တၢ်မၤလိ ၉
ပာ်လုၢ်ပာ်ပှ့ၤသးသမူ လၢကစၢ်ယွၤဟ့ၣ်ပှၤ
“ပမူ, ပဟူးပဂဲၤ ဒီးပဟဲကဲထီၣ်လၢ အဃိ.”—မၤတၢ် ၁၇:၂၈.
တၢ်သးဝံၣ် ၁၄၁ သးသမူအတၢ်လီၤလး
တၢ်မၤလိအံၤ အတၢ်တိာ်ပာ်a
၁. ယဟိဝၤယွၤ ပာ်လုၢ်ပာ်ပှ့ၤ ပသးသမူထဲလဲၣ်.
ဆိကမိၣ်ကွၢ် နပါဟ့ၣ်နၤဟံၣ်တဖျၢၣ်. ဟံၣ်တဖျၢၣ်အံၤ အလီၢ်လံၤ, အခိၣ်ဒုး ဟးဂီၤတကၠဲး ဒီးဟံၣ်ဒူၣ်ကပၤ လီၤပှီၢ်တက့အဃိ နဘၣ်ဘှီဂ့ၤထီၣ်က့ၤအီၤ. ဟံၣ်တဖျၢၣ်အံၤ မ့ၢ်ဟးဂီၤတကၠဲးနာ်က့ အပှ့ၤဒိၣ်မး. အဃိ နကပာ်လုၢ်ပာ်ပှ့ၤ ဒီးကွၢ်ကတီၤ ဟံၣ်တဖျၢၣ်အံၤ မူာ်မူာ်နီၢ်နီၢ်. ယဟိဝၤယွၤစ့ၢ်ကီး အလီၤဂာ်ဒ်သိးဒီး ပါတဂၤအံၤ. အဟ့ၣ်ပှၤတၢ်ဟ့ၣ် အလုၢ်ဒိၣ်ပှ့ၤဒိၣ်တခါ လၢအကဲဝဲ သးသမူ. ဒီးအပာ်လုၢ်ပာ်ပှ့ၤ ပသးသမူဒိၣ်မးအဃိ အဟ့ၣ်လီၤအဖိခွါလၢ ကပှ့ၤက့ၤပှၤအဂီၢ်.—ယိၤဟၣ် ၃:၁၆.
၂. ဖဲ ၂ ကရံၣ်သူး ၇:၁ န့ၣ်ယဟိဝၤယွၤ ဘၣ်သးလၢ ပကမၤမနုၤလဲၣ်.
၂ ယဟိဝၤယွၤန့ၣ် အကဲဝဲ တၢ်မူအဂံၢ်ခီၣ်ထံး. (စံးထီၣ်ပတြၢၤ ၃၆:၉) တၢ်မၢဖိပီလူးစ့ၢ်ကီး နာ်ဝဲဒ်န့ၣ် ဒီးအတဲဝဲလၢ “ပမူ, ပဟူးပဂဲၤ ဒီးပဟဲကဲထီၣ်လၢ အဃိ.” (မၤတၢ် ၁၇:၂၅, ၂၈) ဖဲအံၤန့ၣ် ပသ့ၣ်ညါဘၣ်လၢ ပသးသမူန့ၣ် အကဲဝဲ ယဟိဝၤယွၤ အတၢ်ဟ့ၣ်. ဒီးဒ်သိး ပမူကသ့အဂီၢ် ကစၢ်ယွၤ ဟ့ၣ်ပှၤ တၢ်လၢပလိၣ်ဘၣ်ခဲလၢာ်. (မၤတၢ် ၁၄:၁၅-၁၇) နာ်က့ ခဲအံၤန့ၣ် ယဟိဝၤယွၤ တမၤဝဲတၢ်လီၤလး လၢကဒီသဒၢ ပသးသမူ အဂီၢ်ဘၣ်. ဘၣ်ဆၣ် အဘၣ်သးလၢ ပကကျဲးစၢး ကွၢ်ကတီၤ ပတၢ်အိၣ်ဆူၣ်အိၣ်ချ့ ဒီးဆဲးဘူၣ်ထီၣ်ဘါထီၣ်အီၤ. (ဖး ၂ ကရံၣ်သူး ၇:၁.) အဃိ ပကွၢ်ကတီၤ ပတၢ်အိၣ်ဆူၣ်အိၣ်ချ့ ဒီးဒီသဒၢပသးမူ ကသ့ဒ်လဲၣ်.
ပာ်လုၢ်ပာ်ပှ့ၤ တၢ်ဟ့ၣ်လၢအမ့ၢ် သးသမူ
၃. ဘၣ်မနုၤအဃိ ပကဘၣ် ကွၢ်ကတီၤ ပတၢ်အိၣ်ဆူၣ်အိၣ်ချ့လဲၣ်.
