် ကကၢ်လီၤကွံာ် ဒီးကအိၣ်လၢ ကီၢ်အထံကျိဖိ ခဲလၢာ်အပူၤလီၤ.+ ဒီးပှၤလၢအအိၣ်လၢ ဟီၣ်ခိၣ်ချၢ ခဲလၢာ်န့ၣ် ကဟးထီၣ်လၢ အကဒုလာ် ဒီးကပာ်တ့ၢ်ကွံာ်အီၤလီၤ. ၁၃ ထိၣ်လၢမူခိၣ်ခဲလၢာ် ကဟဲစီၢ်လီၤလၢ အထူၣ်မိၢ်ပှၢ်လၢ အလီၤကူၢ်* အလိၤ ဒီးဆၣ်ဖိကီၢ်ဖိ အမံၤလၢ တၢ်ပျီပူၤခဲလၢာ် ကဟဲအိၣ်လၢ အဒ့အတြၢ်တဖၣ် အလိၤလီၤ.+ ၁၄ တၢ်ကဲထီၣ်သးဒ်အံၤ ဒ်သိး သ့ၣ်လၢအအိၣ်လၢ ထံကျိနံၤတဖၣ် သုတထီတလၢ ဒီးအခိၣ်စိး သုတထီၣ်ထီတုၤလၢ တၢ်အၢၣ်အကျါ နီတထူၣ်တဂ့ၤအဂီၢ် ဒီးဒ်သိး သ့ၣ်လၢအအီဘၣ်ထံဂ့ၤဂ့ၤတဖၣ် သုတထီထီၣ်တုၤလၢ တၢ်အၢၣ်အကျါ တဂ့ၤအဂီၢ်လီၤ. သ့ၣ်တဖၣ်န့ၣ်ခဲလၢာ် ကဘၣ်သံ ဒီးလဲၤလီၤလၢ ဟီၣ်ခိၣ်လာ် ဃုာ်ဒီး ပှၤဟီၣ်ခိၣ်ဖိတဖၣ်လၢ အလဲၤလီၤလၢ တၢ်သွၣ်ခိၣ်လီၤ.’

၁၅ “တၢ်ပၢကစၢ် ယဟိဝၤယွၤ တဲဝဲလၢ ‘ဖဲတၢ်တနံၤလၢ သ့ၣ်ဆှိအ့ရ့းတထူၣ်န့ၣ် လဲၤလီၤလၢ တၢ်သွၣ်ခိၣ်* အပူၤန့ၣ် ယကဒုးအိၣ်ထီၣ် တၢ်သူၣ်အုးသးအုးလီၤ. အဃိ ယကပံးဃာ် ထံလၢအဟဲထီၣ်လၢ ဟီၣ်ခိၣ်လာ် ဒီးမၤပတုာ် အထံကျိဖိတဖၣ် ဒ်သိး ထံအါအါဂီၢ်ဂီၢ် သုတအိၣ်လၢၤတဂ့ၤ အဂီၢ်လီၤ. ယကမၤခံးလီၤ လဘၤနိၣ် အကစၢၢ်ကလိလၢ သ့ၣ်ဆှိအ့ရ့းတထူၣ်န့ၣ် အဃိ ဒီးသ့ၣ်လၢ တၢ်ပျီပူၤတဖၣ်န့ၣ် ကလီၤညွံးလီၤဘဲဝဲ ခဲလၢာ်လီၤ. ၁၆ ဖဲယဆှၢလီၤ သ့ၣ်ဆှိအ့ရ့းတထူၣ်န့ၣ် ဆူတၢ်သွၣ်ခိၣ် အပူၤ တပူၤဃီဒီး ကယဲၢ်ပှၤသံ လၢအအိၣ်ဖဲန့ၣ်တဖၣ်အခါ ယကမၤကနိး ပှၤကလုာ်တဖၣ်လၢ သ့ၣ်တထူၣ်အံၤလီၤကူၢ်အသီၣ် အဃိလီၤ. ဒီးလၢဟီၣ်ခိၣ်လာ်န့ၣ် ဧ့ၤဒ့ၣ်အသ့ၣ်ခဲလၢာ်,+ လဘၤနိၣ် အသ့ၣ်လၢ အဂ့ၤကတၢၢ်တဖၣ် ဒီးကယဲၢ်သ့ၣ်လၢ အအီဘၣ်ထံဂ့ၤဂ့ၤန့ၣ် ကဒိးန့ၢ်ဘၣ် တၢ်သူၣ်မံသးမုာ်လီၤ. ၁၇ သ့ၣ်တဖၣ်န့ၣ် ကလဲၤလီၤဃုာ်ဒီးအီၤ* လၢပှၤလၢ အဘၣ်တၢ်မၤသံအီၤလၢ နးတဖၣ် အအိၣ်လၢ တၢ်သွၣ်ခိၣ်အပူၤလီၤ.+ ဒီးလၢညါပှၤလၢ အအိၣ်မူတ့ၢ်လၢ သ့ၣ်တထူၣ်န့ၣ် အတၢ်ကဒုဖီလာ်လၢ ပှၤကလုာ်တဖၣ်အကျါ ဒီးဆီၣ်ထွဲအီၤန့ၣ် ကအိၣ်တပူၤဃီဒီးအီၤ ဖဲန့ၣ်လီၤ.’+

၁၈ “‘ဧ့ၤဒ့ၣ်အသ့ၣ်ထူၣ်လၢ အလၤကပီၤ ဒီးအတၢ်ကဟုကညီၢ် လီၤဂာ်ဒ်သိးဒီးနၤန့ၣ် အိၣ်တထူၣ်ထူၣ်ဧါ.+ ဘၣ်ဆၣ် နကဘၣ် တၢ်ဆှၢလီၤနၤလၢ ဟီၣ်ခိၣ်လာ်ဃုာ်ဒီး ဧ့ၤဒ့ၣ်အသ့ၣ်ထူၣ်တဖၣ်လီၤ. နကမံနီၤလီၤလၢ ပှၤလၢအတဒိး တၢ်ကူးတရံးဘၣ်တဖၣ် လၢအဘၣ်တၢ်မၤသံအီၤလၢနး အကျါလီၤ. ဖၤရိၤ ဒီးအပှၤဂီၢ်မုၢ် ခဲလၢာ်န့ၣ် တၢ်ကမၤအသးဒီး အဝဲသ့ၣ် ဒ်န့ၣ်လီၤ.’ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.”

နလီၤဂာ်ဒ် တၢ်သးသမူဖးဒိၣ်လၢ ပီၣ်လဲၣ်ပူၤ+ လၢအဆ့ဆိအသး လၢနထံကျိတဖၣ် အပူၤလီၤ.

နမၤဒုထီၣ်ထံလၢနခီၣ် ဒီးနမၤဘၣ်အၢ ထံကျိတဖၣ်လီၤ.’

အဝဲသ့ၣ် ကထုးထီၣ်နၤလၢ ယစၤအပူၤလီၤ.

ဒီးယကမၤ ဒ်သိး ဆၣ်ဖိကီၢ်ဖိအမံၤတဖၣ် ကအီၣ်နၤ တုၤလၢ အသူၣ်တံၤသးတံၤလီၤ.+

 ၇ ‘ဖဲနတုၤလၢ တၢ်ဟးဂီၤအခါ ယကကးဘၢမူခိၣ် ဒီးမၤခံးလီၤ ဆၣ်တဖၣ်လီၤ.

 ၈ ယကမၤခံးလီၤ တၢ်ကပီၤ အဖျၢၣ်တဖၣ် လၢမူခိၣ် ခီဖျိလၢ နဃိလီၤ.

ဒီးယကကးဘၢ နကီၢ်ဒီဘ့ၣ်လၢ တၢ်ခံးသူလီၤ.’ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.

၁၀ ယကဒုးကမၢကမၣ် ပှၤအါဂၤလီၤ.

ဒီးဖဲယဝံၢ်ဝၢ် ယနးလၢ အဝဲသ့ၣ် အစီၤပၤတဖၣ် အမဲာ်ညါအခါ စီၤပၤတဖၣ်အံၤ ကကနိးကစုာ်လၢ တၢ်ပျံၤတၢ်ဖုးအပူၤ လၢနဃိလီၤ.

အဝဲသ့ၣ် ကမၤဟးဂီၤကွံာ် အဲၤကူပတူး အတၢ်ပာ်ထီၣ်ထီသး ဒီးကမၤဟးဂီၤစ့ၢ်ကီး အပှၤဂီၢ်မုၢ်တဖၣ်လီၤ.+

၁၆ အဝဲန့ၣ်မ့ၢ် ထါဟီၣ် ဒီးပှၤဂီၢ်မုၢ်တဖၣ် ကသးဝံၣ်ဝဲ သပှၢ်ကတၢၢ်လီၤ.

ပှၤကလုာ် အပှၤပိာ်မုၣ်တဖၣ်န့ၣ် ကသးဝံၣ်ဝဲ ထါအံၤလီၤ.

အဝဲသ့ၣ် ကသးဝံၣ်ဝဲလၢ အဲၤကူပတူး ဒီးအပှၤဂီၢ်မုၢ်တဖၣ် အဃိလီၤ.’ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.”

၁၇ ဖဲ ၁၂ နံၣ်တနံၣ်, လါထီၣ် ၁၅ သီတသီန့ၣ် ယဟိဝၤယွၤတဲယၤလၢ ၁၈ “ပှၤကညီဖိခွါဧၢ, ဟီၣ်တၢ်ယၢၤတၢ်လၢ အဲၤကူပတူး အပှၤဂီၢ်မုၢ်အဂီၢ် ဒီးတဲလၢ အဝဲသ့ၣ် ဒီးပှၤကလုာ်လၢ အဂံၢ်ဆူၣ်ဘါဆူၣ်တဖၣ် ကလဲၤလီၤလၢဟီၣ်ခိၣ်လာ် ဖဲပှၤသံတ့ၢ်တဖၣ် အိၣ်ဝဲအလီၢ်လီၤ.

၁၉ “‘နဆိမိၣ် နဒိၣ်တၢ်ဂ့ၤန့ၢ် ပှၤဂၤဒံးန့ၣ်. နကသံ ဒီးနကမံနီၤ တပူၤဃီဒီး ပှၤလၢ အတဒိးတၢ်ကူးတရံးတဖၣ်လီၤ.’

၂၀ “‘ပှၤအဲၤကူပတူးဖိတဖၣ်* ကလီၤဃံၢ်သံလၢ ပှၤလၢအသံလၢ နးတဖၣ်အကျါလီၤ.+ ကီၢ်အဲၤကူပတူး* ဘၣ်တၢ်မၤဟးဂီၤအီၤလၢ နးလံ. တွံၢ်ထီၣ်ကွံာ်အီၤ ဃုာ်ဒီးအပှၤဂီၢ်မုၢ်တဖၣ်သၢၤ.

၂၁ “‘အဝဲဒီးအပှၤမၤစၢၤတၢ်တဖၣ်န့ၣ် ပှၤသုးဖိလၢ အဂံၢ်ဆူၣ်ဘါဆူၣ် ကတၢၢ်တဖၣ် ကတဲတၢ်ဒီး အဝဲသ့ၣ် လၢတၢ်သွၣ်ခိၣ်* အပူၤလီၤ. အဝဲသ့ၣ် ကဘၣ်တၢ်မၤသံအီၤလၢနး သပှၢ်ကတၢၢ် ဒီးကဘၣ်သံဝဲ ဒ်ပှၤလၢ အတဒိး တၢ်ကူးတရံးဘၣ် အသိးလီၤ. ၂၂ ကီၢ်အၤၡူၢ် ဒီးအပှၤဂီၢ်မုၢ်ခဲလၢာ်န့ၣ် အိၣ်ဝဲလၢ တၢ်လီၢ်ဖဲန့ၣ်လီၤ. အဝဲသ့ၣ် အတၢ်သွၣ်ခိၣ်န့ၣ် အိၣ်ဝးတရံးအီၤလီၤ.* အဝဲသ့ၣ် မ့ၢ်ပှၤလၢ အလီၤဃံၢ်သံလၢ နးအဃိလီၤ.+ ၂၃ အတၢ်သွၣ်ခိၣ်တဖၣ်န့ၣ် အိၣ်လၢ တၢ်ပူၤယိာ် ဒီးအပှၤဂီၢ်မုၢ်လၢ အသံတဖၣ် အိၣ်ဝးတရံး အတၢ်သွၣ်ခိၣ်လီၤ. မ့ၢ်လၢ ဖဲအဝဲသ့ၣ် အိၣ်မူအခါ အမၤပျံၤမၤဖုး ပှၤဂၤအဃိ အဝဲသ့ၣ်ခဲလၢာ်န့ၣ် ဘၣ်တၢ်မၤသံအီၤလၢ နးလီၤ.

၂၄ “‘ကီၢ်ဧ့ၤလၣ်+ အိၣ်ဝဲဖဲန့ၣ် ဒီးအပှၤဂီၢ်မုၢ်ခဲလၢာ် လၢအသံတဖၣ် အိၣ်ဝးတရံး အတၢ်သွၣ်ခိၣ်လီၤ. အဝဲသ့ၣ်ခဲလၢာ်န့ၣ် သံဝဲလၢ နးအဃိလီၤ. ဒီးအဝဲသ့ၣ် လဲၤလီၤလၢ ဟီၣ်ခိၣ်လာ် ဒ်ပှၤလၢ အတဘၣ် တၢ်ကူးတရံးအီၤဘၣ် အသိးလီၤ. ဖဲအဝဲသ့ၣ် အိၣ်မူဒံးအခါ အမၤပျံၤမၤဖုး ပှၤဂၤလီၤ. ခဲအံၤ အဝဲသ့ၣ်ကတူၢ်ဘၣ် တၢ်မဲာ်ဆှး ဃုာ်ဒီးပှၤလၢ အလဲၤလီၤလၢ တၢ်သွၣ်ခိၣ်လီၤ. ၂၅ ပှၤပာ်လီၤန့ၢ် ကီၢ်ဧ့ၤလၣ် အလီၢ်မံလၢ ပှၤလၢ အဘၣ်တၢ်မၤသံအီၤတဖၣ် အကျါလီၤ. ဒီးအပှၤဂီၢ်မုၢ်လၢ အသံတဖၣ် အိၣ်ဝးတရံး အတၢ်သွၣ်ခိၣ်လီၤ. အဝဲသ့ၣ်တဒိး တၢ်ကူးတရံး နီတဂၤဘၣ် ဒီးဖဲအဝဲသ့ၣ် အိၣ်မူဒံးအခါ အဝဲသ့ၣ် မၤပျံၤမၤဖုး ပှၤဂၤအဃိ အဝဲသ့ၣ် ဘၣ်တၢ်မၤသံအီၤလၢနးလီၤ. ဒီးအဝဲသ့ၣ် ကတူၢ်ဘၣ် တၢ်မဲာ်ဆှး ဃုာ်ဒီးပှၤလၢ အလဲၤလီၤလၢ တၢ်သွၣ်ခိၣ်လီၤ. ကီၢ်ဧ့ၤလၣ် ဘၣ်တၢ်ပာ်လီၤအီၤလၢ ပှၤသံသ့ၣ်တဖၣ် အကျါလံ.

၂၆ “‘ပှၤမ့ၤၡ့းဖိ ဒီးပှၤတူၤဘလးဖိ+ ဒီးအဝဲသ့ၣ် အပှၤဂီၢ်မုၢ်တဖၣ် အိၣ်ဝဲဖဲန့ၣ်လီၤ. အဝဲသ့ၣ်* အတၢ်သွၣ်ခိၣ်တဖၣ် အိၣ်ဝးတရံးအီၤလီၤ.* ပှၤလၢအတဒိး တၢ်ကူးတရံးဘၣ်တဖၣ်အံၤန့ၣ် ဖဲအဝဲသ့ၣ် အိၣ်မူဒံးအခါ အမၤပျံၤမၤဖုး ပှၤဂၤအဃိ အဝဲသ့ၣ် ဘၣ်တၢ်ဆဲးဖျိအီၤလၢ နးလီၤ. ၂၇ အဝဲသ့ၣ် ကဘၣ်တၢ်ပာ်အီၤ တပူၤဃီဒီး ပှၤသုးဖိလၢ အဂံၢ်ဆူၣ်ဘါဆူၣ် လၢအတဒိးတၢ်ကူးတရံးဘၣ် လၢအလီၤဃံၢ်သံဝဲတဖၣ်န့ၣ် တမ့ၢ်ဧီၤ. ပှၤသုးဖိတဖၣ်အံၤ လဲၤလီၤလၢ တၢ်သွၣ်ခိၣ် ဃုာ်ဒီး အတၢ်စုကဝဲၤတဖၣ်လီၤ. ဖဲအဝဲသ့ၣ် အိၣ်မူဒံးအခါ အမၤပျံၤမၤဖုး ပှၤဂၤအဃိ ပှၤကပာ်လီၤ အဝဲသ့ၣ်အနးတဖၣ် လၢအဝဲသ့ၣ်အခိၣ်သၣ်ဃံအဖီလာ်* ဒီးခီဖျိလၢ အတၢ်ကမၣ်အဃိ အဃံတဖၣ်ဒၣ်လဲာ် ကတူၢ်ဘၣ် တၢ်စံၣ်ညီၣ်လီၤ. ၂၈ မ့မ့ၢ်နၤ* န့ၣ် နကဘၣ်တၢ်မၤဟးဂီၤကွံာ်နၤ လၢပှၤလၢအတဒိး တၢ်ကူးတရံးဘၣ်တဖၣ် အကျါလီၤ. ဒီးတၢ်ကပာ်နၤ တပူၤဃီဒီး ပှၤလၢအသံလၢ နးတဖၣ်အံၤလီၤ.

၂၉ “‘ကီၢ်အဒိၣ်+ အိၣ်ဝဲဖဲန့ၣ်စ့ၢ်ကီးလီၤ. ဒီးအစီၤပၤတဖၣ် ဒီးအခိၣ်အနၢ်ခဲလၢာ်န့ၣ် မ့ၢ်ပှၤလၢ အဂံၢ်ဆူၣ်ဘါဆူၣ် ဘၣ်ဆၣ် အဝဲသ့ၣ် မံနီၤဝဲလၢ ပှၤလၢအဘၣ်တၢ်မၤသံအီၤလၢ နးတဖၣ်အကျါလီၤ. အဝဲသ့ၣ်စ့ၢ်ကီး ကမံနီၤ တပူၤဃီဒီး ပှၤလၢအတဒိးတၢ်ကူးတရံးဘၣ်+ ဒီးပှၤလၢအလဲၤလီၤလၢ တၢ်သွၣ်ခိၣ်အပူၤတဖၣ် အကျါလီၤ.

၃၀ “‘ကလံၤစိး အပဒိၣ်ခဲလၢာ် ဒီးပှၤစံဒိၣ်ဖိခဲလၢာ်န့ၣ်+ အိၣ်ဝဲဖဲန့ၣ်လီၤ. ဖဲအဝဲသ့ၣ် အိၣ်မူဒံးအခါ အဝဲသ့ၣ် မ့ၢ်ပှၤလၢ အဂံၢ်ဆူၣ်ဘါဆူၣ် ဒီးအမၤပျံၤမၤဖုးပှၤဂၤ ဘၣ်ဆၣ် အဝဲသ့ၣ် လဲၤလီၤဝဲလၢ ပှၤသံတဖၣ်အအိၣ် လၢတၢ်မဲာ်ဆှး အပူၤလီၤ. ပှၤလၢအတဒိး တၢ်ကူးတရံးဘၣ်တဖၣ်အံၤန့ၣ် ကမံနီၤ တပူၤဃီဒီး ပှၤလၢအဘၣ်တၢ်မၤသံအီၤလၢ နးလီၤ. ဒီးအဝဲသ့ၣ် ကတူၢ်ဘၣ် တၢ်မဲာ်ဆှး ဃုာ်ဒီးပှၤလၢ အလဲၤလီၤလၢ တၢ်သွၣ်ခိၣ်လီၤ.

၃၁ “‘ဖဲဖၤရိၤ ထံၣ်ဘၣ်ဝဲ ပှၤတဖၣ်န့ၣ် ခဲလၢာ်အခါ ဘၣ်ဃးဒီး တၢ်ကဲထီၣ်အသးဒီး အပှၤဂီၢ်မုၢ်န့ၣ် အသးကမုာ်ထီၣ်က့ၤလီၤ.+ ဖၤရိၤ ဒီးအသုးမုၢ်ခဲလၢာ်န့ၣ် ကဘၣ်သံလၢ နးအဃိလီၤ.’ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.

၃၂ “တၢ်ပၢကစၢ် ယဟိဝၤယွၤ တဲဝဲလၢ ‘ဖဲဖၤရိၤ အိၣ်မူဒံးအခါ အဝဲမၤပျံၤမၤဖုး ပှၤဂၤအဃိ ဖၤရိၤ ဒီးအပှၤဂီၢ်မုၢ်ခဲလၢာ် ကဘၣ်တၢ်ပာ်လီၤအီၤ တပူၤဃီဒီး ပှၤလၢအတဒိးတၢ်ကူးတရံး လၢအဘၣ်တၢ်မၤသံအီၤလၢ နးတဖၣ် အကျါလီၤ.’”

၃၃ ကစၢ်ယဟိဝၤယွၤ တဲယၤလၢ ၂ “ပှၤကညီဖိခွါဧၢ, တဲတၢ်ဒီး နပှၤကလုာ်+ ဒီးတဲအဝဲသ့ၣ်လၢ

“‘အဒိ ယကပျၢ်လီၤနးတဘ့ၣ်လၢ ကီၢ်တဘ့ၣ်အပူၤလီၤ.+ အဃိ ကီၢ်တဘ့ၣ်န့ၣ် အပှၤဂီၢ်မုၢ်တဖၣ် ကဃုထၢထီၣ် ပှၤတဂၤ ဒ်အဝဲသ့ၣ် အပှၤခိးကွၢ်တၢ်ဖိ အသိးလီၤ. ၃ ဖဲပှၤခိးကွၢ်တၢ်ဖိတဂၤန့ၣ် ထံၣ်ဝဲ နးတဘ့ၣ်န့ၣ် ဟဲလီၤလၢ ကီၢ်ပူၤအခါ အဝဲကအူထီၣ်ကွဲၤ ဒီးဟ့ၣ်ပလီၢ် ပှၤဂီၢ်မုၢ်တဖၣ်လီၤ.+ ၄ ပှၤတဂၤဂၤ မ့ၢ်နၢ်ဟူ ကွဲၤအသီၣ် ဘၣ်ဆၣ် အမ့ၢ်တကနၣ်ဃုာ် တၢ်ဟ့ၣ်ပလီၢ်ဘၣ်+ ဒီးနးတဘ့ၣ်န့ၣ် မ့ၢ်မၤသံအီၤန့ၣ် အဝဲအသွံၣ်ကလီၤတီလၢ အနီၢ်ကစၢ် အခိၣ်လိၤလီၤ.+ ၅ အဝဲနၢ်ဟူ ကွဲၤအသီၣ် ဘၣ်ဆၣ် တကနၣ်ဃုာ် တၢ်ဟ့ၣ်ပလီၢ်ဘၣ် အဃိ အသွံၣ်ကလီၤတီလၢ အနီၢ်ကစၢ် အခိၣ်လိၤလီၤ. အဝဲမ့ၢ်ဒိကနၣ် တၢ်ဟ့ၣ်ပလီၢ်န့ၣ် အသးသမူ ကပူၤဖျဲးလီၤ.

၆ “‘ဘၣ်ဆၣ် ပှၤခိးကွၢ်တၢ်ဖိတဂၤ မ့ၢ်ထံၣ်ဝဲ နးတဘ့ၣ်န့ၣ် ဟဲဒီး အဝဲမ့ၢ်တအူသီၣ်ကွဲၤဘၣ်+ ဒီးပှၤဂီၢ်မုၢ်တဖၣ် မ့ၢ်တဒိးန့ၢ်ဘၣ် တၢ်ဟ့ၣ်ပလီၢ်ဘၣ် ဒီးနးတဘ့ၣ်န့ၣ် မ့ၢ်မၤသံ အဝဲသ့ၣ် တဂၤဂၤန့ၣ် ပှၤတဂၤန့ၣ် ကသံဝဲလၢ အနီၢ်ကစၢ်အတၢ်ကမၣ် အဃိလီၤ. ဘၣ်ဆၣ် ယကဃ့က့ၤအသွံၣ် လၢပှၤခိးကွၢ်တၢ်ဖိ အအိၣ်လီၤ.’*+

၇ “ပှၤကညီဖိခွါဧၢ, ယဃုထၢထီၣ်နၤလၢ ပှၤခိးကွၢ်တၢ်ဖိလၢ ပှၤအံၣ်စရ့လးဖိတဖၣ် အဂီၢ်လီၤ. ဖဲနနၢ်ဟူ ယတၢ်ကတိၤတဖၣ်အခါ နကဘၣ် ဟ့ၣ်ပလီၢ် အဝဲသ့ၣ် လၢယဂီၢ်လီၤ.+ ၈ ယမ့ၢ်တဲ ပှၤအၢပှၤသီတဂၤလၢ ‘ပှၤအၢပှၤသီဧၢ, နကသံသပှၢ်ကတၢၢ်’+ ဒီးနမ့ၢ်တတဲပလီၢ် ပှၤအၢပှၤသီတဂၤန့ၣ် ဒ်သိးအကဆီတလဲအသးဘၣ်န့ၣ် အဝဲကသံဝဲလၢ အတၢ်ကမၣ်အဃိ+ ဒ်ပှၤအၢပှၤသီတဂၤအသိးလီၤ. ဘၣ်ဆၣ် ယကဃ့က့ၤအသွံၣ် လၢနအိၣ်လီၤ. ၉ ဘၣ်ဆၣ် နမ့ၢ်ဟ့ၣ်ပလီၢ် ပှၤအၢပှၤသီတဂၤ လၢကပာ်တ့ၢ်ကွံာ် အကျဲအၢကျဲသီ သနာ်က့ အဝဲ မ့ၢ်တဆီတလဲအသးဘၣ်န့ၣ် အကဘၣ်သံဝဲလၢ အတၢ်ကမၣ်အဃိလီၤ.+ ဒီးမ့မ့ၢ်နၤန့ၣ် နသးသမူ ကပူၤဖျဲး သပှၢ်ကတၢၢ်လီၤ.+

၁၀ “ပှၤကညီဖိခွါဧၢ, တဲဘၣ် ပှၤအံၣ်စရ့လးဖိတဖၣ်လၢ ‘သုတဲလၢ “ပထီဒါက့ၤတၢ် အဘျီအါမး ဒီးပတၢ်ဒဲးဘး အိၣ်ဃၢလၢပလိၤအဃိ ပလီၤဃိလီၤဃဲၤလံ.+ အဃိ ပဆဲးအိၣ်မူဘၣ် ကသ့ဒ်လဲၣ်.”’+ ၁၁ တဲအဝဲသ့ၣ်လၢ ‘တၢ်ပၢကစၢ် ယဟိဝၤယွၤ တဲဝဲလၢ “ဒ်ယမ့ၢ်ပှၤလၢ အမူဝဲ သပှၢ်တၢၢ်အသိး ယအၢၣ်လီၤလၢ ယတဘၣ်သူၣ်ဘၣ်သးလၢ ပှၤအၢပှၤသီတဖၣ် ကသံဘၣ်.+ လၢတၢ်န့ၣ်အလီၢ် ယအဲၣ်ဒိးလၢ ပှၤအၢပှၤသီတဖၣ် ကဆီတလဲအသး+ ဒီးဆဲးအိၣ်မူဘၣ်လီၤ.+ ပှၤအံၣ်စရ့လးဖိသ့ၣ်ဧၢ, မၤတၢ်အၢတၢ်သီလၢၤတဂ့ၤ, မၤလၢၤတဂ့ၤ.+ မ့တမ့ၢ်ဘၣ်န့ၣ် သုကသံလီၤ.”’+

၁၂ “ပှၤကညီဖိခွါဧၢ, တဲဘၣ်နပှၤကလုာ်လၢ ‘ပှၤတီပှၤလိၤတဂၤ မ့ၢ်ထီဒါတၢ်န့ၣ် အတၢ်တီတၢ်လိၤ လၢအပူၤကွံာ်တဖၣ် မၤပူၤဖျဲးအီၤတန့ၢ်ဘၣ်.+ ပှၤအၢပှၤသီတဂၤ မ့ၢ်တမၤ တၢ်အၢတၢ်သီလၢၤဘၣ်န့ၣ် အတၢ်အၢတၢ်သီ လၢအပူၤကွံာ်တဖၣ် မၤလီၤဃံၢ်အီၤ တန့ၢ်ဘၣ်.+ ဖဲပှၤတီပှၤလိၤတဂၤ မၤတၢ်ဒဲးဘး အမုၢ်နံၤန့ၣ် အတၢ်တီတၢ်လိၤ လၢအပူၤကွံာ်တဖၣ် မၤပူၤဖျဲး အသးသမူ တန့ၢ်လၢၤဘၣ်.+ ၁၃ ယမ့ၢ်တဲ ပှၤတီပှၤလိၤတဂၤလၢ “နကဆဲးအိၣ်မူဘၣ် သပှၢ်ကတၢၢ်” ဘၣ်ဆၣ် အဝဲ မ့ၢ်နာ်လၢ တၢ်တီတၢ်လိၤလၢ အမၤတ့ၢ်ဝဲ လၢညါတဖၣ် ကမၤပူၤဖျဲးအီၤ+ ဒီးမ့ၢ်မၤဝဲ တၢ်ကမၣ်န့ၣ် ယတသ့ၣ်နီၣ်ထီၣ် တၢ်တီတၢ်လိၤလၢ အမၤတ့ၢ်ဝဲ လၢညါတဖၣ်လၢၤဘၣ်. ဒီးအဝဲ ကဘၣ်သံဝဲလၢ တၢ်ကမၣ်လၢ အမၤဝဲ အဃိလီၤ.+

၁၄ “‘ယမ့ၢ်တဲ ပှၤအၢပှၤသီတဂၤလၢ ‘ပှၤအၢပှၤသီဧၢ, နကသံသပှၢ်ကတၢၢ်’ ဒီးအဝဲ မ့ၢ်တမၤ တၢ်ဒဲးဘးလၢၤဘၣ် ဒီးမ့ၢ်မၤတၢ်တီတီလိၤလိၤ ဒီးမၤတၢ်လၢအဘၣ်,+ ၁၅ ဒီးအဝဲ မ့ၢ်ဟ့ၣ်က့ၤ တၢ်လၢပှၤပီၣ်လီၤအီၤ+ ဒီးမ့ၢ်ဟ့ၣ်က့ၤ တၢ်လၢအတမျာ်န့ၢ်ဝဲ+ ဒီးမ့ၢ်လဲၤတၢ်ဒ် တၢ်ဘျၢလၢ အကဟ့ၣ်ပှၤ တၢ်မူအသိး ဒီးမ့ၢ်တမၤ တၢ်ကမၣ်လၢၤဘၣ်န့ၣ် အဝဲ ကဆဲးအိၣ်မူဘၣ်ဝဲ သပှၢ်ကတၢၢ်လီၤ.+ ဒီးအဝဲ တသံဘၣ်ဝဲဘၣ်. ၁၆ ယတစံၣ်ညီၣ်အီၤ* လၢတၢ်ကမၣ်လၢ အမၤတ့ၢ်ဝဲတဖၣ် အဃိဘၣ်.+ ခီဖျိလၢ အမၤတၢ်တီတီလိၤလိၤ ဒီးမၤတၢ်လၢအဘၣ် အဃိ အဝဲကဆဲးအိၣ်မူဘၣ်ဝဲ သပှၢ်ကတၢၢ်လီၤ.’+

၁၇ “နပှၤကလုာ်န့ၣ် တဲဝဲလၢ ‘ယဟိဝၤယွၤ တမၤတၢ် တီတီလိၤလိၤဘၣ်.’ ဘၣ်ဆၣ် ပှၤလၢအမၤတၢ် တတီတလိၤဘၣ်န့ၣ် လၢအဝဲသ့ၣ်ဟီ.

၁၈ “ပှၤတီပှၤလိၤတဂၤ မ့ၢ်တမၤတၢ် တီတီလိၤလိၤလၢၤဘၣ် ဒီးမ့ၢ်မၤ တၢ်ကမၣ်န့ၣ် အဝဲကသံဝဲလီၤ.+ ၁၉ ဒီးပှၤအၢပှၤသီတဂၤ မ့ၢ်တမၤ တၢ်အၢတၢ်သီလၢၤဘၣ် ဒီးမ့ၢ်မၤတၢ်တီတီလိၤလိၤ ဒီးမၤတၢ်လၢအဘၣ်န့ၣ် အဝဲကဆဲးအိၣ်မူဘၣ် ခီဖျိလၢ အမၤဝဲဒ်န့ၣ် အဃိလီၤ.+

၂၀ “ဘၣ်ဆၣ် သုတဲလၢ ‘ယဟိဝၤယွၤ တမၤတၢ် တီတီလိၤလိၤဘၣ်.’+ အိ ပှၤအံၣ်စရ့လးဖိသ့ၣ်ဧၢ, ယကစံၣ်ညီၣ် သုဝဲတဂၤစုာ်စုာ် ဒ်တၢ်လၢ သုမၤအီၤအသိးလီၤ.”

၂၁ ဖဲပဘၣ်တၢ်က့ၤဖီၣ်ပှၤ ပှဲၤထီၣ် ၁၂ နံၣ်တနံၣ်, တဆံလါတလါ, လါထီၣ် ယဲၢ်သီတသီန့ၣ် ပှၤလၢအပူၤဖျဲးထီၣ် လၢဝ့ၢ်ယရူၤၡလ့ၣ်တဂၤ ဟဲတဲဘၣ်ယၤလၢ+ “ဝ့ၢ်လီၤပှီၢ်လံ.”+

၂၂ တချုးဖဲပှၤတဂၤန့ၣ် ဟဲလၢယအိၣ်ဒံးဘၣ် အဟါန့ၣ် ယဟိဝၤယွၤ အစိအကမီၤ လီၤဘၣ်ယၤ ဒီးအိးထီၣ်က့ၤ ယကိာ်ပူၤလီၤ. အဃိ လၢဂီၤခီ ဖဲပှၤတဂၤန့ၣ် ဟဲတုၤလၢယအိၣ်အခါ ယတဲတၢ် သ့ထီၣ်က့ၤလီၤ.+

၂၃ ဒီးကစၢ်ယဟိဝၤယွၤ တဲယၤလၢ ၂၄ “ပှၤကညီဖိခွါဧၢ, ဘၣ်ဃးဒီး ကီၢ်အံၣ်စရ့လးန့ၣ် ပှၤလၢအအိၣ်လၢ ဝ့ၢ်လၢအဟးဂီၤတဖၣ်န့ၣ်+ တဲဝဲလၢ ‘စီၤအၤဘြၤဟၣ်န့ၣ် အိၣ်ဒၣ်တဂၤလီၤ. ဘၣ်ဆၣ် အဝဲမၤန့ၢ်ဝဲ ကီၢ်တဘ့ၣ်လီၤ.+ မ့မ့ၢ်ပဝဲန့ၣ် ပအိၣ်ဒီဒူၣ်အဃိ ကီၢ်အံၤကဲပတၢ် သပှၢ်ကတၢၢ်လီၤ.’

၂၅ “လၢတၢ်န့ၣ်အဃိ တဲအဝဲသ့ၣ်လၢ ‘တၢ်ပၢကစၢ် ယဟိဝၤယွၤ တဲဝဲလၢ “သုအီၣ်တၢ်ညၣ်လၢ အပၣ်ဃုာ်ဒီးတၢ်သွံၣ်+ ဒီးသုသန့ၤသုသးလၢ သုတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်* ဒီးသုမၤသံမၤဝီတၢ် ထီဘိလီၤ.+ အဃိ ကီၢ်အံၤ ကဲသုတၢ် ကသ့ဒ်လဲၣ်. ၂၆ သုသန့ၤသုသးလၢ သုနး+ ဒီးသုမၤ လုၢ်လၢ်သကဲာ်ပဝးလၢ အအၢအသီ ဒီးသုဝဲကိးဂၤဒဲးန့ၣ် သုမံဃုာ်ဒီး ပှၤဂၤအမါလီၤ.+ အဃိ ကီၢ်အံၤ ကဲသုတၢ် ကသ့ဒ်လဲၣ်.”’+

၂၇ “နကဘၣ်တဲ အဝဲသ့ၣ်လၢ ‘တၢ်ပၢကစၢ် ယဟိဝၤယွၤ တဲဝဲလၢ “ဒ်ယမ့ၢ်ပှၤလၢ အမူဝဲ သပှၢ်တၢၢ်အသိး ယအၢၣ်လီၤလၢ ပှၤလၢအအိၣ်လၢ ဝ့ၢ်လၢအဟးဂူာ်ဟးဂီၤတဖၣ် အပူၤန့ၣ် ကဘၣ် လီၤဃံၢ်သံလၢ နးအဃိ ဒီးပှၤလၢ အအိၣ်လၢ ပျီပူၤတဖၣ်န့ၣ် ယကဒုးကဲထီၣ် အဝဲသ့ၣ်လၢ ဆၣ်ဖိကီၢ်ဖိ လၢအအၢတဖၣ် အဆၣ်လီၤ. ဒီးပှၤလၢ အအိၣ်လၢ တၢ်အိၣ်သဒၢအလီၢ် ဒီးလ့ကအိတဖၣ်အပူၤန့ၣ် ကဘၣ်သံလၢ တၢ်ဆူးတၢ်ဆါအဃိလီၤ.+ ၂၈ ယကမၤကဲထီၣ် ကီၢ်လၢ ပှၢ်မုၢ်ကနၢလၢ အအိၣ်သယုၢ် လၢာ်လၢာ်ဆ့ဆ့+ ဒီးအတၢ်ပာ်ထီၣ်ထီသး ဒီးအတၢ်ပာ်ကဖၢလၢအသးန့ၣ် ကကတၢၢ်ကွံာ်ဝဲ ဒီးအံၣ်စရ့လး အကစၢၢ်တဖၣ် ကအိၣ်သယုၢ်+ ဒီးပှၤတလ့ၢ်လိၤဖဲန့ၣ် နီတဂၤဘၣ်. ၂၉ ခီဖျိလၢ တၢ်လီၤသးဘၣ်အၢလၢ အဝဲသ့ၣ် မၤဝဲတဖၣ်အဃိ+ ယကမၤကဲထီၣ် ကီၢ်ဒ် ပှၢ်မုၢ်ကနၢလၢ အအိၣ်သယုၢ် လၢာ်လၢာ်ဆ့ဆ့လီၤ.+ ဖဲန့ၣ်အခါ အဝဲသ့ၣ် ကသ့ၣ်ညါဘၣ်ဝဲလၢ ယမ့ၢ် ယဟိဝၤယွၤလီၤ.”’

