ပှၤဖးလံာ်ဖိတဖၣ် အတၢ်သံကွၢ်

ပှၤလၢအကွဲး ကတိၤဒိ ၃၀:၁၈, ၁၉ တဲဝဲလၢ “ပှၤပိာ်ခွါတဂၤ အတၢ်အိၣ်ထီၣ်အိၣ်လီၤ ဖဲအအိၣ်ဒီး ပိာ်မုၣ်တဂၤ အခါ” န့ၣ် ‘အနၢ်ပၢၢ်ဝဲ တသ့ဘၣ်.’ အအဲၣ်ဒိးတဲဝဲ အခီပညီဒ်လဲၣ်

ပှၤအါဂၤ ဃုာ်ဒီး ပှၤလၢအသ့ၣ်ညါ လံာ်စီဆှံအဂ့ၢ် ဂ့ၤဂ့ၤစ့ၢ်ကီးန့ၣ် အဝဲသ့ၣ် တနၢ်ပၢၢ်ဝဲ တၢ်ကတိၤတဖၣ်အံၤ အခီပညီဘၣ်. လံာ်စီဆှံ အဆၢတဖၣ်အံၤ ဟီၣ်ခိၣ်သီ တၢ်ကွဲးကျိာ်ထံ လံာ်စီဆှံ ကွဲးဖျါထီၣ်ဝဲလၢ “တၢ်လၢယနၢ်ပၢၢ်အီၤ တသ့ဘၣ်န့ၣ် အိၣ်ဝဲသၢမံၤ ဒီးတၢ်လၢ ယတနၢ်ပၢၢ်အီၤဘၣ်န့ၣ် အိၣ်ဝဲလွံၢ်မံၤလီၤ. [မ့ၢ်စ့ၢ်ကီး “တၢ်လၢအလီၤကမၢကမၣ် ဒိၣ်တလၢ လၢယဂီၢ်,” တၢ်ဂ့ၢ်အဘျဲၣ်], တၢ်လွံၢ်မံၤန့ၣ် မ့ၢ်ဝဲ လံာ်ကြီကြာ်လၢ အယူၤလၢမူခိၣ်, ဂုၢ်လၢအဘျိၣ်လၢ လၢၢ်အလိၤ, ကဘီလၢ အလဲၤတၢ်လၢ ပီၣ်လဲၣ်အပူၤ ဒီးပှၤပိာ်ခွါတဂၤ အတၢ်အိၣ်ထီၣ်အိၣ်လီၤ ဖဲအအိၣ်ဒီး ပိာ်မုၣ်တဂၤ အခါလီၤ.”—ကတိၤ ၃၀:၁၈, ၁၉.

လၢညါန့ၣ် ပနၢ်ပၢၢ်လၢ တၢ်ကတိၤ လၢအမ့ၢ် “ပှၤပိာ်ခွါတဂၤ အတၢ်အိၣ်ထီၣ်အိၣ်လီၤ ဖဲအအိၣ်ဒီး ပိာ်မုၣ်တဂၤ အခါ” န့ၣ် အဲၣ်ဒိးတဲဝဲ တၢ်လၢအတဂ့ၤဘၣ် တမံၤမံၤ. ဘၣ်မနုၤအဃိလဲၣ်. အဆၢဖိအဂၤ ဖဲအဆၢဒိၣ် ၃၀ န့ၣ် တဲဖျါထီၣ်ဝဲ တၢ်လၢအတတဲဝဲလၢ “ပှဲၤန့ၣ်ဘၣ်လံ” နီတဘျီဘၣ်န့ၣ် အိၣ်ဝဲစ့ၢ်ကီး. (ကတိၤ ၃၀:၁၅, ၁၆) ဒီးအဆၢဖိ ၂၀ တဲဘၣ်ဃးဒီး “ပိာ်မုၣ်လၢ အအဲၣ်ဘၢတၢ်တဂၤ” ဘၣ်ဆၣ် အတဲလၢ အတမၤကမၣ်တၢ် နီတမံၤဘၣ်. အဃိ ဒ်လံာ်ကြီကြာ်လၢ အယူၤလၢမူခိၣ်, ဂုၢ်လၢအဘျိၣ်လၢ လၢၢ်အလိၤ ဒီးကဘီလၢ အလဲၤတၢ်လၢ ပီၣ်လဲၣ်အပူၤအသိး ပဆိကမိၣ်လၢ ပိာ်ခွါတဂၤ ကမၤတၢ်တမံၤမံၤ ဒီးတၢ်လၢအမၤဝဲန့ၣ် မတဂၤမး တသ့ၣ်ညါဝဲဘၣ်. အဃိ ပဆိကမိၣ်လၢ တၢ်ကတိၤ လၢအမ့ၢ် “ပှၤပိာ်ခွါတဂၤ အတၢ်အိၣ်ထီၣ်အိၣ်လီၤ ဖဲအအိၣ်ဒီး ပိာ်မုၣ်တဂၤ အခါ” န့ၣ် အဲၣ်ဒိးတဲ ဘၣ်ဃးဒီး တၢ်မၤလၢအတဂ့ၤဘၣ် တမံၤမံၤ ဒ်သိးဒီး ပိာ်ခွါသးစၢ်တဂၤ ကူၣ်ထီၣ်တၢ်ဒ်သိး ပိာ်မုၣ်ဖိတဂၤ ကမံဃုာ်ဒီးအီၤ.

