Mutindu ya kuvuanda diaka na kiese mingi na kisalu ya kusamuna

1. Yinki mutindu bantu yankaka kekukimonaka na diambu metadila kusolola na bantu yankaka na kisalu ya kusamuna? (Tala diaka foto.)

LOKOLA beto kele bisadi ya Yehova, beto kesamuninaka bantu yankaka samu beto kezolaka Tata na beto ya dizulu mpe beto kevuandaka na nsatu ya kusadisa bafinangani na beto samu bazaba yandi. Bansamuni mingi kevuandaka mpenza na kiese ya kusamuna. Kasi samu na bayankaka yakevuandaka mpasi samu basepela na kisalu ya kusamuna. Samu na yinki? Bayankaka kevuandaka nsoninsoni mpe bakemonaka ti bakele ve banlongisi ya mbote. Bayankaka kemonaka ti yakele mbote ve kukuenda na yinzo ya bantu yankaka kondua ti babokidisa bau. Bayankaka kevuandaka na wonga ti bantu manga kuyamba bau. Bayankaka balongaka bau ti yakele mbote ve kukuenda tungisa bantu. Atako bakezolaka Yehova mingi, bampangi yango ya babakala mpe ya banketo lenda mona mpasi kutubila nsangu ya mbote na bantu yina bazaba ve. Ya kedika, bamezaba ti kisalu yango kele na mfunu mpe bakesamunaka mbala na mbala. Yehova kesepelaka mingi!

2. Kana nge kena kumona mpasi kuvuanda na kiese na kisalu ya kusamuna, samu na yinki nge fueti lemba ve nzutu?

² Nge kemonaka mbala yankaka mpasi kuvuanda na kiese na kisalu ya kusamuna samu na banguilu ya mutindu yina? Kana yakele mutindu yina, kulemba nzutu ve. Kikadulu na nge ya kukitudila ve ntima lenda monisa ti nge kele muntu ya kumikitisa mpe nge zola ve kubenda dikebi ya bantu na zulu na nge. Yakena kumonisa diaka ti nge kezolaka ve kuzonza na bantu. Mpe muntu mosi ve kesepelaka ti bamanga kuwa yandi, mingimingi ntangu yandi kena kusosa kusala mambu yina kele mbote samu na bantu yankaka. Tata na nge ya dizulu mezaba mbotembote mambu ya mpasi yina nge kena kukutana na yau mpe yandi kele na nsatu ya kupesa nge lusadusu yina nge kele na yau nsatu. (Yez. 41:13) Na disolo yayi, beto ketubila mambu 5 yina kemonisa mutindu ya kununga banguilu ya mutindu yina mpe mutindu ya kuvuanda na kiese na kisalu ya kusamuna.

BIKA MPOVA YA NZAMBI PESA NGE NGOLO

3. Yinki sadisaka mbikudi Yeremia na kusamunina bantu yankaka?

³ Ata na ntangu ya ntama, nsangu ya Nzambi pesaka bisadi na yandi ngolo ntangu bavuandaka na kiyekua mosi ya mpasi ya kukokisa. Beto baka kifuani ya mbikudi Yeremia. Yandi vuandaka kakatana ntangu Yehova pesaka yandi kiyekua ya kusamuna. Yeremia tubaka: ‘Munu zaba ve kutuba, samu munu kele kaka muana fioti.’ (Yer. 1:6) Yinki sadisaka yandi samu yandi vuanda na kibakala samu na kusamuna? Yandi bakaka ngolo na Mpova ya Nzambi. Yandi tubaka: ‘Yakumaka lokola tiya yina kena kupela, yina bamekanga na bivisi na munu, mpe munu kokaka diaka ve kulunda yau.’ (Yer. 20:8, 9) Atako Yeremia vuandaka na terituare mosi ya mpasi, nsangu yina yandi vuandaka na kiyekua ya kusamuna pesaka yandi ngolo yina yandi vuandaka na yau nsatu samu na kukokisa kisalu yango.

4. Yinki kesalamaka ntangu beto kena kutanga Mpova ya Nzambi mpe beto kena kuyindula na mpinda na zulu na yau? (Bakolosai 1:9, 10)

⁴ Baklisto kebakaka ngolo yina kekatukaka na nsangu yina kele na Mpova ya Nzambi. Ntangu ntumua Paulo sonikinaka kimvuka ya Kolosai, yandi tubaka ti kuvuanda na nzayilu ya sikisiki kesala ti bampangi na yandi ‘tambula na mutindu yina mefuana na Yehova’ na kutatamanaka ‘kubuta mbuma na konso kisalu ya mbote.’ (Tanga Bakolosai 1:9, 10.) Kisalu yango ya mbote mesangisa kisalu ya kusamuna nsangu ya mbote. Na yau ntangu beto kena kutanga Mpova ya Nzambi mpe beto kena kuyindula na mpinda na zulu na yau, kiminu na beto samu na Yehova kekumaka ngolo mpe mfunu ya kusamuna nsangu ya Kimfumu kekumaka puelele.