၃၀ “ပှၤကညီဖိခွါဧၢ, နပှၤကလုာ် တဲနဂ့ၢ်လၢ တၢ်ဒူၣ်ကပၤ ဒီးလၢဟံၣ်တြဲၤတဖၣ် အဃၢၤလီၤ.+ အဝဲသ့ၣ် တဲလိာ်အသး တဂၤဒီးတဂၤ ဒီးတဲအဒီပုၢ်ဝဲၢ်လၢ ‘ဟဲမီၤ, ပကလဲၤကနၣ် တၢ်ကတိၤလၢ အဟဲလၢ ယဟိဝၤယွၤအအိၣ်လီၤ.’ ၃၁ ဒီးအဝဲသ့ၣ် ကဟဲပာ်ဖှိၣ်ထီၣ်အသး ဒီးဆ့ၣ်နီၤလၢ နမဲာ်ညါ ဒ်ယပှၤဂီၢ်မုၢ် တဖုအသိးလီၤ. အဝဲသ့ၣ် ကကနၣ် တၢ်လၢနတဲ ဘၣ်ဆၣ် အဝဲသ့ၣ် တမၤထွဲဝဲဘၣ်.+ အဝဲသ့ၣ် ကတဲမုာ်နနၢ်* ဘၣ်ဆၣ် အဝဲသ့ၣ် အသးန့ၣ် ပှဲၤဝဲဒီး တၢ်သးကွံလၢ ကန့ၢ်ဘၣ်တၢ်လၢ အနီၢ်ကစၢ် အဂီၢ်လီၤ. ၃၂ အဝဲသ့ၣ် ပာ်နၤ ဒ်သိးဒီး တၢ်အဲၣ်တၢ်သးဝံၣ်တယုၢ်လၢ ပှၤလၢအဒ့တၢ်သ့တဂၤ ဒ့ဝဲဒီးတၢ်ဒ့တၢ်အူ ဒီးသးဝံၣ်ဝဲလၢ အကလုၢ်မုာ်မုာ် အသိးလီၤ. အဝဲသ့ၣ် ကနၢ်ဟူ တၢ်လၢနကတဲ ဘၣ်ဆၣ် အဝဲသ့ၣ် တမၤထွဲဝဲ နီတဂၤဘၣ်. ၃၃ တၢ်ကတိၤတဖၣ်အံၤ ကဟဲလၢထီၣ်ပှဲၤထီၣ်ဝဲလီၤ. ဖဲအဟဲလၢထီၣ်ပှဲၤထီၣ်အခါ အဝဲသ့ၣ် ကသ့ၣ်ညါဘၣ်ဝဲလၢ လၢညါန့ၣ် ဝံတဂၤ အိၣ်ဝဲလၢ အဝဲသ့ၣ် အကျါလီၤ.”+

၃၄ ကစၢ်ယဟိဝၤယွၤ တဲယၤလၢ ၂ “ပှၤကညီဖိခွါဧၢ, တဲဝံအတၢ်စံးပာ်လၢ အဘၣ်ဃးဒီး အံၣ်စရ့လး အပှၤကွၢ်သိတဖၣ် တက့ၢ်. တဲဝံအတၢ်စံးပာ် ဒီးတဲအဝဲသ့ၣ်လၢ ‘တၢ်ပၢကစၢ် ယဟိဝၤယွၤ တဲဝဲလၢ “အံၣ်စရ့လး အပှၤကွၢ်သိတဖၣ်န့ၣ် ကဘၣ်နးဘၣ်ဖှီၣ်လီၤ.+ အဝဲသ့ၣ် လုၢ်အီၣ်လုၢ်အီလီၤထဲအနီၢ်ကစၢ်အသးလီၤ. တၢ်လၢပှၤကွၢ်သိန့ၣ် ကဘၣ်ဒုးအီၣ် အသိတဖၣ်အဆၣ် တမ့ၢ်ဧီၤ.+ ၃ သုမၤသံ ဆၣ်ဖိကီၢ်ဖိလၢ အဘီၣ်ကတၢၢ်+ ဒီးသုအီၣ်အသိ ဒီးသုကူသုကၤ သိဆူၣ် ဘၣ်ဆၣ် သုတဒုးအီၣ် သိတဖၣ် အဆၣ်ဘၣ်.+ ၄ ဒီးသိလၢ အဂံၢ်စၢ်ဘါစၢ်တဖၣ်န့ၣ် သုတမၤဆူၣ်ထီၣ်က့ၤ အဂံၢ်အဘါဘၣ် ဒီးသိလၢ အဆိးက့န့ၣ် သုတမၤဘျါအီၤဘၣ်. ဒီးသိလၢ အဘၣ်ဒိဘၣ်ထံးန့ၣ် သုတဘိၣ်ထီၣ်န့ၢ် အတၢ်ပူၤလီၢ်ဘၣ်. ဒီးသုတဟဲက့ၤကိး သိလၢ အဟးဖျိးဘၣ်.+ ဒီးသုတဃုက့ၤစ့ၢ်ကီး သိလၢ အလီၤမၢ်ဘၣ်. လၢတၢ်န့ၣ်အလီၢ် သုပၢဆူၣ် အဝဲသ့ၣ်, မၤနၢၤအီၣ်ဃီၣ် အဝဲသ့ၣ် ဒီးသုတအိၣ်ဒီး တၢ်သးကညီၤဘၣ်.+ ၅ မ့ၢ်လၢ ပှၤကွၢ်သိ တအိၣ်ဘၣ် အဃိ အဝဲသ့ၣ် လီၤပြံလီၤပြါဝဲလီၤ.+ အဃိ အဝဲသ့ၣ်ကဲထီၣ် ဆၣ်ဖိကီၢ်ဖိလၢ အအၢတဖၣ် အဆၣ်လီၤ. ၆ ယသိတဖၣ် လီၤပြံလီၤပြါလၢ ကစၢၢ်ကိးဖျၢၣ်ဒဲးအလိၤ ဒီးလၢတၢ်လူၢ်တဖၣ် အကျါလီၤ. ဒီးယသိတဖၣ်န့ၣ် လီၤပြံလီၤပြါလၢ ဟီၣ်ခိၣ်ဒီဘ့ၣ်လီၤ. ပှၤလၢအဃုကွၢ် အဝဲသ့ၣ် ဒီးလူၤဃု အဝဲသ့ၣ်န့ၣ် တအိၣ်နီတဂၤဘၣ်.

၇ “‘“အဃိ ပှၤကွၢ်သိသ့ၣ်ဧၢ, ကနၣ်တၢ်လၢ ယဟိဝၤယွၤ ကတဲဝဲသၢၤ. ၈ ‘တၢ်ပၢကစၢ် ယဟိဝၤယွၤ တဲဝဲလၢ “ဒ်ယမ့ၢ်ပှၤလၢ အမူဝဲ သပှၢ်တၢၢ်အသိး ယအၢၣ်လီၤလၢ မ့ၢ်လၢ ပှၤကွၢ်သိ တအိၣ်ဘၣ်အဃိ ယသိတဖၣ် ဘၣ်တၢ်အ့ၣ်ဖှီအီၤ ဒီးကဲထီၣ်ဝဲ ဆၣ်ဖိကီၢ်ဖိ လၢအအၢတဖၣ်န့ၣ် အဆၣ်လီၤ. ယပှၤကွၢ်သိတဖၣ်န့ၣ် တဟးဃုဝဲ ယသိတဖၣ်ဘၣ်. လၢအဝဲသ့ၣ် ကဒုးအီၣ်ဒုးအီ ယသိတဖၣ်အလီၢ်န့ၣ် အဝဲသ့ၣ် လုၢ်အီၣ်လုၢ်အီလီၤထဲ အနီၢ်ကစၢ်အသးလီၤ.”’ ၉ အဃိ ပှၤကွၢ်သိသ့ၣ်ဧၢ, ကနၣ်ယဟိဝၤယွၤ အတၢ်ကတိၤတက့ၢ်. ၁၀ တၢ်ပၢကစၢ် ယဟိဝၤယွၤ တဲဝဲလၢ ‘ယကသိၣ်ဃီၣ် ပှၤကွၢ်သိတဖၣ်လီၤ. ယကၡဲစရီဒီး ပှၤကွၢ်သိတဖၣ် ခီဖျိ တၢ်လၢအမၤဝဲ ယသိတဖၣ်အဃိလီၤ.* ဒီးယတပျဲလၢ အဝဲသ့ၣ် ဒုးအီၣ်ဒုးအီ ယသိလၢၤဘၣ်.+ ဒီးပှၤကွၢ်သိတဖၣ်န့ၣ် တလုၢ်အီၣ်လုၢ်အီလီၤဘၣ် အနီၢ်ကစၢ်အသးလၢၤဘၣ်. ယကမၤပူၤဖျဲး ယသိတဖၣ် လၢပှၤကွၢ်သိတဖၣ် အကိာ်ပူၤ ဒီးအဝဲသ့ၣ် တကဲဘၣ် ပှၤကွၢ်သိတဖၣ် အတၢ်အီၣ်လၢၤဘၣ်.’”

၁၁ “‘တၢ်ပၢကစၢ် ယဟိဝၤယွၤ တဲဝဲလၢ “ကွၢ်လၢအံၤ, ယကဟးဃုယသိ လၢယနီၢ်ကစၢ် ဒီးယကကွၢ်ထွဲ အဝဲသ့ၣ်လီၤ.+ ၁၂ ယကကွၢ်ထွဲ ယသိတဖၣ် ဒ်ပှၤကွၢ်သိလၢ အထံၣ်န့ၢ်က့ၤ အသိလၢ အလီၤပြံလီၤပြါ ဒီးဒုးအီၣ်ဝဲအဆၣ် အသိးလီၤ.+ အဝဲသ့ၣ် လီၤပြံလီၤပြါလၢ တၢ်အၢၣ်ဒီးတၢ်ခံးသူ အနံၤ ဘၣ်ဆၣ် ယကမၤပူၤဖျဲး အဝဲသ့ၣ် ဖဲတၢ်လီၢ်လၢ အဝဲသ့ၣ် လီၤပြံလီၤပြါဝဲ အလီၢ်လီၤ.+ ၁၃ ယကကိးထီၣ်က့ၤ အဝဲသ့ၣ် လၢပှၤကလုာ်တဖၣ်အကျါ, ယကထုးထီၣ်က့ၤ အဝဲသ့ၣ် လၢထံကီၢ်တဖၣ်န့ၣ်အပူၤ, ပာ်ဖှိၣ်ထီၣ်က့ၤ အဝဲသ့ၣ် ဒီးဟဲက့ၤကိး အဝဲသ့ၣ်ဆူ အနီၢ်ကစၢ် အထံအကီၢ်လီၤ. ယကဒုးအီၣ်ဒုးအီ အဝဲသ့ၣ် လၢအံၣ်စရ့လး အကစၢၢ်တဖၣ်အလိၤ,+ လၢထံကျိဖိတဖၣ် အကပိာ်ကပၤ ဒီးလၢကယဲၢ် တၢ်အိၣ်တၢ်ဆိးအလီၢ် လၢကီၢ်ပူၤလီၤ. ၁၄ ယကဒုးအီၣ်ဒုးအီ အဝဲသ့ၣ် လၢတၢ်အီၣ်ဆၣ်အလီၢ်လၢ အဂ့ၤတဖၣ် ဒီးအဝဲသ့ၣ် ကအီၣ်တၢ်လၢ အံၣ်စရ့လး အကစၢၢ်ဖးထီတဖၣ် အလိၤလီၤ.+ အဝဲသ့ၣ် ကမံနီၤလၢ တၢ်အီၣ်ဆၣ်လီၢ် လါဟ့တဖၣ်+ ဒီးအဝဲသ့ၣ် ကအီၣ်တၢ်လၢ တၢ်အီၣ်ဆၣ်လီၢ်လၢ အဝံၣ်တဖၣ် လၢအံၣ်စရ့လး အကစၢၢ်တဖၣ် အလိၤလီၤ.”

၁၅ “‘တၢ်ပၢကစၢ် ယဟိဝၤယွၤ တဲဝဲလၢ “ယကဒုးအီၣ်ဒုးအီ ယသိ လၢယနီၢ်ကစၢ်+ ဒီးယကဒုးမံနီၤ အဝဲသ့ၣ် လၢယနီၢ်ကစၢ်လီၤ.+ ၁၆ သိလၢအလီၤမၢ်န့ၣ် ယကဃုက့ၤအီၤ+ ဒီးသိလၢ အဟးဖျိးန့ၣ် ယကဟဲက့ၤကိးအီၤလီၤ. သိလၢအဘၣ်ဒိဘၣ်ထံးန့ၣ် ယကဘိၣ်ထီၣ်န့ၢ် အတၢ်ပူၤလီၢ် ဒီးမ့မ့ၢ်သိလၢ အဂံၢ်စၢ်ဘါစၢ်န့ၣ် ယကမၤဆူၣ်ထီၣ်က့ၤ အဂံၢ်အဘါလီၤ. ဘၣ်ဆၣ် သိလၢအဘီၣ် ဒီးသိလၢ အဂံၢ်ဆူၣ်ဘါဆူၣ်န့ၣ် ယကမၤဟးဂီၤကွံာ် အဝဲသ့ၣ် ဒီးယကဒုးအီၣ် အဝဲသ့ၣ်လၢ တၢ်စံၣ်ညီၣ်လီၤ.”

၁၇ “‘ယသိသ့ၣ်ဧၢ, ယၤ တၢ်ပၢကစၢ် ယဟိဝၤယွၤန့ၣ် ယတဲလၢ “ယကစံၣ်ညီၣ်တၢ် တီတီလိၤလိၤ လၢယသိတဖၣ် အဘၢၣ်စၢၤ ဒီးသိဖါ ဒီးမဲာ်တဲးလဲးဖါတဖၣ် အဘၢၣ်စၢၤ ဘူးထီၣ်လံ.+ ၁၈ သု* အီၣ်ဘၣ်တၢ်လၢ တၢ်အီၣ်ဆၣ်အလီၢ် လၢအဂ့ၤကတၢၢ်လံန့ၣ် တလၢပှဲၤဘၣ်သုဒံးဧီၤ. တၢ်အီၣ်ဆၣ်အလီၢ်လၢ အအိၣ်တ့ၢ်တဖၣ်န့ၣ် ဘၣ်မနုၤအဃိ သုယီၢ်တံၢ်အီၤလၢ သုခီၣ်လဲၣ်. သုအီထံလၢ အဆှံကတၢၢ်ဝံၤဒီး ဘၣ်မနုၤအဃိ သုယီၢ်ခွဲးခွးဒုထီၣ်ထံလၢ သုခီၣ်လဲၣ်. ၁၉ မ့ၢ်ယသိတဖၣ်န့ၣ် ကဘၣ်အီၣ်တၢ်လၢ တၢ်အီၣ်ဆၣ်အလီၢ်လၢ သုယီၢ်တံၢ်အီၤလၢ သုခီၣ် ဒီးကဘၣ်အီထံလၢ သုယီၢ်ခွဲးခွးဒုထီၣ်အီၤလၢ သုခီၣ်န့ၣ်ဧါ.”

၂၀ “‘တၢ်ပၢကစၢ် ယဟိဝၤယွၤ တဲဝဲလၢ “ကွၢ်လၢအံၤ, ယကစံၣ်ညီၣ် တၢ်တီတီလိၤလိၤလၢ သိလၢအဘီၣ် ဒီးသိလၢအဃဲၤ အဘၢၣ်စၢၤလီၤ. ၂၁ သုဆီၣ်ဖျိးကွံာ် သိလၢအဆိးက့တဖၣ် လၢသုမိၢ်ပှၢ် ဒီးသုဘျၢၣ် အဝဲသ့ၣ် လၢသုနၢၤ တုၤလၢ အဝဲသ့ၣ် လီၤပြံလီၤပြါကွံာ်ဝဲလၢ အယံၤလီၤ. ၂၂ ယကမၤပူၤဖျဲး ယသိတဖၣ် ဒီးအဝဲသ့ၣ် တကဲထီၣ် ဆၣ်ဖိကီၢ်ဖိအဂၤ အဆၣ်လၢၤဘၣ်.+ ဒီးယကစံၣ်ညီၣ် တၢ်တီတီလိၤလိၤလၢ သိတဖၣ်အဘၢၣ်စၢၤလီၤ. ၂၃ ယကပာ်ထီၣ် ပှၤကွၢ်သိတဂၤလၢ အဝဲသ့ၣ်အဖီခိၣ်+ လၢအမ့ၢ် ယခ့ယပှၤ စီၤဒၤဝံး+ ဒီးအဝဲကဒုးအီၣ်ဒုးအီ အဝဲသ့ၣ်လီၤ. အဝဲအနီၢ်ကစၢ်ဒၣ်ဝဲ ကဒုးအီၣ်ဒုးအီ အဝဲသ့ၣ် ဒီးအကကဲထီၣ် အဝဲသ့ၣ် အပှၤကွၢ်သိလီၤ.+ ၂၄ ဒီးယၤ ယဟိဝၤယွၤန့ၣ် ယကကဲထီၣ် အဝဲသ့ၣ် အကစၢ်ယွၤ+ ဒီးယခ့ယပှၤ စီၤဒၤဝံး ကကဲထီၣ် ပှၤခိၣ်ပှၤနၢ်လၢ အဝဲသ့ၣ်အကျါလီၤ.+ ယၤ ယဟိဝၤယွၤန့ၣ် ယတဲတၢ်ဝံၤလံ.

၂၅ “‘“ယကမၤ တၢ်ဃူတၢ်ဖိး အတၢ်အၢၣ်လီၤအီလီၤဒီး အဝဲသ့ၣ်လီၤ.+ ယကနီဟးထီၣ်ကွံာ် ဆၣ်ဖိကီၢ်ဖိ အအၢလၢကီၢ်ပူၤ+ ဒ်သိး အဝဲသ့ၣ် ကအိၣ်ဘၣ် ဘံၣ်ဘံၣ်ဘၢဘၢလၢ ပှၢ်မုၢ်ကနၢအပူၤ ဒီးကမံဘၣ်မုာ်မုာ်လၢ ပှၢ်လၢ်ကျါလီၤ.+ ၂၆ ယကဆိၣ်ဂ့ၤ* အဝဲသ့ၣ် ဒီးတၢ်လီၢ်လၢ အအိၣ်ဝးတရံး ယတၢ်လူၢ်လီၤ.+ ဒီးယကဒုးစူၤလီၤ မူခိၣ်ထံ လၢအဆၢကတီၢ်ဘၣ်လီၤ. တၢ်ဆိၣ်ဂ့ၤတဖၣ် ကလီၤဝဲဒ် မူခိၣ်စူၤထံ အသိးလီၤ.+ ၂၇ သ့ၣ်ထူၣ်တဖၣ်လၢ တၢ်ပျီပူၤန့ၣ် ကသၣ်ထီၣ်ဝဲ ဒီးဟီၣ်ခိၣ်ညၣ်ထ့ၣ် ကဒုးမဲထီၣ်သၣ်ထီၣ်တၢ်+ ဒီးအဝဲသ့ၣ် ကအိၣ်ဘၣ်လၢကီၢ်ပူၤ ဘံၣ်ဘံၣ်ဘၢဘၢလီၤ. ဒီးဖဲယဘိးကၢ်က့ၤ နီၣ်ယိးဘိလၢ အအိၣ်လၢအဝဲသ့ၣ်အလိၤ+ ဒီးယမၤပူၤဖျဲး အဝဲသ့ၣ်လၢ ပှၤလၢအဒုးကဲကုၢ်အဝဲသ့ၣ် အစုပူၤအခါ အဝဲသ့ၣ် ကသ့ၣ်ညါဘၣ်ဝဲလၢ ယမ့ၢ် ယဟိဝၤယွၤလီၤ. ၂၈ ဒီးပှၤကလုာ်အဂၤတဖၣ် တမၤနၢၤအီၣ်ဃီၣ်အဝဲသ့ၣ်လၢၤဘၣ်. ဒီးဆၣ်ဖိကီၢ်ဖိအအၢလၢ ဟီၣ်ခိၣ်ချၢတဖၣ် တအီၣ်ယူၢ်လီၤကွံာ် အဝဲသ့ၣ်လၢၤဘၣ်. ဒီးအဝဲသ့ၣ် ကအိၣ်ဘၣ်ဘံၣ်ဘံၣ်ဘၢဘၢ ဒီးပှၤတမၤပျံၤမၤဖုး အဝဲသ့ၣ် နီတဂၤဘၣ်.+

၂၉ “‘“ယကသူၣ်လီၤဖျးလီၤန့ၢ် အဝဲသ့ၣ်လၢ တၢ်သူၣ်တၢ်ဖျးအလီၢ်လၢ အမံၤကဟူသၣ်ကဖျါ ဒီးအဝဲသ့ၣ် တသံဘၣ်လၢ တၢ်သၣ်ဝံၤလီၤဒိ လၢကီၢ်ပူၤ အဃိလၢၤဘၣ်.+ ဒီးပှၤကလုာ်တဖၣ် တမၤမဲာ်ဆှး အဝဲသ့ၣ်လၢၤဘၣ်.+ ၃၀ ‘ဒီးပှၤအံၣ်စရ့လးဖိတဖၣ် ကသ့ၣ်ညါဘၣ်ဝဲလၢ ယၤ ယဟိဝၤယွၤန့ၣ် ယမ့ၢ် အဝဲသ့ၣ် အကစၢ်ယွၤ လၢအအိၣ်ဒီး အဝဲသ့ၣ် ဒီးကသ့ၣ်ညါဘၣ်ဝဲလၢ အဝဲသ့ၣ် မ့ၢ်ဝဲယပှၤဂီၢ်မုၢ်လီၤ.’+ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.”’

၃၁ “တၢ်ပၢကစၢ် ယဟိဝၤယွၤ တဲဝဲလၢ ‘ယသိလၢ ယကွၢ်ထွဲအီၤသ့ၣ်ဧၢ,+ သုမ့ၢ်ဒၣ် ပှၤဟီၣ်ခိၣ်ဖိ ဒီးယမ့ၢ် သုကစၢ်ယွၤလီၤ.’”

၃၅ ကစၢ်ယဟိဝၤယွၤ တဲယၤလၢ ၂ “ပှၤကညီဖိခွါဧၢ, ကွၢ်တၢ်လၢ စ့ဧၢ်အကစၢၢ်ကလိတဖၣ်အအိၣ်+ ဒီးတဲဝံအတၢ်စံးပာ်လၢ အထီဒါအီၤတက့ၢ်.+ ၃ တဲအီၤလၢ ‘တၢ်ပၢကစၢ် ယဟိဝၤယွၤ တဲဝဲလၢ “စ့ဧၢ် အကစၢၢ်ကလိသ့ၣ်ဧၢ, ယကဲထီၣ် သုဒုၣ်သုဒါလံ. ယကယၤထီၣ်ယစု ဒ်သိး ယကထီဒါသုအဂီၢ် ဒီးယကဒုးကဲထီၣ်သု လၢပှၢ်မုၢ်ကနၢ လၢအအိၣ်သယုၢ်လီၤ.+ ၄ ယကမၤဟးဂီၤကွံာ် သုဝ့ၢ်တဖၣ် ဒီးသုကကဲထီၣ် ပှၢ်မုၢ်ကနၢ လၢအအိၣ်သယုၢ်လီၤ.+ ဒီးသုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ. ၅ ယကမၤဒ်န့ၣ် မ့ၢ်လၢသုသးဟ့ ပှၤအံၣ်စရ့လးဖိ တကတၢၢ် နီတဘျီဘၣ်+ ဒီးဖဲအဝဲသ့ၣ် ထံၣ်ဘၣ်ဒီး တၢ်ကီတၢ်ခဲ အဆၢကတီၢ် ဒီးဖဲအဝဲသ့ၣ် ဘၣ်တၢ်စံၣ်ညီၣ် အလီၢ်ခံကတၢၢ်အခါ သုဟ့ၣ်လီၤကွံာ် အဝဲသ့ၣ် ဒ်သိး ပှၤကမၤသံကွံာ် အဝဲသ့ၣ် အဂီၢ်လီၤ.”’+

၆ “တၢ်ပၢကစၢ် ယဟိဝၤယွၤ တဲဝဲလၢ ‘ဒ်ယမ့ၢ်ပှၤလၢ အမူဝဲ သပှၢ်တၢၢ်အသိး ယအၢၣ်လီၤလၢ ယကဟ့ၣ်လီၤသုလၢတၢ်သံ အစုပူၤ ဒီးသုဃ့ၢ်တပူၤဘၣ်.+ မ့ၢ်လၢ သုမၤသံ ပှၤလၢ သုသးဟ့အီၤတဖၣ်အဃိ သုဃ့ၢ်ပူၤဖျဲးသုသး လၢတၢ်သံ အစုပူၤ တန့ၢ်ဘၣ်.+ ၇ ယကမၤကဲထီၣ် စ့ဧၢ်အကစၢၢ်ကလိတဖၣ် ဒ်သိးဒီးပှၢ်မုၢ်ကနၢ လၢအအိၣ်သယုၢ်လီၤ.+ ဒီးပှၤလၢ အလ့ၢ်ထီၣ်လ့ၢ်လိၤဖဲန့ၣ်န့ၣ် ယကမၤဟးဂီၤကွံာ်အီၤလီၤ. ၈ ယကမၤပှဲၤ စ့ဧၢ် အကစၢၢ်ကလိတဖၣ်ဒီး ပှၤသံအစိၣ်လီၤ. ပှၤလၢအဘၣ် တၢ်မၤသံအီၤလၢ နးတဖၣ်အံၤန့ၣ် ကအိၣ်ဝဲလၢ သုတၢ်လူၢ်တဖၣ်, သုတၢ်တြီၤပူၤ ဒီးလၢသုထံကျိဖိတဖၣ် အပူၤလီၤ. ၉ ယကဒုးအိၣ်သယုၢ်သု လီၤထူလီၤယိာ် ဒီးပှၤတအိၣ်တဆိးလၢ သုဝ့ၢ်တဖၣ်အပူၤလၢၤဘၣ်.+ ဒီးသုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.’

၁၀ “လၢညါ ယဟိဝၤယွၤ အိၣ်ဝဲဖဲန့ၣ် ဘၣ်ဆၣ် သုတဲလၢ ပှၤကလုာ် ခံကလုာ်အံၤ ဒီးကီၢ်ခံဘ့ၣ်အံၤန့ၣ် သုကမၤန့ၢ်အီၤ ဒီးအကကဲထီၣ် သုတၢ်လီၤ.+ မ့ၢ်လၢ သုတဲဒ်န့ၣ်အဃိ ၁၁ တၢ်ပၢကစၢ် ယဟိဝၤယွၤ တဲဝဲလၢ ‘ဒ်ယမ့ၢ်ပှၤလၢ အမူဝဲ သပှၢ်တၢၢ်အသိး ယအၢၣ်လီၤလၢ ဒ်သုသးထီၣ်ဒီးသးက့ၣ် အဝဲသ့ၣ် ဒီးသုပာ်ဖျါထီၣ် တၢ်သးဟ့လၢ အဝဲသ့ၣ်အဖီခိၣ်အသိးန့ၣ် ယကဟ့ၣ်ကၣ်က့ၤသု ဒ်သုမၤအဝဲသ့ၣ်အသိးလီၤ.+ ဖဲယစံၣ်ညီၣ်သုအခါ ယကပာ်ဖျါထီၣ်န့ၢ် အဝဲသ့ၣ် လၢယမ့ၢ် မတဂၤလဲၣ်န့ၣ်လီၤ. ၁၂ ဘၣ်ဃးဒီး အံၣ်စရ့လး အကစၢၢ်ကလိတဖၣ်န့ၣ် သုတဲလၢ “အဝဲသ့ၣ် ဘၣ်တၢ်မၤအိၣ်သယုၢ်အီၤ ဒီးပန့ၢ်ဘၣ်တၢ်ခွဲးတၢ်ယာ်လၢ ပကမၤဟးဂီၤအဝဲသ့ၣ်လံ.” အဃိ သုကသ့ၣ်ညါဘၣ်လၢ ယၤ ယဟိဝၤယွၤန့ၣ် ယနၢ်ဟူ သုတၢ်ဒုၣ်ဒွဲၣ်စံးအၢ အံၣ်စရ့လး အကစၢၢ်ကလိတဖၣ်လီၤ. ၁၃ ဒီးသုတဲအၢတဲသီယၤလၢ တၢ်ပာ်ကဖၢလၢသးအပူၤ ဒီးသုတဲဆါယၤလၢ တၢ်ကတိၤ အါထံၣ်န့ၣ်+ ယနၢ်ဟူ ခဲလၢာ်လံ.’

၁၄ “တၢ်ပၢကစၢ် ယဟိဝၤယွၤ တဲဝဲလၢ ‘ဖဲယမၤကဲထီၣ်သုဒ်သိးဒီး ပှၢ်မုၢ်ကနၢ လၢအအိၣ်သယုၢ်အခါ ဟီၣ်ခိၣ်ဒီဘ့ၣ် ကသူၣ်ဖှံသးညီဝဲလီၤ. ၁၅ သုသူၣ်ဖှံသးညီ ဖဲအံၣ်စရ့လး အတၢ်န့ၢ်သါ ဘၣ်တၢ်မၤအိၣ်သယုၢ်အီၤ အခါလီၤ. အဃိ ယကမၤသု ဒ်န့ၣ်လီၤ.+ အိ စ့ဧၢ် အကစၢၢ်ကလိ လၢအမ့ၢ် ကီၢ်အဒိၣ်ဒီဘ့ၣ်ဧၢ, နကတုၤလၢတၢ်ဟးဂီၤ ဒီးနကအိၣ်သယုၢ်လီၤ.+ ဒီးပှၤကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.’”

၃၆ “ပှၤကညီဖိခွါဧၢ, တဲဝံအတၢ်စံးပာ်လၢ ဘၣ်ဃးဒီး အံၣ်စရ့လး အကစၢၢ်တဖၣ် ဒီးတဲလၢ ‘အိ အံၣ်စရ့လး အကစၢၢ်တဖၣ်ဧၢ, ကနၣ်တၢ်လၢ ယဟိဝၤယွၤ ကတဲန့ၣ်တက့ၢ်. ၂ တၢ်ပၢကစၢ် ယဟိဝၤယွၤ တဲဝဲလၢ “ဒုၣ်ဒါတဖၣ် တဲဆဲးအဲးသုလၢ ‘ဘၣ်ပိးလီၤ,* တၢ်လီၢ်ထီၣ်ထီ လၢပျၢၤတဖၣ်ဒၣ်လဲာ်န့ၣ် ကဲထီၣ်ပတၢ်လံ.’”’+

၃ “အဃိ တဲတၢ်ဒ်ဝံအသိး ဒီးတဲလၢ ‘တၢ်ပၢကစၢ် ယဟိဝၤယွၤ တဲဝဲလၢ “အဝဲသ့ၣ် ဟဲလၢတၢ်လီၢ်ကိးကပၤဒဲး ဒီးဒုးသု ဒီးမၤအိၣ်သယုၢ်သု ဒ်သိးသုကကဲထီၣ် ပှၤကလုာ်ဂၤ လၢအပူၤဖျဲးတဖၣ် အတၢ်အဂီၢ်လီၤ. ဒီးပှၤတဲအီၣ်သုဂ့ၢ် ဒီးတဲဟးဂီၤ သုဂ့ၢ်လီၤ.+ ၄ လၢတၢ်န့ၣ်အဃိ အိ အံၣ်စရ့လး အကစၢၢ်တဖၣ်ဧၢ, ဒိကနၣ် တၢ်လၢ တၢ်ပၢကစၢ် ယဟိဝၤယွၤ တဲဝဲတက့ၢ်. တၢ်ပၢကစၢ် ယဟိဝၤယွၤ ကတဲဝဲ ကစၢၢ်တဖၣ်, တၢ်လူၢ်တဖၣ်, ထံကျိဖိတဖၣ်, တၢ်တြီၤတဖၣ်, တၢ်ဟးဂူာ်ဟးဂီၤလၢ အအိၣ်သယုၢ်တဖၣ်+ ဒီးဝ့ၢ်တဖၣ်လၢ အဘၣ်တၢ်ပာ်တ့ၢ်အီၤ လၢပှၤကလုာ်ဂၤလၢ အပူၤဖျဲးတဖၣ် ဂုာ်န့ၢ်ဆူၣ် တၢ်အိၣ်လၢအပူၤ ဒီးဒုၣ်ဒွဲၣ်စံးအၢအီၤလီၤ.+ ၅ တၢ်ပၢကစၢ် ယဟိဝၤယွၤ တဲဝဲတၢ်သ့ၣ်တဖၣ်န့ၣ်လၢ ‘ပှၤကလုာ်ဂၤလၢ အပူၤဖျဲးတဖၣ် ဒီးပှၤအဒိၣ်ဖိခဲလၢာ်န့ၣ် လၢတၢ်တပာ်ကဲဘၣ်အပူၤ ဒီးလၢတၢ်သးခုဖးဒိၣ်အပူၤ+ အဝဲသ့ၣ် ပာ်ပနီၣ်ယကီၢ် ဒ်အဝဲသ့ၣ် အတၢ်အသိးလီၤ. အဝဲသ့ၣ် အဲၣ်ဒိးဟံးန့ၢ်ဝဲ တၢ်အီၣ်ဆၣ်အလီၢ် လၢအအိၣ်ဖဲန့ၣ်တဖၣ် ဒီးဂုာ်န့ၢ် တၢ်အိၣ်လၢ ယကီၢ်ပူၤလီၤ.+ အဃိ ယကတဲ အဝဲသ့ၣ်လၢ တၢ်သူၣ်ဒိၣ်သးဖျိး အပူၤလီၤ.’”’+

၆ “အဃိ တဲဝံအတၢ်စံးပာ် လၢဘၣ်ဃးဒီး ကီၢ်အံၣ်စရ့လး, ဒီးတဲဘၣ် ကစၢၢ်တဖၣ်, တၢ်လူၢ်တဖၣ်, ထံကျိဖိတဖၣ် ဒီးတၢ်တြီၤတဖၣ်လၢ ‘တၢ်ပၢကစၢ် ယဟိဝၤယွၤ တဲဝဲလၢ “မ့ၢ်လၢ ပှၤကလုာ်ဂၤတဖၣ် မၤမဲာ်ဆှးသု အဃိ ယကတဲတၢ်လၢ တၢ်သူၣ်ဆူၣ်သးဆူၣ် ဒီးလၢတၢ်သးဒိၣ်အပူၤလီၤ.”’+

၇ “တၢ်ပၢကစၢ် ယဟိဝၤယွၤ တဲဝဲလၢ ‘ယယူာ်ထီၣ်ယစု ဒီးယအၢၣ်လီၤလၢ ပှၤကလုာ်ဂၤလၢ အအိၣ်ဝးတရံးသုတဖၣ်န့ၣ် ကတူၢ်ဘၣ် တၢ်မဲာ်ဆှးလီၤ.+ ၈ အိ အံၣ်စရ့လး အကစၢၢ်တဖၣ်ဧၢ, မ့ၢ်လၢတယံာ်လၢၤဘၣ်န့ၣ် ပှၤအံၣ်စရ့လးဖိတဖၣ် ကဟဲက့ၤဘၣ်အဃိ သုကအိၣ်ဒီး သ့ၣ်ထူၣ်တဖၣ်လၢ အအိၣ်ဒီးအဒ့ဒီးအသၣ် အါအါဂီၢ်ဂီၢ်လၢ အဝဲသ့ၣ်အဂီၢ်လီၤ.+ ၉ ယအိၣ်ဒီးသု ဒီးယကဃၣ်က့ၤယသးလၢ သုအိၣ်အဃိ တၢ်ကသူၣ်လီၤဖျးလီၤတၢ် ဒီးတၢ်ကသူၣ်လီၤတၢ်ချံ လၢသုပူၤလီၤ. ၁၀ ယကမၤအါထီၣ်ဂီၢ်ထီၣ် သုပှၤဂီၢ်မုၢ် အံၣ်စရ့လးဖိခဲလၢာ် ဒီးပှၤကအိၣ်က့ၤလၢ ဝ့ၢ်တဖၣ်အပူၤ+ ဒီးပှၤကဘှီထီၣ်က့ၤ တၢ်လၢ အလီၤပှီၢ်တဖၣ်လီၤ.+ ၁၁ ယကမၤအါထီၣ်ဂီၢ်ထီၣ် သုပှၤဂီၢ်မုၢ် ဒီးသုဆၣ်ဖိကီၢ်ဖိလီၤ.+ အဝဲသ့ၣ် ကအါထီၣ်ဂီၢ်ထီၣ် ဒီးအဖိကအိၣ်ဝဲအါမးလီၤ. ဒီးယကမၤဒ်သိး ပှၤကအိၣ်ကဆိးလၢသုပူၤ ဒ်လၢညါအသိး+ ဒီးယကဒုးဘီၣ်ထီၣ်ညီထီၣ်သု အါန့ၢ်ဒံးလၢညါလီၤ.+ ဒီးသုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.+ ၁၂ ဒီးယကမၤဒ်သိး ယပှၤဂီၢ်မုၢ်အံၣ်စရ့လး ကလ့ၢ်ထီၣ်လ့ၢ်လိၤလၢသုပူၤ ဒီးသုကကဲထီၣ်အဝဲသ့ၣ် အတၢ်လီၤ.+ သုကကဲထီၣ် အဝဲသ့ၣ် အတၢ်န့ၢ်သါ ဒီးသုတမၤလီၤတူာ် အဝဲသ့ၣ် အဖိတဖၣ်နီတဘျီလၢၤဘၣ်.’”+

၁၃ “တၢ်ပၢကစၢ် ယဟိဝၤယွၤ တဲဝဲလၢ ‘အဝဲသ့ၣ် တဲနၤလၢ “နမ့ၢ်ကီၢ်တဘ့ၣ်လၢ အမၤဟးဂီၤကွံာ်ပှၤဂၤ ဒီးမၤလီၤတူာ် နပှၤကလုာ်တဖၣ် အဖိလီၤ.”’ ၁၄ လၢတၢ်န့ၣ်အဃိ ‘နတမၤဟးဂီၤဘၣ် ပှၤဂၤလၢၤဘၣ် ဒီးနတမၤလီၤတူာ်ဘၣ် နပှၤကလုာ်တဖၣ် အဖိလၢၤဘၣ်.’ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ. ၁၅ ‘ယတဒုးတူၢ်နၤလၢ ပှၤကလုာ်တဖၣ် အတၢ်ဒုၣ်ဒွဲၣ် ဒီးအတၢ်တဲဆဲးအဲးလၢၤဘၣ်.+ ဒီးနတကဲထီၣ် တၢ်လီၤဃံၢ်အလီၢ်လၢ နပှၤကလုာ်တဖၣ်အဂီၢ်လၢၤဘၣ်.’ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.”