၃ ပဆဲးမၤ ယဟိဝၤယွၤ အတၢ်မၤကန့ၢ်ဂ့ၤဂ့ၤအဂီၢ် ပကဘၣ် ကွၢ်ကတီၤ ပတၢ်အိၣ်ဆူၣ်အိၣ်ချ့. (မၢ်ကူး ၁၂:၃၀) ခီဖျိလၢ ပဘၣ်သး ဟ့ၣ်လုၢ်ထီၣ်ပ “နီၢ်ခိ ဒ်တၢ်လုၢ်လၢအမူဝဲ, စီဆှံဝဲ ဒီးကစၢ်ယွၤ တူၢ်လိာ်ဝဲ” အဃိ ပတမၤတၢ်လၢ အကမၤဘၣ်ဒိ ပတၢ်အိၣ်ဆူၣ်အိၣ်ချ့ဘၣ်. (ရိမ့ၤ ၁၂:၁) ပကွၢ်ကတီၤ ပတၢ်အိၣ်ဆူၣ်အိၣ်ချ့ ဂ့ၤဂ့ၤလံနာ်က့ တဘျီတခီၣ်န့ၣ် ပဆိးက့သ့ဒံး. ဘၣ်ဆၣ် ခီဖျိလၢ ပပာ်လုၢ်ပာ်ပှ့ၤ ယဟိဝၤယွၤ အတၢ်ဟ့ၣ်လၢအမ့ၢ် သးသမူအဃိ ပကျဲးစၢး ကွၢ်ကတီၤ ပတၢ်အိၣ်ဆူၣ်အိၣ်ချ့ လၢအဂ့ၤကတၢၢ်.
၄. စီၤပၤဒၤဝံး ပာ်လီၤသးလၢ အကမၤမနုၤလဲၣ်.
၄ ဖဲစီၤဒၤဝံး ဘူးထီၣ်ကသံအခါ အတဲဝဲလၢ “ယမ့ၢ်သံ ဒီးလဲၤလီၤလၢ တၢ်ပူၤန့ၣ် အကကဲဘျုးဒ်လဲၣ်. မ့ၢ်ဟီၣ်ခိၣ်ကမူၣ် ကစံးထီၣ်ပတြၢၤနၤဧါ. မ့ၢ်အကတဲဘၣ်ဃးဒီး နတၢ်သးတီအဂ့ၢ်ဧါ.” (စံးထီၣ်ပတြၢၤ ၃၀:၉) ပထံၣ်ဘၣ်လၢ စီၤဒၤဝံးန့ၣ် အပာ်လုၢ်ပာ်ပှ့ၤ ကစၢ်ယွၤ အတၢ်ဟ့ၣ်လၢအမ့ၢ် သးသမူ. အဃိ အပာ်လီၤသးလၢ အကကွၢ်ကတီၤ အတၢ်အိၣ်ဆူၣ်အိၣ်ချ့ ဒ်သိးအကဆဲးမူ ဒီးဘူၣ်ထီၣ်ဘါထီၣ်ဘၣ် ယဟိဝၤယွၤ. ပဝဲစ့ၢ်ကီး ပဘၣ်သး မၤဒ်သိးဒီး စီၤဒၤဝံး.
၅. ပမ့ၢ်ဆိးက့ ဒီးပမ့ၢ်သးပှၢ်ထီၣ်နာ်က့ ပမၤတၢ်မနုၤသ့ဒံးလဲၣ်.
၅ ပမ့ၢ်ဆိးက့ ဒီးပမ့ၢ်သးပှၢ်ထီၣ်န့ၣ် ပမၤတၢ်ဒ်သိးလၢညါ တန့ၢ်အါအါလၢၤဘၣ်. အဃိ ဘၣ်သ့ၣ်သ့ၣ် ပကသးအ့န့ ဒီးပတသးခုဘၣ်. ဘၣ်ဆၣ် ပကဘၣ် ကျဲးစၢး ကွၢ်ကတီၤ ပတၢ်အိၣ်ဆူၣ်အိၣ်ချ့ဒံး. ပမ့ၢ်ဆိးက့ ဒီးပမ့ၢ်သးပှၢ်ထီၣ်နာ်က့ ပကွၢ်လိ စီၤပၤဒၤဝံး ဒီးဆဲးဘူၣ်ထီၣ်ဘါထီၣ် ယဟိဝၤယွၤသ့. တကးဒံးဘၣ် ပမ့ၢ်သံန့ၣ် ယဟိဝၤယွၤ ကမၤသမူထီၣ်က့ၤပှၤ သပှၢ်တၢၢ်. (ယိၤဘး ၁၄:၁၄, ၁၅) ပတလၢတပှဲၤဘၣ်, ဘၣ်ဆၣ် ပသ့ၣ်ညါလၢ ယဟိဝၤယွၤ အဲၣ်ပှၤထဲအံၤညါအဃိ ပသးမုာ်ထီၣ်ဖးဒိၣ်ညါ. (မးသဲ ၁၀:၂၉-၃၁) အဃိ ဖဲပအိၣ်မူဒံးအခါ ပကဘၣ်သး ကွၢ်ကတီၤ ပတၢ်အိၣ်ဆူၣ်အိၣ်ချ့ ဒီးဒီသဒၢ ပသးသမူ လၢအဂ့ၤကတၢၢ်.
တဘၣ်မၤ တၢ်လၢ အကမၤဘၣ်ဒိနၤတဂ့ၤ
၆. ဘၣ်ဃးဒီး ပအီၣ်တၢ်အီတၢ်န့ၣ် ယဟိဝၤယွၤ ဘၣ်သးလၢ ပကမၤမနုၤလဲၣ်.
