တၢ်မၤလိ ၁၈
ဖဲပထီၣ်တၢ်အိၣ်ဖှိၣ်အခါ ပဘၣ်ဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ
“မ်ပဆိကမိၣ်န့ၢ်တၢ်လၢ တဂၤဒီးတဂၤအဂီၢ် . . . , မ်ပဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ.”—ဧ့ၤဘြံၤ ၁၀:၂၄, ၂၅.
တၢ်သးဝံၣ် ၈၈ ဒုးသ့ၣ်ညါယၤ တၢ်လၢအဘၣ်နသး
တၢ်မၤလိအံၤ အတၢ်တိာ်ပာ်a
၁. ဖဲပထီၣ်တၢ်အိၣ်ဖှိၣ်အခါ ဘၣ်မနုၤအဃိ ပဟ့ၣ်တၢ်စံးဆၢလဲၣ်.
ဘၣ်မနုၤအဃိ ပထီၣ်တၢ်အိၣ်ဖှိၣ်လဲၣ်. တၢ်ဂ့ၢ်အရ့ဒိၣ်ကတၢၢ်လၢ ပထီၣ်တၢ်အိၣ်ဖှိၣ်န့ၣ် မ့ၢ်ဝဲဒ်သိး ပကစံးထီၣ်ပတြၢၤ ယဟိဝၤယွၤ. (စံးထီၣ်ပတြၢၤ ၂၆:၁၂; ၁၁၁:၁) ဒီးခဲအံၤန့ၣ် ပအိၣ်မူဘၣ်လၢ တၢ်ဆၢကတီၢ်ကီခဲအဃိ ပလဲၤထီၣ်တၢ်အိၣ်ဖှိၣ် ဒ်သိးပကဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤအဂီၢ်စ့ၢ်ကီး. (၁ သ့းစၤလနံ ၅:၁၁) အဃိ ဖဲပထီၣ်တၢ်အိၣ်ဖှိၣ်အခါ ပမ့ၢ်ယူာ်ထီၣ်စု ဒီးဟ့ၣ်တၢ်စံးဆၢန့ၣ် ကဲဝဲ ပစံးထီၣ်ပတြၢၤ ယဟိဝၤယွၤ ဒီးဟ့ၣ်ဂံၢ်ဟ့ၣ်ဘါ ပဒီပုၢ်ဝဲၢ်မုၣ်ခွါ.
၂. ဖဲပထီၣ်တၢ်အိၣ်ဖှိၣ်အခါ ပအိၣ်ဒီးတၢ်ခွဲးတၢ်ယာ်လၢ ပကစံးဆၢတၢ်လၢ အခါဖဲလဲၣ်.
၂ ကီးနွံဒဲးန့ၣ် ပအိၣ်ဒီးတၢ်ခွဲးတၢ်ယာ်လၢ ပကစံးဆၢတၢ်. အဒိ ဖဲပထီၣ်တၢ်အိၣ်ဖှိၣ်လၢ မုၢ်ဃုနံၤမ့တမ့ၢ်အိၣ်ဘှံးနံၤန့ၣ် ပအိၣ်ဒီးတၢ်ခွဲးတၢ်ယာ်လၢ ပကစံးဆၢတၢ် ဖဲပမၤလိသကီး တၢးထီခိးတၢ် တၢ်မၤလိ အဆၢကတီၢ်. မ့မ့ၢ်လၢ နွံဖးဖီတၢ်အိၣ်ဖှိၣ်န့ၣ် ပဟ့ၣ်တၢ်စံးဆၢသ့ဖဲ ပတဲသကီး နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်, တၢ်အိၣ်ဖှိၣ်တၢ်မၤလိ လံာ်စီဆှံ ဒီးတၢ်ရဲၣ်တၢ်ကျဲၤ အဂၤလၢ အအိၣ်ဒီး တၢ်သံကွၢ်စံးဆၢ.
၃. ပကစံးဆၢတၢ်အဂီၢ် တဘျီတခီၣ် ဘၣ်မနုၤအဃိ တညီဘၣ်လဲၣ် ဒီးဧ့ၤဘြံၤ ၁၀:၂၄, ၂၅ ကမၤစၢၤပှၤဒ်လဲၣ်.