၁၆ ကစၢ်ယဟိဝၤယွၤ တဲယၤလၢ ၁၇ “ပှၤကညီဖိခွါဧၢ, ဖဲပှၤအံၣ်စရ့လးဖိတဖၣ် အိၣ်လၢအကီၢ်ပူၤအခါ အဝဲသ့ၣ် မၤဘၣ်အၢကီၢ် ခီဖျိလၢ အတၢ်သကဲာ်ပဝး ဒီးအတၢ်မၤတဖၣ် အဃိလီၤ.+ လၢယမဲာ်ညါန့ၣ် အဝဲသ့ၣ် အတၢ်သကဲာ်ပဝးတဖၣ် လီၤဂာ်ဒ် ပိာ်မုၣ်လၢ အတကဆှီဘၣ် ဖဲအလုၢ်လၢ်ဟဲအခါန့ၣ်လီၤ.+ ၁၈ မ့ၢ်လၢ အဝဲသ့ၣ် မၤသံမၤဝီတၢ် လၢကီၢ်ပူၤ ဒီးမၤဘၣ်အၢကီၢ် ခီဖျိလၢ အဝဲသ့ၣ် အတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်*+ အဃိ ယလူလီၤ ယတၢ်သးထီၣ်လၢ အဝဲသ့ၣ်အလိၤလီၤ.+ ၁၉ ဒီးယမၤလီၤပြံလီၤပြါ အဝဲသ့ၣ်လၢ ပှၤကလုာ်ဂၤတဖၣ်အကျါ ဒီးနီလဲၤအဝဲသ့ၣ်လၢ ကီၢ်တဖၣ်အပူၤလီၤ.+ ယစံၣ်ညီၣ်အဝဲသ့ၣ်ဒ် အတၢ်သကဲာ်ပဝး ဒီးအတၢ်မၤတဖၣ် အိၣ်ဝဲအသိးလီၤ. ၂၀ ဖဲအဝဲသ့ၣ် လဲၤတုၤလၢ ပှၤကလုာ်ဂၤတဖၣ်အကျါအခါ ပှၤမၤစှၤလီၤ ယမံၤစီဆှံ အလၤကပီၤ+ ခီဖျိ ပှၤတဲလၢ ‘ပှၤသ့ၣ်တဖၣ်အံၤ မ့ၢ်ယဟိဝၤယွၤ အပှၤဂီၢ်မုၢ် ဘၣ်ဆၣ် အဝဲသ့ၣ် ဘၣ်ဟးထီၣ်ကွံာ်လၢ ကီၢ်လၢ ကစၢ်ယွၤ ဟ့ၣ်လီၤအီၤ အပူၤလီၤ.’ ၂၁ ဖဲန့ၣ်န့ၣ် ပှၤအံၣ်စရ့လးဖိတဖၣ် မၤစှၤလီၤ ယမံၤစီဆှံ အလၤကပီၤလၢ ပှၤကလုာ်ဂၤတဖၣ် အကျါလီၤ. အဃိ ယကမၤတၢ်လၢ ယမံၤစီဆှံအဂီၢ်လီၤ.”+

၂၂ “အဃိ တဲဘၣ် ပှၤအံၣ်စရ့လးဖိတဖၣ်လၢ ‘တၢ်ပၢကစၢ် ယဟိဝၤယွၤ တဲဝဲလၢ “အိ ပှၤအံၣ်စရ့လးဖိသ့ၣ်ဧၢ, သုမၤစှၤလီၤ ယမံၤစီဆှံ အလၤကပီၤလၢ ပှၤကလုာ်ဂၤတဖၣ် အကျါအဃိ ယမၤတၢ်လၢ ယမံၤအဂီၢ်လီၤ. တမ့ၢ်လၢ သုဂီၢ်ဘၣ်.”’+ ၂၃ တၢ်ပၢကစၢ် ယဟိဝၤယွၤ တဲဝဲလၢ ‘သုမၤစှၤလီၤ ယမံၤစီဆှံ အလၤကပီၤလၢ ပှၤကလုာ်ဂၤတဖၣ်အကျါ အဃိ ယမံၤစီဆှံ အလၤကပီၤ လီၤစှၤလၢ အဝဲသ့ၣ် အမဲာ်ညါလီၤ. ဘၣ်ဆၣ် ယကပာ်စီဆှံ ယမံၤလၢအဒိၣ်အမုၢ် သပှၢ်တၢၢ်လီၤ.+ ဒီးယကပာ်ဖျါထီၣ်န့ၢ်သုလၢ ယစီဆှံ ဒီးပှၤကလုာ်တဖၣ် ကထံၣ်ဘၣ်ဝဲလီၤ. ဖဲန့ၣ်အခါ အဝဲသ့ၣ် ကသ့ၣ်ညါဘၣ်ဝဲလၢ ယမ့ၢ် ယဟိဝၤယွၤလီၤ.+ ၂၄ ယကကိးထီၣ်က့ၤ သုလၢပှၤကလုာ်ဂၤတဖၣ်အကျါ ဒီးယကထုးထီၣ်က့ၤသုလၢ ထံကီၢ်အဂၤတဖၣ်အပူၤ ဒီးဟဲက့ၤကိးသုလၢ သုကီၢ်ပူၤလီၤ.+ ၂၅ ယကဖှံလီၤ ထံလၢအကဆှီ လၢသုလိၤ ဒီးသုကကဆှီထီၣ်က့ၤလီၤ.+ ဒီးယကမၤ ကဆှီထီၣ်ကွံာ် တၢ်လၢအတကဆှီဘၣ် လၢအအိၣ်ဒီးသု+ ဒီးယကမၤလီၤမၢ်ကွံာ် သုတၢ်ဂီၤတၢ်ဖှီၣ် လၢအလီၤသးဘၣ်အၢ ခဲလၢာ်လီၤ.+ ၂၆ ယကဟ့ၣ်လီၤသု သးလၢအသီ+ ဒီးယကဟ့ၣ်လီၤသု တၢ်ပာ်သူၣ်ပာ်သးလၢ အသီလီၤ.+ ဒီးယကထုးထီၣ်ကွံာ် သုသးလၢ အလီၤဂာ်ဒ်လၢၢ်အသိး+ လၢသုနီၢ်ခိပူၤ ဒီးဟ့ၣ်လီၤသုလၢ သးလၢ အကပုာ်လုး ဒ်တၢ်ဖံးတၢ်ညၣ် အသိးလီၤ.* ၂၇ ယကပာ် ယသးစီဆှံလၢသုပူၤ ဒီးယကမၤဒ်သိး သုကလဲၤတၢ်ဒ် ယတၢ်ဘျၢအိၣ်ဝဲသိးလီၤ.+ ဒီးသုကအိၣ်မူမၤထွဲ ယတၢ်သိၣ်တၢ်သီတဖၣ်လီၤ. ၂၈ ဒီးသုကအိၣ်ဘၣ်လၢ ကီၢ်တဘ့ၣ်လၢ ယဟ့ၣ်လီၤ သုမိၢ်ပၢ်ဖံဖု လၢပျၢၤတဖၣ်အပူၤ ဒီးသုကမ့ၢ် ယပှၤဂီၢ်မုၢ် ဒီးယကမ့ၢ် သုကစၢ်ယွၤလီၤ.’+

၂၉ “‘ဒီးယကမၤပူၤဖျဲးထီၣ်သုလၢ တၢ်လၢ အတကဆှီဘၣ်ခဲလၢာ် ဒီးယကဒုးသၣ်ထီၣ်ဘု အါအါဂီၢ်ဂီၢ်လီၤ. ဒီးယတဒုးအိၣ်ထီၣ် တၢ်သၣ်ဝံၤလီၤဒိလၢ သုကျါ နီတဘျီလၢၤဘၣ်.+ ၃၀ ဒီးဒ်သိး သုသုတတူၢ်ဘၣ် တၢ်မဲာ်ဆှးလၢ ပှၤကလုာ်တဖၣ် အမဲာ်ညါ ခီဖျိလၢ သုထံၣ်ဘၣ် တၢ်သၣ်ဝံၤလီၤဒိအဃိ နီတဘျီလၢၤတဂ့ၤအဂီၢ် ယကဒုးသၣ်ထီၣ် သ့ၣ်ထူၣ်ဝၣ်ထူၣ်တဖၣ် ဒီးဒုးမဲထီၣ်သၣ်ထီၣ် တၢ်လၢစံာ်ပျီတဖၣ်အပူၤ အါအါဂီၢ်ဂီၢ်လီၤ.+ ၃၁ ဖဲန့ၣ်န့ၣ် သုကသ့ၣ်နီၣ်ထီၣ် ဘၣ်ကဒါက့ၤ သုကျဲအၢကျဲသီတဖၣ် ဒီးတၢ်လၢ သုမၤတ့ၢ်လၢ အတဂ့ၤဘၣ်တဖၣ်လီၤ. ဒီးသုကသးဘၣ်အၢလီၤက့ၤသုသး မ့ၢ်လၢ သုတၢ်ကမၣ်အိၣ်ဝဲ ဒီးသုမၤတ့ၢ်လုၢ်လၢ်လၢ အအၢအသီတဖၣ်အဃိလီၤ.+ ၃၂ ဘၣ်ဆၣ် သုကဘၣ်သ့ၣ်ညါလၢ တၢ်လၢ ယမၤအီၤသ့ၣ်တဖၣ်အံၤန့ၣ် တမ့ၢ်လၢသုဂီၢ်ဘၣ်.’+ တၢ်ပၢကစၢ် ယဟိဝၤယွၤ တဲဝဲလၢ ‘အိ ပှၤအံၣ်စရ့လးဖိဧၢ, မ်သုတူၢ်ဘၣ်တၢ်မဲာ်ဆှး ခီဖျိ တၢ်လၢသုမၤအီၤတဖၣ် အဃိန့ၣ်တက့ၢ်.’

၃၃ “တၢ်ပၢကစၢ် ယဟိဝၤယွၤ တဲဝဲလၢ ‘ဖဲယပျၢ်ကွံာ် သုတၢ်ကမၣ် အမုၢ်နံၤန့ၣ် ယကမၤဒ်သိး ပှၤကအိၣ်က့ၤလၢ ဝ့ၢ်တဖၣ်အပူၤ+ ဒီးပှၤကဘှီထီၣ်က့ၤ တၢ်လၢအလီၤပှီၢ်တဖၣ်လီၤ.+ ၃၄ ကီၢ်လၢ ပှၤလ့ၢ်ထီၣ်လ့ၢ်လိၤတဖၣ် ထံၣ်ဘၣ်ဝဲလၢ အအိၣ်သယုၢ်အံၤ တၢ်ကသူၣ်လီၤဖျးလီၤတၢ်လၢ အပူၤလီၤ. ၃၅ ဒီးပှၤကတဲလၢ “ကီၢ်လၢအအိၣ်သယုၢ်တဘ့ၣ်အံၤ ခဲအံၤအလီၤဂာ်ဒ် ဧ့ၤဒ့ၣ် တၤသၣ်လီၢ်အသိးလီၤ.+ ဝ့ၢ်တဖၣ်လၢ အဟးဂူာ်ဟးဂီၤ, အိၣ်သယုၢ် ဒီးလီၤပှီၢ်န့ၣ် ခဲအံၤ ကဲထီၣ်က့ၤ ဝ့ၢ်လၢအအိၣ်ဒီးအဒူၣ်လၢအကျၢၤ ဒီးပှၤအိၣ်ပှၤဆိးလၢအပူၤလံ.”+ ၃၆ ဒီးပှၤကလုာ်ဂၤတဖၣ်လၢ အပူၤဖျဲး လၢအအိၣ်ဝးတရံးသုန့ၣ် ကသ့ၣ်ညါဘၣ်ဝဲလၢ ယၤ ယဟိဝၤယွၤ သူၣ်ထီၣ်က့ၤတၢ်လၢ အလီၤပှီၢ် ဒီးယသူၣ်လီၤဖျးလီၤတၢ်လၢ ကီၢ်လၢအအိၣ်သယုၢ်အပူၤလီၤ. ယၤ ယဟိဝၤယွၤန့ၣ် ယတဲတၢ်ဝံၤလံ ဒီးယကမၤဒ်န့ၣ် သပှၢ်ကတၢၢ်လီၤ.’+

၃၇ “တၢ်ပၢကစၢ် ယဟိဝၤယွၤ တဲဝဲလၢ ‘ယကပျဲလၢ ပှၤအံၣ်စရ့လးဖိတဖၣ် ကဃ့ယၤလၢ ယကမၤအါထီၣ် အဝဲသ့ၣ် အပှၤနီၣ်ဂံၢ် ဒ်သိအါအါဂီၢ်ဂီၢ်အသိး ဒီးယကမၤဒ် အဝဲသ့ၣ် ဃ့ဝဲလီၤ. ၃၈ လၢတၢ်န့ၣ်အဃိ လၢညါ ဝ့ၢ်လၢအဟးဂီၤတ့ၢ်တဖၣ်န့ၣ် ပှၤကအိၣ်က့ၤလၢအပူၤပှဲၤပှဲၤ အါထဲသိးဒီး ပှၤစီဆှံတဖု+ ဒီးသိတဖၣ်လၢ အလဲၤလၢဝ့ၢ်ယရူၤၡလ့ၣ်အပူၤ ဖဲဘူၣ်ဘၣ်အဆၢကတီၢ်အသိးလီၤ.+ ဒီးအဝဲသ့ၣ် ကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.’”

၃၇ ယဟိဝၤယွၤ အစိအကမီၤ လီၤဘၣ်ယၤ ဒီးယဟိဝၤယွၤ အသးစီဆှံ စိာ်ထီၣ်ယၤ ဒီးပာ်လီၤယၤလၢ တၢ်ပၢၤခိၣ် အခၢၣ်သးလီၤ.+ ဖဲန့ၣ်န့ၣ် အိၣ်ပှဲၤဒီး တၢ်ဃံတဖၣ်လီၤ. ၂ အဝဲဒုးဟးတရံးယၤလၢ တၢ်ဃံတဖၣ် အခၢၣ်သး ဒီးယထံၣ်ဘၣ် တၢ်ဃံအါမး အိၣ်ဝဲလၢ တၢ်ပၢၤခိၣ် ဒီးအဃ့ထီဝဲ ဒိၣ်မးလီၤ.+ ၃ ဒီးအဝဲသံကွၢ်ယၤလၢ “ပှၤကညီဖိခွါဧၢ, နဆိကမိၣ် တၢ်ဃံတဖၣ်အံၤ မူထီၣ် ကသ့ဒံးဧါ.” ဖဲန့ၣ်န့ၣ် ယတဲဆၢလၢ “တၢ်ပၢကစၢ် ယဟိဝၤယွၤဧၢ, နမ့ၢ်ပှၤတဂၤလၢ အသ့ၣ်ညါဝဲလီၤ.”+ ၄ ဒီးအဝဲ တဲယၤလၢ “တဲဝံအတၢ်စံးပာ်လၢ ဘၣ်ဃးဒီး တၢ်ဃံတဖၣ်န့ၣ် အဂ့ၢ်တက့ၢ်. ဒီးတဲတၢ်ဃံသ့ၣ်တဖၣ်န့ၣ်လၢ ‘တၢ်ဃံလၢ အဃ့ထီသ့ၣ်ဧၢ, ကနၣ်တၢ်လၢ ယဟိဝၤယွၤ ကတဲဝဲန့ၣ်တက့ၢ်.

၅ “‘တၢ်ပၢကစၢ် ယဟိဝၤယွၤ တဲဘၣ် တၢ်ဃံတဖၣ်န့ၣ်လၢ “ယကထၢနုာ်လီၤ တၢ်ကသါလၢသုပူၤ ဒီးသုကသမူထီၣ်လီၤ.+ ၆ ဒီးယကပာ်လီၤ တၢ်အထူၣ်အပျၢ်တဖၣ် ဒီးတၢ်အညၣ်တဖၣ်လၢ သုလိၤလီၤ. ဒီးယကမၤဘၢသုလၢ တၢ်အဘ့ၣ် ဒီးထၢနုာ်လီၤ တၢ်ကသါ လၢသုပူၤ ဒီးသုကသမူထီၣ်လီၤ. ဒီးသုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.”’”

၇ ဒီးယတဲဝံအတၢ်စံးပာ် ဒ်တၢ်မၤလိာ်ယၤအသိးလီၤ. ဖဲယတဲတၢ်ဒ် ဝံအသိးအခါ တၢ်သီၣ်ထီၣ် ခြဲးခြဲးခြီးခြီး ဒီးတၢ်ဃံတဖၣ် ဟဲထီဘုးတာ်လိာ်အသး တဘိဒီးတဘိလီၤ. ၈ ဒီးယထံၣ် တၢ်အထူၣ်အပျၢ်တဖၣ် ဟဲထီၣ်လၢ တၢ်ဃံတဖၣ်အလိၤ ဒီးအဘ့ၣ် ဟဲထီၣ်ကးဘၢဃာ်အီၤလီၤ. ဘၣ်ဆၣ် တၢ်ကသါတအိၣ်လၢ အဝဲသ့ၣ်အပူၤဒံးဘၣ်.

၉ အဝဲတဲယၤလၢ “တဲဘၣ်ကလံၤလၢ ဝံအတၢ်စံးပာ်တက့ၢ်. ပှၤကညီဖိခွါဧၢ, တဲတၢ်ဒ်ဝံအသိး ဒီးတဲကလံၤလၢ ‘တၢ်ပၢကစၢ် ယဟိဝၤယွၤ တဲဝဲလၢ “ကလံၤဧၢ,* ဟဲထီၣ်လၢ ကလံၤကျိၤလွံၢ်ကျိၤ ဒီးလဲၤအူလီၤလၢ ပှၤလၢ အဘၣ်တၢ်မၤသံအီၤတဖၣ်အံၤအလိၤ ဒ်သိး အဝဲသ့ၣ် ကမူထီၣ်အဂီၢ်တက့ၢ်.”’”

၁၀ အဃိ ယတဲဝံအတၢ်စံးပာ် ဒ်တၢ်မၤလိာ်ယၤအသိး ဒီးတၢ်ကသါ* ဟဲနုာ်လီၤလၢ အဝဲသ့ၣ်အပူၤ ဒီးအဝဲသ့ၣ် မူထီၣ်က့ၤ ဒီးဆၢထၢၣ်ဝဲ+ ဒီးကဲထီၣ် သုးမုၢ်ဖးဒိၣ်တဖုလီၤ.

၁၁ ဒီးအဝဲတဲယၤလၢ “ပှၤကညီဖိခွါဧၢ, တၢ်ဃံတဖၣ်အံၤန့ၣ် မ့ၢ်ဝဲ ပှၤအံၣ်စရ့လးဖိလီၤ.+ အဝဲသ့ၣ် တဲဝဲလၢ ‘ပဃံတဖၣ်အံၤန့ၣ် ဃ့ထီလံ ဒီးပတၢ်မုၢ်လၢ်လၢာ်လံ.+ ဒီးတၢ်မၤဟးဂီၤပှၤ လၢာ်လံ.’ ၁၂ အဃိ တဲတၢ်ဒ်ဝံအသိး ဒီးတဲအဝဲသ့ၣ်လၢ ‘တၢ်ပၢကစၢ် ယဟိဝၤယွၤ တဲဝဲလၢ “ယပှၤဂီၢ်မုၢ်ဧၢ, ယကအိးထီၣ် သုတၢ်သွၣ်ခိၣ်+ ဒီးထုးထီၣ်က့ၤသုလၢ တၢ်သွၣ်ခိၣ်အပူၤ ဒီးဒုးဟဲက့ၤသုလၢ ကီၢ်အံၣ်စရ့လး အပူၤလီၤ.+ ၁၃ အိ ယပှၤဂီၢ်မုၢ်သ့ၣ်ဧၢ, ဖဲယအိးထီၣ် သုတၢ်သွၣ်ခိၣ် ဒီးထုးထီၣ်က့ၤသုလၢ တၢ်သွၣ်ခိၣ်အပူၤအခါ သုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.”’+ ၁၄ ‘ယကထၢနုာ်လီၤ ယသးစီဆှံ လၢသုပူၤ ဒီးသုကသမူထီၣ်လီၤ.+ ဒီးယကဒုးအိၣ်သုလၢ သုကီၢ်ပူၤလီၤ. ဒီးသုကသ့ၣ်ညါဘၣ်လၢ ယၤ ယဟိဝၤယွၤန့ၣ် ယတဲတၢ်ဝံၤလံ ဒီးယမၤဒ်န့ၣ် သပှၢ်ကတၢၢ်လီၤ.’ ယဟိဝၤယွၤ တဲဝဲဒ်န့ၣ်လီၤ.”

၁၅ ကစၢ်ယဟိဝၤယွၤ တဲယၤလၢ ၁၆ “ပှၤကညီဖိခွါဧၢ, ဟံးန့ၢ်သ့ၣ်တကူာ် ဒီးလၢအလိၤန့ၣ် ကွဲးလီၤလၢ ‘လၢယူဒၤဘီမုၢ် ဒီးပှၤအံၣ်စရ့လးဖိလၢ အအိၣ်ဒီးအီၤတဖၣ်အဂီၢ်’ တက့ၢ်.+ ဒီးဟံးန့ၢ် သ့ၣ်အဂၤတကူာ် ဒီးလၢအလိၤန့ၣ် ကွဲးလီၤလၢ ‘စီၤယိၤသး အသ့ၣ်ကူာ်လၢ အဒိလီၤဝဲ အ့ဖရဲၣ်ဘီမုၢ် ဒီးပှၤအံၣ်စရ့လးဖိလၢ အအိၣ်ဒီးအီၤတဖၣ်’ တက့ၢ်.+ ၁၇ ပာ်ဘူးထီၣ် သ့ၣ်ခံကူာ်န့ၣ် ဒီးသ့ၣ်ခံကူာ်န့ၣ် ကကဲထီၣ် သ့ၣ်တကူာ်ဃီ လၢနစုပူၤလီၤ.+ ၁၈ နပှၤကလုာ် မ့ၢ်သံကွၢ်နၤလၢ ‘တၢ်တခါအံၤ အခီပညီ ဒ်လဲၣ်န့ၣ် နတတဲဘၣ်ပှၤဧီၤ’ န့ၣ် ၁၉ တဲဘၣ်အဝဲသ့ၣ်လၢ ‘တၢ်ပၢကစၢ် ယဟိဝၤယွၤ တဲဝဲလၢ “စီၤယိၤသး အသ့ၣ်ကူာ်လၢ အဒိလီၤဝဲ အ့ဖရဲၣ်ဘီမုၢ် ဒီးပှၤအံၣ်စရ့လးဖိ အဒူၣ်လၢ အအိၣ်ဒီးအီၤတဖၣ်န့ၣ် ယကဟံးန့ၢ်အီၤ ဒီးမၤဘုးတာ်အီၤဒီး ယူဒၤဘီမုၢ် အသ့ၣ်ကူာ်လီၤ. ယကမၤကဲထီၣ်က့ၤအီၤလၢ သ့ၣ်တကူာ်ဃီ+ ဒီးအဝဲသ့ၣ် ကကဲထီၣ်သ့ၣ်တကူာ်ဃီလၢ ယစုပူၤလီၤ.”’ ၂၀ စိာ်ဃာ် သ့ၣ်ကူာ်လၢ နကွဲးလီၤတၢ်လၢ အလိၤတဖၣ်အံၤ ဒ်သိး အဝဲသ့ၣ် ကထံၣ်ဝဲအဂီၢ်တက့ၢ်.

၂၁ “တဲအဝဲသ့ၣ်လၢ ‘တၢ်ပၢကစၢ် ယဟိဝၤယွၤ တဲဝဲလၢ “ယကကိးထီၣ်က့ၤ ပှၤအံၣ်စရ့လးဖိလၢ အလဲၤအိၣ်လၢ ပှၤကလုာ်တဖၣ်အကျါ ဒီးယကထုးထီၣ်က့ၤ အဝဲသ့ၣ် လၢတၢ်လီၢ်ကိးတီၤဒဲး ဒီးပာ်ဖှိၣ်ထီၣ်က့ၤ အဝဲသ့ၣ် ဒီးဟဲက့ၤကိး အဝဲသ့ၣ်လၢ အနီၢ်ကစၢ် အထံအကီၢ်လီၤ.+ ၂၂ ယကဒုးကဲထီၣ် အဝဲသ့ၣ်လၢ ပှၤတကလုာ်ဃီလၢကီၢ်ပူၤ+ ဒီးအဝဲသ့ၣ် ကအိၣ်ဝဲလၢ အံၣ်စရ့လး အကစၢၢ်တဖၣ် အလိၤလီၤ. ဒီးအဝဲသ့ၣ် အစီၤပၤလၢ အပၢအဝဲသ့ၣ်ခဲလၢာ်န့ၣ် ကအိၣ်ဝဲတဂၤလီၤ.+ ဒီးအဝဲသ့ၣ်တကဲ ကလုာ်ခံကလုာ်လၢၤဘၣ်. ဒီးတၢ်တနီၤဖးအဝဲသ့ၣ်လၢ ဘီမုၢ်ခံဘ့ၣ်လၢၤဘၣ်.+ ၂၃ အဝဲသ့ၣ် တမၤဘၣ်အၢလီၤအသးလၢ အတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်,* တၢ်သကဲာ်ပဝးလၢ အလီၤသးဘၣ်အၢ ဒီးတၢ်ကမၣ်တဖၣ်လၢၤဘၣ်.+ ယကမၤစၢၤ အဝဲသ့ၣ်ဒ်သိး အကပာ်တ့ၢ်ကွံာ် တၢ်အၢတၢ်သီလၢ အမၤတ့ၢ်ဝဲတဖၣ် ဒီးယကမၤကဆှီထီၣ်က့ၤ အဝဲသ့ၣ်လီၤ. ဒီးအဝဲသ့ၣ် ကကဲထီၣ် ယပှၤဂီၢ်မုၢ် ဒီးယကကဲထီၣ် အဝဲသ့ၣ် အကစၢ်ယွၤလီၤ.+

၂၄ “‘“ယခ့ယပှၤ စီၤဒၤဝံး ကမ့ၢ်အဝဲသ့ၣ်အစီၤပၤ+ ဒီးအဝဲသ့ၣ်ခဲလၢာ်န့ၣ် အပှၤကွၢ်သိ ကအိၣ်ဝဲတဂၤလီၤ.+ အဝဲသ့ၣ် ကလဲၤတၢ်ဒ် ယတၢ်သိၣ်တၢ်သီအသိး ဒီးကမၤထွဲ ယတၢ်ဘျၢ လီၤတံၢ်လီၤဆဲးလီၤ.+ ၂၅ အဝဲသ့ၣ် ကအိၣ်လၢ ကီၢ်လၢ ယဟ့ၣ်လီၤ ယခ့ယပှၤ စီၤယၤကိာ် လၢအမ့ၢ် သုမိၢ်ပၢ်ဖံဖု လၢပျၢၤတဖၣ် အိၣ်ဝဲအလီၢ်လီၤ.+ အဝဲသ့ၣ် ဒီးအဖိတဖၣ် ဒီးအစၢၤအသွဲၣ် လၢခံတဖၣ်+ ကအိၣ်ဝဲဖဲန့ၣ် လီၤထူလီၤယိာ်လီၤ.+ ဒီးယခ့ယပှၤ စီၤဒၤဝံး ကမ့ၢ်အဝဲသ့ၣ် အခိၣ်အနၢ် လီၤထူလီၤယိာ်လီၤ.+

၂၆ “‘“ယကမၤ တၢ်ဃူတၢ်ဖိး အတၢ်အၢၣ်လီၤအီလီၤဒီး အဝဲသ့ၣ်လီၤ.+ တၢ်အၢၣ်လီၤအီလီၤအံၤ ကမ့ၢ်ဝဲ တၢ်အၢၣ်လီၤအီလီၤ အထူအယိာ်လီၤ. ယကဟ့ၣ်လီၤက့ၤ အဝဲသ့ၣ်လၢ အထံအကီၢ် ဒီးမၤအါထီၣ်ဂီၢ်ထီၣ် အဝဲသ့ၣ်လီၤ.+ ဒီးယကသူၣ်လီၤ ယတၢ်လုၢ်ဟံၣ်လၢ အဝဲသ့ၣ်အကျါ လီၤထူလီၤယိာ်လီၤ. ၂၇ ယဒဲ* ကအိၣ်ဒီး အဝဲသ့ၣ်လီၤ. ဒီးယကကဲထီၣ် အဝဲသ့ၣ် အကစၢ်ယွၤ ဒီးအဝဲသ့ၣ် ကကဲထီၣ် ယပှၤဂီၢ်မုၢ်လီၤ.+ ၂၈ ခီဖျိလၢ ယတၢ်လုၢ်ဟံၣ် ကအိၣ်ဝဲလၢ ပှၤအံၣ်စရ့လးဖိအကျါ လီၤထူလီၤယိာ်အဃိ ပှၤကလုာ်တဖၣ် ကသ့ၣ်ညါဘၣ်ဝဲလၢ ယၤ ယဟိဝၤယွၤ ပာ်စီဆှံ ပှၤအံၣ်စရ့လးဖိလီၤ.”’”+

၃၈ ကစၢ်ယဟိဝၤယွၤ တဲယၤလၢ ၂ “ပှၤကညီဖိခွါဧၢ, ကွၢ်ဃီၤတၢ်ဆူ မ့ၤၡ့း ဒီးတူၤဘလး+ အခိၣ်အဒိၣ်ကတၢၢ် စီၤကိးလၢကီၢ်မါကူးအအိၣ်+ ဒီးတဲဝံအတၢ်စံးပာ် လၢအထီဒါအီၤတက့ၢ်.+ ၃ ဒီးတဲလၢ ‘တၢ်ပၢကစၢ် ယဟိဝၤယွၤ တဲဝဲလၢ “မ့ၤၡ့း ဒီးတူၤဘလး အခိၣ်အဒိၣ်ကတၢၢ် စီၤကိးဧၢ, ယကဲထီၣ် နဒုၣ်နဒါလံ. ၄ ယကဒုးဃၣ်တရံးနၤ ဒီးဘျးနခၣ်လၢ နီၣ်ကွးတဖၣ်+ ဒီးယကမူၤဃီၤနၤ ဒီးနသုးမုၢ်ခဲလၢာ်+ ဃုာ်ဒီး ကသ့ၣ်တဖၣ် ဒီးပှၤဒိးကသ့ၣ်ဖိတဖၣ်လၢ အကူသိးဝဲ တၢ်ကူတၢ်ကၤလၢ အဂ့ၤတဖၣ် လၢအမ့ၢ် ပှၤဖးဒိၣ်တဖုလၢ အအိၣ်ဒီး ကတီၤဖိ ဒီးကတီၤဖးဒိၣ်တဖၣ်လီၤ. အဝဲသ့ၣ်ခဲလၢာ်န့ၣ် စိာ်ဝဲနးတဖၣ်လီၤ. ၅ ပှၤဖၢၡၢၣ်ဖိ, ပှၤအဲၤသံအီးပးဖိ ဒီးပှၤပူၤတၤဖိတဖၣ်+ အိၣ်ဝဲဒီး အဝဲသ့ၣ်လီၤ. ဒီးအဝဲသ့ၣ် ခဲလၢာ်န့ၣ် အိၣ်ဝဲဒီး ကတီၤဖိ ဒီးခိၣ်ဖျီၣ်ထးလီၤ. ၆ တကးဒံးဘၣ် ကိမၢၤ ဒီးအသုးဖိခဲလၢာ် ဒီးစီၤတိကးရမၤ+ အစၢၤအသွဲၣ်တဖၣ်လၢ အအိၣ်ဟဲလၢ တၢ်လီၢ်လၢအယံၤကတၢၢ် လၢကလံၤစိးတခီန့ၣ် အိၣ်ဒီးနၤ အဃိ ပှၤအိၣ်ဒီးနၤ ဒီဒူၣ်လီၤ.+

၇ “‘“နၤဒီးနသုးမုၢ်ခဲလၢာ်လၢ အပာ်ဖှိၣ်ထီၣ်အသးဒီးနၤန့ၣ် ကတဲာ်ကတီၤသုသး, အိၣ်ကတဲာ်ကတီၤပာ်စၢၤသုသးသၢၤ. ဒီးနကကဲထီၣ် အဝဲသ့ၣ် အခိၣ်လီၤ.

၈ “‘“အါနံၤအါသီ ဝံၤအလီၢ်ခံ ယကသမံသမိးနၤလီၤ. ဖဲနံၣ်လၢ အလီၢ်ခံကတၢၢ်တဖၣ် အတီၢ်ပူၤ နကလဲၤနုာ်လီၤလၢ ကီၢ်ပူၤလီၤ. ပှၤကီၢ်ဖိတဖၣ်န့ၣ် မ့ၢ်ပှၤလၢ အဘၣ်ဒိဘၣ်ထံးလၢနးဝံၤ အဘၣ် တၢ်ဟဲက့ၤကိးအီၤတဖၣ်လီၤ. ဒီးအဝဲသ့ၣ် ဘၣ်တၢ်ထုးထီၣ်က့ၤအီၤ လၢပှၤအါကလုာ်အကျါ ဒီးဘၣ်တၢ်ပာ်ဖှိၣ်ထီၣ်က့ၤအီၤ ဒီးဘၣ်တၢ်ဟဲက့ၤကိးအီၤ လၢတၢ်လီၢ်လၢ အံၣ်စရ့လး အကစၢၢ်ကလိတဖၣ်လၢ အအိၣ်သယုၢ်တ့ၢ်လၢ တၢ်ဆၢကတီၢ် ဖးယံာ်လီၤ. ပှၤလၢအအိၣ်လၢ ကီၢ်အံၤအပူၤန့ၣ် မ့ၢ်ပှၤလၢ အဘၣ်တၢ်ဟဲက့ၤ ကိးထီၣ်က့ၤအီၤလၢ ပှၤကလုာ်တဖၣ် အကျါလီၤ. ဒီးအဝဲသ့ၣ် ခဲလၢာ်န့ၣ် အိၣ်ဘၣ်ဝဲလၢ တၢ်ဘံၣ်တၢ်ဘၢ အပူၤလီၤ.+ ၉ နကဟဲထီဒါ အဝဲသ့ၣ်ဒ် ကလံၤမုၢ်အသိး ဒီးနၤဒီးနသုးမုၢ်ခဲလၢာ် ဒီးပှၤလၢအအိၣ်ဒီးနၤတဖၣ် ကကးဘၢ ကီၢ်ဒ်တၢ်အၢၣ်ကးဘၢတၢ်အသိးလီၤ.”’

၁၀ “တၢ်ပၢကစၢ် ယဟိဝၤယွၤ တဲဝဲလၢ ‘ဖဲတၢ်တနံၤန့ၣ် တၢ်ဆိကမိၣ်တဖၣ် ကဟဲနုာ်လၢ နသးပူၤ ဒီးနကကူၣ်ထီၣ် တၢ်ကူၣ်လၢ အအၢအသီတမံၤလီၤ. ၁၁ ဒီးနကတဲလၢ “ယကလဲၤနုာ်လီၤလၢ ကီၢ်တဘ့ၣ်လၢ အအိၣ်ဒီးသဝီတဖၣ်လၢ အတအိၣ်ဒီး တၢ်ဒီသဒၢဘၣ်.+ ယကလဲၤထီဒါ ပှၤလၢအအိၣ်ဘၣ် ဘံၣ်ဘံၣ်ဘၢဘၢ လၢတၢ်တမၤတံာ်တာ်အီၤ နီတမံၤဘၣ်လီၤ. အဝဲသ့ၣ်ခဲလၢာ် အိၣ်ဝဲလၢ သဝီတဖၣ်လၢ အတအိၣ်ဒီး တၢ်ဒူၣ်တဖၣ်, တြဲၤတဖၣ် ဒီးတြဲၤအဘိတဖၣ်ဘၣ်လီၤ.” ၁၂ နကတိာ်ပာ်လၢ နကဂုာ်န့ၢ်ဆူၣ်တၢ် ဒီးက့ၤစိာ်တၢ် အါအါဂီၢ်ဂီၢ် ဒီးနကလဲၤဒုး ပှၤဂီၢ်မုၢ် ဒီးတၢ်လီၢ်တဖၣ်လီၤ. တၢ်လီၢ်တဖၣ်အံၤ မ့ၢ်ဝဲ တၢ်လီၢ်လၢ အဟးဂီၤတ့ၢ် ဒီးပှၤက့ၤအိၣ်ဝဲလၢအပူၤ+ ဒီးပှၤဂီၢ်မုၢ်အံၤ မ့ၢ်ပှၤလၢ အဘၣ်တၢ်ထုးထီၣ်အီၤလၢ ပှၤကလုာ်ဂၤတဖၣ်အကျါ+ ဒီးအဝဲသ့ၣ် အိၣ်ဒီး တၢ်ထူးတၢ်တီၤ ဒီးတၢ်စုလီၢ်ခီၣ်ခိၣ်အါမး+ ဒီးအဝဲသ့ၣ်အိၣ်ဝဲလၢ ဟီၣ်ခိၣ် အခၢၣ်သးလီၤ.

၁၃ “‘ပှၤၡဘၤဖိ+ ဒီးပှၤဒဒၣ်ဖိ+ လၢအမ့ၢ် တၢ်ၡံၣ် အပှၤကၤတၢ်ဖိတဖၣ်+ ဒီးအပှၤသုးဖိခဲလၢာ်န့ၣ် ကတဲနၤလၢ “နကလဲၤနုာ်လီၤလၢ ကီၢ်ပူၤ ဒ်သိးနကဂုာ်န့ၢ်ဆူၣ်တၢ် အါအါဂီၢ်ဂီၢ် အဂီၢ်န့ၣ်ဧါ. နပာ်ဖှိၣ်ထီၣ် နသုးဖိတဖၣ် ဒ်သိး ကဟဲက့ၤစိာ် ထူဒီးစ့ ဒီးကဟံးန့ၢ် တၢ်ထူးတၢ်တီၤ ဒီးတၢ်စုလီၢ်ခီၣ်ခိၣ်တဖၣ် ဒီးကဂုာ်န့ၢ်ဆူၣ်တၢ် အါအါဂီၢ်ဂီၢ် အဂီၢ်ဧါ.”’

၁၄ “အဃိ ပှၤကညီဖိခွါဧၢ, တဲတၢ်ဒ်ဝံအသိး ဒီးတဲဘၣ် စီၤကိးလၢ ‘တၢ်ပၢကစၢ် ယဟိဝၤယွၤ တဲဝဲလၢ “ဖဲတၢ်တနံၤန့ၣ် နကသ့ၣ်ညါဘၣ် သပှၢ်ကတၢၢ်လၢ ယပှၤဂီၢ်မုၢ် ပှၤအံၣ်စရ့လးဖိတဖၣ် အိၣ်ဘၣ်ဝဲ ဘံၣ်ဘံၣ်ဘၢဘၢလီၤ.+ ၁၅ နကအိၣ်ဟဲလၢ နတၢ်လီၢ် လၢအမ့ၢ် တၢ်လီၢ်လၢအယံၤကတၢၢ် လၢကလံၤစိးတခီ+ ဒီးနကဟဲဒီး ပှၤအါအါဂီၢ်ဂီၢ်လီၤ. အဝဲသ့ၣ်တဖၣ်န့ၣ် မ့ၢ်ပှၤဖးဒိၣ်တဖု ဒီးသုးမုၢ်ဖးဒိၣ်တဖု+ ဒီးအဝဲသ့ၣ်ခဲလၢာ် ဒိးကသ့ၣ်လီၤ. ၁၆ နကဟဲထီဒါ ယပှၤဂီၢ်မုၢ် ပှၤအံၣ်စရ့လးဖိ ဒ်တၢ်အၢၣ်ကးဘၢ ကီၢ်အသိးလီၤ. စီၤကိးဧၢ, ဖဲမုၢ်နံၤအကတၢၢ်တဖၣ် အတီၢ်ပူၤ ယကမၤဒ်သိး နကဟဲထီဒါ ယကီၢ်+ ဒ်သိးပှၤကလုာ်တဖၣ် ကသ့ၣ်ညါယၤအဂီၢ်လီၤ. ဖဲန့ၣ်အခါ ခီဖျိတၢ်လၢ ယကမၤနၤအဃိ အဝဲသ့ၣ်ကထံၣ်ဘၣ်ဝဲလၢ ယမ့ၢ်ကစၢ်ယွၤလၢ အစီဆှံလီၤ.”’+

၁၇ “တၢ်ပၢကစၢ် ယဟိဝၤယွၤ တဲဝဲလၢ ‘နမ့ၢ်ပှၤတဂၤလၢ ယမၢယခ့ယပှၤ အံၣ်စရ့လးအဝံတဖၣ် တဲဆိပာ်စၢၤအဂ့ၢ် လၢညါလံၤလံၤန့ၣ် တမ့ၢ်ဧီၤ. ဝံတဖၣ် တဲဆိပာ်စၢၤဝဲလၢ တၢ်ကဒုးဟဲနၤ ဒ်သိး နကထီဒါ ပှၤအံၣ်စရ့လးဖိအဂီၢ်န့ၣ် အိၣ်လံအနံၣ်အါမးလံ.

၁၈ “တၢ်ပၢကစၢ် ယဟိဝၤယွၤ တဲဝဲလၢ ‘ဖဲမုၢ်နံၤလၢ စီၤကိး ဟဲနုာ်လီၤလၢ ကီၢ်အံၣ်စရ့လးအပူၤန့ၣ် ယတၢ်သးထီၣ် ကကဲၤထီၣ်လီၤ.+ ၁၉ ယတၢ်သးဒိၣ် ကလီၤဂာ်ဒ်သိးဒီး မ့ၣ်အူ ဒီးယကတဲတၢ်လၢ တၢ်သးဆူၣ်အပူၤ ဒီးဖဲမုၢ်နံၤအဝဲန့ၣ် ဟီၣ်ခိၣ်ကဟူးဖးဒိၣ် လၢကီၢ်အံၣ်စရ့လး အပူၤလီၤ. ၂၀ ညၣ်လၢပီၣ်လဲၣ်ပူၤ, ထိၣ်လၢမူခိၣ်, ဆၣ်ဖိကီၢ်ဖိအအၢ လၢတၢ်ပျီပူၤ, တၢ်လၢအဘျိၣ်လၢ ဟီၣ်ခိၣ်လိၤ ဒီးပှၤဟီၣ်ခိၣ်ဖိခဲလၢာ်လၢ ဟီၣ်ခိၣ်ချၢန့ၣ် ကကနိးကစုာ် လၢယဃိ ဒီးကစၢၢ်တဖၣ် ကလီၤပှီၢ်ကွံာ်,+ လ့တဖၣ် ကလီၤပှီၢ်ကွံာ် ဒီးတၢ်အဒူၣ်ခဲလၢာ် ကလီၤပှီၢ်ကွံာ် လၢယဃိလီၤ.’

၂၁ “တၢ်ပၢကစၢ် ယဟိဝၤယွၤ တဲဝဲလၢ ‘ယကပျဲလီၤ နးတဘ့ၣ် ဒ်သိး အကထီဒါစီၤကိးလၢ ယကစၢၢ်တဖၣ် အလိၤလီၤ. အဃိ အဝဲသ့ၣ်ခဲလၢာ် ကက့ၤဒုးလိာ်သး ကဒဲကဒဲလီၤ.+ ၂၂ ဒီးယကဒုးစူၤလီၤတၢ်ဖးဒိၣ် ဒီးဒုးစူၤလီၤ သူၣ်တဖၣ်,+ မ့ၣ်အူတဖၣ်+ ဒီးကးတဖၣ်+ လၢစီၤကိး ဒီးအသုးဖိတဖၣ် ဒီးပှၤအါအါဂီၢ်ဂီၢ် လၢအအိၣ်ဒီးအီၤ အလိၤလီၤ.+ ဒီးယကစံၣ်ညီၣ်အီၤလၢ တၢ်ဆါသံသတြိာ်+ ဒီးတၢ်မၤသံမၤဝီလီၤ. ၂၃ ယကမၤလၤကပီၤလီၤယသး ဒီးယကပာ်ဖျါထီၣ်လၢ ယမ့ၢ်ကစၢ်ယွၤလၢ အစီဆှံတဂၤ သပှၢ်ကတၢၢ် ဒီးယကပာ်ဖျါထီၣ်န့ၢ် ပှၤအါကလုာ်လၢ ယမ့ၢ် မတဂၤလဲၣ်န့ၣ်လီၤ. ဒီးအဝဲသ့ၣ် ကသ့ၣ်ညါဘၣ်ဝဲလၢ ယမ့ၢ် ယဟိဝၤယွၤလီၤ.’