5. Yinki mutindu beto lenda baka mambote na ntangulu mpe ndongokolo na beto ya Biblia?

⁵ Samu na kubakila Mpova ya Nzambi mambote mingi mpenza, beto fueti manga kutanga, kulonguka, mpe kuyindula na mpinda na zulu na yau na nsualunsualu. Bakaka mpenza ntangu ya kutanga, kulonguka, mpe kuyindula na mpinda. Kana nge metanga verse mosi yina nge kena kubakusa mbote ve, kuluta yau ve. Na kisika ya kuluta yau, sadila Index des publications des Témoins de Jéhovah to Buku ya bolukiluki mpo na Batatoli ya Yehova samu na kumona bansasulu yina metadila verse yango. Kana nge kena kubaka mpenza ntangu ya kulonguka, nge kendimisama mpenza ti mambu yina Biblia ketubaka kele kedika. (1 Te. 5:21) Kana nge kena kundimisama mingi, nge kevuanda na kiese mingi ya kutubila bantu yankaka mambu yina nge longukaka.

KUKIBONGISA MBOTE SAMU NA KISALU YA KUSAMUNA

6. Samu na yinki beto fueti kukibongisa mbote samu na kisalu ya kusamuna?

⁶ Kana nge kena kukibongisa mbote samu na kisalu ya kusamuna, kondua ntembe nge kekukimona mbote ntangu nge kena kusolola na bantu yankaka. Yesu sadisaka banlonguki na yandi bakukibongisa tekila yandi tinda bau na kisalu ya kusamuna. (Luka 10:1-11) Lokola basadilaka mambu yina Yesu longaka bau, bavuandaka na dikoki ya kusala mambu mingi ya mbote mpe yavuandaka pesa bau mpenza kiese.​—Luka 10:17.

7. Yinki mutindu beto lenda kukibongisa samu na kisalu ya kusamuna? (Tala diaka foto.)

⁷ Yinki mutindu beto lenda kukibongisa samu na kisalu ya kusamuna? Beto fueti kanisa na mutindu yina beto lenda tuba kedika mbotembote na bampova na beto mosi. Yakele diaka na mfunu kukanisa na mambu yina bantu lenda tuba to kusala na nsangu na beto, mpe na mutindu nge lenda pesa bau mvutu. Mpe na manima ntangu beto kena kusolola na bantu, beto lenda sala nionso samu na kuvuanda mbote, kuseka, mpe kuvuanda na kimpombo.

8. Na yinki mutindu Baklisto kele lokola bamvungu ya ntoto yina ntumua Paulo tubilaka?

⁸ Ntumua Paulo tubilaka bampangi na yandi Baklisto: ‘Beto kele na kimvuama yayi na bamvungu ya ntoto.’ (2 Bk. 4:7) Yinki kele kimvuama yango? Yakele kisalu ya kusamuna nsangu ya Kimfumu yina kevukisaka baluzingu. (2 Bk. 4:1) Yinki kele bamvungu ya ntoto? Yakena kumonisa bisadi ya Nzambi, yina kesamunaka nsangu ya mbote na bantu yankaka. Na bilumbu ya Paulo, bantu ya mumbongo vuandaka sadila bamvungu ya ntuma samu na kunatina bima ya valere, na kifuani, madia, vinu, mpe mbongo. Mutindu mosi Yehova mepesa beto nsangu ya mbote, yina kele nsangu mosi ya mfunu. Na lusadusu ya Yehova, beto lenda vuanda na ngolo yina beto kele na yau nsatu samu na kusamuna nsangu na beto na kukuikama nionso.

SAMBILAKA SAMU NA KULOMBA KIBAKALA

9. Yinki mutindu beto lenda nunga wonga ya bantu? (Tala diaka foto.)

⁹ Na bantangu yankaka, beto lenda vuanda na wonga ya bantu. Yinki mutindu beto lenda nunga diambu yango ya mpasi? Beto tadila kifuani ya bantumua ntangu bapekisaka bau kusamuna. Na kisika ya kubanga, balombaka Yehova yandi sadisa bau ‘batatamana kutuba mpova na [yandi] na kibakala mpenza.’ Yehova pesaka mbala mosi mvutu na kisambu na bau. (Bis. 4:18, 29, 31) Na bantangu yankaka kana kubanga bantu kena kusala ti beto kakatana kusamuna, beto diaka beto fueti sambila Yehova samu na kulomba lusadusu na yandi. Lomba Yehova sadisa nge samu nge kumisa nzola na nge ngolo samu na bantu, samu nge bika banga kutubila bau nsangu ya mbote.

