ပမၤလီၤမၢ်ကွံာ် တၢ်သးဟ့ ကသ့ဒ်လဲၣ်

၂ တဘၣ် ဟ့ၣ်ကၣ်တၢ်တဂ့ၤ

လံာ်စီဆှံ တဲဝဲလၢ–

“တဘၣ်မၤဆၢ တၢ်အၢလၢတၢ်အၢ လၢပှၤနီတဂၤတဂ့ၤ . . . ဂုာ်ကျဲးစၢးအဂ့ၤကတၢၢ်ဒ်သိး မ့ၢ်သ့န့ၣ် အိၣ်ဃူအိၣ်ဖိးဒီးပှၤကိးဂၤဒဲးတက့ၢ် . . . တဘၣ်ဟ့ၣ်ကၣ်တၢ်တဂ့ၤ . . . တၢ်ကွဲးအသးအိၣ်ဝဲလၢ “ယဟိဝၤယွၤ တဲဝဲလၢ ‘တၢ်ဟ့ၣ်ကၣ်န့ၣ် မ့ၢ်ယတၢ်လီၤ, ယကဟ့ၣ်ကၣ်တၢ်လီၤ.’”—ရိမ့ၤ ၁၂:၁၇–၁၉.

အဲၣ်ဒိးတဲဝဲလၢ–

ဖဲပှၤတဂၤဂၤ မ့ၢ်မၤဆါပှၤန့ၣ် ညီဒိၣ်မးလၢ ပကအဲၣ်ဒိး မၤဆၢက့ၤအဝဲသ့ၣ်. ဘၣ်ဆၣ် ကစၢ်ယွၤတအဲၣ်ဒိးဝဲလၢ ပကက့ၤမၤကၣ်က့ၤတၢ်ဘၣ်. ကစၢ်ယွၤ အဲၣ်ဒိးဝဲလၢ ပကအိၣ်ဒီးတၢ်သးစူၤ. ခီဖျိလၢ တယံာ်လၢၤဘၣ်န့ၣ် အအၢၣ်လီၤပှၤလၢ အကမၤဘၣ်ဂီၢ်က့ၤဝဲ တၢ်တတီတလိၤလၢ အဟဲအိၣ်ထီၣ်ခဲလၢာ်.—စံးထီၣ်ပတြၢၤ ၃၇:၇, ၁၀.

လံာ်စီဆှံတဆၢအံၤ မၤစၢၤပှၤ ကသ့ဒ်လဲၣ်–

ပှၤဟီၣ်ခိၣ်ဖိတဖၣ် တလၢတပှဲၤအဃိ အဝဲသ့ၣ် မ့ၢ်ဟ့ၣ်ကၣ်က့ၤတၢ်န့ၣ် အိၣ်ဒၣ်မၤအါထီၣ်ဝဲ တၢ်သးဟ့လီၤ. အဃိ ဖဲပှၤတဂၤဂၤ မ့ၢ်တဲဆါဘၣ်နၤ မ့မ့ၢ် မၤဆါနၤအခါန့ၣ် တဘၣ် ဟ့ၣ်ကၣ်က့ၤ အဝဲသ့ၣ်တဂ့ၤ. ဂုာ်ကျဲးစၢး ပၢၤနသး ဒီးရ့က့ၤဒီး အဝဲသ့ၣ်ဂ့ၤဂ့ၤ. တဘျီတခီၣ်န့ၣ် ပမ့ၢ်သးပ့ၤနီၣ်ကွံာ် တၢ်လၢအဟဲကဲထီၣ်လၢ အပူၤကွံာ်တဖၣ်န့ၣ် မ့ၢ်ဝဲ တၢ်လၢအဂ့ၤကတၢၢ်လီၤ. (ကတိၤဒိ ၁၉:၁၁) ဘၣ်ဆၣ် တဘျီတခီၣ် တၢ်အိၣ်သး ကအိၣ်ဝဲလၢ နကဘၣ်တီၣ်ဖျါထီၣ် တၢ်ဂ့ၢ်တၢ်ကျိၤလၢ ပှၤဘၣ်မူဘၣ်ဒါတဖၣ်အအိၣ်. အဒိ နကမ့ၢ်ပှၤလၢ အလဲၤခီဖျိဘၣ် ပှၤမၤနၤတတီတလိၤဘၣ်. အဃိ ဖဲန့ၣ်အခါ နဃုထၢလၢ နကတီၣ်ဖျါထီၣ် တၢ်ဂ့ၢ်သ့ၣ်တဖၣ်အံၤလၢ ပလံး အအိၣ် မ့တမ့ၢ် ပှၤဘၣ်မူဘၣ်ဒါတဖၣ် အအိၣ်သ့ဝဲလီၤ.

