လါအီးကထိဘၢၣ်

တဘျီတခီၣ် နကဒိကနၣ်တၢ်အဂီၢ် အကီဧါ. စီၤပၤဒၤဝံးစ့ၢ်ကီး တူၢ်ဘၣ်ဝဲဒ်န့ၣ်အဃိ အဃ့ထုကဖၣ်လၢ ကစၢ်ယွၤအအိၣ် ဒီးတဲဝဲလၢ “ထိၣ်ဟူးထိၣ်ဂဲၤထီၣ်ယသး ဒ်သိးယကသးအိၣ် ဒိကနၣ်နကလုၢ်တက့ၢ်.” (စံး ၅၁:၁၂) စီၤဒၤဝံး အဲၣ်ယဟိဝၤယွၤ ဘၣ်ဆၣ် အကဒိကနၣ် ယဟိဝၤယွၤ အကလုၢ်န့ၣ် တဘျီတခီၣ် တညီလၢအဂီၢ်ဘၣ်. ပဝဲစ့ၢ်ကီး ပလီၤဂာ်ဒ်သိးဒီး စီၤဒၤဝံးလီၤ. ဘၣ်မနုၤအဃိလဲၣ်. တၢ, ခီဖျိလၢ ပတလၢတပှဲၤဘၣ်အဃိ တဘျီတခီၣ် ပတအဲၣ်ဒိး ဒိကနၣ်တၢ်ဘၣ်. ခံ, မုၣ်ကီၤလံၢ် ကျဲးစၢးဝဲထီဘိ ဒ်သိးပကထီဒါက့ၤ ယဟိဝၤယွၤ. (၂ ကရံၣ် ၁၁:၃) သၢ, ပအိၣ်မူဘၣ်လၢ ပှၤလၢအတၢ်ပာ်သူၣ်ပာ်သး လီၤဂာ်ဒ်သိးဒီး ဟီၣ်ခိၣ်အခိၣ်တဂၤ “မၤတၢ်လၢ ဆၢကတီၢ်ခဲအံၤလၢ ပှၤလၢ အတဒိကနၣ်တၢ်တဖၣ် အသးပူၤ.” (အ့း ၂:၂) အဃိ ဒ်သိး ပတမၤတၢ်ဒဲးဘးတဂ့ၤ ဒီးပကမၤနၢၤကွံာ် ပတၢ်ဂံၢ်စၢ်ဘါစၢ်အဂီၢ် ပကဘၣ် ကျဲးစၢးဆူၣ်ဆူၣ်. တကးဒံးဘၣ် မုၣ်ကီၤလံၢ် ဒီးပှၤဟီၣ်ခိၣ်ဖိတဖၣ် ဆီၣ်သနံးပှၤလၢ ပကထီဒါက့ၤတၢ် ဒီးပတဒိကနၣ်တၢ်တဂ့ၤ. အဃိ ပကဘၣ်ကျဲးစၢး တြီဆၢစ့ၢ်ကီး အဝဲသ့ၣ် အတၢ်ဆီၣ်သနံး. ပကဘၣ်ကျဲးစၢး ဆူၣ်ဆူၣ်ဒ်သိး ပကဒိကနၣ် ယဟိဝၤယွၤအကလုၢ် ဒီးပှၤလၢယဟိဝၤယွၤ ဟ့ၣ်အီၤတၢ်စိတၢ်ကမီၤတဖၣ် အကလုၢ်. တၢး၂၃.၁၀ ၆ ¶၁

ယ့ၣ်ၡူးမၤကဲထီၣ်ထံလၢ စပံးထံန့ၣ် ပန့ၢ်ဘၣ်တၢ်မၤလိဒ်လဲၣ်. ပမၤလိန့ၢ်ဘၣ် တၢ်ဆီၣ်လီၤသး. ယ့ၣ်ၡူးတပာ်ထီၣ်ထီသးလၢ အမၤတၢ်လီၤလးသ့အဃိဘၣ်. အမၤတၢ်မ့ၢ်ကဲထီၣ် တမံၤမံၤနာ်က့ အတပတြၢၤလီၤအသး နီတဘျီဘၣ်. ယ့ၣ်ၡူးပာ်ဖျါထီၣ် တၢ်ဆီၣ်လီၤသး ဒီးဟ့ၣ်တၢ်လၤကပီၤခဲလၢာ်လၢ အပါအအိၣ်ထီဘိ. (ယိၤ ၅:၁၉, ၃၀; ၈:၂၈) ပမ့ၢ်ကွၢ်လိ ယ့ၣ်ၡူးန့ၣ် ပကဆီၣ်လီၤသး ဒီးပမၤတၢ်မ့ၢ်ကဲထီၣ် တမံၤမံၤန့ၣ် ပတတဲဂ့ၤလီၤပသး ဒ်သိးပှၤကထံၣ်ဒိၣ်ပှၤအဂီၢ်ဘၣ်. ပတဘၣ် ပတြၢၤလီၤပသးဘၣ်, ဘၣ်ဆၣ် ပကဘၣ်ပတြၢၤလၢ ယဟိဝၤယွၤဟီ. (ယံး ၉:၂၃, ၂၄) ယဟိဝၤယွၤ မ့ၢ်တမၤစၢၤပှၤဘၣ်န့ၣ် ပမၤတၢ် တကဲထီၣ်နီတမံၤဘၣ်. အဃိ ဖဲပမၤတၢ်ကဲထီၣ် တမံၤဂ့ၤတမံၤဂ့ၤန့ၣ် ပကဘၣ်ဟ့ၣ် တၢ်လၤကပီၤ ခဲလၢာ်လၢ ယဟိဝၤယွၤအအိၣ်. (၁ ကရံၣ် ၁:၂၆-၃၁) ပမ့ၢ်အိၣ်ဒီးတၢ်ဆီၣ်လီၤသးန့ၣ် ဖဲပမၤစၢၤပှၤဂၤလၢ အမၤတၢ်ကဲထီၣ် တမံၤမံၤအခါ ပတပတြၢၤလီၤ ပနီၢ်ကစၢ်သးဘၣ်. ပသ့ၣ်ညါလၢ ယဟိဝၤယွၤထံၣ်ဝဲ ဒီးပာ်လုၢ်ပာ်ပှ့ၤ တၢ်လၢပမၤအဃိ ပသးခုလံ. (ထိၣ်သတြီၤဒီး မးသဲ ၆:၂-၄; ဧ့ၤ ၁၃:၁၆) ပမ့ၢ်ကွၢ်လိ ယ့ၣ်ၡူး ဒီးအိၣ်ဒီး တၢ်ဆီၣ်လီၤသးန့ၣ် ပသ့ၣ်ညါလၢ ယဟိဝၤယွၤ ကသးခုနီၢ်ကီၢ်.—၁ ပ့း ၅:၆. တၢး၂၃.၀၄ ၄ ¶၉; ၅ ¶၁၁-၁၂

တၢ်မၢဖိပီလူး ဟ့ၣ်ကူၣ်ပှၤလၢ ပကဆိကမိၣ်န့ၢ်တၢ်လၢ ပှၤဂၤအဂီၢ်. အဃိ ဖဲပထီၣ်တၢ်အိၣ်ဖှိၣ်အခါ ပမၤထွဲ တၢ်ဟ့ၣ်ကူၣ်အံၤ ကသ့ဒ်လဲၣ်. ပကဘၣ်နီၣ်ထီၣ်လၢ ပမ့ၢ်ဘၣ်သးစံးဆၢတၢ်န့ၣ် ပှၤဂၤစ့ၢ်ကီး ဘၣ်သးစံးဆၢတၢ်စ့ၢ်ကီး. အဒိ ဆိမိၣ်ကွၢ်ဒ်အံၤ. ဖဲနတဲတၢ်ဒီး နသကီးအခါ နဘၣ်သးတဲတၢ် တဂၤလီၤဧါ. နတဘၣ်သးမၤ ဒ်န့ၣ်ဘၣ်. နဘၣ်သးလၢ အကတဲတၢ်စ့ၢ်ကီး. ဒ်န့ၣ်အသိး လၢတၢ်အိၣ်ဖှိၣ်စ့ၢ်ကီး ပဘၣ်သးနၢ်ဟူလၢ ပဒီပုၢ်ဝဲၢ်မုၣ်ခွါအါဂၤ ကစံးဆၢတၢ်. အဃိ ပဟ့ၣ်ဂံၢ်ဟ့ၣ်ဘါ အဝဲသ့ၣ်သ့ခီဖျိ ပဟ့ၣ်အဝဲသ့ၣ် တၢ်ခွဲးတၢ်ယာ်လၢ ကတဲဖျါထီၣ် အတၢ်နာ်. (၁ ကရံၣ် ၁၀:၂၄) အဃိ ပကဘၣ် စံးဆၢတၢ်ဖုၣ်ဖုၣ်ဖိ. နမ့ၢ်ဟ့ၣ် တၢ်စံးဆၢဖုၣ်ဖုၣ်ဖိနာ်က့ တဘၣ်တဲဖျါထီၣ် တၢ်ဂ့ၢ်ကီးထံၣ်ဒဲးတဂ့ၤ. နမ့ၢ်တဲဖျါထီၣ် တၢ်ဂ့ၢ်ကီးထံၣ်ဒဲးလၢ လံာ်အဆၢအပူၤန့ၣ် ဘၣ်သ့ၣ်သ့ၣ် ပှၤဂၤတစံးဆၢဘၣ်တၢ်လၢၤဘၣ်. တၢး၂၃.၀၄ ၂၂-၂၃ ¶၁၁-၁၃

ဖဲပတၢ်အိၣ်သးဆီတလဲအခါ ပကဘၣ်နီၣ်ဘၣ်လၢ အရ့ဒိၣ်လၢ ပကမၤစၢၤပှၤဂၤ ခီဖျိပစံၣ်တဲၤတဲလီၤအဝဲသ့ၣ်. လၢတၢ်စံၣ်တဲၤတဲလီၤ တၢ်မၤအပူၤန့ၣ် ပကဘၣ်အိၣ်ဒီး တၢ်ထံၣ်အကြၢးအဘၣ်. ဖဲပလဲၤစံၣ်တဲၤတဲလီၤတၢ်အခါ ပကထံၣ်ဘၣ်ဒီး ပှၤလၢအတၢ်စူၢ်တၢ်နာ်, အတၢ်ပာ်သူၣ်ပာ်သး ဒီးအဒိၣ်ထီၣ်တၢ်လီၢ် လီၤဆီလိာ်သး. တၢ်မၢဖိပီလူးအိၣ်ဒီး တၢ်ထံၣ်အကြၢးအဘၣ် ဒီးပမၤလိန့ၢ်တၢ်လၢ အအိၣ်သ့. ပသ့ၣ်ညါဘၣ်လၢ ယ့ၣ်ၡူးဃုထၢ စီၤပီလူးဒ် “တၢ်မၢဖိလၢ ပှၤကလုာ်တဖၣ်အဂီၢ်.” (ရိ ၁၁:၁၃) အဃိ စီၤပီလူး စံၣ်တဲၤတဲလီၤဝဲ ပှၤအကလုာ်ကလုာ် ဒ်သိးဒီး ပှၤယူဒၤဖိ, ပှၤကြံးဖိ, ပှၤလၢအအိၣ်ဒီး တၢ်ကူၣ်ဘၣ်ကူၣ်သ့, ပှၤမုၢ်ဆ့ၣ်မုၢ်ဂီၤဖိ, ပဒိၣ်ဒီးစီၤပၤတဖၣ်. ဒ်သိးစီၤပီလူးကထုးန့ၢ် ပှၤတဖၣ်အံၤ အသးအဂီၢ် စီၤပီလူး “ကဲထီၣ် တၢ်ခဲလၢာ်လၢ ပှၤအကလုာ်ကလုာ်အဂီၢ်.” (၁ ကရံၣ် ၉:၁၉-၂၂) ဒီးဒ်သိးစီၤပီလူး ကစံၣ်တဲၤတဲလီၤ ပှၤတဖၣ်အံၤအဂီၢ် အဆိမိၣ်ထံဝဲ အဝဲသ့ၣ် ဒိၣ်ထီၣ်တၢ်လီၢ်, အတၢ်ဆဲးတၢ်လၤ ဒီးအတၢ်စူၢ်တၢ်နာ်အဂ့ၢ် လီၤတံၢ်လီၤဆဲး. ခီဖျိလၢ စီၤပီလူး ဆိမိၣ်ထံဝဲ တၢ်ဂ့ၢ်တဖၣ်အံၤအဃိ အအိၣ်ဒီး တၢ်ထံၣ်အကြၢးအဘၣ် ဒီးအမၤစၢၤဘၣ်ပှၤဂၤ ဒ်သိးပှၤကတူၢ်လိာ် ကစၢ်ယွၤကလုၢ်ကထါ. ပဝဲစ့ၢ်ကီး ဖဲပစံၣ်တဲၤတဲလီၤတၢ်အခါ ပမ့ၢ်အိၣ်ဒီး တၢ်ထံၣ်အကြၢးအဘၣ် ဒီးကျဲးစၢး မၤစၢၤ ပှၤတဂၤဘၣ်တဂၤ လၢအဂ့ၤကတၢၢ်န့ၣ် ပတၢ်စံၣ်တဲၤတဲလီၤ ကကဲဘျုးဒိၣ်ထီၣ်. တၢး၂၃.၀၇ ၂၃ ¶၁၁-၁၂

