လါမ့ၤ

ခရံာ်ဖိလၢ တၢ်မၢဖိအစိၤန့ၣ် ထံၣ်ဘၣ်ဒီး တၢ်သၣ်ဝံၤလီၤဒိ “အိၣ်ထီၣ်လၢ ဟီၣ်ခိၣ်ဒီဘ့ၣ်.” ဖဲန့ၣ်အခါ ဟံၣ်ခိၣ်တဖၣ် ကဘၣ်လုၢ်အီၣ်လုၢ်အီ အဟံၣ်ဖိဃီဖိဒ်လဲၣ်န့ၣ် အဝဲသ့ၣ်ကဘၣ်ယိၣ်တၢ် သပှၢ်တၢၢ်. မ့မ့ၢ် ပှၤသးစၢ်လၢ အပာ်လီၤသးလၢ ကမၤအါထီၣ် တၢ်စံၣ်တဲၤတဲလီၤတၢ်မၤဟီမီၤ. ဘၣ်သ့ၣ်သ့ၣ် အဝဲသ့ၣ်ကဆိမိၣ်ဝဲလၢ တၢ်သၣ်ဝံၤလီၤဒိ မ့ၢ်ဝံၤမၣ် အဝဲသ့ၣ် ကစံၣ်တဲၤတဲလီၤတၢ်ဟီဧါ. ခရံာ်ဖိတဖၣ် အတၢ်အိၣ်သး မ့ၢ်အိၣ်ဒ်လဲၣ်ဒ်လဲၣ်နာ်က့ အဝဲသ့ၣ်မၤတၢ်ဆီတလဲ ဒ်အတၢ်အိၣ်သး အိၣ်ဝဲအသိး. အဝဲသ့ၣ် ဆဲးစံၣ်တဲၤတဲလီၤတၢ် လၢအဂ့ၤကတၢၢ် ဒီးတၢ်လၢအအိၣ်ဒီးအဝဲသ့ၣ်န့ၣ် အဝဲသ့ၣ်ဟ့ၣ်မၤစၢၤဝဲ ဒီပုၢ်ဝဲၢ်မုၣ်ခွါလၢ အအိၣ်လၢ ကီၢ်ယူဒၤစ့ၢ်ကီး. (မၤတၢ် ၁၁:၂၉, ၃၀) ပှၤလၢအန့ၢ်ဘၣ် တၢ်မၤစၢၤတဖၣ်န့ၣ် ထံၣ်ဘၣ်ဝဲလၢ ယဟိဝၤယွၤ မၤစၢၤအဝဲသ့ၣ်. (မး ၆:၃၁-၃၃) ဒီးအတၢ်ရ့လိာ်သးဒီး ပှၤလၢအဟဲမၤစၢၤအဝဲသ့ၣ်န့ၣ် ဂ့ၤဒိၣ်ထီၣ်. တကးဒံးဘၣ် ပှၤလၢအဟ့ၣ်လီၤ တၢ်မၤဘူၣ် ဒီးပှၤလၢအလဲၤမၤစၢၤတၢ်တဖၣ်န့ၣ် ခီဖျိလၢအဝဲသ့ၣ် မၤစၢၤဘၣ်တၢ်အဃိ အဝဲသ့ၣ်သးခု.—မၤတၢ် ၂၀:၃၅. တၢး၂၃.၀၄ ၁၆ ¶၁၂-၁၃

တဘျီတခီၣ် ယဟိဝၤယွၤ စံးဆၢအခ့အပှၤ အတၢ်ဃ့ထုကဖၣ် ခီဖျိအသူဝဲ ပှၤလၢအတဘူၣ်ထီၣ်ဘါထီၣ်အီၤတဖၣ် လၢကမၤစၢၤဝဲ အခ့အပှၤ. အဒိ ယဟိဝၤယွၤသူဝဲ စီၤပၤအၢ်တၤၡါၡတၤလၢ ကပျဲဝဲ စီၤနဃ့မယၤ ကက့ၤဘှီဂ့ၤထီၣ်က့ၤ ဝ့ၢ်ယရူၤၡလ့ၣ်. (ဃ့ ၂:၃-၆) ဆၢကတီၢ်ခဲအံၤစ့ၢ်ကီး ဖဲပလိၣ်ဘၣ် တၢ်မၤစၢၤအခါ တဘျီတခီၣ် ယဟိဝၤယွၤ သူဝဲပှၤလၢ အတဘူၣ်ထီၣ်ဘါထီၣ်အီၤတဖၣ် လၢကမၤစၢၤပှၤ. ညီနုၢ်န့ၣ် ယဟိဝၤယွၤ တစံးဆၢ ပတၢ်ဃ့ထုကဖၣ် ဒ်သိးပဆိမိၣ်ဘၣ်. ဘၣ်ဆၣ် အတၢ်စံးဆၢန့ၣ် မၤစၢၤပှၤဒ်သိး ပကဆဲးတီဒီးအီၤ. အဃိ ယဟိဝၤယွၤ စံးဆၢပတၢ်ထုကဖၣ်ဒ်လဲၣ်န့ၣ် ပကဘၣ်ဆိမိၣ်ထံက့ၤအီၤ. တဘျီတခီၣ် ပလိၣ်ဘၣ် တၢ်ဆၢကတီၢ်လၢ ပကဆိမိၣ်ထံက့ၤ ယဟိဝၤယွၤ စံးဆၢပတၢ်ဃ့ထုကဖၣ်. (စံး ၆၆:၁၉, ၂၀) ပမ့ၢ်ဃ့ထုကဖၣ်လၢ ယဟိဝၤယွၤအအိၣ်န့ၣ် မ့ၢ်ဝဲပပာ်ဖျါထီၣ် ပတၢ်နာ်. တကးဒံးဘၣ် ပမ့ၢ်တူၢ်လိာ်လၢ ယဟိဝၤယွၤ ကစံးဆၢပတၢ်ထုကဖၣ် ဒ်လဲၣ်ဒ်လဲၣ်န့ၣ် မ့ၢ်ဝဲပပာ်ဖျါထီၣ် ပတၢ်နာ်စ့ၢ်ကီး.—ဧ့ၤ ၁၁:၆. တၢး၂၃.၀၅ ၁၁ ¶၁၃; ၁၂ ¶၁၅-၁၆

ဖဲပဟ့ၣ်လုၢ်ထီၣ်သး လၢယဟိဝၤယွၤ အအိၣ်အခါ ပအၢၣ်လီၤအီၤလၢ ပကဘူၣ်ထီၣ်ဘါထီၣ်အီၤ ဒီးမၤအတၢ်ဘၣ်သး. အဃိ ပကဘၣ် မၤလၢပှဲၤ ပတၢ်အၢၣ်လီၤတခါအံၤ. ပကမၤထွဲ ဒ်ပအၢၣ်လီၤအသိးန့ၣ် အတကဲ တၢ်ဝံဃၢလၢ ပဂီၢ်ဘၣ်. နီၢ်ကီၢ်န့ၣ် ယဟိဝၤယွၤ တ့လီၤပှၤဒ်သိး ပကမၤ အတၢ်ဘၣ်သး. (လီၣ် ၄:၁၁) တကးဒံးဘၣ် ယဟိဝၤယွၤ တ့လီၤပှၤ ဒ်အက့ၢ်အဂီၤအသိး ဒီးအတ့လီၤပှၤ ဃုာ်ဒီး သးလၢအအဲၣ်ဒိး သ့ၣ်ညါအီၤ ဒီးဘူၣ်ထီၣ်ဘါထီၣ်အီၤ. အဃိ ပရ့လိာ်သးဒီးအီၤသ့ ဒီးပသးခုဒိၣ်မးလၢ ပမၤဘၣ် အတၢ်ဘၣ်သး. ထဲန့ၣ်တကးဒံးဘၣ် ဖဲပမၤ ကစၢ်ယွၤ အတၢ်ဘၣ်သး ဒီးမၤဒ်အဖိခွါ မၤဝဲအခါ ပက “ဒိးန့ၢ်ဘၣ် တၢ်ဂံၢ်တၢ်ဘါ.” (မး ၁၁:၂၈-၃၀) အဃိ ပကဘၣ် ဆဲးမၤဒိၣ်ထီၣ်အါထီၣ် ပတၢ်အဲၣ် ယဟိဝၤယွၤ ခီဖျိ ပဆိမိၣ်ထံ တၢ်ခဲလၢာ်လၢ အမၤန့ၢ်ပှၤ ဒီးတၢ်ဆိၣ်ဂ့ၤလၢ အကဟ့ၣ်ပှၤ လၢခါဆူညါ. ပအဲၣ်ကစၢ်ယွၤ မ့ၢ်ဒိၣ်ထီၣ်န့ၣ် ကညီလၢ ပကဒိကနၣ် အကလုၢ်. (၁ ယိၤ ၅:၃) ယ့ၣ်ၡူးန့ၣ် ခီဖျိလၢ အဃ့ထုကဖၣ် ဒီးသးစၢၢ်ဆၢဝဲ တၢ်ဆိၣ်ဂ့ၤလၢ အကန့ၢ်ဘၣ်ဝဲ အဃိ အမၤကစၢ်ယွၤ အတၢ်ဘၣ်သး န့ၢ်ဝဲလၢလၢပှဲၤပှဲၤ. (ဧ့ၤ ၅:၇; ၁၂:၂) ဒ်ယ့ၣ်ၡူးအသိး ပကဘၣ် ဃ့ယဟိဝၤယွၤလၢ အကဟ့ၣ်ပှၤ တၢ်ဂံၢ်တၢ်ဘါ. ဒီးပကဘၣ် ဆဲးဆိမိၣ်ထံ တၢ်မုၢ်လၢ်လၢ ပကအိၣ်မူဘၣ် လီၤထူလီၤယိာ်. တၢး၂၃.၀၈ ၂၇-၂၈ ¶၄-၅

ပှၤလၢအအိၣ်ဒီး တၢ်ဝံသးစူၤန့ၣ် ပပာ်လုၢ်ပာ်ပှ့ၤအီၤဒိၣ်မး. ပတဲဒ်န့ၣ်ခီဖျိလၢ ပှၤလၢအအိၣ်ခိးတၢ်ကဲ ဒီးတသးဒိၣ်ထီၣ်တၢ် ညီညီဘၣ်န့ၣ် ပပာ်ကဲအဝဲသ့ၣ်. အဒိ ဖဲပမၤကမၣ်တၢ်အခါ ပှၤမ့ၢ်ပာ်ဖျါထီၣ် တၢ်ဝံသးစူၤ လၢပဖီခိၣ်န့ၣ် ပစံးဘျုးဘၣ် အဝဲသ့ၣ်ဖးဒိၣ်. ဒီးဖဲပကျဲးစၢးမၤလိ ဒီးမၤထွဲလံာ်စီဆှံ အတၢ်သိၣ်လိအခါ ခီဖျိလၢ ပှၤလၢအသိၣ်လိပှၤတဂၤ ပာ်ဖျါထီၣ် တၢ်ဝံသးစူၤလၢပဖီခိၣ်အဃိ ပစံးဘျုးအီၤဒိၣ်မး. တကးဒံးဘၣ် ယဟိဝၤယွၤ ပာ်ဖျါထီၣ် တၢ်ဝံသးစူၤလၢပဖီခိၣ်အဃိ ပစံးဘျုးအီၤသပှၢ်တၢၢ်. ပပာ်လုၢ်ပာ်ပှ့ၤပှၤလၢ အပာ်ဖျါထီၣ် တၢ်ဝံသးစူၤသနာ်က့ မ့မ့ၢ်လၢ ပနီၢ်ကစၢ်န့ၣ် ပကပာ်ဖျါထီၣ် တၢ်ဝံသးစူၤအဂီၢ် တညီထီဘိဘၣ်. အဒိ ဖဲပကရီလဲၤတၢ်အခါ ကါမ့ၢ်ကတံာ်န့ၣ် ပသ့ၣ်ညါလၢ ပကစဲၤခံအဃိ ဘၣ်သ့ၣ်သ့ၣ် ပကသးကိၢ်တၢ်. ဒီးဖဲပှၤဂၤမၤအ့န့ ပသးအခါ ပကသးဒိၣ်ထီၣ်တၢ်. တကးဒံးဘၣ် တဘျီတခီၣ်န့ၣ် ပကဆိမိၣ်ဘၣ်လၢ ပအိၣ်ခိးယဟိဝၤယွၤ အတၢ်အၢၣ်လီၤ ဘၣ်ဃးဒီးဟီၣ်ခိၣ်သီ တကဲလၢၤဘၣ်. ပတၢ်အိၣ်သး မ့ၢ်အိၣ်ဒ်န့ၣ်န့ၣ် ပကဘၣ်မၤအါထီၣ် တၢ်ဝံသးစူၤ. တၢး၂၃.၀၈ ၂၀ ¶၁-၂

