တၢ်မၤလိ ၁၇
ဖဲနလဲၤခီဖျိ တၢ်ကီတၢ်ခဲအခါ ယဟိဝၤယွၤ ကမၤစၢၤနၤ
“ပှၤတီပှၤလိၤန့ၣ် ထံၣ်ဘၣ် တၢ်ကီတၢ်ခဲအါမံၤ ဘၣ်ဆၣ် ယဟိဝၤယွၤ မၤပူၤဖျဲးအီၤလၢ တၢ်သ့ၣ်တဖၣ်န့ၣ်ခဲလၢာ်.”—စံးထီၣ်ပတြၢၤ ၃၄:၁၉.
တၢ်သးဝံၣ် ၄၄ ပှၤလၢဆီၣ်လီၤအသး အတၢ်ထုကဖၣ်
တၢ်မၤလိအံၤ အတၢ်တိာ်ပာ်a
၁. ပကဲ ယဟိဝၤယွၤအခ့အပှၤအဃိ ပသ့ၣ်ညါဘၣ် မနုၤလဲၣ်.
ပကဲ ယဟိဝၤယွၤအခ့အပှၤအဃိ ပသ့ၣ်ညါလၢ ယဟိဝၤယွၤအဲၣ်ပှၤ ဒီးအဘၣ်သးလၢ ပအိၣ်ဒီး တၢ်အိၣ်မူလၢအဂ့ၤကတၢၢ်. (ရိမ့ၤ ၈:၃၅-၃၉) ဒီးပသ့ၣ်ညါစ့ၢ်ကီးလၢ ပမ့ၢ်အိၣ်မူမၤထွဲ လံာ်စီဆှံ တၢ်ဟံးစုနဲၣ်ကျဲန့ၣ် ကကဲဘျုးလၢပဂီၢ်ထီဘိ. (ယၡါယၤ ၄၈:၁၇, ၁၈) ဘၣ်ဆၣ် ပမ့ၢ်ထံၣ်ဘၣ် တၢ်ကီတၢ်ခဲ လၢပတဆိမိၣ်ဘၣ်ဘၣ်န့ၣ် ပကဘၣ်မၤဒ်လဲၣ်.
၂. ဘၣ်သ့ၣ်သ့ၣ် ပကထံၣ်ဘၣ် တၢ်ကီတၢ်ခဲမနုၤလဲၣ် ဒီးပကဆိမိၣ်ဘၣ် ဒ်လဲၣ်.
၂ ယဟိဝၤယွၤ အခ့အပှၤခဲလၢာ်န့ၣ် ထံၣ်ဘၣ်ဒီးတၢ်ကီတၢ်ခဲ. အဒိ ပဟံၣ်ဖိဃီဖိ တဂၤဂၤ ကထီဒါပှၤ. ဒီးဘၣ်သ့ၣ်သ့ၣ် ပတၢ်အိၣ်ဆူၣ်အိၣ်ချ့ တဂ့ၤဘၣ်အဃိ ပမၤကစၢ်ယွၤတၢ်မၤ ဒ်သိးဒီး ပဘၣ်သးမၤန့ၣ် တသ့ခဲလၢာ်ဘၣ်. တကးဒံးဘၣ် ဘၣ်သ့ၣ်သ့ၣ် ပကထံၣ်ဘၣ်စ့ၢ်ကီး န့ဆၢၣ်တၢ်ဘၣ်ဒိဘၣ်ထံး အဃိ ပဟံၣ်ပဃီကဟးဂီၤ မ့တမ့ၢ် ခီဖျိလၢ ပတၢ်စူၢ်တၢ်နာ်အဃိ ပကထံၣ်ဘၣ် တၢ်မၤအၢမၤနး. ဖဲပထံၣ်ဘၣ် တၢ်ကီတၢ်ခဲတဖၣ်အံၤအခါ ဘၣ်သ့ၣ်သ့ၣ် ပကဆိမိၣ်လၢ ‘ဘၣ်မနုၤအဃိ တၢ်ကဲထီၣ်သးဒီးယၤ ကၠဲအံၤလဲၣ်. မ့ၢ်ယမၤကမၣ်ဘၣ်တၢ် တမံၤမံၤဟီဧါ. တၢ်ကဲထီၣ်သးဒီးယၤ ကၠဲအံၤအဃိ မ့ၢ်ယဟိဝၤယွၤ တဘၣ်သူၣ်ဘၣ်သးယၤဘၣ်ဟီဧါ.’ နဆိမိၣ်ဘၣ်ကၠဲန့ၣ် တဘျီဘျီဧါ. နမ့ၢ်ဆိမိၣ်ဘၣ် ကၠဲန့ၣ်နာ်က့ တဘၣ်သးဟးဂီၤတဂ့ၤ. ယဟိဝၤယွၤ အခ့အပှၤလၢအသးတီ လၢအတူၢ်ဘၣ်တၢ် ဒ်သိးနၤန့ၣ် အိၣ်ဒီဒူၣ်.—စံးထီၣ်ပတြၢၤ ၂၂:၁, ၂; ဃဘးကူာ် ၁:၂, ၃.
၃. လၢ စံးထီၣ်ပတြၢၤ ၃၄:၁၉ န့ၣ်ပမၤလိန့ၢ်ဘၣ် မနုၤလဲၣ်.
၃ ဖး စံးထီၣ်ပတြၢၤ ၃၄:၁၉. ပာ်သူၣ်ပာ်သး တၢ်ဂ့ၢ်အရ့ဒိၣ်ခံထံၣ်လၢ ပမၤလိန့ၢ်ဘၣ်လၢ လံာ်စံးထီၣ်ပတြၢၤ တဆၢအံၤအပူၤ. (၁) ပှၤတီပှၤလိၤန့ၣ် ထံၣ်ဘၣ်တၢ်ကီတၢ်ခဲအါမံၤ. (၂) ယဟိဝၤယွၤ ကမၤပူၤဖျဲးပှၤလၢ ပတၢ်ကီတၢ်ခဲ. ယဟိဝၤယွၤ ကမၤပူၤဖျဲးပှၤဒ်လဲၣ်. ယဟိဝၤယွၤ ကမၤစၢၤပှၤဒ်သိး ပကအိၣ်ဒီး တၢ်ထံၣ်လၢအဂ့ၤ ဘၣ်ဃးဒီး ပတၢ်အိၣ်မူလၢ ဆၢကတီၢ်ခဲအံၤ. ဒီးယဟိဝၤယွၤ အၢၣ်လီၤပှၤလၢ ပမ့ၢ်မၤအတၢ်မၤန့ၣ် ပကသးခု. သနာ်က့ အတအၢၣ်လီၤပှၤလၢ အကမၤလီၤမၢ်န့ၢ် ပတၢ်ကီတၢ်ခဲလၢ ဆၢကတီၢ်ခဲအံၤဘၣ်. (ယၡါယၤ ၆၆: ၁၄) ယဟိဝၤယွၤ ဟ့ၣ်ဂံၢ်ဟ့ၣ်ဘါပှၤလၢ ပကသးစၢၢ်ဆၢတၢ်လၢ ခါဆူညါ. ဒီးအခါဖဲန့ၣ် ပကအိၣ်မူဘၣ် မုာ်မုာ်ခုၣ်ခုၣ် လီၤထူလီၤယိာ်. (၂ ကရံၣ်သူး ၄:၁၆-၁၈) လၢဆၢကတီၢ်ခဲအံၤဟီန့ၣ် ယဟိဝၤယွၤ ကမၤစၢၤပှၤဒ်သိး ပကဆဲးမၤအတၢ်မၤ ကီးနံၤဒဲး.—သးသယုၢ်တၢ် ၃:၂၂-၂၄.
