DISOLO YA NDONGOKOLO 49
Yehova kepesa mvutu na bisambu na munu?
‘Beno kebokila munu, beno kekuiza, mpe beno kesambila munu, mpe munu kekuwa beno.’—YER. 29:12.
MUYIMBU 41 Yoká libondeli na ngai
NA NKUFIa
1-2. Samu na yinki beto lenda kukimona ti Yehova kena kupesa ve mvutu na bisambu na beto?
‘KUWA kiese mingi mpenza na Yehova, mpe yandi kepesa nge bansatu ya ntima na nge.’ (Nk. 37:4) Yayi kele mpenza nsilulu mosi ya kukamua! Kasi beto fueti vingila Yehova pesa beto kima yina beto melomba yandi na mbala mosi? Samu na yinki yakele mfunu kuyuvusa kiuvu yango? Beto tadila bifuani yayi melanda. Mpupa mosi kena kuvingila samu babokidisa yandi na Kalasi ya bamuangisi ya nsangu ya Kimfumu. Kasi yameluta bamvula mingi bakena kubokila yandi kaka ve. Ntuenia mosi ya bakala kena kulomba Yehova sadisa yandi na maladi na yandi ya mpasi samu yandi vuanda diaka na dikoki ya kusala mingi na kati ya kimvuka. Kasi mavimpi na yandi kena kubonga ve. Bibuti mosi yina kele Baklisto kena kusambila ti muana na bau bikana na kedika. Kasi muana na bau mebaka nzengolo ya kubika kusadila Yehova.
2 Mbala yankaka nge diaka nge melombaka Yehova diambu mosi, kasi nge bakaka yau ve. Yau salaka nge tuba ti Yehova kekuwaka bisambu ya bantu yankaka kasi ya nge ve. To nge lenda kanisa ti nge salaka diambu mosi ya yimbi. Mpangi mosi ya nketo na nkumbu ya Janiceb kukimonaka mpe mutindu yina. Yandi mpe bakala na yandi vuandaka sambila Yehova samu bavuandaka mpenza na nsatu ya kusala na Betele. Yandi metuba: “Munu ndimisamaka ti ntama mingi ve beto kevuanda na Betele.” Kasi bamvula mingi lutaka, babokilaka kaka bankuelani yango ve. Janice metuba: “Munu vuandaka na kiadi mpe munu bulunganaka na makanisi. Munu vuandaka kukiyuvusa kana munu salaka diambu mosi yina sepedisaka ve Yehova. Munu vuandaka sambila Yehova mingi samu na kulomba lutuadusu na yandi. Samu na yinki yandi pesaka ve mvutu na kisambu na munu?”
3. Yinki beto ketubila na disolo yayi?
3 Na bantangu yankaka, beto lenda kukiyuvusa kana Yehova kekuwaka mpenza bisambu na beto. Ata mpe bisadi yankaka ya Yehova ya ntama vuandaka kukitungisa samu na diambu yango. (Yobi 30:20; Nk. 22:2; Hab. 1:2) Yinki lenda ndimisa nge ti Yehova kepesa mvutu na bisambu na nge? (Nk. 65:2) Samu na kubaka mvutu na kiuvu yango, beto kevuanda ntete na nsatu ya kupesa mvutu na biuvu yayi melanda: (1) Yinki Yehova kesala? (2) Yinki Yehova zola beto sala? (3) Samu na yinki beto fueti bongisa mambu yina beto kelombaka na bisambu na beto?
YINKI YEHOVA KESALA?
4. Na kutadila Yeremia 29:12, yinki diambu Yehova melaka?
4 Yehova mepesa beto nsilulu ti yandi kekuwa bisambu na beto. (Tanga Yeremia 29:12.) Nzambi na beto ya nzola kezolaka bisadi na yandi ya kukuikama, na yau yandi lenda manga ve bisambu na bau. (Nk. 10:17; 37:28) Kasi yazola monisa ve ti yandi kepesa beto mambu nionso yina beto kelombaka. Yalenda lomba beto vingila tii na yinza ya yimpa samu na kubaka mambu yankaka yina beto kelombaka.