ဘၣ်ဆၣ် အဆၢဖိတဖၣ်အံၤ အဲၣ်ဒိးတဲဘၣ်ဃးဒီး တၢ်လၢအဂ့ၤစ့ၢ်ကီး. ဘၣ်မနုၤအဃိ ပတဲဒ်န့ၣ်လဲၣ်. ပှၤလၢအကွဲး တၢ်ဂ့ၢ်အံၤန့ၣ် အိၣ်ဒၣ်အကွဲးဖျါထီၣ်ဝဲ တၢ်ဂ့ၢ်လၢ အဒုးကမၢကမၣ်အီၤလီၤ.

လံာ်စီဆှံ အတၢ်ကွဲး လၢအခီၣ်ထံး လၢဧ့ၤဘြံၤကျိာ်န့ၣ် ပာ်ဖျါထီၣ်ဝဲလၢ အဆၢဖိတဖၣ်အံၤ အဲၣ်ဒိးတဲဘၣ်ဃးဒီး တၢ်လၢအဂ့ၤစ့ၢ်ကီး. လံာ်တဘ့ၣ်လၢ အၡဲပၠး ဘၣ်ဃးဒီး လံာ်စီဆှံလၢ ဧ့ၤဘြံၤကျိာ်န့ၣ် (Theological Lexicon of the Old Testament) ပာ်ဖျါထီၣ်ဝဲလၢ ဧ့ၤဘြံၤ အတၢ်ကတိၤဖဲ ကတိၤဒိ ၃၀:၁၈ လၢပှၤကွဲးကျိာ်ထံက့ၤလၢ “ယနၢ်ပၢၢ်အီၤတသ့ဘၣ်” န့ၣ် “အဲၣ်ဒိးတဲဝဲ တၢ်မၤအသးတခါလၢ အလီၤကမၢကမၣ် မ့တမ့ၢ် အဖျါလီၤဂာ်လၢ အကဲထီၣ်သး တသ့ဘၣ်.”

ခြီဖီၣ် ဟါဝဲ ထွါ လၢအကဲ ပှၤသိၣ်လိတၢ်လၢ ဟါဘၢၤ ဖၠၣ်စိမိၤကၠိ လၢကီၢ်အမဲရကၤန့ၣ် တဲစ့ၢ်ကီးဝဲလၢ လံာ်စီဆှံ အဆၢဖိတဖၣ်အံၤ တအဲၣ်ဒိးတဲ ဘၣ်ဃးဒီး တၢ်လၢအတဂ့ၤ တမံၤမံၤန့ၣ်ဘၣ်. အတဲဝဲလၢ “ပှၤလၢအကွဲး တၢ်ဂ့ၢ်အံၤန့ၣ် အဲၣ်ဒိးတဲ ဘၣ်ဃးဒီး တၢ်လၢအထံၣ်ဘၣ်ဝဲ တဖၣ်န့ၣ် အလီၤကမၢကမၣ်ဘၣ်အီၤ ဒိၣ်မး.”

အဃိ ပသ့ၣ်ညါဘၣ်လၢ တၢ်ကတိၤလၢ ပဖးဘၣ်ဖဲ ကတိၤဒိ ၃၀:၁၈, ၁၉ န့ၣ် အဲၣ်ဒိးတဲ ဘၣ်ဃးဒီး တၢ်လၢအလီၤကမၢကမၣ်ဖးဒိၣ် လၢပနၢ်ပၢၢ်အီၤ တသ့ဘၣ်. ပှၤကွဲးလံာ်စီဆှံဖိ တဂၤအံၤ ကမၢကမၣ်ဝဲ ဘၣ်ဃးဒီး လံာ်ကြီကြာ် ယူၤထီၣ်ဖးထီ လၢမူခိၣ်, ဂုၢ်လၢအဘျိၣ်လၢ လၢၢ်အလိၤချ့မး, ကဘီလၢ အဃၢတဘ့ၣ် လဲၤတၢ်လၢ ပီၣ်လဲၣ်အပူၤ ဒီးပှၤပိာ်မုၣ် ဒီးပှၤပိာ်ခွါခံဂၤ လီၤထွံလၢတၢ်အဲၣ် ပှဲၤဒီးတၢ်သးခု.