ပဆဲးမၤဒိၣ်ထီၣ်အါထီၣ် ပတၢ်အဲၣ်လၢ တဂၤဒီးတဂၤ အဖီခိၣ်ကသ့ဒ်လဲၣ်

၁-၂. (က) ဘၣ်မနုၤအဃိ တၢ်မၢဖိပီလူး တဲဝဲလၢ တၢ်အဲၣ်န့ၣ် မ့ၢ်တၢ်ဂ့ၤတၢ်ဝါလၢ “အရ့ဒိၣ်ကတၢၢ်” လဲၣ်. (ခ) ပကတဲသကိး တၢ်သံကွၢ်မနုၤလဲၣ်.

ဖဲတၢ်မၢဖိပီလူး တဲဝဲဘၣ်ဃးဒီး တၢ်နာ်, တၢ်မုၢ်လၢ် ဒီးတၢ်အဲၣ်အခါ အတဲဝဲလၢ “တၢ်အဲၣ်တၢ်ကွံ မ့ၢ်တၢ်လၢ အရ့ဒိၣ်ကတၢၢ်.” (၁ ကရံၣ် ၁၃:၁၃) ဘၣ်မနုၤအဃိ စီၤပီလူး တဲဝဲဒ်န့ၣ်လဲၣ်. ခါဆူညါ ကစၢ်ယွၤ အတၢ်အၢၣ်လီၤ ဘၣ်ဃးဒီး ဟီၣ်ခိၣ်သီန့ၣ် ကဟဲလၢပှဲၤထီၣ်အဃိ ပတလိၣ်ဘၣ် တၢ်နာ် ဒီးတၢ်မုၢ်လၢ်လၢၤဘၣ်. ဘၣ်ဆၣ် ပကဘၣ် အဲၣ်ယဟိဝၤယွၤ ဒီးပှၤဂၤထီဘိအဃိ ပကလိၣ်ဘၣ်တၢ်အဲၣ်ဒံး. တကးဒံးဘၣ် ပတၢ်အဲၣ် ယဟိဝၤယွၤ ဒီးပှၤဂၤန့ၣ် ကဆဲးဒိၣ်ထီၣ်အါထီၣ်ဝဲ လီၤထူလီၤယိာ်.

^၂ ခီဖျိလၢ ပကဘၣ် အဲၣ်ယဟိဝၤယွၤ ဒီးပှၤဂၤထီဘိအဃိ ပကတဲသကိး တၢ်သံကွၢ်သၢဖျၢၣ်. တၢ, ဘၣ်မနုၤအဃိ ပကဘၣ်အဲၣ်လိာ်သး တဂၤဒီးတဂၤလဲၣ်. ခံ, ပပာ်ဖျါထီၣ် တၢ်အဲၣ်လၢ တဂၤဒီးတဂၤ အဖီခိၣ်ကသ့ဒ်လဲၣ်. သၢ, ပဆဲးမၤဒိၣ်ထီၣ်အါထီၣ် ပတၢ်အဲၣ်လၢ တဂၤဒီးတဂၤ အဖီခိၣ်ကသ့ဒ်လဲၣ်.

ဘၣ်မနုၤအဃိ ပကဘၣ်အဲၣ်လိာ်သး တဂၤဒီးတဂၤလဲၣ်

၃. ဘၣ်မနုၤအဃိ အရ့ဒိၣ်လၢ ပကအဲၣ်လိာ်သး တဂၤဒီးတဂၤလဲၣ်.

^၃ ဘၣ်မနုၤအဃိ အရ့ဒိၣ်လၢ ပကဘၣ်အဲၣ်လိာ်သး တဂၤဒီးတဂၤလဲၣ်. ပမ့ၢ်အဲၣ် ပဒီပုၢ်ဝဲၢ်မုၣ်ခွါန့ၣ် ပပာ်ဖျါထီၣ်လၢ ပကဲခရံာ်ဖိနီၢ်ကီၢ်. ယ့ၣ်ၡူး တဲဘၣ်အတၢ်မၢဖိတဖၣ်လၢ “သုမ့ၢ် အဲၣ်လိာ်ကွံလိာ် သုသးကဒဲကဒဲန့ၣ် ပှၤခဲလၢာ် ကသ့ၣ်ညါလၢ သုမ့ၢ် ယပျဲၢ်ယဘီၣ်တဖၣ်လီၤ.” (ယိၤ ၁၃:၃၅) တကးဒံးဘၣ် ပမ့ၢ်အဲၣ်လိာ်သး တဂၤဒီးတဂၤန့ၣ် ကမၤစၢၤပှၤဒ်သိး ပကအိၣ်ဃူအိၣ်ဖိး. စီၤပီလူးတဲဝဲလၢ တၢ်အဲၣ်န့ၣ်မ့ၢ်ဝဲ “တၢ်စၢဃာ်လၢ အဒုးအိၣ်ဃူအိၣ်ဖိးတၢ် လၢလၢပှဲၤပှဲၤ.” (ကလီး ၃:၁၄) သနာ်က့ ဘၣ်မနုၤအဃိ ပကဘၣ်အဲၣ်လိာ်သး တဂၤဒီးတဂၤလဲၣ်န့ၣ် တၢ်ဂ့ၢ်အဂၤအိၣ်ဒံး. တၢ်မၢဖိယိၤဟၣ် ကွဲးန့ၢ်ဝဲ ဒီပုၢ်ဝဲၢ်မုၣ်ခွါတဖၣ်လၢ “ပှၤလၢအအဲၣ် ကစၢ်ယွၤန့ၣ် ကဘၣ်အဲၣ်စ့ၢ်ကီး အဒီပုၢ်ဝဲၢ်.” (၁ ယိၤ ၄:၂၁) အဃိ ပမ့ၢ်အဲၣ်လိာ်သး တဂၤဒီးတဂၤန့ၣ် ပပာ်ဖျါထီၣ်လၢ ပအဲၣ်ကစၢ်ယွၤ.