၄. လၢတၢ်မၤလိတခါအံၤ ပကတဲသကီး တၢ်ဂ့ၢ်မနုၤလဲၣ်.
၄ ခဲအံၤ ပကတဲသကီး ဘၣ်ဃးဒီး ယဟိဝၤယွၤ အခ့အပှၤလၢအသးတီ လၢညါဒီးလၢဆၢကတီၢ်ခဲအံၤ အဒိအတဲာ်န့ၣ် ပန့ၢ်ဘၣ်တၢ်မၤလိ ဒ်လဲၣ်. ဘၣ်သ့ၣ်သ့ၣ် လၢပတၢ်အိၣ်မူပူၤန့ၣ် ပကထံၣ်ဘၣ် တၢ်ကီတၢ်ခဲလၢ ပတဆိမိၣ်ဘၣ်ဘၣ်. ဘၣ်ဆၣ် ပမ့ၢ်သန့ၤသးလၢ ယဟိဝၤယွၤန့ၣ် အကမၤစၢၤပှၤထီဘိ. (စံးထီၣ်ပတြၢၤ ၅၅:၂၂) ဒီးဖဲပတဲသကီး ယဟိဝၤယွၤ အခ့အပှၤလၢအသးတီတဖၣ် အဒိအတဲာ်အခါ သံကွၢ်လီၤနသးလၢ ‘ယမ့ၢ်ထံၣ်ဘၣ် တၢ်အိၣ်သးဒ်သိးဒီး အဝဲသ့ၣ်န့ၣ် ယကမၤကၠဲလဲၣ်. အဝဲသ့ၣ် အဒိအတဲာ်န့ၣ် မၤဂၢၢ်ကျၢၤဒိၣ်ထီၣ် ယတၢ်နာ် ယဟိဝၤယွၤဒ်လဲၣ်. တၢ်လၢယမၤလိဘၣ်လၢ အဝဲသ့ၣ်အအိၣ်န့ၣ် ယမၤထွဲက့ၤလၢ ယတၢ်အိၣ်မူပူၤ ကသ့ဒ်လဲၣ်.’
လၢလံာ်စီဆှံအစိၤ
စီၤယၤကိာ် ဘၣ်မၤန့ၢ်တၢ်လၢ အဖါတံၢ်စီၤလၤဘၣ်အဂီၢ် အိၣ်အနံၣ် ၂၀ ညါ. စီၤလၤဘၣ် တရ့ဒီးစီၤယၤကိာ် တီတီလိၤလိၤဘၣ် နာ်က့ ယဟိဝၤယွၤ ဆိၣ်ဂ့ၤစီၤယၤကိာ် (ကွၢ်လံာ်အဆၢ ၅)
၅. စီၤလၤဘၣ် တရ့ဒီးစီၤယၤကိာ် တီတီလိၤလိၤဘၣ်အဃိ စီၤယၤကိာ် ထံၣ်ဘၣ်တၢ်ကီတၢ်ခဲဒ်လဲၣ်. (ကွၢ်တၢ်ဂီၤလၢ လံာ်ကုခိၣ်.)
၅ လၢလံာ်စီဆှံအစိၤန့ၣ် ယဟိဝၤယွၤ အခ့အပှၤတဖၣ် ထံၣ်ဘၣ်စ့ၢ်ကီး တၢ်ကီတၢ်ခဲလၢ အဝဲသ့ၣ်တဆိမိၣ်ဘၣ်ဘၣ်. ပကဆိမိၣ်ကွၢ်သကီး စီၤယၤကိာ် အဂ့ၢ်. စီၤယၤကိာ်န့ၣ် အပါမၢအလဲၤလၢ အဖါတံၢ်စီၤလၤဘၣ်အအိၣ် ဒီးစီၤလၤဘၣ်န့ၣ် အကဲပှၤလၢ အဘူၣ်ထီၣ်ဘါထီၣ် ယဟိဝၤယွၤ. အဃိ စီၤယၤကိာ်အပါ မၢအဟံဒီးစီၤလၤဘၣ်အဖိမုၣ် ဒီးအပါတဲအီၤလၢ ယဟိဝၤယွၤ ကဆိၣ်ဂ့ၤအီၤအါအါ. (၁ မိၤၡ့ ၂၈:၁-၄) စီၤယၤကိာ် ကနၣ်အပါကလုၢ်အဃိ အဟးထီၣ်လၢ ကီၢ်ကနၤဧၣ် ဒီးလဲၤလၢ စီၤလၤဘၣ်အအိၣ်. စီၤလၤဘၣ်န့ၣ် အဖိမုၣ်အိၣ်ခံဂၤ လၢအမ့ၢ်ဝဲ နီၢ်လ့ၤအၤ ဒီးနီၢ်ရၤဃ့လး. စီၤယၤကိာ် အဲၣ်ဘၣ် နီၢ်ရၤဃ့လးအဃိ တချုးလၢအဖျီသးဒီး နီၢ်ရၤဃ့လးဒံးဘၣ်န့ၣ် အအၢၣ်လီၤ စီၤလၤဘၣ်လၢ အကမၤတၢ်လၢ စီၤလၤဘၣ်အဂီၢ်နွံနံၣ်. (၁ မိၤၡ့ ၂၉:၁၈) သနာ်က့ စီၤလၤဘၣ် လံၣ်အီၣ် စီၤယၤကိာ် ဒီးဟ့ၣ်စီၤယၤကိာ်လၢ အဖိမုၣ်ဝဲၢ်ကိ နီၢ်လ့ၤအၤဟီ. အဃိ စီၤယၤကိာ် တန့ၢ်ဘၣ် နီၢ်ရၤဃ့လး ဒ်အဆိမိၣ်ပာ်စၢၤဝဲဘၣ်. ဘၣ်ဆၣ် စီၤလၤဘၣ် တဲစီၤယၤကိာ်လၢ အမ့ၢ်မၤန့ၢ်တၢ်လၢအဂီၢ် နွံနံၣ်ဒီးန့ၣ် လၢခံတနွံ စီၤလၤဘၣ် ကဟ့ၣ်အီၤ အဖိမုၣ် နီၢ်ရၤဃ့လး. (၁ မိၤၡ့ ၂၉:၂၅-၂၇) တကးဒံးဘၣ် လၢတၢ်ဖံးအီၣ်မၤအီၣ် (စံပွါယ့) တခီစ့ၢ်ကီး စီၤလၤဘၣ် လံၣ်အီၣ်စီၤယၤကိာ် မၢ်မၢ်. အဃိ ပသ့ၣ်ညါဘၣ်လၢ စီၤလၤဘၣ် တရ့ဒီးစီၤယၤကိာ် တီတီလိၤလိၤဘၣ်န့ၣ် အိၣ်ဝဲအနံၣ် ၂၀ ညါ.—၁ မိၤၡ့ ၃၁:၄၁, ၄၂.
၆. စီၤယၤကိာ်ထံၣ်ဘၣ်ဒံး တၢ်ကီတၢ်ခဲအဂၤ မနုၤလဲၣ်.
