Buke zokuhova zoVahompa
9 Apa ga mene Saromo kutunga nzugo zaJehova, mbara* zahompa ntani nayinye eyi ga here kurugana, 2 Jehova ta monekere hena Saromo sikando sauvali ngwendi moomu ga mu monekerere moNgibiyoni. 3 Jehova ta mu tantere asi: “Ame na zuvha ekanderero lyoge neyi wa hundira nge. Ame kwa pongora nzugo ezi wa tunga, yipo ngava fumadekere mo edina lyange dogoro narunye. Ame ngani zi tarera ntani ngani zi popera siruwo nasinye. 4 Ano nsene o limburukwa nge ngwendi moomu ngava limburukwa nge oguho Ndafita nomutjima nagunye pokurugana nayinye eyi na kupangera ntani o sikise mo noveta nonompangera dange, 5 ame ngani ninka uhompa woge u karerere moIsraeli dogoro narunye, ngwendi moomu na tumbwidilire oguho Ndafita asi: ‘Moruvharo roge ngamu tunda nkenye apa gumwe ogu nga hingira posipundi souhompa moIsraeli.’ 6 Nye nsene nove novana woge mu dira kulimburukwa nge ntani mu dire kukwama noveta nonompangera dange edi na mu tantera, mu ze mu ka karere yikarunga yapeke ntani mu ka yi nyongamene, 7 ame ngani gusa mo Vaisraeli mosirongo esi nava pa, nzugo ezi na pongwera edina lyange ngani zi gusa ko komeho zange. Ano Vaisraeli ngava va zora ntani ngava va sindagura. 8 Nzugo ezi ngazi kara ndambo zomamanya. Nkenye ogu nga pita po nga tetuka nokusiva ntani nga tanta asi: ‘Morwasinke Jehova ga ruganena yininke eyi mosirongo esi ntani nonzugo ezi?’ 9 Makura vantu ngava tanta asi: ‘Yeeyi awo kwa siga Karunga gwawo Jehova ogu ga gusire ozinyakurwawo moEgipite, va ka karere yikarunga yapeke nokuyinyongamena. Eyi yiyo Jehova ga va retera udigu wangesi.’”
10 Saromo kwa tungire nonzugo mbali monomvhura 20, zimwe nzugo zaJehova ano zimwe mbara* zahompa. 11 Hiramu hompa gwaTirusi kwa pere Saromo yitji yosedeli noyitji yapeke* ntani nongorodo ezi ga here. Ano hompa Saromo kwa pere Hiramu yitata 20 yomosirongo saGalireya. 12 Makura Hiramu ta tundu moTirusi a ka tare yitata eyi ga mu pere Saromo, nye age kapi ga yi haferere. 13 Hiramu ta pura Saromo asi: “Ove mukwetu, yitata eyi ono pe nge yidona.” Makura tava yi ruku asi Sirongo saKabuli* dogoro naina. 14 Konyima, Hiramu ta tumu kwahompa ngorodo zokusika ponokilograma 4 100.*
15 Ava yiwo ga pangerere hompa Saromo va tunge nzugo zaJehova, mbara* zendi, ndundu,* makuma gaJerusarema nokuwapukurura sitata saHasoro, Megido ntani Gesere. 16 (Farawo hompa gwaEgipite kwa kwete sitata saGesere, ta si hwike. Age hena kwa dipagere Vakanani ava va tungire mo, makura ta si gava ngouhwi* kwamunendi ogu ga kwere Saromo.) 17 Saromo kwa tungwilire* sitata saGesere, Bete-horoni zemedamenena, 18 Barati ntani sitata saTamara esi sa kere momburundu moIsraeli, 19 yitata yaSaromo eyi nga pungwire yininke, yitata omu nga tura matemba gendi, yitata omu va tungire varondi wononkambe ntani nkenye eyi ga here Saromo kutunga moJerusarema, moLibanoni ntani mosirongo nasinye esi nga pangere. 20 Mosirongo mwa kere hena simpe vantu wokonomuhoko dapeke. Awo kuna kara Vaamoli, Vaheti, Vaperesi, Vahevhi noVajebusi. 21 Awo kwa tundire moruvharo ronomuhoko edi va dilire kuzonagura po Vaisraeli. Saromo kwa va pangerere va rugane yirugana youdigu ntani awo kuna kara vapika dogoro naina. 22 Nye Saromo kapi ga tulire Vaisraeli va kare vapika, yeeyi awo kwa kere vakwayita vendi, vakareli vendi, marenga gendi, vapitisili ntani novakurona ava ngava pitisire varondi womatemba novarondi wononkambe. 23 Saromo kwa kere novakurona wovanguuru 550, ava ngava pitisire yirugana eyi ga geve.
24 Nye munaFarawo ta tundu moSitata saNdafita a ze kembo eli ga mu dikilire Saromo, ano konyima Saromo ta dike ndundu.*
25 Saromo nga zamba nonzambo deswakerero nedi dombili rutatu momvhura posizambero esi ga dikilire Jehova ntani nga ninki nonzambo di tutumikire posizambero esi sa kere komeho zaJehova, makura age ta mana kutunga nzugo.
26 Hompa Saromo kwa rugene hena yikepa yoyinzi moEsiyoni-gebere, ezi za kara pepi naEroti konontere dEfuta lyEgeha mosirongo saEdomu. 27 Hiramu kwa tumine vakareli vendi noyikepa yoyinzi, novagara ava va divire efuta va ze kumwe novarugani vaSaromo. 28 Awo kwa zire koOfire, tava ka simba ngorodo zonokilograma 14 360,* tava zi twara kwahompa Saromo.