Yinki beto mezaba samu na bansambusulu ya Yehova ya bilumbu kena kuiza?

1. Samu na yinki beto lenda tuba ti beto kena kuzinga na bantangu mosi ya kukamua?

BETO kena kuzinga na bantangu mosi ya kukamua! Konso kilumbu, bambikudulu ya Biblia kena kukokisama na meso na beto. Na kifuani, beto kena kumona ‘ntinu ya nord’ mpe ‘ntinu ya sud’ kena kunuana samu na kuwelela luyalu ya yinza. (Dan. 11:40, nyp.) Beto kena kumona mutindu nsangu ya mbote ya Kimfumu ya Nzambi kena kusamunua na ntoto ya mvimba, mpe bamilion ya bantu mepona kusadila Yehova. (Yez. 60:22; Mat. 24:14) Mpe beto kena kubaka madia mingi ya kimpeve ‘na ntangu yina mefuana.’​—Mat. 24:45-47.

2. Na yinki diambu beto fueti kukindimisa, kasi yinki beto fueti zaba?

² Yehova kena kutatamana kusadisa beto samu beto bakusa puelele mambu ya mfunu yina kekokisama ntama mingi ve. (Bing. 4:18; Dan. 2:28) Beto lenda ndimisama ti ntangu mpasi ya nene kebanda, beto kezaba mambu nionso yina beto fueti zaba samu na kukanga ntima na kukuikama mpe kutatamana kuvuanda na bumosi na ntangu yango ya mpasi. Kasi, beto fueti zaba ti yakele na mambu yankaka yina beto zaba ve samu na bilumbu kena kuiza. Na disolo yayi, beto ketubila ntete samu na yinki beto bongisaka mambu yina beto tubaka samu na mambu yina kesalama. Na manima beto kevutukila ndambu ya mambu yina beto mezaba samu na bilumbu kena kuiza mpe mutindu Tata na beto ya dizulu kesala mambu.

MAMBU YINA BETO ZABA VE

3. Yinki beto vuandaka tuba samu na ntangu yina bantu kevuanda diaka ve na diluaku ya kumonisa kiminu na Yehova, mpe samu na yinki beto vuandaka kanisa mutindu yina?

³ Na ntama, beto vuandaka tuba ti ntangu kaka mpasi ya nene kebanda, bantu yina kesadilaka Yehova ve kevuanda diaka ve na dikoki ya kumonisa kiminu na Yehova mpe kuvuka na Armagedoni. Beto vuandaka tuba mutindu yina samu beto vuandaka kanisa ti konso muntu mpe konso mambu na ntangu ya Nkuka ya maza vuandaka monisa mambu yina kesalama na bilumbu na beto. Na kifuani beto vuandaka kanisa ti mutindu kaka Yehova kangaka porte ya nzaza tekila kaka Nkuka ya maza banda, mutindu mosi ntangu mpasi ya nene kebanda, muntu mosi ve kevuanda na dikoki ya kumonisa kiminu na Yehova mpe kuvuka.​—Mat. 24:37-39.

4. Samu na yinki beto fueti kanisa ve ti konso diambu yina salamaka na ntangu ya Noa kekokisama na mvimba na yau na bilumbu na beto? Sasila.

⁴ Yamebonga mpenza beto tuba ti konso diambu yina salamaka na Nkuka ya maza kena kumonisa mambu yina kesalama na bilumbu kena kuiza? Ve. Samu na yinki? Samu yakele ve na verse mosi na Biblia yina kena kundimisa mbala mosi diambu yango.a Yesu fuanikisaka “bilumbu ya Noa” na ntangu ya kumonana na yandi, kasi yandi tubaka ve ti konso diambu yina salamaka na ntangu ya Noa kekokisama na mvimba na yau na bilumbu kena kuiza; na kifuani ntangu yina Yehova kangaka porte ya nzaza. Kasi yazola monisa ve ti, beto lenda baka ve malongi na disolo ya Noa mpe ya Nkuka ya maza.