၆ လံာ်စီဆှံန့ၣ် အတကဲ တၢ်အိၣ်ဆူၣ်အိၣ်ချ့အလံာ် ဒီးအတတဲပှၤလၢ ပကဘၣ်အီၣ်မနုၤလဲၣ် ဒီးအီၣ်တၢ်အါထဲလဲၣ်ဘၣ်. ဘၣ်ဆၣ် အပာ်ဖျါန့ၢ်ပှၤ ယဟိဝၤယွၤ အတၢ်ထံၣ် ဘၣ်ဃးဒီး တၢ်အိၣ်ဆူၣ်အိၣ်ချ့ ဒီးတၢ်အီၣ်တၢ်အီ. အဒိ ယဟိဝၤယွၤ ဟ့ၣ်ပလီၢ်ပှၤ ဘၣ်ဃးဒီး “တၢ်လၢ အကမၤဘၣ်ဒိ” ပတၢ်အိၣ်ဆူအိၣ်ချ့. (စံၣ်တဲၤတဲလီၤတၢ် ၁၁:၁၀) လံာ်စီဆှံ တဲဝဲလၢ ပတဘၣ်အီၣ်တၢ် အါတလၢ ဒီးပတဘၣ်အီသံး အါတလၢဘၣ်. ပမ့ၢ်အီၣ်တၢ်အါတလၢ ဒီးအီသံးအါတလၢန့ၣ် အကမၤဘၣ်ဒိ ပတၢ်အိၣ်ဆူၣ်အိၣ်ချ့ ဒီးပသံသ့. (ကတိၤဒိ ၂၃:၂၀) အဃိ ပကအီၣ်ကအီ မနုၤလဲၣ် ဒီးပကအီၣ်ကအီအီၤ ထဲလဲၣ်န့ၣ် ယဟိဝၤယွၤ ဘၣ်သးလၢ ပကဆိမိၣ်ထံတၢ် လီၤတံၢ်လီၤဆဲး ဒီးပၢၤပသး.—၁ ကရံၣ်သူး ၆:၁၂; ၉:၂၅.
၇. ဘၣ်ဃးဒီး ပတၢ်အိၣ်ဆူၣ်အိၣ်ချ့န့ၣ် ကတိၤဒိ ၂:၁၁ မၤစၢၤပှၤဒ်သိး ပဆၢတဲာ်တၢ်လၢအဘၣ် ကသ့ဒ်လဲၣ်.
၇ တချုးပဆၢတဲာ်တၢ် တမံၤမံၤဒံးဘၣ်န့ၣ် ပကဘၣ် ဆိမိၣ်ထံတၢ် မူာ်မူာ်နီၢ်နီၢ်. ပမ့ၢ်မၤဒ်န့ၣ်န့ၣ် ပပာ်ဖျါထီၣ်လၢ ပပာ်လုၢ်ပာ်ပှ့ၤ ယဟိဝၤယွၤ အတၢ်ဟ့ၣ်လၢအမ့ၢ် သးသမူ. (စံးထီၣ်ပတြၢၤ ၁၁၉:၉၉, ၁၀၀; ဖး ကတိၤဒိ ၂:၁၁.) အဒိ ပကအီၣ်မနုၤလဲၣ်န့ၣ် ပကဆိမိၣ်ထံအီၤ လီၤတံၢ်လီၤဆဲး. ဒီးတၢ်အီၣ် တခါခါ မ့ၢ်တတဲးဒီးပှၤဘၣ်န့ၣ် ပသ့ၣ်ညါလၢ ပတဘၣ် အီၣ်အီၤဘၣ်. တကးဒံးဘၣ် ပမ့ၢ်မံဘျဲဘျဲ, ကျဲးစၢးမၤ နီၢ်ခိတၢ်ဟူးတၢ်ဂဲၤ, အိၣ်ကဆှဲကဆှီ ဒီးမၤကဆှဲကဆှီဟံၣ် ထီဘိန့ၣ် ပပာ်ဖျါထီၣ်လၢ ပကဲပှၤလၢ အဆိကမိၣ် ပဲာ်ထံနီၤဖးတၢ်သ့.
မၤတၢ်လၢ တၢ်ပလီၢ်သးထီဘိ
၈. ပကဘၣ်မၤတၢ်လၢ တၢ်ပလီၢ်သးထီဘိန့ၣ် ယဟိဝၤယွၤ အတၢ်သိၣ်တၢ်သီ ပာ်ဖျါထီၣ်ဝဲဒ်လဲၣ်.