၃ ပဝဲကီးဂၤဒဲးန့ၣ် ပဘၣ်သး စံးထီၣ်ပတြၢၤ ယဟိဝၤယွၤ ဒီးဟ့ၣ်ဂံၢ်ဟ့ၣ်ဘါ ပဒီပုၢ်ဝဲၢ်မုၣ်ခွါ. ဘၣ်ဆၣ် ပကစံးဆၢတၢ်အဂီၢ် တဘျီတခီၣ် တညီဘၣ်. အဒိ ပကစံးဆၢတၢ်အဂီၢ် ဘၣ်သ့ၣ်သ့ၣ် ပသးတနီး မ့တမ့ၢ် ပဘၣ်သးစံးဆၢတၢ် ဘၣ်ဆၣ် ဖဲပယူာ်ထီၣ်စုအခါ ဒီပုၢ်ဝဲၢ်ခွါ တကီးပှၤဘၣ်. ပမ့ၢ်ထံၣ်ဘၣ် တၢ်အိၣ်သးဒ်အံၤန့ၣ် ပကဘၣ်မၤဒ်လဲၣ်. ပမ့ၢ်ကွၢ်သကီး လံာ်ပရၢလၢ တၢ်မၢဖိပီလူး ကွဲးန့ၢ်ဝဲဧ့ၤဘြံၤခရံာ်ဖိန့ၣ် ပကသ့ၣ်ညါဘၣ်တၢ်စံးဆၢ. စီၤပီလူးတဲဝဲလၢ ဖဲပထီၣ်တၢ်အိၣ်ဖှိၣ်အခါ တၢ်အရ့ဒိၣ်ကတၢၢ်လၢ ပကဘၣ်မၤန့ၣ် အကဲဝဲ ပကဘၣ် “ဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ.” (ဖး ဧ့ၤဘြံၤ ၁၀:၂၄, ၂၅.) ဒ်သိး ပယူာ်ထီၣ်စု ဒီးဟ့ၣ်တၢ်စံးဆၢ ကဘူၣ်အဂီၢ် ပကဘၣ် သ့ၣ်နီၣ်ထီၣ်လၢ ပမ့ၢ်ဟ့ၣ်တၢ်စံးဆၢ ယိယိဖိနာ်က့ အကဲဘျုးဝဲလၢ ပဒီပုၢ်ဝဲၢ်မုၣ်ခွါအဂီၢ်. ဒီးဖဲပယူာ်ထီၣ်စုအခါ ပှၤမ့ၢ်တကီးပှၤနာ်က့ ပဒီပုၢ်ဝဲၢ်မုၣ်ခွါအဂၤ မ့ၢ်စံးဆၢဘၣ်တၢ်န့ၣ် ပသးခု.—၁ ပ့းတရူး ၃:၈.
၄. တၢ်ဂ့ၢ်သၢထံၣ်လၢ ပကတဲသကီးလၢ တၢ်မၤလိတခါအံၤန့ၣ် မ့ၢ်မနုၤလဲၣ်.
၄ လၢတၢ်မၤလိတခါအံၤ ပကတဲသကီး တၢ်ဂ့ၢ်သၢထံၣ်. တၢ, ပမ့ၢ်အိၣ်ဘၣ် တၢ်အိၣ်ဖှိၣ်လၢ ပှၤနီၣ်ဂံၢ်စှၤ ဒီးပှၤဟ့ၣ်ထီၣ်တၢ်စံးဆၢ မ့ၢ်တအိၣ်အါအါဘၣ်န့ၣ် ပဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ ကသ့ဒ်လဲၣ်. ခံ, ပမ့ၢ်အိၣ်ဘၣ် တၢ်အိၣ်ဖှိၣ်လၢ ပှၤနီၣ်ဂံၢ်အါ ဒီးပှၤယူာ်ထီၣ်စုလၢ ကဟ့ၣ်တၢ်စံးဆၢအဂီၢ် မ့ၢ်အိၣ်အါန့ၣ် ပဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ ကသ့ဒ်လဲၣ်. သၢ, ဒ်သိးပတၢ်စံးဆၢ ကကဲထီၣ်တၢ်ဟ့ၣ်ဂံၢ်ဟ့ၣ်ဘါအဂီၢ် ပကဘၣ်စံးဆၢတၢ်ဒ်လဲၣ်.
ပမ့ၢ်အိၣ်ဘၣ် တၢ်အိၣ်ဖှိၣ်လၢ ပှၤနီၣ်ဂံၢ်စှၤ
၅. ပမ့ၢ်ထီၣ်တၢ်အိၣ်ဖှိၣ်လၢ ပှၤနီၣ်ဂံၢ်အိၣ်စှၤန့ၣ် ပဟ့ၣ်ဂံၢ်ဟ့ၣ်ဘါလိာ်သး ကသ့ဒ်လဲၣ်.
၅ ပမ့ၢ်အိၣ်ဘၣ် တၢ်အိၣ်ဖှိၣ်လၢ ပှၤနီၣ်ဂံၢ်စှၤန့ၣ် တဘျီတခီၣ် ပှၤစံးဆၢတၢ် တအိၣ်အါအါဘၣ်. အဃိ ဒ်သိးပှၤဖီၣ်မူဒါတဂၤ ကကီးထီၣ်ပှၤလၢ ကစံးဆၢတၢ်အဂီၢ် အကဘၣ် အိၣ်ခီးဝဲတစဲးဖိ. ဖဲပထီၣ်တၢ်အိၣ်ဖှိၣ်အခါ ပှၤစံးဆၢတၢ်မ့ၢ်တအိၣ်ဘၣ်န့ၣ် တၢ်ကကၢၣ်ပသး ဒီးပတန့ၢ်ဂံၢ်န့ၢ်ဘါဘၣ်. အဃိ ပကဘၣ်ကျဲးစၢး ယူာ်ထီၣ်စု လၢပကစံးဆၢတၢ်ထီဘိ. ပမ့ၢ်မၤဒ်န့ၣ်န့ၣ် ကကဲထီၣ်တၢ်ဂံၢ်တၢ်ဘါလၢ ပဒီပုၢ်ဝဲၢ်မုၣ်ခွါအဂီၢ် ဒီးအဝဲသ့ၣ်စ့ၢ်ကီး ကဘၣ်သးစံးဆၢတၢ်အါထီၣ်.
၆-၇. ဒ်သိးပယူာ်ထီၣ်စု ဒီးစံးဆၢတၢ်ကဘူၣ်အဂီၢ် ပကဘၣ်မၤဒ်လဲၣ်.