5. Yinki diambu Yehova ketadilaka ntangu yandi kena kuwa bisambu na beto? Sasila.
5 Yehova ketalaka kana mambu yina beto kelombaka kele na nguizani na lukanu na yandi. (Yez. 55:8, 9) Ndambu ya lukanu yango mesangisa kufulusa ntoto na babakala mpe banketo yina kele na bumosi na kiese nionso na yinsi ya luyalu na yandi. Kasi Satana ketubaka ti bantu kevuanda mbote kana bakena kukiyala. (Kuy. 3:1-5) Samu na kumonisa ti mambu yina Diabulu ketubaka kele ya luvunu, Yehova bikaka nzila bantu kukiyala bau mosi. Nzokande, luyalu ya bantu mebimisa mambu mingi ya mpasi yina beto kena kukutana na yau bubu yayi. (Lon. 8:9) Beto mezaba ti Yehova kekatula ve mambu yango nionso na ntangu yayi. Kana yalombaka yandi sala mutindu yina, bantu lendaka kanisa ti luyalu ya bantu menunga, yakele na dikoki ya kupesa solision na mambu yina bantu kena kukutana na yau.
6. Samu na yinki beto fueti ndimisama ti Yehova kesala ntangu nionso mambu yina kele ya nzola mpe ya lunungu?
6 Yehova lenda pesa mvutu na mitindu ya kusuasana na bisambu yina mekokana. Na kifuani, ntangu Ntinu Ezekiasi vuandaka bela ngolo, yandi lombaka Yehova sadisa yandi samu yandi beluka. Yehova pesaka mvutu na kisambu yango na kubelusaka yandi. (2 Bn. 20:1-6) Na ndambu yankaka, ntangu ntumua Paulo lombaka Yehova yandi katula yandi ‘nsende na musuni,’ mbala yankaka yavuandaka mambu metadila mavimpi, kasi Yehova katulaka yau ve. (2 Bk. 12:7-9) Beto tadila diaka kifuani ya ntumua Yakobo mpe ntumua Petelo. Ntinu Herode zolaka kufua bau zole. Kimvuka sambilaka samu na Petelo mpe kondua ntembe samu na Yakobo. Nzokande bakufuaka Yakobo, kasi Petelo vukaka na nzila ya kimangu. (Bis. 12:1-11) Beto lenda kukiyuvusa, ‘Samu na yinki Yehova vukisaka Petelo kasi Yakobo ve?’ Biblia tubila yau ve.c Diambu yina beto fueti kukindimisa na yau kele ti banzila ya Yahova ‘kekonduaka ata fioti ve lunungu.’ (Kul. 32:4) Mpe beto mezaba ti Yehova vuandaka zola Petelo mpe Yakobo. (Kus. 21:14) Na bantangu yankaka Yehova lenda pesa mvutu na mutindu yina beto kukivingilaka na yau ve. Kasi lokola beto ketulaka ntima ti bamvutu ya Yehova na bisambu na beto kevuandaka ntangu nionso ya nzola mpe ya lunungu, beto keyimayimaka ve na mutindu yina Yehova keponaka samu na kupesa mvutu na bisambu na beto.—Yobi 33:13.
7. Yinki beto fueti manga mpe samu na yinki?
7 Beto kesalaka nionso samu na kumanga kukokanisa mambu na beto na yina ya bantu yankaka. Na kifuani, beto lenda lomba Yehova sadisa beto na mutindu mosi, kasi beto baka ve mvutu na mambu yina beto lombaka. Mpe na manima beto mekuwa ti muntu yankaka lombaka diambu ya mutindu mosi na yina beto lombaka, mpe yamemonana lokola Yehova pesaka mvutu na bisambu na yandi. Mpangi mosi ya nketo na nkumbu Anna kutanaka na diambu ya mutindu yina. Yandi sambilaka ti bakala na yandi na nkumbu ya Matthew, beluka na maladi ya kansere. Bampangi zole ya banketo ya Baklisto yina mepusana na bamvula, vuandaka mpe na kansere. Anna sambilaka ngolo samu na bakala na yandi mpe samu na bampangi yango zole ya banketo. Bampangi yango zole belukaka kasi Matthew kufuaka. Na ebandeli Anna kukiyuvusaka kana bampangi yango zole ya banketo belukaka samu Yehova sadisaka bau. Kana yakele mutindu yina samu na yinki Yehova pesaka ve mvutu na bisambu na yandi samu bakala na yandi beluka? Ya kedika, beto lenda tuba ve samu na yinki bampangi yango zole ya banketo belukaka. Diambu yina beto mezaba kele ti Yehova kele na solision yina kemanisa bampasi na beto nionso samu na mvimbamvimba, mpe yandi kele na nsatu ya kufutumuna bampangi na beto nionso yina mekufuaka.—Yobi 14:15.