ယဟိဝၤယွၤ မၢစီၤကံးဒဧိၣ် မၤစှၤလီၤသုးဖိနီၣ်ဂံၢ် ဘူးကလၢာ်ညါ. ဘၣ်သ့ၣ်သ့ၣ် စီၤကံးဒဧိၣ် ကဆိမိၣ်ဝဲလၢ ‘တၢ်ဆီတလဲတခါအံၤ မ့ၢ်အလိၣ်ထဲန့ၣ်ညါဧါ ဒီးမ့ၢ်အဘၣ်ကၠ့ၤဧါ.’ သနာ်က့ စီၤကံးဒဧိၣ် ဒိကနၣ်ယဟိဝၤယွၤ အကလုၢ်. ဆၢကတီၢ်ခဲအံၤ တၢ်ဆီတလဲ မ့ၢ်အိၣ်ထီၣ်လၢ တၢ်ကရၢကရိ အတၢ်ဟံးစုနဲၣ်ကျဲန့ၣ် တၢ်အိၣ်ဖှိၣ်သးပှၢ်တဖၣ် ကွၢ်လိ စီၤကံးဒဧိၣ်သ့. (ဧ့ၤ ၁၃:၁၇) စီၤကံးဒဧိၣ် န့ၢ်ဘၣ်မူဒါလၢ အလီၤဘၣ်ယိၣ် ဒီးအပျံၤတၢ်နာ်က့ အဒိကနၣ် ယဟိဝၤယွၤအကလုၢ် ဒီးအမၤထွဲဝဲ. (စံၣ်ညီၣ် ၉:၁၇) တကးဒံးဘၣ် ဒ်သိးစီၤကံးဒဧိၣ် ကဒီသဒၢ ယဟိဝၤယွၤ အပှၤဂီၢ်မုၢ်အဂီၢ် ယဟိဝၤယွၤအၢၣ်လီၤလၢ အကအိၣ်ဒီးအီၤအဃိ စီၤကံးဒဧိၣ် နာ်ဝဲသပှၢ်တၢၢ်လၢ ယဟိဝၤယွၤ ကမၤစၢၤအီၤ. ဆၢကတီၢ်ခဲအံၤ တၢ်အိၣ်ဖှိၣ်သးပှၢ်လၢ အအိၣ်လၢ တၢ်လီၢ်လၢ ပှၤတြီဃာ်ပတၢ်ဖံးတၢ်မၤစ့ၢ်ကီး အဝဲသ့ၣ်ကွၢ်လိ စီၤကံးဒဧိၣ် အဒိအတဲာ်. အဝဲသ့ၣ် သ့ၣ်ညါဝဲလၢ အမ့ၢ်တီခိၣ်ရိၤမဲတၢ်လၢ တၢ်အိၣ်ဖှိၣ် ဒီးတၢ်စံၣ်တဲၤတဲလီၤန့ၣ် ပှၤကဖီၣ်အီၤ, ပှၤကသံကွၢ်သံဒိးအီၤ, ပှၤတပျဲအမၤတၢ်လၢၤဘၣ် ဒီးပှၤကမၤဆါအီၤ သနာ်က့ အဝဲသ့ၣ်အိၣ်ဒီးတၢ်သးဒူ ဒီးမၤဝဲဒံး. ဖဲတၢ်နးတၢ်ဖှီၣ်ဖးဒိၣ် အဆၢကတီၢ်န့ၣ် တၢ်အိၣ်ဖှိၣ်သးပှၢ်တဖၣ် ကန့ၢ်ဘၣ်တၢ်ဟံးစုနဲၣ်ကျဲ ဒီးတၢ်ဟံးစုနဲၣ်ကျဲတဖၣ်န့ၣ် မ့ၢ်လီၤဘၣ်ယိၣ်သနာ်က့ အဝဲသ့ၣ် ကဘၣ်အိၣ်ဒီးတၢ်သးဒူလၢ ကမၤထွဲဝဲ. တၢး၂၃.၀၆ ၅-၆ ¶၁၂-၁၃

ယဟိဝၤယွၤ မၢပှၤကွဲးလီၤ ပှၤလုၢ်တၢ်ခိၣ် အဒိၣ်ကတၢၢ် စီၤယဟိၤယဒါအဂ့ၢ်လၢ လံာ်စီဆှံအပူၤ ဒ်သိးပကမၤလိန့ၢ်တၢ်လၢအအိၣ်. (ရိ ၁၅:၄) စီၤယဟိၤယဒါန့ၣ် “အမၤတ့ၢ် တၢ်ဂ့ၤလၢ အံၣ်စရ့လးအပူၤ ဘၣ်ဃးဒီး ယွၤလၢအမ့ၢ်အတီ ဒီးကစၢ်ယွၤအဟံၣ်အဃိ” ဖဲအသံအခါ အန့ၢ်ဘၣ် တၢ်ခွဲးတၢ်ယာ်လီၤဆီလၢ ပှၤလဲၤခူၣ်လီၤအီၤ “တပူၤဃီဒီး စီၤပၤတဖၣ် လၢစီၤဒၤဝံးအဝ့ၢ်ပူၤ.” (၂ ကွဲး ၂၄:၁၅, ၁၆) စီၤယဟိၤယဒါ အဂ့ၢ်န့ၣ် မၤစၢၤပှၤလၢ ပကမၤအါထီၣ် တၢ်ပျံၤကစၢ်ယွၤ. တၢ်အိၣ်ဖှိၣ်သးပှၢ်တဖၣ် ကွၢ်လိ စီၤယဟိၤယဒါ သ့ခီဖျိ အဝဲသ့ၣ် ကွၢ်ထွဲဒီးဒီသဒၢ ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်ပူၤ. (မၤတၢ် ၂၀:၂၈) ဒီပုၢ်ဝဲၢ်လၢအသးပှၢ်တဖၣ်န့ၣ် ကွၢ်လိ စီၤယဟိၤယဒါ ခီဖျိ အပျံၤယဟိဝၤယွၤ ဒီးဆဲးတီဒီးအီၤ အဃိ ယဟိဝၤယွၤ သူအဝဲသ့ၣ်လၢ ကမၤလၢပှဲၤအတၢ်တိာ်ပာ်သ့. ယဟိဝၤယွၤရ့ဒီး စီၤယဟိၤယဒါ ဂ့ၤဂ့ၤအဃိ ပှၤသးစၢ်တဖၣ် မ့ၢ်ကွၢ်လိ ယဟိဝၤယွၤန့ၣ် အဝဲသ့ၣ် ကရ့ဒီး ဒီပုၢ်ဝဲၢ်လၢအသးပှၢ်ဂ့ၤဂ့ၤ ဒီးပာ်ကဲအဝဲသ့ၣ်. လီၤဆီဒၣ်တၢ် ဒီပုၢ်ဝဲၢ်သးပှၢ်လၢ အသးတီ ဒီးအမၤတ့ၢ် ယဟိဝၤအတၢ်မၤ ဖးယံာ်လံန့ၣ် ပကဘၣ်ရ့ဒီး အဝဲသ့ၣ်ဂ့ၤဂ့ၤ. (ကတိၤ ၁၆:၃၁) တကးဒံးဘၣ် ပဝဲခဲလၢာ် ပကဘၣ်ဆီၣ်ထွဲ “ပှၤလၢအတီခိၣ်ရိၤမဲတၢ်” ဒီးပကနၣ် အဝဲသ့ၣ်ကလုၢ်.—ဧ့ၤ ၁၃:၁၇. တၢး၂၃.၀၆ ၁၇-၁၈ ¶၁၄-၁၅

ဖဲထီၣ်တၢ်အိၣ်ဖှိၣ်အခါ နကစံးဆၢတၢ် ပှဲၤဘျီလဲၣ်န့ၣ် နဘၣ်ဆိမိၣ်ပာ်စၢၤစ့ၢ်ကီး. ပှၤဂၤ မ့ၢ်တစံးဆၢဘၣ်တၢ်ဒံးဘၣ်, ဘၣ်ဆၣ် နမ့ၢ်ယူာ်ထီၣ်စုမၢ်မၢ်န့ၣ် ပှၤဖီၣ်မူဒါတဂၤ ကတူၢ်ဘၣ်လၢ အဘၣ်ကိးထဲနၤ. အဃိဘၣ်သ့ၣ်သ့ၣ် ပှၤဂၤယူာ်ထီၣ်စုလၢ ကစံးဆၢတၢ်အဂီၢ် တဘူၣ်လၢၤဘၣ်. (စံၣ် ၃:၇) ဖဲပမၤလိသကိးတၢ်ဂ့ၢ်အခါ ပှၤယူာ်ထီၣ်စုမ့ၢ်အါန့ၣ် ပတစံးဆၢဘၣ်တၢ် ဒ်ပဘၣ်သးစံးဆၢ ကိးဘျီဒဲးဘၣ်. တဘျီတခီၣ်န့ၣ် ပှၤဖီၣ်မူဒါတဂၤ မးတကိးပှၤ နီတဘျီဘၣ်. အဃိ ဘၣ်သ့ၣ်သ့ၣ် ပသးတမုာ်ဘၣ်. ပှၤမ့ၢ်တကိးပှၤဘၣ်နာ်က့ ပတဘၣ်သးထီၣ်တၢ်ဘၣ်. (စံၣ် ၇:၉) ပမ့ၢ်တစံးဆၢဘၣ်တၢ် အါအါဘၣ်န့ၣ် ဖဲပှၤစံးဆၢတၢ်အခါ ပကဒိကနၣ်အီၤထံထံ, ဒီးတၢ်အိၣ်ဖှိၣ်မ့ၢ်ဝံၤန့ၣ် ပကပတြၢၤအဝဲသ့ၣ်. ပမ့ၢ်ပတြၢၤ ပဒီပုၢ်ဝဲၢ်မုၣ်ခွါန့ၣ် အဝဲသ့ၣ်ကန့ၢ်ဂံၢ်န့ၢ်ဘါ အဃိလီၤဂာ် ဒ်သိးဒီး ပဟ့ၣ်ထီၣ်တၢ်စံးဆၢ. တၢး၂၃.၀၄ ၂၃-၂၄ ¶၁၄-၁၆

မၤလိကစၢ်ယွၤ အကလုၢ်ကထါ ဒီးဆိမိၣ်ထံအီၤ. သ့ၣ်တထူၣ် အဂံၢ်စဲၤလီၤသးမ့ၢ်ယိာ်န့ၣ် အကအိၣ် ဂၢၢ်ဂၢၢ်ကျၢၤကျၢၤ. ဒ်န့ၣ်အသိး ပတၢ်နာ် မ့ၢ်သန့ၤထီၣ်သးလၢ ကစၢ်ယွၤ အကလုၢ်ကထါန့ၣ် ပကအိၣ် ဂၢၢ်ဂၢၢ်ကျၢၤကျၢၤ. တကးဒံးဘၣ် ဖဲသ့ၣ်တထူၣ်ဒိၣ်ထီၣ်အခါ အဂံၢ်ကဟဲအါထီၣ် ဒီးအဂံၢ်ကစဲၤလီၤသးကျၢၤကျၢၤ. ပဝဲစ့ၢ်ကီး ဖဲပမၤလိ ကစၢ်ယွၤ အကလုၢ်ကထါ ဒီးဆိမိၣ်ထံအီၤအခါ ပမၤဂၢၢ်ကျၢၤထီၣ်ပတၢ်နာ် ဒီးပနာ်နီၢ်ကီၢ်လၢ တၢ်လၢကစၢ်ယွၤတဲဝဲန့ၣ် အဘၣ်ကတၢၢ်. (ကလီး ၂:၆, ၇) ဒီးလၢညါ ကစၢ်ယွၤ သိၣ်လိ, ဟံးစုနဲၣ်ကျဲ ဒီးဒီသဒၢအပှၤဂီၢ်မုၢ်ဒ်လဲၣ်န့ၣ် ဆိမိၣ်ထံအီၤ. အဒိ ဖဲဝံယဃ့းစက့လး ထံၣ်ဝဲတၢ်ထံၣ်လၢညါခီ ဘၣ်ဃးဒီး မူခိၣ်ကလူးတဂၤ ထိၣ်ဝဲတၢ်လုၢ်ဟံၣ် လီၤတံၢ်လီၤဆဲးအခါ ဝံယဃ့းစက့လး ကွၢ်ဝဲထံထံ. တၢ်ထံၣ်လၢညါခီအံၤ မၤဆူၣ်ထီၣ် ဝံယဃ့းစက့လးအသး ဒီးပမၤလိဘၣ်စ့ၢ်ကီးလၢ ပကဘၣ်မၤထွဲ ယဟိဝၤယွၤ အတၢ်သိၣ်တၢ်သီ ဘၣ်ဃးဒီး တၢ်ဘူၣ်ထီၣ်ဘါထီၣ်စီဆှံ. (ဃ့း ၄၀:၁-၄; ၄၃:၁၀-၁၂) အဃိ ပထံၣ်ဘၣ်လၢ ပမ့ၢ်ဟံးန့ၢ်တၢ်ဆၢကတီၢ်လၢ ပကမၤလိ ကစၢ်ယွၤ အကလုၢ်ကထါ ဒီးဆိမိၣ်ထံ တၢ်ဂ့ၢ်လၢအဒိၣ်အယိာ်န့ၣ် ပကန့ၢ်ဘၣ် အဘျုးအါမး. ပမ့ၢ်နာ်န့ၢ်ယဟိဝၤယွၤ လၢပသးဒီဖျၢၣ်န့ၣ် ပအိၣ်ဒီး သးလၢအဂၢၢ်ကျၢၤသ့.—စံး ၁၁၂:၇. တၢး၂၃.၀၇ ၁၈ ¶၁၅-၁၆