10. Yinki mutindu Yehova kesadisaka beto samu beto kokisa mbote kiyekua na beto ya kuvuanda Bambangi na yandi? (Yezaya 43:10-12)

¹⁰ Yehova ponaka beto samu beto vuanda Bambangi na yandi, mpe yandi pesaka beto nsilulu ti yandi kesadisa beto samu beto vuanda na kibakala. (Tanga Yezaya 43:10-12.) Beto tadila kaka mitindu 4 yina yandi kesalaka yau. Ya ntete, Yesu kevuandaka kintuadi na beto ntangu nionso yina beto kena kusamuna nsangu ya mbote. (Mat. 28:18-20) Ya zole, Yehova meponaka bambasi samu na kusadisa beto. (Kus. 14:6) Ya tatu, Yehova mepesaka beto mpeve ya nlongo na yandi samu yasadisa beto beto bambuka na mambu yina beto longukaka. (Yoa. 14:25, 26) Ya yiya, Yehova mepesaka beto bampangi ya babakala mpe ya banketo samu na kusala kintuadi na beto. Na lusadusu ya Yehova mpe ya bampangi na beto ya nzola, beto kele na nionso yina beto kele na yau nsatu samu na kununga.

ZABA KUMESANA NA MAMBU, MPE VUANDA NA MAKANISI YA MBOTE

11. Ntangu beto kele na kisalu ya kusamuna, yinki mutindu beto lenda mona bantu mingi? (Tala diaka foto.)

¹¹ Nge kelembaka nzutu kana nge mekutana kaka na bantu fioti na bayinzo na bau? Samu na yinki ve nge kukiyuvusa: ‘Wapi bantu ya terituare na munu lenda vuanda na ntangu yayi?’ (Bis. 16:13) ‘Bakele na kisalu to na wenze?’ Kana yakele mutindu yina nge lenda kutana na bantu mingi kana nge kena kusamuna na nzila. Mpangi mosi ya bakala na nkumbu ya Joshua metuba, “Munu vuandaka baka maluaku ya kusamuna ntangu munu vuandaka tambula na bawenze mpe na bisika ya bantu mingi.” Yandi mpe nketo na yandi Bridget, vuandaka kuta bantu mingi na bayinzo na bau ntangu bavuandaka vutukila bau na bankokila mpe dimanche na manima ya midi.​—Efe. 5:15, 16.

12. Yinki mutindu beto lenda zaba mambu yina bantu kendiminaka to mambu yina kena kutungisa bau?

¹² Kana bantu kena kusepela mingi ve na nsangu na beto, sosa kuzaba mambu yina bakendiminaka to mambu yina kena kutungisa bau. Joshua mpe Bridget kesadilaka kiuvu yina kevuandaka na ntuala ya trakte kana bazola solola na muntu. Na kifuani, na diambu metadila kusadila trakte Yinki mutindu nge ketadilaka Biblia? bametuba: “Bantu yankaka ketadilaka Biblia lokola mukanda ya Nzambi, kasi bantu yankaka ketadilaka yau mutindu yina ve. Yinki kele dibanza na nge?” Mbala mingi yakesalaka ti disolo banda.

13. Samu na yinki beto lenda tadila kisalu ya kusamuna lokola kisalu mosi yina kena kubuta mbuma ata kana bantu kena kundima beto ve? (Bingana 27:11)

¹³ Ata kana bantu kena kuwa beto ve ntangu beto kena kusamuna, beto ketatamanaka kukokisa lukanu na beto. Samu na yinki? Samu beto mesala diambu yina Yehova mpe Muana na yandi zola beto sala​—beto mepesa kimbangi. (Bis. 10:42) Ata kana beto mona ve muntu ya kusolola na yandi to bamemanga nsangu na beto, beto lenda vuanda na kiese samu beto kena kusepedisa Tata na beto ya dizulu.​—Tanga Bingana 27:11.

14. Yinki mutindu beto lenda vuanda na kiese ntangu nsamuni yankaka mekutana na muntu mosi yina kena kusepela na kedika terituare?