၆ နကစံးဆၢတၢ်အဂီၢ် နမ့ၢ်သးတနီးဟီန့ၣ် နကဘၣ်မၤဒ်လဲၣ်. ပဝဲအါဂၤန့ၣ် ပကစံးဆၢတၢ်အဂီၢ် ပသးတနီး. ဘၣ်ဆၣ် ပဘၣ်သး ဟ့ၣ်ဂံၢ်ဟ့ၣ်ဘါ ပဒီပုၢ်ဝဲၢ်မုၣ်ခွါအဃိ ဖဲပဟ့ၣ်ထီၣ် တၢ်စံးဆၢအခါ ဒ်သိး ပတသးတနီးအါအါတဂ့ၤအဂီၢ် ပကဘၣ်မၤဒ်လဲၣ်.
၇ ပမ့ၢ်ဃုကွၢ် တၢ်ဟ့ၣ်ကူၣ်တနီၤလၢ တၢးထီခိးတၢ်b လၢအပူၤကွံာ်န့ၣ် ကကဲထီၣ် တၢ်မၤစၢၤလၢပဂီၢ်. အဒိ ပကဘၣ် ကတဲာ်ကတီၤပာ်စၢၤ တၢ်မၤလိဂ့ၤဂ့ၤ. (ကတိၤဒိ ၂၁:၅) ပမ့ၢ်သ့ၣ်ညါပာ် တၢ်ဂ့ၢ်ဂ့ၤဂ့ၤန့ၣ် ပယူာ်ထီၣ်စုကဘူၣ် ဒီးဖဲပစံးဆၢတၢ်အခါ ပတသးတနီးအါအါလၢၤဘၣ်. တကးဒံးဘၣ် ပကဘၣ် စံးဆၢတၢ်ဖုၣ်ဖုၣ်ဖိ ဒီးယိယိဖိ. (ကတိၤဒိ ၁၅:၂၃; ၁၇:၂၇) ပတၢ်စံးဆၢမ့ၢ်ဖုၣ်န့ၣ် ပတဘၣ်ယိၣ်တၢ် အါအါဘၣ်. ပမ့ၢ်ဟ့ၣ်တၢ်စံးဆၢ ဖုၣ်ဖုၣ်ဖိ တကျိၤခံကျိၤန့ၣ် ပဒီပုၢ်ဝဲၢ်မုၣ်ခွါ ကနၢ်ပၢၢ်ဝဲဒိၣ်န့ၢ် ပဟ့ၣ်တၢ်စံးဆၢဖးထီဒံး. ပမ့ၢ်စံးဆၢတၢ်ဖုၣ်ဖုၣ်ဖိ လၢအဟဲထီၣ်လၢ ပသးပူၤန့ၣ် ပပာ်ဖျါထီၣ်လၢ ပကတဲာ်ကတီၤပာ်စၢၤတၢ်ဂ့ၢ် လီၤတံၢ်လီၤဆဲး ဒီးပနၢ်ပၢၢ်အီၤဂ့ၤဂ့ၤ.
၈. နကျဲးစၢးမၤထွဲ တၢ်ဟ့ၣ်ကူၣ်လၢ နကဟ့ၣ်တၢ်စံးဆၢန့ၣ် ယဟိဝၤယွၤ ထံၣ်ဝဲဒ်လဲၣ်.
၈ ဘၣ်သ့ၣ်သ့ၣ် နကျဲးစၢးမၤထွဲ တၢ်ဟ့ၣ်ကူၣ်တဖၣ်အံၤလံ. ဘၣ်ဆၣ် နဘၣ်ယိၣ်တၢ်ဒံး ဒီးနစံးဆၢတၢ် ဘူၣ်ထဲတဘျီခံဘျီလီၤ. နမ့ၢ်ဘၣ်ယိၣ်တၢ်ဒံးနာ်က့ သးဟးဂီၤတဂ့ၤ. ယဟိဝၤယွၤ ပာ်လုၢ်ပာ်ပှ့ၤ နတၢ်ကျဲးစၢး. (လူၤကၣ် ၂၁:၁-၄) တကးဒံးဘၣ် တၢ်လၢပမၤတသ့ဘၣ်န့ၣ် ယဟိဝၤယွၤ တမၢန့ၢ်ဆူၣ်ပှၤဘၣ်. (ဖံလံးပံၤ ၄:၅) အဃိ ပာ်လီၤဖီတၢၣ်လၢ နမၤအီၤသ့ ဒီးပာ်လီၤဖီတၢၣ်လၢ နကစံးဆၢတၢ် ဒီးဃ့ယဟိဝၤယွၤလၢ ကမၤစၢၤနၤဒ်သိး နကပာ်သးမုာ်မုာ်. အဆိကတၢၢ်န့ၣ် ပာ်လီၤဖီတၢၣ်လၢ နကစံးဆၢတၢ်ဖုၣ်ဖုၣ်ဖိ.
ပမ့ၢ်အိၣ်ဘၣ် တၢ်အိၣ်ဖှိၣ်လၢ ပှၤနီၣ်ဂံၢ်အါ
၉. လၢတၢ်အိၣ်ဖှိၣ်ပူၤ ပှၤနီၣ်ဂံၢ်အိၣ်မ့ၢ်အါန့ၣ် ဘၣ်မနုၤအဃိ ပတဟ့ၣ်ဘၣ်တၢ်စံးဆၢ အါအါဘၣ်လဲၣ်.