၄-၅. ပအဲၣ်ကစၢ်ယွၤ ဒီးပအဲၣ်ဒီပုၢ်ဝဲၢ်မုၣ်ခွါန့ၣ် အဘၣ်ထွဲလိာ်သးဒ်လဲၣ်. ဟ့ၣ်တၢ်အဒိ.

^၄ ပအဲၣ်ကစၢ်ယွၤ ဒီးပအဲၣ်ဒီပုၢ်ဝဲၢ်မုၣ်ခွါန့ၣ် အဘၣ်ထွဲလိာ်သးဒ်လဲၣ်. ဆိကမိၣ်ကွၢ် ပသးဖျၢၣ်န့ၣ် အဘၣ်ထွဲလိာ်သးဒီး ပနီၢ်ခိက့ၢ်ဂီၤလၢအဂၤဒ်လဲၣ်. အဒိ ဖဲကသံၣ်သရၣ် ဖီၣ်ကွၢ်ဝဲ ပစုဒ့ကိာ် ဒ်သိးကသ့ၣ်ညါလၢ ပသွံၣ်စံၣ်ဂ့ၤဧါ တဂ့ၤဘၣ်ဧါအခါ အကသ့ၣ်ညါဘၣ်ဝဲလၢ ပသးဖျၢၣ် မၤတၢ်ဂ့ၤဧါတဂ့ၤဧါ. ကသံၣ်သရၣ် မၤကွၢ်ဝဲဒ်အံၤန့ၣ် ပန့ၢ်ဘၣ်တၢ်မၤလိ ဘၣ်ဃးဒီး တၢ်အဲၣ်ဒ်လဲၣ်.

^၅ ဖဲကသံၣ်သရၣ် ဖီၣ်ကွၢ်ဝဲ ပစုဒ့ကိာ်အခါ အသ့ၣ်ညါဘၣ်ဝဲ ပသးဖျၢၣ် မၤတၢ်ဂ့ၤဧါတဂ့ၤဧါ. ဒ်န့ၣ်အသိး ဖဲပဆိကမိၣ်ထံက့ၤ ပအဲၣ်ဒီပုၢ်ဝဲၢ်မုၣ်ခွါ ဒိၣ်ထဲလဲၣ်အခါ ပကသ့ၣ်ညါဘၣ်လၢ ပအဲၣ်ယဟိဝၤယွၤ ဒိၣ်ထဲလဲၣ်စ့ၢ်ကီး. ပမ့ၢ်သ့ၣ်ညါဘၣ်လၢ ပအဲၣ်ဒီပုၢ်ဝဲၢ်မုၣ်ခွါ တဒိၣ်ဒ်သိးလၢညါဘၣ်န့ၣ် ဘၣ်သ့ၣ်သ့ၣ် ပအဲၣ်ကစၢ်ယွၤ တဒိၣ်ဒ်သိးလၢညါလၢၤဘၣ်. ဘၣ်ဆၣ် ပမ့ၢ်ပာ်ဖျါထီၣ်လၢ ပအဲၣ်ဒီပုၢ်ဝဲၢ်မုၣ်ခွါထီဘိန့ၣ် ပကသ့ၣ်ညါဘၣ်လၢ ပတၢ်အဲၣ်ယဟိဝၤယွၤန့ၣ် တလီၤစှၤဘၣ်.

၆. ပအဲၣ်ဒီပုၢ်ဝဲၢ်မုၣ်ခွါ မ့ၢ်တဒိၣ်ဒ်သိးလၢညါဘၣ်န့ၣ် ဘၣ်မနုၤအဃိ အကဲဝဲ တၢ်ကီတၢ်ခဲ ဖးဒိၣ်တခါလဲၣ်. (၁ ယိၤဟၣ် ၄:၇-၉, ၁၁)

^၆ ပအဲၣ်ဒီပုၢ်ဝဲၢ်မုၣ်ခွါ မ့ၢ်တဒိၣ်ဒ်သိးလၢညါဘၣ်န့ၣ် အကဲဝဲ တၢ်ကီတၢ်ခဲ ဖးဒိၣ်တခါညါ. ဘၣ်မနုၤအဃိ ပတဲဒ်န့ၣ်လဲၣ်. ခီဖျိလၢ တၢ်ကီတၢ်ခဲ ဖးဒိၣ်တခါအံၤ အပာ်ဖျါထီၣ်လၢ ပတၢ်ရ့လိာ်သးဒီး ယဟိဝၤယွၤ တဂ့ၤဒ်သိးလၢညါလၢၤဘၣ်. တၢ်မၢဖိယိၤဟၣ် တဲဝဲလၢ “ပှၤလၢအတအဲၣ် အဒီပုၢ်ဝဲၢ်လၢ အထံၣ်ဝဲန့ၣ် အအဲၣ်ကစၢ်ယွၤလၢ အထံၣ်ဝဲတသ့ဘၣ်တဂၤန့ၣ် ကသ့ဒ်လဲၣ်.” (၁ ယိၤ ၄:၂၀) ပန့ၢ်ဘၣ် တၢ်မၤလိဒ်လဲၣ်. ပမ့ၢ် “အဲၣ်လိာ်ပသး တဂၤဒီးတဂၤ” မၣ်ယဟိဝၤယွၤ ကဘၣ်သူၣ်ဘၣ်သးပှၤ.—ဖး ၁ ယိၤဟၣ် ၄:၇-၉, ၁၁.

