Bika nzola tinda nge na kutatamana kusamuna!

1. Yinki mambu beto kuwaka na lukutakanu ya nsuka ya mvula 2023?

NA LUKUTAKANU ya nsuka ya mvula 2023,a beto bakaka bansasulu ya kitoko samu na ndambu ya bindimeli na beto mpe beto kuwaka bansangu ya kitoko samu na kisalu na beto. Na kifuani, beto kuwaka ti bantu yankaka lenda baka diluaku ya kukuma na ndambu ya bisadi ya Yehova ata na manima ya kubebisama ya Babiloni ya nene. Beto kuwaka diaka ti kubanda na ngonda ya novembre 2023, yakelombama diaka ve na bansamuni ya Kimfumu na kusonika mambu nionso yina metadila kisalu na bau ya kusamuna. Bansobolo yango mesala ti kisalu na beto ya kusamuna vuanda diaka na mfunu mingi ve to beto sala yau diaka ve na nsualu mutindu beto vuandaka sala yau? Yakele mutindu yina ve!

2. Samu na yinki beto fueti sala kisalu na beto ya kusamuna na nsualu mingi lokola bilumbu kena kuluta? (Marko 13:10)

² Mutindu bilumbu kena kuluta, yakena kulomba beto sala kisalu na beto ya kusamuna na nsualu kuluta. Samu na yinki? Samu ntangu kele diaka mingi ve tekila nsuka kuiza. Beto tadila mambu yina Yesu samunaka samu na kisalu ya kusamuna na bilumbu ya nsuka. (Tanga Marko 13:10.) Na kutadila disolo ya Matayo, Yesu tubaka ti nsangu ya mbote kesamunua na ntoto ya mvimba tekila “nsuka” kuiza. (Mat. 24:14) Mpova yango kena kumonisa nsuka ya yinza ya yimbi ya Satana. Yehova metulaka ‘kilumbu mpe wola’ samu na mambu yina kesalama ntama mingi ve. (Mat. 24:36; 25:13; Bis. 1:7) Konso kilumbu yina kena kuluta kena kusala ti beto pusana na ntangu yango. (Bar. 13:11) Tekila nsuka kuiza, beto fueti tatamana kusamuna.

3. Yinki ketindaka beto na kusamuna?

³ Tala kiuvu ya mfunu yina beto nionso beto fueti kanisa na zulu na yau: Samu na yinki beto kesamunaka nsangu ya mbote? Samu nzola ketindaka beto beto samuna. Mambu yina beto kesalaka na kisalu ya kusamuna kemonisaka nzola na beto—nzola na beto samu na nsangu ya mbote, nzola na beto samu na bantu mpe, yina meluta nionso, nzola na beto samu na Yehova mpe nkumbu na yandi. Beto tadila mosimosi ya mambu yango.

BETO KESAMUNAKA SAMU BETO KEZOLAKA NSANGU YA MBOTE

4. Yinki mutindu beto kekukimonaka kana beto mebaka bansangu ya mbote?

⁴ Nge lenda kukibambuka diaka mutindu nge kukimonaka ntangu nge bakaka nsangu mosi ya mbote—​mbala yankaka kubutuka ya bebe ya mpangi mosi ya dibuta na nge to muntu mosi pesaka nge kisalu yina nge vuandaka mpenza na nsatu na yau. Kondua ntembe nge vuandaka mpenza na nsatu ya ngolo ya kukuenda kabula nsangu yango na dibuta mpe bankundi na nge. Diambu ya mutindu yina salamaka ntangu nge kuwaka nsangu yina meluta bansangu nionso​—nsangu ya mbote ya Kimfumu ya Nzambi?

5. Yinki mutindu nge kukimonaka ntangu nge longukaka kedika ya Mpova ya Nzambi samu na mbala ya ntete? (Tala diaka bafoto.)

⁵ Kanisa na mutindu nge kukimonaka ntangu nge longukaka samu na mbala ya ntete kedika na Mpova ya Nzambi. Nge longukaka ti Tata na nge ya dizulu kezolaka nge, mpe yandi zola nge vuanda na kati ya dibuta ya bisadi na yandi, yina yandi pesaka nsilulu ti yandi kemanisa bampasi na bau. Nge longukaka diaka ti nge lenda vuanda na kivuvu ya kumona bantu yina nge vuandaka zola yina mekufuaka vutuka na luzingu na yinza ya yimpa—mpe mambu yankaka mingi kuluta. (Mar. 10:29, 30; Yoa. 5:28, 29; Bar. 8:38, 39; Kus. 21:3, 4) Bakedika yango simbaka mpenza ntima na nge. (Luka 24:32) Nge vuandaka zola mambu yina nge vuandaka longuka, mpe nge lendaka ve kulunda bakedika yango ya mfunu samu na nge mosi!​—Fuanikisa na Yeremia 20:9.