၉ လၢတၢ်အိၣ်ဖှိၣ်ပူၤ ပှၤနီၣ်ဂံၢ်အိၣ်မ့ၢ်အါန့ၣ် နကထံၣ်ဘၣ် တၢ်အိၣ်သးကီခဲ လၢအဂၤတမံၤစ့ၢ်ကီး. ဒီပုၢ်ဝဲၢ်မုၣ်ခွါအိၣ်အါ ဒီးအဝဲသ့ၣ် ဘၣ်သးစံးဆၢတၢ်အဃိ ဘၣ်သ့ၣ်သ့ၣ် ပှၤတကီးဘၣ်နၤ အါအါဘၣ်. အဒိ ဒီပုၢ်ဝဲၢ်မုၣ်ဒဲၤနံၤယဲ ထံၣ်ဘၣ်တၢ်အိၣ်သးဒ်န့ၣ်.c ဒီပုၢ်ဝဲၢ်မုၣ်ဒဲၤနံၤယဲန့ၣ် အစံးဆၢတၢ်လၢ တၢ်အိၣ်ဖှိၣ်ပူၤမုာ်မး. အဟ့ၣ်တၢ်စံးဆၢန့ၣ် အပာ်ဝဲဒ်သိးဒီး တၢ်ဘူၣ်ထီၣ်ဘါထီၣ် ယဟိဝၤယွၤ, တၢ်ဟ့ၣ်ဂံၢ်ဟ့ၣ်ဘါပှၤဂၤ ဒီးအမၤဂၢၢ်ကျၢၤဒိၣ်ထီၣ် အတၢ်နာ်လံာ်စီဆှံစ့ၢ်ကီး. ဘၣ်ဆၣ် ဖဲအလဲၤပၠီလၢ တၢ်အိၣ်ဖှိၣ်လၢ ပှၤနီၣ်ဂံၢ်အါအခါ အကစံးဆၢတၢ်အဂီၢ် ပှၤတကီးအီၤအါအါလၢၤဘၣ်. တဘျီတခီၣ် အမၣ်တစံးဆၢဘၣ်တၢ် နီဖျၢၣ်ဘၣ်. အဃိ အတဲဝဲလၢ “ယသးတမုာ်နီကၠဲးဘၣ်, ယတူၢ်ဘၣ်လၢ ယတၢ်ခွဲးတၢ်ယာ် တအိၣ်လၢၤဘၣ်. အဃိ ဖဲတၢ်ကဲထီၣ်သးဒ်အံၤ တဘျီဝံၤတဘျီအခါ ယဆိမိၣ်လၢ မ့ၢ်ပှၤတဘၣ်သး ကီးယၤဘၣ်ဟီဧါ.”
၁၀. ဒ်သိးနကစံးဆၢဘၣ်တၢ်အဂီၢ် နကဘၣ်မၤဒ်လဲၣ်.
၁၀ နၤမီၤ နတၢ်အိၣ်သး လီၤဂာ်ဒ်သိးဒီး ဒီပုၢ်ဝဲၢ်မုၣ် ဒဲၤနံၤယဲကၠ့ၤဧါ. မ့ၢ်လီၤဂာ်ဒု ဘၣ်သ့ၣ်သ့ၣ် နတဘၣ်သး စံးဆၢတၢ်လၢၤဘၣ် ဒီးအိၣ်ဒၣ်နကဆ့ၣ်နီၤ ကနၣ်တၢ်လီၤ. ဘၣ်ဆၣ် တဘၣ်ဟ့ၣ်အၡူလၢ နကစံးဆၢတၢ်တဂ့ၤ. ဒီးဒ်သိးနကစံးဆၢဘၣ်တၢ်အဂီၢ် နကဘၣ်မၤဒ်လဲၣ်. ကတဲာ်ကတီၤပာ်စၢၤ တၢ်စံးဆၢအါဖျၢၣ်. ဖဲတၢ်မၤလိစးထီၣ်သးအခါ နမ့ၢ်တစံးဆၢဘၣ်တၢ်ဘၣ်နာ်က့ ဘူးထီၣ်လၢ တၢ်မၤလိကကတၢၢ်န့ၣ် နကစံးဆၢဘၣ်တၢ်ဒံး. ဒီးဖဲနကတဲာ်ကတီၤ တၢးထီခိးတၢ် တၢ်မၤလိအခါ ဆိမိၣ်ထီၣ်လၢ လံာ်အဆၢတဖၣ် ဘၣ်ထွဲဒီး တၢ်ဂ့ၢ်မိၢ်ပှၢ်ဒ်လဲၣ်. နမ့ၢ်မၤဒ်န့ၣ်န့ၣ် နကဟ့ၣ်ဘၣ် တၢ်စံးဆၢတခါခါ လၢတၢ်မၤလိအံၤအဂီၢ်. တကးဒံးဘၣ် တၢ်ဂ့ၢ်အဒိၣ်အယိာ်လၢ လံာ်အဆၢတနီၤန့ၣ် ပှၤစံးဆၢဘၣ်ဝဲကီအဃိ ပှၤတစံးဆၢဝဲအါအါဘၣ်. အဃိ နကဘၣ်မၤဒ်လဲၣ်. နကတဲာ်ကတီၤပာ်စၢၤ တၢ်စံးဆၢတနီၤလၢ တၢ်ဂ့ၢ်အဒိၣ်အယိာ်အဂီၢ်သ့. (၁ ကရံၣ်သူး ၂:၁၀) ဒီးနမၤထွဲတၢ်ဟ့ၣ်ကူၣ်တဖၣ်အံၤလံ ဘၣ်ဆၣ် နတစံးဆၢဘၣ်တၢ်ဘၣ် မ့ၢ်အိၣ်တဘျုးနွံလံန့ၣ် နကဘၣ်မၤဒ်လဲၣ်. တချုးလၢ တၢ်အိၣ်ဖှိၣ် စးထီၣ်ဒံးဘၣ်န့ၣ် လဲၤတဲတၢ်ဒီး ပှၤဖီၣ်မူဒါတဂၤန့ၣ် ဒီးတဲအီၤလၢ နဘၣ်သးစံးဆၢ တၢ်သံကွၢ် ဖဲလဲၣ်တဖျၢၣ်.
