တၢ်ထုကဖၣ်တနီၤန့ၣ် ဘၣ်မနုၤအဃိ ကစၢ်ယွၤ တစံးဆၢဝဲဘၣ်လဲၣ်
ပမ့ၢ်ဃ့ထုကဖၣ်လၢ တၢ်သူၣ်ဘျၢသးဘျၢန့ၣ် ပပၢ်ယဟိဝၤယွၤ ဘၣ်သူၣ်ဘၣ်သးဝဲ ဒီးအသးအိၣ် ဒိကနၣ်ပှၤ. ဘၣ်ဆၣ် ကစၢ်ယွၤ တစံးဆၢ တၢ်ထုကဖၣ်ခဲလၢာ်ဘၣ်. ဘၣ်မနုၤအဃိလဲၣ်. ဒီးဖဲပဃ့ထုကဖၣ်အခါ ပကဘၣ် သ့ၣ်နီၣ်ထီၣ် တၢ်ဂ့ၢ်မနုၤလဲၣ်. လံာ်စီဆှံ ပာ်ဖျါထီၣ်ဝဲ တၢ်ဟ့ၣ်ကူၣ်တနီၤ.
“ဖဲသုဃ့ထုကဖၣ်တၢ်အခါ တဘၣ်တဲဝံၤတဲက့ၤ တၢ်ကတိၤ အလီၢ်လီၢ်တဖၣ် ဒ်ပှၤကလုာ်အဂၤတဖၣ် မၤဝဲအသိးန့ၣ်တဂ့ၤ.”—မးသဲ ၆:၇.
ယဟိဝၤယွၤ တအဲၣ်ဒိးလၢ ပတဲဝံၤတဲက့ၤ တၢ်ထုကဖၣ်လၢ ပတိၢ်ရူးဃာ်အီၤ မ့တမ့ၢ် ဖးထီၣ်တၢ်ကတိၤလၢ တၢ်ထုကဖၣ် အလံာ်ပူၤဘၣ်. အအဲၣ်ဒိးလၢ ပကတဲအီၤ တၢ်လၢအဟဲထီၣ်လၢ ပသးပူၤနီၢ်ကီၢ်. ဆိကမိၣ်ကွၢ် နသကိးတဂၤ မ့ၢ်ဟဲတဲနၤ တၢ်ကတိၤတလီၢ်လီၢ် တနံၤဝံၤတနံၤန့ၣ် နကတူၢ်ဘၣ်ဒ်လဲၣ်. အမ့ၢ်ကဲ နသကိးတဂၤလၢ နမုာ်ဒီးအီၤန့ၣ် အကတဲတၢ်ဒီးနၤ လၢတၢ်သူၣ်ဘျၢသးဘျၢ ဒီးအကတဲဖျါထီၣ် တၢ်အိၣ်လၢ အသးပူၤပျီပျီ. ဒ်န့ၣ်အသိး ဖဲပဃ့ထုကဖၣ်လၢ ပပၢ်အိၣ်လၢမူခိၣ် အအိၣ်အခါ ပမ့ၢ်တဲတၢ်ဒီးအီၤလၢ အဟဲထီၣ်လၢပသးပူၤန့ၣ် ပပာ်အီၤဒ်သိးဒီး အကဲပသကိးနီၢ်ကီၢ်.
“ဖဲသုဃ့တၢ်အခါ မ့ၢ်လၢ သုတၢ်တိာ်ပာ်တဂ့ၤဘၣ် . . . အဃိ သုတဒိးန့ၢ်ဘၣ်အီၤဘၣ်.”—ယၤကိာ် ၄:၃.
ပမ့ၢ်ဃ့တၢ်လၢ တဘၣ်ကစၢ်ယွၤ အသးဘၣ်န့ၣ် ပသ့ၣ်ညါလၢ အတစံးဆၢ ပတၢ်ထုကဖၣ်ဘၣ်. အဒိ ကစၢ်ယွၤ တဲဘၣ်ပှၤလၢ ပတဘၣ်ကဲပှၤလၢ အသူၣ်လီသးကွံတၢ် ဒီးတဘၣ် သန့ၤသးလၢ တၢ်ဘူၣ်ဂ့ၤတီၢ်ဂ့ၤဘၣ်. (ယၡါယၤ ၆၅:၁၁; လူၤကၣ် ၁၂:၁၅) အဃိ ပှၤတဂၤ မ့ၢ်တၤကျိၣ်တၤစ့ ဒီးဃ့လၢ ကစၢ်ယွၤ ကမၤစၢၤအီၤဒ်သိး အလိာ်ကွဲကနၢၤန့ၣ် မ့ၢ်ကစၢ်ယွၤ ကစံးဆၢအတၢ်ထုကဖၣ်ဧါ. ပသ့ၣ်ညါသပှၢ်တၢၢ်လၢ ကစၢ်ယွၤ တစံးဆၢဝဲဘၣ်. အဃိ ပမ့ၢ်အဲၣ်ဒိးလၢ ကစၢ်ယွၤ စံးဆၢပတၢ်ထုကဖၣ်န့ၣ် ပကဘၣ်ဃ့တၢ်ဒ် အဘၣ်လိာ်သးဒီး တၢ်လၢကစၢ်ယွၤ တဲဘၣ်ပှၤလၢ လံာ်စီဆှံအပူၤ.
“ပှၤလၢ အတအဲၣ်ဒိး ဒိကနၣ် တၢ်သိၣ်တၢ်သီဘၣ်န့ၣ်အတၢ်ထုကဖၣ် လီၤသးဘၣ်အၢဝဲလီၤ.”—ကတိၤဒိ ၂၈:၉.
လၢလံာ်စီဆှံအစိၤ ပှၤလၢအတဒိကနၣ် ကစၢ်ယွၤ အတၢ်သိၣ်တၢ်သီဘၣ်န့ၣ် ကစၢ်ယွၤ တစံးဆၢ အတၢ်ထုကဖၣ်ဘၣ်. (ယၡါယၤ ၁:၁၅, ၁၆) ခဲအံၤ ကစၢ်ယွၤ အတၢ်ထံၣ် အိၣ်ဒ်သိးဒီးလၢညါဒံး. (မၤလကံ ၃:၆) အဃိ ပမ့ၢ်အဲၣ်ဒိးလၢ ကစၢ်ယွၤ ကစံးဆၢ ပတၢ်ထုကဖၣ်န့ၣ် ပကဘၣ် ဂုာ်ကျဲးစၢး အိၣ်မူမၤထွဲ အတၢ်သိၣ်တၢ်သီ. ဘၣ်ဆၣ် ပမ့ၢ်မၤဘၣ်တၢ်ကမၣ် လၢအပူၤကွံာ်န့ၣ် မ့ၢ်ကစၢ်ယွၤ ကဒိကနၣ် ပတၢ်ထုကဖၣ်ဒံးဧါ. ပမ့ၢ်ပီၢ်ယၢ်လီၤက့ၤသး, တမၤတၢ်ကမၣ်လၢၤဘၣ် ဒီးဂုာ်ကျဲးစၢးမၤ ကစၢ်ယွၤ အတၢ်ဘၣ်သးန့ၣ် ပနာ်သ့သပှၢ်တၢၢ်လၢ ကစၢ်ယွၤ ကပာ်ဖျါထီၣ်တၢ်အဲၣ် ဒီးကပျၢ်ကွံာ် ပတၢ်ကမၣ်.—မၤတၢ် ၃:၁၉.