တၢ်သးစူၤန့ၣ် အကဲဝဲ တၢ်ဂံၢ်တၢ်ဘါတခါ ဒီးတမ့ၢ် တၢ်ဂံၢ်စၢ်ဘါစၢ် တခါဘၣ်. ဖဲပထံၣ်ဘၣ် တၢ်အိၣ်သးလၢ အမၤတံာ်တာ်ပသးအခါ ပမ့ၢ်အိၣ်ဒီး တၢ်သးစူၤန့ၣ် ပပာ်သးမုာ်မုာ်သ့. ဒီးတၢ်ဂ့ၤတၢ်ဝါလၢအမ့ၢ် တၢ်သးစူၤန့ၣ် အပၣ်ဃုာ်လၢ “သးစီဆှံအတၤသၣ်” အကျါ. (ကလၤ ၅:၂၂, ၂၃) ကြံးအတၢ်ကတိၤ လၢအမ့ၢ် “တၢ်သူၣ်စူၤသးစူၤ” န့ၣ်တဘျီတခီၣ် အဲၣ်ဒိးတဲဝဲ အခီပညီ လီၤဂာ်ဒ်သိးဒီး ကသ့ၣ်မံၤလၢ ပှၤမၤဘှါအီၤတဒု. ထံၣ်တမှံကွၢ်လၢ ကသ့ၣ်မံၤတဒုအံၤ အဘှါဘၣ်ဆၣ် အဂံၢ်အဘါ တစၢ်ဘၣ်. မ့မ့ၢ်ပဝဲ ပှၤဟီၣ်ခိၣ်ဖိမီၤ. ပမၤအိၣ်ထီၣ် တၢ်သးစူၤ ဒီးဆဲးအိၣ်ဒီး တၢ်ဂံၢ်တၢ်ဘါထီဘိ ကသ့ဒ်လဲၣ်. ပမၤလၢ ပနီၢ်ကစၢ်ဂံၢ်ဘါ တသ့ဘၣ်. အဃိ ပကဘၣ်ဃ့ ကစၢ်ယွၤ အသးစီဆှံ ဒီးဃ့အီၤလၢ အကမၤစၢၤပှၤဒ်သိး ပကမၤအိၣ်ထီၣ် တၢ်သးစူၤ. ပထံၣ်ဘၣ် ပှၤအါဂၤ အတၢ်လဲၤခီဖျိ လၢအကဲထီၣ် ပှၤလၢအသးစူၤ အိၣ်ဝဲအါမး. အဒိ ဖဲပှၤဂၤတဲအါတၢ်ဒီး ပဒီပုၢ်ဝဲၢ်မုၣ်ခွါအခါ ပဒီပုၢ်ဝဲၢ်မုၣ်ခွါအါဂၤန့ၣ် ပာ်ဖျါထီၣ် တၢ်သးစူၤ. ဒီးခီဖျိလၢ ပဒီပုၢ်ဝဲၢ်မုၣ်ခွါ အိၣ်ဒီးတၢ်သးစူၤအဃိ ကဲထီၣ်တၢ်အုၣ်သးအဂ့ၤ လၢပှၤအါဂၤအဂီၢ်.—၂ တံၤ ၂:၂၄, ၂၅. တၢး၂၃.၀၉ ၁၅ ¶၃

တၢ်မၢဖိယိၤဟၣ်ထံၣ်ဝဲ တၢ်ထံၣ်လၢညါခီလၢ ပှၤသူၣ်က့သးပှၢ် ၂၄ ဂၤလၢ အအိၣ်လၢမူခိၣ်န့ၣ် ဘူၣ်ထီၣ်ဘါထီၣ်ဝဲ ယဟိဝၤယွၤ. အဝဲသ့ၣ်စံးထီၣ်ပတြၢၤ ကစၢ်ယွၤ ဒီးအဝဲသ့ၣ်သ့ၣ်ညါဝဲလၢ ကစၢ်ယွၤန့ၣ် ကြၢးဒိးန့ၢ်ဘၣ် “တၢ်လၤတၢ်ကပီၤ, တၢ်ယူးယီၣ် ဒီးတၢ်စိတၢ်ကမီၤ.” (လီၣ် ၄:၁၀, ၁၁) မူခိၣ်ကလူး လၢအသးတီတဖၣ်စ့ၢ်ကီး အိၣ်ဒီးတၢ်ခွဲးတၢ်ယာ်အါမးလၢ ကစံးထီၣ်ပတြၢၤ ဒီးမၤလၤကပီၤ ယဟိဝၤယွၤ. အဝဲသ့ၣ်အိၣ်ဒီး ယဟိဝၤယွၤလၢမူခိၣ် ဒီးအသ့ၣ်ညါ ယဟိဝၤယွၤအဂ့ၢ်ဂ့ၤဂ့ၤ. တကးဒံးဘၣ် အဝဲသ့ၣ်ထံၣ်ဘၣ် ယဟိဝၤယွၤ အတၢ်ဂ့ၤတၢ်ဝါ ခီဖျိတၢ်လၢ ယဟိဝၤယွၤမၤဝဲ. အဃိ တၢ်လၢအဝဲသ့ၣ်ထံၣ်ဘၣ်ဝဲန့ၣ် မၤဆူၣ်ထီၣ်အသးလၢ အဝဲသ့ၣ် ကစံးထီၣ်ပတြၢၤ ယဟိဝၤယွၤ. (ဘး ၃၈:၄-၇) ပဝဲစ့ၢ်ကီး ဖဲပဃ့ထုကဖၣ်အခါ ပကဘၣ်စံးထီၣ်ပတြၢၤ ယဟိဝၤယွၤ. ပစံးထီၣ်ပတြၢၤ ယဟိဝၤယွၤ သ့ခီဖျိ ပတဲဘၣ်အီၤလၢ ပအဲၣ်အီၤ ဒီးစံးဘျုးအီၤလၢ တၢ်လၢအမၤန့ၢ်ပှၤ. ဖဲနဖးဒီးမၤလိလံာ်စီဆှံအခါ ဆိမိၣ်ထံ ယဟိဝၤယွၤ အတၢ်ဂ့ၤတၢ်ဝါ တခါခါလၢ နဘၣ်သးကွၢ်လိ ဒီးမၤထွဲအီၤ. (ဘး ၃၇:၂၃; ရိ ၁၁:၃၃) ဝံၤဒီး တဲဘၣ်ယဟိဝၤယွၤလၢ နဘၣ်သူၣ်ဘၣ်သး အတၢ်ဂ့ၤတၢ်ဝါတဖၣ်ဒိၣ်မး. တကးဒံးဘၣ် ယဟိဝၤယွၤန့ၣ် အမၤစၢၤပှၤ ဒီးပဒီပုၢ်ဝဲၢ်မုၣ်ခွါ လၢဟီၣ်ခိၣ်ချၢဒီဘ့ၣ်ညါ အဃိ ပကဘၣ် စံးထီၣ်ပတြၢၤအီၤ.—၁ မူၤ ၂:၁, ၂. တၢး၂၃.၀၅ ၃-၄ ¶၆-၇

လၢညါန့ၣ် ဘၤဘူၤလိၣ်ဖးဒိၣ် ဒိၣ်စိစ့ၢ်ကီးလၢ ကစၢ်ယွၤ အပှၤဂီၢ်မုၢ်အဖီခိၣ်. ဘၣ်ဆၣ်ဖဲ ၁၉၁၉ နံၣ်န့ၣ် “ကုၢ်လၢအတီ ဒီးအကူၣ်တၢ်သ့” သ့ၣ်ညါထီၣ်ဝဲလၢ တၢ်ဆၢကတီၢ်ဘၣ်လံလၢ အဝဲသ့ၣ် ကဘၣ်မၤစၢၤ ပှၤလၢအသးဘျၢတဖၣ်လၢ ကလဲၤတၢ်လၢ “ကျဲစီဆှံ” အပူၤ. (မး ၂၄:၄၅-၄၇; ၡါ ၃၅:၈) ခီဖျိလၢ ပှၤသးတီလၢညါတဖၣ် ကတဲာ်ကတီၤပာ်စၢၤကျဲအဃိ ပှၤအါဂၤစးထီၣ်လဲၤတၢ်လၢ ကျဲမုၢ်ဖးဒိၣ်တဘိအံၤ ဒီးအဝဲသ့ၣ် သ့ၣ်ညါအါထီၣ် ယဟိဝၤယွၤ ဒီးအတၢ်တိာ်ပာ်အဂ့ၢ်. (ကတိၤ ၄:၁၈) တကးဒံးဘၣ် အဝဲသ့ၣ်အိၣ်မူဒ်သိး ယဟိဝၤယွၤ အတၢ်ဘၣ်သး. ယဟိဝၤယွၤ သ့ၣ်ညါဝဲလၢ အခ့အပှၤတဖၣ် ဆီတလဲသးတဘျီဃီခဲလၢာ်တသ့ဘၣ်. အဃိ အဟ့ၣ်အခ့အပှၤတဖၣ် တၢ်ဆၢကတီၢ်လၢ ကဆီတလဲထီၣ်သး ကယီကယီ. ဒီးပသ့ၣ်ညါလၢ ပမ့ၢ်မၤယဟိဝၤယွၤ အတၢ်ဘၣ်သးလၢ တၢ်ကိးမံၤဒဲးန့ၣ် ပကသးခုဒိၣ်မး. ကျဲကိးဘိဒဲးန့ၣ် ပှၤဘၣ်ကွၢ်ထွဲ ဒီးမၤဂ့ၤထီၣ်အီၤထီဘိ. စးထီၣ်လၢ ၁၉၁၉ နံၣ်န့ၣ် ပှၤမၤဂ့ၤထီၣ်ဝဲ “ကျဲစီဆှံ” တဘိအံၤ ဒ်သိးပှၤအါဂၤ ကဆဲးဟးထီၣ်ကွံာ်လၢ ဘၤဘူၤလိၣ်ဖးဒိၣ်အပူၤ ဒီးလဲၤတၢ်လၢ ကျဲတဘိအံၤ. တၢး၂၃.၀၅ ၁၇ ¶၁၅; ၁၉ ¶၁၆

ပှၤပၢဆှၢတၢ်ကမံးတံာ် အနီၢ်ကစၢ်ဒၣ်ဝဲ သိၣ်လိပာ်စၢၤ ကမံးတံာ် အပှၤမၤစၢၤတၢ်တဖၣ် လၢအမၤတၢ်လၢ ကမံးတံာ်အကလုာ်ကလုာ်. ခဲအံၤန့ၣ် ကမံးတံာ် အပှၤမၤစၢၤတၢ်တဖၣ်အံၤ အိၣ်ဒီးမူဒါအါမး. ဒီးခါဆူညါ ဖဲပှၤဘၣ်တၢ်ဒိးဖှူအီၤတဖၣ် ဘၣ်တၢ်ဟံးထီၣ်အီၤ ဆူမူခိၣ် ဝံၤအလီၢ်ခံ ကမံးတံာ် အပှၤမၤစၢၤတၢ်တဖၣ်အံၤ ကဆဲးကွၢ်ထွဲ ယ့ၣ်ၡူးခရံာ် အသိဖိတဖၣ်ဒံး. ဖဲတၢ်နးတၢ်ဖှီၣ်ဖးဒိၣ် ဘူးကဝံၤ ဒီးဖဲပှၤဘၣ်တၢ်ဒိးဖှူအီၤ လၢအအိၣ်တ့ၢ်ဒံးလၢ ဟီၣ်ခိၣ်ချၢတဖၣ် ဘၣ်တၢ်ဟံးထီၣ်အီၤ ဆူမူခိၣ်အခါ ယ့ၣ်ၡူးခရံာ် ကဆဲးတီခိၣ်ရိၤမဲဝဲ ယဟိဝၤယွၤ အပှၤဂီၢ်မုၢ်အဃိ တၢ်ဘူၣ်ထီၣ်ဘါထီၣ်စီဆှံ ကဆဲးအိၣ် လၢဟီၣ်ခိၣ်ချၢဒံး. ဖဲန့ၣ်အဆၢကတီၢ် စီၤကိးလၢကီၢ်မါကူး လၢအမ့ၢ် ကလုာ်ဒူၣ်လၢ အဖီၣ်လိာ်စုန့ၣ် ကဟဲထီဒါ ကစၢ်ယွၤ အပှၤဂီၢ်မုၢ်. (ဃ့း ၃၈:၁၈-၂၀) သနာ်က့ ဒ်သိး ယဟိဝၤယွၤ အပှၤဂီၢ်မုၢ် တဆဲးဘူၣ်ထီၣ်ဘါထီၣ် ယဟိဝၤယွၤ လၢၤတဂ့ၤအဂီၢ်န့ၣ် အဝဲသ့ၣ် မၤဝဲတန့ၢ်ဘၣ်. ယဟိဝၤယွၤ ကမၤပူၤဖျဲး အပှၤဂီၢ်မုၢ် သပှၢ်တၢၢ်. ဘၣ်တဘျီ တၢ်မၢဖိယိၤဟၣ် ထံၣ်ဝဲတၢ်ထံၣ်လၢညါခီ ဘၣ်ဃးဒီး ခရံာ်အသိလၢအဂၤ လၢအမ့ၢ် “ပှၤဂီၢ်မုၢ်ဖးဒိၣ်.” ဒီးအသ့ၣ်ညါဘၣ်ဝဲလၢ “ပှၤဂီၢ်မုၢ်ဖးဒိၣ်” အံၤအမ့ၢ်ပှၤလၢ အလဲၤခီဖျိ “တၢ်နးတၢ်ဖှီၣ်ဖးဒိၣ်.” (လီၣ် ၇:၉, ၁၄) အဃိ ပသ့ၣ်ညါဘၣ်လၢ ယဟိဝၤယွၤ ကမၤပူၤဖျဲး အပှၤဂီၢ်မုၢ် သပှၢ်တၢၢ်. တၢး၂၄.၀၂ ၅-၆ ¶၁၃-၁၄