၃၉ “ပှၤကညီဖိခွါဧၢ, တဲဝံအတၢ်စံးပာ်လၢ အထီဒါ စီၤကိး+ ဒီးတဲအီၤလၢ ‘တၢ်ပၢကစၢ် ယဟိဝၤယွၤ တဲဝဲလၢ “မ့ၤၡ့း ဒီးတူၤဘလး+ အခိၣ်အဒိၣ်ကတၢၢ် စီၤကိးဧၢ, ယကဲထီၣ် နဒုၣ်နဒါလံ. ၂ ယကဒုးဃၣ်တရံးနၤ, ဆှၢနၤ ဒီးယကမၤဒ်သိး နကဟးထီၣ်လၢ တၢ်လီၢ်လၢအယံၤကတၢၢ် လၢကလံၤစိးတခီ+ ဒီးဒုးလဲၤထီၣ်နၤလၢ အံၣ်စရ့လး အကစၢၢ်တဖၣ် အလိၤလီၤ. ၃ ယကတီၢ်လီၤတဲာ်ကွံာ် နချံၣ်လၢ အအိၣ်လၢ နစုစ့ၣ် ဒီးမၤလီၤတဲာ်ကွံာ် နပျၢ်တဖၣ်လၢ အအိၣ်လၢ နစုထွဲလီၤ. ၄ နၤ ဒီးနသုးဖိခဲလၢာ် ဒီးပှၤဂီၢ်မုၢ်လၢ အကအိၣ်ဒီးနၤတဖၣ်န့ၣ် ကလီၤဃံၢ်သံလၢ အံၣ်စရ့လး အကစၢၢ်တဖၣ် အလိၤလီၤ.+ ယကဒုးကဲထီၣ်နၤလၢ ထိၣ်ကိးကလုာ်ဒဲး ဒီးဆၣ်ဖိကီၢ်ဖိအအၢလၢ တၢ်ပျီပူၤတဖၣ် အဆၣ်လီၤ.”’+

၅ “တၢ်ပၢကစၢ် ယဟိဝၤယွၤ တဲဝဲလၢ ‘နကလီၤဃံၢ်သံလၢ တၢ်ပျီပူၤလီၤ.+ ယတဲတၢ်ဝံၤလံ.’

၆ “‘ယကဆှၢလီၤ မ့ၣ်အူလၢ ကီၢ်မါကူးအပူၤ ဒီးလၢပှၤလၢအအိၣ်ဘၣ် ဘံၣ်ဘံၣ်ဘၢဘၢ လၢကီးတဖၣ်အပူၤ အအိၣ်လီၤ.+ ဒီးအဝဲသ့ၣ် ကသ့ၣ်ညါဘၣ်ဝဲလၢ ယမ့ၢ် ယဟိဝၤယွၤလီၤ. ၇ ယကဒုးသ့ၣ်ညါ ယပှၤဂီၢ်မုၢ် ပှၤအံၣ်စရ့လးဖိတဖၣ်လၢ ယမံၤစီဆှံ ဒီးယတပျဲလၢ ပှၤမၤစှၤလီၤ ယမံၤစီဆှံ အလၤကပီၤလၢၤဘၣ်. ဒီးပှၤကလုာ်တဖၣ် ကသ့ၣ်ညါဘၣ်ဝဲလၢ ယမ့ၢ် ယဟိဝၤယွၤ+ လၢအမ့ၢ် ကစၢ်ယွၤလၢအစီဆှံတဂၤလၢ အအိၣ်လၢ အံၣ်စရ့လးအပူၤလီၤ.’+

၈ “တၢ်ပၢကစၢ် ယဟိဝၤယွၤ တဲဝဲလၢ ‘မ့ၢ်လံ, တၢ်ကဟဲကဲထီၣ်အသး ဒ်န့ၣ်လီၤ. ဒီးတၢ်ကမၤအသး ဒ်န့ၣ် သပှၢ်ကတၢၢ်လီၤ. ယတဲတၢ် ဘၣ်ဃးဒီး မုၢ်နံၤအဝဲန့ၣ်လီၤ. ၉ အံၣ်စရ့လး အပှၤဝ့ၢ်ဖိတဖၣ်န့ၣ် ကဟးထီၣ်ဝဲ ဒီးကဒွဲၣ်အူထီၣ် တၢ်စုကဝဲၤတဖၣ် လၢအမ့ၢ် ကတီၤဖိတဖၣ်မ့ၢ်ဂ့ၤ, ကတီၤဖးဒိၣ်တဖၣ်မ့ၢ်ဂ့ၤ, ချံၣ်တဖၣ်မ့ၢ်ဂ့ၤ, ပျၢ်တဖၣ်မ့ၢ်ဂ့ၤ, သုးအနီၣ်တီၢ်တဖၣ်မ့ၢ်ဂ့ၤ ဒီးဘီတဖၣ်မ့ၢ်ဂ့ၤလီၤ. ဒီးအဝဲသ့ၣ် ကသူတၢ်စုကဝဲၤတဖၣ်န့ၣ်လၢ ကဒွဲၣ်ထီၣ်မ့ၣ်အူအဂီၢ်+ နွံနံၣ်ညါလီၤ. ၁၀ မ့ၢ်လၢ အဝဲသ့ၣ် ကသူဝဲ တၢ်စုကဝဲၤတဖၣ်အံၤလၢ ကဒွဲၣ်ထီၣ် မ့ၣ်အူအဂီၢ်အဃိ အဝဲသ့ၣ် တလိၣ်ဟံးန့ၢ်သ့ၣ်လၢ တၢ်ပျီပူၤလၢၤဘၣ် ဒီးတလိၣ်လဲၤထၢစ့ၢ်ကီး သ့ၣ်မုၣ်လၢ ပှၢ်လၢ်ကျါလၢၤဘၣ်လီၤ.’

“‘အဝဲသ့ၣ် ကဂုာ်န့ၢ်တၢ်လၢ ပှၤလၢအဂုာ်န့ၢ်တ့ၢ်တၢ်လၢ အဝဲသ့ၣ် အအိၣ်လီၤ.’ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.

၁၁ “‘ဖဲတၢ်တနံၤန့ၣ် ယကဟ့ၣ်လီၤ စီၤကိး+ အသွၣ်ခိၣ်လၢ ကီၢ်အံၣ်စရ့လးအပူၤ ဖဲပှၤလၢအလဲၤလၢ ပီၣ်လဲၣ်အမုၢ်ထီၣ်တခီ အတၢ်တြီၤပူၤလီၤ. အဃိ ပှၤလ့ၢ်ထီၣ်လ့ၢ်လိၤဖဲန့ၣ် တသ့လၢၤဘၣ်. ပှၤကခူၣ်လီၤ စီၤကိး ဒီးအပှၤဂီၢ်မုၢ် ဖဲန့ၣ်လီၤ. ဒီးပှၤကကိး တၢ်လီၢ်အဝဲန့ၣ်လၢ စီၤကိး အပှၤဂီၢ်မုၢ်တဖၣ် အတၢ်တြီၤလီၤ.+ ၁၂ ဒ်သိး ပှၤအံၣ်စရ့လးဖိတဖၣ် ကမၤကဆှီထီၣ် ကီၢ်အဂီၢ် အဝဲသ့ၣ် ကဘၣ်ခူၣ်လီၤ ပှၤသ့ၣ်တဖၣ်န့ၣ် နွံလါညါလီၤ.+ ၁၃ ပှၤထံဖိကီၢ်ဖိခဲလၢာ် ကခူၣ်လီၤ ပှၤသ့ၣ်တဖၣ်န့ၣ် အဃိ အဝဲသ့ၣ် အမံၤကဟူသၣ်ကဖျါ ဖဲယမၤလၤကပီၤလီၤယသး အနံၤလီၤ.’+ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.

၁၄ “‘ဒ်သိး ကီၢ်ကကဆှီထီၣ်အဂီၢ် ပှၤလၢအလီၤဘၣ်မူဒါတဖၣ် ကဘၣ်လဲၤတၢ်လၢ ကီၢ်ပူၤထီဘိ ဒီးကခူၣ်လီၤကွံာ် ပှၤသံအစိၣ်လၢ အအိၣ်တီၢ်လၢ ဟီၣ်ခိၣ်လိၤလီၤ. ဒီးအဝဲသ့ၣ် ကဆဲးဃုတၢ်ဒ်န့ၣ် နွံလါညါလီၤ. ၁၅ ဒီးပှၤလၢအလဲၤတၢ် လၢကီၢ်ပူၤတဖၣ်န့ၣ် ဖဲအဝဲသ့ၣ်ထံၣ်ဝဲ ပှၤဃံအခါ အဝဲသ့ၣ် ကဘၣ်ပာ်လီၤ တၢ်ပနီၣ်တမံၤလၢ တၢ်ဃံအကပၤလီၤ. ဒီးပှၤလၢ အအိၣ်ဒီးမူဒါလၢ ကဘၣ်ခူၣ်လီၤတၢ်န့ၣ် ကခူၣ်လီၤဝဲတၢ်ဃံအံၤလၢ စီၤကိးအပှၤဂီၢ်မုၢ်တဖၣ် အတၢ်တြီၤပူၤလီၤ.+ ၁၆ ဒီးဖဲန့ၣ်န့ၣ် ဝ့ၢ်ကအိၣ်ဝဲတဖျၢၣ် လၢအကဘၣ်တၢ်ကိးန့ၢ်အမံၤလၢ ဃမိးနၤလီၤ.* ဒီးအဝဲသ့ၣ် ကမၤကဆှီထီၣ် ကီၢ်လီၤ.’+

၁၇ “ပှၤကညီဖိခွါဧၢ, တၢ်ပၢကစၢ် ယဟိဝၤယွၤ တဲဝဲလၢ ‘တဲဘၣ်ထိၣ်အကလုာ်ကလုာ် ဒီးဆၣ်ဖိကီၢ်ဖိအအၢ လၢတၢ်ပျီပူၤလၢ “ပာ်ဖှိၣ်ထီၣ်သုသး ဒီးဟဲသၢၤ. ဟဲပာ်ဖှိၣ်ထီၣ်သုသးလၢ တၢ်လုၢ်လၢ ယကတဲာ်ကတီၤပာ်န့ၢ်သု အအိၣ်သၢၤ. တၢ်လုၢ်ဖးဒိၣ်အံၤ အိၣ်ဝဲလၢ အံၣ်စရ့လး အကစၢၢ်တဖၣ် အလိၤလီၤ.+ ဖဲန့ၣ်န့ၣ် သုကအီၣ်ဘၣ် တၢ်ညၣ် ဒီးအီဘၣ်တၢ်သွံၣ်လီၤ.+ ၁၈ သုကအီၣ် ပှၤလၢအဂံၢ်ဆူၣ်ဘါဆူၣ် အညၣ် ဒီးအီ ဟီၣ်ခိၣ်အပှၤခိၣ်ပှၤနၢ်တဖၣ် အသွံၣ်လီၤ. ပှၤသ့ၣ်တဖၣ်အံၤ မ့ၢ်ဝဲ သိဖါ, သိဖိ, မဲာ်တဲးလဲး ဒီးကျီၢ်ဖါ ဒီးမ့ၢ်ဝဲ ဘၤၡၣ် အဆၣ်ဖိကီၢ်ဖိ လၢအဘီၣ်အသိခဲလၢာ်လီၤ. ၁၉ ဒီးတၢ်လုၢ်လၢ ယကတဲာ်ကတီၤပာ်စၢၤန့ၢ်သုန့ၣ် သုကအီၣ်အသိ ဒီးအီအသွံၣ်ကးကး တုၤလၢသုမူၤလီၤ.”’

၂၀ “‘လၢယစီၢ်နီၤခိၣ်န့ၣ် သုကအီၣ်ဘၣ် ကသ့ၣ်အညၣ် ဒီးပှၤနီလ့ၣ်ကဟၣ်သုး အညၣ်, ပှၤလၢအဂံၢ်ဆူၣ်ဘါဆူၣ် အညၣ် ဒီးပှၤသုးဖိတဖၣ်အညၣ် ကးကးလီၤ.’+ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.

၂၁ “‘ယကပာ်ဖျါထီၣ် ယတၢ်လၤကပီၤလၢ ပှၤကလုာ်တဖၣ်အကျါ ဒီးပှၤကလုာ်ခဲလၢာ် ကထံၣ်ဘၣ်ဝဲ ယတၢ်စံၣ်ညီၣ် ဒီးယတၢ်စိကမီၤ လၢယကပာ်ဖျါထီၣ် လၢအဝဲသ့ၣ် အကျါလီၤ.+ ၂၂ စးထီၣ်ဖဲ မုၢ်နံၤအဝဲန့ၣ် ပှၤအံၣ်စရ့လးဖိတဖၣ် ကသ့ၣ်ညါဘၣ်ဝဲလၢ ယမ့ၢ် အဝဲသ့ၣ် အကစၢ် ယဟိဝၤယွၤလီၤ. ၂၃ ဒီးပှၤကလုာ်တဖၣ် ကသ့ၣ်ညါဘၣ်ဝဲလၢ ပှၤအံၣ်စရ့လးဖိတဖၣ် ဘၣ်တၢ်က့ၤဖီၣ်အီၤန့ၣ် မ့ၢ်လၢအတၢ်ကမၣ်အဃိ ဒီးအတတီဒီးယၤဘၣ် အဃိလီၤ.+ မ့ၢ်လၢ အဝဲသ့ၣ်မၤဝဲဒ်န့ၣ်အဃိ ယဃၣ်ကွံာ် ယမဲာ်လၢ အဝဲသ့ၣ်အအိၣ်+ ဒီးဟ့ၣ်လီၤအဝဲသ့ၣ်လၢ ဒုၣ်ဒါတဖၣ် အစုပူၤ+ ဒီးအဝဲသ့ၣ် ဘၣ်လီၤဃံၢ်သံလၢ နးအဃိလီၤ. ၂၄ ဒီးယမၤအဝဲသ့ၣ် ဒ်အဝဲသ့ၣ် အတၢ်တကဆှီဘၣ် ဒီးအတၢ်ကမၣ် အိၣ်ဝဲအသိး ဒီးယဃၣ်ကွံာ်ယမဲာ်လၢ အဝဲသ့ၣ်အအိၣ်လီၤ.’

၂၅ “တၢ်ပၢကစၢ် ယဟိဝၤယွၤ တဲဝဲလၢ ‘ယကဒုးဟဲက့ၤ စီၤယၤကိာ် အစၢၤအသွဲၣ်လၢ အဘၣ်တၢ်က့ၤဖီၣ်အီၤတဖၣ်+ ဒီးယကပာ်ဖျါထီၣ် တၢ်သးကညီၤ လၢပှၤအံၣ်စရ့လးဖိတဖၣ် အဖီခိၣ်+ ဒီးလၢတၢ်သူၣ်ဆူၣ်သးဆူၣ်အပူၤ ယကဒီသဒၢ ယမံၤစီဆှံလီၤ.+ ၂၆ ခီဖျိအဝဲသ့ၣ် တတီဒီးယၤဘၣ်အဃိ အဝဲသ့ၣ် ကဘၣ်တၢ်မၤမဲာ်ဆှးအီၤ+ သနာ်က့ လၢခံ အဝဲသ့ၣ် ကအိၣ်ဘၣ် ဘံၣ်ဘံၣ်ဘၢဘၢ လၢအနီၢ်ကစၢ်အကီၢ်ပူၤ ဒီးပှၤတမၤပျံၤမၤဖုး အဝဲသ့ၣ် နီတဂၤဘၣ်.+ ၂၇ ဖဲယဟဲက့ၤကိးထီၣ် အဝဲသ့ၣ်လၢ ပှၤဂီၢ်မုၢ်တဖၣ်အကျါ ဒီးယထုးထီၣ်က့ၤ အဝဲသ့ၣ်လၢ အဒုၣ်အဒါတဖၣ် အထံအကီၢ်+ ဒီးယပာ်ဖှိၣ်ထီၣ် အဝဲသ့ၣ်အခါ ယကပာ်ဖျါထီၣ်န့ၢ် အဝဲသ့ၣ်လၢ ယစီဆှံ ဒီးပှၤကလုာ်တဖၣ် ကထံၣ်ဘၣ်ဝဲလီၤ.’+

၂၈ “‘ဖဲယနီလဲၤ အဝဲသ့ၣ်လၢ ပှၤကလုာ်တဖၣ်အကျါ ဝံၤဒီး ယပာ်ဖှိၣ်ထီၣ်က့ၤ အဝဲသ့ၣ်လၢ အဝဲသ့ၣ် အထံအကီၢ်ပူၤအခါ+ အဝဲသ့ၣ် ကသ့ၣ်ညါဘၣ်ဝဲလၢ ယမ့ၢ် အဝဲသ့ၣ် အကစၢ် ယဟိဝၤယွၤလီၤ. ၂၉ ယကလူလီၤ ယသးစီဆှံလၢ ပှၤအံၣ်စရ့လးဖိတဖၣ် အလိၤ+ ဒီးယတဃၣ်ကွံာ် ယမဲာ်လၢ အဝဲသ့ၣ်အအိၣ်လၢၤဘၣ်.’+ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.”

၄၀ ဖဲပဘၣ်တၢ်က့ၤဖီၣ်ပှၤ အိၣ်ဝဲ ၂၅ နံၣ်တနံၣ်,+ နံၣ်စးထီၣ်သီသီ, လါထီၣ် အသီတဆံ ဒီးဘၣ်ဖဲ ဝ့ၢ်ယရူၤၡလ့ၣ် လီၤပှီၢ်ဝံၤ ၁၄ နံၣ်တနံၣ်န့ၣ်+ ယဟိဝၤယွၤ အစိအကမီၤ လီၤဘၣ်ယၤ ဒီးလဲၤဆှၢယၤလၢ ဝ့ၢ်အအိၣ်လီၤ.+ ၂ ယထံၣ်ဘၣ် တၢ်ထံၣ်လၢညါခီလၢ အဟဲလၢ ကစၢ်ယွၤအအိၣ် ဒီးလၢတၢ်ထံၣ်လၢညါခီအပူၤန့ၣ် အဝဲလဲၤဆှၢယၤလၢ ကီၢ်အံၣ်စရ့လး ဒီးပာ်လီၤယၤလၢ ကစၢၢ်ဖးထီတဖျၢၣ် အလိၤလီၤ.+ ဒီးတၢ်သူၣ်ထီၣ်တခါလၢ အလီၤဂာ်ဒီး ဝ့ၢ်တဖျၢၣ်န့ၣ် အိၣ်ဝဲလၢ ကစၢၢ်တဖျၢၣ်အံၤအလိၤလၢ ကလံၤထံးတခီလီၤ.

၃ အဝဲဆှၢဃီၤယၤဖဲန့ၣ် ဒီးယထံၣ်ဘၣ် ပှၤပိာ်ခွါတဂၤလၢ အကပီၤ ဒ်တိၢ်ဘီအသိးလီၤ.+ ဒီးပှၤတဂၤန့ၣ် စိာ်ဝဲ ခီမၤ* ပျံၤတဘိ ဒီးနီၣ်ထိၣ်တပိၢ်ဘိ တဘိလီၤ.*+ ဒီးပှၤတဂၤန့ၣ် ဆၢထၢၣ်ဝဲလၢ တြဲၤအခီၣ်ထံးလီၤ. ၄ ဒီးပှၤပိာ်ခွါတဂၤန့ၣ် တဲယၤလၢ “ပှၤကညီဖိခွါဧၢ, တၢ်လၢ ယကဒုးနဲၣ်နၤခဲလၢာ်န့ၣ် ကွၢ်အီၤမ့ၢ်ထံ, ဒိကနၣ်လီၤတံၢ်လီၤဆဲး ဒီးသးစၢၢ်ဆၢအီၤနီၤ. တၢ်ဟဲကိးနၤဖဲအံၤ လၢတၢ်ဂ့ၢ်အဝဲန့ၣ် အဃိလီၤ. တဲဘၣ် ပှၤအံၣ်စရ့လးဖိတဖၣ်လၢ တၢ်လၢနထံၣ်ဘၣ်အီၤတဖၣ်အဂ့ၢ် ခဲလၢာ်နီၤ.”+

၅ ယထံၣ်တၢ်ဒူၣ်လၢ အအိၣ်ဝးတရံး တၢ်လုၢ်ဟံၣ်လီၤ. ဒီးလၢပှၤပိာ်ခွါ တဂၤန့ၣ် အစုပူၤန့ၣ် အိၣ်ဒီး နီၣ်ထိၣ်တပိၢ်တဘိလၢ အထီဝဲ ဃုပျၢ် (တပျၢ်စုာ်စုာ်န့ၣ် အိၣ်ဝဲ တပျၢ်ဒီးစုနၢလွံၢ်ဘိ) လီၤ.* ဒီးအဝဲထိၣ်ဝဲ တၢ်ဒူၣ် ဒီးတၢ်ဒူၣ်န့ၣ် တီၣ်ဝဲထဲသိးဒီး တပိၢ်တဘိန့ၣ်အထီ ဒီးအကစီၤထီၣ်ထီ တုၤသိးဒီး တပိၢ်တဘိန့ၣ်လီၤ.

၆ ဒီးအဝဲလဲၤလၢ တြဲၤအတၢ်သူၣ်ထီၣ် လၢအဃၣ်အသးလၢ မုၢ်ထီၣ်တခီ+ ဒီးလဲၤထီၣ်ဝဲလၢ ဃီလိၤလီၤ. ဖဲအဝဲထိၣ်ဝဲ တြဲၤအံၤအကျဲစၢၤအခါ အထီထဲသိးဒီး နီၣ်ထိၣ်တပိၢ်တဘိန့ၣ်အထီ ဒီးကျဲစၢၤ လၢအဝဲတကပၤန့ၣ် ထီဝဲထဲသိးဒီး နီၣ်ထိၣ်တပိၢ်တဘိန့ၣ် အထီစ့ၢ်ကီးလီၤ. ၇ ဒီးပှၤခိးတၢ်ဖိ အဒၢးတဖျၢၣ်စုာ်စုာ်န့ၣ် အထီဝဲထဲသိးဒီး နီၣ်ထိၣ်တပိၢ်တဘိန့ၣ်အထီ ဒီးအလဲၢ်စ့ၢ်ကီး ထဲသိးဒီး နီၣ်ထိၣ်တပိၢ်တဘိန့ၣ် အထီလီၤ. ဒီးလၢပှၤခိးတၢ်ဖိ အဒၢးတဖျၢၣ်ဒီးတဖျၢၣ် အဘၢၣ်စၢၤန့ၣ် အိၣ်ဝဲ ယဲၢ်ပျၢ်လီၤ.+ တြဲၤအတၢ်သူၣ်ထီၣ် အကျဲစၢၤလၢ ဆှၢဝဲဆူဘျီၣ်ဒိၣ်လၢ အဃၣ်ဃီၤအသးဆူ တၢ်လုၢ်ဟံၣ်တခီန့ၣ် အိၣ်ဝဲ နီၣ်ထိၣ်တပိၢ်တဘိလီၤ.

၈ အဝဲထိၣ်ဝဲ ဘျီၣ်ဒိၣ်လၢ အဃၣ်ဃီၤအသးဆူ တၢ်လုၢ်ဟံၣ်တခီအံၤ ဒီးအိၣ်ဝဲ နီၣ်ထိၣ်တပိၢ် တဘိလီၤ. ၉ ဒီးအဝဲထိၣ်ဝဲ ဘျီၣ်ဒိၣ်လၢအအိၣ်လၢ တြဲၤအတၢ်သူၣ်ထီၣ်အပူၤအံၤ ဒီးအအိၣ်ဝဲ ဃိးပျၢ်လီၤ. ဒီးအဝဲထိၣ်ဝဲ အတၢၣ်တဖၣ်လၢ တၢ်ကပၤ ဒီးအအိၣ်ဝဲ ခံပျၢ်လီၤ. ဒီးဘျီၣ်ဒိၣ်အံၤ ဃၣ်ဃီၤအသးဆူ တၢ်လုၢ်ဟံၣ် တခီလီၤ.

၁၀ တြဲၤအတၢ်သူၣ်ထီၣ် လၢမုၢ်ထီၣ်တခီအပူၤန့ၣ် အိၣ်ဒီး ပှၤခိးတၢ်ဖိအဒၢး တကပၤသၢဒၢး တကပၤသၢဒၢးလီၤ. ဒၢးတဖျၢၣ်ဒီးတဖျၢၣ်န့ၣ် ထဲသိးလိာ်အသး ဒီးတၢၣ်တဖၣ်လၢ အအိၣ်လၢ တြဲၤအတၢ်သူၣ်ထီၣ်အကိပူၤ အကပၤ ခံကပၤလၢာ်န့ၣ် ထဲသိးလိာ်အသးလီၤ.

၁၁ အဝဲထိၣ်ဝဲ တြဲၤအတၢ်သူၣ်ထီၣ် အကျဲနုာ်လီၤအလီၢ်န့ၣ် လဲၢ်ဝဲအပျၢ် ၁၀ ဒီးအခိၣ်ထိးန့ၣ် လဲၢ်ဝဲ ၁၃ ပျၢ်လီၤ.

၁၂ ပှၤခိးတၢ်ဖိအဒၢး တဖျၢၣ်စုာ်စုာ် အမဲာ်ညါန့ၣ် အိၣ်ဝဲဒီး တၢ်လီၢ်လၢ ပှၤဒူၣ်ဃာ်အီၤ တပျၢ်လီၤ. ဒီးအိၣ်ဝဲဒ်န့ၣ် ခံကပၤလၢာ်လီၤ. ပှၤခိးတၢ်ဖိအဒၢး တဖျၢၣ်စုာ်စုာ်လၢ အအိၣ်လၢ တြဲၤအတၢ်သူၣ်ထီၣ်အပူၤ ခံကပၤလၢာ်န့ၣ် အိၣ်ဝဲ ဃုပျၢ်လီၤ.

၁၃ ဒီးအဝဲထိၣ်ဝဲ တြဲၤအတၢ်သူၣ်ထီၣ် အလဲၢ်လီၤ. အဃိ အဝဲ ထိၣ်ဝဲစးထီၣ်လၢ ပှၤခိးတၢ်ဖိ အဒၢးတဖျၢၣ် အခိၣ်ဒုး တုၤလၢ ပှၤခိးတၢ်ဖိ အဒၢးအဝဲတဖျၢၣ် အခိၣ်ဒုး ဒီးအိၣ်ဝဲ ၂၅ ပျၢ်လီၤ. ပှၤခိးတၢ်ဖိအဒၢး တဖျၢၣ်ဒီးတဖျၢၣ် အကျဲနုာ်လီၤန့ၣ် ကွၢ်ဆၢၣ်မဲာ်လိာ်သးလီၤ.+ ၁၄ အဝဲထိၣ်ဝဲ တၢၣ်တဖၣ်လၢ တၢ်ကပၤ ဒီးတၢၣ်တဖၣ်အံၤ အကစီၤထီၣ်ထီဝဲ အပျၢ် ၆၀ လီၤ. ဒီးထိၣ်စ့ၢ်ကီးဝဲ တြဲၤအတၢ်သူၣ်ထီၣ်အဂၤတဖၣ် အတၢၣ်တဖၣ်လၢ တၢ်ကပၤလီၤ. တြဲၤအတၢ်သူၣ်ထီၣ်တဖၣ်အံၤ အိၣ်ဝးတရံးတၢ်ပျီလီၤ. ၁၅ စးထီၣ်လၢ တြဲၤအတၢ်သူၣ်ထီၣ် အတၢ်နုာ်လီၤအလီၢ် အမဲာ်ညါ တုၤလၢ တြဲၤအတၢ်သူၣ်ထီၣ် အဘျီၣ်ဒိၣ် အကျဲဟးထီၣ်န့ၣ် အိၣ်ဝဲ အပျၢ် ၅၀ လီၤ.

၁၆ ဒီးပှၤခိးတၢ်ဖိ အဒၢးတဖၣ် ဒီးတၢၣ်တဖၣ်လၢ အအိၣ်လၢ တြဲၤအတၢ်သူၣ်ထီၣ်တဖၣ် အကိပူၤ အကပၤခံကပၤလၢာ်န့ၣ် အိၣ်ဝဲဒီး ပဲတြီဖိတဖၣ် လၢအကနူၤ အံၣ်လီၤအံၣ်လီၤဝဲလီၤ.+ ဒီးလၢဘျီၣ်ဒိၣ်တဖၣ် အကိပူၤ ခံကပၤလၢာ်န့ၣ် အိၣ်စ့ၢ်ကီးဒီး ပဲတြီဖိတဖၣ်လီၤ. ဒီးသ့ၣ်စူၣ်ပလိၣ်တဖၣ်+ စိးပျၤအသးလၢ တၢၣ်လၢ အအိၣ်လၢ တၢ်ကပၤတဖၣ်န့ၣ် အလိၤလီၤ.

၁၇ ဒီးအဝဲလဲၤကိးယၤလၢ တၢ်ပျီလၢ အလဲၢ်တဘ့ၣ်အပူၤ ဒီးဖဲန့ၣ် ယထံၣ်ဘၣ် ပှၤအီၣ်တၢ်အဒၢးတဖၣ်+ ဒီးလၢၢ်ဒါခိၣ် လၢအအိၣ်လၢ တၢ်ပျီပူၤလီၤ. ပှၤအီၣ်တၢ်အဒၢး အဖျၢၣ် ၃၀ န့ၣ်အိၣ်ဝဲလၢ လၢၢ်ဒါခိၣ် အလိၤလီၤ. ၁၈ ဒီးလၢၢ်ဒါခိၣ်လၢ အအိၣ်လၢ တြဲၤအတၢ်သူၣ်ထီၣ်တဖၣ် အကပၤန့ၣ် ဘၣ်တၢ်ဒါလီၤအီၤ ထဲသိးဒီး တြဲၤအတၢ်သူၣ်ထီၣ်အထီလီၤ. အဝဲန့ၣ် မ့ၢ်ဝဲ လၢၢ်ဒါခိၣ်လၢ လာ်ခီလီၤ.

၁၉ ဒီးအဝဲထိၣ်တၢ် စးထီၣ်လၢ တြဲၤအတၢ်သူၣ်ထီၣ်လၢ လာ်ခီတဖျၢၣ် တုၤလၢ တြဲၤအတၢ်သူၣ်ထီၣ်လၢ တၢ်ပျီလၢ အအံၣ်တဘ့ၣ်လီၤ. ဒီးတၢ်ဒ့ၣ်စၢၤန့ၣ်အိၣ်ဝဲ အပျၢ် ၁၀၀ ဒီးလၢမုၢ်ထီၣ်တခီမ့ၢ်ဂ့ၤ ဒီးလၢ ကလံၤစိးတခီမ့ၢ်ဂ့ၤ အိၣ်ဝဲဒ်န့ၣ်စ့ၢ်ကီးလီၤ.

၂၀ တၢ်ပျီလၢအလဲၢ်တဘ့ၣ်န့ၣ် အိၣ်ဝဲဒီး တြဲၤအတၢ်သူၣ်ထီၣ် လၢအဃၣ်အသးလၢ ကလံၤစိးတခီ စ့ၢ်ကီးလီၤ. ဒီးအဝဲထိၣ်ဝဲ တၢ်သူၣ်ထီၣ်တဖျၢၣ်န့ၣ် အလဲၢ်အထီ စ့ၢ်ကီးလီၤ. ၂၁ တြဲၤအတၢ်သူၣ်ထီၣ်တဖျၢၣ်အံၤ အပူၤ ခံကပၤလၢာ်န့ၣ် အိၣ်ဝဲဒီး ပှၤခိးတၢ်ဖိ အဒၢးတဖၣ်လီၤ. ဒီးအတၢၣ်တဖၣ်လၢ တၢ်ကပၤ ဒီးဘျီၣ်ဒိၣ်န့ၣ် အနီၣ်ထိၣ်နီၣ်ဒွး ဒ်သိးလိာ်အသးဒီး တၢၣ်ဒီးဘျီၣ်ဒိၣ် လၢအအိၣ်လၢ တြဲၤအတၢ်သူၣ်ထီၣ် အဆိကတၢၢ်တဖျၢၣ် အပူၤလီၤ. တြဲၤအတၢ်သူၣ်ထီၣ်အံၤ ထီဝဲ အပျၢ် ၅၀ ဒီးအလဲၢ်အိၣ်ဝဲ ၂၅ ပျၢ်လီၤ. ၂၂ ဒီးအပဲတြီဖိတဖၣ်, အဘျီၣ်ဒိၣ် ဒီးသ့ၣ်စူၣ်ပလိၣ်တဖၣ် လၢအစိးပျၤအသးန့ၣ်+ အထဲသိးလိာ်အသးဒီး ပဲတြီဖိ, ဘျီၣ်ဒိၣ် ဒီးသ့ၣ်စူၣ်ပလိၣ် လၢအအိၣ်လၢ တြဲၤအတၢ်သူၣ်ထီၣ်လၢ မုၢ်ထီၣ်တခီ အပူၤလီၤ. ဃီသွါအိၣ်ဝဲ နွံသွါလၢ ပှၤကလဲၤထီၣ် ဖဲန့ၣ်အဂီၢ် ဒီးဖဲန့ၣ်န့ၣ် ပှၤကထံၣ်စိ ဘျီၣ်ဒိၣ်လီၤ.

၂၃ တၢ်ပျီလၢအအံၣ်တဘ့ၣ် အပူၤန့ၣ် အိၣ်ဝဲဒီး တြဲၤအတၢ်သူၣ်ထီၣ်တဖျၢၣ်လၢ အကွၢ်ဆၢၣ်မဲာ်လိာ်အသးဒီး တြဲၤအတၢ်သူၣ်ထီၣ် လၢကလံၤစိးတခီ ဒီးအဂၤတဖျၢၣ်န့ၣ် ကွၢ်ဆၢၣ်မဲာ်လိာ်အသးဒီး တြဲၤအတၢ်သူၣ်ထီၣ်လၢ မုၢ်ထီၣ်တခီလီၤ. ဒီးအဝဲထိၣ်ဝဲ တြဲၤအတၢ်သူၣ်ထီၣ် တဖျၢၣ်ဒီးတဖျၢၣ် အတၢ်ဒ့ၣ်စၢၤ ဒီးအိၣ်ဝဲ အပျၢ် ၁၀၀ လီၤ.

၂၄ ဝံၤဒီး အဝဲလဲၤဆှၢယၤလၢ ကလံၤထံး ဒီးယထံၣ်ဘၣ် တြဲၤအတၢ်သူၣ်ထီၣ်လၢ ကလံၤထံးတခီလီၤ.+ ဒီးအဝဲထိၣ်ဝဲ တြဲၤအတၢ်သူၣ်ထီၣ်အံၤ အတၢၣ်တဖၣ်လၢ တၢ်ကပၤ ဒီးအဘျီၣ်ဒိၣ် ဒီးအထဲသိးလိာ်အသးဒီး အဂၤတဖၣ်လီၤ. ၂၅ လၢတြဲၤအတၢ်သူၣ်ထီၣ်အံၤအပူၤ ခံကပၤလၢာ်န့ၣ် အိၣ်ဝဲဒီး ပဲတြီဖိတဖၣ် လၢအလီၤဂာ်လိာ်သးဒီး အဂၤတဖၣ် ဒီးအအိၣ်ဒီး ဘျီၣ်ဒိၣ်လီၤ. တြဲၤအတၢ်သူၣ်ထီၣ်အံၤ ထီဝဲ အပျၢ် ၅၀ ဒီးအလဲၢ်အိၣ်ဝဲ ၂၅ ပျၢ်လီၤ. ၂၆ ဃီသွါအိၣ်ဝဲနွံသွါ လၢပှၤကလဲၤထီၣ် ဖဲန့ၣ်အဂီၢ်+ ဒီးဖဲန့ၣ်န့ၣ် ပှၤကထံၣ်စိ ဘျီၣ်ဒိၣ်လီၤ. ဒီးလၢတၢၣ်လၢ အအိၣ်လၢ တၢ်ကပၤတဖၣ် အလိၤန့ၣ် အိၣ်ဝဲဒီး သ့ၣ်စူၣ်ပလိၣ်တဖၣ်လၢ အစိးပျၤအသး တကပၤတခါလီၤ.

၂၇ လၢတၢ်ပျီလၢ အအံၣ်တဘ့ၣ်အပူၤန့ၣ် အိၣ်ဒီး တြဲၤအတၢ်သူၣ်ထီၣ်တဖျၢၣ်လၢ အဃၣ်အသးလၢ ကလံၤထံးတခီလီၤ. ဒီးအဝဲထိၣ်ဝဲစးထီၣ်ဖဲန့ၣ် တုၤလၢ တြဲၤအတၢ်သူၣ်ထီၣ်လၢ ကလံၤထံးတခီ ဒီးလၢတြဲၤအတၢ်သူၣ်ထီၣ် ခံဖျၢၣ်အံၤအဘၢၣ်စၢၤန့ၣ် တၢ်ဒ့ၣ်စၢၤအိၣ်ဝဲ အပျၢ် ၁၀၀ လီၤ. ၂၈ ဒီးအဝဲလဲၤဆှၢယၤလၢ တြဲၤအတၢ်သူၣ်ထီၣ်လၢ ကလံၤထံးတခီ လၢအအိၣ်လၢ တၢ်ပျီလၢအအံၣ်တဘ့ၣ် အပူၤလီၤ. ဖဲအဝဲထိၣ်ဝဲ တြဲၤအတၢ်သူၣ်ထီၣ်လၢ ကလံၤထံးတခီအခါ အထဲသိးလိာ်အသးဒီး တြဲၤအတၢ်သူၣ်ထီၣ် အဂၤတဖၣ်လီၤ. ၂၉ အပှၤခိးတၢ်ဖိအဒၢးတဖၣ်, အတၢၣ်တဖၣ် လၢတၢ်ကပၤ ဒီးအဘျီၣ်ဒိၣ်န့ၣ် ထဲသိးလိာ်အသးဒီး အဂၤတဖၣ်လီၤ. ဒီးပဲတြီဖိတဖၣ် အိၣ်ဝဲ ခံကပၤလၢာ် ဒီးအအိၣ်ဒီး ဘျီၣ်ဒိၣ်လီၤ. တြဲၤအတၢ်သူၣ်ထီၣ်အံၤ ထီဝဲ အပျၢ် ၅၀ ဒီးအလဲၢ်အိၣ်ဝဲ ၂၅ ပျၢ်လီၤ.+ ၃၀ တြဲၤအတၢ်သူၣ်ထီၣ် တဖျၢၣ်စုာ်စုာ် လၢပှၤကလဲၤနုာ်လီၤလၢ တၢ်ပျီလၢအအံၣ်တဘ့ၣ် အဂီၢ်န့ၣ် အိၣ်ဝဲဒီး ဘျီၣ်ဒိၣ်တဖျၢၣ်စုာ်စုာ်လီၤ. ဒီးဘျီၣ်ဒိၣ်တဖၣ်န့ၣ် အလဲၢ်အိၣ်ဝဲ ၂၅ ပျၢ် ဒီးအထီအိၣ်ဝဲ ၅ ပျၢ်လီၤ. ၃၁ ဒီးတၢ်ပျီလၢအအံၣ်တဘ့ၣ် အဘျီၣ်ဒိၣ်န့ၣ် ဃၣ်ဃီၤအသးဆူ တၢ်ပျီလၢ အလဲၢ်တဘ့ၣ်လီၤ. ဒီးလၢအတၢၣ်လၢ တၢ်ကပၤတဖၣ် အလိၤန့ၣ် အိၣ်ဝဲဒီး သ့ၣ်စူၣ်ပလိၣ် စိးပျၤအသး+ ဒီးဃီသွါအိၣ်ဝဲ ဃိးသွါလၢ ပှၤကလဲၤထီၣ်လၢ ဘျီၣ်ဒိၣ်အကိပူၤ အဂီၢ်လီၤ.+

၃၂ ဒီးယအိၣ်လၢ မုၢ်ထီၣ်တခီဒီး အဝဲလဲၤဆှၢယၤလၢ တၢ်ပျီလၢအအံၣ်တဘ့ၣ်အပူၤလီၤ. အဝဲထိၣ်ဝဲ တြဲၤအတၢ်သူၣ်ထီၣ်ဖဲန့ၣ် ဒီးအထဲသိးလိာ်အသးဒီး တြဲၤအတၢ်သူၣ်ထီၣ် အဂၤတဖၣ်လီၤ. ၃၃ အပှၤခိးတၢ်ဖိအဒၢးတဖၣ်, အတၢၣ်တဖၣ် လၢတၢ်ကပၤ ဒီးအဘျီၣ်ဒိၣ်န့ၣ် ထဲသိးလိာ်အသးဒီး အဂၤတဖၣ်လီၤ. ဒီးပဲတြီဖိတဖၣ် အိၣ်ဝဲ ခံကပၤလၢာ် ဒီးအအိၣ်ဒီး ဘျီၣ်ဒိၣ်လီၤ. တြဲၤအတၢ်သူၣ်ထီၣ်အံၤ ထီဝဲ အပျၢ် ၅၀ ဒီးအလဲၢ်အိၣ်ဝဲ ၂၅ ပျၢ်လီၤ. ၃၄ ဒီးအဘျီၣ်ဒိၣ်န့ၣ် ဃၣ်ဃီၤအသးဆူ တၢ်ပျီလၢ အလဲၢ်တဘ့ၣ်လီၤ. ဒီးလၢအတၢၣ်လၢ အအိၣ်လၢ တၢ်ကပၤ ခံကပၤလၢာ် အလိၤန့ၣ် အိၣ်ဝဲဒီး သ့ၣ်စူၣ်ပလိၣ် စိးပျၤအသး ဒီးဃီသွါအိၣ်ဝဲ ဃိးသွါလၢ ပှၤကလဲၤထီၣ်လၢ ဘျီၣ်ဒိၣ်အကိပူၤ အဂီၢ်လီၤ.