၈ တၢ်သိၣ်တၢ်သီ လၢယဟိဝၤယွၤ ဟ့ၣ်ပှၤအံၣ်စရ့လးဖိန့ၣ် မၤစၢၤအဝဲသ့ၣ်လၢ ဖဲအအိၣ်လၢဟံၣ်မ့ၢ်ဂ့ၤ လဲၤမၤတၢ်မ့ၢ်ဂ့ၤ အကဘၣ် မၤတၢ်လၢ တၢ်ပလီၢ်သးထီဘိ. (၂ မိၤၡ့ ၂၁:၂၈, ၂၉; ၅ မိၤၡ့ ၂၂:၈) ပှၤတဂၤ မ့ၢ်မၤသံဘၣ် ပှၤအဂၤတဂၤ လၢတၢ်တပလီၢ်သးဘၣ် နာ်က့ အတၢ်ကမၣ်အိၣ်ဖးဒိၣ်ညါ. (၅ မိၤၡ့ ၁၉:၄, ၅) ဒီးတၢ်သိၣ်တၢ်သီ အိၣ်ဝဲလၢ ပှၤတဂၤ မ့ၢ်မၤဘၣ်ဒိဘၣ် ဖိသၣ်လၢ အတအိၣ်ဖျဲၣ်ထီၣ်ဒံးဘၣ်န့ၣ် ပှၤကဘၣ်စံၣ်ညီၣ်အီၤ. (၂ မိၤၡ့ ၂၁:၂၂, ၂၃) အဃိ ပသ့ၣ်ညါဘၣ်လၢ ယဟိဝၤယွၤ ဘၣ်သးလၢ ပကကျဲးစၢး မၤတၢ်လၢ တၢ်ပလီၢ်သးထီဘိ.
လၢတၢ်အိၣ်သးသၢခါအံၤန့ၣ် ပပာ်ဖျါထီၣ်လၢ ပပာ်လုၢ်ပာ်ပှ့ၤ သးသမူ ကသ့ဒ်လဲၣ် (ကွၢ်လံာ်အဆၢ ၉)
၉. ဒ်သိးဒီး တၢ်ဘၣ်ဒိဘၣ်ထံး တကဲထီၣ်တဂ့ၤအဂီၢ် ပကဘၣ် မၤမနုၤလဲၣ်. (ကွၢ်စ့ၢ်ကီးတၢ်ဂီၤ.)
၉ လၢဟံၣ်မ့ၢ်ဂ့ၤ လၢတၢ်မၤလီၢ်မ့ၢ်ဂ့ၤ ပမ့ၢ်ကျဲးစၢး မၤတၢ်လၢ တၢ်ပလီၢ်သးထီဘိန့ၣ် ပပာ်ဖျါထီၣ်လၢ ပပာ်လုၢ်ပာ်ပှ့ၤ ယဟိဝၤယွၤ အတၢ်ဟ့ၣ်လၢအမ့ၢ် သးသမူ. အဒိ ပကတၢၤကွံာ်ထး, တၢ်ခိၣ်စူ, တၢ်ထံတၢ်နိ လၢအအိၣ်ဒီးအစုၣ် မ့တမ့ၢ် ကသံၣ်ကသီတမံၤမံၤ. ဒ်သိး တၢ်သ့ၣ်တဖၣ်အံၤ တကဲထီၣ် တၢ်ကီတၢ်ခဲလၢ ပှၤဂၤအဂီၢ် ဒီးဖိသၣ် တထံၣ်ဝဲတဂ့ၤအဂီၢ် ပကဘၣ် တၢၤကွံာ်မ့ၢ်ယံၤ ဒီးတၢၤကွံာ် လၢအလီၢ်ဘၣ်ဘၣ်. ပမ့ၢ်မၤကဲၤထီၣ်မ့ၣ်အူ, ဒိထီၣ်ထံချီ, သူဃဲာ်, ထး, ကွါမ့ၢ်ဂ့ၤန့ၣ် ပတဘၣ်ပာ်တ့ၢ်အီၤ ဒီးလဲၤမၤတၢ်လၢအဂၤဘၣ်. တကးဒံးဘၣ် ပဂံၢ်ဘါမ့ၢ်လီၤစၢ် ခီဖျိလၢ ပအီကသံၣ်, အီသံး ဒီးပမံမ့ၢ်တဘျဲဘၣ်န့ၣ် ပတဘၣ်နီကါဘၣ်. ဒီးဖဲပနီကါခါန့ၣ် ပတဘၣ်ဖီၣ်ဃာ်လီတဲစိ ဒီးတဲလီတဲစိဘၣ်.
ဖဲတၢ်ဘၣ်ဒိဘၣ်ထံး ကဲထီၣ်ဖုးသးအခါ
၁၀. တချုးဖဲ တၢ်ဘၣ်ဒိဘၣ်ထံးကဲထီၣ် ဒီးအကဲထီၣ်သးခါ ပကဘၣ်မၤ မနုၤလဲၣ်.