ဒ်သိး ပကန့ၢ်ဘၣ် သးစီဆှံအဂီၢ် ပကဘၣ်မၤ မနုၤလဲၣ်. ပကဘၣ်ဃ့ ယဟိဝၤယွၤလၢ အကဟ့ၣ်ပှၤ အသးစီဆှံ, ပကဘၣ်ဖး ဒီးမၤလိလံာ်စီဆှံ ဒီးမၤသကိးတၢ်ဒီး တၢ်ကရၢကရိလၢ ယဟိဝၤယွၤ အသးစီဆှံ ဟံးစုနဲၣ်ကျဲဝဲ. ပမ့ၢ်မၤဒ်အံၤန့ၣ် “သးစီဆှံအတၤသၣ်” ကမၤတၢ်လၢ ပတၢ်အိၣ်မူပူၤ. (ကလၤ ၅:၂၂, ၂၃) ယဟိဝၤယွၤ ဟ့ၣ်လီၤအသးစီဆှံ ထဲပှၤလၢ အဆိမိၣ်တၢ်လၢ အကဆှီ ဒီးမၤတၢ်လၢအဂ့ၤ. ပမ့ၢ်ဆဲးဆိမိၣ်တၢ်လၢ အတကဆှီဘၣ် ဒီးမၤတၢ်လၢ အတဂ့ၤဘၣ်န့ၣ် ယဟိဝၤယွၤ တဟ့ၣ်ပှၤ အသးစီဆှံလၢၤဘၣ်. (၁ သ့း ၄:၇, ၈) တကးဒံးဘၣ် ဒ်သိးပကဆဲးန့ၢ်ဘၣ် ယဟိဝၤယွၤ အသးစီဆှံအဂီၢ်ပ “တဘၣ်ဆိကမိၣ်ဆံး ဝံအတၢ်စံးပာ်တဖၣ်” ဘၣ်. (၁ သ့း ၅:၂၀) ဖဲအံၤ “ဝံအတၢ်စံးပာ်တဖၣ်” န့ၣ်အဲၣ်ဒိးတဲဝဲ တၢ်ကစီၣ်လၢပန့ၢ်ဘၣ်ခီဖျိ ယဟိဝၤယွၤ အသးစီဆှံ ဒီးအပၣ်ဃုာ်စ့ၢ်ကီးဒီး တၢ်ကစီၣ်လၢ အဘၣ်ဃးဒီး ယဟိဝၤယွၤ အမုၢ်နံၤ ဒီးတၢ်အကတၢၢ် ဘူးထီၣ်ထဲလဲၣ်အဂ့ၢ်. ပှၤတနီၤန့ၣ် ဆိမိၣ်ဝဲလၢ ယဟိဝၤယွၤ အမုၢ်နံၤ, အၢ်မက့းဒိၣ် တဟဲဖဲ အအိၣ်မူအဆၢကတီၢ်ဘၣ်. မ့မ့ၢ်ပှၤန့ၣ် ပတဘၣ်ဆိမိၣ်ဒ်န့ၣ်ဘၣ်. ပကဘၣ် ပာ်ဖျါထီၣ်လၢ ယဟိဝၤယွၤ အမုၢ်နံၤအံၤ ဟဲဘူးထီၣ်မၣ်ဘူးထီၣ် ဒီးပကဘၣ်ဆဲး ‘မၤတၢ်လၢ အပာ်ဖျါထီၣ်လၢ ပသးတီဒီးကစၢ်ယွၤ’ ခီဖျိ ပဆဲးအိၣ်ဒီး လုၢ်လၢ်သကဲာ်ပဝးလၢ အကဆှီ.—၂ ပ့း ၃:၁၁, ၁၂. တၢး၂၃.၀၆ ၁၂ ¶၁၃-၁၄

ဖဲပကွၢ် အ့ၤထၢၤနဲၣ်အခါ တၢ်ဂီၤဘ့ၣ်ဆ့ မ့ၢ်ဟဲဖျါထီၣ်န့ၣ် ပကဘၣ်မၤဒ်လဲၣ်. ပမ့ၢ်ပာ်လုၢ်ပာ်ပှ့ၤ ပတၢ်ရ့လိာ်သးဒီး ယဟိဝၤယွၤန့ၣ် ကမၤစၢၤပှၤလၢ ပတကွၢ်တၢ်ဂီၤဘ့ၣ်ဆ့ဘၣ် ဒီးပကဘၣ်ပံးကွံာ်တဘျီဃီ. တၢ်ဂီၤတနီၤလၢ အတမ့ၢ်တၢ်ဂီၤဘ့ၣ်ဆ့ဘၣ်နာ်က့ အမ့ၢ်မၤအိၣ်ထီၣ် ပတၢ်ဆိမိၣ်လၢ အတဂ့ၤဘၣ်န့ၣ် ပတဘၣ်ကွၢ်စ့ၢ်ကီးဘၣ်. တကးဒံးဘၣ် လၢပသးပူၤနာ်က့ ပတဘၣ် ဆိမိၣ် ဘၣ်ဃးဒီး တၢ်မၤကမၣ်မုၣ်ကမၣ်ခွါအဂ့ၢ်ဘၣ်. (မး ၅:၂၈, ၂၉) တၢ်အိၣ်ဖှိၣ်သးပှၢ်ဒ့ဘ့း လၢအအိၣ်လၢယိၤကီၢ်န့ၣ် တဲဝဲလၢ “ယကၠးလီၤယသးလၢ ‘တၢ်ဂီၤတဖၣ် မ့ၢ်တကဲ တၢ်ဂီၤဘ့ၣ်ဆ့ဘၣ်နာ်က့ ယမ့ၢ်ဆဲးကွၢ်အီၤန့ၣ် မ့ၢ်ယဟိဝၤယွၤ ကဘၣ်သးဝဲဧါ.’ ယကၠးလီၤယသးကၠဲန့ၣ်အဃိ မၤစၢၤယၤလၢ ယကဆၢတဲာ်တၢ်လၢအဘၣ်.” တၢ်ပျံၤ ယဟိဝၤယွၤန့ၣ် အကဲဝဲ “တၢ်ကူၣ်သ့ အဂံၢ်ခီၣ်ထံး.” အဃိ ပမ့ၢ်ဘၣ်ယိၣ်လၢ ပကမၤသးအုးဘၣ် ယဟိဝၤယွၤအသးန့ၣ် ကမၤစၢၤပှၤလၢ ပကဆၢတဲာ်တၢ်လၢအဘၣ်. တၢး၂၃.၀၆ ၂၃ ¶၁၂-၁၃

တၢ်ကတိၤလၢ “ဒၢးဖိတဖၣ်အပူၤ” န့ၣ်ဘၣ်သ့ၣ်သ့ၣ် အဲၣ်ဒိးတဲဝဲ ပတၢ်အိၣ်ဖှိၣ်တဖၣ်. ဒီးဖဲတၢ်နးတၢ်ဖှီၣ်ဖးဒိၣ် အဆၢကတီၢ် ပမ့ၢ်ဆဲးအိၣ်ဃူအိၣ်ဖိးဒီး ပဒီပုၢ်ဝဲၢ်မုၣ်ခွါန့ၣ် ယဟိဝၤယွၤ အၢၣ်လီၤလၢ အကဒီသဒၢပှၤ. အဃိ ဒ်သိးပကပူၤဖျဲးအဂီၢ် ခဲအံၤန့ၣ် ပကဘၣ်ကျဲးစၢးမၤအါထီၣ် ပတၢ်အဲၣ်ဒီပုၢ်ဝဲၢ်မုၣ်ခွါ ဒီးနၢ်ပၢၢ်စၢၤအဝဲသ့ၣ်. ဒီးဖဲ “ယဟိဝၤယွၤ အမုၢ်နံၤဖးဒိၣ်” ဟဲဝဲအခါ ပှၤဟီၣ်ခိၣ်ဖိခဲလၢာ် ကထံၣ်ဘၣ် တၢ်ကီတၢ်ခဲဖးဒိၣ်. (ဖါ ၁:၁၄, ၁၅) ယဟိဝၤယွၤ အပှၤဂီၢ်မုၢ်စ့ၢ်ကီး ကထံၣ်ဘၣ်တၢ်ကီတၢ်ခဲ. ဘၣ်ဆၣ် ပမ့ၢ်အိၣ်ကတီၤပာ်စၢၤသးလၢ အခဲအံၤန့ၣ် ပကပာ်ပသးမုာ်မုာ် ဒီးပမၤစၢၤပှၤဂၤကသ့. ပမ့ၢ်ထံၣ်ဘၣ်ဒီး တၢ်ကီတၢ်ခဲ ဒ်လဲၣ်ဂ့ၤဒ်လဲၣ်ဂ့ၤ ပကအိၣ်ဒီး တၢ်တူၢ်န့ၢ်ခီၣ်ကဲ. ဖဲပဒီပုၢ်ဝဲၢ်မုၣ်ခွါတဖၣ် ထံၣ်ဘၣ် တၢ်ကီတၢ်ခဲအခါ ပကမၤစၢၤအဝဲသ့ၣ် ခီဖျိပပာ်ဖျါထီၣ် တၢ်သးကညီၤ ဒီးဟ့ၣ်လီၤမၤစၢၤ တၢ်လၢအဝဲသ့ၣ်လိၣ်ဘၣ်တဖၣ်. ဒီးဆၢကတီၢ်ခဲအံၤ ပမ့ၢ်အဲၣ်ပဒီပုၢ်ဝဲၢ်မုၣ်ခွါတဖၣ်န့ၣ် လၢခါဆူညါစ့ၢ်ကီး ပကအဲၣ် ပဒီပုၢ်ဝဲၢ်မုၣ်ခွါတဖၣ် ဒိၣ်ထီၣ်. ယဟိဝၤယွၤ ကဟ့ၣ်ပှၤတၢ်မူလီၤထူလီၤယိာ် လၢဟီၣ်ခိၣ်သီအပူၤ ဒီးဖဲန့ၣ် တၢ်ကီတၢ်ခဲ ဒီးတၢ်နးတၢ်ဖှီၣ် တအိၣ်ဘၣ်.—ၡါ ၆၅:၁၇. တၢး၂၃.၀၇ ၇ ¶၁၆-၁၇

လံာ်စီဆှံ ပာ်ဖျါထီၣ်ဝဲ ပှၤလၢအသးတီတဖၣ်န့ၣ် မ့ၢ်ပှၤလၢအသးဆူၣ်. ဘၣ်ဆၣ် ပှၤလၢအသးဆူၣ်န့ၣ် တဘျီတခီၣ် အသးဂံၢ်ဘါလီၤစၢ်သ့စ့ၢ်ကီး. အဒိ ဘၣ်တဘျီ စီၤပၤဒၤဝံး တူၢ်ဘၣ်လၢ အမ့ၢ်ပှၤလၢ အဂံၢ်ဆူၣ်ဘါဆူၣ် ဒီးအသူၣ်ဒူသးဒူ “ထဲသိးဒီး ကစၢၢ်တဖျၢၣ်.” ဘၣ်ဆၣ် ဘၣ်တဘျီဘျီန့ၣ် အ “ပျံၤတၢ်ဒိၣ်မး.” (စံး ၃၀:၇) မ့မ့ၢ်စီၤၡံၡိၣ်န့ၣ် အမ့ၢ်ပှၤလၢအဂံၢ်ဆူၣ် ခီဖျိလၢ ကစၢ်ယွၤအသးစီဆှံ မၤစၢၤအီၤအဃိ. ဒီးအနီၢ်ကစၢ်စ့ၢ်ကီး သ့ၣ်ညါဝဲလၢ ကစၢ်ယွၤအသးစီဆှံ မ့ၢ်တမၤစၢၤအီၤဘၣ်န့ၣ် ‘အဂံၢ်အဘါ ကလီၤစၢ်ကွံာ်ဝဲ ဒီးအကကဲထီၣ် ဒ်ပှၤပိာ်ခွါ အဂၤတဖၣ် အသိး.’ (စံၣ်ညီၣ် ၁၄:၅, ၆; ၁၆:၁၇) ပထံၣ်ဘၣ်လၢ ပှၤလၢအသးတီတဖၣ်အံၤ အိၣ်ဒီးတၢ်ဂံၢ်တၢ်ဘါန့ၣ် ခီဖျိလၢ ယဟိဝၤယွၤ မၤစၢၤအဝဲသ့ၣ်အဃိလီၤ. တၢ်မၢဖိပီလူးစ့ၢ်ကီး သ့ၣ်ညါလီၤအသးလၢ ဒ်သိးအကအိၣ်ဒီး တၢ်ဂံၢ်တၢ်ဘါအဂီၢ် အလိၣ်ဘၣ် ယဟိဝၤယွၤ အတၢ်မၤစၢၤ. (၂ ကရံၣ် ၁၂:၉, ၁၀) ဒီးအထံၣ်ဘၣ် တၢ်ကီတၢ်ခဲ လၢတၢ်အိၣ်ဆူၣ်အိၣ်ချ့တကပၤစ့ၢ်ကီး. (ကလၤ ၄:၁၃, ၁၄) အအဲၣ်ဒိး မၤတၢ်လၢအဘၣ် ဘၣ်ဆၣ် တဘျီတခီၣ်န့ၣ် ကီလၢအဂီၢ်ဒိၣ်မး. (ရိ ၇:၁၈, ၁၉) ဒီးတဘျီတခီၣ် အတူၢ်ဘၣ်လၢ အသူၣ်ကိၢ်သးဂီၤ ဒီးအဘၣ်ယိၣ်တၢ်စ့ၢ်ကီး. (၂ ကရံၣ် ၁:၈, ၉) ယဟိဝၤယွၤ ဟ့ၣ်စိဟ့ၣ်ကမီၤစီၤပီလူး အဃိ ဖဲစီၤပီလူး အဂံၢ်စၢ်ဘါစၢ်အခါ အတူၢ်ဘၣ်ဝဲလၢ အအိၣ်ဒီး တၢ်စိတၢ်ကမီၤ ဒီးအဂံၢ်အဘါ ဟဲဆူၣ်ထီၣ်ကဒါက့ၤ. တၢး၂၃.၁၀ ၁၂ ¶၁-၂