ပပာ်ဖျါထီၣ် တၢ်အဲၣ်လၢ တဂၤဒီးတဂၤ အဖီခိၣ်ကသ့ဒ်လဲၣ်

၇-၈. ပပဖျါထီၣ် ပတၢ်အဲၣ်လၢ တဂၤဒီးတဂၤ အဖီခိၣ်ကသ့ဒ်လဲၣ်.

^၇ လၢလံာ်စီဆှံအပူၤန့ၣ် ပဖးဘၣ် တၢ်မၤလိာ် လၢအမ့ၢ် ပကဘၣ် “အဲၣ်လိာ်ပသး တဂၤဒီးတဂၤ” ထီဘိ. (ယိၤ ၁၅:၁၂, ၁၇; ရိ ၁၃:၈; ၁ သ့း ၄:၉; ၁ ပ့း ၁:၂၂; ၁ ယိၤ ၄:၁၁) သနာ်က့ တၢ်အဲၣ်န့ၣ် အကဲဝဲ တၢ်တူၢ်ဘၣ်တခါ လၢအဟဲထီၣ်လၢ ပသးပူၤ ဒီးပှၤဟီၣ်ခိၣ်ဖိ ထံၣ်ဝဲတသ့ နီတဂၤဘၣ်. အဃိ ပပာ်ဖျါထီၣ် တၢ်အဲၣ်လၢ တဂၤဒီးတဂၤ အဖီခိၣ်ကသ့ဒ်လဲၣ်. ပပာ်ဖျါထီၣ် ပတၢ်အဲၣ်သ့ခီဖျိ တၢ်လၢပတဲ ဒီးပမၤ.

^၈ ပအဲၣ်ဒီပုၢ်ဝဲၢ်မုၣ်ခွါန့ၣ် ပပာ်ဖျါထီၣ်သ့လၢ ကျဲအါဘိ. အဒိ လံာ်စီဆှံ တဲဘၣ်ပှၤလၢ “သုကဘၣ် တဲလိာ်သးတၢ် တီတီလိၤလိၤ.” (ကၤ ၈:၁၆) “အိၣ်ဃူအိၣ်ဖိးလိာ်သး တဂၤဒီးတဂၤ ထီဘိ.” (မၢ် ၉:၅၀) “ပာ်ဖျါထီၣ်ဆိ တၢ်ယူးယီၣ်ပာ်ကဲ လၢပှၤဂၤအဖီခိၣ်.” (ရိ ၁၂:၁၀) “တူၢ်လိာ်လိာ်သး တဂၤဒီးတဂၤ.” (ရိ ၁၅:၇) “ဆဲး . . . ပျၢ်လိာ်သးတၢ်ကမၣ် တဂၤဒီးတဂၤ.” (ကလီး ၃:၁၃) “ဆဲးဝံစၢၤလိာ်သုသးလၢ သုတၢ်ဝံဃၢ တဂၤဒီးတဂၤ.” (ကလၤ ၆:၂) “ဆဲးဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ ဒီးမၤမုာ်ထီၣ်လိာ်သး တဂၤဒီးတဂၤ.” (၁ သ့း ၅:၁၁) “ဃ့ထုကဖၣ်န့ၢ်တၢ်လၢ တဂၤဒီးတဂၤအဂီၢ်.”—ယၤ ၅:၁၆.

၉. ဘၣ်မနုၤအဃိ ပတဲလၢ တၢ်မၤမုာ်ထီၣ်လိာ်သးန့ၣ် အကဲဝဲ ပပာ်ဖျါထီၣ် တၢ်အဲၣ်လဲၣ်. (ကွၢ်စ့ၢ်ကီးတၢ်ဂီၤ.)

^၉ ခဲအံၤ ပကတဲသကိး ကျဲတဘိလၢ ပကပာ်ဖျါထီၣ် တၢ်အဲၣ်လၢ တဂၤဒီးတဂၤ အဖီခိၣ်. စီၤပီလူး တဲဝဲလၢ “ဆဲး . . . မၤမုာ်ထီၣ်လိာ်သး တဂၤဒီးတဂၤ.” ဘၣ်မနုၤအဃိ ပတဲလၢ တၢ်မၤမုာ်ထီၣ်လိာ်သးန့ၣ် အကဲဝဲ ပပာ်ဖျါထီၣ် တၢ်အဲၣ်လဲၣ်. လံာ်စီဆှံတၢ်ကွဲးကျိာ်ထံ အဂၤတဘ့ၣ် ပာ်ဖျါထီၣ်ဝဲလၢ စီၤပီလူးသူဝဲ တၢ်ကတိၤ “တၢ်မၤမုာ်ထီၣ်က့ၤ” န့ၣ်အခီပညီမ့ၢ်ဝဲ “ဖဲပှၤတဂၤ ဘၣ်လဲၤခီဖျိ တၢ်အိၣ်သးကီခဲအခါ ပအိၣ်လၢအကပၤ ဒီးဟ့ၣ်ဂံၢ်ဟ့ၣ်ဘါအီၤ.” အဃိ ဖဲပမၤမုာ်ထီၣ်က့ၤ ဒီပုၢ်ဝဲၢ်မုၣ်ခွါ တဂၤဂၤလၢ အလဲၤခီဖျိ တၢ်အိၣ်သးကီခဲအခါ ပမၤစၢၤအီၤလၢ အကဆဲးမၤ ယဟိဝၤယွၤအတၢ်မၤ ဒီးဆဲးတီဒီးအီၤ. ဒီးဖဲပမၤမုာ်ထီၣ်က့ၤ ဒီပုၢ်ဝဲၢ်မုၣ်ခွါ တဘျီဂ့ၤတဘျီဂ့ၤန့ၣ် ပပာ်ဖျါထီၣ်လၢ ပအဲၣ်အဝဲသ့ၣ်.—၂ ကရံၣ် ၇:၆, ၇, ၁၃.