၆ စီၤယၤကိာ်ထံၣ်ဘၣ်ဒံး တၢ်ကီတၢ်ခဲအဂၤစ့ၢ်ကီး. အဒိ စီၤယၤကိာ် အဖိခွါအိၣ်ဒီဒူၣ် ဒီးအဖိခွါတဖၣ်န့ၣ် တအိၣ်ဃူဃူဖိးဖိးဘၣ်. စီၤယၤကိာ် အဖိခွါတဖၣ်န့ၣ် ဆါအီၣ်ကွံာ်အပုၢ်စီၤယိၤသး ဒ်ကုၢ်တဂၤ. ဒီးအဖိခွါခံဂၤ လၢအမ့ၢ် စီၤစူၤမ့းအိၣ် ဒီးစီၤလ့ၤဝံန့ၣ် မၤမဲာ်ဆှးအဟံၣ်ဖိဃီဖိ ဒီးမၤဟးဂီၤ ယဟိဝၤယွၤအမံၤ. တကးဒံးဘၣ် ဖဲနီၢ်ရၤဃ့လး အိၣ်ဖျဲၣ်ထီၣ် အဖိခံဂၤတဂၤအခါ အသံသဒၣ်ကွံာ် စီၤယၤကိာ်. ဒီးခီဖျိလၢ တၢ်သၣ်ဝံၤလီၤဒိ အိၣ်ထီၣ်နးမးအဃိ ဖဲစီၤယၤကိာ် သးပှၢ်ထီၣ်အခါ အဟံၣ်ဖိဃီဖိ ဘၣ်လဲၤအိၣ်က့ၤလၢ ကီၢ်အဲၤကူပတူး.—၁ မိၤၡ့ ၃၄:၃၀; ၃၅:၁၆-၁၉; ၃၇:၂၈; ၄၅:၉-၁၁, ၂၈.
၇. ယဟိဝၤယွၤ ဒုးသ့ၣ်ညါ စီၤယၤကိာ်လၢ အဘၣ်သူၣ်ဘၣ်သးအီၤ ဒ်လဲၣ်.
၇ စီၤယၤကိာ် ထံၣ်ဘၣ် တၢ်ကီတၢ်ခဲအါမးနာ်က့ အနာ်န့ၢ်ယဟိဝၤယွၤ ဒီးအနာ် ယဟိဝၤယွၤ တၢ်အၢၣ်လီၤထီဘိ. အဃိ ယဟိဝၤယွၤ ဒုးသ့ၣ်ညါ စီၤယၤကိာ်လၢ အဘၣ်သူၣ်ဘၣ်သးအီၤ. အဒိ စီၤလၤဘၣ် တရ့ဒီးစီၤယၤကိာ် တီတီလိၤလိၤဘၣ်နာ်က့ ယဟိဝၤယွၤ ဆိၣ်ဂ့ၤစီၤယၤကိာ် ဒီးဟ့ၣ်အီၤ တၢ်ဖိတၢ်လံၤဒီဒူၣ်. တကးဒံးဘၣ် စီၤယၤကိာ်န့ၣ် အဆိမိၣ်လၢ အဖိခွါစီၤယိၤသး သံသဒၣ်ကွံာ်အီၤ ဖၣ်ယံာ်လံ အဃိ ဖဲအထံၣ်လိာ်က့ၤသးဒီး စီၤယိၤသးအခါ နဆိမိၣ်ကွၢ် အကသးခုစံးဘျုးယဟိဝၤယွၤ ဖးဒိၣ်ညါ. ပထံၣ်ဘၣ်လၢ စီၤယၤကိာ် အတၢ်ရ့လိာ်သးဒီး ယဟိဝၤယွၤန့ၣ် ဖၣ်ဂ့ၤညါအဃိ မၤစၢၤအီၤလၢ အကလဲၤခီဖျိ အတၢ်ကီတၢ်ခဲ. (၁ မိၤၡ့ ၃၀:၄၃; ၃၂:၉, ၁၀; ၄၆:၂၈-၃၀) ပဝဲစ့ၢ်ကီး ပတၢ်ရ့လိာ်သးဒီး ယဟိဝၤယွၤ မ့ၢ်ဂ့ၤန့ၣ် ပမ့ၢ်ထံၣ်ဘၣ် တၢ်ကီတၢ်ခဲလၢ ပတဆိမိၣ်ဘၣ်ဘၣ်နာ်က့ ပလဲၤခီဖျိအီၤကန့ၢ်.
၈. စီၤဒၤဝံး ဘၣ်သးမၤ မနုၤလဲၣ်.
၈ စီၤဒၤဝံး စ့ၢ်ကီး ဘၣ်သးမၤန့ၢ်တၢ်လၢ ယဟိဝၤယွၤအဂီၢ်ဒီဒူၣ် ဘၣ်ဆၣ် အတမၤဘၣ်ဝဲခဲလၢာ်ဘၣ်. အဒိ စီၤဒၤဝံး တဲဘၣ် ဝံနၤသၣ်လၢ အဘၣ်သးတ့ထီၣ် တၢ်လုၢ်ဟံၣ်တဖျၢၣ် လၢယဟိဝၤယွၤအဂီၢ်. ဒီးဝံနၤသၣ် တဲက့ၤစီၤဒၤဝံးလၢ “ယွၤလၢအမ့ၢ်အတီတဂၤ အိၣ်ဒီးနၤအဃိ တၢ်လၢအအိၣ်လၢ နသးပူၤ တမံၤဂ့ၤ တမံၤဂ့ၤန့ၣ် မၤဟီ.” (၁ ကွဲးနီၣ်တၢ် ၁၇:၁, ၂) ဝံနၤသၣ် အတၢ်ကတိၤအံၤ ကမၤဆူၣ်ထီၣ် စီၤဒၤဝံးအသး ဖးဒိၣ်ညါ. ဒီးဘၣ်သ့ၣ်သ့ၣ် စီၤဒၤဝံး ကစးထီၣ် ရဲၣ်ကျဲၤတၢ်တဘျီဃီ လၢကတ့ထီၣ် တၢ်လုၢ်ဟံၣ်အဂီၢ်.
၉. ဖဲစီၤဒၤဝံး နၢ်ဟူတၢ်ကစီၣ်အခါ အမၤဝဲဒ်လဲၣ်.
၉ လၢခံတယံာ်ဘၣ်န့ၣ် ဝံနၤသၣ် ဟဲက့ၤတဲဘၣ်စီၤဒၤဝံးလၢ တၢ်ကစီၣ်အဂၤတခါ. “ဖဲတၢ်တနၤန့ၣ်” ယဟိဝၤယွၤ တဲဘၣ်ဝံနၤသၣ်လၢ ပှၤလၢကတ့ထီၣ်တၢ်လုၢ်ဟံၣ်န့ၣ် တကဲဝဲ စီၤဒၤဝံးဘၣ်, ကကဲဝဲလၢ အဖိခွါတဂၤဟီ. (၁ ကွဲးနီၣ်တၢ် ၁၇:၃, ၄, ၁၁, ၁၂) အဃိ ဖဲစီၤဒၤဝံး နၢ်ဟူတၢ်ကစီၣ်အံၤအခါ အမၤဝဲဒ်လဲၣ်. ပထံၣ်ဘၣ်လၢ စီၤဒၤဝံး ဆီတလဲက့ၤ အတၢ်ရဲၣ်တၢ်ကျဲၤ ဒီးအမၤစၢၤအဖိခွါ စီၤၡလိၤမိၤလၢ ကပာ်ဖှိၣ်ထီၣ် ကျိၣ်စ့ဒီးတၢ်ပီးတၢ်လီလၢ အလိၣ်ဘၣ်ဝဲ ဒ်သိးကတ့ထီၣ်တၢ်လုၢ်ဟံၣ်.—၁ ကွဲးနီၣ်တၢ် ၂၉:၁-၅.
၁၀. ယဟိဝၤယွၤ ဆိၣ်ဂ့ၤစီၤဒၤဝံးဒ်လဲၣ်.
