စီၤပၤစီလူး အဖိခွါဝဲၢ်ကိန့ၣ်​ အမံၤမ့ၢ်စီၤယိနၤသၣ်​ ဒီးအဝဲမ့ၢ်ပှၤသုးဖိလၢ အိၣ်ဒီးတၢ်သးဒူတဂၤ. စီၤဒၤဝံးတဲဝဲလၢ စီၤယိနၤသၣ်​ ဃ့ၢ်ချ့န့ၢ်ဒံး လံာ်ကြီကြာ် ဒီးအဂံၢ်ဆူၣ်န့ၢ်ဒံးခ့ယုၢ်. ဘၣ်တနံၤန့ၣ်​ စီၤယိနၤသၣ်ထံၣ်ဝဲ ပှၤဖလ့ၡသး အသုးဖိအဂၤ ၂၀ အိၣ်လၢတၢ်လူၢ်ခိၣ်. ဒီးစီၤယိနၤသၣ်တဲဘၣ်​ အသုးဖိလၢ အစိာ်အစုကဝဲၤတဂၤလၢ ‘ယဟိဝၤယွၤ မ့ၢ်ဟ့ၣ်ပှၤတၢ်ပနီၣ်န့ၣ်​ ပကလဲၤဒုးအဝဲသ့ၣ်. အဃိ ပှၤဖလ့ၡသးဖိတဖၣ်​ မ့ၢ်တဲပှၤလၢ ဟဲထီၣ်ဒုးပှၤန့ၣ်​ ပသ့ၣ်ညါလၢ ပကဘၣ်လဲၤထီၣ်ဒုး အဝဲသ့ၣ်.’ ဒီးပှၤဖလ့ၡသးဖိတဖၣ်​ ကိးပသူထီၣ်လၢ ‘ဟဲထီၣ်ဒုးပှၤသၢၤ.’ လၢတၢ်န့ၣ်အဃိ စီၤယိနၤသၣ်​ ဒီးအပှၤသုးဖိတဂၤန့ၣ်​ လဲၤထီၣ်လၢ တၢ်လူၢ်ခိၣ်​ ဒီးဒုးနၢၤဝဲ ပှၤဖလ့ၡသး အသုးဖိတဖၣ်.

ခီဖျိလၢ စီၤယိနၤသၣ်မ့ၢ် စီၤစီလူးအဖိခွါဝဲၢ်ကိ အဃိ အဝဲအိၣ်ဒီး တၢ်ခွဲးတၢ်ယာ်လၢ ကကဲထီၣ်ဘၣ်ဝဲ စီၤပၤလၢခံတဂၤ. ဘၣ်ဆၣ်​ စီၤယိနၤသၣ်​ သ့ၣ်ညါဝဲလၢ ယဟိဝၤယွၤ ဃုထၢထီၣ်​ စီၤဒၤဝံးဒ်သိး ကကဲထီၣ်စီၤပၤလၢ စီၤစီလူးအလီၢ်. ဘၣ်ဆၣ်​ သနာ်က့ စီၤယိနၤသၣ်တသးက့ၣ်​ စီၤဒၤဝံးဘၣ်. လၢတၢ်န့ၣ်အလီၢ် စီၤယိနၤသၣ်​ ကဲထီၣ်ဝဲ စီၤဒၤဝံး အတံၤသကိး တံၢ်နီၢ်တဂၤ. အဝဲသ့ၣ်​ အၢၣ်လီၤအီလီၤအသးလၢ ကတီလိာ်အသး ဒီးကကဟုကယာ်လိာ်အသး တဂၤဒီးတဂၤ. မ့ၢ်လၢ စီၤယိနၤသၣ်​ အဲၣ်ဝဲစီၤဒၤဝံး ဒ်အတံၤသကိးတံၢ်နီၢ်အဃိ အဝဲဟ့ၣ်လီၤ စီၤဒၤဝံးလၢ အဆ့ကၤ, နး, ချံၣ်​ ဒီးအယီၢ်တကိး.