ပမ့ၢ်တူၢ်ဘၣ်လၢ ပလုၢ်ပပှ့ၤတအိၣ်ဘၣ် သနာ်က့ ပကဘၣ်နီၣ်ဘၣ်လၢ ယဟိဝၤယွၤ အနီၢ်ကစၢ်ဒၣ်ဝဲ မူၤဃီၤပှၤဆူအအိၣ်. (ယိၤ ၆:၄၄) တၢ်ဂ့ၤတၢ်ဝါလၢ ပနီၢ်ကစၢ် တထံၣ်ဘၣ်န့ၣ် ယဟိဝၤယွၤထံၣ်ဝဲ ဒီးအသ့ၣ်ညါ တၢ်အိၣ်လၢ ပသးပူၤ နီၢ်ကီၢ်. (၂ ကွဲး ၆:၃၀) အဃိ ဖဲယဟိဝၤယွၤတဲလၢ အပာ်လုၢ်ပာ်ပှ့ၤပှၤအခါ ပနာ်န့ၢ်အီၤသ့ သပှၢ်တၢၢ်. (၁ ယိၤ ၃:၁၉, ၂၀) တချုးလၢပသ့ၣ်ညါ တၢ်မ့ၢ်တၢ်တီဒံးဘၣ်န့ၣ် ပဝဲတနီၤ ပမၤတ့ၢ်တၢ်ကမၣ် ဒီးပတူၢ်ဘၣ်လၢ ပတၢ်ကမၣ်အိၣ်ဒံး. (၁ ပ့း ၄:၃) ခရံာ်ဖိလၢ အအိၣ်ဒီး တၢ်သးတီစ့ၢ်ကီး အဝဲသ့ၣ် ဘၣ်ဆဲးတြီဆၢဒံး တၢ်သူၣ်လီသးကွံလၢ အတဂ့ၤဘၣ်. နၤမီၤ နတူၢ်ဘၣ်လၢ ယဟိဝၤယွၤ တပျၢ်ကွံာ်နတၢ်ကမၣ်ဘၣ်ဧါ. နမ့ၢ်တူၢ်ဘၣ်ဒ်န့ၣ်န့ၣ် တမ့ၢ်ထဲနၤတဂၤဘၣ်. ယဟိဝၤယွၤ အခ့အပှၤတနီၤ လၢအသးတီဒီးအီၤန့ၣ် တူၢ်ဘၣ်တၢ်ဒ်သိးနၤ စ့ၢ်ကီး. အဒိ ဖဲတၢ်မၢဖိပီလူး ဆိကမိၣ်ထီၣ်က့ၤ တၢ်ကမၣ်လၢ အမၤဝဲလၢညါတဖၣ်အခါ အတူၢ်ဘၣ်လၢ အကဲပှၤနးသံ. (ရိ ၇:၂၄) ဘၣ်ဆၣ် ပထံၣ်ဘၣ်လၢ စီၤပီလူး ပီၢ်ယၢ်လီၤက့ၤအသး ဒီးအဒိးဘျၢထံ. သနာ်က့ အတဲလီၤသးလၢ အမ့ၢ် “တၢ်မၢဖိအဆံးကတၢၢ်” ဒီးပှၤတၢ်ဒဲးဘးဖိ “အဒိၣ်ကတၢၢ်.”—၁ ကရံၣ် ၁၅:၉; ၁ တံၤ ၁:၁၅. တၢး၂၄.၀၃ ၂၇ ¶၅-၆

ပန့ၢ်ဘၣ် တၢ်မၤလိလၢ စီၤပၤယိၤအၣ်အအိၣ်လၢ ပကဘၣ်ဃုထၢ ပသကိးလၢ အအဲၣ်ယဟိဝၤယွၤ ဒီးသကိးလၢ အဘၣ်သးမၤသးခု ယဟိဝၤယွၤအသး. ပသကိးလၢ အအဲၣ်ယဟိဝၤယွၤန့ၣ် ကမၤစၢၤပှၤလၢ ပကဆၢတဲာ် တၢ်လၢအဘၣ်. ပှၤလၢအအဲၣ် ယဟိဝၤယွၤန့ၣ် အသးပှၢ်မ့ၢ်ဂ့ၤ အသးစၢ်မ့ၢ်ဂ့ၤ ပရ့ဒီးအဝဲသ့ၣ်သ့. အဒိ စီၤယိၤအၣ်န့ၣ် အသးစၢ်န့ၢ်ဒံး အသကိးစီၤယဟိၤယဒါ ဖးဒိၣ်ညါ. အဃိ ဖဲနဃုထၢ နသကိးအခါ သံကွၢ်လီၤနသးလၢ ‘ယသကိးတဖၣ်အံၤ ကမၤစၢၤယၤလၢ ယကမၤဂၢၢ်ကျၢၤထီၣ် ယတၢ်နာ် ယဟိဝၤယွၤဧါ. မ့ၢ်အဝဲသ့ၣ် ဆီၣ်ထွဲယၤလၢ ယကအိၣ်မူ ဒ်ယဟိဝၤယွၤ အတၢ်ဘျၢအသိးဧါ. မ့ၢ်အဝဲသ့ၣ် တဲဘၣ်ဃး ယဟိဝၤယွၤအဂ့ၢ် ဒီးတၢ်မ့ၢ်တၢ်တီ အဂ့ၢ်စ့ၢ်ကီးဧါ. မ့ၢ်အဝဲသ့ၣ် အိၣ်မူမၤထွဲ ဒ်ယဟိဝၤယွၤ အတၢ်ဘျၢအသိးဧါ. ဖဲယမၤတၢ် တဘၣ်ဘၣ်အခါ မ့ၢ်အဝဲသ့ၣ် တဲယၤထဲတၢ်လၢ ယဘၣ်သးနၢ်ဟူလီၤဧါ မ့တမ့ၢ် မ့ၢ်အဝဲသ့ၣ် ကဘှီဘၣ်ထီၣ်က့ၤယၤဧါ.’ (ကတိၤ ၂၇:၅, ၆, ၁၇) နီၢ်ကီၢ်န့ၣ် ပှၤလၢအတအဲၣ် ယဟိဝၤယွၤဘၣ်န့ၣ် နတလိၣ်ရ့အီၤ ဘူးဘူးတံၢ်တံၢ်ဘၣ်. ဘၣ်ဆၣ် နမ့ၢ်ရ့ဒီး ပှၤလၢအအဲၣ် ယဟိဝၤယွၤန့ၣ် အဝဲသ့ၣ် ကမၤစၢၤနၤထီဘိ.—ကတိၤ ၁၃:၂၀. တၢး၂၃.၀၉ ၉-၁၀ ¶၆-၇

လၢကြံးကျိာ်န့ၣ် လံာ်မဲာ်ဖျၢၣ် အဆိကတၢၢ် တဖျၢၣ်န့ၣ် မ့ၢ်ဝဲ “အဲလ်ဖၤ” ဒီးအလီၢ်ခံကတၢၢ် တဖျၢၣ်န့ၣ် မ့ၢ်ဝဲ “အိမဲၤကၤ.” အဃိ ယဟိဝၤယွၤ တဲဝဲလၢ ယမ့ၢ် “ကဒီးဧ” လၢအမ့ၢ်ဝဲ အဲလ်ဖၤ ဒီးအိမဲၤကၤန့ၣ် အဲၣ်ဒိးတဲဝဲ တၢ်လၢအစးထီၣ်မၤဝဲ တမံၤမံၤန့ၣ် အကမၤဝံၤဝဲ သပှၢ်တၢၢ်. ယဟိဝၤယွၤတ့လီၤ နီၢ်အံၣ်အု ဒီးစီၤအၤဒၣ် ဝံၤအလီၢ်ခံ အတဲဘၣ်အဝဲသ့ၣ်လၢ “မ်သုသၣ်ထီၣ် ဒီးအါထီၣ်ဂီၢ်ထီၣ် ဒီးမၤပှဲၤထီၣ်ဟီၣ်ခိၣ် ဒီးမၤနၢၤအီၤ.” (၁ မိၤ ၁:၂၈) ဖဲန့ၣ်အခါ လီၤဂာ်ဒ်သိးဒီး ယဟိဝၤယွၤတဲဝဲ “က.” ဒီးယဟိဝၤယွၤ တဲဖျါထီၣ် အတၢ်တိာ်ပာ်လၢ နီၢ်အံၣ်အု ဒီးစီၤအၤဒၣ် အစၢၤအသွဲၣ် လၢအလၢအပှဲၤ ဒီးအအိၣ်ဒီး တၢ်ဒိကနၣ်တဖၣ်န့ၣ် ကမၤပှဲၤထီၣ်ဟီၣ်ခိၣ် ဒီးဒုးကဲထီၣ် ဟီၣ်ခိၣ်ဒီဘ့ၣ်လၢ ပၤရဒံစူး. ဒီးဖဲယဟိဝၤယွၤ အတၢ်တိာ်ပာ်အံၤ ဟဲလၢပှဲၤထီၣ်အခါ ယဟိဝၤယွၤ ကတဲဝဲ “ဧ.” ယဟိဝၤယွၤ တ့လီၤဝဲ “မူခိၣ်ဒီးဟီၣ်ခိၣ် ဒီးတၢ်အိၣ်လၢအပူၤတဖၣ်” ဝံၤအလီၢ်ခံ အတဲတၢ်တမံၤလၢ အပာ်ဖျါထီၣ်ဝဲလၢ အတၢ်တိာ်ပာ် ကဟဲလၢပှဲၤထီၣ်နီၢ်ကီၢ်. အအဲၣ်ဒိးတဲဝဲလၢ အကမၤလၢပှဲၤထီၣ် အတၢ်အၢၣ်လီၤလၢ ပှၤဟီၣ်ခိၣ်ဖိ ဒီးဟီၣ်ခိၣ်အဂီၢ်. ဒီးအတၢ်အၢၣ်လီၤအံၤ ကဟဲလၢပှဲၤထီၣ်ဝဲ ဖဲမုၢ်နွံနံၤတနံၤ အကတၢၢ်.—၁ မိၤ ၂:၁-၃. တၢး၂၃.၁၁ ၅ ¶၁၃-၁၄