၁၀ ယဟိဝၤယွၤ တဲဘၣ်စီၤဒၤဝံးလၢ အတကဲ ပှၤလၢကတ့ထီၣ်တၢ်လုၢ်ဟံၣ်ဘၣ်နာ်က့ ယဟိဝၤယွၤ ကမၤတၢ်အၢၣ်လီၤအီလီၤဒီးအီၤတခါ. ယဟိဝၤယွၤ အၢၣ်လီၤစီၤဒၤဝံးလၢ အစၢၤအသွဲၣ်တဂၤ ကပၢဘၣ်တၢ် လီၤထူလီၤယိာ်. (၂ ၡမူၤအ့လး ၇:၁၆) ခါဆူညါ လၢဟီၣ်ခိၣ်သီ ဖဲယ့ၣ်ၡူးပၢတၢ် အနံၣ်တကထိ အဆၢကတီၢ်န့ၣ် စီၤဒၤဝံး ကသ့ၣ်ညါဘၣ်ဝဲလၢ ယ့ၣ်ၡူးန့ၣ် အကဲစီၤပၤတဂၤလၢ အဟဲလီၤစၢၤလၢ အစၢၤအသွဲၣ် အကျါအဃိ ထံၣ်တမှံကွၢ် စီၤဒၤဝံး ကသးခုထဲလဲၣ်. စီၤဒၤဝံးအတၢ်လဲၤခီဖျိအံၤ သိၣ်လိပှၤလၢ ပမ့ၢ်တမၤဘၣ် ယဟိဝၤယွၤအတၢ်မၤ ဒ်ပဘၣ်သးမၤအသိးဘၣ်နာ်က့ ယဟိဝၤယွၤ ကဆိၣ်ဂ့ၤပှၤ ဒီးဟ့ၣ်ပှၤတၢ်မၤအဂ့ၤတခါခါ လၢပတဆိမိၣ်ဘၣ်ဘၣ်.
၁၁. ခရံာ်ဖိလၢ တၢ်မၢဖိအစိၤန့ၣ် တထံၣ်ဘၣ် ကစၢ်ယွၤအဘီအမုၢ် ဟဲဒ်အဝဲသ့ၣ် ဆိမိၣ်ပာ်စၢၤဝဲဘၣ်နာ်က့ အဝဲသ့ၣ်န့ၢ်ဘၣ် တၢ်ဆိၣ်ဂ့ၤဒ်လဲၣ်. (မၤတၢ် ၆:၇)
၁၁ ခရံာ်ဖိလၢ တၢ်မၢဖိအစိၤန့ၣ် အဝဲသ့ၣ်ထံၣ်ဘၣ် တၢ်ကီတၢ်ခဲတနီၤလၢ အဝဲသ့ၣ် တဆိမိၣ်ဘၣ်ဘၣ်. အဝဲသ့ၣ်ဘၣ်သးလၢ ကစၢ်ယွၤအဘီအမုၢ် ကဟဲသပှၢ်တၢၢ် ဘၣ်ဆၣ် ကစၢ်ယွၤအဘီအမုၢ် ကဟဲအခါဖဲလဲၣ်န့ၣ် အဝဲသ့ၣ်တသ့ၣ်ညါဝဲဘၣ်. (မၤတၢ် ၁:၆, ၇) အဃိ အဝဲသ့ၣ်မၤဝဲဒ်လဲၣ်. အဝဲသ့ၣ် ဆဲးစံၣ်တဲၤတဲလီၤတၢ်ဆူၣ်ဆူၣ်အဃိ တၢ်သးခုကစီၣ် ရၤလီၤသးတုၤလၢ တၢ်လီၢ်အါတီၤ. အဝဲသ့ၣ် ထံၣ်ဘၣ်ဝဲလၢ ယဟိဝၤယွၤဆိၣ်ဂ့ၤအဝဲသ့ၣ် တၢ်စံၣ်တဲၤတဲလီၤတၢ်မၤနီၢ်ကီၢ်.—ဖး မၤတၢ် ၆:၇.
၁၂. ဖဲတၢ်သၣ်ဝံၤလီၤဒိ အိၣ်ထီၣ်အခါ ခရံာ်ဖိလၢ တၢ်မၢဖိအစိၤတဖၣ် မၤဝဲဒ်လဲၣ်.
၁၂ ဘၣ်တဘျီ တၢ်သၣ်ဝံၤလီၤဒိ “အိၣ်ထီၣ်လၢ ဟီၣ်ခိၣ်ဒီဘ့ၣ်.” (မၤတၢ် ၁၁:၂၈) အဃိ ခရံာ်ဖိလၢ တၢ်မၢဖိအစိၤန့ၣ် ထံၣ်ဘၣ်ဒီး တၢ်သၣ်ဝံၤလီၤဒိ. ခီဖျိလၢ တၢ်သၣ်ဝံၤလီၤဒိအိၣ်ထီၣ်အဃိ အဝဲသ့ၣ်ကထံၣ်ဘၣ် တၢ်ကီတၢ်ခဲထဲလဲၣ်န့ၣ် နထံၣ်တမှံကွၢ်သ့. ဖဲန့ၣ်ခါ ဟံၣ်ခိၣ်တဖၣ် ကဘၣ်လုၢ်အီၣ်လုၢ်အီ အဟံၣ်ဖိဃီဖိဒ်လဲၣ်န့ၣ် အဝဲသ့ၣ်ကဘၣ်ယိၣ်တၢ် သပှၢ်တၢၢ်. မ့မ့ၢ် ပှၤသးစၢ်လၢ အပာ်လီၤသးလၢ ကမၤအါထီၣ် တၢ်စံၣ်တဲၤတဲလီၤတၢ်မၤဟီမီၤ. ဘၣ်သ့ၣ်သ့ၣ် အဝဲသ့ၣ်ကဆိမိၣ်ဝဲလၢ တၢ်သၣ်ဝံၤလီၤဒိ မ့ၢ်ဝံၤမၣ် အဝဲသ့ၣ်ကစံၣ်တဲၤတဲလီၤတၢ်ဟီဧါ. ခရံာ်ဖိတဖၣ် အတၢ်အိၣ်သး မ့ၢ်အိၣ်ဒ်လဲၣ်ဒ်လဲၣ်နာ်က့ အဝဲသ့ၣ်မၤတၢ်ဆီတလဲ ဒ်အတၢ်အိၣ်သး အိၣ်ဝဲအသိး. အဝဲသ့ၣ် ဆဲးစံၣ်တဲၤတဲလီၤတၢ်လၢ အဂ့ၤကတၢၢ် ဒီးတၢ်လၢအအိၣ်ဒီးအဝဲသ့ၣ်န့ၣ် အဝဲသ့ၣ်ဟ့ၣ်မၤစၢၤဝဲ ဒီပုၢ်ဝဲၢ်မုၣ်ခွါလၢ အအိၣ်လၢ ကီၢ်ယူဒၤစ့ၢ်ကီး.—မၤတၢ် ၁၁:၂၉, ၃၀.
၁၃. ဖဲတၢ်သၣ်ဝံၤလီၤဒိ အိၣ်ထီၣ်အခါ ခရံာ်ဖိတဖၣ် န့ၢ်ဘၣ်တၢ်ဆိၣ်ဂ့ၤဒ်လဲၣ်.