၃၅ ဒီးအဝဲလဲၤဆှၢယၤလၢ တြဲၤအတၢ်သူၣ်ထီၣ်လၢ ကလံၤစိးတခီလီၤ.+ အဝဲထိၣ်ဝဲ တြဲၤအတၢ်သူၣ်ထီၣ်အံၤ ဒီးအထဲသိးလိာ်အသးဒီး တြဲၤအတၢ်သူၣ်ထီၣ် အဂၤတဖၣ်လီၤ. ၃၆ အပှၤခိးတၢ်ဖိအဒၢးတဖၣ်, အတၢၣ်တဖၣ် လၢတၢ်ကပၤ ဒီးအဘျီၣ်ဒိၣ်န့ၣ် ထဲသိးလိာ်အသးဒီး အဂၤတဖၣ်လီၤ. ဒီးပဲတြီဖိတဖၣ် အိၣ်ဝဲ ခံကပၤလၢာ်လီၤ. တြဲၤအတၢ်သူၣ်ထီၣ်အံၤ ထီဝဲ အပျၢ် ၅၀ ဒီးအလဲၢ်အိၣ်ဝဲ ၂၅ ပျၢ်လီၤ. ၃၇ ဒီးအတၢၣ်တဖၣ် လၢတၢ်ကပၤ ခံကပၤလၢာ်န့ၣ် ဃၣ်ဃီၤအသးဆူ တၢ်ပျီလၢ အလဲၢ်တဘ့ၣ်လီၤ. လၢအလိၤန့ၣ် အိၣ်ဝဲဒီး သ့ၣ်စူၣ်ပလိၣ် စိးပျၤအသး ဒီးဃီသွါအိၣ်ဝဲ ဃိးသွါလၢ ပှၤကလဲၤထီၣ်လၢ ဘျီၣ်ဒိၣ်အကိပူၤ အဂီၢ်လီၤ.

၃၈ ပှၤအီၣ်တၢ်အဒၢး တဖျၢၣ်လၢ အအိၣ်ဒီး အကျဲနုာ်လီၤအလီၢ်န့ၣ် အိၣ်ဘူးဒီး တြဲၤအတၢ်သူၣ်ထီၣ် အတၢၣ်လၢတၢ်ကပၤတဖၣ်လီၤ. တၢ်လုၢ်ဒွဲၣ်အူတဖၣ်န့ၣ် ဘၣ်တၢ်သ့ကဆှီအီၤ ဖဲန့ၣ်လီၤ.+

၃၉ ဒီးတြဲၤအတၢ်သူၣ်ထီၣ် အဘျီၣ်ဒိၣ် ခံကပၤလၢာ်န့ၣ် အိၣ်ဝဲဒီး စီၢ်နီၤခိၣ်ခံဖျၢၣ် စုာ်စုာ်လီၤ. စီၢ်နီၤခိၣ်တဖၣ်အံၤန့ၣ် မ့ၢ်ဝဲလၢ ပှၤကမၤသံ ဆၣ်ဖိကီၢ်ဖိတဖၣ်လၢ တၢ်လုၢ်ဒွဲၣ်အူအဂီၢ်,+ တၢ်လုၢ်လၢ တၢ်ဒဲးဘးအဂီၢ်+ ဒီးတၢ်လုၢ်လၢ တၢ်ကမၣ်အဂီၢ်လီၤ.+ ၄၀ တြဲၤအတၢ်သူၣ်ထီၣ် လၢကလံၤစိးတခီ အကျဲနုာ်လီၤ အကပၤန့ၣ် အိၣ်ဝဲဒီး စီၢ်နီၤခိၣ် ခံဖျၢၣ်လီၤ. ဒီးလၢတြဲၤအတၢ်သူၣ်ထီၣ် အဘျီၣ်ဒိၣ် အဝဲတကပၤန့ၣ် အိၣ်ဒီး စီၢ်နီၤခိၣ် ခံဖျၢၣ်လီၤ. ၄၁ တြဲၤအတၢ်သူၣ်ထီၣ် တကပၤစုာ်စုာ်န့ၣ် အိၣ်ဝဲဒီး စီၢ်နီၤခိၣ် လွံၢ်ဖျၢၣ်လီၤ. အဃိ စီၢ်နီၤခိၣ်ခဲလၢာ်န့ၣ် အိၣ်ဝဲ ဃိးဖျၢၣ်လီၤ. စီၢ်နီၤခိၣ်တဖၣ်အံၤန့ၣ် မ့ၢ်ဝဲလၢ ပှၤကမၤသံ ဆၣ်ဖိကီၢ်ဖိ လၢတၢ်ကလုၢ်ထီၣ်အီၤ အဂီၢ်လီၤ. ၄၂ စီၢ်နီၤခိၣ် လွံၢ်ဖျၢၣ်လၢ ပှၤသူအီၤလၢ တၢ်လုၢ်ဒွဲၣ်အူအဂီၢ်န့ၣ် ဘၣ်တၢ်တ့အီၤလၢ လၢၢ်လၢ တၢ်စိးပျၤအီၤလီၤ. ဒီးစီၢ်နီၤခိၣ် တဖၣ်အံၤန့ၣ် ထီဝဲ တပျၢ်တထါ ဒီးအဒီၣ်ဃီၤအိၣ်ဝဲ တပျၢ်တထါ ဒီးအကစီၤ ထီၣ်ထီဝဲ တပျၢ်လီၤ. ဒီးလၢစီၢ်နီၤခိၣ် တဖၣ်အံၤ အလိၤန့ၣ် အိၣ်ဝဲဒီး တၢ်ပီးတၢ်လီလၢ ပှၤကမၤသံ ဆၣ်ဖိကီၢ်ဖိလၢ တၢ်လုၢ်ဒွဲၣ်အူအဂီၢ် ဒီးတၢ်လုၢ်တၢ်ပာ်တဖၣ် အဂီၢ်လီၤ. ၄၃ တၢ်ပာ်ထီၣ်တၢ်ဖိတၢ်လံၤ အလီၢ်လၢ အလဲၢ်အိၣ်ဝဲ စုနၢလွံၢ်ဘိန့ၣ် ဘၣ်တၢ်ထီထီၣ်အီၤလၢ တၢ်ဒူၣ်လၢတၢ်ကိပူၤအလိၤ ဝးဝးလီၤ. ဒီးတၢ်လုၢ်တၢ်ပာ် အတၢ်ညၣ်န့ၣ် ပှၤပာ်လီၤဝဲလၢ စီၢ်နီၤခိၣ်တဖၣ် အဖီခိၣ်လီၤ.

၄၄ တြဲၤအတၢ်သူၣ်ထီၣ်လၢ တၢ်ကိပူၤတခီ အကပၤန့ၣ် အိၣ်ဝဲဒီး ပှၤအီၣ်တၢ်အဒၢးတဖၣ် လၢပှၤသးဝံၣ်တၢ်ဖိတဖၣ် အဂီၢ်လီၤ.+ ဒီးပှၤအီၣ်တၢ်အဒၢးတဖၣ်အံၤ အိၣ်ဝဲလၢ တၢ်ပျီလၢအအံၣ်တဘ့ၣ်အပူၤ ဒီးအအိၣ်ဘူးဒီး တြဲၤအတၢ်သူၣ်ထီၣ်လၢ ကလံၤစိးတခီ ဒီးအဃၣ်အသးလၢ ကလံၤထံးတခီလီၤ. ဒီးပှၤအီၣ်တၢ်အဒၢး အဂၤတဖျၢၣ်န့ၣ် အိၣ်ဘူးဒီး တြဲၤအတၢ်သူၣ်ထီၣ် လၢမုၢ်ထီၣ်တခီ ဒီးအဃၣ်အသးလၢ ကလံၤစိးတခီလီၤ.

၄၅ ဒီးအဝဲ တဲယၤလၢ “ပှၤအီၣ်တၢ်အဒၢးလၢ အဃၣ်အသးလၢ ကလံၤထံးတခီန့ၣ် မ့ၢ်ဝဲဒၣ်လၢ ပှၤလုၢ်တၢ်ဒိၣ်တဖၣ်လၢ အမၤတၢ်လၢ တၢ်လုၢ်ဟံၣ်အပူၤ အဂီၢ်လီၤ.+ ၄၆ ပှၤအီၣ်တၢ်အဒၢးလၢ အဃၣ်အသးလၢ ကလံၤစိးတခီန့ၣ် မ့ၢ်ဝဲဒၣ်လၢ ပှၤလုၢ်တၢ်ဒိၣ်တဖၣ်လၢ အမၤတၢ်လၢ တၢ်လုၢ်လီၢ် အဂီၢ်လီၤ.+ အဝဲသ့ၣ်န့ၣ် မ့ၢ်ဝဲ စီၤစၤဒိး အစၢၤအသွဲၣ်တဖၣ်လီၤ.+ ဒီးအဝဲသ့ၣ် မ့ၢ်ပှၤလ့ၤဝံဖိတဖၣ်လၢ အဘၣ်တၢ်ဟ့ၣ်လီၤအီၤမူဒါလၢ ကသုးဘူးအသးဆူ ယဟိဝၤယွၤအအိၣ် လၢကမၤအတၢ် အဂီၢ်လီၤ.”+

၄၇ ဒီးအဝဲထိၣ်ဝဲ တၢ်ပျီလၢအအံၣ်တဘ့ၣ်လီၤ. အထီဝဲ အပျၢ် ၁၀၀ ဒီးအဒီၣ်ဃီၤအိၣ်ဝဲ အပျၢ် ၁၀၀ ဒီးအမ့ၢ်ဝဲ တၢ်လွံၢ်နၢၣ်လၢ အကနူၤ ထဲသိးလိာ်သးလီၤ. ဒီးတၢ်လုၢ်လီၢ်န့ၣ် အိၣ်ဝဲလၢ တၢ်လုၢ်ဟံၣ် အမဲာ်ညါလီၤ.

၄၈ ဒီးအဝဲ လဲၤဆှၢနုာ်ယၤလၢ ဘျီၣ်ဒိၣ်လၢ အအိၣ်လၢတၢ်လုၢ်ဟံၣ် အမဲာ်ညါ+ ဒီးအထိၣ်ဝဲ တၢ်အထူၣ်လၢတၢ်ကပၤ လၢအအိၣ်ဖဲ ကျဲနုာ်လီၤအလီၢ်လီၤ. တၢ်ထူၣ်တကပၤန့ၣ် လဲၢ်ဝဲ ယဲၢ်ပျၢ် ဒီးအဝဲတကပၤန့ၣ်လဲၢ်ဝဲ သၢပျၢ်လီၤ. ဒီးအအိၣ်ဝဲလၢ စုစ့ၣ်တထူၣ် ဒီးစုထွဲတထူၣ်လီၤ.

၄၉ ဘျီၣ်ဒိၣ်အံၤ လဲၢ်ဝဲ အပျၢ် ၂၀ ဒီးထီဝဲ ၁၁* ပျၢ်လီၤ. ပှၤကဘၣ်လဲၤထီၣ် ဃီသွါတဖၣ် ဒ်သိးပှၤကလဲၤနုာ်ဖဲန့ၣ် အဂီၢ်လီၤ. ဒီးတၢ်ထူၣ်လၢအအိၣ်ဘူးဒီး တၢ်ဒူၣ်ကပၤန့ၣ် အိၣ်ဝဲ တကပၤတထူၣ်လီၤ.+

၄၁ ဒီးအဝဲ လဲၤဆှၢယၤလၢ တၢ်လီၢ်စီဆှံလီၤ.* ဒီးအဝဲထိၣ်ဝဲ တၢ်ထူၣ်လၢတၢ်ကပၤတဖၣ် ဒီးတၢ်ထူၣ်တဖၣ်အံၤ တကပၤန့ၣ်လဲၢ်ဝဲဃုပျၢ်* ဒီးတၢ်ထူၣ်လၢ အဝဲတကပၤန့ၣ် လဲၢ်ဝဲဃုပျၢ်လီၤ. ၂ ဒီးကျဲနုာ်လီၤအလီၢ်န့ၣ် လဲၢ်ဝဲ အပျၢ်တဆံလီၤ. ဒီးတၢ်ဒူၣ်လၢအံၤတကပၤန့ၣ် လဲၢ်ဝဲ ယဲၢ်ပျၢ် ဒီးအဝဲတကပၤန့ၣ် လဲၢ်ဝဲယဲၢ်ပျၢ်လီၤ. ဒီးအဝဲထိၣ်ဝဲ တၢ်လီၢ်စီဆှံ အထီန့ၣ်အိၣ်ဝဲ အပျၢ် ၄၀ ဒီးအလဲၢ်န့ၣ် အိၣ်ဝဲ အပျၢ် ၂၀ လီၤ.

၃ ဒီးအဝဲ လဲၤနုာ်လီၤလၢ တၢ်ကိပူၤ ဒီးထိၣ်ဝဲ တၢ်ထူၣ်လၢတၢ်ကပၤ လၢအအိၣ်ဖဲ ကျဲနုာ်လီၤအလီၢ်လီၤ. တၢ်ထူၣ်အံၤ တီၣ်ဝဲ ခံပျၢ် ဒီးတၢ်ဒူၣ်လၢ ကျဲနုာ်လီၤအလီၢ် အကပၤ ခံကပၤလၢာ်န့ၣ် လဲၢ်ဝဲ နွံပျၢ်လီၤ. ဒီးကျဲနုာ်လီၤအလီၢ်န့ၣ် လဲၢ်ဝဲ ၆ ပျၢ်လီၤ. ၄ ဒီးအဝဲထိၣ်ဝဲ ဒၢးလၢအဃၣ်အမဲာ်ဆူ တၢ်လီၢ်စီဆှံ ဒီးအလဲၢ်အိၣ်ဝဲ အပျၢ် ၂၀ ဒီးအထီအိၣ်ဝဲ အပျၢ် ၂၀ လီၤ.+ ဒီးအဝဲ တဲယၤလၢ “အဝဲအံၤမ့ၢ်ဝဲ တၢ်လီၢ်စီဆှံကတၢၢ်လီၤ.”+

၅ ဒီးအဝဲထိၣ်ဝဲ တၢ်လုၢ်ဟံၣ်အဒူၣ် ဒီးအတီၣ်ဝဲ ဃုပျၢ်လီၤ. ဒီးဒၢးဖိတဖၣ် လၢတၢ်ကပၤ လၢအအိၣ်ဝးတရံး တၢ်လုၢ်ဟံၣ်န့ၣ် လဲၢ်ဝဲလွံၢ်ပျၢ်လီၤ.+ ၆ ဒၢးဖိတဖၣ်အံၤန့ၣ် အိၣ်ဝဲသၢကထြၢ ဒီးတကထြၢစုာ်စုာ်န့ၣ် အိၣ်ဝဲဒီး ဒၢးအဖျၢၣ် ၃၀ လီၤ. လၢတၢ်လုၢ်ဟံၣ် အဒူၣ်အလိၤန့ၣ် အိၣ်ဝဲဒီး တၢ်ပတီၢ်တဖၣ်ဝးဝးလၢ ပှၤကတီၣ်ထီၣ် ဒၢးဖိတဖၣ် အတၢ်တီအဂီၢ်လီၤ. အဃိ တၢ်တီတဖၣ်န့ၣ် တလဲၤနုာ်လီၤလၢ တၢ်လုၢ်ဟံၣ်အဒူၣ်ပူၤဘၣ်.+ ၇ လၢတၢ်လုၢ်ဟံၣ် အကပၤ ခံခီလၢာ်န့ၣ် အိၣ်ဒီးဃီသွါလၢ အတဝံာ်အသး ဒီးတုၤထီၣ်ဝဲဆူ ဒၢးဖိလၢ တၢ်ဖီခိၣ်တဖၣ်လီၤ.+ ပှၤမ့ၢ်အိၣ်လၢ အဖီလာ်ကတၢၢ် တကထြၢ ဒီးထီၣ်လၢ ခံကထြၢ တကထြၢန့ၣ် ဒၢးဖိလၢ အအိၣ်ဝဲဖဲန့ၣ်တဖၣ်န့ၣ် လဲၢ်န့ၢ်ဒံးဒၢးဖိတဖၣ်လၢ အဖီလာ်ကတၢၢ် တကထြၢလီၤ. ဒီးဒၢးဖိလၢ သၢကထြၢတကထြၢန့ၣ် လဲၢ်န့ၢ်ဒံး ဒၢးဖိတဖၣ်လၢ ခံကထြၢတကထြၢလီၤ.

၈ ဒီးယထံၣ်ဘၣ်လၢ တၢ်အပတီၢ်လၢ တၢ်လုၢ်ဟံၣ်ခီၣ်ထံးန့ၣ် အပိၣ်ထီၣ်ဝဲ တစဲးလၢ တၢ်လုၢ်ဟံၣ်အချၢဝးဝးလီၤ. ဒီးဒၢးဖိတဖၣ် အခီၣ်ထံးန့ၣ် အကစီၤထီၣ်ထီအိၣ်ဝဲ နီၣ်ထိၣ်တပိၢ်တဘိလၢ အအိၣ်ဝဲ ဃုပျၢ်လီၤ. ၉ ဒၢးဖိတဖၣ် အဒူၣ်လၢအချၢတခီန့ၣ် အတီၣ်အိၣ်ဝဲ ယဲၢ်ပျၢ်လီၤ. တၢ်သူၣ်ထီၣ်တခါလၢ ဒၢးဖိတဖၣ်အံၤ အိၣ်လၢအပူၤန့ၣ် ဘုးတာ်လိာ်သးဒီး တၢ်လုၢ်ဟံၣ်လီၤ. ဒီးတၢ်လီၢ်လီၤပျီ* အိၣ်ဝဲလၢ တၢ်သူၣ်ထီၣ်တခါအံၤ အကပၤဝးဝးလီၤ.

၁၀ လၢတၢ်လုၢ်ဟံၣ် အကပၤ လၢအံၤတကပၤ ဒီးလၢန့ၣ်တကပၤန့ၣ် အိၣ်ဝဲဒီး တၢ်လီၢ်လၢအအိၣ်လီၤပျီ လၢအလဲၢ် အပျၢ် ၂၀ စုာ်စုာ် ဖဲတၢ်လုၢ်ဟံၣ်ဒီး ပှၤအီၣ်တၢ်အဒၢး အဘၢၣ်စၢၤလီၤ.+ ၁၁ လၢဒၢးဖိတဖၣ် ဒီးတၢ်လီၢ်လီၤပျီ အဘၢၣ်စၢၤန့ၣ် အိၣ်ဝဲဒီး ကျဲနုာ်လီၤအလီၢ်လီၤ. ကျဲနုာ်လီၤအံၤ အိၣ်ဝဲလၢ ကလံၤစိးတခါ ဒီးကလံၤထံးတခါလီၤ. တၢ်လီၢ်လီၤပျီလၢ အအိၣ်လၢ တၢ်လုၢ်ဟံၣ် အကပၤဝးဝးအံၤန့ၣ် အိၣ်ဝဲ ယဲၢ်ပျၢ်လီၤ.

၁၂ တၢ်သူၣ်ထီၣ် လၢမုၢ်နုာ် လၢအမဲာ်ဃၣ်အသးလၢ တၢ်လီၢ်လၢအအိၣ်လီၤပျီ တကပၤန့ၣ် ထီဝဲ အပျၢ် ၇၀ ဒီးလဲၢ်ဝဲ အပျၢ် ၉၀ လီၤ. ဒီးတၢ်သူၣ်ထီၣ်တဖျၢၣ်အံၤ အဒူၣ်ဝးတရံးအီၤန့ၣ် တီၣ်ဝဲ ယဲၢ်ပျၢ်လီၤ.

၁၃ ဒီးအဝဲထိၣ်ဝဲ တၢ်လုၢ်ဟံၣ် ဒီးအထီအိၣ်ဝဲ အပျၢ် ၁၀၀ လီၤ. ဒီးတၢ်လီၢ်လၢအအိၣ်လီၤပျီ, တၢ်သူၣ်ထီၣ်* ဒီးအဒူၣ်တဖၣ်န့ၣ် ခဲလၢာ် အိၣ်ဝဲအပျၢ် ၁၀၀ လီၤ. ၁၄ ဒီးတၢ်လုၢ်ဟံၣ်အမဲာ်ညါလၢ အမဲာ်ဃၣ်အသးလၢ မုၢ်ထီၣ်တခီ ပၣ်ဃုာ်ဒီးတၢ်လီၢ်လၢ အအိၣ်လီၤပျီန့ၣ် အိၣ်ဝဲအပျၢ် ၁၀၀ လီၤ.

၁၅ အဝဲထိၣ်ဝဲ တၢ်သူၣ်ထီၣ်လၢ အမဲာ်ဃၣ်အသးလၢ တၢ်လီၢ်လၢအအိၣ်လီၤပျီလၢ အအိၣ်လၢ တၢ်လုၢ်ဟံၣ်အလီၢ်ခံ ဃုာ်ဒီး အတၢ်ဟးထီၣ်ဟးလီၤအလီၢ်တဖၣ်လၢ တၢ်ကပၤ ခံကပၤလၢာ်န့ၣ် ဒီးအိၣ်ဝဲ အပျၢ် ၁၀၀ လီၤ.

အဝဲထိၣ်ဝဲ တၢ်လီၢ်စီဆှံ, တၢ်လီၢ်စီဆှံကတၢၢ်+ ဒီးဘျီၣ်ဒိၣ်တဖၣ်လၢ အအိၣ်လၢ တၢ်ပျီအပူၤလီၤ. ၁၆ ဒီးအဝဲထိၣ်စ့ၢ်ကီးဝဲ ကျဲစၢၤတဖၣ်, ပဲတြီဖိတဖၣ် လၢအကနူၤ အံၣ်လီၤအံၣ်လီၤဝဲ+ ဒီးတၢ်ဟးထီၣ်ဟးလီၤအလီၢ်တဖၣ်လၢ အအိၣ်လၢ တၢ်လီၢ်သၢတီၤန့ၣ်လီၤ. တၢ်ဒူၣ်လၢ အဘူးဒီး ကျဲစၢၤအကပၤန့ၣ် ဘၣ်တၢ်ကျးအီၤလၢ သ့ၣ်ဘၣ်+ စးထီၣ်လၢ တၢ်ဒါခိၣ် တုၤလၢ ပဲတြီဖိတဖၣ်အအိၣ်လီၤ. ဒီးပဲတြီဖိတဖၣ်စ့ၢ်ကီး ဘၣ်တၢ်ကျးအီၤ ဒ်န့ၣ်စ့ၢ်ကီးလီၤ. ၁၇ ကျဲနုာ်လီၤ အဖီခိၣ်, တၢ်လုၢ်ဟံၣ်အကိပူၤ ဒီးအချၢ ဒီးတၢ်ဒူၣ်လၢအအိၣ်ဝးတရံး တၢ်လုၢ်ဟံၣ် အကိပူၤ ဒီးအချၢခဲလၢာ်န့ၣ် ဘၣ်တၢ်ထိၣ်အီၤလီၤ. ၁၈ ဒီးအိၣ်ဝဲဒီး ခ့ရူာ်အဂီၤတဖၣ်လၢ+ ပှၤစိးပျၤအီၤ ဒီးသ့ၣ်စူၣ်ပလိၣ် အဂီၤလၢပှၤစိးပျၤအီၤတဖၣ်လီၤ.+ ဒီးသ့ၣ်စူၣ်ပလိၣ် တထူၣ်စုာ်စုာ်န့ၣ် အိၣ်ဝဲလၢ ခ့ရူာ်တဒုဒီးတဒု အဘၢၣ်စၢၤလီၤ. ဒီးခ့ရူာ်တဒုစုာ်စုာ်န့ၣ် အမဲာ်သၣ်အိၣ်ဝဲ ခံဘ့ၣ်လီၤ. ၁၉ ဒီးအမဲာ်သၣ်လၢ အလီၤဂာ်ဒီး ပှၤကညီအမဲာ်န့ၣ် ကွၢ်ဃီၤတၢ်လၢအံၤတကပၤလၢ သ့ၣ်စူၣ်ပလိၣ် လၢအံၤတထူၣ်အအိၣ် ဒီးအမဲာ်သၣ်လၢ အလီၤဂာ်ဒီး ခ့ယုၢ်အမဲာ်သၣ်န့ၣ် ကွၢ်ဃီၤတၢ်လၢန့ၣ်တကပၤလၢ သ့ၣ်စူၣ်ပလိၣ် လၢန့ၣ်တထူၣ် အအိၣ်လီၤ.+ ဒီးဘၣ်တၢ်စိးပျၤအီၤ ဒ်န့ၣ်လၢ တၢ်လုၢ်ဟံၣ်ဒီတဖျၢၣ် အဒူၣ်လိၤဝးဝးလီၤ. ၂၀ လၢတၢ်လုၢ်ဟံၣ် အဒူၣ်လိၤန့ၣ် အိၣ်ဝဲဒီး ခ့ရူာ်ဒီးသ့ၣ်စူၣ်ပလိၣ် အဂီၤလၢ ပှၤစိးပျၤအီၤ စးထီၣ်လၢ တၢ်ဒါခိၣ် တုၤလၢတၢ်လီၢ်လၢ အအိၣ်လၢ ကျဲနုာ်လီၤအဖီခိၣ်လီၤ.

၂၁ တၢ်လုၢ်ဟံၣ် အပဲတြီ အထူၣ်တဖၣ်န့ၣ် အိၣ်ဒီးအနၢၣ်လွံၢ်နၢၣ် လၢအကနူၤ ထဲသိးလိာ်အသးလီၤ.+ လၢတၢ်စီဆှံအလီၢ်* အမဲာ်ညါန့ၣ်အိၣ်ဒီး တၢ်လၢအလီၤဂာ်ဒီး ၂၂ တၢ်လုၢ်လီၢ် လၢပှၤတ့အီၤလၢသ့ၣ်လီၤ.+ ဒီးအကစီၤထီၣ်ထီဝဲ သၢပျၢ် ဒီးအထီအိၣ်ဝဲ ခံပျၢ် ဒီးအအိၣ်ဒီး အနၢၣ်တဖၣ်လီၤ. ဒီးအခီၣ်ထံး ဒီးအကပၤန့ၣ် ပှၤတ့အီၤလၢ သ့ၣ်လီၤ. ဒီးအဝဲတဲယၤလၢ “အဝဲအံၤမ့ၢ်ဝဲ စီၢ်နီၤခိၣ်လၢ အအိၣ်လၢ ယဟိဝၤယွၤ အမဲာ်ညါလီၤ.”+

၂၃ တၢ်လီၢ်စီဆှံ ဒီးတၢ်လီၢ်စီဆှံကတၢၢ်န့ၣ် အိၣ်ဒီး အပဲတြီခံဘ့ၣ် စုာ်စုာ်လီၤ.+ ၂၄ ပဲတြီတဖၣ်န့ၣ် အိၣ်ဒီးအလၣ်ခံခီလၢ အတရံးအသးသ့ ဒီးပဲတြီတခါစုာ်စုာ်န့ၣ် အိၣ်ဒီးအလၣ်ခံခီလီၤ. ၂၅ တၢ်လုၢ်ဟံၣ် အပဲတြီတဖၣ်န့ၣ် အိၣ်ဝဲဒီးခ့ရူာ် အဂီၤ ဒီးသ့ၣ်စူၣ်ပလိၣ် အဂီၤလၢ အစိးပျၤအသးတဖၣ် ဒ်အအိၣ်ဝဲလၢ တၢ်လုၢ်ဟံၣ် အတၢ်ဒူၣ်ကပၤ အသိးလီၤ.+ ဒီးဘျီၣ်ဒိၣ်အခိၣ်ဒုးလၢ အဘၣ်တၢ်တ့အီၤလၢသ့ၣ်န့ၣ် ဟဲပိၣ်ထီၣ်တစဲးလၢ တၢ်မဲာ်ညါလီၤ. ၂၆ ဘျီၣ်ဒိၣ်အကပၤ ခံကပၤလၢာ်, တၢ်လုၢ်ဟံၣ် အဒၢးဖိတဖၣ် ဒီးတၢ်အခိၣ်ဒုး လၢအပိၣ်ထီၣ်အသးတဖၣ်န့ၣ် အိၣ်ဝဲဒီး ပဲတြီဖိတဖၣ် လၢအကနူၤ အံၣ်လီၤအံၣ်လီၤ+ ဒီးသ့ၣ်စူၣ်ပလိၣ်အဂီၤလၢ ဘၣ်တၢ်စိးပျၤအီၤတဖၣ်လီၤ.

၄၂ ဒီးအဝဲလဲၤဆှၢယၤလၢ တၢ်ပျီလၢ အလဲၢ်တဘ့ၣ်လၢ ကလံၤစိးတခီလီၤ.+ ဒီးအဝဲ လဲၤဆှၢယၤလၢ ပှၤအီၣ်တၢ်အဒၢး အတၢ်သူၣ်ထီၣ်လၢ အအိၣ်ဘူးဒီး တၢ်လီၢ်လၢအအိၣ်လီၤပျီ+ ဒီးအိၣ်စ့ၢ်ကီးဝဲလၢ တၢ်သူၣ်ထီၣ်လၢ တၢ်လုၢ်ဟံၣ်အလီၢ်ခံန့ၣ်* အကပၤလီၤ.+ ၂ ပှၤအီၣ်တၢ်အဒၢး အတၢ်သူၣ်ထီၣ်န့ၣ် အဝဲထိၣ်အီၤ စးထီၣ်လၢ ကျဲနုာ်လီၤအလီၢ် လၢကလံၤစိးတခီဒီး လဲၢ်ဝဲ အပျၢ်* ၁၀၀ ဒီးအထီဝဲ အပျၢ် ၅၀ လီၤ. ၃ အအိၣ်ဝဲလၢ တၢ်ပျီလၢ အအံၣ်တဘ့ၣ် အတၢ်လီၢ်လၢအအိၣ်လီၤပျီ လၢအလဲၢ်ဝဲ အပျၢ် ၂၀+ ဒီးတၢ်ပျီလၢအလဲၢ်တဘ့ၣ် အလၢၢ်ဒါခိၣ် အဘၢၣ်စၢၤလီၤ. တၢ်ဟးထီၣ်ဟးလီၤအလီၢ်တဖၣ်န့ၣ် ကွၢ်ဆၢၣ်မဲာ်လိာ်သး ဒီးတၢ်သူၣ်ထီၣ်အံၤ အိၣ်ဝဲ သၢကထြၢလီၤ. ၄ လၢပှၤအီၣ်တၢ်အဒၢးတဖၣ် အမဲာ်ညါန့ၣ် အိၣ်ဝဲဒီးကျဲဖိတဘိလၢ+ အလဲၢ်ဝဲ အပျၢ် ၁၀ ဒီးအထီဝဲ အပျၢ်* ၁၀၀ လီၤ. ဒီးပှၤအီၣ်တၢ်အဒၢးတဖၣ် အတၢ်နုာ်လီၤအလီၢ်န့ၣ် အိၣ်ဝဲလၢ ကလံၤစိးတခီလီၤ. ၅ ပှၤအီၣ်တၢ် အဒၢးဖိတဖၣ်လၢ တၢ်သူၣ်ထီၣ်အံၤ အဖီခိၣ်ကတၢၢ် တကထြၢန့ၣ် အံၣ်န့ၢ်ဒံး ပှၤအီၣ်တၢ်အဒၢးတဖၣ်လၢ အခၢၣ်သး တကထြၢ ဒီးအဖီလာ်ကတၢၢ် တကထြၢ, မ့ၢ်လၢ တၢ်ဟးထီၣ်ဟးလီၤအလီၢ်တဖၣ်န့ၣ် လဲၢ်ဝဲအဃိလီၤ. ၆ ပှၤအီၣ်တၢ်အဒၢးတဖၣ်န့ၣ် အိၣ်ဝဲ သၢကထြၢလီၤ. ဘၣ်ဆၣ် အတအိၣ်ဒီး တၢၣ်တဖၣ် ဒ်တၢ်ပျီတဖၣ် အိၣ်ဒီးအတၢၣ် အသိးဘၣ်. အဃိ ဒၢးတဖၣ်လၢ အဖီခိၣ်ကတၢၢ် တကထြၢန့ၣ် အံၣ်န့ၢ်ဒံး ဒၢးတဖၣ်လၢ အခၢၣ်သး တကထြၢ ဒီးဒၢးတဖၣ်လၢ အခၢၣ်သးတကထြၢန့ၣ် အံၣ်န့ၢ်ဒံး ဒၢးတဖၣ်လၢ အဖီလာ်ကတၢၢ် တကထြၢလီၤ.

၇ ဒီးတၢ်ဒူၣ်လၢ ဘၣ်တၢ်တ့အီၤလၢလၢၢ် လၢအအိၣ်ဝဲလၢ အချၢတပၤန့ၣ် အိၣ်ဝဲ အပျၢ် ၅၀ လီၤ. တၢ်အဒူၣ်အံၤ အိၣ်ဝဲလၢ ပှၤအီၣ်တၢ်အဒၢးတဖၣ် အမဲာ်ညါ ဒီးအိၣ်သဃဲၤလိာ်သးဒီး တၢ်ပျီလၢ အလဲၢ်တဘ့ၣ် ဒီးပှၤအီၣ်တၢ်အဒၢး အဂၤတဖၣ်လီၤ. ၈ ပှၤအီၣ်တၢ်အဒၢးတဖၣ်လၢ အအိၣ်ဘူးဒီး တၢ်ပျီလၢ အလဲၢ်တဘ့ၣ်န့ၣ် အထီခဲလၢာ် အိၣ်ဝဲ အပျၢ် ၅၀ လီၤ. မ့မ့ၢ် ပှၤအီၣ်တၢ်အဒၢးတဖၣ်လၢ အအိၣ်ဘူးဒီး တၢ်လုၢ်ဟံၣ်တကပၤန့ၣ် အထီခဲလၢာ် အိၣ်ဝဲအပျၢ် ၁၀၀ လီၤ. ၉ ပှၤအီၣ်တၢ်အဒၢးတဖၣ်န့ၣ် အိၣ်ဒီး ကျဲနုာ်လီၤအလီၢ်လၢ မုၢ်ထီၣ်တခီလီၤ. ပှၤမ့ၢ်အိၣ်လၢ တၢ်ပျီလၢ အလဲၢ်တဘ့ၣ် ဒီးပှၤဟဲနုာ်လီၤဖဲန့ၣ် သ့ဝဲလီၤ.

၁၀ လၢတၢ်အဒူၣ်လၢ အဘၣ်တၢ်တ့အီၤလၢ လၢၢ်လၢအအိၣ်ဝဲ လၢမုၢ်ထီၣ်တခီ အလီၢ်ခံန့ၣ် အိၣ်ဝဲစ့ၢ်ကီးဒီး ပှၤအီၣ်တၢ်အဒၢးတဖၣ်လီၤ. ပှၤအီၣ်တၢ်အဒၢးတဖၣ်အံၤ အိၣ်ဘူးဒီး တၢ်လီၢ်လၢအအိၣ်လီၤပျီ ဒီးတၢ်သူၣ်ထီၣ်တဖျၢၣ်န့ၣ်လီၤ.*+ ၁၁ ဒီးကျဲဖိတဘိလၢ ပှၤအီၣ်တၢ်အဒၢးတဖၣ် လၢကလံၤထံးတခီ အမဲာ်ညါန့ၣ် လီၤဂာ်ဒီး ပှၤအီၣ်တၢ်အဒၢးတဖၣ်လၢ ကလံၤစိးတခီ အကျဲဖိတဘိန့ၣ်လီၤ.+ ဒီးပှၤအီၣ်တၢ်အဒၢးတဖၣ်အံၤ အလဲၢ်အထီန့ၣ် ထဲသိးလိာ်အသးဒီး ပှၤအီၣ်တၢ်အဒၢးတဖၣ်လၢ ကလံၤထံးတခီ ဒီးဘၣ်တၢ်ရဲၣ်လီၤကျဲၤလီၤအီၤ ဒ်သိးသိးလီၤ. ဒီးအတၢ်ဟးထီၣ်အကျဲန့ၣ် လီၤဂာ်လိာ်အသးလီၤ. ပှၤအီၣ်တၢ်အဒၢးတဖၣ်လၢ ကလံၤစိးတခီ အကျဲနုာ်လီၤတဖၣ်န့ၣ် ၁၂ လီၤဂာ်လိာ်အသးဒီး ပှၤအီၣ်တၢ်အဒၢးတဖၣ်လၢ ကလံၤထံးတခီ အကျဲနုာ်လီၤတဖၣ်လီၤ. ဒ်သိး ပှၤကနုာ်လီၤ ဖဲန့ၣ်အဂီၢ် လၢကျဲဖိ အခီၣ်ထံးန့ၣ် အိၣ်ဒီးကျဲနုာ်လီၤအလီၢ် လၢအအိၣ်ဘူးဒီး တၢ်ဒူၣ်လၢ ဘၣ်တၢ်တ့အီၤလၢလၢၢ် လၢမုၢ်ထီၣ်တခီလီၤ.+

၁၃ ဒီးအဝဲတဲယၤလၢ “ပှၤအီၣ်တၢ်အဒၢးတဖၣ် လၢကလံၤစိးတခီ ဒီးပှၤအီၣ်တၢ်အဒၢးတဖၣ် လၢကလံၤထံးတခီ လၢအအိၣ်ဘူးဒီး တၢ်လီၢ်လၢအအိၣ်လီၤပျီန့ၣ်+ မ့ၢ်ဝဲပှၤအီၣ်တၢ်အဒၢး စီဆှံတဖၣ်လီၤ. ပှၤလုၢ်တၢ်ဒိၣ်တဖၣ် လၢအသုးဘူးအသးဆူ ယဟိဝၤယွၤ အအိၣ်န့ၣ် အီၣ်ဝဲ တၢ်လုၢ်လၢ အစီဆှံနီၢ်ကီၢ်တဖၣ် ဖဲန့ၣ်လီၤ.+ တၢ်လီၢ်အဝဲအံၤ စီဆှံအဃိ အဝဲသ့ၣ် ပာ်လီၤဝဲ တၢ်လုၢ်လၢ အစီဆှံနီၢ်ကီၢ်, တၢ်လုၢ်ဘု, တၢ်လုၢ်လၢတၢ်ဒဲးဘးအဂီၢ် ဒီးတၢ်လုၢ်လၢတၢ်ကမၣ်အဂီၢ် ဖဲန့ၣ်လီၤ.+ ၁၄ ပှၤလုၢ်တၢ်ဒိၣ်တဖၣ် မ့ၢ်ဟဲနုာ်လီၤလၢ တၢ်စီဆှံအလီၢ်န့ၣ် ဖဲအဝဲသ့ၣ် မၤတၢ်အခါ အကူကၤဝဲ တၢ်ကူတၢ်ကၤလၢ အစီဆှံအဃိ တချုးလၢ အဟးထီၣ်ဖဲန့ၣ် ဒီးလဲၤဝဲလၢ တၢ်ပျီလၢ အလဲၢ်တဘ့ၣ်ဒံးဘၣ်အခါ အဝဲသ့ၣ် ကဘၣ်ဘ့ၣ်လီၤဆိ တၢ်ကူတၢ်ကၤတဖၣ်အံၤလီၤ.+ ဒီးအဝဲသ့ၣ် မ့ၢ်သိးထီၣ် တၢ်ကူတၢ်ကၤ အဂၤတဖၣ်န့ၣ် အဝဲသ့ၣ် လဲၤဝဲလၢ ပှၤဂီၢ်မုၢ် န့ၢ်ဘၣ်အခွဲး လၢကဟဲဝဲအလီၢ်န့ၣ် သ့ဝဲလီၤ.”