၁၀. တၢ်ဒိသူၣ်ဒိသး ဒီးတၢ်မၤမုာ်ထီၣ်က့ၤန့ၣ် အဘၣ်ထွဲလိာ်သးဒ်လဲၣ်.

^၁၀ တၢ်ဒိသူၣ်ဒိသး ဒီးတၢ်မၤမုာ်ထီၣ်က့ၤန့ၣ် အဘၣ်ထွဲလိာ်သး. ဘၣ်မနုၤအဃိ ပတဲဒ်န့ၣ်လဲၣ်. ပှၤလၢအအိၣ်ဒီး တၢ်ဒိသူၣ်ဒိသးန့ၣ် ဖဲအထံၣ်ဘၣ် ပှၤတဂၤဂၤ လဲၤခီဖျိဘၣ် တၢ်နးတၢ်ဖှီၣ်အခါ အဘၣ်သး မၤမုာ်ထီၣ်က့ၤ ပှၤတဂၤန့ၣ်အသး ဒီးမၤစၢၤအီၤတမံၤမံၤ. အဃိ တၢ်ဒိသူၣ်ဒိသးန့ၣ် ထိၣ်ဟူးထိၣ်ဂဲၤထီၣ်ပှၤလၢ ပကမၤမုာ်ထီၣ်က့ၤပှၤသး. စီၤပီလူးတဲဝဲလၢ ယဟိဝၤယွၤ အတၢ်ဒိသူၣ်ဒိသးန့ၣ် အဘၣ်ထွဲလိာ်သးဒီး အမၤမုာ်ထီၣ်က့ၤပှၤသး. တကးဒံးဘၣ် အတဲဝဲလၢ ယဟိဝၤယွၤန့ၣ် “အမ့ၢ် ပၢ်လၢအပှဲၤဒီး တၢ်သးကညီၤ ဒီးအမ့ၢ်ဝဲ တၢ်မၤမုာ်ခဲလၢာ် အကစၢ်.” (၂ ကရံၣ် ၁:၃) ဖဲအံၤန့ၣ် စီၤပီလူးသူဝဲ တၢ်ကတိၤ လၢအမ့ၢ် “တၢ်သးကညီၤ” ဒ်သိး အကပာ်ဖျါထီၣ်ဝဲလၢ ပှၤတဂၤ အိၣ်ဒီးတၢ်ဒိသူၣ်ဒိသး လၢပှၤဂၤအဖီခိၣ်. ဒီးခီဖျိလၢ ကစၢ်ယွၤန့ၣ် အအိၣ်ဒီး တၢ်ဒိသူၣ်ဒိသး လၢပှၤဂၤအဖီခိၣ်အဃိ လံာ်စီဆှံကိးအီၤလၢ ပၢ်လၢအအိၣ်ဒီး တၢ်သးကညီၤ မ့တမ့ၢ် တၢ်သးကညီၤ အဂံၢ်ခီၣ်ထံး. ဒီးခီဖျိလၢ အတၢ်ဒိသူၣ်ဒိသးအဃိ အမၤမုာ်ထီၣ်က့ၤ “ပှၤလၢ တၢ်မၤကွၢ် ခဲလၢာ်အပူၤ.” (၂ ကရံၣ် ၁:၄) အဒိ ပှၤလၢအသးကိၢ်အူ ဒီးအဲၣ်ဒိးအီထံတဂၤ မ့ၢ်အီဘၣ်ထံန့ၣ် အသးခုၣ်လီၤက့ၤ ဒီးအသးမုာ်ထီၣ်က့ၤ. ဒ်န့ၣ်အသိး ပှၤလၢအလဲၤခီဖျိ တၢ်နးတၢ်ဖှီၣ်န့ၣ် ယဟိဝၤယွၤ မၤခုၣ်လီၤဝဲအသး ဒီးမၤမုာ်ထီၣ်က့ၤအသး. အဃိ ပကွၢ်လိ ယဟိဝၤယွၤ ဒီးပာ်ဖျါထီၣ် တၢ်ဒိသူၣ်ဒိသး ဒီးမၤမုာ်ထီၣ်က့ၤပှၤသး ကသ့ဒ်လဲၣ်. ပမၤသ့ခီဖျိ ပမၤအါထီၣ် တၢ်ဂ့ၤတၢ်ဝါ အဂၤလၢ ကမၤစၢၤပှၤ ဒ်သိးပကအိၣ်ဒီး တၢ်ဒိသူၣ်ဒိသး လၢပှၤဂၤအဖီခိၣ် ဒီးမၤမုာ်ထီၣ်က့ၤပှၤသး. တၢ်ဂ့ၤတၢ်ဝါ အဂၤလၢ ကမၤစၢၤပှၤန့ၣ် ကမ့ၢ်တၢ်ဂ့ၤတၢ်ဝါ မနုၤလဲၣ်.