လၢလံာ်စီဆှံပူၤန့ၣ် ပှၤဒိဂ့ၤတဲာ်ဘၣ်လၢ ဒီပုၢ်ဝဲၢ်ခွါသးစၢ်တဖၣ် ကွၢ်လိဝဲသ့န့ၣ် အိၣ်ဝဲအါမး. ပိာ်ခွါလၢ အဒိဂ့ၤတဲာ်ဘၣ် လၢအပူၤကွံာ်တဖၣ်န့ၣ် အဲၣ်ကစၢ်ယွၤ ဒီးမၤလၢပှဲၤအမူဒါလၢ ကကွၢ်ထွဲဝဲ ကစၢ်ယွၤ အပှၤဂီၢ်မုၢ်ဂ့ၤဂ့ၤ. တကးဒံးဘၣ် ဒီပုၢ်ဝဲၢ်ခွါသးစၢ်တဖၣ် ကွၢ်လိဝဲ ဒီပုၢ်ဝဲၢ်ခွါလၢ အဒိၣ်တုာ်ခိၣ်ပှဲၤ လၢအဟံၣ်ပူၤဃီပူၤ ဒီးလၢအတၢ်အိၣ်ဖှိၣ်အပူၤသ့. (ဧ့ၤ ၁၃:၇) ထဲန့ၣ်တကးဒံးဘၣ် အဝဲသ့ၣ် ကွၢ်လိဝဲ ယ့ၣ်ၡူးအဒိအတဲာ် သ့စ့ၢ်ကီး. (၁ ပ့း ၂:၂၁) ဖဲနမၤလိပှၤတဖၣ်အံၤ အဂ့ၢ်အခါ ဆိကမိၣ် ဘၣ်ဃးဒီး အဝဲသ့ၣ် အတၢ်ဂ့ၤတၢ်ဝါ လၢနဘၣ်သးကွၢ်လိ. (ဧ့ၤ ၁၂:၁, ၂) ဝံၤဒီး ဆိကမိၣ်ထီၣ်လၢ နကကွၢ်လိအီၤဒ်လဲၣ်. ဒီပုၢ်ဝဲၢ်ခွါလၢ အအိၣ်ဒီး တၢ်သ့ဆိကမိၣ် ပဲာ်ထံနီၤဖးတၢ်န့ၣ် တချုးလၢ အဆၢတဲာ်တၢ် တမံၤမံၤဒံးဘၣ်န့ၣ် အဆိကမိၣ်ထံတၢ် လီၤတံၢ်လီၤဆဲး. အဃိ နကဘၣ် မၤအိၣ်ထီၣ် တၢ်သ့တၢ်ဘၣ်တခါအံၤ ဒီးဆဲးပၢၤဃာ်အီၤ. အဆိကတၢၢ်န့ၣ် မၤလိလံာ်စီဆှံ အတၢ်ဟံးစုနဲၣ်ကျဲ ဒီးဆိကမိၣ်ထီၣ်လၢ တၢ်ဟံးစုနဲၣ်ကျဲတဖၣ်အံၤ ကဲဘျုးလၢ နဂီၢ်ဒ်လဲၣ်. ဝံၤဒီး မၤထွဲ တၢ်ဟံးစုနဲၣ်ကျဲတဖၣ်အံၤ ဒ်သိးကမၤစၢၤနၤလၢ နကဆၢတဲာ်တၢ်လၢအဘၣ် ယဟိဝၤယွၤအသး. (စံး ၁၁၉:၉) နမ့ၢ်မၤဒ်န့ၣ်န့ၣ် နကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီ.—ကတိၤ ၂:၁၁, ၁၂; ဧ့ၤ ၅:၁၄. တၢး၂၃.၁၂ ၂၅ ¶၄-၅

မိပါတဖၣ် ကဘၣ်သိၣ်လိအဖိလၢ ဖဲပှၤဂၤသံကွၢ် အတၢ်စူၢ်တၢ်နာ် အဂ့ၢ်အခါ အဝဲသ့ၣ် ကဘၣ်စံးဆၢက့ၤဝဲမုာ်မုာ်. (ယၤ ၃:၁၃) မိပါတနီၤန့ၣ် ဖဲအဝဲသ့ၣ် မၤဝဲဟံၣ်ဖိဃီဖိ တၢ်မၤလိ လံာ်စီဆှံအခါ အဝဲသ့ၣ် ကၠီးလိသးဒီးအဖိ. အဒိ အဝဲသ့ၣ် ကွၢ်သကိးဝဲ တၢ်ဂ့ၢ်လၢ ပှၤကသံကွၢ်အီၤ လၢကၠိ, အဝဲသ့ၣ် တဲသကိး ဒီးကၠီးလိသးလၢ အကဘၣ်စံးဆၢက့ၤ ပှၤဂၤဒ်လဲၣ် ဒီးအဝဲသ့ၣ် သိၣ်လိအဖိလၢ အကတဲတၢ်မုာ်မုာ်. ပှၤသးစၢ်တဖၣ် မ့ၢ်ကၠီးလိပာ်စၢၤသး လၢဟံၣ်န့ၣ် ကမၤစၢၤ အဝဲသ့ၣ်ဒ်သိး အဝဲသ့ၣ် အနီၢ်ကစၢ် ကနာ်ဝဲ သပှၢ်တၢၢ်လၢ တၢ်လၢအဝဲသ့ၣ် နာ်ဝဲန့ၣ် အမ့ၢ်အတီ ဒီးကမၤစၢၤအီၤလၢ အကတဲနၢ်ပၢၢ်ပှၤဂၤ လၢအတၢ်နာ်အဂ့ၢ်. တၢ်ဂ့ၢ်ပိာ်ထွဲလိာ်အခံတဖၣ် လၢအမ့ၢ် “ပှၤသးစၢ်တဖၣ် အတၢ်သံကွၢ်” လၢအအိၣ်လၢ jw.org အပူၤန့ၣ် အိၣ်ဒီးလံာ်ကၠီးလိသး လၢပှၤသးစၢ်အဂီၢ်. လံာ်ကၠီးလိသးတဖၣ်အံၤ ကမၤစၢၤဝဲ ပှၤသးစၢ်တဖၣ်ဒ်သိး အဝဲသ့ၣ် ကမၤဂၢၢ်ကျၢၤဒိၣ်ထီၣ် အတၢ်နာ် ဒီးကကတဲာ်ကတီၤ ပာ်စၢၤအသးလၢ ကစံးဆၢက့ၤပှၤဂၤဒ်လဲၣ်အဂီၢ်. နမ့ၢ်မၤလိသကိး တၢ်ဂ့ၢ်ပိာ်ထွဲလိာ်အခံ တခါအံၤ ဒီးနဟံၣ်ဖိဃီဖိန့ၣ် ကမၤစၢၤနၤဒီးနဖိလၢ သုကတဲဖျါထီၣ် သုတၢ်စူၢ်တၢ်နာ် လၢတၢ်သးစူၤအပူၤ ဒီးတၢ်လၢသုတဲန့ၣ် ကထုးန့ၢ်ပှၤဂၤအသး. တၢး၂၃.၀၉ ၁၇ ¶၁၀; ၁၈ ¶၁၅-၁၆

နပာ်လီၤနီၢ်သးဖီတၢၣ် ဘၣ်ဆၣ် နဆိမိၣ်လၢ အကီလၢ နကမၤလၢပှဲၤအီၤန့ၣ် အိၣ်တဘျီဘျီဧါ. နမ့ၢ်ဆိမိၣ်ဒ်န့ၣ်န့ၣ် တမ့ၢ်ထဲနၤတဂၤဘၣ်. အဒိ ဒီပုၢ်ဝဲၢ်ခွါဖံလံး ဘၣ်သးမၤဂ့ၤထီၣ် အတၢ်ဃ့ထုကဖၣ် ဒီးအဘၣ်သး ဃ့ထုကဖၣ်အါထီၣ်. ဘၣ်ဆၣ် အကဃ့ထုကဖၣ်အဂီၢ် အတၢ်ဆၢကတီၢ် တအိၣ်အါအါဘၣ်. မ့မ့ၢ်ဒီပုၢ်ဝဲၢ်မုၣ်အဲရံၤကၤန့ၣ် ပာ်လီၤဖီတၢၣ်လၢ ကလဲၤထံၣ်ဖှိၣ်လိာ်သးလၢ တၢ်စံၣ်တဲၤတဲလီၤတၢ်အဂီၢ် ဘၣ်ဆၢဘၣ်ကတီၢ်. ဘၣ်ဆၣ် အဝဲလဲၤစဲၤခံ ဘူးကအိၣ်ကိးဘျီဒဲးညါ. နပာ်လီၤဖီတၢၣ်လံ ဒီးနမၤလၢပှဲၤအီၤ မ့ၢ်တန့ၢ်ဒံးဘၣ်နာ်က့ တဘၣ်သးဟးဂီၤတဂ့ၤ. ပှၤတဂၤကမၤလၢပှဲၤ အဖီတၢၣ်ဆံးဆံးဖိတခါအဂီၢ် အကဘၣ်ဟံးန့ၢ် တၢ်ဆၢကတီၢ် ဒီးကျဲးစၢးဝဲဆူၣ်ဆူၣ်. ဒီးပသ့ၣ်ညါလၢ နဘၣ်သးမၤလၢပှဲၤ နဖီတၢၣ်ဒံးအဃိ နပာ်ဖျါထီၣ်လၢ နပာ်လုၢ်ပာ်ပှ့ၤ နတၢ်ရ့လိာ်သးဒီး ယဟိဝၤယွၤ ဒီးနဘၣ်သးဟ့ၣ် ယဟိဝၤယွၤ တၢ်လၢအဂ့ၤကတၢၢ်. အဃိ ယဟိဝၤယွၤ ပာ်လုၢ်ပာ်ပှ့ၤ နတၢ်ကျဲးစၢး ဒီးတၢ်လၢနမၤတန့ၢ်ဘၣ်န့ၣ် အတမၢနမၤဘၣ်. (စံး ၁၀၃:၁၄; မံ ၆:၈) ပဝဲတဂၤဒီးတဂၤန့ၣ် ပတၢ်အိၣ်သး တဒ်သိးလိာ်သးဘၣ်အဃိ ပကဘၣ်ပာ်လီၤဖီတၢၣ်လၢ ပမၤအီၤန့ၢ်. တၢး၂၃.၀၅ ၂၆ ¶၁-၂

ပှၤတဂၤ မ့ၢ်အိၣ်ဒီးတၢ်သးဒူ သနာ်က့ အပျံၤတၢ်သ့စ့ၢ်ကီး. အမ့ၢ်ပျံၤတၢ် သနာ်က့ အကဆဲးမၤ တၢ်လၢအဘၣ်ထီဘိ. စီၤဒၤနံးယ့လးန့ၣ် အကဲပှၤသးစၢ်လၢ အအိၣ်ဒီးတၢ်သးဒူတဂၤ. စီၤဒၤနံးယ့လး မၤလိဝဲ ကစၢ်ယွၤအဝံတဖၣ် အတၢ်ကွဲးနီၣ်ကွဲးဃါ ဒီးအမၤလိစ့ၢ်ကီး တၢ်စံးပာ်လၢ ဝံယံးရမံယၤကွဲးဝဲတဖၣ်. ခီဖျိလၢ စီၤဒၤနံးယ့လး မၤလိဝံအတၢ်စံးပာ်တဖၣ်အံၤအဃိ အသ့ၣ်ညါဘၣ်ဝဲလၢ တယံာ်လၢၤဘၣ်န့ၣ် ပှၤယူဒၤဖိ ကက့ၤဘၣ်လၢ ဝ့ၢ်ယရူၤၡလ့ၣ်. (ဒၤ ၉:၂) ဖဲစီၤဒၤနံးယ့လး ထံၣ်ဘၣ်ဝဲလၢ ဝံအတၢ်စံးပာ်တဖၣ်အံၤ ဟဲလၢပှဲၤထီၣ်အခါ အနာ်န့ၢ် ယဟိဝၤယွၤ အါထီၣ် ဒီးပှၤလၢအနာ်န့ၢ် ယဟိဝၤယွၤန့ၣ် အဝဲသ့ၣ် အတၢ်သးဒူ ကအိၣ်အါထီၣ်စ့ၢ်ကီး. (ထိၣ်သတြီၤဒီး ရိမ့ၤ ၈:၃၂, ၃၇-၃၉.) တကးဒံးဘၣ် တၢ်အရ့ဒိၣ်ကတၢၢ်တခါလၢ စီၤဒၤနံးယ့လးမၤဝဲန့ၣ် မ့ၢ်ဝဲ အဃ့ထုကဖၣ်လၢ ယဟိဝၤယွၤ အအိၣ်ထီဘိ. (ဒၤ ၆:၁၀) အဝဲဃ့ပျၢ် အတၢ်ဒဲးဘး ဒီးတဲဖျါထီၣ် အတၢ်တူၢ်ဘၣ်လၢ ယဟိဝၤယွၤအအိၣ်. ဒီးတကးဒံးဘၣ် အဃ့ယဟိဝၤယွၤ အတၢ်မၤစၢၤ စ့ၢ်ကီး. (ဒၤ ၉:၄, ၅, ၁၉) စီၤဒၤနံးယ့လးန့ၣ် အကဲပှၤဟီၣ်ခိၣ်ဖိ ဒ်သိးဒီးပှၤအဃိ အတအိၣ်ဖျဲၣ်ထီၣ်ဃုာ်ဒီး တၢ်သးဒူဘၣ်. သနာ်က့ အမၤအိၣ်ထီၣ် အတၢ်သးဒူခီဖျိ အမၤလိ ကစၢ်ယွၤအကလုၢ်ကထါ, အဃ့ထုကဖၣ် ဒီးအသန့ၤသးလၢ ယဟိဝၤယွၤထီဘိ. တၢး၂၃.၀၈ ၃ ¶၄; ၄ ¶၇