၁၁. ဖံလံးပံၤ ၂:၄ ဟ့ၣ်ကူၣ်ပှၤလၢ ပကမၤမနုၤလဲၣ်.
၁၁ ဖး ဖံလံးပံၤ ၂:၄. တၢ်မၢဖိပီလူး ဟ့ၣ်ကူၣ်ပှၤလၢ ပကဆိကမိၣ်န့ၢ်တၢ်လၢ ပှၤဂၤအဂီၢ်. အဃိ ဖဲပထီၣ်တၢ်အိၣ်ဖှိၣ်အခါ ပမၤထွဲ တၢ်ဟ့ၣ်ကူၣ်အံၤ ကသ့ဒ်လဲၣ်. ပကဘၣ်နီၣ်ထီၣ်လၢ ပမ့ၢ်ဘၣ်သးစံးဆၢတၢ်န့ၣ် ပှၤဂၤစ့ၢ်ကီး ဘၣ်သးစံးဆၢတၢ်စ့ၢ်ကီး.
ဖဲပတဲသကီးတၢ်ဒီးပှၤဂၤအခါ ပပျဲလၢပှၤဂၤကတဲတၢ် ဒီးဖဲပထီၣ်တၢ်အိၣ်ဖှိၣ်အခါစ့ၢ်ကီး ပပျဲလၢ ပှၤဂၤကစံးဆၢတၢ် (ကွၢ်လံာ်အဆၢ ၁၂)
၁၂. ဖဲပထီၣ်တၢ်အိၣ်ဖှိၣ်အခါ ပဟ့ၣ်ဂံၢ်ဟ့ၣ်ဘါ ပဒီပုၢ်ဝဲၢ်မုၣ်ခွါ ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၂ အဒိ ဆိမိၣ်ကွၢ်ဒ်အံၤ. ဖဲနတဲတၢ်ဒီး နသကီးအခါ နဘၣ်သးတဲတၢ် တဂၤလီၤဧါ. နတဘၣ်သးမၤ ဒ်န့ၣ်ဘၣ်. နဘၣ်သးလၢ အကတဲတၢ်စ့ၢ်ကီး. ဒ်န့ၣ်အသိး လၢတၢ်အိၣ်ဖှိၣ်စ့ၢ်ကီး ပဘၣ်သးနၢ်ဟူလၢ ပဒီပုၢ်ဝဲၢ်မုၣ်ခွါအါဂၤ ကစံးဆၢတၢ်. အဃိပဟ့ၣ်ဂံၢ်ဟ့ၣ်ဘါ အဝဲသ့ၣ်သ့ခီဖျိ ပဟ့ၣ်အဝဲသ့ၣ် တၢ်ခွဲးတၢ်ယာ်လၢ ကတဲဖျါထီၣ် အတၢ်နာ်. (၁ ကရံၣ်သူး ၁၀:၂၄) ပဟ့ၣ်အဝဲသ့ၣ် တၢ်ခွဲးတၢ်ယာ် ကသ့ဒ်လဲၣ်န့ၣ် ခဲအံၤပကတဲသကီး.
၁၃. ဒ်သိး ပဒီပုၢ်ဝဲၢ်မုၣ်ခွါအါဂၤ ကစံးဆၢဘၣ်တၢ်အဂီၢ် ပကဘၣ်မၤဒ်လဲၣ်.