၁၁. ဒ် ကလီးစဲ ၃:၁၂ ဒီး ၁ ပ့းတရူး ၃:၈ ပာ်ဖျါထီၣ်ဝဲအသိး ဒ်သိး ပကဆဲးအဲၣ်ပဒီပုၢ်ဝဲၢ်မုၣ်ခွါ ဒီးမၤမုာ်ထီၣ်လိာ်သးအဂီၢ် ပကဘၣ်မၤအါထီၣ် တၢ်ဂ့ၤတၢ်ဝါအဂၤ မနုၤလဲၣ်.

^၁၁ လံာ်စီဆှံ ဟ့ၣ်ကူၣ်ပှၤလၢ ပကဆဲးအဲၣ်ပဒီပုၢ်ဝဲၢ်မုၣ်ခွါဒီး “ဆဲး . . . မၤမုာ်ထီၣ်လိာ်သး တဂၤဒီးတဂၤ.” ပမၤဒ်န့ၣ် ကိးနံၤဒဲးကသ့အဂီၢ် တၢ်မနုၤကမၤစၢၤပှၤလဲၣ်. ပကဘၣ် မၤအါထီၣ် တၢ်ဂ့ၤတၢ်ဝါ ဒ်သိးဒီး တၢ်ဒိသူၣ်ဒိသး, ဒီပုၢ်ဝဲၢ်တၢ်အဲၣ် ဒီးတၢ်သူၣ်ဂ့ၤသးဝါ. (ဖး ကလီးစဲ ၃:၁၂; ၁ ပ့းတရူး ၃:၈.) တၢ်ဂ့ၤတၢ်ဝါတဖၣ်အံၤ ကမၤစၢၤပှၤဒ်လဲၣ်. ပမ့ၢ်အိၣ်ဒီး တၢ်ဒိသူၣ်ဒိသး လၢပဒီပုၢ်ဝဲၢ်မုၣ်ခွါအဖီခိၣ် ဒီးပမ့ၢ်သးအိၣ်အဝဲသ့ၣ်နီၢ်ကီၢ်န့ၣ် ဖဲအဝဲသ့ၣ် ထံၣ်ဘၣ်ဒီး တၢ်အိၣ်သးကီခဲအခါ ပကဘၣ်သး မၤမုာ်ထီၣ်က့ၤ အဝဲသ့ၣ်အသး. အဃိ ယ့ၣ်ၡူး တဲဝဲလၢ “ဒ်တၢ်အိၣ်လၢ ပသးပူၤအသိးန့ၣ် ပတဲထီၣ်အီၤလီၤ. ပှၤလၢ အဂ့ၤတဂၤန့ၣ် အသးပှဲၤဒီး တၢ်လၢအဂ့ၤအဃိ အကတဲတၢ်လၢအဂ့ၤ.” (မး ၁၂:၃၄, ၃၅) ပမ့ၢ်မၤမုာ်ထီၣ်က့ၤ ပဒီပုၢ်ဝဲၢ်မုၣ်ခွါအသးန့ၣ် ပပာ်ဖျါထီၣ်လၢ ပအဲၣ်အဝဲသ့ၣ်နီၢ်ကီၢ်.

ပဆဲးမၤဒိၣ်ထီၣ်အါထီၣ် ပတၢ်အဲၣ်လၢ တဂၤဒီးတဂၤ အဖီခိၣ်ကသ့ဒ်လဲၣ်

၁၂. (က) ဘၣ်မနုၤအဃိ ပကဘၣ် ပလီၢ်ပသးထီဘိလဲၣ်. (ခ) ခဲအံၤ ပကတဲသကိး တၢ်သံကွၢ် မနုၤလဲၣ်.

^၁၂ ပကဘၣ် “ဆဲးအဲၣ်လိာ်ပသး တဂၤဒီးတဂၤ.” (၁ ယိၤ ၄:၇) သနာ်က့ ပကဘၣ် သ့ၣ်နီၣ်ထီၣ်လၢ ယ့ၣ်ၡူး ဟ့ၣ်ပလီၢ်ပှၤလၢ “ပှၤအါတက့ၢ် အတၢ်အဲၣ်တၢ်ကွံ [က] လီၤစှၤဝဲ.” (မး ၂၄:၁၂) ယ့ၣ်ၡူး တအဲၣ်ဒိးတဲဝဲလၢ အပျဲၢ်အဘီၣ်တဖၣ် အတၢ်အဲၣ်တၢ်ကွံ ကလီၤစှၤဝဲဘၣ်. ပမ့ၢ်ကွၢ်လၢ ဆၢကတီၢ်ခဲအံၤန့ၣ် ပှၤဟီၣ်ခိၣ်ဖိ အတၢ်အဲၣ်တၢ်ကွံ လီၤစှၤဝဲအဃိ ဒ်သိး ပှၤဟီၣ်ခိၣ်ဖိ အတၢ်ပာ်သူၣ်ပာ်သး တဒိၣ်စိလၢပဖီခိၣ်တဂ့ၤအဂီၢ် ပကဘၣ် ပလီၢ်ပသးထီဘိ. အဃိ ခဲအံၤ ပကတဲသကိး တၢ်သံကွၢ်လၢ အရ့ဒိၣ်တဖျၢၣ်. ပအဲၣ်ပဒီပုၢ်ဝဲၢ်မုၣ်ခွါ ဒိၣ်ထဲလဲၣ်န့ၣ် ပသ့ၣ်ညါကသ့ဒ်လဲၣ်.