၁၀ ခီဖျိလၢ န့ဆၢၣ် တၢ်ဘၣ်ဒိဘၣ်ထံး, တၢ်ဆူးတၢ်ဆါ ရၤလီၤသး ဒီးထံဖိကီၢ်ဖိ မၤတၢထီၣ်တၢလီၤတၢ်အဃိ တဘျီတခီၣ်န့ၣ် တၢ်ဘၣ်ဒိဘၣ်ထံး ကဲထီၣ်ဖုးသးဒီးပှၤသ့. အဃိ ဖဲတၢ်ဘၣ်ဒိဘၣ်ထံး ကဲထီၣ်ဖုးသးအခါ ဒ်သိးပကအိၣ် ပူၤပူၤဖျဲးဖျဲးအဂီၢ် ပကဘၣ် ကျဲးစၢးမၤထွဲ ပှၤဘၣ်မူဘၣ်ဒါ တၢ်ဟံးစုနဲၣ်ကျဲ လၢအဟ့ၣ်ပလီၢ်ပှၤ. (ရိမ့ၤ ၁၃:၁, ၅-၇) တချုးလၢ တၢ်ဘၣ်ဒိဘၣ်ထံး ကဲထီၣ်ဒံးဘၣ်န့ၣ် ပအိၣ်ကတီၤဆိပသးသ့. အဃိ လီၢ်ကဝီၤ ပှၤဘၣ်မူဘၣ်ဒါ မ့ၢ်ဟ့ၣ်လီၤပှၤ တၢ်ဟံးစုနဲၣ်ကျဲ တမံၤမံၤန့ၣ် ပကဘၣ်မၤထွဲအီၤ. အဒိ ပအိၣ်ကတီၤပာ်စၢၤသး ခီဖျိ ပပာ်ဃာ်ထံ, တၢ်အီၣ်တၢ်အီ လၢအဟးဂီၤတသ့ဘၣ် ဒီးကသံၣ်ကသီတနီၤ.
၁၁. တၢ်ဆူးတၢ်ဆါ မ့ၢ်ရၤလီၤသး လၢပတၢ်လီၢ်န့ၣ် ပကဘၣ်မၤဒ်လဲၣ်.
၁၁ တၢ်ဆူးတၢ်ဆါ မ့ၢ်ရၤလီၤသး လၢပတၢ်လီၢ်န့ၣ် ပကဘၣ်မၤဒ်လဲၣ်. ပကဘၣ် မၤထွဲ ပှၤဘၣ်မူဘၣ်ဒါ အတၢ်ဟံးစုနဲၣ်ကျဲ ဒ်သိးဒီး ပသ့စု, ပအိၣ်ယံၤဒီးပှၤဂၤ, ပကးဘၢနါဒ့ ဒီးပအိၣ်လီၤဆီဒီးပှၤဂၤ. ပမ့ၢ်မၤထွဲ တၢ်ဟံးစုနဲၣ်ကျဲတဖၣ်အံၤန့ၣ် ပပာ်ဖျါထီၣ်လၢ ပပာ်လုၢ်ပာ်ပှ့ၤ ယဟိဝၤယွၤ အတၢ်ဟ့ၣ်လၢအမ့ၢ် သးသမူ.
၁၂. ဖဲတၢ်ဘၣ်ဒိဘၣ်ထံး ကဲထီၣ်ဖုးသးအခါ တၢ်ဟံးစုနဲၣ်ကျဲဖဲ ကတိၤဒိ ၁၄:၁၅ မၤစၢၤပှၤဒ်လဲၣ်.
၁၂ ဖဲတၢ်ဘၣ်ဒိဘၣ်ထံး ကဲထီၣ်ဖုးသးအခါ ပကနၢ်ဟူဘၣ် တၢ်ကစီၣ်လၢ အတဘၣ်လီၤတံၢ်ဘၣ်. ပကနၢ်ဟူဘၣ်လၢ ပသကီး, လၢပှၤလၢပခိၣ်ပဃၢၤ ဒီးလၢတၢ်ဂီၤမူပူၤ. အဃိ ပတဘၣ်နာ် “တၢ်ကတိၤ ကိးထံၣ်ဒဲး” ဘၣ်. ပကဘၣ်ကနၣ် တၢ်ကစီၣ်နီၢ်ကီၢ်လၢ ပဒိၣ်ဒီးကသံၣ်သရၣ် တဲလီၤဝဲ. (ဖး ကတိၤဒိ ၁၄:၁၅.) တချုးလၢ ပှၤပၢဆှၢတၢ်ကမံးတံာ် ဒီးဝဲၤတြၢ်တဖၣ် ဆှၢလီၤတၢ်ဟံးစုနဲၣ်ကျဲ ဘၣ်ဃးဒီး ပထီၣ်တၢ်အိၣ်ဖှိၣ် ဒီးတၢ်စံၣ်တဲၤတဲလီၤတၢ်မၤ ဒံးဘၣ်န့ၣ် အဝဲသ့ၣ်ကျဲးစၢး ဃုသ့ၣ်ညါဆိ တၢ်ဂ့ၢ်တၢ်ကျိၤ လီၤတံၢ်လီၤဆဲး. (ဧ့ၤဘြံၤ ၁၃:၁၇) အဃိ ပမ့ၢ်မၤထွဲ တၢ်ဟံးစုနဲၣ်ကျဲန့ၣ် ပဒီသဒၢလီၤပသး တကးဒံးဘၣ် ပဒီသဒၢပှၤဂၤစ့ၢ်ကီး. ဒီးပှၤလၢပခိၣ်ပဃၢၤ ကထံၣ်ဝဲလၢ ပပာ်လီၤတၢ်အဒိလၢအဂ့ၤ.—၁ ပ့းတရူး ၂:၁၂.
အိၣ်ကတီၤသးလၢ နတတူၢ်လိာ်တၢ်သွံၣ်ဘၣ်
၁၃. ပပာ်ဖျါထီၣ်လၢ ပပာ်လုၢ်ပာ်ပှ့ၤ ယဟိဝၤယွၤ အတၢ်သိၣ်တၢ်သီ ဘၣ်ဃးဒီး တၢ်သွံၣ်ကသ့ဒ်လဲၣ်.