၁၃ ဒ်သိး ပဒီပုၢ်ဝဲၢ်မုၣ်ခွါအါဂၤ ကစံးဆၢဘၣ်တၢ်အဂီၢ် အဆိကတၢၢ်န့ၣ် ပကဘၣ် စံးဆၢတၢ်ဖုၣ်ဖုၣ်ဖိ. ဘၣ်ဃးဒီး တၢ်ဂ့ၢ်အံၤန့ၣ် တၢ်အိၣ်ဖှိၣ်သးပှၢ် ဒီးတၢ်အိၣ်ဖှိၣ်ဖိလၢ အတၢ်လဲၤခီဖျိအါန့ၣ် ကဘၣ်ပာ်လီၤ တၢ်အဒိလၢအဂ့ၤ. နမ့ၢ်ဟ့ၣ် တၢ်စံးဆၢဖုၣ်ဖုၣ်ဖိနာ်က့ တဘၣ်တဲဖျါထီၣ် တၢ်ဂ့ၢ်ကီးထံၣ်ဒဲးတဂ့ၤ. နမ့ၢ်တဲဖျါထီၣ် တၢ်ဂ့ၢ်ကီးထံၣ်ဒဲးလၢ လံာ်အဆၢအပူၤန့ၣ် ဘၣ်သ့ၣ်သ့ၣ် ပှၤဂၤတစံးဆၢဘၣ်တၢ်လၢၤဘၣ်. အဒိ လၢလံာ်အဆၢတဆၢအံၤန့ၣ် တၢ်ဟ့ၣ်ကူၣ်အိၣ်ဝဲခံထံၣ် လၢအမ့ၢ် ပကဘၣ် စံးဆၢတၢ်ဖုၣ်ဖုၣ်ဖိ ဒီးပတဘၣ်တဲဖျါထီၣ် တၢ်ဂ့ၢ်ကီးထံၣ်ဒဲးဘၣ်. အဃိ ပှၤမ့ၢ်ကီးဆိနၤ လၢနကစံးဆၢ လံာ်အဆၢတဆၢအံၤန့ၣ် ဖဲနစံးဆၢတၢ်အခါ တဲဖျါထီၣ်ထဲ တၢ်ဂ့ၢ်တထံၣ်.
ဘၣ်သ့ၣ်သ့ၣ် ပတယူာ်ထီၣ်စု လၢအခါဖဲလဲၣ် (ကွၢ်လံာ်အဆၢ ၁၄)f
၁၄. နကစံးဆၢတၢ် ပှဲၤဘျီလဲၣ်န့ၣ် နဆိမိၣ်ပာ်စၢၤ ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၄ နကစံးဆၢတၢ် ပှဲၤဘျီလဲၣ်န့ၣ် နဘၣ်ဆိမိၣ်ပာ်စၢၤစ့ၢ်ကီး. ပှၤဂၤ မ့ၢ်တစံးဆၢဘၣ်တၢ်ဒံးဘၣ်, ဘၣ်ဆၣ် နမ့ၢ်ယူာ်ထီၣ်စုမၢ်မၢ်န့ၣ် ပှၤဖီၣ်မူဒါတဂၤ ကတူၢ်ဘၣ်လၢ အဘၣ်ကီးထဲနၤ. အဃိဘၣ်သ့ၣ်သ့ၣ် ပှၤဂၤယူာ်ထီၣ်စုလၢ ကစံးဆၢတၢ်အဂီၢ် တဘူၣ်လၢၤဘၣ်.—စံၣ်တဲၤတဲလီၤတၢ် ၃:၇.
၁၅. (က) ပကစံးဆၢတၢ်အဂီၢ် ပှၤမ့ၢ်တကီးပှၤဘၣ်နာ်က့ ပကဘၣ်အိၣ်ဒီးတၢ်ထံၣ်ဒ်လဲၣ်. (ခ) ပှၤဖီၣ်မူဒါတဂၤ ဆိမိၣ်န့ၢ်တၢ်လၢ ပှၤကီးဂၤဒဲးအဂီၢ် ကသ့ဒ်လဲၣ်. (ကွၢ်တၢ်လွံၢ်နၢၣ် လၢအမ့ၢ် “ဖဲနဖီၣ်မူဒါအခါ.”)
၁၅ ဖဲပမၤလိသကီးတၢ်ဂ့ၢ်အခါ ပှၤယူာ်ထီၣ်စုမ့ၢ်အါန့ၣ် ပတစံးဆၢဘၣ်တၢ် ဒ်ပဘၣ်သးစံးဆၢ ကီးဘျီဒဲးဘၣ်. တဘျီတခီၣ်န့ၣ် ပှၤဖီၣ်မူဒါတဂၤ မၣ်တကီးပှၤ နီတဘျီဘၣ်. အဃိ ဘၣ်သ့ၣ်သ့ၣ် ပသးတမုာ်ဘၣ်. ပှၤမ့ၢ်တကီးပှၤဘၣ်နာ်က့ ပတဘၣ်သးထီၣ်တၢ်ဘၣ်.—စံၣ်တဲၤတဲလီၤတၢ် ၇:၉.
၁၆. ပဟ့ၣ်ဂံၢ်ဟ့ၣ်ဘါ ပှၤလၢအဟ့ၣ်တၢ်စံးဆၢတဖၣ် ကသ့ဒ်လဲၣ်.
၁၆ ပမ့ၢ်တစံးဆၢဘၣ်တၢ် အါအါဘၣ်န့ၣ် ဖဲပှၤစံးဆၢတၢ်အခါ ပကဒိကနၣ်အီၤထံထံ, ဒီးတၢ်အိၣ်ဖှိၣ်မ့ၢ်ဝံၤန့ၣ် ပကပတြၢၤအဝဲသ့ၣ်. ပမ့ၢ်ပတြၢၤ ပဒီပုၢ်ဝဲၢ်မုၣ်ခွါန့ၣ် အဝဲသ့ၣ်ကန့ၢ်ဂံၢ်န့ၢ်ဘါ အဃိလီၤဂာ်ဒ်သိးဒီး ပဟ့ၣ်ထီၣ်တၢ်စံးဆၢလီၤ. (ကတိၤဒိ ၁၀:၂၁) အဃိ ပမ့ၢ်ပတြၢၤပှၤဂၤန့ၣ် မ့ၢ်ဒၣ် ပဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ.