5. (a) Yinki diambu Noa salaka tekila Nkuka ya maza? (Baebreo 11:7; 1 Piere 3:20) (b) Na kutadila kisalu ya kusamuna, yinki mutindu mambu yina beto kena kukutana na yau mekokana na yina salamaka na bilumbu ya Noa?

⁵ Ntangu Noa kuwaka nsangu ya nduengoso ya Yehova, yandi monisaka ti yandi vuandaka na kiminu na kutungaka nzaza. (Tanga Baebreo 11:7; 1 Piere 3:20.) Mutindu mosi, bantu yina kena kuwa nsangu ya mbote ya Kimfumu ya Nzambi fueti monisa kiminu na bau na mambu yina bakesalaka. (Bis. 3:17-20) Petelo bokidilaka Noa “nsamuni ya lunungu.” (2 Pie. 2:5) Kasi, mutindu beto tubilaka yau na disolo meluta, beto zaba ve kana Noa mekaka kusamunina konso muntu yina vuandaka na ntoto tekila Nkuka ya maza. Bubu yayi beto kena kumeka kusamunina bantu ya ntoto ya mvimba, mpe beto kena kusala yau na vema. Kasi yavuanda yinki bangolo yina beto lenda sala, beto lenda vuanda ve na dikoki ya kusamunina konso muntu na ntoto nsangu ya mbote tekila nsuka kuiza. Samu na yinki?

6-7. Samu na yinki beto lenda tuba ve ti beto kekoka kusamunina konso muntu na ntoto tekila nsuka kuiza?

⁶ Beto tadila mambu yina Yesu tubaka samu na kisalu na beto ya kusamuna. Yandi samunaka ti nsangu ya mbote fueti samunua ‘na ntoto ya mvimba samu na kupesa kimbangi na makanda nionso.’ (Mat. 24:14) Mbikudulu yango kena kukokisama mingi na ntangu na beto na mutindu yina yamesalamaka ntete ve. Nsangu ya Kimfumu kena kusamunua na bandinga kuluta 1000, mpe na nzila ya site jw.org, bantu mingi ya ntoto ya mvimba lenda longuka mambu metadila Kimfumu ya Nzambi.

⁷ Kasi, Yesu tubaka diaka ti banlonguki na yandi ‘kemanisa ve kukuenda na bambanza nionso,’ to kusamuna na konso muntu tekila yandi kuiza. (Mat. 10:23; 25:31-33) Bampova ya Yesu kekokisama diaka na bilumbu na beto. Bubu yayi bantu mingi kezingaka na babuala yina kisalu na beto ya kusamuna mepekisamaka. Katula yau, bana mingi kena kubutuka konso miniti. Beto kesalaka nionso yina beto lenda samu na kusamuna nsangu ya mbote na bantu ya ‘makanda nionso, . . . mabuta nionso, . . . bandinga nionso.’ (Kus. 14:6) Kasi diambu ya kedika kele ti beto kevuanda ve na dikoki ya kusamuna nsangu ya mbote na konso muntu na ntoto tekila nsuka kuiza.

8. Yinki kiuvu beto lenda kukiyuvusa samu na bansambusulu ya Yehova ya bilumbu kena kuiza? (Tala diaka bafoto.)

⁸ Na kutadila mambu yayi beto melonguka, beto lenda kukiyuvusa: Yinki beto mezaba samu na bantu yina lenda baka ve diluaku ya kuwa nsangu ya mbote tekila mpasi ya nene banda? Yinki mutindu Yehova mpe Muana na yandi, yina yandi pesaka kiyekua ya kusambisa kesambisa bau? (Yoa. 5:19, 22, 27; Bis. 17:31) Verse yina mesimba yintu ya diambu ya disolo yayi metuba ti Yehova ‘zola ve ata muntu mosi kufua.’ Kutu, yandi zola ti ‘bantu nionso balula ntima.’ (2 Pie. 3:9; 1 Tim. 2:4) Atako beto mezaba mambu yango samu na Yehova, yandi tubila beto ve mutindu yandi kesambisa bantu nionso yina bakaka ve diluaku ya kuwa nsangu ya mbote. Ya kedika, yalomba ve yandi tubila beto kaka konso diambu metadila mambu yina yandi salaka mpe mambu yina yandi kesala.