၁၃ ပှၤအါဂၤ သ့ၣ်ညါဝဲလၢ ယဟိဝၤပှၤအုၣ်အသးတဖၣ် ထံၣ်ဝဲလၢ တၢ်သွံၣ်န့ၣ် အလုၢ်ဒိၣ်ပှ့ၤဒိၣ်ဒိၣ်မး. ပပာ်လုၢ်ပာ်ပှ့ၤ ယဟိဝၤယွၤ အတၢ်ဟ့ၣ်လၢအမ့ၢ် သးသမူ. ဒီးပမၤထွဲ ယဟိဝၤယွၤ အတၢ်သိၣ်တၢ်သီ ဘၣ်ဃးဒီးတၢ်သွံၣ် အဃိ တၢ်ဘၣ်ယိၣ် မ့ၢ်အိၣ်ထီၣ် လၢပတၢ်အိၣ်ဆူၣ်အိၣ်ချ့တကပၤ နာ်က့ ပတသွီတၢ်သွံၣ်ဘၣ်. (မၤတၢ် ၁၅:၂၈, ၂၉) နာ်က့ ပတဘၣ်သးသံဘၣ် အဃိပကျဲးစၢးဃု ကသံၣ်သရၣ် လၢအကကူဆါယါဘျါပှၤလၢ အတပၣ်ဒီးတၢ်သွံၣ်ဘၣ်.
၁၄. ဒ်သိး တၢ်ဘၣ်ဒိဘၣ်ထံး တအိၣ်ထီၣ်တဂ့ၤအဂီၢ် ပကဘၣ်မၤမနုၤလဲၣ်.
၁၄ ပမ့ၢ်ကွၢ်ကတီၤ ပတၢ်အိၣ်ဆူၣ်အိၣ်ချ့ ဒီးမၤထွဲတၢ်ဟ့ၣ်ကူၣ် လၢပတဲသကီး လၢတၢ်မၤလိတခါအံၤန့ၣ် ဘၣ်သ့ၣ်သ့ၣ် ပတဆိးက့တုၤလၢ ပဘၣ်ဖှဲးပသး ဒီးပတလိၣ်ဃုထၢ တၢ်ကူဆါယါဘျါ လၢအပၣ်ဒီးတၢ်သွံၣ်ဘၣ်. ပမ့ၢ်ဘၣ်ဖှဲးသးနာ်က့ ပတၢ်အိၣ်ဆူၣ်အိၣ်ချ့ မ့ၢ်ဂ့ၤန့ၣ် ပဘျါက့ၤချ့လီၤ. တကးဒံးဘၣ် လၢဟံၣ်မ့ၢ်ဂ့ၤ လၢတၢ်မၤလီၢ်မ့ၢ်ဂ့ၤ ဒ်သိး တၢ်ဘၣ်ဒိဘၣ်ထံး တအိၣ်ထီၣ်တဂ့ၤအဂီၢ် ပကဘၣ်မၤတၢ်လၢ တၢ်ပလီၢ်သးထီဘိ ဒီးဖဲပနီကါအခါ ပကဘၣ်မၤထွဲ ပဒိၣ်အတၢ်သိၣ်တၢ်သီ ဘၣ်ဃးဒီးကါကျဲ.
ခီဖျိလၢ ပပာ်လုၢ်ပာ်ပှ့ၤ ပသးသမူအဃိ ပမၤပှဲၤ တၢ်သွံၣ်ခးက့ ဒီးပဟးစိာ်အီၤထီဘိ (ကွၢ်လံာ်အဆၢ ၁၅)d
၁၅. (က) ဘၣ်မနုၤအဃိ ပဘၣ်ဟးစိာ် တၢ်သွံၣ်ခးက့ ထီဘိလဲၣ်. (ကွၢ်စ့ၢ်ကီးတၢ်ဂီၤ.) (ခ) ဒ်တၢ်ဂီၤမူ ပာ်ဖျါဝဲအသိး ဘၣ်ဃးဒီးတၢ်သွံၣ်န့ၣ် ပဆၢတဲာ်တၢ်လၢအဘၣ် ကသ့အဂီၢ် ပကဘၣ်မၤဒ်လဲၣ်.