၁၅ ဖဲအဝဲထိၣ်ဝဲ တၢ်လုၢ်ဟံၣ် ဝံၤအခါ အဝဲဆှၢထီၣ်ယၤလၢ တၢ်ချၢ လၢတြဲၤအတၢ်သူၣ်ထီၣ် လၢအမဲာ်ဃၣ်အသးလၢ မုၢ်ထီၣ်တခီ အကျဲ+ ဒီးထိၣ်ဝဲ တၢ်လီၢ်ဖဲန့ၣ် ဒီတခါလီၤ.

၁၆ ဒီးအဝဲထိၣ်တၢ်လၢ မုၢ်ထီၣ်တခီ လၢနီၣ်ထိၣ်တပိၢ်တဘိလီၤ.* စးထီၣ် လၢန့ၣ်တကပၤ တုၤလၢအံၤတကပၤန့ၣ် အထီဝဲ တုၤသိးဒီး နီၣ်ထိၣ်တပိၢ်ဘိ အဘိ ၅၀၀ လီၤ.

၁၇ ဒီးအဝဲထိၣ်ကဒီးဝဲလၢ ကလံၤစိးတခီ ဒီးအထီဝဲ တုၤသိးဒီး နီၣ်ထိၣ်တပိၢ်ဘိ အဘိ ၅၀၀ လီၤ.

၁၈ ဒီးအဝဲထိၣ်ကဒီးဝဲလၢ ကလံၤထံးတခီ ဒီးအထီဝဲ တုၤသိးဒီး နီၣ်ထိၣ်တပိၢ်ဘိ အဘိ ၅၀၀ လီၤ.

၁၉ အဝဲလဲၤတရံးဝဲလၢ မုၢ်နုာ်တခီ ဒီးထိၣ်ကဒီးဝဲလၢ မုၢ်နုာ်တခီ ဒီးအထီဝဲ တုၤသိးဒီး နီၣ်ထိၣ်တပိၢ်ဘိ အဘိ ၅၀၀ လီၤ.

၂၀ ဒီးအဝဲထိၣ်တၢ်လီၢ် လွံၢ်ကပၤလၢာ်လီၤ. ဒီးတၢ်ဒူၣ် အိၣ်ဝးတရံးဝဲ တၢ်လီၢ်အဝဲန့ၣ်+ ဒ်သိး ကနီၤဖးဝဲ တၢ်လီၢ်လၢအစီဆှံ ဒီးတၢ်လီၢ်ယိယိဖိအဂီၢ်လီၤ.+ ဒီးတၢ်ဒူၣ် ကိးကပၤဒဲးန့ၣ် အထီဝဲတုၤသိးဒီး နီၣ်ထိၣ်တပိၢ်ဘိ အဘိ ၅၀၀ လီၤ.+

၄၃ ဒီးအဝဲဆှၢယၤလၢ တြဲၤအတၢ်သူၣ်ထီၣ် လၢအမဲာ်ဃၣ်အသးလၢ မုၢ်ထီၣ်တခီလီၤ.+ ၂ ဒီးဖဲန့ၣ် ယထံၣ်အံၣ်စရ့လး အကစၢ်ယွၤ အလၤကပီၤ ဟဲဝဲလၢ မုၢ်ထီၣ်တခီ+ ဒီးအကလုၢ် သီၣ်လီၤဂာ်ဒ် ထံယွၤလီၤဆူၣ်ဆူၣ် သီၣ်ဝဲအသိးလီၤ.+ ဒီးဟီၣ်ခိၣ် ကပီၤထီၣ်ဝဲလၢ အလၤကပီၤ အဃိလီၤ.+ ၃ တၢ်လၢ ယထံၣ်အီၤန့ၣ် လီၤဂာ်ဒီး တၢ်ထံၣ်လၢညါခီလၢ ယထံၣ်ဘၣ်အီၤ ဖဲယ* ကလဲၤမၤဟးဂီၤ ဝ့ၢ်အခါလီၤ. ဒီးအဖျါလီၤဂာ်ဒ် တၢ်လၢ ယထံၣ်တ့ၢ်အီၤဖဲ ထံကျိကဘၢ် အကပၤလီၤ.+ ဒီးယထိၣ်လီၤပှီၤယသးလၢ ဟီၣ်ခိၣ်လိၤလီၤ.

၄ ဒီးယဟိဝၤယွၤ အလၤကပီၤ ဟဲခီဖျိ တြဲၤအတၢ်သူၣ်ထီၣ် လၢအဃၣ်အသးလၢ မုၢ်ထီၣ်တခီ ဒီးနုာ်လီၤဝဲလၢ တၢ်လုၢ်ဟံၣ်ပူၤလီၤ.+ ၅ ဒီးသးစီဆှံ* န့ၣ်ဒုးဆၢထၢၣ်ယၤ ဒီးလဲၤကိးယၤလၢ တၢ်ပျီလၢ အအံၣ်တဘ့ၣ်န့ၣ် အပူၤလီၤ. ဒီးယထံၣ်လၢ တၢ်လုၢ်ဟံၣ် ပှဲၤဝဲဒီး ယဟိဝၤယွၤ အလၤကပီၤလီၤ.+ ၆ ဒီးယနၢ်ဟူ ပှၤတဂၤလၢ တၢ်လုၢ်ဟံၣ်အပူၤ တဲတၢ်ဒီးယၤလီၤ. ဒီးပှၤပိာ်ခွါတဂၤန့ၣ် ဟဲဆၢထၢၣ်လၢ ယကပၤလီၤ.+ ၇ အဝဲတဲယၤလၢ

“ပှၤကညီဖိခွါဧၢ, တၢ်လီၢ်အဝဲအံၤန့ၣ် မ့ၢ်ဝဲ ယလီၢ်ပစိာ်အလီၢ်+ ဒီးယပာ်လီၤ ယခီၣ်ညါသး အလီၢ်လီၤ.+ အဝဲအံၤမ့ၢ် တၢ်လီၢ်လၢ ယကအိၣ်လၢ အံၣ်စရ့လး အပှၤဂီၢ်မုၢ်အကျါ လီၤထူလီၤယိာ် အဂီၢ်လီၤ.+ လၢခံန့ၣ် ပှၤအံၣ်စရ့လးဖိ ဒီးအဝဲသ့ၣ် အစီၤပၤတဖၣ်န့ၣ် တမၤစှၤလီၤ ယမံၤစီဆှံအလၤကပီၤ+ ခီဖျိလၢ အဝဲသ့ၣ် ဘူၣ်ထီၣ်ဘါထီၣ်ယွၤအဂၤတဖၣ်* ဒီးခီဖျိ တၢ်ဂီၤတၢ်ဖှီၣ်လၢ အဝဲသ့ၣ် ပာ်ပနီၣ်ဝဲဒ် အဝဲသ့ၣ် အစီၤပၤတဖၣ်အသိး* န့ၣ်လၢၤဘၣ်. ၈ လၢညါ အဝဲသ့ၣ် သူၣ်လီၤအတၢ်လုၢ်ဟံၣ် အကျဲနုာ်လီၤ ဘူးဒီး ယတၢ်လုၢ်ဟံၣ် အကျဲနုာ်လီၤ ဒီးအပဲတြီအထူၣ်န့ၣ် အိၣ်ဘူးဒီး ယပဲတြီအထူၣ်အဃိ လၢယၤဒီး အဝဲသ့ၣ် အဘၢၣ်စၢၤန့ၣ် အိၣ်ဒၣ်ထဲ တၢ်အဒူၣ်တခါလီၤ.+ ဒီးအဝဲသ့ၣ် မၤစှၤလီၤ ယမံၤစီဆှံအလၤကပီၤ ခီဖျိ အဝဲသ့ၣ်မၤတၢ်လၢ အလီၤသးဘၣ်အၢတဖၣ်အဃိ ယသးဒိၣ်ထီၣ်တၢ် ဒီးမၤဟးဂီၤကွံာ် အဝဲသ့ၣ်လီၤ.+ ၉ ခဲအံၤ မ်အဝဲသ့ၣ်ပတုာ်ဘူၣ်ထီၣ်ဘါထီၣ် ယွၤအဂၤတဖၣ်* ဒီးတၢ်ဂီၤတၢ်ဖှီၣ်လၢ အဝဲသ့ၣ် ပာ်ပနီၣ်ဒ် အဝဲသ့ၣ် အစီၤပၤတဖၣ်အသိး* န့ၣ်မ်အဝဲသ့ၣ် ထုးထီၣ်ကွံာ်လၢယအိၣ် ဖးယံၤတက့ၢ်. အဝဲသ့ၣ် မ့ၢ်မၤထွဲဒ်န့ၣ်န့ၣ် ယကအိၣ်လၢ အဝဲသ့ၣ်အကျါ လီၤထူလီၤယိာ်လီၤ.+

၁၀ “ပှၤကညီဖိခွါဧၢ, ဒ်သိး ပှၤအံၣ်စရ့လးဖိတဖၣ် ကမဲာ်ဆှးလၢ အတၢ်ကမၣ်တဖၣ်အဃိအဂီၢ်+ တဲဘၣ်အဝဲသ့ၣ် ဘၣ်ဃးဒီး တၢ်လုၢ်ဟံၣ် အဂ့ၢ်န့ၣ်တက့ၢ်.+ အဝဲသ့ၣ် ကဘၣ်ဆိကမိၣ်ထံဝဲ တၢ်လုၢ်ဟံၣ် အက့ၢ်အဂီၤအဂ့ၢ် ဒ်သိး ကန့ၢ်တၢ်မၤလိ အဂီၢ်လီၤ. ၁၁ အဝဲသ့ၣ် မ့ၢ်မဲာ်ဆှး ဘၣ်ဃးဒီး တၢ်လၢအမၤတ့ၢ်ဝဲ ခဲလၢာ်န့ၣ် နကဘၣ်ဒုးသ့ၣ်ညါ အဝဲသ့ၣ်ဘၣ်ဃးဒီး တၢ်လုၢ်ဟံၣ် အက့ၢ်အဂီၤ လီၤတံၢ်လီၤဆဲး, အဖျါမၤသးဒ်လဲၣ် ဒီးအကျဲဟးထီၣ် ဒီးအကျဲနုာ်လီၤတဖၣ် အဂ့ၢ်လီၤ.+ ဒီးနကဘၣ် တဲနၢ်ပၢၢ် အဝဲသ့ၣ် ဘၣ်ဃးဒီး တၢ်လုၢ်ဟံၣ်အက့ၢ်အဂီၤ ဒီးနကဘၣ် တဲနၢ်ပၢၢ် အဝဲသ့ၣ် လၢတၢ်ဘျၢ ဒီးတၢ်သိၣ်တၢ်သီတဖၣ်လၢ အဘၣ်ထွဲဒီး တၢ်လုၢ်ဟံၣ်လီၤ. ဒီးနကဘၣ်ကွဲးလီၤ တၢ်သ့ၣ်တဖၣ်န့ၣ်လၢ အဝဲသ့ၣ် အမဲာ်ညါ ဒ်သိး အဝဲသ့ၣ် ကဟံးန့ၢ် တၢ်မၤလိလၢ အဘၣ်ဃးဒီး တၢ်လုၢ်ဟံၣ် အက့ၢ်အဂီၤ ဒီးကအိၣ်မူမၤထွဲဒ် တၢ်ဘျၢလၢ အဘၣ်ထွဲဒီး တၢ်လုၢ်ဟံၣ် အဂီၢ်လီၤ.+ ၁၂ အဝဲအံၤမ့ၢ်ဝဲ တၢ်သိၣ်တၢ်သီ လၢအဘၣ်ဃးဒီး တၢ်လုၢ်ဟံၣ်လီၤ. ကယဲၢ် တၢ်လီၢ်လၢ အအိၣ်လၢ ကစၢၢ်ဒီခိၣ်န့ၣ် စီဆှံဝဲနီၢ်ကီၢ်လီၤ.+ အဝဲန့ၣ် မ့ၢ်ဝဲ တၢ်သိၣ်တၢ်သီလၢ အဘၣ်ဃးဒီးတၢ်လုၢ်ဟံၣ်လီၤ.

၁၃ “တၢ်လုၢ်လီၢ် အခံဒါန့ၣ် အနီၣ်ထိၣ်နီၣ်ဒွးန့ၣ် အိၣ်ဝဲဒ်အံၤလီၤ. အကစီၤန့ၣ် ထီဝဲတပျၢ်*+ (တပျၢ်စုာ်စုာ်န့ၣ် အိၣ်ဝဲ တပျၢ် ဒီးစုနၢလွံၢ်ဘိ) လီၤ. ဒီးအပိၣ်ထီၣ်လဲၢ်န့ၣ်ဒံး တၢ်လုၢ်လီၢ် အဆိကတၢၢ်တပတီၢ် တပျၢ်လီၤ. ဒီးတၢ်လီၤဆၢၣ်တခါလၢ အအိၣ်လၢ တၢ်လုၢ်လီၢ် အခံဒါအဖီခိၣ်န့ၣ် ယိာ်ဝဲတထါလီၤ.* အဝဲအံၤမ့ၢ်ဝဲ တၢ်လုၢ်လီၢ်အခံဒါလီၤ. ၁၄ တၢ်လုၢ်လီၢ် အဆိကတၢၢ် တပတီၢ်န့ၣ် အကစီၤထီၣ်ထီအိၣ်ဝဲ ခံပျၢ် ဒီးအပိၣ်ထီၣ် လဲၢ်န့ၢ်ဒံး ခံပတီၢ်တပတီၢ်န့ၣ် တပျၢ်လီၤ. ခံပတီၢ်တပတီၢ်န့ၣ် အကစီၤထီၣ်ထီအိၣ်ဝဲ လွံၢ်ပျၢ် ဒီးအပိၣ်ထီၣ် လဲၢ်န့ၢ်ဒံး အဖီခိၣ်ကတၢၢ်တပတီၢ် တပျၢ်လီၤ. ၁၅ အဖီခိၣ်ကတၢၢ် တပတီၢ်န့ၣ် မ့ၢ်ဝဲတၢ်လုၢ်လီၢ် အဖၣ်ကပူၤ ဒီးအကစီၤထီၣ်ထီဝဲ လွံၢ်ပျၢ်လီၤ. ဒီးလၢအနၢၣ်အလိၤန့ၣ် အိၣ်ဒီးအနၢၤလွံၢ်ဘိလီၤ.+ ၁၆ တၢ်လုၢ်လီၢ် အဖၣ်ကပူၤန့ၣ် မ့ၢ်ဝဲတၢ်လွံၢ်နၢၣ်လၢ အကနူၤ ထဲသိးလိာ်အသး ဒီးအထီဝဲ ၁၂ ပျၢ် ဒီးအလဲၢ်ဝဲ ၁၂ ပျၢ်လီၤ.+ ၁၇ တၢ်လုၢ်လီၢ် အပတီၢ် ခံပတီၢ်တပတီၢ်န့ၣ် အိၣ်ဝဲ ၁၄ ပျၢ် လွံၢ်ကပၤလၢာ် ဒီးတၢ်လၢအလီၤဆၢၣ်တခါ လၢအအိၣ်လၢ အဖီခိၣ်န့ၣ် ယိာ်ဝဲ တထါလီၤ. ဒီးတၢ်လုၢ်လီၢ် အခံဒါကိးကပၤဒဲးန့ၣ် အပိၣ်ထီၣ်လဲၢ်န့ၢ်ဒံး အဖီခိၣ် တပတီၢ်န့ၣ် တပျၢ်စုာ်စုာ်လီၤ.

“ဒီးတၢ်လုၢ်လီၢ် အဃီသွါတဖၣ်န့ၣ် အမဲာ်ဃၣ်အသးလၢ မုၢ်ထီၣ်တခီလီၤ.”

၁၈ အဝဲတဲယၤလၢ “ပှၤကညီဖိခွါဧၢ, တၢ်ပၢကစၢ် ယဟိဝၤယွၤ တဲဝဲလၢ ‘ဖဲပှၤတ့ထီၣ် တၢ်လုၢ်လီၢ်ဝံၤအခါ ဒ်သိးပှၤကလုၢ်ထီၣ် တၢ်လုၢ်ဒွဲၣ်အူတဖၣ် ဒီးပှၤကဖှံလီၤ တၢ်သွံၣ်လၢ အလိၤအဂီၢ် ပှၤကဘၣ်မၤထွဲ တၢ်ဟံးစုနဲၣ်ကျဲ အဝဲအံၤလီၤ.’+

၁၉ “‘နကဘၣ်ဟ့ၣ်လီၤ ပှၤလုၢ်တၢ်ဒိၣ်တဖၣ်* လၢကျီၢ်ဖါဖိတဒု ဒ်တၢ်လုၢ်လၢ တၢ်ဒဲးဘးအသိးလီၤ.+ ပှၤလုၢ်တၢ်ဒိၣ်တဖၣ်အံၤ မ့ၢ်ဝဲ စီၤစၤဒိး အစၢၤအသွဲၣ်တဖၣ်+ လၢအသုးဘူးအသးဆူ ယအိၣ် လၢကမၤယတၢ် အဂီၢ်လီၤ.’ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ. ၂၀ ‘နကဘၣ်ဟံးန့ၢ် အသွံၣ်တနီၤ ဒီးထွါအီၤလၢ တၢ်လုၢ်လီၢ်အနၢၤလွံၢ်ဘိ, တၢ်လုၢ်လီၢ် အပတီၢ်ခံပတီၢ်တပတီၢ် အနၢၣ်လွံၢ်နၢၣ်အလိၤ ဒီးလၢတၢ်လီၤဆၢၣ် အခိၣ်ဒူဝးဝး ဒ်သိး ကမၤကဆှီထီၣ် တၢ်လုၢ်လီၢ်လၢ တၢ်ဒဲးဘး ဒီးမၤဘၣ်လိာ်ဖိးဒ့က့ၤတၢ် လၢတၢ်လုၢ်လီၢ် အဂီၢ်လီၤ.+ ၂၁ ဒီးဟံးန့ၢ် ကျီၢ်ဖါဖိ လၢအမ့ၢ်တၢ်လုၢ်လၢ တၢ်ဒဲးဘးအဂီၢ် ဒ်သိး ပှၤကဒွဲၣ်ထီၣ်ဝဲလၢ တၢ်လီၢ်လီၤလီၤဆီဆီတတီၤလၢ အအိၣ်လၢ တၢ်လုၢ်ဟံၣ် အတၢ်သူၣ်ထီၣ်အချၢတက့ၢ်.+ ၂၂ ဒီးဖဲခံသီတသီန့ၣ် နကဘၣ်လုၢ်ထီၣ် မဲာ်တဲးလဲးဖါ လၢအလၢအပှဲၤတဒု ဒ်တၢ်လုၢ်လၢ တၢ်ဒဲးဘး အဂီၢ်လီၤ. ဒီးအဝဲသ့ၣ် ကမၤကဆှီထီၣ် တၢ်လုၢ်လီၢ်လၢတၢ်ဒဲးဘး ဒ်အမၤကဆှီထီၣ်ဝဲ တၢ်လုၢ်လီၢ်လၢ တၢ်ဒဲးဘး ခီဖျိကျီၢ်ဖါဖိအသွံၣ် အသိးလီၤ.’

၂၃ “‘ဖဲနမၤကဆှီထီၣ် တၢ်လုၢ်လီၢ်လၢ တၢ်ဒဲးဘးဝံၤအခါ နကဘၣ်လုၢ်ထီၣ် ကျီၢ်ဖါဖိ လၢအလၢအပှဲၤတဒု ဒီးသိဖါ လၢအလၢအပှဲၤ တဒုလီၤ. ၂၄ နကဘၣ် ဟဲမူၤအီၤလၢ ယဟိဝၤယွၤ အမဲာ်ညါ ဒီးပှၤလုၢ်တၢ်ဒိၣ်တဖၣ် ကဖှံလီၤအံသၣ်လၢအလိၤ+ ဒီးကလုၢ်ထီၣ်ဝဲ ဒ်တၢ်လုၢ်ဒွဲၣ်အူဒီတဒု လၢယဟိဝၤယွၤ အအိၣ်လီၤ. ၂၅ နကဘၣ်ဟ့ၣ်လုၢ်ထီၣ် မဲာ်တဲးလဲးဖါ လၢတၢ်လုၢ်လၢတၢ်ဒဲးဘးအဂီၢ် ကိးနံၤဒဲးလၢ နွံသီအတီၢ်ပူၤလီၤ.+ ဒီးနကဘၣ်ဟ့ၣ်လုၢ်ထီၣ် ဃုာ်ဒီး ကျီၢ်ဖါဖိတဒု ဒီးသိဖါတဒုလီၤ. နကဘၣ်ဟ့ၣ်လုၢ်ထီၣ် ဆၣ်ဖိကီၢ်ဖိလၢ အလၢအပှဲၤတဖၣ်လီၤ. ၂၆ အဝဲသ့ၣ် ကဘၣ်မၤဘၣ်လိာ်ဖိးဒ့က့ၤတၢ် လၢတၢ်လုၢ်လီၢ်အဂီၢ် နွံသီ ဒီးကဘၣ်မၤကဆှီထီၣ်ဝဲ ဒ်သိး ပှၤကသူအီၤ အဂီၢ်လီၤ. ၂၇ ဖဲနွံသီအံၤဝံၤအလီၢ်ခံန့ၣ် စးထီၣ်လၢ ဃိးသီတသီ+ ဒီးဆူမဲာ်ညါန့ၣ် ပှၤလုၢ်တၢ်ဒိၣ်တဖၣ် ကလုၢ်ထီၣ်ဝဲ သု* တၢ်လုၢ်ဒွဲၣ်အူတဖၣ် ဒီးသုတၢ်လုၢ်အိၣ်ဃူအိၣ်ဖိး လၢတၢ်လုၢ်လီၢ် အဖီခိၣ်လီၤ. ဒီးယကဘၣ်သူၣ်ဘၣ်သးသုလီၤ.’+ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.”

၄၄ ဒီးအဝဲဟဲက့ၤကိးယၤလၢ တၢ်လုၢ်ဟံၣ်အတြဲၤအတၢ်သူၣ်ထီၣ် လၢအမဲာ်ဃၣ်အသးလၢ မုၢ်ထီၣ်တခီလီၤ.+ ဒီးတြဲၤန့ၣ် ပံးအသးလီၤ.+ ၂ ဒီးယဟိဝၤယွၤ တဲယၤလၢ “တြဲၤအတၢ်သူၣ်ထီၣ်အံၤ ကပံးဃာ်အသးလီၤ. တြဲၤအံၤ အတအိးထီၣ်အသးဘၣ် ဒီးပှၤတလဲၤနုာ်လီၤဘၣ်ဖဲန့ၣ် နီတဂၤဘၣ်. မ့ၢ်လၢအံၣ်စရ့လး အကစၢ် ယဟိဝၤယွၤ လဲၤနုာ်တ့ၢ်ဝဲ ဖဲန့ၣ်အဃိ+ အကကးပံးဃာ်အသး ဒ်န့ၣ်လီၤ. ၃ ဘၣ်ဆၣ် မ့မ့ၢ် ပှၤခိၣ်ပှၤနၢ်န့ၣ် ကဆ့ၣ်နီၤအီၣ်ဝဲ ကိၣ်လၢယဟိဝၤယွၤအမဲာ်ညါ ဖဲန့ၣ်+ မ့ၢ်လၢ အဝဲမ့ၢ် ပှၤခိၣ်ပှၤနၢ်အဃိလီၤ. အဝဲ ကနုာ်လီၤဟးထီၣ်လၢ တြဲၤအတၢ်သူၣ်ထီၣ် အဘျီၣ်ဒိၣ်အကိပူၤလီၤ.”+

၄ ဝံၤဒီးအဝဲ လဲၤဆှၢခီဖျိယၤလၢ တြဲၤအတၢ်သူၣ်ထီၣ် လၢကလံၤစိးတခီအပူၤ ဆူတၢ်လုၢ်ဟံၣ်အမဲာ်ညါလီၤ. ဖဲယကွၢ်တၢ်အခါ ယထံၣ် ယဟိဝၤယွၤ အလၤကပီၤ အိၣ်ပှဲၤဝဲလၢ ယဟိဝၤယွၤ အတၢ်လုၢ်ဟံၣ် အပူၤလီၤ.+ ဒီးယထိၣ်လီၤပှီၤယသးလၢ ဟီၣ်ခိၣ်လိၤလီၤ.+ ၅ ဒီးယဟိဝၤယွၤ တဲယၤလၢ “ပှၤကညီဖိခွါဧၢ, တၢ်ခဲလၢာ် လၢယကတဲဘၣ်နၤ ဘၣ်ဃးဒီး တၢ်ဘျၢဒီး တၢ်သိၣ်တၢ်သီတဖၣ်လၢ အဘၣ်ထွဲဒီး ယၤ, ယဟိဝၤယွၤ အတၢ်လုၢ်ဟံၣ်န့ၣ် သးစၢၢ်ဆၢဒီးကွၢ်မ့ၢ်ထံ ဒီးဒိကနၣ်အီၤ လီၤတံၢ်လီၤဆဲးတက့ၢ်. ကွၢ်ထံကွၢ်ဆး တၢ်လုၢ်ဟံၣ် အကျဲနုာ်လီၤ ဒီးတၢ်စီဆှံအလီၢ် အကျဲဟးထီၣ်တဖၣ် ခဲလၢာ်တက့ၢ်.+ ၆ နကဘၣ်တဲ ပှၤအံၣ်စရ့လးဖိလၢ အထီဒါတၢ်တဖၣ်လၢ ‘တၢ်ပၢကစၢ် ယဟိဝၤယွၤ တဲဝဲလၢ “အိ ပှၤအံၣ်စရ့လးဖိသ့ၣ်ဧၢ, သုမၤ လုၢ်လၢ်လၢ အလီၤသးဘၣ်အၢတဖၣ် အါတလၢလံ.” ၇ ဖဲသုဟဲကိး ပှၤထံဂၤကီၢ်ဂၤဖိလၢ အတဒိးတၢ်ကူးတရံးလၢ သးဒီးနီၢ်ခိ ဘၣ်တဖၣ် လၢယတၢ်လုၢ်ဟံၣ် အပူၤအခါ အဝဲသ့ၣ် မၤဘၣ်အၢ ယတၢ်လုၢ်ဟံၣ်လီၤ. သုလုၢ်ထီၣ်ဒံး တၢ်လုၢ်လၢအမ့ၢ် တၢ်အသိ ဒီးတၢ်အသွံၣ်တဖၣ် လၢယအိၣ် ဘၣ်ဆၣ် တကတီၢ်ဃီန့ၣ် သုမၤဟးဂီၤ တၢ်အၢၣ်လီၤအီလီၤ ခီဖျိသုလုၢ်လၢ်လၢ အလီၤသးဘၣ်အၢတဖၣ်လီၤ. ၈ သုတကွၢ် ကတဲာ်ကတီၤ ယတၢ်စီဆှံတဖၣ်ဘၣ်.+ လၢတၢ်န့ၣ်အလီၢ် သုမၢပှၤဂၤမၤဝဲ မူဒါတဖၣ်လၢ ယတၢ်လုၢ်ဟံၣ်အပူၤလီၤ.”’

၉ “‘တၢ်ပၢကစၢ် ယဟိဝၤယွၤ တဲဝဲလၢ “ပှၤထံဂၤကီၢ်ဂၤဖိလၢ အတဒိးတၢ်ကူးတရံးလၢ သးဒီးနီၢ်ခိ ဘၣ်တဖၣ် လၢအအိၣ်လၢ ကီၢ်အံၣ်စရ့လးအပူၤန့ၣ် တဘၣ်နုာ်လီၤလၢ ယတၢ်လုၢ်ဟံၣ် အပူၤနီတဂၤဘၣ်.”’

၁၀ “‘ဖဲပှၤအံၣ်စရ့လးဖိတဖၣ် ပာ်တ့ၢ်ကွံာ်ယၤ ခီဖျိဘူၣ်ထီၣ်ဘါထီၣ်ဝဲ အတၢ်ဂီၤတၢ်ဖှီၣ်လၢ အလီၤသးဘၣ်အၢအခါ ပှၤလ့ၤဝံဖိတဖၣ် ပာ်တ့ၢ်ကွံာ်ယၤ စ့ၢ်ကီးလီၤ.+ အဃိ အဝဲသ့ၣ် ကတူၢ်ဘၣ်က့ၤတၢ် ခီဖျိ တၢ်ကမၣ် လၢအမၤဝဲအဃိလီၤ. ၁၁ ဝံၤဒီးအဝဲသ့ၣ် ကမၤတၢ်လၢ ယတၢ်စီဆှံအလီၢ် ဒီးကကွၢ်ထွဲ တၢ်လုၢ်ဟံၣ်အတြဲၤ အတၢ်သူၣ်ထီၣ်တဖၣ်+ ဒီးကမၤတၢ်လၢ တၢ်လုၢ်ဟံၣ်အပူၤလီၤ. အဝဲသ့ၣ် ကမၤသံ ဆၣ်ဖိကီၢ်ဖိတဖၣ်လၢ တၢ်လုၢ်ဒွဲၣ်အူ ဒီးတၢ်လုၢ်အဂၤတဖၣ်လၢ ပှၤဂီၢ်မုၢ်တဖၣ်အဂီၢ် ဒီးကဆၢထၢၣ်လၢ ပှၤဂီၢ်မုၢ်အမဲာ်ညါ ဒ်သိး ကမၤန့ၢ်တၢ်လၢ ပှၤဂီၢ်မုၢ်အဂီၢ်လီၤ. ၁၂ မ့ၢ်လၢ လၢညါန့ၣ် အဝဲသ့ၣ် မၤန့ၢ်တၢ်လၢ ပှၤဂီၢ်မုၢ်အဂီၢ် လၢတၢ်ဂီၤတၢ်ဖှီၣ် လၢအလီၤသးဘၣ်အၢတဖၣ် အမဲာ်ညါ ဒီးကဲထီၣ် တၢ်လီၤဃံၢ်အလီၢ်လၢ ပှၤအံၣ်စရ့လးဖိတဖၣ် ကမၤတၢ်ဒဲးဘးအဂီၢ်အဃိ+ ယယူာ်ထီၣ်ယစု ဒီးယအၢၣ်လီၤလၢ ယကထီဒါအဝဲသ့ၣ်လီၤ. ဒီးအဝဲသ့ၣ် ကတူၢ်ဘၣ်က့ၤတၢ် ခီဖျိ တၢ်ကမၣ်လၢ အမၤတ့ၢ်ဝဲ အဃိလီၤ.’ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ. ၁၃ ‘အဝဲသ့ၣ် တသုးဘူးဘၣ်အသး လၢယအိၣ် ဒ်သိးကမၤတၢ်ဒ် ယပှၤလုၢ်တၢ်ဒိၣ်တဖၣ်ဘၣ်. ဒီးအဝဲသ့ၣ် တသုးဘူးဘၣ်အသးလၢ ယတၢ်စီဆှံ ဒီးယတၢ်စီဆှံနီၢ်ကီၢ်တဖၣ် အအိၣ်လၢၤဘၣ်. ဒီးအဝဲသ့ၣ် ကတူၢ်ဘၣ်တၢ်မဲာ်ဆှး ခီဖျိလၢ အဝဲသ့ၣ်မၤဝဲလုၢ်လၢ်လၢ အလီၤသးဘၣ်အၢ အဃိလီၤ. ၁၄ လၢခံယကမၢ အဝဲသ့ၣ် မၤက့ၤမူဒါတဖၣ်လၢ အဘၣ်ထွဲဒီး တၢ်လုၢ်ဟံၣ်လီၤ. ဒီးအဝဲသ့ၣ်ကမၤ တၢ်လုၢ်ဟံၣ်အတၢ်မၤ ဒီးကယဲၢ်တၢ်မၤလၢ အဘၣ်တၢ်မၤအီၤလၢ တၢ်လုၢ်ဟံၣ်အပူၤလီၤ.’+

၁၅ “တၢ်ပၢကစၢ် ယဟိဝၤယွၤ တဲဝဲလၢ ‘ဖဲပှၤအံၣ်စရ့လးဖိတဖၣ် ပာ်တ့ၢ်ကွံာ်ယၤအခါ+ ပှၤလုၢ်တၢ်ဒိၣ်တဖၣ်* လၢအမ့ၢ် စီၤစၤဒိး အစၢၤအသွဲၣ်တဖၣ်န့ၣ်+ ဆဲးမၤဝဲမူဒါလၢ အဘၣ်ထွဲဒီး တၢ်စီဆှံအလီၢ်န့ၣ်လီၤ. အဃိ အဝဲသ့ၣ် ကဟဲသုးဘူးအသးလၢ ယအိၣ် လၢကမၤယတၢ်အဂီၢ် ဒီးကဆၢထၢၣ်လၢ ယမဲာ်ညါ ဒ်သိး ကလုၢ်ထီၣ် တၢ်အသိ+ ဒီးတၢ်သွံၣ်+ လၢယအိၣ် အဂီၢ်လီၤ. ၁၆ အဝဲသ့ၣ် ကနုာ်လီၤလၢ ယတၢ်စီဆှံအလီၢ် ဒီးကသုးဘူးအသးလၢ ယစီၢ်နီၤခိၣ် ဒ်သိး ကမၤယတၢ် အဂီၢ်လီၤ.+ ဒီးအဝဲသ့ၣ် ကမၤဝဲ အမူဒါလၢ ယဟ့ၣ်လီၤအီၤလီၤ.+

၁၇ “‘ဖဲအဝဲသ့ၣ် ဟဲနုာ်လီၤလၢ တြဲၤအတၢ်သူၣ်ထီၣ် လၢတၢ်ပျီလၢ အအံၣ်တဘ့ၣ်အပူၤအခါ အဝဲသ့ၣ် ကဘၣ်ကူကၤဝဲ တၢ်ကူတၢ်ကၤလၢအညၣ်ဂ့ၤလီၤ.+ ဖဲအဝဲသ့ၣ် မၤတၢ်လၢ တြဲၤအတၢ်သူၣ်ထီၣ်လၢ တၢ်ပျီလၢအအံၣ်တဘ့ၣ်အပူၤမ့ၢ်ဂ့ၤ, တၢ်လီၢ်လၢ တၢ်ကိပူၤမ့ၢ်ဂ့ၤ အဝဲသ့ၣ် တဘၣ်ကူကၤဝဲ တၢ်ကူတၢ်ကၤလၢ အဘၣ်တၢ်မၤအီၤလၢ သိဆူၣ်ဘၣ်. ၁၈ အဝဲသ့ၣ် ကဘၣ်ဖၢၣ် ခိၣ်ဖၢၣ်လီၤဆီလၢ ပှၤထါအီၤလၢ တၢ်ကံးညာ်လၢအညၣ်ဂ့ၤ ဒီးကူထီၣ် ဖျီၣ်ခံဖုၣ်ခီၣ် လၢပှၤထါအီၤလၢ တၢ်ကံးညာ်လၢအညၣ်ဂ့ၤလီၤ.+ အဝဲသ့ၣ် တဘၣ်ကူကၤဝဲ တၢ်လၢကမၤထီၣ်အကပၢၤ နီတမံၤဘၣ်. ၁၉ တချုးလၢ အဝဲသ့ၣ် ဟးထီၣ်ဒီး လဲၤဝဲလၢ တၢ်ပျီလၢ အလဲၢ်တဘ့ၣ် လၢပှၤဂီၢ်မုၢ် ဟဲဝဲအလီၢ်အခါ အဝဲသ့ၣ် ကဘၣ်ဘ့ၣ်လီၤကွံာ် အတၢ်ကူတၢ်ကၤလၢ အကၤဝဲဖဲ အမၤတၢ်အခါ+ ဒီးကဘၣ်ပာ်ဝဲလၢ ပှၤအီၣ်တၢ် အဒၢးစီဆှံတဖၣ် အပူၤလီၤ.+ အဝဲသ့ၣ် ကဘၣ်ကူထီၣ်ကၤထီၣ် တၢ်ကူတၢ်ကၤလၢအဂၤ ဒ်သိးတၢ်စီဆှံ သုတဘၣ်ကူပှၤဂီၢ်မုၢ် ခီဖျိလၢ အဝဲသ့ၣ် အတၢ်ကူတၢ်သိး တဂ့ၤအဂီၢ်လီၤ. ၂၀ အဝဲသ့ၣ် တဘၣ်လူၤအခိၣ်ဘၣ်+ ဒီးအဝဲသ့ၣ် တဘၣ်ပာ်ထီ အခိၣ်ဆူၣ်ဘၣ်. အဝဲသ့ၣ် ကဘၣ်တံာ် အခိၣ်ဆူၣ် ဂ့ၤဂ့ၤဘၣ်ဘၣ်လီၤ. ၂၁ ဖဲပှၤလုၢ်တၢ်ဒိၣ်တဖၣ် ကလဲၤနုာ်လီၤလၢ တၢ်ပျီလၢ အအံၣ်တဘ့ၣ်အပူၤအခါ အဝဲသ့ၣ် တဘၣ်အီ စပံးထံဘၣ်.+ ၂၂ အဝဲသ့ၣ် တဘၣ်ဟံးန့ၢ် မုၣ်ကမဲ မ့တမ့ၢ် ပိာ်မုၣ်လၢ အဝၤမၤကတၢၢ်ကွံာ် အတၢ်ဆီဟံၣ်ဆီဃီဒီးအီၤဘၣ်.+ အဝဲသ့ၣ် ဆီဟံၣ်ဆီဃီဒီး အံၣ်စရ့လးမုၣ်လၢ အမုၣ်ကနီၤမ့ၢ်ဂ့ၤ မုၣ်ကမဲလၢ အကဲတ့ၢ် ပှၤလုၢ်တၢ်ဒိၣ်အမါမ့ၢ်ဂ့ၤ သ့လီၤ.’+

၂၃ “‘အဝဲသ့ၣ် ကဘၣ်သိၣ်လိ ယပှၤဂီၢ်မုၢ် ဒ်သိး ယပှၤဂီၢ်မုၢ်နီၤဖး တၢ်စီဆှံဒီး တၢ်တစီဆှံဘၣ် ကဘၣ်အဂီၢ်လီၤ. ဒီးအဝဲသ့ၣ် ကသိၣ်လိ ယပှၤဂီၢ်မုၢ် ဒ်သိးယပှၤဂီၢ်မုၢ် နီၤဖး တၢ်လၢအကဆှီ ဒီးတၢ်တကဆှီဘၣ် ကဘၣ်အဂီၢ်လီၤ.+ ၂၄ ဘၣ်ဃးဒီး တၢ်မူးတၢ်ရၢ်န့ၣ် အဝဲသ့ၣ် ကဘၣ်စံၣ်ညီၣ်တၢ် ဒ်စံၣ်ညီၣ်ကွီၢ်အသိး+ ဒီးအဝဲသ့ၣ် ကဘၣ် စံၣ်ညီၣ်တၢ်ဒ် ယတၢ်သိၣ်တၢ်သီ အိၣ်ဝဲအသိးလီၤ.+ ဒီးဘၣ်ဃးဒီး ဘူၣ်တဖၣ်န့ၣ် အဝဲသ့ၣ် ကဘၣ်မၤထွဲ ဒ်ယတၢ်သိၣ်တၢ်သီ ဒီးယတၢ်ဘျၢ အိၣ်ဝဲအသိးလီၤ.+ ဒီးအဝဲသ့ၣ် ကဘၣ်ပာ်စီဆှံ မုၢ်အိၣ်ဘှံးနံၤလီၤ. ၂၅ အဝဲသ့ၣ် တဘၣ်လဲၤမၤဘူးပှၤသံ နီတဂၤဘၣ်, အမ့ၢ်မၤဝဲ ဒ်န့ၣ်န့ၣ် အကကဲထီၣ် ပှၤလၢအတကဆှီဘၣ်လီၤ. ဘၣ်ဆၣ် အဝဲသ့ၣ် မၤဘၣ်အၢလီၤအသးလၢ အမိၢ်မ့ၢ်ဂ့ၤ, အပၢ်မ့ၢ်ဂ့ၤ, အဖိမုၣ်မ့ၢ်ဂ့ၤ, အဖိခွါမ့ၢ်ဂ့ၤ, အဒီပုၢ်ဝဲၢ်ခွါမ့ၢ်ဂ့ၤ, အဒီပုၢ်ဝဲၢ်မုၣ်လၢ အတဆီဟံၣ်ဆီဃီဒံးဘၣ်မ့ၢ်ဂ့ၤ အဃိ သ့လီၤ.+ ၂၆ ဒီးပှၤလုၢ်တၢ်ဒိၣ် မၤကဆှီထီၣ်အသး မ့ၢ်ဝံၤန့ၣ် ကဘၣ်အိၣ်ခိးဝဲ နွံသီ ဒီးမၤကဒါက့ၤ အတၢ်မၤသ့လီၤ. ၂၇ ဖဲအဝဲ နုာ်လီၤလၢ တၢ်ပျီလၢအအံၣ်တဘ့ၣ်အပူၤ ဒ်သိး ကမၤတၢ်လၢ တၢ်စီဆှံအလီၢ် အနံၤန့ၣ် အဝဲ ကဘၣ်လုၢ်ထီၣ်ဝဲ တၢ်လုၢ်လၢ တၢ်ဒဲးဘးအဂီၢ်လီၤ.’+ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.