ခီဖျိလၢ စီၤစီလူးလူၤမၤသံ စီၤဒၤဝံးအဃိ စီၤဒၤဝံး ဘၣ်ဃ့ၢ်ပူၤဖျဲးအသး. မ့မ့ၢ်စီၤယိနၤသၣ်န့ၣ်​ လဲၤထံၣ်လိာ်သးဒီး စီၤဒၤဝံး ဒီးတဲဘၣ်အီၤလၢ ‘ပာ်စၢ်လီၤ နဂံၢ်နဘါတဂ့ၤ, ပာ်နသးဒူဒူမီၤ. ယဟိဝၤယွၤ ဃုထၢထီၣ်နၤ လၢစီၤပၤ, ယပၢ်သ့ၣ်ညါဝဲလံ.’ မ့ၢ်နအဲၣ်ဒိးအိၣ်ဒီး တံၤသကိး လၢအဂ့ၤဒ် စီၤယိနၤသၣ်အသိး စ့ၢ်ကီးဧါ.

စီၤယိနၤသၣ်​ ဟ့ၣ်လီၤအသးလၢ ကမၤစၢၤစီၤဒၤဝံးန့ၣ်​ အိၣ်ဝဲအါဘျီ. စီၤယိနၤသၣ်​ သ့ၣ်ညါဝဲလၢ စီၤပၤစီလူး အဲၣ်ဒိးမၤသံ စီၤဒၤဝံး. အဃိ အဝဲတဲဘၣ်အပၢ်လၢ ‘စီၤဒၤဝံး တမၤကမၣ်တၢ် နီတမံၤဘၣ်. နမ့ၢ်မၤသံအီၤန့ၣ်​ မ့ၢ်ဒၣ်နမၤတၢ်ဒဲးဘး.’ လၢတၢ်န့ၣ်အဃိ စီၤစီလူးသးပှံၢ်ထီၣ်ဝဲ စီၤယိနၤသၣ်ဒိၣ်မး. ပူၤကွံာ်တဘျုးနံၣ်​ ဝံၤအလီၢ်ခံ စီၤစီလူးဒီးစီၤယိနၤသၣ်​ သံဝဲလၢ တၢ်ဒုးပျီအပူၤ ဒ်သိးသိး.

ဖဲစီၤယိနၤသၣ်​ သံဝံၤအလီၢ်ခံန့ၣ်​ စီၤဒၤဝံးဃုကွၢ်ဝဲ စီၤယိနၤသၣ်အဖိခွါ စီၤမဖံဘိၤၡ့း. ဖဲစီၤဒၤဝံးထံၣ်ဝဲ စီၤမဖံဘိၤၡ့းအခါ စီၤဒၤဝံးတဲဘၣ်အီၤလၢ ‘ခီဖျိလၢနပၢ်မ့ၢ် ယတံၤသကိး လၢအဂ့ၤတဂၤအဃိ ယကကွၢ်ထွဲက့ၤနၤ တစိၤလၢနသး. နကအိၣ်လၢယနီပူၤ ဒီးနကအီၣ်တၢ်ဒီးယၤလၢ ယစီၢ်နီၤခိၣ်.’ စီၤဒၤဝံး တသးပ့ၤနီၣ်​ အတံၤသကိး စီၤယိနၤသၣ်​ နီတဘျီဘၣ်.

