လါမၢ်ၡး

ခဲအံၤဒု ဟီၣ်ခိၣ်သီ တတုၤဒံးဘၣ်. သနာ်က့ ဆိမိၣ်ကွၢ် တၢ်လၢအအိၣ်ခဲအံၤ ဒ်သိးဒီး ဆၣ်, သ့ၣ်ထူၣ်, ဆၣ်ဖိကီၢ်ဖိ ဒီးပှၤဟီၣ်ခိၣ်ဖိတဖၣ်. တၢ်ဘၣ်တ့တဖၣ်အံၤ ခီၣ်ထံးခါ အတအိၣ်ဘၣ်န့ၣ် ပှၤသ့ၣ်ညါဝဲကိးဂၤဒဲးလီၤ. ဘၣ်ဆၣ်ခီဖျိလၢ ယဟိဝၤယွၤ တ့လီၤတၢ်အဃိ တၢ်ဘၣ်တ့တဖၣ်အံၤ ဟဲအိၣ်ထီၣ်ဝဲ. (၁ မိၤ ၁:၁, ၂၆, ၂၇) ပတၢ်ဘၣ်တ့ကစၢ် အၢၣ်လီၤဝဲလၢ အကမၤဂ့ၤထီၣ်က့ၤ ဟီၣ်ခိၣ်တဘ့ၣ်အံၤ လၢအသီ. လၢဟီၣ်ခိၣ်သီန့ၣ် ပှၤဟီၣ်ခိၣ်ဖိခဲလၢာ် ကအိၣ်ဆူၣ်အိၣ်ချ့ ဒီးကအိၣ်မူဘၣ် လီၤထူလီၤယိာ်. အဃိ ယဟိဝၤယွၤ အၢၣ်လီၤလၢ အကမၤကဲထီၣ် ဟီၣ်ခိၣ်သီန့ၣ် ပနာ်န့ၢ်အီၤသ့နီၢ်ကီၢ်. (ၡါ ၆၅:၁၇; လီၣ် ၂၁:၃, ၄) ခဲအံၤ ပကဘၣ် ဟံးန့ၢ်တၢ်ခွဲးတၢ်ယာ် လၢလၢပှဲၤပှဲၤလၢ ပကမၤဂၢၢ်ကျၢၤအါထီၣ် ပတၢ်နာ်. ပကဘၣ် ပာ်လုၢ်ပာ်ပှ့ၤအါထီၣ် တၢ်ပှ့ၤက့ၤ, ဆိမိၣ်ထံ ယဟိဝၤယွၤ အတၢ်စိတၢ်ကမီၤအဂ့ၢ် ဒီးမၤတၢ်လၢ ကမၤစၢၤပှၤဒ်သိး ပတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်. ပမ့ၢ်မၤဒ်န့ၣ်န့ၣ် ပကပၣ်ဃုာ်လၢ “ပှၤလၢအနာ်တၢ် ဒီးဝံသးစူၤတၢ် အဃိန့ၢ်သါဘၣ် တၢ်စံးပာ်တဖၣ်” အကျါ.—ဧ့ၤ ၆:၁၁, ၁၂. တၢး၂၃.၀၄ ၃၁ ¶၁၈-၁၉

ယ့ၣ်ၡူး ကွၢ်ထီၣ်တၢ်လၢမူခိၣ် ဒီးဃ့ထုကဖၣ်လၢ ပှၤမဲာ်ညါ. ယ့ၣ်ၡူး မၤဝဲဒ်အံၤန့ၣ် ခီဖျိအဘၣ်သး ဟ့ၣ်တၢ်လၤကပီၤလၢ ယဟိဝၤယွၤအအိၣ်ခဲလၢာ်. ဝံၤဘျီ ယ့ၣ်ၡူးကီးထီၣ်ဝဲလၢ “စီၤလါစရူးဧၢ, ဟဲက့ၤထီၣ်ဟီ.” (ယိၤ ၁၁:၄၃) ဒီးစီၤလါစရူး ဟဲက့ၤထီၣ်လၢ တၢ်သွၣ်ခိၣ်. ဘၣ်ဆၣ် တၢ်လီၤလးလၢ ယ့ၣ်ၡူးမၤဝဲအံၤ ပှၤတနီၤဆိမိၣ်လၢ အကဲထီၣ်သးတသ့ဘၣ်. တၢ်ဂ့ၢ်အံၤန့ၣ် မၤဂၢၢ်ကျၢၤဒိၣ်ထီၣ် ပတၢ်နာ် ဘၣ်ဃးဒီး ပတၢ်မုၢ်လၢ်လၢ တၢ်ဂဲၤဆၢထၢၣ်သမူထီၣ်က့ၤ. ပထံၣ်ဘၣ် ယ့ၣ်ၡူးအၢၣ်လီၤ နီၢ်မၢ်သၤလၢ “နဒီပုၢ်ဝဲၢ်ခွါကဂဲၤဆၢထၢၣ်က့ၤ.” (ယိၤ ၁၁:၂၃) ဒ်အပၢ်အသိး ယ့ၣ်ၡူး ဘၣ်သးမၤလၢပှဲၤထီၣ် အတၢ်အၢၣ်လီၤ ဒီးအအိၣ်ဒီး တၢ်စိတၢ်ကမီၤလၢ ကမၤလၢပှဲၤထီၣ်ဝဲ. ယ့ၣ်ၡူး မဲာ်ထံလီၤန့ၣ် ပာ်ဖျါထီၣ်ဝဲလၢ အဘၣ်သး မၤသမူထီၣ်က့ၤပှၤသံ ဒီးအဘၣ်သး မၤလီၤမၢ်ကွံာ် တၢ်သူၣ်အုးသးအုးလၢ အဟဲအိၣ်ထီၣ်လၢ တၢ်သံအဃိ. ဒီးဖဲစီၤလါစရူး ဟဲက့ၤထီၣ်လၢ တၢ်သွၣ်ခိၣ်အခါ ယ့ၣ်ၡူး ပာ်ဖျါထီၣ်ဝဲလၢ အအိၣ်ဒီး တၢ်စိတၢ်ကမီၤလၢ အကမၤသမူထီၣ်က့ၤပှၤသံ. တကးဒံးဘၣ် ပမ့ၢ်ဆိကမိၣ်ထံ လံာ်စီဆှံအဆၢ လၢတနံၤအံၤအဂီၢ် ဘၣ်ဃးဒီးတၢ်လၢ ယ့ၣ်ၡူးတဲဝဲ နီၢ်မၢ်သၤန့ၣ် ပနာ်သ့လၢ ကစၢ်ယွၤအတၢ်အၢၣ်လီၤလၢ ပှၤသံတဖၣ် ကဂဲၤဆၢထၢၣ် သမူထီၣ်က့ၤန့ၣ် ကဟဲလၢပှဲၤထီၣ် သပှၢ်တၢၢ်. တၢး၂၃.၀၄ ၁၁-၁၂ ¶၁၅-၁၆

ဖဲပသ့ၣ်ညါထီၣ် ယဟိဝၤယွၤ အတၢ်ဘၣ်သးအိၣ်ဒ်လဲၣ်အခါ ဘၣ်သ့ၣ်သ့ၣ် ပကဘၣ် ဆီတလဲက့ၤ ပတၢ်ဃ့ထုကဖၣ်. ပကဘၣ်နီၣ်ဘၣ်လၢ ယဟိဝၤယွၤ ကမၤလၢပှဲၤ အတၢ်တိာ်ပာ်အဂီၢ် အပာ်ပနီၣ်ဃာ်ဝဲ တၢ်ဆၢကတီၢ်ဝံၤလံ. ယဟိဝၤယွၤ တိာ်ပာ်ဝဲလၢ အကမၤလီၤမၢ်ကွံာ် တၢ်ကီတၢ်ခဲ ကိးမံၤဒဲး လၢပှၤဟီၣ်ခိၣ်ဖိ ထံၣ်ဘၣ်ဝဲလၢဆၢကတီၢ်ခဲအံၤ ဒ်သိးဒီး န့ဆၢၣ်တၢ်ဘၣ်ဒိဘၣ်ထံး, တၢ်ဆူးတၢ်ဆါ ဒီးတၢ်သံတၢ်ပှၢ်. ပသ့ၣ်ညါဘၣ်လၢ ယဟိဝၤယွၤ ကသူဝဲအဘီအမုၢ်ဒ်သိး အကမၤလၢပှဲၤထီၣ် အတၢ်တိာ်ပာ်. (ဒၤ ၂:၄၄; လီၣ် ၂၁:၃, ၄) ဘၣ်ဆၣ် ဆၢကတီၢ်ခဲအံၤန့ၣ် ယဟိဝၤယွၤ ပျဲဝဲလၢ မုၣ်ကီၤလံၢ် ကပၢဟီၣ်ခိၣ်ဒံး. (ယိၤ ၁၂:၃၁; လီၣ် ၁၂:၉) ယဟိဝၤယွၤ မ့ၢ်မၤလီၤမၢ်န့ၢ် ပှၤဟီၣ်ခိၣ်ဖိ အတၢ်ကီတၢ်ခဲလၢ ဆၢကတီၢ်ခဲအံၤန့ၣ် ဖျါလီၤဂာ်လၢ မုၣ်ကီၤလံၢ် အတၢ်ပၢန့ၣ်အဂ့ၤ. အဃိ ပမ့ၢ်ဘၣ်အိၣ်ခိး ယဟိဝၤယွၤလၢ အကမၤလၢပှဲၤထီၣ် အတၢ်တိာ်ပာ်နာ်က့ ယဟိဝၤယွၤ ကဆဲးမၤစၢၤပှၤ ဒီးအတပာ်တ့ၢ်ပှၤဘၣ်. ယဟိဝၤယွၤ ကမၤစၢၤပှၤနီၢ်ကီၢ်. တၢး၂၃.၀၅ ၈ ¶၄; ၉-၁၀ ¶၇-၈

ဒ်သိးပှၤဂၤ ကန့ၢ်ဘၣ်အဘျုး လၢတၢ်သ့ၣ်နီၣ်ထီၣ်က့ၤအမူးအဂီၢ် ပမၤစၢၤအဝဲသ့ၣ် ကသ့ဒ်လဲၣ်. အဆိကတၢၢ်န့ၣ် ပကဘၣ်ကွဲမုာ် အဝဲသ့ၣ်. ဖဲပလဲၤဟး စံၣ်တဲၤတဲလီၤတၢ်အခါ ပကွဲမုာ် ပှၤလၢပထံၣ်လိာ်သးဒီး အဝဲသ့ၣ် တကးဒံးဘၣ် ပကွဲးနီၣ်ဃာ် ပှၤလၢ ပသ့ၣ်ညါအီၤတဖၣ်အမံၤ ဒီးကွဲမုာ်အဝဲသ့ၣ် သ့စ့ၢ်ကီး. ပကွဲးနီၣ်ဃာ် ပဘူးပတံၢ်, ပသကိးလၢ တၢ်မၤလီၢ်, ပသကိးလၢကၠိ ဒီးပှၤအဂၤလၢပသ့ၣ်ညါတဖၣ် အမံၤသ့. ဒီးပလံာ်က့လၢ လံာ်ကွဲမုာ်အဂီၢ် မ့ၢ်တယၢဘၣ် သနာ်က့ ပဆှၢန့ၢ်အဝဲသ့ၣ် လံာ်ကွဲမုာ်လၢ လီတဲစိအပူၤ သ့စ့ၢ်ကီး. အဝဲသ့ၣ် ကဟဲထီၣ်ဧါ တဟဲထီၣ်ဧါန့ၣ် ပတသ့ၣ်ညါဘၣ်, ဘၣ်ဆၣ် အဝဲသ့ၣ်မ့ၢ်ဟဲထီၣ်န့ၣ် ပကသးခုဒိၣ်မး. (စံၣ် ၁၁:၆) ပကဘၣ် သ့ၣ်နီၣ်ထီၣ်လၢ ပှၤလၢပကွဲမုာ်အီၤတဖၣ် မ့ၢ်တဟဲထီၣ်ဘၣ် ပတၢ်အိၣ်ဖှိၣ် နီတဘျီဒံးဘၣ်န့ၣ် ဘၣ်သ့ၣ်သ့ၣ် အဝဲသ့ၣ် ကအဲၣ်ဒိးသံကွၢ်ပှၤတၢ်အါမး. အဃိ ပကဘၣ် ဆိကမိၣ်ထီၣ်ပာ်စၢၤ တၢ်သံကွၢ်လၢ အဝဲသ့ၣ်ကသံကွၢ်ဝဲ ဒီးအိၣ်ကတီၤသးလၢ ပကစံးဆၢက့ၤအီၤ. ပှၤသးအိၣ်တၢ် လၢအဟဲထီၣ် တၢ်သ့ၣ်နီၣ်ထီၣ်က့ၤအမူးန့ၣ် ဘၣ်သ့ၣ်သ့ၣ် အဝဲသ့ၣ် ကဘၣ်သးသ့ၣ်ညါ တၢ်ဂ့ၢ်အိၣ်ဒံး. အဃိ ဒ်သိး “ပှၤသးဘျၢ” တဖၣ် ကန့ၢ်ဘၣ်အဘျုး လၢမူးတခါအံၤအဂီၢ် တချုးလၢ တၢ်သ့ၣ်နီၣ်ထီၣ်က့ၤအမူး ဘၣ်ဒံးဘၣ်, ဖဲမူးအံၤဘၣ်ဝဲအဆၢကတီၢ် ဒီးဖဲမူးအံၤဝံၤဝဲ အလီၢ်ခံန့ၣ် ပကဘၣ် ကျဲးစၢးမၤစၢၤအဝဲသ့ၣ်.—မၤတၢ် ၁၃:၄၈. တၢး၂၄.၀၁ ၁၂ ¶၁၃, ၁၅; ၁၃ ¶၁၆