ဖဲပဒိကနၣ် ပှၤလၢအအိၣ်ဒီး တၢ်စိတၢ်ကမီၤလၢ အပၢတၢ်လၢပဖီခိၣ် အကလုၢ်အခါ ကကဲဘျုးလၢ ပနီၢ်ကစၢ်အဂီၢ် ဒီးပှၤဂၤအဂီၢ်ဒ်လဲၣ်. ပမ့ၢ်ဒိကနၣ် ဒီးမၤထွဲ ပဒိၣ်တၢ်သိၣ်တၢ်သီန့ၣ် ပတဘၣ် တၢ်စံၣ်ညီၣ်ဘၣ်. (ရိ ၁၃:၁, ၄) ဖဲပဒိကနၣ် ပှၤလၢအအိၣ်ဒီး တၢ်စိတၢ်ကမီၤလၢ ပဖီခိၣ် အကလုၢ်အခါ အဝဲသ့ၣ် ထံၣ်ဝဲလၢ ယဟိဝၤပှၤအုၣ်အသးတဖၣ်န့ၣ် အမ့ၢ်ထံဖိကီၢ်ဖိလၢအဂ့ၤ ဒီးအိၣ်ဒီးတၢ်ဒိကနၣ်. အဒိ ပူၤကွံာ်အနံၣ်အါမး လၢနဲးကၠံရံယါန့ၣ် ဖဲပှၤထီၣ်တၢ်အိၣ်ဖှိၣ်အခါ ပှၤသုးဖိတဖၣ် ဟဲနုာ်လီၤလၢ တၢ်အိၣ်ဖှိၣ်ပူၤ ဒီးဟးဃုဝဲ ပှၤလၢအထီဒါ ပဒိၣ်ပပှၢ်တဖၣ်လၢ အတဟ့ၣ် တၢ်ခိတၢ်သွဲဘၣ်. ဘၣ်ဆၣ် ပှၤဘၣ်မူဘၣ်ဒါတဂၤ တဲဝဲပှၤသုးဖိတဖၣ်လၢ “ယဟိဝၤပှၤအုၣ်အသးတဖၣ်န့ၣ် အဝဲသ့ၣ်ဟ့ၣ်တၢ်ခိတၢ်သွဲ ထီဘိလီၤ.” အဃိ ပထံၣ်ဘၣ်လၢ ဖဲပဒိကနၣ် ပဒိၣ်တၢ်သိၣ်တၢ်သီအခါ ပှၤဂၤကထံၣ်ဝဲလၢ ယဟိဝၤပှၤအုၣ်အသးန့ၣ် မ့ၢ်ပှၤလၢအဂ့ၤတဖု. ဒီးခီဖျိလၢ ပအိၣ်ဒီးတၢ်ဒိကနၣ် ဒီးအိၣ်ဒီးမံၤဂ့ၤသၣ်ဂ့ၤအဃိ လၢခံန့ၣ် ကကဲထီၣ်တၢ်ဒီသဒၢလၢ ပဒီပုၢ်ဝဲၢ်မုၣ်ခွါတဖၣ်အဂီၢ်. တၢး၂၃.၁၀ ၉ ¶၁၃

ယဟိဝၤယွၤ အခ့အပှၤတနီၤန့ၣ် အိၣ်ခိးဝဲလၢ တၢ်အကတၢၢ် ကဟဲတုၤန့ၣ် ဖးယံာ်လံ. အဝဲသ့ၣ်တနီၤ ဆိမိၣ်ဝဲလၢ ကစၢ်ယွၤ အတၢ်အၢၣ်လီၤ ဘၣ်ဃးဒီး တၢ်အကတၢၢ်အံၤ ကြၢးဟဲတုၤလံ. အဝဲသ့ၣ် တၢ်ထံၣ်အိၣ်ဒ်န့ၣ်နာ်က့ ယဟိဝၤယွၤ နၢ်ပၢၢ်ဝဲ. အဃိ ဘၣ်ဃးဒီး တၢ်အကတၢၢ်န့ၣ် ယဟိဝၤယွၤ တဲဘၣ်ဝံဃဘးကူာ်လၢ “တၢ်ထံၣ်လၢညါခီအံၤ ကလၢထီၣ်ပှဲၤထီၣ်ဖဲ တၢ်ဆၢကတီၢ်လၢ ဘၣ်တၢ်ပာ်ပနီၣ်အီၤ ဘၣ်ဝဲအခါလီၤ. ဒီးတၢ်ဆၢကတီၢ်အံၤ ကဟဲဝဲချ့ချ့ ဒီးတၢ်ထံၣ်လၢညါခီအံၤ တမ့ၢ်တၢ်လံၣ်တၢ်လီဘၣ်. မ့ၢ်ဖျါလၢ အယံာ်ဝဲဘၣ်ဆၣ် ခိးကွၢ်လၢ်အီၤလၢ တၢ်သးဆူၣ် အပူၤတက့ၢ်. တၢ်ထံၣ်လၢညါခီအံၤ ကဟဲလၢထီၣ်ပှဲၤထီၣ်ဝဲ သပှၢ်ကတၢၢ် ဒီးတစဲၤခံဘၣ်.” (ဃဘး ၂:၃) ယဟိဝၤယွၤ အတၢ်ကတိၤအံၤ အကဲဘျုးထဲ ဝံဃဘးကူာ်အဂီၢ်လီၤဧါ. မ့မ့ၢ်ပဂီၢ်ဟီမီၤ အကဲဘျုးစ့ၢ်ကီးဧါ. တၢ်မၢဖိပီလူး တဲဝဲလၢ ယဟိဝၤယွၤ အတၢ်ကတိၤအံၤ ဘၣ်ထွဲဒီး ခရံာ်ဖိလၢ အအိၣ်ခိးကွၢ်လၢ် ဟီၣ်ခိၣ်သီစ့ၢ်ကီး. (ဧ့ၤ ၁၀:၃၇) အဃိ ပမ့ၢ်ဆိမိၣ်လၢ ပဘၣ်အိၣ်ခိး ယဟိဝၤယွၤ အတၢ်အၢၣ်လီၤအံၤ ဖးယံာ်ဒံးနာ်က့ ပနာ်သ့နီၢ်ကီၢ်လၢ အတၢ်အၢၣ်လီၤအံၤ “ကဟဲလၢထီၣ်ပှဲၤထီၣ်ဝဲ သပှၢ်ကတၢၢ် ဒီးတစဲၤခံဘၣ်.” တၢး၂၃.၀၄ ၃၀ ¶၁၆

လီၤသးအုးဒိၣ်မးလၢ ပှၤအံၣ်စရ့လးဖိ အါတက့ၢ်န့ၣ် တတူၢ်လိာ်ဝဲလၢ ယဟိဝၤယွၤ သူစီၤမိၤၡ့ ဒ်အပှၤခၢၣ်စးတဂၤအသိးဘၣ်. (၄ မိၤၡ့ ၁၄:၁၀, ၁၁) ယဟိဝၤယွၤ သူစီၤမိၤၡ့လၢ ကဟံးစုနဲၣ်ကျဲအဝဲသ့ၣ်န့ၣ် အဝဲသ့ၣ် တတူၢ်လိာ်ဝဲဘၣ် အိၣ်တဘျုးဘျီညါ. အဃိ ယဟိဝၤယွၤ တပျဲနုာ်အဝဲသ့ၣ်လၢ ကီၢ်တၢ်စံးပာ်အပူၤဘၣ်. (၄ မိၤ ၁၄:၃၀) သနာ်က့ ပှၤအံၣ်စရ့လးဖိတနီၤ ဒိကနၣ် ဒီးမၤထွဲဝဲ ယဟိဝၤယွၤ အတၢ်ဟံးစုနဲၣ်ကျဲ. အဒိ ယဟိဝၤယွၤ တဲဝဲလၢ “စီၤကၤလ့းန့ၣ် . . . အဝဲ ဒိကနၣ် ယကလုၢ်လၢ အသးဒီဖျၢၣ် ထီဘိ.” (၄ မိၤ ၁၄:၂၄) ယဟိဝၤယွၤ ဆိၣ်ဂ့ၤက့ၤ စီၤကၤလ့း ဒီးပျဲစ့ၢ်ကီးလၢ စီၤကၤလ့း ကဃုထၢ တၢ်လီၢ်လၢ အဘၣ်သးအိၣ်ဝဲ လၢကီၢ်ကနၤဧၣ်အပူၤ. (ၡူ ၁၄:၁၂-၁၄) ပှၤအံၣ်စရ့လးဖိလၢ အလဲၤနုာ်ဘၣ်လၢ ကီၢ်တၢ်စံးပာ်အပူၤန့ၣ် အဝဲသ့ၣ် ပာ်လီၤတၢ်အဒိအတဲာ် လၢအဂ့ၤ ဒီးအဝဲသ့ၣ် ဒိကနၣ် ဒီးမၤထွဲဝဲ ယဟိဝၤယွၤ အတၢ်ဟံးစုနဲၣ်ကျဲစ့ၢ်ကီး. ဖဲစီၤယိၤၡူ ထီၣ်က့ၤလၢ စီၤမိၤၡ့အလီၢ် ဒီးတီခိၣ်ရိၤမဲ ပှၤအံၣ်စရ့လးဖိအခါ လၢစီၤယိၤၡူ အတၢ်အိၣ်မူ ဒီတစိၤန့ၣ် ပှၤအံၣ်စရ့လးဖိတဖၣ် ပာ်ကဲအီၤဒိၣ်မး.” (ၡူ ၄:၁၄) အဃိ ယဟိဝၤယွၤ ဆိၣ်ဂ့ၤအဝဲသ့ၣ် ဒီးဒုးအိၣ် အဝဲသ့ၣ်လၢ ကီၢ်လၢအအၢၣ်လီၤပာ်စၢၤ အဝဲသ့ၣ်.—ၡူ ၂၁:၄၃, ၄၄. တၢး၂၄.၀၂ ၂၁ ¶၆-၇

ဖဲကသံၣ်သရၣ် ဖီၣ်ကွၢ်ဝဲ ပစုဒ့ကိာ်အခါ အသ့ၣ်ညါဘၣ်ဝဲ ပသးဖျၢၣ် မၤတၢ်ဂ့ၤဧါတဂ့ၤဧါ. ဒ်န့ၣ်အသိး ဖဲပဆိကမိၣ်ထံက့ၤ ပအဲၣ်ဒီပုၢ်ဝဲၢ်မုၣ်ခွါ ဒိၣ်ထဲလဲၣ်အခါ ပကသ့ၣ်ညါဘၣ်လၢ ပအဲၣ်ယဟိဝၤယွၤ ဒိၣ်ထဲလဲၣ်စ့ၢ်ကီး. ပမ့ၢ်သ့ၣ်ညါဘၣ်လၢ ပအဲၣ်ဒီပုၢ်ဝဲၢ်မုၣ်ခွါ တဒိၣ်ဒ်သိးလၢညါဘၣ်န့ၣ် ဘၣ်သ့ၣ်သ့ၣ် ပအဲၣ်ကစၢ်ယွၤ တဒိၣ်ဒ်သိးလၢညါလၢၤဘၣ်. ဘၣ်ဆၣ် ပမ့ၢ်ပာ်ဖျါထီၣ်လၢ ပအဲၣ်ဒီပုၢ်ဝဲၢ်မုၣ်ခွါထီဘိန့ၣ် ပကသ့ၣ်ညါဘၣ်လၢ ပတၢ်အဲၣ်ယဟိဝၤယွၤန့ၣ် တလီၤစှၤဘၣ်. ပအဲၣ်ဒီပုၢ်ဝဲၢ်မုၣ်ခွါ မ့ၢ်တဒိၣ်ဒ်သိးလၢညါဘၣ်န့ၣ် အကဲဝဲ တၢ်ကီတၢ်ခဲ ဖးဒိၣ်တခါညါ. ဘၣ်မနုၤအဃိ ပတဲဒ်န့ၣ်လဲၣ်. ခီဖျိလၢ တၢ်ကီတၢ်ခဲ ဖးဒိၣ်တခါအံၤ အပာ်ဖျါထီၣ်လၢ ပတၢ်ရ့လိာ်သးဒီး ယဟိဝၤယွၤ တဂ့ၤဒ်သိးလၢညါလၢၤဘၣ်. တၢ်မၢဖိယိၤဟၣ် တဲဝဲလၢ “ပှၤလၢအတအဲၣ် အဒီပုၢ်ဝဲၢ်လၢ အထံၣ်ဝဲန့ၣ် အအဲၣ်ကစၢ်ယွၤလၢ အထံၣ်ဝဲတသ့ဘၣ်တဂၤန့ၣ် ကသ့ဒ်လဲၣ်.” (၁ ယိၤ ၄:၂၀) ပန့ၢ်ဘၣ် တၢ်မၤလိဒ်လဲၣ်. ပမ့ၢ် “အဲၣ်လိာ်ပသး တဂၤဒီးတဂၤ” မးယဟိဝၤယွၤ ကဘၣ်သူၣ်ဘၣ်သးပှၤ.—၁ ယိၤ ၄:၇-၉, ၁၁. တၢး၂၃.၁၁ ၈ ¶၃; ၉ ¶၅-၆

