Buke zokuhova zoVahompa

10 Hompa gomukadi gwaSeba kwa zuvhire omu ga divikwire Saromo morwa edina lyaJehova, makura ta zi a ka mu heteke nomapuro goudigu.* 2 Age ta ka sika moJerusarema novakareli wovanzi nonongameru edi da simbire magadi gobalisemu nongorodo zonzi ntani nomamanya gondiro. Age ta zi kwaSaromo, ta ka mu tantera nayinye eyi ya kere momutjima gwendi. 3 Makura Saromo ta limburura mapuro gendi nagenye. Kwato epuro eli lya mu digoperere kulimburura.

4 Hompa gomukadi gwaSeba kwa tetukire unene apa ga mwene unongo naunye waSaromo nonzugo ezi ga dikire. 5 Age kwa tetukire hena unene nondya edi nga di kara positafura sendi, omu ngava hingire vakareli vendi, omu ngava gavere nondya positafura neyi ngava dwara, vantu ava ngava mu pe yikunwa ntani nonzambo dendi deswakerero edi nga gava nkenye apa konzugo zaJehova. 6 Makura ta tantere hompa asi: “Eyi na zuvha mosirongo sange kuhamena unongo woge neyi wa rugana,* kuna kara usili. 7 Nye ame kapi na yi pulire dogoro paapa nina wiza ni ya yi limonene nyamwange. Ame kwa tantera nge tupu yoyisesu. Unongo noungawo woge wa pitakana eyi na zuvha. 8 Vantu woge ntani novakareli woge ava ava sikama nkenye apa komeho zoge vanerago, morwa awo kupurakena nkenye apa kounongo woge! 9 Karunga goge Jehova va mu hamberere. Age kuhafera eyi o rugana, yiyo ga kuninka o hingire posipundi souhompa soVaisraeli. Mokumona asi Jehova kwa hara Vaisraeli dogoro narunye, age kwa kuhorowora o kare hompa yipo o pangere pauhunga.”

10 Makura hompa gomukadi gwaSeba ta gava kwahompa ngorodo zonokilograma 4 100* nomagadi gomanzi gobalisemu ntani nomamanya gondiro. Kwato hena gumwe ga retere magadi gomanzi gobalisemu ngwendi aga ga geve hompa gomukadi gwaSeba kwaSaromo.

11 Yikepa yaHiramu eyi ngayi simbi ngorodo koOfire, ngayi simbi hena yitji* yoyinzi nomamanya gondiro. 12 Hompa kwa ruganesere yitji oyo a rugane nongundi dokonzugo zaJehova nombara* zendi noyiumba ntani nayimwe yokusikisa eyi ngava ruganesa vadimbi. Yitji oyo kwato hena gumwe ogu ga yi reta ndi va yi mone mo hena dogoro naina.

13 Kugusa ko yininke nayinye eyi ga geve hompa Saromo kwahompa gomukadi gwaSeba, age kwa mu pere hena nayinye eyi ga mu hundilire ntani neyi ga here. Konyima, hompa gomukadi gwaSeba ta tengura kosirongo sendi kumwe novakareli vendi.

14 Ano Saromo nga gwana nkenye mvhura ngorodo zonokilograma 23 000,* 15 kugusa ko oyo, age nga gwana hena mutero kovarandesi novarandi ntani kovahompa navenye womoArabiya novanguuru womosirongo.

16 Hompa Saromo kwa rugene yilikandwiso yoyinene 200 yongorodo ezi va vhonga (nkenye silikandwiso kwa si rugene nongorodo zonokilograma ntambali)* 17 ntani yilikandwiso yoyinunu* 300 yongorodo ezi va vhonga (nkenye silikandwiso sosinunu kwa si rugene nongorodo zonokilograma mbali).* Makura hompa ta yi tura moNzugo zoyitji yomoMusitu gwaLibanoni.

18 Hompa kwa rugene hena sipundi souhompa sonombinga dovanzovhu ntani kwa si kwitire ngorondo zene-zene. 19 Kosipundi souhompa kwa tulire ko yininke yokurondera ntazimwe ntani konyima zosipundi kwa tulire ko etaratara lyokuliudinga. Ano komaruha gavali gosipundi kwa kere ko yininke yokukambeka mawoko, ntani konontere doyininke oyo kwa sikeme ko vanyime vavali. 20 Koyininke yokurondera kwa kere ko vanyime 12. Kwankenye ruha kwa kere ko vanyime ntazimwe. Kwato hena hompa ogu ga rugene sipundi sokufana ngoso.

21 Nonkinda nadinye dahompa Saromo kwa kere dongorodo ntani yipako nayinye yomoNzugo zoyitji yomoMusitu gwaLibanoni kwa kere yongorodo zene-zene. Kwato sininke esi sa kere sosisiliveli, yeeyi siliveli ngava zi tara asi kwato mulyo momazuva gaSaromo. 22 Yeeyi hompa kwa kere noyikepa yokoTaresisi eyi ngayi gendi kumwe noyikepa yaHiramu mefuta. Yikepa yokoTaresisi ngayi wiza nkenye apa konyima zonomvhura ntatu nongorodo, siliveli, nombinga dovanzovhu, mangwanza ntani noyidira.*

23 Hompa Saromo kwa kere nounongo ntani noungawo kupitakana vahompa navenye vepevhu. 24 Vantu navenye womouzuni kwa here va ze* kwaSaromo, va ka purakene kounongo ou ga mu pere Karunga. 25 Awo ngava mu twarere mauhwi ntani ngava yi rugana nkenye mvhura. Awo ngava twara yipako yosiliveli, yongorodo, yidwara, yirwiso, magadi gobalisemu, nonkambe ntani nonsino.

26 Saromo kwa twikilire kulipongaikira matemba nononkambe.* Age kwa kere nomatemba 1 400 nononkambe* 12 000. Age kwa di tulire moyitata omu nga pungwire matemba, pepi nahompa moJerusarema.

27 Hompa Saromo kwa pongaikire siliveli zonzi moJerusarema ngwendi mamanya ntani noyitji yosedeli yoyinzi ngwendi yitji* eyi ya kara moSefera.

28 Nonkambe daSaromo kwa ka di simbire koEgipite, ano varandi vahompa yiwo ngava randa nonkambe edi* kuliza nomukoso ogu va tura po. 29 Nkenye etemba ngava li randa koEgipite noyisiliveli 600, ano nkenye nkambe ngava zi randa yisiliveli 150, konyima ngava ya yi randesa kovahompa woVaheti ntani kovahompa vaSiliya.