လံာ်စီဆှံပာ်ဖျါထီၣ်ဝဲ တၢ်ဂဲၤဆၢထၢၣ် သမူထီၣ်က့ၤလၢ ဟီၣ်ခိၣ်ချၢအဂ့ၢ်န့ၣ် အိၣ်ဝဲ ဃိးဘျီညါ. အဃိ ဃုသ့ၣ်ညါကွၢ် တၢ်ဂဲၤဆၢထၢၣ် သမူထီၣ်က့ၤအဂ့ၢ်တဖၣ်အံၤ လီၤတံၢ်လီၤဆဲး. ဒီးဆိမိၣ်ထံလၢ တၢ်ဂဲၤဆၢထၢၣ် သမူထီၣ်က့ၤအဂ့ၢ် တခါဘၣ်တခါန့ၣ် ပာ်ဖျါထီၣ်ဝဲ ကစၢ်ယွၤ အတၢ်စိတၢ်ကမီၤ အိၣ်ထဲလဲၣ် ဒီးအဘၣ်သး မၤသမူထီၣ်က့ၤပှၤသံတဖၣ် ထဲလဲၣ်. ဃုကွၢ်စ့ၢ်ကီးလၢ နန့ၢ်ဘၣ် တၢ်မၤလိလၢ တၢ်ဂဲၤဆၢထၢၣ် သမူထီၣ်က့ၤအဂ့ၢ်ဒ်လဲၣ်. တၢ်ဂဲၤဆၢထၢၣ်သမူထီၣ်က့ၤ အဂ့ၢ်လၢ အရ့ဒိၣ်ကတၢၢ်လၢ ပကဘၣ်ဃုသ့ၣ်ညါန့ၣ် အကဲဝဲယ့ၣ်ၡူး တၢ်ဂဲၤဆၢထၢၣ် သမူထီၣ်က့ၤ. ပှၤလၢအထံၣ်ဘၣ်လၢ ယ့ၣ်ၡူး ဂဲၤဆၢထၢၣ် သမူထီၣ်က့ၤ နီၢ်ကီၢ်န့ၣ် အိၣ်ဝဲအဂၤလၢ အကယၤတဖၣ်ညါအဃိ တၢ်အုၣ်သးတဖၣ်အံၤ မၤဂၢၢ်ကျၢၤဒိၣ်ထီၣ် ပတၢ်နာ်ဒိၣ်မး. (၁ ကရံၣ် ၁၅:၃-၆, ၂၀-၂၂) ယဟိဝၤယွၤ အၢၣ်လီၤပှၤလၢ အကမၤသမူထီၣ်က့ၤပှၤသံအဃိ ပစံးဘျုးအီၤဒိၣ်မး. ပသ့ၣ်ညါလၢ ယဟိဝၤယွၤ အိၣ်ဒီးတၢ်စိတၢ်ကမီၤ ဒီးအဘၣ်သး မၤသမူထီၣ်က့ၤပှၤသံအဃိ ပနာ်လၢ အကမၤလၢပှဲၤ အတၢ်အၢၣ်လီၤသပှၢ်တၢၢ်. ယဟိဝၤယွၤ အၢၣ်လီၤပဝဲကိးဂၤဒဲးလၢ ‘ပှၤလၢ နအဲၣ်ဘၣ် ကဂဲၤဆၢထၢၣ်က့ၤ’ အဃိ ပဘၣ်ကျဲးစၢး မၤဂၢၢ်ကျၢၤဒိၣ်ထီၣ် ပတၢ်နာ်လၢ တၢ်ဂဲၤဆၢထၢၣ် သမူထီၣ်က့ၤ. ပမ့ၢ်မၤဒ်န့ၣ်န့ၣ် ပတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်.—ယိၤ ၁၁:၂၃. တၢး၂၃.၀၄ ၈ ¶၂; ၁၂ ¶၁၇; ၁၃ ¶၂၀

ပမ့ၢ်အိၣ်ဒီးတၢ်ဆီၣ်လီၤသးန့ၣ် ပတဆိမိၣ်ဒိၣ်လီၤသးဘၣ် ဒီးပသ့ၣ်ညါလီၤသးလၢ ပမၤတၢ်တသ့ခဲလၢာ်ဘၣ်. တကးဒံးဘၣ် ပပာ်ကဲပှၤဂၤ ဒီးပဆိမိၣ်လၢ ပှၤဂၤဂ့ၤဒိၣ်န့ၢ်ဒံးပှၤ. (ဖံလံး ၂:၃) စီၤကံးဒဧိၣ်န့ၣ် အကဲပှၤလၢအအိၣ်ဒီး တၢ်ဆီၣ်လီၤသး. အဒိ ဖဲယဟိဝၤယွၤ အမူခိၣ်ကလူး တဲစီၤကံးဒဧိၣ်လၢ ကစၢ်ယွၤဃုထၢထီၣ်အီၤ လၢအကမၤပူၤဖျဲး ပှၤအံၣ်စရ့လးဖိလၢ ပှၤမံးဒယၣ်ဖိ အစုပူၤအခါ စီၤကံးဒဧိၣ်တဲဝဲလၢ “ယဒူၣ်ဖိထၢဖိမ့ၢ် ဒူၣ်ဖိထၢဖိလၢ အရ့တဒိၣ်ဘၣ်တဒူၣ်လၢ မနၤၡ့ၤအဒူၣ်အကျါလီၤ. ဒီးယမ့ၢ်ပှၤလၢ အဆံးကတၢၢ်လၢ ယပၢ်အဒူၣ်ဖိထၢဖိ အကျါ.” (စံၣ်ညီၣ် ၆:၁၅) စီၤကံးဒဧိၣ် ဆိမိၣ်ဝဲလၢ အမၤလၢပှဲၤ မူဒါတခါန့ၣ် တန့ၢ်ဘၣ်. ဘၣ်ဆၣ် ယဟိဝၤယွၤ သ့ၣ်ညါဝဲလၢ အမၤဝဲန့ၢ်. လၢခံန့ၣ် ခီဖျိလၢ ယဟိဝၤယွၤ အတၢ်မၤစၢၤအဃိ စီၤကံးဒဧိၣ် မၤလၢပှဲၤအမူဒါန့ၢ်ဝဲ. တၢ်အိၣ်ဖှိၣ်သးပှၢ်တဖၣ်န့ၣ် တသ့ဖဲအသ့ အပာ်ဖျါထီၣ် တၢ်ဆီၣ်လီၤသးလၢ တၢ်ကိးမံၤဒဲးအပူၤ. (မၤတၢ် ၂၀:၁၈, ၁၉) အဝဲသ့ၣ် ပာ်ဖျါထီၣ် တၢ်ဆီၣ်လီၤသး ခီဖျိ အဝဲသ့ၣ် တပတြၢၤလီၤသးလၢ တၢ်လၢအမၤဝဲသ့ ဒီးတၢ်လၢ အမၤကဲထီၣ်လိၣ်ထီၣ်ဝဲ အဃိဘၣ်. ဒီးအမၤတၢ် မ့ၢ်ကမၣ်နာ်က့ အကျဲးစၢးဝဲဒ်သိး အတဆိမိၣ်လီၤသးလၢ အတကျီးဘၣ်န့ၣ်ဘၣ်. တၢး၂၃.၀၆ ၃ ¶၄-၅

မုၣ်ကီၤလံၢ်အခိၣ် ကဘၣ်တၢ်မၤသဘှံးအီၤအဂီၢ် ပှၤကဘၣ်အိၣ်ခိးဒံး အနံၣ် ၁,၀၀၀ ဘျဲၣ်ညါ. (လီၣ် ၂၀:၇-၁၀) တချုးလၢ အဟဲကဲထီၣ်သးဒံးဘၣ်န့ၣ် လံာ်စီဆှံ ပာ်ဖျါထီၣ်န့ၢ်ပှၤ တၢ်မၤအသး လၢကကဲထီၣ်သး တဆီဘၣ်တဆီအဂ့ၢ်. လံာ်စီဆှံ တဲဝဲလၢ ပှၤကလုာ်တဖၣ် ကတဲဝဲလၢ “တၢ်မုာ်တၢ်ခုၣ် ဒီးတၢ်ဘံၣ်တၢ်ဘၢအိၣ်လံ.” (၁ သ့း ၅:၂, ၃) ဒီးဖဲပဒိၣ်ပပှၢ်တဖၣ် ကမၤဟးဂီၤကွံာ် တၢ်ဘူၣ်တၢ်ဘါ လၢအကမၣ်တဖၣ်အခါ တၢ်နးတၢ်ဖှီၣ်ဖးဒိၣ် ကစးထီၣ် “တဘျီဃီ.” (လီၣ် ၁၇:၁၆) ဒီးယ့ၣ်ၡူး ကနီၤဖးသိဒီးမဲာ်တဲးလဲး ဒ်သိးကစံၣ်ညီၣ် ပှၤဟီၣ်ခိၣ်ဖိအဂီၢ်. (မး ၂၅:၃၁-၃၃, ၄၆) ဖဲန့ၣ်အဆၢကတီၢ် မုၣ်ကီၤလံၢ်န့ၣ် တအိၣ်ဃိဒိဘၣ်. အကသးပှံၢ်ထီၣ်တၢ် ဒီးကထိၣ်ဟူးထိၣ်ဂဲၤထီၣ် ပှၤကလုာ်တဖၣ် ဒ်သိး ကပာ်ဖှိၣ်ထီၣ်အသး. ပှၤတဖၣ်န့ၣ် လံာ်စီဆှံ ကိးအဝဲသ့ၣ်လၢ စီၤကိးလၢကီၢ်မါကူး ဒီးအဝဲသ့ၣ် ကဟဲထီဒါ ယဟိဝၤယွၤ အပှၤဂီၢ်မုၢ်. (ဃ့း ၃၈:၂, ၁၀, ၁၁) ဒီးဖဲတၢ်နးတၢ်ဖှီၣ်ဖးဒိၣ် အဆၢကတီၢ် တတီၤတီၤန့ၣ် ပှၤဘၣ်တၢ်ဒိးဖှူအီၤ လၢအအိၣ်တ့ၢ်ဒံးတဖၣ် ကက့ၤထီၣ်လၢမူခိၣ်. အဝဲသ့ၣ် ကပာ်ဖှိၣ်ထီၣ်သးဒီး ယ့ၣ်ၡူး ဒီးမူခိၣ်အသုးမုၢ်သံၣ်ဘိတဖၣ် ဒ်သိးကဒုးတၢ်လၢ အၢ်မက့းဒိၣ်တၢ်ဒုး ဖဲတၢ်နးတၢ်ဖှီၣ်ဖးဒိၣ်အကတၢၢ် အဆၢကတီၢ်. (မး ၂၄:၃၁; လီၣ် ၁၆:၁၄, ၁၆) ဖဲန့ၣ်ဝံၤအလီၢ်ခံ ယ့ၣ်ၡူးအတၢ်ပၢအနံၣ် တကထိ ကစးထီၣ်ဝဲ.—လီၣ် ၂၀:၆. တၢး၂၃.၁၀ ၂၀-၂၁ ¶၉-၁၀

ဆၢကတီၢ်ခဲအံၤ ယဟိဝၤယွၤ အခ့အပှၤအါဂၤ အိၣ်လၢတၢ်လီၢ်လၢ ပဒိၣ်တြီဃာ် ပတၢ်ဖံးတၢ်မၤ. ပဒီပုၢ်ဝဲၢ်မုၣ်ခွါတဖၣ်န့ၣ် အတၢ်အိၣ်သး လီၤဂာ်ဒ်သိးဒီး စီၤဧိၤဘါဒယၤ. အဝဲသ့ၣ်ထံၣ်ဘၣ် တၢ်ကီတၢ်ခဲနာ်က့ အဆဲးဘူၣ်ထီၣ်ဘါထီၣ် ယဟိဝၤယွၤ ဒီးအဝဲသ့ၣ်ဆဲးပာ်ကဲ ပဒိၣ်တဖၣ်ဒံး. (မး ၂၂:၂၁) အဝဲသ့ၣ်ပာ်ဖျါထီၣ်လၢ အပျံၤကစၢ်ယွၤ ခီဖျိ အကနၣ် ကစၢ်ယွၤအကလုၢ် အါန့ၢ်ဒံး အကနၣ် ပှၤကညီအကလုၢ်ဒံး. (မၤတၢ် ၅:၂၉) အဃိ အဝဲသ့ၣ် ဆဲးစံၣ်တဲၤတဲလီၤ တၢ်သးခုကစီၣ် ဒီးဆဲးထီၣ်တၢ်အိၣ်ဖှိၣ်တပူၤဃီ လၢတၢ်ကူၣ်သ့အပူၤ. (မး ၁၀:၁၆, ၂၈) ပဒီပုၢ်ဝဲၢ်မုၣ်ခွါတဖၣ်အံၤ ကျဲးစၢးမၤစၢၤလိာ်သး ဒ်သိးအဝဲသ့ၣ် ကန့ၢ်ဘၣ်နီၢ်သးတၢ်အီၣ် ဒီးကဆဲးအိၣ်ဒီး တၢ်ရ့လိာ်သးဒီး ယဟိဝၤယွၤလၢအဂ့ၤ. ပကကွၢ်သကိး ဒီပုၢ်ဝဲၢ်ခွါဟဲနရံၤ လၢအအိၣ်လၢ အၤဖြံၤကၤတၢ်လီၢ်. တၢ်လီၢ်လၢအအိၣ်ဝဲန့ၣ် လၢအပူၤကွံာ် ပဒိၣ်တြီဃာ် ပတၢ်ဖံးတၢ်မၤ. ဖဲပဒိၣ်တြီဃာ် ပတၢ်ဖံးတၢ်မၤအခါ ဒီပုၢ်ဝဲၢ်ခွါဟဲနရံၤ မၤစၢၤတၢ်လၢ ကဆှၢန့ၢ်ဝဲ ပတၢ်ကရၢကရိ လံာ်လဲၢ်လၢ ပဒီပုၢ်ဝဲၢ်မုၣ်ခွါအအိၣ်. အတဲဝဲလၢ “ယကဲပှၤလၢအမဲာ်ဆှးသ့. သနာ်က့ . . . ယဟိဝၤယွၤ ဟ့ၣ်ယၤတၢ်သးဒူလၢ ယလိၣ်ဘၣ်.” နၤစ့ၢ်ကီး နအိၣ်ဒီးတၢ်သးဒူ ဒီးနမၤအါထီၣ် တၢ်ပျံၤကစၢ်ယွၤ လၢအဂ့ၤတကလုာ် ဒ်သိးဒီး ဒီပုၢ်ဝဲၢ်ခွါဟဲနရံၤသ့. တၢး၂၃.၀၆ ၁၆ ¶၉, ၁၁