၁၃ ဖဲတၢ်သၣ်ဝံၤလီၤဒိ အိၣ်ထီၣ်အခါ ခရံာ်ဖိတဖၣ် န့ၢ်ဘၣ်တၢ်ဆိၣ်ဂ့ၤဒ်လဲၣ်. ပှၤလၢအန့ၢ်ဘၣ် တၢ်မၤစၢၤတဖၣ်န့ၣ် ထံၣ်ဘၣ်ဝဲလၢ ယဟိဝၤယွၤမၤစၢၤအဝဲသ့ၣ်. (မးသဲ ၆:၃၁-၃၃) ဒီးအတၢ်ရ့လိာ်သးဒီး ပှၤလၢအဟဲမၤစၢၤအဝဲသ့ၣ်န့ၣ် ဂ့ၤဒိၣ်ထီၣ်. တကးဒံးဘၣ် ပှၤလၢအဟ့ၣ်လီၤ တၢ်မၤဘူၣ် ဒီးပှၤလၢအလဲၤမၤစၢၤတၢ်တဖၣ်န့ၣ် ခီဖျိလၢအဝဲသ့ၣ် မၤစၢၤဘၣ်တၢ်အဃိ အဝဲသ့ၣ်သးခု. (မၤတၢ် ၂၀:၃၅) ပထံၣ်ဘၣ်လၢ ခရံာ်ဖိတဖၣ်အံၤ မၤတၢ်ဆီတလဲဒ် တၢ်အိၣ်သး အိၣ်ဝဲအသိးအဃိ ယဟိဝၤယွၤ ဆိၣ်ဂ့ၤအဝဲသ့ၣ် ကီးဂၤဒဲး.
၁၄. တၢ်ကဲထီၣ်သးဒီး စီၤပီလူး ဒီးစီၤဘၢ်နါဘၤဒ်လဲၣ် ဒီးအဝဲသ့ၣ် အဒိအတဲာ်န့ၣ် ကဲဘျုးဒ်လဲၣ်. (မၤတၢ် ၁၄:၂၁, ၂၂)
၁၄ ခရံာ်ဖိလၢ တၢ်မၢဖိအစိၤတဖၣ်န့ၣ် အဝဲသ့ၣ်ထံၣ်ဘၣ် တၢ်မၤအၢမၤနးမၢ်မၢ်. ဒီးတဘျီတခီၣ် အဝဲသ့ၣ်ထံၣ်ဘၣ် တၢ်မၤအၢမၤနးလၢ အဝဲသ့ၣ်တဆိမိၣ်ဘၣ်ဘၣ်. ဖဲစီၤဘၢ်နါဘၤ ဒီးတၢ်မၢဖိပီလူး စံၣ်တဲၤတဲလီၤတၢ်လၢ ဝ့ၢ်လူစတြၤအခါ တၢ်ကဲထီၣ်သးဒီး အဝဲသ့ၣ်ဒ်လဲၣ်န့ၣ် ပကကွၢ်သကီး. ခီၣ်ထံးခါ ပှၤလၢကနၣ် အတၢ်စံၣ်တဲၤတဲလီၤတဖၣ်န့ၣ် တူၢ်လိာ်အဝဲသ့ၣ်ဂ့ၤဂ့ၤ. ဘၣ်ဆၣ်လၢခံ ပှၤလၢအထီဒါတၢ်တဖၣ် “ကွဲန့ၢ်လွဲန့ၢ် ပှၤဂီၢ်မုၢ်တဖၣ်” အဃိ ပှၤတနီၤလၢ အကနၣ် အဝဲသ့ၣ် လၢအခီၣ်ထံးန့ၣ် ကွံာ်ဝဲစီၤပီလူးလၢလၢၢ် ဒီးပာ်သံအီၤ. (မၤတၢ် ၁၄:၁၉) သနာ်က့ စီၤပီလူး ဒီးစီၤဘၢ်နါဘၤ ဆဲးစံၣ်တဲၤတဲလီၤတၢ်လၢ တၢ်လီၢ်အဂၤဒံး. အဃိ အဝဲသ့ၣ် “ဒုးကဲထီၣ် ပှၤတနီၤလၢ ယ့ၣ်ၡူး အပျဲၢ်အဘီၣ်” ဒီးအဝဲသ့ၣ် အတၢ်ကတိၤ ဒီးအဒိအတဲာ်န့ၣ် ကဲထီၣ်တၢ်ဂံၢ်တၢ်ဘါလၢ ဒီပုၢ်ဝဲၢ်မုၣ်ခွါတဖၣ်အဂီၢ်. (ဖး မၤတၢ် ၁၄:၂၁, ၂၂.) စီၤပီလူး ဒီးစီၤဘၢ်နါဘၤ ထံၣ်ဘၣ် တၢ်မၤအၢမၤနး နာ်က့ အဝဲသ့ၣ် ဆဲးစံၣ်တဲၤတဲလီၤတၢ်ဒံးအဃိ ကဲဘျုးဝဲလၢ ပှၤအါဂၤအဂီၢ်. ပဝဲစ့ၢ်ကီး ပမ့ၢ်ဆဲးမၤ ယဟိဝၤယွၤ အတၢ်မၤ ဒီးပမ့ၢ်တဟ့ၣ်အၡူဘၣ်န့ၣ် ပကန့ၢ်ဘၣ်တၢ်ဆိၣ်ဂ့ၤ.
လၢပစိၤခဲအံၤ
၁၅. လၢဒီပုၢ်ဝဲၢ်ခွါအ့ၤဟ့ၣ် မဲးမ့လဲၤ အတၢ်လဲၤခီဖျိန့ၣ် နန့ၢ်ဘၣ် တၢ်မၤလိဒ်လဲၣ်.
၁၅ တချုးဖဲ ၁၉၁၄ နံၣ်န့ၣ် ယဟိဝၤယွၤ ပှၤဂီၢ်မုၢ်တဖၣ် ခိးကွၢ်ဝဲလၢ တၢ်ကကဲထီၣ်သး တမံၤမံၤ. အဒိ ဒီပုၢ်ဝဲၢ်မုၣ်ခွါအါဂၤ ဆိမိၣ်ဝဲလၢ တယံာ်ဘၣ်န့ၣ် အဝဲသ့ၣ် ကလဲၤထီၣ်ဘၣ်လၢမူခိၣ် ဒီးဒီပုၢ်ဝဲၢ်ခွါမဲးမ့လဲၤစ့ၢ်ကီး ဆိမိၣ်ဝဲဒ်န့ၣ်. အဃိ ဖဲလါစဲးပတ့ဘၢၣ် ၁၉၁၄ န့ၣ်အဟ့ၣ်တၢ်စံၣ်တဲၤတဲလီၤတခါ ဒီးအတဲဝဲလၢ “ဘၣ်သ့ၣ်သ့ၣ် ယကစံၣ်တဲၤတဲလီၤဘၣ် ကမျၢၢ်တၢ်စံၣ်တဲၤတဲလီၤတခါအံၤန့ၣ် အလီၢ်ခံကတၢၢ်တဘျီလီၤ.” ဘၣ်ဆၣ် အတၢ်စံၣ်တဲၤတဲလီၤန့ၣ် တမ့ၢ်အလီၢ်ခံကတၢၢ်တဘျီဘၣ်. လၢခံဒီပုၢ်ဝဲၢ်ခွါမဲးမ့လဲၤ တဲဝဲလၢ “ဘၣ်သ့ၣ်သ့ၣ် ပဝဲတနီၤန့ၣ် ပကရီဆိမိၣ်လၢ ပကလဲၤဘၣ်လၢ မူခိၣ်တဘျီဃီ.” ဒီးအဆဲးတဲဝဲလၢ “ဘၣ်ဆၣ် တၢ်လၢပကဘၣ်မၤန့ၣ်မ့ၢ်ဝဲ ပကဘၣ်ဆဲးမၤ ကစၢ်အတၢ်မၤ ဆူၣ်ဆူၣ်.” ဒီပုၢ်ဝဲၢ်ခွါမဲးမ့လဲၤ ဟးစံၣ်တဲၤတဲလီၤတၢ်ဆူၣ်မး ဒီးအဆဲးမၤ ကစၢ်ယွၤအတၢ်မၤလၢ တၢ်သးဆူၣ်. တကးဒံးဘၣ် အန့ၢ်ဘၣ် တၢ်ခွဲးတၢ်ယာ်လၢ အလဲၤဟ့ၣ်ဂံၢ်ဟ့ၣ်ဘါဝဲ ဒီပုၢ်ဝဲၢ်ခွါအါဂၤလၢ အလီၤဘၣ်လၢဃိာ်ပူၤ ခီဖျိလၢ အဝဲသ့ၣ်တလဲၤကဲသုးဘၣ်အဃိ. ဒီပုၢ်ဝဲၢ်ခွါမဲးမ့လဲၤန့ၣ် အသးပှၢ်ထီၣ်နာ်က့ အလဲၤထီၣ် တၢ်အိၣ်ဖှိၣ်ထီဘိ. ဖဲဒီပုၢ်ဝဲၢ်ခွါမဲးမ့လဲၤ အိၣ်ခီးဝဲအခိၣ်ဖး အဆၢကတီၢ် အဆဲးမၤယဟိဝၤယွၤ အတၢ်မၤဆူၣ်ဆူၣ်အဃိ အန့ၢ်ဘၣ်အဘျုးဒ်လဲၣ်. ဖဲ ၁၉၆၆ နံၣ် တချုးအသံဒံးဘၣ်န့ၣ် အကွဲးဝဲလၢ “ခဲအံၤနာ်က့ ယတၢ်နာ်ဆူၣ် ဒ်သိးဒီးလၢညါလီၤ.” ဒီပုၢ်ဝဲၢ်ခွါတဂၤအံၤ အတၢ်ပာ်သူၣ်ပာ်သး ဖၣ်ဂ့ၤညါ. အဃိ ဖဲပလဲၤခီဖျိ တၢ်မၤကွၢ်လၢ အယံာ်န့ၢ်ဒံး ပဆိမိၣ်ပာ်အီၤအခါ ပကဘၣ် ကွၢ်လိအဒိအတဲာ်.—ဧ့ၤဘြံၤ ၁၃:၇.