6. Yinki dilongi nge mebaka na disolo ya Ernest mpe Rose?

⁶ Beto tadila disolo mosi. Mpangi mosi ya bakala na nkumbu ya Ernestb vuandaka na bamvula 10 ntangu tata na yandi kufuaka. Ernest metuba: “Munu vuandaka kukiyuvusa: ‘Yandi mekuenda na dizulu? To yandi melemba kuzinga samu na mvimbamvimba?’ Munu vuandaka lula bana yankaka yina vuandaka na batata na bau.” Ernest vuandaka kuenda mbala na mbala kisika bazikaka tata na yandi, yandi vuandaka fukama na diziami ya tata na yandi, mpe kusambila: “Melomba nge Nzambi, mukele na nsatu ya kuzaba kisika tata na munu kele.” Bamvula 17 na manima ya lufua ya tata na yandi, Ernest bandaka kulonguka Biblia, yina yandi ndimaka na luzolo na yandi mosi. Yandi sepelaka kulonguka ti bantu ya kufua kezabaka kima mosi ve, lokola bakele na pongi mosi ya ngolo, mpe ti Biblia mepesa nsilulu ya mfutumukunu na bilumbu kena kuiza. (Lon. 9:5, 10; Bis. 24:15) Nsukansuka, yandi bakaka bamvutu na biuvu yina vuandaka tungisa yandi bamvula mingi! Ernest vuandaka sepela mingi na bakedika ya Biblia yina yandi vuandaka longuka. Nketo na yandi Rose, bandaka mpe kulonguka Biblia na yandi mpe yandi vuandaka sepela na mambu yina yandi vuandaka longuka. Na mvula 1978 babakaka mbotama. Basamunaka na vema nionso na bantu ya dibuta na bau, na bankundi na bau, mpe na bantu yankaka bakedika ya mfunu yina balongukaka. Yau salaka ti Ernest mpe Rose sadisa bantu kuluta 70 na kuzaba Yehova mpe na kubaka mbotama.

7. Yinki kesalamaka kana nzola ya kedika ya Biblia mebaka misisa na bantima na beto? (Luka 6:45)

⁷ Yakele puelele ti kana nzola samu na kedika ya Biblia mebaka misisa na ntima na beto, beto kekoka ve kukanga yinua samu na kutubila bantu bakedika yango. (Tanga Luka 6:45.) Beto kekukimonaka lokola banlonguki ya Yesu ya siekle ya ntete yina tubaka: ‘Beto lenda bika ve kutubila mambu yina beto monaka mpe beto kuwaka.’ (Bis. 4:20) Beto kezolaka kedika mingi, na yau beto kezolaka kusamuna yau na bantu mingi yina beto lenda samunina yau.

BETO KESAMUNAKA SAMU BETO KEZOLAKA BANTU

8. Yinki ketindaka beto beto tubila bantu yankaka nsangu ya mbote? (Tala ankadre “Nzola kesadisa nge kumisa bantu banlonguki.”) (Tala diaka foto.)

⁸ Mutindu mosi na Yehova mpe Muana na yandi, beto kezolaka bantu. (Bing. 8:31; Yoa. 3:16) Beto kemonaka kiadi ya ngolo samu na bantu yina kele ‘na Nzambi ve’ mpe yina kele ‘na kivuvu ve.’ (Baef. 2:12) Samu na mambu ya mpasi yina bakena kukutana na yau, bakena kukimona lokola bakele na kati ya dibulu mosi ya mudindu. Kasi beto kele na nsinga yina lenda bimisa bau na kati na yau: Nsangu ya mbote ya Kimfumu ya Nzambi. Nzola mpe ntima kiadi na beto samu na bantu yango ketindaka beto na kusala nionso yina beto lenda samu na kutubila bau nsangu ya mbote. Nsangu yango ya mfunu lenda fulusa bantima na bau na kivuvu, kusadisa bau babaka luzingu yina meluta mbote bubu yayi, mpe kupesa bau kivuvu ya ‘luzingu ya kedika’​—luzingu ya mvula na mvula—​na yinza ya yimpa ya Nzambi.​—1 Tim. 6:19.