ပှၤယူဒၤဖိလၢ အအိၣ်လၢ ဘၤဘူၤလိၣ်န့ၣ် အဝဲသ့ၣ် ကက့ၤလၢ ကီၢ်အံၣ်စရ့လးအဂီၢ် အဝဲသ့ၣ် တၢ်လဲၤကျဲန့ၣ်ကကီ ဒီးကယံာ်ဝဲလွံၢ်လါညါ. ဘၣ်ဆၣ် ယဟိဝၤယွၤ အၢၣ်လီၤဝဲလၢ တၢ်ကီတၢ်ခဲလၢ ကမၤတံာ်တာ်အဝဲသ့ၣ်န့ၣ် အကမၤလီၤမၢ်ကွံာ်ဝဲ ဒီးကမၤဂ့ၤထီၣ်န့ၢ် အဝဲသ့ၣ်အကျဲ. ပှၤယူဒၤဖိလၢ အသးတီတဖၣ်န့ၣ် သ့ၣ်ညါဝဲလၢ အဝဲသ့ၣ် မ့ၢ်က့ၤကဒါလၢ ကီၢ်အံၣ်စရ့လးန့ၣ် အဝဲသ့ၣ်ကဘၣ်တူၢ်ၡူကွံာ်တၢ် အိၣ်တနီၤ. ဘၣ်ဆၣ် အဝဲသ့ၣ် သ့ၣ်ညါဝဲလၢ အကန့ၢ်ဘၣ်က့ၤတၢ်ဆိၣ်ဂ့ၤ အါန့ၢ်တၢ်လၢ အဝဲသ့ၣ် ဘၣ်တူၢ်ၡူကွံာ်ဝဲဒံး. တၢ်ဆိၣ်ဂ့ၤ အဒိၣ်ကတၢၢ်တခါန့ၣ် အဘၣ်ဃးဒီး အဝဲသ့ၣ် တၢ်ဘူၣ်ထီၣ်ဘါထီၣ် ယဟိဝၤယွၤ. လၢဘၤဘူၤလိၣ်န့ၣ် တၢ်လုၢ်ဟံၣ် လၢယဟိဝၤယွၤအဂီၢ် တအိၣ်နီတဖျၢၣ်ဘၣ်. ပှၤအံၣ်စရ့လးဖိ ကလုၢ်ထီၣ်တၢ် ဒ်စီၤမိၤၡ့အတၢ်သိၣ်တၢ်သီ အိၣ်ဝဲအသိးအဂီၢ် တၢ်လုၢ်လီၢ်တအိၣ်ဘၣ် ဒီးပှၤလုၢ်တၢ်ဒိၣ် လၢကလုၢ်ထီၣ်တၢ်စ့ၢ်ကီး တအိၣ်ဘၣ်. တကးဒံးဘၣ် လၢဘၤဘူၤလိၣ်န့ၣ် ပှၤလၢအဘူၣ်ထီၣ်ဘါထီၣ် ယွၤလၢအကမၣ်တဖၣ် အိၣ်အါန့ၢ် ပှၤလၢအအိၣ်မူမၤထွဲ ယဟိဝၤယွၤ အတၢ်သိၣ်တၢ်သီ ဒီးဘူၣ်ထီၣ်ဘါထီၣ် ယဟိဝၤယွၤဒံး. အဃိ ပှၤယူဒၤဖိလၢအကလး လၢအအဲၣ် ယဟိဝၤယွၤန့ၣ် ခိးကွၢ်လၢ်ဝဲလၢ အဝဲသ့ၣ် ကက့ၤဘၣ်လၢ အထံကီၢ် ဒီးဒုးအိၣ်ထီၣ်က့ၤ တၢ်ဘူၣ်တၢ်ဘါစီဆှံ. တၢး၂၃.၀၅ ၁၄-၁၅ ¶၃-၄

ပဆဲးအိၣ်မူ “ဒ် တၢ်ကပီၤအဖိတဖၣ်” ကသ့အဂီၢ် ပကလိၣ်ဘၣ် ကစၢ်ယွၤအသးစီဆှံ အတၢ်မၤစၢၤ. ဘၣ်မနုၤအဃိလဲၣ်. ပှၤဟီၣ်ခိၣ်ဖိ အါတက့ၢ်န့ၣ် အိၣ်ဒီး လုၢ်လၢ်သကဲာ်ပဝး လၢအတဂ့ၤဘၣ်အဃိ ပကအိၣ်ဒီး လုၢ်လၢ်သကဲာ်ပဝး လၢအဂ့ၤအဂီၢ် တညီနီတစဲးဘၣ်. (၁ သ့း ၄:၃-၅, ၇, ၈) သနာ်က့ သးစီဆှံ ကမၤစၢၤပှၤဒ်သိး ပကမၤနၢၤကွံာ် ပှၤဟီၣ်ခိၣ်ဖိ အတၢ်ထံၣ်လၢ အတဘၣ်လိာ်သးဒီး ယဟိဝၤယွၤ အတၢ်ထံၣ်ဘၣ်. တကးဒံးဘၣ် သးစီဆှံ ကမၤစၢၤပှၤဒ်သိး ပကမၤအါထီၣ် “တၢ်ဂ့ၤ, တၢ်တီတၢ်လိၤ ဒီးတၢ်မ့ၢ်တၢ်တီ အကလုာ်ကလုာ်.” (အ့း ၅:၉) ဒ်သိး ပကန့ၢ်ဘၣ် သးစီဆှံအဂီၢ် ပကဘၣ်ဃ့လၢ ယဟိဝၤယွၤအအိၣ်. ယ့ၣ်ၡူး တဲဝဲလၢ ယဟိဝၤယွၤက “ဟ့ၣ်ဝဲ ပှၤလၢအဃ့အီၤသးစီဆှံ.” (လူၤ ၁၁:၁၃) ဒီးဖဲပဘူၣ်ထီၣ်ဘါထီၣ် ယဟိဝၤယွၤ တပူၤဃီဒီး ဒီပုၢ်ဝဲၢ်မုၣ်ခွါအခါ ပန့ၢ်ဘၣ်စ့ၢ်ကီး သးစီဆှံ. (အ့း ၅:၁၉, ၂၀) ဒီးပမ့ၢ်န့ၢ်ဘၣ် ယဟိဝၤယွၤ အသးစီဆှံန့ၣ် ပအိၣ်မူဒ်သိးဒီး ယဟိဝၤယွၤ အတၢ်ဘၣ်သးသ့. တၢး၂၄.၀၃ ၂၃-၂၄ ¶၁၃-၁၅

နလိၣ်ဘၣ်အါထီၣ် တၢ်ဝံသးစူၤဧါ. မ့ၢ်လိၣ်ဘၣ်န့ၣ် ဃ့လၢကစၢ်ယွၤကမၤစၢၤနၤ. တၢ်ဝံသးစူၤန့ၣ် အကဲဝဲ သးစီဆှံအတၤသၣ်တခါ. (ကလၤ ၅:၂၂, ၂၃) အဃိ ပကဘၣ်ဃ့ ယဟိဝၤယွၤ အသးစီဆှံ ဒီးဃ့အီၤလၢအကမၤစၢၤပှၤ ဒ်သိးပကအိၣ်ဒီး သးစီဆှံအတၤသၣ် တခါအံၤ. ပမ့ၢ်ထံၣ်ဘၣ်ဒီး တၢ်အိၣ်သးကီခဲလၢ ပကဘၣ်အိၣ်ဒီး တၢ်ဝံသးစူၤန့ၣ် ပကဘၣ် “ဆဲးဃ့” ယဟိဝၤယွၤ အသးစီဆှံဒ်သိး ကမၤစၢၤပှၤလၢ ပကအိၣ်ဒီး တၢ်ဝံသးစူၤ. (လူၤ ၁၁:၁၃) ပကဘၣ်ဃ့စ့ၢ်ကီး ယဟိဝၤယွၤလၢ အကမၤစၢၤပှၤ လၢပကအိၣ်ဒီး တၢ်ထံၣ်ဒ်သိးဒီးအီၤ. ပဃ့ဝံၤဒီး ပကဘၣ်ကျဲးစၢး အဂ့ၤကတၢၢ် ဒ်သိးပကအိၣ်ဒီး တၢ်ဝံသးစူၤ ကိးနံၤဒဲး. ပမ့ၢ်ဆဲးဃ့လၢ ပကအိၣ်ဒီးတၢ်ဝံသးစူၤ ဒီးဆဲးပာ်ဖျါထီၣ် တၢ်ဝံသးစူၤန့ၣ် လၢညါပမ့ၢ်တကဲပှၤလၢ အအိၣ်ဒီး တၢ်ဝံသးစူၤဘၣ်သနာ်က့ ယဟိဝၤယွၤ ကမၤစၢၤပှၤဒ်သိး ပကဝံသးစူၤတၢ်အါထီၣ်. တကးဒံးဘၣ် ဆိမိၣ်ထံ ပှၤအဒိအတဲာ်လၢ လံာ်စီဆှံပူၤ. လၢလံာ်စီဆှံပူၤန့ၣ် ပထံၣ်ဘၣ် ပှၤလၢအအိၣ်ဒီး တၢ်ဝံသးစူၤ အဒိအတဲာ် အိၣ်ဝဲအါမး. ပမ့ၢ်ဆိမိၣ်ထံ ပှၤတဖၣ်အံၤအဂ့ၢ်န့ၣ် ကမၤစၢၤပှၤလၢ ပကဘၣ်ပာ်ဖျါထီၣ် တၢ်ဝံသးစူၤ. တၢး၂၃.၀၈ ၂၂ ¶၁၀-၁၁

ယ့ၣ်ၡူးမၤမုာ်ထီၣ် တၢ်မၢဖိပ့းတရူးအသး ဒီးတဲဘၣ်အီၤလၢ ယဟိဝၤယွၤ ကမၤစၢၤအီၤ ဒီးမၤလၢပှဲၤန့ၢ် အတၢ်လိၣ်ဘၣ် လၢနီၢ်ခိတကပၤ. တကးဒံးဘၣ် ဖဲစီၤပ့းတရူး ဒီးတၢ်မၢဖိအဂၤတဖၣ် ဖီၣ်ညၣ်အခါ ယ့ၣ်ၡူးမၤတၢ်လီၤလးအဂၤတခါ လၢအဝဲသ့ၣ် အမဲာ်ညါ. (ယိၤ ၂၁:၄-၆) တၢ်လီၤလးတခါအံၤ ဒုးသ့ၣ်ညါ စီၤပ့းတရူးလၢ ယဟိဝၤယွၤ ဟ့ၣ်အီၤ နီၢ်ခိတၢ်လိၣ်ဘၣ် သ့ဝဲညီညီဖိ. ဖဲန့ၣ်အခါ ဘၣ်သ့ၣ်သ့ၣ် စီၤပ့းတရူး ကနီၣ်ထီၣ်ဝဲ ယ့ၣ်ၡူးအတၢ်ကတိၤလၢ အတဲဝဲလၢ ပှၤလၢအ “ပာ်ဆိယွၤအဘီအမုၢ်” န့ၣ်ယဟိဝၤယွၤ ကမၤလၢပှဲၤန့ၢ် အတၢ်လိၣ်ဘၣ်. (မး ၆:၃၃) အဃိ ဒ်သိး စီၤပ့းတရူး တပာ်ဆိ နီၢ်ခိတၢ်လိၣ်ဘၣ်လၢညါတဂ့ၤ ဒီးကပာ်ဆိ တၢ်စံၣ်တဲၤတဲလီၤတၢ်မၤ လၢအတၢ်အိၣ်မူပူၤအဂီၢ် ယ့ၣ်ၡူးအတၢ်ကတိၤအံၤ ကကဲထီၣ်တၢ်မၤစၢၤ လၢအဂီၢ်ဒိၣ်မး. ဖဲ ခ.န. ၃၃ ဘူၣ်ယဲၢ်ဆံအနံၤန့ၣ် စီၤပ့းတရူး စံၣ်တဲၤတဲလီၤတၢ်ဒူဒူ အဃိ ပှၤတူၢ်လိာ် တၢ်သးခုကစီၣ် အိၣ်ဝဲလၢ အကထိတဖၣ်ညါ. (မၤတၢ် ၂:၁၄, ၃၇-၄၁) လၢခံ စီၤပ့းတရူး မၤစၢၤစ့ၢ်ကီး ပှၤၡၤမရံဖိ ဒီးပှၤကလုာ်အဂၤတဖၣ်လၢ ကသ့ၣ်ညါထီၣ် ယ့ၣ်ၡူးခရံာ်အဂ့ၢ် ဒီးပိာ်ယ့ၣ်ၡူးအခံ. (မၤတၢ် ၈:၁၄-၁၇; ၁၀:၄၄-၄၈) ပထံၣ်ဘၣ်လၢ ယဟိဝၤယွၤသူဝဲ စီၤပ့းတရူး ဒ်သိး အကမၤစၢၤ ပှၤအကလုာ်ကလုာ်လၢ ကဟဲနုာ်လီၤလၢ ခရံာ်ဖိတၢ်အိၣ်ဖှိၣ်အပူၤ. တၢး၂၃.၀၉ ၂၀ ¶၁; ၂၃ ¶၁၁