၁၆. ဒီပုၢ်ဝဲၢ်ခွါ ဟါဘၢၤကၠဲန့ ဒီးအမါန့ၣ် လဲၤခီဖျိဘၣ်ဝဲ တၢ်ကီတၢ်ခဲဒ်လဲၣ်. (ယၤကိာ် ၄:၁၄)
၁၆ ယဟိဝၤယွၤ အခ့အပှၤအါဂၤ လဲၤခီဖျိဘၣ်ဝဲ တၢ်ဆူးတၢ်ဆါ လၢအဝဲသ့ၣ် တဆိမိၣ်ဘၣ်ဝဲနီတဘျီဘၣ်. အဒိ ဖဲဒီပုၢ်ဝဲၢ်ခွါ ဟါဘၢၤကၠဲန့b တဲဖျါထီၣ် အတၢ်လဲၤခီဖျိအခါ အတဲဝဲလၢ အီၤဒီးအမါ မၤဝဲမံၤၡၢၤနရံၤတၢ်မၤ လၢကီၢ်ကၣ်နၣ်မုာ်မး. လၢခံယံာ်ထီၣ်ဘျီ ဒီပုၢ်ဝဲၢ်ခွါ ဟါဘၢၤကၠဲန့ န့ၢ်ဘၣ်တၢ်ဆါတခါ လၢအမ့ၢ် တၢ်သးလီၤစၢ်တၢ်ဆါ လၢအနးတကလုာ်. ဒီပုၢ်ဝဲၢ်ခွါ ဟါဘၢၤကၠဲန့ တဲဝဲလၢ အတၢ်ဆါတခါအံၤ လီၤဂာ်ဒ်သိးဒီး တၢ်ကတိၤ လၢအအိၣ်ဖဲ ယၤကိာ် ၄:၁၄ လၢအတဲဝဲလၢ “ခဲမုၢ်ဆ့ၣ် သုတၢ်အိၣ်မူ ကမၤအသးဒ်လဲၣ်န့ၣ် သုတသ့ၣ်ညါဘၣ်.” (ဖး.) ဒီးအတဲဝဲလၢ “ခီဖျိလၢ ယန့ၢ်ဘၣ် တၢ်ဆါတခါအံၤအဃိ ပပာ်လီၤသးလၢ ပကဟးထီၣ်လၢ ကီၢ်ကၣ်နၣ်ဒီး ပာ်တ့ၢ်ကွံာ် ပသကီးတဖၣ် ဒီးက့ၤဘှီဘျါသးလၢ ကီၢ်ခဲနဒၣ်.” ဒီပုၢ်ဝဲၢ်ခွါ ဟါဘၢၤကၠဲန့ ဒီးအမါန့ၣ် လဲၤခီဖျိဘၣ်ဝဲ တၢ်ကီတၢ်ခဲနာ်က့ ယဟိဝၤယွၤ မၤစၢၤအဝဲသ့ၣ်လၢ ကဆဲးမၤအတၢ်မၤ လၢတၢ်သးတီ.
၁၇. ဒီပုၢ်ဝဲၢ်ခွါ ဟါဘၢၤကၠဲန့ အတၢ်လဲၤခီဖျိန့ၣ် ကဲထီၣ်တၢ်မၤစၢၤလၢ ဒီပုၢ်ဝဲၢ်မုၣ်ခွါတဖၣ် အဂီၢ်ဒ်လဲၣ်.
၁၇ ဒီပုၢ်ဝဲၢ်ခွါ ဟါဘၢၤကၠဲန့ တဲဖျါထီၣ်အဂ့ၢ်ပျီပျီအဃိ အတၢ်လဲၤခီဖျိအံၤ မၤစၢၤဘၣ် ပှၤဂၤဒီဒူၣ်ညါ. အဒိ ဒီပုၢ်ဝဲၢ်မုၣ်တဂၤ တဲဝဲလၢ “ယဖးဘၣ် တၢ်အိၣ်မူ တၢ်လဲၤခီဖျိအဂ့ၢ်အါမး ဘၣ်ဆၣ် ဒီပုၢ်ဝဲၢ်ခွါ ဟါဘၢၤကၠဲန့ အတၢ်လဲၤခီဖျိန့ၣ် ထီးဘၣ်ယသး ဖးဒိၣ်ညါ. . . . ဒီပုၢ်ဝဲၢ်ခွါ ဟါဘၢၤကၠဲန့ ဘၣ်ပာ်တ့ၢ်ကွံာ်အမူဒါ ဒ်သိးကက့ၤဘှီဘျါသး. အဃိ အတၢ်လဲၤခီဖျိအံၤ မၤစၢၤယၤလၢ ယကအိၣ်ဒီး တၢ်ထံၣ်အကြၢးအဘၣ် ဖဲယဘၣ်လဲၤခီဖျိ တၢ်ကီတၢ်ခဲစ့ၢ်ကီး.” ဒီပုၢ်ဝဲၢ်ခွါတဂၤစ့ၢ်ကီး တဲဝဲလၢ “ယကဲဘၣ် တၢ်အိၣ်ဖှိၣ်သးပှၢ် န့ၢ်အနံၣ်တဆံညါ. လၢခံ ယအိၣ်ဒီး သးအတၢ်ဆိကမိၣ်တၢ်ဆါအဃိ ယတကဲဘၣ် တၢ်အိၣ်ဖှိၣ်သးပှၢ်လၢၤဘၣ်. ယတူၢ်ဘၣ်လၢ ယတကဲဘျုးနီတကၠဲးဘၣ် ဒီးယသးဟးဂီၤတုၤလၢ ယမၣ်တဘၣ်သးဖး တၢ်အိၣ်မူ တၢ်လဲၤခီဖျိအဂ့ၢ်ဘၣ်. . . . ဘၣ်ဆၣ် ဒီပုၢ်ဝဲၢ်ခွါ ဟါဘၢၤကၠဲန့ အတၢ်လဲၤခီဖျိန့ၣ် မၤဆူၣ်ထီၣ်ယသး ဖးဒိၣ်ညါ.” ဒီပုၢ်ဝဲၢ်ခွါ ဟါဘၢၤကၠဲန့ အတၢ်လဲၤခီဖျိအံၤ ဒုးသ့ၣ်နီၣ်ထီၣ်ပှၤလၢ ဖဲပထံၣ်ဘၣ် တၢ်ကီတၢ်ခဲလၢ ပတဆိမိၣ်ဘၣ်ဘၣ်အခါ ပတၢ်လဲၤခီဖျိန့ၣ် မၤဆူၣ်ထီၣ်ပှၤဂၤအသးသ့. တၢ်အိၣ်သး မ့ၢ်တကဲထီၣ် ဒ်သိးပဆိမိၣ်ပာ်စၢၤဘၣ်နာ်က့ ပပာ်လီၤ တၢ်ဒိတၢ်တဲာ်လၢ ပအိၣ်ဒီး တၢ်နာ်ဒီးတၢ်တူၢ်န့ၢ်ခီၣ်ကဲသ့.—၁ ပ့းတရူး ၅:၉.