9. Yinki nduengoso beto kena kupesa samu na bilumbu kena kuiza, mpe samu na yinki? (Ezekiele 33:7, 8)

⁹ Nzola na beto samu na bantu ketindaka beto diaka na kutubila bau ti nsuka ya yinza yayi ya yimbi mekuma pene. (Tanga Ezekiele 33:​7, 8.) Beto kele na kiadi samu na bafinangani na beto mpe bampangi na beto ya dibuta yina kesadilaka Yehova ve. Bantu mingi kena kuzinga kaka kondua kuzaba mambu yina kena kuiza​—ti ‘mpasi ya nene kevuanda, mpasi mosi yina salama ntete ve banda na ebandeli ya yinza tii bubu yayi, mpe yakesalama diaka ve.’ (Mat. 24:21) Beto kezolaka bazaba mambu yina kesalama na ntangu yango ya nsambusulu. Ya ntete mabundu ya luvunu kebebisama, na manima yinza yayi ya yimbi kebebisama na Armagedoni. (Kus. 16:14, 16; 17:16, 17; 19:11, 19, 20) Beto kena kusambila ti bantu mingi ndima nduengoso yango mpe kuiza sangana na beto na nsambudulu ya kuvedila bubu yayi. Kasi yinki beto ketuba samu na bantu yina kena kuwa beto ve bubu yayi, buela diaka bampangi na beto ya dibuta yina beto kezolaka?

10. Samu na yinki yakele na mfunu beto tatamana kuluengisa bantu samu na mambu yina kesalama ntama mingi ve?

¹⁰ Mutindu beto sasilaka yau na disolo meluta, mbala yankaka yalenda vuanda ti luzolo ya Yehova kele kuvukisa bantu yina kesoba bantima na bau ntangu bakemona kubebisama ya Babiloni ya nene. Kana yakele mutindu yina, yakele na mfunu mingi kutatamana kutubila bau mambu yango bubu yayi. Beto lunda diambu yayi: Mambu yina beto kena kutubila bau bubu yayi lenda pesa bau diambu yina bakebambuka na yau na manima. (Fuanikisa na Ezekiele 33:33.) Mbala yankaka bakebambuka na banduengoso yina bakuwaka na beto mpe yaketinda bau basangana na beto samu na kusambila Yehova kintuadi tekila ntangu ya kusala yau vuanda diaka ve. Mutindu mosi na nkengi ya buloko na Filipi yina balulaka ntima kaka na manima ntangu ‘ntoto ninganaka ngolo mpenza,’ mbala yankaka bantu yankaka yina kena kundima beto ve bubu yayi kebalula ntima na manima ya kubebisama na kintulumukina ya Babiloni ya nene.​—Bis. 16:25-34.

BETO KESAMUNAKA SAMU BETO KEZOLAKA YEHOVA MPE NKUMBU NA YANDI

11. Yinki mutindu beto kepesaka Yehova nkembo, lokumu, mpe kilendo? (Kusonga 4:11) (Tala diaka bafoto.)

¹¹ Mfunu meluta nene yina beto kesamunaka nsangu ya mbote kele, beto kezolaka Yehova Nzambi mpe nkumbu na yandi ya nlongo. Beto ketadilaka kisalu ya kusamuna lokola mutindu ya kupesa Nzambi yina beto kezolaka lokumu. (Tanga Kusonga 4:11.) Beto mendima na ntima ya mvimba ti: ‘Yehova Nzambi na beto, . . . mebonga kubaka nkembo, lokumu, mpe kilendo’ na bisadi na yandi ya kukuikama. Beto kepesaka yandi nkembo mpe lokumu ntangu beto ketubilaka bantu yankaka mambu yina kena kundimisa ti yandi ‘mesalaka bima nionso’ mpe beto kezingaka samu yandi mepesaka beto luzingu. Beto kepesaka yandi kilendo​—kilendo na beto—​ntangu beto kepesaka yandi ntangu na beto, ngolo na beto, mpe bima na beto samu na kusamuna mingi na kutadila makoki na beto. (Mat. 6:33; Luka 13:24; Bakol. 3:23) Beto kezolaka kutuba mambu yina metadila Nzambi yina beto kezolaka. Beto kevuandaka na nsatu ya kutubila bantu yankaka mambu metadila nkumbu na yandi mpe Nzambi ya yinki mutindu yandi kele. Samu na yinki?