ဘူးကအိၣ်ခံနံၣ်ဝံၤအလီၢ်ခံ ဘၤဘူၤလိၣ် အစီၤပၤနဘူၤကးန့စၢ် မံမီၢ်ဝဲ တၢ်ဂီၤဖးဒိၣ်တဒု ဒီးအတၢ်မံမီၢ်အံၤ မၤကိၢ်မၤဂီၤအသးဒိၣ်မး. အဃိ အဟ့ၣ်လီၤတၢ်ကလုၢ်လၢ ပှၤကူၣ်ဘၣ်ကူၣ်သ့ခဲလၢာ် ပၣ်ဃုာ်ဒီး စီၤဒၤနံးယ့လးန့ၣ် ကဘၣ်တဲဘၣ်အီၤလၢ အတၢ်မံမီၢ် ဒီးတၢ်မံမီၢ်အခီပညီ. အဝဲသ့ၣ်တဲဝဲ မ့ၢ်တဘၣ်ဘၣ်န့ၣ် စီၤပၤကမၤသံ အဝဲသ့ၣ်ခဲလၢာ်. (ဒၤ ၂:၃-၅) အဃိ ဒ်သိးပှၤအါဂၤ အသးသမူကပူၤဖျဲးအဂီၢ် စီၤဒၤနံးယ့လး ကဘၣ်ကရီ မၤတၢ်တမံၤမံၤ. စီၤဒၤနံးယ့လး “လဲၤလၢစီၤပၤအအိၣ် ဒီးဃ့ဝဲလၢ စီၤပၤကဟ့ၣ်အီၤ တၢ်ဆၢကတီၢ်လၢ ကတဲနၢ်ပၢၢ်အီၤ အတၢ်မံမီၢ် အခီပညီ အဂီၢ်.” (ဒၤ ၂:၁၆) တၢ်လၢစီၤဒၤနံးယ့လးမၤဝဲန့ၣ် ပာ်ဖျါထီၣ်လၢ အအိၣ်ဒီးတၢ်သးဒူ ဒီးတၢ်နာ်. လၢညါ စီၤဒၤနံးယ့လး တဲဖျါထီၣ်ဝဲတၢ်မံမီၢ် အခီပညီ တဘျီဘျီလံဧါန့ၣ် လံာ်စီဆှံတပာ်ဖျါထီၣ်ဝဲဘၣ်. အဃိ စီၤဒၤနံးယ့လး မၢအသကိးသၢဂၤ လၢက “ဃ့မူခိၣ်အကစၢ် လၢအကသးကညီၤအဝဲသ့ၣ် ဒီးကပာ်ဖျါထီၣ်န့ၢ် အဝဲသ့ၣ် တၢ်ခူသူၣ်တခါအံၤ.” (ဒၤ ၂:၁၈) ဒီးယဟိဝၤယွၤ စံးဆၢအဝဲသ့ၣ် တၢ်ဃ့ထုကဖၣ်. ခီဖျိလၢ ကစၢ်ယွၤ အတၢ်မၤစၢၤအဃိ စီၤဒၤနံးယ့လးတဲဖျါထီၣ် စီၤပၤနဘူၤကးန့စၢ် အတၢ်မံမီၢ် အခီပညီဘၣ်ဝဲ. အဃိ စီၤဒၤနံးယ့လး ဒီးအသကိးတဖၣ် ပှၤတမၤသံ အဝဲသ့ၣ်ဘၣ်. တၢး၂၃.၀၈ ၃ ¶၄

ပမ့ၢ်အိၣ်ဒီး တၢ်ဝံသးစူၤန့ၣ် ပကန့ၢ်ဘၣ်အဘျုးဒ်လဲၣ်. ပမ့ၢ်ဝံသးစူၤတၢ်န့ၣ် ပကန့ၢ်ဘၣ် တၢ်သးခုအါထီၣ် ဒီးပပာ်သးမုာ်မုာ်ကသ့ဒိၣ်ထီၣ်. တၢ်ဝံသးစူၤန့ၣ် ကမၤစၢၤပှၤလၢ ပကအိၣ်ဒီး တၢ်ထံၣ်လၢအဂ့ၤ ဒီးပတၢ်အိၣ်ဆူၣ်အိၣ်ချ့စ့ၢ်ကီးကဂ့ၤ. ပမ့ၢ်ဝံသးစူၤပှၤဂၤန့ၣ် ပကအိၣ်ဒီး တၢ်ရ့လိာ်သးလၢအဂ့ၤ ဒီးလၢတၢ်အိၣ်ဖှိၣ်ပူၤန့ၣ် တၢ်ဃူတၢ်ဖိး ကအိၣ်အါထီၣ်. ဖဲပှၤတဂၤဂၤ မၤပှၤမ့ၢ်တဘၣ်ဘၣ်အခါ ပမ့ၢ်တသးဒိၣ်ထီၣ်တၢ်ချ့ချ့ဘၣ်န့ၣ် အတကဲထီၣ် တၢ်ကီတၢ်ခဲဖးဒိၣ်ဘၣ်. (စံး ၃၇:၈; ကတိၤ ၁၄:၂၉) တကးဒံးဘၣ် ခီဖျိလၢ ပကွၢ်လိ ပပၢ်အိၣ်လၢမူခိၣ် ယဟိဝၤယွၤအဃိ ပတၢ်ရ့လိာ်သးဒီးအီၤ ဂ့ၤဒိၣ်ထီၣ်. တၢ်ဝံသးစူၤန့ၣ် အကဲဝဲ တၢ်ဂ့ၤတၢ်ဝါတခါလၢ အဂ့ၤဒိၣ်မး ဒီးအကဲဘျုးလၢ ပှၤခဲလၢာ်အဂီၢ်. ပကပာ်ဖျါထီၣ် တၢ်ဝံသးစူၤန့ၣ် တညီထီဘိဘၣ် သနာ်က့ ခီဖျိလၢ ယဟိဝၤယွၤ အတၢ်မၤစၢၤအဃိ ပဆဲးမၤအါထီၣ် တၢ်ဝံသးစူၤသ့. ဒီးဖဲပအိၣ်ခိး ဟီၣ်ခိၣ်သီလၢ တၢ်ဝံသးစူၤအပူၤအခါ ပနာ်သပှၢ်တၢၢ်လၢ ယဟိဝၤယွၤ “အမဲာ်ချံန့ၣ် ကွၢ်ထွဲဝဲပှၤလၢ အပျံၤအီၤတဖၣ် ဒီးပှၤလၢအအိၣ်ခိးကွၢ်လၢ် အတၢ်အဲၣ်လၢအတီ.” (စံး ၃၃:၁၈) အဃိ မ်ပပာ်လီၤသး ဂၢၢ်ဂၢၢ်ကျၢၤကျၢၤလၢ ပကဆဲးပာ်ဖျါထီၣ် တၢ်ဝံသးစူၤထီဘိ. တၢး၂၃.၀၈ ၂၂ ¶၇; ၂၅ ¶၁၆-၁၇

စီၤယၤကိာ် တဲဝဲလၢ ပှၤတဂၤန့ၣ် အအိၣ်ဒီးတၢ်နာ် သနာ်က့ အတၢ်မၤန့ၣ် ပာ်ဖျါထီၣ်လၢ အတၢ်နာ်တအိၣ်ဘၣ်. (ယၤ ၂:၁-၅, ၉) ဒီးစီၤယၤကိာ် တဲစ့ၢ်ကီးဝဲလၢ ပှၤတဂၤဂၤ မ့ၢ်ထံၣ်ဝဲ ‘ဒီပုၢ်ဝဲၢ်မုၣ်ခွါတဂၤဂၤ လၢအတၢ်ကူတၢ်ကၤ မ့တမ့ၢ် အတၢ်အီၣ်တၢ်အီ တအိၣ်ဘၣ်,’ ဘၣ်ဆၣ် အမ့ၢ်တမၤစၢၤဝဲဘၣ်န့ၣ် အတဲဝဲလၢ အအိၣ်ဒီးတၢ်နာ် သနာ်က့ အတၢ်မၤန့ၣ် ပာ်ဖျါထီၣ်လၢ အတၢ်နာ်တအိၣ်ဘၣ်. (ယၤ ၂:၁၄-၁၆) စီၤယၤကိာ် ဟ့ၣ်ဝဲတၢ်အဒိ ဘၣ်ဃးဒီး နီၢ်ရၤဃးအဂ့ၢ်. နီၢ်ရၤဃးန့ၣ် အပာ်ဖျါထီၣ်အတၢ်နာ် ခီဖျိအတၢ်မၤ. (ယၤ ၂:၂၅, ၂၆) နီၢ်ရၤဃး နၢ်ဟူဘၣ်ဝဲ ယဟိဝၤယွၤအဂ့ၢ် ဒီးအနာ်ဝဲလၢ ယဟိဝၤယွၤန့ၣ် အဆီၣ်ထွဲမၤစၢၤ ပှၤအံၣ်စရ့လးဖိ. (ၡူ ၂:၉-၁၁) အဃိ နီၢ်ရၤဃး ပာ်ဖျါထီၣ် အတၢ်နာ် ခီဖျိအတၢ်မၤ ဒီးအမၤပူၤဖျဲးဝဲ ပှၤအံၣ်စရ့လးဖိ အပှၤကွၢ်ဟုၣ်တၢ်ခံဂၤ အသးသမူလၢ တၢ်လီၤဘၣ်ယိၣ်အပူၤ. ဒီးဒ်စီၤအၤဘြၤဟၣ်အသိး နီၢ်ရၤဃး တကဲပှၤလၢပှၤပှဲၤဘၣ် ဒီးအတမၤထွဲ စီၤမိၤၡ့အတၢ်သိၣ်တၢ်သီဘၣ် သနာ်က့ အဝဲသ့ၣ်ခံဂၤလၢာ် ကဲထီၣ်ဝဲ ပှၤတီပှၤလိၤ. လၢနီၢ်ရၤဃး အဒိအတဲာ်န့ၣ် ပန့ၢ်ဘၣ်တၢ်မၤလိလၢ ပကဘၣ်ပာ်ဖျါထီၣ် ပတၢ်နာ် ခီဖျိပတၢ်မၤန့ၣ် အရ့ဒိၣ်ဒိၣ်မး. တၢး၂၃.၁၂ ၅-၆ ¶၁၂-၁၃

ပဝဲခရံာ်ဖိတဖၣ် ပမ့ၢ်သ့ၣ်ညါ လံာ်စီဆှံအဂ့ၢ်ထဲတစဲးဖိန့ၣ် ပတကြၢးသးမံဒံးဘၣ်. ခီဖျိလၢ သးစီဆှံ အတၢ်မၤစၢၤအဃိ ပအဲၣ်ဒိးမၤလိအါထီၣ် “တၢ်ဂ့ၢ်အဒိၣ်အယိာ် လၢအဘၣ်ဃးဒီး ကစၢ်ယွၤအဂ့ၢ် စ့ၢ်ကီး.” (၁ ကရံၣ် ၂:၉, ၁၀) ဒ်သိးပတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်အဂီၢ် ပကဘၣ်မၤ နီၢ်ကစၢ် တၢ်မၤလိလံာ်စီဆှံ လီၤတံၢ်လီၤဆဲး. အဒိ ဃုသ့ၣ်ညါအါထီၣ် တၢ်ဂ့ၢ်ဘၣ်ဃးဒီး ယဟိဝၤယွၤ ပာ်ဖျါထီၣ် အတၢ်အဲၣ်လၢ အခ့အပှၤလၢပျၢၤတဖၣ် အဖီခိၣ် ဒီးလၢပဖီခိၣ်ဒ်လဲၣ်. ဃုသ့ၣ်ညါ ဘၣ်ဃးဒီး ယဟိဝၤယွၤ ရဲၣ်ကျဲၤဝဲ တၢ်ဘူၣ်တၢ်ဘါ အမ့ၢ်အတီလၢပျၢၤ ဒီးလၢဆၢကတီၢ်ခဲအံၤန့ၣ် လီၤဆီလိာ်သးဒ်လဲၣ်. မ့တမ့ၢ် ဃုသ့ၣ်ညါအါထီၣ် ဝံအတၢ်စံးပာ် ဘၣ်ဃးဒီး ယ့ၣ်ၡူးအတၢ်အိၣ်မူ လၢဟီၣ်ခိၣ်ချၢ ဒီးအတၢ်စံၣ်တဲၤတဲလီၤအဂ့ၢ် လၢအဟဲလၢထီၣ်ပှဲၤထီၣ်တဖၣ်. ဘၣ်ဃးဒီး တၢ်ဂ့ၢ်တဖၣ်အံၤ နဃုမၤလိအီၤလၢ လံာ်နဲၣ်ကျဲလၢ ကဃုသ့ၣ်ညါတၢ်အဂီၢ် သ့ဒီးပနာ်သပှၢ်တၢၢ်လၢ နမၤလိအီၤကမုာ်. နမ့ၢ်ဃုသ့ၣ်ညါအါထီၣ် တၢ်ဂ့ၢ်ဒိၣ်ဒိၣ်ယိာ်ယိာ် လၢလံာ်စီဆှံအပူၤ ဒီးမၤနနီၢ်ကစၢ် တၢ်မၤလိလံာ်စီဆှံ လီၤတံၢ်လီၤဆဲးန့ၣ် နတၢ်နာ် ကဂၢၢ်ကျၢၤဒိၣ်ထီၣ်ဒီး “နကထံၣ်န့ၢ် တၢ်သ့ၣ်ညါ ဘၣ်ဃးဒီး ကစၢ်ယွၤ.”—ကတိၤ ၂:၄, ၅. တၢး၂၃.၁၀ ၁၈-၁၉ ¶၃-၅