ဖဲပထံၣ်ဘၣ် တၢ်အိၣ်သးလၢ ပတဆိမိၣ်ဘၣ်ဘၣ်အခါ ပမ့ၢ်သန့ၤသးလၢ ယဟိဝၤယွၤန့ၣ် ပတၢ်ရ့လိာ်သးဒီးအီၤ ကဂ့ၤဒိၣ်ထီၣ် (ကွၢ်လံာ်အဆၢ ၁၈)
၁၈. ဒ်တၢ်ဂီၤပာ်ဖျါထီၣ်ဝဲအသိး ဒီပုၢ်ဝဲၢ်မုၣ် မုၣ်ကမဲတဂၤလၢ အအိၣ်လၢ နဲးကၠံရံယါ အဒိအတဲာ်န့ၣ် နန့ၢ်ဘၣ် တၢ်မၤလိဒ်လဲၣ်.
၁၈ ခီဖျိလၢ ခိၤရိၤနၤတၢ်ဆါ (COVID-19) ရၤလီၤသးအဃိ ယဟိဝၤယွၤ အခ့အပှၤအါဂၤစ့ၢ်ကီး ထံၣ်ဘၣ်တၢ်ကီတၢ်ခဲ. အဒိ ဒီပုၢ်ဝဲၢ်မုၣ် မုၣ်ကမဲတဂၤလၢ အအိၣ်လၢ နဲးကၠံရံယါန့ၣ် အတၢ်အီၣ်တၢ်အီ ဒီးအစ့အိၣ်တ့ၢ် ထဲတစဲးဖိလီၤ. ဘၣ်တဂီၤ အဖိမုၣ်ကၠးအီၤလၢ အဝဲသ့ၣ် ဖီအီၣ်အဟုသး လၢအအိၣ်တ့ၢ်ထဲတခွး မ့ၢ်ဝံၤဘျီ အဝဲသ့ၣ် ကဘၣ်အီၣ်က့ၤမနုၤလဲၣ်. ဒီပုၢ်ဝဲၢ်မုၣ်အံၤ တဲဘၣ်အဖိမုၣ်လၢ အစ့ ဒီးတၢ်အီၣ်တၢ်အီ မ့ၢ်တအိၣ်လၢၤဘၣ်နာ်က့ အဝဲသ့ၣ် ကဘၣ်ကွၢ်လိ မုၣ်ကမဲလၢညါတဂၤလၢ ဝ့ၢ်စၤရဖၤသးန့ၣ် အဒိအတဲာ်. မုၣ်ကမဲတဂၤလၢ ဝ့ၢ်စၤရဖၤသးန့ၣ် ဖီအီၣ်ဝဲအတၢ်အီၣ် လၢအအိၣ်တ့ၢ် လၢခံကတၢၢ်တဘျီ ဒီးနာ်န့ၢ်ဝဲလၢ ယဟိဝၤယွၤ ကကွၢ်ထွဲအီၤ. (၁ စီၤပၤ ၁၇:၈-၁၆) ဒီးတချုးလၢ ဒီပုၢ်ဝဲၢ်မုၣ်အံၤ ဒီးအဖိမုၣ် တဲသကီး ဘၣ်ဃးဒီး မုၢ်ဆါခီတၢ်အီၣ်ဒံးဘၣ်န့ၣ် ဒီပုၢ်ဝဲၢ်မုၣ်ခွါ ဟဲစိာ်န့ၢ်အဝဲသ့ၣ် တၢ်အီၣ်တၢ်အီတနီၤ. တၢ်အီၣ်တၢ်အီလၢ ဒီပုၢ်ဝဲၢ်မုၣ်ခွါ ဟဲစိာ်န့ၢ်အဝဲသ့ၣ်န့ၣ် အဝဲသ့ၣ်အီၣ်ဝဲ ကတူၢ်ခံနွံညါ. ဒီပုၢ်ဝဲၢ်မုၣ်အံၤ တဲဝဲလၢ အသ့ၣ်ညါဘၣ်လၢ တၢ်လၢအတဲသကီးဒီး အဖိမုၣ်န့ၣ် ယဟိဝၤယွၤ ကနၣ်ဝဲထံထံ. အဃိ ပမၤလိဘၣ်လၢ ဖဲပထံၣ်ဘၣ် တၢ်အိၣ်သးလၢ ပတဆိမိၣ်ဘၣ်ဘၣ်အခါ ပမ့ၢ်သန့ၤသးလၢ ယဟိဝၤယွၤန့ၣ် ပတၢ်ရ့လိာ်သးဒီးအီၤ ကဂ့ၤဒိၣ်ထီၣ်.—၁ ပ့းတရူး ၅:၆, ၇.
၁၉. ဒီပုၢ်ဝဲၢ်ခွါ အဲလဲးစံးယၢၤၡီး ထံၣ်ဘၣ်တၢ်မၤအၢမၤနး ဒ်လဲၣ်.