8. (a) Na kutadila Yezaya 43:2, yinki mutindu Yehova kesadisaka beto? (b) Yinki mutindu kisambu lenda sadisa beto ntangu beto kena kukutana na mambu ya mpasi? (Tala video Kisambu kesadisaka beto samu beto kanga ntima.)
8 Yehova ketatamana kusadisa beto. Lokola Yehova kele Tata na beto ya nzola, yandi kesepelaka ve kumona beto beto kena kuniokuama. (Yez. 63:9) Nzokande yandi kekatulaka ve bampasi nionso yina kena kukumina beto, yina kele lokola banzadi to ludimi ya tiya. (Tanga Yezaya 43:2.) Kasi, yandi mepesa beto nsilulu ti yandi kesadisa beto na ‘kuluta na kati’ na yau. Mpe yandi kebika ve banzomono na beto bimisina beto mambu ya mpasi yina kesala manisa ve. Yehova kepesa beto diaka mpeve ya nlongo na yandi ya kilendo samu na kusadisa beto beto kanga ntima. (Luka 11:13; Fil. 4:13) Yau kesala ti beto tula ntima ti yandi kepesa beto nionso yina beto kele na yau mpenza nsatu samu na kukanga ntima mpe kubikana ya kukuikama na yandi.d
YINKI YEHOVA ZOLA BETO SALA?
9. Na nguizani na Yakobo 1:6, 7, samu na yinki beto fueti tula ntima ti Yehova kesadisa beto?
9 Yehova zola beto tudila yandi ntima. (Ebr. 11:6) Na bantangu yankaka, banzomono na beto lenda monana lokola beto lenda kangila yau ve ntima. Beto lenda ata kubanda kutula ntembe ti Yehova kesadisa beto. Kasi Biblia mendimisa beto ti na nzila ya kilendo ya Nzambi, beto lenda ‘monte na kibaka.’ (Nk. 18:29) Na kisika ya kubika ti bantembe yala beto, beto fueti sambilaka na kiminu nionso na kutulaka ntima ti Yehova kepesa mvutu na bisambu na beto.—Tanga Yakobo 1:6, 7.
10. Pesa kifuani ya mutindu beto lenda sala mambu yina kele na nguizani na bisambu na beto.
10 Yehova zola beto sala mambu na nguizani na bisambu na beto. Na kifuani, mpangi mosi ya bakala lenda lomba Yehova sadisa yandi yandi baka konje na kisalu ya kinsuni samu yandi kuenda na lukutakanu ya nene. Yinki mutindu Yehova lenda pesa mvutu na kisambu yango? Yandi lenda pesa mpangi yango kibakala yina yandi kele na yau nsatu samu yandi kuenda kutana na mfumu na yandi ya kisalu. Kasi mpangi yango fueti kuenda kuta mfumu na yandi ya kisalu samu na kulomba yinsua. Yandi lenda banda kusala yau mbala mingi. Yandi lenda lomba na nkundi na yandi ya kisalu sala na kisika na yandi mpe yandi kesala na kisika ya nkundi na yandi kilumbu yankaka. Katula yau, yandi lenda lomba konje kondua ti bafuta yandi.
11. Samu na yinki beto fueti sambilaka mbala na mbala na diambu metadila mitungisi na beto?
11 Yehova zola ti beto sambila yandi mbala na mbala samu na mambu yina kele mfunu samu na beto. (1 Te. 5:17) Yesu tubaka ti beto kebaka ve mvutu na mbala mosi samu na mambu yankaka yina beto kelombaka. (Luka 11:9) Kasi kulemba nzutu ve! Sambilaka mbala na mbala na ntima ya mvimba. (Luka 18:1-7) Kana beto kena kutatamana kusambila samu na diambu mosi, beto kemonisa Yehova ti diambu yango kele mpenza na mfunu samu na beto. Beto kemonisa diaka kiminu na beto na dikoki na yandi ya kusadisa beto.
SAMU NA YINKI YALENDA LOMBA BETO BONGISA MAMBU YANKAKA YINA BETO KELOMBAKA NA BISAMBU?