12. Yinki mutindu beto kekumisaka nkumbu ya Yehova nlongo na kisalu na beto ya kusamuna?

¹² Nzola na beto samu na Yehova ketindaka beto na kukumisa nkumbu na yandi nlongo. (Mat. 6:9) Yau memonisa ti beto kezolaka kutubila bantu yankaka ti mambu ya yimbi yina Satana tubaka samu na Yehova kele ya kedika ve. (Kuy. 3:1-5; Yobi 2:4; Yoa. 8:44) Ntangu beto kena kusamuna, beto kevuandaka na nsatu ya ngolo ya kutubila bantu nionso yina kekuwa beto kana Yehova kele nani mpe muntu ya yinki mutindu yandi kele mpenza. Beto kezolaka konso muntu zaba ti kikadulu na yandi yina meluta nene kele nzola, mutindu na yandi ya kuyadila kele ya mbote mpe ya lunungu, mpe ntama mingi ve Kimfumu na yandi kekuiza manisa bampasi nionso mpe kunata kiese mpe kiyenge na bantu. (Nk. 37:10, 11, 29; 1 Yoa. 4:8) Ntangu beto ketubilaka bantu mambu metadila Yehova na kisalu ya kusamuna, beto kekumisaka nkumbu na yandi nlongo. Beto kevuandaka diaka na kiese samu beto kena kusala mambu yina beto fueti sala lokola beto kele Bambangi ya Yehova. Samu na yinki beto metuba mutindu yina?

13. Samu na yinki beto kemonaka ti beto kele na lokumu mutindu beto kele na nkumbu ya Bambangi ya Yehova? (Yezaya 43:10-12)

¹³ Yehova ponaka beto samu beto vuanda “bambangi” na yandi. (Tanga Yezaya 43:​10-12.) Mua bamvula meluta, letre mosi yina katukaka na Kimvuka ya Ntuadisi tubaka: “Diambu yina kele ya lokumu kuluta samu na mosimosi kati na beto kele kuvuanda na nkumbu ya Bambangi ya Yehova.”c Samu na yinki beto metuba mutindu yina? Beto tadila kifuani mosi. Kana nge kele na nsatu muntu mosi sadila nge kimbangi na tribinale samu na kimuntu na nge, nge kepona muntu yina nge mezaba mpe yina nge ketudilaka ntima, muntu yina kimuntu na yandi kesala ti bandima kimbangi na yandi. Na kuponaka beto samu beto vuanda Bambangi na yandi, Yehova kemonisaka ti yandi mezaba beto mbote mpe yandi ketudilaka beto ntima ti beto ketubila bantu yankaka ti yandi kele kaka Nzambi mosi ya kedika. Beto kekukimonaka mpenza na lokumu kuvuanda Bambangi na yandi na yau beto kesadilaka konso diluaku samu na kuzabisa nkumbu na yandi mpe kumonisa ti mambu nionso ya yimbi yina tubamaka samu na yandi kele ya luvunu. Na kusalaka mutindu yina, beto kesalaka mambu yina kele na nguizani na nkumbu na beto, beto kele Bambangi samu na Yehova!​—Nk. 83:18; Bar. 10:13-15.

BETO KETATAMANA KUSAMUNA TII NA NSUKA

14. Yinki bansilulu ya kitoko kena kuvingila beto na bilumbu kena kuiza?

¹⁴ Mambu ya kitoko kena kuvingila beto na bilumbu kena kuiza! Na lusakumunu ya Yehova, beto kele na kivuvu ya kumona bantu mingi yina kesangana na beto na kedika tekila mpasi ya nene banda. Beto kele diaka na kiese ya kuzaba ti ata na kilokola yina meluta mpasi na disolo ya bantu—mpasi ya nene—beto lenda mona diaka bantu mingi yina kebika yinza ya Satana yina kevuanda pene ya kubebisama mpe kesangana na beto samu na kukumisa Yehova!​—Bis. 13:48.

15-16. Yinki beto ketatamana kusala, mpe tii yinki ntangu?

¹⁵ Tekila yau, beto kele na kisalu ya kusala. Beto kele na diluaku ya kusala kisalu yina kesala salama diaka ve—kusamuna nsangu ya mbote ya Kimfumu ya Nzambi na ntoto ya mvimba. Na ntangu yango kaka, beto fueti tatamana kuluengisa bantu samu na mambu yina kesalama ntama mingi ve. Bantu fueti zaba ti nsuka ya yinza yayi ya yimbi kena kupusana na nsualu. Na manima ntangu nsambusulu kekuiza, bakezaba ti nsangu yina beto vuandaka samuna vuandaka katuka na Yehova Nzambi.​—Ezek. 38:23.

¹⁶ Na yau, beto kele na nzengolo ya kusala yinki? Bika nzola samu na nsangu ya mbote, nzola samu na bantu mpe, yina meluta nionso, nzola samu na Yehova Nzambi mpe nkumbu na yandi, tinda beto beto tatamana kusamuna na nsatu ya ngolo, na nsualu, mpe na vema tii Yehova ketuba, “yamekoka!”