ဖဲစီၤစီလူး သံဝံၤအလီၢ်ခံ စီၤဒၤဝံးကဲထီၣ်စီၤပၤ. ဖဲစီၤဒၤဝံး ကဲထီၣ်စီၤပၤအခါ အသးနံၣ်အိၣ်ဝဲ ၃၀. စီၤဒၤဝံးကဲထီၣ်​ စီၤပၤတဘျုးနံၣ်​ ဝံၤအလီၢ်ခံ အဝဲမၤဘၣ်​ တၢ်ကမၣ်ဖးဒိၣ်တခါ. ဘၣ်တနၤဖဲ စီၤဒၤဝံးအိၣ်ဝဲလၢ ဟံၣ်ခိၣ်အခါ အဝဲထံၣ်စိလီၤဝဲ ပိာ်မုၣ်လၢ အဒိၣ်တၢ်ဂ့ၤတဂၤ. ပိာ်မုၣ်အံၤ အမံၤမ့ၢ် နီၢ်ဘၤသၡ့ဘၤ ဒီးအဝၤန့ၣ်​ မ့ၢ်ဝဲပှၤသုးဖိတဂၤလၢ အမံၤမ့ၢ်ဝဲ စီၤအူၤရံယၤ. စီၤဒၤဝံး မၢပှၤလဲၤကိးန့ၢ် နီၢ်ဘၤသၡ့ဘၤ ဆူအဟံၣ်. ဝံၤဒီး အဝဲသ့ၣ်​ မံဃုာ်လိာ်သး. တယံာ်တမီၢ်န့ၣ်​ နီၢ်ဘၤသၡ့ဘၤ ဒၢထီၣ်ဝဲ. ဘၣ်ဆၣ်​ စီၤဒၤဝံး ဂုာ်ကျဲးစၢးပာ်ခူသူၣ်ဝဲ အတၢ်ကမၣ်. လၢတၢ်န့ၣ်အဃိ စီၤဒၤဝံးတဲဘၣ်​ အသုးခိၣ်ကျၢၢ်လၢ မၢစီၤအူၤရံယၤ လဲၤဒုးတၢ်လၢတၢ်မဲာ်ညါ ဒီးပာ်တ့ၢ်ကွံာ်အီၤလၢ တၢ်ဒုးပျီအပူၤ ဒ်သိး ဒုၣ်ဒါကမၤသံအီၤအဂီၢ်. ဖဲစီၤအူၤရံယၤသံလၢ တၢ်ဒုးပျီပူၤ ဝံၤအလီၢ်ခံ စီၤဒၤဝံးဖျီအသးဒီး နီၢ်ဘၤသၡ့ဘၤ.

ဘၣ်ဆၣ်​ ယဟိဝၤယွၤထံၣ်ဝဲ တၢ်အၢတၢ်သီလၢ စီၤဒၤဝံးမၤဝဲတဖၣ်န့ၣ်. အဃိ ယဟိဝၤယွၤ ကမၤဝဲဒ်လဲၣ်. ယဟိဝၤယွၤ ဆှၢလီၤအဝံနၤသၣ်ဆူ စီၤဒၤဝံးအအိၣ်. ဝံနၤသၣ်တဲဘၣ်​ စီၤဒၤဝံး တၢ်အဒိတခါလၢ ‘ပှၤထူးပှၤတီၤတဂၤ အိၣ်ဝဲဒီးအသိအါမး. ဒီးပှၤဖှီၣ်ဖိယာ်ဖိတဂၤန့ၣ်​ အသိအိၣ်ဝဲ ထဲတဒုဧိၤအဃိ အဝဲအဲၣ်ဝဲအသိဒိၣ်မး. ဘၣ်ဆၣ်​ ပှၤထူးပှၤတီၤတဂၤအံၤ ဟံးန့ၢ်ဝဲ ပှၤဖှီၣ်ဖိယာ်ဖိတဂၤန့ၣ်​ အသိ.’ ဖဲစီၤဒၤဝံးနၢ်ဟူ ဝံနၤသၣ်​ အတၢ်ကတိၤအံၤအခါ အဝဲသးပှံၢ်ထီၣ်တၢ်ဒိၣ်မး ဒီးတဲဝဲလၢ ‘ပှၤထူးပှၤတီၤတဂၤန့ၣ်​ ကြၢးဘၣ်တၢ်မၤသံအီၤ.’ ဝံနၤသၣ်​ တဲဘၣ်အီၤလၢ ‘ပှၤထူးပှၤတီၤတဂၤန့ၣ်​ မ့ၢ်ဝဲနၤ.’ လၢတၢ်န့ၣ်အဃိ စီၤဒၤဝံးအသးဘၣ်ဒိ ဒီးအၢၣ်လီၤဝဲ အတၢ်ကမၣ်. စီၤဒၤဝံး တဲဘၣ်ဝံနၤသၣ်လၢ ‘ယမၤကမၣ်ဘၣ်​ ယဟိဝၤယွၤလံ.’ ခီဖျိလၢ စီၤဒၤဝံး မၤဘၣ်တၢ်ဒဲးဘးအဃိ လၢခံစီၤဒၤဝံး ဒီးအဟံၣ်ဖိဃီဖိန့ၣ်​ ထံၣ်ဘၣ်ဝဲ တၢ်ကီတၢ်ခဲအါမး. ယဟိဝၤယွၤ စံၣ်ညီၣ်ဝဲစီၤဒၤဝံး, ဘၣ်ဆၣ်​ မ့ၢ်လၢစီၤဒၤဝံးအိၣ်ဒီး တၢ်ဆီၣ်လီၤသး ဒီးအၢၣ်လီၤအတၢ်ကမၣ်​ အဃိ ယဟိဝၤယွၤ တမၤသံအီၤဘၣ်.