၁၅ ပပာ်လုၢ်ပာ်ပှ့ၤ ယဟိဝၤယွၤ အတၢ်ဟ့ၣ်လၢအမ့ၢ် သးသမူ အဃိပမၤပှဲၤ တၢ်သွံၣ်ခးက့ (DPA) ဒီးပဟးစိာ် ခးက့အံၤထီဘိ.b လၢပခးက့လိၤန့ၣ် ပကွဲးလီၤ ပတၢ်ဃုထၢ ဘၣ်ဃးဒီး တၢ်ကူဆါယါဘျါ အကျိၤအကျဲ ဒီးပတၢ်ဆၢတဲာ် ဘၣ်ဃးဒီးတၢ်သွံၣ်. ပတၢ်ဂ့ၢ်တၢ်ကျိၤ လၢပခးက့လိၤန့ၣ် အကဘၣ် ဘၣ်လီၤတံၢ်လီၤဆဲး. ဒီးပမ့ၢ်ဘၣ်မၤပှဲၤ တၢ်သွံၣ်ခးက့ လၢအသီန့ၣ် ပဘၣ်မၤပှဲၤအီၤ တဘျီဃီ. ပမ့ၢ်ကွဲးလီၤ ပတၢ်ဆၢတဲာ် လၢလံာ်က့လိၤန့ၣ် ကမၤစၢၤပှၤဒ်သိးဒီး ပတမၤလၢာ်ဂီၤ တၢ်ဆၢကတီၢ် ဒီးတဲသကီး ပတၢ်ကူဆါယါဘျါ အကျိၤအကျဲဒီး ကသံၣ်သရၣ်ဘၣ်. အဃိ ပကန့ၢ်ဘၣ် တၢ်ကူဆါယါဘျါ တဘျီဃီ. တကးဒံးဘၣ် ခးက့အံၤ ကမၤစၢၤပှၤဒ်သိး ပကန့ၢ်ဘၣ် တၢ်ကူဆါယါဘျါ ဒီးကသံၣ်ကသီလၢ အတကဲထီၣ် တၢ်လီၤဘၣ်ယိၣ် လၢပသးသမူအဂီၢ်ဘၣ်.c
၁၆. ပမၤပှဲၤ တၢ်သွံၣ်ခးက့ မ့ၢ်တဘၣ်ဂ့ၤဂ့ၤဘၣ်န့ၣ် ပကဘၣ်မၤ မနုၤလဲၣ်.
၁၆ ပမ့ၢ်သးစၢ် ဒီးပတၢ်အိၣ်ဆူၣ်အိၣ်ချ့ မ့ၢ်ဂ့ၤနာ်က့ တၢ်ဘၣ်ဒိဘၣ်ထံး ကဲထီၣ်ဖုးသးဒီးပှၤ ဒီးပဆိးက့သ့. (စံၣ်တဲၤတဲလီၤတၢ် ၉:၁၁) အဃိ ပကဘၣ်မၤပှဲၤ တၢ်သွံၣ်ခးက့န့ၣ် အရ့ဒိၣ်ဒိၣ်မး. နမၤပှဲၤ တၢ်သွံၣ်ခးက့ မ့ၢ်တဘၣ်ဂ့ၤဂ့ၤဘၣ်န့ၣ် ဃ့တၢ်မၤစၢၤလၢ နတၢ်အိၣ်ဖှိၣ်သးပှၢ် တဂၤဂၤအအိၣ် ဒီးအဝဲသ့ၣ်ကမၤစၢၤနၤ. တၢ်အိၣ်ဖှိၣ်သးပှၢ်တဖၣ် နၢ်ပၢၢ်ဝဲ တၢ်ဂ့ၢ်တၢ်ကျိၤဂ့ၤဂ့ၤလၢ ကဘၣ် မၤပှဲၤတၢ်သွံၣ်ခးက့ဒ်လဲၣ် ဘၣ်ဆၣ် အဝဲသ့ၣ် တဆၢတဲာ်န့ၢ်တၢ် လၢနဂီၢ်ဘၣ်. နကဃုထၢ ဒ်လဲၣ်န့ၣ် နကဘၣ်ဆၢတဲာ် လၢနနီၢ်ကစၢ်. (ကလၤတံ ၆:၄, ၅) တၢ်အိၣ်ဖှိၣ်သးပှၢ်တဖၣ် ဟ့ၣ်ကူၣ်နၤ ဘၣ်ဃးဒီး နကဃုထၢ တၢ်ကူဆါယါဘျါသ့ ဒီးအဝဲသ့ၣ် မၤစၢၤနၤလၢ နကမၤပှဲၤတၢ်သွံၣ်ခးက့သ့.
အိၣ်ဒီး တၢ်ထံၣ်အကြၢးအဘၣ်
၁၇. ဘၣ်ဃးဒီး ပတၢ်အိၣ်ဆူၣ်အိၣ်ချ့န့ၣ် ပအိၣ်ဒီး တၢ်ထံၣ်အကြၢးအဘၣ် ကသ့ဒ်လဲၣ်.