ဖဲစီၤယိၤအၣ် နီၢ်ဆံးခါန့ၣ် အပါသံသဒၣ်အီၤ. အဃိ ပှၤလုၢ်တၢ်ဒိၣ် လၢအသးတီတဂၤ လၢအမ့ၢ် စီၤယဟိၤယဒါန့ၣ် ကွၢ်လုၢ်ဒိၣ်ထီၣ်အီၤ ဒီးသိၣ်လိအီၤလၢ ယဟိဝၤယွၤအဂ့ၢ်. ခီဖျိလၢ စီၤပၤယိၤအၣ် ဒိကနၣ်ဒီးမၤထွဲဝဲ စီၤယဟိၤယဒါ အတၢ်ဟ့ၣ်ကူၣ်အဃိ အဆၢတဲာ်တၢ် လၢတၢ်ကူၣ်သ့. တကးဒံးဘၣ် ခီဖျိလၢ စီၤယဟိၤယဒါ အဒိအတဲာ်အဃိ စီၤယိၤအၣ် ဆၢတဲာ်လီၤအသးလၢ အကဘူၣ်ထီၣ်ဘါထီၣ် ယဟိဝၤယွၤ ဒီးမၤအတၢ်မၤ. တကးဒံးဘၣ် အမၤစၢၤ ပှၤဂီၢ်မုၢ်လၢ ကဘူၣ်ထီၣ်ဘါထီၣ် ယဟိဝၤယွၤ ဒီးမၤအတၢ်မၤစ့ၢ်ကီး. စီၤယိၤအၣ် ရဲၣ်ကျဲၤစ့ၢ်ကီးဝဲလၢ ကဘှီဂ့ၤထီၣ်က့ၤ ယဟိဝၤယွၤ အတၢ်လုၢ်ဟံၣ်. (၂ ကွဲး ၂၄:၁, ၂, ၄, ၁၃, ၁၄) နမိနပါ မ့တမ့ၢ် ပှၤတဂၤဂၤ မ့ၢ်သိၣ်လိနၤလၢ နကအဲၣ်ယဟိဝၤယွၤ ဒီးအိၣ်မူ ဒ်အတၢ်ဘျၢအသိးန့ၣ် အကဲဝဲ တၢ်ဟ့ၣ်အလုၢ်ဒိၣ်ပှ့ၤဒိၣ်တခါ လၢနဂီၢ်. (ကတိၤ ၂:၁, ၁၀-၁၂) ဘၣ်သ့ၣ်သ့ၣ် နမိနပါ ကသိၣ်လိနၤ လၢကျဲအါဘိ. ဒီးနမ့ၢ်မၤထွဲ တၢ်ဟ့ၣ်ကူၣ် လၢအသန့ၤထီၣ်သးလၢ လံာ်စီဆှံန့ၣ် အဝဲသ့ၣ် ကသးခုဒိၣ်မး. ထဲန့ၣ်တကးဒံးဘၣ် နကမၤသးခု ယဟိဝၤယွၤအသး ဒီးနတၢ်ရ့လိာ်သးဒီးအီၤ ကဂ့ၤဒိၣ်ထီၣ်. (ကတိၤ ၂၂:၆; ၂၃:၁၅, ၂၄) အဃိ ဒ်သိးပကမၤသးခု ပမိပပါ ဒီးယဟိဝၤယွၤ အသးအဂီၢ် ပကဘၣ်ကွၢ်လိ ပှၤသးစၢ်စီၤယိၤအၣ် အဒိအတဲာ်. တၢး၂၃.၀၉ ၈-၉ ¶၃-၅

ယဟိဝၤယွၤ အၢၣ်လီၤဝဲလၢ အကဒိကနၣ် ပတၢ်ထုကဖၣ်. ခီဖျိလၢ ပဘူၣ်ထီၣ်ဘါထီၣ် ယဟိဝၤယွၤ ဒီးပတီဒီးအီၤအဃိ အကဒိကနၣ် ပတၢ်ထုကဖၣ်ထီဘိ. (စံး ၁၀:၁၇; ၃၇:၂၈) သနာ်က့ ယဟိဝၤယွၤ တဟ့ၣ်ပှၤ တၢ်လၢပဃ့အီၤ ကိးမံၤဒဲးဘၣ်. ဒီးတၢ်လၢပဃ့အီၤ တနီၤန့ၣ် ဒ်သိးပကဒိးန့ၢ်ဘၣ်အဂီၢ် ဘၣ်သ့ၣ်သ့ၣ် ပကဘၣ်အိၣ်ခိးအီၤတုၤလၢ ဟီၣ်ခိၣ်သီညါ. ယဟိဝၤယွၤ ဆိကမိၣ်ဃုာ်ဝဲလၢ တၢ်လၢပဃ့န့ၣ် အဘၣ်ထွဲလိာ်သးဒီး အတၢ်တိာ်ပာ်ဒ်လဲၣ်. (ၡါ ၅၅:၈, ၉) ယဟိဝၤယွၤ အတၢ်တိာ်ပာ်အိၣ်ဝဲလၢ ပှၤဟီၣ်ခိၣ်ဖိခဲလၢာ် ကဒိကနၣ်အီၤ ဒီးကအိၣ်လၢအတၢ်ပၢဖီလာ် ဃူဃူဖိးဖိး. ဘၣ်ဆၣ် မုၣ်ကီၤလံၢ် တဲဝဲလၢ ပှၤဟီၣ်ခိၣ်ဖိ မ့ၢ်ပၢလီၤအသးန့ၣ် ကဂ့ၤလၢအဝဲသ့ၣ်အဂီၢ် ဒိၣ်တစဲး. (၁ မိၤ ၃:၁-၅) ဒ်သိးယဟိဝၤယွၤ ကပာ်ဖျါထီၣ် မုၣ်ကီၤလံၢ် အတၢ်လံၣ်တၢ်လီအဂီၢ် အပျဲဝဲလၢ ပှၤဟီၣ်ခိၣ်ဖိ ကပၢလီၤအသး. ဒီးဆၢကတီၢ်ခဲအံၤ ပထံၣ်ဘၣ်လၢ ပှၤဟီၣ်ခိၣ်ဖိပၢတၢ်န့ၣ် အဒုးအိၣ်ထီၣ်ထဲ တၢ်ကီတၢ်ခဲလဲလဲ. (စံၣ် ၈:၉) သနာ်က့ တၢ်ကီတၢ်ခဲ ကိးမံၤဒဲးလၢ ပထံၣ်ဘၣ်ခဲအံၤန့ၣ် ပသ့ၣ်ညါလၢ ယဟိဝၤယွၤ တမၤလီၤမၢ်န့ၢ်ပှၤဒံးဘၣ်. တၢး၂၃.၁၁ ၂၁ ¶၄-၅

ယဟိဝၤယွၤ အၢၣ်လီၤ စီၤအၤဘြၤဟၣ်လၢ “ပှၤအါကလုာ်” ကဘၣ်ဆိၣ်ဂ့ၤလၢအီၤ. ဘၣ်ဆၣ် စီၤအၤဘြၤဟၣ် အသးပှၢ်ထီၣ်န့ၢ်အနံၣ် ၁၀၀ ဒီးနီၢ်စၤရါ သးပှၢ်ထီၣ်န့ၢ်အနံၣ် ၉၀ လံသနာ်က့ တၢ်အၢၣ်လီၤလၢ အဝဲသ့ၣ်ကန့ၢ်ဘၣ် အဖိခွါန့ၣ် အဝဲသ့ၣ်တန့ၢ်ဘၣ်ဝဲဒံးဘၣ်. ပမ့ၢ်ကွၢ်လၢ ပှၤဟီၣ်ခိၣ်ဖိ အတၢ်ထံၣ်န့ၣ် စီၤအၤဘြၤဟၣ် ဒီးနီၢ်စၤရါ အဖိအိၣ်တန့ၢ်လၢၤဘၣ်. အဃိ တၢ်မုၢ်လၢ်တခါအံၤ ကဲထီၣ်တၢ်မၤကွၢ်လၢ စီၤအၤဘြၤဟၣ်အဂီၢ် ဖးဒိၣ်ညါ. ဘၣ်ဆၣ် “စီၤအၤဘြၤဟၣ် မုၢ်လၢ်တၢ် ဒီးအဝဲအိၣ်ဒီးတၢ်နာ်လၢ အကကဲထီၣ် ပှၤအါကလုာ်အပၢ် ဒ်တၢ်စံးပာ်အိၣ်ဝဲအသိး.” (ရိ ၄:၁၈, ၁၉) ဒီးလၢခံ ဒ်စီၤအၤဘြၤဟၣ် မုၢ်လၢ်ဝဲအသိး အဖိခွါစီၤအံၤစဲး ဟဲအိၣ်ဖျဲၣ်ထီၣ်ဝဲ အဃိ စီၤအၤဘြၤဟၣ် အတၢ်မုၢ်လၢ်အံၤ ဟဲလၢပှဲၤထီၣ်ဝဲနီၢ်ကီၢ်. (ရိ ၄:၂၀-၂၂) ပဝဲစ့ၢ်ကီး ပန့ၢ်ဘၣ်ကစၢ်ယွၤ အတၢ်ဘၣ်သး ဒီးကဲထီၣ်ပှၤတီပှၤလိၤ ဒ်စီၤအၤဘြၤဟၣ်အသိးသ့. တကးဒံးဘၣ် စီၤပီလူး တဲဝဲလၢ “တၢ်ကတိၤလၢ အမ့ၢ် “အဝဲဘၣ်တၢ်ပာ်ပနီၣ်အီၤ” န့ၣ် တဘၣ်တၢ်ကွဲးလီၤအီၤထဲလၢ စီၤအၤဘြၤဟၣ်အဂီၢ်ဘၣ်. ဘၣ်တၢ်ကွဲးစ့ၢ်ကီးအီၤလၢ ပဂီၢ်လီၤ. ပဝဲစ့ၢ်ကီး ပကဘၣ်တၢ်ပာ်ပနီၣ်ပှၤ ဒ်ပှၤတီပှၤလိၤတဖၣ် အသိး, မ့ၢ်လၢပနာ် ပှၤတဂၤလၢ အဒုးဂဲၤဆၢထၢၣ်က့ၤ ပကစၢ်ယ့ၣ်ၡူး” အဃိ. (ရိ ၄:၂၃, ၂၄) ပထံၣ်ဘၣ်လၢ ဒ်စီၤအၤဘြၤဟၣ်အသိး ပကဘၣ်ပာ်ဖျါထီၣ် ပတၢ်နာ် ခီဖျိပတၢ်မၤ. တၢး၂၃.၁၂ ၇ ¶၁၆-၁၇

ဖဲပထံၣ်ဘၣ်ဒီး တၢ်ကီတၢ်ခဲ ဒီးပပျံၤတၢ်အခါ ပကဘၣ် သ့ၣ်နီၣ်ထီၣ်လၢ ယဟိဝၤယွၤ ထံၣ်ဝဲပတၢ်ကီတၢ်ခဲ ဒီးအသ့ၣ်ညါဝဲ ပတၢ်တူၢ်ဘၣ်. အဒိ လၢညါ ဖဲပှၤအံၣ်စရ့လးဖိ အိၣ်လၢကီၢ်အဲၤကူပတူးအခါ ပှၤရ့ဒီးအဝဲသ့ၣ် တဂ့ၤဘၣ်န့ၣ် ယဟိဝၤယွၤထံၣ်ဝဲ တကးဒံးဘၣ် ယဟိဝၤယွၤ သ့ၣ်ညါဝဲ “တၢ်လၢအဝဲသ့ၣ် [တူၢ်ဘၣ်ခီၣ်ဘၣ်ဝဲ].” (၂ မိၤ ၃:၇) ဘၣ်သ့ၣ်သ့ၣ် ပကဆိကမိၣ်လၢ ဖဲပထံၣ်ဘၣ် တၢ်ကီတၢ်ခဲ လၢအလီၤပျံၤလီၤဖုးအခါ ယဟိဝၤယွၤ မၤစၢၤပှၤဒ်လဲၣ်. ပမ့ၢ်ဆိကမိၣ်ဘၣ် ဒ်န့ၣ်န့ၣ် ပကဘၣ် ဃ့ယဟိဝၤယွၤလၢ အကမၤစၢၤပှၤ ဒ်သိးပကထံၣ်ဘၣ် အတၢ်မၤစၢၤ. (၂ စီၤပၤ ၆:၁၅-၁၇) ဝံၤဒီး ဆိကမိၣ်ထံ တၢ်သံကွၢ်တဖၣ်အံၤ. ပနၢ်ဟူဘၣ် တၢ်စံၣ်တဲၤတဲလီၤ မ့တမ့ၢ် ပှၤဟ့ၣ်တၢ်စံးဆၢ လၢတၢ်အိၣ်ဖှိၣ် ဒီးအမၤဆူၣ်ထီၣ် ပသးဂံၢ်ဘါ အိၣ်တခါခါဧါ. လံာ်လဲၢ်, တၢ်ဂီၤမူ မ့တမ့ၢ် တၢ်သးဝံၣ် လၢအဟ့ၣ်ဂံၢ်ဟ့ၣ်ဘါပှၤန့ၣ် အိၣ်တခါခါဧါ. ပှၤတဲဘၣ်ပှၤတၢ်ဂ့ၢ် မ့တမ့ၢ် လံာ်စီဆှံအဆၢ လၢအမၤမုာ်ထီၣ်ပသး အိၣ်တဂၤဂၤဧါ. ပဒီပုၢ်ဝဲၢ်မုၣ်ခွါ အတၢ်အဲၣ် ဒီးနီၢ်သးတၢ်အီၣ် လၢပဒိးန့ၢ်ဘၣ်တဖၣ် ကဲဘျုးလၢပဂီၢ်ဒိၣ်မးန့ၣ် တဘျီတခီၣ် ပတနီၣ်ဘၣ်ဘၣ်. ပဒီပုၢ်ဝဲၢ်မုၣ်ခွါ ဒီးနီၢ်သးတၢ်အီၣ် တဖၣ်အံၤန့ၣ် မ့ၢ်ဝဲယဟိဝၤယွၤ အတၢ်ဟ့ၣ် လၢအလီၤကမၢကမၣ်ဒိၣ်မး. (ၡါ ၆၅:၁၃; မၢ် ၁၀:၂၉, ၃၀) တၢ်ဟ့ၣ်တဖၣ်အံၤ ပာ်ဖျါထီၣ်ဝဲလၢ ယဟိဝၤယွၤ သးအိၣ်ပှၤဖးဒိၣ်ညါ ဒီးပာ်ဖျါထီၣ်ဝဲလၢ ပနာ်န့ၢ်အီၤ သ့သပှၢ်တၢၢ်.—ၡါ ၄၉:၁၄-၁၆. တၢး၂၄.၀၁ ၄-၅ ¶၉-၁၀