၁၃. ပအဲၣ်ပဒီပုၢ်ဝဲၢ်မုၣ်ခွါ ဒိၣ်ထဲလဲၣ်န့ၣ် ပသ့ၣ်ညါကသ့ဒ်လဲၣ်.

^၁၃ ဒ်သိး ပကသ့ၣ်ညါလၢ ပအဲၣ်ဒီပုၢ်ဝဲၢ်မုၣ်ခွါ ဒိၣ်ထဲလဲၣ်အဂီၢ် ပကဘၣ် ဆိကမိၣ်ထံက့ၤ ပတၢ်အိၣ်သးတနီၤ. (၂ ကရံၣ် ၈:၈) တၢ်မၢဖိပ့းတရူး ပာ်ဖျါထီၣ်ဝဲ တၢ်အိၣ်သးတခါ ဒီးအတဲဝဲဒ်အံၤ. “လၢတၢ်ခဲလၢာ် အဖီခိၣ်န့ၣ် သုကဘၣ် အဲၣ်လိာ်ကွံလိာ်သုသးဒိၣ်မး မ့ၢ်လၢ တၢ်အဲၣ်တၢ်ကွံန့ၣ် ကျၢၢ်ဘၢတၢ်ဒဲးဘး အါမးအဃိလီၤ.” (၁ ပ့း ၄:၈) အဃိ ဖဲပဒီပုၢ်ဝဲၢ်မုၣ်ခွါ တဂၤဂၤ မၤကမၣ်တၢ် မ့တမ့ၢ် မၤဘၣ်ဒိပသးအခါ ပရ့ဒီးအဝဲသ့ၣ်ဒ်လဲၣ်န့ၣ် ကပာ်ဖျါထီၣ်လၢ ပအဲၣ်အဝဲသ့ၣ်ဒိၣ်ထဲလဲၣ်.

၁၄. ၁ ပ့းတရူး ၄:၈ တဲဘၣ်ပှၤလၢ ပကဘၣ်ပာ်ဖျါထီၣ် တၢ်အဲၣ်ဒ်လဲၣ်တကလုာ်လဲၣ်. ဟ့ၣ်တၢ်အဒိ.

^၁၄ ခဲအံၤ ပကဆိကမိၣ်ထံကွၢ် စီၤပ့းတရူး အတၢ်ကတိၤ. ဖဲအဆၢဖိ ၈ အခီၣ်ထံးတကူာ်န့ၣ် အတဲဘၣ်ပှၤလၢ “အဲၣ်လိာ်ကွံလိာ်သုသးဒိၣ်မး.” စီၤပ့းတရူး သူဝဲတၢ်ကတိၤ “ဒိၣ်မး” အံၤအခီပညီလိၤလိၤ မ့ၢ်ဝဲ “ထုးသလၣ်ထီၣ်သး.” ဒီးအဆၢဖိ လၢအလီၢ်ခံတကူာ်န့ၣ် ပာ်ဖျါထီၣ်လၢ ပမ့ၢ်အဲၣ်လိာ်ကွံလိာ်ပသးဒိၣ်မးန့ၣ် ကမၤစၢၤပှၤဒ်သိး ပကကျၢၢ်ဘၢ ပဒီပုၢ်ဝဲၢ်မုၣ်ခွါ အတၢ်ကမၣ်အါမး. အဒိ ထံၣ်တမှံကွၢ်လၢ စီၢ်နီၤခိၣ်တဖျၢၣ်န့ၣ် အလွဲၢ်လီၤတကျီး ဒီးအဖျါလာ်အၢဒိၣ်မး. ဒ်သိးပှၤတထံၣ်အီၤဒ်န့ၣ်တဂ့ၤအဂီၢ် နကဘၣ် ကျၢၢ်ဘၢအီၤလၢ တၢ်ကံးညာ်. ဒီးနမ့ၢ်ထုးသလၣ်ထီၣ် တၢ်ကံးညာ်အံၤ တစဲးဘၣ်တစဲးန့ၣ် အကကျၢၢ်ဘၢဝဲ စီၢ်နီၤခိၣ်ဒီတဘ့ၣ် ဒီးနတထံၣ် တၢ်အလွဲၢ်လီၤတကျီး ဒီးဖျါဘၣ်အၢလၢၤဘၣ်. ဒ်န့ၣ်အသိး ပမ့ၢ်မၤအါထီၣ် ပတၢ်အဲၣ် တစဲးဘၣ်တစဲးန့ၣ် အကမၤစၢၤပှၤဒ်သိး ပကကျၢၢ်ဘၢ “တၢ်ဒဲးဘး အါမး.” ဒီးတၢ်ကတိၤ “ကျၢၢ်ဘၢ” န့ၣ်အဲၣ်ဒိးတဲဝဲအခီပညီလၢ ပပျၢ်ကွံာ် တၢ်ကမၣ်. ဒ်တၢ်ကံးညာ် ကျၢၢ်ဘၢဝဲ တၢ်အလွဲၢ်လီၤတကျီး ဒီးတၢ်ဘၣ်အၢသ့ဝဲအသိး ပတၢ်အဲၣ်န့ၣ် ကျၢၢ်ဘၢဝဲ ပဒီပုၢ်ဝဲၢ်မုၣ်ခွါ အတၢ်ဂံၢ်စၢ်ဘါစၢ် ဒီးအတၢ်ကမၣ်သ့.