12. (a) Yinki kele kiuvu mosi yina beto fueti kukiyuvusa na diambu metadila mambu yina beto kelombaka, mpe samu na yinki? (b) Yinki mutindu beto lenda kukindimisa ti bisambu na beto kemonisaka luzitu samu na Yehova? (Tala ankadre “Mambu yina munu kelombaka na bisambu kemonisaka luzitu samu na Yehova?”)
12 Kana beto kena kubaka ve mvutu na bisambu na beto, beto fueti kukiyuvusa biuvu tatu. Ya ntete, ‘Munu kena kusambila samu na diambu ya mbote?’ Mbala mingi, beto kekanisaka ti beto mezaba yina meluta mbote samu na beto. Kasi mambu yankaka yina beto kelombaka lenda vuanda ve mpenza na mfunu samu na beto. Kana beto kena kusambila samu na diambu mosi, yalenda vuanda na solision mosi yina meluta mbote kuluta solision yina beto kena kusosa. Mpe mambu yankaka yina beto kelombaka lenda vuanda ve na nguizani na luzolo ya Yehova. (1 Yn. 5:14) Na kifuani, beto tadila kifuani ya bibuti yina beto tubilaka na ebandeli. Bavuandaka lomba Yehova tanina muana na bau samu yandi bikana na kedika. Diambu yina bavuandaka lomba monanaka lokola yamebonga. Kasi, Yehova ketindaka ata mosi ve kati na beto na kingolo samu na kusadila yandi. Yandi zola beto nionso ata mpe bana, beto pona kusadila yandi. (Kul. 10:12, 13; 30:19, 20) Yau yina bibuti fueti lomba nde Yehova sadisa bau basimba bantima ya bana na bau samu bazola Yehova mpe bakuma bankundi na Yandi.—Bin. 22:6; Efe. 6:4.
13. Na kutadila Baebreo 4:16, yinki ntangu Yehova kesadisa beto? Sasila.
13 Kiuvu ya zole, ‘Yakele ntangu yina mebonga samu na Yehova na kupesa mvutu na kisambu na munu?’ Beto lenda mona ti beto kele na nsatu ya kubaka mvutu na nsualu na bisambu na beto. Ya kedika, Yehova mezaba ntangu yina mebonga samu na kupesa beto lusadusu. (Tanga Baebreo 4:16.) Kana beto kena kubaka ve mvutu na mbala mosi na mambu yina beto lombaka na kisambu na beto, beto lenda kanisa ti mvutu ya Yehova kele, ‘Ve.’ Kasi mvutu na yandi lenda vuanda, ‘Ntete ve.’ Na kifuani, kanisa na ntuenia ya bakala yina beto tubilaka, yina vuandaka sambila samu yandi beluka na maladi na yandi. Kana Yehova vukisaka yandi na nzila ya kimangu, Satana zolaka tuba ti mpangi yango tatamanaka kusadila Yehova kaka samu yandi vukisaka yandi na maladi na yandi. (Yobi 1:9-11; 2:4) Katula yau, Yehova metulaka deja ntangu yina yandi kebelusa maladi nionso. (Yez. 33:24; Kus. 21:3, 4) Mpe bubu yayi, beto lenda vingila ve ti beto beluka na nzila ya kimangu. Na yau, mpangi yango ya bakala lenda lomba Yehova pesa yandi ngolo mpe kiyenge na makanisi samu yandi kanga ntima na maladi na yandi mpe yandi tatamana kusadila Nzambi na kukuikama nionso.—Nk. 29:11.
14. Yinki dilongi nge mebaka na kifuani ya Janice?
14 Kanisa diaka na disolo ya mpangi Janice, yina vuandaka sambila Yehova samu yandi kuenda sala na Betele. Bamvula 5 lutaka tekila yandi bakusa mutindu Yehova pesaka mvutu na kisambu na yandi. Yandi metuba: “Yehova sadilaka ntangu yango samu na kulonga munu mpe samu na kubongisa munu samu munu vuanda Muklisto ya mbote kuluta. Yalombaka munu kudisa kikadulu na munu ya kutudila yandi ntima. Yalombaka munu longuka Biblia na dikebi nionso. Mpe yalombaka munu vuanda na kiese yavuanda yinki kisika munu kena kusadila Yehova.” Na manima, babokilaka Janice mpe bakala na yandi samu na kusala kisalu ya kizungidila. Na kuvutulaka makanisi na manima, Janice metuba: “Yehova pesaka mvutu na bisambu na munu kasi ve na mutindu yina munu kanisaka. Yabakaka ntangu samu munu bakusa ti mvutu ya Yehova vuandaka kado mosi ya kitoko, kasi munu kele na butondi mingi mutindu munu bakaka diluaku ya kumona nzola mpe kimpombo na yandi.”