တၢ်မၢဖိပ့းတရူး သူဝဲတၢ်ကတိၤ “ဒိၣ်မး” အံၤအခီပညီလိၤလိၤ မ့ၢ်ဝဲ “ထုးသလၣ်ထီၣ်သး.” ဒီးအဆၢဖိ လၢအလီၢ်ခံတကူာ်န့ၣ် ပာ်ဖျါထီၣ်လၢ ပမ့ၢ်အဲၣ်လိာ်ကွံလိာ်ပသးဒိၣ်မးန့ၣ် ကမၤစၢၤပှၤဒ်သိး ပကကျၢၢ်ဘၢ ပဒီပုၢ်ဝဲၢ်မုၣ်ခွါ အတၢ်ကမၣ်အါမး. အဒိ ထံၣ်တမှံကွၢ်လၢ စီၢ်နီၤခိၣ်တဖျၢၣ်န့ၣ် အလွဲၢ်လီၤတကျီး ဒီးအဖျါလာ်အၢဒိၣ်မး. ဒ်သိးပှၤတထံၣ်အီၤဒ်န့ၣ်တဂ့ၤအဂီၢ် နကဘၣ် ကျၢၢ်ဘၢအီၤလၢ တၢ်ကံးညာ်. ဒီးနမ့ၢ်ထုးသလၣ်ထီၣ် တၢ်ကံးညာ်အံၤ တစဲးဘၣ်တစဲးန့ၣ် အကကျၢၢ်ဘၢဝဲ စီၢ်နီၤခိၣ်ဒီတဘ့ၣ် ဒီးနတထံၣ် တၢ်အလွဲၢ်လီၤတကျီး ဒီးဖျါဘၣ်အၢလၢၤဘၣ်. ဒ်န့ၣ်အသိး ပမ့ၢ်မၤအါထီၣ် ပတၢ်အဲၣ် တစဲးဘၣ်တစဲးန့ၣ် အကမၤစၢၤပှၤဒ်သိး ပကကျၢၢ်ဘၢ “တၢ်ဒဲးဘး အါမး.” ဒီးတၢ်ကတိၤ “ကျၢၢ်ဘၢ” န့ၣ်အဲၣ်ဒိးတဲဝဲအခီပညီလၢ ပပျၢ်ကွံာ် တၢ်ကမၣ်. ဒ်တၢ်ကံးညာ် ကျၢၢ်ဘၢဝဲ တၢ်အလွဲၢ်လီၤတကျီး ဒီးတၢ်ဘၣ်အၢသ့ဝဲအသိး ပတၢ်အဲၣ်န့ၣ် ကျၢၢ်ဘၢဝဲ ပဒီပုၢ်ဝဲၢ်မုၣ်ခွါ အတၢ်ဂံၢ်စၢ်ဘါစၢ် ဒီးအတၢ်ကမၣ်သ့. ပပျၢ်ကွံာ် ဒီပုၢ်ဝဲၢ်မုၣ်ခွါ အတၢ်ကမၣ် မ့ၢ်ကီဘၣ်ဆၣ် ပမ့ၢ်အဲၣ် ပဒီပုၢ်ဝဲၢ်မုၣ်ခွါဒိၣ်မးန့ၣ် ပတၢ်အဲၣ် ကမၤစၢၤပှၤလၢ ပကပျၢ်ကွံာ် အဝဲသ့ၣ်အတၢ်ကမၣ်. (ကလီး ၃:၁၃) ဒီးဖဲပပျၢ်ကွံာ် ပှၤဂၤအတၢ်ကမၣ်အခါ ပပာ်ဖျါထီၣ်လၢ ပအဲၣ်အဝဲသ့ၣ်ဒိၣ်မး ဒီးပဘၣ်သးမၤသးခု ယဟိဝၤယွၤအသး. တၢး၂၃.၁၁ ၁၁-၁၂ ¶၁၃-၁၅

ဖဲစီၤပၤယိၤၡံယၤ အိၣ်ဝဲ ၂၆ နံၣ်အခါ အစးထီၣ် ဘှီဂ့ၤထီၣ်က့ၤ ကစၢ်ယွၤ အတၢ်လုၢ်ဟံၣ်. ဖဲပှၤဘှီဂ့ၤထီၣ်က့ၤ တၢ်လုၢ်ဟံၣ်အခါ ပှၤထံၣ်န့ၢ်ဝဲ “ယဟိဝၤယွၤ အလံာ် တၢ်သိၣ်တၢ်သီတဘ့ၣ်လၢ အဟ့ၣ်လီၤဝဲ ခီဖျိလၢ စီၤမိၤၡ့.” ဖဲစီၤပၤနၢ်ဟူဝဲ ပှၤဖးထီၣ် လံာ်တၢ်သိၣ်တၢ်သီအံၤအခါ အဒိကနၣ်ဝဲ ဒီးအမၤထွဲဝဲ ဒ်လံာ်တၢ်သိၣ်တၢ်သီ အိၣ်ဝဲအသိး. (၂ ကွဲး ၃၄:၁၄, ၁၉-၂၁) နၤမီၤ နအဲၣ်ဒိး ဖးလံာ်စီဆှံ ကိးနံၤဒဲးဧါ. ဖဲနဖးလံာ်စီဆှံအခါ နမၤနီၣ်ဃာ် လံာ်စီဆှံအဆၢ လၢကကဲထီၣ် တၢ်မၤစၢၤလၢ နဂီၢ်ဧါ. ဖဲစီၤယိၤၡံယၤ အသးနံၣ် ကအိၣ်ဝဲ ၃၉ နံၣ်အခါ အမၤဘၣ်တၢ်ကမၣ်တခါ တုၤလၢအဘၣ်သံညါ. စီၤယိၤၡံယၤ နာ်န့ၢ်လီၤအသး ဒီးအတဃုကွၢ် ယဟိဝၤယွၤ အတၢ်ဟံးစုနဲၣ်ကျဲလၢၤဘၣ်. (၂ ကွဲး ၃၅:၂၀-၂၅) ဘၣ်ဃးဒီး တၢ်ဂ့ၢ်အံၤ ပန့ၢ်ဘၣ်တၢ်မၤလိလၢ ပသးနံၣ်မ့ၢ်ပှၢ် ဒီးပမၤလိ လံာ်စီဆှံ မ့ၢ်ယံာ်လံသနာ်က့ ပကဘၣ်ဆဲးဃုဒံး ယဟိဝၤယွၤ အတၢ်ဟံးစုနဲၣ်ကျဲ. တကးဒံးဘၣ် ပကဘၣ်ဃ့ထုကဖၣ် ဒ်သိး ယဟိဝၤယွၤ ကဟံးစုနဲၣ်ကျဲပှၤ, မၤလိအကလုၢ်ကထါထီဘိ ဒီးမၤထွဲ တၢ်ဟ့ၣ်ကူၣ်လၢ ဒီပုၢ်ဝဲၢ်မုၣ်ခွါလၢ အဒိၣ်တုာ်ခိၣ်ပှဲၤတဖၣ်ဟ့ၣ်ပှၤ. ပမ့ၢ်မၤတၢ်သ့ၣ်တဖၣ်အံၤန့ၣ် အကမၤစၢၤပှၤဒ်သိး ပတမၤဘၣ် တၢ်ကမၣ်ဖးဒိၣ်တဂ့ၤ ဒီးပကအိၣ်ဒီး တၢ်သးခု.—ယၤ ၁:၂၅. တၢး၂၃.၀၉ ၁၂ ¶၁၅-၁၆

လံာ်စီဆှံ ပာ်ဖျါထီၣ်ဝဲ ပိာ်မုၣ်လၢ အဒိဂ့ၤတဲာ်ဘၣ်န့ၣ် အိၣ်ဝဲအါဂၤ. အဝဲသ့ၣ် အဲၣ်ယဟိဝၤယွၤ ဒီးဘူၣ်ထီၣ်ဘါထီၣ်အီၤ. ပိာ်မုၣ်တဖၣ်အံၤ အဝဲသ့ၣ် “ပၢၤအတၢ်အိၣ်မူ ကိးသနၢၣ်” ဒီး “တီလၢ တၢ်ကိးမံၤဒဲးအပူၤ.” (၁ တံၤ ၃:၁၁) တကးဒံးဘၣ် ဒီပုၢ်ဝဲၢ်မုၣ်သးစၢ်တဖၣ် ကွၢ်လိဝဲ ဒီပုၢ်ဝဲၢ်မုၣ်လၢ အဒိၣ်တုာ်ခိၣ်ပှဲၤ လၢအအိၣ်လၢ အတၢ်အိၣ်ဖှိၣ်အပူၤသ့စ့ၢ်ကီး. ဒီပုၢ်ဝဲၢ်မုၣ်သးစၢ်သ့ၣ် ဆိကမိၣ်ထီၣ် ဒီပုၢ်ဝဲၢ်မုၣ်တဂၤဂၤလၢ အအိၣ်ဒီး တၢ်ဒိဂ့ၤတဲာ်ဘၣ် လၢနအဲၣ်ဒိးကွၢ်လိအီၤ. ပာ်သူၣ်ပာ်သး အဝဲသ့ၣ် အတၢ်ဂ့ၤတၢ်ဝါ ဒီးဆိကမိၣ်ထီၣ်လၢ နကကွၢ်လိအီၤဒ်လဲၣ်. ဒီးဒ်သိး နကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီအဂီၢ် နကဘၣ်အိၣ်ဒီး တၢ်ဂ့ၤတၢ်ဝါ လၢအရ့ဒိၣ်သၢခါ. ဒ်သိး ပိာ်မုၣ်တဂၤ ကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီအဂီၢ် အရ့ဒိၣ်ဒိၣ်မးလၢ အကဘၣ်အိၣ်ဒီး တၢ်ဆီၣ်လီၤသး. ပိာ်မုၣ်လၢ အအိၣ်ဒီး တၢ်ဆီၣ်လီၤသးန့ၣ် အအိၣ်ဒီး တၢ်ရ့လိာ်သးဒီး ယဟိဝၤယွၤ လၢအဂ့ၤ ဒီးအရ့ဒီးပှၤဂၤဂ့ၤဂ့ၤ. အဒိ ပိာ်မုၣ်လၢ အအဲၣ်ယဟိဝၤယွၤန့ၣ် အကပာ်ဖျါထီၣ် တၢ်ဆီၣ်လီၤသး ဒီးမၤထွဲဝဲ လံာ်စီဆှံ အတၢ်ဟံးစုနဲၣ်ကျဲ ဖဲ ၁ ကရံၣ်သူး ၁၁:၃. ဖဲန့ၣ် ယဟိဝၤယွၤ ပာ်လီၤတၢ်ရဲၣ်တၢ်ကျဲၤလၢ မတဂၤ ကဘၣ်တီခိၣ်ရိၤမဲ တၢ်အိၣ်ဖှိၣ်လဲၣ် ဒီးမတဂၤ ကဘၣ်တီခိၣ်ရိၤမဲ ဟံၣ်ဖိဃီဖိလဲၣ်. တၢး၂၃.၁၂ ၁၉ ¶၃-၅

ယဟိဝၤယွၤ ဘၣ်သးဝဲလၢ ဝၤတဂၤ ကအဲၣ်အမါ, ကကွၢ်ထွဲအီၤ ဒီးမၤလၢပှဲၤန့ၢ် အနီၢ်ခိ ဒီးအနီၢ်သးတၢ်လိၣ်ဘၣ်. အဃိ နမ့ၢ်မၤအါထီၣ် တၢ်သ့ဆိကမိၣ် ပဲာ်ထံနီၤဖးတၢ်, ပာ်ကဲ ဒီပုၢ်ဝဲၢ်မုၣ် ဒီးကဲပှၤလၢ ပှၤနာ်န့ၢ်အီၤသ့န့ၣ် ကမၤစၢၤနၤဒ်သိး နကကဲထီၣ် ဝၤလၢအဂ့ၤတဂၤ. တကးဒံးဘၣ် နကအိၣ်ကတီၤသးလၢ နကမၤလၢပှဲၤနမူဒါ ဒ်ဝၤဒီးဟံၣ်ခိၣ်အသိး. နဆီဟံၣ်ဆီဃီ ဝံၤအလီၢ်ခံ ဘၣ်သ့ၣ်သ့ၣ် နကဘၣ်သးကဲထီၣ်ပါ. အဃိ ဒ်သိးနကကဲထီၣ် ပါလၢအဂ့ၤတဂၤအဂီၢ် နဟံန့ၢ်တၢ်မၤလိ လၢယဟိဝၤယွၤ အအိၣ်ကသ့ဒ်လဲၣ်. (အ့း ၆:၄) အဒိ ယဟိဝၤယွၤ တဲဘၣ်အဖိခွါယ့ၣ်ၡူးလၢ အအဲၣ်အီၤ ဒီးအဘၣ်သူၣ်ဘၣ်သးအီၤ. (မး ၃:၁၇) အဃိ နမ့ၢ်ကဲထီၣ်ပါတဂၤန့ၣ် တဲဘၣ်နဖိလၢ နအဲၣ်အီၤထီဘိ. ဒီးပတြၢၤအဝဲသ့ၣ်လၢ တၢ်ဂ့ၤလၢအဝဲသ့ၣ်မၤဝဲတဖၣ်. နမ့ၢ်ကဲပါ လၢအကွၢ်လိ ယဟိဝၤယွၤန့ၣ် နကမၤစၢၤနဖိ ဒ်သိးအကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီ. အဃိ ခဲအံၤန့ၣ် နအိၣ်ကတီၤနသး လၢနကကဲထီၣ် ပါလၢအဂ့ၤတဂၤ သ့ခီဖျိ နပာ်ဖျါထီၣ်တၢ်အဲၣ် ဒီးသးအိၣ်ကွၢ်ထွဲ နဟံၣ်ဖိဃီဖိ ဒီးဒီပုၢ်ဝဲၢ်မုၣ်ခွါ လၢတၢ်အိၣ်ဖှိၣ်အပူၤ. တကးဒံးဘၣ် မၤလိနသး ဒ်သိးနကတဲအဝဲသ့ၣ်လၢ နအဲၣ်အီၤ ဒီးပာ်လုၢ်ပာ်ပှ့ၤအီၤ.—ယိၤ ၁၅:၉. တၢး၂၃.၁၂ ၂၈-၂၉ ¶၁၇-၁၈