တချုးလၢ ယ့ၣ်ၡူး က့ၤထီၣ်လၢမူခိၣ်ဒံးဘၣ်န့ၣ် ယ့ၣ်ၡူးဒုးသ့ၣ်နီၣ်ထီၣ် အပျဲၢ်အဘီၣ်လၢ အဝဲသ့ၣ်အိၣ်ဒီးမူဒါလၢ ကစံၣ်တဲၤတဲလီၤ ယ့ၣ်ၡူးအဂ့ၢ်လၢ “ဝ့ၢ်ယရူၤၡလ့ၣ်အပူၤ, လၢယူဒၤ အဟီၣ်ကဝီၤဒီဘ့ၣ်, လၢၡၤမရံအပူၤ ဒီးပၢၢ်တုၤလၢ ဟီၣ်ခိၣ်ဒီဘ့ၣ်.” (မၤတၢ် ၁:၈; လူၤ ၂၄:၄၆-၄၈) လၢခံတယံာ်ဘၣ်န့ၣ် ပှၤယူဒၤဖိ တၢ်ဘူၣ်တၢ်ဘါခိၣ်နၢ်တဖၣ် ဖီၣ်ဝဲတၢ်မၢဖိပ့းတရူး ဒီးယိၤဟၣ် ဒီးလဲၤကိးအဝဲသ့ၣ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်တဖျၢၣ်. ဒီးဖဲန့ၣ်ဝံၤအလီၢ်ခံ တၢ်ဘူၣ်တၢ်ဘါခိၣ်နၢ်တဖၣ် တဲအဝဲသ့ၣ်လၢ တဘၣ်စံၣ်တဲၤတဲလီၤတၢ်လၢၤဘၣ် ဒီးတဲပျံၤစ့ၢ်ကီးအဝဲသ့ၣ်. (မၤတၢ် ၄:၁၈, ၂၁) ဘၣ်ဆၣ် စီၤပ့းတရူး ဒီးစီၤယိၤဟၣ် မၤဝဲဒ်လဲၣ်. ဖဲပှၤယူဒၤဖိ တၢ်ဘူၣ်တၢ်ဘါခိၣ်နၢ်တဖၣ် တဲပျံၤစီၤပ့းတရူး ဒီးစီၤယိၤဟၣ်အခါ အဝဲသ့ၣ် တဲက့ၤဝဲ “လၢပကဒိကနၣ် ကစၢ်ယွၤအလီၢ် ပမ့ၢ်ဒိကနၣ်က့ၤလၢ သုကလုၢ်န့ၣ် မ့ၢ်ကစၢ်ယွၤ ကထံၣ်ဝဲလၢ အဘၣ်ဧါ တဘၣ်ဘၣ်ဧါန့ၣ် ဆၢတဲာ်လၢ သုနီၢ်ကစၢ်တက့ၢ်. ဘၣ်ဆၣ် မ့မ့ၢ်ပှၤန့ၣ် တၢ်လၢပထံၣ်ဘၣ် ဒီးတၢ်လၢပနၢ်ဟူဘၣ်တဖၣ်န့ၣ် ပဘၣ်စံၣ်တဲၤတဲလီၤအီၤ ဒီးပပတုာ်တသ့ဘၣ်.” (မၤတၢ် ၄:၁၉, ၂၀) ဖဲပှၤပျၢ်ကွံာ် စီၤပ့းတရူး ဒီးစီၤယိၤဟၣ် ဝံၤအလီၢ်ခံ ယ့ၣ်ၡူးအပျဲၢ်အဘီၣ်တဖၣ် ဃ့ထုကဖၣ်လၢ ယဟိဝၤယွၤအအိၣ် ဒ်သိးအဝဲသ့ၣ်ဆဲးမၤ ယဟိဝၤယွၤ အတၢ်ဘၣ်သး ကန့ၢ်အဂီၢ်. ဒီးယဟိဝၤယွၤ စံးဆၢအဝဲသ့ၣ် တၢ်ထုကဖၣ်.—မၤတၢ် ၄:၃၁. တၢး၂၃.၀၅ ၅ ¶၁၁-၁၂

ယဟိဝၤယွၤ ဒီးအဖိခွါယ့ၣ်ၡူးခရံာ်န့ၣ် အဝဲသ့ၣ် အိၣ်ဘၣ်တပူၤဃီဒ်သိးသိး ယံာ်န့ၢ်ဒံး ပှၤကိးဂၤဒဲး စၢၢ်တလၢၢ်. လၢအနံၣ်လၢ အကကွဲၢ်တဖၣ် အကကွဲၢ်န့ၣ် အဝဲသ့ၣ် အိၣ်လၢမူခိၣ် ဒီးအဝဲသ့ၣ် အတၢ်အဲၣ်လၢ တဂၤဒီးတဂၤအဖီခိၣ် ဂ့ၤဝဲဒိၣ်မး ဒီးအတၢ်ရ့လိာ်သးစ့ၢ်ကီး ဂၢၢ်ကျၢၤဒိၣ်မး. ဒ်လံာ်စီဆှံအဆၢလၢ တနံၤအံၤ ပာ်ဖျါဝဲအသိး ပထံၣ်ဘၣ်လၢ ယဟိဝၤယွၤ ပာ်ဖျါထီၣ်လၢ အအဲၣ်ယ့ၣ်ၡူး သပှၢ်တၢၢ်. နီၢ်ကီၢ်န့ၣ် ယဟိဝၤယွၤ မ့ၢ်တဲဝဲယိယိဖိလၢ ‘အဝဲအံၤ မ့ၢ်ပှၤလၢ ယဘၣ်သူၣ်ဘၣ်သးအီၤ’ န့ၣ်သ့. သနာ်က့ အဘၣ်သးလၢ ပကသ့ၣ်ညါလၢ အအဲၣ်အဖိခွါဒိၣ်မး အဃိ အကိးဝဲ အဖိခွါလၢ “ယဖိခွါလၢယအဲၣ်အီၤ.” ယဟိဝၤယွၤန့ၣ် အသးခုလၢ ယ့ၣ်ၡူးအဃိဒိၣ်မး ခီဖျိလၢ ယ့ၣ်ၡူးသးအိၣ် ဟ့ၣ်လီၤကွံာ်အသးသမူအဃိ. (အ့း ၁:၇) တကးဒံးဘၣ် ယ့ၣ်ၡူးသ့ၣ်ညါဝဲလၢ အပါအဲၣ်အီၤ သပှၢ်တၢၢ် ဒီးယ့ၣ်ၡူး တူၢ်ဘၣ် အပါအတၢ်အဲၣ် နီၢ်ကီၢ်ကီၢ်. အဃိ ယ့ၣ်ၡူး တဲဝဲတလီၢ်လီၢ်လၢ အပါအဲၣ်အီၤ.—ယိၤ ၃:၃၅; ၁၀:၁၇; ၁၇:၂၄. တၢး၂၄.၀၁ ၂၈ ¶၈

ဆိကမိၣ်ကွၢ် တၢ်အဒိတခါအံၤ. ပှၤလၢနသးအိၣ်အီၤတဂၤ တဲနဂ့ၢ်လၢ အတဂ့ၤဘၣ်. နသ့ၣ်ညါလၢ တၢ်လၢအတဲဝဲန့ၣ် တမ့ၢ်တတီဘၣ် သနာ်က့ ပှၤတနီၤ နာ်အီၣ်ဝဲ. ထဲန့ၣ်တကးဒံးဘၣ် ပှၤလၢအနာ်အီၣ်အီၤတဖၣ်န့ၣ် ဟးတဲဘၣ်ပှၤဂၤ ဒီးပှၤဂၤစ့ၢ်ကီး နာ်အီၣ်အီၤ. ဖဲန့ၣ်အခါ နကတူၢ်ဘၣ်ဒ်လဲၣ်. နဂ့ၢ်နကျိၤလၢ ပှၤတဲလံၣ်တဲလီဝဲန့ၣ် ကမၤဘၣ်ဒိနသး တမ့ၢ်ဧီၤ. ပမ့ၢ်ကွၢ် တၢ်အဒိတခါအံၤန့ၣ် ပနၢ်ပၢၢ် ယဟိဝၤယွၤ အတၢ်တူၢ်ဘၣ်သ့. ယဟိဝၤယွၤန့ၣ် အမူခိၣ်ကလူးတဂၤ တဲလံၣ်တဲလီဝဲအဂ့ၢ်လၢ နီၢ်အံၣ်အုအအိၣ်. ဒီးနီၢ်အံၣ်အု နာ်အီၣ်ဝဲ အတၢ်လံၣ်တၢ်လီ. ခီဖျိလၢ တၢ်လံၣ်တၢ်လီ တခါန့ၣ်အဃိ နီၢ်အံၣ်အု ဒီးစီၤအၤဒၣ် ထီဒါက့ၤယဟိဝၤယွၤ. အဃိ ပှၤဟီၣ်ခိၣ်ဖိခဲလၢာ် မၤတၢ်ဒဲးဘး ဒီးလၢခံန့ၣ် ဘၣ်သံဝဲ. (၁ မိၤ ၃:၁-၆; ရိ ၅:၁၂) တၢ်ကီတၢ်ခဲ, တၢ်သံ, တၢ်ဒုးတၢ်ယၤ ဒီးတၢ်နးတၢ်ဖှီၣ်န့ၣ် ဟဲကဲထီၣ်သး ခီဖျိလၢ မုၣ်ကီၤလံၢ် တဲလံၣ်တဲလီတၢ်အဃိ. ဘၣ်ဃးဒီး တၢ်လံၣ်တၢ်လီ ဒီးတၢ်ကီတၢ်ခဲလၢ အဟဲကဲထီၣ်သး ခီဖျိလၢ မုၣ်ကီၤလံၢ် လံၣ်တၢ်အဃိန့ၣ် ယဟိဝၤယွၤ တူၢ်ဘၣ်ဝဲ ဒ်လဲၣ်. ယဟိဝၤယွၤ တဘၣ်သးဝဲ နီတစဲးဘၣ်. သနာ်က့ ယဟိဝၤယွၤန့ၣ် တသးဒိၣ်ထီၣ်တၢ် ဒီးတသးအုးဘၣ်. အဆဲးကဲဝဲ “ကစၢ်ယွၤလၢ အသးခုတဂၤ.”—၁ တံၤ ၁:၁၁. တၢး၂၄.၀၂ ၈ ¶၁-၂

ဖဲပထံၣ်ဘၣ် တၢ်လ့ပစီအခါ ပကွၢ်လိ စီၤယိၤသး သ့ဒ်လဲၣ်. တချုးလၢ ပထံၣ်ဘၣ် တၢ်လ့ပစီဒံးဘၣ်န့ၣ် ပကဘၣ် ဆၢတဲာ်ပာ်စၢၤသး လၢခဲအံၤ. ပကဘၣ် ဟးဆှဲး တၢ်ကိးမံၤဒဲးလၢ ယဟိဝၤယွၤသးဟ့ဝဲ တဘျီဃီ ဒီးပတဘၣ် ဆိကမိၣ်အဂ့ၢ် နီတစဲးဘၣ်. (စံး ၉၇:၁၀; ၁၁၉:၁၆၅) ခီဖျိလၢ ပဆၢတဲာ်ပာ်စၢၤသးအဃိ ဖဲပထံၣ်ဘၣ် တၢ်လ့ပစီအခါ ပသးတဒ့ဒီဘၣ်. မ့မ့ၢ်နၤန့ၣ် ခီဖျိလၢ နသ့ၣ်ညါဘၣ် တၢ်မ့ၢ်တၢ်တီလံအဃိ နဘၣ်သး ဘူၣ်ထီၣ်ဘါထီၣ် ယဟိဝၤယွၤ ဒီးမၤအတၢ်မၤ လၢနသးဒီဖျၢၣ် ဘၣ်ဆၣ် ဘၣ်သ့ၣ်သ့ၣ် နဆိကမိၣ်လၢ နဟ့ၣ်လုၢ်ထီၣ်သး ဒီးဒိးဘျၢထံ တန့ၢ်ဒံးဘၣ်. နမ့ၢ်ဆိကမိၣ် ဒ်န့ၣ်န့ၣ် မၤဒ်သိး စီၤပၤဒၤဝံးမၤဝဲ ဒီးဃ့ကညး ယဟိဝၤယွၤလၢ “အိ ကစၢ်ယွၤဧၢ, ဃုကွၢ်ယၤလီၤတံၢ်လီၤဆဲး ဒီးသ့ၣ်ညါနၢ်ပၢၢ် ယသးတက့ၢ်. သမံသမိးယၤ ဒီးသ့ၣ်ညါနၢ်ပၢၢ် ယတၢ်ဆိကမိၣ်လၢ အမၤကိၢ်မၤဂီၤ ယသးန့ၣ်တက့ၢ်. မ့ၢ်တၢ်အၢ အိၣ်လၢယပူၤတမံၤမံၤဧါန့ၣ် ဃုကွၢ်တက့ၢ်. ဒီးဟံးစုနဲၣ်ကျဲယၤလၢ ကျဲလၢအအိၣ်ဝဲ လီၤထူလီၤယိာ်တက့ၢ်.” (စံး ၁၃၉:၂၃, ၂၄) ယဟိဝၤယွၤ ဆိၣ်ဂ့ၤ ပှၤလၢအဃုအီၤလၢ “တၢ်သူၣ်ဆူၣ်သးဆူၣ် အပူၤ.” အဃိ ဖဲနဂုာ်ကျဲးစၢး မၤလၢပှဲၤနဖီတၢၣ်လၢ နကဟ့ၣ်လုၢ်ထီၣ်သး ဒီးဒိးဘျၢထံအခါ နပာ်ဖျါထီၣ်လၢ နဃုယဟိဝၤယွၤ လၢတၢ်သူၣ်ဆူၣ်သးဆူၣ် အပူၤ.—ဧ့ၤ ၁၁:၆. တၢး၂၄.၀၃ ၆ ¶၁၃-၁၅