တၢ်ဟ့ၣ်ကၣ်က့ၤတၢ်န့ၣ် တကဲဘျုးနီတမံၤဘၣ်

နကမၤဘၣ်ထီၣ်က့ၤ တၢ်အိၣ်သးအဂီၢ် နဃုကျဲမ့ၢ်တဘၣ်ဘၣ်ဟီမီၤ. နဂုာ်ကျဲးစၢး မၤဃူမၤဖိးတၢ်လံ သနာ်က့ တၢ်ဃူတၢ်ဖိးမ့ၢ်တအိၣ်ဒံးဘၣ်မီၤ. နကမၤဒ်လဲၣ်. တဘၣ်ဟ့ၣ်ကၣ်က့ၤတၢ်တဂ့ၤ နမ့ၢ်ဟ့ၣ်ကၣ်က့ၤတၢ်န့ၣ် ညီနုၢ် အိၣ်ဒၣ် နကမၤနးထီၣ်က့ၤ တၢ်အိၣ်သးလီၤ. ဘၣ်ဆၣ် နမ့ၢ်တဟ့ၣ်ကၣ်က့ၤတၢ်ဘၣ်န့ၣ် နမၤလီၤမၢ်ကွံာ်ဝဲ တၢ်သူၣ်ဟ့ၣ်သးဟ့တဖၣ် သ့ဝဲလီၤ. နမ့ၢ်မၤထွဲ ကစၢ်ယွၤအဟံးစုနဲၣ်ကျဲန့ၣ် နနာ်သ့လၢ နမၤဘၣ်ဂီၢ်ကွံာ် တၢ်ကီတၢ်ခဲတဖၣ်ကန့ၢ်. ဒီးလံာ်စီဆှံတဲဝဲလၢ “သန့ၤစ့ၢ်ကီး နသးလၢအီၤတက့ၢ်. ဒီးကမၤကဲထီၣ်အီၤလီၤ.”—စံးထီၣ်ပတြၢၤ ၃၇:၃-၅.

တၢ်အိၣ်မူ တၢ်လဲၤခီဖျိအဂ့ၢ် အ့ၤတြ့ၤအဲၤ(န်)

မၤလီၤမၢ်ကွံာ်ဝဲ တၢ်ပာ်သူၣ်ပာ်သးလၢအမ့ၢ် တၢ်ဟ့ၣ်ကၣ်တၢ် န့ၢ်လံ

အ့ၤတြ့ၤအဲၤ(န်)န့ၣ် ဖဲအဒိၣ်ထီၣ်သီအခါ အကဲဝဲပှၤတဂၤလၢ အမၤဆူၣ်မၤစိးတၢ် ဒီးအသးဟ့တၢ်. အဃိ ပှၤလၢအမၤဆါအီၤန့ၣ် အဝဲက့ၤ မၤကၣ်က့ၤဝဲ ကိးဂၤဒဲးလီၤ. အတဲဝဲလၢ “ယပၣ်ဃုာ်ဘၣ်လၢ ပှၤခးလိာ်သးအကျါ ဒီးအါဘျီန့ၣ် ယဘၣ်ဒိ ဒီးယသွံၣ်လီၤ ဒီးပှၤပာ်သံယၤလၢ ကျဲခိၣ်ဒ်န့ၣ်လီၤ”