နီၢ်အံၣ်အု ဒီးစီၤအၤဒၣ် ထီဒါတၢ်ဝံၤအလီၢ်ခံ ကစၢ်ယွၤ အတၢ်တိာ်ပာ်လၢ ပှၤဟီၣ်ခိၣ်ဖိ အလၢအပှဲၤ ကအိၣ်လၢဟီၣ်ခိၣ်ချၢန့ၣ် ဖျါလီၤဂာ်လၢ မုၣ်ကီၤလံၢ် မၤဟးဂီၤဝဲန့ၢ်လံ. ဘၣ်သ့ၣ်သ့ၣ် မုၣ်ကီၤလံၢ် ကဆိကမိၣ်ဝဲလၢ ယဟိဝၤယွၤ မၤလၢပှဲၤထီၣ် အတၢ်အၢၣ်လီၤ တသ့ဘၣ်. အဃိ အဆိကမိၣ်ဝဲလၢ ဒ်သိး ယဟိဝၤယွၤ ကမၤလၢပှဲၤ အတၢ်တိာ်ပာ် လၢပှၤဟီၣ်ခိၣ်ဖိအဂီၢ် အကဘၣ် မၤသံကွံာ် နီၢ်အံၣ်အု ဒီးစီၤအၤဒၣ် ဒီးအကဘၣ်တ့လီၤ ပှၤဒီမိၢ်ဝၤ အလၢအပှဲၤ လၢအသီခံဂၤ. သနာ်က့ ယဟိဝၤယွၤ မ့ၢ်မၤဝဲဒ်န့ၣ်န့ၣ် မုၣ်ကီၤလံၢ်ကတဲလၢ ယဟိဝၤယွၤန့ၣ် အကဲပှၤလံၣ်တၢ်. ဘၣ်မနုၤအဃိ ပတဲဒ်န့ၣ်လဲၣ်. ခီဖျိလၢ ဖဲ ၁ မိၤၡ့ ၁:၂၈ န့ၣ်ယဟိဝၤယွၤ တဲဘၣ် နီၢ်အံၣ်အု ဒီးစီၤအၤဒၣ်လၢ အဝဲသ့ၣ် အချံအသၣ်န့ၣ် ကဘၣ်မၤပှဲၤထီၣ်ဟီၣ်ခိၣ်. ဘၣ်သ့ၣ်သ့ၣ် မုၣ်ကီၢ်လံၢ် ကဆိကမိၣ်ဝဲလၢ ယဟိဝၤယွၤ ကပျဲဝဲလၢ နီၢ်အံၣ်အု ဒီးစီၤအၤဒၣ် ကအိၣ်ဖျဲၣ်ထီၣ်အဖိ ဘၣ်ဆၣ် အဖိတဖၣ်အံၤ ကဲထီၣ် ပှၤလၢပှၤပှဲၤ တသ့နီတဘျီဘၣ်. (စံၣ် ၇:၂၀; ရိ ၃:၂၃) ဒီးနီၢ်အံၣ်အု ဒီးစီၤအၤဒၣ် အစၢၤအသွဲၣ် မ့ၢ်တကဲထီၣ် ပှၤလၢပှၤပှဲၤဘၣ်န့ၣ် မုၣ်ကီၤလံၢ် ကတဲဝဲလၢ ယဟိဝၤယွၤ မၤလၢပှဲၤထီၣ် အတၢ်အၢၣ်လီၤ တန့ၢ်ဘၣ်. ဒီးကစၢ်ယွၤ အတၢ်တိာ်ပာ်လၢ ပှၤဟီၣ်ခိၣ်ဖိ အလၢအပှဲၤ ကအိၣ်လၢ ဟီၣ်ခိၣ်ချၢန့ၣ် ကဲထီၣ်သးတသ့ဘၣ်. တၢး၂၃.၁၁ ၆ ¶၁၅-၁၆

ဆၢကတီၢ်ခဲအံၤ ယဟိဝၤယွၤဟ့ၣ်ပှၤ တၢ်ဟံးစုနဲၣ်ကျဲ ခီဖျိအကလုၢ်ကထါ ဒီးအတၢ်ကရၢကရိ လီၤတံၢ်လီၤဆဲး. အဃိ ပတဘၣ်မၤအါထီၣ် အတၢ်ဟံးစုနဲၣ်ကျဲ လၢအဟ့ၣ်ပာ်စၢၤပှၤဘၣ်. (ကတိၤ ၃:၅-၇) တကးဒံးဘၣ် ပတဘၣ်မၤအါန့ၢ်ဒံး တၢ်ကွဲးအသး လၢလံာ်စီဆှံပူၤ ဒီးဒုးအိၣ်ထီၣ်တၢ်သိၣ်တၢ်သီလၢ ပဒီပုၢ်ဝဲၢ်မုၣ်ခွါအဂီၢ်ဘၣ်. မုၣ်ကီၤလံၢ်သူဝဲ “တၢ်လီတၢ်ဝ့ၤ ကလီကလီ” ဒီး “ပှၤဟီၣ်ခိၣ်ဖိ အလုၢ်အလၢ် ဒီးဟီၣ်ခိၣ်အတၢ်ထံၣ်” ဒ်သိးကဆှၢကမၣ် ဒီးမၤလီၤဖး ပှၤဟီၣ်ခိၣ်ဖိ. (ကလီး ၂:၈) ဖဲတၢ်မၢဖိအစိၤန့ၣ် ပှၤယူဒၤဖိသိၣ်လိဝဲ ပှၤဟီၣ်ခိၣ်ဖိ အတၢ်ထံၣ်တဖၣ်လၢ အတသန့ၤထီၣ်သးလၢ လံာ်စီဆှံဘၣ် ဒီးအဝဲသ့ၣ် သိၣ်လိဝဲလၢ ခရံာ်ဖိတဖၣ် ကဘၣ်မၤထွဲဝဲ စီၤမိၤၡ့ အတၢ်သိၣ်တၢ်သီ. တၢ်သိၣ်လိတဖၣ်အံၤ အကဲတၢ်လံၣ်တၢ်လီ လၢအမၤယံၤထီၣ်ပှၤဂၤဒီး ယဟိဝၤယွၤ လၢအမ့ၢ်တၢ်ကူၣ်သ့ အဂံၢ်ခီၣ်ထံး. ဆၢကတီၢ်ခဲအံၤစ့ၢ်ကီး မုၣ်ကီၤလံၢ်သူဝဲ ကမျၢၢ်တၢ်ကစီၣ် ဒီးအ့ၤထၢၤနဲၣ် ဒ်သိးကရၤလီၤဝဲ တၢ်ကစီၣ်လၢအကမၣ် ဒီးအတမ့ၢ်တတီဘၣ် လၢထံကီၢ်ခိၣ်နၢ်တဖၣ် ရၤလီၤဝဲ. တၢး၂၃.၀၇ ၁၆ ¶၁၁-၁၂

ယဟိဝၤယွၤ ကမၤမနုၤလဲၣ်န့ၣ် မုၣ်ကီၤလံၢ် တသ့ၣ်ညါဝဲနီတဘျီဘၣ်. မုၣ်ကီၤလံၢ်, နီၢ်အံၣ်အု ဒီးစီၤအၤဒၣ် ထီဒါတၢ် သနာ်က့ ယဟိဝၤယွၤ ကမၤလၢပှဲၤထီၣ် အတၢ်တိာ်ပာ်အဂီၢ် အအိၣ်ဒီး အတၢ်ရဲၣ်တၢ်ကျဲၤ အဂ့ၤကတၢၢ်. ယဟိဝၤယွၤ ပျဲဝဲလၢ နီၢ်အံၣ်အု ဒီးစီၤအၤဒၣ် ကထီၣ်ဖိထီၣ်လံၤ ဒီးခီဖျိလၢ ယဟိဝၤယွၤ မၤဝဲဒ်အံၤအဃိ အတၢ်အၢၣ်လီၤ ဟဲလၢပှဲၤထီၣ် ဒီးအပာ်ဖျါထီၣ်လၢ အတကဲ ပှၤလံၣ်တၢ်တဂၤဘၣ်. ယဟိဝၤယွၤ ပာ်ဖျါထီၣ်ဝဲလၢ အမ့ၢ်တဲလၢ အကမၤတၢ်တမံၤမံၤန့ၣ် တၢ်မနုၤမး တြီအီၤတန့ၢ်ဘၣ်. ယဟိဝၤယွၤ မၤဝဲဒ်သိး အတၢ်အၢၣ်လီၤ ကဟဲလၢပှဲၤထီၣ် ခီဖျိ အဒုးအိၣ်ထီၣ်ဝဲ ပိာ်မုၣ် “အချံအသၣ်” လၢအကမၤပူၤဖျဲးဝဲ နီၢ်အံၣ်အု ဒီးစီၤအၤဒၣ် အစၢၤအသွဲၣ်တဖၣ် လၢအအိၣ်ဒီး တၢ်ဒိကနၣ်. (၁ မိၤ ၃:၁၅; ၂၂:၁၈) ပိာ်မုၣ်အချံအသၣ်အံၤ ကဟ့ၣ်လီၤအသးသမူ ဒ်တၢ်ပှ့ၤက့ၤအသိး ဒီးကမၤပူၤဖျဲးဝဲ ပှၤဟီၣ်ခိၣ်ဖိ. ပသ့ၣ်ညါဘၣ်လၢ တၢ်ပှ့ၤက့ၤန့ၣ် အဒိးသန့ၤထီၣ်သးလၢ ယဟိဝၤယွၤ အတၢ်အဲၣ်နီၢ်ကီၢ်. (မး ၂၀:၂၈; ယိၤ ၃:၁၆) မ့မ့ၢ် မုၣ်ကီၤလံၢ်န့ၣ် အအဲၣ်လီၤထဲအသး ဒီးအတအိၣ်ဒီး တၢ်အဲၣ်နီၢ်ကီၢ်ဘၣ်အဃိ ယဟိဝၤယွၤ ကရဲၣ်ကျဲၤဝဲ တၢ်ပှ့ၤက့ၤ လၢကျဲဒ်အံၤန့ၣ် မုၣ်ကီၤလံၢ် တဆိကမိၣ်ဘၣ်နီတဘျီဘၣ်. ဒီးခီဖျိလၢ တၢ်ပှ့ၤက့ၤအဃိ ခါဆူညါ တၢ်ကကဲထီၣ်သးဒ်လဲၣ်. ယ့ၣ်ၡူး ပၢတၢ်အနံၣ်တကထိ ဝံၤအလီၢ်ခံ နီၢ်အံၣ်အု ဒီးစီၤအၤဒၣ် အစၢၤအသွဲၣ် လၢအကဲထီၣ် ပှၤလၢပှၤပှဲၤ ဒီးအအိၣ်ဒီး တၢ်ဒိကနၣ်န့ၣ် ကအိၣ်ဘၣ်လၢ ဟီၣ်ခိၣ်ပၤရဒံစူးအပူၤ ဒ်ယဟိဝၤယွၤ တိာ်ပာ်ဝဲအသိး. တၢး၂၃.၁၁ ၆ ¶၁၇