9. Yinki mambu Yehova monisinaka beto na Biblia?

⁹ Na Mpova na yandi, Yehova tubilaka beto ndambu ya mambu yina yandi kesala. Na kifuani, Biblia metubila beto ti Yehova kefutumuna ‘bantu ya kukondua lunungu’ yina bakaka ve diluaku ya kuwa nsangu ya mbote mpe ya kusoba bikadulu na bau. (Bis. 24:15; Luka 23:42, 43) Yamebimisa biuvu yankaka ya mfunu.

10. Yinki biuvu yankaka yamebimisa?

¹⁰ Bantu nionso yina kekufua na ntangu ya mpasi ya nene kekufua samu na mvimbamvimba kondua kivuvu ya kufutumuka? Masonukua memonisa yau puelele ti bantu yina keteleminaka Yehova mpe yina Yehova mpe makesa na yandi kekufua na Armagedoni kefutumuka ve. (2 Bate. 1:6-10) Kasi yinki beto ketuba samu na bantu yankaka, na kifuani, bantu yina kekufua na bisumbula yina kebimaka yau mosi, baaksidan, to na maboko ya bantu yankaka na ntangu ya mpasi ya nene? (Lon. 9:11; Zek. 14:13) Ndambu ya bantu yango lenda vuanda na kati ya ‘bantu ya kukondua lunungu’ yina kefutumuka na yinza ya yimpa? Beto zaba ve.

MAMBU YINA BETO MEZABA

11. Bakesambisa bantu na Armagedoni na kutadila yinki diambu?

¹¹ Beto mezaba mambu mingi samu na mambu yina kesalama na bilumbu kena kuiza. Na kifuani, beto mezaba ti na Armagedoni, bakesambisa bantu na kutadila mutindu basadilaka bampangi ya Klisto mambu. (Mat. 25:40) Bayina kevuanda lokola mameme monisaka ti bavuandaka pesa maboko na Baklisto yina metulua mafuta na kimpeve mpe na Klisto. Beto mezaba diaka ti ndambu ya bampangi ya Klisto ketatamana kuvuanda na ntoto na manima ya kubanda ya mpasi ya nene mpe bakekuenda na dizulu ntangu fioti tekila Armagedoni banda. Ntangu nionso yina ndambu ya bampangi ya Klisto kevuanda awa na ntoto, bantu yina kele na bantima yina mebonga kevuanda na diluaku ya kupesa bau mpe kisalu yina bakena kusala maboko. (Mat. 25:31, 32; Kus. 12:17) Samu na yinki mambu yango kele na mfunu?

12-13. Yinki diambu ndambu ya bantu kesala na manima ya kumona kubebisama ya ‘Babiloni ya nene’? (Tala diaka bafoto.)

¹² Ata na manima ya kubanda ya mpasi ya nene, yalenda salama ti bantu yina kemona kubebisama ya ‘Babiloni ya nene’ bambuka ti Bambangi ya Yehova vuandaka tuba ti mambu yango kekokisama bamvula mingi na ntuala. Ndambu ya bantu yina kemona kubebisama ya Babiloni ya nene lenda balula bantima na bau?​—Kus. 17:5; Ezek. 33:33.

¹³ Kana yamesalama mutindu yina yakevuanda mutindu mosi na mambu yina salamaka na Ezipito na ntangu ya Mose. Kuzimbakana ve ti grupe mosi ya nene ya bantu sanganaka na Bayisaele ntangu babikaka Ezipito. Mbala yankaka ndambu ya bantu yango bandaka kukudisa kiminu ntangu bamonaka kukokisama ya banduengoso ya Bampasi 10 ya Mose. (Kub. 12:38) Kana diambu ya mutindu yina mesalama na manima ya kubebisama ya Babiloni ya nene, beto kelemba nzutu samu beto memona bantu yankaka mekuiza sangana na beto ntangu fioti tekila nsuka salama? Ya kedika beto kelemba nzutu ve! Beto kezolaka kuvuanda lokola Tata na beto ya dizulu yina kele, ‘Nzambi yina kenlemvukilaka bantu mpe kewilaka bantu kiadi, yandi kefuemaka nsualu ve mpe yandi kele ya kufuluka na nzola ya kukuikama mpe kedika.’b​—Kub. 34:6.