ပဟ့ၣ်ဂံၢ်ဟ့ၣ်ဘါလိာ်သး လၢအဂၤသ့ဒံး
၁၇. (က) မိပါတဖၣ် မၤစၢၤအဖိလၢ ကကတဲာ်ကတီၤပာ်စၢၤ တၢ်စံးဆၢလၢ ကြၢးဒီးအဝဲသ့ၣ် ကသ့ဒ်လဲၣ်. (ခ) ဖဲပကတဲာ်ကတီၤပာ်စၢၤ တၢ်စံးဆၢအခါ တၢ်ဂ့ၢ်လွံၢ်ထံၣ်လၢ တၢ်ဂီၤမူပာ်ဖျါဝဲန့ၣ် ပမၤထွဲအီၤ ကသ့ဒ်လဲၣ်. (ကွၢ်စ့ၢ်ကီး တၢ်ဂ့ၢ်အဘျဲၣ်.)
၁၇ ဖဲပထီၣ်တၢ်အိၣ်ဖှိၣ်အခါ ပဟ့ၣ်ဂံၢ်ဟ့ၣ်ဘါလိာ်သး လၢအဂၤသ့ဒံး. နမ့မ့ၢ် မိပါန့ၣ် မၤစၢၤနဖိလၢ ကကတဲာ်ကတီၤပာ်စၢၤ တၢ်စံးဆၢတဖၣ်လၢ ကြၢးဒီးအဝဲသ့ၣ်သးနံၣ်. (မးသဲ ၂၁:၁၆) တဘျီတခီၣ် လၢတၢ်အိၣ်ဖှိၣ်ပူၤန့ၣ် ပှၤမၤလိတၢ်ဂ့ၢ်အရ့ဒိၣ် ဒ်သိးဒီး တၢ်ဆီဟံၣ်ဆီဃီ ဒီးလုၢ်လၢ်သကဲာ်ပဝးအဂ့ၢ်. ဘၣ်ဆၣ် ဘၣ်သ့ၣ်သ့ၣ် လံာ်အဆၢကအိၣ်ဝဲ တဆၢခံဆၢလၢ ဖိသၣ်တဖၣ်ဟ့ၣ်ဝဲ တၢ်စံးဆၢသ့. ဒီးဖဲနဖိယူာ်ထီၣ်စုအခါ တဘျီတခီၣ် ဘၣ်မနုၤအဃိ ပှၤတကီးအဝဲသ့ၣ်ဘၣ်လဲၣ်န့ၣ် နကဘၣ်ၡဲပၠးအဝဲသ့ၣ်. နမ့ၢ်ၡဲပၠးအဝဲသ့ၣ်န့ၣ် ကမၤစၢၤအဝဲသ့ၣ်ဒ်သိး အသးတဟးဂီၤ ညီညီဘၣ်.—၁ တံၤမသ့း ၆:၁၈.d
၁၈. ဖဲပစံးဆၢတၢ်အခါ ပကဘၣ်ပလီၢ်သးလၢ မနုၤလဲၣ်. (ကတိၤဒိ ၂၇:၂)
၁၈ ပဝဲခဲလၢာ်န့ၣ် ပကတဲာ်ကတီၤပာ်စၢၤ တၢ်စံးဆၢလၢ ကမၤလၤကပီၤ ယဟိဝၤယွၤ ဒီးဟ့ၣ်ဂံၢ်ဟ့ၣ်ဘါ ပဒီပုၢ်ဝဲၢ်မုၣ်ခွါတဖၣ်သ့. (ကတိၤဒိ ၂၅:၁၁) တဘျီတခီၣ်န့ၣ် ပဟ့ၣ်ထီၣ်တၢ်စံးဆၢ ဘၣ်ဃး ပနီၢ်ကစၢ်တၢ်လဲၤခီဖျိ ဖုၣ်ဖုၣ်ဖိ, ဘၣ်ဆၣ် ပတဘၣ် တဲဘၣ်ဃး ပနီၢ်ကစၢ်အဂ့ၢ်အါတလၢဘၣ်. (ဖး ကတိၤဒိ ၂၇:၂; ၂ ကရံၣ်သူး ၁၀:၁၈) ဘၣ်မနုၤအဃိလဲၣ်န့ၣ် ဖဲပစံးဆၢတၢ်အခါ ပကဘၣ် သးစၢၢ်ဆၢဒိၣ်လၢ ယဟိဝၤယွၤ, အကလုၢ်ကထါ ဒီးအပှၤဂီၢ်မုၢ်ဟီ. (လီၣ်ဖျါ ၄:၁၁) ဘၣ်ဆၣ် လံာ်အဆၢအတၢ်သံကွၢ် မ့ၢ်မၢပတဲဖျါထီၣ် ပနီၢ်ကစၢ်တၢ်လဲၤခီဖျိန့ၣ် ပတဲဖျါထီၣ် ပတၢ်လဲၤခီဖျိ လၢအဘၣ်ဃးဒီး လံာ်အဆၢသ့. ဘၣ်ဃး တၢ်ဂ့ၢ်အံၤန့ၣ် ပကတဲသကီးလၢ လံာ်အဆၢလၢခံတဆၢ.