ယဟိဝၤယွၤတဲဝဲလၢ တၢ်သွံၣ်န့ၣ် အကဲတၢ်သးသမူ ဒီးအကဲတၢ်ဟ့ၣ်လုၢ်ဒိၣ်ပှ့ၤဒိၣ်တခါ လၢအဟ့ၣ်လီၤပှၤ. (၃ မိၤ ၁၇:၁၄) အဃိ ပမၤထွဲ ယဟိဝၤယွၤ အတၢ်သိၣ်တၢ်သီ ဘၣ်ဃးဒီး တၢ်ပာ်လုၢ်ပာ်ပှ့ၤ သးသမူ ဒီးတၢ်သွံၣ်. ဖဲယဟိဝၤယွၤ ဟ့ၣ်ပှၤဟီၣ်ခိၣ်ဖိအခွဲးလၢ ကအီၣ်တၢ်ဖံးတၢ်ညၣ်အခါ အမၤလိာ် အဝဲသ့ၣ်လၢ တဘၣ်အီၣ် တၢ်သွံၣ်ဘၣ်. (၁ မိၤ ၉:၄) ဖဲယဟိဝၤယွၤ ဟ့ၣ်လီၤပှၤအံၣ်စရ့လးဖိ တၢ်သိၣ်တၢ်သီအခါ အမၤလိာ်စ့ၢ်ကီး အဝဲသ့ၣ်လၢ တဘၣ်အီၣ် တၢ်သွံၣ်ဘၣ်. (၃ မိၤ ၁၇:၁၀) ဒီးဖဲတၢ်မၢဖိအစိၤန့ၣ် ယဟိဝၤယွၤ မၤလိာ် ပှၤပၢဆှၢတၢ်ကမံးတံာ်လၢ ကတဲဘၣ် ခရံာ်ဖိခဲလၢာ်လၢ အဝဲသ့ၣ်ကဘၣ် “ဟးဆှဲး [တၢ်သွံၣ်] ထီဘိ.” (မၤတၢ် ၁၅:၂၈, ၂၉) ဆၢကတီၢ်ခဲအံၤစ့ၢ်ကီး ပမ့ၢ်ဘၣ်ဆၢတဲာ်တၢ် ဘၣ်ဃးဒီး ပတၢ်အိၣ်ဆူၣ်အိၣ်ချ့န့ၣ် ပကဘၣ် မၤထွဲတၢ်မၤလိာ်အံၤ လီၤတံၢ်လီၤဆဲး. ကဘၣ်ဟးဆှဲးစ့ၢ်ကီး တၢ်မၤကမၣ်မုၣ်ကမၣ်ခွါ. တၢ်မၢဖိပီလူး သူတၢ်ကတိၤလၢ “မၤသံကွံာ်” သုနီၢ်ခိက့ၢ်ဂီၤန့ၣ် အဲၣ်ဒိးတဲဝဲ အခီပညီလၢ ပကဘၣ်ကျဲးစၢး မၤလီၤမၢ်ကွံာ် တၢ်သူၣ်လီသးကွံလၢ အကမၣ်တဖၣ်. ပတဘၣ် ကွၢ်တၢ်တမံၤမံၤ မ့တမ့ၢ် မၤတၢ်တမံၤမံၤလၢ ပကမၤဘၣ် တၢ်မၤကမၣ်မုၣ်ကမၣ်ခွါန့ၣ်ဘၣ်.—ကလီး ၃:၅; ဘး ၃၁:၁. တၢး၂၃.၀၇ ၁၅ ¶၅-၆

စီၤၡံၡိၣ် အဲၣ်ဘၣ်ဝဲ နီၢ်ဒလံလၤဒိၣ်မးအဃိ အတဆိမိၣ်ဝဲလၢ နီၢ်ဒလံလၤ ကကူၣ်အီၤဘၣ်. ဘၣ်မနုၤအဃိ စီၤၡံၡိၣ် ဂံၢ်ဆူၣ်ထဲအံၤညါလဲၣ်န့ၣ် နီၢ်ဒလံလၤ သံကွၢ်န့ၢ်ဆူၣ်အီၤ ခဲအံၤခဲအံၤအဃိ လၢခံစီၤၡံၡိၣ် တဲဘၣ်အီၤ. စီၤၡံၡိၣ် မၤကမၣ်တၢ် ခီဖျိ အတဲဘၣ် နီၢ်ဒလံလၤ လၢအတၢ်ခူသူၣ်အဃိ လၢခံန့ၣ် အဂံၢ်တဆူၣ် ဒ်သိးဒီးလၢညါလၢၤဘၣ် ဒီးအတၢ်ရ့လိာ်သးဒီး ယဟိဝၤယွၤစ့ၢ်ကီး ဘၣ်ဒိဝဲ. (စံၣ်ညီၣ် ၁၆:၁၆-၂၀) စီၤၡံၡိၣ် နာ်န့ၢ် နီၢ်ဒလံလၤ အါန့ၢ်အနာ်န့ၢ် ယဟိဝၤယွၤ အဃိ အထံၣ်ဘၣ် တၢ်ကီတၢ်ခဲ ဒီးအဘၣ်လဲၤခီဖျိတၢ်နးမး. ပှၤဖလ့ၡသးဖိ ဖီၣ်န့ၢ်စီၤၡံၡိၣ် ဒီးမၤဘျီၣ်အမဲာ်ချံ. ဝံၤဒီး ပှၤဖၢနုာ်အီၤလၢဃိာ်ပူၤ ဖဲဝ့ၢ်ဂါစၤ ဒီးပှၤမၢအဂူာ်ဘု လၢဆၢၣ်ဂူာ်. ပှၤဖလ့ၡသးဖိတဖၣ် နာ်ဝဲလၢ အယွၤဒၤကိၣ် မၤစၢၤအဝဲသ့ၣ်လၢ ကဖီၣ်န့ၢ်ဝဲ စီၤၡံၡိၣ်အဃိ လၢခံအဝဲသ့ၣ် ပာ်ဖှိၣ်ထီၣ်အသး ဒီးလုၢ်ထီၣ်တၢ်လုၢ်လၢ အယွၤဒၤကိၣ်အအိၣ်. တကးဒံးဘၣ် အဝဲသ့ၣ်ကိးထီၣ် စီၤၡံၡိၣ်လၢဃိာ်ပူၤ ဒီးလဲၤကိးအီၤလၢဘူၣ်ပူၤ ဒ်သိးပှၤ “ကနံၤဘၣ်အီၤ” ဒီးပှၤကမၤမဲာ်ဆှးအီၤအဂီၢ်.—စံၣ်ညီၣ် ၁၆:၂၁-၂၅. တၢး၂၃.၀၉ ၅-၆ ¶၁၃-၁၄

ဘၣ်သ့ၣ်သ့ၣ် ပှၤလၢပတၢ်မၤလီၢ် မ့တမ့ၢ် ပှၤလၢပထီၣ်ကၠိဒီးအီၤ တဂၤဂၤ ကသံကွၢ်ပှၤလၢ ဘၣ်မနုၤအဃိ ပအိၣ်မူမၤထွဲ လံာ်စီဆှံအတၢ်ဘျၢလဲၣ်. ပကတဲပၠးအဝဲသ့ၣ်လၢ ပနာ်လၢ လံာ်စီဆှံ အတၢ်ဘျၢန့ၣ် အဂ့ၤကတၢၢ်လၢပဂီၢ် တကးဒံးဘၣ် ပကဘၣ် ပာ်ကဲအဝဲသ့ၣ် အတၢ်ထံၣ်. (၁ ပ့း ၃:၁၅) အဃိ ဖဲပှၤသံကွၢ်ပှၤ တၢ်သံကွၢ်အခါ ပတဘၣ်ကရီဆိမိၣ်လၢ အဝဲသ့ၣ် သံကွၢ်ဆဲးအဲးတၢ်ဘၣ်. ပကဘၣ်ဆိမိၣ်ဆိလၢ အတၢ်သံကွၢ်န့ၣ် ကမၤစၢၤပှၤဒ်သိး ပကသ့ၣ်ညါဘၣ် တၢ်အရ့ဒိၣ်လၢအဂီၢ် မ့ၢ်မနုၤလဲၣ်ဟီ. ဒီးအမ့ၢ်သံကွၢ်တၢ် ဒ်လဲၣ်ဒ်လဲၣ်သနာ်က့ ပကဘၣ် စံးဆၢက့ၤအီၤ မုာ်မုာ်. ပမ့ၢ်စံးဆၢက့ၤအီၤ မုာ်မုာ်န့ၣ် ကမၤစၢၤအီၤလၢ အကဆိမိၣ်ထံက့ၤ အတၢ်ထံၣ်. အဒိ ပှၤလၢပတၢ်မၤလီၢ်တဂၤ မ့ၢ်သံကွၢ်ပှၤလၢ ဘၣ်မနုၤအဃိ ပတမၤ နံၤအိၣ်ဖျဲၣ်ဘၣ်လဲၣ်န့ၣ် ပကမၤဒ်လဲၣ်. အဆိကတၢၢ်န့ၣ် ပဘၣ်ဆိမိၣ်ထံဆိလၢ ဘၣ်သ့ၣ်သ့ၣ် အကဆိမိၣ်ဝဲလၢ ပဝဲယဟိဝၤပှၤအုၣ်အသးန့ၣ် ပမၤမုာ်မၤဖှံသး တန့ၢ်ဘၣ်ဟီဧါ. ဒ်သိး အဝဲသ့ၣ်တထံၣ်ပှၤ ဒ်န့ၣ်တဂ့ၤအဂီၢ် အဆိကတၢၢ် ပကပတြၢၤအီၤလၢ အကဲပှၤလၢ အသးအိၣ်ပှၤဂၤ. ပမ့ၢ်မၤဒ်န့ၣ်န့ၣ် ဘၣ်သ့ၣ်သ့ၣ် ပကန့ၢ်ဘၣ် တၢ်ခွဲးတၢ်ယာ်လၢ ပကတဲဘၣ်အီၤတၢ်လၢ လံာ်စီဆှံပာ်ဖျါထီၣ်ဝဲ ဘၣ်ဃးဒီး နံၤအိၣ်ဖျဲၣ်အဂ့ၢ်. တၢး၂၃.၀၉ ၁၇ ¶၁၀-၁၁

ပတၢ်ဆၢကတီၢ် လၢအအိၣ်ဒီးပှၤန့ၣ် ပကဘၣ်သူအီၤလၢ အဂ့ၤကတၢၢ် ဒ်သိး ပကစံၣ်တဲၤတဲလီၤဘၣ် ပှၤကလုာ်ခဲလၢာ် လၢဟီၣ်ခိၣ်ဒီဘ့ၣ်အဂီၢ်. စီၤပ့းတရူး ဟ့ၣ်သဆၣ်ထီၣ်ပှၤလၢ ပက “အိၣ်ခိးဒီးကွၢ်လၢ်” ယဟိဝၤယွၤအမုၢ်နံၤ. (၂ ပ့း ၃:၁၁, ၁၂) အဃိ ပမၤဒ်န့ၣ် ကသ့ဒ်လဲၣ်. ပမၤဒ်န့ၣ် သ့ခီဖျိ တနံၤဘၣ်တနံၤ ပဆိမိၣ်ထံ တၢ်ဆိၣ်ဂ့ၤလၢ ပကဒိးန့ၢ်ဘၣ်လၢ ဟီၣ်ခိၣ်သီအပူၤ. ပကထံၣ်တမှံလၢ ပကသါဘၣ် ကလံၤလၢ အကဆှီ, အီၣ်ဘၣ်တၢ်အီၣ် လၢအန့ၢ်ဂံၢ်န့ၢ်ဘါ ဒီးထံၣ်ဘၣ်က့ၤ ပှၤလၢပအဲၣ် လၢအသံသဒၣ်ပှၤ ဖဲအဝဲသ့ၣ် ဂဲၤဆၢထၢၣ် သမူထီၣ်က့ၤအခါ. တကးဒံးဘၣ် ထံၣ်တမှံကွၢ် ပှၤလၢအသံ လၢအနံၣ်လၢ အကယၤတဖၣ် လၢအဂဲၤဆၢထၢၣ် သမူထီၣ်က့ၤန့ၣ် ပကသိၣ်လိဘၣ် အဝဲသ့ၣ် ဘၣ်ဃးဒီး ဝံအတၢ်စံးပာ် လၢထီၣ်ပှဲၤထီၣ်ဝဲအဂ့ၢ်. ပမ့ၢ်ဆိမိၣ်ထီၣ် ဘၣ်ဃးဒီး တၢ်ဂ့ၢ်တဖၣ်အံၤန့ၣ် ကမၤစၢၤပှၤလၢ ပကအိၣ်ခိး ကစၢ်ယွၤအမုၢ်နံၤလၢ တၢ်သးဆူၣ်အပူၤ ဒီးနာ်လၢ တယံာ်လၢၤဘၣ်န့ၣ် ကစၢ်ယွၤအမုၢ်နံၤ ကဟဲဝဲသပှၢ်တၢၢ်. ခါဆူညါ တၢ်ကမၤအသး ဒ်လဲၣ်န့ၣ် ပ “သ့ၣ်ညါဆိပာ်စၢၤ တၢ်ဂ့ၢ်အံၤ” အဃိ တၢ်သိၣ်လိလၢ အကမၣ်တဖၣ် “တဆှၢကမၣ်” ပှၤဘၣ်. တၢး၂၃.၀၉ ၂၇ ¶၅-၆

ပှၤသးစၢ်တဖၣ် အိၣ်ဒီးအသကိးတဖၣ်လၢ “တဒိကနၣ်အမိၢ်အပၢ် အကလုၢ်ဘၣ်.” (၂ တံၤ ၃:၁, ၂) ဘၣ်မနုၤအဃိ အဝဲသ့ၣ်အါဂၤ တဘၣ်သး ဒိကနၣ် အမိအပါ အကလုၢ်ဘၣ်လဲၣ်. မိပါတနီၤန့ၣ် ဖဲအဝဲသ့ၣ် သိၣ်အဖိအခါ ခီဖျိလၢ အဝဲသ့ၣ်တမၤဝဲ ဒ်အတဲအဖိအသိးဘၣ် အဃိ အဖိတဖၣ် တနာ်အီၣ်အဝဲသ့ၣ် ဒီးတကနၣ် အကလုၢ်လၢၤဘၣ်. ဒီးခီဖျိလၢ ဟီၣ်ခိၣ်တၢ်အိၣ်သး ဆီတလဲအဃိ ပှၤသးစၢ်တနီၤ ဆိကမိၣ်ဝဲလၢ မိပါတၢ်ဟ့ၣ်ကူၣ်တဖၣ်န့ၣ် တကဲဘျုးလၢၤဘၣ် ဒီးတချုးစိၤလၢၤဘၣ်. နမ့မ့ၢ် ပှၤသးစၢ်န့ၣ် နဆိကမိၣ်ဒ်န့ၣ် တဘျီဘျီဧါ. ယဟိဝၤယွၤ အဲၣ်ဒိးလၢ ပှၤသးစၢ်တဖၣ် ကမၤထွဲ တၢ်မၤလိာ်လၢ ပထံၣ်ဘၣ်ဖဲ လံာ်စီဆှံအဆၢလၢ တနံၤအံၤအဂီၢ်. သနာ်က့ ပှၤသးစၢ်အါဂၤ ကမၤထွဲဝဲ တၢ်မၤလိာ်အံၤအဂီၢ် တဘျီတခီၣ် တညီလၢအဝဲသ့ၣ်အဂီၢ်ဘၣ်. အဃိ ဒ်သိးနကမၤထွဲ တၢ်မၤလိာ်အံၤအဂီၢ် တၢ်မနုၤကမၤစၢၤနၤလဲၣ်. နမၤလိန့ၢ်တၢ်လၢ ယ့ၣ်ၡူး အဒိအတဲာ်လၢ အအိၣ်ဒီး တၢ်ဒိကနၣ်သ့. (၁ ပ့း ၂:၂၁-၂၄) ယ့ၣ်ၡူးန့ၣ် အကဲပှၤလၢပှၤပှဲၤ ဘၣ်ဆၣ် အမိအပါ တကဲပှၤလၢပှၤပှဲၤဘၣ်. တဘျီတခီၣ် ယ့ၣ်ၡူးအမိအပါ တဲကမၣ်တၢ် ဒီးထံၣ်ကမၣ်အီၤ သနာ်က့ အပာ်ကဲ အမိအပါဒံး.—၂ မိၤ ၂၀:၁၂. တၢး၂၃.၁၀ ၇ ¶၄-၅