၂၈ “‘တၢ်န့ၢ်သါလၢ အဝဲသ့ၣ် ကန့ၢ်ဘၣ်ဝဲန့ၣ် မ့ၢ်ဝဲယၤလီၤ.+ ယမ့ၢ် အဝဲသ့ၣ် အတၢ်န့ၢ်သါအဃိ သုတဘၣ်ဟ့ၣ် အဝဲသ့ၣ် ဟီၣ်ခိၣ်လီၢ် လၢကီၢ်အံၣ်စရ့လးအပူၤ နီတမံၤဘၣ်. ၂၉ အဝဲသ့ၣ် ကအီၣ်ဘၣ်တၢ်လုၢ်ဘု,+ တၢ်လုၢ်လၢ တၢ်ဒဲးဘးအဂီၢ်, တၢ်လုၢ်လၢ တၢ်ကမၣ်အဂီၢ်+ ဒီးတၢ်လၢ ပှၤပာ်လီၤဆီအီၤလၢ အံၣ်စရ့လးအပူၤ ခဲလၢာ်န့ၣ် ကကဲထီၣ် အဝဲသ့ၣ်အတၢ်လီၤ.+ ၃၀ သုတၤသၣ်ဆိလၢ အဂ့ၤကတၢၢ်ခဲလၢာ် ဒီးသုတၢ်မၤဘူၣ် ကိးကလုာ်ဒဲးန့ၣ် ကကဲထီၣ် ပှၤလုၢ်တၢ်ဒိၣ်တဖၣ် အတၢ်လီၤ.+ ဒီးသုတၤသၣ်ဆိ လၢအမ့ၢ် ဘုလၢအဘၣ် တၢ်တိၢ်သဘှံးအီၤ တစဲးန့ၣ် သုကဘၣ်ဟ့ၣ်လီၤအီၤလၢ ပှၤလုၢ်တၢ်ဒိၣ်အအိၣ်လီၤ.+ သုမ့ၢ်မၤဒ်န့ၣ်န့ၣ် တၢ်ဆိၣ်ဂ့ၤ ကလီၤဘၣ်လၢ သုဟံၣ်ဖိဃီဖိခဲလၢာ် အဖီခိၣ်လီၤ.+ ၃၁ ပှၤလုၢ်တၢ်ဒိၣ်တဖၣ်န့ၣ် တဘၣ်အီၣ် ထိၣ်ဒီးဆၣ်ဖိကီၢ်ဖိလၢ ပှၤထံၣ်န့ၢ်အီၤလၢ အသံ မ့တမ့ၢ် လၢအဘၣ်တၢ်အ့ၣ်ဖှီအီၤဘၣ်.’+

၄၅ “‘ဒီးဖဲသုနီၤဖးလီၤ ဟီၣ်ခိၣ်လၢ တၢ်န့ၢ်သါအဂီၢ်အခါ+ သုကဘၣ်မၤဘူၣ်လီၤ ယဟိဝၤယွၤလၢ ဟီၣ်ခိၣ်စီဆှံ တကဝီၤလၢ ကီၢ်ပူၤလီၤ.+ ဒီးဟီၣ်ခိၣ်စီဆှံ တကဝီၤအံၤ အထီကဘၣ်အိၣ်ဝဲ အပျၢ်* ၂၅,၀၀၀ ဒီးအလဲၢ် ကဘၣ်အိၣ်ဝဲ အပျၢ် ၁၀,၀၀၀ လီၤ.+ ဒီးဟီၣ်ခိၣ်အံၤ ဒီတကဝီၤန့ၣ် ကမ့ၢ်ဝဲ ဟီၣ်ခိၣ်စီဆှံ အကဝီၤလီၤ. ၂ ဒီးလၢဟီၣ်ခိၣ်တကဝီၤအံၤ အကိပူၤန့ၣ် ပှၤကဘၣ် ပာ်ပနီၣ်ဝဲ တၢ်လီၢ်လၢ တၢ်စီဆှံအလီၢ် အဂီၢ်လီၤ. တၢ်လီၢ်အံၤ မ့ၢ်ဝဲ တၢ်လီၢ်အနၢၣ်လွံၢ်နၢၣ်လၢ အကနူၤထဲသိးလိာ်အသး ဒီးတကပၤစုာ်စုာ်န့ၣ် အိၣ်ဝဲအပျၢ် ၅၀၀ လီၤ.+ ဒီးလၢအကပၤ ကိးကပၤဒဲးန့ၣ် အိၣ်ဝဲဒီး တၢ်ပျီလၢ အလဲၢ်ဝဲ အပျၢ် ၅၀ လီၤ.+ ၃ ဒီးနကဘၣ်ထိၣ် တၢ်လီၢ်လၢအထီဝဲ အပျၢ် ၂၅,၀၀၀ ဒီးအလဲၢ် အပျၢ် ၁၀,၀၀၀ လီၤ. ဒီးလၢတၢ်လီၢ်အံၤအပူၤန့ၣ် ကအိၣ်ဒီး တၢ်လုၢ်ဟံၣ် လၢအမ့ၢ် တၢ်လၢအစီဆှံနီၢ်ကီၢ်လီၤ. ၄ ဟီၣ်ခိၣ်တကဝီၤအံၤ ကမ့ၢ်ဝဲ ဟီၣ်ခိၣ်စီဆှံ တကဝီၤလၢ ပှၤလုၢ်တၢ်ဒိၣ်တဖၣ် အဂီၢ်လီၤ.+ အဝဲသ့ၣ်မ့ၢ်ပှၤလၢ အမၤတၢ်လၢ တၢ်လုၢ်ဟံၣ်အပူၤ ဒီးဟဲသုးဘူးထီၣ်အသး ဒ်သိး ကမၤယဟိဝၤယွၤအတၢ် အဂီၢ်လီၤ.+ ဟီၣ်ခိၣ်စီဆှံ တကဝီၤအံၤန့ၣ် ကမ့ၢ်ဝဲ တၢ်လီၢ်လၢ အဝဲသ့ၣ် အဟံၣ်ကအိၣ်ဝဲအလီၢ် ဒီးကမ့ၢ်ဝဲ တၢ်စီဆှံအလီၢ်လၢ တၢ်လုၢ်ဟံၣ် အဂီၢ်လီၤ.

၅ “‘ပှၤလ့ၤဝံဖိတဖၣ်လၢ အမၤတၢ်လၢ တၢ်လုၢ်ဟံၣ်န့ၣ် ကန့ၢ်ဘၣ်ဝဲ တၢ်လီၢ်လၢ အထီဝဲအပျၢ် ၂၅,၀၀၀ ဒီးအလဲၢ်အပျၢ် ၁၀,၀၀၀ လီၤ.+ ဒီးကန့ၢ်ဘၣ်ဝဲ ပှၤအီၣ်တၢ်အဒၢး အဖျၢၣ် ၂၀ လီၤ.+

၆ “‘သုကဘၣ်ဟ့ၣ်လီၤ တၢ်လီၢ်လၢအထီဝဲ အပျၢ် ၂၅,၀၀၀ (ဒ်ဟီၣ်ခိၣ်စီဆှံ အကဝီၤ အထီအိၣ်ဝဲအသိး) ဒီးအလဲၢ် အပျၢ် ၅,၀၀၀ လၢဝ့ၢ်အဂီၢ်လီၤ.+ ဒီးတၢ်လီၢ်အံၤ ကမ့ၢ်ဝဲ ပှၤအံၣ်စရ့လးဖိ ခဲလၢာ်အတၢ်လီၤ.

၇ “‘ဒီးဟီၣ်ခိၣ်စီဆှံ အကဝီၤ ဒီးဝ့ၢ်အတၢ်လီၢ်တၢ်ကျဲအကပၤ ခံကပၤလၢာ်န့ၣ် ကဘၣ်အိၣ်ဒီး တၢ်လီၢ်လၢ ပှၤခိၣ်ပှၤနၢ် အဂီၢ်လီၤ. တၢ်လီၢ်အံၤ ကဘၣ်အိၣ်လၢ ဟီၣ်ခိၣ်စီဆှံ အကဝီၤ ဒီးဝ့ၢ်အတၢ်လီၢ်တၢ်ကျဲ အမုၢ်ထီၣ်တခီ ဒီးအမုၢ်နုာ်တခီလီၤ. တၢ်လီၢ်တတီၤအံၤအထီ စးထီၣ်လၢ ကီၢ်ဆၢလၢ မုၢ်နုာ်တခီ တုၤလၢ ကီၢ်ဆၢလၢ မုၢ်ထီၣ်တခီန့ၣ် အိၣ်ဝဲထဲသိးဒီး ပှၤအဒူၣ်တဒူၣ် အဟီၣ်ကဝီၤ အထီ အိၣ်ဝဲအသိးလီၤ.+ ၈ ဟီၣ်ခိၣ်တကဝီၤအံၤ ကကဲထီၣ် အဝဲသ့ၣ်အတၢ် လၢအံၣ်စရ့လး အကီၢ်ပူၤလီၤ. ယပှၤခိၣ်ပှၤနၢ် သ့ၣ်တဖၣ် တမၤနၢၤအီၣ်ဃီၣ် ယပှၤဂီၢ်မုၢ်လၢၤဘၣ်+ ဒီးအဝဲသ့ၣ် ကဟ့ၣ်လီၤ ပှၤအံၣ်စရ့လးဖိတဖၣ် လၢဟီၣ်ခိၣ်ကဝီၤတဖၣ် ဒ်အဝဲသ့ၣ် အဒူၣ် အိၣ်ဝဲအသိးလီၤ.’+

၉ “တၢ်ပၢကစၢ် ယဟိဝၤယွၤ တဲဝဲလၢ ‘အံၣ်စရ့လး အပှၤခိၣ်ပှၤနၢ်သ့ၣ်ဧၢ, တဘၣ်မၤဆူၣ်မၤစိးတၢ် ဒီးဆီၣ်တံၢ်မၤနၢၤတၢ် လၢၤတဂ့ၤ. မၤတၢ်တီတီလိၤလိၤ+ ဒီးတဘၣ် ဟံးန့ၢ်ဆူၣ် ယပှၤဂီၢ်မုၢ်တဖၣ် အတၢ်လီၢ် လၢၤတဂ့ၤ.’+

“တၢ်ပၢကစၢ် ယဟိဝၤယွၤ တဲဝဲလၢ ‘သုမၤတၢ်န့ၣ် တလၢကွံာ်အခၢးလံ. ၁၀ သုကဘၣ်သူ စီၤပီၢ်, အ့ဖး* အတၢ်ထိၣ် ဒီးဘၤသၤ* အတၢ်ထိၣ် လၢအဘၣ်လီၤတံၢ်လီၤဆဲးလီၤ.+ ၁၁ တၢ်ထိၣ်တၢ်စီၤ လၢအမ့ၢ် အ့ဖး ဒီးဘၤသၤန့ၣ် သုကဘၣ် ပာ်ပနီၣ်အီၤ လီၤတံၢ်လီၤဆဲးလီၤ. တဘၤသၤန့ၣ် ကဘၣ်အိၣ်ဝဲ ဃိမ့ၢ်* ဆံဆဲၣ်ပူတပူ ဒီးတအ့ဖးန့ၣ် ကဘၣ်အိၣ်ဝဲ ဃိမ့ၢ် ဆံဆဲၣ်ပူတပူလီၤ. တၢ်ထိၣ်တၢ်စီၤအံၤန့ၣ် ကဘၣ်ဒိးသန့ၤထီၣ်အသးလၢ ဃိမ့ၢ် အတၢ်ထိၣ်တၢ်စီၤ အဖီခိၣ်လီၤ. ၁၂ တၡက့လး*+ န့ၣ်အိၣ်ဝဲ က့ရၤ* ၂၀ လီၤ. အၡက့လး ၆၀ န့ၣ်အိၣ်ဝဲ တမၤနၤလီၤ.’*

၁၃ “‘တၢ်လၢသုကဘၣ် ဟ့ၣ်မၤဘူၣ်န့ၣ် မ့ၢ်ဝဲဒ်အံၤလီၤ. ဘုကၠူၣ် အကံလိ ၁၆၀ န့ၣ်* သုကဘၣ်ဟ့ၣ်မၤဘူၣ် သၢကံလိလီၤ.* ဒီးဘုမုယီၤ အကံလိ ၁၃၀ န့ၣ်* သုကဘၣ် ဟ့ၣ်မၤဘူၣ်လီၤ ခံကံလိလီၤ.* ၁၄ သိဧိၤချါဧိၤလၢ ပှၤကဘၣ်ဟ့ၣ်လီၤန့ၣ် ပှၤကဘၣ်ထိၣ်စီၤအီၤလၢ ဘၤသၤလီၤ. တဘၤသၤန့ၣ် အိၣ်ဝဲ ကိၢ်* ဆံဆဲၣ်ပူတပူလီၤ. အဘၤသၤတဆံန့ၣ် မ့ၢ်ဝဲ တဃိမ့ၢ် မ့ၢ်လၢ အဘၤသၤတဆံန့ၣ် အိၣ်ပှဲၤသိးဒီး တဃိမ့ၢ်အဃိလီၤ. ၁၅ လၢအံၣ်စရ့လး အဆၣ်ဖိကီၢ်ဖိတဖၣ်အကျါ သိအဒု ၂၀၀ န့ၣ်သုကဘၣ်ဟ့ၣ်လီၤ သိတဒုလီၤ. တၢ်သ့ၣ်တဖၣ်အံၤန့ၣ် ပှၤကဘၣ်သူအီၤလၢ တၢ်လုၢ်ဘု,+ တၢ်လုၢ်ဒွဲၣ်အူ+ ဒီးတၢ်လုၢ်အိၣ်ဃူအိၣ်ဖိးအဂီၢ်+ ဒ်သိး ပှၤကမၤဘၣ်လိာ်ဖိးဒ့က့ၤတၢ်လၢ ပှၤဂီၢ်မုၢ်အဂီၢ်လီၤ.’+ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.

၁၆ “‘ပှၤဂီၢ်မုၢ်လၢ အအိၣ်လၢ ကီၢ်ပူၤခဲလၢာ်န့ၣ် ကဟ့ၣ်မၤဘူၣ်ဝဲ+ အံၣ်စရ့လး အပှၤခိၣ်ပှၤနၢ်လၢ တၢ်သ့ၣ်တဖၣ်န့ၣ်လီၤ. ၁၇ ဖဲပှၤမၤဘူၣ်အဆၢကတီၢ်မ့ၢ်ဂ့ၤ, လါထီၣ်သီမ့ၢ်ဂ့ၤ, မုၢ်အိၣ်ဘှံးနံၤမ့ၢ်ဂ့ၤ+ ဒီးဖဲပှၤအံၣ်စရ့လးဖိ အဘူၣ်လၢ အဘၣ်တၢ်ပာ်ပနီၣ်အီၤတဖၣ် ဘၣ်ဝဲအခါမ့ၢ်ဂ့ၤ+ ပှၤခိၣ်ပှၤနၢ်တဖၣ်န့ၣ် ဘၣ်ဟံးမူဒါလၢ တၢ်လုၢ်ဒွဲၣ်အူတဖၣ်,+ တၢ်လုၢ်ဘုတဖၣ်+ ဒီးတၢ်လုၢ်စပံးထံအဂီၢ်လီၤ.+ အဝဲသ့ၣ် ကဘၣ်ဟ့ၣ်လီၤဝဲ ဆၣ်ဖိကီၢ်ဖိတဖၣ်လၢ တၢ်လုၢ်လၢ တၢ်ဒဲးဘးအဂီၢ်, တၢ်လုၢ်ဘု, တၢ်လုၢ်ဒွဲၣ်အူဒီတဒု ဒီးတၢ်လုၢ်အိၣ်ဃူအိၣ်ဖိးတဖၣ် ဒ်သိး ကမၤဘၣ်လိာ်ဖိးဒ့က့ၤတၢ် လၢပှၤအံၣ်စရ့လးဖိတဖၣ် အဂီၢ်လီၤ.’

၁၈ “တၢ်ပၢကစၢ် ယဟိဝၤယွၤ တဲဝဲလၢ ‘ဖဲလါအဆိကတၢၢ်တလါ, လါထီၣ်တသီန့ၣ် နကဘၣ်ဟံးန့ၢ် ကျီၢ်ဖါဖိလၢ အလၢအပှဲၤတဒု ဒီးနကဘၣ်မၤကဆှီထီၣ် တၢ်လုၢ်ဟံၣ် လၢတၢ်ဒဲးဘးလီၤ.+ ၁၉ ဒီးပှၤလုၢ်တၢ်ဒိၣ်န့ၣ် ကဟံးန့ၢ်ဝဲ တၢ်လုၢ်လၢ တၢ်ဒဲးဘးအဂီၢ် အသွံၣ်တနီၤ ဒီးထွါဝဲလၢ တၢ်လုၢ်ဟံၣ် အပဲတြီအထူၣ်တဖၣ် အလိၤ,+ လၢတၢ်လုၢ်လီၢ် အပတီၢ်ခံပတီၢ် တပတီၢ်န့ၣ် အနၢၣ်လွံၢ်နၢၣ်လၢာ်အလိၤလီၤ. ဒီးအဝဲကထွါဝဲလၢ တၢ်ပျီလၢ အအံၣ်တဘ့ၣ် အတြဲၤအတၢ်သူၣ်ထီၣ် အပဲတြီအထူၣ်လိၤလီၤ. ၂၀ ဖဲလါထီၣ် နွံသီတသီန့ၣ် နကဘၣ်မၤဒ်န့ၣ် လၢပှၤလၢအမၤဘၣ် တၢ်ဒဲးဘးလၢ တၢ်တပာ်သူၣ်ပာ်သး ဒီးတၢ်တသ့ၣ်ညါဘၣ်အပူၤ အဂီၢ်လီၤ.+ ဒီးသုကဘၣ်မၤဘၣ်လိာ်ဖိးဒ့က့ၤတၢ် လၢတၢ်လုၢ်ဟံၣ် အဂီၢ်လီၤ.+

၂၁ “‘ဖဲလါအဆိကတၢၢ်တလါ, လါထီၣ် ၁၄ သီတသီန့ၣ် သုကဘၣ်မၤ ဘူၣ်လဲၤကပာ်လီၤ.+ ဒီးပှၤကဘၣ်အီၣ် ကိၣ်လၢအတပၣ်ဒီးကိၣ်မံၣ်ဘၣ် နွံသီလီၤ.+ ၂၂ ဒီးတၢ်တနံၤန့ၣ် ပှၤခိၣ်ပှၤနၢ် ကဟ့ၣ်လီၤဝဲ ကျီၢ်ဖါဖိတဒု ဒ်တၢ်လုၢ်လၢ တၢ်ဒဲးဘးအဂီၢ်လၢ အနီၢ်ကစၢ်အဂီၢ် ဒီးပှၤဂီၢ်မုၢ်ခဲလၢာ်လၢ ကီၢ်ပူၤ အဂီၢ်လီၤ.+ ၂၃ ဒီးဖဲဘူၣ်ဘၣ် နွံသီအတီၢ်ပူၤ ကိးနံၤဒဲးန့ၣ် အဝဲကဟ့ၣ်လီၤဝဲ ကျီၢ်ဖါဖိလၢ အလၢအပှဲၤနွံဒု ဒီးသိဖါလၢ အလၢအပှဲၤနွံဒု ဒ်တၢ်လုၢ်ဒွဲၣ်အူလၢ ယဟိဝၤယွၤအအိၣ် အသိးလီၤ.+ ဒီးအဝဲ ကဟ့ၣ်လီၤစ့ၢ်ကီး မဲာ်တဲးလဲးဖါ တနံၤတဒု ဒ်တၢ်လုၢ်လၢ တၢ်ဒဲးဘးအဂီၢ်လီၤ. ၂၄ ဒီးအဝဲ ကဘၣ်ဟ့ၣ်လီၤဝဲ ကိၣ်ကမူၣ်တအ့ဖး* ဒ်တၢ်လုၢ်ဘုအသိး ဃုာ်ဒီးကျီၢ်ဖါဖိ တဒုစုာ်စုာ် ဒီးကိၣ်ကမူၣ်တအ့ဖး ဃုာ်ဒီးသိဖါတဒုစုာ်စုာ် ဒီးအဝဲ ကဟ့ၣ်လီၤ သိသၢလံးထၢၣ်ဒီးတဝာ် ဃုာ်ဒီးကိၣ်ကမူၣ် တအ့ဖး စုာ်စုာ်လီၤ.

၂၅ “‘ဖဲလါနွံလါတလါ, လါထီၣ် ၁၅ သီတသီ ဘူၣ်ဘၣ်ဝဲအခါ အဝဲကဘၣ်ဟ့ၣ်လီၤဝဲ တၢ်လုၢ်လၢ တၢ်ဒဲးဘးအဂီၢ်, တၢ်လုၢ်ဒွဲၣ်အူ, တၢ်လုၢ်ဘု ဒီးသိဧိၤချါဧိၤလီၤ. ဖဲဘူၣ်အဝဲန့ၣ်ဘၣ်ဝဲ နွံသီအတီၢ်ပူၤ ကိးနံၤဒဲးန့ၣ်+ အဝဲကဘၣ်မၤဝဲ ဒ်န့ၣ်လီၤ.’”

၄၆ “တၢ်ပၢကစၢ် ယဟိဝၤယွၤ တဲဝဲလၢ ‘တၢ်ပျီလၢအအံၣ်တဘ့ၣ် အတြဲၤအတၢ်သူၣ်ထီၣ် လၢအမဲာ်ဃၣ်အသးလၢ မုၢ်ထီၣ်တခီန့ၣ်+ ကဘၣ်ကးတံာ်ဃာ်အသး+ ဖဲပှၤမၤတၢ်မၤ ဃုသီအတီၢ်ပူၤလီၤ.+ ဘၣ်ဆၣ် ဖဲမုၢ်အိၣ်ဘှံးနံၤ ဒီးလါထီၣ်သီ အနံၤန့ၣ် ကဘၣ်အိးထီၣ်အသးလီၤ. ၂ ပှၤခိၣ်ပှၤနၢ်တဂၤန့ၣ် ကအိၣ်လၢတၢ်ချၢ ဒီးကနုာ်လီၤဝဲလၢ တြဲၤအတၢ်သူၣ်ထီၣ်အပူၤ လၢတြဲၤအတၢ်သူၣ်ထီၣ် အဘျီၣ်ဒိၣ်အကျဲလီၤ.+ ဒီးအဝဲ ကဆၢထၢၣ်ဝဲလၢ တြဲၤအတၢ်သူၣ်ထီၣ် အပဲတြီအထူၣ် အကပၤလီၤ. ဒီးပှၤလုၢ်တၢ်ဒိၣ်တဖၣ် ကလုၢ်ထီၣ်ဝဲ ပှၤခိၣ်ပှၤနၢ်တဂၤန့ၣ် အတၢ်လုၢ်ဒွဲၣ်အူ ဒီးအတၢ်လုၢ်အိၣ်ဃူအိၣ်ဖိးတဖၣ် ဒီးအဝဲကထိၣ်လီၤပှီၤအသးလၢ တြဲၤအကျဲစၢၤ ဝံၤဒီးကဟးထီၣ်ဝဲလီၤ. ဘၣ်ဆၣ် တြဲၤအတၢ်သူၣ်ထီၣ်န့ၣ် ကဘၣ်အိးထီၣ်ဃာ်အသး တုၤလၢ ဟါလီၤခီလီၤ. ၃ ဖဲမုၢ်အိၣ်ဘှံးနံၤ ဒီးလါထီၣ်သီအနံၤတဖၣ်န့ၣ်+ ပှၤထံဖိကီၢ်ဖိတဖၣ်စ့ၢ်ကီး ကထိၣ်လီၤပှီၤအသးလၢ ယဟိဝၤယွၤ အမဲာ်ညါ ဖဲတြဲၤအတၢ်သူၣ်ထီၣ်အံၤ အကျဲနုာ်လီၤအလီၢ်လီၤ.

၄ “‘တၢ်လုၢ်ဒွဲၣ်အူလၢ ပှၤခိၣ်ပှၤနၢ် ကဟ့ၣ်လီၤဝဲလၢ ယဟိဝၤယွၤအအိၣ် ဖဲမုၢ်အိၣ်ဘှံးနံၤန့ၣ် ကဘၣ်ပၣ်ဃုာ်ဒီး သိဖါဖိလၢ အလၢအပှဲၤ ဃုဒု ဒီးသိဖါလၢ အလၢအပှဲၤ တဒုလီၤ.+ ၅ အဝဲ ကဘၣ်ဟ့ၣ်လီၤဝဲ ကိၣ်ကမူၣ် တအ့ဖး* ဒ်တၢ်လုၢ်ဘုအသိး ဃုာ်ဒီး သိဖါတဒုလီၤ. မ့မ့ၢ် တၢ်လုၢ်ဘုလၢ အဝဲ ကဘၣ်ဟ့ၣ်ဝဲ ဃုာ်ဒီး သိဖါဖိတဖၣ်န့ၣ် အဝဲ ကဘၣ်ဟ့ၣ်ဝဲ တၢ်လၢအဟ့ၣ်ဝဲန့ၢ်လီၤ. ဒီးကဘၣ်ဟ့ၣ်လီၤဃုာ်ဝဲဒီး သိသၢလံးထၢၣ်ဒီးတဝာ် လၢကိၣ်ကမူၣ် တအ့ဖးစုာ်စုာ် အဂီၢ်လီၤ.+ ၆ တၢ်လုၢ်လၢ အဝဲကဘၣ်ဟ့ၣ်လီၤဝဲဖဲ လါထီၣ်သီအနံၤန့ၣ် ကဘၣ်ပၣ်ဃုာ်ဒီး ကျီၢ်ဖါဖိလၢ အလၢအပှဲၤတဒု, သိဖါဖိ ဃုဒု ဒီးသိဖါတဒုလီၤ. ဒီးဆၣ်ဖိကီၢ်ဖိတဖၣ်အံၤန့ၣ် ကဘၣ်မ့ၢ် ဆၣ်ဖိကီၢ်ဖိလၢ အလၢအပှဲၤလီၤ.+ ၇ အဝဲ ကဘၣ်ဟ့ၣ်လီၤဝဲ ကိၣ်ကမူၣ် တအ့ဖး ဒ်တၢ်လုၢ်ဘုအသိး ဃုာ်ဒီး ကျီၢ်ဖါတဒု ဒီးကိၣ်ကမူၣ်တအ့ဖး ဃုာ်ဒီး သိဖါတဒု ဒီးကဘၣ်ဟ့ၣ်ဝဲ တၢ်လၢအဟ့ၣ်ဝဲန့ၢ် ဃုာ်ဒီး သိဖါဖိတဖၣ်လီၤ. ဒီးကဘၣ်ဟ့ၣ်လီၤ သိသၢလံးထၢၣ်ဒီးတဝာ် လၢကိၣ်ကမူၣ် တအ့ဖး စုာ်စုာ်အဂီၢ်လီၤ.

၈ “‘ဖဲပှၤခိၣ်ပှၤနၢ်တဂၤအံၤ လဲၤနုာ်လီၤလၢ တြဲၤအတၢ်သူၣ်ထီၣ် အပူၤအခါ အဝဲကဘၣ် လဲၤနုာ်လီၤဝဲလၢ တြဲၤအတၢ်သူၣ်ထီၣ် အဘျီၣ်ဒိၣ် အကျဲလီၤ. ဒီးအဝဲကဘၣ် ဟးထီၣ်က့ၤဝဲလၢ ကျဲတဘိန့ၣ် စ့ၢ်ကီးလီၤ.+ ၉ ဖဲပှၤထံဖိကီၢ်ဖိတဖၣ် ဟဲလၢဘူၣ်ဧိၤပွဲဧိၤတဖၣ် ဒ်သိး ကဘူၣ်ထီၣ်ဘါထီၣ် ယဟိဝၤယွၤအဂီၢ်အခါ+ အဝဲသ့ၣ် မ့ၢ်ဟဲနုာ်လီၤလၢ တြဲၤအတၢ်သူၣ်ထီၣ်လၢ ကလံၤစိးတခီန့ၣ်+ အဝဲသ့ၣ် ကဘၣ်ဟးထီၣ်က့ၤလၢ တြဲၤအတၢ်သူၣ်ထီၣ်လၢ ကလံၤထံးတခီလီၤ.+ ဒီးပှၤလၢအဟဲနုာ်လီၤ လၢတြဲၤအတၢ်သူၣ်ထီၣ်လၢ ကလံၤထံးတခီန့ၣ် ကဘၣ် ဟးထီၣ်က့ၤလၢ တြဲၤအတၢ်သူၣ်ထီၣ်လၢ ကလံၤစိးတခီလီၤ. အဝဲသ့ၣ် တဘၣ် ဟးထီၣ်က့ၤလၢ တြဲၤအတၢ်သူၣ်ထီၣ်လၢ အဟဲနုာ်လီၤဝဲတခီန့ၣ်ဘၣ်. အဝဲသ့ၣ် ကဘၣ်ဟးထီၣ်လၢ တြဲၤအတၢ်သူၣ်ထီၣ်လၢ အဝဲတခီလီၤ. ၁၀ ပှၤခိၣ်ပှၤနၢ်တဂၤန့ၣ် ကဘၣ်အိၣ်လၢ အဝဲသ့ၣ်အကျါ ဒီးဖဲအဝဲသ့ၣ် ဟဲနုာ်လီၤအခါ ပှၤခိၣ်ပှၤနၢ်အံၤ ကဘၣ်ဟဲနုာ်လီၤဒီးအဝဲသ့ၣ် ဒီးဖဲအဝဲသ့ၣ် ဟးထီၣ်အခါ ပှၤခိၣ်ပှၤနၢ်တဂၤအံၤ ကဘၣ်ဟးထီၣ်ဒီး အဝဲသ့ၣ်လီၤ. ၁၁ ဖဲဘူၣ်ဘၣ်ဝဲ ဒီးပှၤမၤဘူၣ်တဖၣ် အဆၢကတီၢ် တၢ်လုၢ်ဘု ကဘၣ်မ့ၢ် ကိၣ်ကမူၣ် တအ့ဖး ဒ်တၢ်လုၢ်ဘုအသိး ဃုာ်ဒီး ကျီၢ်ဖါတဒု ဒီးကိၣ်ကမူၣ်တအ့ဖး ဃုာ်ဒီး သိဖါတဒု ဒီးအကဘၣ်ဟ့ၣ်ဝဲ တၢ်လၢအဟ့ၣ်ဝဲန့ၢ် ဃုာ်ဒီး သိဖါဖိတဖၣ်လီၤ. ဒီးကဘၣ်ဟ့ၣ်လီၤဃုာ်ဒီး သိသၢလံးထၢၣ်ဒီးတဝာ် လၢကိၣ်ကမူၣ် တအ့ဖး စုာ်စုာ်အဂီၢ်လီၤ.+

၁၂ “‘ပှၤခိၣ်ပှၤနၢ်တဂၤ မ့ၢ်ဟ့ၣ်လီၤဝဲ တၢ်လုၢ်ဒွဲၣ်အူ+ မ့တမ့ၢ် တၢ်လုၢ်အိၣ်ဃူအိၣ်ဖိးတဖၣ် ဒ်တၢ်လုၢ်လၢ တၢ်သးအိၣ်အပူၤ လၢယဟိဝၤယွၤ အအိၣ်န့ၣ် တြဲၤအတၢ်သူၣ်ထီၣ်လၢ အမဲာ်ဃၣ်အသးလၢ မုၢ်ထီၣ်တခီန့ၣ် တၢ်ကအိးထီၣ်န့ၢ်အီၤလီၤ. ဒီးအဝဲကဟ့ၣ်လီၤ အတၢ်လုၢ်ဒွဲၣ်အူ ဒီးအတၢ်လုၢ်အိၣ်ဃူအိၣ်ဖိးတဖၣ် ဒ်အမၤဝဲလၢ မုၢ်အိၣ်ဘှံးနံၤ အသိးလီၤ.+ ဒီးဖဲအဝဲ ဟးထီၣ် ဝံၤအခါ ပှၤကဘၣ် ကးပံးတြဲၤအံၤလီၤ.+

၁၃ “‘ကိးနံၤဒဲးန့ၣ် နကဘၣ်ဟ့ၣ်လီၤ သိဖါဖိလၢ အအိၣ်တနံၣ် လၢအလၢအပှဲၤတဒု ဒ်တၢ်လုၢ်ဒွဲၣ်အူအသိး လၢယဟိဝၤယွၤအအိၣ်လီၤ.+ တဂီၤဘၣ်တဂီၤန့ၣ် နကဘၣ်မၤဒ်န့ၣ်လီၤ. ၁၄ တကးဒံးဘၣ် ကိးဂီၤဒဲးန့ၣ် နကဘၣ်ဟ့ၣ်လီၤ ကိၣ်ကမူၣ် ခံကံလိ* ဒ်တၢ်လုၢ်ဘုအသိး ဃုာ်ဒီး သိတလံးထၢၣ်ဘျဲၣ် လၢပှၤကဖှံလီၤအီၤလၢ ကိၣ်ကမူၣ် လၢအဂ့ၤ အလိၤလီၤ. အဝဲန့ၣ် ကမ့ၢ်ဝဲတၢ်လုၢ်ဘုလၢ ပှၤလုၢ်ထီၣ်အီၤလၢ ယဟိဝၤယွၤအအိၣ် ထီဘိလီၤ. အဝဲန့ၣ် မ့ၢ်ဝဲ တၢ်သိၣ်တၢ်သီလၢ အဂၢၢ်အကျၢၤလီၤ. ၁၅ ကိးဂီၤဒဲးန့ၣ် အဝဲသ့ၣ် ကဘၣ်ဟ့ၣ်လီၤဝဲ သိဖါဖိ, တၢ်လုၢ်ဘု ဒီးသိဧိၤချါဧိၤ ဒ်ကိးနံၤဒဲး အတၢ်လုၢ်ဒွဲၣ်အူ အသိးလီၤ.’

၁၆ “တၢ်ပၢကစၢ် ယဟိဝၤယွၤ တဲဝဲလၢ ‘ပှၤခိၣ်ပှၤနၢ်တဂၤ မ့ၢ်ဟ့ၣ်ဝဲ အဖိခွါတဂၤစုာ်စုာ် ဟီၣ်ခိၣ်လီၢ် ဒ်တၢ်န့ၢ်သါအသိးန့ၣ် တၢ်ဟ့ၣ်အံၤ ကကဲထီၣ် အဖိခွါအတၢ်လီၤ. ဒီးတၢ်ဟ့ၣ်အံၤ ကကဲထီၣ် အဖိခွါ အတၢ်န့ၢ်သါလီၤ. ၁၇ ဘၣ်ဆၣ် အဝဲမ့ၢ်ဟ့ၣ်လီၤ အခ့အပှၤတဂၤဂၤလၢ ဟီၣ်ခိၣ်လီၢ်လၢ အတၢ်န့ၢ်သါအကျါန့ၣ် အခ့အပှၤ ကန့ၢ်ဘၣ်ဝဲတုၤဖဲ တၢ်ထူၣ်ဖျဲးအနံၣ်လီၤ.+ ဖဲန့ၣ်အခါ ဟီၣ်ခိၣ်လီၢ်အံၤ ကကဲထီၣ်ကဒါက့ၤ ပှၤခိၣ်ပှၤနၢ်တဂၤန့ၣ် အတၢ်လီၤ. ဘၣ်ဆၣ် မ့မ့ၢ် အဖိခွါတဖၣ်န့ၣ် ကန့ၢ်ဘၣ်ဝဲ အတၢ်န့ၢ်သါ ဒ်အဝဲသ့ၣ်အတၢ်အသိး ထီဘိလီၤ. ၁၈ ဒီးပှၤခိၣ်ပှၤနၢ်န့ၣ် တဘၣ်နီဟးထီၣ်ကွံာ် ပှၤဂၤလၢ အဝဲသ့ၣ်အတၢ်လီၢ်တၢ်ကျဲ ဒီးဟံးန့ၢ်ဆူၣ် အဝဲသ့ၣ် အတၢ်န့ၢ်သါဘၣ်. အဝဲကဘၣ်ဟ့ၣ်လီၤ အဖိခွါတဖၣ် တၢ်န့ၢ်သါလၢ အနီၢ်ကစၢ် အတၢ်လီၢ်တၢ်ကျဲအပူၤ ဒ်သိး ယပှၤဂီၢ်မုၢ်တဖၣ် သုတဘၣ်တၢ်နီဟးထီၣ်ကွံာ်အီၤလၢ အနီၢ်ကစၢ် တၢ်လီၢ်တၢ်ကျဲ နီတဂၤတဂ့ၤအဂီၢ်လီၤ.’”