Kana nge kena kukimona ti nge bakaka ve mvutu ya Yehova na kisambu na nge, kanisa kusambila samu na mambu yankaka (Tala paragrafe 15)f
15. Samu na yinki na bantangu yankaka beto fueti lomba ve mambu ya sikisiki na bisambu na beto? (Tala diaka bafoto.)
15 Kiuvu ya tatu, ‘Munu fueti sambila samu na kima yankaka?’ Atako yakele mbote kulomba mambu ya sikisiki na bisambu, kasi na bantangu yankaka, yalenda vuanda mbote kuluta beto bika lomba mambu yina kele mpenza sikisiki na bisambu na beto, na mutindu yina nde beto kemona yinki Yehova zola samu na beto. Beto tadila kifuani ya mpangi mosi ya mpupa yina vuandaka sambila samu na kukota na Kalasi ya bamuangisi ya nsangu ya Kimfumu. Yandi kele na nsatu ya kukota na kalasi yango samu na kukuenda pesa maboko kisika yina nsatu ya bansamuni kele mingi. Na yau, ntangu yandi kena kutatamana kusambila samu babokidisa yandi na kalasi yango, yandi lendaka lomba diaka Yehova sadisa yandi samu yandi mona maluaku yankaka ya kusadila yandi diaka mingi. (Bis. 16:9, 10) Na manima yandi lendaka sala diambu yina kele na nguizani na kisambu na yandi, na kuyuvusaka nkengi ya kizungidila na bau kana yakele na kimvuka mosi ya pembeni yina kele na nsatu ya bampasudi nzila. To yandi lendaka sonikina biro ya filiale samu na kuzaba kisika yina kele na nsatu ya bansamuni mingi ya Kimfumu.e
16. Yinki diambu beto lenda ndimisama na yau?
16 Mutindu beto melonguka yau, beto lenda ndimisama ti Yehova kepesa bamvutu na bisambu na beto na nzola nionso mpe na mutindu yina mebonga. (Nk. 4:3; Yez. 30:18) Na bantangu yankaka beto lenda baka ve mvutu na mutindu yina beto vuandaka vingila. Kasi Yehova kesala zimbakana ata fioti ve bisambu na beto. Yandi kezolaka beto mingi. Mpe yandi kesala sundola beto ata fioti ve. (Nk. 9:10) Na yau, tatamana ‘[ku]tudila yandi ntima ntangu nionso,’ na kuzibudilaka yandi ntima na nge na kisambu.—Nk. 62:8.
MUYIMBU 43 Libondeli ya kopesa matɔndi
a Disolo yayi kesasila samu na yinki beto lenda tula ntima ti Yehova kepesa ntangu nionso bamvutu na bisambu na beto na mutindu ya nzola mpe na mutindu yina mebonga.
b Beto mepesa bau bankumbu yankaka.
c Tala disolo “Nge ketulaka ntima na mutindu ya Yehova ya kusadila mambu?” na Yinzo’a zulu ya Nkengi ya février 2022 paragrafe 3-6.
d Samu na kuzaba mambu mingi na mutindu Yehova kesadisaka beto beto kanga ntima na bampasi, tala video Kisambu kesadisaka beto samu beto kanga ntima na jw.org.
e Samu na kubaka malako na diambu metadila kukuenda sala na terituare ya filiale yankaka, tala mukanda Tobongisami mpo na kosala mokano ya Yehova, kikapu 10, paragrafe 6-9.
f NSASULU YA FOTO: Bampangi zole kena kusambila samu babokidisa bau na Kalasi ya bamuangisi ya nsangu ya Kimfumu. Na manima, bamebokila mosi kati na bau, kasi mpangi yankaka babokila yandi ve. Na kisika yandi lemba nzutu, mpangi yango yina babokilaka ve kena kusambila Yehova yandi sadisa yandi mona maluaku yankaka ya kusala mingi na kisalu na yandi. Na manima yandi mesonikina biro ya filiale samu na kuzabisa bau ti yandi kele na nsatu ya kusala na kisika yina nsatu ya bansamuni kele mingi.