တၢ်မၢဖိပီလူးတဲဘၣ် ပှၤဧ့ၤဘြံၤဖိ လၢအကဲထီၣ် ခရံာ်ဖိတဖၣ် ပျီပျီလၢ စီၤမိၤၡ့တၢ်သိၣ်တၢ်သီ လၢအမ့ၢ် တၢ်လုၢ်တၢ်ပာ်န့ၣ် မၤလီၤမၢ်ကွံာ် ပှၤဟီၣ်ခိၣ်ဖိ အတၢ်ဒဲးဘးခဲလၢာ် တသ့ဘၣ်. အဃိ စီၤမိၤၡ့ အတၢ်သိၣ်တၢ်သီန့ၣ် “ဘၣ်တၢ်မၤကတၢၢ်ကွံာ်အီၤ” လံ. ဝံၤဒီး စီၤပီလူး သိၣ်လိအဝဲသ့ၣ် တၢ်မ့ၢ်တၢ်တီ အဒိၣ်အယိာ်တနီၤ လၢအအိၣ်လၢ လံာ်စီဆှံပူၤ. စီၤပီလူး တဲပၠးအဝဲသ့ၣ် ဘၣ်ဃးဒီး “တၢ်မုၢ်လၢ်လၢ အဂ့ၤဒိၣ်ဝဲတခါ.” တၢ်မုၢ်လၢ်လၢ အဂ့ၤဒိၣ်ဝဲတခါအံၤ အိၣ်ထီၣ် ခီဖျိလၢ ယ့ၣ်ၡူးအတၢ်ဟ့ၣ်လုၢ်ထီၣ်သးအဃိ ဒီးတၢ်မုၢ်လၢ်အံၤ ကမၤစၢၤအဝဲသ့ၣ်ဒ်သိး အဝဲသ့ၣ်က “ဘူးထီၣ်ဒီးကစၢ်ယွၤ” အဂီၢ်. (ဧ့ၤ ၇:၁၉) စီၤပီလူးၡဲပၠး ဧ့ၤဘြံၤဒီပုၢ်ဝဲၢ်မုၣ်ခွါတဖၣ်လၢ ခရံာ်ဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ ခဲအံၤန့ၣ် ဂ့ၤဒိၣ်န့ၢ် ပှၤယူဒၤဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤ လၢအပူၤကွံာ်ဒံး. ပှၤယူဒၤဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤန့ၣ် ကဲဝဲ “တၢ်အကဒုလၢ အပာ်ဖျါထီၣ် တၢ်လၢအကဟဲခါဆူညါလီၤ. ဘၣ်ဆၣ် တၢ်လၢအမ့ၢ်တၢ်နီၢ်ကီၢ်န့ၣ် မ့ၢ်ဝဲခရံာ်.” (ကလီး ၂:၁၇) တၢ်အကဒုန့ၣ် ကဲဝဲ တၢ်အက့ၢ်အဂီၤတခါလၢ ပထံၣ်အီၤတၡဲဘၣ် အဃိ တၢ်အကဒုန့ၣ် တမ့ၢ်ဝဲ တၢ်နီၢ်ကီၢ်ဘၣ်. ဒ်န့ၣ်အသိး ပှၤယူဒၤဖိ အတၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤန့ၣ် ကဲထီၣ်ဝဲ တၢ်အကဒု မ့ၢ်လၢ တၢ်ဘူၣ်ထီၣ်ဘါထီၣ် အတၢ်ရဲၣ်တၢ်ကျဲၤလၢ အဂ့ၤန့ၢ်အီၤန့ၣ် ဟဲတုၤဝဲအဃိ. ဒ်သိး ယဟိဝၤယွၤ ကပျၢ်ပတၢ်ဒဲးဘး ဒီးကတူၢ်လိာ် ပတၢ်ဘူၣ်ထီၣ်ဘါထီၣ်အဂီၢ် ပကဘၣ်နၢ်ပၢၢ် အတၢ်ရဲၣ်တၢ်ကျဲၤ အိၣ်ဝဲဒ်လဲၣ်အဂ့ၢ်. တၢး၂၃.၁၀ ၂၅ ¶၄-၅

ဒၤနံးယ့လး အဆၢဒိၣ် ၁၁ ပာ်ဖျါထီၣ်ဝဲ စီၤပၤခံဂၤ မ့တမ့ၢ် ပဒိၣ်တၢ်ပၢခံဖု လၢအထီဒါလိာ်သး ဒ်သိးအကဒိၣ်စိလၢ ဟီၣ်ခိၣ်ဒီဘ့ၣ်အဂီၢ်. ဒီးပမ့ၢ်ထိၣ်သတြီၤ ဝံအတၢ်စံးပာ်အံၤ ဒီးတၢ်စံးပာ်အဂၤတဖၣ် လၢလံာ်စီဆှံအပူၤန့ၣ် ပသ့ၣ်ညါဘၣ်လၢ “ကလံၤစိးအစီၤပၤ” န့ၣ်ကဲဝဲ ကီၢ်ရၢၡါ ဒီးပှၤလၢအဖီၣ်လိာ်သးစုဒီးအီၤ. မ့မ့ၢ်လၢ “ကလံၤထံးအစီၤပၤ” န့ၣ်ကဲဝဲ ဘြံးတၢၤဒီးအမဲရကၤ. ယဟိဝၤပှၤအုၣ်အသး လၢအအိၣ်လၢ “ကလံၤစိးအစီၤပၤ” အတၢ်ပၢဖီလာ်န့ၣ် ထံၣ်ဘၣ်ဝဲ တၢ်မၤအၢမၤနး. ခီဖျိလၢ အဝဲသ့ၣ်တၢ်နာ်အဃိ ပှၤမၤဆါအီၤ ဒီးဖၢနုာ်အီၤလၢဃိာ်ပူၤ. ပထံၣ်ဘၣ်လၢ “ကလံၤစိးအစီၤပၤ” မၤအၢမၤနးဝဲ ပဒီပုၢ်ဝဲၢ်မုၣ်ခွါသနာ်က့ ပဒီပုၢ်ဝဲၢ်မုၣ်ခွါ တပျံၤတၢ်ဘၣ်. ပတဲဒ်န့ၣ် ခီဖျိလၢ ပဒီပုၢ်ဝဲၢ်မုၣ်ခွါတဖၣ် သ့ၣ်ညါဝဲလၢ တၢ်မၤအၢမၤနး လၢအဝဲသ့ၣ် ထံၣ်ဘၣ်ဝဲန့ၣ် မၤလၢပှဲၤထီၣ်ဝဲ ဝံဒၤနံးယ့လး အတၢ်စံးပာ်အဃိ အဝဲသ့ၣ်တၢ်နာ် ဟဲဂၢၢ်ကျၢၤဒိၣ်ထီၣ်. (ဒၤ ၁၁:၄၁) ပသ့ၣ်ညါဘၣ်ဒ်အံၤအဃိ အမၤစၢၤပှၤလၢ ပကမၤဂၢၢ်ကျၢၤဒိၣ်ထီၣ် ပတၢ်မုၢ်လၢ် ဒီးဆဲးတီဒီး ယဟိဝၤယွၤ. တၢး၂၃.၀၈ ၁၁ ¶၁၅-၁၆

ခီဖျိလၢ ယဟိဝၤယွၤ အဲၣ်ပှၤအဃိ အနၢ်ပၢၢ်စၢၤ ပတၢ်တူၢ်ဘၣ် ဒီးအသးဆူၣ်လၢ အကဒီသဒၢပှၤ. ဖဲပသးဘၣ်ဒိအခါ အသးတမုာ်ဘၣ်. အဃိ ပမ့ၢ်ဃ့ထုကဖၣ်လၢအအိၣ် ဒီးတဲအီၤလၢ “ဒီသဒၢယၤ ဒ်နမဲာ်ပှာ်ဖိအသိး” န့ၣ် အကစံးဆၢပှၤ. (စံး ၁၇:၈) တၢ်လၢမဲာ်ချံန့ၣ် အကဲဝဲ တၢ်လုၢ်ဒိၣ်ပှ့ၤဒိၣ်တခါလၢ ပနီၢ်ခိမိၢ်ပှၢ်အဂီၢ်. အဃိ ဖဲယဟိဝၤယွၤ ထိၣ်သတြီၤပှၤ ဒ်သိးဒီး အမဲာ်ပှာ်ဖိအခါ လီၤဂာ်ဒ်သိး အတဲဝဲလၢ ‘ပှၤတဂၤဂ့ၤတဂၤဂ့ၤလၢ အမၤဆါနၤ လၢအမ့ၢ် ယပှၤဂီၢ်မုၢ်န့ၣ် မ့ၢ်ဒၣ်အမၤဆါ တၢ်လၢအလုၢ်ဒိၣ်ပှ့ၤဒိၣ် လၢယဂီၢ်.’ ယဟိဝၤယွၤ ဘၣ်သးလၢ ပကနာ်သပှၢ်တၢၢ်လၢ အအဲၣ်ပဝဲတဂၤဘၣ်တဂၤ နီၢ်ကီၢ်. ဘၣ်ဆၣ် အသ့ၣ်ညါဝဲလၢ ခီဖျိလၢ တၢ်ကဲထီၣ်သးဒီးပှၤ လၢအပူၤကွံာ်အဃိ ပကဆိကမိၣ်ဘၣ်လၢ အတအဲၣ်ပှၤနီၢ်ကီၢ်ဘၣ်. မ့တမ့ၢ်ဘၣ်န့ၣ် ခဲအံၤပထံၣ်ဘၣ် တၢ်အိၣ်သးကီခဲလၢ အမၤဒ့ဒီပသးအဃိ ပကဆိကမိၣ်လၢ ယဟိဝၤယွၤ တအဲၣ်ပှၤဘၣ်. အဃိ ဒ်သိး ပကနာ်သပှၢ်တၢၢ်လၢ ယဟိဝၤယွၤ အဲၣ်ပှၤနီၢ်ကီၢ်အဂီၢ် တၢ်မနုၤကမၤစၢၤပှၤလဲၣ်. ပမ့ၢ်မၤလိအါထီၣ် ဘၣ်ဃးဒီး ယဟိဝၤယွၤ ပာ်ဖျါထီၣ် အတၢ်အဲၣ် လၢယ့ၣ်ၡူးအဖီခိၣ်, လၢပှၤလၢအဘၣ်တၢ်ဒိးဖှူအီၤ ဒီးပဝဲကိးဂၤဒဲး အဖီခိၣ်န့ၣ် ပကနာ်သပှၢ်တၢၢ်လၢ ယဟိဝၤယွၤ အဲၣ်ပှၤနီၢ်ကီၢ်. တၢး၂၄.၀၁ ၂၇ ¶၆-၇