၁၉ ဒီးအဝဲလဲၤဆှၢယၤလၢ ကျဲနုာ်လီၤအလီၢ်+ လၢအအိၣ်လၢ တြဲၤအတၢ်သူၣ်ထီၣ်လၢ အဆှၢပှၤဆူ ပှၤလုၢ်တၢ်ဒိၣ်တဖၣ် အီၣ်တၢ်အဒၢးစီဆှံတဖၣ် အကပၤလီၤ. ဒၢးတဖၣ်အံၤန့ၣ် အမဲာ်ဃၣ်အသးလၢ ကလံၤစိးတခီလီၤ.+ ဖဲန့ၣ် ယထံၣ်ဘၣ် တၢ်လီၢ်တတီၤလၢ တၢ်လီၢ်ခံ လၢမုၢ်နုာ်တခီလီၤ. ၂၀ ဒီးအဝဲတဲယၤလၢ “တၢ်လီၢ်ဖဲအံၤန့ၣ် ပှၤလုၢ်တၢ်ဒိၣ်တဖၣ် ကချီဝဲ တၢ်လုၢ်လၢ တၢ်ကမၣ်အဂီၢ် ဒီးတၢ်လုၢ်လၢ တၢ်ဒဲးဘးအဂီၢ် ဒီးမ့ၢ်စ့ၢ်ကီး တၢ်လီၢ်လၢ အဝဲသ့ၣ် ကကုၢ်ဝဲ တၢ်လုၢ်ဘုလီၤ.+ ဒီးဒ်သိး တၢ်စီဆှံ သုတဘၣ်ကူ ပှၤဂီၢ်မုၢ်တဂ့ၤအဂီၢ် အဝဲသ့ၣ် တဘၣ်လဲၤစိာ်ထီၣ်တၢ်လၢ တၢ်ပျီလၢ အလဲၢ်တဘ့ၣ်အပူၤ နီတမံၤဘၣ်.”+

၂၁ ဒီးအဝဲ လဲၤကိးယၤလၢ တၢ်ပျီလၢ အလဲၢ်တဘ့ၣ်အပူၤ ဒီးအမၢယလဲၤလၢ တၢ်ပျီလၢ အလဲၢ်တဘ့ၣ်န့ၣ် အတၢ်နၢၣ်ထံး လွံၢ်နၢၣ်လီၤ. ဖဲတၢ်အနၢၣ်တနၢၣ်စုာ်စုာ်န့ၣ် ယထံၣ်ဘၣ် တၢ်ပျီဖိတဘ့ၣ်စုာ်စုာ်လီၤ. ၂၂ တၢ်ပျီဖိတဖၣ်လၢ အအိၣ်လၢ တၢ်ပျီလၢ အလဲၢ်တဘ့ၣ် အနၢၣ်ထံး တနၢၣ်စုာ်စုာ်န့ၣ် အထီအိၣ်ဝဲ အပျၢ်* ၄၀ ဒီးအလဲၢ်အိၣ်ဝဲ အပျၢ် ၃၀ လီၤ. တၢ်ပျီဖိ လွံၢ်ဘ့ၣ်လၢာ်န့ၣ် အတုၤသိး ထဲသိးလိာ်အသးလီၤ. ၂၃ လၢၢ်အဒူၣ် အိၣ်ဝးတရံးဝဲ တၢ်ပျီဖိလွံၢ်ဘ့ၣ်လၢာ်လီၤ. ဒီးလၢလၢၢ်အဒူၣ်တဖၣ် အခီၣ်ထံးန့ၣ် ပှၤတ့ထီၣ်ဝဲ တၢ်လီၢ်လၢ ပှၤကချီဝဲ တၢ်ညၣ်လၢ တၢ်လုၢ်တဖၣ် အဂီၢ်လီၤ. ၂၄ ဒီးအဝဲတဲယၤလၢ “ပှၤလၢအမၤဝဲ တၢ်လုၢ်ဟံၣ် အတၢ်မၤတဖၣ်န့ၣ် ချီဝဲ ပှၤဂီၢ်မုၢ်အတၢ်လုၢ် ဖဲတၢ်လီၢ်တဖၣ်အံၤလီၤ.”+

၄၇ ဒီးအဝဲ ဟဲက့ၤဆှၢယၤလၢ တၢ်လုၢ်ဟံၣ် အကျဲနုာ်လီၤလီၤ.+ ဒီးဖဲန့ၣ်န့ၣ် ယထံၣ်ဘၣ် ထံဟဲယွၤလီၤလၢ တၢ်လုၢ်ဟံၣ်အကျဲစၢၤ အဖီလာ် ဒီးယွၤလီၤလၢ မုၢ်ထီၣ်တခီလီၤ.+ တၢ်လုၢ်ဟံၣ် အမဲာ်ညါန့ၣ် ဃၣ်အသးဆူ မုၢ်ထီၣ်တခီလီၤ. ဒီးထံန့ၣ် ဟဲယွၤလီၤဝဲလၢ တၢ်လုၢ်ဟံၣ် အထွဲတခီ အဖီလာ်လၢ တၢ်လုၢ်လီၢ် အကလံၤထံးတခီလီၤ.

၂ အဝဲ ဆှၢထီၣ်ယၤလၢ တၢ်ချၢ လၢတြဲၤအတၢ်သူၣ်ထီၣ်လၢ ကလံၤစိးတခီ အကျဲ+ ဒီးဆှၢတရံးယၤလၢ တြဲၤအတၢ်သူၣ်ထီၣ်လၢ အမဲာ်ဃၣ်အသးလၢ မုၢ်ထီၣ်တခီ+ ဒီးယထံၣ်ဘၣ် ထံဟဲဆဲးယွၤလီၤလၢ အထွဲတခီလီၤ.

၃ ပှၤပိာ်ခွါတဂၤန့ၣ်စိာ်ဝဲ ပှၤထိၣ်တၢ်အပျံၤ ဒီးလဲၤဝဲလၢ မုၢ်ထီၣ်တခီ+ ဒီးထိၣ်ထံကျိဖိ အပျၢ်* ၁,၀၀၀ လီၤ. ဒီးအဝဲမၢ ယလဲၤခီထံ ဒီးထံန့ၣ် အိၣ်ဝဲတုၤသိး ယခီၣ်ဒ့ကိာ်လီၤ.

၄ ဒီးအဝဲ ထိၣ်ကဒီးထံကျိဖိ အပျၢ် ၁,၀၀၀ ဒီးမၢယလဲၤခီထံ ဒီးထံန့ၣ် တုၤထီၣ်လၢ ယခီၣ်လ့ၢ်ခိၣ်လီၤ.

ဒီးအဝဲ ထိၣ်ကဒီးထံကျိဖိ အပျၢ် ၁,၀၀၀ ဒီးမၢယလဲၤခီထံ ဒီးထံန့ၣ် တုၤထီၣ်လၢ ယယီၢ်ဒ့လီၤ.

၅ ဒီးအဝဲ ထိၣ်ကဒီးထံကျိဖိ အပျၢ် ၁,၀၀၀ ဒီးထံကျိန့ၣ် ယခီဂာ်အီၤလၢယခီၣ် တန့ၢ်လၢၤဘၣ်. ဒီးထံယိာ်ဝဲဒိၣ်မး တုၤဒၣ်လဲာ် ပှၤဘၣ်ပီၢ်ထံလီၤ.

၆ အဝဲတဲယၤလၢ “ပှၤကညီဖိခွါဧၢ, နထံၣ်ဧါ.”

ဒီးအဝဲမၢ ယဟဲက့ၤကဒါက့ၤလၢ ထံကျိကၢၢ်နံၤလီၤ. ၇ ဖဲယဟဲက့ၤကဒါက့ၤလၢ ထံကျိကၢၢ်နံၤအခါ ယထံၣ်ဘၣ်လၢ လၢထံကျိကၢၢ်နံၤ ခံကပၤလၢာ်န့ၣ် သ့ၣ်ထူၣ်အိၣ်ဝဲ အါမးလီၤ.+ ၈ ဒီးအဝဲတဲယၤလၢ “ထံကျိတဘိအံၤယွၤလီၤလၢ တၢ်လီၢ်လၢမုၢ်ထီၣ်တခီ ဒီးဆဲးယွၤလီၤဒီးခီဂာ်ဝဲ ဧၤရဘၤ*+ ဒီးယွၤလီၤဝဲလၢ ပီၣ်လဲၣ်* အပူၤလီၤ. ဒီးဖဲထံကျိယွၤလီၤလၢ ပီၣ်လဲၣ်ပူၤအခါ+ ထံဖဲန့ၣ်တဖၣ် ကဘျါထီၣ်က့ၤလီၤ. ၉ ဖဲထံကျိယွၤလီၤ အလီၢ်န့ၣ် တၢ်သးသမူ လၢအလဲၤတၢ် ဒီဖုဒီဂီၢ် ကအိၣ်ဝဲလီၤ. မ့ၢ်လၢ ထံကျိ ကယွၤလီၤဝဲဖဲန့ၣ် အဃိ ညၣ်ကအိၣ်ဝဲ အါအါဂီၢ်ဂီၢ်လီၤ. ဒီးပီၣ်လဲၣ်အထံန့ၣ် ကဘျါထီၣ်က့ၤ ဒီးတၢ်သးသမူ ကအိၣ်ဝဲ ဖဲထံကျိယွၤလီၤအလီၢ် တပူၤဂ့ၤတပူၤဂ့ၤလီၤ.

၁၀ “ဒီးပှၤမၤညၣ်ဖိတဖၣ်န့ၣ် ကဆၢထၢၣ်ဝဲလၢ ပီၣ်လဲၣ်ကၢၢ်နံၤ စးထီၣ်လၢ ဧ့ၣ်က့ဒံၤ+ ပၢၢ်တုၤလၢ ဧ့ၣ်ဧ့ကလဲၣ် ဖဲတၢ်လိဃ့လီၤ စၤတဖၣ် အလီၢ်လီၤ. ဖဲန့ၣ်န့ၣ် ညၣ်ကအိၣ်ဝဲ အကလုာ်ကလုာ် ဒ်ညၣ်အိၣ်လၢ ပီၣ်လဲၣ်ဖးဒိၣ်အပူၤ အသိးလီၤ.+

၁၁ “ဖဲန့ၣ်န့ၣ် ကအိၣ်ဝဲဒီး ကပံာ်အလီၢ်တဖၣ် ဒီးထံချၢးတဖၣ်လီၤ.* မ့မ့ၢ် တၢ်လီၢ်တဖၣ်န့ၣ် တဘျါထီၣ်ဘၣ်. အံသၣ်ကအိၣ်ဒံးလၢ တၢ်လီၢ်တဖၣ်န့ၣ်လီၤ.+

၁၂ “ကယဲၢ်သ့ၣ်ထူၣ်လၢ အသၣ်ထီၣ်သ့ခဲလၢာ်န့ၣ် ကမဲထီၣ်ဝဲလၢ ထံကျိကၢၢ်နံၤ ခံကပၤလၢာ်လီၤ. ဒီးအလၣ်တဖၣ်န့ၣ် တလီၤညွံးလီၤဘဲဘၣ် ဒီးအသၣ်တဖၣ် ကသၣ်ထီၣ် ထီဘိလီၤ. မ့ၢ်လၢထံလၢ တၢ်လုၢ်ဟံၣ်န့ၣ် ကယွၤလီၤန့ၢ်အီၤ ထီဘိအဃိ ကသၣ်ထီၣ် တၤသၣ်အသီ ကိးလါဒဲးလီၤ.+ အသၣ်တဖၣ်န့ၣ် ကကဲထီၣ်တၢ်အီၣ် ဒီးအလၣ်တဖၣ် ကမ့ၢ်ဝဲလၢ ကမၤဘျါတၢ်အဂီၢ်လီၤ.”+

၁၃ တၢ်ပၢကစၢ် ယဟိဝၤယွၤ တဲဝဲလၢ “ဟီၣ်ခိၣ်လီၢ်လၢ သုကဘၣ်ဟ့ၣ်လီၤ ပှၤအံၣ်စရ့လးဖိ ၁၂ ဒူၣ် ဒ်တၢ်န့ၢ်သါအသိးန့ၣ် မ့ၢ်ဝဲဒ်အံၤလီၤ. စီၤယိၤသး အစၢၤအသွဲၣ်န့ၣ် ကန့ၢ်ဘၣ်ဝဲ ဟီၣ်ခိၣ်လီၢ် ခံတီၤလီၤ.+ ၁၄ သုကန့ၢ်ဘၣ် ဟီၣ်ခိၣ်လီၢ် ဒ်တၢ်န့ၢ်သါအသိး ဒီးသုကန့ၢ်ဘၣ်အီၤ ပှဲၤသိးသိးလီၤ. ယအၢၣ်လီၤတ့ၢ်လၢ ယကဟ့ၣ်လီၤ သုမိၢ်ပၢ်ဖံဖု လၢပျၢၤတဖၣ်လၢ ကီၢ်အံၤ+ ဒီးခဲအံၤ သုန့ၢ်ဘၣ်အီၤဒ် တၢ်န့ၢ်သါအသိးလံ.

၁၅ “ကီၢ်ဆၢလၢ ကလံၤစိးတခီန့ၣ် စးထီၣ်အသးလၢ ပီၣ်လဲၣ်ဖးဒိၣ် ဒီးဆဲးလဲၤဝဲလၢ ဃ့သလိၣ်အကျဲ+ ဒီးလဲၤဝဲလၢ စဒး,+ ၁၆ ဃမါသး,+ ဘ့ၤရိသး+ ဒီးစံးဘြံၣ် လၢအအိၣ်လၢ ဝ့ၢ်ဒၤမ့ၤစ့း အဟီၣ်ကဝီၤ ဒီးဝ့ၢ်ဃမါသး အဟီၣ်ကဝီၤ အဘၢၣ်စၢၤလီၤ. ဒီးဆဲးလဲၤဝဲလၢ ဃၤစ့ၢ်တဟံကိၣ် လၢအအိၣ်ဘူးဒီး ဃၤရာ်အတၢ်လီၢ်အဆၢလီၤ.+ ၁၇ အဃိ ကီၢ်ဆၢန့ၣ် စးထီၣ်အသးလၢ ပီၣ်လဲၣ် ဒီးအိၣ်တုၤလၢ ဃစၢ်ဧ့နၣ်+ လၢအအိၣ်လၢ ကလံၤစိးတခီလၢ ဝ့ၢ်ဒၤမ့ၤစ့း အတၢ်လီၢ်အဆၢ ဒီးတုၤလၢ ဃမါသး အတၢ်လီၢ်အဆၢလီၤ.+ အဝဲန့ၣ်မ့ၢ်ဝဲ ကီၢ်ဆၢလၢ ကလံၤစိးတခီလီၤ.

၁၈ “ကီၢ်ဆၢလၢ မုၢ်ထီၣ်တခီန့ၣ် အိၣ်ဝဲလၢ ဃၤရာ် ဒီးဝ့ၢ်ဒၤမ့ၤစ့း အဘၢၣ်စၢၤ ဒီးလၢကံးလဧး ဟီၣ်ကဝီၤ+ ဒီးကီၢ်အံၣ်စရ့လး အဘၢၣ်စၢၤလၢထံကျိယၢ်ဒ့ၣ် အကပၤလီၤ. နဘၣ်ထိၣ်အီၤ စးထီၣ်လၢ ကီၢ်ဆၢလၢ ကလံၤစိးတခီ ပၢၢ်တုၤလၢ မုၢ်ထီၣ်ပီၣ်လဲၣ်လီၤ.* အဝဲအံၤမ့ၢ်ဝဲ ကီၢ်ဆၢလၢ မုၢ်ထီၣ်တခီလီၤ.

၁၉ “ကီၢ်ဆၢလၢ ကလံၤထံးတခီန့ၣ် စးထီၣ်အသးလၢ တၤမၢ် ဒီးလဲၤလၢ ထံမရံဘါကၤဒ့ၣ်+ ဒီးလၢတၢ်တြီၤပူၤ* ဒီးတုၤလၢ ပီၣ်လဲၣ်ဖးဒိၣ်လီၤ.+ အဝဲန့ၣ်မ့ၢ်ဝဲ ကီၢ်ဆၢလၢ ကလံၤထံးတခီလီၤ.

၂၀ “ကီၢ်ဆၢလၢ မုၢ်နုာ်တခီန့ၣ် မ့ၢ်ဝဲ ပီၣ်လဲၣ်ဖးဒိၣ် ဒီးအစးထီၣ်အသးလၢ ကီၢ်ဆၢလၢ ကလံၤထံးတခီ ဒီးလဲၤထီၣ်တုၤလၢ တၢ်လီၢ်လၢ အကွၢ်ဆၢၣ်မဲာ်လိာ်အသးဒီး လံၤဘိၤဃမါသးလီၤ.*+ အဝဲန့ၣ်မ့ၢ်ဝဲ ကီၢ်ဆၢလၢ မုၢ်နုာ်တခီလီၤ.”

၂၁ “သုဝဲ ပှၤအံၣ်စရ့လးဖိ ၁၂ ဒူၣ်န့ၣ် သုကဘၣ်နီၤလီၤလိာ်သုသး လၢကီၢ်အံၤလီၤ. ၂၂ ဒီးသုကဘၣ်နီၤလီၤကီၢ်အံၤ ဒ်တၢ်န့ၢ်သါအသိး လၢသုဂီၢ် ဒီးပှၤထံဂၤကီၢ်ဂၤဖိလၢ အဖိအိၣ်ထီၣ်ဖဲ အအိၣ်ဝဲဆိးဝဲလၢ သုကျါ အဆၢကတီၢ်န့ၣ် အဂီၢ်လီၤ. ဒီးသုကဘၣ်ပာ်အဝဲသ့ၣ် ဒ်သိးဒီး ပှၤအံၣ်စရ့လးဖိလီၤ. အဝဲသ့ၣ် ကဒိးန့ၢ်ဘၣ် တၢ်န့ၢ်သါ ဃုာ်ဒီးသု လၢပှၤအံၣ်စရ့လးဖိ အဒူၣ်တဖၣ် အကျါလီၤ. ၂၃ ပှၤထံဂၤကီၢ်ဂၤဖိ မ့ၢ်အိၣ်ဝဲလၢ ပှၤအံၣ်စရ့လးဖိအဒူၣ် တဒူၣ်ဂ့ၤတဒူၣ်ဂ့ၤ အဟီၣ်ကဝီၤပူၤန့ၣ် သုကဘၣ်ဟ့ၣ်အီၤ တၢ်န့ၢ်သါဖဲန့ၣ်လီၤ.” တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.

၄၈ “ပှၤအဒူၣ်တဖၣ် စးထီၣ်လၢ ကလံၤစိးတခီ တုၤလၢ ကလံၤထံးတခီန့ၣ် ဘၣ်တၢ်ပာ်ဖျါထီၣ်အမံၤ ဒ်လၢလာ်အံၤအသိးလီၤ. ဟီၣ်ကဝီၤလၢ ဒၣ်အဒူၣ် ကန့ၢ်ဘၣ်ဝဲန့ၣ်+ အိၣ်ဝဲလၢ ကျဲလၢအလဲၤစးထီၣ်လၢ ဃ့သလိၣ် တုၤလၢ ဃမါသး+ အကပၤ ဒီးဟီၣ်ကဝီၤအံၤ အဆၢန့ၣ် လဲၤတုၤလီၤလၢ ဃစၢ်ဧ့နၣ်လီၤ. ဒီးဒၣ်အဟီၣ်ကဝီၤန့ၣ် အိၣ်ဝဲလၢ ဝ့ၢ်ဒၤမ့ၤစ့း အတၢ်လီၢ်အဆၢလၢ ကလံၤစိးတခီန့ၣ် အကပၤ ဒီးအိၣ်ဝဲလၢ ဝ့ၢ်ဃမါသး အကပၤလီၤ.+ ဒီးဟီၣ်ကဝီၤအဆၢန့ၣ် အိၣ်လၢ ကီၢ်ဆၢလၢမုၢ်ထီၣ်တခီ ဒီးတုၤလၢ ကီၢ်ဆၢလၢ မုၢ်နုာ်တခီလီၤ. ၂ အၤၡ့ၢ်အဒူၣ်+ အဟီၣ်ကဝီၤအဆၢလၢ ကလံၤစိးတခီန့ၣ် မ့ၢ်စ့ၢ်ကီး ဒၣ်အဒူၣ် အဟီၣ်ကဝီၤအဆၢ, စးထီၣ်လၢ ကီၢ်ဆၢလၢမုၢ်ထီၣ်တခီ တုၤလၢ ကီၢ်ဆၢလၢ မုၢ်နုာ်တခီလီၤ. ၃ နးသၤလံအဒူၣ် အဟီၣ်ကဝီၤအဆၢလၢ+ ကလံၤစိးတခီန့ၣ် မ့ၢ်စ့ၢ်ကီး အၤၡ့ၢ်အဒူၣ် အဟီၣ်ကဝီၤအဆၢ, စးထီၣ်လၢ ကီၢ်ဆၢလၢမုၢ်ထီၣ်တခီ တုၤလၢ ကီၢ်ဆၢလၢ မုၢ်နုာ်တခီလီၤ. ၄ မနၤၡ့ၤအဒူၣ် အဟီၣ်ကဝီၤအဆၢလၢ+ ကလံၤစိးတခီန့ၣ် မ့ၢ်စ့ၢ်ကီး နးသၤလံအဒူၣ် အဟီၣ်ကဝီၤအဆၢ, စးထီၣ်လၢ ကီၢ်ဆၢလၢမုၢ်ထီၣ်တခီ တုၤလၢ ကီၢ်ဆၢလၢ မုၢ်နုာ်တခီလီၤ. ၅ အ့ဖရဲၣ်အဒူၣ် အဟီၣ်ကဝီၤအဆၢလၢ ကလံၤစိးတခီန့ၣ် မ့ၢ်စ့ၢ်ကီး မနၤၡ့ၤအဒူၣ်+ အဟီၣ်ကဝီၤအဆၢ, စးထီၣ်လၢ ကီၢ်ဆၢလၢမုၢ်ထီၣ်တခီ တုၤလၢ ကီၢ်ဆၢလၢ မုၢ်နုာ်တခီလီၤ. ၆ ရူၤဘ့ၣ်အဒူၣ် အဟီၣ်ကဝီၤအဆၢလၢ ကလံၤစိးတခီန့ၣ် မ့ၢ်စ့ၢ်ကီး အ့ဖရဲၣ်အဒူၣ်+ အဟီၣ်ကဝီၤအဆၢ, စးထီၣ်လၢ ကီၢ်ဆၢလၢမုၢ်ထီၣ်တခီ တုၤလၢ ကီၢ်ဆၢလၢ မုၢ်နုာ်တခီလီၤ. ၇ ယူဒၤအဒူၣ် အဟီၣ်ကဝီၤအဆၢလၢ ကလံၤစိးတခီန့ၣ် မ့ၢ်စ့ၢ်ကီး ရူၤဘ့ၣ်အဒူၣ်+ အဟီၣ်ကဝီၤအဆၢ, စးထီၣ်လၢ ကီၢ်ဆၢလၢမုၢ်ထီၣ်တခီ တုၤလၢ ကီၢ်ဆၢလၢ မုၢ်နုာ်တခီလီၤ. ၈ ဖဲယူဒၤအဒူၣ် အဟီၣ်ကဝီၤအဆၢ စးထီၣ်လၢ ကီၢ်ဆၢလၢမုၢ်ထီၣ်တခီ ဒီးတုၤလၢ ကီၢ်ဆၢလၢ မုၢ်နုာ်တခီ အကပၤန့ၣ် သုကဘၣ် ပာ်လီၤဆီ တၢ်မၤဘူၣ် အဟီၣ်ခိၣ်လီၤ. တၢ်လီၢ်အံၤ အလဲၢ်ကဘၣ်အိၣ်ဝဲ အပျၢ်* ၂၅,၀၀၀ လီၤ.+ တၢ်လီၢ်တတီၤအံၤအထီ စးထီၣ်လၢ ကီၢ်ဆၢလၢ မုၢ်ထီၣ်တခီ တုၤလၢ ကီၢ်ဆၢလၢ မုၢ်နုာ်တခီန့ၣ် အိၣ်ဝဲထဲသိးဒီး ပှၤအဒူၣ်အဂၤတဖၣ် အဟီၣ်ကဝီၤ အထီ အိၣ်ဝဲအသိးလီၤ. မ့မ့ၢ် တၢ်လုၢ်ဟံၣ်န့ၣ် ကအိၣ်ဝဲလၢ တၢ်ခၢၣ်သးလီၤ.

၉ “ဟီၣ်ခိၣ်အကဝီၤလၢ သုကဘၣ် ပာ်လီၤဆီလၢ ယဟိဝၤယွၤအဂီၢ်န့ၣ် အထီကဘၣ်အိၣ်ဝဲအပျၢ် ၂၅,၀၀၀ ဒီးအလဲၢ် ကဘၣ်အိၣ်ဝဲ အပျၢ် ၁၀,၀၀၀ လီၤ. ၁၀ တၢ်လီၢ်တတီၤန့ၣ် မ့ၢ်ဟီၣ်ခိၣ်အကဝီၤစီဆှံလၢ ပှၤလုၢ်တၢ်ဒိၣ်တဖၣ် အဂီၢ်လီၤ.+ လၢကလံၤစိးတကပၤန့ၣ် အိၣ်ဝဲအပျၢ် ၂၅,၀၀၀ ဒီးမုၢ်နုာ်တကပၤန့ၣ်အိၣ်ဝဲ အပျၢ် ၁၀,၀၀၀ ဒီးမုၢ်ထီၣ်တကပၤန့ၣ် အိၣ်ဝဲအပျၢ် ၁၀,၀၀၀ ဒီးကလံၤထံးတကပၤန့ၣ် အိၣ်ဝဲအပျၢ် ၂၅,၀၀၀ လီၤ. မ့မ့ၢ် ယဟိဝၤယွၤ အတၢ်လုၢ်ဟံၣ်န့ၣ် ကအိၣ်ဝဲလၢ တၢ်ခၢၣ်သးလီၤ. ၁၁ တၢ်လီၢ်တတီၤန့ၣ် ကမ့ၢ်ဝဲလၢ ပှၤလုၢ်တၢ်ဒိၣ်တဖၣ် လၢအမ့ၢ် စီၤစၤဒိး အစၢၤအသွဲၣ်တဖၣ်+ လၢအဘၣ်တၢ်ပာ်စီဆှံအီၤဝံၤတဖၣ် အဂီၢ်လီၤ. ဖဲပှၤအံၣ်စရ့လးဖိတဖၣ် ဒီးပှၤလ့ၤဝံဖိတဖၣ် ပာ်တ့ၢ်ကွံာ်ယၤအခါ အဝဲသ့ၣ် တပာ်တ့ၢ်ကွံာ်ယၤဘၣ် ဒီးဆဲးမၤဝဲမူဒါလၢ ယဟ့ၣ်လီၤအီၤလီၤ.+ ၁၂ လၢဟီၣ်ခိၣ်လၢ တၢ်မၤဘူၣ်လီၤအီၤအကျါန့ၣ် အဝဲသ့ၣ် ကဒိးန့ၢ်ဘၣ် ဟီၣ်ခိၣ်တကဝီၤ လၢအဘၣ်တၢ်ပာ်လီၤဆီအီၤ ဒ်တၢ်လၢအစီဆှံနီၢ်ကီၢ် အသိး ဒီးဟီၣ်ခိၣ် တကဝီၤအံၤ ကအိၣ်လၢ ပှၤလ့ၤဝံဖိတဖၣ် အဟီၣ်ခိၣ် အကပၤလီၤ.

၁၃ “လၢပှၤလုၢ်တၢ်ဒိၣ် အဟီၣ်ခိၣ်လီၢ် အကပၤန့ၣ် ပှၤလ့ၤဝံဖိ ကဒိးန့ၢ်ဘၣ် ဟီၣ်ခိၣ်တကဝီၤလၢ အထီအိၣ်ဝဲအပျၢ် ၂၅,၀၀၀ ဒီးအလဲၢ်အိၣ်ဝဲ အပျၢ် ၁၀,၀၀၀ လီၤ. (ဟီၣ်ခိၣ်တကဝီၤအံၤ အထီအိၣ်ဝဲအပျၢ် ၂၅,၀၀၀ ဒီးအလဲၢ်အိၣ်ဝဲ အပျၢ် ၁၀,၀၀၀) ၁၄ မ့ၢ်လၢ ဟီၣ်ခိၣ်လၢ အဂ့ၤကတၢၢ် တကဝီၤအံၤ စီဆှံဝဲလၢ ယဟိဝၤယွၤ အမဲာ်ညါအဃိ အဝဲသ့ၣ် တဘၣ်ဆါကွံာ်အီၤဘၣ်, တဘၣ်ခီလဲအီၤဘၣ် ဒီးတဘၣ်ပျဲလၢ အကကဲထီၣ် ပှၤဂၤအတၢ် စ့ၢ်ကီးဘၣ်.

၁၅ “ဒီးဟီၣ်ခိၣ်လၢ အအိၣ်တ့ၢ်လၢ အလဲၢ်အိၣ်ဝဲအပျၢ် ၅,၀၀၀ ဒီးအထီအိၣ်ဝဲ အပျၢ် ၂၅,၀၀၀ န့ၣ် ပှၤဝ့ၢ်ဖိတဖၣ် ကသူဝဲလၢ+ တၢ်အိၣ်တၢ်ဆိး အလီၢ်တဖၣ်အဂီၢ် ဒီးဆၣ်ဖိကီၢ်ဖိ အတၢ်အီၣ်ဆၣ်အလီၢ်လီၤ. မ့မ့ၢ်ဝ့ၢ်န့ၣ် ကအိၣ်ဝဲလၢ အခၢၣ်သးလီၤ.+ ၁၆ ဝ့ၢ်တဖျၢၣ်န့ၣ် အတၢ်ထိၣ် အိၣ်ဝဲဒ်အံၤလီၤ. ဝ့ၢ်အဆၢလၢ ကလံၤစိးတခီန့ၣ် အိၣ်ဝဲအပျၢ် ၄,၅၀၀ ဒီးဝ့ၢ်အဆၢလၢ ကလံၤထံးတခီန့ၣ် အိၣ်ဝဲအပျၢ် ၄,၅၀၀ ဒီးဝ့ၢ်အဆၢလၢ မုၢ်ထီၣ်တခီန့ၣ် အိၣ်ဝဲအပျၢ် ၄,၅၀၀ ဒီးဝ့ၢ်အဆၢလၢ မုၢ်နုာ်တခီန့ၣ် အိၣ်ဝဲအပျၢ် ၄,၅၀၀ လီၤ. ၁၇ ဆၣ်ဖိကီၢ်ဖိ အတၢ်အီၣ်ဆၣ်အလီၢ် လၢဝ့ၢ်အကလံၤစိးတခီန့ၣ် အိၣ်ဝဲအပျၢ် ၂၅၀, လၢကလံၤထံးတခီန့ၣ် အိၣ်ဝဲ အပျၢ် ၂၅၀, လၢမုၢ်ထီၣ်တခီန့ၣ် အိၣ်ဝဲအပျၢ် ၂၅၀ ဒီးလၢမုၢ်နုာ်တခီန့ၣ် အိၣ်ဝဲအပျၢ် ၂၅၀ လီၤ.

၁၈ “ဟီၣ်ခိၣ်လီၢ်လၢ အအိၣ်တ့ၢ်တဖၣ်န့ၣ် ကအိၣ်သဃဲၤလိာ်သးဒီး ဟီၣ်ခိၣ်စီဆှံ အကဝီၤလီၤ.+ လၢမုၢ်ထီၣ်တခီန့ၣ် ကအိၣ်ဝဲအပျၢ် ၁၀,၀၀၀ ဒီးလၢမုၢ်နုာ်တခီန့ၣ် ကအိၣ်ဝဲအပျၢ် ၁၀,၀၀၀ လီၤ. တၢ်လီၢ်အံၤ ကအိၣ်သဃဲၤလိာ်သးဒီး ဟီၣ်ခိၣ်စီဆှံ အကဝီၤလီၤ. ဒီးတၢ်လၢ အမဲထီၣ်သၣ်ထီၣ်တဖၣ်န့ၣ် ကမ့ၢ်ဝဲ တၢ်အီၣ်လၢ ပှၤလၢအမၤတၢ်လၢ ဝ့ၢ်ပူၤတဖၣ် အဂီၢ်လီၤ. ၁၉ ပှၤလၢ အံၣ်စရ့လး အဒူၣ်တဖၣ်အကျါလၢ အမၤတၢ်လၢ ဝ့ၢ်အဂီၢ်န့ၣ် ကသူၣ်အီၣ်ဖျးအီၣ်တၢ် ဖဲန့ၣ်လီၤ.+

၂၀ “ဟီၣ်ခိၣ်လၢ တၢ်မၤဘူၣ်လီၤအီၤ ဒီတကဝီၤန့ၣ် အိၣ်ဝဲအပျၢ် ၂၅,၀၀၀ လွံၢ်ကပၤလၢာ်လီၤ. သုကဘၣ်ပာ်လီၤဆီ တၢ်လီၢ်အဝဲန့ၣ်လီၤ. တၢ်လီၢ်အဝဲန့ၣ် ကပၣ်ဃုာ်ဒီး ဟီၣ်ခိၣ်အကဝီၤစီဆှံ ဒီးဝ့ၢ်အတၢ်လီၢ်တၢ်ကျဲလီၤ.

၂၁ “ဒီးဟီၣ်ခိၣ်လၢ အအိၣ်တ့ၢ်လၢ ဟီၣ်ခိၣ်အကဝီၤစီဆှံ ဒီးဝ့ၢ်အတၢ်လီၢ်တၢ်ကျဲ အကပၤ ခံကပၤလၢာ်န့ၣ် ကကဲထီၣ် ပှၤခိၣ်ပှၤနၢ် အတၢ်လီၤ.+ ဟီၣ်ကဝီၤအံၤ အိၣ်သဃဲၤဒီး ဟီၣ်ခိၣ်လၢ တၢ်မၤဘူၣ်လီၤအီၤ အဆၢလၢ အအိၣ်ဝဲ အပျၢ် ၂၅,၀၀၀ ဒီးအအိၣ်ဝဲ လၢအမုၢ်ထီၣ်တခီ ဒီးအမုၢ်နုာ်တခီလီၤ. ဒီးပှၤခိၣ်ပှၤနၢ် အဟီၣ်ကဝီၤတဘ့ၣ်အံၤအဆၢ ကမ့ၢ်ဝဲ ပှၤအဒူၣ်ခံဒူၣ် အဟီၣ်ကဝီၤအဆၢ စ့ၢ်ကီးလီၤ. ဒီးဟီၣ်ခိၣ်အကဝီၤစီဆှံ ဒီးတၢ်လုၢ်ဟံၣ်န့ၣ် အိၣ်ဝဲလၢပှၤခိၣ်ပှၤနၢ် အဟီၣ်ကဝီၤတဘ့ၣ်အံၤ အခၢၣ်သးလီၤ.

၂၂ “ပှၤလ့ၤဝံဖိ အဟီၣ်ခိၣ်လီၢ် ဒီးဝ့ၢ်အတၢ်လီၢ်တၢ်ကျဲန့ၣ် ကအိၣ်ဝဲလၢ ပှၤခိၣ်ပှၤနၢ် အဟီၣ်ကဝီၤ အဘၢၣ်စၢၤလီၤ. ဒီးပှၤခိၣ်ပှၤနၢ် အဟီၣ်ကဝီၤန့ၣ် ကအိၣ်ဝဲလၢ ယူဒၤအဒူၣ်အဟီၣ်ကဝီၤ+ ဒီးဘံၣ်ယၤမံၣ် အဒူၣ်အဟီၣ်ကဝီၤ အဘၢၣ်စၢၤလီၤ.

၂၃ “ပှၤအဒူၣ်အဂၤလၢ အအိၣ်တ့ၢ်တဖၣ်န့ၣ်မ့ၢ်ဝဲ ဒ်အံၤလီၤ. ဟီၣ်ကဝီၤလၢ ဘံၣ်ယၤမံၣ်အဒူၣ် န့ၢ်ဘၣ်ဝဲန့ၣ် စးထီၣ်အသးလၢ ကီၢ်ဆၢလၢ မုၢ်ထီၣ်တခီ တုၤလၢ ကီၢ်ဆၢလၢ မုၢ်နုာ်တခီလီၤ.+ ၂၄ စူၤမ့းအိၣ်အဒူၣ် အဟီၣ်ကဝီၤအဆၢန့ၣ် မ့ၢ်စ့ၢ်ကီး ဘံၣ်ယၤမံၣ်အဒူၣ် အဟီၣ်ကဝီၤအဆၢ+ စးထီၣ်လၢ ကီၢ်ဆၢလၢ မုၢ်ထီၣ်တခီ တုၤလၢ ကီၢ်ဆၢလၢ မုၢ်နုာ်တခီလီၤ. ၂၅ ယံးစၣ်ကၢ်အဒူၣ် အဟီၣ်ကဝီၤအဆၢန့ၣ်+ မ့ၢ်စ့ၢ်ကီး စူၤမ့းအိၣ်အဒူၣ် အဟီၣ်ကဝီၤအဆၢ စးထီၣ်လၢ ကီၢ်ဆၢလၢ မုၢ်ထီၣ်တခီ တုၤလၢ ကီၢ်ဆၢလၢ မုၢ်နုာ်တခီလီၤ. ၂၆ စဘူလိၣ်အဒူၣ် အဟီၣ်ကဝီၤအဆၢန့ၣ် မ့ၢ်စ့ၢ်ကီး ယံးစၣ်ကၢ်အဒူၣ် အဟီၣ်ကဝီၤအဆၢ+ စးထီၣ်လၢ ကီၢ်ဆၢလၢ မုၢ်ထီၣ်တခီ တုၤလၢ ကီၢ်ဆၢလၢ မုၢ်နုာ်တခီလီၤ.+ ၂၇ ကးအဒူၣ် အဟီၣ်ကဝီၤအဆၢန့ၣ် မ့ၢ်စ့ၢ်ကီး စဘူလိၣ်အဒူၣ် အဟီၣ်ကဝီၤအဆၢ+ စးထီၣ်လၢ ကီၢ်ဆၢလၢ မုၢ်ထီၣ်တခီ တုၤလၢ ကီၢ်ဆၢလၢ မုၢ်နုာ်တခီလီၤ. ၂၈ ကီၢ်ဆၢလၢ ကလံၤထံးတခီလၢ အအိၣ်လၢ ကးအဒူၣ် အဟီၣ်ကဝီၤ အဆၢအကပၤန့ၣ် စးထီၣ်အသးလၢ တၤမၢ်+ ဒီးလဲၤလၢ ထံမရံဘါကၤဒ့ၣ်+ ဒီးလၢတၢ်တြီၤပူၤ*+ ဒီးတုၤလၢ ပီၣ်လဲၣ်ဖးဒိၣ်လီၤ.

၂၉ “သုဝဲပှၤအံၣ်စရ့လးဖိ အဒူၣ်တဖၣ်န့ၣ် သုကဘၣ်ဟ့ၣ်နီၤလီၤလိာ်သး ကီၢ်အံၤ ဒ်တၢ်န့ၢ်သါအသိးလီၤ.+ ဒီးအကကဲထီၣ် သုတၢ်လီၤ.”+ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.

၃၀ “ဝ့ၢ်အတြဲၤတဖၣ်န့ၣ် အိၣ်ဝဲဒ်အံၤလီၤ. ဝ့ၢ်အကလံၤစိး တကပၤန့ၣ် ထီဝဲအပျၢ် ၄,၅၀၀ လီၤ.+

၃၁ “ဝ့ၢ်အတြဲၤတဖၣ်န့ၣ် ဘၣ်တၢ်ကိးန့ၢ်အမံၤ ဒ်ပှၤအံၣ်စရ့လးဖိတဖၣ် အဒူၣ်အိၣ်ဝဲအသိးလီၤ. လၢကလံၤစိးတကပၤန့ၣ် ဝ့ၢ်အတြဲၤ အိၣ်ဝဲသၢခါ ဒီးအမ့ၢ်ဝဲ ရူၤဘ့ၣ်အတြဲၤ, ယူဒၤအတြဲၤ ဒီးလ့ၤဝံအတြဲၤလီၤ.

၃၂ “ဝ့ၢ်အမုၢ်ထီၣ် တကပၤန့ၣ် ထီဝဲအပျၢ် ၄,၅၀၀ လီၤ. ဒီးဖဲန့ၣ်န့ၣ် ဝ့ၢ်အတြဲၤ အိၣ်ဝဲသၢခါ ဒီးအမ့ၢ်ဝဲ ယိၤသးအတြဲၤ, ဘံၣ်ယၤမံၣ်အတြဲၤ ဒီးဒၣ်အတြဲၤလီၤ.

၃၃ “ဝ့ၢ်အကလံၤထံး တကပၤန့ၣ် ထီဝဲ အပျၢ် ၄,၅၀၀ လီၤ. ဒီးဖဲန့ၣ်န့ၣ် ဝ့ၢ်အတြဲၤ အိၣ်ဝဲသၢခါ ဒီးအမ့ၢ်ဝဲ စူၤမ့းအိၣ်အတြဲၤ, ယံးစၣ်ကၢ်အတြဲၤ ဒီးစဘူလိၣ်အတြဲၤလီၤ.

၃၄ “ဝ့ၢ်အမုၢ်နုာ် တကပၤန့ၣ် ထီဝဲအပျၢ် ၄,၅၀၀ လီၤ. ဒီးဖဲန့ၣ်န့ၣ် ဝ့ၢ်အတြဲၤ အိၣ်ဝဲသၢခါ ဒီးအမ့ၢ်ဝဲ ကးအတြဲၤ, အၤၡ့ၢ်အတြဲၤ ဒီးနးသၤလံအတြဲၤလီၤ.

၃၅ “ဝ့ၢ်ဒူၣ်လၢ အအိၣ်ဝးတရံးဝ့ၢ်န့ၣ် အိၣ်ဝဲအပျၢ် ၁၈,၀၀၀ လီၤ. စးထီၣ်ဖဲ တၢ်တနံၤန့ၣ် ဝ့ၢ်တဖျၢၣ်အံၤ ကအိၣ်ဒီးအမံၤလၢ အခီပညီမ့ၢ်ဝဲ ယဟိဝၤယွၤ အိၣ်ဝဲဖဲန့ၣ်လီၤ.”+