၁၉ ပူၤကွံာ်စှၤကီးနံၣ်န့ၣ် ပဒီပုၢ်ဝဲၢ်မုၣ်ခွါအါဂၤ ထံၣ်ဘၣ်တၢ်မၤအၢမၤနး လၢအဝဲသ့ၣ် တဆိမိၣ်ဘၣ်ဘၣ်. အဒိ ပကတဲသကီး ဒီပုၢ်ဝဲၢ်ခွါ အဲလဲးစံးယၢၤၡီး လၢအအိၣ်လၢ ကီၢ်ရၢၡါန့ၣ် အတၢ်လဲၤခီဖျိ. ဒီပုၢ်ဝဲၢ်ခွါ အဲလဲးစံးယၢၤၡီးန့ၣ် အဘျၢထံဖဲ ၁၉၉၄. ဖဲန့ၣ်အခါ ယဟိဝၤပှၤအုၣ်အသး လၢအအိၣ်လၢ ကီၢ်ရၢၡါန့ၣ် အိၣ်ဒီးတၢ်သဘျ့လၢ ကဘူၣ်ထီၣ်ဘါထီၣ် ယဟိဝၤယွၤ. လၢခံတဘျုးနံၣ်ဘျီ လၢကီၢ်ရၢၡါန့ၣ် တၢ်အိၣ်သးဆီတလဲ. အဃိ ဖဲ ၂၀၂၀ န့ၣ်ပှၤဟဲနုာ်လီၤဃုကွၢ်တၢ်လၢ ဒီပုၢ်ဝဲၢ်ခွါ အဲလဲးစံးယၢၤၡီးအဟံၣ် ဒီးပှၤဟံန့ၢ် အတၢ်ဖိတၢ်လံၤဒီဒူၣ်. လၢခံစှၤကိာ်လါန့ၣ် ပဒိၣ်တီၣ်ထီၣ်တၢ်မူး ဒီးတဲဝဲလၢ ဒီပုၢ်ဝဲၢ်ခွါအံၤ အမၤကမၣ်တၢ်. တကးဒံးဘၣ် ဒ်သိးကဖျါလၢ ဒီပုၢ်ဝဲၢ်ခွါ အဲလဲးစံးယၢၤၡီး မၤကမၣ်တၢ်အဂီၢ် ပှၤတဂၤပာ်မၤသးလၢ အသးအိၣ်လံာ်စီဆှံ ဒီးမၤလိတၢ်အိၣ်ဝဲ တနံၣ်ဘျဲၣ်ညါ. သနာ်က့ အဒိဟုၣ်ဝဲတၢ်ဂီၤမူ ဝံၤဘျီ အတီၣ်ထီၣ်ဝဲလၢ စံၣ်ညီၣ်ကွီၢ်အရူ. ပှၤတဂၤအံၤ မၤဝဲကၠဲအံၤန့ၣ် ဖၣ်လီၤသးဘၣ်ဒိညါ.
၂၀. ဒီပုၢ်ဝဲၢ်ခွါ အဲလဲးစံးယၢၤၡီး အတၢ်ရ့လိာ်သးဒီး ယဟိဝၤယွၤ ဂ့ၤဒိၣ်ထီၣ်ဒ်လဲၣ်.
၂၀ တၢ်မၤအၢမၤနးလၢ ဒီပုၢ်ဝဲၢ်ခွါ အဲလဲးစံးယၢၤၡီး ထံၣ်ဘၣ်ဝဲန့ၣ် ကဲဘျုးလၢအဂီၢ် တမံၤမံၤဧါ. ကဲဘျုးဝဲ. ဒီပုၢ်ဝဲၢ်ခွါ အဲလဲးစံးယၢၤၡီးန့ၣ် အတၢ်ရ့လိာ်သးဒီး ယဟိဝၤယွၤ ဂ့ၤဒိၣ်ထီၣ် ဒီးအတဲဝဲလၢ “ယၤဒီးယမါန့ၣ် ပဃ့ထုကဖၣ်ဒ်သိးသိး အါန့ၢ်ဒံးလၢညါ. ဒီးယသ့ၣ်ညါဘၣ်လၢ ယဟိဝၤယွၤ မ့ၢ်တမၤစၢၤယၤဘၣ်န့ၣ် ယလဲၤခီဖျိ တၢ်အိၣ်သးတခါအံၤ လၢယနီၢ်ကစၢ်တန့ၢ်ဘၣ်. တကးဒံးဘၣ် လၢလံာ်စီဆှံပူၤန့ၣ် အိၣ်ဒီးတၢ်ဂ့ၢ်အါမးလၢ အပာ်ဖျါထီၣ်ဝဲလၢ ပကဘၣ် ပာ်သးဂၢၢ်ဂၢၢ် ဒီးနာ်န့ၢ်ယဟိဝၤယွၤ. အဃိ ဖဲယမၤ နီၢ်ကစၢ်တၢ်မၤလိလံာ်စီဆှံ ဒီးဆိမိၣ်ထံ ယဟိဝၤယွၤ အခ့အပှၤလၢညါ လၢအသးတီတဖၣ် အဂ့ၢ်အခါ အမၤစၢၤယၤဒ်သိး ယကမၤလီၤမၢ်ကွံာ် တၢ်သးဟးဂီၤ.”
၂၁. လၢတၢ်မၤလိတခါအံၤန့ၣ် ပမၤလိဘၣ် မနုၤလဲၣ်.
၂၁ လၢတၢ်မၤလိတခါအံၤန့ၣ် ပမၤလိဘၣ် မနုၤလဲၣ်. ပအိၣ်မူလၢ ဆၢကတီၢ်ခဲအံၤန့ၣ် တဘျီတခီၣ် ပကထံၣ်ဘၣ် တၢ်ကီတၢ်ခဲလၢ ပတဆိမိၣ်ဘၣ်ဘၣ်. သနာ်က့ ပမ့ၢ်သန့ၤသးလၢ ယဟိဝၤယွၤန့ၣ် အကမၤစၢၤပှၤထီဘိ. လံာ်စီဆှံအဆၢလၢ တၢ်မၤလိတခါအံၤအခီၣ်ထံးန့ၣ် တဲဝဲလၢ “ပှၤတီပှၤလိၤန့ၣ် ထံၣ်ဘၣ် တၢ်ကီတၢ်ခဲအါမံၤဘၣ်ဆၣ် ယဟိဝၤယွၤ မၤပူၤဖျဲးအီၤလၢ တၢ်သ့ၣ်တဖၣ်န့ၣ်ခဲလၢာ်.” (စံးထီၣ်ပတြၢၤ ၃၄:၁၉) အဃိ ပမၤလိဘၣ်လၢ ပတဘၣ်ဆိမိၣ်ထဲ ပတၢ်ကီတၢ်ခဲဘၣ် ဒီးပကဘၣ်နာ်လၢ ယဟိဝၤယွၤ အိၣ်ဒီး တၢ်စိတၢ်ကမီၤလၢ အကမၤစၢၤပှၤထီဘိ. ပမ့ၢ်နာ်န့ၢ် ယဟိဝၤယွၤန့ၣ် ပကတဲဒ် စီၤပီလူး တဲဝဲလၢ “ယအိၣ်ဒီး တၢ်ဂံၢ်တၢ်ဘါလၢ ယကလဲၤခီဖျိတၢ်ခဲလၢာ် ခီဖျိပှၤတဂၤလၢ အဟ့ၣ်ယၤ တၢ်စိကမီၤန့ၣ်အဃိ.”—ဖံလံးပံၤ ၄:၁၃.
တၢ်သးဝံၣ် ၃၈ ကစၢ်ကမၤဆူၣ်ထီၣ် နဂံၢ်ဘါ
a ပအိၣ်မူဘၣ်လၢ မုၢ်နံၤခံကတၢၢ်အဃိ ပကထံၣ်ဘၣ် တၢ်ကီတၢ်ခဲ အကလုာ်ကလုာ် လၢပတဆိမိၣ်ဘၣ်ဘၣ်. သနာ်က့ ပနာ်လၢ ယဟိဝၤယွၤ ကမၤစၢၤအခ့အပှၤလၢ အသးတီတဖၣ်. ယဟိဝၤယွၤ မၤစၢၤအခ့အပှၤ လၢညါတဖၣ်ဒ်လဲၣ်. ဆၢကတီၢ်ခဲအံၤစ့ၢ်ကီး အကမၤစၢၤပှၤဒ်လဲၣ်. ဖဲပဆိမိၣ်ထံ ဘၣ်ဃး ယဟိဝၤယွၤ မၤစၢၤအခ့အပှၤလၢညါ ဒီးအခ့အပှၤလၢ ဆၢကတီၢ်ခဲအံၤအဂ့ၢ်အခါ ပတၢ်နာ် ကဂၢၢ်ကျၢၤဒိၣ်ထီၣ်. ဒီးပမ့ၢ်သန့ၤသးလၢ ယဟိဝၤယွၤန့ၣ် အကမၤစၢၤပှၤစ့ၢ်ကီး.