¹⁴ Beto lenda sepela diaka ntangu nsamuni yankaka memona muntu mosi na terituare na beto yina kena kusepela na kedika. Yinzo’a zulu ya Nkengi fuanikisaka kisalu na beto na kusosa muana mosi yina mezimbana. Bantu mingi kepesaka maboko samu na kusosa yandi, na kukuendaka sosa na bisika mutindu na mutindu. Ntangu muana yango memonana, muntu nionso kevuandaka na kiese, kaka ve muntu yina monaka yandi. Mutindu mosi, konso muntu na kimvuka kepesaka maboko samu na kukumisa bantu banlonguki ya Yesu. Beto kevuandaka na nsatu ya konso muntu na kimvuka samu na kusamunina bantu nionso, mpe muntu nionso kevuandaka na kiese ntangu muntu ya yimpa mebanda kukuiza na balukutakanu.

TULA MAKANISI NA NGE NA NZOLA NA NGE SAMU NA YEHOVA MPE NA NZOLA NA NGE SAMU NA BAFINANGANI NA NGE

15. Yinki mutindu kusadila Matayo 22:37-39 lenda sadisa beto samu beto kudisa kiese na beto na kisalu ya kusamuna? (Tala diaka kuvertire.)

¹⁵ Beto lenda kudisa nzola na beto samu na kisalu ya kusamuna na kutulaka makanisi na beto na nzola na beto samu na Yehova mpe samu na bafinangani na beto. (Tanga Matayo 22:37-39.) Kanisa na kiese yina Yehova kevuandaka na yau ntangu yandi kemonaka beto beto kena sala kisalu, mpe kiese yina bantu kevuanda na yau ntangu bamebanda kulonguka Biblia! Zaba diaka ti, bantu yina kena kuwa nsangu na beto mpe kena kubaka nzengolo ya kusadila Yehova lenda baka luzingu ya mvula na mvula.​—Yoa. 6:40; 1 Tm. 4:16.

16. Yinki mutindu beto lenda sepela na kisalu na beto ya kusamuna ntangu beto kele diaka ve na dikoki ya kubima na yinzo? Pesa bifuani.

¹⁶ Nge kevuandaka diaka ve na dikoki ya kubima na yinzo samu na kukuenda samuna samu na mfunu mosi to yankaka? Kana yakele mutindu yina, tula makanisi na nge na mambu yina nge lenda sala samu na kumonisa nzola na nge samu na Yehova mpe samu na bafinangani na nge. Na ntangu ya maladi ya COVID-19, Samuel mpe Dania vuandaka bima diaka ve na yinzo na bau. Na ntangu yango ya mpasi, bavuandaka pesa kimbangi mbala na mbala na nzila ya telefone, na nzila ya baletre, mpe bavuandaka tuadisa bandongokolo ya Biblia na nzila ya Zoom. Samuel pesaka kimbangi na bantu yina yandi vuandaka kutana na bau na opitale kisika yandi vuandaka bakila tretema ya kansere. Yandi metuba: “Mambu ya mpasi kelembisaka beto na makanisi, na nzutu, mpe na kimpeve. Na yau beto kevuandaka na nsatu ya kubaka kiese na kisalu na beto samu na Yehova.” Katula yau, Dania kubuaka mpe yandi vuandaka diaka ve na dikoki ya kukita na mfulu bangonda tatu. Na manima yalombaka yandi sadila kiti ya makoka bangonda 6. Yandi metuba: “Munu vuandaka meka kusala nionso yina mulendaka sala na kutadila makoki na munu. Munu vuandaka na dikoki ya kusamunina infirmière yina vuandaka sadisa munu, mpe munu vuandaka solola na bantu yina vuandaka kuiza tekila beto bima na yinzo. Munu vuandaka solola diaka mbote na nzila ya telefone na nketo mosi yina kesalaka na kompani mosi yina ketadilaka mambu ya mavimpi.” Mambu yina Samuel mpe Dania kutanaka na yau pekisaka bau basala diaka mingi, kasi bavuandaka sala yina bavuandaka na dikoki ya kusala mpe kusala plina vuandaka pesa bau kiese.

17. Yinki mutindu beto lenda bakila makanisi ya disolo yayi mambote?

¹⁷ Makanisi 5 yina beto metubila na disolo yayi kesimbaka ntangu beto kena kusadila yau nionso. Konso dikanisi kele lokola episi mosi yina beto kena kubuela na madia. Kana baepisi nionso mekota na madia, yau kesala ti madia bima mbote. Na kusadilaka makanisi yayi nionso, beto kevuanda ya kubongama samu na kununga banguilu ya yimbi mpe beto kevuanda na kiese mingi na kisalu ya kusamuna.