လၢညါ ဖဲယဟိဝၤယွၤ အပှၤဂီၢ်မုၢ် ထံၣ်ဘၣ်တၢ်မၤကွၢ်အခါ စီၤဧ့စြၤ ထံၣ်ဘၣ်ဝဲလၢ ယဟိဝၤယွၤ ဆီၣ်ထွဲမၤစၢၤ အဝဲသ့ၣ်. ပူၤကွံာ်တဘျုးနံၣ် ဖဲ ချ.ခ.န ၄၈၄ န့ၣ် စီၤပၤအဃၤၡဝ့ရိၣ် ဟ့ၣ်လီၤတၢ်ကလုၢ်လၢ ပှၤကမၤလီၤတူာ်ကွံာ် ပှၤယူဒၤဖိ လၢအအိၣ်လၢ ဖၢၡၢၣ်ကီၢ်ရ့ၣ်အပူၤခဲလၢာ်. ဒီးဖဲန့ၣ်အခါ လီၤဂာ်လၢ စီၤဧ့စြၤအိၣ်လၢ ဘၤဘူၤလိၣ်. (အ့ၤ ၃:၇, ၁၃-၁၅) စီၤဧ့စြၤ ဒီးပှၤယူဒၤဖိတဖၣ် ထံၣ်ဘၣ် တၢ်လီၤဘၣ်ယိၣ် လၢအသးသမူအဂီၢ်လံ. ဖဲတၢ်သိၣ်တၢ်သီ လဲၤတုၤလၢ “ကယဲၢ်ကီၢ်ရ့ၣ်” လၢပှၤယူဒၤဖိ အိၣ်ဝဲအလီၢ်အခါ အဝဲသ့ၣ်သးကိၢ်တၢ်ဒိၣ်မး တုၤလၢ အဝဲသ့ၣ်တအီၣ်တၢ်လၢၤဘၣ် ဒီးဃ့ထုကဖၣ်လၢ ယဟိဝၤယွၤအအိၣ် ပှဲၤဒီးမဲာ်ထံမဲာ်နိ. (အ့ၤ ၄:၃) ဘၣ်ဆၣ် လၢခံ ပှၤလၢအကူၣ်ထီၣ်တၢ်လၢ ကမၤသံ ပှၤယူဒၤဖိတဖၣ်န့ၣ် ပှၤမၤသံကွံာ်အဝဲသ့ၣ် အဃိ ဆိကမိၣ်ကွၢ် စီၤဧ့စြၤ ဒီးပှၤယူဒၤဖိတဖၣ် ကသးခုထဲလဲၣ်. (အ့ၤ ၉:၁, ၂) ပသ့ၣ်ညါဘၣ်လၢ တၢ်ကဲထီၣ်သးတဘျီအံၤ မၤစၢၤဝဲစီၤဧ့စြၤ ဒ်သိး အကအိၣ်ကတီၤအသးလၢ တၢ်မၤကွၢ် လၢအကထံၣ်ဘၣ်ဝဲ လၢခါဆူညါ. ဒီးအတၢ်လဲၤခီဖျိအံၤ မၤစၢၤအီၤဒ်သိး အကနာ်ဝဲ သပှၢ်တၢၢ်လၢ ယဟိဝၤယွၤ ဒီသဒၢ အပှၤဂီၢ်မုၢ်သ့. တၢး၂၃.၁၁ ၁၇ ¶၁၂-၁၃

တၢ်မၢဖိပီလူး အဲၣ်ဒိးတဲဝဲ ဘၣ်ဃးဒီး “တၢ်မၤ လၢအဘၣ်ထွဲဒီး တၢ်သိၣ်တၢ်သီ.” တၢ်သိၣ်တၢ်သီတခါအံၤ အကဲဝဲ စီၤမိၤၡ့အတၢ်သိၣ်တၢ်သီ လၢကစၢ်ယွၤဟ့ၣ်လီၤဝဲ ပှၤအံၣ်စရ့လးဖိ ဖဲကစၢၢ်စံၤနါအခါ. (ရိ ၃:၂၁, ၂၈) ဖဲစီၤပီလူးအစိၤန့ၣ် ဖျါလၢ ပှၤယူၤဒၤဖိလၢ အကဲထီၣ်ခရံာ်ဖိတနီၤ နာ်ဝဲလၢ အကဘၣ်မၤထွဲ စီၤမိၤၡ့အတၢ်သိၣ်တၢ်သီဒံး. အဃိ စီၤပီလူးသူဝဲ စီၤအၤဘြၤဟၣ် အဒိအတဲာ် ဒ်သိး ကပာ်ဖျါထီၣ်ဝဲလၢ ပကကဲထီၣ် ပှၤတီပှၤလိၤအဂီၢ် ပတလိၣ်မၤထွဲ “တၢ်မၤ လၢအဘၣ်ထွဲဒီး တၢ်သိၣ်တၢ်သီ” လၢၤဘၣ်, ဘၣ်ဆၣ် အတဲဝဲလၢ ပကဘၣ်အိၣ်ဒီးတၢ်နာ်. ပသ့ၣ်ညါဘၣ် တၢ်ဂ့ၢ်အံၤအဃိ ကဲထီၣ်တၢ်ဟ့ၣ်ဂံၢ်ဟ့ၣ်ဘါ လၢပဂီၢ်ဒိၣ်မး ဒီးပသ့ၣ်ညါဘၣ်လၢ ပမ့ၢ်နာ်ယဟိဝၤယွၤ ဒီးယ့ၣ်ၡူးခရံာ်န့ၣ် ပကဲထီၣ် ပှၤတီပှၤလိၤသ့. ဘၣ်ဆၣ် ပမ့ၢ်ကွၢ် တၢ်ကတိၤ လၢအမ့ၢ် “တၢ်မၤ” လၢယၤကိာ် အဆၢဒိၣ် ၂ ပာ်ဖျါထီၣ်ဝဲန့ၣ် အလီၤဆီဒီး “တၢ်မၤ လၢအဘၣ်ထွဲဒီး တၢ်သိၣ်တၢ်သီ.” စီၤယၤကိာ် အဲၣ်ဒိးတဲဝဲလၢ တၢ်မၤအံၤ ကဲဝဲ တၢ်မၤလၢ ပမၤအီၤကိးနံၤဒဲး လၢပတၢ်အိၣ်မူအပူၤ. (ယၤ ၂:၂၄) အဒိ ခရံာ်ဖိတဂၤ အနာ်ကစၢ်ယွၤ နီၢ်ကီၢ်ဧါ တနီၢ်ကီၢ်ဧါန့ၣ် အကပာ်ဖျါထီၣ်ဝဲ ခီဖျိအတၢ်မၤ. တၢး၂၃.၁၂ ၃ ¶၈; ၄-၅ ¶၁၀-၁၁

ဒီပုၢ်ဝဲၢ်မုၣ်လၢ အပာ်လီၤသးလၢ ကဆီဟံၣ်ဆီဃီန့ၣ် အကဘၣ်ဃုထၢ အသးသမူတံၤသကိး လီၤတံၢ်လီၤဆဲး. နတၢ်ဆၢတဲာ်တခါအံၤ အကဲဝဲ တၢ်ဆၢတဲာ် လၢအရ့ဒိၣ်ဒိၣ်မး. ဒီးနကဘၣ် သ့ၣ်နီၣ်ထီၣ်လၢ ပိာ်ခွါလၢ နကဆီဟံၣ်ဆီဃီဒီးအီၤ တဂၤန့ၣ် ကကဲထီၣ်ဝဲ နဟံၣ်ခိၣ်. (ရိ ၇:၂; အ့း ၅:၃၃) အဃိ သံကွၢ်လီၤနသးလၢ ‘ပိာ်ခွါတဂၤအံၤ အကဲ ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီဧါ. လၢအတၢ်အိၣ်မူ အပူၤန့ၣ် အပာ်ဆိ ယဟိဝၤယွၤ လၢနီၣ်ဂံၢ်တၢဧါ. အဆၢတဲာ်တၢ်လၢ တၢ်ကူၣ်သ့အပူၤဧါ. အမ့ၢ်မၤကမၣ်တၢ်န့ၣ် အအၢၣ်လီၤ အတၢ်ကမၣ်ဧါ. အပာ်ကဲပိာ်မုၣ်ဧါ. အမၤစၢၤယၤ ဒ်သိး ယကအိၣ်ဒီး တၢ်ရ့လိာ်သးဒီး ယဟိဝၤယွၤ လၢအဂ့ၤ, အကွၢ်ထွဲယၤ ဒီးကဲထီၣ် ယသကိး လၢအဂ့ၤတဂၤ ကသ့ဧါ. နမ့ၢ်ဘၣ်သးန့ၢ်ဘၣ် ဝၤလၢအဂ့ၤတဂၤန့ၣ် နၤစ့ၢ်ကီး နကဘၣ်ကဲ မါလၢအဂ့ၤတဂၤ. မါလၢအဂ့ၤ တဂၤန့ၣ် အကဲဝဲ “ပှၤမၤစၢၤတၢ်တဂၤ လၢအကြၢးဒီး” အဝၤ. (၁ မိၤ ၂:၁၈) ခီဖျိလၢ အအဲၣ် ယဟိဝၤယွၤအဃိ အကျဲးစၢး ပာ်ဖျါထီၣ် အဝၤအတၢ်ဂ့ၤတၢ်ဝါ လၢပှၤဂၤအမဲာ်ညါ. (ကတိၤ ၃၁:၁၁, ၁၂; ၁ တံၤ ၃:၁၁) အဃိ ဒ်သိးနကကဲထီၣ် မါလၢအဂ့ၤတဂၤအဂီၢ် ခဲအံၤ နအိၣ်ကတီၤနသး သ့ခီဖျိ နမၤဒိၣ်ထီၣ်အါထီၣ် နတၢ်အဲၣ်ယဟိဝၤယွၤ ဒီးမၤစၢၤနဟံၣ်ဖိဃီဖိ ဒီးပှၤလၢတၢ်အိၣ်ဖှိၣ်အပူၤ. တၢး၂၃.၁၂ ၂၂-၂၃ ¶၁၈-၁၉

ဒ်သိးပဆၢတဲာ်တၢ်ကဘၣ်အဂီၢ် ယဟိဝၤယွၤ အၢၣ်လီၤပှၤလၢ အကဟ့ၣ်ပှၤ တၢ်ကူၣ်သ့. ပမ့ၢ်ဘၣ်ဆၢတဲာ်တၢ်လၢ အကဆီတလဲ ပတၢ်အိၣ်မူန့ၣ် ပလိၣ်ဘၣ် ယဟိဝၤယွၤ အတၢ်ကူၣ်သ့. တကးဒံးဘၣ် ဒ်ယဟိဝၤယွၤ ဟ့ၣ်တၢ်မၢဖိပီလူး တၢ်စိကမီၤလၢ အလဲၤခီဖျိတၢ်ကန့ၢ်အသိး ယဟိဝၤယွၤ ကဟ့ၣ်ပှၤ တၢ်စိကမီၤလၢ ပလဲၤခီဖျိ ပတၢ်ကီတၢ်ခဲကန့ၢ်စ့ၢ်ကီး. (ဖံလံး ၄:၁၃) ယဟိဝၤယွၤ မၤစၢၤပှၤ ခီဖျိပဒီပုၢ်ဝဲၢ်မုၣ်ခွါတဖၣ်. အဒိ တချုးလၢ ယ့ၣ်ၡူးကသံတနၤန့ၣ် အဃ့ထုကဖၣ်တၢ်ဆူၣ်ဆူၣ် လၢအသးဒီဖျၢၣ်. အဃ့ကညး ယဟိဝၤယွၤဒ်သိး ပှၤအဂၤ တဆိမိၣ်ကမၣ်အီၤလၢ အမၤဟးဂီၤ ယဟိဝၤယွၤအမံၤ တဂ့ၤအဂီၢ်. ယဟိဝၤယွၤ တစံးဆၢ ယ့ၣ်ၡူးအတၢ်ဃ့တခါအံၤဘၣ်, သနာ်က့ ယဟိဝၤယွၤ ဆှၢလီၤဝဲ မူခိၣ်ကလူးတဂၤလၢ ကဟ့ၣ်ဂံၢ်ဟ့ၣ်ဘါအီၤ. (လူၤ ၂၂:၄၂, ၄၃) ပဝဲစ့ၢ်ကီး ယဟိဝၤယွၤ မၤစၢၤပှၤခီဖျိ ပဒီပုၢ်ဝဲၢ်မုၣ်ခွါတဖၣ်. ဒီပုၢ်ဝဲၢ်မုၣ်ခွါတဖၣ်အံၤ ကိးပှၤလၢလီတဲစိ ဒီးဟ့ၣ်ဂံၢ်ဟ့ၣ်ဘါပှၤ မ့တမ့ၢ် ဟဲဟးအိၣ်သကိးပှၤ. အဃိ ပသ့ၣ်ညါဘၣ်လၢ ပဝဲခဲလၢာ်န့ၣ် ပကဘၣ်ဟံန့ၢ် တၢ်ခွဲးတၢ်ယာ်လၢ ပကတဲ “တၢ်ကတိၤလၢ အမုာ်” လၢကကဲထီၣ် တၢ်ဟ့ၣ်ဂံၢ်ဟ့ၣ်ဘါလၢ ပဒီပုၢ်ဝဲၢ်မုၣ်ခွါအဂီၢ်.—ကတိၤ ၁၂:၂၅. တၢး၂၃.၀၅ ၁၀-၁၁ ¶၉-၁၁