ဖဲအ့ၤတြ့ၤအဲၤ(န်) သးအိၣ် ၁၆ နံၣ်အခါ အစးထီၣ် မၤလိလံာ်စီဆှံ. အတဲဝဲလၢ “ယမၤလိလံာ်စီဆှံန့ၣ် လဲၤထီၣ်လဲၤထီဝဲအဃိ ယသ့ၣ်ညါလီၤယသးလၢ ယကဘၣ်ဆီတလဲ ယတၢ်အိၣ်မူ.” အ့ၤတြ့ၤအဲၤ(န်) ကဘၣ်မၤလီၤမၢ်ကွံာ် အတၢ်ပာ်သူၣ်ပာ်သး လၢအမ့ၢ်အတၢ်သးဟ့ ဒီးတၢ်မၤဆူၣ်မၤစိး. အဃိ တၢ်ဂ့ၢ်လၢ အမၤလိဘၣ်ဝဲဖဲ ရိမ့ၤ ၁၂:၁၇-၁၉ န့ၣ်ကဲဘျုးလၢအဂီၢ်ဒိၣ်မး. လံာ်စီဆှံတဆၢအံၤ တဲဝဲလၢ တဘၣ်ဟ့ၣ်ကၣ်က့ၤတၢ်တဂ့ၤ. ဒီးအ့ၤတြ့ၤအဲၤ(န်) တဲဝဲလၢ “ယသ့ၣ်ညါလၢ တၢ်ဆၢကတီၢ်မ့ၢ်ဘၣ်န့ၣ် ယဟိဝၤယွၤ ကမၤလီၤမၢ်ကွံာ် တၢ်တတီတလိၤဘၣ်တဖၣ်ခဲလၢာ်. အဃိ လၢခံကယီကယီန့ၣ် ယမၤလီၤမၢ်ကွံာ် ယတၢ်ပာ်သူၣ်ပာ်သး လၢအတဂ့ၤဘၣ်တဖၣ်န့ၢ်ဝဲ.”

ဘၣ်တဟါ ပှၤလၢအကဲတ့ၢ်ဝဲ အ့ၤတြ့ၤအဲၤ(န်) အဒုၣ်အဒါတဖၣ်န့ၣ် ဟဲထိဝဲ အ့ၤတြ့ၤအဲၤ(န်). ဒီးအဒုၣ်အဒါအခိၣ်တဂၤန့ၣ် တဲအီၤလၢ “မၤဆၢကဒါသၢၤ.” အ့ၤတြ့ၤအဲၤ(န်) တဲဝဲလၢ “ဖဲန့ၣ်အဆၢကတီၢ်န့ၣ် ယအဲၣ်ဒိး က့ၤမၤဆၢက့ၤအဝဲသ့ၣ်ညါ. ဘၣ်ဆၣ် ယတက့ၤမၤဆၢ အဝဲသ့ၣ်ဘၣ်. ယဃ့ထုကဖၣ်တၢ်လၢ ယဟိဝၤယွၤအအိၣ် တဘျီဃီ ဒီးဟးထီၣ်ကွံာ်ဖဲန့ၣ်.

အ့ၤတြ့ၤအဲၤ(န်) တဲဝဲလၢ “လၢခံတနံၤန့ၣ် ယထံၣ်လိာ်သးဒီး ယဒုၣ်ယဒါအခိၣ်တဂၤန့ၣ်. ဘၣ်ဆၣ် အအိၣ်ထဲတဂၤလီၤ. ဖဲန့ၣ်အခါ ယသးဒိၣ်ထီၣ်တၢ်. ဘၣ်ဆၣ် ယဃ့ထုကဖၣ်လၢ ယဟိဝၤယွၤအအိၣ်ချ့ချ့ ဒ်သိးဒီး ယပၢၤယသးကန့ၢ်အဂီၢ်. ဖဲန့ၣ် ယဆိကမိၣ်လၢ အဝဲစ့ၢ်ကီး ကသးဒိၣ်ထီၣ်ယၤ. ဘၣ်ဆၣ် အဟဲလၢယအိၣ် ဒီးတဲယၤလၢ ‘တၢ်ကဲထီၣ်သးဖဲမနၤန့ၣ် ဝံသးစူၤ ပျၢ်ယတၢ်ကမၣ်နီၤ. ယမ့ၢ်တဲနၤတီတီန့ၣ် ယအဲၣ်ဒိးကဲထီၣ် ပှၤဒ်သိးဒီးနၤ ဒီးယအဲၣ်ဒိးမၤလိ လံာ်စီဆှံ.’ အဝဲတဲယၤ ဒ်အံၤအဃိ ယဖုးဘၣ်ယသးဒိၣ်မး. ခီဖျိလၢ ယပၢၤယသးန့ၢ်ဝဲအဃိ ယသးခုဒိၣ်မး. ဒီးခဲအံၤန့ၣ် ပစးထီၣ်မၤလိလံာ်စီဆှံ ဒ်သိးသိးလံ.”