14-15. Diluaku ya muntu ya kuzinga mvula na mvula ketadilaka ntangu yina yandi kekufuaka to kisika yina yandi kezingaka? Sasila. (Nkunga 33:4, 5)

¹⁴ Na bantangu yankaka, bampangi na beto yankaka lenda tuba samu na bampangi na bau ya kinsuni yina kesadilaka Yehova ve ti, “Kana yandi mekufua tekila mpasi ya nene banda, yakevuanda mbote samu na yandi, samu na manima yandi kevuanda na kivuvu ya kufutumuka.” Kondua ntembe mabanza ya mbote nde ketindaka bau na kutuba mutindu yina. Kasi kuzinga mvula na mvula na bilumbu kena kuiza tadila ve ntangu yina muntu kekufuaka. Yehova kele Zuzi ya kukoka—banzengolo na yandi kevuandaka ntangu nionso ya mbote mpe ya lunungu. (Tanga Nkunga 33:4, 5.) Beto lenda tula ntima ti “Zuzi ya ntoto ya mvimba” kesala mambu yina kele mbote.​—Kuy. 18:25.

¹⁵ Yamebonga beto tuba ti luzingu ya mvula na mvula ya konso muntu tadila ve kisika yina yandi kezingaka. Yehova ketadila ata fioti ve bamilion ya bantu lokola “bankombo” kaka samu bakezingaka na babuala yina bakele ve na diluaku ya kuwa nsangu ya Kimfumu. (Mat. 25:46) Zuzi ya lunungu ya ntoto ya mvimba ketudilaka bantu yango dikebi kuluta mutindu beto lenda kanisa yau. Beto zaba ve mutindu Yehova ketuadisila mambu na ntangu ya mpasi ya nene. Mbala yankaka ndambu ya bantu yango kebaka diluaku ya kulonguka mambu metadila Yehova, kumonisa kiminu na yandi, mpe kuvuanda na ndambu ya Yehova ntangu yandi kesala ti nkumbu na yandi zabana na konso muntu na ntoto.​—Ezek. 38:16.

16. Yinki beto mezaba samu na Yehova? (Tala diaka foto.)

¹⁶ Na nzila ya ndongokolo na beto ya Biblia, beto mezaba ti bantu kele na mfunu mingi na meso ya Yehova. Yandi pesaka luzingu ya Muana na yandi samu konso muntu kati na beto vuanda na diluaku ya kuzinga mvula na mvula. (Yoa. 3:16) Beto nionso beto kemonaka nzola ya Yehova. (Yez. 49:15) Yandi mezaba mosimosi kati na beto na nkumbu. Ya kedika, yandi mezaba beto mbote na mutindu ti ata kana beto mekufua, yandi lenda futumuna beto samu yandi mezaba konso mambu yina metadila beto mpe mambu yina beto vuandaka na yau! (Mat. 10:29-31) Ya kedika, yakele na mfunu beto tula ntima ti Tata na beto ya nzola ya dizulu kesala nsambusulu mosi ya kukoka samu na konso muntu, samu yandi kele na nduenga, na lunungu, mpe na ntima kiadi.​—Yak. 2:13.

17. Yinki beto ketubila na disolo melanda?

¹⁷ Ntangu yayi lokola beto mebaka bambakusulu yayi ya mbote kuluta, beto mebakusa ti kisalu na beto ya kusamuna fueti salama diaka na nsualu kuluta. Samu na yinki beto lenda tuba mutindu yina? Mpe yinki ketindaka beto beto tatamana kusamuna nsangu ya mbote kondua kulemba? Beto ketubila bamvutu ya biuvu yango na mpinda na disolo melanda.