ဒီပုၢ်ဝဲၢ်မုၣ်ခွါလၢ အပတုာ်မၤ ယဟိဝၤယွၤအတၢ်မၤန့ၣ် ဘၣ်သ့ၣ်သ့ၣ် အဝဲသ့ၣ် ကဘၣ်ယိၣ်ဝဲလၢ ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်ပူၤန့ၣ် ကတဲအီၣ်အဂ့ၢ် ဒီးကဘၣ်ယိၣ်ဝဲလၢ ပှၤတရ့ဒီးအဝဲသ့ၣ် ဂ့ၤဂ့ၤဘၣ်. အဃိ တဘၣ်သံကွၢ် တၢ်သံကွၢ်လၢ ကမၤမဲာ်ဆှးအဝဲသ့ၣ် မ့တမ့ၢ် တဲတၢ်တမံၤမံၤလၢ ကမၤဘၣ်ဒိ အဝဲသ့ၣ် အသးတဂ့ၤ. ဒီပုၢ်ဝဲၢ်မုၣ်ခွါတဖၣ်အံၤ အဝဲသ့ၣ်ကဲဝဲ ယဟိဝၤယွၤအခ့အပှၤ ဒ်သိးဒီးပှၤလီၤ. ဒီးပဘူၣ်ထီၣ်ဘါထီၣ်ဘၣ် ယဟိဝၤယွၤ တပူၤဃီဒီးအဝဲသ့ၣ် လၢအသီတဘျီအဃိ ပသးခုဒိၣ်မး. (စံး ၁၁၉:၁၇၆; မၤတၢ် ၂၀:၃၅) ယ့ၣ်ၡူးမၢပမၤ တၢ်သ့ၣ်နီၣ်ထီၣ်က့ၤ အတၢ်သံအမူး ကိးနံၣ်ဒဲးအဃိ ပသးခုဒိၣ်မး ဒီးပသ့ၣ်ညါလၢ မူးအံၤအရ့ဒိၣ်ဒိၣ်မး. အဃိ ဖဲပမၤ တၢ်သ့ၣ်နီၣ်ထီၣ်က့ၤအမူးအခါ အကဲဘျုးလၢပဂီၢ် ဒီးလၢပှၤဂၤအဂီၢ် လၢကျဲတဘျုးဘိညါ. (ၡါ ၄၈:၁၇, ၁၈) အဒိ ပတၢ်အဲၣ်လၢ ယဟိဝၤယွၤ ဒီးယ့ၣ်ၡူး အဖီခိၣ်န့ၣ် ဟဲဒိၣ်ထီၣ်အါထီၣ်ဝဲ. ပပာ်ဖျါထီၣ်လၢ ပစံးဘျုးအဝဲသ့ၣ်လၢ တၢ်လၢအဝဲသ့ၣ် မၤန့ၢ်ပှၤ. ပတၢ်ရ့လိာ်သးဒီး ဒီပုၢ်ဝဲၢ်မုၣ်ခွါစ့ၢ်ကီး ဂ့ၤဒိၣ်ထီၣ်ဝဲ. တကးဒံးဘၣ် ပမၤစၢၤဘၣ်ပှၤဂၤ ဒ်သိး အဝဲသ့ၣ်စ့ၢ်ကီး ကန့ၢ်ဘၣ် တၢ်ဆိၣ်ဂ့ၤလၢ ပကဒိးန့ၢ်ဘၣ် ခီဖျိလၢ တၢ်ပှ့ၤက့ၤအဃိ. ခဲအံၤ ပကဘၣ် ကျဲးစၢးအဂ့ၢ်ကတၢၢ် ဒီးအိၣ်ကတီၤသးလၢ မုၢ်နံၤလီၤဆီလၢ အရ့ဒိၣ်ကတၢၢ်တနံၤအံၤအဂီၢ်. တၢး၂၄.၀၁ ၁၄ ¶၁၈-၁၉

ယဟိဝၤယွၤ ဟံးစုနဲၣ်ကျဲပှၤဒ်လဲၣ်. ယဟိဝၤယွၤသူဝဲ အကလုၢ်ကထါ လံာ်စီဆှံ ဒ်သိး အကဟံးစုနဲၣ်ကျဲပှၤ အါကတၢၢ်. သနာ်က့ အသူစ့ၢ်ကီး ပှၤဟီၣ်ခိၣ်ဖိလၢ ကဟံးစုနဲၣ်ကျဲပှၤ. အဒိ ယဟိဝၤယွၤ သူဝဲ “ကုၢ်လၢအတီ ဒီးအကူၣ်တၢ်သ့” ဒ်သိး ကကတဲာ်ကတီၤန့ၢ်ပှၤ နီၢ်သးတၢ်အီၣ်လၢ ကမၤစၢၤပှၤဒ်သိး ပကဆၢတဲာ်တၢ်လၢ တၢ်ကူၣ်သ့. (မး ၂၄:၄၅) ယဟိဝၤယွၤ သူစ့ၢ်ကီး ပိာ်ခွါအဂၤလၢ အတုၤထီၣ်ထီၣ်ဘး ဒ်သိးကဟံးစုနဲၣ်ကျဲပှၤ. အဒိ ဒ်သိး ပလဲၤခီဖျိ တၢ်အိၣ်သးကီခဲ ကန့ၢ်အဂီၢ် ကဝီၤအပှၤကွၢ်တၢ် ဒီးတၢ်အိၣ်ဖှိၣ်သးပှၢ်တဖၣ် အတၢ်ဟ့ၣ်ဂံၢ်ဟ့ၣ်ဘါ ဒီးအတၢ်ဟံးစုနဲၣ်ကျဲန့ၣ် ကဲထီၣ် တၢ်မၤစၢၤလၢ ပဂီၢ်ဒိၣ်မး. တချုးလၢ တၢ်အကတၢၢ်ဟဲတုၤဒံးဘၣ် ဒီးဖဲတၢ်အိၣ်သးကီခဲ အဆၢကတီၢ်အံၤန့ၣ် ယဟိဝၤယွၤ ဟ့ၣ်ပှၤတၢ်ဟံးစုနဲၣ်ကျဲ လၢပနာ်န့ၢ်အီၤသ့အဃိ ပစံးဘျုးအီၤဒိၣ်မး. တၢ်ဟံးစုနဲၣ်ကျဲအံၤ အမၤစၢၤပှၤဒ်သိး ပကဆဲးကဲဘၣ် ယဟိဝၤယွၤအသကိး ဒီးအိၣ်ဘၣ်မုာ်မုာ်လၢ ခဲအံၤဒီးခါဆူညါ. သနာ်က့ ယဟိဝၤယွၤ အတၢ်ဟံးစုနဲၣ်ကျဲ လၢပဒိးန့ၢ်ဘၣ်ခီဖျိ ပှၤဟီၣ်ခိၣ်ဖိလၢ အတလၢတပှဲၤဘၣ် အအိၣ်န့ၣ် တဘျီတခီၣ် ပကဒိကနၣ် ဒီးမၤထွဲအီၤအဂီၢ် တညီဘၣ်. ဖဲပထံၣ်ဘၣ် တၢ်အိၣ်သးဒ်န့ၣ်အခါ အရ့ဒိၣ်ဒိၣ်မးလၢ ပကနာ်သပှၢ်တၢၢ်လၢ ယဟိဝၤယွၤန့ၣ် အကဲဝဲပှၤတဂၤလၢ အဟံးစုနဲၣ်ကျဲ အပှၤဂီၢ်မုၢ် ဒီးအတၢ်ဟံးစုနဲၣ်ကျဲန့ၣ် အကဲဘျုး လၢပဂီၢ်ထီဘိ. တၢး၂၄.၀၂ ၂၀ ¶၂-၃

ပဝဲစ့ၢ်ကီး ပမ့ၢ်မၤလိလံာ်စီဆှံဆူၣ်ဆူၣ်န့ၣ် ပတၢ်အဲၣ်ယဟိဝၤယွၤ ကဒိၣ်ထီၣ်. ဖဲပဖးလံာ်စီဆှံအခါ ပကဘၣ်ကျဲးစၢး ဃုသ့ၣ်ညါလၢ လံာ်စီဆှံတတီၤအံၤ ပာ်ဖျါထီၣ် ယဟိဝၤယွၤအဂ့ၢ်ဒ်လဲၣ်. ဒီးပကဘၣ် သံကွၢ်လီၤပသးလၢ ‘လံာ်စီဆှံတတီၤအံၤ ပာ်ဖျါထီၣ်လၢ ယဟိဝၤယွၤ အဲၣ်ယၤဒ်လဲၣ်. ဒီးတၢ်ဂ့ၢ်အံၤ မၤစၢၤယၤလၢ ယကအဲၣ်ယဟိဝၤယွၤ ဒ်လဲၣ်.’ ပမၤဒိၣ်ထီၣ်အါထီၣ် ပတၢ်အဲၣ်ယဟိဝၤယွၤ သ့ခီဖျိ ပဃ့ထုကဖၣ်လၢ ယဟိဝၤယွၤအအိၣ် ကိးနံၤဒဲး ဒီးတဲဘၣ်အီၤလၢ ပတၢ်တူၢ်ဘၣ်. (စံး ၂၅:၄, ၅) ဒီးယဟိဝၤယွၤ ကစံးဆၢက့ၤ ပတၢ်ထုကဖၣ်. (၁ ယိၤ ၃:၂၁, ၂၂) တကးဒံးဘၣ် ပကဘၣ် မၤဒိၣ်ထီၣ်အါထီၣ် ပတၢ်အဲၣ်လၢ ပှၤဂၤအဖီခိၣ်စ့ၢ်ကီး. အဒိ စီၤပီလူးကဲထီၣ် ခရံာ်ဖိဝံၤအလီၢ်ခံ စှၤကိာ်နံၣ်ဘျီ အထံၣ်လိာ်သးဒီး စီၤတံၤမသ့း လၢအကဲ ပှၤသးစၢ်တဂၤ. စီၤတံၤမသ့းန့ၣ် အအဲၣ်ယဟိဝၤယွၤ ဒီးပှၤဂၤစ့ၢ်ကီး. စီၤပီလူးတဲဘၣ် ပှၤဖံလံးပံၤဖိလၢ “ပှၤအဂၤ လၢအတၢ်ပာ်သူၣ်ပာ်သး ဒ်သိးဒီး [စီၤတံၤမသ့း] လၢအကကွၢ်ထွဲ သုတၢ်လိၣ်ဘၣ်တဖၣ်လၢ တၢ်သူၣ်အိၣ်သးအိၣ်နီၢ်ကီၢ် အပူၤန့ၣ် တအိၣ်ဒီးယၤ နီတဂၤဘၣ်.” (ဖံလံး ၂:၂၀) စီၤပီလူးထံၣ်ဝဲလၢ စီၤတံၤမသ့း အဲၣ်ဒီပုၢ်ဝဲၢ်မုၣ်ခွါဒိၣ်မး. အဃိ အဘၣ်သူၣ်ဘၣ်သး စီၤတံၤမသ့း သပှၢ်တၢၢ်. ဒီးဒီပုၢ်ဝဲၢ်မုၣ်ခွါတဖၣ် ခိးကွၢ်လၢ်ဝဲလၢ စီၤတံၤမသ့း ကဟဲဟးလၢ အဝဲသ့ၣ်အအိၣ်.—၁ ကရံၣ် ၄:၁၇. တၢး၂၃.၀၇ ၉ ¶၇-၁၀

တချုးလၢ ပှၤအံၣ်စရ့လးဖိ နုာ်လီၤလၢ ကီၢ်တၢ်စံးပာ်ဒံးဘၣ်န့ၣ် စီၤမိၤၡ့ သံဝဲလံ. စီၤမိၤၡ့ သံဝံၤအလီၢ်ခံ ယဟိဝၤယွၤ တမၤစၢၤ အပှၤဂီၢ်မုၢ်လၢၤဘၣ်ဧါ. တမ့ၢ်ဒ်န့ၣ်ဘၣ်. ပှၤအံၣ်စရ့လးဖိတဖၣ်အံၤ မ့ၢ်ဆဲးတီဒီး ယဟိဝၤယွၤထီဘိန့ၣ် ယဟိဝၤယွၤ ကဆဲးမၤစၢၤအဝဲသ့ၣ်. ပထံၣ်ဘၣ်စ့ၢ်ကီးလၢ တချုးဖဲ စီၤမိၤၡ့ သံဒံးဘၣ်န့ၣ် ယဟိဝၤယွၤ မၢအဟ့ၣ်လီၤ စီၤယိၤၡူမူဒါလၢ အကတီခိၣ်ရိၤမဲ ပှၤအံၣ်စရ့လးဖိ. ဒီးစီၤမိၤၡ့ သိၣ်လိပာ်စၢၤ စီၤယိၤၡူ တဘျုးနံၣ်ညါ. (၂ မိၤ ၃၃:၁၁; ၅ မိၤ ၃၄:၉) ထဲန့ၣ်တကးဒံးဘၣ် ပှၤပိာ်ခွါလၢ အတီခိၣ်ရိၤမဲတၢ်သ့ လၢအမ့ၢ် ပှၤတကထိအခိၣ်, ပှၤတကယၤအခိၣ်, ပှၤယဲၢ်ဆံအခိၣ် ဒီးပှၤအဂၤတဆံအခိၣ် အိၣ်စ့ၢ်ကီး. (၅ မိၤ ၁:၁၅) အဃိ ပထံၣ်ဘၣ်လၢ ကစၢ်ယွၤ ကွၢ်ထွဲအပှၤဂီၢ်မုၢ်ဂ့ၤဂ့ၤ. ပထံၣ်ဘၣ် တၢ်အဒိအဂၤတခါလၢ စီၤအ့ၤလံယၤအစိၤ. ဒ်သိး ပှၤဂီၢ်မုၢ်တဖၣ် ကဘူၣ်ထီၣ်ဘါထီၣ် ယဟိဝၤယွၤအဂီၢ် စီၤအ့ၤလံယၤ မၤစၢၤအဝဲသ့ၣ် တဘျုးနံၣ်ညါ. ဘၣ်ဆၣ် လၢခံန့ၣ် ယဟိဝၤယွၤ ဟ့ၣ်လီၤအီၤမူဒါလၢ အကလဲၤလၢယူဒၤ လၢကလံၤထံးတခီ. (၂ စီၤပၤ ၂:၁; ၂ ကွဲး ၂၁:၁၂) မ့ၢ်ကစၢ်ယွၤ ပာ်တ့ၢ်ကွံာ် အပှၤဂီၢ်မုၢ်လၢ အအိၣ်လၢ အံၣ်စရ့လး အဒူၣ်တဆံ အဘီမုၢ်လံဧါ. တပာ်တ့ၢ်ဝဲဘၣ်. စီၤအ့ၤလံယၤ သိၣ်လိပာ်စၢၤ စီၤအလံၤၡါ တဘျုးနံၣ်ညါ. ပထံၣ်ဘၣ်လၢ ယဟိဝၤယွၤ ဆဲးမၤလၢပှဲၤထီၣ် အတၢ်တိာ်ပာ် ဒီးအဆဲးကွၢ်ထွဲအပှၤဂီၢ်မုၢ်လၢ အသးတီတဖၣ်ထီဘိ. တၢး၂၄.၀၂ ၅ ¶၁၂