စီၤဒၤဝံး အဲၣ်ဒိးတ့ထီၣ်​ တၢ်လုၢ်ဟံၣ်လၢ ယဟိဝၤယွၤအဂီၢ်. ဘၣ်ဆၣ်​ ယဟိဝၤယွၤ ဃုထၢထီၣ်​ စီၤဒၤဝံးအဖိခွါ စီၤၡလိၤမိၤလၢ ကတ့ထီၣ်ဝဲတၢ်လုၢ်ဟံၣ်. လၢတၢ်န့ၣ်အဃိ စီၤဒၤဝံး စးထီၣ်ကတဲာ်ကတီၤဝဲ တၢ်ဖိတၢ်လံၤ ဒ်သိး စီၤၡလိၤမိၤ ကတ့ထီၣ်ဝဲ တၢ်လုၢ်ဟံၣ်အဂီၢ်. ဒီးစီၤဒၤဝံးတဲဝဲလၢ ‘ယဟိဝၤယွၤ အတၢ်လုၢ်ဟံၣ်န့ၣ်​ ကဘၣ်လီၤဘီလီၤမုၢ် ဖးဒိၣ်. ဘၣ်ဆၣ်​ ယဖိခွါစီၤၡလိၤမိၤ မ့ၢ်ဒံးပှၤသးစၢ်အဃိ ယကကတဲာ်ကတီၤန့ၢ်အီၤ တၢ်ဖိတၢ်လံၤတဖၣ်.’ လၢတၢ်လုၢ်ဟံၣ်အဂီၢ်န့ၣ်​ စီၤဒၤဝံး မၤဘူၣ်လီၤဝဲ အစ့ဒီဒူၣ်ညါ. အဝဲဃုန့ၢ်ဝဲ ပှၤမၤတၢ်ဖိလၢ အအိၣ်ဒီး အတၢ်သ့တၢ်ဘၣ်တဖၣ်. ဒီးစီၤဒၤဝံး ပာ်ဖှိၣ်ဃာ်ဝဲ ထူဒီးစ့ ဒီးသ့ၣ်ဆှိအ့ရ့းလၢ အဟဲလၢ ကီၢ်စိၢ်ဒီးကီၢ်စံဒိၣ်. ဖဲစီၤဒၤဝံး ဘူးထီၣ်ကသံအခါ အဝဲဟ့ၣ်လီၤ စီၤၡလိၤမိၤလၢ တၢ်ရဲၣ်တၢ်ကျဲၤလၢ တၢ်သူၣ်ထီၣ်​ တၢ်လုၢ်ဟံၣ်အဂီၢ်. စီၤဒၤဝံးတဲဘၣ်​ စီၤၡလိၤမိၤလၢ ‘ယဟိဝၤယွၤ မၢယကွဲးလီၤ တၢ်ဂ့ၢ်တၢ်ကျိၤတဖၣ်အံၤ လၢနဂီၢ်. ယဟိဝၤယွၤ ကမၤစၢၤနၤ. ပျံၤတၢ်တဂ့ၤ. ပာ်နသးဒူဒူ ဒီးမၤနတၢ်မၤသၢၤ.’