ပကဲယဟိဝၤယွၤအခ့အပှၤ လၢအသးတီသနာ်က့ ပကထံၣ်ဘၣ်ဒံး တၢ်ကီတၢ်ခဲ ဒီးတၢ်ဆူးတၢ်ဆါ ဒ်သိးဒီး ပှၤဟီၣ်ခိၣ်ဖိအဂၤတဖၣ် ထံၣ်ဘၣ်ဝဲ. တကးဒံးဘၣ် ပှၤလၢအသးဟ့ ကစၢ်ယွၤအပှၤဂီၢ်မုၢ်တဖၣ် ကမၤအၢမၤနးပှၤ ဒီးထီဒါပှၤစ့ၢ်ကီး. ဒ်သိး တၢ်ကီတၢ်ခဲတဖၣ်အံၤ တဟဲဘၣ်ပှၤတဂ့ၤအဂီၢ် ယဟိဝၤယွၤ တတြီဃာ်ဝဲဘၣ်, သနာ်က့ အအၢၣ်လီၤပှၤလၢ အကမၤစၢၤပှၤ. (ၡါ ၄၁:၁၀) ဒီးခီဖျိလၢ ယဟိဝၤယွၤ မၤစၢၤပှၤအဃိ ပမ့ၢ်ထံၣ်ဘၣ် တၢ်အိၣ်သးကီခဲနးမး သနာ်က့ ပကဆဲးအိၣ်ဒီးတၢ်သးခု, ပကဆၢတဲာ်တၢ်လၢအဘၣ် ဒီးပကဆဲးတီဒီးအီၤ. ယဟိဝၤယွၤ အၢၣ်လီၤပှၤလၢ အကဟ့ၣ်ပှၤ “တၢ်သူၣ်မံသးမုာ်” လၢအဟဲလၢ အအိၣ်. (ဖံလံး ၄:၆, ၇) တၢ်သူၣ်မံသးမုာ်အံၤ အဲၣ်ဒိးတဲဝဲ တၢ်မုာ်တၢ်ခုၣ် လၢအဟဲကဲထီၣ်အသး ခီဖျိလၢ ပအိၣ်ဒီး တၢ်ရ့လိာ်သးလၢအဂ့ၤဒီး ယဟိဝၤယွၤအဃိ. တၢ်သူၣ်မံသးမုာ်အံၤ “အဒိၣ်န့ၢ်ယိာ်န့ၢ်တၢ်လၢ ပနၢ်ပၢၢ်အီၤ.” တၢ်ကတိၤတထံၣ်အံၤ အခီပညီမ့ၢ်ဝဲ တၢ်မုာ်တၢ်ခုၣ် လၢပတူၢ်ဘၣ်တခါအံၤန့ၣ် အဂ့ၤဒိၣ်န့ၢ် ပဆိကမိၣ်ဒံး. အဒိ ဖဲနဃ့ထုကဖၣ်ဝံၤအလီၢ်ခံ နတူၢ်ဘၣ်လၢ နသးခုၣ်လီၤ ဒီးသးမုာ်ထီၣ်က့ၤ သတူၢ်ကလာ်န့ၣ် အိၣ်တဘျီဘျီဧါ. နမ့ၢ်တူၢ်ဘၣ်ဒ်န့ၣ်န့ၣ် မ့ၢ်ဝဲခီဖျိလၢ နဒိးန့ၢ်ဘၣ် “တၢ်သူၣ်မံသးမုာ်လၢ အဟဲလၢ ကစၢ်ယွၤအအိၣ်” အဃိ. တၢး၂၄.၀၁ ၂၀ ¶၂; ၂၁ ¶၄

ပှၤလၢအအဲၣ် ကစၢ်ယွၤန့ၣ် အဝဲသ့ၣ်သးအိၣ် စံးထီၣ်ပတြၢၤ ကစၢ်ယွၤအမံၤ လၢအသးဒီဖျၢၣ်ညါ. စီၤဒၤဝံး သ့ၣ်ညါဝဲလၢ ဖဲပစံးထီၣ်ပတြၢၤ ယဟိဝၤယွၤ အမံၤအခါ အလီၤဂာ်ဒ်သိးဒီး ပစံးထီၣ်ပတြၢၤ ယဟိဝၤယွၤ အနီၢ်ကစၢ်. ဖဲပနၢ်ဟူ ယဟိဝၤယွၤအမံၤအခါ ပဆိကမိၣ်ထီၣ်ဃုာ်ဒီး အတၢ်ပာ်သူၣ်ပာ်သး, အတၢ်ဂ့ၤတၢ်ဝါ ဒီးအတၢ်မၤလၢ အလီၤလိၢ်လီၤလးတဖၣ်. စီၤဒၤဝံးအဲၣ်ဒိး ပာ်စီဆှံ ကစၢ်ယွၤအမံၤ ဒီးစံးထီၣ်ပတြၢၤအမံၤ. တကးဒံးဘၣ် အဘၣ်သး စံးထီၣ်ပတြၢၤ ကစၢ်ယွၤအမံၤ လၢအ “သးဒီဖျၢၣ်ညါ.” ပှၤလ့ၤဝံဖိစ့ၢ်ကီး ပာ်လီၤ တၢ်အဒိအတဲာ်လၢ ကစံးထီၣ်ပတြၢၤ ကစၢ်ယွၤအမံၤ. အဝဲသ့ၣ် အိၣ်ဒီးတၢ်ဆီၣ်လီၤသး ဒီးအၢၣ်လီၤတူၢ်လိာ်ဝဲလၢ တၢ်စံးထီၣ်ပတြၢၤလၢ ယဟိဝၤယွၤ ကြၢးဒိးန့ၢ်ဝဲန့ၣ် အဝဲသ့ၣ် တဲဖျါထီၣ်ဝဲလၢ တၢ်ကတိၤမၣ်တလၢာ်ဘၣ်. (ဃ့ ၉:၅) ဒီးပနာ်သပှၢ်တၢၢ်လၢ အဝဲသ့ၣ်အတၢ်ဆီၣ်လီၤသး ဒီးအတၢ်စံးထီၣ်ပတြၢၤ လၢအဟဲထီၣ်လၢ အသးဒီဖျၢၣ်ညါန့ၣ် မၤသးခု ယဟိဝၤယွၤအသးဒိၣ်မး. တၢး၂၄.၀၂ ၉ ¶၆

ပဖီတၢၣ်လၢ အတဘၣ်လိာ်သးဒီး ပတၢ်အိၣ်သးန့ၣ် ပမၤအီၤမ့ၢ်တန့ၢ်ဘၣ်နာ်က့ ယဟိဝၤယွၤ သ့ၣ်ညါဝဲ ဒီးအနၢ်ပၢၢ်စၢၤပှၤ. (၂ ကရံၣ် ၈:၁၂) ပမ့ၢ်ထံၣ်ဘၣ်ဒီး တၢ်မၤတံာ်တာ်နာ်က့ ပဟံန့ၢ်တၢ်မၤလိသ့. လံာ်စီဆှံတဲဝဲလၢ “ကစၢ်ယွၤန့ၣ် မ့ၢ်ပှၤတီပှၤလိၤ . . . အဃိ အဝဲတသးပ့ၤနီၣ် သုတၢ်မၤ” ဘၣ်. (ဧ့ၤ ၆:၁၀) နၤစ့ၢ်ကီး နဘၣ်ဆိမိၣ်ထီၣ်က့ၤ ဖီတၢၣ်လၢ နမၤအီၤန့ၢ်လၢညါတဖၣ် ဒ်သိးဒီး နမၤအိၣ်ထီၣ် နတၢ်ရ့လိာ်သးဒီး ယဟိဝၤယွၤ, နတဲဘၣ်ပှၤဂၤလၢ ယဟိဝၤယွၤအဂ့ၢ် ဒီးနဒိးဘျၢထံ. အဃိ တၢ်လၢနမၤတ့ၢ်တဖၣ်န့ၣ် တဘၣ်သးပ့ၤနီၣ်အီၤတဂ့ၤ. ဒ်နမၤလၢပှဲၤနဖီတၢၣ်လၢညါ န့ၢ်ဝဲအသိး ခဲအံၤစ့ၢ်ကီး နဆဲးမၤလၢပှဲၤနဖီတၢၣ်ကန့ၢ်. ခီဖျိလၢ ယဟိဝၤယွၤ အတၢ်မၤစၢၤအဃိ နမၤလၢပှဲၤနဖီတၢၣ်သ့. ဖဲနမၤလၢပှဲၤနဖီတၢၣ်အခါ နမ့ၢ်ဆိမိၣ်ထီၣ်က့ၤလၢ ယဟိဝၤယွၤ မၤစၢၤတ့ၢ်နၤဒ်လဲၣ်န့ၣ် နကသးခုစ့ၢ်ကီး. (၂ ကရံၣ် ၄:၇) အဃိ နမ့ၢ်တဟ့ၣ်အၡူဘၣ်န့ၣ် နကန့ၢ်ဘၣ် တၢ်ဆိၣ်ဂ့ၤအါမး.—ကလၤ ၆:၉. တၢး၂၃.၀၅ ၃၁ ¶၁၆-၁၈

ယဟိဝၤယွၤ ပာ်ဖျါထီၣ် ဒီးတဲဖျါထီၣ်ဝဲလၢ အအဲၣ်အပှၤဂီၢ်မုၢ် ဒီးအဘၣ်သူၣ်ဘၣ်သး အဝဲသ့ၣ်. အဒိ လၢလံာ်စီဆှံအပူၤန့ၣ် ပထံၣ်ဘၣ်လၢ ယဟိဝၤယွၤ တဲဘၣ်ယ့ၣ်ၡူးလၢ ယ့ၣ်ၡူးမ့ၢ်အဖိခွါ လၢအအဲၣ်ဝဲ ဒီးဘၣ်သူၣ်ဘၣ်သးဝဲန့ၣ် ခံဘျီ. (မး ၃:၁၇; ၁၇:၅) နၤမီၤ, နဘၣ်သးလၢ ယဟိဝၤယွၤ တဲနၤဒ်န့ၣ် စ့ၢ်ကီးဧါ. ယဟိဝၤယွၤ တတဲတၢ်ဒီးပှၤ လၢအနီၢ်ကစၢ်ဘၣ်, ဘၣ်ဆၣ် အတဲတၢ်ဒီးပှၤခီဖျိ အကလုၢ်ကထါ လံာ်စီဆှံ. ဖဲပဖးဘၣ်ဃးဒီး ယ့ၣ်ၡူးတဲတၢ်ဒီးအပျဲၢ်အဘီၣ် လၢတၢ်အဲၣ်တၢ်ကွံအခါ လီၤဂာ်ဒ်သိးဒီးပ “နၢ်ဟူ” ယဟိဝၤယွၤ တဲပှၤလၢ အဘၣ်သူၣ်ဘၣ်သးပှၤ. ယ့ၣ်ၡူးကွၢ်လိ ဒီးပာ်ဖျါထီၣ်က့ၤ အပါအတၢ်ဂ့ၤတၢ်ဝါ လၢလၢပှဲၤပှဲၤ. အဃိ ဖဲပဖးဘၣ်ဃးဒီး ယ့ၣ်ၡူး တဲဖျါထီၣ်လၢ အဘၣ်သူၣ်ဘၣ်သး အပျဲၢ်အဘီၣ်လၢ အတလၢတပှဲၤဘၣ် အဂ့ၢ်အခါ ပထံၣ်တမှံကွၢ်လၢ တၢ်လၢယ့ၣ်ၡူးတဲ အဝဲသ့ၣ်န့ၣ် လီၤဂာ်ဒ်သိး ယဟိဝၤယွၤတဲပှၤသ့. (ယိၤ ၁၅:၉, ၁၅) ဖဲပထံၣ်ဘၣ် တၢ်ကီတၢ်ခဲအခါ ဘၣ်သ့ၣ်သ့ၣ် ပကဆိကမိၣ်လၢ ယဟိဝၤယွၤ တဘၣ်သူၣ်ဘၣ်သးပှၤလၢၤဘၣ်. ဘၣ်ဆၣ် နီၢ်ကီၢ်န့ၣ် တၢ်ကီတၢ်ခဲတဖၣ်အံၤ ဒုးအိၣ်ထီၣ် တၢ်ခွဲးတၢ်ယာ်လၢ ပကပာ်ဖျါထီၣ်လၢ ပအဲၣ်ယဟိဝၤယွၤ ဒီးသန့ၤသးလၢအီၤ.—ယၤ ၁:၁၂. တၢး၂၄.၀၃ ၂၇-၂၈ ¶၁၀-၁၁