Buke zokuhova zoVahompa

12 Rehoboyamu kwa zire koSikemu, yeeyi Vaisraeli navenye kwa zire koSikemu va ka mu ture a kare hompa. 2 Ano Jerobiyamu munaNebata ta yi zuvhu (age kwa kere simpe moEgipite, morwa kwa tjwayukire hompa Saromo, ta ka tunga moEgipite), 3 makura tava tumu vantu va ka mu zigide. Ano konyima Jerobiyamu ta zi kwaRehoboyamu kumwe noVaisraeli navenye va ka mu tantere asi: 4 “Oguho kwa digopekere eparu lyetu. Nye nsene kapi no tu pura tu rugane yoyinzi ngwendi moomu va yi rugene oguho, o dire kudigopeka eparu lyetu, ose ngatu kuruganena.”

5 Makura age ta va tantere asi: “Zendeni, ngomu ka tengure konyima zomazuva gatatu.” Makura awo tava zi. 6 Konyima, hompa Rehoboyamu ta zi a ka pure masimbi* aga nga ga ruganene oguhwe apa va kere vazuni. Age kwa va pulire asi: “Ngapi omu nani limburura vantu ava?” 7 Masimbi ogo taga mu limburura asi: “Nsene naina o kara ngwendi mukareli kovantu ava, o rugane eyi vana hara nokuvalimburura monkedi zongwa, awo ngava twikira kukara vakareli woge.”

8 Nye age kapi ga purakenene eyi ga mu tanterere masimbi,* ta zi a ka pure vadinkantu vakwawo ava ga kura nawo, ava ga tulire va kare vakareli vendi. 9 Age kwa va pulire asi: “Ngapi omu nani limburura vantu ava vana pura nge ni dire kudigopeka eparu lyawo ngwendi moomu va yi rugene otate?” 10 Vadinkantu ava ga kura nawo tava mu tantere asi: “Ka tantere vantu ava vana kupura o dire kudigopeka eparu lyawo ngwendi moomu va yi rugene oguho asi: ‘Ame ngani mu tekura nonyanya kupitakana omu va mu tekwire otate.* 11 Otate kwa digopekere eparu lyeni, nye ame ngani li digopeka unene. Otate ngava mu sopora nonongora, nye ame ngani mu sopora nonongora edi va tura yininke youtwe.’”

12 Konyima zomazuva gatatu, Jerobiyamu ta zi kumwe noVaisraeli kwaRehoboyamu ngwendi moomu ga va tanterere hompa Rehoboyamu asi ngava ka tengure konyima zomazuva gatatu. 13 Nye hompa ta va limburura monkedi zonyanya ntani age kapi ga kweme eyi ga mu tanterere masimbi.* 14 Age kwa va tanterere eyi va mu tanterere vadinkantu vakwawo asi: “Otate kwa digopekere eparu lyeni, nye ame ngani li digopeka unene. Otate ngava mu sopora nonongora, nye ame ngani mu sopora nonongora edi va tura yininke youtwe.” 15 Yipo nye, hompa kapi ga purakenene kovantu, yeeyi Jehova yige ga yi ninkisire yi horoke yipo di sike mo nonkango daJehova, edi ga tanterere Jerobiyamu munaNebata kupitira mwaAhiya gomoSiro.

16 Vaisraeli navenye apa va mwene asi hompa kapi ana kuvapurakena, tava mu tantere asi: “Ndafita kapisi ekoro lyetu ntani ogo munaIsayi kapi nga tu pa yuma. Zendeni mu ka karere yikarunga yeni, one Vaisraeli. Ano one epata lyaNdafita lipangereni nye nyamweni!” Makura Vaisraeli tava tengura komambo gawo.* 17 Nye Rehoboyamu kwa twikilire kupangera Vaisraeli ava va tungire moyitata yorudi rwaJuda.

18 Makura hompa Rehoboyamu ta tumu Adoramu ogu nga pitisire vantu ava ngava ruganene hompa a ze koVaisraeli, nye Vaisraeli navenye tava ka mu dipaga nomamanya. Ano hompa Rehoboyamu ta rondo metemba lyendi a tjwayukire koJerusarema. 19 Kutunda opo, Vaisraeli kapi va kwatesere ko epata lyaNdafita dogoro naina.

20 Apa va yi zuvhire Vaisraeli navenye asi Jerobiyamu ga ka tengura, tava mu zigida, makura tava mu tura a kare hompa goVaisraeli. Vaisraeli navenye kapi ngava kwatesa ko epata lyaNdafita, vantu womorudi rwaJuda velike ngava kwatesa ko epata lyaNdafita.

21 Apa ga ka sikire Rehoboyamu munaSaromo moJerusarema, ta pongaike vakwayita 180 000 womorudi rwaJuda noru rwaMbenyameni ava va deura,* va ka rwise Vaisraeli yipo va mu tengwidire uhompa. 22 Makura Karunga gousili ta tantere mukareli gwendi Semaya asi: 23 “Tantera Rehoboyamu munaSaromo, hompa gorudi rwaJuda novantu womorudi narunye rwaJuda noru rwaMbenyameni ntani novantu navenye wokuhupa ko asi: 24 ‘Jehova kuna kutanta asi: “Mwa ha za mu ka rwise Vaisraeli vakweni. Tengureni namuvenye komambo geni, yeeyi nyame nina yi ninkisa yi horoke.”’” Awo tava limburukwa eyi ga va tanterere Jehova, makura tava tengura komambo gawo ngwendi moomu ga va tanterere Jehova.

25 Konyima, Jerobiyamu ta tungurura* sitata saSikemu esi sa kara momukunda gonondundu gwaEfurayimi makura ta tungu moomo. Kutunda opo, ta zi ta ka tungurura* sitata saPenueli. 26 Jerobiyamu ta litantere mwene asi: “Uhompa kuvhura nga u tengure kepata lyaNdafita. 27 Vantu ava nsene va twikira kuza konzugo zaJehova koJerusarema va ka gave nonzambo dawo, awo ngava tameka kuhara Rehoboyamu, hompa gorudi rwaJuda. Awo ngava dipaga nge, va tengure kwaRehoboyamu hompa gorudi rwaJuda.” 28 Konyima zokupura magano kovagavindunge vendi, hompa ta rugana nontana mbali dongorodo ntani ta tantere vantu asi: “Mwa ha lihepeka kuza koJerusarema. Karunga gweni ogu ga mu gusa moEgipite gogu.” 29 Makura ta tura ntana zimwe moBeteli, ano zimwe moDana. 30 Ano eyi kwa va ninkisire va zone, vantu ngava zi dogoro koDana va ka karere ntana ozo.

31 Jerobiyamu kwa dikire hena nonzugo dokukarera yikarunga yoyimpempa konondundu ntani kwa horowere vantu ava va dilire kutunda mezimo lyoVarevhi va kare vapristeli. 32 Jerobiyamu kwa tulisire po hena sipito mokwedi kwauntantatu mezuva 15, ngwendi sesi ngasi kara moJuda. Age kwa dikire hena sizambero moBeteli, apa nga zambere nonzambo konontana edi ga rugene ntani kwa horowere hena vapristeli va rugane mononzugo edi ga dikilire konondundu. 33 Age kwa tamekere kuzamba nonzambo posizambero esi ga rugene moBeteli mezuva 15, mokwedi kwauntantatu oku ga horowere mwene, ta tulisa po sipito soVaisraeli ntani kwa rondere kosizambero a ka gave nonzambo, yipo musi gwado gu tutumuke.