ခရံာ်ဖိလၢ အအိၣ်လၢ ဝ့ၢ်အ့းဖ့းစူးအပူၤန့ၣ် အဝဲသ့ၣ်အိၣ်မူက့ၤဒ် ယဟိဝၤယွၤ အတၢ်သိၣ်တၢ်သီ အိၣ်ဝဲအသိး ဒီးလီၤဂာ်ဒ်သိးဒီး တၢ်သိၣ်တၢ်သီအံၤ မၤကပီၤထီၣ် အဝဲသ့ၣ်အကျဲ. (စံး ၁၁၉:၁၀၅) ပှၤအ့းဖ့းစူးဖိတဖၣ်အံၤ အဝဲသ့ၣ် ဟးထီၣ်ကွံာ်လၢ တၢ်ဘူၣ်တၢ်ဘါကမၣ်အပူၤ ဒီးတအိၣ်ဒီး လုၢ်လၢ်သကဲာ်ပဝး လၢအတဂ့ၤတဖၣ်လၢၤဘၣ်. အဝဲသ့ၣ်ကဲထီၣ် “ပှၤကွၢ်လိ ကစၢ်ယွၤ” ဒီးအဝဲသ့ၣ် ဘူၣ်ထီၣ်ဘါထီၣ်က့ၤ ယဟိဝၤယွၤ ဒီးဂုာ်ကျဲးစၢး မၤသးခုအသး. (အ့း ၅:၁) ဒ်ပှၤအ့းဖ့းစူးဖိအသိး ပဝဲစ့ၢ်ကီး တချုးလၢ ပမၤလိ တၢ်မ့ၢ်တၢ်တီ ဒံးဘၣ်အခါ ပအိၣ်လၢ တၢ်ဘူၣ်တၢ်ဘါကမၣ်အပူၤ ဒီးပအိၣ်ဒီး လုၢ်လၢ်သကဲာ်ပဝး လၢအတဂ့ၤဘၣ်. အဒိ ပဝဲတနီၤန့ၣ် ပမၤဘၣ် တၢ်ဘူၣ်တၢ်ဘါအမူးပွဲ, ပဝဲအဂၤတနီၤန့ၣ် ပအိၣ်မူ တၢ်အိၣ်မူလၢ အတဂ့ၤဘၣ်. ဘၣ်ဆၣ် ဖဲပမၤလိဘၣ် ယဟိဝၤယွၤ အတၢ်သိၣ်တၢ်သီ ဘၣ်ဃးဒီး တၢ်လၢအဘၣ် ဒီးတၢ်လၢအကမၣ် ဝံၤအလီၢ်ခံ ပဆီတလဲက့ၤသး. ပအိၣ်မူက့ၤဒ် ယဟိဝၤယွၤ အတၢ်ဘၣ်သးအသိး အဃိ ပဒိးန့ၢ်ဘၣ် အဘျုးဒီဒူၣ်ညါ. (ၡါ ၄၈:၁၇) ခဲအံၤန့ၣ် ပထံၣ်ဘၣ် တၢ်ကီတၢ်ခဲဒံး. ပဟးထီၣ်ကွံာ်လၢ တၢ်ခံးအကျါလံ သနာ်က့ ပကဘၣ် ဆဲးအိၣ်ယံၤဒီးတၢ်ခံး ဒီး “ဆဲးအိၣ်မူဒ် တၢ်ကပီၤအဖိတဖၣ်.” တၢး၂၄.၀၃ ၂၁-၂၂ ¶၆-၇

ဘၣ်သ့ၣ်သ့ၣ် နကဆိကမိၣ်လၢ နဟ့ၣ်လုၢ်ထီၣ်သး ဒီးဒိးဘျၢထံ တန့ၢ်ဒံးဘၣ်. ဒီးဒ်သိး နကအိၣ်မူမၤထွဲ ယဟိဝၤယွၤ အတၢ်သိၣ်တၢ်သီအဂီၢ် ဘၣ်သ့ၣ်သ့ၣ် နဆိကမိၣ်လၢ နကဘၣ်ဆီတလဲသးအိၣ်ဒံး. ဒီးဘၣ်သ့ၣ်သ့ၣ် နလိၣ်ဘၣ်အါထီၣ် တၢ်ဆၢကတီၢ်လၢ နကမၤဂၢၢ်ကျၢၤဒိၣ်ထီၣ် နတၢ်နာ်. (ကလီး ၂:၆, ၇) ပမ့ၢ်ဘၣ်ကွၢ်န့ၣ် ပှၤမၤလိလံာ်စီဆှံဖိတဖၣ် အတၢ်လဲၤထီၣ်လဲၤထီ တဒ်သိးလိာ်သးဘၣ်. ဒီးဖဲပှၤသးစၢ်တဖၣ် ဟ့ၣ်လုၢ်ထီၣ်သး ဒီးဒိးဘျၢထံအခါ အသးနံၣ်တဒ်သိးလိာ်သး ကိးဂၤဒဲးဘၣ်. အဃိ ဂုာ်ကျဲးစၢး သမံသမိးလီၤက့ၤ နတၢ်လဲၤထီၣ်လဲၤထီ လၢနီၢ်သးတခီ, တၢ်လၢနဘၣ်ဆီတလဲ မ့ၢ်အိၣ်ဒံးန့ၣ် ဂုာ်ကျဲးစၢး ဆီတလဲအီၤ ဒီးတဘၣ် ထိၣ်သတြီၤနသးဒီး ပှၤဂၤတဂ့ၤ. (ကလၤ ၆:၄, ၅) နမ့ၢ်ဆိကမိၣ်လၢ နဟ့ၣ်လုၢ်ထီၣ်သးလၢ ယဟိဝၤယွၤအအိၣ် တန့ၢ်ဒံးဘၣ် သနာ်က့ ဆဲးပာ်လီၤဃာ်ဖီတၢၣ်တခါအံၤ. ဒီးနမ့ၢ်ဘၣ်မၤ တၢ်ဆီတလဲ တမံၤဂ့ၤတမံၤဂ့ၤန့ၣ် ဃ့ယဟိဝၤယွၤလၢ အကမၤစၢၤနၤ. (ဖံလံး ၂:၁၃) တကးဒံးဘၣ် နကဘၣ်နာ်သပှၢ်တၢၢ်လၢ ယဟိဝၤယွၤ နၢ်ဟူနတၢ်ဃ့ ဒီးအကမၤစၢၤနၤ.—၁ ယိၤ ၅:၁၄. တၢး၂၄.၀၃ ၅ ¶၉-၁၀

ဘၣ်တဘျီ နီၢ်စၤရါ အသးတမုာ်ဘၣ်အဃိ အတဲဘၣ် အတၢ်တူၢ်ဘၣ်လၢ စီၤအၤဘြၤဟၣ် ဒီးအပာ်တၢ်ကမၣ်လၢ စီၤအၤဘြၤဟၣ်အလိၤ. ဘၣ်ဆၣ် စီၤအၤဘြၤဟၣ် သ့ၣ်ညါဝဲလၢ အမါနီၢ်စၤရါန့ၣ် အကဲမါလၢအဂ့ၤ ဒီးဆီၣ်ထွဲမၤစၢၤအီၤ ထီဘိ. အဃိ နီၢ်စၤရါ အတၢ်ထံၣ် အိၣ်ဒ်လဲၣ်န့ၣ် စီၤအၤဘြၤဟၣ် ကနၣ်န့ၢ်အီၤ. (၁ မိၤၡ့ ၁၆:၅, ၆) ပန့ၢ်ဘၣ် တၢ်မၤလိဒ်လဲၣ်. ဝၤတဖၣ်န့ၣ် အိၣ်ဒီးတၢ်စိတၢ်ကမီၤလၢ ကဘၣ်ဆၢတဲာ်န့ၢ်တၢ်လၢ အဟံၣ်ဖိဃီဖိအဂီၢ်. (၁ ကရံၣ် ၁၁:၃) ဘၣ်ဆၣ် တချုးလၢ အဆၢတဲာ်တၢ်ဒံးဘၣ်အခါ အတၢ်ဆၢတဲာ် မ့ၢ်ဘၣ်ဃးဒီးအမါန့ၣ် အကဘၣ် ဒိကနၣ်တၢ်လၢ အမါတဲဝဲ မူာ်မူာ်နီၢ်နီၢ် ဒီးဆိမိၣ်ဆိန့ၢ်တၢ်လၢ အမါအဂီၢ်. ဝၤတဖၣ် မ့ၢ်မၤဒ်န့ၣ်န့ၣ် အပာ်ဖျါထီၣ်လၢ အအဲၣ်အမါ. (၁ ကရံၣ် ၁၃:၄, ၅) ဘၣ်တဘျီ စီၤအၤဘြၤဟၣ် ဘၣ်သးတူၢ်လိာ် ပှၤတမှံၤလၢ အဟဲတုၤလၢအဟံၣ်. အဃိ စီၤအၤဘြၤကရီလဲၤလၢ နီၢ်စၤရါအအိၣ်ဒီး မၢအတ့ ကိၣ်ဖးဒိၣ်တလိၣ်. (၁ မိၤ ၁၈:၆) နီၢ်စၤရါ ဆီၣ်ထွဲအဝၤ တၢ်ဆၢတဲာ် ဒီးဒ်အဝၤမၢအီၤအသိး အမၤဝဲချ့ချ့. မါတဖၣ် ကွၢ်လိ နီၢ်စၤရါ သ့ခီဖျိ သုဆီၣ်ထွဲ သုဝၤအတၢ်ဆၢတဲာ်. ဖဲသုမၤဒ်န့ၣ်အခါ မ့ၢ်ဝဲသုမၤဂၢၢ်ကျၢၤဒိၣ်ထီၣ် သုတၢ်ဆီဟံၣ်ဆီဃီ.—၁ ပ့း ၃:၅, ၆. တၢး၂၃.၀၅ ၂၄-၂၅ ¶၁၆-၁၇

ဖဲစီၤကံးဒဧိၣ် ကဲထီၣ်စံၣ်ညီၣ်ကွီၢ် ဝံၤအလီၢ်ခံ အကဘၣ်အိၣ်ဒီး တၢ်ဒိကနၣ် ဒီးတၢ်သးဒူ အါထီၣ်. စီၤကံးဒဧိၣ် န့ၢ်ဘၣ်မူဒါလၢ အကဘၣ်မၤဟးဂီၤကွံာ် အပါအတၢ်လုၢ်လီၢ်လၢ အပါတ့ထီၣ်ဝဲလၢ ဘဧၤလးအဂီၢ် ဒီးမူဒါအံၤ တညီဘၣ်. (စံၣ်ညီၣ် ၆:၂၅, ၂၆) လၢခံ ဖဲစီၤကံးဒဧိၣ် ပာ်ဖှိၣ်ထီၣ် သုးဖိလၢကလဲၤဒုးတၢ် ဝံၤအလီၢ်ခံ ယဟိဝၤယွၤ မၢအမၤလီၤစှၤဝဲ သုးဖိနီၣ်ဂံၢ် ခံဘျီညါ. (စံၣ်ညီၣ် ၇:၂-၇) ဒီးလၢခံကတၢၢ်န့ၣ် ယဟိဝၤယွၤ မၢအလဲၤဒုးဝဲ အဒုၣ်ဒါအဒဲကဝီၤ လၢမုၢ်နၤခီ. (စံၣ်ညီၣ် ၇:၉-၁၁) တၢ်အိၣ်ဖှိၣ်သးပှၢ်တဖၣ် ကဘၣ် “အိၣ်ကတဲာ်ကတီၤအသးလၢ ကဒိကနၣ်တၢ်အဂီၢ်.” တၢ်အိၣ်ဖှိၣ်သးပှၢ်လၢ အအိၣ်ဒီးတၢ်ဒိကနၣ်န့ၣ် အကမၤထွဲတၢ်လၢ လံာ်စီဆှံတဲဝဲ ဒီးကမၤထွဲဝဲ တၢ်ကရၢကရိ အတၢ်ဟံးစုနဲၣ်ကျဲ ထီဘိ. တဘျီတခီၣ် မ့ၢ်ကီလၢအက ဒိကနၣ်တၢ်နာ်က့ အကပာ်လီၤ တၢ်ဒိတၢ်တဲာ်အဂ့ၤလၢ ပှၤဂၤအဂီၢ်. အဒိ အကန့ၢ်ဘၣ် တၢ်သိၣ်လိနဲၣ်လိ ဒီဒူၣ် မ့တမ့ၢ် တၢ်ဟံးစုနဲၣ်ကျဲတနီၤ ဆီတလဲသးချ့မးအဃိ အကမၤထွဲဝဲအဂီၢ် ကီဒိၣ်မး. ဒီးတဘျီတခီၣ် အကဆိမိၣ်ဘၣ်လၢ တၢ်ဟံးစုနဲၣ်ကျဲတနီၤန့ၣ် အတလိၤအါအါဘၣ်. မ့တမ့ၢ် အကန့ၢ်ဘၣ်မူဒါတခါခါ ဒီးခီဖျိလၢ မူဒါအံၤအဃိ ပှၤကဖီၣ်အီၤ. ဖဲတၢ်အိၣ်ဖှိၣ်သးပှၢ်တဖၣ် ထံၣ်ဘၣ်တၢ်အိၣ်သး ဒ်န့ၣ်အခါ အဝဲသ့ၣ်ကွၢ်လိ စီၤကံးဒဧိၣ် အတၢ်ဒိကနၣ် ကသ့ဒ်လဲၣ်. အဝဲသ့ၣ်ကဘၣ်ဒိကနၣ် ဒီးမၤထွဲတၢ်ဟံးစုနဲၣ်ကျဲ လီၤတံၢ်လီၤဆဲး. တၢး၂၃.၀၆ ၄-၅ ¶၉-၁၁