၁၉. (က) ပမ့ၢ်ပာ်ဖျါထီၣ်လၢ ပဆိမိၣ်န့ၢ်တၢ်လၢ ပှၤဟဲထီၣ်တၢ်အိၣ်ဖှိၣ်အဂီၢ်န့ၣ် ကကဲဘျုးဒ်လဲၣ်. (ရိမ့ၤ ၁:၁၁, ၁၂) (ခ) ဘၣ်ဃးဒီး ပဟ့ၣ်တၢ်စံးဆၢလၢ တၢ်အိၣ်ဖှိၣ်ပူၤန့ၣ် ကဲဘျုးလၢနဂီၢ်ဒ်လဲၣ်.
၁၉ ပကဟ့ၣ်တၢ်စံးဆၢလၢ တၢ်အိၣ်ဖှိၣ်ပူၤအဂီၢ် တၢ်သိၣ်တၢ်သီလၢ အဃံးတလၢဒု တအိၣ်ဘၣ်. သနာ်က့ ပကဘၣ်ကျဲးစၢး ဟ့ၣ်တၢ်စံးဆၢလၢ ကဟ့ၣ်ဂံၢ်ဟ့ၣ်ဘါလိာ်သး. အဒိ ပှၤကညီနီၣ်ဂံၢ် မ့ၢ်စှၤန့ၣ် ပကဘၣ် စံးဆၢအါထီၣ်တၢ်. ဘၣ်ဆၣ် ပှၤကညီနီၣ်ဂံၢ် မ့ၢ်အါန့ၣ် ပမ့ၢ်တဟ့ၣ်ဘၣ်တၢ်စံးဆၢ အါအါဘၣ်နာ်က့ ခီဖျိလၢ ပှၤဂၤန့ၢ်ဘၣ် တၢ်ခွဲးတၢ်ယာ်လၢ ကစံးဆၢတၢ်အဃိ ပသးခုစၢၤအဝဲသ့ၣ်. ဖဲပထီၣ်တၢ်အိၣ်ဖှိၣ်အခါ ခီဖျိလၢ ပသးစၢၢ်ဆၢလၢ ပှၤဂၤတၢ်လိၣ်ဘၣ်ဒီး “ပဟ့ၣ်ဂံၢ်ဟ့ၣ်ဘါလိာ်သး ယၢ်ခီယၢ်ခီ” အဃိ ပကသးခုကီးဂၤဒဲး.—ဖး ရိမ့ၤ ၁:၁၁, ၁၂.
တၢ်သးဝံၣ် ၉၃ ဆိၣ်ဂ့ၤဘၣ် ပတၢ်အိၣ်ဖှိၣ်ရိဖှိၣ်
a ဖဲပထီၣ်တၢ်အိၣ်ဖှိၣ်အခါ ပမ့ၢ်စံးဆၢတၢ်န့ၣ် ကဲဝဲပဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ. ဘၣ်ဆၣ် ပှၤတနီၤန့ၣ် ကစံးဆၢတၢ်အဂီၢ် အသးတနီး. မ့မ့ၢ် ပှၤအဂၤတနီၤဟီန့ၣ် စံးဆၢတၢ်မုာ်မးအဃိ ဘၣ်သးဝဲလၢ ပှၤကကီးအဝဲသ့ၣ် ခဲအံၤခဲအံၤ. သနာ်က့ ဒ်သိးပဝဲခဲလၢာ် ကန့ၢ်ဂံၢ်န့ၢ်ဘါအဂီၢ် ပပာ်ဖျါထီၣ်လၢ ပဆိမိၣ်န့ၢ်တၢ်လၢ တဂၤဒီးတဂၤအဂီၢ် ဒီးဟ့ၣ်ဂံၢ်ဟ့ၣ်ဘါလိာ်သး ကသ့ဒ်လဲၣ်. ဒီးပဟ့ၣ်တၢ်စံးဆၢလၢ ကဟ့ၣ်ဂံၢ်ဟ့ၣ်ဘါ ပဒီပုၢ်ဝဲၢ်မုၣ်ခွါလၢ ကပာ်ဖျါထီၣ်တၢ်အဲၣ် ဒီးမၤဂ့ၤတၢ် ကသ့ဒ်လဲၣ်. ပကတဲသကီးလၢ တၢ်မၤလိတခါအံၤ.
b ကွၢ်တၢ်ဟ့ၣ်ကူၣ်လၢ တၢးထီခိးတၢ်, လါယနူၤအါရံၤ ၂၀၁၉, ကဘျံးပၤ ၈-၁၃, ဒီး September 1, 2003, issue, pp. 19-22.
c ပှၤမံၤတနီၤန့ၣ် ပှၤဆီတလဲဝဲ.
d လၢ jw.org အပူၤန့ၣ် ကွၢ်တၢ်ဂီၤမူ လၢအမ့ၢ် ကဲထီၣ်ယဟိဝၤယွၤ အတံၤသကိး—ကတဲာ်ကတီၤပာ်စၢၤ နတၢ်စံးဆၢ.
f တၢ်ဂီၤအခီပညီ– တၢ်အိၣ်ဖှိၣ်လၢ ပှၤနီၣ်ဂံၢ်အိၣ်အါတဖျၢၣ်အပူၤ ဒီပုၢ်ဝဲၢ်ခွါလၢ အဟ့ၣ်တၢ်စံးဆၢဝံၤတဂၤန့ၣ် အပျဲလၢပှၤအဂၤ ကဟ့ၣ်တၢ်စံးဆၢ.