၁၅. ပပာ်ဖျါထီၣ်လၢ ပအဲၣ်ပဒီပုၢ်ဝဲၢ်မုၣ်ခွါဒိၣ်မး ကသ့ဒ်လဲၣ်. (ကလီးစဲ ၃:၁၃)

^၁၅ ပပျၢ်ကွံာ် ဒီပုၢ်ဝဲၢ်မုၣ်ခွါ အတၢ်ကမၣ် မ့ၢ်ကီဘၣ်ဆၣ် ပမ့ၢ်အဲၣ် ပဒီပုၢ်ဝဲၢ်မုၣ်ခွါဒိၣ်မးန့ၣ် ပတၢ်အဲၣ် ကမၤစၢၤပှၤလၢ ပကပျၢ်ကွံာ် အဝဲသ့ၣ်အတၢ်ကမၣ်. (ဖး ကလီးစဲ ၃:၁၃.) ဒီးဖဲပပျၢ်ကွံာ် ပှၤဂၤအတၢ်ကမၣ်အခါ ပပာ်ဖျါထီၣ်လၢ ပအဲၣ်အဝဲသ့ၣ်ဒိၣ်မး ဒီးပဘၣ်သးမၤသးခု ယဟိဝၤယွၤအသး. ဒ်သိးပကပျၢ်ကွံာ် ပှၤဂၤအတၢ်ကမၣ် ဒီးပတသးထီၣ်တၢ် ညီညီတဂ့ၤအဂီၢ် တၢ်မနုၤကမၤစၢၤပှၤလဲၣ်.

၁၆-၁၇. ဒ်သိးပကကွၢ်ကပာ်ကွံာ် ပဒီပုၢ်ဝဲၢ်မုၣ်ခွါ အတၢ်ကမၣ် တစဲးတမွဲးအဂီၢ် တၢ်မနုၤကမၤစၢၤပှၤလဲၣ်. ဟ့ၣ်တၢ်အဒိ. (ကွၢ်စ့ၢ်ကီးတၢ်ဂီၤ.)

^၁၆ ပကဘၣ် သးစၢၢ်ဆၢလၢ ပဒီပုၢ်ဝဲၢ်မုၣ်ခွါ အတၢ်ဂ့ၤတခီ ဒီးပတဘၣ် သးစၢၢ်ဆၢလၢ အတၢ်လီၤတူာ်လီၤကာ်တခီဘၣ်. အဒိ ဆိကမိၣ်ကွၢ် တၢ်အိၣ်သးတခါအံၤ. နၤဒီးဒီပုၢ်ဝဲၢ်မုၣ်ခွါတကရူၢ် ရ့လိာ်သးမုာ်မး. ဒီးဖဲနအီၣ်သကိးအီသကိးတၢ် ဝံၤအလီၢ်ခံ နဒိသကိးတၢ်ဂီၤဒီး ဒီပုၢ်ဝဲၢ်မုၣ်ခွါ. ဒီးနဘၣ်ယိၣ်လၢ တၢ်ဂီၤဖျါတဂ့ၤဘၣ်အဃိ နဒိတၢ်ဂီၤသၢဘ့ၣ်. လၢတၢ်ဂီၤသၢဘ့ၣ် အကျါတဘ့ၣ်န့ၣ် နထံၣ်လၢ ဒီပုၢ်ဝဲၢ်ခွါတဂၤ တနံၤကမှံဘၣ်. အဃိ နဖၠဲးကွံာ်တၢ်ဂီၤတဘ့ၣ်န့ၣ်. ဘၣ်ဆၣ် နတၢ်ဂီၤအိၣ်တ့ၢ်ခံဘ့ၣ်ဒံး ဒီးလၢတၢ်ဂီၤခံဘ့ၣ်အပူၤန့ၣ် ဒီပုၢ်ဝဲၢ်ခွါတဂၤန့ၣ် အနံၤကမှံစ့ၢ်ကီး.

^၁၇ တၢ်ဂီၤလၢ ပပာ်ဃာ်ခံဘ့ၣ်န့ၣ် အလီၤဂာ်ဒ်သိးဒီး တၢ်ဂ့ၢ်လၢ ပပာ်လၢပခိၣ်နူာ်ပူၤ. ဖဲပရ့လိာ်သးဒီး ဒီပုၢ်ဝဲၢ်မုၣ်ခွါအခါ ညီနုၢ်န့ၣ် ပနီၣ်ဘၣ်က့ၤ တၢ်လၢအမၤမုာ်ပသး. ဘၣ်ဆၣ် ပမ့ၢ်နီၣ်ဘၣ်က့ၤလၢ ပဒီပုၢ်ဝဲၢ်မုၣ်ခွါတဂၤဂၤ တဲတၢ်မ့တမ့ၢ် မၤတၢ်တမံၤမံၤလၢ အမၤဘၣ်ဒိပသးန့ၣ် ပကမၤဒ်လဲၣ်. ဒ်ပဖၠဲးကွံာ်တၢ်ဂီၤ လၢပကွၢ်တဂ့ၤဘၣ် တဘ့ၣ်အသိး ဖဲပနီၣ်ဘၣ်က့ၤ တၢ်လၢအမၤ ဘၣ်ဒိပသးအခါ ပကဘၣ်ကျဲးစၢး ထုးထီၣ်ကွံာ်လၢ ပခိၣ်နူာ်ပူၤ. (ကတိၤ ၁၉:၁၁; အ့း ၄:၃၂) ခီဖျိလၢ ပနီၣ်ဘၣ်က့ၤ တၢ်လၢအမၤမုာ်ပသး သ့ဒီဒူၣ်ညါအဃိ တၢ်ကမၣ်တစဲးတမွဲးန့ၣ် ပတလိၣ် ပာ်လၢပခိၣ်နူာ်ပူၤလၢၤဘၣ်. ပကဘၣ် နီၣ်ဘၣ်က့ၤ တၢ်လၢအမၤမုာ်ပသး ဒီးပာ်လုၢ်ပာ်ပှ့ၤအီၤ.