ပှၤလုၢ်တၢ်ခိၣ် အဒိၣ်ကတၢၢ်တဂၤ ဒိးန့ၢ်ဘၣ်မူဒါလၢ ကမၤတၢ်လၢ ပှၤဂီၢ်မုၢ်အခၢၣ်စး လၢကစၢ်ယွၤအမဲာ်ညါ. ပှၤအံၣ်စရ့လးဖိ အပှၤလုၢ်တၢ်ခိၣ် အဒိၣ်ကတၢၢ် လၢအမ့ၢ်စီၤအၤဟရိၣ်န့ၣ် ယဟိဝၤယွၤ ဃုထၢထီၣ်အီၤ ဖဲပှၤပာ်စီဆှံဝဲ ဒဲစီဆှံအဆၢကတီၢ်. ဘၣ်ဆၣ်တၢ်မၢဖိပီလူး ပာ်ဖျါထီၣ်ဝဲလၢ “ပှၤလုၢ်တၢ်ဒိၣ်တဖၣ် သံဝဲအဃိ အဝဲသ့ၣ် ဆဲးမၤပှၤလုၢ်တၢ်ဒိၣ် အတၢ်မၤတသ့လၢၤဘၣ်. လၢတၢ်န့ၣ်အဃိ ပှၤလုၢ်တၢ်ဒိၣ် လၢအဂၤတဖၣ် ကဘၣ်ထီၣ်လၢအလီၢ် ဒီးဆဲးမၤက့ၤတၢ်.” (ဧ့ၤ ၇:၂၃-၂၆) ဒီးပှၤလုၢ်တၢ်ခိၣ် အဒိၣ်ကတၢၢ်စ့ၢ်ကီး မ့ၢ်ဝဲပှၤတလၢတပှဲၤဘၣ်အဃိ အဘၣ်လုၢ်ထီၣ်တၢ်လၢ အနီၢ်ကစၢ် အတၢ်ဒဲးဘးအဂီၢ်. အဃိ ပှၤအံၣ်စရ့လးဖိ အပှၤလုၢ်တၢ်ခိၣ် အဒိၣ်ကတၢၢ်န့ၣ် လီၤဆီလိာ်သးဒီး ပှၤလုၢ်တၢ်ခိၣ် အဒိၣ်ကတၢၢ် လၢအမ့ၢ်ယ့ၣ်ၡူးခရံာ်န့ၣ် ဖးဒိၣ်ညါ. ပှၤလုၢ်တၢ်ခိၣ် အဒိၣ်ကတၢၢ် လၢအမ့ၢ် ယ့ၣ်ၡူးခရံာ်န့ၣ် “အဝဲမ့ၢ်ဝဲ ဒဲနီၢ်ကီၢ် အတၢ်လီၢ်စီဆှံကတၢၢ်န့ၣ် အခ့အပှၤလီၤ. ဒဲအံၤ ယဟိဝၤယွၤ သူၣ်ထီၣ်ဝဲဒီး တမ့ၢ်လၢ ပှၤဟီၣ်ခိၣ်ဖိ သူၣ်ထီၣ်ဝဲဘၣ်.” (ဧ့ၤ ၈:၁, ၂) စီၤပီလူး ပာ်ဖျါထီၣ်ဝဲလၢ “ဘၣ်ဆၣ် မ့မ့ၢ်ယ့ၣ်ၡူးန့ၣ် မူဝဲလီၤထူလီၤယိာ်အဃိ ပှၤတလိၣ်ကဲထီၣ် ပှၤလုၢ်တၢ်ဒိၣ် လၢအလီၢ်နီတဂၤဘၣ်.” စီၤပီလူး ဆဲးတဲဝဲလၢ ယ့ၣ်ၡူးန့ၣ် “အတဘၣ်အၢဘၣ်သီဘၣ်” ဒီး “အလီၤဆီဒီး ပှၤတၢ်ဒဲးဘးဖိတဖၣ်.” ဒီးယ့ၣ်ၡူးန့ၣ်တလီၤဂာ် ဒ်ပှၤလုၢ်တၢ်ခိၣ် အဒိၣ်ကတၢၢ် အဂၤတဖၣ် အသိးဘၣ်အဃိ “အဝဲတလိၣ်ဟ့ၣ်လုၢ်ထီၣ်တၢ် ကိးနံၤဒဲး” လၢအတၢ်ဒဲးဘးအဂီၢ်ဘၣ်. တၢး၂၃.၁၀ ၂၆ ¶၈-၉

တၢ်ကတိၤ လၢအမ့ၢ် “မူခိၣ်အလီၢ်လံၤ” န့ၣ်အဲၣ်ဒိးတဲဝဲ ထံကီၢ်ပဒိၣ်ပပှၢ်တဖၣ်လၢ မုၣ်ကီၤလံၢ် ဒီးအတၢ်ဝံတၢ်နါတဖၣ် ဒိၣ်စိလၢအဝဲသ့ၣ်အဖီခိၣ်. (မး ၄:၈, ၉; ၁ ယိၤ ၅:၁၉) မ့မ့ၢ် တၢ်ကတိၤ လၢအမ့ၢ် “ဟီၣ်ခိၣ်” န့ၣ်အဲၣ်ဒိးတဲဝဲ ပှၤဟီၣ်ခိၣ်ဖိခဲလၢာ်. (၁ မိၤ ၁၁:၁; စံး ၉၆:၁) အဃိ “ဟီၣ်ခိၣ်အလီၢ်လံၤ” န့ၣ်အဲၣ်ဒိးဒိလီၤဝဲ ပှၤဟီၣ်ခိၣ်ဖိလၢ အအၢအသီတဖၣ်. ပထံၣ်ဘၣ်လၢ တမ့ၢ်ထဲ ယဟိဝၤယွၤ ကမၤဂ့ၤထီၣ်က့ၤ “မူခိၣ်” ဒီး “ဟီၣ်ခိၣ်” တစဲးတမွဲးဘၣ်. အဝဲကမၤဟးဂီၤကွံာ် မူခိၣ်အလီၢ်လံၤ ဒီးဟီၣ်ခိၣ်အလီၢ်လံၤ ခဲလၢာ်ခဲဆ့. ဝံၤဘျီ အဝဲကမၤကဲထီၣ်က့ၤ “မူခိၣ်အသီ ဒီးဟီၣ်ခိၣ်အသီ” လၢအမ့ၢ် တၢ်ပၢတၢ်ပြး အသီတခါ ဒီးပှၤဟီၣ်ခိၣ်ဖိ အတီအလိၤတဖၣ်. ယဟိဝၤယွၤ ကမၤဂ့ၤထီၣ်က့ၤဟီၣ်ခိၣ် ဒီးပှၤဟီၣ်ခိၣ်ဖိ အဃိ ပှၤဟီၣ်ခိၣ်ဖိခဲလၢာ် ကကဲထီၣ်ပှၤလၢပှၤပှဲၤ. ဒ်ဝံယၡါယၤ တဲဆိပာ်စၢၤဝဲအသိး ယဟိဝၤယွၤ ကမၤဂ့ၤထီၣ်က့ၤ ဟီၣ်ခိၣ်ဒီဖျၢၣ် ဃံဃံလၤလၤ လၢအလီၤဂာ်ဒ် ဧ့ၤဒ့ၣ်တၤသၣ်ကရၢၢ်အသိး. ဒီးယဟိဝၤယွၤ ကမၤဘျါက့ၤ ဒီးကမၤဂ့ၤထီၣ်က့ၤ ပဝဲတဂၤဘၣ်တဂၤဂ့ၤဂ့ၤ. တကးဒံးဘၣ် ယဟိဝၤယွၤ ကမၤဂ့ၤထီၣ်က့ၤ ပှၤလၢအခီၣ်ဟးဂီၤ, ပှၤလၢအမဲာ်တထံၣ်တၢ်, ပှၤလၢအတနၢ်ဟူတၢ်တဖၣ် ဒီးပှၤသံတဖၣ်စ့ၢ်ကီး ယဟိဝၤယွၤ ကမၤသမူထီၣ်က့ၤအီၤ.—ၡါ ၂၅:၈; ၃၅:၁-၇. တၢး၂၃.၁၁ ၄ ¶၉-၁၀

“တၢ်နးတၢ်ဖှီၣ်ဖးဒိၣ်” ကကဲထီၣ်အသး သတူၢ်ကလာ်. (မး ၂၄:၂၁) ပသ့ၣ်ညါပာ်စၢၤလၢ တၢ်နးတၢ်ဖှီၣ်ဖးဒိၣ်ကဟဲဝဲ အဃိ အလီၤဆီဒီး န့ဆၢၣ်တၢ်ဘၣ်ဒိဘၣ်ထံးအဂၤတဖၣ်. လၢအပူၤကွံာ် ကအိၣ်လၢအနံၣ် ၂,၀၀၀ န့ၣ်ယ့ၣ်ၡူးဟ့ၣ်ပလီၢ် အပျဲၢ်အဘီၣ် လၢမုၢ်နံၤအဝဲန့ၣ်. အဃိ ပမ့ၢ်အိၣ်ကတီၤပာ်စၢၤသးလၢ မုၢ်နံၤအဝဲန့ၣ် ညီလၢပကလဲၤခီဖျိ တၢ်ကီတၢ်ခဲ ဒီးပမၤစၢၤပှၤဂၤလၢ အလဲၤခီဖျိတၢ် ကန့ၢ်စ့ၢ်ကီး. (လူၤ ၂၁:၃၆) ဒ်သိးပကဒိကနၣ် ယဟိဝၤယွၤအကလုၢ်အဂီၢ် ပကဘၣ်အိၣ်ဒီး တၢ်တူၢ်န့ၢ်ခီၣ်ကဲ ဒီးနာ်လၢ အကဒီသဒၢပှၤ. အဒိ ပဒီပုၢ်ဝဲၢ်မုၣ်ခွါတဖၣ် အဟံၣ်အဃီဒီးအတၢ်ဖိတၢ်လံၤ မ့ၢ်ဟးဂီၤကွံာ် တနီၤမ့ၢ်ဂ့ၤ ခဲလၢာ်မ့ၢ်ဂ့ၤ ပကမၤဒ်လဲၣ်. (ဃဘး ၃:၁၇, ၁၈) ပကဘၣ်အိၣ်ဒီး တၢ်သးကညီၤ ဒီးမၤစၢၤအဝဲသ့ၣ်. ပှၤကလုာ်တဖၣ် လၢအပာ်ဖှိၣ်ထီၣ်အသး မ့ၢ်ဟဲထီဒါပှၤ ဒီးပမ့ၢ်ဘၣ်အိၣ် တပူၤဃီဒီး ပဒီပုၢ်ဝဲၢ်မုၣ်ခွါ တစိၢ်တလီၢ်န့ၣ် ပကမၤဒ်လဲၣ်. (ဃ့း ၃၈:၁၀-၁၂) ဒ်သိးပလဲၤခီဖျိ တၢ်ကီတၢ်ခဲ ကန့ၢ်အဂီၢ် ပကဘၣ်အိၣ်ဒီး တၢ်အဲၣ်လၢအဂၢၢ်ကျၢၤ. တၢး၂၃.၀၇ ၂ ¶၂-၃