၁၇ ညီနုၢ်န့ၣ် ပဃုတၢ်ဟံးစုနဲၣ်ကျဲ လၢလံာ်စီဆှံပူၤဝံၤမၣ် ပဆၢတဲာ်တၢ်. ဘၣ်ဃးဒီး ပတၢ်အိၣ်ဆူၣ်အိၣ်ချ့ ဒီးတၢ်ကူဆါယါဘျါ အကျိၤအကျဲစ့ၢ်ကီး ပဃုတၢ်ဟံးစုနဲၣ်ကျဲ လၢလံာ်စီဆှံပူၤ. (မၤတၢ် ၂၄:၁၆; ၁ တံၤမသ့း ၃:၉) နာ်က့ ဖဲပဆၢတဲာ်တၢ် ဒီးတဲသကီး ပတၢ်ဆၢတဲာ် ဒီးပှၤဂၤအခါ ပကဘၣ်မၤထွဲ လံာ်စီဆှံ အတၢ်ဟ့ၣ်ကူၣ်ဖဲ ဖံလံးပံၤ ၄:၅. ဖဲန့ၣ်တဲဝဲလၢ “သုတမ့ၢ် ပှၤလၢအခိၣ်ကိၤဘၣ်န့ၣ် မ်အအိၣ်ဖျါထီၣ်လၢ ပှၤခဲလၢာ် အမဲာ်ညါတက့ၢ်.” ပမ့ၢ်အိၣ်ဒီး တၢ်ထံၣ်အကြၢးအဘၣ်န့ၣ် ပတကိၢ်တၢ်လၢ ပတၢ်အိၣ်ဆူၣ်အိၣ်ချ့အဂီၢ် အါတလၢဘၣ်. ဒီးပတမၢဆူၣ်ပှၤဂၤလၢ ကဆၢတဲာ်တၢ် ဒ်သိးဒီးပှၤဘၣ်. ပဒီပုၢ်ဝဲၢ်မုၣ်ခွါတဖၣ် အတၢ်ဆၢတဲာ် မ့ၢ်တဒ်သိးဒီးပှၤနာ်က့ ပပာ်ကဲ အတၢ်ဆၢတဲာ် ဒီးပအဲၣ်အဝဲသ့ၣ်.—ရိမ့ၤ ၁၄:၁၀-၁၂.
၁၈. ယဟိဝၤယွၤ ဟ့ၣ်ပှၤသးသမူအဃိ ပစံးဘျုးက့ၤအီၤ ကသ့ဒ်လဲၣ်.
၁၈ ပကဆဲးဘူၣ်ထီၣ်ဘါထီၣ်ဘၣ် ယဟိဝၤယွၤအဂီၢ် ပကဘၣ် ကွၢ်ကတီၤ ပတၢ်အိၣ်ဆူၣ်အိၣ်ချ့ ဒီးဒီသဒၢလီၤပသး. ပမ့ၢ်မၤဒ်န့ၣ်န့ၣ် ပပာ်ဖျါထီၣ်လၢ ပစံးဘျုးက့ၤ ယဟိဝၤယွၤ လၢအမ့ၢ် ပတၢ်ဘၣ်တ့ကစၢ်. (လီၣ်ဖျါ ၄:၁၁) ဘၣ်ဆၣ် ခဲအံၤဒု ပကဆိးက့ ဒီးတၢ်ဘၣ်ဒိဘၣ်ထံး ကဲထီၣ်ဖုးသးဒီးပှၤသ့. ယဟိဝၤယွၤ တတ့လီၤပှၤလၢ ပတၢ်အိၣ်မူ ကအိၣ်ကၠဲအံၤဘၣ်. အဃိ တယံာ်လၢၤဘၣ်န့ၣ် အကဟ့ၣ်ပှၤ တၢ်မူအထူအယိာ် ဒီးပတဘၣ်တူၢ်တၢ်ဆါ ဒီးပတသံလၢၤဘၣ်. (လီၣ်ဖျါ ၂၁:၄) ဆၢကတီၢ်ခဲအံၤ ပအိၣ်မူဘၣ် ဒီးပမၤဘၣ် ယဟိဝၤယွၤ အတၢ်မၤအဃိ ပသးခုညါ.
တၢ်သးဝံၣ် ၁၄၀ တၢ်မူအထူအယိာ်—တုၤလံ
a တၢ်မၤလိတခါအံၤ ကမၤစၢၤပှၤဒ်သိး ပကပာ်လုၢ်ပာ်ပှ့ၤအါထီၣ် သးသမူ လၢကစၢ်ယွၤဟ့ၣ်ပှၤ. ပကမၤလိဘၣ်လၢ ဖဲတၢ်ဆူးတၢ်ဆါ ဒီးတၢ်ဘၣ်ဒိဘၣ်ထံး ကဲထီၣ်ဖုးသးအခါ ပကဘၣ် ကွၢ်ကတီၤ ပတၢ်အိၣ်ဆူၣ်အိၣ်ချ့ ဒီးဒီသဒၢပသးဒ်လဲၣ်. တကးဒံးဘၣ် ပကတဲသကီး ဘၣ်ဃးဒီး တချုးလၢ တၢ်ဘၣ်ယိၣ်အိၣ်ထီၣ် လၢပတၢ်အိၣ်ဆူၣ်အိၣ်ချ့တကပၤ ဒံးဘၣ်န့ၣ် ပအိၣ်ပလီၢ်ဆိသး ကသ့ဒ်လဲၣ်.
b တၢ်သွံၣ်ခးက့အံၤ ပကီးစ့ၢ်ကီးလၢ DPA.
c ကွၢ်တၢ်ဂီၤမူ လၢအခိၣ်တီမ့ၢ်ဝဲ ဘၣ်ဃးဒီးတၢ်သွံၣ်န့ၣ် နဆၢတဲာ်တၢ်လၢ အဘၣ်ကသ့အဂီၢ် နကဘၣ်မၤဒ်လဲၣ် လၢ jw.org.
d တၢ်ဂီၤ အခီပညီ– ဒီပုၢ်ဝဲၢ်ခွါတဂၤ မၤပှဲၤဝဲ အတၢ်သွံၣ်ခးက့ ဒီးအဟးစိာ်ဝဲထီဘိ.