ဆၢကတီၢ်ခဲအံၤ ဘၣ်မနုၤအဃိ တၢ်အဲၣ်န့ၣ် အရ့ဒိၣ်ဒိၣ်မးလဲၣ်

၁၈. တၢ်မၤလိတခါအံၤ ပာ်ဖျါထီၣ်ဝဲလၢ တၢ်အဲၣ်န့ၣ် အရ့ဒိၣ်ထဲလဲၣ်.

^၁၈ ဘၣ်မနုၤအဃိ ပကဘၣ် ဆဲးမၤဒိၣ်ထီၣ်အါထီၣ် တၢ်အဲၣ်လၢ တဂၤဒီးတဂၤ အဖီခိၣ်လဲၣ်. ဒ်တၢ်မၤလိတခါအံၤ ပာ်ဖျါထီၣ်ဝဲအသိး ပမ့ၢ်အဲၣ်ပဒီပုၢ်ဝဲၢ်မုၣ်ခွါန့ၣ် ပပာ်ဖျါထီၣ်လၢ ပအဲၣ်ယဟိဝၤယွၤ. ပပာ်ဖျါထီၣ်လၢ ပအဲၣ်ပဒီပုၢ်ဝဲၢ်မုၣ်ခွါ ကသ့ဒ်လဲၣ်. ပပာ်ဖျါထီၣ်သ့ခီဖျိ ပမၤမုာ်ထီၣ်က့ၤ အဝဲသ့ၣ်အသး. တကးဒံးဘၣ် ပမ့ၢ်အိၣ်ဒီး တၢ်ဒိသူၣ်ဒိသးန့ၣ် ကထိၣ်ဟူးထိၣ်ဂဲၤထီၣ်ပှၤလၢ ပကမၤထွဲ တၢ်ဟ့ၣ်ကူၣ် လၢအမ့ၢ် “ဆဲး . . . မၤမုာ်ထီၣ်လိာ်သး တဂၤဒီးတဂၤ.” ဒီးပဆဲးမၤဒိၣ်ထီၣ်အါထီၣ် တၢ်အဲၣ်လၢ တဂၤဒီးတဂၤ အဖီခိၣ် ကသ့ဒ်လဲၣ်. ပမၤသ့ခီဖျိ ပကျဲးစၢးပျၢ်ကွံာ်ပဒီပုၢ်ဝဲၢ်မုၣ်ခွါအတၢ်ကမၣ်.

၁၉. ဆၢကတီၢ်ခဲအံၤ ဘၣ်မနုၤအဃိ ပကဘၣ် ဆဲးမၤဒိၣ်ထီၣ်အါထီၣ် တၢ်အဲၣ်လၢ တဂၤဒီးတဂၤ အဖီခိၣ်လဲၣ်.

^၁၉ ဆၢကတီၢ်ခဲအံၤ ဘၣ်မနုၤအဃိ ပကဘၣ် ဆဲးမၤဒိၣ်ထီၣ်အါထီၣ် တၢ်အဲၣ်လၢ တဂၤဒီးတဂၤ အဖီခိၣ်လဲၣ်. စီၤပ့းတရူး တဲဝဲလၢ “တၢ်ခဲလၢာ် အကတၢၢ်န့ၣ် ဘူးထီၣ်လံ. အဃိ, . . . သုကဘၣ် အဲၣ်လိာ်ကွံလိာ်သုသးဒိၣ်မး.” (၁ ပ့း ၄:၇, ၈) ဟီၣ်ခိၣ်လၢ မုၣ်ကီၤလံၢ်ပၢဝဲအံၤ ကကတၢၢ် ဘူးထီၣ်မၣ်ဘူးထီၣ်အဃိ တၢ်ကကဲထီၣ်သးဒ်လဲၣ်. ယ့ၣ်ၡူး တဲဆိပာ်စၢၤဝဲလၢ “ပှၤကလုာ်ခဲလၢာ် ကသးဟ့သုလၢ ယမံၤအဃိ.” (မး ၂၄:၉) ဒ်သိး ပလဲၤခီဖျိ ပှၤဂၤအတၢ်သးဟ့ ကန့ၢ်အဂီၢ် ပကဘၣ် အိၣ်ဃူအိၣ်ဖိး. ခီဖျိလၢ တၢ်အဲၣ်န့ၣ် “အဒုးအိၣ်ဃူအိၣ်ဖိးတၢ် လၢလၢပှဲၤပှဲၤ” အဃိ ပမ့ၢ်အိၣ်ဃူအိၣ်ဖိးန့ၣ် မုၣ်ကီၤလံၢ် မၤလီၤဖးပှၤ တန့ၢ်ဘၣ်.—ကလီး ၃:၁၄; ဖံလံး ၂:၁, ၂.