ပှၤဒီမိၢ်ဝၤခံဂၤ ဟံးန့ၢ်တၢ်မၤလိလၢ စီၤအကူလၤ ဒီးနီၢ်ပြံစကံးလၤ အအိၣ်သ့. စီၤအကူလၤ ဒီးနီၢ်ပြံစကံးလၤန့ၣ် ဒီပုၢ်ဝဲၢ်မုၣ်ခွါ လၢအအိၣ်ဖဲ အဝဲသ့ၣ်အစိၤန့ၣ် အဲၣ်အဝဲသ့ၣ်ဒိၣ်မး. (ရိ ၁၆:၃, ၄) အဝဲသ့ၣ်မၤသကိးတၢ်, စံၣ်တဲၤတဲလီၤတၢ် ဒီးမၤစၢၤသကိးပှၤဂၤ တပူၤဃီ. (မၤတၢ် ၁၈:၂, ၃, ၂၄-၂၆) တကးဒံးဘၣ် လၢလံာ်စီဆှံပူၤ နမ့ၢ်ဖးဘၣ် စီၤအကူလၤ ဒီးနီၢ်ပြံစကံးလၤအဂ့ၢ်န့ၣ် နကထံၣ်အဝဲသ့ၣ်ခံဂၤ အမံၤအိၣ်တပူၤဃီ ထီဘိ. နကွၢ်လိ အဝဲသ့ၣ် ကသ့ဒ်လဲၣ်. ဆိမိၣ်ကွၢ် တၢ်လၢနၤဒီးနသးသမူတံၤသကိး ကဘၣ်မၤန့ၣ် အိၣ်ဒီဒူၣ်. တၢ်မၤတနီၤန့ၣ် နမၤသကိးဒီး နသးသမူတံၤသကိးသ့ အဃိ တဘၣ်မၤထဲ နနီၢ်ကစၢ်တဂၤတဂ့ၤ. အဒိ စီၤအကူလၤ ဒီးနီၢ်ပြံစကံးလၤန့ၣ် အဝဲသ့ၣ် ဟးစံၣ်တဲၤတဲလီၤတၢ် တပူၤဃီ. အဃိ နရဲၣ်ကျဲၤပာ်စၢၤလၢ နကဟးစံၣ်တဲၤတဲလီၤတၢ် တပူၤဃီဒီး နသးသမူတံၤသကိးသ့. ဒီးစီၤအကူလၤ ဒီးနီၢ်ပြံစကံးလၤန့ၣ် အဝဲသ့ၣ်မၤသကိးတၢ် တပူၤဃီ. ဘၣ်သ့ၣ်သ့ၣ် နၤဒီးနသးသမူတံၤသကိး တၢ်ဖံးတၢ်မၤ တဒ်သိးဘၣ် သနာ်က့ နမၤသကိး ဟံၣ်ဃီတၢ်ဖံးတၢ်မၤ တပူၤဃီသ့. (စံၣ် ၄:၉) နၤဒီးနသးသမူတံၤသကိး မ့ၢ်မၤစၢၤလိာ်သးန့ၣ် လီၤဂာ်ဒ်သိးဒီး သုမၤသကိးတၢ် တပူၤဃီ. တကးဒံးဘၣ် သုအိၣ်ဒီး တၢ်ဆၢကတီၢ်လၢ သုကတဲသကိးတၢ်. တၢး၂၃.၀၅ ၂၂-၂၃ ¶၁၀-၁၂

တဘျီတခီၣ် ပဝဲကိးဂၤဒဲးန့ၣ် ပပျံၤတၢ်. အဒိ ဖဲစီၤပၤစီလူး ဂုာ်ကျဲးစၢး လူၤမၤသံ စီၤဒၤဝံးအခါ စီၤဒၤဝံး ပာ်လီၤအသးလၢ အကလဲၤဃ့ၢ်ပူၤဖျဲးအသးလၢ ဝ့ၢ်ကၤသး လၢအမ့ၢ် ပှၤဖလ့ၡသးဖိအဝ့ၢ်. တယံာ်ဘၣ်ဒီး ဝ့ၢ်ကၤသး အစီၤပၤအၤကံၣ် သ့ၣ်ညါဘၣ်ဝဲလၢ စီၤဒၤဝံးန့ၣ် အကဲပှၤသုးဖိလၢ အမၤသံဝဲ ပှၤဖလ့ၡသးဖိ “လၢအကလးတဖၣ်.” အဃိ စီၤဒၤဝံး “ပျံၤ . . . စီၤပၤအၤကံၣ် ဒိၣ်မး.” (၁ မူၤ ၂၁:၁၀-၁၂) ဒီးစီၤဒၤဝံး ဘၣ်ယိၣ်ဝဲလၢ စီၤပၤအၤကံၣ် ကမၤအီၤတမံၤမံၤ. စီၤဒၤဝံး ပျံၤတၢ်သနာ်က့ ဒ်သိးအကအိၣ်ဒီး တၢ်သးဒူအဂီၢ် တၢ်မနုၤမၤစၢၤအီၤလဲၣ်. စံးထီၣ်ပတြၢၤ ၅၆ ပာ်ဖျါထီၣ်ဝဲ စီၤဒၤဝံးအတၢ်တူၢ်ဘၣ် ဖဲအအိၣ်လၢ ဝ့ၢ်ကၤသးအခါ. ဖဲထါစံးထီၣ်ပတြၢၤတယုၢ်န့ၣ် စီၤဒၤဝံး တဲဖျါထီၣ်တၢ်ဂ့ၢ်လၢ ဘၣ်မနုၤအဃိ အပျံၤတၢ်လဲၣ် ဒီးဒ်သိးအတပျံၤတၢ်လၢၤတဂ့ၤအဂီၢ် တၢ်မနုၤမၤစၢၤအီၤလဲၣ်. ဖဲစီၤဒၤဝံးပျံၤတၢ်အခါ အနာ်န့ၢ် ယဟိဝၤယွၤ. (စံး ၅၆:၁-၃, ၁၁) စီၤဒၤဝံး နာ်န့ၢ် ယဟိဝၤယွၤန့ၣ် ကဲဘျုးလၢအဂီၢ် ဖးဒိၣ်ညါ. ဒီးခီဖျိလၢ ယဟိဝၤယွၤ မၤစၢၤအီၤအဃိ စီၤဒၤဝံးမၤဝဲ တၢ်လၢအလီၤကမၢကမၣ် ဖးဒိၣ်တမံၤခီဖျိ အပာ်မၤအသး ဒ်ပှၤပျုၢ်တဂၤအသိး. တဘျီအံၤ စီၤပၤအၤကံၣ် တထံၣ်စီၤဒၤဝံး ဒ်သိးဒီး ပှၤလၢအလီၤဘၣ်ယိၣ်တဂၤလၢၤဘၣ် ဒီးအဘၣ်သးလၢ စီၤဒၤဝံး ကဟးထီၣ်ကွံာ်လၢ အဝ့ၢ်ပူၤအဃိ စီၤဒၤဝံး အသးသမူပူၤဖျဲးဝဲ.—၁ မူၤ ၂၁:၁၃–၂၂:၁. တၢး၂၄.၀၁ ၂ ¶၁-၃

လံာ်စီဆှံအဆၢလၢ တနံၤအံၤ အဂီၢ်န့ၣ် တဲဘၣ်ဃးဒီး မတဂၤလဲၣ်. တဲဘၣ်ဃးဒီး ပှၤဘၣ်တၢ်ဒိးဖှူအီၤ လၢအဂဲၤဆၢထၢၣ် သမူထီၣ်က့ၤတဖၣ်. အဃိ ဖဲတၢ်နးတၢ်ဖှီၣ်ဖးဒိၣ် ဘူးကဝံၤ ဒီးဖဲပှၤဘၣ်တၢ်ဒိးဖှူအီၤ လၢအအိၣ်တ့ၢ်ဒံးလၢ ဟီၣ်ခိၣ်ချၢတဖၣ် ဘၣ်တၢ်ဟံးထီၣ်အီၤ ဆူမူခိၣ်အခါ အဝဲသ့ၣ် အမူဒါအဆိကတၢၢ်န့ၣ်မ့ၢ်ဝဲ အကဘၣ်ဒုးတၢ်. ဘၣ်ဆၣ် ဖဲအဝဲသ့ၣ် ဂဲၤဆၢထၢၣ် သမူထီၣ်က့ၤလၢ မူခိၣ်ဝံၤအလီၢ်ခံ အဝဲသ့ၣ် ကမၤသကိးတၢ်ဒီး ယ့ၣ်ၡူးခရံာ် ဒီးအမူခိၣ်ကလူးတဖၣ် ဒီးအဝဲသ့ၣ် ကဒုးဝဲ ကစၢ်ယွၤအဒုၣ်အဒါ ဖဲတၢ်ဒုးအလီၢ်ခံကတၢၢ်တခါ. ဆိကမိၣ်ကွၢ် တၢ်ဂ့ၢ်တထံၣ်အံၤ. ဖဲခရံာ်ဖိလၢ အဘၣ်တၢ်ဒိးဖှူအီၤတဖၣ် အိၣ်ဒံးလၢ ဟီၣ်ခိၣ်ချၢအခါ အဝဲသ့ၣ်တနီၤန့ၣ် အသးပှၢ် ဒီးအဂံၢ်အဘါတအိၣ်ဘၣ်. ဘၣ်ဆၣ် ဖဲအဝဲသ့ၣ် ဂဲၤဆၢထၢၣ် သမူထီၣ်က့ၤ လၢမူခိၣ်အခါ အဝဲသ့ၣ် ကကဲထီၣ် ပှၤနီၢ်သးဖိလၢ အဂံၢ်အဘါဆူၣ် လၢအသံတသ့ဘၣ် ဒီးအဝဲသ့ၣ် ကန့ၢ်ဘၣ်မူဒါလၢ ကဒုးသကိးတၢ်ဒီး ယ့ၣ်ၡူးခရံာ် လၢအမ့ၢ်စီၤပၤ. ဒီးဖဲအၢ်မက့းဒိၣ်တၢ်ဒုး ဝံၤအလီၢ်ခံ အဝဲသ့ၣ် ကမၤသကိးတၢ်ဒီးယ့ၣ်ၡူး ဒီးမၤစၢၤပှၤဟီၣ်ခိၣ် ဒ်သိး ပှၤဟီၣ်ခိၣ်ဖိ ကကဲထီၣ် ပှၤလၢပှၤပှဲၤအဂီၢ်. ပသ့ၣ်ညါဘၣ်လၢ ဖဲအဝဲသ့ၣ်အိၣ်လၢ ဟီၣ်ခိၣ်ချၢအခါ အဝဲသ့ၣ် တကဲပှၤလၢပှၤပှဲၤဘၣ် သနာ်က့ အဝဲသ့ၣ် မၤစၢၤဘၣ် ဒီပုၢ်ဝဲၢ်မုၣ်ခွါအါမး. အဃိ ဖဲအဝဲသ့ၣ် အိၣ်လၢမူခိၣ်အခါ အဝဲသ့ၣ် မၤစၢၤ ဒီပုၢ်ဝဲၢ်မုၣ်ခွါ လၢဟီၣ်ခိၣ်ချၢ ကသ့အါန့ၢ်အန့ၣ် စၢၢ်တလၢၢ်ဒံး. တၢး၂၄.၀၂ ၆-၇ ¶၁၅-၁၆

ပှၤတနီၤ ဟ့ၣ်လုၢ်ထီၣ်သး ဒီးဒိးဘျၢထံန့ၢ်လံ ဘၣ်ဆၣ် အဝဲသ့ၣ် မၤယံာ်မၤနီၢ်သးဒံး. အဝဲသ့ၣ် ဘၣ်ယိၣ်ဝဲလၢ အဒိးဘျၢထံမ့ၢ်ဝံၤ ဒီးအမ့ၢ်မၤကမၣ်တၢ်ဖးဒိၣ်န့ၣ် ပှၤကထုးထီၣ်ကွံာ်အီၤလၢ တၢ်အိၣ်ဖှိၣ်ပူၤ. ဘၣ်သ့ၣ်သ့ၣ် နကဘၣ်ယိၣ်ဒ်န့ၣ်, ဘၣ်ဆၣ် ဒ်သိး “[န] ကအိၣ်မူ ဒ်ပှၤလၢအကြၢးဝဲဘၣ်ဝဲဒီး ယဟိဝၤယွၤ, မၤတၢ်ဘၣ်အသးလၢ တၢ်ခဲလၢာ်အပူၤ” အဂီၢ် နကဘၣ်နာ် သပှၢ်တၢၢ်လၢ ယဟိဝၤယွၤ ကမၤစၢၤနၤ. (ကလီး ၁:၁၀) တကးဒံးဘၣ် ဒ်ယဟိဝၤယွၤ မၤစၢၤတ့ၢ် ပှၤအါဂၤလၢ ကမၤတၢ်လၢအဘၣ်အသိး ယဟိဝၤယွၤ ကမၤစၢၤနၤဒ်သိး နကမၤတၢ်လၢအဘၣ်စ့ၢ်ကီး. (၁ ကရံၣ် ၁၀:၁၃) ဒီးခီဖျိလၢ ယဟိဝၤယွၤ မၤစၢၤအပှၤဂီၢ်မုၢ်ဒ်သိး အဝဲသ့ၣ် ကဆဲးတီဒီးအီၤအဃိ ပှၤလၢအဘၣ်တၢ်ထုးထီၣ်ကွံာ်အီၤလၢ တၢ်အိၣ်ဖှိၣ်ပူၤန့ၣ် တအိၣ်အါအါဘၣ်. ပတကဲ ပှၤလၢပှၤပှဲၤဘၣ်အဃိ ပမၤကမၣ်တၢ်. (ယၤ ၁:၁၄) ဘၣ်ဆၣ် ဖဲပထံၣ်ဘၣ် တၢ်လ့ပစီလၢ ပကမၤကမၣ်တၢ်အခါ ပကမၤဧါ တမၤဧါန့ၣ် တၢ်ဆၢတဲာ် အိၣ်လၢပစုပူၤ. နီၢ်ကီၢ်န့ၣ် ပကအိၣ်မူဒ်လဲၣ် ဒီးပကမၤမနုၤလဲၣ်န့ၣ် အကဲဝဲ ပနီၢ်ကစၢ် တၢ်ဃုထၢ. ပှၤတနီၤတဲဝဲလၢ ဒ်သိးပတမၤထွဲ တၢ်သူၣ်လီသးကွံ လၢအကမၣ်တဂ့ၤအဂီၢ် ပပၢၤပသးတန့ၢ်ဘၣ်. ဘၣ်ဆၣ် တၢ်လၢအဝဲသ့ၣ် တဲဝဲန့ၣ် တဘၣ်ဘၣ်, ပပၢၤပသးသ့. တၢး၂၄.၀၃ ၅ ¶၁၁-၁၂